AWˬ LAWN 46
KʼA MUIˬ HKAWˇ 49 Yaˬhoˉvaˬ nyi hkʼaˇ suh tuˬ te piˇ ve
Awˬ viˉ awˬ nyi hawˉ hkʼaˆ˗oˬ,—Ga piˇ shehˍ hpaˇ te gʼa tuˬ coˇ caˇ chehˇ˗aw laˇ?
“Piˇ ve lehˬ gʼa ve aꞈ kehˉ awˬ bon uiˍ ve yoˬ.”—TCUH YAˇ 20:35.
A YEˇ UIˍ VE AWˬ LAWN
Baˆtiˆsaˬ haꞈ yuˬ˗oˬ ve hawˉ hkʼaˆ htaꞈ awˬ gʼaˇ piˇ leh ga piˇ shehˍ hpaˇ te gʼa tuˬ ve te hkʼaˇ dawˇ hkʼaˇ cawˬ tuˬ coˇ caˇ sheˍ.
1. Ga piˇ shehˍ hpaˇ htaꞈ tcuh yaˇ Pawˇluꞈ hkʼaˬ hkʼe dawˇ ve le?
Ga piˇ shehˍ hpaˇ lehˬ, Hkriꞈ yaˇ awˬ moˍ hkʼaw a yeˇ uiˍ ve kanˉ laiˉ ceuˬ te ve yoˬ. Awˬ viˉ awˬ nyi hawˉ hkʼaˆ chi ve teˇ hpaˍ htaꞈ tcuh yaˇ Pawˇluꞈ awˬ hpfuhˇ shiˍ jaˇ ve yoˬ. Tawˇ pa haˉ te kʼo, Hpiˇliˇpiˆ venˇ hkʼaw chehˇ ve awˬ viˉ awˬ nyi htaꞈ yawˇ liꞈ bvuhꞈ piˇ htaˇ, ga piˇ shehˍ hpaˇ leh nyi haꞈ shaˉ paˍ htaꞈ liꞈ bvuhꞈ piˇ leh awˬ gʼaˇ piˇ ve yoˬ.—Hpiˇliˇpiˆ 1:1.
2. Awˬ viˉ awˬ nyi hawˉ hkʼaˆ Lon˗iˉ ga piˇ shehˍ hpaˇ gʼa te ve htaꞈ hkʼaˬ hkʼe dawˇ ve le?
2 A shaꞈ maˇ ve maˇ heˆ leh a shaꞈ i ve chaw Baˆtiˆsaˬ haꞈ yuˬ˗oˬ ve hawˉ hkʼaˆ maˇ kʼoˆ, yawˇ hui ga piˇ shehˍ hpaˇ gʼa te ve htaꞈ ha lehˬ jaˇ ve yoˬ. Tawˇ pa haˉ te kʼo, Deh˗veꞈ 18 hkʼawꞈ htaˇ, ga piˇ shehˍ hpaˇ te tuˬ leuˆ yuˬ piˇ ve yoˬ. Leh Lon˗iˉ kʼo aˬ laˬ hkʼe 50 hkʼawꞈ htaˇ, ga piˇ shehˍ hpaˇ te tuˬ leuˆ yuˬ piˇ ve yoˬ. Awˬ nu ve ga piˇ shehˍ hpaˇ dawˇ ve hkʼe, Lon˗iˉ yawˇ ve dawˇ hkʼaˇ htaꞈ kʼoˆ maˍ laˇ ve, “ngaˬ ga piˇ shehˍ hpaˇ gʼa te leh awˬ viˉ awˬ nyi htaꞈ gʼa ga piˇ ve, chi daꞈ jaˇ ve awˬ vuiˬ hpehꞈ ve tehꞈ dawˇ ve yoˬ. Hkriꞈ yaˇ awˬ moˍ hkʼaw ve awˬ viˉ awˬ nyi ngaˬ htaꞈ hkʼaˬ htaˆ kaꞈ haꞈ ve tehꞈ hpeuꞈ maw laˇ ve yoˬ. Chi teˇ hkui ngaˬ yawˇ hui htaꞈ hkʼa dehꞈ gʼa ga piˇ ve ha lehˬ jaˇ!”
3. Aˬ htoꞈ ma ve na hkawˇ htaꞈ ngaˬ hui teˇ geh henˇ tuˬ le?
3 Nawˬ Baˆtiˆsaˬ haꞈ yuˬ˗oˬ ve hawˉ hkʼaˆ hpehꞈ leh ga piˇ shehˍ hpaˇ maˇ hpehꞈ sheˍ ve kʼo, ga piˇ shehˍ hpaˇ te gʼa tuˬ nawˬ dawˇ teh taˍ gʼa˗aw laˇ? Nawˬ ga piˇ shehˍ hpaˇ te gaˇ tuˬ aˬ htoꞈ ma te laˇ ve le? Liꞈ hpu hkʼaw ve awˬ liˇ awˬ hkʼaˇ hkʼe, nawˬ aˬ htoꞈ ma ve dawˇ hkʼaˇ gʼa cawˬ cawˇ ve le? Awˬ lawn chi ve hkʼaw na hkawˇ chi ve teˇ hpaˍ hkʼawꞈ laˇ tuˬ yoˬ. Yaꞈ hkʼaˇ, ga piˇ shehˍ hpaˇ ve awˬ vuiˬ aˬ htoꞈ ma cawˬ ve awˉ lawˉ teˇ geh henˇ tuˬ yoˬ.
GA PIˇ SHEHˍ HPAˇ VE AWˬ VUIˬ Aˬ HTOꞈ MA CAWˬ VE LE?
