1. Chaw teˇ hpaˍ hpaˍ kʼo Daˍviˆ hkʼa shuˍ aˬ htoꞈ ma na ve le?

 Ngaˬ hui a shaꞈ teꞈ hkʼaˇ gawˬ lehˍ ve leh ha lehˬ ve cawˬ gaˇ ve yoˬ. Dawˇ haˍ ve htaꞈ teˇ gʼaˇ kaꞈ maˇ dawˇ cawˇ taˬ. Yaꞈ hkʼaˇ, chi beuꞈ teˇ co˗e dawˇ haˍ ve leh shoꞈ shaꞈ ve gʼa hpuˇ tuˬ te laˇ ve yoˬ. Chi htaꞈ pa taw, jawˇ mawˇ Daˍviˆ “ngaˬ hkʼaˬ maw maw gʼa tuꞈ hkanˍ chehˇ tuˬ sheˍ ve le?” tehꞈ Yaˬhoˉvaˬ htaꞈ na ve hkʼe, Yaˬhoˉvaˬ ve kanˉ te ve chaw teˇ hpaˍ kaꞈ hkʼa shuˍ na ve yoˬ.—Chiˇ mvuh ve 13:2.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Ngaˬ hui maˇ dawˇ haˍ ve hpehꞈ kʼai maˇ gʼa. Yaꞈ hkʼaˇ, ngaˬ hui chi ma maˇ gʼa dawˇ haˍ tuˬ, te gʼa ve teˇ ceuˬ ceuˬ cawˬ ve yoˬ. Awˉ lawˉ htaˇ ngaˬ hui dawˇ haˍ tuˬ aˬ htoꞈ ma te laˇ gʼa ve teˇ geh nyi sheˍ. Ngaˬ hui shoꞈ shaꞈ ve gʼa hpuˇ htaˇ, nyi ma gawˬ lehˍ cawˬ gʼa tuˬ ga laˇ gʼa ve, awˬ hkʼaˇ 6 hkʼaˇ htaꞈ teˇ geh nyi sheˍ.

3. Ngaˬ hui htaꞈ dawˇ haˍ tuˬ te laˇ gʼa ve aˬ htoꞈ ma cawˬ ve le? Leh ngaˬ hui chi ve teˇ hpaˍ htaꞈ hkʼaˬ hkʼe taw gu gʼa ve le?

³ Ngaˬ hui htaꞈ dawˇ haˍ tuˬ te laˇ ve laiˉ ceuˬ cawˬ ve yoˬ. Teˇ ceuˬ ceuˬ kʼo, ngaˬ hui gu gʼa ve yoˬ. Yaꞈ hkʼaˇ, teˇ ceuˬ ceuˬ kʼo, ngaˬ hui gu maˇ gʼa. Tawˇ pa haˉ te kʼo, teˇ hkʼawꞈ le le caˇ tuˬ dawˬ tuˬ maˇ heˆ leh veuꞈ kʼaˇ leh yehˬ ngaˍ ve hkʼaˬ hkʼe hpehꞈ tuˬ ngaˬ hui gu maˇ gʼa. Leh kanˉ teˇ geh te ve, liꞈ teˇ geh henˇ ve, ngaˬ hui ka tiꞈ maˇ yeˬ tuˬ leh pehꞈ ve tzuhˆ ve maˇ te yaꞈ tuˬ, maˇ nyiˉ laˇ tcuh tuˬ kaꞈ gu maˇ gʼa. Leh ngaˬ hui yehˬ teˇ taw lo mawˇ maˇ hkʼawˇ la tuˬ  kaꞈ tawˍ piˇ maˇ gʼa. Maˇ˗awˍ ve chaw Gʼuiˬ sha ve awˬ liˇ awˬ hkʼaˇ htaꞈ maˇ gʼaꞈ te ve pa taw, chi hkʼe ve awˬ lawn htaꞈ ngaˬ hui gʼa hpuˇ ve yoˬ. Chi hkʼoˆ kaꞈ, miˬ guiˬ ve gʼuiˬ sha Saˍtanˍ lehˬ, chaw teˇ hpaˍ “chi miˬ guiˬ ve dawˇ haˍ tuˬ” htaꞈ gʼa hpuˇ ve pa taw Yaˬhoˉvaˬ ve kanˉ maˇ te gʼa tuˬ yawˇ shiˍ ve yoˬ. (Maꞈhtehˍ 13:22; 1 Yoˇhanˬ 5:19) Miˬ guiˬ chi hkʼoˆ lo shoꞈ shaꞈ ve cawˬ maˇ jaˇ ve pa taw chaw yaˇ htaꞈ dawˇ haˍ tuˬ te piˇ ve anˇ tuˬ maˇ loˍ.

