AWˬ LAWN 45
KʼA MUIˬ HKAWˇ 138 Uˉ hkeh mvuh hpu ve daꞈ jaˇ
Gʼuiˬ sha ve kanˉ ka tiꞈ yeˬ ve hkʼaw te ve chaw ve tawˇ hkawˇ htaꞈ henˇ yuˬ sheˍ
‘Chaw mawˇ teˇ hpaˍ lehˬ, cuˇ yiˍ cawˬ ve yoˬ. Leh chaw mawˇ teˇ hpaˍ lehˬ, dawˇ shiˍ puiˉ ve nyi ma cawˬ ve yoˬ.’—YAWˇBAˆ 12:12-13.
A YEˇ UIˍ VE AWˬ LAWN
Yaˬhoˉvaˬ ve tawˇ hkawˇ na yuˬ ve lehˬ, chi teˇ hkui kaꞈ ngaˬ hui awˬ bon gʼa tuˬ te laˇ leh, awˬ gʼuˇ suhˍ hpawˇ co co taiˍ taiˍ ve a shaꞈ gʼa tuˬ kaꞈ te laˇ ve yoˬ.
1. Aˬ htoꞈ ma te ngaˬ hui awˬ viˉ awˬ nyi chaw mawˇ geh henˇ yuˬ cawˇ ve le?
Ngaˬ hui teˇ gʼaˇ le le cuˇ yiˍ cawˬ ve hkʼaw dawˇ cheˆ gʼa tuˬ, daꞈ jaˇ ve beˆ maˍ laˇ hkawˇ gʼa gaˇ ve yoˬ. Daꞈ jaˇ ve beˆ maˍ laˇ hkawˇ ngaˬ hui nyi haꞈ shaˉ paˍ geh lawˬ gʼa leh co ha hpawˇ ve chaw mawˇ geh kaꞈ lawˬ gʼa ve yoˬ. Yaꞈ hkʼaˇ, yawˇ hui a shaꞈ maˇ˗oˬ ve kʼo, yawˇ hui beˆ maˍ laˇ ve yehˇ maˇ gʼa˗o ve tehꞈ, maˇ dawˇ nyi cawˇ ve yoˬ. Awˬ viˉ awˬ nyi chaw mawˇ laiˉ ceuˬ gʼa hpuˇ jaw˗oˬ ve pa taw, Yaˬhoˉvaˬ lehˬ ngaˬ hui htaꞈ yawˇ hui geh henˇ yuˬ tcuh gaˇ ve yoˬ. Hkʼe te leh, yawˇ hui lehˬ hpehꞈ laˬ jaw ve awˬ lawn, na gʼa ve, leh cuˇ yiˍ ngaˬ hui aꞈ kehˉ cawˬ maˇ ve yoˬ.—Yawˇbaˆ 12:12.
2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
2 Liꞈ hpu ve awˬ co˗e htaˇ, Yaˬhoˉvaˬ yawˇ ve kanˉ ka tiꞈ yeˬ ve hkʼaw te ve chaw htaꞈ yehˇ ve yoˬ. Tawˇ pa haˉ te kʼo, Gʼuiˬ sha ve chaw htaꞈ awˬ gʼaˇ piˇ leh beˆ maˍ piˇ tuˬ, Moˉseˍ, Daˍviˆ, leh tcuh yaˇ Yoˇhanˬ htaꞈ yehˇ ve yoˬ. Yawˇ hui chehˇ ve awˬ co˗e peun daꞈ leh yawˇ hui a shaꞈ teꞈ hkʼaˇ teˇ gʼaˇ leh teˇ gʼaˇ kaꞈ maˇ shuˍ daꞈ ve yoˬ. Yawˇ hui a shaꞈ teꞈ chehˇ ve awˬ leh meuˇ htaˇ, yawˇ hui aꞈ kehˉ a shaꞈ i ve chaw htaꞈ beˆ maˍ piˇ ve yoˬ. Yawˇ hui 3 gʼaˇ lehˬ, Yaˬhoˉvaˬ ve tawˇ hkawˇ na yuˬ ve a yeˇ uiˍ jaˇ tehꞈ kʼoˆ ve yoˬ. Leh Yaˬhoˉvaˬ kaꞈ yawˇ hui ve tawˇ hkawˇ, chi beuꞈ teˇ co˗e ngaˬ hui awˬ pon awˬ bon cawˬ tuˬ kaꞈ bvuhꞈ keu tcuh taˍ ve yoˬ. A shaꞈ maˇ ve, maˇ heˆ leh a shaꞈ i ve chaw htawˇ, yawˇ hui beˆ maˍ laˇ ve tawˇ hkawˇ htaꞈ nyi ve kʼo, awˬ bon gʼa tuˬ yoˬ. (Roˉmaꞈ 15:4; 2 Tiˆmoˉseˍ 3:16) Awˬ lawn chi ve hkʼaw, chaw chi 3 gʼaˇ awˬ leh meuˇ tawˇ yaw ve htaꞈ teˇ geh henˇ tuˬ yoˬ. Leh yawˇ hui ve tawˇ hkawˇ ngaˬ hui hkʼaˬ hkʼe henˇ yuˬ gʼa ve kaꞈ teˇ geh henˇ tuˬ yoˬ.
‘GʼUIˬ SHA NAWˬ HUI HTAꞈ MAW MAW CHEHˇ TCUH LAˇ TUˬ YOˬ’
3. Moˉseˍ aˬ htoꞈ ma awˬ vuiˬ htaꞈ te ve le?
3 Moˉseˍ lehˬ a shaꞈ teꞈ chehˇ ve teˇ co˗e Yaˬhoˉvaˬ ve kanˉ hkʼa dehꞈ te ve yoˬ. Yawˇ tcuh kaˍ paˍ te ve, suhˉ jehˬ paˍ te ve, awˬ hoˉ te ve, cuˇ yiˍ cawˬ ve, leh hpehꞈ laˬ jaw ve awˬ lawn kaꞈ cawˬ maˇ jaˇ ve yoˬ. Iˉsaˍreˍlaˆ chaw Eˇjiˇtuꞈ mvuhˇ miˬ lo awˬ ceˬ te chehˇ ve chaw htaꞈ kaꞈ yawˇ shiˍ tawˆ la piˇ ve yoˬ. Leh Yaˬhoˉvaˬ anˇ tuˬ te ve awˬ ceuˬ htaꞈ kaꞈ yawˇ gʼa mawˬ ve yoˬ. Yaˬhoˉvaˬ Moˉseˍ htaꞈ Liꞈ hpu awˉ lawˉ 5 daw bvuhꞈ tcuh ve yoˬ. Yawˇ lehˬ Chiˇ mvuh ve liꞈ kaˇ nanˉ uiˍ 90 leh 91 kaꞈ bvuhꞈ leh Yawˇbaˆ liꞈ kaꞈ bvuhꞈ ve yoˬ hehˉ.
