AWˬ LAWN 35
KʼA MUIˬ HKAWˇ 123 Ka tiꞈ yeˬ ve hkʼaw Gʼuiˬ sha awˬ hawˉ lo chehˇ ve
Nyi haꞈ shaˉ paˍ Hkriꞈ yaˇ awˬ moˍ hkʼaw tawˆ cheˆ piˇ taˍ ve chaw htaꞈ hkʼaˬ hkʼe ga piˇ gʼa tuˬ le?
“Venˇ baˆ htaꞈ dawˇ hpfuhˆ tuˬ maˇ loˍ ve hteˇ ve cawˇ ve chaw 99 gʼaˇ htaꞈ pa taw, mvuhˇ naw ma hkʼoˆ lo ha lehˬ tuˬ cawˬ ve aꞈ kehˉ, venˇ baˆ yaˇ teˇ gʼaˇ, venˇ baˆ htaꞈ dawˇ hpfuhˆ ve pa taw, mvuhˇ naw ma hkʼoˆ lo ha lehˬ tuˬ leuˉ leh cawˬ maˇ ve yoˬ.”—LUˉKAꞈ 15:7.
A YEˇ UIˍ VE AWˬ LAWN
Aˬ htoꞈ ma te chaw teˇ hpaˍ htaꞈ Hkriꞈ yaˇ awˬ moˍ hkʼaw tawˆ cheˆ piˇ ve le, leh chaw oˇ ve teˇ hpaˍ venˇ baˆ dawˇ hpfuhˆ leh Yaˬhoˉvaˬ geh kʼawꞈ meuˆ daꞈ tuˬ, nyi haꞈ shaˉ paˍ hkʼaˬ hkʼe ga piˇ gʼa ve le?
1-2. (a) Venˇ baˆ uiˍ jaˇ ve htaꞈ te leh maˇ dawˇ hpfuhˆ ve chaw htaꞈ Yaˬhoˉvaˬ hkʼaˬ hkʼe dawˇ ve le? (b) Yaˬhoˉvaˬ lehˬ te yaꞈ ve chaw htaꞈ aˬ htoꞈ ma te tcuh gaˇ ve le?
Yaˬhoˉvaˬ lehˬ teˇ ceuˬ le le htaꞈ haꞈ yuˬ ve maˇ heˆ. Yawˇ lehˬ haiˬ ve awˬ ceuˬ te ve htaꞈ nyi bawˬ ve yoˬ. (Chiˇ mvuh ve 5:4-6) Yaˬhoˉvaˬ lehˬ chaw yaˇ hkʼa biˇ te gʼa tuˬ yawˇ maˇ dawˇ law ve htawˇ, Liꞈ hpu hkʼaw cawˬ ve cawˇ ve awˬ liˇ awˇ hkʼaˇ htaꞈ ngaˬ hui na yuˬ tuˬ, yawˇ heuˆ gaˇ ve yoˬ. (Chiˇ mvuh ve 130:3, 4) Chi htaꞈ pa taw, “Gʼuiˬ sha htaꞈ maˇ yawˆ maˇ yan ve chaw chi teˇ hpaˍ lehˬ, haiˬ ve leh chaꞈ chiˆ ve laiˉ ceuˬ te tuˬ awˬ pon, Gʼuiˬ sha ve awˬ bon htaꞈ yuˬ hpfuhˆ piˇ ve yoˬ.” Chi hkʼe ve htaꞈ Yaˬhoˉvaˬ maˇ haꞈ yuˬ ve yoˬ. (Yuˇdaꞈ 4) Awˬ tehˬ kʼo, Liꞈ hpu hkʼaw kʼoˆ ve, “Gʼuiˬ sha htaꞈ maˇ yawˆ maˇ yan ve chaw teˇ hpaˍ htaꞈ” Aˍmaˍgeˍdonˍ awˬ nyi hkʼaw te luˬ piˇ tuˬ yoˬ.—2 Peˍtruˆ 3:7; Hpeuꞈ maˍ ve 16:16.
2 Yaꞈ hkʼaˇ, Yaˬhoˉvaˬ lehˬ chaw teˇ gʼaˇ le le htaꞈ maˇ te luˬ piˇ gaˇ ve yoˬ. Liꞈ chi teˇ kʼoˆ laiˉ lawn cawˬ ve hkʼaw gʼa henˇ˗oˬ ve hkʼe, Liꞈ hpu hkʼaw hkʼa tawˍ lehˆ kʼoˆ laˇ ve, Gʼuiˬ sha lehˬ “chaw hkʼa peu˗eˬ venˇ baˆ htaꞈ dawˇ hpfuhˆ” tcuh gaˇ ve yoˬ. (2 Peˍtruˆ 3:9) Nyi haꞈ shaˉ paˍ Yaˬhoˉvaˬ htaꞈ henˇ yuˬ ve lehˬ, te yaꞈ ve chaw te hkʼaˇ dawˇ hkʼaˇ pa tuˬ ga piˇ leh Yaˬhoˉvaˬ geh kʼawꞈ meuˆ daꞈ tuˬ kaꞈ ga piˇ ve yoˬ. Chi hkʼe te ve htawˇ, teˇ pawˆ pawˆ kʼo chaw teˇ hpaˍ venˇ baˆ maˇ dawˇ hpfuhˆ ve yoˬ. (Iˉsaˍyaˆ 6:9) Chaw teˇ hpaˍ kʼo, nyi haꞈ shaˉ paˍ yawˇ htaꞈ laiˉ pawˆ ga piˇ˗oˬ ve htawˇ, te yaꞈ sheˍ ve yoˬ. Chi hkʼe hpehꞈ ve kʼo, nyi haꞈ shaˉ paˍ hkʼaˬ hkʼe te tuˬ le?
