1. Nawˬ Yaˬhoˉvaˬ htaꞈ kʼoˆ htaˇ hkʼaˬ hkʼe ve htaꞈ dawˇ mawˬ gʼa ve le?

 Yaˬhoˉvaˬ hkʼaˬ hkʼe hpehꞈ ve nawˬ dawˇ nyi jaw˗aw laˇ? Nawˬ bon lawˬ htaˇ yawˇ hkʼaˬ hkʼe hpehꞈ ve htaꞈ dawˇ nyi˗aw laˇ? Ngaˬ hui Yaˬhoˉvaˬ htaꞈ maˇ mawˬ gʼa ve htawˇ, yawˇ hkʼaˬ hkʼe hpehꞈ ve ngaˬ hui shiˍ tuˬ Liꞈ hpu hkʼaw maˍ laˇ ve yoˬ. Liꞈ hpu hkʼaw Yaˬhoˉvaˬ lehˬ, “ngaˬ hui htaꞈ haꞈ shaˉ laˇ shehˍ hpaˇ hpehꞈ” leh “toꞈ baˬ chehˇ ve aˬ miˍ” hkʼe hpehꞈ ve yoˬ. (Chiˇ mvuh ve 84:11; Heˍbrehˇ 12:29) Leh kʼawꞈ kʼoˆ sheˍ ve, Gʼuiˬ sha lehˬ shehnˉ shiˍ, hpu htaꞈ shi˗oꞈ taˍ ve, leh aˉ laˇ miˬ shiˉ jaw chi ve teˇ hpaˍ hkʼe hpehꞈ ve yoˬ. (Yeˍsaˍkeˍlaˆ 1:26-28) Yaꞈ hkʼaˇ, tawˇ hkawˇ teˇ ceuˬ ceuˬ kʼo ngaˬ hui kawˆ tuˬ te laˇ leh Gʼuiˬ sha geh jiˆ kʼai maˇ haˆ tehꞈ dawˇ ve yoˬ.

2. Yaˬhoˉvaˬ geh maˇ meuˆ daꞈ tuˬ aˬ htoꞈ ma te laˇ ve le?

² Ngaˬ hui Yaˬhoˉvaˬ htaꞈ maˇ mawˬ gʼa ve pa taw, yawˇ ngaˬ hui htaꞈ haꞈ ve tehꞈ yonˍ gʼa tuˬ haˍ ve yoˬ. Maˇ heˆ leh chaw teˇ hpaˍ dawˇ ve, Yaˬhoˉvaˬ yawˇ hui htaꞈ maˇ haꞈ laˇ taˬ. Awˬ lawn kʼo, yawˇ hui chaw teˇ gʼaˇ kaꞈ maˇ haꞈ piˇ jaw ve pa taw yoˬ. Yawˇ hui ve awˬ pa kaꞈ yawˇ hui htaꞈ maˇ haꞈ. Chi hkʼe dawˇ ve htaꞈ Yaˬhoˉvaˬ na gʼa leh, chi hkʼe ve dawˇ hkʼaˇ ngaˬ hui htaꞈ heuˆ la kuiˬ hkʼaˬ hkʼe cawˬ ve kaꞈ yawˇ shiˍ ve yoˬ. Chi htaꞈ pa taw, Yaˬhoˉvaˬ ngaˬ hui htaꞈ haꞈ ve tehꞈ shiˍ tuˬ, yawˇ ve te hkʼaˇ dawˇ hkʼaˇ Liꞈ hpu hkʼaw bvuhꞈ tcuh taˍ ve yoˬ.

3. Yaˬhoˉvaˬ haꞈ pehnˇ ve htaꞈ caˉ daꞈ ve aˬ htoꞈ ma te ngaˬ hui hkʼa dehꞈ dawˇ nyi cawˇ ve le?

³ Yaˬhoˉvaˬ htaꞈ caˉ daꞈ ve hkʼa dehꞈ kʼoˆ gʼa ve teˇ ceuˬ lehˬ, yawˇ haꞈ pehnˇ ve cawˬ ve yoˬ. Liꞈ hpu hkʼaw kʼoˆ ve, Gʼuiˬ sha lehˬ haꞈ pehnˇ ve teˇ ceuˬ hpehꞈ ve yoˬ. (1 Yoˇhanˬ 4:8) Yaˬhoˉvaˬ teˇ ceuˬ le le haꞈ pehnˇ ve hkʼaw te ve yoˬ. Yaˬhoˉvaˬ haꞈ pehnˇ ve uiˍ jaˇ leh yawˇ htaꞈ maˇ haꞈ ve chaw teˇ hpaˍ htaꞈ kaꞈ haꞈ ve tehꞈ hpeuꞈ maw piˇ ve yoˬ. (Maꞈhtehˍ 5:44, 45) Yaˬhoˉvaˬ leh yawˇ haꞈ pehnˇ ve htaꞈ caˉ daꞈ ve awˬ lawn chi ve hkʼaw ngaˬ hui teˇ geh henˇ tuˬ yoˬ. Ngaˬ hui Yaˬhoˉvaˬ htaꞈ hkʼa dehꞈ shiˍ daꞈ ve kʼo, yawˇ htaꞈ leuˉ leh haꞈ tuˬ kaꞈ teˇ geh henˇ tuˬ yoˬ.

