1. 1935 hkʼawꞈ hpawnˬ daꞈ lonˉ hkʼaw bon maˍ hkawˇ, yaˇ nehˬ teˇ gʼaˇ htaꞈ hkʼaˬ hkʼe heuˆ la kuiˬ cawˬ ve le?

 Awˬ hpawˇ awˬ miˇ ma teˇ ca Liꞈ hpu henˇ yaˇ hpehꞈ ve yoˬ. * Yawˇ hui yaˇ paˍ 3 gʼaˇ leh yaˇ miˇ 2 gʼaˇ cawˬ ve yoˬ. Yaˇ teˇ hpaˍ Yaˬhoˉvaˬ htaꞈ haꞈ tuˬ leh Yeˍsuˆ htaꞈ henˇ yuˬ tuˬ maˍ piˇ ve yoˬ. 1926 hkʼawꞈ htaˇ, yaˇ paˍ teˇ gʼaˇ 18 hkʼawꞈ gaˬ leh Baˆtiˆsaˬ haꞈ yuˬ ve yoˬ. Oˇ teˇ yanˇ Liꞈ hpu henˇ yaˇ Yeˍsuˆ suh ve dawˇ nawˇ tuˬ hpawnˬ daꞈ htaˇ, yawˇ hui hkaoˍ monˇ caˇ leh a pehˉ meuˇ gʼuiˬ dawˬ ve yoˬ. Leh yaˇ nehˬ chi teˇ gʼaˇ kaꞈ yoˬ. 1935 hkʼawꞈ htaˇ Aˍmeˬriˆkaꞈ mvuhˇ miˬ Waw˗che˗tan D.C lo awˬ viˉ awˬ nyi J. F. Raˆhteuˬfawˍ ve bon maˍ hkawˇ awˬ lawn lehˬ,“chaw awˬ moˍ lonˉ” yoˬ. Yaˇ nehˬ chi teˇ gʼaˇ bon maˍ hkawˇ na peuꞈ hkʼawꞈ nawˉ yawˇ ve dawˇ law kuiˬ kaꞈ pa ve yoˬ. Hpawnˬ daꞈ ve oˇ ve hkʼaw a yeˇ uiˍ jaˇ ve awˬ tehˬ ve awˬ lawn aˬ htoꞈ ma kʼoˆ ve le?

2. Awˬ viˉ awˬ nyi Raˆhteuˬfawˍ awˬ tehˬ ve ha lehˬ tuˬ aˬ htoꞈ ma kʼoˆ maˍ piˇ ve le?

² Hpeuꞈ maˍ ve liꞈ 7:9 hkʼaw ve “chaw awˬ moˍ lonˉ” a shu htaꞈ kʼoˆ gaˇ ve awˬ viˉ awˬ nyi Raˆhteuˬfawˍ ve bon maˍ hkawˇ hkʼaw kʼoˆ maˍ piˇ ve yoˬ. Chaw awˬ moˍ lonˉ lehˬ, mvuhˇ naw ma hkʼoˆ gʼa taˆ˗e tuˬ Liꞈ hpu henˇ yaˇ na gʼa jaw ve yoˬ. Awˬ lawn kʼo, yawˇ hui ka tiꞈ yeˬ ve maˇ maw sheˍ leh mvuhˇ naw ma hkʼoˆ taˆ˗e tuˬ awˬ hawˉ lo ve teˇ moˍ hpehꞈ ve yoˬ. Yaꞈ hkʼaˇ, chaw awˬ moˍ lonˉ mvuhˇ naw ma hkʼoˆ maˇ gʼa taˆ˗e ve tehꞈ, Raˆhteuˬfawˍ Liꞈ hpu laiˉ tawn kʼoˆ maˍ piˇ ve yoˬ. Yawˇ hui Yeˍsuˆ Hkriꞈ * ve awˬ kaˍ awˬ nu ve yawˬ hpehꞈ leh “uiˍ  jaˇ ve tuꞈ ve hkanˍ ve” htaꞈ hpanˍ kʼai leh miˬ guiˬ hkʼoˆ co co taiˍ taiˍ ve a shaꞈ gʼa tuˬ yoˬ. (Hpeuꞈ maˍ ve 7:14) Yeˍsuˆ kʼoˆ ve, “yawˬ hkawˇ chi htaꞈ maˇ caˉ daꞈ ve awˬ kaˍ awˬ nu yawˬ teˇ hpaˍ htawˇ ngaˬ cawˬ sheˍ ve yoˬ. Yawˬ oˇ ve teˇ hpaˍ htaꞈ htawˇ ngaˬ gʼa ca shiˍ veu laˇ leh, yawˇ hui ngaˬ ve hkawˇ htaꞈ na yuˬ tuˬ yoˬ. Oˇ htaˇ, yawˬ moˍ teˇ moˍ tiˉ cawˬ leh, yawˬ hawˉ shehˍ hpaˇ teˇ gʼaˇ tiˉ cawˬ tuˬ yoˬ.” (Yoˇhanˬ 10:16) Yawˬ chi teˇ moˍ lehˬ, Yaˬhoˉvaˬ ve ka tiꞈ yeˬ ve shaˉ hkiˆ hkanˍ ve chaw Paˍraˍdiˇsuˆ hkʼo hkʼaw co co taiˍ taiˍ chehˇ tuˬ dawˇ law taˍ ve yoˬ. (Maꞈhtehˍ 25:31-33, 46) Na gʼa ve awˬ suhˉ chi Gʼuiˬ sha ve chaw laiˉ gʼaˇ leh yaˇ nehˬ oˇ ve htaꞈ kaꞈ pa piˇ ve yoˬ.—Chiˇ mvuh ve 97:11; Tawˇ naˉ ve 4:18.