4. Moˉseˍ a shu htaꞈ awˬ gʼaˇ piˇ ve le? Leh aˬ htoꞈ ma awˬ pon le?
4 Moˉseˍ a shaꞈ 120 hkʼawꞈ htaˇ suh˗e ve yoˬ. Yawˇ maˇ suh˗e sheˍ htaˇ, Yaˬhoˉvaˬ Iˉsaˍreˍlaˆ chaw awˬ pon te laˇ jaw ve awˬ ceuˬ htaꞈ yawˇ hui dawˇ nyi tuˬ, yawˇ teˇ gʼaˇ le le htaꞈ kuˬ hpawnˬ leh kʼoˆ maˍ piˇ ve yoˬ. Chaw teˇ hpaˍ kʼo, Yaˬhoˉvaˬ anˇ tuˬ laiˉ ceuˬ te ve htaꞈ gʼa mawˬ jaw ve yoˬ. Leh Yaˬhoˉvaˬ Eˇjiˇtuꞈ chaw htaꞈ suhˉ jehˬ leh ciˍ yanˍ piˇ ve kaꞈ gʼa mawˬ jaw ve yoˬ. (Tawˆ kʼai ve 7:3, 4) Yawˇ hui lehˬ laˇ tsuhˇ gʼuiˬ nyi 2 hkʼoˇ pehˬ taˍ ve htaꞈ kaꞈ gʼa hpanˍ kʼai jaw leh Hpaˍrawˇ ve maꞈ yaˇ htaꞈ te luˬ piˇ ve kaꞈ gʼa mawˬ jaw ve yoˬ. (Tawˆ kʼai ve 14:29-31) Yawˇ hui heh puiˉ hkʼaw lo chehˇ htaˇ, Yaˬhoˉvaˬ yawˇ hui htaꞈ hkʼaˬ hkʼe te nyi haꞈ shaˉ laˇ ve htaꞈ kaꞈ gʼa mawˬ jaw ve yoˬ. (Bon maˍ ve 8:3, 4) Chi teˇ hkui Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ hkʼaw loꞈ˗e te chehˇ htaˇ, awˬ yanˇ chi ve Moˉseˍ yawˇ hui htaꞈ awˬ gʼaˇ piˇ ve yoˬ. a
5. Bon maˍ ve liꞈ 30:19, 20 hkʼaw Moˉseˍ kʼoˆ ve tawˇ hkawˇ Iˉsaˍreˍlaˆ chaw htaꞈ aˬ htoꞈ ma htawˆ hkanˍ piˇ taˍ ve le?
5 Moˉseˍ aˬ htoꞈ ma kʼoˆ ve le? (Bon maˍ ve 30:19, 20 gʼaw sheˍ.) Moˉseˍ Iˉsaˍreˍlaˆ chaw htaꞈ kʼoˆ piˇ ve, awˬ gʼuˇ suhˍ hpawˇ yawˇ hui ve dawˇ law kuiˬ daꞈ jaˇ ve yoˬ. Yaˬhoˉvaˬ yawˇ ka tiꞈ te taˍ ve mvuhˇ miˬ hkʼaw yawˇ hui maw maw gʼa chehˇ tuˬ yoˬ tehꞈ, awˬ bon naꞈ piˇ ve yoˬ. Mvuhˇ miˬ chi ve hkʼaw daꞈ jaˇ leh teˇ ceuˬ le le kaꞈ hkʼa biˇ cawˬ ve yoˬ. Hkʼe te leh, Moˉseˍ Iˉsaˍreˍlaˆ chaw htaꞈ kʼoˆ piˇ ve, “nawˬ hui htaꞈ mvuhˇ miˬ lonˉ teˇ peˆ leh, nawˬ hui maˇ te taˍ ve venˇ lonˉ teˇ hpaˍ piˇ laˇ tuˬ yoˬ. Yehˬ teˇ hpaˍ awˬ hkʼaw lo htawˇ, nawˬ hui maˇ ca keu taˍ ve mawˇ hkʼa biˇ cawˬ leh, nawˬ hui maˇ duˇ taˍ ve iˉ kaˆ nanˬ bawˍ teˇ hpaˍ, nawˬ hui maˇ te taˍ ve a pehˉ meuˇ hko leh shaˍlonˍ hko teˇ hpaˍ oˇ kaˬ lo cawˬ taˍ ve yoˬ.”—Bon maˍ ve 6:10, 11.
6. Aˬ htoꞈ ma te Yaˬhoˉvaˬ lehˬ awˬ nu ve mvuhˇ miˬ Iˉsaˍreˍlaˆ chaw htaꞈ bawˆ gʼaˇ tcuh ve le?
6 Moˉseˍ Iˉsaˍreˍlaˆ chaw htaꞈ shaˍ tiꞈ piˇ sheˍ ve yoˬ. Yawˇ kʼoˆ ve, Iˉsaˍreˍlaˆ chaw mvuhˇ miˬ chi ve hkʼaw caˉ leh chehˇ gaˇ ve kʼo, yawˇ hui Yaˬhoˉvaˬ ve tawˇ hkawˇ htaꞈ gʼa na yuˬ ve yoˬ. Moˉseˍ yawˇ hui htaꞈ awˬ gʼaˇ piˇ ve, ‘a shaꞈ teꞈ ve htaꞈ leuˆ yuˬ tuˬ ve laˇ’ maˇ heˆ leh ‘Yaˬhoˉvaˬ tawˇ htaꞈ hkʼa dehꞈ na yuˬ tuˬ ve laˇ?’ Yaꞈ hkʼaˇ, Iˉsaˍreˍlaˆ chaw Yaˬhoˉvaˬ ve tawˇ hkawˇ maˇ na yuˬ ve yoˬ. Hkʼe te leh, Yaˬhoˉvaˬ lehˬ Aˍsuˇriˆ chaw Iˉsaˍreˍlaˆ chaw htaꞈ bawˆ gʼaˇ tcuh leh, peuˬ hkʼawꞈ nawˉ Baˍbuˍlonˍ chaw kaꞈ yawˇ hui htaꞈ bawˆ gʼaˇ tcuh leh, awˬ ceˬ te tuˬ kaꞈ yuˬ kʼai tcuh ve yoˬ.—2 Jawˇmawˇ 17:6-8, 13, 14; 2 Raˍsaˍvanˍ 36:15-17, 20.
