1. Venˇ baˆ dawˇ hpfuhˆ ve aˬ htoꞈ ma htaꞈ kʼoˆ gaˇ ve le?

 Ngaˬ hui te yaꞈ htaˇ, venˇ baˆ dawˇ hpfuhˆ tuˬ a yeˇ uiˍ jaˇ. Liꞈ hpu hkʼaw venˇ baˆ dawˇ hpfuhˆ ve lehˬ, a shu yawˇ te yaꞈ taˍ ve htaꞈ nyi ma luˬ ve yoˬ. Yawˇ ve dawˇ hkʼaˇ pa ve, awˬ ceuˬ oˇ ve htaꞈ maˇ kʼawꞈ te˗o ve, leh maˇ kʼawꞈ te yaꞈ tuˬ coˇ caˇ ve yoˬ.—Kʼawꞈ kʼoˆ maˍ taˍ ve hkʼaw “Venˇ baˆ dawˇ hpfuhˆ ve” tawˇ hkawˇ htaꞈ nyi sheˍ.

2. Aˬ htoꞈ ma te ngaˬ hui teˇ gʼaˇ le le venˇ baˆ dawˇ hpfuhˆ ve awˬ lawn gʼa henˇ cawˇ ve le? (Neˍhaˍmiˆ 8:9-11)

² Chaw yaˇ teˇ gʼaˇ le le venˇ baˆ dawˇ hpfuhˆ tuˬ, awˬ lawn gʼa henˇ cawˇ ve yoˬ. Aˬ htoꞈ ma pa taw le? Awˬ lawn kʼo, ngaˬ hui teˇ nyi le le venˇ baˆ te ve yoˬ. Ngaˬ hui teˇ gʼaˇ le le Aˍdanˍ leh Eˇvaꞈ ve awˬ yaˇ awˬ duˬ hpehꞈ ve pa taw, venˇ baˆ yaˇ hpehꞈ leh gʼa suh˗e ve yoˬ. (Roˉmaꞈ 3:23; 5:12) Teˇ gʼaˇ˗ehˬ kaꞈ venˇ baˆ htaꞈ gu maˇ gʼa. Yonˍ hkʼaˇ yonˍ yeˬ jaˇ ve tcuh yaˇ Pawˇluꞈ htawˇ, venˇ baˆ htaꞈ tawˍ daꞈ tuˬ maˇ sha ve tehꞈ shiˍ ve yoˬ. (Roˉmaꞈ 7:21-24) Yaꞈ hkʼaˇ, ngaˬ hui venˇ baˆ yaˇ hpehꞈ ve pa taw, ngaˬ hui hkʼaˬ htaˆ kaꞈ nyi ma luˬ chehˇ ve tehꞈ kʼoˆ gaˇ ve laˇ? Maˇ heˆ. Yaˬhoˉvaˬ lehˬ ha kʼaˉ puiˉ jaˇ ve Gʼuiˬ sha hpehꞈ ve yoˬ. Yawˇ ngaˬ hui htaꞈ ha lehˬ ve cawˬ tcuh gaˇ ve yoˬ. Neˍhaˍmiˆ ve awˬ co˗e htaˇ, Yuˇdaꞈ chaw ve awˬ lawn htaꞈ dawˇ nyi sheˍ. (Neˍhaˍmiˆ 8:9-11 gʼaw sheˍ.) Yaˬhoˉvaˬ lehˬ, yawˇ hui te jaw ve venˇ baˆ htaꞈ pa taw, hkʼaˬ htaˆ kaꞈ nyi ma luˬ ve maˇ hpehꞈ tcuh gaˇ. Yaꞈ hkʼaˇ, yawˇ hui ha lehˬ ha kʼa ve hkʼaw Yaˬhoˉvaˬ htaꞈ oˉ kʼoˍ pui tcuh gaˇ ve yoˬ. Venˇ baˆ dawˇ hpfuhˆ ve lehˬ, nyi ma sha tuˬ te laˇ ve tehꞈ Yaˬhoˉvaˬ shiˍ ve yoˬ. Hkʼe te leh, awˬ lawn chi htaꞈ caˉ daꞈ ve yawˇ ngaˬ hui htaꞈ maˍ laˇ ve yoˬ. Ngaˬ hui venˇ baˆ dawˇ hpfuhˆ ve kʼo, ha kʼaˉ puiˉ jaˇ ve Yaˬhoˉvaˬ Gʼuiˬ sha lehˬ, ngaˬ hui htaꞈ venˇ baˆ hpehˇ laˇ tuˬ yoˬ tehꞈ yonˍ gʼa ve yoˬ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Venˇ baˆ dawˇ hpfuhˆ ve htaꞈ caˉ daꞈ ve ngaˬ hui leuˉ leh teˇ geh henˇ  sheˍ. Awˬ lawn chi ve hkʼaw ngaˬ hui 3 lawn htaꞈ teˇ geh henˇ tuˬ yoˬ. Awˉ lawˉ teˇ lawn, venˇ baˆ dawˇ hpfuhˆ ve awˬ lawn Iˉsaˍreˍlaˆ chaw hui htaꞈ Yaˬhoˉvaˬ hkʼaˬ hkʼe maˍ piˇ ve le? 2 lawn teˇ lawn, venˇ baˆ yaˇ venˇ baˆ dawˇ hpfuhˆ tuˬ Yaˬhoˉvaˬ hkʼaˬ hkʼe ga laˇ ve le? 3 lawn teˇ lawn, venˇ baˆ dawˇ hpfuhˆ ve awˬ lawn Yeˍsuˆ awˬ laꞈ gʼawˇ hui htaꞈ hkʼaˬ hkʼe maˍ piˇ ve le? Chi ve teˇ hpaˍ teˇ geh henˇ tuˬ yoˬ.