3-4. 1935 hkʼawꞈ hpawnˬ daꞈ lonˉ htaˇ, laiˉ meunˍ gʼaˇ yawˇ hui ve dawˇ law kuiˬ htaꞈ caˉ daꞈ ve shiˍ tuˬ aˬ htoꞈ ma ga piˇ ve le?

³ Ha lehˬ jaˇ ve awˬ yanˇ gaˬ la ve yoˬ. Awˬ viˉ awˬ nyi Raˆhteuˬfawˍ na chehˇ ve chaw htaꞈ kʼoˆ piˇ ve, “a shu teˇ gʼaˇ miˬ guiˬ hkʼoˆ co co taiˍ taiˍ chehˇ tuˬ dawˇ law taˍ ve tu huˉ sheˍ.” Oˇ ve teˇ nyi htaꞈ mawˬ ve awˬ viˉ awˬ nyi teˇ gʼaˇ kʼoˆ ve, hpawnˬ daꞈ la ve chaw aˬ laˬ hkʼe 20,000 gʼaˇ ve hkʼaw teˇ hkoˇ hpaˆ tu huˉ ve yoˬ. Raˆhteuˬfawˍ kʼoˆ ve, “chaw awˬ moˍ lonˉ htaꞈ nyi sheˍ!” Oˇ ve teˇ nyi hpawnˬ daꞈ la ve chaw hui kaꞈ ha lehˬ jaˇ! Tu huˉ ve chaw hui lehˬ, Yaˬhoˉvaˬ yawˇ hui htaꞈ mvuhˇ naw ma hkʼoˆ taˆ˗e tuˬ maˇ gʼa leuˆ leh daꞈ kehˬ ve awˬ ha hpu kaꞈ maˇ gʼa leuˆ yuˬ ve htaꞈ shiˍ ve yoˬ. Peuˬ hkʼawꞈ nawˉ teˇ nyi 840 gʼaˇ Baˆtiˆsaˬ haꞈ yuˬ leh maˇ˗awˍ ve awˬ kaˍ awˬ nu ve yawˬ hpehꞈ ve yoˬ.

⁴ Awˬ viˉ awˬ nyi Raˆhteuˬfawˍ ve bon maˍ hkawˇ na peuˬ hkʼawꞈ nawˉ, yaˇ nehˬ oˇ ve teˇ gʼaˇ leh laiˉ meunˍ gʼaˇ kaꞈ Yeˍsuˆ suh ve dawˇ nawˇ tuˬ hpawnˬ daꞈ htaˇ, hkaoˍ monˇ maˇ caˇ leh a pehˉ meuˇ gʼuiˬ maˇ dawˇ˗o. “1935 hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ htaˇ, ngaˬ hkaoˍ monˇ caˇ leh a pehˉ meuˇ gʼuiˬ dawˬ ve awˬ leh meuˇ teˇ pawˆ hpehꞈ ve yoˬ. Yaˬhoˉvaˬ ngaˬ htaꞈ mvuhˇ naw ma hkʼoˆ taˆ˗e tuˬ maˇ leuˆ laˇ leh daꞈ kehˬ awˬ ha hpu kaꞈ maˇ leuˆ laˇ ve tehꞈ ngaˬ shiˍ ve yoˬ. Yaꞈ hkʼaˇ, ngaˬ miˬ guiˬ chi hkʼoˆ co co taiˍ taiˍ chehˇ tuˬ leh Paˍraˍdiˇsuˆ hpehꞈ la tuˬ gʼa ga piˇ tuˬ yoˬ” tehꞈ awˬ viˉ awˬ nyi hawˉ hkʼaˆ chi teˇ gʼaˇ nyi ma nuˇ nehˬ ve hkʼaw kʼoˆ ve hkʼe laiˉ gʼaˇ kaꞈ chi hkʼe dawˇ ve yoˬ. (Roˉmaꞈ 8:16, 17; 2 Kawˇrenˍhtuˆ 1:21, 22) Oˇ teˇ yanˇ tanˬ leh, chaw awˬ moˍ lonˉ kaꞈ kʼawꞈ maˇ la leh, yawˇ hui lehˬ leuˆ yuˬ taˍ ve chaw miˬ guiˬ hkʼoˆ leuˉ taˍ ve geh kanˉ teˇ geh te ve yoˬ.

5. Yeˍsuˆ suh ve dawˇ nawˇ tuˬ hpawnˬ daꞈ htaˇ, hkaoˍ monˇ maˇ caˇ leh a pehˉ meuˇ gʼuiˬ maˇ dawˬ˗o ve chaw htaꞈ Yaˬhoˉvaˬ hkʼaˬ hkʼe dawˇ ve le?