4. Ga piˇ shehˍ hpaˇ ve awˬ vuiˬ aˬ htoꞈ ma cawˬ ve le? (Awˬ han htaꞈ nyi sheˍ.)
4 Ga piˇ shehˍ hpaˇ ve awˬ vuiˬ lehˬ, Baˆtiˆsaˬ yuˬ˗oˬ ve hawˉ hkʼaˆ gʼa te ve yoˬ. Chi ve lehˬ daꞈ kehˬ ve awˬ ha hpu leuˆ yuˬ piˇ ve yoˬ. Yawˇ hui Hkriꞈ yaˇ awˬ moˍ hkʼaw nyi haꞈ shaˉ paˍ htaꞈ laiˉ ceuˬ ga piˇ gʼa ve yoˬ. Tawˇ pa haˉ te kʼo, hto toˇ kuiˬ awˬ ti gu teh ve, awˬ viˉ awˬ nyi hto toˇ htaˇ liꞈ kʼoˆ yehˬ tuˬ awˬ hkʼaˇ hkʼa dehꞈ gu teh piˇ ve yoˬ. Yawˇ hui hpawnˬ daꞈ kuiˬ yehˬ hkʼaw daꞈ kehˬ tuˬ te ve, yawˇ hui hpawnˬ daꞈ kuiˬ yehˬ kʼawꞈ gu te ve, haꞈ yuˬ piˇ paˍ te ve, hpawnˬ daꞈ chehˇ htaˇ awˬ hkawˇ tawˆ tuˬ awˬ hkʼeun htaꞈ nyi haꞈ shaˉ leh VDO kaꞈ hpaw ve yoˬ. Kanˉ chi ve teˇ hpaˍ ga piˇ shehˍ hpaˇ gʼa te ve yoˬ. Yaꞈ hkʼaˇ, a yeˇ uiˍ jaˇ ve lehˬ, yawˇ hui Yaˬhoˉvaˬ htaꞈ gʼa haꞈ ve yoˬ. Yaˬhoˉvaˬ ve awˬ liˇ awˬ hkʼaˇ hkʼe gʼa gʼaꞈ te leh awˬ viˉ awˬ nyi htaꞈ gʼa haꞈ ve yoˬ. (Maꞈhtehˍ 22:37-39) Baˆtiˆsaˬ yuˬ˗oˬ ve hawˉ hkʼaˆ ga piˇ shehˍ hpaˇ te gʼa tuˬ, aˬ htoꞈ ma gʼa te cawˇ sheˍ ve le?
Ga piˇ shehˍ hpaˇ Yeˍsuˆ htaꞈ henˇ yuˬ gʼa ve lehˬ awˬ nu ve chaw htaꞈ ga piˇ ve (Awˬ tawn 4 nyi sheˍ)
5. Awˬ viˉ awˬ nyi hawˉ hkʼaˆ ga piˇ shehˍ hpaˇ te gaˇ ve kʼo yawˇ aˬ htoꞈ ma gʼa te cawˇ ve le?
5 Liꞈ hpu hkʼaw ga piˇ shehˍ hpaˇ te tuˬ ve te hkʼaˇ dawˇ hkʼaˇ htaꞈ kʼoˆ taˍ ve yoˬ. (1 Tiˆmoˉseˍ 3:8-10, 12, 13) Nawˬ ga piˇ shehˍ hpaˇ te gaˇ ve kʼo, teˇ hkʼaˇ dawˇ hkʼaˇ chi ve teˇ hpaˍ htaꞈ caˉ daꞈ ve hpfuhˆ nyi leh gʼaꞈ te gʼa tcuh sheˍ. Yaꞈ hkʼaˇ, awˉ lawˉ htaˇ nawˬ ga piˇ shehˍ hpaˇ te gaˇ tuˬ aˬ htoꞈ ma te laˇ ve htaꞈ awˉ lawˉ shiˍ cawˇ ve yoˬ.
NAWˬ TE GAˇ TUˬ Aˬ HTOꞈ MA TE LAˇ VE LE?
6. Nawˬ awˬ viˉ awˬ nyi htaꞈ ga piˇ gaˇ tuˬ aˬ htoꞈ ma te laˇ ve le? (Maꞈhtehˍ 20:28; Awˬ htaꞈ hpawˇ ve awˬ han htaꞈ nyi sheˍ.)
6 Yeˍsuˆ lehˬ ngaˬ hui awˬ pon daꞈ ve henˇ yuˬ tuˬ hpehꞈ ve yoˬ. Yawˇ teˇ ceuˬ le le haꞈ pehnˇ ve hkʼaw te ve yoˬ. Yawˇ Yaˬhoˉvaˬ leh chaw yaˇ htaꞈ haꞈ ve yoˬ. Haꞈ ve chi htaꞈ pa taw, Yeˍsuˆ ha lehˬ ha kʼa kanˉ te hkeuꞈ leh Yeˍsuˆ te ve kanˉ lehˬ, awˬ nu ve chaw awˬ pon awˬ hpfuhˇ maˇ cawˬ ve hkʼe shawˍ ve yoˬ. (Maꞈhtehˍ 20:28 gʼaw sheˍ; Yoˇhanˬ 13:5, 14, 15) Haꞈ pehnˇ ve hkʼaw nawˬ te gaˇ ve kʼo, Yaˬhoˉvaˬ nawˬ htaꞈ awˬ bon naꞈ laˇ leh, nawˬ ga piˇ shehˍ hpaˇ te gʼa tuˬ te hkʼaˇ dawˇ hkʼaˇ cawˬ tuˬ kaꞈ ga laˇ tuˬ yoˬ.—1 Kawˇrenˍhtuˆ 16:14; 1 Peˍtruˆ 5:5.