4. Ngaˬ hui shoꞈ shaꞈ ve gʼa hpuˇ jaˇ htaˇ hkʼaˬ hkʼe te tuˬ le?

⁴ Ngaˬ hui shoꞈ shaꞈ ve gʼa hpuˇ jaˇ htaˇ, dawˇ haˍ dawˇ hkiˉ ve htaꞈ tiˉ dawˇ nyi chehˇ ve yoˬ. Tawˇ pa haˉ te kʼo, ngaˬ hui hpu ca leh maˇ yehˇ lawꞈ la ve htaꞈ dawˇ haˍ ve yoˬ. Ngaˬ hui naˬ jaˇ la htaˇ, kanˉ te maˇ gʼa la ve htaꞈ kaꞈ dawˇ haˍ ve yoˬ. Chi hkʼe gʼa hpuˇ htaˇ hkʼaˬ hkʼe te tuˬ le? Ngaˬ hui beˬ ve lawˇ ve gʼa hpuˇ htaˇ, Gʼuiˬ sha ve awˬ liˇ awˬ hkʼaˇ htaꞈ te yaꞈ la ve htaꞈ dawˇ haˍ ve yoˬ. Chi hkʼoˆ kaꞈ, maˇ maw ve awˬ yanˇ Saˍtanˍ yawˇ ve chaw Gʼuiˬ sha ve chaw htaꞈ ca te luˬ la tcuh tuˬ yoˬ. Chi hkʼe gʼa hpuˇ htaˇ, ngaˬ hui hkʼaˬ hkʼe te tuˬ dawˇ haˍ ve yoˬ. ‘Ngaˬ hui chi hkʼe dawˇ ve lehˬ yaꞈ˗aw laˇ’ tehꞈ htawˇ dawˇ nawˬ dawˇ cawˬ ve yoˬ.

5. Yeˍsuˆ “taˇ dawˇ hkiˉ” tehꞈ kʼoˆ piˇ ve hkʼaˬ hkʼe kʼoˆ gaˇ ve le?

⁵ Yeˍsuˆ awˬ laꞈ gʼawˇ htaꞈ “taˇ dawˇ hkiˉ” tehꞈ kʼoˆ piˇ ve ngaˬ hui shiˍ ve yoˬ. (Maꞈhtehˍ 6:25) Yeˍsuˆ kʼoˆ ve, ngaˬ hui teꞈ chiˉ maˇ gʼa dawˇ haˍ˗o ve htaꞈ kʼoˆ gaˇ ve laˇ? Chi hkʼe maˇ heˆ. Oˇ htaˇ Yaˬhoˉvaˬ ve kanˉ te ve chaw laiˉ gʼaˇ kaꞈ dawˇ haˍ jaw ve yoˬ. Yaꞈ hkʼaˇ, Yaˬhoˉvaˬ yawˇ hui htaꞈ nyi hkʼaˇ suh jaˇ. * (1 Jawˇmawˇ 19:4; Chiˇ mvuh ve 6:3) Ngaˬ hui dawˇ haˍ jaˇ leh Yaˬhoˉvaˬ ve kanˉ a shaꞈ teꞈ kuiˬ hkʼaw a yeˇ uiˍ jaˇ ve tehꞈ maˇ shawˍ tuˬ Yeˍsuˆ ngaˬ hui htaꞈ maˇ te tcuh gaˇ. Hkʼe kʼo, ngaˬ hui dawˇ haˍ htaˇ hkʼaˬ hkʼe te cawˇ ve le?—Awˇ ceˍ awˇ fa “ Ngaˬ hui hkʼaˬ hkʼe te tuˬ le?” htaꞈ nyi sheˍ.

6. Hpiˇliˇpiˆ liꞈ 4:6, 7 hkʼaw kʼoˆ taˍ ve hkʼe, ngaˬ hui nyi ma gawˬ lehˍ cawˬ tuˬ aˬ htoꞈ ma ga laˇ ve le?

⁶ (1) Hkʼaˬ htaˆ kaꞈ bon lawˬ sheˍ. Nawˬ teˇ ceuˬ ceuˬ htaꞈ dawˇ haˍ ve kʼo, Yaˬhoˉvaˬ ga laˇ tuˬ bon lawˬ gʼa ve yoˬ. (1 Peˍtruˆ 5:7) “Gʼuiˬ sha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve teˇ ceuˬ” Yaˬhoˉvaˬ nawˬ ve bon lawˬ hkawˇ htaꞈ hkʼawꞈ laˇ tuˬ yoˬ. (Hpiˇliˇpiˆ 4:6, 7 gʼaw sheˍ.) Ngaˬ hui nyi ma gawˬ lehˍ cawˬ tuˬ Yaˬhoˉvaˬ daꞈ kehˬ ve awˬ ha hpu peꞈ laˇ tuˬ yoˬ.—Gaˍlaˍtiˆ 5:22.

