AWˬ LAWN 31
KʼA MUIˬ HKAWˇ 12 Uiˍ jaˇ mvuh jaˇ ve Gʼuiˬ sha Yaˬhoˉvaˬ
Chaw yaˇ venˇ baˆ leh suh ve htaꞈ gʼa ponˬ tuˬ Yaˬhoˉvaˬ hkʼaˬ hkʼe te ve le?
“Gʼuiˬ sha miˬ guiˬ yaˇ htaꞈ haꞈ jaˇ ve pa taw, yawˇ ve Yaˇ hpu tiˍ piˇ laˇ ve yoˬ.”—YOˇHANˬ 3:16.
A YEˇ UIˍ VE AWˬ LAWN
Ngaˬ hui venˇ baˆ htaꞈ tawˍ daꞈ tuˬ Yaˬhoˉvaˬ hkʼaˬ hkʼe ga laˇ ve, leh ngaˬ hui venˇ baˆ htaꞈ gʼa ponˬ leh, co co taiˍ taiˍ ve a shaꞈ gʼa tuˬ, Yaˬhoˉvaˬ awˬ hkʼaˇ hkʼaˬ hkʼe gu laˇ ve teˇ geh henˇ tuˬ yoˬ.
1-2. (a) Venˇ baˆ lehˬ aˬ htoꞈ ma le? Leh ngaˬ hui venˇ baˆ htaꞈ hkʼaˬ hkʼe te ponˬ gʼa tuˬ le? (“Kʼawꞈ kʼoˆ maˍ taˍ ve” hkʼaw nyi sheˍ.) (b) Shaw nyi kuiˬ Taꞈ yehˬ chi ve teˇ kʼoˆ hkʼaw chi ve teˇ lawn leh awˬ nu ve awˬ lawn kaꞈ ngaˬ hui aˬ htoꞈ ma awˬ lawn htaꞈ henˇ tuˬ le? (Chi ve teˇ kʼoˆ hkʼaw “Gʼaw ve chaw awˬ pon” htaꞈ kaꞈ nyi sheˍ.)
Yaˬhoˉvaˬ nawˬ htaꞈ hkʼaˬ hkʼe taw haꞈ ve shiˍ gaˇ˗aˬ laˇ? Shiˍ gʼa ve teˇ hkʼaˇ lehˬ, nawˬ venˇ baˆ leh suh ve htaꞈ gʼa ponˬ tuˬ, Yaˬhoˉvaˬ hkʼaˬ hkʼe ga laˇ ve awˬ hkʼaˇ chaˬ nyi sheˍ. Venˇ baˆ a lehˬ, canˇ paˍ hkʼe hpehꞈ ve yoˬ. Chi nawˬ hkʼaˇ nawˬ ponˬ gʼa tuˬ te maˇ gʼa. Teˇ nyi le le ngaˬ hui teˇ gʼaˇ le le venˇ baˆ te yaꞈ leh, venˇ baˆ lehˬ ngaˬ hui suh˗e tuˬ te laˇ ve yoˬ. (Roˉmaꞈ 5:12) Chi hkʼe hpehꞈ ve htawˇ, daꞈ ve awˬ lawn cawˬ ve yoˬ. Yaˬhoˉvaˬ ga laˇ tcuh ve kʼo, ngaˬ hui venˇ baˆ htaꞈ gʼaˇ tuˬ yoˬ.
2 Aˬ laˬ hkʼe 6,000 hkʼawꞈ htaˇ, chaw yaˇ venˇ baˆ htaꞈ tawˍ daꞈ tuˬ, Yaˬhoˉvaˬ ga laˇ ve yoˬ. Aˬ htoꞈ ma pa taw Yaˬhoˉvaˬ chi hkʼe te ve le? Awˬ lawn kʼo, yawˇ ngaˬ hui htaꞈ haꞈ jaˇ ve yoˬ. Gʼuiˬ sha chaw yaˇ htaꞈ tanˬ hpanˍ htaˇ kaꞈ haꞈ jaˇ ve pa taw, yawˇ hui venˇ baˆ htaꞈ tawˍ daꞈ gʼaˇ tuˬ, yawˇ laiˉ ceuˬ te ve yoˬ. Venˇ baˆ lehˬ ngaˬ hui suh˗e tuˬ te laˇ ve tehꞈ Yaˬhoˉvaˬ shiˍ ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ maˇ suh tcuh gaˇ leh co co taiˍ taiˍ teꞈ chehˇ tcuh gaˇ ve yoˬ. (Roˉmaꞈ 6:23) Awˬ ceuˬ chi ve Yaˬhoˉvaˬ nawˬ htaꞈ kaꞈ gʼa tcuh gaˇ ve yoˬ. Awˬ lawn chi ve hkʼaw na hkawˇ 3 maˬ htaꞈ teˇ geh henˇ tuˬ yoˬ. (1) Yaˬhoˉvaˬ venˇ baˆ yaˇ htaꞈ aˬ htoꞈ ma dawˇ law kuiˬ peꞈ laˇ ve le? (2) Liꞈ hpu awˬ co˗e htaˇ venˇ baˆ yaˇ Yaˬhoˉvaˬ nyi hkʼaˇ suh tuˬ hkʼaˬ hkʼe te piˇ ve le? (3) Yeˍsuˆ lehˬ chaw yaˇ venˇ baˆ leh suh ve htaꞈ ponˬ gʼa tuˬ hkʼaˬ hkʼe ga laˇ ve le?