YAˬHOˉVAˬ NGAˬ HUI HTAꞈ HAꞈ JAˇ

4. Yaˬhoˉvaˬ haꞈ pehnˇ ve nawˬ hkʼaˬ hkʼe dawˇ tuˬ te laˇ ve le? (Awˬ han htaꞈ nyi sheˍ.)

⁴ ‘Yaˬhoˉvaˬ lehˬ ha kʼaˉ puiˉ jaˇ ve yoˬ.’ (Yaˍkoˆ 5:11) Liꞈ hpu hkʼaw Yaˬhoˉvaˬ yawˇ awˬ to awˬ e yaˇ ehˉ htaꞈ haꞈ ve hk’e tehˆ taˍ ve yoˬ. (Iˉsaˍyaˆ  66:12, 13) Awˬ e yaˇ ehˉ cawˬ ve htaꞈ dawˇ nyi sheˍ. Yawˇ ve yaˇ ehˉ tehˉ kʼawꞈ hkʼaw taˆ taˍ leh tawˇ nuˇ lehˍ yaw piˇ ve yoˬ. Yaˇ naˬ leh hawˬ ve kʼo, haˆ beˬ piˇ leh nyi haꞈ shaˉ piˇ ve yoˬ. Chi ve hkʼa shuˍ shuˍ, ngaˬ hui naˬ leh dawˇ haˍ htaˇ, Yaˬhoˉvaˬ ngaˬ hui htaꞈ haꞈ ve pa taw ga laˇ tuˬ yoˬ tehꞈ yonˍ gʼa ve yoˬ. Chiˇ mvuh ve liꞈ bvuhꞈ paˍ kʼoˆ ve, “ngaˬ dawˇ haˍ leh nyi ma luˬ chehˇ ve teˇ yanˇ, nawˬ ngaˬ htaꞈ dawˇ sha laˇ leh, ha lehˬ tcuh laˇ ve yoˬ.”—Chiˇ mvuh ve 94:19.

5. Yaˬhoˉvaˬ haꞈ pehnˇ ve nawˬ hkʼaˬ hkʼe dawˇ tuˬ te laˇ ve le?

⁵ Yaˬhoˉvaˬ haꞈ pehnˇ ve co co yeˬ ve yoˬ. (Chiˇ mvuh ve 103:8) Ngaˬ hui te yaꞈ ve htawˇ, yawˇ ngaˬ hui htaꞈ haꞈ chehˇ sheˍ ve yoˬ. Iˉsaˍreˍlaˆ chaw Yaˬhoˉvaˬ nyi ma luˬ tuˬ laiˉ pawˆ te piˇ ve htawˇ, yawˇ hui venˇ baˆ dawˇ hpfuhˆ htaˇ yawˇ hui htaꞈ Yaˬhoˉvaˬ haꞈ ve tehꞈ hpeuꞈ maw piˇ ve yoˬ. Tawˇ pa haˉ te kʼo, yawˇ yawˇ hui htaꞈ kʼoˆ piˇ ve, “nawˬ hui lehˬ ngaˬ mehˆ gʼuˇ suhˍ lo awˬ hpfuhˇ hkʼaˆ jaˇ leh, ngaˬ awˬ meꞈ awˬ hponˇ piˇ taˍ ve chaw hpehꞈ ve pa taw, nawˬ hui ve a shaꞈ htaꞈ htaiˍ hkʼawꞈ laˇ tuˬ” yoˬ. (Iˉsaˍyaˆ 43:4, 5) Chi beuꞈ teˇ co˗e Yaˬhoˉvaˬ ha pehnˇ ve chi hkʼe ve cawˬ sheˍ ve tehꞈ hpeuꞈ maw laˇ ve pa taw, ngaˬ hui yawˇ htaꞈ yonˍ gʼa ve yoˬ. Leh ngaˬ hui uiˍ jaˇ ve venˇ baˆ htaꞈ te yaꞈ ve htawˇ, dawˇ hpfuhˆ ve kʼo, Yaˬhoˉvaˬ ngaˬ hui htaꞈ maˇ chiˇ baˬ laˇ taˬ. Yawˇ ngaˬ hui htaꞈ hkʼaˬ htaˆ kaꞈ haꞈ ve yoˬ. Yaˬhoˉvaˬ ka tiꞈ te laˇ ve, “yawˇ lehˬ ha kʼaˉ puiˉ leh venˇ baˆ hpehˇ piˇ puiˉ ve yoˬ.” (Iˉsaˍyaˆ 55:7) Yawˇ ngaˬ hui htaꞈ venˇ baˆ hpehˇ laˇ htaˇ, ngaˬ hui “dawˇ sha” la ve yoˬ.—Tcuh yaˇ 3:19.

