1. Chi beuꞈ teˇ co˗e ve chaw aˬ htoꞈ ma te “shu htaꞈ maˇ haꞈ puiˉ ve chaw” hpehꞈ ve le?

 Liꞈ hpu hkʼaw kʼoˆ taˍ ve, awˬ leh meuˇ ve awˬ yanˇ chaw yaˇ lehˬ, “shu htaꞈ maˇ haꞈ puiˉ ve chaw” hpehꞈ ve yoˬ. (2 Tiˆmoˉseˍ 3:1, 3) Tcuh kaˍ paˍ ve tawˇ hkawˇ chi ngaˬ hui ve awˬ co˗e awˬ tehˬ hpehꞈ la ve htaꞈ gʼa mawˬ ve yoˬ. Tawˇ pa haˉ te kʼo, chi beuꞈ teˇ co˗e laiˉ lanˬ yehˬ kʼa baˬ daꞈ leh teˇ geh maˇ gʼa chehˇ. Awˬ pa awˬ e beuꞈ daꞈ ve pa taw yaˇ teˇ hpaˍ kaꞈ haꞈ piˇ ve htaꞈ maˇ gʼa. Teˇ yehˬ kʼa hkʼaw ceh tiˉ chehˇ ve htawˇ, maˇ shiˍ daꞈ jaw ve chaw hkʼe hpehꞈ ve yoˬ. Yehˬ kʼa hpawˇ chaˬ nyi paˍ teˇ gʼaˇ kʼoˆ ve, “yawˇ hui maˇ˗awˍ ve kʼo, hkʼaw hpi˗u teuˇ, htehˆleꞈ, tawˇ yaw tuˬ awˬ hkʼeun leh VDO kenˍ (game) leˍ guiˇ ve htaꞈ awˬ yanˇ yehˇ maˇ ve pa taw, awˬ pa, awˬ e, leh yaˇ kaꞈ tawˇ hkʼa dehꞈ maˇ yaw daꞈ. Yawˇ hui teˇ yehˬ hkʼaw tiˉ chehˇ ve htawˇ, hkʼa dehꞈ maˇ shiˍ daꞈ.”

2-3. (a) Roˉmaꞈ liꞈ 12:10 hkʼaw kʼoˆ taˍ ve hkʼe, ngaˬ hui a shu htaꞈ haꞈ cawˇ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Miˬ guiˬ yaˇ hui maˇ haꞈ daꞈ ve hkʼe, ngaˬ hui maˇ hpehꞈ gaˇ. (Roˉmaꞈ 12:2) Yaꞈ hkʼaˇ, ngaˬ hui hkʼa dehꞈ haꞈ daꞈ ve tehꞈ hpeuꞈ maw piˇ gaˇ ve yoˬ. Yehˬ kʼa hkʼaw ve chaw htaꞈ ceh tiˉ haꞈ ve maˇ heˆ. Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ kaꞈ gʼa haꞈ ve yoˬ. (Roˉmaꞈ 12:10 gʼaw sheˍ.) Ngaˬ hui yehˬ kʼa hkʼaw meuˆ daꞈ ve chaw htaꞈ haꞈ ve hkʼe, awˬ viˉ awˬ nyi htaꞈ kaꞈ gʼa haꞈ ve yoˬ. Ngaˬ hui chi hkʼe te haꞈ daꞈ ve kʼo, Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ ve awˬ ceuˬ hpehꞈ ve pa taw, awˬ viˉ awˬ nyi teˇ moˍ tiˉ hpehꞈ tuˬ ngaˬ hui ga piˇ chehˇ ve yoˬ.—Miˆhkaˍ 2:12.

³ Ngaˬ hui hkʼa dehꞈ haꞈ daꞈ gʼa tuˬ, Liꞈ hpu hkʼaw ve awˬ lawn ngaˬ hui htaꞈ hkʼaˬ hkʼe maˍ laˇ gʼa ve teˇ geh nyi sheˍ.