7. Moˉseˍ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le? (Awˬ han htaꞈ nyi sheˍ.)
7 Ngaˬ hui htaꞈ aˬ htoꞈ ma maˍ laˇ ve le? Na yuˬ ve lehˬ a shaꞈ gʼa tuˬ te laˇ ve yoˬ. Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ hkʼaw loꞈ˗e te chehˇ ve hkʼa shuˍ, ngaˬ hui kaꞈ Gʼuiˬ sha ka tiꞈ te taˍ laˇ ve miˬ guiˬ awˬ suhˉ hkʼaw loꞈ˗e te chehˇ ve yoˬ. Oˇ ve teˇ yanˇ miˬ guiˬ hkʼa peu˗eˬ hkʼoˆ daꞈ jaˇ ve hko hpehꞈ tuˬ ve htaꞈ ngaˬ hui gʼa mawˬ tuˬ yoˬ. (Iˉsaˍyaˆ 35:1; Luˉkaꞈ 23:43) Saˍtanˍ leh yawˇ hpawˇ chehˇ ve chaw htaꞈ hkʼa peu˗eˬ te luˬ piˇ tuˬ yoˬ. (Hpeuꞈ maˍ ve 20:2, 3) Maˇ heˆ heˆ ve bon Yaˬhoˉvaˬ geh maˇ meuˆ daꞈ tuˬ te laˇ ve maˇ kʼawꞈ cawˬ˗o. (Hpeuꞈ maˍ ve 17:16) Mvuhˇ miˬ yaˇ htaꞈ fawˉ mehˍ ve mvuhˇ miˬ uˉ peunˍ ve maˇ kʼawꞈ cawˬ˗o. (Hpeuꞈ maˍ ve 19:19, 20) Miˬ guiˬ awˬ suhˉ hkʼaw Yaˬhoˉvaˬ htaꞈ tawˍ daꞈ ve chaw maˇ kʼawꞈ cawˬ˗o. (Chiˇ mvuh ve 37:10, 11) Chaw teˇ gʼaˇ le le Yaˬhoˉvaˬ ve awˬ liˇ tawˇ hkawˇ htaꞈ na yuˬ tuˬ yoˬ. Chi ve lehˬ miˬ guiˬ hkʼa peu˗eˬ hkʼoˆ dawˇ sha gawˬ lehˍ ve cawˬ tuˬ te leh teˇ moˍ tiˉ hpehꞈ tuˬ kaꞈ te tuˬ yoˬ. Teˇ gʼaˇ le le haꞈ daꞈ leh yonˍ gʼa daꞈ ve yoˬ. (Iˉsaˍyaˆ 11:9) Chi ve lehˬ dawˇ law kuiˬ daꞈ jaˇ ve yoˬ. Leuˉ leh ngaˬ hui Yaˬhoˉvaˬ ve tawˇ hkawˇ na yuˬ ve kʼo, miˬ guiˬ awˬ suhˉ hkʼaw co co taiˍ taiˍ gʼa chehˇ tuˬ yoˬ.—Chiˇ mvuh ve 37:29; Yoˇhanˬ 3:16.
Ngaˬ hui Yaˬhoˉvaˬ ve hkawˇ na yuˬ ve kʼo, miˬ guiˬ awˬ suhˉ hkʼaw co co taiˍ taiˍ gʼa chehˇ tuˬ yoˬ (Awˬ tawn 7 nyi sheˍ)
8. Awˬ gʼuˇ suhˍ hpawˇ co co taiˍ taiˍ a shaꞈ gʼa tuˬ ka tiꞈ te taˍ laˇ ve tawˇ hkawˇ Miˍshenˍnaˍliˍ teˇ gʼaˇ htaꞈ hkʼaˬ hkʼe ga piˇ ve le? (Yuˇdaꞈ 20, 21)
8 Gʼuiˬ sha ka tiꞈ te taˍ laˇ ve, ngaˬ hui co co taiˍ taiˍ ve a shaꞈ gʼa tuˬ htaꞈ hkʼaˬ htaˆ kaꞈ dawˇ nyi ve kʼo, shoꞈ shaꞈ ve awˬ lawn aˬ htoꞈ ma gʼa hpuˇ ve htawˇ maˇ kʼoˆ, ngaˬ hui yawˇ ve tawˇ hkawˇ htaꞈ na yuˬ gaˇ ve yoˬ. (Yuˇdaꞈ 20, 21 gʼaw sheˍ.) Ka tiꞈ tawˇ hkawˇ oˇ ve lehˬ, ngaˬ hui a shu yawˇ ve gʼaˇ nuˇ kuiˬ htaꞈ tawˍ daꞈ gʼaˇ tuˬ kaꞈ ga laˇ ve yoˬ. Aˍfaˍriˆkaˆ miˬ guiˬ lo Miˍshenˍnaˍliˍ te maw jaˇ˗oˬ ve teˇ gʼaˇ yawˇ ve gʼaˇ nuˇ kuiˬ htaꞈ hkʼaˬ htaˆ kaꞈ gʼa tawˍ daꞈ ve yoˬ. Yawˇ kʼoˆ ve, “ngaˬ Yaˬhoˉvaˬ ve hkawˇ maˇ na yuˬ ve kʼo, ngaˬ co co taiˍ taiˍ ve a shaꞈ maˇ gʼa taˬ tehꞈ hkʼaˬ htaˆ kaꞈ dawˇ nyi ve yoˬ. Chi ve ngaˬ ve gʼaˇ nuˇ kuiˬ htaꞈ tawˍ daꞈ gʼaˇ tuˬ dawˇ teh taˍ leh hkʼaˬ htaˆ kaꞈ Yaˬhoˉvaˬ htaꞈ gʼaˇ va tuˬ bon lawˬ ve yoˬ. Yaˬhoˉvaˬ ga laˇ ve kʼo, ngaˬ ve gʼaˇ nuˇ kuiˬ htaꞈ tawˍ daꞈ gʼaˇ tuˬ yoˬ.”
