1. Gʼuiˬ sha haꞈ pehnˇ ve htaꞈ nawˬ hkʼaˬ hkʼe dawˇ tuˬ te laˇ ve le?

 “Gʼuiˬ sha lehˬ haꞈ pehnˇ ve teˇ ceuˬ hpehꞈ ve” tehꞈ Yoˇhanˬ bvuhꞈ ve yoˬ. (1 Yoˇhanˬ 4:8) Chi suhˉ˗ehˍ kʼoˆ ve kʼo, ngaˬ hui awˬ tehˬ ve a yeˇ uiˍ ve htaꞈ dawˇ nawˇ tuˬ te laˇ ve yoˬ. A shaꞈ Gʼuiˬ sha geh laˬ leh haꞈ pehnˇ ve kaꞈ yawˇ geh laˬ ve yoˬ. Yawˇ ngaˬ hui htaꞈ haꞈ jaˇ. Gʼuiˬ sha haꞈ pehnˇ ve htaꞈ pa taw, ngaˬ hui kawˆ tuˬ maˇ cawˬ ve, ha lehˬ ve, a shaꞈ awˬ hpfuhˇ cawˬ ve, tehꞈ dawˇ tuˬ te laˇ ve yoˬ.

2. Maꞈhtehˍ liꞈ 22:37-40 hkʼaw kʼoˆ taˍ ve hkʼe, a yeˇ uiˍ jaˇ ve awˬ liˇ tawˇ hkawˇ 2 hkawˇ aˬ htoꞈ ma le? Leh awˬ liˇ tawˇ hkawˇ 2 hkawˇ teˇ hkawˇ htaꞈ aˬ htoꞈ ma te ngaˬ hui gʼaꞈ te tuˬ haˍ jaˇ tehꞈ dawˇ ve le?

² Hkriꞈ yaˇ awˬ pon haꞈ pehnˇ ve teˇ ceuˬ lehˬ, awˬ liˇ tawˇ hkawˇ hpehꞈ ve yoˬ. Te kaꞈ hpehꞈ, maˇ te kaꞈ hpehꞈ, leuˆ yuˬ gʼa ve maˇ heˆ. (Maꞈhtehˍ 22:37-40 gʼaw sheˍ.) Ngaˬ hui Yaˬhoˉvaˬ htaꞈ hkʼa dehꞈ shiˍ daꞈ htaˇ, awˬ liˇ tawˇ hkawˇ awˉ lawˉ teˇ maˬ htaꞈ na yuˬ tuˬ sha ve yoˬ. Yaˬhoˉvaˬ lehˬ biˇ jaˇ ve Gʼuiˬ sha hpehꞈ ve pa taw yoˬ. Yawˇ nyi ma nuˇ nehˬ leh ngaˬ hui awˬ pon dawˇ nyi laˇ puiˉ jaˇ. Ngaˬ hui ve awˬ viˉ awˬ nyi maˇ biˇ ve chaw hpehꞈ ve pa taw, awˬ liˇ tawˇ hkawˇ 2 hkawˇ teˇ hkawˇ htaꞈ na yuˬ tuˬ haˍ jaˇ tehꞈ dawˇ ve yoˬ. Teˇ pawˆ pawˆ kʼo, yawˇ hui kʼoˆ ve leh te ve ngaˬ hui htaꞈ heuˆ la tuˬ maˇ dawˇ nyi laˇ? Ngaˬ hui chi hkʼe gʼa hpuˇ tuˬ Yaˬhoˉvaˬ shiˍ ve yoˬ. Hkʼe te leh, Yaˬhoˉvaˬ chaw teˇ hpaˍ hpaˍ htaꞈ yehˇ leh haꞈ pehnˇ ve teˇ ceuˬ hpeuꞈ maw piˇ tuˬ a yeˇ uiˍ ve tehꞈ, Liꞈ hpu hkʼaw bvuhꞈ tuˬ beˆ maˍ piˇ ve yoˬ. Chi ngaˬ hui hkʼaˬ hkʼe gʼaꞈ te gʼa tuˬ le? Chi htaꞈ caˉ daꞈ ve bvuhꞈ ve teˇ gʼaˇ lehˬ Yoˇhanˬ yoˬ.—1 Yoˇhanˬ 3:11, 12.