VENˇ BAˆ YAˇ HTAꞈ YAˬHOˉVAˬ DAWˇ LAW KUIˬ Aˬ HTOꞈ MA PIˇ VE LE?
3. Chaw yaˇ awˉ lawˉ teˇ ca hkʼaˬ hkʼe te venˇ baˆ yaˇ hpehꞈ la ve le?
3 Yaˬhoˉvaˬ chaw yaˇ awˉ lawˉ teˇ ca hpanˍ htaˇ, yawˇ yawˇ hui htaꞈ ha lehˬ tcuh gaˇ ve yoˬ. Yaˬhoˉvaˬ yawˇ hui htaꞈ daꞈ jaˇ ve yehˬ cawˬ tcuh gaˇ ve, heuˆ daꞈ tcuh gaˇ ve, leh yawˇ hui htaꞈ daꞈ jaˇ ve kanˉ te tcuh gaˇ ve yoˬ. Gʼuiˬ sha lehˬ yawˇ hui ve awˬ yaˇ awˬ duˬ miˬ guiˬ chi hkʼoˆ lo hkʼa biˇ cawˬ tcuh gaˇ leh, miˬ guiˬ hkʼa peu˗eˬ hkʼoˆ lo daꞈ jaˇ ve Eˍdenˍ hko hkʼa shuˍ hpehꞈ tcuh gaˇ ve yoˬ. Yaˬhoˉvaˬ yawˇ hui htaꞈ sha jaˇ ve awˬ liˇ tawˇ hkawˇ teˇ hkawˇ ceh tiˉ piˇ leh, shaˍ tiꞈ piˇ sheˍ ve, awˬ liˇ tawˇ hkawˇ htaꞈ maˇ na yuˬ ve, maˇ heˆ leh Gʼuiˬ sha htaꞈ hpfuhˆ ve kʼo, yawˇ hui gʼa suh tuˬ yoˬ. Yaˬhoˉvaˬ htaꞈ maˇ haꞈ leh yawˇ hui htaꞈ kaꞈ maˇ haꞈ ve, mvuhˇ naw ma tcuh yaˇ ca beˬ la ve tehꞈ ngaˬ hui shiˍ ve yoˬ. Aˍdanˍ Leh Eˇvaꞈ beˬ ve chi htaꞈ tawˍ daꞈ maˇ gʼaˇ leh yawˇ hui htaꞈ haꞈ ve Awˬ pa Yaˬhoˉvaˬ htaꞈ gʼaˇ maˇ va leh venˇ baˆ te ve yoˬ. Awˬ leh meuˇ htaˇ, Yaˬhoˉvaˬ kʼoˆ taˍ ve awˬ ceuˬ hpehꞈ la ve yoˬ. Oˇ ve teˇ yanˇ htaꞈ tanˬ leh yawˇ hui te ve venˇ baˆ lehˬ, mawˇ leh suh˗e tuˬ te piˇ ve yoˬ.—Awˬ hkuiˉ puiˍ 1:28, 29; 2:8, 9, 16-18; 3:1-6, 17-19, 24; 5:5.
4. Aˬ htoꞈ ma te Yaˬhoˉvaˬ lehˬ venˇ baˆ htaꞈ nyi bawˬ leh ngaˬ hui venˇ baˆ htaꞈ tawˍ daꞈ gʼaˇ tuˬ ga laˇ gaˇ ve le? (Roˉmaꞈ 8:20, 21)
4 Aˬ htoꞈ ma te Yaˬhoˉvaˬ venˇ baˆ htaꞈ nyi bawˬ jaˇ ve ngaˬ hui na gʼa tuˬ, Awˬ lawn chi ve yawˇ Liꞈ hpu hkʼaw bvuhꞈ keu tcuh taˍ ve yoˬ. Venˇ baˆ lehˬ ngaˬ hui Yaˬhoˉvaˬ geh maˇ meuˆ daꞈ tuˬ te laˇ leh suh tuˬ kaꞈ te laˇ ve yoˬ. (Iˉsaˍyaˆ 59:2) Chi ve htaꞈ pa taw, Saˍtanˍ lehˬ Aˍdanˍ leh Eˇvaꞈ venˇ baˆ te tuˬ coˇ caˇ leh beˬ piˇ ve yoˬ. Leh Saˍtanˍ lehˬ chi teˇ hkui hkʼa gaˬ chaw yaˇ htaꞈ beˬ chehˇ sheˍ ve yoˬ. Saˍtanˍ lehˬ Eˍdenˍ hko hkʼaw peuˬ hkʼawꞈ nawˉ, yawˇ Yaˬhoˉvaˬ htaꞈ gʼaˇ tuˬ yoˬ tehꞈ dawˇ ve yoˬ. Yaꞈ hkʼaˇ, Yaˬhoˉvaˬ chaw yaˇ htaꞈ hkʼaˬ hkʼe taw haꞈ ve yawˇ maˇ shiˍ. Yaˬhoˉvaˬ yawˇ ve a loˍ Aˍdanˍ leh Eˇvaꞈ ve awˬ yaˇ awˬ duˬ htaꞈ caˉ daꞈ ve maˇ pa jaw. Yaˬhoˉvaˬ chaw yaˇ htaꞈ haꞈ jaˇ ve pa taw, dawˇ law kuiˬ laꞈ haˉ cawˬ tcuh ve yoˬ. (Roˉmaꞈ 8:20, 21 gʼaw sheˍ.) Yaˬhoˉvaˬ lehˬ Aˍdanˍ leh Eˇvaꞈ ve awˬ yaˇ awˬ duˬ teˇ hpaˍ hpaˍ yawˇ ve hkawˇ na yuˬ tuˬ yoˬ tehꞈ shiˍ ve yoˬ. Yaˬhoˉvaˬ lehˬ Awˬ pa leh hpanˍ shehˍ hpaˇ hpehꞈ ve pa taw, chaw yaˇ venˇ baˆ leh suh ve htaꞈ gʼa ponˬ tuˬ, yawˇ awˬ hkʼaˇ ca ve yoˬ. Leh yawˇ ve awˬ hkʼaˇ lehˬ aˬ htoꞈ ma le?