“HAIˬ VE CHAW Oˇ VE TEˇ GʼAˇ HTAꞈ NAWˬ HUI AWˬ HKʼAW LO GʼAꞈ KʼOˬ LOˬ”
3. (a) Liꞈ hpu hkʼaw venˇ baˆ maˇ dawˇ hpfuhˆ ve chaw htaꞈ hkʼaˬ hkʼe te piˇ tuˬ kʼoˆ laˇ ve le? (b) Chaw chi teˇ gʼaˇ venˇ baˆ maˇ dawˇ hpfuhˆ leh Hkriꞈ yaˇ awˬ moˍ hkʼaw tawˆ cheˆ piˇ tuˬ te ve tehꞈ ngaˬ hui hkʼaˬ hkʼe kʼoˆ gʼa ve le?
3 Te yaꞈ ve chaw venˇ baˆ maˇ dawˇ hpfuhˆ ve kʼo, nyi haꞈ shaˉ paˍ kaꞈ 1 Kawˇrenˍhtuˆ liꞈ 5:13 hkʼaw kʼoˆ taˍ ve hkʼe gʼa gʼaꞈ te ve yoˬ. Choˬ kaˬ lo kʼoˆ ve, “haiˬ ve chaw oˇ ve teˇ gʼaˇ htaꞈ nawˬ hui awˬ hkʼaw lo gʼaꞈ kʼoˬ loˬ.” Te yaꞈ ve chaw yawˇ venˇ baˆ maˇ dawˇ hpfuhˆ leh te yaꞈ sheˍ ve kʼo, Hkriꞈ yaˇ awˬ moˍ hkʼaw yawˇ htaꞈ tawˆ cheˆ laˇ tuˬ yoˬ tehꞈ shiˍ ve yoˬ. Chi ve lehˬ, yawˇ Hkriꞈ yaˇ awˬ moˍ hkʼaw tawˆ cheˆ piˇ tuˬ te ve htaꞈ shuˍ ve yoˬ. Chi htaꞈ pa taw, yawˇ awˬ yawˇ hkʼaˬ hkʼe sheˍ ve kʼo, oˇ hkʼe gʼa gʼeuꞈ tuˬ yoˬ. (Gaˍlaˍtiˆ 6:7) Aˬ htoꞈ ma pa taw, ngaˬ hui chi hkʼe kʼoˆ gʼa ve le? Nyi haꞈ shaˉ paˍ yawˇ htaꞈ laiˉ pawˆ ga piˇ˗oˬ ve htawˇ, yawˇ ve te hkʼaˇ dawˇ hkʼaˇ maˇ pa ve pa taw yoˬ. (2 Jawˇmawˇ 17:12-15) Yawˇ te ve awˬ ceuˬ lehˬ, Yaˬhoˉvaˬ ve awˬ liˇ awˬ hkʼaˇ htaꞈ maˇ na yuˬ ve tehꞈ hpeuꞈ maw laˇ ve yoˬ.—Bon maˍ ve 30:19, 20.
4. Te yaꞈ leh venˇ baˆ maˇ dawˇ hpfuhˆ ve chaw htaꞈ Hkriꞈ yaˇ awˬ moˍ hkʼaw tawˆ cheˆ piˇ htaˇ, aˬ htoꞈ ma te shiˍ laˇ kaˇ laˇ cawˇ ve le?
4 Te yaꞈ leh venˇ baˆ maˇ dawˇ hpfuhˆ ve chaw htaꞈ Hkriꞈ yaˇ awˬ moˍ hkʼaw tawˆ cheˆ piˇ htaˇ, yawˇ Yaˬhoˉvaˬ ve Shaˉhkiˆhkanˍ ve chaw maˇ kʼawꞈ hpehꞈ˗o ve tehꞈ Hkriꞈ yaˇ awˬ moˍ hkʼaw shiˍ laˇ kaˇ laˇ tuˬ yoˬ. Chi hkʼe shiˍ laˇ kaˇ laˇ ve lehˬ, te yaꞈ ve chaw htaꞈ yaꞈ taw tuˬ te piˇ ve maˇ heˆ. Yaꞈ hkʼaˇ, Hkriꞈ yaˇ awˬ moˍ hkʼaw ve awˬ viˉ awˬ nyi Liꞈ hpu hkʼaw beˆ maˍ laˇ taˍ ve hkʼe, chaw oˇ ve teˇ gʼaˇ geh “awˬ chawˇ maˇ gʼa te” ve yoˬ. Leh “chi hkʼe ve chaw geh awˍ kaꞈ taˇ caˇ.” (1 Kawˇrenˍhtuˆ 5:9-11) Chi lehˬ beˆ maˍ laˇ hkawˇ daꞈ jaˇ ve yoˬ. Awˬ lawn kʼo, Pawˇluꞈ kʼoˆ ve, “diˇ a ciˉ ceh tiˉ hkaoˍ monˇ awˬ tcuhˇ teˇ diˬ hkʼa peu˗eˬ htaꞈ ciˇ la piˇ puiˉ” ve yoˬ. (1 Kawˇrenˍhtuˆ 5:6) Te yaꞈ leh venˇ baˆ maˇ dawˇ hpfuhˆ ve chaw, awˬ nu ve awˬ viˉ awˬ nyi Yaˬhoˉvaˬ ve hkawˇ na yuˬ tuˬ maˇ loˍ tehꞈ dawˇ tuˬ te piˇ ve yoˬ.—Tawˇ naˉ ve 13:20; 1 Kawˇrenˍhtuˆ 15:33.