Aˉ yaˇ leh awˬ meh bvuhˬ ve heuˆ gaˇ ve aꞈ kehˉ, Yeˍsuˆ nyi ma nuˇ nehˬ ve hkʼaw awˬ nu ve chaw htaꞈ ga piˇ ve, tcuh yaˇ hui mawˬ tuˬ te maˍ piˇ ve (Awˬ tawn 6 nyi sheˍ)
7. Uiˍ gaˇ mvuh gaˇ ve nyi ma cawˬ leh a shu yawˇ awˬ pon tiˉ dawˇ nyi ve awˬ viˉ awˬ nyi hawˉ hkʼaˆ maˇ cawˬ tuˬ aˬ htoꞈ ma te shaˍ tiꞈ gʼa te cawˇ ve le?
7 Chi teˇ hkui ve miˬ guiˬ yaˇ lehˬ, awˬ meh bvuhˬ ve chaw htaꞈ dawˇ cawˇ ve yoˬ. Yaꞈ hkʼaˇ, Yaˬhoˉvaˬ ve kanˉ hkʼaˇ hkʼaw chi hkʼe maˇ heˆ. Yeˍsuˆ hkʼa shuˍ awˬ viˉ awˬ nyi hawˉ hkʼaˆ awˬ nu ve chaw htaꞈ haꞈ ve chaw lehˬ, aˉ yaˇ cawˬ ve chaw maˇ hpehꞈ gaˇ ve, a yeˇ uiˍ ve chaw kaꞈ maˇ hpehꞈ gaˇ ve, awˬ meꞈ awˬ hponˇ cawˬ ve chaw kaꞈ maˇ hpehꞈ gaˇ ve yoˬ. Uiˍ gaˇ mvuh gaˇ ve chaw htaꞈ Hkriꞈ yaˇ awˬ moˍ hkʼaw kanˉ te tuˬ leuˆ teh piˇ ve kʼo, a yeˇ maˇ uiˍ ve kanˉ teˇ ceuˬ ceuˬ htaꞈ yawˇ maˇ te gaˇ ve yoˬ. Chi ve lehˬ, Yaˬhoˉvaˬ awˬ pon awˬ hpfuhˇ hkʼaˆ jaˇ ve yawˬ htaꞈ nyi haꞈ shaˉ ve yoˬ. Yawˇ awˬ to htaꞈ a yeˇ uiˍ jaˇ tehꞈ shawˍ leh kanˉ chi teˇ hpaˍ htaꞈ yawˇ maˇ te keunˍ tehꞈ dawˇ ve yoˬ. (Yoˇhanˬ 10:12) A shu yawˇ awˬ pon tiˉ dawˇ nyi leh uiˍ gaˇ mvuh gaˇ ve nyi ma cawˬ ve chaw htaꞈ yawˇ hui te ve kanˉ htaꞈ Yaˬhoˉvaˬ awˬ bon maˇ naꞈ piˇ taˍ.—1 Kawˇrenˍhtuˆ 10:24, 33; 13:4, 5.
8. Yeˍsuˆ tcuh yaˇ hui htaꞈ aˬ htoꞈ ma beˆ maˍ piˇ ve le?
8 Teˇ pawˆ pawˆ kʼo, Yeˍsuˆ meuˆ daꞈ jaˇ ve awˬ chawˇ kaꞈ yawˇ hui daꞈ jaˇ ve awˬ vuiˬ htaꞈ gʼa gaˇ ve yoˬ. Tcuh yaˇ Yoˇhanˬ leh Yaˍkoˆ ve awˬ lawn htaꞈ dawˇ nyi sheˍ. Yawˇ hui Gʼuiˬ sha ve mvuhˇ miˬ hkʼaw daꞈ jaˇ ve awˬ vuiˬ htaꞈ gʼa tuˬ Yeˍsuˆ geh lawˬ ve yoˬ. Yaꞈ hkʼaˇ, yawˇ hui chi hkʼe lawˬ ve htaꞈ Yeˍsuˆ maˇ ha lehˬ ve yoˬ. Leh Yeˍsuˆ tcuh yaˇ 12 gʼaˇ htaꞈ kʼoˆ maˍ piˇ ve, “nawˬ hui awˬ hkʼaw lo chaw uiˍ hpehꞈ gaˇ ve chaw hkʼaˬ ve teˇ gʼaˇ maˇ kʼoˆ, yawˇ nawˬ hui ve awˬ ceˬ gʼa te ve yoˬ. Nawˬ hui awˬ hkʼaw lo awˬ hoˉ te gaˇ ve chaw hkʼaˬ ve teˇ gʼaˇ maˇ kʼoˆ, hkʼa peu˗eˬ awˬ pon yawˇ lehˬ vuiˬ taˍ ve awˬ ceˬ gʼa hpehꞈ ve yoˬ.” (Maˍkuˆ 10:35-37, 43, 44) Chi htaꞈ pa taw, awˬ viˉ awˬ nyi hawˉ hkʼaˆ cawˇ ve dawˇ hkʼaˇ cawˬ ve chaw lehˬ shu htaꞈ gʼa ga piˇ ve yoˬ. Chi ve lehˬ Hkriꞈ yaˇ awˬ moˍ hkʼaw awˬ bon gʼa ve yoˬ.—1 Hteˇsaˍlawˇniˆ 2:8.
NAWˬ AWˬ VIˉ AWˬ NYI HTAꞈ GA PIˇ GAˇ TUˬ Aˬ HTOꞈ MA TE LAˇ VE LE?