IˉSAˍREˍLAˆ CHAW VENˇ BAˆ DAWˇ HPFUHˆ VE CHAW HTAꞈ YAˬHOˉVAˬ Aˬ HTOꞈ MA MAˍ PIˇ VE LE?

4. Venˇ baˆ dawˇ hpfuhˆ ve awˬ lawn Yaˬhoˉvaˬ Iˉsaˍreˍlaˆ chaw htaꞈ hkʼaˬ hkʼe maˍ piˇ ve le?

⁴ Yaˬhoˉvaˬ Iˉsaˍreˍlaˆ chaw htaꞈ shaw hpoˆ leh yawˇ ve mvuhˇ miˬ yaˇ hpehꞈ la tcuh tuˬ te htaˇ, yawˇ yawˇ hui htaꞈ ka tiꞈ te piˇ ve yoˬ. Iˉsaˍreˍlaˆ chaw Yaˬhoˉvaˬ ve awˬ liˇ tawˇ hkawˇ htaꞈ hkʼaˬ htaˆ kaꞈ gʼaꞈ te ve kʼo, yawˇ yawˇ hui htaꞈ haꞈ shaˉ piˇ leh awˬ bon naꞈ piˇ tuˬ yoˬ. Yaˬhoˉvaˬ Moˉseˍ htaꞈ cuˇ leh yawˇ hui htaꞈ ka tiꞈ te piˇ ve, “yaꞈ nyi ngaˬ nawˬ hui htaꞈ piˇ laˇ chehˇ ve awˬ liˇ tawˇ hkawˇ teˇ hpaˍ lehˬ, nawˬ hui awˬ pon haˍ jaˇ ve awˬ ceuˬ hpehꞈ ve maˇ heˆ.” (Bon maˍ ve 30:11, 16) Iˉsaˍreˍlaˆ chaw hui Yaˬhoˉvaˬ htaꞈ hpfuhˆ leh, maˇ heˆ heˆ ve gʼuiˬ sha htaꞈ oˉ kʼoˍ pui ve kʼo, Yaˬhoˉvaˬ yawˇ hui htaꞈ awˬ bon maˇ naꞈ piˇ leh, yawˇ hui tuꞈ ve hkanˍ ve htaꞈ gʼa hpuˇ tuˬ yoˬ. Yaꞈ hkʼaˇ, yawˇ hui te yaꞈ ve htawˇ, Yaˬhoˉvaˬ yawˇ hui htaꞈ baˬ taˉ piˇ tuˬ ve htaꞈ kʼoˆ gaˇ ve maˇ heˆ. ‘Gʼuiˬ sha geh kʼawꞈ hpfuhˆ kʼawꞈ la leh, ngaˬ nawˬ hui htaꞈ peꞈ laˇ chehˇ ve awˬ liˇ tawˇ hkawˇ teˇ hpaˍ htaꞈ hkʼa dehꞈ na yuˬ˗oꞈ.’ (Bon maˍ ve 30:1-3, 17-20) Chi kʼoˆ gaˇ ve lehˬ, yawˇ hui venˇ baˆ dawˇ hpfuhˆ gʼa ve yoˬ. Yawˇ hui venˇ baˆ dawˇ hpfuhˆ ve kʼo, Yaˬhoˉvaˬ yawˇ hui geh kʼawꞈ meuˆ daꞈ leh awˬ bon naꞈ piˇ tuˬ yoˬ.

5. Iˉsaˍreˍlaˆ chaw htaꞈ Yaˬhoˉvaˬ dawˇ law chehˇ sheˍ ve tehꞈ hkʼaˬ hkʼe hpeuꞈ maw laˇ ve le? (2 Jawˇmawˇ 17:13, 14)

⁵ Iˉsaˍreˍlaˆ chaw lehˬ, Yaˬhoˉvaˬ leuˆ yuˬ taˍ ve mvuhˇ miˬ yaˇ hpehꞈ ve htawˇ, yawˇ htaꞈ laiˉ pawˆ hpfuhˆ ve yoˬ. Yawˇ hui maˇ heˆ heˆ ve gʼuiˬ sha htaꞈ oˉ kʼoˍ pui ve awˬ hkʼoˆ kaꞈ, yawˇ hui haiˬ ve laiˉ ceuˬ htaꞈ te sheˍ ve yoˬ. Hkʼe te leh, yawˇ hui tuꞈ ve hkanˍ ve gʼa hpuˇ ve yoˬ. Yaꞈ hkʼaˇ, Yaˬhoˉvaˬ yawˇ hui htaꞈ dawˇ law chehˇ sheˍ. Iˉsaˍreˍlaˆ chaw venˇ baˆ dawˇ hpfuhˆ leh Yaˬhoˉvaˬ geh kʼawꞈ la tuˬ yawˇ tcuh kaˍ paˍ htaꞈ yawˇ hui geh laiˉ pawˆ kʼai tcuh ve yoˬ.—2 Jawˇmawˇ 17:13, 14 gʼaw sheˍ.

6. Yaˬhoˉvaˬ yawˇ ve tcuh kaˍ paˍ htaꞈ cuˇ leh Iˉsaˍreˍlaˆ chaw hui htaꞈ shaˍ tiꞈ hkʼaˬ hkʼe piˇ ve le? (Awˬ han htaꞈ nyi sheˍ.)