‘NAWˬ TE VE KANˉ HKʼA PEU˗Eˬ UIˍ LA DAꞈ LA TUˬ YOˬ’
9. Daˍviˆ a shaꞈ teꞈ kuiˬ hkʼaw shoꞈ shaꞈ ve awˬ lawn aˬ htoꞈ ma gʼa hpuˇ ve le?
9 Daˍviˆ lehˬ daꞈ jaˇ ve jawˇ mawˇ hpehꞈ ve yoˬ. Yawˇ tinˍ hteˆ cheuˬ ve, kʼa muiˬ hkawˇ bvuhꞈ paˍ hpehꞈ ve, maꞈ bawˆ cheuˬ ve, leh tcuh kaˍ paˍ kaꞈ hpehꞈ ve yoˬ. Yawˇ a shaꞈ teꞈ kuiˬ hkʼaw shoꞈ shaꞈ ve laiˉ ceuˬ gʼa hpuˇ ve yoˬ. Tawˇ pa haˉ te kʼo, yawˇ jawˇ mawˇ Sawˉluꞈ gʼaꞈ yuˬ ve htaꞈ laiˉ hkʼawꞈ gʼa hpaw˗e ve yoˬ. Leh Daˍviˆ jawˇ mawˇ te peuˬ hkʼawꞈ nawˉ, yawˇ ve yaˇ paˍ Aˍbaˆsaˍlonˍ yawˇ awˬ tan jawˇ mawˇ te gaˇ ve pa taw, yawˇ gʼa hpaw˗e ve yoˬ. Daˍviˆ shoꞈ shaꞈ ve laiˉ ceuˬ gʼa hpuˇ leh venˇ baˆ uiˍ jaˇ ve htaꞈ te yaꞈ jaw ve htawˇ, yawˇ suh htaˇ hkʼa gaˬ Yaˬhoˉvaˬ htaꞈ ka tiꞈ yeˬ ve yoˬ. Yaˬhoˉvaˬ lehˬ Daˍviˆ htaꞈ “ngaˬ nyi ma cawˇ ve chaw” hpehꞈ ve tehꞈ kʼoˆ ve yoˬ. Chi htaꞈ pa taw, Daˍviˆ cuˇ yiˍ cawˬ ve hkʼaw beˆ maˍ laˇ ve htaꞈ ngaˬ hui kaꞈ na yuˬ cawˇ ve yoˬ.—Tcuh yaˇ 13:22; 1 Jawˇmawˇ 15:5.
10. Shawˉlaꞈmonˍ jawˇ mawˇ maˇ te sheˍ htaˇ, Daˍviˆ aˬ htoꞈ ma beˆ maˍ piˇ ve le?
10 Daˍviˆ yawˇ ve yaˇ Shawˉlaꞈmonˍ htaꞈ teˇ ceuˬ ceuˬ beˆ maˍ piˇ ve htaꞈ teˇ geh nyi sheˍ. Chi ve lehˬ, Shawˉlaꞈmonˍ awˬ gʼuˇ suhˍ hpawˇ Iˉsaˍreˍlaˆ chaw ve jawˇ mawˇ gʼa te tuˬ yoˬ. Yaˬhoˉvaˬ yawˇ ve mvuhˇ miˬ yaˇ yawˇ htaꞈ oˉ kʼoˍ pui gʼa tuˬ, Shawˉlaꞈmonˍ bon yehˬ lonˉ te tuˬ leuˆ yuˬ piˇ ve yoˬ. (1 Raˍsaˍvanˍ 22:5) Shawˉlaꞈmonˍ gʼa te cawˇ ve kanˉ laiˉ ceuˬ cawˬ leh yawˇ Iˉsaˍreˍlaˆ chaw htaꞈ sheh kʼai gʼa tuˬ, Yaˬhoˉvaˬ ga laˇ tuˬ kaꞈ lawˬ ve yoˬ. Leh Daˍviˆ Shawˉlaꞈmonˍ htaꞈ aˬ htoꞈ ma kʼoˆ piˇ ve le? Teˇ geh nyi sheˍ.
11. 1 Jawˇmawˇ liꞈ 2:2, 3 hkʼaw kʼoˆ taˍ ve hkʼe, Daˍviˆ Shawˉlaꞈmonˍ htaꞈ aˬ htoꞈ ma htawˆ hkanˍ piˇ ve le? Leh tawˇ hkawˇ oˇ teˇ hpaˍ awˬ tehˬ hkʼaˬ hkʼe hpehꞈ la ve le? (Awˬ han htaꞈ nyi sheˍ.)
