AWˬ LAWN 33
KʼA MUIˬ HKAWˇ 130 Venˇ baˆ hpehˇ piˇ sheˍ
Venˇ baˆ uiˍ jaˇ ve te ve chaw htaꞈ Yaˬhoˉvaˬ ngaˬ hui htaꞈ hkʼaˬ hkʼe dawˇ tcuh gaˇ ve le?
‘Teˇ gʼaˇ gʼaˇ venˇ baˆ te ve kʼo, ngaˬ hui htaꞈ ga laˇ shehˍ hpaˇ cawˬ ve yoˬ.’—1 YOˇHANˬ 2:1.
A YEˇ UIˍ VE AWˬ LAWN
Kawˇrenˍhtuˆ venˇ hkʼaw chehˇ ve Hkriꞈ yaˇ awˬ moˍ hkʼaw venˇ baˆ uiˍ jaˇ ve te ve chaw htaꞈ gu piˇ ve awˬ lawn, ngaˬ hui htaꞈ hkʼaˬ hkʼe maˍ laˇ ve le?
1. Yaˬhoˉvaˬ chaw yaˇ teˇ gʼaˇ le le htaꞈ aˬ htoꞈ ma te tcuh gaˇ ve le?
Yaˬhoˉvaˬ lehˬ chaw yaˇ a shu yawˇ hkʼaˇ yawˇ leuˆ yuˬ tuˬ hpanˍ taˍ laˇ ve yoˬ. Awˬ lawn teˇ hpaˍ htaꞈ dawˇ cheˆ htaˇ, laꞈ shawnˍ chi ve htaꞈ nawˬ teˇ nyi le le yehˇ ve yoˬ. Chaw yaˇ a shaꞈ teꞈ kuiˬ lo dawˇ cheˆ ve a yeˇ uiˍ jaˇ ve lehˬ, Yaˬhoˉvaˬ htaꞈ awˬ to chiˇ aꞈ piˇ tuˬ dawˇ cheˆ leh, yawˇ ve yehˬ kʼa hkʼaw ve chaw teˇ gʼaˇ hpehꞈ la tuˬ dawˇ cheˆ ve yoˬ. Yaˬhoˉvaˬ lehˬ chaw yaˇ teˇ gʼaˇ le le htaꞈ chi hkʼe te tcuh gaˇ ve yoˬ. Aˬ htoꞈ ma pa taw le? Awˬ lawn kʼo, yawˇ chaw yaˇ htaꞈ haꞈ jaˇ leh yawˇ hui htaꞈ daꞈ jaˇ ve awˬ ceuˬ gʼa tcuh gaˇ ve yoˬ. Yaˬhoˉvaˬ lehˬ chaw yaˇ yawˇ geh hkʼa dehꞈ meuˆ daꞈ tcuh gaˇ leh, co co taiˍ taiˍ ve a shaꞈ kaꞈ gʼa tcuh gaˇ ve yoˬ.—Bon maˍ ve 30:19, 20; Gaˍlaˍtiˆ 6:7, 8.
2. Venˇ baˆ te leh maˇ dawˇ hpfuhˆ ve chaw htaꞈ Yaˬhoˉvaˬ hkʼaˬ hkʼe dawˇ ve le? (1 Yoˇhanˬ 2:1)
2 Yaˬhoˉvaˬ yawˇ ve kanˉ te tuˬ chaw teˇ gʼaˇ htaꞈ kaꞈ maˇ nyiˉ piˇ. Yaꞈ hkʼaˇ, chaw yaˇ teˇ gʼaˇ le le dawˇ cheˆ tuˬ leuˆ yuˬ tcuh ve yoˬ. Hkriꞈ yaˇ teˇ gʼaˇ Baˆtiˆsaˬ haꞈ yuˬ˗oˬ leh Gʼuiˬ sha ve awˬ liˇ awˬ hkʼaˇ htaꞈ te yaꞈ leh venˇ baˆ uiˍ jaˇ ve htaꞈ te ve kʼo, hkʼaˬ hkʼe te tuˬ le? Yawˇ venˇ baˆ maˇ dawˇ hpfuhˆ ve kʼo, Hkriꞈ yaˇ awˬ moˍ hkʼaw tawˆ cheˆ piˇ tuˬ yoˬ. (1 Kawˇrenˍhtuˆ 5:13) Chi hkʼe hpehꞈ ve kʼo, Yaˬhoˉvaˬ yawˇ htaꞈ venˇ baˆ dawˇ hpfuhˆ tcuh gaˇ leh, yawˇ geh kʼawꞈ la tuˬ dawˇ law taˍ ve yoˬ. Chi ve htaꞈ pa taw, Yaˬhoˉvaˬ lehˬ htaiˍ hkʼawꞈ ve gu teh taˍ laˇ ve a yeˇ uiˍ jaˇ ve yoˬ. Awˬ lawn kʼo, Yaˬhoˉvaˬ lehˬ venˇ baˆ yaˇ dawˇ hpfuhˆ ve htaꞈ venˇ baˆ hpehˇ piˇ gaˇ ve yoˬ. (1 Yoˇhanˬ 2:1 gʼaw sheˍ.) Yaˬhoˉvaˬ chaw yaˇ htaꞈ haꞈ jaˇ leh te yaꞈ ve chaw htaꞈ venˇ baˆ dawˇ hpfuhˆ leh yawˇ geh kʼawꞈ la tcuh gaˇ ve yoˬ.—Zaˍhkaˍriˆ 1:3; Roˉmaꞈ 2:4; Yaˍkoˆ 4:8.