⁶ Laiˉ pawˆ kʼo, Yaˬhoˉvaˬ tcuh kaˍ paˍ htaꞈ cuˇ leh  Iˉsaˍreˍlaˆ chaw htaꞈ shaˍ tiꞈ piˇ tcuh ve yoˬ. Tawˇ pa haˉ te kʼo, Yaˬhoˉvaˬ tcuh kaˍ paˍ Iˉsaˍyaˆ htaꞈ cuˇ leh kʼoˆ piˇ tcuh ve, “ka tiꞈ maˇ yeˬ ve Iˉsaˍreˍlaˆ chaw hui˗oˬ, ngaˬ geh kʼawꞈ hpfuhˆ kʼawꞈ la˗o. Ngaˬ lehˬ ha kʼaˉ puiˉ ve pa taw, hkʼaˬ htaˆ kaꞈ ngaˬ nawˬ hui htaꞈ nyi ma zuhˆ chehˇ tuˬ ve maˇ heˆ. Ngaˬ hui Gʼuiˬ sha htaꞈ baˬ taˉ ve lehˬ, yaꞈ jaˇ peuˬ.” (Yeˍraˍmiˆ 3:12, 13) Yaˬhoˉvaˬ tcuh kaˍ paˍ Yawˇlaˆ htaꞈ cuˇ leh yawˇ hui htaꞈ kʼoˆ piˇ tcuh ve, “nawˬ hui ve nyi ma awˬ tawˬ hkʼa gaˬ ngaˬ geh kʼawꞈ hpfuhˆ kʼawꞈ la˗o.” (Yawˇlaˆ 2:12, 13) Yaˬhoˉvaˬ tcuh kaˍ paˍ Iˉsaˍyaˆ htaꞈ yawˇ hui geh bon maˍ˗e tcuh leh kʼoˆ piˇ tcuh ve, “daꞈ kehˬ la tuˬ nawˬ hui a shu yawˇ awˬ to htaꞈ tsuhˇ baˬ˗oꞈ. Nawˬ hui te chehˇ ve chaꞈ chiˆ ve kanˉ hkʼa peu˗eˬ htaꞈ baˬ taˉ˗oˆ.” (Iˉsaˍyaˆ 1:16-19) Chi hkʼoˆ kaꞈ, Yaˬhoˉvaˬ Yeˍsaˍkeˍlaˆ htaꞈ cuˇ leh yawˇ hui htaꞈ kʼoˆ piˇ tcuh ve, ‘haiˬ ve chaw teˇ gʼaˇ suh˗e ve pa taw ngaˬ ha lehˬ ve yoˬ, tehꞈ nawˬ dawˇ ve laˇ? Yawˇ venˇ baˆ dawˇ hpfuhˆ leh kʼawꞈ teꞈ chehˇ ve htaꞈ ngaˬ mawˬ gaˇ ve yoˬ. Nawˬ hui teˇ gʼaˇ htaꞈ kaꞈ ngaˬ maˇ suh˗e piˇ lawˬ gaˇ. Chi htaꞈ pa taw, nawˬ hui venˇ baˆ dawˇ hpfuhˆ leh a shaꞈ teꞈ chehˇ˗oˆ.’ (Yeˍsaˍkeˍlaˆ 18:23, 32) Chaw yaˇ co co taiˍ taiˍ a shaꞈ gʼa teꞈ chehˇ tuˬ venˇ baˆ dawˇ hpfuhˆ ve kʼo, Yaˬhoˉvaˬ ha lehˬ jaˇ tuˬ yoˬ. Chaw yaˇ venˇ baˆ dawˇ hpfuhˆ˗oˬ htaˇ hehꞈ Yaˬhoˉvaˬ ga piˇ tuˬ maˇ law chehˇ. Teˇ lawn lawn htaꞈ teˇ geh nyi sheˍ.

7. Yaˬhoˉvaˬ Iˉsaˍreˍlaˆ chaw htaꞈ maˍ piˇ tuˬ tcuh kaˍ paˍ Hawˇseˍ leh yawˇ ve awˬ miˇ ma ve awˬ lawn htaꞈ cuˇ leh hkʼaˬ hkʼe maˍ piˇ ve le?