⁵ Yeˍsuˆ suh ve dawˇ nawˇ tuˬ hpawnˬ daꞈ ve 1935 hkʼawꞈ peuˬ hkʼawꞈ nawˉ, hkaoˍ monˇ maˇ caˇ leh a pehˉ meuˇ gʼuiˬ maˇ dawˬ˗o ve chaw htaꞈ, Yaˬhoˉvaˬ hkʼaˬ hkʼe dawˇ ve le? Leh chi teˇ hkui awˬ viˉ awˬ nyi hkaoˍ monˇ caˇ leh a pehˉ meuˇ gʼuiˬ dawˬ jaw ve chaw, Yaˬhoˉvaˬ maˇ leuˆ laˇ ve shiˍ htaˇ, maˇ caˇ leh maˇ dawˇ˗o. Yaˬhoˉvaˬ yawˇ hui htaꞈ hkʼaˬ hkʼe dawˇ ve le? (1 Kawˇrenˍhtuˆ 11:28) Yawˇ hui mvuhˇ naw ma hkʼoˆ taˆ˗e tuˬ tehꞈ dawˇ ve pa taw, hkaoˍ monˇ caˇ leh a pehˉ meuˇ gʼuiˬ dawˬ jaw ve yoˬ. Yaꞈ hkʼaˇ, yawˇ hui shiˍ la htaˇ, hkaoˍ monˇ maˇ caˇ leh a pehˉ meuˇ gʼuiˬ maˇ dawˬ˗o. Yaˬhoˉvaˬ ve kanˉ ka tiꞈ yeˬ ve hkʼaw te tuˬ dawˇ teh taˍ ve yoˬ. Yawˇ hui awˬ kaˍ awˬ nu ve yawˬ hpehꞈ ve tehꞈ Yaˬhoˉvaˬ haꞈ yuˬ ve yoˬ. Yawˇ hui hkaoˍ monˇ maˇ caˇ leh a pehˉ meuˇ gʼuiˬ maˇ dawˬ˗o ve htawˇ, Yeˍsuˆ suh ve dawˇ nawˇ tuˬ hpawnˬ daꞈ˗e ve yoˬ. Yaˬhoˉvaˬ leh Yeˍsuˆ yawˇ hui awˬ pon te piˇ ve htaꞈ awˬ hpfuhˇ shiˍ ve pa taw yoˬ.

6. Yeˍsuˆ mvuhˇ naw ma tcuh yaˇ hui htaꞈ aˬ htoꞈ ma te tuˬ kʼoˆ piˇ ve yoˬ.

⁶ Maˇ maw kʼo tuꞈ jaˇ hkanˍ jaˇ ve awˬ yanˇ gaˬ la tuˬ yoˬ. Leuˆ yuˬ taˍ ve chaw leh awˬ kaˍ awˬ nu ve yawˬ htaꞈ caˉ daꞈ ve chaw awˬ moˍ lonˉ, Hpeuꞈ maˍ ve liꞈ kaˇ nanˉ uiˍ 7 hkʼaw hkʼaˬ hkʼe kʼoˆ ve, chaˬ nyi htaˇ awˬ gʼaˇ gʼa ve yoˬ. Leuˆ yuˬ taˍ ve chaw  htaꞈ yinˉ tcuhˉ piˇ leh Yaˬhoˉvaˬ htawˆ hkanˍ piˇ htaˇ hkʼa gaˬ, Yeˍsuˆ mvuhˇ naw ma tcuh yaˇ htaꞈ awˇ ceˍ awˍ hpawˇ lo ve mvuhˇ haw teˇ hpaˍ htaꞈ vawˆ tiˍ taˍ tcuh ve yoˬ. (Hpeuꞈ maˍ ve 7:1-4) Leuˆ yuˬ taˍ ve chaw ka tiꞈ yeˬ ve pa taw, mvuhˇ naw ma hkʼoˆ jawˇ mawˇ leh paw hkuˇ te tuˬ laꞈ shawnˍ gʼa tuˬ yoˬ. (Hpeuꞈ maˍ ve 20:6) Yaˬhoˉvaˬ leh mvuhˇ naw ma hkʼoˆ ve yehˬ kʼa, leuˆ yuˬ taˍ ve chaw 144,000 gʼaˇ laꞈ shawnˍ gʼa tuˬ htaꞈ law nyi taˍ ve yoˬ.

7. Hpeuꞈ maˍ ve liꞈ 7:9, 10 hkʼaw kʼoˆ taˍ ve hkʼe, Yoˇhanˬ ve zuhꞈ maˆ hkʼaw yawˇ a shu htaꞈ mawˬ ve le? Leh yawˇ hui aˬ htoꞈ ma te chehˇ ve le? (Awˬ htaꞈ hpawˇ ve awˬ han htaꞈ nyi sheˍ.)