3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
3 Venˇ baˆ uiˍ jaˇ ve htaꞈ te leh, te yaꞈ ve chaw htaꞈ Yaˬhoˉvaˬ yawˇ dawˇ ve hkʼe ngaˬ hui htaꞈ kaꞈ dawˇ tcuh gaˇ ve yoˬ. Awˬ lawn chi ve hkʼaw chi hkʼe te gʼa tuˬ ga laˇ ve yoˬ. Chi ve hkʼaw nawˬ henˇ htaˇ hkʼa dehꞈ chaˬ nyi sheˍ. (1) Kawˇrenˍhtuˆ venˇ hkʼaw chehˇ ve Hkriꞈ yaˇ lehˬ, venˇ baˆ uiˍ jaˇ ve te ve chaw htaꞈ hkʼaˬ hkʼe gu piˇ ve le? (2) Venˇ baˆ te ve chaw dawˇ hpfuhˆ htaˇ, Pawˇluꞈ Kawˇrenˍhtuˆ venˇ hkʼaw chehˇ ve Hkriꞈ yaˇ htaꞈ hkʼaˬ hkʼe beˆ maˍ piˇ ve le? Leh (3) venˇ baˆ uiˍ jaˇ ve te ve chaw htaꞈ Yaˬhoˉvaˬ dawˇ ve awˬ hkʼaˇ htaꞈ caˉ daꞈ ve ngaˬ hui htaꞈ hkʼaˬ hkʼe maˍ laˇ ve le?
KAWˇRENˍHTUˆ VENˇ HKʼAW CHEHˇ VE HKRIꞈ YAˇ LEHˬ, VENˇ BAˆ UIˍ JAˇ VE TE VE CHAW HTAꞈ HKʼAˬ HKʼE GU PIˇ VE LE?
4. Kawˇrenˍhtuˆ venˇ hkʼaw chehˇ ve Hkriꞈ yaˇ awˬ moˍ hkʼaw aˬ htoꞈ ma hpehꞈ la ve le? (1 Kawˇrenˍhtuˆ 5:1, 2)
4 1 Kawˇrenˍhtuˆ liꞈ 5:1, 2 gʼaw sheˍ. Pawˇluꞈ shu mvuhˇ miˬ lo bon maˍ˗e ve 3 pawˆ teˇ pawˆ htaˇ, Kawˇrenˍhtuˆ venˇ hkʼaw chehˇ ve Hkriꞈ yaˇ awˬ moˍ htaꞈ caˉ daꞈ ve awˬ lawn, yawˇ gʼa kaˇ htaˇ cheˆ˗ehꞈ kʼai ve yoˬ. Hkriꞈ yaˇ awˬ moˍ chi ve hkʼaw awˬ viˉ awˬ nyi hawˉ hkʼaˆ teˇ gʼaˇ awˬ pa ve awˬ miˇ ma geh zuhꞈ ve yoˬ. Chi hkʼe te ve lehˬ, cheˆ˗ehꞈ kʼai leh “lawˇ kiˍ yaˇ hui geh kaꞈ maˇ cawˬ jaw ve teˇ ceuˬ hpehꞈ ve yoˬ.” Awˬ viˉ awˬ nyi chi hkʼe ve htaꞈ ceh tiˉ gʼa yeunˇ hkanˍ ve maˇ heˆ. Yaꞈ hkʼaˇ, chaw teˇ hpaˍ kʼo, chi hkʼe leˇ ve htaꞈ dawˇ cawˇ ve yoˬ. Gʼuiˬ sha lehˬ maˇ biˇ ve chaw yaˇ htaꞈ ha kʼaˉ ve tehꞈ, hpeuꞈ maw laˇ ve awˬ hkʼaˇ htaꞈ yawˇ hui henˇ yuˬ ve tehꞈ dawˇ ve yoˬ. Yaꞈ hkʼaˇ, Yaˬhoˉvaˬ lehˬ maˇ daꞈ ve te hkʼaˇ chi hkʼe ve htaꞈ maˇ haꞈ yuˬ. Hawˉ hkʼaˆ chi ve teˇ gʼaˇ te hkʼaˇ chaꞈ chiˆ jaˇ leh Hkriꞈ yaˇ awˬ moˍ awˬ meh luˬ tuˬ te piˇ ve yoˬ. Yawˇ ve te hkʼaˇ awˬ nu ve awˬ viˉ awˬ nyi htaꞈ heuˆ la kuiˬ cawˬ ve yoˬ. Hkʼe te leh, Pawˇluꞈ Hkriꞈ yaˇ awˬ moˍ hkʼaw aˬ htoꞈ ma te tuˬ beˆ maˍ piˇ ve le?
