1-2. Yaˬhoˉvaˬ ve kanˉ ka tiꞈ yeˬ ve hkʼaw te ve chaw shoꞈ shaꞈ ve awˬ lawn aˬ htoꞈ ma gʼa hpuˇ ve le?

 Maˇ dawˇ maˇ gaˇ ve awˬ lawn ngaˬ hui gʼa hpuˇ htaˇ, a shaꞈ teꞈ kuiˬ hkʼaw laꞈ tcuh laꞈ haˉ pa laˇ gʼa ve yoˬ. Tawˇ pa haˉ te kʼo, awˬ viˉ awˬ nyi ka tiꞈ yeˬ ve Lon˗iˉ a meh ve, mvuhˇ haˉ caˇ ve a naˍ awˬ nu ve chaw hkʼa dehꞈ maˇ hpehꞈ ve yawˇ hpehꞈ ve tehꞈ saˍ laꞈ gʼonˍ tehˆ nyi mawˬ leh yawˇ hkʼaˬ nyiˇ ha pa maˇ gʼa chehˇ˗o tehꞈ kʼoˆ piˇ ve yoˬ. Mo˗ni˗kaˇ leh awˬ hpawˇ Gʼuiˬ sha ve kanˉ ha lehˬ ha kʼa ve hkʼaw teˇ geh te ve yoˬ. Yaꞈ hkʼaˇ, teˇ nyi htaˇ yawˇ ve awˬ hpawˇ haˉ chawˇ te ve laiˉ hkʼawꞈ gaˬ˗oˬ ve yawˇ shiˍ la ve yoˬ. Mvuhˇ yeˬ mvuhˇ haw lonˉ Heun˗ri˗hkin laˬ ve pa taw, awˬ viˉ awˬ nyi yaˇ miˇ O˗li˗bi˗a gʼa hpaw˗e ve yoˬ. Mvuhˇ yeˬ mvuhˇ haw laˬ peuˬ hkʼawꞈ nawˉ yawˇ aˉ hkʼaw lo kʼawꞈ kʼoꞈ˗e ve yoˬ. Yawˇ ve yehˬ hkʼa peu˗eˬ paˆ˗e ve htaꞈ gʼa mawˬ ve yoˬ. Awˬ viˉ awˬ nyi chi ve teˇ hpaˍ a shaꞈ teꞈ kuiˬ hkʼaw laꞈ tcuh laꞈ haˉ pa kʼai ve yoˬ. Nawˬ awˬ pon kʼo, shoꞈ shaꞈ ve awˬ lawn maˇ dawˇ maˇ gaˇ ve nawˬ a shaꞈ teꞈ kuiˬ hkʼaw gʼa hpuˇ jaw˗aw laˇ?

² Yaˬhoˉvaˬ ve kanˉ te ve chaw teˇ gʼaˇ le le htawˇ, shoꞈ shaꞈ ve awˬ lawn awˬ nu ve chaw gʼa hpuˇ ve hkʼa shuˍ gʼa hpuˇ ve yoˬ. Yaꞈ hkʼaˇ, chi hkʼe ceh tiˉ maˇ heˆ. Tawˍ laˇ ve htaꞈ ngaˬ hui gʼa yeunˇ hkanˍ leh, Yaˬhoˉvaˬ ve kanˉ te ve chaw htaꞈ maˇ dawˇ cawˇ ve fawˉ mehˍ laˇ ve htaꞈ kaꞈ ngaˬ hui gʼa yeunˇ hkanˍ ve yoˬ. Shoꞈ shaꞈ ve awˬ lawn teˇ ceuˬ le le Yaˬhoˉvaˬ maˇ haꞈ shaˉ laˇ ve htawˇ, ngaˬ hui yeunˇ hkanˍ gʼaˇ tuˬ yawˇ ga laˇ tuˬ yoˬ tehꞈ ka tiꞈ te taˍ laˇ ve yoˬ. (Iˉsaˍyaˆ 41:10) Yawˇ ngaˬ hui htaꞈ ga laˇ ve kʼo, ngaˬ hui ha lehˬ ve cawˬ ve, hkʼa dehꞈ dawˇ cheˆ gʼa ve, leh a shaꞈ teꞈ kuiˬ hkʼaw shoꞈ shaꞈ ve gʼa hpuˇ ve htawˇ, yawˇ htaꞈ ka tiꞈ yeˬ gʼa ve yoˬ. Awˬ lawn chi ve hkʼaw ngaˬ hui shoꞈ shaꞈ ve gʼa hpuˇ jaˇ htaˇ, Yaˬhoˉvaˬ ga laˇ ve 4 hkʼaˇ htaꞈ teˇ geh henˇ leh Yaˬhoˉvaˬ gu teh taˍ laˇ ve htaꞈ ngaˬ hui awˬ bon gʼa tuˬ hkʼaˬ hkʼe gʼa te cawˇ ve kaꞈ teˇ geh henˇ tuˬ yoˬ.