⁷ Jawˇmawˇ leh paw hkuˇ 144,000 gʼaˇ htaꞈ Yoˇhanˬ kʼoˆ peuˬ hkʼawꞈ nawˉ, “chaw awˬ moˍ lonˉ” Aˍmaˍgeˍdonˍ htaꞈ hpanˍ kʼai ve kaꞈ yawˇ mawˬ ve yoˬ. Chaw chi teˇ moˍ awˉ lawˉ teˇ moˍ htaꞈ maˇ shuˍ. Awˬ lawn kʼo, chaw chi teˇ moˍ lehˬ awˉ lawˉ teˇ moˍ aꞈ kehˉ maˇ jaˇ leh hkʼaˬ hkʼe ma cawˬ ve kaꞈ maˇ shiˍ. (Hpeuꞈ maˍ ve 7:9, 10 gʼaw sheˍ.) “Yawˇ hui lehˬ, hpuˉ˗ehˍ ve aˉ poꞈ zuhˬ ma htaꞈ veuꞈ deh” ve lehˬ, Yaˬhoˉvaˬ leh Yeˍsuˆ htaꞈ ka tiꞈ yeˬ ve tehꞈ hpeuꞈ maw piˇ leh Saˍtanˍ ve miˬ guiˬ hkʼoˆ “chaꞈ chiˆ ve teˇ hpaˍ maˇ gʼa ngawˉ tuˬ gʼa faˬ taˍ ve yoˬ.” (Yaˍkoˆ 1:27) Chaw awˬ moˍ lonˉ awˬ hkawˇ bvuhˬ chaweh kuˬ ve, yawˇ hui gʼa ponˬ ve lehˬ, Yaˬhoˉvaˬ leh Yeˍsuˆ te ve geh laˬ ve yoˬ. Yawˇ hui “tcuhˉ pui meuˇ awˬ kʼaˉ teˇ hpaˍ htaꞈ vawˆ taˍ ve” lehˬ Yeˍsuˆ Yaˬhoˉvaˬ leuˆ yuˬ taˍ ve Jawˇmawˇ hpehꞈ ve tehꞈ haꞈ yuˬ leh ha lehˬ ve hkʼaw hpeuꞈ maw laˇ ve yoˬ.—Yoˇhanˬ 12:12, 13. htaꞈ tehˆ daꞈ sheˍ.

8. Hpeuꞈ maˍ ve liꞈ 7:11, 12 hkʼaw mvuhˇ naw ma hkʼoˆ Yaˬhoˉvaˬ ve yehˬ kʼa htaꞈ caˉ daꞈ ve ngaˬ hui htaꞈ hkʼaˬ hkʼe kʼoˆ maˍ laˇ ve le?

⁸ Hpeuꞈ maˍ ve liꞈ 7:11, 12 gʼaw sheˍ. Mvuhˇ naw ma hkʼoˆ lo ve Yaˬhoˉvaˬ ve yehˬ kʼa ha lehˬ jaˇ leh yawˇ hui chaw awˬ moˍ lonˉ htaꞈ gʼa mawˬ htaˇ Gʼuiˬ sha htaꞈ chiˇ mvuh chehˇ ve Yoˇhanˬ gʼa mawˬ ve yoˬ. Awˬ gʼuˇ suhˍ hpawˇ zuhꞈ maˆ chi awˬ tehˬ hpehꞈ la ve, chaw awˬ moˍ lonˉ tuꞈ jaˇ hkanˍ jaˇ ve htaꞈ hpanˍ kʼai ve htaꞈ yawˇ hui gʼa mawˬ htaˇ ha lehˬ jaˇ.

9. Hpeuꞈ maˍ ve liꞈ 7:13-15 hkʼaw kʼoˆ taˍ ve hkʼe, chi teˇ hkui chaw awˬ moˍ lonˉ aˬ htoꞈ ma te chehˇ ve le?

⁹ Hpeuꞈ maˍ ve liꞈ 7:13-15 gʼaw sheˍ. Yoˇhanˬ chaw awˬ moˍ lonˉ htaꞈ “aˉ poꞈ zuhˬ ma htaꞈ Yawˬ ehˉ ve awˬ suhˍ awˬ hkʼaw lo tsuhˇ hpu taˍ peuˬ ve chaw hui hpehꞈ ve” tehꞈ kʼoˆ ve yoˬ. Chi lehˬ yawˇ hui dawˇ shiˍ puiˉ ve nyi ma daꞈ kehˬ leh Gʼuiˬ sha yawˇ hui htaꞈ nyi hkʼaˇ suh ve tehꞈ kʼoˆ gaˇ ve yoˬ. (Iˉsaˍyaˆ 1:18) Yawˇ hui awˬ to chi aꞈ piˇ˗oˬ ve Hkriꞈ yaˇ hpehꞈ leh, Baˆtiˆsaˬ haꞈ yuˬ˗oˬ leh Yaˬhoˉvaˬ geh meuˆ daꞈ ve cawˬ leh, Yeˍsuˆ htaiˍ hkʼawꞈ laˇ ve awˬ hpfuhˇ htaꞈ yonˍ ve tehꞈ hpeuꞈ maw piˇ ve yoˬ. (Yoˇhanˬ 3:36; 1 Peˍtruˆ 3:21) Hkʼe te leh yawˇ hui Yaˬhoˉvaˬ kʼaw jaw gʼuˇ suhˍ lo huˉ taˍ leh miˬ guiˬ hkʼoˆ lo “tanˇ hkuinˇ tanˇ vanˇ yawˇ ve kanˉ htaꞈ te chehˇ ve yoˬ.” Chi teˇ hkui maˇ˗awˍ ve chaw awˬ moˍ lonˉ lehˬ, Gʼuiˬ sha ve mvuhˇ miˬ awˬ lawn hto toˇ leh shu awˬ laꞈ gʼawˇ hpehꞈ la tuˬ maˍ piˇ chehˇ ve yoˬ. Yawˇ hui kanˉ chi htaꞈ ha lehˬ ha kʼa te leh a shaꞈ teꞈ kuiˬ hkʼaw Gʼuiˬ sha ve mvuhˇ miˬ htaꞈ a yeˇ uiˍ jaˇ tehꞈ shawˍ ve yoˬ.—Maꞈhtehˍ 6:33; 24:14; 28:19, 20.