5. Yaˬhoˉvaˬ chaw yaˇ htaꞈ hkʼaˬ hkʼe htaˇ dawˇ law kuiˬ tanˬ cawˬ la piˇ ve le? (Awˬ hkuiˉ puiˍ 3:15)
5 Awˬ hkuiˉ puiˍ liꞈ 3:15 gʼaw sheˍ. Chaw yaˇ awˉ lawˉ teˇ ca venˇ baˆ te yaꞈ peuˬ hkʼawꞈ nawˉ, Yaˬhoˉvaˬ lehˬ chaw yaˇ htaꞈ dawˇ law kuiˬ laꞈ haˉ piˇ ve yoˬ. Yaˬhoˉvaˬ Saˍtanˍ htaꞈ te luˬ tuˬ yoˬ tehꞈ kʼoˆ piˇ ve yoˬ. Ka tiꞈ tawˇ hkawˇ chi ve awˬ tehˬ hpehꞈ la gʼa tuˬ, chaw teˇ gʼaˇ ve “awˬ yaˇ awˬ duˬ” Saˍtanˍ ve oˉ kʼoˍ htaꞈ naˆ nehˆ piˇ leh Eˍdenˍ hko hkʼaw hpehꞈ la ve awˬ ceuˬ hkʼa peu˗eˬ htaꞈ gu piˇ tuˬ yoˬ. (1 Yoˇhanˬ 3:8) Yaꞈ hkʼaˇ, ka tiꞈ tawˇ hkawˇ chi ve maˇ hpehꞈ la sheˍ htaˇ, awˬ yaˇ awˬ duˬ gʼa tuˬ gʼa hkanˍ leh Saˍtanˍ lehˬ awˬ yaˇ awˬ duˬ chi ve teˇ gʼaˇ htaꞈ suh˗e tuˬ te piˇ tuˬ yoˬ. Chi ve lehˬ Yaˬhoˉvaˬ nyi ma naˬ jaˇ tuˬ te piˇ tuˬ yoˬ. Chaw yaˇ maˇ maˇ venˇ baˆ leh suh ve htaꞈ gʼa ponˬ tuˬ ve pa taw, Yaˬhoˉvaˬ nyi ma chi hkʼe taw taw naˬ ve htawˇ awˬ hpfuhˇ hkʼawꞈ jaˇ ve tehꞈ shawˍ ve yoˬ.
LIꞈ HPU VE AWˬ CO˗E HTAˇ VENˇ BAˆ YAˇ YAˬHOˉVAˬ NYI HKʼAˇ SUH VE TE PIˇ TUˬ HKʼAˬ HKʼE TE VE LE?