4. Yaˍkoˆ liꞈ 5:11 hkʼaw kʼoˆ taˍ ve hkʼe, Yaˬhoˉvaˬ ha kʼaˉ puiˉ ve htaꞈ hkʼaˬ hkʼe kʼoˆ taˍ ve le?

⁴ Liꞈ hpu hkʼaw Yaˬhoˉvaˬ ve te hkʼaˇ dawˇ hkʼaˇ daꞈ ve htaꞈ kʼoˆ taˍ ve yoˬ. Tawˇ pa haˉ te kʼo, Liꞈ hpu hkʼaw “Gʼuiˬ sha lehˬ haꞈ pehnˇ  ve teˇ ceuˬ hpehꞈ ve” tehꞈ kʼoˆ ve yoˬ. (1 Yoˇhanˬ 4:8) Tawˇ hkawˇ chi gʼa kaˇ ve ceh kaꞈ ngaˬ hui Yaˬhoˉvaˬ geh meuˆ daꞈ gaˇ jaˇ. Yaꞈ hkʼaˇ, chi hkʼe ceh maˇ heˆ. Liꞈ hpu hkʼaw kʼoˆ sheˍ ve, Yaˬhoˉvaˬ lehˬ “ha kʼaˉ puiˉ ve” yoˬ. (Yaˍkoˆ 5:11 gʼaw sheˍ.) Chi nyi ma gawˬ lehˍ cawˬ tuˬ te laˇ leh, Yaˬhoˉvaˬ ngaˬ hui htaꞈ haꞈ jaˇ ve tehꞈ shiˍ ve yoˬ!

5. Yaˬhoˉvaˬ ha kʼaˉ puiˉ ve tehꞈ hkʼaˬ hkʼe hpeuꞈ maw laˇ ve le? Leh ngaˬ hui hkʼaˬ hkʼe te yawˇ htaꞈ henˇ yuˬ gʼa tuˬ le?

⁵ Yaˬhoˉvaˬ haꞈ pehnˇ ve htaꞈ caˉ daꞈ ve Tawˆ kʼai ve liꞈ 34:6 hkʼaw kʼoˆ laˇ taˍ ve, ngaˬ hui yawˇ geh meuˆ daꞈ gaˇ tuˬ te laˇ ve awˬ nu ve teˇ ceuˬ lehˬ, ha kʼaˉ puiˉ ve yoˬ. (Yaˍkoˆ 5:11) Yaˬhoˉvaˬ ngaˬ hui htaꞈ ha kʼaˉ laˇ ve teˇ ceuˬ lehˬ, ngaˬ hui te yaꞈ htaˇ yawˇ venˇ baˆ hpehˇ laˇ ve yoˬ. (Chiˇ mvuh ve 51:1) Liꞈ hpu hkʼaw ha kʼaˉ puiˉ ve lehˬ, venˇ baˆ hpehˇ piˇ ve htaꞈ ceh kʼoˆ gaˇ ve maˇ heˆ. Shu tuꞈ ve htaꞈ ngaˬ hui gʼa mawˬ htaˇ, ha kʼaˉ puiˉ ve lehˬ yawˇ htaꞈ ga piˇ gaˇ ve yoˬ. Yaˬhoˉvaˬ ngaˬ hui htaꞈ ga laˇ gaˇ jaˇ. Awˬ e yaˇ htaꞈ hkʼaˬ hkʼe taw ga piˇ gaˇ jaˇ ve htawˇ, Yaˬhoˉvaˬ ngaˬ hui htaꞈ chi ve aꞈ kehˉ ga laˇ gaˇ jaˇ ve tehꞈ yawˇ kʼoˆ ve yoˬ. (Iˉsaˍyaˆ 49:15) Ngaˬ hui tuꞈ ve gʼa hpuˇ htaˇ, ha kʼaˉ ve kaꞈ Gʼuiˬ sha ngaˬ hui htaꞈ ga laˇ gaˇ tuˬ te piˇ ve yoˬ. (Chiˇ mvuh ve 37:39; 1 Kawˇrenˍhtuˆ 10:13) Ngaˬ hui kaꞈ ha kʼaˉ puiˉ ve tehꞈ hpeuꞈ maw piˇ gʼa tuˬ, awˬ viˉ awˬ nyi htaꞈ venˇ baˆ hpehˇ piˇ leh nyi ma hkʼaw beuꞈ ve maˇ cawˬ tcuh. (Eˇfeˇsuꞈ 4:32) Yaꞈ hkʼaˇ, ha kʼaˉ puiˉ ve a yeˇ uiˍ jaˇ ve teˇ ceuˬ lehˬ, awˬ viˉ awˬ nyi tuꞈ ve leh shoꞈ shaꞈ ve gʼa hpuˇ htaˇ, ngaˬ hui ga piˇ ve yoˬ. Ngaˬ hui shu htaꞈ haꞈ leh ha kʼaˉ ve kʼo, haꞈ pehnˇ uiˍ jaˇ ve Yaˬhoˉvaˬ htaꞈ henˇ yuˬ chehˇ ve tehꞈ hpeuꞈ maw piˇ ve yoˬ.—Eˇfeˇsuꞈ 5:1.