 YAˬHOˉVAˬ NAWˬ HTAꞈ HAꞈ SHAˉ LAˇ TUˬ YOˬ

3. Ngaˬ hui shoꞈ shaꞈ ve awˬ lawn gʼa hpuˇ jaˇ htaˇ hkʼaˬ hkʼe dawˇ ve le?

³ Shoꞈ shaꞈ ve. Ngaˬ hui shoꞈ shaꞈ ve awˬ lawn gʼa hpuˇ htaˇ, ngaˬ hui teꞈ chiˉ maˇ dawˇ nyi gʼa leh dawˇ cheˆ kaꞈ maˇ gʼa ve yoˬ. Cheˆ˗ehꞈ kʼai ve, nyi ma naˬ jaˇ ve, leh aˬ htoꞈ ma te tuˬ kaꞈ maˇ shiˍ˗o ve yoˬ. Chi awˬ gʼuˇ suhˍ htaˇ kʼoˆ kʼai peuˬ ve awˬ viˉ awˬ nyi yaˇ miˇ 2 gʼaˇ shoꞈ shaꞈ ve gʼa hpuˇ jaˇ htaˇ hkʼaˬ hkʼe dawˇ ve le? O˗li˗bi˗a kʼoˆ ve, “mvuhˇ yeˬ mvuhˇ haw lonˉ Heun˗ri˗hkin peuˬ hkʼawꞈ nawˉ ngaˬ ve yehˬ teꞈ chiˉ kaꞈ maˇ leuˉ˗o ve htaꞈ gʼa mawˬ htaˇ, ngaˬ ca dawˇ maˇ tawˆ˗o. Ngaˬ teꞈ chiˉ maˇ leuˉ˗o ve htaꞈ tiˉ dawˇ nyi leh hkʼaˬ hkʼe kʼawꞈ te tuˬ kaꞈ ca dawˇ maˇ tawˆ˗o. Mo˗ni˗kaˇ yawˇ ve awˬ hpawˇ haˉ chawˇ te ve shiˍ peuˬ hkʼawꞈ nawˉ yawˇ kʼoˆ ve, “ngaˬ ve nyi ma shiˍ hkʼaw miˬ guiˬ teˇ hkʼoˆ paˆ˗e ve htaꞈ shuˍ ve, nyi ma shiˍ htaꞈ aˉ hteꞈ juˆ laˇ ve htaꞈ shuˍ ve, awˬ lawn chi ve ngaˬ gʼa hpuˇ tuˬ tehꞈ maˇ dawˇ. Ngaˬ teꞈ chiˉ te tuˬ awˬ gʼaˇ kaꞈ maˇ cawˬ˗o.” Ngaˬ hui chi hkʼe gʼa hpuˇ ve kʼo, Yaˬhoˉvaˬ hkʼaˬ hkʼe ga laˇ tuˬ ka tiꞈ te taˍ laˇ ve le?

4. Hpiˇliˇpiˆ liꞈ 4:6, 7 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ aˬ htoꞈ ma peꞈ laˇ tuˬ ka tiꞈ te taˍ laˇ ve le?

⁴ Yaˬhoˉvaˬ aˬ htoꞈ ma te tuˬ le? Liꞈ hpu hkʼaw kʼoˆ ve, ‘Gʼuiˬ sha lo laˬ ve dawˇ sha gaˇ sha ve’ ngaˬ hui htaꞈ peꞈ laˇ tuˬ yoˬ tehꞈ yawˇ ka tiꞈ te taˍ laˇ ve yoˬ. (Hpiˇliˇpiˆ 4:6, 7 gʼaw sheˍ.) Dawˇ sha gaˇ sha ve chi lehˬ, ngaˬ hui Yaˬhoˉvaˬ htaꞈ haꞈ leh yawˇ geh meuˆ daꞈ ve ceh tiˉ nyi ma gawˬ lehˍ cawˬ gʼa ve htaꞈ kʼoˆ gaˇ ve yoˬ. Dawˇ sha gaˇ sha ve chi lehˬ, “ca dawˇ maˇ gaˬ ve” ngaˬ hui dawˇ maˇ gʼa ve aꞈ kehˉ kanˇ paˆ cawˬ jaˇ. Nawˬ chi hkʼe gʼa hpuˇ jaw˗aw laˇ? Dawˇ haˍ jaˇ ve htawˇ bon lawˬ peuˬ hkʼawꞈ nawˉ, nawˬ nyi ma sha jaˇ ve yoˬ. Chi ve lehˬ, ‘Gʼuiˬ sha geh lo laˬ ve dawˇ sha gaˇ sha ve’ teˇ ceuˬ hpehꞈ ve yoˬ.

5. Gʼuiˬ sha geh lo laˬ ve dawˇ sha gawˬ lehˍ ve ngaˬ hui ve nyi ma leh dawˇ hkʼaˇ htaꞈ hkʼaˬ hkʼe haꞈ shaˉ laˇ gʼa tuˬ le?