9. Nawˬ awˬ viˉ awˬ nyi htaꞈ hkʼa dehꞈ ga piˇ gaˇ tuˬ aˬ htoꞈ ma te laˇ ve le?
9 Nawˬ Yaˬhoˉvaˬ htaꞈ haꞈ leh awˬ nu ve chaw htaꞈ ga piˇ gaˇ ve yoˬ. Yaꞈ hkʼaˇ, chi hkʼe hpehꞈ ve htawˇ, ga piˇ shehˍ hpaˇ gʼa te cawˇ ve kanˉ teˇ ceuˬ ceuˬ htaꞈ nawˬ maˇ te gaˇ ve yoˬ hehˉ. Hkʼe kʼo, nawˬ awˬ viˉ awˬ nyi htaꞈ hkʼa dehꞈ ga piˇ gaˇ tuˬ, aˬ htoꞈ ma te laˇ ve le? Nawˬ awˬ viˉ awˬ nyi htaꞈ ga piˇ ve kʼo, ha lehˬ ve hkʼaˬ hkʼe taw cawˬ ve htaꞈ dawˇ nyi sheˍ. Yeˍsuˆ kʼoˆ ve, “piˇ ve lehˬ gʼa ve aꞈ kehˉ awˬ bon uiˍ ve yoˬ.” (Tcuh yaˇ 20:35) Yeˍsuˆ awˬ liˇ awˬ hkʼaˇ chi ve htaꞈ gʼaꞈ te leh awˬ nu ve chaw htaꞈ ga piˇ ve yawˇ ha lehˬ jaˇ ve yoˬ. Nawˬ kaꞈ chi hkʼa shuˍ shuˍ te gʼa ve yoˬ.
10. Yeˍsuˆ awˬ nu ve chaw htaꞈ ga piˇ ve yawˇ ha lehˬ jaˇ ve tehꞈ hkʼaˬ hkʼe hpeuꞈ maw laˇ ve le? (Maˍkuˆ 6:31-34)
10 Yeˍsuˆ shu htaꞈ ga piˇ ve ha lehˬ ve tehꞈ hpeuꞈ maw laˇ ve awˬ lawn htaꞈ teˇ geh nyi sheˍ. (Maˍkuˆ 6:31-34 gʼaw sheˍ.) Teˇ pawˆ htaˇ Yeˍsuˆ leh tcuh yaˇ hui heuˬ jaˇ ve yoˬ. Yawˇ hui gʼaˇ ca jehˇ tuˬ chaw gawˬ kuiˬ teˇ kaˬ lo kʼai˗e te chehˇ ve yoˬ. Yaꞈ hkʼaˇ, chaw awˬ moˍ lonˉ Yeˍsuˆ maˍ ve htaꞈ na gaˇ jaˇ ve pa taw, awˬ gʼuˇ suhˍ lo law taˍ piˇ ve yoˬ. Oˇ ve teˇ yanˇ Yeˍsuˆ yawˇ hui htaꞈ maˇ maˍ piˇ kaꞈ gʼa ve yoˬ. Awˬ lawn kʼo, Yeˍsuˆ leh tcuh yaˇ hui “awˍ kaꞈ caˇ maˇ tanˇ ve yoˬ.” Maˇ heˆ leh Yeˍsuˆ lehˬ chaw awˬ moˍ lonˉ htaꞈ awˬ tehˬ ve awˬ lawn 1 lawn leh 2 lawn ceh tiˉ maˍ piˇ leh kʼoꞈ˗e tcuh kaꞈ gʼa ve yoˬ. Yaꞈ hkʼaˇ, Yeˍsuˆ yawˇ hui htaꞈ haꞈ ve pa taw, “awˬ lawn laiˉ ceuˬ maˍ piˇ ve yoˬ.” Leh Yeˍsuˆ yawˇ hui htaꞈ mvuhˇ hpeuꞈ la htaˇ hkʼa gaˬ maˍ piˇ ve yoˬ. (Maˍkuˆ 6:35) Yawˇ chi hkʼe te ve lehˬ, gʼa te cawˇ leh te ve maˇ heˆ. Yaꞈ hkʼaˇ, Yeˍsuˆ yawˇ hui htaꞈ ha kʼaˉ ve pa taw te ve yoˬ. Yeˍsuˆ yawˇ hui htaꞈ haꞈ ve pa taw maˍ piˇ gaˇ ve yoˬ. Yeˍsuˆ awˬ nu ve chaw htaꞈ ga piˇ ve lehˬ ha lehˬ jaˇ tuˬ te piˇ ve yoˬ.