6. Zaˍhkaˍriˆ liꞈ 2:8 hkʼaw Yaˬhoˉvaˬ htaꞈ caˉ daꞈ ve ngaˬ hui htaꞈ aˬ htoꞈ ma maˍ laˇ ve le?

⁶ Zaˍhkaˍriˆ liꞈ 2:8 gʼaw sheˍ. Yaˬhoˉvaˬ ngaˬ hui htaꞈ haꞈ jaˇ ve pa taw, yawˇ ngaˬ hui ve dawˇ hkʼaˇ htaꞈ na gʼa leh haꞈ shaˉ laˇ tuˬ yoˬ. Ngaˬ hui nyi ma naˬ ve kʼo, yawˇ kaꞈ nyi ma naˬ ve pa taw, ngaˬ hui ve bon lawˬ hkawˇ htaꞈ yawˇ hkʼawꞈ laˇ tuˬ yoˬ tehꞈ yonˍ gʼa ve yoˬ. Ngaˬ hui htaꞈ haꞈ shaˉ laˇ tuˬ yawˇ geh lawˬ ve kʼo, ‘yawˇ ve mehˆ shiˍ htaꞈ yawˇ haꞈ shaˉ taˍ ve hkʼe” haꞈ shaˉ laˇ tuˬ yoˬ. (Chiˇ mvuh ve 17:8) Awˬ to hkʼaw cawˬ ve awˬ hkʼeun hkʼa peu˗eˬ hkʼaw mehˆ shiˍ lehˬ a yeˇ uiˍ jaˇ. Chi htaꞈ pa taw, Yaˬhoˉvaˬ ngaˬ hui htaꞈ yawˇ ve mehˆ shiˍ hkʼe hpehꞈ ve tehꞈ tehˆ taˍ ve yoˬ. Yawˇ ngaˬ hui htaꞈ kʼoˆ laˇ chehˇ ve, ‘nawˬ hui htaꞈ a shu ca yaꞈ la ve kʼo, ngaˬ ve mawˇ awˬ hpfuhˇ hkʼaˆ jaˇ ve htaꞈ ca yaꞈ la ve hkʼe hpehꞈ ve yoˬ.’

7. Yaˬhoˉvaˬ ngaˬ hui htaꞈ haꞈ ve tehꞈ yonˍ gʼa tuˬ ngaˬ hui aˬ htoꞈ ma gʼa te cawˇ ve le?

⁷ Yaˬhoˉvaˬ nawˬ htaꞈ haꞈ jaˇ ve tehꞈ yonˍ gʼa tcuh gaˇ ve yoˬ. Yaꞈ hkʼaˇ, peuˬ laˬ htaˇ nawˬ shoꞈ shaꞈ ve awˬ lawn gʼa hpuˇ ve Gʼuiˬ sha nawˬ htaꞈ awˬ tehˬ tehˬ haꞈ ve laˇ tehꞈ, htawˇ dawˇ nawˬ dawˇ cawˬ tuˬ te laˇ ve htaꞈ yawˇ shiˍ ve yoˬ. Maˇ heˆ leh chi teˇ hkui shoꞈ shaꞈ ve awˬ lawn nawˬ gʼa hpuˇ chehˇ ve Gʼuiˬ sha nawˬ htaꞈ  haꞈ ve laˇ tehꞈ, maˇ yonˍ gʼa tuˬ te laˇ ve yoˬ. Hkʼe kʼo, Yaˬhoˉvaˬ haꞈ pehnˇ ve htaꞈ ngaˬ hui yonˍ gʼa tuˬ aˬ htoꞈ ma te laˇ ve le? Yeˍsuˆ, leuˆ yuˬ taˍ ve chaw, leh ngaˬ hui teˇ gʼaˇ le le htaꞈ Yaˬhoˉvaˬ haꞈ ve tehꞈ hkʼaˬ hkʼe hpeuꞈ maw laˇ ve teˇ geh nyi sheˍ.

YAˬHOˉVAˬ HAꞈ PEHNˇ VE HKʼAˬ HKʼE HPEUꞈ MAW LAˇ VE LE?

