1-2. Nyi haꞈ shaˉ paˍ “daꞈ ve kanˉ” aˬ htoꞈ ma te ve le?

 Nawˬ ga piˇ shehˍ hpaˇ teˇ tcuhˉ teˇ yanˇ gʼa te˗oˬ ve kʼo, nyi haꞈ shaˉ paˍ gʼa te tuˬ ve te hkʼaˇ dawˇ hkʼaˇ cawˬ tuˬ, nawˬ awˬ to nawˬ uiˍ la mvuh la tuˬ te gaˇ ve yoˬ. Nawˬ “daꞈ ve kanˉ” chi htaꞈ te gaˇ ve maˇ heˆ laˇ?—1 Tiˆmoˉseˍ 3:1.

² Nyi haꞈ shaˉ paˍ ve kanˉ aˬ htoꞈ ma cawˬ ve le? Yawˇ hui hto toˇ ve hkʼaw sheh kʼai ve, yawˇ hui awˬ viˉ awˬ nyi htaꞈ awˬ gʼaˇ piˇ ve, leh Hkriꞈ yaˇ awˬ moˍ hkʼaw kaꞈ bon maˍ ve yoˬ. Chi hkʼoˆ kaꞈ, yawˇ hui tawˇ yaw ve leh yawˇ hui ve awˬ lawn, awˬ viˉ awˬ nyi htaꞈ yonˍ hkʼaˇ yonˍ yeˬ tuˬ te piˇ gʼa ve yoˬ. Chi htaꞈ pa taw, Liꞈ hpu hkʼaw kanˉ te hkeuꞈ ve nyi haꞈ shaˉ paˍ htaꞈ ‘chaw yaˇ hpehꞈ ve laꞈ shawnˍ’ tehꞈ kʼoˆ ve yoˬ.—Eˇfeˇsuꞈ 4:8.

3. Nyi haꞈ shaˉ paˍ gʼa te tuˬ awˬ viˉ awˬ nyi hawˉ hkʼaˆ te hkʼaˇ dawˇ hkʼaˇ hkʼaˬ hkʼe ve gʼa cawˬ cawˇ ve le? (1 Tiˆmoˉseˍ 3:1-7; Tiˇtuˆ 1:5-9)

³ Nawˬ nyi haꞈ shaˉ paˍ te gʼa tuˬ, te hkʼaˇ dawˇ hkʼaˇ aˬ htoꞈ ma gʼa cawˬ cawˇ ve le? Nyi haꞈ shaˉ paˍ gʼa te ve lehˬ, kanˉ te caˇ ve htaꞈ maˇ shuˍ daꞈ. Nawˬ te puiˉ te hpehꞈ ve htaꞈ pa taw, nyi haꞈ shaˉ paˍ gʼa te ve maˇ heˆ. Maˇ˗awˍ ve kʼo, nawˬ kanˉ ca na te˗e htaˇ, kanˉ te kuiˬ lo heuˆ gaˇ ve hkʼe, nawˬ te puiˉ te hpehꞈ ve cawˬ ve kʼo, nawˬ kanˉ gʼa te tuˬ yoˬ. Yaꞈ hkʼaˇ, nyi haꞈ shaˉ paˍ hpehꞈ ve lehˬ, hto toˇ leh maˍ cheuˬ ve ceh tiˉ maˇ heˆ. 1 Tiˆmoˉseˍ liꞈ 3:1-7 leh Tiˇtuˆ liꞈ 1:5-9 hkʼaw kʼoˆ taˍ ve hkʼe, nawˬ nyi haꞈ shaˉ paˍ gʼa te tuˬ, awˬ nu ve te hkʼaˇ dawˇ hkʼaˇ kaꞈ gʼa cawˬ cawˇ ve yoˬ. (Gʼaw sheˍ.) Awˬ lawn chi ve hkʼaw nyi haꞈ shaˉ paˍ te gʼa tuˬ, awˬ hkʼaˇ 3 hkʼaˇ htaꞈ teˇ geh henˇ tuˬ yoˬ. Chi ve lehˬ, awˬ baˬ hpawˇ lo leh Hkriꞈ yaˇ awˬ moˍ hkʼaw kaꞈ awˬ meh daꞈ ve chaw gʼa hpehꞈ piˇ ve, yehˬ kʼa hkʼaw sheh kʼai ve daꞈ ve henˇ yuˬ tuˬ hpehꞈ ve, leh awˬ viˉ awˬ nyi htaꞈ ga piˇ ve yoˬ.

DAꞈ VE AWˬ MEH CAWˬ VE

4. “Venˇ baˆ taˍ kuiˬ maˇ cawˬ ve chaw” hkʼaˬ hkʼe kʼoˆ gaˇ ve le?