11. Yeˍsuˆ awˬ nu ve htaꞈ hkʼaˬ hkʼe ga piˇ sheˍ ve le? (Awˬ han htaꞈ nyi sheˍ.)
11 Yeˍsuˆ awˬ nu ve chaw htaꞈ ga piˇ ve lehˬ, yawˇ hui htaꞈ Gʼuiˬ sha ve awˬ tehˬ ve awˬ lawn maˍ piˇ ve yoˬ. Leh Yeˍsuˆ yawˇ hui htaꞈ awˬ nu ve awˬ ceuˬ kaꞈ ga piˇ sheˍ ve yoˬ. Tawˇ pa haˉ te kʼo, yawˇ anˇ tuˬ te leh yawˇ hui htaꞈ caˇ tuˬ gu teh piˇ ve yoˬ. Hkʼe te leh, Yeˍsuˆ lehˬ awˬ laꞈ gʼawˇ chaw yaˇ htaꞈ caˇ tuˬ pehˬ piˇ tcuh ve yoˬ. (Maˍkuˆ 6:41) Yeˍsuˆ chi hkʼe te htaˇ, awˬ laꞈ gʼawˇ awˬ nu ve chaw htaꞈ ga piˇ tuˬ awˬ hkʼaˇ maˍ piˇ ve yoˬ. Chi hkʼoˆ kaꞈ, yawˇ awˬ nu ve chaw htaꞈ ga piˇ ve awˬ ceuˬ lehˬ, ga piˇ shehˍ hpaˇ te ve kanˉ lehˬ oˇ ve hkʼa shuˍ a yeˇ uiˍ jaˇ ve yoˬ. Tcuh yaˇ hui Yeˍsuˆ geh teˇ geh kanˉ te leh, “chaw hkʼa peu˗eˬ hkʼa bvuhˆ gʼa caˇ” tuˬ pehˬ piˇ ve hkʼaˬ hkʼe taw ha lehˬ ve htaꞈ dawˇ nyi sheˍ. (Maˍkuˆ 6:42) Yeˍsuˆ yawˇ loˍ ve aꞈ kehˉ awˬ nu ve chaw loˍ ve htaꞈ te ve, chi teˇ pawˆ ceh tiˉ maˇ heˆ. Yaꞈ hkʼaˇ, yawˇ a shaꞈ teꞈ chehˇ htaˇ, awˬ nu ve chaw htaꞈ ga piˇ ve yoˬ. (Maꞈhtehˍ 4:23; 8:16) Yeˍsuˆ awˬ nu ve chaw htaꞈ maˍ piˇ leh yawˇ hui loˍ ve awˬ ceuˬ htaꞈ ga piˇ ve ha lehˬ jaˇ ve yoˬ. Nawˬ ga piˇ shehˍ hpaˇ hpehꞈ leh awˬ nu ve chaw htaꞈ ga piˇ ve kʼo, nawˬ kaꞈ ha lehˬ jaˇ tuˬ yoˬ.
Yaˬhoˉvaˬ htaꞈ haꞈ leh awˬ nu ve chaw htaꞈ ga piˇ lehˬ Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ ga piˇ piˇ tuˬ nawˬ htaꞈ awˬ gʼaˇ peꞈ laˇ ve (Awˬ tawn 11 nyi sheˍ) a
12. Ngaˬ hui Hkriꞈ yaˇ awˬ moˍ hkʼaw awˬ bon maˇ cawˬ tehꞈ aˬ htoꞈ ma te maˇ dawˇ nyi cawˬ ve le?
12 Nawˬ te puiˉ te hpehꞈ ve daꞈ jaˇ ve awˬ ceuˬ maˇ cawˬ ve kʼo, awˬ gʼaˇ taˇ nuˇ. Nawˬ ve te hkʼaˇ dawˇ hkʼaˇ teˇ ceuˬ ceuˬ Hkriꞈ yaˇ awˬ moˍ hkʼaw awˬ viˉ awˬ nyi awˬ pon awˬ bon cawˬ tuˬ yoˬ. 1 Kawˇrenˍhtuˆ liꞈ 12:12-30 hkʼaw tcuh yaˇ Pawˇluꞈ kʼoˆ taˍ ve awˬ ceuˬ htaꞈ nawˬ dawˇ nyi sheˍ. Leh awˬ lawn chi ve nawˬ ve awˬ lawn htaꞈ hkʼaˬ hkʼe hawˍ daꞈ ve, Yaˬhoˉvaˬ ga laˇ tuˬ bon lawˬ sheˍ. Pawˇluꞈ ve tawˇ hkawˇ nawˬ a yeˇ uiˍ ve chaw hpehꞈ ve tehꞈ mawˬ tuˬ te laˇ leh Yaˬhoˉvaˬ ve kanˉ te ve chaw teˇ gʼaˇ le le hkʼa shuˍ, Hkriꞈ yaˇ awˬ moˍ hkʼaw awˬ hpfuhˇ cawˬ ve tehꞈ mawˬ tuˬ kaꞈ te laˇ ve yoˬ. Chi htaꞈ pa taw, chi teˇ hkui nawˬ ga piˇ shehˍ hpaˇ te tuˬ te hkʼaˇ dawˇ hkʼaˇ hkʼa dehꞈ maˇ cawˬ sheˍ ve kʼo, awˬ gʼaˇ taˇ nuˇ. Yaˬhoˉvaˬ ve kanˉ te tuˬ leh awˬ viˉ awˬ nyi htaꞈ caˉ leh ga piˇ tuˬ nawˬ te gʼa ve hkʼe te sheˍ. Nawˬ te puiˉ te hpehꞈ ve htaꞈ nyi haꞈ shaˉ paˍ nyi leh nawˬ htaꞈ keunˍ daꞈ ve hkʼe kanˉ peꞈ laˇ tuˬ yoˬ tehꞈ kaꞈ yonˍ sheˍ.—Roˉmaꞈ 12:4-8.