8. Yeˍsuˆ Yaˬhoˉvaˬ haꞈ pehnˇ ve htaꞈ aˬ htoꞈ ma te yonˍ gʼa ve le?

⁸ Yaˬhoˉvaˬ leh Yeˍsuˆ teˇ geh laiˉ lanˬ hkʼawꞈ chehˇ ve yoˬ. Hkʼe te leh, yawˇ huiˉ maˬ haꞈ daꞈ leh meuˆ daꞈ jaˇ. Maꞈhtehˍ liꞈ 17:5 hkʼaw Yaˬhoˉvaˬ ve tawˇ hkawˇ Yeˍsuˆ htaꞈ hkʼaˬ hkʼe taw haꞈ ve gʼa mawˬ ve yoˬ. Yaˬhoˉvaˬ ‘chaw chi teˇ gʼaˇ htaꞈ ngaˬ haꞈ jaˇ’ tehꞈ kʼoˆ ve ceh kaꞈ gʼa ve yoˬ. Yaꞈ hkʼaˇ, yawˇ chi hkʼe ceh tiˉ kʼoˆ ve maˇ heˆ. Yaˬhoˉvaˬ Yeˍsuˆ htaꞈ “chaw chi lehˬ, ngaˬ haꞈ jaˇ ve ngaˬ ve Yaˇ hpu hpehꞈ leh, yawˇ htaꞈ ngaˬ nyi hkʼaˇ suh jaˇ” tehꞈ kʼoˆ ve ngaˬ hui yonˍ gʼa tuˬ te laˇ ve yoˬ. Yaˬhoˉvaˬ Yeˍsuˆ htaꞈ nyi hkʼaˇ suh jaˇ leh Yeˍsuˆ ve a shaꞈ tanˇ laˇ ve htaꞈ kaꞈ nyi hkʼaˇ suh jaˇ ve yoˬ. (Eˇfeˇsuꞈ 1:7) Yaˬhoˉvaˬ Yeˍsuˆ htaꞈ hkʼaˬ hkʼe taw haꞈ ve Yeˍsuˆ shiˍ ve htaꞈ ngaˬ hui kaꞈ gʼa mawˬ ve yoˬ. Liꞈ hpu hkʼaw Yeˍsuˆ laiˉ pawˆ kʼoˆ ve, yawˇ ve Awˬ pa Yaˬhoˉvaˬ yawˇ htaꞈ haꞈ jaˇ.—Yoˇhanˬ 3:35; 10:17; 17:24.

9. Yaˬhoˉvaˬ leuˆ yuˬ taˍ ve chaw htaꞈ haꞈ ve tehꞈ aˬ htoꞈ ma hpeuꞈ maw laˇ ve le? Tawˇ pa haˉ kʼoˆ maˍ laˇ sheˍ. (Roˉmaꞈ 5:5)

⁹ Chi hkʼoˆ kaꞈ, Yaˬhoˉvaˬ leuˆ yuˬ taˍ ve chaw htaꞈ haꞈ ve tehꞈ hpeuꞈ maw piˇ sheˍ ve yoˬ. (Roˉmaꞈ 5:5 gʼaw sheˍ.) Liꞈ hpu htaꞈ caˉ daꞈ ve liꞈ kʼoˆ teˇ kʼoˆ hkʼaw kʼoˆ ve, “ngeuˍ keu ve” Liꞈ hpu chi teˇ tawn hkʼaw kʼoˆ ve lehˬ “iˉ kaˆ lawˬ yaꞈ la chehˇ ve htaꞈ dawˇ mawˬ tuˬ te laˇ ve” htaꞈ kʼoˆ gaˇ ve yoˬ. Tawˇ pa haˉ chi ve lehˬ, Yaˬhoˉvaˬ leuˆ yuˬ taˍ ve chaw htaꞈ hkʼaˬ hkʼe taw haꞈ ve ngaˬ hui dawˇ mawˬ tuˬ te laˇ ve yoˬ. Leh leuˆ yuˬ taˍ ve chaw kaꞈ Yaˬhoˉvaˬ yawˇ hui htaꞈ haꞈ ve tehꞈ shiˍ ve yoˬ. (Yuˇdaꞈ 1) Yoˇhanˬ leuˆ yuˬ taˍ ve chaw htaꞈ kʼoˆ ve, “Awˬ pa ngaˬ hui htaꞈ hkʼaˬ ma haꞈ ve htaꞈ dawˇ nyi˗o. Ngaˬ hui htaꞈ Gʼuiˬ sha ve awˬ yaˇ awˬ duˬ tehꞈ” kʼoˆ ve yoˬ. (1 Yoˇhanˬ 3:1) Yaꞈ hkʼaˇ, Yaˬhoˉvaˬ leuˆ yuˬ taˍ ve chaw htaꞈ ceh tiˉ haꞈ ve laˇ? Maˇ heˆ. Yawˇ ngaˬ hui teˇ gʼaˇ le le htaꞈ kaꞈ haꞈ ve yoˬ.