6. Yaˬhoˉvaˬ ve kanˉ ka tiꞈ yeˬ ve hkʼaw te ve Aˍbeˍlaˆ leh Noˉaꞈ Yaˬhoˉvaˬ nyi hkʼaˇ suh tuˬ hkʼaˬ hkʼe te ve le?
6 Venˇ baˆ yaˇ hkʼaˬ hkʼe te leh Yaˬhoˉvaˬ geh meuˆ daꞈ gʼa tuˬ, yawˇ awˬ meu˗eˇ awˬ meu˗eˇ hkʼa tawˍ lehˆ mawˬ tuˬ te laˇ ve yoˬ. Eˍdenˍ hko hkʼaw hpfuhˆ peuˬ hkʼawꞈ nawˉ, Aˍdanˍ leh Eˇvaꞈ ve yaˇ Aˍbeˍlaˆ Yaˬhoˉvaˬ htaꞈ yonˍ ve tehꞈ hpeuꞈ maw laˇ ve yoˬ. Aˍbeˍlaˆ Yaˬhoˉvaˬ htaꞈ haꞈ jaˇ ve awˬ hkʼoˆ kaꞈ, yawˇ nyi hkʼaˇ suh tuˬ te piˇ gaˇ leh Yaˬhoˉvaˬ geh kaꞈ meuˆ daꞈ gaˇ ve yoˬ. Hkʼe te leh, yawˇ Yaˬhoˉvaˬ htaꞈ tuˉ tanˇ piˇ ve yoˬ. Aˍbeˍlaˆ lehˬ yawˬ hawˉ paˍ hpehꞈ ve pa taw, yawˬ ehˉ teˇ hkeh hkeh htaꞈ yuˬ leh yawˇ Yaˬhoˉvaˬ htaꞈ tuˉ tanˇ piˇ ve yoˬ. Chi Yaˬhoˉvaˬ hkʼaˬ hkʼe dawˇ ve le? Yawˇ lehˬ “Aˍbeˍlaˆ ve tanˇ tuˬ htaꞈ nyi ma cawˇ ve yoˬ.” (Awˬ hkuiˉ puiˍ 4:4) Yaˬhoˉvaˬ ve kanˉ ka tiꞈ yeˬ ve hkʼaw te ve chaw teˇ hpaˍ yawˇ htaꞈ haꞈ leh yawˇ ve hkawˇ na yuˬ ve pa taw, yawˇ hui ve tuˉ tanˇ tuˬ htaꞈ yawˇ nyi ma cawˇ ve yoˬ. Tawˇ pa haˉ te kʼo, Noˉaꞈ kaꞈ teˇ gʼaˇ hpehꞈ ve yoˬ. (Awˬ hkuiˉ puiˍ 8:20, 21) Yaˬhoˉvaˬ tuˉ tanˇ tuˬ chi teˇ hpaˍ htaꞈ nyi ma cawˇ ve lehˬ, venˇ baˆ yaˇ yawˇ nyi ma cawˇ tuˬ te piˇ gʼa leh, yawˇ geh meuˆ daꞈ gʼa ve tehꞈ hpeuꞈ maw laˇ ve yoˬ. b
7. Aˍbraˍhanˍ yawˇ ve yaˇ paˍ tuˉ tanˇ laˇ ve awˬ lawn ngaˬ hui shiˍ tuˬ aˬ htoꞈ ma te laˇ ve le?
7 Yaˬhoˉvaˬ ve kanˉ ka tiꞈ yeˬ ve hkʼaw te ve chaw 1 gʼaˇ lehˬ, Aˍbraˍhanˍ kaꞈ hpehꞈ ve yoˬ. Yawˇ yonˍ ve cawˬ jaˇ ve yoˬ. Teˇ nyi htaˇ Yaˬhoˉvaˬ lehˬ, Aˍbraˍhanˍ haˍ jaˇ ve kanˉ teˇ ceuˬ te laˇ tuˬ yawˇ lawˬ piˇ ve yoˬ. Chi ve lehˬ, Aˍbraˍhanˍ ve yaˇ paˍ 1 gʼaˇ tiˉ cawˬ ve Iˉcaˆ yawˇ htaꞈ tuˉ tanˇ laˇ tuˬ lawˬ piˇ ve yoˬ. Aˍbraˍhanˍ awˬ pon kʼo, chi ve lehˬ yawˇ nyi ma naˬ jaˇ tuˬ te piˇ ve yoˬ. Yaꞈ hkʼaˇ, yawˇ Gʼuiˬ sha kʼoˆ piˇ ve teˇ ceuˬ le le htaꞈ gʼaꞈ te gaˇ ve yoˬ. Yawˇ tuˉ tanˇ˗a te chehˇ htaˇ, Yaˬhoˉvaˬ yawˇ htaꞈ tawˍ piˇ ve yoˬ. Awˬ lawn chi ve lehˬ, awˬ gʼuˇ suhˍ hpawˇ ve htaꞈ caˉ daꞈ ve, Yaˬhoˉvaˬ a yeˇ uiˍ jaˇ ve awˬ ceuˬ htaꞈ te tuˬ yoˬ tehꞈ, ngaˬ hui shiˍ tuˬ te laˇ ve yoˬ. Yaˬhoˉvaˬ chaw yaˇ htaꞈ haꞈ jaˇ ve pa taw, yawˇ haꞈ jaˇ ve Yaˇ paˍ teˇ gʼaˇ tiˉ cawˬ ve htawˇ, chaw yaˇ awˬ pon tuˉ tanˇ laˇ ve yoˬ.—Awˬ hkuiˉ puiˍ 22:1-18.