6. Yawˇnaˆtanˍ leh Daˍviˆ hkʼaˬ hkʼe te haꞈ daꞈ ve le?

⁶ Liꞈ hpu hkʼaw awˬ chawˇ meuˆ daꞈ jaˇ ve leh haꞈ daꞈ jaˇ ve chaw awˬ lawn cawˬ ve yoˬ. Yawˇnaˆtanˍ leh Daˍviˆ ve awˬ lawn htaꞈ teˇ geh nyi sheˍ. Liꞈ hpu hkʼaw kʼoˆ ve, “yawˇnaˆtanˍ Daˍviˆ htaꞈ nyi ma cawˇ jaˇ leh, yawˇ awˬ to htaꞈ haꞈ ve hkʼe Daˍviˆ htaꞈ haꞈ ve yoˬ.” (1 Saˍmo˗eˍlaˆ 18:1) Oˇ ve teˇ yanˇ Daˍviˆ htaꞈ,  Sawˉluꞈ awˬ tan jawˇ mawˇ te tuˬ Daˍviˆ leuˆ ve yoˬ. Sawˉluꞈ Daˍviˆ htaꞈ hkawehˉ jaˇ leh tiˇ pehˍ tuˬ coˇ caˇ ve yoˬ. Yaꞈ hkʼaˇ, Sawˉluꞈ ve yaˇ Yawˇnaˆtanˍ lehˬ awˬ lawn chi htaꞈ maˇ dawˇ cawˇ. Yawˇnaˆtanˍ leh Daˍviˆ awˬ chawˇ te daꞈ leh hkʼaˬ htaˆ kaꞈ ga daꞈ tuˬ yoˬ tehꞈ ka tiꞈ te daꞈ ve yoˬ.—1 Saˍmo˗eˍlaˆ 20:42.

7. Yawˇnaˆtanˍ leh Daˍviˆ awˬ chawˇ maˇ te daꞈ gʼa tuˬ aˬ htoꞈ ma te piˇ ve le?

⁷ Yawˇnaˆtanˍ leh Daˍviˆ awˬ chawˇ maˇ te daꞈ gʼa tuˬ, te piˇ ve laiˉ ceuˬ cawˬ ve yoˬ. Awˬ lawn chi htaꞈ ngaˬ hui hkʼa dehꞈ dawˇ nyi htaˇ, yawˇ hui haꞈ daꞈ ve htaꞈ dawˇ cawˇ jaˇ tuˬ yoˬ. Tawˇ pa haˉ te kʼo, Yawˇnaˆtanˍ leh Daˍviˆ aˬ laˬ hkʼe 30 hkʼawꞈ peun daꞈ ve yoˬ. Yaˇ nehˬ chi ve teˇ gʼaˇ yawˇ htaꞈ shuˍ daꞈ ve maˇ cawˬ tehꞈ Yawˇnaˆtanˍ dawˇ kaꞈ gʼa ve yoˬ hehˉ. A shaꞈ kaꞈ peun daꞈ jaˇ. Hpehꞈ laˬ jaw ve awˬ lawn kaꞈ maˇ cawˬ. Yaꞈ hkʼaˇ, Yawˇnaˆtanˍ chi hkʼe maˇ dawˇ. Yawˇ Daˍviˆ htaꞈ yawˆ yan ve yoˬ.

