Heˍbrehˇ ve tawˇ hkawˇ miˬ guiˬ awˬ suhˉ yuˬ tawˆ ve Liꞈ hpu hkʼaw “iˉ mvuhˇ lawˬ” tehꞈ kʼoˆ ve lehˬ iˉ mvuhˇ lawˬ laiˉ ceuˬ htaꞈ kʼoˆ gʼa ve yoˬ. (Tcuh yaˇ 8:28, 29, 38) Yaꞈ hkʼaˇ, nyi˗a kʼo Ehˇtaˍyoˇpiˆ chaw a maꞈ lonˉ yehˇ ve iˉ mvuhˇ lawˬ lehˬ, maꞈ yaˇ yehˇ ve iˉ mvuhˇ lawˬ maˇ heˆ leh enˍ daꞈ htaˇ yehˇ ve iˉ mvuhˇ lawˬ aꞈ kehˉ uiˍ ve yoˬ. Aˬ htoꞈ ma pa taw, ngaˬ hui chi hkʼe kʼoˆ gʼa ve awˬ hkʼaˇ teˇ ceuˬ ceuˬ htaꞈ teˇ geh nyi sheˍ.

Ehˇtaˍyoˇpiˆ chaw a maꞈ lonˉ chi teˇ gʼaˇ lehˬ, aˉ yaˇ cawˬ leh vuiˇ jaˇ kuiˬ lo laˬ ve. Liꞈ hpu hkʼaw kʼoˆ ve yawˇ lehˬ, ‘Kanˍdaˍkeˍ meh ve nanˇ hawˉ hkanˇ ma awˬ hawˉ lo jawˇ mawˇ te ve Ehˇtaˍyoˇpiˆ chaw teˇ gʼaˇ lehˬ, nanˇ hawˉ hkanˇ ma ve hpu shi mawˇ jeˬ hkʼa peu˗eˬ htaꞈ haꞈ shaˉ shehˍ hpaˇ lonˉ teˇ gʼaˇ hpehꞈ ve yoˬ.’ (Tcuh yaˇ 8:27) Oˇ htaˇ teˇ co˗e Ehˇtaˍyoˇpiˆ mvuhˇ miˬ lehˬ, Eˇjiˇtuꞈ mvuhˇ miˬ awˬ hawˉ hpawˇ te leh chi teˇ hkui Suˬdanˬ mvuhˇ miˬ hkʼa gaˬ uˉ peunˍ chehˇ ve yoˬ. Ehˇtaˍyoˇpiˆ chaw chi teˇ gʼaˇ yaꞈ kʼaw kʼai vuiˇ jaˇ ve pa taw, iˉ mvuhˇ lawˬ gʼa pa ve yoˬ. Leh yawˇ loˍ ve mawˇ laiˉ ceuˬ kaꞈ gʼa yuˬ kʼai ve yoˬ. Oˇ htaˇ teˇ co˗e chaw gʼawˬ caˇ ve iˉ mvuhˇ lawˬ lehˬ, gaˉ yaw 4 paˉ cawˬ leh mui kuiˬ hkʼoˆ kaꞈ beh taˍ ve yoˬ. Tcuh yaˇ liꞈ hkʼaw—Chi ve tcuhˉ kuiˬ kʼoˆ gaˇ ve lehˬ (Kaˇlaˇ hkawˇ) “chi hkʼe ve iˉ mvuhˇ lawˬ lehˬ mawˇ gʼawˬ gʼa maˇ jaˇ leh chaw yaˇ laiˉ kaˬ lo kaꞈ kʼai gʼa ve yoˬ.”

Ehˇtaˍyoˇpiˆ chaw a maꞈ lonˉ Hpiˇliˇpuˆ yawˇ geh laˬ htaˇ, liꞈ daw gʼaw chehˇ ve. Liꞈ hpu hkʼaw kʼoˆ ve, “Hpiˇliˇpuˆ gʼuiˇ kʼai leh, tcuh kaˍ paˍ Iˉsaˍyaˆ ve liꞈ hkʼaw lo jawˇ mawˇ oˇ ve gʼaw chehˇ ve htaꞈ yawˇ gʼa kaˇ” ve yoˬ. (Tcuh yaˇ 8:30) Iˉ mvuhˇ lawˬ chi maˇ gehˬ. Chi htaꞈ pa taw, Ehˇtaˍyoˇpiˆ chaw yaꞈ kʼaw kʼai chehˇ htaˇ, liꞈ daw htaꞈ gʼaw gʼa leh Hpiˇliˇpuˆ kaꞈ iˉ mvuhˇ lawˬ hkʼaˇ suh gʼaꞈ mi ve yoˬ.

Ehˇtaˍyoˇpiˆ chaw a maꞈ lonˉ “yawˇ geh teˇ geh taˆ mui la tuˬ yawˇ Hpiˇliˇpuˆ htaꞈ kuˬ ve.” (Tcuh yaˇ 8:31) Maˇ˗awˍ ve kʼo enˍ daꞈ htaˇ yehˇ ve iˉ mvuhˇ lawˬ lehˬ, iˉ mvuhˇ lawˬ hkʼoˆ ciˇ ve chaw huˉ taˍ ve yoˬ. Yaꞈ hkʼaˇ, iˉ mvuhˇ lawˬ chi hkehˬ leh Ehˇtaˍyoˇpiˆ chaw a maꞈ lonˉ leh Hpiˇliˇpuˆ teˇ geh mui gʼa ve yoˬ.

Chi htaꞈ pa taw, Tcuh yaˇ liꞈ kaˇ nanˉ uiˍ 8 hkʼaw kʼoˆ taˍ ve, oˇ htaˇ teˇ co˗e ve shaˉ hkiˆ chi beuꞈ teˇ co˗e cawˬ taˍ ve, maꞈ yaˇ yehˇ ve iˉ mvuhˇ lawˬ leh enˍ daꞈ htaˇ yehˇ ve iˉ mvuhˇ lawˬ aꞈ kehˉ Ehˇtaˍyoˇpiˆ chaw a maꞈ lonˉ yehˇ ve iˉ mvuhˇ lawˬ lehˬ, Gʼuiˬ sha ve kanˉ hkʼaˇ hkʼaw ngaˬ hui awˬ han mawˬ tuˬ gu teh taˍ laˇ ve yoˬ.