5. Hkriꞈ yaˇ awˬ moˍ hkʼaw hkʼaˬ hkʼe te tuˬ Pawˇluꞈ beˆ maˍ piˇ ve le? (1 Kawˇrenˍhtuˆ 5:13) (Awˬ han htaꞈ nyi sheˍ.)
5 1 Kawˇrenˍhtuˆ liꞈ 5:13 gʼaw sheˍ. Venˇ baˆ te leh maˇ dawˇ hpfuhˆ ve chaw htaꞈ Hkriꞈ yaˇ awˬ moˍ hkʼaw tawˆ cheˆ piˇ tuˬ, Pawˇluꞈ htaꞈ dawˇ pawnˍ piˇ leh liꞈ bvuhꞈ tcuh ve yoˬ. Hkʼe te leh, Hkriꞈ yaˇ awˬ moˍ hkʼaw awˬ viˉ awˬ nyi oˇ ve teˇ gʼaˇ htaꞈ hkʼaˬ hkʼe te piˇ cawˇ ve le? Pawˇluꞈ kʼoˆ ve, awˬ viˉ awˬ nyi chaw chi hkʼe ve geh “awˬ chawˇ maˇ gʼa te” ve yoˬ. Chi hkʼaˬ hkʼe kʼoˆ gaˇ ve le? Pawˇluꞈ kʼawꞈ kʼoˆ ve, “chi hkʼe ve chaw geh awˍ kaꞈ taˇ caˇ.” (1 Kawˇrenˍhtuˆ 5:11) Maˇ˗awˍ ve kʼo ngaˬ hui chaw teˇ gʼaˇ geh awˍ caˇ ve kʼo, yawˇ geh tawˇ yaw daꞈ ve yoˬ. Leh chi ngaˬ hui chaw oˇ ve teˇ gʼaˇ geh meuˆ daꞈ tuˬ te laˇ ve yoˬ. Chi htaꞈ pa taw, Hkriꞈ yaˇ awˬ moˍ hkʼaw ve awˬ viˉ awˬ nyi, hawˉ hkʼaˆ oˇ ve teˇ gʼaˇ geh awˬ chawˇ maˇ te daꞈ cawˇ ve tehꞈ, Pawˇluꞈ beˆ maˍ laˇ ve htaꞈ ngaˬ hui hkʼa tawˍ lehˆ na gʼa ve yoˬ. Chi hkʼe te ve lehˬ, Hkriꞈ yaˇ awˬ moˍ hkʼaw maˇ daꞈ ve heuˆ la kuiˬ maˇ cawˬ. (1 Kawˇrenˍhtuˆ 5:5-7) Chi hkʼoˆ kaꞈ, Hkriꞈ yaˇ awˬ moˍ hkʼaw ve chaw hawˉ hkʼaˆ oˇ ve teˇ gʼaˇ geh awˬ chawˇ maˇ te˗oˬ ve kʼo, yawˇ Yaˬhoˉvaˬ htaꞈ hkʼaˬ hkʼe taw te yaꞈ ve dawˇ nyi tuˬ yoˬ. Chi yawˇ yaꞈ taw tuˬ te piˇ leh venˇ baˆ dawˇ hpfuhˆ tuˬ kaꞈ te piˇ ve yoˬ.
Te yaꞈ leh venˇ baˆ maˇ dawˇ hpfuhˆ ve chaw htaꞈ Hkriꞈ yaˇ awˬ moˍ hkʼaw tawˆ cheˆ piˇ tuˬ, Kawˇrenˍhtuˆ venˇ hkʼaw ve awˬ viˉ awˬ nyi beˆ maˍ piˇ tuˬ, Yaˬhoˉvaˬ lehˬ Pawˇluꞈ htaꞈ dawˇ pawnˍ piˇ leh liꞈ bvuhꞈ tcuh ve (Awˬ tawn 5 nyi sheˍ)