10. Chaw awˬ moˍ lonˉ aˬ htoꞈ ma htaꞈ yonˍ ve le? Leh ka tiꞈ te taˍ laˇ ve awˬ tehˬ hpehꞈ la ve yawˇ hui aˬ htoꞈ ma mawˬ tuˬ le?

¹⁰ Tuꞈ jaˇ hkanˍ jaˇ ve htaꞈ hpanˍ kʼai ve chaw awˬ moˍ lonˉ Yaˬhoˉvaˬ yawˇ hui htaꞈ haꞈ shaˉ laˇ tuˬ yoˬ tehꞈ yonˍ ve yoˬ. Awˬ lawn kʼo, “Kʼaw jaw hkʼoˆ lo mui shehˍ hpaˇ lehˬ, yawˇ hui geh chehˇ leh yawˇ hui htaꞈ haꞈ shaˉ tuˬ yoˬ.” Awˬ kaˍ awˬ nu ve yawˬ lehˬ Gʼuiˬ sha ve ka tiꞈ biˇ la tuˬ dawˇ law taˍ ve yoˬ. Choˬ kʼoˆ ve, “[Gʼuiˬ sha] lehˬ, yawˇ hui ve mehˆ gʼuiˬ hkʼa peu˗eˬ htaꞈ shiˆ baˬ piˇ tuˬ yoˬ. Suh ve teˇ ceuˬ maˇ kʼawꞈ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ kʼawꞈ cawˬ.”—Hpeuꞈ maˍ ve 21:3, 4.

11-12. (a) Hpeuꞈ maˍ ve liꞈ 7:16, 17 hkʼaw kʼoˆ taˍ ve hkʼe, awˬ gʼuˇ suhˍ hpawˇ chaw awˬ moˍ lonˉ aˬ htoꞈ ma awˬ bon gʼa tuˬ le? (b) Awˬ kaˍ awˬ nu ve yawˬ Yeˍsuˆ suh ve dawˇ nawˇ tuˬ hpawnˬ daꞈ htaˇ aˬ htoꞈ ma te gʼa ve le? Leh yawˇ hui te gaˇ tuˬ aˬ htoꞈ ma te piˇ ve le?

¹¹ Hpeuꞈ maˍ ve 7:16, 17 gʼaw sheˍ. Taˇ kanˬ  hkʼaˇ maˇ daꞈ leh maꞈ bawˆ daꞈ ve pa taw, Yaˬhoˉvaˬ ve chaw teˇ hpaˍ caˇ tuˬ vuiˬ tuˬ hpu maˇ lawꞈ leh meuꞈ ve yoˬ. Teˇ hpaˍ kʼo yonˍ ve htaꞈ pa taw htawnˍ hkʼaw lo gʼa chehˇ ve yoˬ. Haiˬ ve miˬ guiˬ htaꞈ te luˬ peuˬ hkʼawꞈ nawˉ, chaw awˬ moˉ lonˉ ha lehˬ jaˇ tuˬ yoˬ. Awˬ lawn kʼo, yawˇ hui caˇ tuˬ dawˬ tuˬ cawˬ maˇ jaˇ leh Yaˬhoˉvaˬ ve cuˇ yiˍ kaꞈ gʼa shiˍ tuˬ yoˬ. Yaˬhoˉvaˬ Saˍtanˍ ve miˬ guiˬ htaꞈ te luˬ htaˇ, yawˇ mvuhˇ miˬ teˇ hpaˍ htaꞈ beuꞈ ve lehˬ “haw ve chiˆ ve” hkʼe hpehꞈ ve yoˬ. Yaꞈ hkʼaˇ, yawˇ chaw awˬ moˍ lonˉ htaꞈ chi hkʼe maˇ te taˬ. Tuꞈ jaˇ hkanˍ jaˇ ve peuˬ hkʼawꞈ nawˉ, gʼa ponˬ ve chaw htaꞈ co co taiˍ taiˍ peꞈ laˇ gʼa ve iˉ kaˆ htaꞈ Yeˍsuˆ shiˍ maˍ piˇ tuˬ yoˬ. Chaw awˬ moˍ lonˉ lehˬ dawˇ law kuiˬ daꞈ jaˇ. A shaꞈ teꞈ chehˇ jaw ve laiˉ hinˉ lanˬ gʼaˇ hkʼaw chaw awˬ moˍ lonˉ ceh tiˉ maˇ gʼa suh!—Yoˇhanˬ 11:26.