11 Daˍviˆ aˬ htoꞈ ma kʼoˆ ve le? (1 Jawˇmawˇ 2:2, 3 gʼaw sheˍ.) Daˍviˆ Shawˉlaꞈmonˍ htaꞈ kʼoˆ piˇ ve, nawˬ Yaˬhoˉvaˬ ve hkawˇ na yuˬ ve kʼo dawˇ taˍ ve hkʼe te gʼa tuˬ yoˬ. Leh laiˉ hkʼawꞈ peuˬ hkʼawꞈ nawˉ Yaˬhoˉvaˬ lehˬ Shawˉlaꞈmonˍ dawˇ taˍ ve hkʼe te gʼa tcuh ve yoˬ. (1 Raˍsaˍvanˍ 29:23-25) Yawˇ daꞈ jaˇ ve bon yehˬ lonˉ te leh Liꞈ hpu laiˉ daw bvuhꞈ ve yoˬ. Yawˇ cuˇ yiˍ cawˬ leh paw sha jaˇ ve yoˬ. (1 Jawˇmawˇ 4:34) Yaꞈ hkʼaˇ, Daˍviˆ kʼoˆ taˍ ve hkʼa shuˍ, yawˇ Yaˬhoˉvaˬ ve hkawˇ na yuˬ htaˇ, dawˇ taˍ ve hkʼe te gʼa ve yoˬ. Shawˉlaꞈmonˍ a shaꞈ teꞈ chehˇ ve awˬ leh meuˇ teˇ tawn htaˇ, yawˇ maˇ heˆ heˆ ve gʼuiˬ sha htaꞈ oˉ kʼoˍ pui ve nyi ma luˬ jaˇ. Hkʼe te leh, Yaˬhoˉvaˬ nyi hkʼaˇ maˇ suh ve yoˬ. Leh Yaˬhoˉvaˬ Shawˉlaꞈmonˍ hteˇ ve cawˇ ve hkʼaw uˉ peunˍ tuˬ cuˇ yiˍ maˇ piˇ ve yoˬ.—1 Jawˇmawˇ 11: 9, 10; 12:4.
Ngaˬ hui Yaˬhoˉvaˬ ve hkawˇ na yuˬ ve kʼo, ngaˬ hui cawˇ ve hkʼaw dawˇ cheˆ gʼa tuˬ, Yaˬhoˉvaˬ cuˇ yiˍ peꞈ laˇ tuˬ yoˬ tehꞈ Daˍviˆ Shawˉlaꞈmonˍ htaꞈ kʼoˆ piˇ ve awˬ leh meuˇ ve tawˇ ngaˬ hui htaꞈ hkʼaˬ hkʼe ga laˇ ve le? (Awˬ tawn 11-12 nyi sheˍ) b
12. Daˍviˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ gʼa ve le?
12 Ngaˬ hui htaꞈ aˬ htoꞈ ma maˍ laˇ ve le? Na yuˬ ve lehˬ dawˇ taˍ ve hkʼe te gʼa tuˬ te laˇ ve yoˬ. (Chiˇ mvuh ve 1:1-3) Awˬ tehˬ yoˬ, ngaˬ hui Shawˉlaꞈmonˍ hkʼa shuˍ paw sha leh awˬ meh bvuhˬ ve cawˬ tuˬ Yaˬhoˉvaˬ ka tiꞈ maˇ te taˍ laˇ ve yoˬ. Yaꞈ hkʼaˇ, ngaˬ hui Yaˬhoˉvaˬ ve hkawˇ na yuˬ ve kʼo, ngaˬ hui cawˇ ve hkʼaw dawˇ cheˆ gʼa tuˬ, yawˇ cuˇ yiˍ peꞈ laˇ tuˬ yoˬ. (Tawˇ naˉ ve 2:6, 7; Yaˍkoˆ 1:5) Kanˉ te ve, liꞈ henˇ ve, pyawˍ ve awˬ ceuˬ te ve, leh hpu ve awˬ lawn chi ve teˇ hpaˍ leuˆ htaˇ, Yaˬhoˉvaˬ beˆ maˍ laˇ hkawˇ ngaˬ hui cuˇ yiˍ cawˬ ve hkʼaw dawˇ cheˆ gʼa tuˬ ga laˇ ve yoˬ. Yaˬhoˉvaˬ beˆ maˍ laˇ hkawˇ ngaˬ hui yuˬ yehˇ ve kʼo, ngaˬ hui yawˇ geh meuˆ daꞈ ve htaꞈ haꞈ shaˉ laˇ leh co co taiˍ taiˍ ve a shaꞈ kaꞈ gʼa tuˬ yoˬ. (Tawˇ naˉ ve 2:10, 11) Chi hkʼoˆ kaꞈ, ngaˬ hui awˬ viˉ awˬ nyi geh meuˆ daꞈ leh yehˬ kʼa hkʼaw ha lehˬ ve cawˬ tuˬ ga laˇ gʼa ve beˆ maˍ laˇ hkawˇ gʼa tuˬ yoˬ.
13. Hka˗min a shaꞈ teꞈ kuiˬ lo dawˇ taˍ ve hkʼe te gʼa tuˬ aˬ htoꞈ ma ga piˇ ve le?
13 Moˬzanˇbiˆ mvuhˇ miˬ lo chehˇ ve Hka˗min liꞈ chi mvuh mvuh henˇ ve lehˬ, a shaꞈ teꞈ kuiˬ lo dawˇ taˍ ve hkʼe te gʼa tuˬ ga laˇ gʼa ve tehꞈ dawˇ ve yoˬ. Yawˇ liꞈ chi mvuh mvuh henˇ leh yehˬ te ve hpawˇ shawehˇ ve kaꞈ henˇ ve yoˬ. Yawˇ kʼoˆ ve, “ngaˬ chi hkʼe ve hpawˇ henˇ ve dawˇ cawˇ jaˇ. Yaꞈ hkʼaˇ, awˬ yanˇ leh awˬ gʼaˇ kaꞈ gʼa yehˇ jaˇ ve yoˬ. Ngaˬ mvuhˇ shawˉ 7 naˍ riˍ hpaˆ te leh mvuhˇ hpeuꞈ 6 naˍ riˍ hkʼa gaˬ gʼa henˇ ve pa taw, hpawnˬ daꞈ˗e tuˬ haˍ jaˇ. Hkʼe te leh, ngaˬ ve yonˍ hkʼaˇ kaꞈ awˬ meu˗eˇ awˬ meu˗eˇ awˬ gʼaˇ nuˇ kʼai ve yoˬ. Ngaˬ jawˇ mawˇ 2 gʼaˇ ve awˬ ceˬ te chehˇ ve tehꞈ dawˇ ve yoˬ.” (Maꞈhtehˍ 6:24) Yawˇ gʼa hpuˇ chehˇ ve awˬ lawn htaꞈ caˉ daꞈ ve bon lawˬ leh Gʼuiˬ sha ve kanˉ hkʼaˇ hkʼaw ve liꞈ kʼoˆ htaꞈ kaꞈ hpfuhˆ nyi ve yoˬ. Yawˇ kʼawꞈ kʼoˆ ve, “nyi haꞈ shaˉ paˍ leh ngaˬ e geh daꞈ jaˇ ve beˆ maˍ laˇ hkawˇ gʼa peuˬ hkʼawꞈ nawˉ, liꞈ chi mvuh mvuh maˇ kʼawꞈ henˇ˗o tuˬ, dawˇ cheˆ leh Yaˬhoˉvaˬ ve kanˉ awˬ yanˇ hkʼa biˇ te ve yoˬ. Chi ve lehˬ, ngaˬ a shaꞈ teꞈ kuiˬ hkʼaw daꞈ jaˇ ve awˬ ceuˬ htaꞈ leuˆ yuˬ tuˬ ga laˇ ve yoˬ. Hkʼe te leh, ngaˬ chi hkʼe leuˆ yuˬ ve ha lehˬ jaˇ.”