⁷ Tcuh kaˍ paˍ Hawˇseˍ ve awˬ miˇ ma Gawˇmaˍ ve awˬ lawn htaꞈ cuˇ leh, Yaˬhoˉvaˬ Iˉsaˍreˍlaˆ chaw htaꞈ maˍ piˇ ve yoˬ. Gawˇmaˍ haˉ chawˇ haˉ paˆ te peuˬ hkʼawꞈ nawˉ, yawˇ Hawˇseˍ htaꞈ baˬ taˉ leh awˬ nu ve hawˉ hkʼaˆ geh ca chehˇ˗e ve yoˬ. Yaꞈ hkʼaˇ, Yaˬhoˉvaˬ Gawˇmaˍ htaꞈ maˇ ga piˇ˗oˬ ve laˇ? Chaw yaˇ teˇ gʼaˇ le le ve nyi ma htaꞈ shiˍ shehˍ hpaˇ Yaˬhoˉvaˬ Hawˇseˍ htaꞈ kʼoˆ piˇ ve, “shu htaꞈ haˉ chawˇ haˉ paˆ te chehˇ ve yaˇ miˇ teˇ gʼaˇ htaꞈ nawˬ ca kʼawꞈ heuˆ loˬ. Ngaˬ ve chaw teˇ hpaˍ lehˬ awˬ nu ve gʼuiˬ sha teˇ hpaˍ htaꞈ oˉ kʼoˍ ca pui leh, shaˉ hoꞈ teˇ hpaˍ htaꞈ a pehˉ meuˇ shiˍ awˬ goˇ ca tanˇ piˇ chehˇ ve htawˇ, ngaˬ yawˇ hui htaꞈ haꞈ chehˇ ve hkʼa shuˍ, nawˬ htawˇ yaˇ miˇ oˇ ve htaꞈ gʼa haꞈ tuˬ yoˬ.” (Hawˇseˍ 3:1; Tawˇ naˉ ve 16:2) Hawˇseˍ ve awˬ miˇ ma venˇ baˆ uiˍ jaˇ ve htaꞈ te chehˇ sheˍ ve tehꞈ chaˬ nyi sheˍ. Yaꞈ hkʼaˇ, Yaˬhoˉvaˬ Hawˇseˍ htaꞈ yawˇ geh kʼai tcuh ve, venˇ baˆ hpehˇ piˇ tcuh ve, leh yaˇ miˇ oˇ ve htaꞈ kʼawꞈ heuˆ loˬ tehꞈ kʼoˆ piˇ ve yoˬ. a Yaˬhoˉvaˬ Iˉsaˍreˍlaˆ chaw htaꞈ hkʼaˬ hkʼe dawˇ ve awˬ lawn, chi ve htaꞈ cuˇ leh maˍ piˇ ve yoˬ. Yawˇ hui venˇ baˆ uiˍ jaˇ ve htaꞈ te ve htawˇ, yawˇ yawˇ hui htaꞈ haꞈ chehˇ sheˍ ve yoˬ. Yawˇ hui venˇ baˆ dawˇ hpfuhˆ leh te hkʼaˇ dawˇ hkʼaˇ pa tuˬ kaꞈ, Yaˬhoˉvaˬ ga piˇ ve yoˬ. Awˬ lawn chi ngaˬ hui htaꞈ maˍ laˇ ve lehˬ, Yaˬhoˉvaˬ chaw yaˇ teˇ gʼaˇ le le ve nyi ma htaꞈ shiˍ gʼa leh venˇ baˆ uiˍ jaˇ ve htaꞈ te ve chaw venˇ baˆ dawˇ hpfuhˆ tuˬ yawˇ coˇ caˇ leh ga piˇ ve yoˬ. (Tawˇ naˉ ve 17:3) Aˬ htoꞈ ma pa taw Yaˬhoˉvaˬ chi hkʼe te ve teˇ geh nyi sheˍ.

VENˇ BAˆ YAˇ DAWˇ HPFUHˆ TUˬ YAˬHOˉVAˬ HKʼAˬ HKʼE GA PIˇ VE LE?

8. Yaˬhoˉvaˬ lehˬ Kaˍiˉnaˆ venˇ baˆ dawˇ hpfuhˆ tuˬ hkʼaˬ hkʼe ga piˇ ve le? (Awˬ hkuiˉ puiˍ 4:3-7) (Awˬ han htaꞈ nyi sheˍ.)

⁸ Kaˍiˉnaˆ lehˬ Aˍdanˍ leh Eˇvaꞈ haꞈ jaˇ ve yaˇ paˍ hpehꞈ ve yoˬ. Yawˇ awˬ pa awˬ e geh gʼa ve venˇ baˆ htaꞈ pa taw, maˇ daꞈ ve awˬ ceuˬ htaꞈ te tuˬ te piˇ ve yoˬ. Yaꞈ hkʼaˇ, chi hkʼe ceh tiˉ maˇ heˆ. Liꞈ hpu hkʼaw kʼoˆ sheˍ ve, ‘yawˇ te ve kanˉ teˇ hpaˍ haiˬ jaˇ ve yoˬ.’ (1 Yoˇhanˬ 3:12) Chi ve htaꞈ pa taw, Yaˬhoˉvaˬ lehˬ “Kaˍiˉnaˆ ve tanˇ tuˬ htaꞈ yawˇ maˇ haꞈ yuˬ.” Kaˍiˉnaˆ te hkʼaˇ dawˇ hkʼaˇ pa cawˇ ve htawˇ, “Kaˍiˉnaˆ nyi ma zuhˆ jaˇ ve yoˬ.” Hkʼe kʼo, Yaˬhoˉvaˬ hkʼaˬ hkʼe te ve le? Yawˇ Kaˍiˉnaˆ geh hteˇ˗ehˬ yaw daꞈ ve yoˬ. (Awˬ hkuiˉ puiˍ 4:3-7 gʼaw sheˍ.) Kaˍiˉnaˆ te hkʼaˇ dawˇ hkʼaˇ pa leh daꞈ ve htaꞈ te ve kʼo, Yaˬhoˉvaˬ haꞈ pehnˇ ve hkʼaw Kaˍiˉnaˆ geh daꞈ ve tawˇ yaw daꞈ tuˬ, awˬ hkʼaˇ ca ve htaꞈ chaˬ nyi sheˍ. Leh yawˇ Kaˍiˉnaˆ htaꞈ awˬ bon naꞈ piˇ tuˬ yoˬ. Kaˍiˉnaˆ nyi ma zuhˆ chehˇ sheˍ ve kʼo, yawˇ uiˍ jaˇ ve venˇ baˆ htaꞈ te leh maˇ daꞈ ve awˬ ceuˬ gʼa hpuˇ tuˬ yoˬ tehꞈ, Yaˬhoˉvaˬ yawˇ htaꞈ shaˍ tiꞈ piˇ ve yoˬ. Kaˍiˉnaˆ Yaˬhoˉvaˬ ve hkawˇ maˇ na yuˬ ve pa taw, nyi ma luˬ jaˇ. Yawˇ venˇ baˆ dawˇ hpfuhˆ tuˬ Yaˬhoˉvaˬ ga laˇ tuˬ maˇ lawˬ. Kaˍiˉnaˆ Yaˬhoˉvaˬ ve hkawˇ maˇ na yuˬ hkʼawꞈ nawˉ, Yaˬhoˉvaˬ lehˬ awˬ nu ve venˇ baˆ yaˇ htaꞈ maˇ ga piˇ˗o ve laˇ? Maˇ heˆ.