13. Awˬ viˉ awˬ nyi hawˉ hkʼaˆ ga piˇ shehˍ hpaˇ te gʼa tuˬ awˬ nu ve teˇ hkʼaˇ lehˬ aˬ htoꞈ ma le?
13 Awˬ viˉ awˬ nyi hawˉ hkʼaˆ coˇ caˇ leh ga piˇ shehˍ hpaˇ gʼa te tuˬ ve awˬ nu ve teˇ hkʼaˇ lehˬ, yawˇ hui gʼa cawˬ cawˇ ve te hkʼaˇ dawˇ hkʼaˇ maˇ˗awˍ ve kʼo, Hkriꞈ yaˇ teˇ gʼaˇ le le cawˬ˗oˬ ve yoˬ. Chi ve lehˬ, ngaˬ hui teˇ gʼaˇ le le Yaˬhoˉvaˬ geh gʼa meuˆ daꞈ cawˇ ve yoˬ. Piˇ ve lehˬ ha lehˬ ve cawˬ tuˬ te laˇ ve, leh Hkriꞈ yaˇ a shaꞈ teꞈ kuiˬ hkʼaw kaꞈ daꞈ ve te hkʼaˇ dawˇ hkʼaˇ gʼa cawˬ ve yoˬ. Chi htaꞈ pa taw, nawˬ kaꞈ te hkʼaˇ dawˇ hkʼaˇ maˇ˗awˍ ve kʼo, ga piˇ shehˍ hpaˇ hkʼa shuˍ cawˬ˗oˬ ve yoˬ. Yaꞈ hkʼaˇ, ga piˇ shehˍ hpaˇ te gʼa tuˬ, nawˬ aˬ htoꞈ ma gʼa te cawˇ sheˍ ve le?
NAWˬ GA PIˇ SHEHˍ HPAˇ GʼA TE TUˬ TE CAWˇ VE AWˬ CEUˬ
14. “Dawˇ yeˬ gaˇ yeˬ ve chaw gʼa hpehꞈ ve” aˬ htoꞈ ma htaꞈ kʼoˆ gaˇ ve le? (1 Tiˆmoˉseˍ 3:8-10, 12)
14 Chi teˇ hkui gʼa te cawˇ ve awˬ ceuˬ 1 Tiˆmoˉseˍ liꞈ 3:8-10, 12 hkʼaw ve teˇ hkʼaˇ dawˇ hkʼaˇ htaꞈ teˇ geh nyi sheˍ. (Gʼaw sheˍ.) Ga piˇ shehˍ hpaˇ lehˬ “dawˇ yeˬ gaˇ yeˬ ve chaw gʼa hpehꞈ ve yoˬ.” Tawˇ hkawˇ chi ve lehˬ “yawˆ yanˍ ve” “yonˍ gʼa ve” maˇ heˆ leh “yawˆ yanˍ ve gʼa keunˍ ve” chaw gʼa hpehꞈ ve yoˬ. Chi ve lehˬ nawˬ gʼuiˬ yawˬ ve, pyawˍ ve, maˇ te gʼa ve htaꞈ kʼoˆ gaˇ ve maˇ heˆ. (Cuˇ yiˍ piˇ ve 3:1, 4) Yaꞈ hkʼaˇ, nawˬ gʼa ve awˬ vuiˬ htaꞈ hkʼa dehꞈ gʼa te ve yoˬ. Nawˬ yonˍ gʼa ve chaw leh gʼaˇ va gʼa ve chaw hpehꞈ ve kʼo, Hkriꞈ yaˇ awˬ moˍ hkʼaw ve awˬ viˉ awˬ nyi kaꞈ nawˬ htaꞈ yawˆ yanˍ tuˬ yoˬ.
15. “Ha tehˬ nyiˇ maˬ cawˬ ve chaw” maˇ gʼa hpehꞈ leh “hpu shi mawˇ jeˬ htaꞈ sheˉ lai ve chaw maˇ gʼa hpehꞈ” ve hkʼaˬ hkʼe kʼoˆ gaˇ ve le?
15 “Ha tehˬ nyiˇ maˬ cawˬ ve chaw” maˇ gʼa hpehꞈ. Chi kʼoˆ gaˇ ve lehˬ, kʼoˆ taˍ ve hkʼe gʼaꞈ te ve, ka tiꞈ yeˬ ve, leh yonˍ gʼa ve chaw gʼa hpehꞈ ve yoˬ. Nawˬ kʼoˆ taˍ ve tawˇ hkawˇ htaꞈ ka tiꞈ gʼa yeˬ leh awˬ nu ve chaw htaꞈ maˇ gʼa heˍ. (Tawˇ naˉ ve 3:32) “Hpu shi mawˇ jeˬ htaꞈ sheˉ lai ve chaw maˇ gʼa hpehꞈ.” Chi kʼoˆ gaˇ ve lehˬ, awˬ viˉ awˬ nyi geh teˇ geh pawnˇ daꞈ leh tanˇ kaˬ te htaˇ gʼa hteˇ cawˇ leh hpu ve awˬ lawn htaꞈ caˉ daꞈ ve kaꞈ gʼa hteˇ cawˇ ve yoˬ. Leh nawˬ a shu yawˇ awˬ pon tiˉ maˇ gʼa dawˇ nyi ve yoˬ.
16. (a) “A pehˉ meuˇ gʼuiˬ dawˬ ponˬ dawˬ leuˉ ve chaw” maˇ gʼa hpehꞈ ve hkʼaˬ hkʼe kʼoˆ gaˇ ve le? (b) “Daꞈ ve kehˬ ve shiˍ puiˉ ve nyi ma” htaꞈ maˇ shoꞈ shaꞈ laˇ ve hkʼaˬ hkʼe kʼoˆ gaˇ ve le?
16 “A pehˉ meuˇ gʼuiˬ dawˬ ponˬ dawˬ leuˉ ve chaw” maˇ gʼa hpehꞈ ve kʼoˆ gaˇ ve lehˬ, nawˬ a pehˉ meuˇ gʼuiˬ maˇ dawˬ maˇ ve, maˇ heˆ leh dawˬ bvuhˆ jaˇ ve chaw maˇ gʼa hpehꞈ. “Daꞈ ve kehˬ ve shiˍ puiˉ ve nyi ma” htaꞈ maˇ shoꞈ shaꞈ laˇ ve kʼoˆ gaˇ ve lehˬ, nawˬ Yaˬhoˉvaˬ ve awˬ liˇ awˬ hkʼaˇ htaꞈ te chehˇ ve yoˬ. Leh nawˬ maˇ biˇ ve chaw hpehꞈ ve htawˇ, nawˬ Yaˬhoˉvaˬ geh hkʼa dehꞈ meuˆ daꞈ ve pa taw, nyi ma gawˬ lehˍ ve cawˬ ve yoˬ.