7. Ngaˬ hui bon hkʼaˬ hkʼe lawˬ cawˇ ve le?

⁷ Nawˬ bon lawˬ htaˇ, nyi ma hkʼaw cawˬ ve Yaˬhoˉvaˬ htaꞈ kʼoˆ piˇ sheˍ. Nawˬ shoꞈ shaꞈ ve gʼa hpuˇ leh hkʼaˬ hkʼe dawˇ ve kaꞈ kʼoˆ piˇ sheˍ. Nawˬ shoꞈ shaꞈ ve gʼa hpuˇ ve gu gʼa tuˬ awˬ hkʼaˇ cawˬ sheˍ ve kʼo, hkʼaˬ hkʼe te gu tuˬ ve shiˍ tuˬ kaꞈ Gʼuiˬ sha geh cuˇ yiˍ lawˬ sheˍ. Leh chi ve htaꞈ nawˬ gʼaꞈ te gʼa tuˬ, Gʼuiˬ sha geh awˬ gʼaˇ lawˬ sheˍ. Nawˬ gʼa hpuˇ ve gu maˇ gʼa ve kʼo, maˇ dawˇ haˍ jaˇ tuˬ Yaˬhoˉvaˬ ga laˇ tuˬ lawˬ sheˍ. Nawˬ gʼa hpuˇ ve Yaˬhoˉvaˬ htaꞈ hteˇ˗ehꞈ kʼoˆ piˇ leh bon lawˬ ve kʼo, yawˇ nawˬ ve bon lawˬ hkawˇ htaꞈ hkʼawꞈ laˇ ve, nawˬ hkʼa tawˍ lehˆ mawˬ tuˬ yoˬ. Yaꞈ hkʼaˇ, nawˬ ve bon lawˬ hkawˇ htaꞈ Yaˬhoˉvaˬ laꞈ haˉ maˇ hkʼawꞈ laˇ ve kʼo, awˬ gʼaˇ taˇ nuˇ. Yaˬhoˉvaˬ nawˬ htaꞈ yawˇ geh bon lawˬ tcuh gaˇ ve ceh maˇ heˆ. Hkʼaˬ htaˆ kaꞈ lawˬ tcuh gaˇ ve yoˬ.—Luˉkaꞈ 11:8-10.

8. Ngaˬ hui bon lawˬ htaˇ aˬ htoꞈ ma htaꞈ kʼawꞈ kʼoˆ cawˇ ve le?

⁸ Nawˬ dawˇ haˍ ve Yaˬhoˉvaˬ htaꞈ kʼoˆ maˍ piˇ htaˇ, awˬ bon uiˍ jaˇ kʼoˆ piˇ sheˍ. Chi teˇ hkui nawˬ shoꞈ shaꞈ ve gʼa hpuˇ chehˇ ve htawˇ, nawˬ a shaꞈ teꞈ kuiˬ hkʼaw daꞈ ve awˬ ceuˬ htaꞈ dawˇ nyi ve kʼo daꞈ ve yoˬ. Nawˬ Yaˬhoˉvaˬ htaꞈ hkʼaˬ hkʼe kʼoˆ piˇ tuˬ maˇ shiˍ ve kʼo, ‘Yaˬhoˉvaˬ˗oˬ ngaˬ htaꞈ ga laˇ˗oˆ!’ kʼoˆ piˇ ve ceh kaꞈ lawꞈ ve yoˬ. Yawˇ nawˬ ve bon lawˬ hkawˇ htaꞈ hkʼawꞈ laˇ tuˬ yoˬ tehꞈ yonˍ gʼa ve yoˬ.—2 Raˍsaˍvanˍ 18:31; Roˉmaꞈ 8:26.