⁵ Hpiˇliˇpiˆ liꞈ 4:7 hkʼaw kʼoˆ sheˍ ve, Gʼuiˬ sha lo laˬ ve dawˇ sha gawˬ lehˍ ve lehˬ, ‘ngaˬ hui ve nyi ma leh dawˇ hkʼaˇ htaꞈ haꞈ shaˉ laˇ tuˬ yoˬ.’ Heˍlaˍsaˆ hkawˇ kʼo, haꞈ shaˉ ve lehˬ maꞈ yaˇ venˇ htaꞈ canˇ paˍ maˇ gʼa te luˬ laˇ tuˬ haꞈ shaˉ ve htaꞈ kʼoˆ gaˇ ve yoˬ. Maꞈ yaˇ venˇ taˍ meuꞈ hpeꞈ htaꞈ shaw chehˇ htaˇ, venˇ hkʼaw chehˇ ve chaw hkʼa dehꞈ zuhꞈ mehˬ gʼa ve yoˬ. Chi ve hkʼa shuˍ shuˍ, Gʼuiˬ sha lo laˬ ve dawˇ sha gawˬ lehˍ ve ngaˬ hui ve nyi ma leh dawˇ hkʼaˇ htaꞈ haꞈ shaˉ laˇ tuˬ yoˬ. Ngaˬ hui yonˍ yeˬ leh kawˆ tuˬ maˇ cawˬ ve pa taw, nyi ma gawˬ lehˍ cawˬ gʼa ve yoˬ. (Chiˇ mvuh ve 4:8) Haˍnaˆ hkʼa shuˍ shuˍ, ngaˬ hui shoꞈ shaꞈ ve gʼa hpuˇ chehˇ sheˍ ve htawˇ, ngaˬ hui nyi ma gawˬ lehˍ cawˬ gʼa ve yoˬ. (1 Saˍmo˗eˍlaˆ 1:16-18) Ngaˬ hui nyi ma gawˬ lehˍ cawˬ ve kʼo, cuˇ yiˍ cawˬ ve hkʼaw hkʼa dehꞈ dawˇ cheˆ gʼa ve yoˬ.

6. Gʼuiˬ sha geh lo laˬ ve dawˇ sha gaˇ sha ve ngaˬ hui awˬ bon gʼa tuˬ hkʼaˬ hkʼe gʼa te cawˇ ve le? (Awˬ han htaꞈ nyi sheˍ.)

⁶ Ngaˬ hui aˬ htoꞈ ma gʼa te cawˇ ve le? Nawˬ nyi ma luˬ jaˇ ve kʼo, Gʼuiˬ sha geh lo laˬ ve dawˇ sha gawˬ lehˍ ve cawˬ tuˬ bon lawˬ leh, nawˬ nyi ma sha htaˇ hkʼa gaˬ caˉ leh bon lawˬ sheˍ. (Luˉkaꞈ 11:9; 1 Hteˇsaˍlawˇniˆ 5:17) Chi awˬ gʼuˇ suhˍ htaˇ ve Lon˗iˉ kʼawꞈ kʼoˆ maˍ laˇ ve, Lon˗iˉ hkʼa nyiˇ ha pa maˇ gʼa chehˇ˗o ve htaꞈ shiˍ htaˇ yawˇ leh Eh˗na hkʼaˬ  hkʼe te yeunˇ hkanˍ gʼaˇ ve htaꞈ yawˇ kʼoˆ maˍ laˇ ve, “yawˇ htaꞈ caˉ daꞈ ve maˇ daꞈ ve awˬ lawn gʼa kaˇ htaˇ, ngaˬ naˬ ve leh awˬ nu ve awˬ lawn hkʼaˬ hkʼe dawˇ cheˆ gʼa tuˬ haˍ jaˇ. Yaꞈ hkʼaˇ, bon lawˬ ve ga laˇ gʼa jaˇ. Chi ngaˬ nyi ma gawˬ lehˍ ve cawˬ tuˬ ga laˇ ve yoˬ.” Lon˗iˉ leh yawˇ ve awˬ miˇ ma kʼoˆ ve, yawˇ hui bon hkʼa dehꞈ lawˬ leh laiˉ pawˆ lawˬ ve yoˬ. Yawˇ hui nyi ma gawˬ lehˍ ve cawˬ tuˬ Yaˬhoˉvaˬ ga laˇ tuˬ lawˬ leh cuˇ yiˍ cawˬ ve hkʼaw dawˇ cheˆ gʼa tuˬ kaꞈ lawˬ ve yoˬ. Leh yawˇ hui Yaˬhoˉvaˬ ga laˇ ve tehꞈ dawˇ ve yoˬ. Nawˬ shoꞈ shaꞈ ve awˬ lawn gʼa hpuˇ jaˇ leh haꞈ yuˬ maˇ gʼa˗o tehꞈ dawˇ ve kʼo, teˇ hkui teˇ hkui bon lawˬ sheˍ. Leh Yaˬhoˉvaˬ geh laˬ ve dawˇ sha gawˬ lehˍ ve nawˬ ve nyi ma leh dawˇ hkʼaˇ htaꞈ haꞈ shaˉ laˇ tuˬ yoˬ.—Roˉmaꞈ 12:12.