6. Pawˇluꞈ ve liꞈ Hkriꞈ yaˇ awˬ moˍ hkʼaw leh te yaꞈ ve chaw awˬ pon awˬ bon hkʼaˬ hkʼe cawˬ ve le?
6 Pawˇluꞈ yawˇ bvuhꞈ taˍ ve liꞈ Kawˇrenˍhtuˆ venˇ hkʼaw chehˇ ve Hkriꞈ yaˇ htaꞈ feu piˇ peuˬ hkʼawꞈ nawˉ, oˇ kaˬ lo ve awˬ viˉ awˬ nyi hkʼaˬ hkʼe haꞈ yuˬ tuˬ ve le naˍ, yawˇ htawˇ dawˇ nawˬ dawˇ cawˬ ve yoˬ. Oˇ kaˬ lo ve awˬ viˉ awˬ nyi Pawˇluꞈ beˆ maˍ piˇ ve htaꞈ hkʼa dehꞈ haꞈ yuˬ ve tehꞈ, Tiˇtuˆ Pawˇluꞈ htaꞈ kʼoˆ piˇ ve yoˬ. (2 Kawˇrenˍhtuˆ 7:6, 7) Yawˇ hui Pawˇluꞈ kʼoˆ piˇ ve tawˇ htaꞈ hkʼa dehꞈ gʼaꞈ te ve yoˬ. Chi hkʼoˆ kaꞈ, hkʼaˬ nyiˇ ha pa maˇ gaˬ sheˍ ve kaꞈ, te yaꞈ ve chaw venˇ baˆ dawˇ hpfuhˆ leh haiˬ ve awˬ ceuˬ htaꞈ maˇ kʼawꞈ te˗o. Yawˇ a shu yawˇ ve te hkʼaˇ dawˇ hkʼaˇ pa leh Yaˬhoˉvaˬ ve awˬ liˇ awˬ hkʼaˇ htaꞈ teˇ pawˆ kʼawꞈ gʼaꞈ te ve yoˬ. (2 Kawˇrenˍhtuˆ 7:8-11) Ngaˬ chi hkʼe te ve lehˬ, Pawˇluꞈ Hkriꞈ yaˇ awˬ moˍ hkʼaw hkʼaˬ hkʼe te tuˬ beˆ maˍ piˇ ve le?
KAWˇRENˍHTUˆ VENˇ HKʼAW VE HKRIꞈ YAˇ AWˬ MOˍ VENˇ BAˆ DAWˇ HPFUHˆ VE CHAW HTAꞈ HKʼAˬ HKʼE TE PIˇ CAWˇ VE LE?
7. Te yaꞈ ve chaw htaꞈ Hkriꞈ yaˇ awˬ moˍ hkʼaw tawˆ cheˆ piˇ ve awˬ bon hkʼaˬ hkʼe cawˬ ve le? (2 Kawˇrenˍhtuˆ 2:5-8)
7 2 Kawˇrenˍhtuˆ liꞈ 2:5-8 gʼaw sheˍ. Pawˇluꞈ kʼoˆ ve, te yaꞈ ve awˬ viˉ awˬ nyi hawˉ hkʼaˆ oˇ ve htaꞈ “yiˍ yanˍ piˇ ve lehˬ lawꞈ peuˬ.” Chi kʼoˆ gaˇ ve lehˬ, te yaꞈ ve chaw htaꞈ Hkriꞈ yaˇ awˬ moˍ hkʼaw tawˆ cheˆ piˇ peuˬ hkʼawꞈ nawˉ, yawˇ venˇ baˆ gʼa dawˇ hpfuhˆ cawˇ ve tehꞈ dawˇ ve yoˬ. Yawˇ venˇ baˆ dawˇ hpfuhˆ˗oˬ htaˇ, yawˇ htaꞈ kʼawꞈ maˍ piˇ tuˬ maˇ loˍ˗o.—Heˍbrehˇ 12:11.
8. Kawˇrenˍhtuˆ venˇ lo ve Hkriꞈ yaˇ awˬ moˍ hkʼaw aˬ htoꞈ ma te tuˬ Pawˇluꞈ beˆ maˍ piˇ ve le?
8 Pawˇluꞈ Kawˇrenˍhtuˆ venˇ hkʼaw awˬ viˉ awˬ nyi htaꞈ beˆ maˍ piˇ ve, “venˇ baˆ htaꞈ hpehˇ piˇ cawˇ leh kʼawꞈ dawˇ sha la piˇ cawˇ ve yoˬ.” Hawˉ hkʼaˆ oˇ ve teˇ gʼaˇ te yaꞈ leh oˇ kaˬ lo ve awˬ viˉ awˬ nyi htaꞈ Pawˇluꞈ beˆ maˍ piˇ sheˍ ve, ‘yawˇ htaꞈ awˬ tehˬ awˬ na haꞈ yuˬ piˇ cawˇ ve yoˬ.’ Te yaꞈ ve chaw htaꞈ Hkriꞈ yaˇ awˬ moˍ hkʼaw kʼawꞈ haꞈ yuˬ piˇ ve ceh tiˉ, Pawˇluꞈ awˬ viˉ awˬ nyi htaꞈ kʼoˆ piˇ ve maˇ heˆ tehꞈ chaˬ nyi sheˍ. Awˬ viˉ awˬ nyi oˇ ve teˇ gʼaˇ htaꞈ tawˇ yaw piˇ ve, leh te ve hkʼaw venˇ baˆ hpehˇ˗oˬ ve tehꞈ haꞈ pehnˇ ve hkʼaw hpeuꞈ maw piˇ sheˍ. Yawˇ hui chi hkʼe te htaˇ, awˬ viˉ awˬ nyi oˇ ve teˇ gʼaˇ htaꞈ Hkriꞈ yaˇ awˬ moˍ hkʼaw haꞈ yuˬ piˇ ve tehꞈ, hkʼa tawˍ lehˆ hpeuꞈ maw piˇ ve yoˬ.