5. Hkriꞈ yaˇ awˬ moˍ hkʼaw tawˆ cheˆ piˇ ve chaw htaꞈ ngaˬ hui hkʼaˬ hkʼe nyi cawˇ ve le? Leh aˬ htoꞈ ma pa taw le?
5 Hkriꞈ yaˇ awˬ moˍ hkʼaw tawˆ cheˆ piˇ ve chaw htaꞈ ngaˬ hui hkʼaˬ hkʼe nyi cawˇ ve le? Ngaˬ hui yawˇ geh awˬ chawˇ maˇ te ve htawˇ, yawˇ mehˉ kʼai taˍ ve yawˬ hkʼe hpehꞈ ve tehꞈ, ngaˬ hui shawˍ leh yawˇ kʼawꞈ kʼawꞈ la gʼa tuˬ awˬ hkʼaˇ cawˬ ve yoˬ. Yawˇ Yaˬhoˉvaˬ htaꞈ awˬ to chiˇ aꞈ piˇ jaw ve tehꞈ ngaˬ hui tawnˇ taˍ cawˇ ve yoˬ. Chi teˇ hkui ceh tiˉ yawˇ awˬ to chiˇ aꞈ piˇ taˍ ve hkʼe maˇ gʼaꞈ te ve yoˬ. Hkʼe te leh, chi yawˇ awˬ pon kawˆ tuˬ cawˬ ve yoˬ. (Yeˍsaˍkeˍlaˆ 18:31) Chi hkʼe hpehꞈ ve htawˇ, Yaˬhoˉvaˬ ha kʼaˉ puiˉ ve tehꞈ hpeuꞈ maw laˇ sheˍ ve awˬ yanˇ htaˇ, yawˇ Hkriꞈ yaˇ awˬ moˍ hkʼaw kʼawꞈ la gʼa tuˬ dawˇ law gʼa sheˍ ve yoˬ. Te yaꞈ chaw Hkriꞈ yaˇ awˬ moˍ hkʼaw tawˆ cheˆ piˇ˗oˬ ve htawˇ, yawˇ kʼawꞈ la gʼa tuˬ sheˍ ve tehꞈ nyi haꞈ shaˉ paˍ dawˇ law taˍ ve, hkʼaˬ hkʼe hpeuꞈ maw piˇ cawˇ ve le?
HKRIꞈ YAˇ AWˬ MOˍ HKʼAW TAWˆ CHEˆ PIˇ VE CHAW HTAꞈ NYI HAꞈ SHAˉ PAˍ HKʼAˬ HKʼE GA PIˇ GʼA TUˬ LE?
6. Hkriꞈ yaˇ awˬ moˍ hkʼaw tawˆ cheˆ piˇ ve chaw htaꞈ nyi haꞈ shaˉ paˍ hkʼaˬ hkʼe ga piˇ gʼa ve le?
6 Hkriꞈ yaˇ awˬ moˍ hkʼaw tawˆ cheˆ piˇ ve chaw lehˬ, dawˇ law kuiˬ maˇ cawˬ˗o leh Yaˬhoˉvaˬ geh kʼawꞈ la tuˬ yawˇ hkʼaˇ yawˇ awˬ hkʼaˇ gʼa ca ve laˇ? Maˇ heˆ. Nyi haꞈ shaˉ paˍ awˬ moˍ hkʼaw suhˉ jehˬ piˇ tuˬ leuˆ teh taˍ ve chaw lehˬ, te yaꞈ leh venˇ baˆ maˇ dawˇ hpfuhˆ ve chaw htaꞈ Hkriꞈ yaˇ awˬ moˍ hkʼaw tawˆ cheˆ piˇ˗oˬ ve tehꞈ kʼoˆ piˇ ve yoˬ. Yawˇ Hkriꞈ yaˇ awˬ moˍ hkʼaw kʼawꞈ kʼawꞈ la tuˬ awˬ hkʼaˇ hkʼaˬ hkʼe gʼa te cawˇ ve kaꞈ yawˇ hui kʼoˆ maˍ piˇ ve yoˬ. Yawˇ ve te hkʼaˇ dawˇ hkʼaˇ pa˗oˬ ve tehꞈ shiˍ tuˬ, ponˬ kʼai ve hkʼaˬ nyiˇ ha pa maˇ gaˬ sheˍ htaˇ, yawˇ htaꞈ kʼawꞈ mawˬ daꞈ gaˇ ve tehꞈ, nyi haꞈ shaˉ paˍ kʼoˆ piˇ ve yoˬ. Chaw oˇ ve teˇ gʼaˇ kaꞈ nyi haꞈ shaˉ paˍ hui htaꞈ mawˬ daꞈ gaˇ ve kʼo, yawˇ hui chaw oˇ ve teˇ gʼaˇ venˇ baˆ dawˇ hpfuhˆ tuˬ nyi ma nuˇ nehˬ ve hkʼaw jehˬ piˇ leh Hkriꞈ yaˇ awˬ moˍ hkʼaw kʼawꞈ kʼawꞈ la tuˬ kaꞈ jehˬ piˇ ve yoˬ. Yawˇ te hkʼaˇ dawˇ hkʼaˇ maˇ pa sheˍ ve kʼo, yawˇ geh ca kʼawꞈ guiˇ˗e leh yawˇ kʼawꞈ kʼawꞈ la tuˬ, nyi haꞈ shaˉ paˍ yawˇ geh teˇ hkui teˇ hkui ca kʼawꞈ guiˇ˗e ve yoˬ.