9. Ngaˬ hui kawˆ htaˇ hkʼaˬ hkʼe gʼa te cawˇ ve le?

⁹ (2) Nawˬ ve cuˇ yiˍ htaꞈ maˇ heˆ. Yaˬhoˉvaˬ ve  cuˇ yiˍ htaꞈ gʼaˇ va sheˍ. Aˬ laˬ hkʼe 800 hkʼawꞈ Yeˍsuˆ maˇ laˬ sheˍ htaˇ, (B.C.E.), Yuˇdaꞈ chaw lehˬ Aˍsuˇriˆ chaw hui ca bawˆ la leh awˬ ceˬ gʼa te la ve htaꞈ yawˇ hui kawˆ ve yoˬ. Hkʼe te leh, Yuˇdaꞈ chaw Eˇjiˇtuꞈ chaw ga laˇ tuˬ lawˬ ve yoˬ. (Iˉsaˍyaˆ 30:1, 2) Yaꞈ hkʼaˇ, yawˇ hui chi hkʼe te ve kʼo, maˇ gʼaˇ taˬ tehꞈ Yaˬhoˉvaˬ shaˍ tiꞈ piˇ ve yoˬ. (Iˉsaˍyaˆ 30:7, 12, 13) Yawˇ hui kawˆ htaˇ hkʼaˬ hkʼe gʼa te tuˬ ve, Yaˬhoˉvaˬ Iˉsaˍyaˆ htaꞈ cuˇ leh yawˇ hui htaꞈ kʼoˆ piˇ tcuh ve yoˬ. Yaˬhoˉvaˬ kʼoˆ ve, “ngaˬ htaꞈ gʼaˇ ca kʼawꞈ va la˗o. Oˇ hkʼe te ve kʼo, nawˬ hui awˬ gʼaˇ kʼawꞈ cawˬ la leh, gawˬ lehˍ gʼa chehˇ tuˬ yoˬ.”—Iˉsaˍyaˆ 30:15.

10. Ngaˬ hui Yaˬhoˉvaˬ htaꞈ gʼaˇ va ve tehꞈ hkʼaˬ hkʼe htaˇ hpeuꞈ maw piˇ cawˇ ve le?

¹⁰ Ngaˬ hui Yaˬhoˉvaˬ htaꞈ gʼaˇ va ve tehꞈ hpeuꞈ maw piˇ ve laiˉ hkʼaˇ cawˬ ve yoˬ. Tawˇ pa haˉ te kʼo, nawˬ hpu gʼa maˇ jaˇ tuˬ kanˉ gʼa te ve kʼo, nawˬ kanˉ gʼa te maˇ leh Yaˬhoˉvaˬ ve kanˉ nawˬ te jaw ve hkʼe maˇ gʼa te ve kʼo, hkʼaˬ hkʼe te tuˬ ve le? Maˇ heˆ leh kanˉ te kuiˬ lo ve chaw nawˬ htaꞈ dawˇ cawˇ leh yawˇ Shaˉhkiˆhkanˍ ve chaw maˇ hpehꞈ ve kʼo, nawˬ hkʼaˬ hkʼe te tuˬ le? Leh yehˬ kʼa hkʼaw ve chaw, nawˬ htaꞈ yehˬ kʼa maˇ heˆ leh Yaˬhoˉvaˬ htaꞈ leuˆ tcuh laˇ ve kʼo nawˬ hkʼaˬ hkʼe te tuˬ le? Chi hkʼe gʼa hpuˇ htaˇ, nawˬ dawˇ cheˆ tuˬ haˍ ve yoˬ hehˉ. Yaꞈ hkʼaˇ, Yaˬhoˉvaˬ nawˬ htaꞈ beˆ maˍ laˇ tuˬ yoˬ. (Maꞈhtehˍ 6:33; 10:37; 1 Kawˇrenˍhtuˆ 7:39) Na hkawˇ lehˬ, nawˬ Yaˬhoˉvaˬ htaꞈ gʼaˇ va leh yawˇ beˆ maˍ laˇ ve htaꞈ hkʼa dehꞈ gʼaꞈ te tuˬ laˇ?