3. Haꞈ pehnˇ ve htaꞈ caˉ daꞈ ve Yoˇhanˬ hkʼaˬ hkʼe kʼoˆ ve le?

³ Yoˇhanˬ ve liꞈ hkʼaw Hkriꞈ yaˇ aˬ htoꞈ ma te haꞈ pehnˇ ve gʼa hpeuꞈ maw piˇ cawˇ ve yawˇ laiˉ pawˆ kʼoˆ ve yoˬ. Awˬ tehˬ kʼo, ha lehˬ ve bon hkawˇ liꞈ yawˇ bvuhꞈ ve lehˬ, ha lehˬ ve bon hkawˇ liꞈ  bvuhꞈ paˍ 3 gʼaˇ pawnˇ daꞈ ve aꞈ kehˉ, yawˇ “haꞈ ve” htaꞈ a ciˉ kʼoˆ maˇ ve yoˬ. Yoˇhanˬ ha lehˬ ve bon hkawˇ liꞈ leh awˬ nu ve 3 puꞈ bvuhꞈ htaˇ yawˇ aˬ laˬ hkʼe 100 hkʼawꞈ yoˬ. Chi ve hkʼaw hpeuꞈ maw laˇ ve, Hkriꞈ yaˇ te ve teˇ ceuˬ le le haꞈ pehnˇ ve geh laˬ ve yoˬ. (1 Yoˇhanˬ 4:10, 11) Yaꞈ hkʼaˇ, Yoˇhanˬ awˬ lawn chi htaꞈ na gʼa tuˬ awˬ yanˇ gʼa yehˇ maw jaˇ.

4. Yoˇhanˬ awˬ nu ve chaw htaꞈ hkʼaˬ htaˆ kaꞈ haꞈ ve tehꞈ hpeuꞈ maw piˇ˗aw laˇ?

⁴ Yoˇhanˬ yaˇ nehˬ htaˇ teˇ pawˆ pawˆ haꞈ pehnˇ ve maˇ hpeuꞈ maw piˇ. Tawˇ pa haˉ te kʼo, Yeˍsuˆ leh yawˇ ve awˬ laꞈ gʼawˇ Yeˍruˆsaˍlehnˍ venˇ lo kʼai tuˬ Saˍmaˍriˆ venˇ htaꞈ hpanˍ htaˇ, yawˇ hui htaꞈ maˇ haꞈ yuˬ piˇ ve hkʼaˆ teˇ hkʼaˆ cawˬ ve yoˬ. Yoˇhanˬ hkʼaˬ hkʼe te ve le? Yawˇ Yeˍsuˆ htaꞈ kʼoˆ piˇ ve, mvuhˇ naw ma lo aˬ miˍ ce yaꞈ la tcuh leh hkʼaˆ chi ve hkʼaw hkʼa peu˗eˬ toꞈ baˬ piˇ tuˬ nawˬ ngaˬ htaꞈ te tcuh laˇ hpehꞈ˗aw laˇ? (Luˉkaꞈ 9:52-56) Yoˇhanˬ awˬ nu ve tcuh yaˇ hui htaꞈ haꞈ pehnˇ ve maˇ hpeuꞈ maw piˇ ve teˇ pawˆ cawˬ ve yoˬ. Oˇ ve teˇ yanˇ, Yaˍkoˆ leh Yoˇhanˬ Yeˍsuˆ Gʼuiˬ sha ve mvuhˇ miˬ hkʼaw Jawˇmawˇ gʼa te htaˇ, yawˇ huiˉ maˬ laꞈ sha paˉ teˇ gʼaˇ laꞈ mehˍ paˉ teˇ gʼaˇ mui tcuh laˇ tuˬ awˬ e htaꞈ ca lawˬ tcuh ve yoˬ. Awˬ lawn chi ve awˬ nu ve tcuh yaˇ hui shiˍ htaˇ, beuꞈ jaˇ! (Maꞈhtehˍ 20:20, 21, 24) Yaꞈ hkʼaˇ, Yoˇhanˬ laiˉ pawˆ te yaꞈ ve htawˇ, Yeˍsuˆ yawˇ htaꞈ haꞈ sheˍ.—Yoˇhanˬ 21:7.

5. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁵ Awˬ lawn chi ve hkʼaw Yoˇhanˬ ve awˬ lawn leh haꞈ pehnˇ ve awˬ ceuˬ htaꞈ caˉ daꞈ ve yawˇ bvuhꞈ ve kaꞈ teˇ geh henˇ tuˬ yoˬ. Leh ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ tuˬ awˬ hkʼaˇ shiˍ tuˬ kaꞈ henˇ tuˬ yoˬ. Chi hkʼoˆ kaꞈ, yehˬ shehˍ hpaˇ yehˬ kʼa htaꞈ haꞈ ve tehꞈ hpeuꞈ maw piˇ tuˬ, a yeˇ uiˍ ve awˬ ceuˬ gʼa te ve kaꞈ teˇ geh henˇ tuˬ yoˬ.