7. Hkriꞈ yaˇ awˬ moˍ hkʼaw tawˆ cheˆ piˇ ve chaw htaꞈ te piˇ htaˇ, nyi haꞈ shaˉ paˍ Yaˬhoˉvaˬ haꞈ pehnˇ ve hkʼaˬ hkʼe hpeuꞈ maw piˇ gʼa tuˬ le? (Yeˍraˍmiˆ 3:12)
7 Hkriꞈ yaˇ awˬ moˍ hkʼaw tawˆ cheˆ piˇ ve chaw htaꞈ te piˇ htaˇ, nyi haꞈ shaˉ paˍ lehˬ Yaˬhoˉvaˬ ha kʼaˉ puiˉ ve htaꞈ henˇ yuˬ ve yoˬ. Yaˬhoˉvaˬ lehˬ Iˉsaˍreˍlaˆ chaw venˇ baˆ dawˇ hpfuhˆ˗oˬ htaˇ hehꞈ, ga piˇ tuˬ yoˬ tehꞈ maˇ law chehˇ. Yawˇ hui venˇ baˆ dawˇ hpfuhˆ˗oꞈ ve tehꞈ maˇ hpeuꞈ maw piˇ sheˍ htaˇ kaꞈ, Yaˬhoˉvaˬ yawˇ hui htaꞈ awˉ lawˉ ga piˇ ve yoˬ. Liꞈ kʼoˆ chi ve hkʼaw 2 lawn teˇ lawn htaꞈ ngaˬ hui gʼa henˇ˗oˬ ve yoˬ. Yaˬhoˉvaˬ yawˇ ha kʼaˉ puiˉ ve tehꞈ hpeuꞈ maw piˇ tuˬ, tcuh kaˍ paˍ Hawˇseˍ ve awˬ lawn htaꞈ yawˇ tehˆ maˍ piˇ ve yoˬ. Hawˇseˍ ve awˬ miˇ ma venˇ baˆ uiˍ jaˇ ve htaꞈ te chehˇ sheˍ ve htawˇ, Yaˬhoˉvaˬ lehˬ Hawˇseˍ ve awˬ miˇ ma yawˇ geh teˇ pawˆ kʼawꞈ kʼawꞈ la tuˬ ca jehˬ tcuh ve yoˬ. (Hawˇseˍ 3:1; Maˍlaˍhkiˆ 3:7) Nyi haꞈ shaˉ paˍ Yaˬhoˉvaˬ htaꞈ henˇ yuˬ gʼa ve lehˬ, te yaꞈ ve chaw venˇ baˆ dawˇ hpfuhˆ leh Hkriꞈ yaˇ awˬ moˍ hkʼaw kʼawꞈ kʼawꞈ la tcuh gaˇ ve tehꞈ hpeuꞈ maw piˇ cawˇ ve yoˬ. Chaw oˇ ve teˇ gʼaˇ kʼawꞈ kʼawꞈ la tuˬ haˍ jaˇ ve tehꞈ yawˇ hui maˇ te piˇ cawˇ.—Yeˍraˍmiˆ 3:12 gʼaw sheˍ.
8. Mehˉ kʼai taˍ ve yaˇ paˍ ve awˬ lawn Yeˍsuˆ tawˇ pa haˉ tehˆ maˍ laˇ ve hkʼaw, Yaˬhoˉvaˬ ha kʼaˉ puiˉ jaˇ ve Gʼuiˬ sha hpehꞈ ve tehꞈ ngaˬ hui mawˬ tuˬ hkʼaˬ hkʼe te laˇ ve le? (Luˉkaꞈ 15:7)
8 Liꞈ kʼoˆ chi ve hkʼaw 2 lawn teˇ lawn mehˉ kʼai taˍ ve yaˇ paˍ ve awˬ lawn, Yeˍsuˆ tawˇ pa haˉ tehˆ maˍ laˇ ve htaꞈ teˇ geh nyi sheˍ. Yaˇ paˍ kʼawꞈ la ve awˬ pa vuiˇ kuiˬ lo ceh mawˬ htawˇ, “yawˇ geh gʼuiˇ kʼai ve yoˬ. Awˬ yaˇ paˍ ve kʼawˍ peˍ htaꞈ yawˇ kʼuˉ taˍ leh boˆ nu ve yoˬ.” (Luˉkaꞈ 15:20) Awˬ pa yaˇ paˍ lawˬ hkawˉ laˇ tuˬ htaꞈ maˇ law chehˇ. Yaꞈ hkʼaˇ, awˬ pa awˉ lawˉ yaˇ geh guiˇ kʼai ve yoˬ. Awˬ pa yaˇ htaꞈ haꞈ ve hkʼa shuˍ, nyi haꞈ shaˉ paˍ kaꞈ Hkriꞈ yaˇ awˬ moˍ hkʼaw tawˆ cheˆ piˇ ve chaw htaꞈ chi hkʼa shuˍ te piˇ cawˇ ve yoˬ. Nyi haꞈ shaˉ paˍ yawˇ htaꞈ “aˉ hkʼaw lo” kʼawꞈ la tcuh gaˇ ve yoˬ. (Luˉkaꞈ 15:22-24, 32) Leh venˇ baˆ yaˇ teˇ gʼaˇ dawˇ hpfuhˆ htaˇ, mvuhˇ naw ma hkʼoˆ leh miˬ guiˬ hkʼoˆ lo ve chaw teˇ gʼa le le kaꞈ ha lehˬ jaˇ ve yoˬ.—Luˉkaꞈ 15:7 gʼaw sheˍ.