11. Ngaˬ hui tawˍ ve tsuhˇ ve gʼa hpuˇ htaˇ, nyi ma gawˬ lehˍ cawˬ gʼa tuˬ aˬ htoꞈ ma ve awˬ lawn henˇ gʼa ve le?

¹¹ (3) Daꞈ ve awˬ lawn leh maˇ daꞈ ve awˬ lawn kaꞈ maˍ laˇ gʼa sheˍ. Nyi ma gawˬ lehˍ cawˬ leh Yaˬhoˉvaˬ htaꞈ gʼaˇ va ve a yeˇ uiˍ jaˇ ve tehꞈ, Liꞈ hpu hkʼaw laiˉ lawn cawˬ ve yoˬ. Awˬ lawn chi htaꞈ nawˬ henˇ htaˇ, Yaˬhoˉvaˬ ve kanˉ te ve chaw tawˍ ve tsuhˇ ve gʼa hpuˇ maˇ jaˇ htaˇ, yawˇ hui nyi ma gawˬ lehˍ cawˬ gʼa tuˬ aˬ htoꞈ ma ga piˇ ve chaˬ nyi sheˍ. Tawˇ pa haˉ te kʼo, Yuˇdaꞈ chaw ve shaˉ nanˉ lonˉ tcuh yaˇ hui htaꞈ bon maˇ maˍ toˇ tcuh htaˇ, yawˇ hui maˇ kawˆ. Yawˇ hui haꞈ hanˉ ve hkʼaw kʼoˆ ve, “chaw yaˇ ve tawˇ hkawˇ aꞈ kehˉ Gʼuiˬ sha ve tawˇ hkawˇ htaꞈ ngaˬ hui gʼa na yuˬ ve yoˬ.” (Tcuh yaˇ 5:29) Yawˇ hui htaꞈ jawꞈ piˇ ve htawˇ maˇ kawˆ. Aˬ htoꞈ ma pa taw le? Awˬ lawn kʼo, Yaˬhoˉvaˬ yawˇ hui geh chehˇ leh yawˇ hui htaꞈ nyi hkʼaˇ suh jaˇ ve tehꞈ shiˍ ve pa taw yawˇ hui bon maˍ tcuhˉ taˍ ve yoˬ. (Tcuh yaˇ 5:40-42) Saˍteˍhpanˍ kaꞈ hkʼa shuˍ, yawˇ htaꞈ shu tiˇ pehˍ˗a te htaˇ kaꞈ nyi ma gawˬ lehˍ cawˬ leh, yawˇ ve mehˆ hpfuhˇ mvuhˇ naw ma tcuh yaˇ htaꞈ shuˍ ve tehꞈ, awˬ nu ve chaw gʼa mawˬ ve yoˬ. (Tcuh yaˇ 6:12-15) Aˬ htoꞈ ma te yawˇ nyi ma gawˬ lehˍ cawˬ ve le? Awˬ lawn kʼo, Yaˬhoˉvaˬ yawˇ htaꞈ nyi hkʼaˇ suh ve tehꞈ yonˍ gʼa ve yoˬ.

12. 1 Peˍtruˆ liꞈ 3:14 leh 4:14 hkʼaw kʼoˆ taˍ ve hkʼe, ngaˬ hui fawˉ mehˍ ve gʼa hpuˇ ve htawˇ, aˬ htoꞈ ma te ha lehˬ gʼa ve le?

¹² Yaˬhoˉvaˬ yawˇ hui geh chehˇ ve tehꞈ tcuh yaˇ hui yonˍ ve yoˬ. Awˬ lawn kʼo, yawˇ hui Gʼuiˬ sha geh kanˇ paˆ gʼa leh anˇ tuˬ te gʼa ve yoˬ. (Tcuh yaˇ 5:12-16; 6:8) Yaˬhoˉvaˬ ngaˬ hui htaꞈ chi hkʼe maˇ te laˇ ve htawˇ, Liꞈ hpu hkʼaw kʼoˆ ve, ngaˬ hui cawˇ ve htaꞈ te leh gʼa tuꞈ gʼa hkanˍ htaˇ, Gʼuiˬ sha ngaˬ hui htaꞈ nyi hkʼaˇ suh ve yoˬ. (1 Peˍtruˆ 3:14; 4:14 gʼaw sheˍ.) Awˬ gʼuˇ suhˍ hpawˇ ngaˬ hui fawˉ mehˍ ve gʼa hpuˇ htaˇ, hkʼaˬ hkʼe te cawˇ ve htaꞈ dawˇ haˍ ve aꞈ kehˉ, chi teˇ hkui te gʼa ve awˬ ceuˬ htaꞈ te leh Yaˬhoˉvaˬ ga laˇ leh nyi haꞈ shaˉ laˇ gʼa ve tehꞈ ngaˬ hui yonˍ ve yoˬ. Yeˍsuˆ ve ka tiꞈ htaꞈ oˇ htaˇ ve awˬ laꞈ gʼawˇ hkʼe, ngaˬ hui kaꞈ gʼaˇ va cawˇ ve yoˬ. Yeˍsuˆ ka tiꞈ te taˍ laˇ ve, “nawˬ hui ve canˇ paˍ hkʼa peu˗eˬ gʼawˬ hkʼaˆ maˇ gʼa leh tawˍ taˍ maˇ gʼa ve tawˇ hkawˇ leh cuˇ yiˍ maˍ yiˍ ngaˬ nawˬ hui htaꞈ peꞈ laˇ tuˬ yoˬ.” Leh Yeˍsuˆ ngaˬ hui htaꞈ kʼoˆ laˇ ve, ‘nawˬ nyi ma yeˬ puiˉ ve pa taw, a shaꞈ gʼa teꞈ tuˬ yoˬ.’ (Luˉkaꞈ 21:12-19) Yaˬhoˉvaˬ ve kanˉ ka tiꞈ yeˬ ve hkʼaw te leh suh˗oˬ ve chaw, Yaˬhoˉvaˬ yawˇ hui ve awˬ lawn hkʼa peu˗eˬ htaꞈ tawnˇ gʼa ve tehꞈ taˇ leunˇ. Chi htaꞈ pa taw, nawˬ aˬ htoꞈ ma  gʼa hpuˇ ve htawˇ, Yaˬhoˉvaˬ nawˬ htaꞈ kʼawꞈ teꞈ tu la tcuh laˇ tuˬ yoˬ.