8. Moˉseˍ ve awˬ liˇ tawˇ hkawˇ to nuˇ to shaˆ tuˉ tanˇ ve lehˬ, aˬ htoꞈ ma htaꞈ dawˇ mawˬ tuˬ te laˇ ve le? (Oˉ kʼoˍ pui ve 4:27-29; 17:11)
8 Laiˉ ha hkʼawꞈ peuˬ hkʼawꞈ nawˉ, Yaˬhoˉvaˬ lehˬ Iˉsaˍreˍlaˆ chaw htaꞈ awˬ liˇ tawˇ hkawˇ piˇ ve yoˬ. Awˬ liˇ tawˇ hkawˇ chi ve hkʼaw kʼoˆ ve, yawˇ hui venˇ baˆ pehnˇ laˇ ve htaꞈ gʼa tuˬ, to nuˇ to shaˆ gʼa tuˉ tanˇ ve yoˬ. (Oˉ kʼoˍ pui ve 4:27-29; 17:11 gʼaw sheˍ.) Tuˉ tanˇ tuˬ chi hkʼe ve uiˍ jaˇ ve tuˉ tanˇ tuˬ teˇ maˬ htaꞈ dawˇ mawˬ tuˬ te laˇ ve yoˬ. Chi ve lehˬ chaw yaˇ venˇ baˆ htaꞈ co co gʼa ponˬ tuˬ ga laˇ gʼa ve yoˬ. Yaˬhoˉvaˬ ve tcuh kaˍ paˍ htaꞈ dawˇ pawnˍ piˇ leh kʼoˆ maˍ laˇ tcuh ve, ka tiꞈ te taˍ ve awˬ yaˇ awˬ duˬ chi ve lehˬ, Gʼuiˬ sha ve Yaˇ hpehꞈ leh tuꞈ jaˇ hkanˍ jaˇ ve hkʼaw gʼa suh˗e ve yoˬ. Yawˇ lehˬ yawˬ ehˉ tuˉ tanˇ tuˬ tiˇ pehˍ ve hkʼe tiˇ pehˍ piˇ ve yoˬ. (Iˉsaˍyaˆ 53:1-12) Chi ve htaꞈ dawˇ nyi sheˍ. Chaw yaˇ teˇ gʼaˇ le le htaꞈ ga ponˬ piˇ tuˬ Yaˬhoˉvaˬ lehˬ, yawˇ haꞈ jaˇ ve Yaˇ paˍ htaꞈ tuˉ tanˇ laˇ tcuh ve yoˬ. Hkʼe te leh, nawˬ kaꞈ venˇ baˆ leh suh ve htaꞈ gʼa ponˬ tuˬ yoˬ.
YEˍSUˆ CHAW YAˇ HTAꞈ HKʼAˬ HKʼE GA LAˇ VE LE?
9. Baˆtiˆsaˬ piˇ paˍ Yoˇhanˬ Yeˍsuˆ htaꞈ caˉ daꞈ ve aˬ htoꞈ ma kʼoˆ ve le? (Heˍbrehˇ 9:22; 10:1-4, 12)
9 Awˉ lawˉ peuˇ teˇ co˗e htaˇ, Baˆtiˆsaˬ piˇ paˍ Yoˇhanˬ Naˍzaˍrehˆ chaw Yeˍsuˆ htaꞈ kʼoˆ ve, “miˬ guiˬ yaˇ ve venˇ baˆ htaꞈ yuˬ baˬ shehˍ hpaˇ, Gʼuiˬ sha ve Yawˬ ehˉ htaꞈ nyi˗o”. (Yoˇhanˬ 1:29) Yoˇhanˬ htaꞈ dawˇ pawnˍ piˇ leh beˆ maˍ laˇ ve, Yeˍsuˆ lehˬ tcuh kaˍ paˍ ve tawˇ hkawˇ kʼoˆ maw jaˇ˗oˬ ve awˬ yaˇ awˬ duˬ hpehꞈ ve yoˬ. Yawˇ ve awˬ to htaiˍ hkʼawꞈ laˇ tuˬ tanˇ laˇ ve yoˬ. Awˬ leh meuˇ htaˇ, Yaˬhoˉvaˬ ka tiꞈ te taˍ ve awˬ yaˇ awˬ duˬ htaꞈ ca mawˬ˗oˬ. Yawˇ lehˬ chaw yaˇ co co taiˍ taiˍ venˇ baˆ gʼa ponˬ tuˬ ga laˇ shehˍ hpaˇ hpehꞈ ve yoˬ.—Heˍbrehˇ 9:22; 10:1-4, 12 gʼaw sheˍ.