8. Nawˬ dawˇ kʼo, aˬ htoꞈ ma te Yawˇnaˆtanˍ leh Daˍviˆ ve daꞈ jaˇ ve awˬ chawˇ hpehꞈ ve le?

⁸ Yawˇnaˆtanˍ Daˍviˆ htaꞈ hkawehˉ ve kʼo, anˇ tuˬ maˇ loˍ. Yawˇnaˆtanˍ lehˬ Sawˉluꞈ ve yaˇ paˍ hpehꞈ ve yoˬ. Yawˇ jawˇ mawˇ te tuˬ a hkaw˗anˬ cawˬ ve yoˬ. (1 Saˍmo˗eˍlaˆ 20:31) Yaꞈ hkʼaˇ, Yawˇnaˆtanˍ nyi ma nuˇ nehˬ leh Yaˬhoˉvaˬ htaꞈ ka tiꞈ yeˬ ve yoˬ. Daˍviˆ jawˇ mawˇ te tuˬ Gʼuiˬ sha dawˇ cehˆ ve htaꞈ Yawˇnaˆtanˍ kaꞈ nyi ma cawˇ ve yoˬ. Chi hkʼe te ve kʼo, Sawˉluꞈ beuꞈ jaˇ tuˬ yawˇ shiˍ ve htawˇ, Yawˇnaˆtanˍ Daˍviˆ htaꞈ kaꞈ ka tiꞈ yeˬ ve yoˬ.—1 Saˍmo˗eˍlaˆ 20:32-34.

9. Yawˇnaˆtanˍ Daˍviˆ htaꞈ canˇ paˍ hpehꞈ ve tehꞈ dawˇ˗aw laˇ? Kʼoˆ maˍ laˇ sheˍ.

⁹ Yawˇnaˆtanˍ Daˍviˆ htaꞈ haꞈ jaˇ leh canˇ paˍ hpehꞈ ve tehꞈ maˇ dawˇ. Awˬ tehˬ kʼo, Yawˇnaˆtanˍ hkaˆ bawˆ cheuˬ jaˇ leh haꞈ hanˉ jaˇ ve maꞈ yaˇ kaꞈ hpehꞈ ve yoˬ. Yawˇ leh awˬ pa kaꞈ “aˉ ceˬ aꞈ kehˉ gehˬ jaˇ leh, laˇ caˬ shiˉ aꞈ kehˉ awˬ gʼaˇ uiˍ jaˇ” ve awˬ meh bvuhˬ ve htaꞈ shu shiˍ ve yoˬ. (2 Saˍmo˗eˍlaˆ 1:22, 23) Yawˇnaˆtanˍ yawˇ hkʼaˬ hkʼe taw cheuˬ ve kʼoˆ gaˇ kaꞈ gʼa ve yoˬ. Yawˇ chi hkʼe maˇ te. Yawˇ Daˍviˆ htaꞈ maˇ enˍ daꞈ leh maˇ hkawehˉ leh maˇ beuꞈ. Daˍviˆ haꞈ hanˉ leh Yaˬhoˉvaˬ htaꞈ gʼaˇ va ve htaꞈ Yawˇnaˆtanˍ chiˇ mvuh piˇ ve yoˬ. Awˬ tehˬ kʼo, Yawˇnaˆtanˍ Daˍviˆ geh tanˬ meuˆ daꞈ htaˇ, yawˇ awˬ to htaꞈ haꞈ ve hkʼe Daˍviˆ htaꞈ haꞈ ve tehꞈ kʼoˆ piˇ ve yoˬ. Daˍviˆ Gawˇliˇyaˆ htaꞈ tiˇ pehˍ piˇ peuˬ hkʼawꞈ nawˉ htaˇ yoˬ. Ngaˬ hui ve awˬ viˉ awˬ nyi htaꞈ haꞈ ve chi hkʼe ve hkʼaˬ hkʼe te hpeuꞈ maw piˇ gʼa tuˬ le?

10. “Nyi ma awˬ tawˬ hkʼa gaˬ” haꞈ ve aˬ htoꞈ ma htaꞈ kʼoˆ gaˇ ve le?

