Tcuh yaˇ Pawˇluꞈ Hteˇsaˍlawˇniˆ venˇ hkʼaw ve Hkriꞈ yaˇ htaꞈ liꞈ bvuhꞈ piˇ ve, “liꞈ chi awˬ hkʼaw lo ngaˬ hui bvuhꞈ taˍ ve tawˇ hkawˇ htaꞈ chaw teˇ gʼaˇ gʼaˇ maˇ na yuˬ ve kʼo, yawˇ htaꞈ tawnˇ taˍ˗oꞈ.” (2 Hteˇsaˍlawˇniˆ 3:14) Chi awˬ gʼuˇ suhˍ htaˇ kʼoˆ maˍ laˇ taˍ ve, chi ve lehˬ nyi haꞈ shaˉ paˍ awˬ pon beˆ maˍ piˇ taˍ ve yoˬ. Laiˉ pawˆ beˆ maˍ piˇ˗oˬ ve htawˇ, a shu teˇ gʼaˇ Liꞈ hpu hkʼaw ve awˬ liˇ awˬ hkʼaˇ htaꞈ maˇ na yuˬ ve kʼo, nyi haꞈ shaˉ paˍ lehˬ Hkriꞈ yaˇ awˬ moˍ hkʼaw bon maˍ leh, awˬ viˉ awˬ nyi kaꞈ chaw oˇ ve teˇ gʼaˇ geh tawˇ hkʼa dehꞈ maˇ yaw daꞈ ve, maˇ heˆ leh yawˇ geh maˇ meuˆ daꞈ tuˬ shaˍ tiꞈ piˇ ve yoˬ.

Yaꞈ hkʼaˇ, na gʼa ve awˬ suhˉ chi htaꞈ gʼa kʼawꞈ pa cawˇ ve yoˬ. Hkriꞈ yaˇ teˇ gʼaˇ leh teˇ gʼaˇ awˬ lawn teˇ hpaˍ htaꞈ hkʼaˬ hkʼe dawˇ cheˆ cawˇ ve, Pawˇluꞈ beˆ maˍ laˇ taˍ ve htaꞈ chi teˇ hkui ngaˬ hui na gʼa la ve yoˬ. Chi htaꞈ pa taw, nyi haꞈ shaˉ paˍ lehˬ shaˍ tiꞈ piˇ tuˬ bon maˍ piˇ tuˬ maˇ loˍ. Aˬ htoꞈ ma pa taw chi hkʼe pa ve le? Pawˇluꞈ bvuhꞈ ve awˬ lawn awˬ tanˇ htaꞈ teˇ geh nyi sheˍ.

Hkriꞈ yaˇ awˬ moˍ hkʼaw ve chaw teˇ hpaˍ hkʼa dehꞈ maˇ na yuˬ ve htaꞈ Pawˇluꞈ gʼa kaˇ ve yoˬ. Liꞈ hpu hkʼaw beˆ maˍ laˇ ve htaꞈ yawˇ hui maˇ na yuˬ ve yoˬ. Chi awˬ gʼuˇ suhˍ Pawˇluꞈ Hteˇsaˍlawˇniˆ venˇ hkʼaw maˇ guiˇ la sheˍ htaˇ, yawˇ beˆ maˍ piˇ jaw ve, “chaw teˇ gʼaˇ gʼaˇ kanˉ maˇ te gaˇ ve kʼo, awˍ taˇ caˍ piˇ.” Hkriꞈ yaˇ awˬ moˍ hkʼaw ve chaw teˇ hpaˍ yawˇ kanˉ te gʼa ve htawˇ, yawˇ awˬ to htaꞈ hu tuˬ ceh kaꞈ kanˉ maˇ te ve yoˬ. Chi hkʼoˆ kaꞈ, shu ve awˬ lawn htaꞈ ca shoꞈ shaꞈ piˇ ve yoˬ. Hkriꞈ yaˇ lehˬ chi hkʼe ve chaw teˇ hpaˍ htaꞈ hkʼaˬ hkʼe te piˇ cawˇ ve le?—2 Hteˇsaˍlawˇniˆ 3:6, 10-12.

Pawˇluꞈ kʼoˆ ve, “yawˇ htaꞈ tawnˇ taˍ˗oꞈ.” Pawˇluꞈ kʼoˆ ve Heˍlaˍsaˆ hkawˇ chi ve lehˬ, chaw oˇ ve teˇ gʼaˇ maˇ heˆ leh yawˇ ve dawˇ hkʼaˇ maˇ gʼa heuˆ la tuˬ shaˍ tiꞈ gʼa te ve yoˬ. Tawˇ hkawˇ chi ve Pawˇluꞈ nyi haꞈ shaˉ paˍ htaꞈ ceh tiˉ maˇ heˆ. Hkriꞈ yaˇ awˬ moˍ hkʼaw ve chaw hkʼa peu˗eˬ htaꞈ beˆ maˍ piˇ ve yoˬ. (2 Hteˇsaˍlawˇniˆ 1:1; 3:6) Chi htaꞈ pa taw, Hkriꞈ yaˇ teˇ gʼaˇ leh teˇ gʼaˇ Liꞈ hpu hkʼaw beˆ maˍ laˇ ve htaꞈ chaw teˇ hpaˍ maˇ na yuˬ ve htaꞈ chaˬ nyi leh, chi hkʼe ve chaw teˇ hpaˍ geh ‘awˬ chawˇ maˇ te ve’ yoˬ hehˉ.