YAˬHOˉVAˬ NAWˬ HTAꞈ YONˍ YEˬ VE CAWˬ TCUH LAˇ TUˬ YOˬ

7. Ngaˬ hui shoꞈ shaꞈ ve awˬ lawn gʼa hpuˇ htaˇ hkʼaˬ hkʼe dawˇ ve le?

⁷ Shoꞈ shaꞈ ve. Ngaˬ hui shoꞈ shaꞈ ve gʼa hpuˇ jaˇ htaˇ ngaˬ hui ve dawˇ hkʼaˇ keunˍ lawꞈ cawˇ lawꞈ maˇ cawˬ la ve yoˬ. Yonˍ yeˬ ve maˇ cawˬ leh maˇ te jaw ve awˬ ceuˬ htaꞈ te la ve yoˬ. Heuˇ shan hpawˇ gʼuiˬ baˇ lonˉ htinˍ piˇ ve hkʼa shuˍ, ngaˬ hui shoꞈ shaꞈ ve laiˉ ceuˬ gʼa hpuˇ ve yoˬ. Chi awˬ gʼuˇ suhˍ htaˇ kʼoˆ kʼai peuˬ ve Eh˗na kʼawꞈ kʼoˆ ve, yawˇ ve awˬ hpawˇ Lon˗iˉ suh peuˬ hkʼawꞈ nawˉ yawˇ dawˇ haˍ ve laiˉ ceuˬ htaꞈ gʼa yeunˇ hkanˍ ve yoˬ. Yawˇ kʼoˆ ve, “ngaˬ ve nyi ma hkʼaw cawˬ ve awˬ ceuˬ yuˬ tawˆ laˇ leh maˇ cawˬ˗o ve htaꞈ shuˍ ve yoˬ. Ngaˬ awˬ to teꞈ chiˉ maˇ leuˉ˗o leh ha kʼaˉ jaˇ ve yoˬ. Teˇ pawˆ pawˆ kʼo, ngaˬ hpawˇ maˇ chehˇ˗o ve htaꞈ ngaˬ beuꞈ jaˇ.” Chi hkʼoˆ kaꞈ, maˇ˗awˍ ve kʼo awˬ lawn teˇ hpaˍ htaꞈ Lon˗iˉ dawˇ cheˆ ve pa taw, chi teˇ hkui Eh˗na yawˇ teˇ gʼaˇ tiˉ chehˇ leh nyi ma maˇ sha ve yoˬ. Teˇ pawˆ pawˆ kʼo, mvuhˇ yeˬ mvuhˇ haw lonˉ laˬ htaˇ yawˇ laˇ tsuhˇ gʼuiˬ hkʼaw chehˇ taˍ ve htaꞈ dawˇ mawˬ ve yoˬ. Ngaˬ hui chi hkʼe gʼa hpuˇ htaˇ Yaˬhoˉvaˬ hkʼaˬ hkʼe ga laˇ tuˬ ve le?

8. Iˉsaˍyaˆ liꞈ 33:6 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ aˬ htoꞈ ma awˬ lawn ka tiꞈ te taˍ laˇ ve le?

⁸ Yaˬhoˉvaˬ aˬ htoꞈ ma te tuˬ le? Ngaˬ hui yonˍ yeˬ ve cawˬ tuˬ Yaˬhoˉvaˬ te laˇ tuˬ yoˬ tehꞈ ka tiꞈ te taˍ laˇ ve yoˬ. (Iˉsaˍyaˆ 33:6 gʼaw sheˍ.) Heuˇ shan hpawˇ mvuhˇ yeˬ mvuhˇ haw lonˉ gʼa hpuˇ htaˇ awˬ liˉ awˬ laˬ te leh hpfuhˆ baˬ˗e te ve yoˬ. Chi hkʼe maˇ hpehꞈ tuˬ heuˇ shan hpawˇ laiˉ hkeh awˬ jaˇ lo sho baˉ li cawˬ ve yoˬ. Chi ve lehˬ heuˇ shan hpawˇ awˬ jaˇ lo nyiˇ paˉ paˉ cawˬ ve yoˬ. Sho baˉ li chi ve lehˬ heuˇ shan hpawˇ gʼuiˬ baˇ lonˉ gʼa hpuˇ htaˇ, maˇ hpfuhˆ-e tuˬ ga piˇ ve yoˬ. Chi hkʼe te htaˇ heuˇ shan hpawˇ hkʼaw ciˇ ve chaw kawˆ tuˬ maˇ cawˬ leh oˉ kʼoˍ maˇ muiˬ tuˬ te piˇ ve yoˬ. Yaꞈ hkʼaˇ, sho baˉ li chi ve kanˉ hkʼa dehꞈ te gʼa tuˬ heuˇ shan hpawˇ gʼuˇ suhˍ hpawˇ lo tiˉ gʼaꞈ kʼai ve yoˬ. Chi ve hkʼa shuˍ shuˍ, ngaˬ hui shoꞈ shaꞈ ve gʼa hpuˇ ve htawˇ, Yaˬhoˉvaˬ ve kanˉ ka tiꞈ yeˬ ve hkʼaw te ve kʼo, yawˇ ngaˬ hui htaꞈ yonˍ yeˬ ve cawˬ tcuh laˇ tuˬ yoˬ.