6. Yaˬhoˉvaˬ ngaˬ hui htaꞈ haꞈ ve hkʼaˬ hkʼe hpeuꞈ maw laˇ ve le?

⁶ Haꞈ ve lehˬ awˬ nu ve chaw htaꞈ daꞈ ve hpawˇ dawˇ leh tawˇ daꞈ daꞈ yaw piˇ ve yoˬ tehꞈ ngaˬ hui dawˇ ve yoˬ. Yaꞈ hkʼaˇ, awˬ tehˬ haꞈ ve lehˬ gʼa te tawˆ la ve yoˬ. (Yaˍkoˆ 2:17, 26 htaꞈ tehˆ daꞈ sheˍ.) Tawˇ pa haˉ te kʼo, Yaˬhoˉvaˬ ngaˬ hui htaꞈ haꞈ ve yoˬ. (1 Yoˇhanˬ 4:19) Gʼuiˬ sha ngaˬ hui htaꞈ haꞈ ve tehꞈ hpeuꞈ maw laˇ tuˬ, Liꞈ hpu hkʼaw daꞈ ve tawˇ yaw laˇ ve yoˬ. (Chiˇ mvuh ve 25:10; Roˉmaꞈ 8:38, 39) Gʼuiˬ sha ngaˬ hui htaꞈ haꞈ ve lehˬ tawˇ yaw laˇ ve ceh maˇ heˆ. Yawˇ te laˇ ve awˬ ceuˬ kaꞈ yonˍ gʼa ve yoˬ. Yoˇhanˬ bvuhꞈ ve, “Gʼuiˬ sha ngaˬ hui htaꞈ haꞈ ve lehˬ, yawˇ ngaˬ hui htaꞈ chi hkʼe hpeuꞈ maˍ laˇ ve yoˬ. Yaˇ hpu htaꞈ pa taw ngaˬ hui co ha gʼa teꞈ tuˬ, Gʼuiˬ sha lehˬ yawˇ ve Yaˇ hpu tiˍ htaꞈ miˬ guiˬ hkʼoˆ lo peu laˇ ve yoˬ.” (1 Yoˇhanˬ 4:9) Yaˬhoˉvaˬ yawˇ haꞈ jaˇ ve Yaˇ ngaˬ hui awˬ pon tuꞈ hkanˍ leh suh tcuh laˇ ve yoˬ. (Yoˇhanˬ 3:16) Yaˬhoˉvaˬ ngaˬ hui htaꞈ awˬ tehˬ haꞈ ve, htawˇ dawˇ nawˬ dawˇ maˇ cawˬ ve maˇ heˆ laˇ?

7. Yeˍsuˆ ngaˬ hui htaꞈ haꞈ ve tehꞈ yawˇ hkʼaˬ hkʼe hpeuꞈ maw laˇ ve le?

⁷ Yeˍsuˆ yawˇ ve awˬ laꞈ gʼawˇ htaꞈ haꞈ jaˇ.  (Yoˇhanˬ 13:1; 15:15) Yawˇ kʼoˆ ve ceh maˇ heˆ. Yaꞈ hkʼaˇ, yawˇ te tawˆ la ve yoˬ. Yeˍsuˆ kʼoˆ ve, “a shu yawˇ ve awˬ chawˇ awˬ pon a shu yawˇ ve a shaꞈ tanˇ piˇ ve haꞈ pehnˇ ve teˇ ceuˬ aꞈ kehˉ uiˍ ve haꞈ pehnˇ ve teˇ ceuˬ kaꞈ maˇ cawˬ.” (Yoˇhanˬ 15:13) Yaˬhoˉvaˬ leh Yeˍsuˆ ngaˬ hui htaꞈ haꞈ laˇ ve htaꞈ dawˇ nyi htaˇ, ngaˬ hui aˬ htoꞈ ma te cawˇ ve le?

8. 1 Yoˇhanˬ liꞈ 3:18 hkʼaw kʼoˆ taˍ ve hkʼe, ngaˬ hui aˬ htoꞈ ma te cawˇ ve le?

⁸ Ngaˬ hui Yaˬhoˉvaˬ leh Yeˍsuˆ htaꞈ haꞈ ve kʼo, yawˇ huiˉ maˬ ve hkawˇ na yuˬ ve yoˬ. (Yoˇhanˬ 14:15; 1 Yoˇhanˬ 5:3) Ngaˬ hui gʼa haꞈ daꞈ cawˇ ve tehꞈ Yeˍsuˆ hkʼa tawˍ lehˆ kʼoˆ laˇ ve yoˬ. (Yoˇhanˬ 13:34, 35) Ngaˬ hui awˬ viˉ awˬ nyi htaꞈ awˬ tehˬ haꞈ ve kʼo, kʼoˆ ve ceh maˇ heˆ. Yaꞈ hkʼaˇ, yawˇ mawˬ tuˬ gʼa te ve yoˬ. (1 Yoˇhanˬ 3:18 gʼaw sheˍ.) Ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ tuˬ hkʼaˬ hkʼe gʼa te ve le?