9. Te yaꞈ ve chaw venˇ baˆ dawˇ hpfuhˆ ve htaꞈ venˇ baˆ hpehˇ piˇ tuˬ aˬ htoꞈ ma te chaw teˇ hpaˍ awˬ pon haˍ jaˇ tehꞈ dawˇ ve le?
9 Awˬ viˉ awˬ nyi hawˉ hkʼaˆ oˇ ve teˇ gʼaˇ htaꞈ Hkriꞈ yaˇ awˬ moˍ hkʼaw kʼawꞈ haꞈ yuˬ piˇ ve, chaw teˇ hpaˍ hpaˍ awˬ pon haˍ jaˇ tehꞈ dawˇ ve chaw cawˬ˗aw laˇ? Liꞈ hpu hkʼaw maˇ gʼa kʼoˆ laˇ taˍ. Yaꞈ hkʼaˇ, chaw teˇ hpaˍ hpaˍ awˬ pon haꞈ yuˬ piˇ tuˬ haˍ jaˇ ve yoˬ. Aˬ htoꞈ ma pa taw le? Awˬ lawn kʼo, yawˇ te ve awˬ ceuˬ Hkriꞈ yaˇ awˬ moˍ awˬ meh luˬ tuˬ te piˇ leh, chaw teˇ hpaˍ awˬ pon yaꞈ taw tuˬ kaꞈ te piˇ ve yoˬ. Yawˇ hui haˉ chawˇ haˉ paˆ maˇ te tuˬ coˇ caˇ jaˇ ve htawˇ, hawˉ hkʼaˆ oˇ ve teˇ gʼaˇ htaꞈ haꞈ pehnˇ ve hkʼaw haꞈ yuˬ piˇ ve chaw teˇ hpaˍ kʼo, maˇ hteˇ maˇ cawˇ ve tehꞈ dawˇ ve yoˬ. (Luˉkaꞈ 15:28-30 htaꞈ tehˆ daꞈ sheˍ.) Kawˇrenˍhtuˆ venˇ hkʼaw chehˇ ve Hkriꞈ yaˇ awˬ moˍ hkʼaw, oˇ ve teˇ gʼaˇ venˇ baˆ dawˇ hpfuhˆ ve htaꞈ Hkriꞈ yaˇ awˬ moˍ hkʼaw haꞈ pehnˇ ve tehꞈ, haꞈ yuˬ piˇ ve aˬ htoꞈ ma te a yeˇ uiˍ jaˇ ve le?
10-11. Te yaꞈ leh venˇ baˆ dawˇ hpfuhˆ ve chaw htaꞈ nyi haꞈ shaˉ paˍ venˇ baˆ maˇ hpehˇ piˇ ve kʼo hkʼaˬ hkʼe hpehꞈ la tuˬ le?
10 Te yaꞈ ve chaw awˬ tehˬ awˬ na venˇ baˆ dawˇ hpfuhˆ ve htaꞈ nyi haꞈ shaˉ paˍ Hkriꞈ yaˇ awˬ moˍ hkʼaw maˇ kʼawꞈ la tcuh ve, maˇ heˆ leh yawˇ kʼawꞈ la˗oˬ ve htawˇ, Hkriꞈ yaˇ awˬ moˍ hkʼaw ve chaw yawˇ htaꞈ haꞈ pehnˇ ve tehꞈ maˇ hpeuꞈ maw piˇ ve kʼo, hkʼaˬ hkʼe hpehꞈ tuˬ le? Dawˇ nyi sheˍ. Yawˇ ‘dawˇ haˍ jaˇ ve awˬ hkʼaw lo gʼa hkanˍ chehˇ ve yoˬ hehˉ.’ Yawˇ awˉ lawˉ htaˇ hkʼe Hkriꞈ yaˇ awˬ moˍ hkʼaw ve chaw teˇ gʼaˇ hpehꞈ maˇ gʼa taˬ tehꞈ dawˇ ve yoˬ. Yawˇ Yaˬhoˉvaˬ geh kʼawꞈ meuˆ daꞈ tuˬ awˬ gʼaˇ maˇ cawˬ leh, yawˇ te hkʼaˇ dawˇ hkʼaˇ pa ve kaꞈ awˬ bon maˇ cawˬ tehꞈ dawˇ ve yoˬ.