10. Yeˍsuˆ venˇ baˆ yaˇ hui htaꞈ “kuˬ yuˬ tuˬ” hkʼaˬ hkʼe hpeuꞈ maw laˇ ve le?
10 A shu yawˇ awˬ to venˇ baˆ yaˇ hpehꞈ ve tehꞈ, haꞈ yuˬ ve chaw htaꞈ Yeˍsuˆ a yeˇ yuˬ ve tehꞈ hpeuꞈ maw laˇ ve yoˬ. Leh chaw chi teˇ hpaˍ yawˇ ve awˬ laꞈ gʼawˇ hpehꞈ la tuˬ jehˬ piˇ ve yoˬ. Venˇ baˆ htaꞈ pa taw, chaw yaˇ teˇ gʼaˇ le le tuꞈ ve hkanˍ ve leh naˬ tuˬ te piˇ ve tehꞈ yawˇ shiˍ ve yoˬ. Hkʼe te leh, venˇ baˆ yaˇ hpehꞈ ve tehꞈ haꞈ yuˬ ve chaw htaꞈ yawˇ ga piˇ ve yoˬ. Yawˇ tawˇ pa haˉ yehˇ leh kʼoˆ maˍ laˇ ve, “chehˇ sha ve chaw hui naˆ tsuhˇ shehˍ hpaˇ htaꞈ maˇ loˍ.” Leh yawˇ kʼawꞈ kʼoˆ sheˍ ve, “hteˇ ve cawˇ ve chaw hui htaꞈ kuˬ yuˬ tuˬ ngaˬ laˬ ve maˇ heˆ. Venˇ baˆ yaˇ hui htaꞈ kuˬ yuˬ tuˬ ngaˬ laˬ ve yoˬ.” (Maꞈhtehˍ 9:12, 13) Yeˍsuˆ yawˇ kʼoˆ ve hkʼe te ve yoˬ. Yaˇ miˇ teˇ gʼaˇ ve mehˆ gʼuiˬ Yeˍsuˆ ve hkui sheh htaꞈ jaˆ pfuhˍ leh, yawˇ ve uˉ hkeh mvuh yuˬ shiˆ ve yo. (Luˉkaꞈ 7:37-50) Saˍmaˍriˆ chaw yaˇ miˇ teˇ gʼaˇ pehꞈ ve zuhˆ ve htaꞈ te ve, nanˬ bawˍ paˇ lo iˉ kaˆ ca hkʼo la ve htaꞈ Yeˍsuˆ a yeˇ uiˍ jaˇ ve teˇ lawn maˍ piˇ ve yoˬ. (Yoˇhanˬ 4:7, 17-19, 25, 26) Suh ve htaꞈ ponˬ piˇ tuˬ Yaˬhoˉvaˬ Yeˍsuˆ htaꞈ kanˇ paˆ piˇ ve yoˬ. Hawˉ hkʼaˆ, yaˇ miˇ, yaˇ ehˉ, leh chaw mawˇ htawˇ maˇ kʼoˆ, suh˗oˬ ve htaꞈ Yeˍsuˆ kʼawꞈ teꞈ tu la piˇ tcuh tuˬ yoˬ.—Maꞈhtehˍ 11:5.
11. Aˬ htoꞈ ma te venˇ baˆ yaˇ Yeˍsuˆ geh laˬ gaˇ ve le?
11 Venˇ baˆ yaˇ hui htawˇ, Yeˍsuˆ geh laˬ gaˇ ve anˇ tuˬ maˇ loˍ. Awˬ lawn kʼo, Yeˍsuˆ yawˇ hui htaꞈ ha kʼaˉ jaˇ ve pa taw, yawˇ hui yawˇ geh tawˇ yaw daꞈ htaˇ nyi ma sha jaˇ ve yoˬ. (Luˉkaꞈ 15:1, 2) Yeˍsuˆ htaꞈ yonˍ ve tehꞈ hpeuꞈ maw piˇ ve chaw htaꞈ yawˇ chiˇ mvuh piˇ leh, haꞈ pehnˇ ve tehꞈ hpeuꞈ maw piˇ ve yoˬ. (Luˉkaꞈ 19:1-10) Yeˍsuˆ ve Awˬ pa Yaˬhoˉvaˬ Gʼuiˬ sha lehˬ, hkʼaˬ hkʼe taw ha kʼaˉ puiˉ jaˇ ve chaw yaˇ dawˇ mawˬ tuˬ yawˇ te piˇ ve yoˬ. (Yoˇhanˬ 14:9) Yaˬhoˉvaˬ chaw yaˇ htaꞈ haꞈ jaˇ leh, chaw yaˇ venˇ baˆ htaꞈ tawˍ daꞈ gʼaˇ tuˬ yawˇ ga laˇ gaˇ jaˇ ve tehꞈ, Yeˍsuˆ kʼoˆ ve leh te ve hkʼaw hpeuꞈ maw piˇ ve yoˬ. Venˇ baˆ yaˇ te hkʼaˇ dawˇ hkʼaˇ pa leh Yeˍsuˆ awˬ hkʼaˇ suh gʼaꞈ kʼai gaˇ tuˬ yawˇ te piˇ ve yoˬ.—Luˉkaꞈ 5:27, 28.