⁴ Nawˬ nyi haꞈ shaˉ paˍ te gʼa tuˬ, daꞈ ve te hkʼaˇ dawˇ hkʼaˇ gʼa cawˬ ve yoˬ. Leh nawˬ “venˇ baˆ taˍ kuiˬ maˇ cawˬ ve chaw” gʼa hpehꞈ ve yoˬ.  Chi kʼoˆ gaˇ ve lehˬ, nawˬ Hkriꞈ yaˇ awˬ moˍ hkʼaw daꞈ ve awˬ meh gʼa cawˬ ve yoˬ. Awˬ lawn kʼo, nawˬ daꞈ ve te hkʼaˇ dawˇ hkʼaˇ cawˬ leh, nawˬ htaꞈ chaw teˇ gʼaˇ kaꞈ nyi cha tuˬ ve awˬ hkʼaˇ maˇ gʼa cawˬ. ‘Awˬ baˬ hpawˇ chehˇ ve chaw mehˆ gʼuˇ suhˍ nawˬ daꞈ ve awˬ meh cawˬ ve chaw gʼa hpehꞈ ve yoˬ.’ Awˬ tehˬ kʼo, Yaˬhoˉvaˬ ve kanˉ maˇ te ve chaw nawˬ ve yonˍ hkʼaˇ htaꞈ caˉ daꞈ ve, maˇ heˆ heˆ kʼoˆ laˇ ve yoˬ. Yaꞈ hkʼaˇ, nawˬ ka tiꞈ maˇ yeˬ leh maˇ daꞈ ve chaw hpehꞈ ve tehꞈ, awˬ nu ve chaw htawˇ dawˇ nawˬ dawˇ cawˬ tuˬ maˇ te piˇ cawˇ. (Daˍyeˍlaˆ 6:4, 5) A shu yawˇ awˬ to htaꞈ na nyi cawˇ ve, ‘ngaˬ awˬ baˬ hpawˇ lo leh Hkriꞈ yaˇ awˬ moˍ hkʼaw kaꞈ daꞈ ve awˬ meh cawˬ ve chaw hpehꞈ˗aw laˇ?’

5. Nawˬ “daꞈ ve htaꞈ nyi ma cawˇ ve chaw” hpehꞈ ve tehꞈ hkʼaˬ hkʼe hpeuꞈ maw piˇ gʼa tuˬ le?

⁵ Nawˬ “daꞈ ve htaꞈ nyi ma cawˇ ve chaw” hpehꞈ ve kʼo, awˬ nu ve chaw daꞈ ve awˬ ceuˬ htaꞈ nawˬ ca nyi leh, yawˇ hui htaꞈ chiˇ mvuh piˇ ve yoˬ. Nawˬ awˬ nu ve chaw htaꞈ daꞈ ve awˬ ceuˬ te piˇ ve ha lehˬ leh, yawˇ hui lawˬ ve aꞈ kehˉ kaꞈ te piˇ ve yoˬ. (1 Hteˇsaˍlawˇniˆ 2:8) Aˬ htoꞈ ma te, te hkʼaˇ dawˇ hkʼaˇ chi ve teˇ hpaˍ nyi haꞈ shaˉ paˍ awˬ pon a yeˇ uiˍ jaˇ ve le? Awˬ lawn kʼo, yawˇ hui awˬ viˉ awˬ nyi htaꞈ awˬ gʼaˇ ca piˇ˗e tuˬ, ha lehˬ ha kʼa awˬ yanˇ yuˬ tanˇ leh, Hkriꞈ yaˇ awˬ moˍ hkʼaw kanˉ laiˉ ceuˬ te sheˍ ve yoˬ. (1 Peˍtruˆ 5:1-3) Yawˇ hui kanˉ te tuˬ cawˬ maˇ jaˇ ve htawˇ, awˬ nu ve chaw htaꞈ gʼa ga piˇ ve ha lehˬ jaˇ ve yoˬ.—Tcuh yaˇ 20:35.

6. “Hkehˉ chaw htaꞈ haꞈ yuˬ puiˉ ve chaw” hkʼaˬ hkʼe kʼoˆ gaˇ ve le? (Heˍbrehˇ 13:2, 16; Awˬ han htaꞈ nyi sheˍ.)