¹² Chaw awˬ moˍ lonˉ dawˇ law kuiˬ daꞈ jaˇ leh Yaˬhoˉvaˬ leh Yeˍsuˆ htaꞈ awˬ bon uiˍ jaˇ kʼoˆ piˇ ve yoˬ. Yawˇ hui mvuhˇ naw ma hkʼoˆ taˆ˗e tuˬ maˇ gʼa leuˆ piˇ ve htawˇ, Yaˬhoˉvaˬ lehˬ yawˇ hui htaꞈ maˇ haꞈ leh a yeˇ maˇ yuˬ ve maˇ heˆ. Leuˆ yuˬ taˍ ve chaw leh awˬ kaˍ awˬ nu ve yawˬ Yaˬhoˉvaˬ leh Yeˍsuˆ htaꞈ chiˇ mvuh gʼa ve yoˬ. Leh te gʼa ve teˇ hkʼaˇ lehˬ, Yeˍsuˆ suh ve dawˇ nawˇ tuˬ hpawnˬ daꞈ˗e ve yoˬ.

13-14. Leuˆ yuˬ taˍ ve chaw leh awˬ kaˍ awˬ nu ve yawˬ aˬ htoꞈ ma te Yeˍsuˆ suh ve dawˇ nawˇ tuˬ hpawnˬ daꞈ˗e cawˇ ve le?

¹³ Ponˬ laˬ ve hkʼaˬ nyiˇ hkʼawꞈ maˇ gaˬ sheˍ htaˇ, Yeˍsuˆ suh ve dawˇ nawˇ tuˬ hpawnˬ daꞈ htaˇ aˬ laˬ hkʼe 1,000 gʼaˇ hkʼaw ve teˇ gʼaˇ hkaoˍ monˇ caˇ leh a pehˉ meuˇ gʼuiˬ dawˬ ve yoˬ. Maˇ˗awˍ ve Hkriꞈ yaˇ awˬ moˍ hkʼaw hkaoˍ monˇ caˇ leh a pehˉ meuˇ gʼuiˬ dawˬ ve chaw maˇ cawˬ. Yeˍsuˆ suh ve dawˇ nawˇ tuˬ hpawnˬ daꞈ la ve maˇ˗awˍ ve chaw, miˬ guiˬ hkʼoˆ co co taiˍ taiˍ chehˇ tuˬ dawˇ law taˍ ve yoˬ. Hkʼe kʼo, aˬ htoꞈ ma te yawˇ hui Yeˍsuˆ suh ve dawˇ nawˇ tuˬ hpawnˬ daꞈ˗e sheˍ ve le? Yawˇ awˬ chawˇ heuˆ daꞈ ve hkʼaw kʼai ve hkʼe hpehꞈ ve yoˬ. Yawˇ kʼai ve lehˬ yawˇ huiˉ maˬ htaꞈ haꞈ leh ga piˇ gaˇ ve yoˬ. Chi hkʼa shuˍ shuˍ, awˬ kaˍ awˬ nu ve yawˬ kaꞈ Yeˍsuˆ suh ve dawˇ nawˇ tuˬ hpawnˬ daꞈ˗e ve lehˬ, yawˇ hui Yeˍsuˆ leh leuˆ yuˬ taˍ ve chaw htaꞈ haꞈ leh ga piˇ gaˇ ve yoˬ. Chi hkʼoˆ kaꞈ, yawˇ hui Yeˍsuˆ suh ve dawˇ nawˇ tuˬ hpawnˬ daꞈ˗e sheˍ ve lehˬ, Yeˍsuˆ htaiˍ hkʼawꞈ laˇ ve leh miˬ guiˬ hkʼoˆ yawˇ hui co co taiˍ taiˍ a shaꞈ gʼa tuˬ ve awˬ hpfuhˇ htaꞈ shiˍ ve tehꞈ hpeuꞈ maw piˇ ve yoˬ.

 ¹⁴ Awˬ kaˍ awˬ nu ve yawˬ Yeˍsuˆ suh ve dawˇ nawˇ tuˬ hpawnˬ daꞈ˗e ve lehˬ, yawˇ hkawˇ na yuˬ ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve tcuh yaˇ hui geh yawˇ awˉ lawˉ teˇ pawˆ te htaˇ, “ngaˬ htaꞈ dawˇ nawˇ tuˬ chi htaꞈ te˗o” tehꞈ kʼoˆ piˇ ve yoˬ. (1 Kawˇrenˍhtuˆ 11:23-26) Chi htaꞈ pa taw, leuˆ yuˬ taˍ ve chaw miˬ guiˬ hkʼoˆ maˇ leuˉ htaˇ hkʼa gaˬ awˬ kaˍ awˬ nu ve yawˬ Yeˍsuˆ suh ve dawˇ nawˇ tuˬ hpawnˬ daꞈ˗e ve yoˬ. Leh yawˇ hui laiˉ gʼaˇ htaꞈ kaꞈ hpawnˬ daꞈ laˬ tuˬ jehˬ piˇ ve yoˬ.