9. Hpfuhˆ nyi tuˬ ve laꞈ caˉ hkʼaw ngaˬ hui yonˍ yeˬ ve cawˬ tuˬ hkʼaˬ hkʼe ga laˇ ve le? (Awˬ han htaꞈ nyi sheˍ.)

⁹ Ngaˬ hui aˬ htoꞈ ma gʼa te cawˇ ve le? Nawˬ shoꞈ shaꞈ ve laiˉ ceuˬ gʼa hpuˇ leh dawˇ haˍ jaˇ htaˇ, Hkriꞈ yaˇ ve awˬ vuiˬ hkʼaˬ htaˆ kaꞈ te tuˬ coˇ caˇ sheˍ. Nawˬ oˇ  htaˇ hkʼa shuˍ hkʼa dehꞈ te maˇ gʼa ve htawˇ, Yaˬhoˉvaˬ lehˬ awˬ hkʼaˇ ca puiˉ ve Gʼuiˬ sha hpehꞈ ve tehꞈ tawnˇ taˍ sheˍ. (Luˉkaꞈ 21:1-4 htaꞈ tehˆ daꞈ sheˍ.) Chi hkʼoˆ kaꞈ, nawˬ a shu yawˇ hkʼaˇ yawˇ Liꞈ hpu henˇ leh hkʼa dehꞈ dawˇ nyi tuˬ awˬ yanˇ shaw teh sheˍ. Ngaˬ hui ve dawˇ hkʼaˇ keunˍ lawꞈ cawˇ lawꞈ ve cawˬ tuˬ, Yaˬhoˉvaˬ miˬ guiˬ hkʼoˆ lo yawˇ ve kanˉ hkʼaˇ htaꞈ cuˇ leh Liꞈ hpu hkʼaw daꞈ ve beˆ maˍ laˇ hkawˇ cawˬ tcuh laˇ ve yoˬ. Nawˬ ve chaw ceuˬ tawˇ hkawˇ hpfuhˆ nyi tuˬ laꞈ caˉ cawˬ tcuh laˇ ve yoˬ. Nawˬ ve chaw ceuˬ tawˇ hkawˇ hpfuhˆ nyi tuˬ laꞈ caˉ JW laiˉbaˍliˍ^® ehˆ leh Yaˬhoˉvaˬ ve Shaˉhkiˆhkanˍ ve chaw hpfuhˆ nyi tuˬ laꞈ caˉ hkʼaw hpfuhˆ nyi sheˍ. Chi awˬ gʼuˇ suhˍ htaˇ ve Mo˗ni˗kaˇ kʼawꞈ kʼoˆ ve, yawˇ ve dawˇ hkʼaˇ maˇ daꞈ ve htaꞈ yeunˇ hkanˍ gʼaˇ tuˬ, hpfuhˆ nyi tuˬ laꞈ caˉ hkʼaw daꞈ ve beˆ maˍ laˇ hkawˇ ca gʼa tuˬ yehˇ ve yoˬ. Tawˇ pa haˉ te kʼo, “beuꞈ ve” leh “hpfuhˆ ve” maˇ heˆ leh “ka tiꞈ yeˬ ve” htaꞈ hpfuhˆ nyi ve yoˬ. Yawˇ nyi ma sha htaˇ hkʼa gaˬ awˬ lawn chi teˇ hpaˍ htaꞈ hpfuhˆ nyi leh gʼaw ve yoˬ. Mo˗ni˗kaˇ kʼoˆ ve, “tanˬ hpfuhˆ nyi htaˇ ngaˬ nyi ma maˇ sha ve yoˬ. Yaꞈ hkʼaˇ, ngaˬ shiˍ gaˇ ve awˬ lawn htaꞈ mawˬ leh gʼaw˗oˬ htaˇ, Yaˬhoˉvaˬ ngaˬ htaꞈ kʼoˆ laˇ leh awˬ gʼaˇ peꞈ laˇ ve htaꞈ shuˍ ve tehꞈ dawˇ ve yoˬ. Ngaˬ hkʼaˬ hkʼe dawˇ ve htaꞈ Yaˬhoˉvaˬ shiˍ leh ngaˬ htaꞈ awˬ gʼaˇ peꞈ laˇ chehˇ ve tehꞈ dawˇ ve yoˬ.” Yaˬhoˉvaˬ chi hkʼe ga laˇ ve lehˬ nawˬ yonˍ yeˬ ve cawˬ leh keunˍ lawꞈ cawˇ lawꞈ ve dawˇ hkʼaˇ cawˬ tuˬ kaꞈ ga laˇ ve yoˬ. Hkʼe te leh, nawˬ nyi ma sha la ve yoˬ.—Chiˇ mvuh ve 119:143, 144.

YAˬHOˉVAˬ NAWˬ HTAꞈ AWˬ GʼAˇ PEꞈ LAˇ TUˬ YOˬ

10. Ngaˬ hui nyi ma naˬ jaˇ ve awˬ lawn gʼa hpuˇ peuˬ hkʼawꞈ nawˉ hkʼaˬ hkʼe dawˇ tuˬ te laˇ ve le?

¹⁰ Shoꞈ shaꞈ ve. Ngaˬ hui nyi ma naˬ jaˇ tuˬ awˬ lawn gʼa hpuˇ htaˇ, teˇ nyi nyi kʼo awˬ gʼaˇ nuˇ jaˇ leh teꞈ chiˉ kaꞈ maˇ te gaˇ˗o ve yoˬ. Gʼuiˇ enˍ daꞈ paˍ naˬ˗e ve hkʼa shuˍ hpehꞈ ve tehꞈ, ngaˬ hui dawˇ ve yoˬ. Chi awˬ gʼuˇ suhˍ htaˇ gʼuiˇ gehˬ gʼa ve htawˇ, chi teˇ hkui a yehˉ a yehˉ gʼa juˇ kʼai ve yoˬ. Leh ngaˬ hui hkʼa sha sha˗ehˬ te kʼai gʼa jaw ve htawˇ, chi teˇ hkui te maˇ gʼa˗o. Chi awˬ gʼuˇ suhˍ htaˇ ngaˬ hui laiˉ ceuˬ te gʼa ve htawˇ, chi teˇ hkui te maˇ gʼa˗o. Eˇliˇyaꞈ awˬ gʼaˇ peuˬ˗e leh teꞈ chiˉ maˇ te gaˇ˗o ve hkʼa shuˍ, ngaˬ hui kaꞈ maˇ te gaˇ˗o ve yoˬ. (1 Jawˇmawˇ 19:5-7) Ngaˬ hui chi hkʼe hpehꞈ ve kʼo, Yaˬhoˉvaˬ ngaˬ hui htaꞈ hkʼaˬ hkʼe ga laˇ tuˬ ka tiꞈ te taˍ laˇ ve le?