13. Nyi ma gawˬ lehˍ maˇ cawˬ leh Yaˬhoˉvaˬ htaꞈ gʼaˇ maˇ va ve chaw ve awˬ lawn henˇ htaˇ, ngaˬ hui htaꞈ aˬ htoꞈ ma maˍ laˇ gʼa ve le?

¹³ Nyi ma gawˬ lehˍ maˇ cawˬ leh Yaˬhoˉvaˬ htaꞈ gʼaˇ maˇ va ve chaw ve awˬ lawn kaꞈ ngaˬ hui htaꞈ maˍ laˇ gʼa ve yoˬ. Yawˇ hui ve awˬ lawn lehˬ ngaˬ hui maˇ gʼa te yaꞈ tuˬ ga laˇ ve yoˬ. Tawˇ pa haˉ te kʼo, Yuˇdaꞈ ve jawˇ mawˇ Aˍsaˍ tanˬ uˉ peunˍ htaˇ, maꞈ moˍ lonˉ yawˇ hui htaꞈ ca bawˆ la ve yoˬ. Yaꞈ hkʼaˇ, yawˇ Yaˬhoˉvaˬ htaꞈ gʼaˇ va ve pa taw maꞈ moˍ oˇ ve htaꞈ gʼaˇ ve yoˬ. (2 Raˍsaˍvanˍ 14:9-12) Iˉsaˍreˍlaˆ mvuhˇ miˬ htaꞈ uˉ peunˍ ve jawˇ mawˇ Baˍshaˍ ve maꞈ moˍ i ve htaꞈ jawˇ mawˇ Aˍsaˍ gʼa mawˬ htaˇ, yawˇ Yaˬhoˉvaˬ htaꞈ oˇ htaˇ hkʼe leˇ gʼaˇ maˇ va. Yaꞈ hkʼaˇ, Suˇriˆ ve maꞈ moˍ htaꞈ gʼaˇ va ve yoˬ. (2 Raˍsaˍvanˍ 16:1-3) Yawˇ a shaꞈ maˇ leh naˬ jaˇ htaˇ kaꞈ Yaˬhoˉvaˬ htaꞈ gʼaˇ maˇ va.—2 Raˍsaˍvanˍ 16:12.

14. Jawˇmawˇ Aˍsaˍ te yaꞈ ve ngaˬ hui htaꞈ hkʼaˬ hkʼe maˍ laˇ gʼa ve le?

¹⁴ Awˉ lawˉ htaˇ Jawˇmawˇ Aˍsaˍ shoꞈ shaꞈ ve gʼa hpuˇ htaˇ, Yaˬhoˉvaˬ htaꞈ gʼaˇ va ve yoˬ. Ponˬ kʼai ve awˬ yanˇ, yawˇ shoꞈ shaꞈ ve gʼa hpuˇ htaˇ, Yaˬhoˉvaˬ ga laˇ tuˬ yawˇ maˇ lawˬ leh yawˇ hkʼaˇ yawˇ gu ve yoˬ. Aˍsaˍ Suˇriˆ maꞈ moˍ ga laˇ tuˬ lawˬ ve lehˬ nyi˗a kʼo daꞈ ve yoˬ. Yaꞈ hkʼaˇ, hkʼaˬ htaˆ kaꞈ ga piˇ maˇ gʼa. Yaˬhoˉvaˬ tcuh kaˍ paˍ htaꞈ cuˇ leh Aˍsaˍ htaꞈ ca kʼoˆ piˇ tcuh ve, ‘nawˬ lehˬ, Gʼuiˬ sha htaꞈ gʼaˇ maˇ va leh Suˇriˆ jawˇ mawˇ htaꞈ gʼaˇ va ve pa taw, yawˇ hui htaꞈ maˇ gʼaˇ.’ (2 Raˍsaˍvanˍ 16:7) Ngaˬ hui a shu yawˇ awˬ to htaꞈ gʼaˇ maˇ va jaˇ tuˬ shaˍ tiꞈ gʼa te ve yoˬ. Awˬ lawn kʼo, ngaˬ hui shoꞈ shaꞈ ve teˇ ceuˬ le le a shu yawˇ hkʼaˇ yawˇ gu gʼa ve tehꞈ dawˇ leh Liꞈ hpu hkʼaw Yaˬhoˉvaˬ beˆ maˍ laˇ ve htaꞈ gʼaˇ maˇ va la ve yoˬ. Ngaˬ hui teˇ ceuˬ ceuˬ gʼa hpuˇ leh laꞈ haˉ gʼa dawˇ cheˆ htaˇ, nyi ma gawˬ lehˍ te leh Yaˬhoˉvaˬ htaꞈ gʼaˇ va ve lehˬ, ngaˬ hui cawˇ ve htaꞈ dawˇ cheˆ gʼa tuˬ yawˇ ga laˇ tuˬ yoˬ.