10. Yaˬhoˉvaˬ nawˬ htaꞈ haꞈ ve tehꞈ hkʼa tawˍ lehˆ mawˬ tuˬ aˬ htoꞈ ma hpeuꞈ maw laˇ ve le?

¹⁰ Yaˬhoˉvaˬ nawˬ htaꞈ haꞈ ve tehꞈ hkʼa tawˍ lehˆ mawˬ tuˬ aˬ htoꞈ ma hpeuꞈ maw laˇ ve le? Chi ve lehˬ htaiˍ hkʼawꞈ laˇ ve yoˬ. Ngaˬ hui htaꞈ haꞈ leh ngaˬ hui awˬ pon chi hkʼe taw taw te laˇ ve teˇ gʼaˇ˗ehˬ kaꞈ maˇ cawˬ. (Yoˇhanˬ 3:16; Roˉmaꞈ 5:8) Ngaˬ hui venˇ baˆ hpehˇ laˇ ve htaꞈ gʼa leh Yaˬhoˉvaˬ geh awˬ chawˇ kʼawꞈ te gʼa tuˬ, yawˇ haꞈ jaˇ ve Yaˇ paˍ teˇ gʼaˇ le le awˬ pon, suh tcuh laˇ ve yoˬ. (1 Yoˇhanˬ 4:10) Yaˬhoˉvaˬ leh Yeˍsuˆ ngaˬ hui awˬ pon hkʼaˬ hkʼe taw yuˬ tanˇ laˇ ve htaꞈ ngaˬ hui hkʼa dehꞈ dawˇ nyi htaˇ, yawˇ huiˉ maˬ ngaˬ hui htaꞈ haꞈ jaˇ ve tehꞈ gʼa shiˍ ve yoˬ. (Gaˍlaˍtiˆ 2:20) Htaiˍ hkʼawꞈ ve awˬ hpfuhˇ lehˬ, Yaˬhoˉvaˬ hteˇ ve cawˇ ve awˬ pon gu teh taˍ laˇ ve awˬ ceuˬ hpehꞈ ve maˇ heˆ. Yaꞈ hkʼaˇ, Yaˬhoˉvaˬ ngaˬ hui htaꞈ haꞈ jaˇ ve pa taw, ngaˬ hui htaꞈ laꞈ shawnˍ peꞈ laˇ tuˬ gu teh taˍ laˇ ve yoˬ. Yaˬhoˉvaˬ yawˇ awˬ pon awˬ hpfuhˇ hkʼaˆ jaˇ ve awˬ ceuˬ tanˇ laˇ ve lehˬ, ngaˬ hui htaꞈ haꞈ jaˇ ve tehꞈ hpeuꞈ maw laˇ ve yoˬ. Chi ve lehˬ, Yeˍsuˆ ve a shaꞈ hpehꞈ ve yoˬ. Yaˬhoˉvaˬ Yeˍsuˆ ve awˬ to ngaˬ hui awˬ pon tuꞈ ve hkanˍ ve hkʼaw suh˗e tcuh laˇ ve yoˬ.

11. Yeˍraˍmiˆ liꞈ 31:3 hkʼaw kʼoˆ taˍ ve hkʼe, ngaˬ hui htaꞈ aˬ htoꞈ ma maˍ laˇ ve le?

¹¹ Ngaˬ hui gʼa henˇ˗oˬ ve hkʼe, Yaˬhoˉvaˬ ngaˬ hui htaꞈ haꞈ ve ceh tiˉ maˇ heˆ. Yawˇ ngaˬ hui htaꞈ haꞈ ve tehꞈ hpeuꞈ maw laˇ ve yoˬ. (Yeˍraˍmiˆ 31:3 gʼaw sheˍ.) Leh Yaˬhoˉvaˬ ngaˬ hui htaꞈ haꞈ ve pa taw, ngaˬ hui yawˇ geh jiˆ laˬ tuˬ te laˇ ve yoˬ. (Bon maˍ ve liꞈ 7:7, 8 htaꞈ tehˆ daꞈ sheˍ.) Yaˬhoˉvaˬ ngaˬ hui htaꞈ maˇ haꞈ tuˬ teˇ ceuˬ˗ehˬ kaꞈ tawˍ piˇ maˇ gʼa. (Roˉmaꞈ 8:38, 39) Yaˬhoˉvaˬ haꞈ pehnˇ ve nawˬ hkʼaˬ hkʼe dawˇ tuˬ te laˇ ve le? Chiˇ mvuh ve liꞈ kaˇ nanˉ uiˍ 23 htaꞈ teˇ geh gʼaw leh Yaˬhoˉvaˬ Daˍviˆ htaꞈ haꞈ leh nyi haꞈ shaˉ piˇ ve htaꞈ awˬ bon hkʼaˬ hkʼe gʼa ve teˇ geh nyi sheˍ. Leh haꞈ pehnˇ ve chi hkʼe ve ngaˬ hui teˇ gʼaˇ le le awˬ pon awˬ bon hkʼaˬ hkʼe cawˬ ve htaꞈ kaꞈ teˇ geh nyi sheˍ.