14. Moˉseˍ leh Daˍviˆ maˍ laˇ ve a yeˇ uiˍ jaˇ ve lehˬ aˬ htoꞈ ma awˬ lawn le?
14 Moˉseˍ leh Daˍviˆ Yaˬhoˉvaˬ htaꞈ haꞈ jaˇ leh yawˇ ve hkawˇ na yuˬ ve htaꞈ awˬ hpfuhˇ shiˍ ve yoˬ. Yawˇ huiˉ maˬ ve tawˇ hkawˇ lehˬ, yawˇ hui ve awˬ lawn htaꞈ awˬ nu ve chaw gʼaꞈ te tuˬ awˬ gʼaˇ piˇ leh Yaˬhoˉvaˬ htaꞈ hkʼaˬ htaˆ kaꞈ ka tiꞈ yeˬ tuˬ kaꞈ awˬ gʼaˇ piˇ ve yoˬ. A shu teˇ gʼaˇ Yaˬhoˉvaˬ ve hkawˇ maˇ na yuˬ ve kʼo, chaw oˇ ve teˇ gʼaˇ yawˇ htaꞈ awˬ chawˇ maˇ gʼa te leh, yawˇ ka tiꞈ te taˍ ve htaꞈ kaꞈ awˬ bon maˇ gʼa taˬ tehꞈ shaˍ tiꞈ piˇ ve yoˬ. Yawˇ huiˉ maˬ beˆ maˍ laˇ ve hkawˇ, chi beuꞈ teˇ co˗e ngaˬ hui awˬ pon kaꞈ yehˇ gʼa ve yoˬ. Yaˬhoˉvaˬ ve kanˉ te ve chaw teˇ gʼaˇ beˆ maˍ laˇ ve hkawˇ htaꞈ teˇ geh kʼawꞈ nyi sheˍ. Yaˬhoˉvaˬ htaꞈ ka tiꞈ yeˬ ve hkʼaˬ hkʼe taw a yeˇ uiˍ jaˇ ve yawˇ kʼoˆ maˍ laˇ ve yoˬ.
“NGAˬ HA LEHˬ TUˬ CHI Aꞈ KEHˉ UIˍ VE TEˇ CEUˬ KAꞈ MAˇ CAWˬ”
15. Tcuh yaˇ Yoˇhanˬ a shaꞈ teꞈ kuiˬ lo hpehꞈ laˬ jaw ve awˬ lawn aˬ htoꞈ ma cawˬ ve le?
15 Yoˇhanˬ lehˬ Yeˍsuˆ haꞈ jaˇ ve tcuh yaˇ hpehꞈ ve yoˬ. (Maꞈhtehˍ 10:2; Yoˇhanˬ 19:2) Yoˇhanˬ lehˬ Yeˍsuˆ geh teˇ geh Gʼuiˬ sha ve kanˉ te ve yoˬ. Yeˍsuˆ anˇ tuˬ te ve laiˉ ceuˬ htaꞈ yawˇ gʼa mawˬ leh Yeˍsuˆ tuꞈ ve hkanˍ ve gʼa hpuˇ htaˇ kaꞈ awˬ paˇ lo chehˇ taˍ ve yoˬ. Yeˍsuˆ suhˆ hkuiˉ daw hkʼoˆ htaꞈ pehˍ piˇ ve htaꞈ Yoˇhanˬ gʼa mawˬ leh, Yeˍsuˆ kʼawꞈ teꞈ tu la peuˬ hkʼawꞈ nawˉ kaꞈ yawˇ ve awˬ to Yoˇhanˬ htaꞈ mawˬ tcuh ve yoˬ. Hkriꞈ yaˇ awˬ moˍ uiˍ la mvuh la ve htaꞈ kaꞈ yawˇ gʼa mawˬ sheˍ leh ‘mvuhˇ naw ma awˬ hawˉ lo cawˬ taˍ ve ha lehˬ ve bon hkawˇ maˍ piˇ ve’ htaꞈ kaꞈ yawˇ gʼa mawˬ ve yoˬ.—Kawˇlawˇsehˇ 1:23.
16. Yoˇhanˬ ve liꞈ a shu awˬ bon gʼa sheˍ ve le?
16 Yoˇhanˬ a shaꞈ maˇ˗oˬ htaˇ, Yaˬhoˉvaˬ lehˬ yawˇ htaꞈ daꞈ jaˇ ve awˬ vuiˬ piˇ leh Liꞈ hpu teˇ hpaˍ bvuhꞈ tcuh ve yoˬ. Tawˇ pa haˉ te kʼo, Hpeuꞈ maˍ ve liꞈ bvuhꞈ tuˬ kaꞈ yawˇ htaꞈ dawˇ pawnˍ piˇ ve yoˬ. (Hpeuꞈ maˍ ve 1:1) Yawˇ ha lehˬ ve bon hkawˇ liꞈ teˇ daw gʼa bvuhꞈ leh yawˇ htaꞈ dawˇ pawnˍ piˇ leh awˬ nu ve Liꞈ hpu 3 daw bvuhꞈ tcuh sheˍ ve yoˬ. 3 daw teˇ daw hkʼaw ka tiꞈ yeˬ ve Hkriꞈ yaˇ teˇ gʼaˇ yawˇ haꞈ jaˇ ve yaˇ hkʼe shawˍ ve Gaˍyuˆ htaꞈ bvuhꞈ piˇ ve yoˬ. (3 Yoˇhanˬ 1) Oˇ ve teˇ yanˇ Hkriꞈ yaˇ Yoˇhanˬ ve yaˇ hkʼe shawˍ ve laiˉ gʼaˇ cawˬ ve yoˬ. Yoˇhanˬ bvuhꞈ ve liꞈ Yeˍsuˆ ve awˬ laꞈ gʼawˇ teˇ gʼaˇ le le htaꞈ awˬ gʼaˇ piˇ leh chi beuꞈ teˇ co˗e ngaˬ hui htaꞈ kaꞈ awˬ gʼaˇ peꞈ laˇ ve yoˬ.