15. Ngaˬ hui Liꞈ hpu gʼaw htaˇ hkʼaˬ hkʼe te cawˇ ve le?

¹⁵ (4) Liꞈ hpu awˬ tawn tawnˇ taˍ sheˍ. Nyi ma gawˬ lehˍ te leh Yaˬhoˉvaˬ htaꞈ gʼaˇ va ve Liꞈ hpu awˬ tawn htaꞈ caˉ daꞈ ve nawˬ gʼa mawˬ htaˇ, Liꞈ hpu awˬ tawn chi ve teˇ hpaˍ nawˬ tawnˇ gʼa tuˬ tawnˇ taˍ sheˍ. Nawˬ Liꞈ hpu awˬ tawn chi ve teˇ hpaˍ tawnˇ gʼa ve maˇ heˆ leh bvuhꞈ keu leh hkʼaˬ htaˆ kaꞈ gʼaw sheˍ. Yaˬhoˉvaˬ Yawˇsuˆ htaꞈ kʼoˆ piˇ ve, nawˬ cuˇ yiˍ cawˬ ve hkʼaw dawˇ cheˆ gʼa gaˇ ve kʼo, Liꞈ hpu hkʼaw ve awˬ liˇ tawˇ hkawˇ hkʼaˬ htaˆ kaꞈ gʼa gʼaw tawˆ ve yoˬ. Yawˇ gʼaw ve awˬ ceuˬ shoꞈ shaꞈ ve gʼa hpuˇ htaˇ, tawˍ daꞈ ve htaꞈ maˇ kawˆ tuˬ ga piˇ ve yoˬ. (Yawˇsuˆ 1:8, 9) Nawˬ kawˆ ve leh dawˇ haˍ ve gʼa hpuˇ htaˇ, nawˬ gʼaw ve Liꞈ hpu awˬ tawn kaꞈ nawˬ nyi ma gawˬ lehˍ cawˬ tuˬ ga laˇ gʼa ve yoˬ.—Chiˇ mvuh ve 27:1-3; Tawˇ naˉ ve 3:25, 26.

16. Ngaˬ hui nyi ma gawˬ lehˍ cawˬ leh Yaˬhoˉvaˬ htaꞈ gʼaˇ va tuˬ, yawˇ Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ hkʼaˬ hkʼe yehˇ ve le?

¹⁶ (5) Awˬ viˉ awˬ nyi geh awˬ chawˇ te sheˍ. Ngaˬ hui nyi ma gawˬ lehˍ cawˬ leh Yaˬhoˉvaˬ htaꞈ gʼaˇ va tuˬ yawˇ Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ yehˇ ve yoˬ. Ngaˬ hui hpawnˬ daꞈ˗e htaˇ, bon maˍ hkawˇ leh awˬ vuiˬ te ve teˇ hpaˍ leh awˬ viˉ awˬ nyi hkʼawꞈ ve htaꞈ kaꞈ awˬ bon gʼa ve yoˬ. Chi hkʼoˆ kaꞈ, awˬ viˉ awˬ nyi geh tawˇ gʼa yaw daꞈ htaˇ, ngaˬ hui kaꞈ awˬ gʼaˇ kʼawꞈ gʼa ve yoˬ. (Heˍbrehˇ 10:24, 25) Ngaˬ hui dawˇ haˍ ve awˬ ceuˬ awˬ chawˇ meuˆ daꞈ ve geh kʼoˆ maˍ piˇ htaˇ, nyi ma sha la ve yoˬ. “Na sha ve tawˇ” awˬ chawˇ geh gʼa ve lehˬ, ngaˬ hui maˇ dawˇ haˍ jaˇ tuˬ leh awˬ gʼaˇ gʼa tuˬ ga laˇ ve yoˬ.—Tawˇ naˉ ve 12:25.