12. Yeˍsuˆ yawˇ suh ve htaꞈ caˉ daꞈ ve aˬ htoꞈ ma maˍ laˇ ve le?
12 Maˇ maw ve awˬ yanˇ Yeˍsuˆ aˬ htoꞈ ma gʼa hpuˇ tuˬ yawˇ shiˍ ve yoˬ. Yawˇ awˬ laꞈ gʼawˇ htaꞈ laiˉ pawˆ kʼoˆ piˇ ve, yawˇ htaꞈ shu hpfuhˆ leh suhˆ hkuiˉ daw hkʼoˆ lo tuꞈ jaˇ hkanˍ jaˇ ve hkʼaw tiˇ pehˍ laˇ tuˬ yoˬ. (Maꞈhtehˍ 17:22; 20:18, 19) Baˆtiˆsaˬ piˇ paˍ Yoˇhanˬ leh tcuh kaˍ paˍ hui awˉ lawˉ htaˇ kaꞈ kʼoˆ taˍ ve hkʼa shuˍ, Yeˍsuˆ yawˇ suh˗e ve lehˬ chaw yaˇ ve venˇ baˆ htaꞈ ponˬ piˇ ve tehꞈ shiˍ ve yoˬ. Yawˇ suh˗e peuˬ hkʼawꞈ nawˉ, “chaw hkʼa peu˗eˬ htaꞈ ngaˬ geh lo ngaˬ gʼawˬ veu laˇ tuˬ yoˬ” tehꞈ yawˇ kʼoˆ piˇ ve yoˬ. (Yoˇhanˬ 12:32) Venˇ baˆ yaˇ Yeˍsuˆ htaꞈ yonˍ leh yawˇ ve hkawˇ na yuˬ ve kʼo, Yaˬhoˉvaˬ nyi ma cawˇ tuˬ te piˇ gʼa ve yoˬ. Yawˇ hui chi hkʼe te ve kʼo, awˬ leh meuˇ htaˇ yawˇ hui “venˇ baˆ awˬ hkʼaw lo ponˬ tawˆ la peuˬ.” (Roˉmaꞈ 6:14, 18, 22; Yoˇhanˬ 8:32) Chi htaꞈ pa taw, Yeˍsuˆ lehˬ ngaˬ hui teˇ gʼaˇ le le htaꞈ ga laˇ tuˬ yawˇ haꞈ hanˉ ve hkʼaw a shaꞈ tanˇ laˇ ve yoˬ.—Yoˇhanˬ 10:17, 18.
13. Yeˍsuˆ hkʼaˬ hkʼe te suh˗e ve le? Leh yawˇ suh˗e ve Yaˬhoˉvaˬ htaꞈ caˉ daꞈ ve ngaˬ hui htaꞈ hkʼaˬ hkʼe maˍ laˇ ve le? (Awˬ han htaꞈ nyi sheˍ.)
13 Yeˍsuˆ htaꞈ shu hpfuhˆ piˇ ve, hpeh tiˍ piˇ ve, deˇ piˇ ve, leh she pfuhˍ piˇ ve yoˬ. Yeˍsuˆ maˇ te yaꞈ ve htawˇ, te yaꞈ ve tehꞈ suhˉ jehˬ cheˆ piˇ leh ciˍ yanˍ piˇ ve yoˬ. Maꞈ yaˇ Yeˍsuˆ htaꞈ tiˇ pehˍ piˇ kuiˬ lo shiˍ kʼai leh suhˆ hkuiˉ daw hkʼoˆ lo htaꞈ pehˍ piˇ ve yoˬ. Yeˍsuˆ chi ve hkʼa peu˗eˬ htaꞈ ka tiꞈ yeˬ ve hkʼaw yeunˇ hkanˍ ve yoˬ. Yeˍsuˆ aꞈ kehˉ nyi ma naˬ jaˇ ve teˇ gʼaˇ cawˬ ve lehˬ, Yaˬhoˉvaˬ Gʼuiˬ sha hpehꞈ ve yoˬ. Yaˬhoˉvaˬ kanˇ paˆ uiˍ jaˇ leh Yeˍsuˆ chi hkʼe taw taw maˇ gʼa tuꞈ hkanˍ tuˬ ga piˇ gʼa ve htawˇ, yawˇ yeunˇ hkanˍ ve hkʼaw maˇ ga piˇ. Aˬ htoꞈ ma pa taw le? Aˬ htoꞈ ma te yaˇ htaꞈ haꞈ jaˇ ve, Awˬ pa chi hkʼe taw taw yeunˇ hkanˍ ve le? Hkʼawꞈ laˇ hkawˇ lehˬ, Yaˬhoˉvaˬ ngaˬ hui htaꞈ haꞈ jaˇ ve pa taw yoˬ. Yeˍsuˆ kʼoˆ ve, “Gʼuiˬ sha miˬ guiˬ yaˇ htaꞈ haꞈ jaˇ ve pa taw, yawˇ ve Yaˇ hpu tiˍ piˇ laˇ ve yoˬ. Hkʼe te leh, Yaˇ hpu htaꞈ hkʼa yonˍ ve chaw hkʼa peu˗eˬ maˇ gʼa luˬ maˇ gʼa sheˆ ve awˬ hkʼoˆ kaꞈ, co tiꞈ ha tiꞈ htaꞈ gʼa ve yoˬ.”—Yoˇhanˬ 3:16.