15. Yeˍsuˆ suh ve dawˇ nawˇ tuˬ hpawnˬ daꞈ htaˇ, ngaˬ hui Yaˬhoˉvaˬ leh Yeˍsuˆ htaꞈ hkʼaˬ hkʼe chiˇ mvuh gʼa tuˬ le?

¹⁵ Yeˍsuˆ suh ve dawˇ nawˇ tuˬ hpawnˬ daꞈ ve te htaˇ, ngaˬ hui Yaˬhoˉvaˬ leh Yeˍsuˆ htaꞈ chiˇ mvuh tuˬ kʼa muiˬ hkawˇ kʼa leh bon lawˬ ve yoˬ. Chi teˇ hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ ve bon maˍ hkawˇ awˬ lawn lonˉ ma lehˬ “Gʼuiˬ sha leh Yeˍsuˆ nawˬ awˬ pon te laˇ ve htaꞈ awˬ bon uiˍ hkawˇ kʼoˆ piˇ sheˍ.” Bon maˍ hkawˇ chi ve lehˬ, ngaˬ hui Yaˬhoˉvaˬ leh Yeˍsuˆ htaꞈ awˬ bon uiˍ jaˇ kʼoˆ piˇ tuˬ ga laˇ ve yoˬ. Hkaoˍ monˇ leh a pehˉ meuˇ gʼuiˬ chiˇ piˇ htaˇ, Yeˍsuˆ suh ve dawˇ nawˇ tuˬ hpawnˬ daꞈ la ve chaw, yawˇ ve awˬ to leh awˬ suhˍ htaꞈ dawˇ nawˇ tuˬ awˬ yanˇ cawˬ ve yoˬ. Yaˬhoˉvaˬ ngaˬ hui htaꞈ haꞈ leh co co taiˍ taiˍ a shaꞈ gʼa tuˬ, yawˇ ve Yaˇ paˍ ngaˬ hui awˬ pon suh tcuh laˇ ve htaꞈ dawˇ nawˇ tuˬ te laˇ ve yoˬ. (Maꞈhtehˍ 20:28) Yaˬhoˉvaˬ leh yawˇ ve Yaˇ paˍ htaꞈ haꞈ ve chaw teˇ gʼaˇ le le, Yeˍsuˆ suh ve dawˇ nawˇ tuˬ hpawnˬ daꞈ˗e gaˇ ve yoˬ.

16. Leuˆ yuˬ taˍ ve chaw leh awˬ kaˍ awˬ nu ve yawˬ aˬ htoꞈ ma shuˍ daꞈ ve le?

¹⁶ Leuˆ yuˬ taˍ ve chaw leh awˬ kaˍ awˬ nu ve yawˬ teˇ ceuˬ ceuˬ maˇ shuˍ daꞈ ve htawˇ, Yaˬhoˉvaˬ yawˇ hui htaꞈ haꞈ ve yoˬ. Gʼuiˬ sha mehˆ gʼuˇ suhˍ yawˇ hui awˬ hpfuhˇ hkʼa shuˍ cawˬ ve yoˬ. Yaˬhoˉvaˬ lehˬ, leuˆ yuˬ taˍ ve chaw leh awˬ kaˍ awˬ nu ve yawˬ htaꞈ htaiˍ hkʼawꞈ ve awˬ hpfuhˇ hkʼa shuˍ vuiˬ hkʼawꞈ taˍ ve yoˬ. Chi lehˬ yawˇ haꞈ jaˇ ve Yaˇ paˍ ve a shaꞈ yoˬ. Chi nyiˇ moˍ peun daꞈ ve lehˬ, yawˇ hui ve dawˇ law kuiˬ yoˬ. Yaꞈ hkʼaˇ, yawˇ hui Gʼuiˬ sha htaꞈ ka tiꞈ gʼa yeˬ ve yoˬ. (Chiˇ mvuh ve 31:23) Leuˆ yuˬ taˍ ve chaw leh awˬ kaˍ awˬ nu ve yawˬ hpehꞈ ve htawˇ, yawˇ hui loˍ ve hkʼe Yaˬhoˉvaˬ daꞈ kehˬ ve awˬ ha hpu hkʼa shuˍ piˇ ve yoˬ tehꞈ taˇ leunˇ sheˍ.

17. Leuˆ yuˬ taˍ ve chaw a shaꞈ teꞈ chehˇ sheˍ ve aˬ htoꞈ ma htaꞈ dawˇ law taˍ ve le?

¹⁷ Lehˆ yuˬ taˍ ve Hkriꞈ yaˇ paw la htaˇ kaꞈ mvuhˇ naw ma hkʼoˆ taˆ˗e tuˬ dawˇ law taˍ ve maˇ heˆ. Hkʼawꞈ nawˉ htaˇ dawˇ law kuiˬ chi ve Yaˬhoˉvaˬ yawˇ hui nyi ma hkʼaw cawˬ tcuh ve yoˬ. Yawˇ hui lehˬ dawˇ law kuiˬ htaꞈ dawˇ nyi leh, awˬ lawn chi htaꞈ caˉ daꞈ ve bon lawˬ leh, mvuhˇ naw ma hkʼoˆ lo laꞈ shawnˍ gʼa tuˬ htaꞈ dawˇ law taˍ ve yoˬ. Mvuhˇ naw ma hkʼoˆ yawˇ hui ve awˬ to hkʼaˬ hkʼe hpehꞈ tuˬ maˇ shiˍ ve htawˇ, yawˇ hui Yaˬhoˉvaˬ, Yeˍsuˆ, mvuhˇ naw ma tcuh yaˇ teˇ hpaˍ, leh leuˆ yuˬ taˍ ve chaw teˇ hpaˍ htaꞈ gʼa mawˬ daꞈ tuˬ dawˇ law taˍ ve yoˬ. Leh yawˇ hui Gʼuiˬ sha ve mvuhˇ miˬ hkʼaw gʼa  chehˇ tuˬ kaꞈ dawˇ law taˍ ve yoˬ.—Hpiˇliˇpiˆ 3:20, 21; 1 Yoˇhanˬ 3:2.