9. Yaˬhoˉvaˬ lehˬ te yaꞈ ve chaw htaꞈ aˬ htoꞈ ma te tcuh gaˇ ve le?
9 Yaˬhoˉvaˬ lehˬ te yaꞈ leh venˇ baˆ maˇ dawˇ hpfuhˆ ve chaw htaꞈ Hkriꞈ yaˇ awˬ moˍ hkʼaw maˇ kʼawꞈ chehˇ tcuh tehꞈ, ngaˬ hui gʼa henˇ˗oˬ ve yoˬ. Yaꞈ hkʼaˇ, Yaˬhoˉvaˬ lehˬ yawˇ htaꞈ baˬ taˉ ve maˇ heˆ. Yawˇ geh kʼawꞈ la tcuh gaˇ ve yoˬ. Hawˇseˍ liꞈ 14:4 hkʼaw te yaꞈ leh venˇ baˆ dawˇ hpfuhˆ ve chaw htaꞈ, Yaˬhoˉvaˬ hkʼaˬ hkʼe dawˇ ve ngaˬ hui mawˬ tuˬ ga laˇ ve yoˬ. Choˬ kaˬ lo kʼoˆ ve, “ngaˬ ve chaw teˇ hpaˍ htaꞈ ngaˬ geh kʼawꞈ shiˍ yuˬ tuˬ yoˬ. Nyi ma awˬ tawˬ hkʼa gaˬ, ngaˬ yawˇ hui htaꞈ haꞈ tuˬ yoˬ. Ngaˬ yawˇ hui htaꞈ nyi ma kʼawꞈ zuhˆ tuˬ ve maˇ heˆ.” Te yaꞈ ve chaw venˇ baˆ dawˇ hpfuhˆ˗oˬ ve tehꞈ hpeuꞈ maw laˇ tuˬ, Liꞈ hpu awˬ tawn chi ve nyi haꞈ shaˉ paˍ chaˬ nyi mawˬ tuˬ ga piˇ ve yoˬ. Leh Yaˬhoˉvaˬ ve tawˇ hkawˇ chi ve Hkriꞈ yaˇ awˬ moˍ hkʼaw tawˆ cheˆ piˇ ve chaw haˆ kʼawꞈ la gaˇ tuˬ te piˇ ve yoˬ.
10-11. Hkriꞈ yaˇ awˬ moˍ hkʼaw tawˆ cheˆ piˇ maw jaˇ˗oˬ ve chaw htaꞈ hkʼaˬ hkʼe te nyi haꞈ shaˉ paˍ ga piˇ gʼa tuˬ le?
10 Hkʼe kʼo, oˇ htaˇ Hkriꞈ yaˇ awˬ moˍ hkʼaw tawˆ cheˆ piˇ ve chaw htaꞈ hkʼaˬ hkʼe te piˇ tuˬ le? Yawˇ htaꞈ Hkriꞈ yaˇ awˬ moˍ hkʼaw tawˆ cheˆ piˇ ve laiˉ hkʼawꞈ gaˬ˗oˬ ve yoˬ. Nyi haꞈ shaˉ paˍ yawˇ htaꞈ hkʼaˬ hkʼe ga piˇ gʼa tuˬ le? Yawˇ te yaꞈ ve laiˉ hkʼawꞈ gaˬ˗oˬ leh, aˬ htoꞈ ma awˬ lawn htaꞈ pa taw, Hkriꞈ yaˇ awˬ moˍ hkʼaw tawˆ cheˆ piˇ ve tawnˇ maˇ gʼa˗o ve yoˬ hehˉ. Aˬ htoꞈ ma ve awˬ lawn hpehꞈ ve htawˇ, nyi haꞈ shaˉ paˍ yawˇ htaꞈ gʼaꞈ ca leh ca guiˇ piˇ sheˍ. Nyi haꞈ shaˉ paˍ yawˇ geh bon lawˬ leh yawˇ Hkriꞈ yaˇ awˬ moˍ hkʼaw kʼawꞈ kʼawꞈ la tuˬ jehˬ piˇ sheˍ. Chaw teˇ gʼaˇ Hkriꞈ yaˇ awˬ moˍ hkʼaw tawˆ˗e maw jaˇ˗oˬ ve kʼo, yawˇ ve yonˍ hkʼaˇ awˬ gʼaˇ nuˇ jaˇ ve yoˬ. Chi htaꞈ pa taw, yawˇ Hkriꞈ yaˇ awˬ moˍ hkʼaw kʼawꞈ kʼawꞈ la gaˇ ve tehꞈ hpeuꞈ maw laˇ ve kʼo, yawˇ maˇ kʼawꞈ la sheˍ ve htawˇ, nyi haꞈ shaˉ paˍ lehˬ yawˇ htaꞈ Liꞈ hpu kʼawꞈ maˍ piˇ cawˇ ve yoˬ. Nyi haꞈ shaˉ paˍ ceh tiˉ chi hkʼe te gʼa ve yoˬ.