11. Yaˬhoˉvaˬ ngaˬ hui htaꞈ ga laˇ gʼa ve awˬ hkʼaˇ lehˬ aˬ htoꞈ ma le? (Chiˇ mvuh ve 94:18)

¹¹ Yaˬhoˉvaˬ aˬ htoꞈ ma te tuˬ le? Yawˇ ngaˬ hui htaꞈ awˬ gʼaˇ peꞈ laˇ tuˬ yoˬ tehꞈ ka tiꞈ te taˍ laˇ ve yoˬ. (Chiˇ mvuh ve 94:18 gʼaw sheˍ.) Gʼuiˇ enˍ daꞈ paˍ naˬ˗e leh yawˇ htaꞈ shu gʼawˬ sheh piˇ ve hkʼa shuˍ, ngaˬ hui Yaˬhoˉvaˬ ve kanˉ caˉ leh te kʼai gʼa tuˬ ngaˬ hui htaꞈ ga laˇ tuˬ loˍ ve yoˬ. Ngaˬ hui shoꞈ shaꞈ ve awˬ lawn gʼa hpuˇ htaˇ Yaˬhoˉvaˬ ngaˬ hui htaꞈ ka tiꞈ te laˇ ve, “ngaˬ lehˬ nawˬ hui ve Gʼuiˬsha hpehꞈ ve yoˬ. Ngaˬ nawˬ hui htaꞈ awˬ gʼaˇ peꞈ laˇ leh, chi hkʼe kʼoˆ laˇ ve yoˬ. Taˇ kawˆ. Ngaˬ nawˬ hui htaꞈ ga laˇ tuˬ yoˬ.” (Iˉsaˍyaˆ 41:13) Jawˇ mawˇ Daˍviˆ kaꞈ chi ve hkʼa shuˍ  ga piˇ ve htaꞈ gʼa ve yoˬ. Yawˇ shoꞈ shaꞈ ve gʼa hpuˇ jaˇ leh canˇ paˍ gʼaꞈ yuˬ piˇ htaˇ, yawˇ Yaˬhoˉvaˬ htaꞈ kʼoˆ ve, “nawˬ ngaˬ htaꞈ haꞈ shaˉ laˇ leh ponˬ laˇ ve yoˬ.” (Chiˇ mvuh ve 18:35) Yaꞈ hkʼaˇ, Yaˬhoˉvaˬ ngaˬ hui htaꞈ hkʼaˬ hkʼe haꞈ shaˉ laˇ tuˬ le?

12. Ngaˬ hui awˬ gʼaˇ nuˇ htaˇ ga laˇ tuˬ Yaˬhoˉvaˬ a shu htaꞈ yehˇ ve le?

¹² Yaˬhoˉvaˬ ngaˬ hui htaꞈ haꞈ shaˉ laˇ tuˬ ve teˇ hkʼaˇ lehˬ, yawˇ awˬ nu ve chaw ngaˬ hui htaꞈ ga laˇ tcuh ve yoˬ. Tawˇ pa haˉ te kʼo, Daˍviˆ awˬ gʼaˇ nuˇ htaˇ, Yawˇnaˆtanˍ Daˍviˆ geh laˬ leh awˬ gʼaˇ piˇ ve yoˬ. (1 Saˍmo˗eˍlaˆ 23:16, 17) Yaˬhoˉvaˬ Eˇliˇshehˇ htaꞈ cuˇ leh Eˇliˇyaꞈ htaꞈ ga piˇ tcuh ve yoˬ. (1 Jawˇmawˇ 19:16, 21; 2 Jawˇmawˇ 2:2) Chi beuˬ teˇ co˗e Yaˬhoˉvaˬ ngaˬ hui htaꞈ ga laˇ tuˬ yehˬ kʼa hkʼaw ve chaw, awˬ chawˇ maˇ heˆ leh, nyi haꞈ shaˉ paˍ htaꞈ yehˇ ve yoˬ. Yaꞈ hkʼaˇ, teˇ pawˆ pawˆ kʼo ngaˬ hui nyi ma naˬ jaˇ htaˇ, ngaˬ hui teˇ gʼaˇ˗ehꞈ kaꞈ maˇ mawˬ gaˇ leh teˇ gʼaˇ tiˉ chehˇ gaˇ ve yoˬ. Chi hkʼe dawˇ ve lehˬ a hkʼe leˇ hpehꞈ ve yoˬ. Leh ngaˬ hui Yaˬhoˉvaˬ ga laˇ ve htaꞈ gʼa tuˬ hkʼaˬ hkʼe gʼa te cawˇ ve le?

13. Yaˬhoˉvaˬ gu teh taˍ laˇ ve awˬ ceuˬ htaꞈ ngaˬ hui awˬ bon gʼa tuˬ hkʼaˬ hkʼe gʼa te cawˇ ve le? (Awˬ han htaꞈ nyi sheˍ.)