⁶ Nawˬ meuˆ daꞈ ve awˬ chawˇ maˇ heˆ ve htawˇ, teˇ gʼaˇ le le htaꞈ daꞈ ve te piˇ ve kʼo, nawˬ “hkehˉ chaw htaꞈ haꞈ yuˬ puiˉ ve chaw” hpehꞈ ve tehꞈ hpeuꞈ maw piˇ ve yoˬ. (1 Peˍtruˆ 4:9) Liꞈ kʼoˆ teˇ kʼoˆ hkʼaw hkehˉ chaw htaꞈ haꞈ yuˬ puiˉ ve chaw htaꞈ kʼoˆ taˍ ve, “maˇ shiˍ daꞈ ve chaw loꞈ la tuˬ yawˇ yehˬ miˉ hpaw piˇ leh, haꞈ yuˬ puiˉ ve chaw hpehꞈ ve yoˬ.” A shu yawˇ awˬ to htaꞈ na nyi cawˇ ve, ‘ngaˬ hkehˉ chaw htaꞈ haꞈ yuˬ piˇ puiˉ ve daꞈ ve awˬ meh cawˬ˗aw laˇ?’ (Heˍbrehˇ 13:2, 16 gʼaw sheˍ.) Hkehˉ chaw htaꞈ haꞈ yuˬ piˇ puiˉ ve chaw lehˬ, haˍ ve gʼawˇ ve chaw maˇ heˆ leh Gʼuiˬ sha ve kanˉ te hkeuꞈ ve chaw htaꞈ kaꞈ haꞈ yuˬ piˇ ve yoˬ. Tawˇ pa haˉ te kʼo, toˇ nyi shehˍ hpaˇ leh awˬ nu ve Hkriꞈ yaˇ awˬ moˍ hkʼaw ve chaw bon ca maˍ la ve htaꞈ kaꞈ ha yuˬ piˇ ve yoˬ.—Awˬ hkuiˉ puiˍ 18:2-8; Tawˇ naˉ ve 3:27; Luˉkaꞈ 14:13, 14; Tcuh yaˇ 16:15; Roˉmaꞈ 12:13.

7. Nyi haꞈ shaˉ paˍ lehˬ yawˇ hpu htaꞈ maˇ sheˉ lai puiˉ ve chaw hpehꞈ ve tehꞈ hkʼaˬ hkʼe hpeuꞈ maw piˇ gʼa tuˬ le?

⁷ “Hpu htaꞈ maˇ sheˉ lai puiˉ ve chaw” chi kʼoˆ gaˇ ve lehˬ, nawˬ a shaꞈ teꞈ kuiˬ hkʼaw hpu shi mawˇ jeˬ htaꞈ a yeˇ uiˍ jaˇ ve tehꞈ maˇ gʼa shawˍ. Nawˬ paw sha ve maˇ heˆ leh haˍ gʼawˇ ve htawˇ maˇ kʼoˆ, Yaˬhoˉvaˬ  uˉ peunˍ ve a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve yoˬ. (Maꞈhtehˍ 6:33) Nawˬ Yaˬhoˉvaˬ awˬ pon awˬ yanˇ, awˬ gʼaˇ, leh hpu shi mawˇ jeˬ htaꞈ yehˇ ve yoˬ. Yehˬ kʼa hkʼaw ve chaw htaꞈ nyi haꞈ shaˉ leh Hkriꞈ yaˇ awˬ moˍ hkʼaw awˬ viˉ awˬ nyi htaꞈ kaꞈ ga piˇ ve yoˬ. (Maꞈhtehˍ 6:24; 1 Yoˇhanˬ 2:15-17) A shu yawˇ awˬ to htaꞈ na nyi cawˇ ve, ‘ngaˬ awˬ pon hpu a yeˇ hkʼaˬ hkʼe taw uiˍ ve le? Ngaˬ cawˬ taˍ ve awˬ ceuˬ htaꞈ nyi hkʼaˇ suh chehˇ˗aw laˇ? Maˇ heˆ leh ngaˬ hpu ca ve htaꞈ ceh tiˉ a yeˇ yuˬ leh mawˇ jeˬ maˇ maˇ cawˬ gaˇ ve laˇ?’—1 Tiˆmoˉseˍ 6:6, 17-19.

8. “Shaˍ tiꞈ taˍ puiˉ ve chaw” leh “a shu yawˇ awˬ to htaꞈ gʼaˇ puiˉ ve chaw” hkʼaˬ hkʼe kʼoˆ gaˇ ve le?

⁸ Nawˬ “shaˍ tiꞈ taˍ puiˉ ve chaw” leh “a shu yawˇ awˬ to htaꞈ gʼaˇ puiˉ ve chaw” hpehꞈ ve kʼo, nawˬ awˬ hkʼaˇ ca puiˉ leh laiˉ lawn htaꞈ keunˍ lawꞈ cawˇ lawꞈ ve chaw hpehꞈ ve yoˬ. Tawˇ pa haˉ te kʼo, nawˬ caˇ ponˬ caˇ leuˉ leh dawˬ ponˬ dawˬ leuˉ ve chaw maˇ hpehꞈ ve yoˬ. Nyi sha ve hkʼaw nawˬ awˬ hkiˇ shawˍ leh uˉ hkeh mvuh gʼa nuˆ ve yoˬ. Leh pyawˍ ve awˬ ceuˬ daꞈ ve hkʼaw gʼa leuˆ ve, leh chi teˇ hkui shu dawˇ cawˇ jaˇ ve awˬ ceuˬ htaꞈ nawˬ dawˇ cawˇ ve chaw maˇ gʼa hpehꞈ ve yoˬ. (Luˉkaꞈ 21:34; Yaˍkoˆ 4:4) Nawˬ nyi ma haˆ maˇ zuhˆ puiˉ leh, awˬ nu ve chaw nawˬ htaꞈ maˇ daꞈ ve awˬ ceuˬ te laˇ ve htawˇ, nyi ma gawˬ lehˍ cawˬ gʼa ve yoˬ. Chi hkʼoˆ kaꞈ, nawˬ “a pehˉ meuˇ gʼuiˬ dawˬ ponˬ dawˬ leuˉ ve chaw” maˇ gʼa hpehꞈ leh dawˬ bvuhˆ jaˇ ve chaw kaꞈ maˇ gʼa hpehꞈ. A shu yawˇ awˬ to htaꞈ na nyi cawˇ ve, ‘ngaˬ a shaꞈ teꞈ kuiˬ lo shaˍ tiꞈ taˍ puiˉ ve chaw leh, a shu yawˇ awˬ to htaꞈ gʼaˇ puiˉ ve chaw hpehꞈ ve tehꞈ hpeuꞈ maw piˇ˗aw laˇ?’