9. Yaˬhoˉvaˬ lehˬ Daˍviˆ venˇ baˆ dawˇ hpfuhˆ tuˬ hkʼaˬ hkʼe ga piˇ ve le?

 ⁹ Yaˬhoˉvaˬ lehˬ jawˇ mawˇ Daˍviˆ htaꞈ haꞈ jaˇ ve yoˬ. Yaˬhoˉvaˬ lehˬ Daˍviˆ htaꞈ “ngaˬ nyi ma cawˇ ve chaw” hpehꞈ ve tehꞈ kʼoˆ piˇ ve yoˬ. (Tcuh yaˇ 13:22) Yaꞈ hkʼaˇ, Daˍviˆ venˇ baˆ uiˍ jaˇ ve htaꞈ te ve yoˬ. Yawˇ haˉ chawˇ haˉ paˆ te leh chaw htaꞈ kaꞈ tiˇ pehˍ ve yoˬ. Moˉseˍ ve awˬ liˇ awˬ hkʼaˇ hkʼaw kʼo, Daˍviˆ lehˬ suh keunˍ ve yoˬ. (Oˉ kʼoˍ pui ve 20:10; Heh puiˉ hkʼaw 35:31) Yaꞈ hkʼaˇ, Yaˬhoˉvaˬ lehˬ Daˍviˆ venˇ baˆ dawˇ hpfuhˆ tuˬ ga piˇ ve yoˬ. b Oˇ ve teˇ yanˇ, Daˍviˆ venˇ baˆ dawˇ hpfuhˆ˗oˬ ve tehꞈ maˇ hpeuꞈ maw piˇ ve pa taw, Yaˬhoˉvaˬ lehˬ tcuh kaˍ paˍ Naˍtanˍ htaꞈ Daˍviˆ geh kʼai tcuh ve yoˬ. Naˍtanˍ yehˇ ve awˬ lawn Daˍviˆ ve nyi ma hkʼaw gaˬ jaˇ ve pa taw, yawˇ venˇ baˆ dawˇ hpfuhˆ tuˬ te piˇ ve yoˬ. (2 Saˍmo˗eˍlaˆ 12:1-14) Daˍviˆ yawˇ awˬ tehˬ awˬ na venˇ baˆ dawˇ hpfuhˆ˗oˬ ve tehꞈ hpeuꞈ maw piˇ tuˬ, Chiˇ mvuh ve liꞈ teˇ puꞈ bvuhꞈ ve yoˬ. (Chiˇ mvuh ve liꞈ kaˇ nanˉ uiˍ 51 awˬ hkʼoˆ ve awˬ lawn) Chiˇ mvuh ve liꞈ chi teˇ puꞈ hkʼaw venˇ baˆ yaˇ maˇ maˇ venˇ baˆ dawˇ hpfuhˆ tuˬ ga piˇ ve yoˬ. Yaˬhoˉvaˬ haꞈ pehnˇ ve hkʼaw Daˍviˆ venˇ baˆ dawˇ hpfuhˆ tuˬ ga piˇ ve ngaˬ hui ha lehˬ jaˇ ve maˇ heˆ laˇ?

10. Venˇ baˆ te ve chaw htaꞈ Yaˬhoˉvaˬ yeunˇ hkanˍ leh venˇ baˆ hpehˇ piˇ ve htaꞈ caˉ daꞈ ve nawˬ hkʼaˬ hkʼe dawˇ ve le?

¹⁰ Venˇ baˆ te leh haiˬ ve teˇ ceuˬ le le htaꞈ Yaˬhoˉvaˬ nyi bawˬ jaˇ. (Chiˇ mvuh ve 5:4, 5) Yaꞈ hkʼaˇ, chi hkʼe hpehꞈ ve htawˇ, ngaˬ hui teˇ gʼaˇ le le venˇ baˆ yaˇ hpehꞈ ve htaꞈ yawˇ shiˍ ve yoˬ. Yaˬhoˉvaˬ ngaˬ hui htaꞈ haꞈ jaˇ ve pa taw, ngaˬ hui venˇ baˆ htaꞈ tawˍ daꞈ tuˬ yawˇ ga laˇ ve yoˬ. Venˇ baˆ te ve chaw teˇ gʼaˇ le le dawˇ hpfuhˆ tuˬ, leh yawˇ venˇ baˆ uiˍ jaˇ ve htaꞈ te ve htawˇ Yaˬhoˉvaˬ geh kʼawꞈ meuˆ daꞈ tuˬ kaꞈ ga piˇ ve yoˬ. Chi hkʼe ve ngaˬ hui gʼa shiˍ htaˇ, nyi ma sha jaˇ ve yoˬ. Yaˬhoˉvaˬ ngaˬ hui htaꞈ yeunˇ hkanˍ laˇ leh venˇ baˆ hpehˇ laˇ ve tehꞈ gʼa shiˍ htaˇ, ngaˬ hui yawˇ htaꞈ ka tiꞈ yeˬ tuˬ dawˇ teh taˍ gaˇ leh, venˇ baˆ te yaꞈ htaˇ haˆ dawˇ hpfuhˆ gaˇ ve yoˬ. Venˇ baˆ dawˇ hpfuhˆ ve awˬ lawn Yeˍsuˆ awˬ laꞈ gʼawˇ hui htaꞈ hkʼaˬ hkʼe maˍ piˇ ve teˇ geh kʼawꞈ nyi sheˍ.