11 Te yaꞈ leh venˇ baˆ dawˇ hpfuhˆ ve chaw htaꞈ awˬ viˉ awˬ nyi venˇ baˆ maˇ hpehˇ piˇ ve kʼo, hkʼaˬ hkʼe hpehꞈ tuˬ le? Chi hkʼe te ve lehˬ, yawˇ Yaˬhoˉvaˬ geh maˇ kʼawꞈ meuˆ daꞈ tuˬ te piˇ ve yoˬ. Awˬ lawn kʼo, Yaˬhoˉvaˬ lehˬ venˇ baˆ dawˇ hpfuhˆ ve chaw htaꞈ venˇ baˆ hpehˇ piˇ ve, yawˇ hui maˇ henˇ yuˬ ve yoˬ. Yaꞈ hkʼaˇ, Saˍtanˍ haiˬ jaˇ leh ha kʼaˉ puiˉ ve maˇ cawˬ ve htaꞈ yawˇ hui henˇ yuˬ chehˇ ve yoˬ. Hkʼe te leh, heuˆ la kuiˬ lehˬ, awˬ viˉ awˬ nyi oˇ ve teˇ gʼaˇ Yaˬhoˉvaˬ ve kanˉ teˇ pawˆ kʼawꞈ te la tuˬ ve yonˍ hkʼaˇ htaꞈ te luˬ piˇ tuˬ, Saˍtanˍ yawˇ hui htaꞈ yehˇ ve laꞈ caˉ hpehꞈ ve yoˬ.—2 Kawˇrenˍhtuˆ 2:10, 11; Eˇfeˇsuꞈ 4:27.
12. Kawˇrenˍhtuˆ venˇ hkʼaw ve awˬ viˉ awˬ nyi hkʼaˬ hkʼe te Yaˬhoˉvaˬ htaꞈ henˇ yuˬ gʼa tuˬ le?
12 Kawˇrenˍhtuˆ venˇ hkʼaw ve awˬ viˉ awˬ nyi Yaˬhoˉvaˬ htaꞈ henˇ yuˬ ve yoˬ. Saˍtanˍ htaꞈ maˇ heˆ. Yawˇ chi hkʼe te gʼa tuˬ venˇ baˆ dawˇ hpfuhˆ ve chaw htaꞈ Yaˬhoˉvaˬ venˇ baˆ hpehˇ piˇ ve hkʼe, venˇ baˆ gʼa hpehˇ piˇ ve yoˬ. Liꞈ hpu bvuhꞈ paˍ teˇ hpaˍ Yaˬhoˉvaˬ htaꞈ hkʼaˬ hkʼe kʼoˆ ve teˇ geh chaˬ nyi sheˍ. Daˍviˆ kʼoˆ ve, “nawˬ geh bon lawˬ ve chaw hui htaꞈ nawˬ venˇ baˆ hpehˇ piˇ” ve yoˬ. (Chiˇ mvuh ve 86:5) Miˆhkaˍ kʼoˆ ve, ‘Gʼuiˬ sha˗oˬ, nawˬ htaꞈ shuˍ ve awˬ kaˍ awˬ nu gʼuiˬ sha teˇ gʼaˇ kaꞈ maˇ cawˬ. Nawˬ lehˬ chaw teˇ hpaˍ ve venˇ baˆ htaꞈ hpehˇ piˇ ve yoˬ.’ (Miˆhkaˍ 7:18) Leh Iˉsaˍyaˆ kʼoˆ ve, “haiˬ ve chaw teˇ hpaˍ htawˇ, a shu yawˇ ve a loˍ htaꞈ baˬ taˉ leh, nyi ma awˬ suhˉ kʼawꞈ pa piˇ lawˬ˗oꞈ. Yawˇ hui htaꞈ ngaˬ hui ve Jawˇ mawˇ Gʼuiˬ sha geh kʼawꞈ hpfuhˆ kʼawꞈ la piˇ lawˬ˗oꞈ. Awˬ lawn kʼo, yawˇ lehˬ ha kʼaˉ puiˉ leh venˇ baˆ hpehˇ piˇ puiˉ ve yoˬ.”—Iˉsaˍyaˆ 55:7.
13. Te yaꞈ ve chaw htaꞈ Hkriꞈ yaˇ awˬ moˍ hkʼaw kʼawꞈ kʼawꞈ la tcuh ve aˬ htoꞈ ma te keunˍ jaˇ ve le? (Awˇ ceˍ awˇ fa “ Kawˇrenˍhtuˆ venˇ lo Hkriꞈ yaˇ awˬ moˍ hkʼaw ve hawˉ hkʼaˆ hkʼaˬ hkʼe htaˇ kʼawꞈ la tuˬ haꞈ yuˬ piˇ ve le?” htaꞈ nyi sheˍ.)