11 Nyi haꞈ shaˉ paˍ Yaˬhoˉvaˬ ha kʼaˉ puiˉ ve htaꞈ henˇ yuˬ ve yoˬ. Yawˇ hui Hkriꞈ yaˇ awˬ moˍ hkʼaw tawˆ˗e˗oˬ ve chaw htaꞈ te gʼa ve hkʼe ca hpfuhˆ leh, yawˇ hui Yaˬhoˉvaˬ geh kʼawꞈ la tuˬ awˬ gʼaˇ piˇ ve yoˬ. Te yaꞈ ve chaw venˇ baˆ dawˇ hpfuhˆ leh maˇ kʼawꞈ te yaꞈ˗o ve tehꞈ hpeuꞈ maw laˇ htaˇ, yawˇ htaꞈ Hkriꞈ yaˇ awˬ moˍ hkʼaw laꞈ haˉ kʼawꞈ la tcuh ve yoˬ.—2 Kawˇrenˍhtuˆ 2:6-8.
12. (a) Nyi haꞈ shaˉ paˍ shaˍ tiꞈ hkʼa dehꞈ te cawˇ ve hkʼaˬ hkʼe ve awˬ yanˇ htaˇ le? (b) Venˇ baˆ teˇ ceuˬ ceuˬ htaꞈ te yaꞈ ve chaw Yaˬhoˉvaˬ ha kʼaˉ laˇ ve htaꞈ maˇ gʼa keunˍ tehꞈ aˬ htoꞈ ma te ngaˬ hui maˇ dawˇ nyi cawˇ ve le? (Awˬ maiˉ htaꞈ nyi sheˍ.)
12 Chaw teˇ gʼaˇ gʼaˇ htaꞈ Hkriꞈ yaˇ awˬ moˍ hkʼaw kʼawꞈ la tuˬ, maˇ kʼawꞈ haꞈ yuˬ piˇ sheˍ htaˇ, nyi haꞈ shaˉ paˍ teˇ lawn lawn htaꞈ shaˍ tiꞈ hkʼa dehꞈ te cawˇ ve yoˬ. Tawˇ pa haˉ te kʼo, yawˇ yaˇ htaꞈ haiˬ ve hpawˇ te piˇ ve, yawˇ Gʼuiˬ sha htaꞈ hpfuhˆ ve, maˇ heˆ leh yawˇ ve awˬ ca htaꞈ baˬ daꞈ tuˬ awˬ hkʼaˇ gu chehˇ ve kʼo, yawˇ awˬ tehˬ awˬ na venˇ baˆ dawˇ hpfuhˆ˗oˬ ve laˇ tehꞈ, nyi haꞈ shaˉ paˍ hkʼa dehꞈ gʼa nyi cawˇ ve yoˬ. (Maˍlaˍhkiˆ 2:14; 2 Tiˆmoˉseˍ 3:6) Nyi haꞈ shaˉ paˍ lehˬ, Gʼuiˬ sha ve yawˬ ehˉ htaꞈ hkʼa dehꞈ gʼa nyi haꞈ shaˉ ve yoˬ. Awˬ tehˬ awˬ na venˇ baˆ dawˇ hpfuhˆ ve chaw htaꞈ Yaˬhoˉvaˬ venˇ baˆ hpehˇ piˇ leh, yawˇ hkʼaˬ hkʼe taw haiˬ ve awˬ ceuˬ htaꞈ te ve htawˇ maˇ kʼoˆ, Yaˬhoˉvaˬ venˇ baˆ hpehˇ piˇ tuˬ yoˬ tehꞈ, ngaˬ hui tawnˇ taˍ cawˇ ve yoˬ. Chi htaꞈ pa taw, awˬ nu ve chaw htaꞈ haiˬ ve awˬ ceuˬ te piˇ ve teˇ lawn lawn htaꞈ, nyi haꞈ shaˉ paˍ shaˍ tiꞈ gʼa te cawˇ ve htawˇ, yawˇ chi hkʼe te ve, oˇ hkʼe te ve, Yaˬhoˉvaˬ ha kʼaˉ laˇ ve htaꞈ maˇ gʼa keunˍ tehꞈ maˇ dawˇ cheˆ piˇ cawˇ. a—1 Peˍtruˆ 2:10.
HKRIꞈ YAˇ AWˬ MOˍ HKʼAW VE AWˬ VIˉ AWˬ NYI HKʼAˬ HKʼE TE CAWˇ VE LE?
13. Te yaꞈ ve chaw htaꞈ Hkriꞈ yaˇ awˬ moˍ hkʼaw shaˍ tiꞈ piˇ leh Hkriꞈ yaˇ awˬ moˍ hkʼaw tawˆ cheˆ piˇ ve chaw htaꞈ ngaˬ hui te piˇ ve awˬ hkʼaˇ hkʼaˬ hkʼe peun daꞈ ve le?
13 Peuˬ taˉ ve teˇ lawn hkʼaw gʼa henˇ˗oˬ ve hkʼe, awˬ viˉ awˬ nyi teˇ gʼaˇ te yaꞈ leh shaˍ tiꞈ piˇ˗oˬ ve tehꞈ, Hkriꞈ yaˇ awˬ moˍ hkʼaw shiˍ laˇ kaˇ laˇ htaˇ, yawˇ venˇ baˆ dawˇ hpfuhˆ˗oˬ leh, maˇ daꞈ ve awˬ ceuˬ maˇ kʼawꞈ te˗o ve tehꞈ shiˍ ve pa taw, ngaˬ hui yawˇ geh awˬ chawˇ te gʼa ve yoˬ. (1 Tiˆmoˉseˍ 5:20) Yawˇ Hkriꞈ yaˇ awˬ moˍ hkʼaw teˇ gʼaˇ hpehꞈ sheˍ leh, yawˇ awˬ viˉ awˬ nyi geh awˬ chawˇ te ve lehˬ, awˬ gʼaˇ gʼa gaˇ ve yoˬ. (Heˍbrehˇ 10:24, 25) Yaꞈ hkʼaˇ, Hkriꞈ yaˇ awˬ moˍ hkʼaw tawˆ cheˆ piˇ ve awˬ lawn lehˬ, ngaˬ hui yawˇ geh “awˬ chawˇ maˇ gʼa te ve” leh “chi hkʼe ve chaw geh awˍ kaꞈ taˇ caˇ”.—1 Kawˇrenˍhtuˆ 5:11.