¹⁰ Liꞈ hpu hkʼaw ngaˬ hui ‘nyi ma awˬ tawˬ hkʼa gaˬ haꞈ daꞈ˗oꞈ’ tehꞈ kʼoˆ laˇ ve yoˬ. (1 Peˍtruˆ 1:22) Chi ve Yaˬhoˉvaˬ ngaˬ hui htaꞈ te maˍ laˇ ve yoˬ. Yaˬhoˉvaˬ ngaˬ hui htaꞈ haꞈ jaˇ leh yawˇ haꞈ pehnˇ ve htaꞈ teˇ ceuˬ kaꞈ tawˍ piˇ maˇ gʼa. Ngaˬ hui Yaˬhoˉvaˬ htaꞈ ka tiꞈ yeˬ ve kʼo, yawˇ ngaˬ hui htaꞈ hkʼaˬ htaˆ kaꞈ haꞈ tuˬ yoˬ. (Roˉmaꞈ 8:38, 39) Heˍlaˍsaˆ hkawˇ “nyi ma awˬ tawˬ hkʼa gaˬ” kʼoˆ ve tcuhˉ kuiˬ lehˬ, awˬ leh hkʼa gaˬ naˆ keu ve leh teˇ pawˆ le aꞈ kehˉ awˬ gʼaˇ yuˬ tawˆ ve htaꞈ kʼoˆ gaˇ ve yoˬ. Awˬ viˉ awˬ nyi htaꞈ haꞈ ve tehꞈ hpeuꞈ maw piˇ tuˬ, teˇ pawˆ le le aꞈ kehˉ gʼa coˇ caˇ jaˇ. Shu ngaˬ hui htaꞈ beuꞈ ve maˇ heˆ leh nyi ma luˬ tuˬ te laˇ htaˇ, ‘haꞈ pehnˇ ve awˬ hkʼaw lo teˇ gʼaˇ leh teˇ gʼaˇ yeunˇ hkanˍ daꞈ˗oꞈ. Aˉ caˆ hkeh hpeh tsuhꞈ taˍ ve hkʼe, cawˇ daꞈ hawˍ daꞈ ve teˇ ceuˬ nawˬ hui htaꞈ hpeh tsuhꞈ taˍ ve awˬ hkʼaw lo, Awˬ ha hpu htaꞈ pa taw hkʼaˬ htaˆ kaꞈ nyi ma teˇ shiˍ tiˉ cawˬ hpehꞈ tuˬ gʼaˇ hteꞈ te’ cawˇ ve yoˬ. (Eˇfeˇsuꞈ 4:1-3) Awˬ viˉ awˬ nyi geh dawˇ sha gawˬ lehˍ ve cawˬ tuˬ coˇ caˇ leh te gʼa ve hkʼe te ve kʼo, yawˇ hui te yaꞈ ve htaꞈ maˇ nyi. Yawˇ hui htaꞈ Yaˬhoˉvaˬ dawˇ ve hkʼe ngaˬ hui kaꞈ dawˇ tuˬ yoˬ.—1 Saˍmo˗eˍlaˆ 16:7; Chiˇ mvuh ve 130:3.

11. Aˬ htoꞈ ma te teˇ pawˆ pawˆ ngaˬ hui haꞈ pehnˇ ve hpeuꞈ maw piˇ tuˬ maˇ sha ve le?

¹¹ Awˬ viˉ awˬ nyi te yaꞈ ve htaꞈ ngaˬ hui shiˍ htaˇ, teˇ pawˆ pawˆ haꞈ ve tehꞈ hpeuꞈ maw piˇ tuˬ maˇ sha. Awˬ lawn chi ve awˉ lawˉ peuˇ ve Hkriꞈ yaˇ awˬ  pon kaꞈ maˇ sha. Tawˇ pa haˉ te kʼo, Eˇvawˇdiˆ leh Suˇtuˆ “[Pawˇluꞈ] geh teˇ geh ha lehˬ ve bon hkawˇ bvuhꞈ kʼai tuˬ te” htaˇ, yawˇ huiˉ maˬ hawˍ daꞈ ve yoˬ. Peuˬ hkʼawꞈ nawˉ yawˇ huiˉ maˬ maˇ hawˍ daꞈ. Hkʼe te leh, Pawˇluꞈ yawˇ huiˉ maˬ htaꞈ kʼoˆ piˇ ve, “Jawˇmawˇ Yeˍsuˆ awˬ hkʼaw lo nyi ma hawˍ daꞈ la tuˬ” te˗o.—Hpiˇliˇpiˆ 4:2, 3.