9. Haꞈ ve teˇ ceuˬ lehˬ Yoˇhanˬ htaꞈ aˬ htoꞈ ma te gaˇ tuˬ te piˇ ve le?

⁹ Awˬ tehˬ kʼo, Yoˇhanˬ lehˬ awˬ pa geh ngaˇ ca hawˇ leh hpu chi ma ma ca kaꞈ hpehꞈ ve yoˬ. Yaꞈ hkʼaˇ, yawˇ chi hkʼe te ve aꞈ kehˉ, awˬ nu ve chaw Yaˬhoˉvaˬ leh Yeˍsuˆ htaꞈ caˉ daꞈ ve awˬ tehˬ ve maˍ piˇ tuˬ yawˇ ve a shaꞈ teꞈ hkʼaˇ yuˬ tanˇ jaˇ. Yoˇhanˬ leuˆ ve a shaꞈ teꞈ hkʼaˇ lehˬ sha ve maˇ heˆ. Yawˇ fawˉ mehˍ ve gʼa hpuˇ leh yawˇ mawˇ jaˇ˗oˬ htaˇ yawˇ htaꞈ teˇ kaˬ lo gʼawˬ baˬ piˇ ve yoˬ. (Tcuh yaˇ 3:1; 4:1-3; 5:18; Hpeuꞈ maˍ ve 1:9) Yawˇ htawnˍ hkʼaw gʼa chehˇ ve htawˇ, awˬ viˉ awˬ nyi htaꞈ dawˇ nawˇ chehˇ sheˍ. Tawˇ pa haˉ te kʼo, yawˇ Paˍmoˆ conˇ lo chehˇ htaˇ yoˬ. Maˇ maw kʼo, hpehꞈ la tuˬ ve awˬ ceuˬ htaꞈ awˬ viˉ awˬ nyi shiˍ cawˇ ve pa taw, yawˇ Hpeuꞈ maˍ ve liꞈ bvuhꞈ leh Hkriꞈ yaˇ awˬ moˍ laiˉ kaˬ lo feu piˇ ve yoˬ. (Hpeuꞈ maˍ ve 1:1) Nyi˗a kʼo, Paˍmoˆ conˇ lo hpehˇ piˇ peuˬ hkʼawꞈ nawˉ, yawˇ Yeˍsuˆ ve ha lehˬ ve bon hkawˇ liꞈ leh Yeˍsuˆ Gʼuiˬ sha ve kanˉ te ve htaꞈ caˉ daꞈ ve liꞈ bvuhꞈ ve yoˬ. Awˬ viˉ awˬ nyi htaꞈ awˬ gʼaˇ piˇ leh yonˍ yeˬ maˇ la tuˬ yawˇ liꞈ 3 puꞈ htaꞈ bvuhꞈ ve yoˬ. Yoˇhanˬ lehˬ yawˇ ve a shaꞈ teꞈ hkʼaˇ yuˬ tanˇ jaˇ. Nawˬ yawˇ htaꞈ hkʼaˬ hkʼe te henˇ yuˬ gʼa tuˬ le?

10. Nawˬ awˬ nu ve chaw htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa tuˬ le?

¹⁰ Nawˬ awˬ nu ve chaw htaꞈ awˬ tehˬ awˬ na haꞈ˗aw laˇ tehꞈ nawˬ ve a shaꞈ teꞈ hkʼaˇ hpeuꞈ maw piˇ ve yoˬ. Saˍtanˍ ve miˬ guiˬ lehˬ nawˬ a shu yawˇ awˬ to pon tiˉ dawˇ nyi tuˬ te laˇ ve yoˬ. Nawˬ ve awˬ gʼaˇ awˬ shaˉ, hpu ca ve, leh daꞈ ve awˬ meh cawˬ tuˬ te tcuh gaˇ ve yoˬ. Yaꞈ hkʼaˇ, miˬ guiˬ chi hkʼoˆ lo ve awˬ viˉ awˬ nyi chi hkʼe maˇ te taˬ. Chaw yaˇ Yaˬhoˉvaˬ geh meuˆ daꞈ la tuˬ ga piˇ ve yawˇ hui daꞈ ve awˬ lawn sha tanˇ hto toˇ tuˬ awˬ yanˇ yehˇ maˇ jaˇ. Teˇ hpaˍ kʼo Gʼuiˬ sha ve kanˉ awˬ yanˇ hkʼa biˇ te ve yoˬ.

11. Gʼuiˬ sha ve kanˉ ka tiꞈ yeˬ ve hkʼaw te ve laiˉ gʼaˇ yawˇ hui Gʼuiˬ sha leh awˬ viˉ awˬ nyi htaꞈ haꞈ ve hkʼaˬ hkʼe hpeuꞈ maw laˇ ve le?