YAˬHOˉVAˬ HAꞈ PEHNˇ VE NAWˬ HKʼAˬ HKʼE DAWˇ TUˬ TE LAˇ VE LE?

12. Chiˇ mvuh ve liꞈ kaˇ nanˉ uiˍ 23 hkʼaw ngaˬ hui htaꞈ aˬ htoꞈ ma kʼoˆ laˇ ve le?

¹² Chiˇ mvuh ve liꞈ 23:1-6 gʼaw sheˍ. Chiˇ mvuh ve liꞈ kaˇ nanˉ uiˍ 23 hkʼaw Yaˬhoˉvaˬ haꞈ pehnˇ ve, leh  nyi haꞈ shaˉ laˇ ve htaꞈ yonˍ gʼa tuˬ hpeuꞈ maw laˇ ve yoˬ. Daˍviˆ lehˬ Chiˇ mvuh ve liꞈ chi teˇ puꞈ bvuhꞈ paˍ hpehꞈ ve yoˬ. Yawˇ kʼoˆ ve, Yaˬhoˉvaˬ lehˬ yawˬ hawˉ shehˍ hpaˇ hpehꞈ leh yawˇ Yaˬhoˉvaˬ geh meuˆ daꞈ ve yoˬ. Daˍviˆ kʼoˆ ve, Yaˬhoˉvaˬ yawˇ htaꞈ sheh kʼai laˇ chehˇ ve pa taw, yawˇ kawˆ tuˬ maˇ cawˬ ve tehꞈ dawˇ ve yoˬ. Leh Daˍviˆ kaꞈ Yaˬhoˉvaˬ htaꞈ hkʼa dehꞈ yonˍ gʼa ve yoˬ. Yawˇ a shaꞈ teꞈ chehˇ ve teˇ co˗e Yaˬhoˉvaˬ yawˇ htaꞈ haꞈ ve tehꞈ hpeuꞈ maw laˇ chehˇ ve htaꞈ gʼa shiˍ ve yoˬ. Leh Daˍviˆ chi hkʼe taw taw yonˍ gʼa tuˬ aˬ htoꞈ ma te piˇ ve le?

13. Daˍviˆ Yaˬhoˉvaˬ yawˇ htaꞈ ga laˇ chehˇ ve tehꞈ yonˍ gʼa tuˬ aˬ htoꞈ ma te piˇ ve le?

¹³ “Ngaˬ loˍ ve awˬ ceuˬ hkʼa peu˗eˬ htaꞈ gʼa taˍ peuˬ.” Daˍviˆ loˍ ve awˬ ceuˬ hkʼa peu˗eˬ Yaˬhoˉvaˬ ga laˇ chehˇ ve tehꞈ gʼa mawˬ ve yoˬ. Yaˬhoˉvaˬ lehˬ Daˍviˆ ve awˬ chawˇ hpehꞈ leh yawˇ htaꞈ nyi hkʼaˇ suh jaˇ ve tehꞈ gʼa mawˬ ve yoˬ. Chi ve htaꞈ pa taw, Daˍviˆ awˬ gʼuˇ suhˍ hpawˇ aˬ htoꞈ ma gʼa hpuˇ ve htawˇ maˇ kʼoˆ, yawˇ loˍ ve awˬ ceuˬ Yaˬhoˉvaˬ ga laˇ tuˬ yoˬ tehꞈ yonˍ gʼa ve yoˬ. Yaˬhoˉvaˬ Daˍviˆ htaꞈ haꞈ leh hkʼa dehꞈ nyi haꞈ shaˉ laˇ tuˬ yoˬ tehꞈ yonˍ gʼa ve pa taw, yawˇ awˬ gʼaˇ cawˬ ve, ha lehˬ ve, leh teꞈ chiˉ kaꞈ maˇ dawˇ haˍ tuˬ te piˇ ve yoˬ.—Chiˇ mvuh ve 16:11.