17. 3 Yoˇhanˬ liꞈ ehˉ 4 hkʼaw kʼoˆ taˍ ve hkʼe, ha lehˬ tuˬ te laˇ ve aˬ htoꞈ ma le?
17 Yoˇhanˬ aˬ htoꞈ ma bvuhꞈ ve le? (3 Yoˇhanˬ 4 gʼaw sheˍ.) Yoˇhanˬ kʼoˆ ve, ha lehˬ ve lehˬ Yaˬhoˉvaˬ hkawˇ na yuˬ ve yoˬ. Yoˇhanˬ liꞈ 3 daw teˇ daw bvuhꞈ chehˇ htaˇ, chaw teˇ hpaˍ maˇ heˆ heˆ ve tanˬ maˍ leh Hkriꞈ yaˇ awˬ moˍ hkʼaw maˇ cawˇ maˇ hawˍ daꞈ tuˬ te ve yoˬ. Yaꞈ hkʼaˇ, Hkriꞈ yaˇ laiˉ gʼaˇ “hteˇ ve cawˇ ve teˇ ceuˬ awˬ hkʼaˇ suh kʼai chehˇ” ve yoˬ. Yaˬhoˉvaˬ ve hkawˇ na yuˬ leh ‘yawˇ tawˇ piˇ taˍ ve htaꞈ na yuˬ leh te ve yoˬ.’ (2 Yoˇhanˬ 4, 6) Ka tiꞈ yeˬ ve Hkriꞈ yaˇ chi teˇ hpaˍ Yoˇhanˬ ha lehˬ tuˬ ceh tiˉ te piˇ ve maˇ heˆ. Yaꞈ hkʼaˇ, Yaˬhoˉvaˬ ha lehˬ tuˬ kaꞈ te piˇ sheˍ ve yoˬ.—Tawˇ naˉ ve 27:11.
18. Yoˇhanˬ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le?
18 Ngaˬ hui htaꞈ aˬ htoꞈ ma maˍ laˇ ve le? Yaˬhoˉvaˬ htaꞈ ka tiꞈ yeˬ ve lehˬ ha lehˬ ve cawˬ tuˬ te laˇ ve yoˬ. (1 Yoˇhanˬ 5:3) Tawˇ pa haˉ te kʼo, ngaˬ hui Yaˬhoˉvaˬ nyi ma sha tuˬ te piˇ ve tehꞈ shiˍ ve pa taw, ha lehˬ ve yoˬ. Saˍtanˍ ve miˬ guiˬ hkʼoˆ lo beˬ laˇ ve htaꞈ ngaˬ hui tawˍ daꞈ gʼaˇ leh Yaˬhoˉvaˬ ve hkawˇ hkʼaˬ htaˆ kaꞈ na yuˬ ve htaꞈ yawˇ gʼa mawˬ htaˇ, ha lehˬ jaˇ ve yoˬ. (Tawˇ naˉ ve 23:15) Ngaˬ hui chi hkʼe te ve htaꞈ mvuhˇ naw ma tcuh yaˇ kaꞈ ha lehˬ jaˇ ve yoˬ. (Luˉkaꞈ 15:10) Chi hkʼoˆ kaꞈ, awˬ viˉ awˬ nyi tuꞈ ve hkanˍ ve leh beˬ ve lawˇ ve htaꞈ ka tiꞈ yeˬ ve ngaˬ hui gʼa mawˬ htaˇ ha lehˬ jaˇ ve yoˬ. (2 Hteˇsaˍlawˇniˆ 1:4) Ngaˬ hui miˬ guiˬ awˬ suhˉ hkʼaw chehˇ htaˇ, Saˍtanˍ ve haiˬ ve miˬ guiˬ hkʼoˆ lo ngaˬ hui chehˇ jaw ve htawˇ, ngaˬ hui hkʼaˬ htaˆ kaꞈ Yaˬhoˉvaˬ htaꞈ ka tiꞈ yeˬ ve dawˇ nyi htaˇ nyi hkʼaˇ suh jaˇ ve yoˬ.
19. Awˬ viˉ awˬ nyi yaˇ miˇ Raˍhkeˍlaˆ awˬ tehˬ ve awˬ lawn shu htaꞈ maˍ piˇ ve hkʼaˬ hkʼe dawˇ ve le? (Awˬ han htaꞈ nyi sheˍ.)
19 Chi hkʼoˆ kaꞈ, shu htaꞈ awˬ tehˬ ve awˬ lawn maˍ piˇ ve ngaˬ hui ha lehˬ ve cawˬ tuˬ te laˇ ve yoˬ. Awˬ viˉ awˬ nyi yaˇ miˇ teˇ gʼaˇ Raˍhkeˍlaˆ meh ve awˬ lawn htaꞈ teˇ geh nyi sheˍ. Yawˇ Do˗mi˗ni˗hko lo chehˇ ve yoˬ. Yaˬhoˉvaˬ ve awˬ lawn yawˇ shu htaꞈ maˍ piˇ ve lehˬ daꞈ jaˇ ve tehꞈ dawˇ ve yoˬ. Yawˇ ga piˇ leh Shaˉhkiˆhkanˍ ve chaw hpehꞈ la ve htaꞈ yawˇ kʼoˆ ve, “Liꞈ hpu henˇ ve chaw awˬ meu˗eˇ awˬ meu˗eˇ Yaˬhoˉvaˬ htaꞈ haꞈ la leh gʼaˇ va la ve htaꞈ ngaˬ gʼa mawˬ htaˇ, ha lehˬ jaˇ ve hkʼaˬ hkʼe kʼoˆ tuˬ maˇ shiˍ. Yawˇ hui ve a shaꞈ teꞈ hkʼaˇ pa leh Yaˬhoˉvaˬ nyi hkʼaˇ suh tuˬ te piˇ ve htaꞈ ngaˬ gʼa mawˬ htaˇ ha lehˬ jaˇ ve yoˬ. Ngaˬ teˇ ceuˬ le le yuˬ tanˇ ve awˬ hpfuhˇ hkʼawꞈ jaˇ ve tehꞈ dawˇ ve yoˬ. Awˬ lawn kʼo, chi ngaˬ ha lehˬ jaˇ tuˬ te laˇ ve yoˬ.”