¹¹ Awˬ viˉ awˬ nyi ka tiꞈ yeˬ ve laiˉ gʼaˇ a shu yawˇ awˬ to leh yehˬ kʼa htaꞈ hu tuˬ awˬ yanˇ hkʼa biˇ kanˉ gʼa te ve yoˬ. Chi hkʼe hpehꞈ ve htawˇ, chaw teˇ hpaˍ kʼo, mvuhˇ yeˬ mvuhˇ haw hpawˇ ga piˇ ve, Gʼuiˬ sha ve kanˉ hkʼaˇ yehˬ te ve hpawˇ ga piˇ ve, maˇ heˆ leh teˇ gʼaˇ le le miˬ guiˬ hkʼa peu˗eˬ hkʼoˆ kanˉ awˬ pon hpu tanˇ tanˇ piˇ ve yoˬ. Yawˇ hui Gʼuiˬ sha ve kanˉ hkʼaˇ hpawˇ chehˇ tuˬ coˇ caˇ leh te gʼa ve hkʼe te ve yoˬ. Yawˇ hui Yaˬhoˉvaˬ leh awˬ nu ve chaw htaꞈ haꞈ ve pa taw chi hkʼe te ve yoˬ. Ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ tuˬ, teˇ shinˉ le le hpawnˬ daꞈ˗e ve, leh awˬ gʼaˇ piˇ daꞈ ve yoˬ. Ngaˬ hui heuˬ ve htawˇ, hpawnˬ daꞈ ve maˇ haˇ jaw. Ngaˬ hui ha lehˬ leh kawˆ ve htawˇ awˬ gʼaˇ piˇ daꞈ ve yoˬ. A shaꞈ teꞈ kuiˬ hkʼaw teˇ gʼaˇ le le shoꞈ shaꞈ ve cawˬ ve htawˇ, ngaˬ hui coˇ caˇ leh awˬ viˉ awˬ nyi geh maˇ hpawnˬ daꞈ sheˍ htaˇ leh hpehˇ htaˇ awˬ gʼaˇ piˇ daꞈ ve yoˬ. (Heˍbrehˇ 10:24, 25) Awˬ viˉ awˬ nyi te ve awˬ ceuˬ htaꞈ ngaˬ hui awˬ hpfuhˇ shiˍ jaˇ.

12. Yoˇhanˬ awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve awˬ nu ve teˇ hkʼaˇ lehˬ aˬ htoꞈ ma le?

¹² Yoˇhanˬ awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve lehˬ, chiˇ mvuh piˇ ve ceh maˇ heˆ.  Yawˇ hui htaꞈ kaꞈ beˆ maˍ piˇ ve yoˬ. Tawˇ pa haˉ te kʼo, yawˇ bvuhꞈ ve liꞈ hkʼaw awˬ viˉ awˬ nyi yonˍ hkʼaˇ leh, yawˇ hui te ve daꞈ ve awˬ ceuˬ kaꞈ chiˇ mvuh piˇ ve yoˬ. Yaꞈ hkʼaˇ, venˇ baˆ htaꞈ caˉ daꞈ ve yawˇ hteˇ˗ehꞈ beˆ maˍ piˇ ve yoˬ. (1 Yoˇhanˬ 1:8–2:1, 13, 14) Ngaˬ hui kaꞈ hkʼa shuˍ shuˍ awˬ viˉ awˬ nyi daꞈ ve awˬ ceuˬ te ve htaꞈ chiˇ mvuhˇ piˇ ve a yeˇ uiˍ jaˇ. Yaꞈ hkʼaˇ, chaw teˇ hpaˍ hpaˍ te hkʼaˇ dawˇ hkʼaˇ maˇ daꞈ ve htaꞈ ngaˬ hui mawˬ htaˇ, yawˇ hui htaꞈ hteˇ˗ehꞈ shaˍ tiꞈ piˇ tuˬ ngaˬ hui gʼa haꞈ hanˉ jaˇ ve htawˇ, haꞈ pehnˇ ve hkʼaw gʼa te ve yoˬ. Yaꞈ hkʼaˇ, Liꞈ hpu hkʼaw kʼoˆ ve, awˬ tehˬ ve awˬ chawˇ lehˬ shaˍ tiꞈ piˇ daꞈ leh cheuˬ la tuˬ ga daꞈ gʼa ve yoˬ.—Tawˇ naˉ ve 27:17.