12. Awˬ viˉ awˬ nyi htaꞈ haꞈ leh meuˆ daꞈ tuˬ ngaˬ hui hkʼaˬ hkʼe gʼa te cawˇ ve le?

¹² Awˬ viˉ awˬ nyi htaꞈ haꞈ leh meuˆ daꞈ tuˬ ngaˬ hui hkʼaˬ hkʼe gʼa te cawˇ ve le? Ngaˬ hui ve awˬ viˉ awˬ nyi htaꞈ hkʼa dehꞈ shiˍ daꞈ˗oˬ htaˇ, yawˇ hui htaꞈ na gʼa leh haꞈ tuˬ sha ve yoˬ. A shaꞈ leh hpehꞈ laˬ jaw ve peun daꞈ ve pa taw, awˬ viˉ awˬ nyi htaꞈ awˬ chawˇ maˇ te tuˬ taˇ te laˇ tcuh. Yawˇnaˆtanˍ leh Daˍviˆ aˬ laˬ hkʼe 30 hkʼawꞈ peun daꞈ ve htawˇ, yawˇ hui meuˆ daꞈ gʼa ve htaꞈ tawnˇ gʼa˗aw laˇ? Chi teˇ hkui nawˬ chehˇ ve Hkriꞈ yaˇ awˬ moˍ hkʼaw nawˬ a shu htaꞈ awˬ chawˇ te gʼa tuˬ dawˇ nyi sheˍ. Yawˇ hui nawˬ aꞈ kehˉ a shaꞈ i ve maˇ heˆ leh a shaꞈ maˇ tuˬ yoˬ hehˉ. Nawˬ chi hkʼe te ve kʼo, ‘awˬ viˉ awˬ nyi htaꞈ haꞈ ve’ tehꞈ hpeuꞈ maw piˇ chehˇ ve yoˬ.—1 Peˍtruˆ 2:17.

13. Aˬ htoꞈ ma te ngaˬ hui Hkriꞈ yaˇ awˬ moˍ hkʼaw ve chaw htaꞈ meuˆ daꞈ ve maˇ shuˍ daꞈ ve le?

¹³ Awˬ viˉ awˬ nyi htaꞈ haꞈ ve tcuhˉ kuiˬ lehˬ, Hkriꞈ yaˇ awˬ moˍ hkʼaw ve chaw htaꞈ hkʼa shuˍ meuˆ daꞈ ve htaꞈ kʼoˆ gaˇ ve laˇ? Maˇ heˆ. Ngaˬ hui hkʼa shuˍ dawˇ cawˇ ve chaw htaꞈ meuˆ daꞈ ve lehˬ maˇ yaꞈ. Yeˍsuˆ yawˇ ve awˬ laꞈ gʼawˇ hui htaꞈ “awˬ chawˇ” tehꞈ kʼoˆ ve htawˇ, yawˇ Yoˇhanˬ htaꞈ meuˆ daꞈ jaˇ. (Yoˇhanˬ 13:23; 15:15; 20:2) Chi hkʼe hpehꞈ ve htawˇ, Yeˍsuˆ lehˬ chaw mehˆ hpfuhˇ htaꞈ nyi leh Yoˇhanˬ htaꞈ yawˇ hui aꞈ kehˉ daꞈ ve maˇ te piˇ. Tawˇ pa haˉ te kʼo, Yoˇhanˬ leh Yaˍkoˆ Gʼuiˬ sha ve mvuhˇ miˬ hkʼaw a yeˇ uiˍ ve awˬ vuiˬ gʼa te tuˬ Yeˍsuˆ geh lawˬ ve yoˬ. Yawˇ yawˇ hui htaꞈ kʼoˆ piˇ ve, “ngaˬ ve laꞈ sha paˉ laꞈ mehˍ paˉ gʼa mui tuˬ, ngaˬ peꞈ laˇ maˇ hpehꞈ.” (Maˍkuˆ 10:35-40) Ngaˬ hui Yeˍsuˆ htaꞈ henˇ yuˬ leh, chaw mehˆ hpfuhˇ htaꞈ nyi leh, awˬ chawˇ meuˆ daꞈ jaˇ ve htaꞈ shu aꞈ kehˉ daꞈ ve maˇ gʼa te piˇ. (Yaˍkoˆ 2:3, 4) Ngaˬ hui chaw mehˆ hpfuhˇ htaꞈ nyi ve kʼo, maˇ cawˇ maˇ hawˍ daꞈ. Chi hkʼe ve Hkriꞈ yaˇ awˬ moˍ hkʼaw maˇ cawˬ cawˇ.—Yuˇdaꞈ 17-19.

14. Hpiˇliˇpiˆ liꞈ 2:3 hkʼaw kʼoˆ taˍ ve hkʼe, maˇ enˍ daꞈ leh ngaˬ hui shu aꞈ kehˉ daꞈ ve tehꞈ maˇ dawˇ tuˬ aˬ htoꞈ ma ga laˇ ve le?