¹³ Ngaˬ hui aˬ htoꞈ ma gʼa te cawˇ ve le? Ngaˬ hui teˇ gʼaˇ tiˉ chehˇ gaˇ ve htawˇ, chi hkʼe taˇ te. Awˬ lawn kʼo, ngaˬ hui teˇ gʼaˇ tiˉ chehˇ htaˇ, ngaˬ hui maˇ daꞈ ve dawˇ hkʼaˇ cawˬ ve, a shu yawˇ awˬ to pon tiˉ dawˇ nyi la ve, ngaˬ hui gʼa hpuˇ chehˇ ve awˬ lawn htaꞈ tiˉ dawˇ nyi la ve, leh chi ngaˬ hui maˇ daꞈ ve htaꞈ te tuˬ dawˇ cheˆ la ve yoˬ. (Tawˇ naˉ ve 18:1) Ngaˬ hui shoꞈ shaꞈ ve awˬ lawn gʼa hpuˇ jaˇ htaˇ teˇ gʼaˇ tiˉ chehˇ gaˇ ve yoˬ. Yaꞈ hkʼaˇ, ngaˬ hui awˬ nu ve chaw htaꞈ maˇ mawˬ daꞈ leh teˇ gʼaˇ tiˉ chi maw maw chehˇ ve kʼo, Yaˬhoˉvaˬ awˬ nu ve chaw htaꞈ yehˇ leh ngaˬ hui htaꞈ ga laˇ ve maˇ gʼa la ve yoˬ. Chi htaꞈ pa taw, nawˬ awˬ pon haˍ jaˇ tehꞈ dawˇ ve htawˇ, yehˬ kʼa hkʼaw ve chaw, awˬ chawˇ maˇ heˆ leh nyi haꞈ shaˉ paˍ ga laˇ tcuh cawˇ ve yoˬ. Chi ve lehˬ, Yaˬhoˉvaˬ nawˬ htaꞈ ga laˇ ve awˬ hkʼaˇ hpehꞈ ve tehꞈ dawˇ sheˍ.—Tawˇ naˉ ve 17:17; Iˉsaˍyaˆ 32:1, 2.

YAˬHOˉVAˬ NAWˬ HTAꞈ AWˬ GʼAˇ PEꞈ LAˇ TUꞈ YOˬ

14. Ngaˬ hui kawˆ tuˬ te laˇ ve awˬ ceuˬ aˬ htoꞈ ma cawˬ ve le?

¹⁴ Shoꞈ shaꞈ ve. Teˇ pawˆ pawˆ kʼo, ngaˬ hui kawˆ tuˬ te laˇ ve awˬ lawn gʼa hpuˇ ve yoˬ. Liꞈ hpu hkʼaw Gʼuiˬ sha ve kanˉ ka tiꞈ yeˬ ve hkʼaw te ve chaw laiˉ gʼaˇ canˇ paˍ tawˍ piˇ ve, nyiˉ piˇ ve htaꞈ gʼa hpuˇ ve pa taw, dawˇ haˍ leh kawˆ ve yoˬ. (Chiˇ mvuh ve 18:4; 55:1, 5) Chi ve hkʼa shuˍ shuˍ, liꞈ henˇ kuiˬ, kanˉ te kuiˬ, yehˬ kʼa hkʼaw ve chaw leh, mvuhˇ miˬ kanˉ te paˍ tawˍ laˇ ve htaꞈ gʼa hpuˇ ve yoˬ. Maˇ heˆ leh ngaˬ hui naˬ jaˇ ve pa taw, suh la ve htaꞈ kaꞈ kawˆ ve yoˬ. Chi hkʼe gʼa hpuˇ htaˇ ngaˬ hui yaˇ ehˉ hkʼa shuˍ hpehꞈ leh kawˆ jaˇ ve pa taw, teꞈ chiˉ te maˇ gʼa ve yoˬ. Leh Yaˬhoˉvaˬ ngaˬ hui htaꞈ hkʼaˬ hkʼe ga laˇ gʼa tuˬ le?

15. Chiˇ mvuh ve liꞈ 94:19 hkʼaw ngaˬ hui htaꞈ aˬ htoꞈ ma ka tiꞈ te taˍ laˇ ve le?

¹⁵ Yaˬhoˉvaˬ aˬ htoꞈ ma te tuˬ le? Yaˬhoˉvaˬ ngaˬ hui htaꞈ awˬ gʼaˇ peꞈ laˇ leh ngaˬ hui nyi ma sha tuˬ  te laˇ ve yoˬ. (Chiˇ mvuh ve 94:19 gʼaw sheˍ.) Chiˇ mvuh ve liꞈ bvuhꞈ paˍ ve tawˇ hkawˇ lehˬ, yaˇ miˇ ehˉ tanˇ hkuinˇ htaˇ mvuhˇ tawˍ mvuhˇ htehˆ ve awˬ hkawˇ htaꞈ gʼa kaˇ leh kawˆ jaˇ ve pa taw, zuhꞈ maˇ gʼa ve hkʼe ngaˬ hui dawˇ nyi tuˬ te laˇ ve yoˬ. Oˇ ve teˇ yanˇ awˬ pa yawˇ ve bawehˇ hkʼaw loꞈ la leh, yawˇ ve yaˇ miˇ ehˉ zuhꞈ htaˇ hkʼa gaˬ kʼuˉ taˍ ve yoˬ. Oˇ ve teˇ yanˇ mvuhˇ tawˍ ve awˬ hkawˇ maˇ jehˇ sheˍ ve htawˇ awˬ pa kʼuˉ piˇ ve lehˬ, yaˇ miˇ ehˉ nyi ma sha tuˬ te piˇ ve yoˬ. Chi ve hkʼa shuˍ shuˍ, ngaˬ hui a shaꞈ teꞈ kuiˬ hkʼaw shoꞈ shaꞈ ve awˬ lawn gʼa hpuˇ jaˇ htaˇ, ngaˬ hui ve Awˬ pa Yaˬhoˉvaˬ ngaˬ hui nyi ma sha htaˇ hkʼa gaˬ kʼuˉ laˇ tuˬ htaꞈ loˍ ve yoˬ. Leh Gʼuiˬ sha ngaˬ hui htaꞈ awˬ gʼaˇ chi hkʼe ve hkʼaˬ hkʼe te peꞈ laˇ gʼa tuˬ le?