13. Ngaˬ hui aˬ htoꞈ ma maˇ te cawˇ ve le?

¹³ Teˇ pawˆ pawˆ ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ tuˬ teˇ ceuˬ ceuˬ maˇ te. Tawˇ pa haˉ te kʼo, awˬ viˉ awˬ nyi teˇ ceuˬ ceuˬ kʼoˆ ve ngaˬ hui gʼa kaˇ htaˇ, dawˇ vaiˇ jaˇ ve maˇ heˆ leh beuꞈ puiˉ jaˇ ve chaw maˇ gʼa hpehꞈ. Yeˍsuˆ miˬ guiˬ hkʼoˆ chehˇ ve awˬ leh meuˇ htaˇ, awˬ laꞈ gʼawˇ htaꞈ kʼoˆ piˇ ve dawˇ nyi sheˍ. Yawˇ hui a shaꞈ gʼa gaˇ ve kʼo, ngaˬ ve awˬ shaˍ caˇ ve leh ngaˬ ve awˬ suhˍ gʼa dawˬ ve yoˬ. (Yoˇhanˬ 6:53-57) Laiˉ gʼaˇ Yeˍsuˆ chi hkʼe kʼoˆ ve htaꞈ gʼa kaˇ htaˇ, cheˆ˗ehꞈ kʼai leh Yeˍsuˆ htaꞈ baˬ taˉ ve yoˬ. Yaꞈ hkʼaˇ, Yeˍsuˆ ve awˬ chawˇ awˬ tehˬ ve teˇ gʼaˇ lehˬ Yoˇhanˬ yoˬ. Yawˇ chi hkʼe maˇ te. Yawˇ hui Yeˍsuˆ kʼoˆ ve htaꞈ maˇ na gʼa leh cheˆ˗ehꞈ kai ve yoˬ hehˉ. Yaꞈ hkʼaˇ, yawˇ hui Yeˍsuˆ ve tawˇ hkawˇ htaꞈ haꞈ yuˬ maˇ gʼa leh baˬ taˉ ve maˇ heˆ. Yeˍsuˆ awˬ tehˬ ve tawˇ yaw ve tehꞈ yawˇ hui shiˍ ve pa taw Yeˍsuˆ htaꞈ yonˍ ve yoˬ. (Yoˇhanˬ 6:60, 66-69) Chi htaꞈ pa taw shu tawˇ yaw ve htaꞈ ngaˬ hui dawˇ nyi vaiˇ jaˇ ve maˇ heˆ leh beuꞈ puiˉ jaˇ ve maˇ gʼa hpehꞈ tuˬ a yeˇ uiˍ jaˇ. Yaꞈ hkʼaˇ, yawˇ kʼoˆ ve tawˇ tcuhˉ kuiˬ hkʼaˬ hkʼe kʼoˆ gaˇ ve, kʼoˆ tcuh tuˬ ngaˬ hui awˬ yanˇ piˇ cawˇ ve yoˬ.—Tawˇ naˉ ve 18:13; Cuˇ yiˍ piˇ ve 7:9.

14. Aˬ htoꞈ ma te beuꞈ daꞈ ve awˬ ceuˬ ngaˬ hui ve nyi ma hkʼaw maˇ cawˬ tcuh cawˇ ve le?

¹⁴ Ngaˬ hui awˬ viˉ awˬ nyi htaꞈ maˇ beuꞈ cawˇ ve tehꞈ Yoˇhanˬ shaˍ tiꞈ peꞈ laˇ ve yoˬ. Ngaˬ hui chi hkʼe maˇ te ve kʼo, Saˍtanˍ htaꞈ awˬ hkʼaˇ hpaw piˇ ve yoˬ. (1 Yoˇhanˬ 2:11; 3:15) Yeˍsuˆ suh peuˬ hkʼawꞈ nawˉ awˬ viˉ awˬ nyi hkʼaw awˬ lawn chi hkʼe ve hpehꞈ la ve yoˬ. Oˇ ve te yanˇ, awˬ viˉ awˬ nyi beuꞈ daꞈ leh maˇ cawˇ maˇ hawˍ daꞈ tuˬ Saˍtanˍ coˇ caˇ leh te ve yoˬ. Yoˇhanˬ liꞈ bvuhꞈ ve awˬ yanˇ htaˇ, chaw teˇ hpaˍ te hkʼaˇ dawˇ hkʼaˇ Saˍtanˍ hkʼe ve Hkriꞈ yaˇ awˬ moˍ hkʼaw cawˬ ve yoˬ. Daˍyawˇtaˍraˆ lehˬ Hkriꞈ yaˇ awˬ moˍ hkʼaw maˇ cawˇ maˇ hawˍ daꞈ tuˬ coˇ caˇ leh te ve yoˬ. (1 Yoˇhanˬ 2:11; 3:15) Hkriꞈ yaˇ awˬ moˍ hkʼaw Uˉ peunˍ ve Kawˍmiˍtiˍ peu laˇ ve chaw htaꞈ yawˇ maˇ yawˆ yan. Yawˇ maˇ  dawˇ cawˇ ve chaw htaꞈ haꞈ yuˬ ve awˬ viˉ awˬ nyi htaꞈ kaꞈ yawˇ gʼaꞈ kʼoˍ piˇ ve yoˬ. Yawˇ uiˍ muiˬ caˆ muiˬ jaˇ. Chi beuꞈ teˇ co˗e kaꞈ Gʼuiˬ sha ve chaw beuꞈ daꞈ leh maˇ cawˇ maˇ hawˍ daꞈ tuˬ Saˍtanˍ coˇ caˇ jaˇ. Yaꞈ hkʼaˇ, ngaˬ hui awˬ viˉ awˬ nyi htaꞈ beuꞈ daꞈ leh maˇ cawˇ daꞈ tuˬ taˇ te laˇ tcuh.