VENˇ BAˆ DAWˇ HPFUHˆ VE AWˬ LAWN YEˍSUˆ AWˬ LAꞈ GʼAWˇ HUI HTAꞈ HKʼAˬ HKʼE MAˍ PIˇ VE LE?

11-12. Yaˬhoˉvaˬ lehˬ venˇ baˆ hpehˇ piˇ puiˉ ve Gʼuiˬ sha hpehꞈ ve tehꞈ chaw yaˇ mawˬ tuˬ Yeˍsuˆ aˬ htoꞈ ma maˍ piˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹¹ Awˉ lawˉ peuˇ teˇ co˗e htaˇ Maˍsiˉyaꞈ lehˬ miˬ guiˬ hkʼoˆ lo paw la ve yoˬ. Peuˬ taˉ ve teˇ lawn hkʼaw kʼoˆ ve hkʼa shuˍ, venˇ baˆ dawˇ hpfuhˆ ve lehˬ hkʼaˬ hkʼe taw a yeˇ uiˍ jaˇ ve tehꞈ, Yaˬhoˉvaˬ lehˬ Baˆtiˆsaˬ piˇ paˍ  Yoˇhanˬ leh Yeˍsuˆ htaꞈ cuˇ leh chaw yaˇ htaꞈ maˍ piˇ tcuh ve yoˬ.—Maꞈhtehˍ 3:1, 2; 4:17.

¹² Yeˍsuˆ miˬ guiˬ hkʼoˆ lo Gʼuiˬ sha ve kanˉ te ve awˬ yanˇ htaˇ, Yaˬhoˉvaˬ lehˬ venˇ baˆ hpehˇ piˇ puiˉ ve Gʼuiˬ sha hpehꞈ ve tehꞈ chaw yaˇ shiˍ tuˬ, yawˇ maˍ piˇ ve yoˬ. Chi hkʼe te tuˬ Yeˍsuˆ lehˬ mehˉ kʼai ve yaˇ paˍ ve awˬ lawn tawˇ pa haˉ tehˆ maˍ piˇ ve yoˬ. Yaˇ paˍ chi ve teˇ gʼaˇ lehˬ yawˇ ve te hkʼaˇ dawˇ hkʼaˇ htaꞈ te tuˬ leuˆ yuˬ ve yoˬ. Yaꞈ hkʼaˇ, laiˉ hkʼawꞈ peuˬ hkʼawꞈ nawˉ, yawˇ “kʼawꞈ shiˍ kʼawꞈ nawˇ” la ve yoˬ. Leh aˉ hkʼaw kʼawꞈ kʼawꞈ˗e ve yoˬ. Awˬ pa hkʼaˬ hkʼe dawˇ ve le? Yeˍsuˆ kʼoˆ ve, “yawˇ vuiˇ kuiˬ lo kʼawꞈ la chehˇ ve htaꞈ awˬ pa gʼa mawˬ htaˇ, yawˇ htaꞈ ha kʼaˉ leh, yawˇ geh gʼuiˇ kʼai ve yoˬ. Awˬ yaˇ paˍ ve kʼawˍ peˍ htaꞈ yawˇ kʼuˉ taˍ leh boˆ nu ve yoˬ.” Awˉ lawˉ htaˇ yaˇ paˍ chi ve teˇ gʼaˇ lehˬ, awˬ pa ve yehˬ hkʼaw lo ve awˬ ceˬ hkʼe shawˍ laˇ tuˬ lawˬ ve yoˬ. Yaꞈ hkʼaˇ, awˬ pa yawˇ htaꞈ venˇ baˆ hpehˇ piˇ leh yehˬ kʼa hkʼaw ve chaw hkʼe kʼawꞈ shawˍ piˇ ve yoˬ. Leh yawˇ htaꞈ “ngaˬ yaˇ paˍ” tehꞈ kuˬ piˇ ve yoˬ. Awˬ pa yawˇ htaꞈ kʼoˆ piˇ ve, “mehˉ kʼai peuˬ ve htawˇ, chi beuꞈ kʼawꞈ mawˬ peuˬ.” (Luˉkaꞈ 15:11-32) Yeˍsuˆ miˬ guiˬ hkʼoˆ lo maˇ laˬ sheˍ htaˇ, yawˇ mvuhˇ naw ma hkʼoˆ lo a shaꞈ teꞈ chehˇ ve yoˬ. Venˇ baˆ te yaꞈ ve chaw htaꞈ Yeˍsuˆ yawˇ ve Awˬ pa ha kʼaˉ ve hkʼaw venˇ baˆ hpehˇ piˇ ve htaꞈ yawˇ gʼa mawˬ ve yoˬ. Yeˍsuˆ tawˇ pa haˉ tehˆ maˍ laˇ ve chi hkʼaw, ngaˬ hui nyi ma gawˬ lehˍ cawˬ tuˬ te laˇ leh Yaˬhoˉvaˬ ha kʼaˉ puiˉ jaˇ ve Gʼuiˬ sha hpehꞈ ve tehꞈ kaꞈ yonˍ gʼa tuˬ te laˇ ve yoˬ.