Ngaˬ hui hkʼa shuˍ awˬ nu ve chaw Yaˬhoˉvaˬ htaꞈ haꞈ leh yawˇ ve hkawˇ na yuˬ tuˬ gʼa maˍ piˇ ve ha lehˬ jaˇ (Awˬ tawn 19 nyi sheˍ)
GʼUIˬ SHA VE KANˉ KA TIꞈ YEˬ VE HKʼAW TE VE CHAW VE TAWˇ HKAWˇ HTAꞈ AWˬ BON GʼA VE
20. Ngaˬ hui lehˬ Moˉseˍ, Daˍviˆ, leh Yoˇhanˬ htaꞈ hkʼaˬ hkʼe shuˍ ve le?
20 Moˉseˍ, Daˍviˆ, leh Yoˇhanˬ a shaꞈ te chehˇ ve awˬ co˗e ngaˬ hui htaꞈ peun daꞈ ve htawˇ, yawˇ hui gʼa hpuˇ ve awˬ lawn ngaˬ hui htaꞈ maˇ shuˍ ve yoˬ. Yaꞈ hkʼaˇ, yawˇ hui ngaˬ hui htaꞈ shuˍ daꞈ ve laiˉ ceuˬ cawˬ ve yoˬ. Tawˇ pa haˉ te kʼo, yawˇ hui awˬ tehˬ awˬ na Yaˬhoˉvaˬ Gʼuiˬ sha ve kanˉ te ve, yawˇ hui bon lawˬ ve, Gʼuiˬ sha htaꞈ gʼaˇ va ve, leh ngaˬ hui hkʼa shuˍ Gʼuiˬ sha beˆ maˍ laˇ tuˬ lawˬ ve yoˬ. Chi hkʼoˆ kaꞈ, ngaˬ hui Yaˬhoˉvaˬ ve hkawˇ na yuˬ ve kʼo, awˬ bon maˇ maˇ naꞈ laˇ tuˬ yoˬ tehꞈ yawˇ hui hkʼa shuˍ yonˍ ve yoˬ.
21. Moˉseˍ, Daˍviˆ, leh Yoˇhanˬ ve tawˇ hkawˇ htaꞈ gʼaꞈ te ve chaw aˬ htoꞈ ma awˬ bon gʼa tuˬ le?
21 Chi htaꞈ pa taw, hawˉ hkʼaˆ chi ve 3 gʼaˇ ve tawˇ hkawˇ htaꞈ ngaˬ hui a yeˇ yuˬ leh gʼaꞈ te sheˍ. Yaˬhoˉvaˬ hkawˇ na yuˬ ve kʼo, ngaˬ hui dawˇ taˍ ve hkʼe teˇ ceuˬ le le te gʼa tuˬ yoˬ. Ngaˬ hui ve a shaꞈ chi “maw maw gʼa chehˇ tuˬ yoˬ.” (Bon maˍ ve 30:20) Leh ngaˬ hui Yaˬhoˉvaˬ nyi hkʼaˇ suh tuˬ te piˇ ve pa taw, ha lehˬ jaˇ tuˬ yoˬ. Ngaˬ hui dawˇ taˍ ve aꞈ kehˉ Yaˬhoˉvaˬ ngaˬ hui htaꞈ laꞈ shawnˍ maˇ maˇ peꞈ laˇ tuˬ yoˬ.—Eˇfeˇsuꞈ 3:20.
KʼA MUIˬ HKAWˇ 129 Ngaˬ hui caˉ leh yeunˇ hkanˍ tuˬ yoˬ
a Iˉsaˍreˍlaˆ chaw maˇ˗awˍ ve laˇ tsuhˇ gʼuiˬ nyi lo Yaˬhoˉvaˬ anˇ tuˬ te ve htaꞈ gʼa mawˬ ve chaw yawˇ ka tiꞈ te taˍ piˇ ve mvuhˇ miˬ hkʼaw maˇ gʼa loꞈ˗e ve yoˬ. (Heh puiˉ hkʼaw 14:22, 23) Yaˬhoˉvaˬ kʼoˆ ve 20 hkʼawꞈ hpaˆ ve chaw teˇ gʼaˇ le le heh puiˉ hkʼaw lo suh taˉ ve yoˬ. (Heh puiˉ hkʼaw 14:29) Yaꞈ hkʼaˇ, Yawˇsuˆ, Kaˍlehˆ, Iˉsaˍreˍlaˆ chaw hkʼawꞈ nawˉ lo ve teˇ toˆ, leh Leˍviˆ awˬ ceuˬ awˬ hkʼaˇ kaꞈ Yawˇdanˍ gʼuiˬ ma htaꞈ hpanˍ tawˆ˗e leh Hkaˍnanˍ mvuhˇ miˬ hkʼaw Yaˬhoˉvaˬ ka tiꞈ te taˍ piˇ ve htaꞈ awˬ tehˬ gʼa mawˬ ve yoˬ.—Bon maˍ ve 1:24-40.
b KʼAWꞈ KʼOˆ MAˍ TAˍ VE: Laꞈ mehˍ hpawˇ ve: Daˍviˆ yawˇ ve yaˇ paˍ Shawˉlaꞈmonˍ htaꞈ beˆ maˍ piˇ ve awˬ leh meuˇ ve tawˇ. Laꞈ sha hpawˇ ve: Gʼuiˬ sha ve kanˉ hkʼaˇ hkʼaw maˍ piˇ ve htaꞈ gʼuˇ suhˍ peuˍ ve chaw liꞈ henˇ yehˬ hkʼaw awˬ bon gʼa ve yoˬ.