Ngaˬ hui venˇ baˆ leh suh ve htaꞈ gʼa pon tuˬ, Yaˬhoˉvaˬ Yeˍsuˆ htaꞈ shu tiˇ pehˬ piˇ tcuh htaˇ, yawˇ nyi ma naˬ jaˇ ve (Awˬ tawn 13 nyi sheˍ)
14. Yeˍsuˆ ve a shaꞈ tanˇ laˇ ve htaꞈ nawˬ aˬ htoꞈ ma awˬ bon gʼa ve le?
14 Yeˍsuˆ suh˗e ve hkʼa tawˍ lehˆ hpeuꞈ maw laˇ ve lehˬ, Aˍdanˍ leh Eˇvaꞈ ve awˬ yaˇ awˬ duˬ htaꞈ Yaˬhoˉvaˬ haꞈ jaˇ ve yoˬ. Chi ve Yaˬhoˉvaˬ nawˬ htaꞈ haꞈ jaˇ ve tehꞈ hpeuꞈ maw laˇ ve yoˬ. Yaˬhoˉvaˬ yawˇ haꞈ jaˇ ve Yaˇ paˍ tanˇ laˇ leh nawˬ venˇ baˆ leh suh ve htaꞈ gʼa ponˬ tuˬ, yawˇ naˬ jaˇ ve htaꞈ teˇ ceuˬ˗ehˬ kaꞈ tehˆ maˇ gʼa. (1 Yoˇhanˬ 4:9, 10) Awˬ tehˬ yoˬ, ngaˬ hui teˇ gʼaˇ le le venˇ baˆ htaꞈ tawˍ daꞈ gʼaˇ tuˬ Yaˬhoˉvaˬ ga laˇ gaˇ ve yoˬ.
15. Yaˬhoˉvaˬ geh gʼa ve laꞈ shawnˍ htaiˍ hkʼawꞈ ve htaꞈ ngaˬ hui awˬ bon gʼa tuˬ hkʼaˬ hkʼe gʼa te cawˇ ve le?
15 Yaˬhoˉvaˬ geh gʼa ve laꞈ shawnˍ lehˬ, ngaˬ hui venˇ baˆ htaꞈ gʼa ponˬ tuˬ Yeˍsuˆ ve a shaꞈ htaiˍ hkʼawꞈ tcuh laˇ ve yoˬ. Yaꞈ hkʼaˇ, Yaˬhoˉvaˬ venˇ baˆ hpehˇ laˇ ve htaꞈ ngaˬ hui gʼa tuˬ, ngaˬ hui teˇ ceuˬ ceuˬ gʼa te cawˇ ve yoˬ. Chi ve lehˬ aˬ htoꞈ ma le? Baˆtiˆsaˬ piˇ paˍ Yoˇhanˬ leh Yeˍsuˆ hkʼawꞈ laˇ ve, “mvuhˇ naw ma mvuhˇ miˬ gaˬ la paˇ neˇ ve pa taw, venˇ baˆ htaꞈ dawˇ hpfuhˆ loˬ.” (Maꞈhtehˍ 3:1, 2; 4:17) Chi htaꞈ pa taw, ngaˬ hui venˇ baˆ htaꞈ tawˍ daꞈ gʼaˇ leh, Yaˬhoˉvaˬ geh meuˆ daꞈ gaˇ ve kʼo, venˇ baˆ dawˇ hpfuhˆ ve lehˬ a yeˇ uiˍ jaˇ ve yoˬ. Yaꞈ hkʼaˇ, venˇ baˆ dawˇ hpfuhˆ ve aˬ htoꞈ ma htaꞈ kʼoˆ gaˇ ve le? Leh venˇ baˆ dawˇ hpfuhˆ ve lehˬ ngaˬ hui venˇ baˆ htaꞈ tawˍ daꞈ gʼaˇ tuˬ hkʼaˬ hkʼe ga laˇ gʼa ve le? Gʼuˇ suhˍ teˇ lawn hkʼaw teˇ geh henˇ tuˬ yoˬ.
KʼA MUIˬ HKAWˇ 18 Htaiˍ hkʼawꞈ ve gu teh laˇ ve
a KʼAWꞈ KʼOˆ MAˍ TAˍ VE: Liꞈ hpu hkʼaw “venˇ baˆ” kʼoˆ ve tawˇ hkawˇ te yaꞈ ve htaꞈ kʼoˆ gaˇ ve yoˬ. Chi ve lehˬ Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te ve yoˬ. Leh “venˇ baˆ” kʼoˆ gaˇ ve lehˬ, maˇ biˇ ve maˇ heˆ leh Aˍdanˍ geh gʼa ve awˬ shinˉ awˬ ka lehˬ venˇ baˆ hpehꞈ ve yoˬ. Venˇ baˆ kʼoˆ ve chi ve lehˬ, ngaˬ hui teˇ gʼaˇ le le suh˗e tuˬ te laˇ ve yoˬ.
b Hkriꞈ yaˇ ve awˬ co˗e htaˇ, Yaˬhoˉvaˬ ve kanˉ ka tiꞈ yeˬ ve hkʼaw te ve chaw tuˉ tanˇ ve htaꞈ yawˇ haꞈ yuˬ ve yoˬ. Chaw yaˇ teˇ gʼaˇ le le venˇ baˆ leh suh ve htaꞈ co co ponˬ gʼa tuˬ, awˬ gʼuˇ suhˍ hpawˇ Yeˍsuˆ ve a shaꞈ gʼa tuˉ tanˇ laˇ tuˬ yoˬ tehꞈ Yaˬhoˉvaˬ shiˍ ve yoˬ.—Roˉmaꞈ 3:25.