9. “Nyi ma taˍ puiˉ ve chaw” leh “te keunˍ te cawˇ ve htaꞈ te ve chaw” hkʼaˬ hkʼe kʼoˆ gaˇ ve le?

⁹ Nawˬ “nyi ma taˍ puiˉ ve chaw” hpehꞈ ve kʼo, nawˬ aˬ htoꞈ ma ve awˬ lawn gʼa hpuˇ ve htawˇ, Liꞈ hpu hkʼaw ve awˬ liˇ awˬ hkʼaˇ htaꞈ hkʼaˬ htaˆ kaꞈ dawˇ nyi tuˬ yoˬ. Chi ve lehˬ awˬ lawn teˇ hpaˍ htaꞈ nawˬ hkʼa dehꞈ na gʼa tuˬ, cuˇ yiˍ cawˬ ve hkʼaw dawˇ cheˆ gʼa tuˬ, leh nawˬ haˆ maˇ dawˇ cheˆ tuˬ kaꞈ ga laˇ ve yoˬ. Yaꞈ hkʼaˇ, awˬ lawn teˇ hpaˍ hkʼa dehꞈ cawˬ˗oˬ ve laˇ tehꞈ, yonˍ gʼa tuˬ nawˬ te ve yoˬ. (Tawˇ naˉ ve 18:13) Chi htaꞈ pa taw, nawˬ cuˇ yiˍ cawˬ ve hkʼaw dawˇ cheˆ gʼa ve yoˬ. Chi ve lehˬ nawˬ Yaˬhoˉvaˬ dawˇ ve hkʼe dawˇ ve tehꞈ hpeuꞈ maw piˇ ve yoˬ. Nawˬ “te keunˍ te cawˇ ve htaꞈ te ve chaw” hpehꞈ ve kʼo, nawˬ aˬ htoꞈ ma teˇ ceuˬ kaꞈ gu teh taˍ ve hkʼe hteˇ hteˇ shawˇ shawˇ te leh, shawˉ pawˍ maˇ law chehˇ leh haˆ haˆ te ve yoˬ. Nawˬ yonˍ gʼa ve chaw hpehꞈ leh beˆ maˍ laˇ ve hkʼe gʼaꞈ te ve tehꞈ, chaw teˇ gʼaˇ le le mawˬ tuˬ yoˬ. Te hkʼaˇ dawˇ hkʼaˇ chi ve teˇ hpaˍ lehˬ, nawˬ daꞈ ve awˬ meh cawˬ tuˬ te laˇ ve yoˬ. Yehˬ kʼa hkʼaw sheh kʼai ve daꞈ ve henˇ yuˬ tuˬ hpehꞈ ve, leh Liꞈ hpu hkʼaw kʼoˆ taˍ ve htaꞈ teˇ geh kʼawꞈ nyi sheˍ.

YEHˬ KʼA HKʼAW SHEH KʼAI VE DAꞈ VE HENˇ YUˬ TUˬ HPEHꞈ VE

10. Awˬ viˉ awˬ nyi hawˉ hkʼaˆ ‘a shu yawˇ ve yehˬ kʼa htaꞈ uˉ peunˍ gʼa ve chaw’ hkʼaˬ hkʼe hpehꞈ gʼa tuˬ le?

¹⁰ Nawˬ awˬ hpawˇ hpehꞈ leh nyi haꞈ shaˉ paˍ hpehꞈ gaˇ ve kʼo, nawˬ ve yehˬ kʼa hkʼaw ve chaw daꞈ ve henˇ yuˬ tuˬ gʼa hpehꞈ ve yoˬ. Chi htaꞈ pa taw, nawˬ ‘a shu yawˇ ve yehˬ kʼa htaꞈ uˉ peunˍ gʼa ve chaw’ gʼa hpehꞈ leh yehˬ kʼa hkʼaw ve chaw htaꞈ haꞈ leh a yeˇ hkʼa dehꞈ yuˬ ve chaw kaꞈ gʼa hpehꞈ ve yoˬ. Chi kʼoˆ gaˇ ve lehˬ, yehˬ kʼa hkʼaw Gʼuiˬ sha htaꞈ oˉ kʼoˍ pui ve kaꞈ gʼa sheh kʼai ve yoˬ. Chi aˬ htoꞈ ma te a yeˇ uiˍ jaˇ ve le? Awˬ lawn kʼo, tcuh yaˇ Pawˇluꞈ kʼoˆ ve, “a shu yawˇ ve yehˬ kʼa htaꞈ uˉ peunˍ maˇ gʼaˇ ve chaw lehˬ, Gʼuiˬ sha ve Hkriꞈ yaˇ awˬ moˍ htaꞈ hkʼaˬ hkʼe te nyi haꞈ shaˉ gʼa tuˬ le?”—1 Tiˆmoˉseˍ 3:5.