14. Yaˬhoˉvaˬ ngaˬ hui htaꞈ hkʼaˬ hkʼe hpawˇ ga laˇ chehˇ ve le?

¹⁴ Ngaˬ hui a shaꞈ teꞈ kuiˬ hkʼaw shoꞈ shaꞈ ve awˬ lawn gʼa hpuˇ htaˇ, Yaˬhoˉvaˬ ngaˬ hui htaꞈ haꞈ leh nyi haꞈ shaˉ laˇ tuˬ yoˬ. Awˬ viˉ awˬ nyi yaˇ miˇ Hkehn ve awˬ lawn htaꞈ teˇ geh nyi sheˍ. a Yawˇ Beˍteˍlaˆ hkʼaw 20 hkʼawꞈ hpaˆ kanˉ te˗oˬ ve yoˬ. Yaꞈ hkʼaˇ, yawˇ ve yehˬ kʼa hkʼaw ve chaw shoꞈ shaꞈ ve laiˉ ceuˬ gʼa hpuˇ ve yoˬ. Yawˇ yawˇ hui htaꞈ hkʼaˬ hkʼe ga piˇ tuˬ maˇ shiˍ. Tawˇ pa haˉ te kʼo, yawˇ ve awˬ pa uˉ nawꞈ nehˆ hkʼaw ve awˬ suhˍ caˆ peꞈ˗e ve, awˬ nyi ma htaꞈ Hkriꞈ yaˇ awˬ moˍ hkʼaw tawˆ cheˆ piˇ ve, leh yawˇ hui ve yehˬ kʼa hkʼaw ve tanˇ kaˍ hkʼaˇ kaꞈ caˉ leh te kʼai maˇ gʼa˗o. Yehˬ awˬ hpfuhˇ piˇ maˇ gʼa leh shu yuˬ hkʼawꞈ ve yoˬ. Leh Yaˬhoˉvaˬ yawˇ hui ve yehˬ kʼa htaꞈ hkʼaˬ hkʼe nyi haꞈ shaˉ piˇ ve le? Hkehn kʼoˆ ve, “Yaˬhoˉvaˬ lehˬ ngaˬ ve yehˬ kʼa loˍ ve awˬ ceuˬ teˇ nyi le le nyi haꞈ shaˉ laˇ chehˇ ve yoˬ. Teˇ  pawˆ pawˆ kʼo, ngaˬ maˇ dawˇ gʼa ve awˬ leuˉ kaꞈ yawˇ peꞈ laˇ chehˇ ve htaꞈ gʼa mawˬ ve yoˬ. Yaˬhoˉvaˬ ngaˬ htaꞈ haꞈ leh ngaˬ awˬ pon te laˇ ve awˬ ceuˬ htaꞈ ngaˬ dawˇ nyi gaˇ ve yoˬ. Chi ve ngaˬ maˇ leunˇ jaw. Awˬ lawn chi ve teˇ hpaˍ htaꞈ dawˇ nyi htaˇ, ngaˬ shoꞈ shaꞈ ve htaꞈ ponˬ kʼai gʼa tuˬ ga laˇ ve yoˬ.”

15. Aˬ htoꞈ ma te Daˍviˆ awˬ gʼaˇ awˬ shaˉ awˬ suhˉ kʼawꞈ cawˬ ve le? (Awˬ han htaꞈ nyi sheˍ.)

¹⁵ “Yawˇ ngaˬ htaꞈ awˬ gʼaˇ awˬ shaˉ awˬ suhˉ piˇ laˇ” ve yoˬ. Teˇ pawˆ pawˆ kʼo, Daˍviˆ shoꞈ shaꞈ ve laiˉ ceuˬ gʼa hpuˇ ve pa taw, dawˇ haˍ jaˇ. (Chiˇ mvuh ve 18:4-6) Yaꞈ hkʼaˇ, Yaˬhoˉvaˬ yawˇ htaꞈ haꞈ leh nyi haꞈ shaˉ piˇ ve lehˬ, yawˇ awˬ gʼaˇ awˬ shaˉ awˬ suhˉ kʼawꞈ cawˬ ve yoˬ. Yaˬhoˉvaˬ ve awˬ chawˇ Daˍviˆ awˬ gʼaˇ nuˇ htaˇ, “mvuhꞈ nawˉ lehˍ cawˬ ve” leh “kehˬ daꞈ ve iˉ kaˆ gʼuiˬ po” lo shiˍ kʼai piˇ ve yoˬ. Hkʼe te leh, Daˍviˆ awˬ gʼaˇ teˇ pawˆ kʼawꞈ cawˬ la ve yoˬ. Leh yawˇ ha lehˬ ha kʼa ve hkʼaw Yaˬhoˉvaˬ ve kanˉ te kʼai gʼa ve yoˬ.—Chiˇ mvuh ve 18:28-32.