13-14. Tcuh yaˇ Peˍtruˆ lehˬ venˇ baˆ dawˇ hpfuhˆ ve htaꞈ caˉ daꞈ ve aˬ htoꞈ ma gʼa henˇ ve le? Leh awˬ lawn chi yawˇ awˬ nu ve chaw htaꞈ hkʼaˬ hkʼe maˍ piˇ ve le? (Awˬ han htaꞈ nyi sheˍ.)

¹³ Venˇ baˆ dawˇ hpfuhˆ ve leh venˇ baˆ hpehˇ piˇ ve htaꞈ caˉ daꞈ ve, Yeˍsuˆ geh tcuh yaˇ Peˍtruˆ laiˉ ceuˬ henˇ yuˬ gʼa ve yoˬ. Peˍtruˆ laiˉ pawˆ te yaꞈ ve htawˇ, Yeˍsuˆ yawˇ htaꞈ venˇ baˆ hpehˇ piˇ ve yoˬ. Tawˇ pa haˉ te kʼo, Peˍtruˆ Yeˍsuˆ htaꞈ maˇ shiˍ tehꞈ 3 pawˆ chiˇ baˬ peuˬ hkʼawꞈ nawˉ, yawˇ nyi ma luˬ jaˇ ve yoˬ. (Maꞈhtehˍ 26:34, 35, 69-75) Yaꞈ hkʼaˇ, Yeˍsuˆ kʼawꞈ teꞈ tu la peuˬ hkʼawꞈ nawˉ, Yeˍsuˆ ve awˬ to Peˍtruˆ htaꞈ mawˬ tcuh ve yoˬ. (Luˉkaꞈ 24:33, 34; 1 Kawˇrenˍhtuˆ 15:3-5) Oˇ ve teˇ yanˇ Peˍtruˆ venˇ baˆ dawˇ hpfuhˆ˗oˬ ve tehꞈ, Yeˍsuˆ shiˍ ve yoˬ. Yeˍsuˆ Peˍtruˆ htaꞈ venˇ baˆ hpehˇ laˇ˗oˬ ve tehꞈ yonˍ gʼa tuˬ te piˇ ve yoˬ.—Maˍkuˆ liꞈ 16:7 hkʼaw Liꞈ hpu henˇ tuˬ ve liꞈ hkʼaw “Peˍtruˆ” kʼoˆ ve tawˇ hkawˇ htaꞈ nyi sheˍ.

¹⁴ Venˇ baˆ dawˇ hpfuhˆ ve leh venˇ baˆ hpehˇ laˇ ve  aˬ htoꞈ ma htaꞈ kʼoˆ gaˇ ve, Peˍtruˆ shiˍ leh na gʼa ve yoˬ. Awˬ lawn kʼo, chi hkʼe ve yawˇ gʼa hpuˇ jaw ve yoˬ. Hkʼe te leh, awˬ lawn chi yawˇ awˬ nu ve chaw htaꞈ maˍ piˇ gʼa ve yoˬ. Peˍteˍkoˆteˍ pawehˇ te ve maˇ maw hkʼawꞈ nawˉ, Peˍtruˆ lehˬ Yuˇdaꞈ chaw teˇ moˍ htaꞈ bon gʼa maˍ piˇ ve yoˬ. Yawˇ hui Meˍsiˉyaꞈ htaꞈ tiˇ pehˍ˗oˬ ve awˬ lawn yawˇ yawˇ hui htaꞈ kʼoˆ piˇ ve yoˬ. Yaꞈ hkʼaˇ, Peˍtruˆ haꞈ pehnˇ ve hkʼaw yawˇ hui htaꞈ awˬ gʼaˇ piˇ ve, “Gʼuiˬ sha nawˬ hui ve venˇ baˆ htaꞈ shiˆ baˬ laˇ tuˬ, venˇ baˆ htaꞈ dawˇ hpfuhˆ leh nyi ma kʼawꞈ pa˗o. Chi hkʼe te ve kʼo, Jawˇ mawˇ Gʼuiˬ sha lo laˬ ve dawˇ sha ve awˬ yanˇ gaˬ la” ve yoˬ. (Tcuh yaˇ 3:14, 15, 17, 19) Venˇ baˆ dawˇ hpfuhˆ ve lehˬ, venˇ baˆ yaˇ kʼawꞈ kʼawꞈ la gaˇ tuˬ Peˍtruˆ ve awˬ lawn maˍ laˇ ve yoˬ. Chi ve lehˬ yawˇ ve te hkʼaˇ dawˇ hkʼaˇ pa leh, Gʼuiˬ sha nyi hkʼaˇ suh tuˬ kʼawꞈ te ve htaꞈ kʼoˆ gaˇ ve yoˬ. Chi hkʼoˆ kaꞈ, Peˍtruˆ kʼawꞈ kʼoˆ sheˍ ve, Yaˬhoˉvaˬ lehˬ venˇ baˆ htaꞈ shiˆ baˬ piˇ leh maˇ te jaw ve hkʼe kʼawꞈ te piˇ tuˬ yoˬ. Laiˉ chi hkʼawꞈ peuˬ hkʼawꞈ nawˉ, Peˍtruˆ Hkriꞈ yaˇ hui htaꞈ htawˆ hkanˍ piˇ ve, ‘Yaˬhoˉvaˬ lehˬ chaw hkʼa peu˗eˬ venˇ baˆ htaꞈ dawˇ hpfuhˆ leh teˇ gʼaˇ kaꞈ maˇ gʼa luˬ kʼai tuˬ yawˇ heuˆ gaˇ ve pa taw, yawˇ nawˬ hui htaꞈ yeunˇ hkanˍ chehˇ ve teˇ ceuˬ yoˬ.’ (2 Peˍtruˆ 3:9) Yawˇ venˇ baˆ uiˍ jaˇ ve htaꞈ te ve htawˇ, chi ve lehˬ Hkriꞈ yaˇ teˇ gʼaˇ le le awˬ pon daꞈ jaˇ ve dawˇ law kuiˬ hpehꞈ ve yoˬ.