11-12. Yehˬ kʼa hkʼaw ve chaw te hkʼaˇ dawˇ hkʼaˇ awˬ viˉ awˬ nyi hawˉ hkʼaˆ nyi haꞈ shaˉ paˍ hpehꞈ ve htaꞈ heuˆ la kuiˬ hkʼaˬ hkʼe cawˬ ve le? (Awˬ han htaꞈ nyi sheˍ.)

¹¹ Nawˬ awˬ pa hpehꞈ ve kʼo, ‘yehˬ yaˇ kʼa yaˇ teˇ hpaˍ htaꞈ hteˇ ve cawˇ ve awˬ hkʼaw lo hkʼa dehꞈ maˍ ve yoˬ.’ Nawˬ yaˇ htaꞈ haꞈ pehnˇ ve hkʼaw gʼa maˍ piˇ ve yoˬ. Nawˬ yaˇ htaꞈ ha lehˬ ve cawˬ tcuh gaˇ ve, awˬ nu ve yaˇ hkʼa shuˍ leˬ guiˇ leh gʼuiˬ yawˬ tcuh gaˇ ve yoˬ. Yaꞈ hkʼaˇ, nawˬ ve yaˇ htaꞈ hkʼa dehꞈ maˍ piˇ ve kʼo, yaˇ na yuˬ puiˉ ve, yawˆ yan puiˉ ve, leh awˬ liˇ awˬ hkʼaˇ daꞈ ve chaw hpehꞈ ve yoˬ. Chi hkʼoˆ kaꞈ, yaˇ Yaˬhoˉvaˬ geh meuˆ daꞈ tuˬ coˇ caˇ leh ga piˇ sheˍ. Yaˇ Liꞈ hpu hkʼaw ve awˬ liˇ awˬ hkʼaˇ htaꞈ gʼaꞈ te leh Baˆtiˆsaˬ haꞈ yuˬ tuˬ kaꞈ ga piˇ sheˍ.

¹² “Yaˇ teˇ hpaˍ lehˬ, Hkriꞈ yaˇ gʼa hpehꞈ ve awˬ hkʼoˆ kaꞈ, yawˇ hui awˬ lawn shu kʼoˆ kuiˬ yaw kuiˬ maˇ gʼa cawˬ tuˬ, awˬ liˇ daꞈ leh, shu ve hkawˇ htaꞈ na yuˬ puiˉ ve chaw gʼa hpehꞈ ve yoˬ.” Yaˇ Baˆtiˆsaˬ maˇ haꞈ  yuˬ sheˍ ve hto toˇ ve chaw hpehꞈ ve, maˇ heˆ leh Baˆtiˆsaˬ haꞈ yuˬ˗oˬ leh venˇ baˆ uiˍ jaˇ ve htaꞈ te leh awˬ pa awˬ e geh chehˇ sheˍ ve kʼo, chi awˬ pa htaꞈ heuˆ la kuiˬ hkʼaˬ hkʼe cawˬ ve le? Awˬ pa yaˇ htaꞈ hpehˇ baˬ taˍ leh maˇ maˍ piˇ ve kʼo, yawˇ nyi haꞈ shaˉ paˍ maˇ kʼawꞈ gʼa te tuˬ yoˬ.—Shaw nyi kuiˬ Taꞈ yehˬ Ha pa 10 maˬ 15 nyi 1996 hkʼawꞈ liꞈ mehˆ hpfuhˇ 21 awˬ tawn 6-7 htaꞈ nyi sheˍ. (Laˇhuˍ hkawˇ maˇ cawˬ.)

AWˬ VIˉ AWˬ NYI HTAꞈ GA PIˇ VE

13. “Nyi ma nuˇ nehˬ ve chaw” leh ‘a shu yawˇ ve a loˍ awˬ hkʼaˇ suh maˇ te ve chaw’ hpehꞈ ve tehꞈ nawˬ hkʼaˬ hkʼe te hpeuꞈ maw piˇ gʼa tuˬ le?