Chi kʼoˆ gaˇ ve lehˬ, chaw oˇ ve teˇ gʼaˇ htaꞈ Hkriꞈ yaˇ awˬ moˍ hkʼaw tawˆ cheˆ piˇ ve chaw hkʼe te piˇ cawˇ˗aw laˇ? Maˇ te piˇ cawˇ. Awˬ lawn kʼo, Pawˇluꞈ kʼoˆ ve, “awˬ viˉ awˬ nyi hkʼa shuˍ shuˍ shawˍ taˍ leh, yawˇ htaꞈ shaˍ tiꞈ piˇ˗oˆ.” Chi htaꞈ pa taw, tawnˇ taˍ˗oꞈ ve chaw geh ngaˬ hui hpawnˬ daꞈ˗e ve, leh hto toˇ˗e ve kʼai gʼa sheˍ ve yoˬ. Yaꞈ hkʼaˇ, chaw oˇ ve teˇ gʼaˇ geh ngaˬ hui awˬ chawˇ chi maw maw maˇ te leh teˇ geh maˇ ca guiˇ˗e ve yoˬ. Aˬ htoꞈ ma pa taw le? Pawˇluꞈ kʼoˆ ve, “yawˇ gʼa yaꞈ taw tuˬ” awˬ pon yoˬ. Chi hkʼe te ve lehˬ, Hkriꞈ yaˇ maˇ na yuˬ ve chaw yaꞈ taw tuˬ te piˇ leh yawˇ pa tuˬ kaꞈ te piˇ ve yoˬ.—2 Hteˇsaˍlawˇniˆ 3:14, 15.

Chi beuꞈ teˇ co˗e Hkriꞈ yaˇ beˆ maˍ laˇ hkawˇ chi htaꞈ hkʼaˬ hkʼe gʼaꞈ te gʼa tuˬ le? Awˉ lawˉ htaˇ awˬ viˉ awˬ nyi oˇ ve teˇ gʼaˇ maˇ na yuˬ ve tehꞈ ngaˬ hui gʼa shiˍ cawˇ ve yoˬ. Pawˇluꞈ kʼoˆ taˍ ve hkʼa shuˍ, dawˇ shiˍ puiˉ ve nyi ma htaꞈ yehˇ leh dawˇ cheˆ ve ngaˬ hui htaꞈ maˇ shuˍ ve, maˇ heˆ leh dawˇ cawˇ ve ngaˬ hui htaꞈ maˇ shuˍ daꞈ ve htaꞈ Pawˇluꞈ kʼoˆ gaˇ ve maˇ heˆ. Ngaˬ hui nyi ma luˬ tuˬ te laˇ ve chaw htaꞈ kaꞈ yawˇ kʼoˆ gaˇ ve maˇ heˆ. Gʼuiˬ sha ve tawˇ hkawˇ htaꞈ maˇ na yuˬ ve chaw htaꞈ ceh tiˉ Pawˇluꞈ kʼoˆ chehˇ ve yoˬ.

Hkriꞈ yaˇ teˇ hpaˍ Gʼuiˬ sha beˆ maˍ piˇ ve hkawˇ htaꞈ hkʼaˬ htaˆ kaꞈ maˇ na yuˬ ve kʼo, a yawˇ geh awˬ chawˇ hkʼa dehꞈ maˇ te ve, maˇ heˆ leh yawˇ geh maˇ ca guiˇ˗e tuˬ a shu yawˇ hkʼaˇ yawˇ dawˇ cheˆ gʼa ve yoˬ. Awˬ lawn chi ve yehˬ kʼa hkʼaw ve chaw maˇ heˆ kʼo, awˬ nu ve chaw htaꞈ maˇ kʼoˆ piˇ ve yoˬ. Leh ngaˬ hui yawˇ geh hpawnˬ daꞈ˗e ve, leh hto toˇ˗e ve kʼai gʼa sheˍ ve yoˬ. Yaꞈ hkʼaˇ, teˇ nyi kʼo yawˇ ve te hkʼaˇ dawˇ hkʼaˇ pa˗oˬ htaˇ, ngaˬ hui yawˇ geh awˬ chawˇ kʼawꞈ te hpehꞈ ve yoˬ.