15-16. (a) Venˇ baˆ hpehˇ piˇ ve htaꞈ caˉ daꞈ ve Pawˇluꞈ hkʼaˬ hkʼe gʼa henˇ ve le? (1 Tiˆmoˉseˍ 1:12-15) (b) Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

¹⁵ Taˍsuˆ venˇ lo chehˇ ve Sawˉluꞈ haiˬ ve laiˉ ceuˬ htaꞈ te jaw ve yoˬ. Yawˇ Yeˍsuˆ ve awˬ laꞈ gʼawˇ htaꞈ fawˉ mehˍ piˇ jaˇ ve yoˬ. Maˇ˗awˍ ve Hkriꞈ yaˇ lehˬ, chaw chi teˇ gʼaˇ te hkʼaˇ dawˇ hkʼaˇ pa maˇ gʼa leh venˇ baˆ dawˇ hpfuhˆ maˇ gʼa taˬ kaꞈ dawˇ ve yoˬ. Yaꞈ hkʼaˇ, Yeˍsuˆ chi hkʼe maˇ dawˇ. Sawˉluꞈ a shu yawˇ ve te hkʼaˇ dawˇ hkʼaˇ pa leh venˇ baˆ dawˇ hpfuhˆ gʼa tuˬ yoˬ tehꞈ Yeˍsuˆ shiˍ ve yoˬ. Sawˉluꞈ daꞈ ve te hkʼaˇ dawˇ hkʼaˇ cawˬ ve tehꞈ Yeˍsuˆ leh Yaˬhoˉvaˬ mawˬ ve yoˬ. Yeˍsuˆ kʼoˆ ve, “ngaˬ ve awˬ meh htaꞈ pfuhˇ kʼai tuˬ, yawˇ lehˬ ngaˬ leuˆ yuˬ taˍ ve awˬ hkʼeun hpehꞈ ve yoˬ.” (Tcuh yaˇ 9:15) Yeˍsuˆ anˇ tuˬ te leh Sawˉluꞈ venˇ baˆ dawˇ hpfuhˆ tuˬ ga piˇ ve yoˬ. (Tcuh yaˇ 7:58-8:3; 9:1-9, 17-20) Sawˉluꞈ Hkriꞈ yaˇ hpehꞈ la htaˇ, yawˇ ve awˬ meh awˬ nu ve teˇ meh lehˬ, tcuh yaˇ Pawˇluꞈ tehꞈ meh ve yoˬ. Yawˇ Gʼuiˬ sha ha kʼaˉ laˇ ve htaꞈ gʼa ve teˇ hkui teˇ hkui kʼoˆ ve yoˬ. (1 Tiˆmoˉseˍ 1:12-15 gʼaw sheˍ.) Pawˇluꞈ maˍ ve, “Gʼuiˬ sha ve awˬ bon lehˬ, nawˬ venˇ baˆ htaꞈ dawˇ hpfuhˆ tuˬ sheh kʼai laˇ ve htaꞈ nawˬ shiˍ ve” yoˬ.—Roˉmaꞈ 2:4.

¹⁶ Kawˇrenˍhtuˆ venˇ hkʼaw chehˇ ve Hkriꞈ yaˇ pehꞈ ve tzuhˆ ve te ve awˬ lawn cawˬ ve htaꞈ Pawˇluꞈ gʼa kaˇ htaˇ, awˬ lawn chi yawˇ hkʼaˬ hkʼe gu ve le? Yaˬhoˉvaˬ yawˇ ve kanˉ te ve chaw htaꞈ maˍ piˇ leh yawˇ hui venˇ baˆ dawˇ hpfuhˆ htaˇ, yawˇ haꞈ pehnˇ ve tehꞈ hkʼaˬ hkʼe hpeuꞈ maw piˇ ve, Pawˇluꞈ ve tawˇ hkawˇ htaꞈ ngaˬ hui henˇ yuˬ gʼa ve yoˬ. Leh awˬ lawn chi ve ngaˬ hui Yaˬhoˉvaˬ htaꞈ hkʼaˬ hkʼe henˇ yuˬ gʼa ve kaꞈ teˇ geh nyi sheˍ. Awˬ lawn chi ve hkʼa peu˗eˬ ngaˬ hui gʼuˇ suhˍ teˇ lawn hkʼaw teˇ geh kʼawꞈ henˇ tuˬ yoˬ.