¹³ Awˬ viˉ awˬ nyi hawˉ hkʼaˆ Hkriꞈ yaˇ ve teˇ hkʼaˇ dawˇ hkʼaˇ hkʼe cawˬ ve chaw lehˬ, Hkriꞈ yaˇ awˬ moˍ hkʼaw laꞈ shawnˍ hkʼe hpehꞈ ve yoˬ. Awˬ viˉ awˬ nyi hawˉ hkʼaˆ “nyi ma nuˇ nehˬ ve chaw” lehˬ dawˇ sha gawˬ lehˍ ve cawˬ tuˬ te ve yoˬ. Nawˬ nyi ma nuˇ nehˬ ve chaw hpehꞈ gaˇ ve kʼo, shu tawˇ yaw htaˇ hkʼa dehꞈ na taˍ piˇ leh aˬ htoꞈ ma pa taw yawˇ chi hkʼe dawˇ ve na gʼa piˇ sheˍ. Nyi haꞈ shaˉ paˍ hpawnˬ daꞈ chehˇ htaˇ, yawˇ hui dawˇ cheˆ ve Liꞈ hpu hkʼaw ve awˬ liˇ awˬ hkʼaˇ htaꞈ maˇ yaꞈ ve kʼo, nyi haꞈ shaˉ paˍ maˇ˗awˍ ve dawˇ cheˆ ve htaꞈ nawˬ haꞈ yuˬ˗aw laˇ? ‘A shu yawˇ ve a loˍ awˬ hkʼaˇ suh maˇ te ve chaw’ gʼa hpehꞈ ve yoˬ. Chi kʼoˆ gaˇ ve lehˬ, nawˬ ve dawˇ hkʼaˇ, hkʼaˇ suh gʼaꞈ te tuˬ htaꞈ ceh tiˉ maˇ gʼawˆ tiˍ taˍ. Yaꞈ hkʼaˇ, dawˇ hkʼaˇ piˇ daꞈ ve laiˉ gʼaˇ cawˬ ve htaꞈ nawˬ awˬ hpfuhˇ shiˍ leh, yawˇ hui ve dawˇ hkʼaˇ htaꞈ kaꞈ nawˬ awˬ hpfuhˇ shiˍ ve yoˬ. (Awˬ hkuiˉ puiˍ 13:8, 9; Tawˇ naˉ ve 15:22) Nawˬ “shu htaꞈ tawˇ maˇ gʼawˬ daꞈ puiˉ ve chaw” leh “nyi ma ngeh ve chaw” maˇ gʼa hpehꞈ. Nyi ma uiˍ ve mvuh ve leh shu hawˉ lo maˇ chehˇ ve aꞈ kehˉ, nawˬ nyi ma nuˇ nehˬ leh awˬ hkʼaˇ ca puiˉ ve chaw gʼa hpehꞈ ve yoˬ. Nawˬ dawˇ sha gawˬ lehˍ ve chaw hpehꞈ ve kʼo, shoꞈ shaꞈ leh dawˇ maˇ jaˇ ve awˬ yanˇ hpehꞈ ve htawˇ, nawˬ dawˇ sha gawˬ lehˍ ve cawˬ tuˬ te ve yoˬ. (Yaˍkoˆ 3:17, 18) Ngaˬ hui htaꞈ tawˍ laˇ ve chaw htawˇ, nawˬ nyi ma nuˇ nehˬ ve hkʼaw tawˇ yaw ve kʼo, awˬ nu ve chaw nyi ma nuˇ nehˬ ve cawˬ tuˬ te piˇ ve yoˬ.—Suhˉ jehˬ ve 8:1-3; Tawˇ naˉ ve 20:3; 25:15; Maꞈhtehˍ 5:23, 24.

14. “Hkriꞈ yaˇ awˬ suhˉ maˇ gʼa hpehꞈ” ve leh “daꞈ ve kehˬ ve chaw” hkʼaˬ hkʼe kʼoˆ gaˇ ve le?

¹⁴ Awˬ viˉ awˬ nyi hawˉ hkʼaˆ nyi haꞈ shaˉ paˍ hpehꞈ ve chaw lehˬ, “Hkriꞈ yaˇ awˬ suhˉ maˇ gʼa hpehꞈ.” Chi kʼoˆ gaˇ ve lehˬ, yawˇ co ha hpawˇ ve chaw mawˇ hpehꞈ maw˗oˬ ve chaw gʼa hpehꞈ ve yoˬ. Yaꞈ hkʼaˇ, Baˆtiˆsaˬ haꞈ yuˬ˗oˬ ve laiˉ hkʼawꞈ gaˬ˗oˬ ve htawˇ, nyi haꞈ shaˉ paˍ gʼa te ve htaꞈ kʼoˆ gaˇ ve maˇ heˆ. Nawˬ  nyi haꞈ shaˉ paˍ gʼa te tuˬ maˇ leuˆ yuˬ laˇ sheˍ htaˇ, nawˬ Yeˍsuˆ htaꞈ henˇ yuˬ ve tehꞈ gʼa hpeuꞈ maw piˇ ve yoˬ. Nawˬ nyi ma nuˇ nehˬ ve leh Yaˬhoˉvaˬ nawˬ htaꞈ awˬ vuiˬ peꞈ laˇ ve htaꞈ te tuˬ gu hehnˇ taˍ ve chaw kaꞈ gʼa hpehꞈ piˇ ve yoˬ. (Maꞈhtehˍ 20:23; Hpiˇliˇpiˆ 2:5-8) Nawˬ “daꞈ ve kehˬ ve chaw” hpehꞈ ve tehꞈ gʼa hpeuꞈ maw piˇ ve yoˬ. Chi ve lehˬ, nawˬ Yaˬhoˉvaˬ geh meuˆ daꞈ ve, yawˇ ve awˬ liˇ awˬ hkʼaˇ htaꞈ gʼaꞈ te ve, leh Yaˬhoˉvaˬ yawˇ ve kanˉ hkʼaˇ htaꞈ cuˇ leh beˆ maˍ laˇ taˍ ve htaꞈ kaꞈ gʼa gʼaꞈ te ve yoˬ.—1 Tiˆmoˉseˍ 4:15.