 ¹⁴ Ngaˬ hui teˇ gʼaˇ leh teˇ gʼaˇ haꞈ daꞈ ve kʼo, maˇ enˍ daꞈ leh shu aꞈ kehˉ daꞈ ve kaꞈ maˇ dawˇ. Yawˇnaˆtanˍ ve awˬ lawn htaꞈ dawˇ nyi sheˍ. Yawˇ Daˍviˆ htaꞈ maˇ hkawehˉ leh jawˇ mawˇ te tuˬ Daˍviˆ veh la ve kaꞈ maˇ dawˇ. Ngaˬ hui Yawˇnaˆtanˍ htaꞈ henˇ yuˬ gʼa ve yoˬ. Awˬ viˉ awˬ nyi puiˉ ve hpehꞈ ve htaꞈ pa taw, yawˇ hui htaꞈ enˍ daꞈ leh hkawehˉ ve kaꞈ maˇ te cawˇ. “Yaꞈ hkʼaˇ, nyi ma nuˇ nehˬ ve awˬ hkʼaw lo, teˇ gʼaˇ leh teˇ gʼaˇ a shu yawˇ awˬ to aꞈ kehˉ shu htaꞈ taˍ uiˍ taˍ mvuh piˇ˗oˆ.” (Hpiˇliˇpiˆ 2:3 gʼaw sheˍ.) Hkriꞈ yaˇ awˬ moˍ htaꞈ ga piˇ gʼa tuˬ teˇ gʼaˇ le le daꞈ ve awˬ ceuˬ cawˬ ve tehꞈ tawnˇ taˍ sheˍ. Ngaˬ hui hkʼaˬ htaˆ kaꞈ nyi ma nuˇ nehˬ ve kʼo, awˬ viˉ awˬ nyi te hkʼaˇ dawˇ hkʼaˇ daꞈ ve htaꞈ nyi mawˬ leh yawˇ hui ve daꞈ ve htaꞈ kaꞈ henˇ yuˬ gaˇ ve yoˬ.—1 Kawˇrenˍhtuˆ 12:21-25.