17. “Yawˇ hui htaꞈ htawˇ awˉ lawˉ lawˇ nyi piˇ” ve chi hkʼaˬ hkʼe kʼoˆ gaˇ ve le? (1 Tiˆmoˉseˍ 3:10; Awˬ han htaꞈ nyi sheˍ.)
17 “Yawˇ hui htaꞈ htawˇ awˉ lawˉ lawˇ nyi” chi kʼoˆ gaˇ ve lehˬ, nyi haꞈ shaˉ paˍ nawˬ htaꞈ awˬ vuiˬ te tcuh laˇ leh nawˬ kanˉ htaꞈ a yeˇ yuˬ leh hkʼa dehꞈ te gʼa ve tehꞈ hpeuꞈ maw piˇ ve kʼo, nawˬ yonˍ gʼa ve chaw hpehꞈ ve yoˬ. Chi htaꞈ pa taw, nawˬ awˬ vuiˬ gʼa ve kʼo, nyi haꞈ shaˉ paˍ leh Gʼuiˬ sha ve kanˉ hkʼaˇ hkʼaw beˆ maˍ laˇ ve awˬ hkʼaˇ suh gʼaꞈ te tuˬ coˇ caˇ sheˍ. Kanˉ chi ve hkʼaˬ hkʼe gʼa te cawˇ ve leh hkʼaˬ hkʼe htaˇ te peuˬ cawˇ ve htaꞈ kaꞈ nawˬ gʼa shiˍ cawˇ ve yoˬ. Awˬ vuiˬ gʼa taˍ ve htaꞈ nawˬ kaiˬ ve hkʼaw hkʼa dehꞈ te ve kʼo, nawˬ uiˍ la mvuh la chehˇ ve htaꞈ awˬ viˉ awˬ nyi mawˬ tuˬ yoˬ. Baˆtiˆsaˬ haꞈ yuˬ˗oˬ ve hawˉ hkʼaˆ htaꞈ nyi haꞈ shaˉ paˍ a yeˇ yuˬ leh gʼa maˍ piˇ cawˇ ve yoˬ. (1 Tiˆmoˉseˍ 3:10 gʼaw sheˍ.) Nawˬ chehˇ kuiˬ Hkriꞈ yaˇ awˬ moˍ hkʼaw hawˉ hkʼaˆ a shaꞈ 10 leh 14 hkʼawꞈ ve chaw cawˬ˗aw laˇ? Yawˇ hui a shu yawˇ hkʼaˇ yawˇ Liꞈ hpu henˇ ve hkʼa dehꞈ te chehˇ˗aw laˇ? Yawˇ hui hpawnˬ daꞈ kuiˬ hkʼaw awˬ gʼaˇ piˇ daꞈ leh hto toˇ ve yawˇ hui hkʼaˬ htaˆ kaꞈ kʼai˗aw laˇ? Chi ve teˇ hpaˍ te chehˇ ve kʼo, yawˇ hui htaꞈ keunˍ daꞈ ve hkʼe awˬ vuiˬ piˇ leh, awˬ viˉ awˬ nyi hawˉ hkʼaˆ chi ve teˇ hpaˍ htaꞈ ‘lawˇ nyi piˇ sheˍ.’ Yaꞈ hkʼaˇ, yawˇ hui a shaꞈ 17 leh 19 hkʼawꞈ gaˬ˗o ve kʼo, yawˇ hui ga piˇ shehˍ hpaˇ te gʼa ve yoˬ.
Nyi haꞈ shaˉ paˍ lehˬ hawˉ hkʼaˆ Baˆtiˆsaˬ haꞈ yuˬ˗oˬ ve chaw htaꞈ awˬ vuiˬ te tcuh ve awˬ hkʼaˇ yawˇ hui htaꞈ ‘lawˇ nyi piˇ ve’ (Awˬ tawn 17 nyi sheˍ)
18. “Venˇ baˆ taˍ tuˬ maˇ cawˬ” ve hkʼaˬ hkʼe kʼoˆ gaˇ ve le?
18 “Venˇ baˆ taˍ tuˬ maˇ cawˬ” ve chi kʼoˆ gaˇ ve lehˬ, nawˬ venˇ baˆ uiˍ jaˇ ve htaꞈ te ve tehꞈ shu maˇ kʼoˆ cawˇ ve yoˬ. Awˬ tehˬ kʼo, Hkriꞈ yaˇ htaꞈ kaꞈ maˇ heˆ heˆ she pfuhˍ laˇ ve gʼa hpuˇ la ve yoˬ. Yeˍsuˆ htaꞈ kaꞈ chaw yaˇ maˇ heˆ heˆ she pfuhˍ piˇ jaw leh yawˇ ve awˬ laꞈ gʼawˇ kaꞈ chi hkʼe gʼa hpuˇ tuˬ yoˬ tehꞈ Yeˍsuˆ kʼoˆ taˍ ve yoˬ. (Yoˇhanˬ 15:20) Yaꞈ hkʼaˇ, nawˬ Yeˍsuˆ hkʼa shuˍ te hkʼaˇ dawˇ hkʼaˇ daꞈ ve htaꞈ cawˬ tuˬ coˇ caˇ ve kʼo, nawˬ kaꞈ Hkriꞈ yaˇ awˬ moˍ hkʼaw daꞈ ve awˬ meh cawˬ tuˬ yoˬ.—Maꞈhtehˍ 11:19.