18. Awˬ kaˍ awˬ nu ve yawˬ aˬ htoꞈ ma htaꞈ dawˇ law taˍ ve le?

¹⁸ Awˬ kaˍ awˬ nu ve yawˬ miˬ guiˬ hkʼoˆ lo co co taiˍ taiˍ a shaꞈ gʼa tuˬ dawˇ law taˍ ve, chi lehˬ chaw yaˇ ve dawˇ law kuiˬ hpehꞈ ve yoˬ. (Cuˇ yiˍ piˇ ve 3:11) Yawˇ hui miˬ guiˬ hkʼoˆ daꞈ jaˇ ve Paˍraˍdiˇsuˆ hko hpehꞈ tuˬ gʼa ga daꞈ tuˬ dawˇ law taˍ ve yoˬ. Yawˇ hui a shu yawˇ ve yehˬ gʼa te ve, daꞈ jaˇ ve hko gʼa te ve, awˬ hawehˬ awˬ haˆ gʼa hu ve, leh oˇ ve teˇ yanˇ teˇ gʼaˇ le le chehˇ sha cawˬ sha leh awˬ gʼaˇ uiˍ tuˬ yoˬ. (Iˉsaˍyaˆ 65:21-23) Yawˇ hui laiˉ kaˬ lo gʼa ca guiˇ˗e ve, hkʼaw hkʼoˆ lo gʼa taˆ˗e ve, laˇ tsuhˇ gʼuiˬ lo gʼa kʼai ve, leh Gʼuiˬ sha hpanˍ taˍ ve awˬ ceuˬ htaꞈ gʼa chaˬ nyi tuˬ yoˬ. Leh yawˇ hui htaꞈ ha lehˬ jaˇ tuˬ te piˇ ve lehˬ, yawˇ hui Yaˬhoˉvaˬ geh gʼaˇ hteꞈ meuˆ daꞈ tuˬ yoˬ.

19. Yeˍsuˆ suh ve dawˇ nawˇ tuˬ hpawnˬ daꞈ ve te htaˇ ngaˬ hui teˇ gʼaˇ le le aˬ htoꞈ ma te tuˬ awˬ yanˇ cawˬ ve le? Leh Yeˍsuˆ suh ve dawˇ nawˇ tuˬ hpawnˬ daꞈ ve chi teˇ hkʼawꞈ hkʼaˬ htaˇ te tuˬ le?

¹⁹ Yaˬhoˉvaˬ yawˇ ve kanˉ te ve awˬ to chiˇ aꞈ piˇ˗oˬ ve teˇ gʼaˇ le le htaꞈ, awˬ gʼuˇ suhˍ hpawˇ daꞈ jaˇ ve dawˇ law kuiˬ cawˬ tcuh ve yoˬ. (Yeˍraˍmiˆ 29:11) Yeˍsuˆ suh ve dawˇ nawˇ tuˬ hpawnˬ daꞈ ve lehˬ, Gʼuiˬ sha leh Yeˍsuˆ ngaˬ hui ve a shaꞈ awˬ pon hkʼaˬ htaˆ kaꞈ ha lehˬ tuˬ te laˇ ve htaꞈ chiˇ mvuhˇ piˇ gʼa ve yoˬ. Chi lehˬ awˬ tehˬ ve Hkriꞈ yaˇ awˬ pon a yeˇ uiˍ jaˇ. Chi teˇ hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ ve shinˉ peuˬ hkawꞈ nyi Ha pa 3 maˬ 27 nyi 2021 hkʼawꞈ mvuhˇ nyi loꞈ˗e peuˬ hkʼawꞈ nawˉ htaˇ yoˬ. Laiˉ gʼaˇ hpawnˬ daꞈ ve chi laˬ tuˬ maˇ haˍ. Chaw teˇ hpaˍ kʼo tawˍ ve tsuhˇ ve gʼa hpuˇ ve htawˇ hpawnˬ daꞈ˗e leh, teˇ hpaˍ kʼo htawnˍ hkʼaw lo chehˇ ve htawˇ, Yeˍsuˆ suh ve dawˇ nawˇ tuˬ hpawnˬ daꞈ ve yoˬ. Hkʼaˬ hkʼe hpawnˬ daꞈ ve htawˇ, Yaˬhoˉvaˬ, Yeˍsuˆ, mvuhˇ naw ma tcuh yaˇ, leh leuˆ yuˬ taˍ ve chaw kʼawꞈ teꞈ tu la˗oˬ ve, ngaˬ hui htaꞈ nyi chehˇ ve tehꞈ tawnˇ taˍ sheˍ. Leh Hkriꞈ yaˇ awˬ moˍ, awˬ moˍ ehˉ, leh teˇ gʼaˇ le le Yeˍsuˆ suh ve dawˇ nawˇ tuˬ hpawnˬ daꞈ ve ha lehˬ ve hkʼaw hpawnˬ daꞈ sheˍ!