13 Kawˇrenˍhtuˆ venˇ hkʼaw ve awˬ viˉ awˬ nyi Yaˬhoˉvaˬ htaꞈ henˇ yuˬ gʼa tuˬ, hawˉ hkʼaˆ oˇ ve teˇ gʼaˇ venˇ baˆ dawˇ hpfuhˆ˗oˬ ve htaꞈ yawˇ hui gʼa haꞈ yuˬ piˇ leh, yawˇ htaꞈ haꞈ ve tehꞈ gʼa hpeuꞈ maw piˇ ve yoˬ. Awˬ viˉ awˬ nyi chi ve teˇ hpaˍ Pawˇluꞈ beˆ maˍ piˇ ve htaꞈ gʼaꞈ te ve tehꞈ hpeuꞈ maw piˇ ve lehˬ, hkʼa peu˗eˬ htaꞈ “na yuˬ chehˇ” ve yoˬ. (2 Kawˇrenˍhtuˆ 2:9) Awˬ tehˬ kʼo, awˬ viˉ awˬ nyi hawˉ hkʼaˆ oˇ ve teˇ gʼaˇ htaꞈ Hkriꞈ yaˇ awˬ moˍ hkʼaw tawˆ cheˆ piˇ ve, hkʼaˬ nyiˇ ha pa maˇ gaˬ sheˍ ve kaꞈ kʼawꞈ kʼawꞈ la ve yoˬ. Yawˇ htaꞈ maˍ piˇ ve lehˬ, yawˇ venˇ baˆ dawˇ hpfuhˆ gʼa tuˬ te piˇ ve pa taw, oˇ hkʼe ceh kaꞈ lawꞈ˗oˬ ve yoˬ. Yawˇ htaꞈ Hkriꞈ yaˇ awˬ moˍ hkʼaw a yehˉ˗ehꞈ kʼawꞈ kʼawꞈ la tcuh˗a tehꞈ, nyi haꞈ shaˉ paˍ awˬ yanˇ ponˬ kʼai ve maˇ te tcuh cawˇ.
YAˬHOˉVAˬ HTEˇ VE CAWˇ VE LEH HA KʼAˉ VE HTAꞈ HENˇ YUˬ SHEˍ
14-15. Kawˇrenˍhtuˆ venˇ hkʼaw ve awˬ viˉ awˬ nyi lehˬ te yaꞈ ve chaw htaꞈ gu piˇ ve awˬ hkʼaˇ ngaˬ hui htaꞈ hkʼaˬ hkʼe maˍ laˇ ve le? (2 Peˍtruˆ 3:9) (Awˬ han htaꞈ nyi sheˍ.)
14 Kawˇrenˍhtuˆ venˇ hkʼaw ve awˬ viˉ awˬ nyi te yaꞈ ve chaw htaꞈ hkʼaˬ hkʼe gu piˇ ve awˬ hkʼaˇ, Yaˬhoˉvaˬ Liꞈ hpu hkʼaw bvuhꞈ keu tcuh taˍ ve lehˬ, “ngaˬ hui htaꞈ maˍ laˇ tuˬ” awˬ pon hpehꞈ ve yoˬ. (Roˉmaꞈ 15:4) Venˇ baˆ uiˍ jaˇ ve htaꞈ te yaꞈ ve Yaˬhoˉvaˬ maˇ teh taˍ ve tehꞈ, awˬ lawn chi ngaˬ hui htaꞈ maˍ laˇ ve yoˬ. Chaw teˇ hpaˍ dawˇ ve, Yaˬhoˉvaˬ ha kʼaˉ puiˉ ve pa taw, te yaꞈ leh venˇ baˆ maˇ dawˇ hpfuhˆ ve chaw htaꞈ Hkriꞈ yaˇ awˬ moˍ hkʼaw kʼawꞈ chehˇ tcuh sheˍ ve yoˬ. Yaꞈ hkʼaˇ, chi hkʼe maˇ heˆ. Yaˬhoˉvaˬ ha kʼaˉ puiˉ jaˇ ve htawˇ, te ve teˇ ceuˬ le le htaꞈ yawˇ maˇ haꞈ yuˬ leh yawˇ ve awˬ liˇ awˬ hkʼaˇ hkʼaˬ htaˆ kaꞈ hkʼa shuˍ hpehꞈ ve yoˬ. (Yuˇdaꞈ 4) Te yaꞈ leh venˇ baˆ maˇ dawˇ hpfuhˆ ve chaw htaꞈ Yaˬhoˉvaˬ lehˬ, Hkriꞈ yaˇ awˬ moˍ hkʼaw kʼawꞈ chehˇ tcuh ve kʼo, Hkriꞈ yaˇ awˬ moˍ hkʼaw ve chaw teˇ gʼaˇ le le kawˆ tuˬ cawˬ ve pa taw, yawˇ htaꞈ ha kʼaˉ ve tehꞈ maˇ hpeuꞈ maw piˇ ve yoˬ.—Tawˇ naˉ ve 13:20; 1 Kawˇrenˍhtuˆ 15:33.