15. Nyi haꞈ shaˉ paˍ lehˬ bon maˍ cheuˬ ve chaw hpehꞈ cawˇ ve laˇ? Tawˇ pa haˉ kʼoˆ maˍ laˇ sheˍ.

¹⁵ Liꞈ hpu hkʼaw hkʼa tawˍ lehˆ kʼoˆ laˇ taˍ ve, nyi haꞈ shaˉ paˍ lehˬ “maˍ piˇ puiˉ ve chaw” gʼa hpehꞈ ve yoˬ. Yaꞈ hkʼaˇ, chi kʼoˆ gaˇ ve lehˬ nawˬ bon maˍ cheuˬ jaˇ ve chaw gʼa hpehꞈ ve laˇ? Maˇ heˆ. Daꞈ ve nyi haꞈ shaˉ paˍ laiˉ gʼaˇ yawˇ hui bon maˍ cheuˬ jaˇ ve chaw maˇ hpehꞈ ve htawˇ, yawˇ hui hto toˇ kuiˬ lo hkʼa dehꞈ maˍ puiˉ ve, leh awˬ viˉ awˬ nyi htaꞈ awˬ gʼaˇ piˇ puiˉ ve yoˬ. (1 Tiˆmoˉseˍ 3:2; 1 Kawˇrenˍhtuˆ 12:28, 29; Eˇfeˇsuꞈ 4:11 htaꞈ tehˆ daꞈ sheˍ.) Hkʼaˬ hkʼe hpehꞈ ve htawˇ maˇ kʼoˆ, maˍ cheuˬ la tuˬ nawˬ coˇ caˇ leh gʼa te ve yoˬ. Hkʼe kʼo, nawˬ hkʼaˬ hkʼe te maˍ cheuˬ la gʼa tuˬ le?

16. Nawˬ maˍ piˇ puiˉ ve chaw hkʼaˬ hkʼe te hpehꞈ tuˬ le? (Awˬ han htaꞈ nyi sheˍ.)

¹⁶ “Daꞈ jaˇ biˇ jaˇ ve tawˇ hkawˇ teˇ hpaˍ maˍ piˇ” ve yoˬ. Nawˬ maˍ cheuˬ ve chaw hpehꞈ tuˬ, Liꞈ hpu hkʼaw ve awˬ ceuˬ maˍ piˇ leh beˆ maˍ piˇ sheˍ. Nawˬ Liꞈ hpu leh Gʼuiˬ sha ve kanˉ hkʼaˇ hkʼaw ve liꞈ kʼoˆ teˇ hpaˍ htaꞈ hkʼa dehꞈ gʼa henˇ cawˇ ve yoˬ. (Tawˇ naˉ ve 15:28; 16:23) Nawˬ Liꞈ hpu henˇ htaˇ, Liꞈ hpu hkʼaw ve awˬ liˇ awˬ hkʼaˇ htaꞈ hkʼaˬ hkʼe yuˬ yehˇ gʼa ve chaˬ nyi sheˍ. Leh nawˬ maˍ piˇ htaˇ kaꞈ yawˇ hui ve nyi ma hkʼaw gaˬ tuˬ te sheˍ. Nyi haꞈ shaˉ paˍ te maw jaˇ˗oˬ ve chaw geh beˆ maˍ laˇ hkawˇ lawˬ leh nawˬ gʼaꞈ te ve kʼo, nawˬ maˍ puiˉ ve chaw hpehꞈ gʼa ve yoˬ. (1 Tiˆmoˉseˍ 5:17) Nyi haꞈ shaˉ paˍ lehˬ ‘awˬ viˉ awˬ nyi htaꞈ awˬ gʼaˇ piˇ puiˉ ve chaw gʼa hpehꞈ ve yoˬ.’ Yaꞈ hkʼaˇ, teˇ pawˆ pawˆ kʼo, awˬ viˉ awˬ nyi htaꞈ beˆ maˍ piˇ ve, maˇ heˆ leh “gʼawˬ hkʼaˆ ve chaw teˇ hpaˍ htaꞈ maˍ” piˇ ve yoˬ. Chi hkʼe ve awˬ yanˇ htaˇ, nyi haꞈ shaˉ paˍ nyi ma nuˇ nehˬ ve gʼa cawˬ ve yoˬ. Nawˬ nyi ma nuˇ nehˬ ve chaw hpehꞈ ve kʼo, haꞈ pehnˇ ve tehꞈ hpeuꞈ maw piˇ leh Liꞈ hpu hkʼaw ve awˬ lawn maˍ piˇ ve yoˬ. Saˍ laꞈ lonˉ Yeˍsuˆ htaꞈ nawˬ henˇ yuˬ ve pa taw, nawˬ maˍ piˇ puiˉ ve chaw hpehꞈ ve yoˬ.—Maꞈhtehˍ 11:28-30; 2 Tiˆmoˉseˍ 2:24.