14. Hkriꞈ yaˇ awˬ moˍ hkʼaw tawˆ cheˆ piˇ ve chaw htaꞈ te piˇ ve awˬ hkʼaˇ Hkriꞈ yaˇ teˇ gʼaˇ leh teˇ gʼaˇ Liꞈ hpu htaꞈ hawˍ daꞈ ve a shu yawˇ ve dawˇ shiˍ puiˉ ve nyi ma htaꞈ hkʼaˬ hkʼe yehˇ cawˇ ve le? (Awˬ han htaꞈ nyi sheˍ.)
14 Ngaˬ hui gʼa henˇ˗oˬ ve hkʼe, Hkriꞈ yaˇ awˬ moˍ hkʼaw tawˆ cheˆ piˇ ve chaw htaꞈ maˇ yawˆ maˇ yan te piˇ ve htaꞈ kʼoˆ gaˇ ve laˇ? Maˇ heˆ. Awˬ tehˬ kʼo, ngaˬ hui oˇ hkʼe ve chaw geh awˬ chawˇ maˇ te. Yaꞈ hkʼaˇ, Hkriꞈ yaˇ awˬ moˍ hkʼaw tawˆ cheˆ piˇ ve chaw hpawnˬ daꞈ la tuˬ, jehˬ piˇ maˇ jehˬ piˇ ve, Hkriꞈ yaˇ teˇ gʼaˇ le le Liꞈ hpu htaꞈ hawˍ daꞈ ve a shu yawˇ ve dawˇ shiˍ puiˉ ve nyi ma htaꞈ yehˇ gʼa ve yoˬ. Chaw oˇ ve teˇ gʼaˇ ngaˬ hui ve awˬ viˉ awˬ nyi maˇ heˆ leh, ngaˬ hui meuˆ daꞈ jaˇ ve awˬ chawˇ hpehꞈ jaw ve yoˬ hehˉ. Leh yawˇ awˬ tehˬ hpawnˬ daꞈ la ve kʼo, hkʼaˬ hkʼe te tuˬ le? Oˇ htaˇ kʼo, ngaˬ hui chi hkʼe ve chaw htaꞈ tawˇ maˇ yaw piˇ. Yaꞈ hkʼaˇ, chi teˇ hkui Hkriꞈ yaˇ teˇ gʼaˇ leh teˇ gʼaˇ Liꞈ hpu htaꞈ hawˍ daꞈ ve a shu yawˇ ve dawˇ shiˍ puiˉ ve nyi ma htaꞈ yehˇ leh awˬ lawn chi dawˇ cheˆ gʼa ve yoˬ. Chaw teˇ hpaˍ dawˇ ve, tawˇ a ciˉ ciˉ yaw piˇ leh, chaw oˇ ve teˇ gʼaˇ Hkriꞈ yaˇ awˬ moˍ hkʼaw hpawnˬ daꞈ la tuˬ haꞈ yuˬ piˇ gʼa ve yoˬ. Hkʼaˬ hkʼe hpehꞈ ve htawˇ, yawˇ geh caˉ leh tawˇ maˇ yaw daꞈ ve, maˇ heˆ leh awˬ chawˇ maˇ te ve yoˬ.
Hkriꞈ yaˇ awˬ moˍ hkʼaw tawˆ cheˆ piˇ ve chaw hpawnˬ daꞈ la tuˬ jehˬ piˇ ve maˇ heˆ leh, tawˇ a ciˉ ciˉ yaw piˇ tuˬ, awˬ lawn chi hkʼe ve htaꞈ Hkriꞈ yaˇ teˇ gʼaˇ le le a shu yawˇ ve dawˇ shiˍ puiˉ ve nyi ma htaꞈ yehˇ tuˬ Liꞈ hpu hkʼaw beˆ maˍ laˇ taˍ ve (Awˬ tawn 14 hkʼaw ve)
15. 2 Yoˇhanˬ liꞈ 9-11 hkʼaw venˇ baˆ te ve hkʼaˬ hkʼe ve chaw htaꞈ kʼoˆ chehˇ ve le? (Awˇ ceˍ awˇ fa “ Yoˇhanˬ leh Pawˇluꞈ venˇ baˆ ve awˬ lawn hkʼa shuˍ ve htaꞈ kʼoˆ chehˇ ve laˇ?” htaꞈ nyi sheˍ.)