15 Chi hkʼoˆ kaꞈ, Yaˬhoˉvaˬ lehˬ chaw teˇ gʼaˇ htaꞈ kaꞈ maˇ te luˬ gaˇ ve tehꞈ, ngaˬ hui gʼa henˇ˗oˬ ve yoˬ. Chi htaꞈ pa taw, te gʼa ve kʼo, Yaˬhoˉvaˬ lehˬ chaw yaˇ htaꞈ hkʼa dehꞈ ga piˇ gaˇ ve yoˬ. Te hkʼaˇ dawˇ hkʼaˇ pa leh Yaˬhoˉvaˬ geh awˉ lawˉ htaˇ hkʼe kʼawꞈ meuˆ daꞈ gaˇ ve chaw htaꞈ yawˇ ha kʼaˉ ve tehꞈ hpeuꞈ maw piˇ ve yoˬ. (Yeˍsaˍkeˍlaˆ 33:11; 2 Peˍtruˆ 3:9 gʼaw sheˍ.) Chi htaꞈ pa taw, Kawˇrenˍhtuˆ venˇ hkʼaw ve awˬ viˉ awˬ nyi lehˬ, hawˉ hkʼaˆ oˇ ve teˇ gʼaˇ venˇ baˆ dawˇ hpfuhˆ htaˇ, yawˇ hui hawˉ hkʼaˆ oˇ ve teˇ gʼaˇ htaꞈ venˇ baˆ hpehˇ piˇ leh Hkriꞈ yaˇ awˬ moˍ hkʼaw kʼawꞈ kʼawꞈ la tcuh tuˬ, Yaˬhoˉvaˬ Pawˇluꞈ htaꞈ cuˇ leh ga piˇ tcuh ve yoˬ.
Tawˆ cheˆ piˇ ve chaw Hkriꞈ yaˇ awˬ moˍ hkʼaw kʼawꞈ kʼawꞈ la htaˇ Yaˬhoˉvaˬ haꞈ leh ha kʼaˉ puiˉ ve htaꞈ ngaˬ hui henˇ yuˬ gʼa ve (Awˬ tawn 14-15 nyi sheˍ)
16. Kawˇrenˍhtuˆ venˇ hkʼaw ve awˬ viˉ awˬ nyi lehˬ te yaꞈ ve chaw htaꞈ gu piˇ ve awˬ hkʼaˇ nawˬ hkʼaˬ hkʼe dawˇ ve le?
16 Kawˇrenˍhtuˆ venˇ hkʼaw ve awˬ viˉ awˬ nyi lehˬ, te yaꞈ ve chaw htaꞈ gu piˇ ve awˬ hkʼaˇ, Yaˬhoˉvaˬ ve haꞈ pehnˇ ve leh hteˇ ve cawˇ ve htaꞈ ngaˬ hui mawˬ tuˬ te laˇ ve yoˬ. (Chiˇ mvuh ve 33:5) Nawˬ ha lehˬ jaˇ leh Yaˬhoˉvaˬ htaꞈ chiˇ mvuh gaˇ ve maˇ heˆ laˇ? Awˬ tehˬ kʼo, ngaˬ hui teˇ gʼaˇ le le venˇ baˆ yaˇ hpehꞈ leh Yaˬhoˉvaˬ venˇ baˆ hpehˇ laˇ tuˬ htaꞈ loˍ ve yoˬ. Hkʼe te leh, Yaˬhoˉvaˬ ngaˬ hui htaꞈ htaiˍ hkʼawꞈ laˇ ve awˬ bon uiˍ jaˇ ve yoˬ. Chi yawˇ ngaˬ hui htaꞈ venˇ baˆ hpehˇ laˇ gʼa tuˬ te piˇ ve yoˬ. Yaˬhoˉvaˬ yawˇ ve chaw htaꞈ haꞈ jaˇ ve tehꞈ ngaˬ hui gʼa shiˍ ve, awˬ gʼaˇ gʼa jaˇ leh ha lehˬ jaˇ ve yoˬ. Leh yawˇ ve chaw htaꞈ daꞈ jaˇ ve awˬ ceuˬ piˇ gaˇ ve yoˬ!
17. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?
17 Chi beuꞈ teˇ co˗e ve chaw venˇ baˆ uiˍ jaˇ ve htaꞈ te ve kʼo, nyi haꞈ shaˉ paˍ Yaˬhoˉvaˬ haꞈ pehnˇ ve htaꞈ henˇ yuˬ leh, te yaꞈ ve chaw venˇ baˆ dawˇ hpfuhˆ tuˬ hkʼaˬ hkʼe ga piˇ gʼa tuˬ le? Hkriꞈ yaˇ awˬ moˍ hkʼaw chaw teˇ hpaˍ htaꞈ tawˆ cheˆ piˇ ve, maˇ heˆ leh chaw teˇ hpaˍ htaꞈ Hkriꞈ yaˇ awˬ moˍ hkʼaw kʼawꞈ kʼawꞈ la tcuh tuˬ, nyi haꞈ shaˉ paˍ dawˇ cheˆ htaˇ, Hkriꞈ yaˇ awˬ moˍ hkʼaw ve awˬ viˉ awˬ nyi hkʼaˬ hkʼe te cawˇ ve le? Gʼuˇ suhˍ teˇ lawn hkʼaw teˇ geh henˇ tuˬ yoˬ.
KʼA MUIˬ HKAWˇ 109 Nyi ma awˬ tawˬ hkʼa gaˬ haꞈ daꞈ˗oꞈ