17. Heˍbrehˇ liꞈ 6:19 hkʼaw kʼoˆ taˍ ve hkʼe, ngaˬ hui tuꞈ ve hkanˍ ve gʼa hpuˇ htaˇ, Gʼuiˬ sha ve mvuhˇ miˬ dawˇ law kuiˬ lehˬ, nyi ma gawˬ lehˍ cawˬ tuˬ hkʼaˬ hkʼe ga laˇ gʼa ve le?

¹⁷ (6) Nawˬ ve dawˇ law kuiˬ htaꞈ hkʼa tawˍ lehˆ mawˬ tcuh sheˍ. Ngaˬ hui tuꞈ ve hkanˍ ve gʼa hpuˇ leh dawˇ haˍ htaˇ, Gʼuiˬ sha ve mvuhˇ miˬ dawˇ law kuiˬ lehˬ, “maˇ jiˆ kʼai puiˉ ve sho kʼuˉ kʼawehꞈ hkʼe hpehꞈ” leh ngaˬ hui nyi ma gawˬ lehˍ cawˬ  tuˬ ga laˇ gʼa ve yoˬ. (Heˍbrehˇ 6:19 gʼaw sheˍ.) Yaˬhoˉvaˬ ka tiꞈ te taˍ laˇ ve htaꞈ nawˬ dawˇ nyi ve kʼo, nawˬ ve dawˇ law kuiˬ htaꞈ hkʼa tawˍ lehˆ mawˬ tuˬ yoˬ. Oˇ ve teˇ yanˇ nawˬ dawˇ haˍ ve maˇ cawˬ˗o. (Iˉsaˍyaˆ 65:17) Nawˬ miˬ guiˬ awˬ suhˉ hkʼaw dawˇ sha gawˬ lehˍ ve htaꞈ dawˇ mawˬ ve kʼo, oˇ ve teˇ yanˇ nawˬ dawˇ haˍ tuˬ te laˇ ve maˇ daꞈ ve maˇ cawˬ˗o. (Miˆhkaˍ 4:4) Chi hkʼoˆ kaꞈ, shu awˬ laꞈ gʼawˇ hpehꞈ la tuˬ nawˬ hto toˇ ve leh maˍ ve htaꞈ te sheˍ. Chi nawˬ te˗oˬ htaˇ, ‘nawˬ dawˇ law taˍ ve awˬ leh meuˇ htaˇ biˇ la tuˬ yoˬ.’—Heˍbrehˇ 6:11.

18. Awˬ gʼuˇ suhˍ hpawˇ ngaˬ hui aˬ htoꞈ ma htaꞈ gʼa hpuˇ tuˬ le? Leh ngaˬ hui hkʼaˬ hkʼe te gu gʼa tuˬ le?

¹⁸ Miˬ guiˬ chi awˬ leh meuˇ gaˬ la paˇ neˇ ve kʼo, ngaˬ hui shoꞈ shaꞈ ve gʼa hpuˇ leh dawˇ haˍ dawˇ hkiˉ tuˬ te laˇ ve yoˬ. 2021 hkʼawꞈ a yeˇ uiˍ jaˇ ve Liꞈ hpu awˬ tawn ngaˬ hui shoꞈ shaꞈ ve gu gʼa leh nyi ma gawˬ lehˍ cawˬ tuˬ ga laˇ gʼa ve yoˬ. Ngaˬ hui ve awˬ gʼaˇ htaꞈ gʼaˇ va cawˇ ve maˇ heˆ. Yaˬhoˉvaˬ htaꞈ gʼaˇ va cawˇ ve yoˬ. Chi ve teˇ hkʼawꞈ ngaˬ hui Yaˬhoˉvaˬ ka tiꞈ te taˍ ve htaꞈ gʼaˇ va ve tehꞈ hpeuꞈ maw piˇ tuˬ yoˬ. Oˇ kaˬ lo kʼoˆ ve, ‘Ngaˬ htaꞈ gʼaˇ ca va la ve kʼo, nawˬ hui awˬ gʼaˇ kʼawꞈ cawˬ la leh, gawˬ lehˍ gʼa chehˇ tuˬ yoˬ.’—Iˉsaˍyaˆ 30:15.