19. “Awˬ miˇ ma teˇ gʼaˇ tiˉ gʼa cawˬ” ve hkʼaˬ hkʼe kʼoˆ gaˇ ve le?
19 “Awˬ miˇ ma teˇ gʼaˇ tiˉ gʼa cawˬ ve.” Nawˬ awˬ miˇ ma heuˆ˗oˬ ve kʼo, Yaˬhoˉvaˬ awˉ lawˉ htaˇ kaꞈ heuˆ daꞈ ve awˬ lawn gu teh taˍ laˇ ve htaꞈ nawˬ gʼa gʼaꞈ te cawˇ ve yoˬ. Chi ve lehˬ awˬ miˇ ma teˇ gʼaˇ tiˉ gʼa cawˬ ve yoˬ. (Maꞈhtehˍ 19:3-9) Hkriꞈ yaˇ lehˬ pehꞈ ve tzuhˆ ve htaꞈ maˇ gʼa te. (Heˍbrehˇ 13:4) Yaꞈ hkʼaˇ, chi hkʼe ceh tiˉ maˇ heˆ. Nawˬ awˬ miˇ ma htaꞈ ka tiꞈ gʼa yeˬ ve lehˬ, awˬ nu ve yaˇ miˇ htaꞈ maˇ gʼa maˆ ve yoˬ.—Yawˇbaˆ 31:1.
20. Awˬ viˉ awˬ nyi hawˉ hkʼaˆ hkʼaˬ hkʼe te yehˬ kʼa hkʼaw “hkʼa dehꞈ” nyi haꞈ shaˉ gʼa tuˬ le?
20 ‘A shu yawˇ ve yaˇ leh a shu yawˇ ve yehˬ kʼa htaꞈ hkʼa dehꞈ uˉ peunˍ ve chaw gʼa hpehꞈ ve.’ Nawˬ yehˬ shehˍ hpaˇ hpehꞈ ve kʼo, nawˬ yehˬ kʼa hkʼaw hkʼa dehꞈ gʼa nyi haꞈ shaˉ piˇ ve yoˬ. Hkʼaˬ htaˆ kaꞈ yehˬ kʼa hkʼaw oˉ kʼoˍ pui ve gʼa te ve yoˬ. Nawˬ te gʼa ve hkʼe awˬ miˇ ma leh yaˇ geh hkʼaˬ htaˆ kaꞈ hto toˇ˗e sheˍ. Leh yaˇ Yaˬhoˉvaˬ geh meuˆ daꞈ tuˬ ga piˇ sheˍ. (Eˇfeˇsuꞈ 6:4) Awˬ viˉ awˬ nyi hawˉ hkʼaˆ yehˬ kʼa hkʼaw hkʼa dehꞈ nyi haꞈ shaˉ gʼa ve kʼo, Hkriꞈ yaˇ awˬ moˍ hkʼaw kaꞈ nyi haꞈ shaˉ gʼa ve yoˬ.—1 Tiˆmoˉseˍ 3:5 htaꞈ tehˆ daꞈ sheˍ.
21. Nawˬ ga piˇ shehˍ hpaˇ maˇ hpehꞈ sheˍ ve kʼo, hkʼaˬ hkʼe te cawˇ ve le?
21 Nawˬ awˬ viˉ awˬ nyi hawˉ hkʼaˆ ga piˇ shehˍ hpaˇ maˇ hpehꞈ sheˍ ve kʼo, awˬ lawn chi ve hkʼaw ngaˬ hui gʼa henˇ˗oˬ ve hkʼe, chi htaꞈ caˉ daꞈ ve nawˬ bon hkʼa dehꞈ lawˬ sheˍ. Ga piˇ shehˍ hpaˇ te tuˬ ve te hkʼaˇ dawˇ hkʼaˇ htaꞈ caˉ daꞈ ve nawˬ hkʼa dehꞈ hpfuhˆ nyi leh coˇ caˇ leh te gʼa tcuh sheˍ. Nawˬ Yaˬhoˉvaˬ leh awˬ viˉ awˬ nyi htaꞈ hkʼa dehꞈ haꞈ leh aˬ htoꞈ ma te nawˬ yawˇ hui htaꞈ ga piˇ gaˇ ve dawˇ nyi sheˍ. (1 Peˍtruˆ 4:8, 10) Ga piˇ shehˍ hpaˇ hpehꞈ tuˬ nawˬ coˇ caˇ sheˍ. Chi hkʼe te ve kʼo, nawˬ awˬ viˉ awˬ nyi htaꞈ gʼa ga piˇ ve ha lehˬ jaˇ tuˬ yoˬ. Nawˬ ga piˇ shehˍ hpaˇ ve awˬ vuiˬ htaꞈ te tuˬ coˇ caˇ ve htaꞈ Yaˬhoˉvaˬ awˬ bon naꞈ laˇ tuˬ yoˬ.—Hpiˇliˇpiˆ 2:13.
KʼAW MUIˬ HKAWˇ 17 “Ngaˬ te gaˇ”
a AWˬ HAN HTAꞈ KʼOˆ MAˍ TAˍ VE: Laꞈ mehˍ hpawˇ ve Yeˍsuˆ awˬ laꞈ gʼawˇ htaꞈ ga piˇ ve. Laꞈ sha hpawˇ ve ga piˇ shehˍ hpaˇ Hkriꞈ yaˇ awˬ moˍ hkʼaw awˬ viˉ awˬ nyi chaw mawˇ htaꞈ ga piˇ ve