 CAˉ LEH TE KʼAI SHEˍ

17. (a) Ga piˇ shehˍ hpaˇ coˇ caˇ leh nyi haꞈ shaˉ paˍ te gʼa tuˬ, aˬ htoꞈ ma ga piˇ gʼa ve le? (b) Awˬ viˉ awˬ nyi hawˉ hkʼaˆ htaꞈ awˬ vuiˬ awˬ suhˉ te tuˬ leuˆ yuˬ piˇ htaˇ, nyi haꞈ shaˉ paˍ aˬ htoꞈ ma htaꞈ gʼa dawˇ nyi cawˇ ve le? (Awˇ ceˍ awˇ fa “ Awˬ viˉ awˬ nyi hawˉ hkʼaˆ ve te hkʼaˇ dawˇ hkʼaˇ htaꞈ chaˬ nyi htaˇ awˬ hkʼaˇ ca puiˉ ve chaw gʼa hpehꞈ ve” htaꞈ nyi sheˍ.)

¹⁷ Nyi haꞈ shaˉ paˍ hpehꞈ tuˬ ve te hkʼaˇ dawˇ hkʼaˇ htaꞈ nawˬ gʼa henˇ peuˬ hkʼawꞈ nawˉ, ga piˇ shehˍ hpaˇ teˇ hpaˍ hpaˍ yawˇ nyi haꞈ shaˉ paˍ te maˇ gʼa tehꞈ dawˇ ve yoˬ. Yaꞈ hkʼaˇ, Yaˬhoˉvaˬ leh yawˇ ve kanˉ hkʼaˇ, nawˬ te hkʼaˇ dawˇ hkʼaˇ chi ve teˇ hpaˍ htaꞈ hkʼa biˇ henˇ yuˬ gʼa tuˬ, maˇ dawˇ law ve tehꞈ tawnˇ taˍ sheˍ. (1 Peˍtruˆ 2:21) Nawˬ te hkʼaˇ dawˇ hkʼaˇ chi ve teˇ hpaˍ htaꞈ te gʼa tuˬ, Yaˬhoˉvaˬ ve daꞈ kehˬ ve awˬ ha hpu ga laˇ tuˬ yoˬ. (Hpiˇliˇpiˆ 2:13) Te hkʼaˇ dawˇ hkʼaˇ nawˬ hkʼa dehꞈ te gʼa gaˇ ve aˬ htoꞈ ma cawˬ ve le? Yaˬhoˉvaˬ geh bon lawˬ ve, awˬ lawn oˇ ve htaꞈ caˉ daꞈ ve hpfuhˆ nyi ve, leh nawˬ aˬ htoꞈ ma gʼa pa cawˇ ve htaꞈ shiˍ tuˬ, nyi haꞈ shaˉ paˍ teˇ gʼaˇ gʼaˇ geh beˆ maˍ laˇ tuˬ lawˬ sheˍ.

18. Ga piˇ shehˍ hpaˇ teˇ gʼaˇ le le aˬ htoꞈ ma te cawˇ ve le?

¹⁸ Awˬ viˉ awˬ nyi hawˉ hkʼaˆ teˇ gʼaˇ le le leh nyi haꞈ shaˉ paˍ hpehꞈ˗oˬ ve chaw htawˇ, awˬ lawn chi ve hkʼaw kʼoˆ taˍ ve hkʼe te hkʼaˇ dawˇ hkʼaˇ cawˬ tuˬ coˇ caˇ sheˍ. (Hpiˇliˇpiˆ 3:16) Nawˬ ga piˇ shehˍ hpaˇ hpehꞈ˗oˬ ve laˇ? Nawˬ co ha hpawˇ uiˍ la mvuh la tuˬ coˇ caˇ sheˍ. Nawˬ Hkriꞈ yaˇ awˬ moˍ hkʼaw hkʼa dehꞈ ga piˇ gʼa tuˬ Yaˬhoˉvaˬ maˍ laˇ tcuh sheˍ. (Iˉsaˍyaˆ 64:8) Nawˬ nyi haꞈ shaˉ paˍ hpehꞈ tuˬ te hkʼaˇ dawˇ hkʼaˇ cawˬ tuˬ coˇ caˇ ve htaꞈ Yaˬhoˉvaˬ awˬ bon naꞈ laˇ tcuh sheˍ.