15. Yehˬ shehˍ hpaˇ aˬ htoꞈ ma htaꞈ gʼa tawnˇ taˍ cawˇ ve le?

¹⁵ Yehˬ shehˍ hpaˇ yehˬ kʼa htaꞈ haꞈ ve tehꞈ hpeuꞈ maw piˇ ve awˬ hkʼaˇ teˇ hkʼaˇ lehˬ, teˇ gʼaˇ leh teˇ gʼaˇ loˍ ve awˬ ceuˬ htaꞈ nyi haꞈ shaˉ piˇ ve yoˬ. (1 Tiˆmoˉseˍ 5:8) Yaꞈ hkʼaˇ, a yeˇ uiˍ jaˇ ve lehˬ, yehˬ kʼa hkʼaw ve chaw teˇ gʼaˇ le le Yaˬhoˉvaˬ geh meuˆ daꞈ tuˬ gʼa ga piˇ ve tehꞈ tawnˇ taˍ cawˇ ve yoˬ. (Maꞈhtehˍ 5:3) Awˬ lawn chi ve Yeˍsuˆ daꞈ ve henˇ tuˬ te maˍ laˇ ve teˇ geh nyi sheˍ. Yoˇhanˬ ve ha lehˬ ve bon hkawˇ liꞈ hkʼaw yawˇ kʼoˆ ve, Yeˍsuˆ suhˆ hkuiˉ daw hkʼoˆ lo suh˗e yoˬ te htaˇ, yawˇ kaꞈ yehˬ kʼa htaꞈ dawˇ nawˇ ve yoˬ. Oˇ ve teˇ yanˇ Yeˍsuˆ tuꞈ hkanˍ jaˇ. Yaꞈ hkʼaˇ, yawˇ ve awˬ e Maˍriˆ paˇ lo huˉ chehˇ ve Yoˇhanˬ htaꞈ kʼoˆ piˇ ve, yawˇ suh peuˬ hkʼawꞈ nawˉ awˬ e htaꞈ gʼa nyi haꞈ shaˉ laˇ tuˬ lawˬ ve yoˬ. (Yoˇhanˬ 19:26, 27) Yawˇ ve awˬ nyi laiˉ gʼaˇ cawˬ leh awˬ e htaꞈ nyi haꞈ shaˉ gʼa ve yoˬ. Yaꞈ hkʼaˇ, oˇ ve teˇ yanˇ yawˇ hui awˬ laꞈ gʼawˇ maˇ hpehꞈ la sheˍ. Yeˍsuˆ awˬ e loˍ ve awˬ ceuˬ cawˬ tcuh gaˇ ve yoˬ. Yawˇ Yaˬhoˉvaˬ ve kanˉ caˉ leh te gʼa tuˬ, yonˍ hkʼaˇ hpawˇ kaꞈ nyi haꞈ shaˉ tcuh gaˇ ve yoˬ.

16. Yoˇhanˬ lehˬ aˬ htoꞈ ma ve awˬ vuiˬ cawˬ ve le?

¹⁶ Yoˇhanˬ lehˬ awˬ vuiˬ laiˉ ceuˬ htaꞈ gʼa nyi haꞈ shaˉ ve yoˬ. Awˬ lawn kʼo, yawˇ tcuh yaˇ teˇ gʼaˇ hpehꞈ leh bon maˍ kuiˬ hkʼaw kaꞈ gʼa sheh kʼai ve yoˬ. Yawˇ awˬ miˇ ma cawˬ ve yoˬ. Chi htaꞈ pa taw, yawˇ yehˬ kʼa hkʼaw loˍ ve awˬ ceuˬ cawˬ tuˬ leh yawˇ hui ve yonˍ hkʼaˇ kaꞈ gʼa nyi haꞈ shaˉ piˇ ve yoˬ. (1 Kawˇrenˍhtuˆ 9:5) Chi beuꞈ teˇ co˗e ve yehˬ shehˍ hpaˇ Yoˇhanˬ htaꞈ hkʼaˬ hkʼe henˇ yuˬ gʼa ve le?