15 Chaw teˇ hpaˍ htawˇ dawˇ nawˬ dawˇ cawˬ ve, ‘venˇ baˆ uiˍ jaˇ ve te ve chaw geh yawˇ tawˇ yaw daꞈ ve lehˬ, yawˇ te ve awˬ ceuˬ htaꞈ gʼa ga chehˇ ve tehꞈ, Liꞈ hpu hkʼaw kʼoˆ ve maˇ heˆ laˇ?’ (2 Yoˇhanˬ 9-11 gʼaw sheˍ.) Liꞈ hpu chi ve teˇ tawn hkʼaw awˬ lawn awˬ tanˇ, Gʼuiˬ sha htaꞈ hpfuhˆ ve chaw leh haiˬ ve awˬ ceuˬ te tuˬ jehˬ piˇ ve chaw geh kaꞈ, beˆ maˍ laˇ hkawˇ chi yehˇ gʼa ve tehꞈ hpeuꞈ maw laˇ ve yoˬ. (Hpeuꞈ maˍ ve 2:20) Chi htaꞈ pa taw, Gʼuiˬ sha htaꞈ hpfuhˆ ve chaw maˍ ve hkawˇ na ve, maˇ heˆ leh haiˬ ve awˬ ceuˬ te ve, chi hkʼe ve chaw geh nyi haꞈ shaˉ paˍ tawˇ ca yaw daꞈ˗e tuˬ maˇ kʼai. Hkʼaˬ hkʼe hpehꞈ ve htawˇ, chaw oˇ ve teˇ gʼaˇ venˇ baˆ dawˇ hpfuhˆ ve hpehꞈ kʼai gʼa ve yoˬ hehˉ. Yaꞈ hkʼaˇ, yawˇ venˇ baˆ maˇ dawˇ hpfuhˆ sheˍ ve ceh ceh, ngaˬ hui yawˇ htaꞈ tawˇ maˇ yaw piˇ ve, maˇ heˆ leh hpawnˬ daꞈ kuiˬ lo laˬ tuˬ maˇ jehˬ piˇ.
YAˬHOˉVAˬ HA KʼAˉ PUIˉ VE HTAꞈ HENˇ YUˬ SHEˍ
16-17. (a) Yaˬhoˉvaˬ lehˬ venˇ baˆ te ve chaw htaꞈ aˬ htoꞈ ma te tcuh gaˇ ve le? (Yeˍsaˍkeˍlaˆ 18:32) (b) Nyi haꞈ shaˉ paˍ hkʼaˬ hkʼe te Yaˬhoˉvaˬ geh kanˉ te geh te gʼa ve le?
16 Liꞈ kʼoˆ chi ve hkʼaw awˬ lawn chi htaꞈ caˉ daꞈ ve 5 lawn, ngaˬ hui aˬ htoꞈ ma gʼa henˇ˗oˬ ve le? Yaˬhoˉvaˬ chaw teˇ gʼaˇ htaꞈ kaꞈ maˇ te luˬ gaˇ ve tehꞈ, ngaˬ hui gʼa henˇ˗oˬ ve yoˬ. (Yeˍsaˍkeˍlaˆ 18:32 gʼaw sheˍ.) Yaˬhoˉvaˬ lehˬ venˇ baˆ te ve chaw htaꞈ yawˇ geh kʼawꞈ kʼawꞈ la tcuh gaˇ ve yoˬ. (2 Kawˇrenˍhtuˆ 5:20) Chi ve htaꞈ pa taw, teˇ co˗e peuˬ teˇ co˗e Yaˬhoˉvaˬ yawˇ ve mvuhˇ miˬ yaˇ nyi ma heh leh, laiˉ pawˆ te yaꞈ ve htaꞈ venˇ baˆ dawˇ hpfuhˆ tuˬ te piˇ leh, yawˇ geh kʼawꞈ la tuˬ kaꞈ te piˇ ve yoˬ. Chi beuꞈ teˇ co˗e ve nyi haꞈ shaˉ paˍ lehˬ, Yaˬhoˉvaˬ geh kanˉ teˇ geh te leh venˇ baˆ te ve chaw dawˇ hpfuhˆ tuˬ ga piˇ ve yoˬ.—Roˉmaꞈ 2:4; 1 Kawˇrenˍhtuˆ 3:9.
17 Venˇ baˆ te ve chaw dawˇ hpfuhˆ htaˇ, mvuhˇ naw ma hkʼoˆ lo hkʼaˬ hkʼe taw ha lehˬ jaˇ ve htaꞈ dawˇ nyi sheˍ. Ngaˬ hui ve Awˬ pa Yaˬhoˉvaˬ lehˬ, mehˉ kʼai taˍ ve yawˬ htaꞈ shuˍ ve chaw Hkriꞈ yaˇ awˬ moˍ hkʼaw kʼawꞈ kʼawꞈ la htaˇ, ha lehˬ jaˇ ve yoˬ. Yaˬhoˉvaˬ ha kʼaˉ puiˉ ve leh haꞈ pehnˇ uiˍ jaˇ ve htaꞈ ngaˬ hui dawˇ nyi htaˇ, ngaˬ hui yawˇ htaꞈ leuˉ leh haꞈ jaˇ ve yoˬ.—Luˉkaꞈ 1:78.
KʼA MUIˬ HKAWˇ 111 Ngaˬ hui ha lehˬ chehˇ ve
a Liꞈ hpu hkʼaw venˇ baˆ maˇ hpehˇ piˇ gʼa ve awˬ lawn htaꞈ kʼoˆ taˍ ve yoˬ. Venˇ baˆ chi hkʼe te ve chaw lehˬ, Yaˬhoˉvaˬ htaꞈ tawˍ daꞈ leh yawˇ ve dawˇ hkʼaˇ pa tuˬ maˇ te ve yoˬ. Yaˬhoˉvaˬ leh Yeˍsuˆ ceh tiˉ venˇ baˆ te leh maˇ hpehˇ piˇ gʼa ve htaꞈ dawˇ cheˆ piˇ gʼa ve yoˬ.—Maˍkuˆ 3:29; Heˍbrehˇ 10:26, 27.