16. Yaˬhoˉvaˬ awˬ gʼaˇ peꞈ laˇ ve htaꞈ gʼa tuˬ ngaˬ hui hkʼaˬ hkʼe gʼa te cawˇ ve le? (Awˬ han htaꞈ nyi sheˍ.)

¹⁶ Ngaˬ hui aˬ htoꞈ ma gʼa te cawˇ ve le? Yaˬhoˉvaˬ geh bon lawˬ ve, Liꞈ hpu gʼaw ve awˬ yanˇ yehˇ sheˍ. (Chiˇ mvuh ve 77:1, 12-14) Nawˬ hkʼaˬ htaˆ kaꞈ chi hkʼe te ve kʼo, nawˬ dawˇ haˍ jaˇ htaˇ te ve awˬ ceuˬ lehˬ, nawˬ ve Awˬ pa Yaˬhoˉvaˬ ga laˇ tuˬ lawˬ ve yoˬ. Nawˬ aˬ htoꞈ ma htaꞈ kawˆ ve, leh aˬ htoꞈ ma awˬ lawn dawˇ haˍ ve, Gʼuiˬ sha htaꞈ kʼoˆ maˍ piˇ sheˍ. Gʼuiˬ sha Liꞈ hpu htaꞈ cuˇ leh ngaˬ hui htaꞈ tawˇ yaw leh awˬ gʼaˇ peꞈ laˇ tuˬ yoˬ. (Chiˇ mvuh ve 119:28) Nawˬ kawˆ ve htaꞈ yeunˇ hkanˍ gʼaˇ tuˬ ga laˇ gʼa ve, Liꞈ hpu awˬ tawn teˇ tawn tawn htaꞈ mawˬ tuˬ yoˬ. Nawˬ Yawˇbaˆ liꞈ, Chiˇ mvuh ve liꞈ, leh Tawˇ naˉ ve liꞈ gʼaw htaˇ, awˬ gʼaˇ gʼa tuˬ yoˬ. Nawˬ Yaˬhoˉvaˬ geh bon lawˬ leh Liꞈ hpu gʼaw htaˇ Maꞈhtehˍ liꞈ kaˇ nanˉ uiˍ 6 hkʼaw Yeˍsuˆ kʼoˆ ve tawˇ hkawˇ lehˬ, Gʼuiˬ sha nawˬ htaꞈ awˬ gʼaˇ peꞈ laˇ ve tehꞈ dawˇ tuˬ yoˬ.

17. Ngaˬ hui aˬ htoꞈ ma awˬ lawn htaꞈ yonˍ gʼa ve le?

¹⁷ Ngaˬ hui a shaꞈ teꞈ kuiˬ hkʼaw shoꞈ shaꞈ ve awˬ lawn gʼa hpuˇ jaˇ htaˇ, Yaˬhoˉvaˬ ngaˬ hui htaꞈ ga laˇ tuˬ yoˬ tehꞈ yonˍ gʼa ve yoˬ. Ngaˬ hui teˇ gʼaˇ tiˉ chehˇ ve maˇ heˆ tehꞈ yonˍ gʼa ve yoˬ. (Chiˇ mvuh ve 23:4; 94:14) Yaˬhoˉvaˬ ngaˬ hui htaꞈ haꞈ shaˉ laˇ ve, yonˍ yeˬ ve cawˬ tuˬ te laˇ ve, ga laˇ ve leh awˬ gʼaˇ peꞈ laˇ tuˬ yoˬ tehꞈ ka tiꞈ te taˍ laˇ ve yoˬ. Iˉsaˍyaˆ liꞈ 26:3 hkʼaw kʼoˆ ve, “Gʼuiˬ sha˗oˬ, nawˬ lehˬ nawˬ htaꞈ gʼaˇ va leh yonˍ ve chaw hui htaꞈ gawˬ lehˍ chehˇ tcuh piˇ ve yoˬ.” Chi htaꞈ pa taw, Yaˬhoˉvaˬ htaꞈ gʼaˇ va leh nawˬ htaꞈ ga laˇ tuˬ yawˇ gu teh taˍ laˇ ve awˬ ceuˬ htaꞈ haꞈ yuˬ sheˍ. Nawˬ chi hkʼe te ve kʼo, nawˬ a shaꞈ teꞈ kuiˬ hkʼaw shoꞈ shaꞈ ve gʼa hpuˇ jaˇ htaˇ, yonˍ yeˬ ve cawˬ tuˬ yoˬ.