15. Tan˗ya leh yawˇ ve yaˇ 3 gʼaˇ ve awˬ lawn nawˬ htaꞈ hkʼaˬ hkʼe maˍ laˇ ve le?

¹⁵ Ngaˬ hui maˇ dawˇ maˇ gaˇ ve hkʼaw shoꞈ shaꞈ ve gʼa hpuˇ htaˇ, Yaˬhoˉvaˬ ngaˬ hui htaꞈ awˬ gʼaˇ peꞈ laˇ tuˬ yoˬ. Yawˇ chi hkʼe te ve lehˬ, awˬ viˉ awˬ nyi htaꞈ cuˇ leh ngaˬ hui loˍ ve awˬ ceuˬ htaꞈ ga laˇ tcuh ve yoˬ. Tan˗ya leh yawˇ ve yaˇ 3 gʼaˇ ve awˬ lawn htaꞈ teˇ geh nyi sheˍ. 2019 hkʼawꞈ htaˇ Aˍmeˬriˆkaꞈ mvuhˇ miˬ lo “Haꞈ pehnˇ ve lehˬ maˇ luˬ puiˉ!” kʼoˆ ve, laiˉ mvuhˇ miˬ lo laˬ ve hpawnˬ daꞈ lonˉ hkʼaw yawˇ hui kʼawꞈ la ve yoˬ. Tan˗ya kʼoˆ ve, “hkawꞈ nyi htaˇ ngaˬ hui hkehˉ chaw haˉ kuiˬ yehˬ lo kʼawꞈ˗e tuˬ kaˇ yaꞈ kʼaw geh jaˇ ve htaꞈ kʼai chehˇ htaˇ, kaˇ teˇ kaˇ ngaˬ hui ve kaˇ htaꞈ ca htiˬ la ve yoˬ. Teˇ gʼaˇ kaꞈ maˇ naˬ ve daꞈ jaˇ. Oˇ teˇ hkui ngaˬ hui teꞈ chiˉ te tuˬ maˇ shiˍ. Ngaˬ hui kaˇ hkʼaw tawˆ la leh yaꞈ kʼaw jaˇ lo huˉ taˍ ve yoˬ. Hkʼaˬ hkʼe te tuˬ naˍ kaꞈ maˇ shiˍ. Leh awˬ nu ve kaˇ teˇ kaˇ ca gʼawꞈ tawˍ la ve htaꞈ ngaˬ hui mawˬ  ve yoˬ. Ngaˬ hui htaꞈ naˬ tuˬ ve maˇ gʼa heuˆ la tuˬ, kaˇ hkʼaw chehˇ ve chaw yawˇ hui geh laˬ tuˬ laꞈ mehˆ meuˬ laˇ ve yoˬ. Oˇ ve teˇ gʼaˇ kaꞈ hpawnˬ daꞈ lonˉ hkʼaw kʼawꞈ la ve awˬ viˉ awˬ nyi hpehꞈ ve yoˬ. Leh ngaˬ hui htaꞈ ga laˇ ve yawˇ teˇ gʼaˇ tiˉ maˇ heˆ. Suˬ˗isa˗lehˇ mvuhˇ miˬ lo laˬ ve awˬ tan te ve chaw 5 gʼaˇ kaꞈ kaˇ jehˇ leh ngaˬ hui geh laˬ ve yoˬ. Awˬ viˉ awˬ nyi yaˇ miˇ ngaˬ leh yaˇ htaꞈ kʼuˉ laˇ ve yoˬ. Ngaˬ ha lehˬ jaˇ. Chi oˇ teˇ hkui ngaˬ loˍ jaˇ ve awˬ ceuˬ hpehꞈ ve yoˬ. Teꞈ chiˉ maˇ heˆ˗o, taˇ dawˇ haˍ tehꞈ kʼoˆ piˇ ve htawˇ, yawˇ hui ngaˬ geh chehˇ taˍ laˇ sheˍ. Naˆ tsuhˇ yehˬ lo ve kaˇ laˬ˗oˬ ve htawˇ, yawˇ hui maˇ kʼai sheˍ. Hpehꞈ la ve teˇ ceuˬ le le Yaˬhoˉvaˬ ngaˬ htaꞈ haꞈ jaˇ ve tehꞈ mawˬ ve yoˬ. Awˬ lawn chi ve ngaˬ awˬ viˉ awˬ nyi htaꞈ haꞈ maˇ la tuˬ te laˇ ve yoˬ. Ngaˬ Yaˬhoˉvaˬ htaꞈ haꞈ leh awˬ bon uiˍ jaˇ kʼoˆ piˇ gaˇ tuˬ te laˇ ve yoˬ.” Nawˬ ga laˇ tuˬ loˍ ve leh, awˬ viˉ awˬ nyi nawˬ htaꞈ ga laˇ ve leh, haꞈ pehnˇ ve hpeuꞈ mawˬ laˇ ve hkʼaˬ hkʼe htaˇ le, nawˬ tawnˇ gʼa˗aw laˇ?

16. Aˬ htoꞈ ma te ngaˬ hui teˇ gʼaˇ leh teˇ gʼaˇ haꞈ daꞈ cawˇ ve le?

¹⁶ Ngaˬ hui teˇ gʼaˇ leh teˇ gʼaˇ haꞈ daꞈ ve kʼo, aˬ htoꞈ ma awˬ bon cawˬ ve le? Awˬ viˉ awˬ nyi shoꞈ shaꞈ ve gʼa hpuˇ htaˇ, ngaˬ hui awˬ gʼaˇ piˇ gʼa ve yoˬ. Leh awˬ viˉ awˬ nyi teˇ moˍ tiˉ hpehꞈ tuˬ ngaˬ hui ga piˇ gʼa ve yoˬ. Chi hkʼoˆ kaꞈ, ngaˬ hui Yeˍsuˆ ve awˬ laꞈ gʼawˇ hpehꞈ ve tehꞈ hpeuꞈ maw piˇ ve yoˬ. Chi lehˬ nyi ma nuˇ nehˬ ve chaw Yaˬhoˉvaˬ htaꞈ oˉ kʼoˍ pui la gaˇ tuˬ ngaˬ hui ga piˇ gʼa ve yoˬ. Leh a yeˇ uiˍ jaˇ ve lehˬ ngaˬ hui Yaˬhoˉvaˬ htaꞈ chiˇ mvuh ve yoˬ. “Yawˇ lehˬ ha kʼaˉ pui ve Awˬ pa hpehꞈ leh, dawˇ sha gaˇ sha tuˬ hkʼa peu˗eˬ piˇ shehˍ hpaˇ Gʼuiˬ sha hpehꞈ ve yoˬ.” (2 Kawˇrenˍhtuˆ 1:3) Ngaˬ hui teˇ gʼaˇ le le hkʼa dehꞈ haꞈ daꞈ tuˬ coˇ caˇ sheˍ!