17. Yehˬ shehˍ hpaˇ lehˬ awˬ miˇ ma leh yaˇ ve yonˍ hkʼaˇ htaꞈ nyi haꞈ shaˉ piˇ tuˬ aˬ htoꞈ ma te a yeˇ uiˍ jaˇ ve le?

¹⁷ Yehˬ shehˍ hpaˇ lehˬ awˬ vuiˬ laiˉ ceuˬ htaꞈ gʼa nyi haꞈ shaˉ ve yoˬ. Tawˇ pa haˉ te kʼo, yawˇ kaiˬ ve chaw gʼa hpehꞈ ve yoˬ. Yawˇ chi hkʼe te ve kʼo, Yaˬhoˉvaˬ kaꞈ chiˇ mvuh ve gʼa tuˬ yoˬ. (Eˇfeˇsuꞈ 6:5, 6; Tiˇtuˆ 2:9, 10) Leh yawˇ Hkriꞈ yaˇ awˬ moˍ hkʼaw kaꞈ awˬ vuiˬ cawˬ ve yoˬ. Yawˇ awˬ viˉ awˬ nyi htaꞈ nyi haꞈ shaˉ leh hto toˇ ve kaꞈ gʼa sheh kʼai ve yoˬ. A yeˇ uiˍ jaˇ ve lehˬ, awˬ miˇ awˬ yaˇ geh hkʼaˬ htaˆ kaꞈ teˇ geh Liꞈ hpu gʼa henˇ ve yoˬ. Yehˬ shehˍ hpaˇ lehˬ yehˬ kʼa hkʼaw loˍ ve awˬ ceuˬ cawˬ tuˬ nyi haꞈ shaˉ piˇ ve pa taw, awˬ miˇ ma leh yaˇ awˬ bon uiˍ jaˇ tuˬ yoˬ. Yawˇ hui Yaˬhoˉvaˬ ve kanˉ caˉ leh te gʼa tuˬ, leh hkʼaˬ hkʼe dawˇ ve htaꞈ na gʼa piˇ  tuˬ, leh yonˍ hkʼaˇ kaꞈ gʼa nyi haꞈ shaˉ piˇ ve yoˬ.—Eˇfeˇsuꞈ 5:28, 29; 6:4.

18. Yoˇhanˬ aˬ htoꞈ ma htaꞈ yonˍ gʼa ve le?

¹⁸ Yoˇhanˬ mawˇ˗oˬ leh yawˇ ha lehˬ ve awˬ ceuˬ, yawˇ ve yonˍ hkʼaˇ htaꞈ awˬ gʼaˇ nuˇ tuˬ te piˇ ve kaꞈ gʼa hpuˇ jaw ve yoˬ hehˉ. Yaꞈ hkʼaˇ, yawˇ Yeˍsuˆ piˇ taˉ ve tawˇ hkawˇ htaꞈ na yuˬ tuˬ, te gʼa ve hkʼe te ve yoˬ. Awˬ viˉ awˬ nyi htaꞈ haꞈ˗oꞈ kʼoˆ taˉ ve tawˇ kaꞈ yoˬ. Yawˇ chi hkʼe te ve pa taw, Yaˬhoˉvaˬ leh Yeˍsuˆ yawˇ htaꞈ haꞈ ve tehꞈ yonˍ gʼa leh, shoꞈ shaꞈ ve gʼa hpuˇ ve htawˇ, tawˍ daꞈ gʼaˇ tuˬ kaꞈ awˬ gʼaˇ piˇ ve yoˬ. (Yoˇhanˬ 14:15-17; 15:10; 1 Yoˇhanˬ 4:16) Yoˇhanˬ awˬ viˉ awˬ nyi htaꞈ haꞈ ve lehˬ, kʼoˆ ve leh te ve hkʼaw hpeuꞈ maw piˇ ve yoˬ. Saˍtanˍ leh yawˇ ve miˬ guiˬ Yoˇhanˬ htaꞈ jehˇ tuˬ te piˇ maˇ gʼa.

19. 1 Yoˇhanˬ liꞈ 4:7 hkʼaw kʼoˆ taˍ ve hkʼe, ngaˬ hui aˬ htoꞈ ma te cawˇ ve le? Leh aˬ htoꞈ ma pa taw le?

¹⁹ Yoˇhanˬ hkʼa shuˍ shuˍ, ngaˬ hui kaꞈ Saˍtanˍ uˉ peunˍ ve awˬ hawˉ lo chehˇ ve yoˬ. Saˍtanˍ lehˬ maˇ daꞈ ve gʼuiˬ sha hpehꞈ leh chaw teˇ gʼaˇ htaꞈ kaꞈ maˇ haꞈ jaw. (1 Yoˇhanˬ 3:1, 10) Saˍtanˍ lehˬ, ngaˬ hui awˬ viˉ awˬ nyi htaꞈ maˇ haꞈ tcuh gaˇ. Yaꞈ hkʼaˇ, ngaˬ hui yawˇ htaꞈ maˇ gʼaˇ tcuh ve kʼo, yawˇ ngaˬ hui htaꞈ teꞈ chiˉ te maˇ gʼa. Chi htaꞈ pa taw, awˬ viˉ awˬ nyi htaꞈ haꞈ sheˍ. Leh awˬ viˉ awˬ nyi htaꞈ haꞈ ve lehˬ, kʼoˆ ve leh te ve hkʼaw hpeuꞈ maw piˇ ve yoˬ. Ngaˬ hui chi hkʼe te htaˇ, Yaˬhoˉvaˬ ve yehˬ kʼa hkʼaw chehˇ ve ha lehˬ gʼa ve yoˬ. Leh ngaˬ hui ve a shaꞈ kaꞈ awˬ hpfuhˇ hkʼaˆ jaˇ tuˬ yoˬ.—1 Yoˇhanˬ 4:7 gʼaw sheˍ.