16. Yaˬhoˉvaˬ haꞈ pehnˇ ve nawˬ awˬ gʼaˇ awˬ shaˉ awˬ suhˉ kʼawꞈ cawˬ tuˬ aˬ htoꞈ ma te laˇ ve le?

¹⁶ Chi beuꞈ teˇ co˗e kaꞈ hkʼa shuˍ shuˍ, ngaˬ hui a shaꞈ teꞈ kuiˬ hkʼaw shoꞈ shaꞈ ve gʼa hpuˇ htaˇ Yaˬhoˉvaˬ lehˬ, “hkʼaˬ htaˆ kaꞈ haꞈ pehnˇ uiˍ jaˇ leh ha kʼaˉ puiˉ jaˇ ve” htaꞈ ngaˬ hui gʼa mawˬ ve yoˬ. (Dawˇ haˍ ve 3:22; Kawˇlawˇsehˇ 1:11) La˗hki˗laˆ ve awˬ lawn htaꞈ teˇ geh nyi sheˍ. A naˍ 19 ve awˬ yanˇ htaˇ, yawˇ ve awˬ hpawˇ yawˇ leh Yaˬhoˉvaˬ htaꞈ baˬ taˉ piˇ ve pa taw, yawˇ nyi ma naˬ jaˇ ve yoˬ. Leh Yaˬhoˉvaˬ yawˇ htaꞈ hkʼaˬ hkʼe ga piˇ ve le? Yawˇ kʼoˆ ve, “Yaˬhoˉvaˬ yawˇ ngaˬ htaꞈ haꞈ ve tehꞈ yonˍ gʼa tuˬ ga laˇ ve yoˬ. Yaˬhoˉvaˬ ngaˬ htaꞈ nyi haꞈ shaˉ laˇ chehˇ ve tehꞈ hkʼaˬ htaˆ kaꞈ awˬ gʼaˇ peꞈ laˇ chehˇ ve lehˬ, yawˇ ngaˬ awˬ chawˇ cawˬ tuˬ te laˇ ve, caˇ tuˬ yuˬ vuiˬ laˇ ve, awˬ hkʼeun hkʼaw liꞈ bvuhꞈ feu laˇ ve, leh awˬ gʼaˇ gʼa tuˬ Liꞈ hpu awˬ tawn bvuhꞈ laˇ ve, ngaˬ htaꞈ kʼehˉ suhˍ lehˍ te laˇ ve, yawˇ chi ve teˇ hpaˍ htaꞈ cuˇ ve yoˬ. Haꞈ lu diˬ ve yehˬ kʼa lonˉ chi hkʼe ve hkʼaw ngaˬ gʼa chehˇ ve Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ.”

17. Aˬ htoꞈ ma te Daˍviˆ yawˇ “kawˆ tuˬ ve maˇ heˆ” tehꞈ kʼoˆ ve le?

¹⁷ “Ngaˬ kawˆ tuˬ ve maˇ heˆ. Awˬ lawn kʼo nawˬ ngaˬ geh chehˇ taˍ ve yoˬ.” Daˍviˆ laiˉ pawˆ kʼo kawˆ tuˬ gʼa hpuˇ ve yoˬ. Leh yawˇ aꞈ kehˉ awˬ gʼaˇ uiˍ ve canˇ paˍ htaꞈ kaꞈ gʼa tawˍ daꞈ ve yoˬ. Yaꞈ hkʼaˇ, Yaˬhoˉvaˬ haꞈ pehnˇ ve Daˍviˆ kawˆ ve maˇ cawˬ tuˬ te piˇ ve yoˬ. Hkʼaˬ htaˆ kaꞈ Yaˬhoˉvaˬ yawˇ geh chehˇ ve tehꞈ yawˇ yonˍ gʼa ve yoˬ. Leh chi ve Yaˬhoˉvaˬ yawˇ htaꞈ haꞈ shaˉ laˇ gʼa tuˬ yoˬ tehꞈ yawˇ yonˍ gʼa tuˬ te piˇ ve yoˬ. Daˍviˆ kʼa muiˬ hkawˇ kʼa leh kʼoˆ ve, “ngaˬ kawˆ ve hkʼa peu˗eˬ awˬ hkʼaw lo yawˇ ngaˬ htaꞈ ponˬ laˇ ve yoˬ.” (Chiˇ mvuh ve 34:4) Teˇ pawˆ pawˆ kʼo Daˍviˆ kawˆ jaˇ ve htawˇ, Yaˬhoˉvaˬ yawˇ htaꞈ haꞈ ve tehꞈ shiˍ ve pa taw maˇ kawˆ˗o.

18. Nawˬ kawˆ ve tehꞈ dawˇ htaˇ Yaˬhoˉvaˬ haꞈ pehnˇ ve nawˬ htaꞈ hkʼaˬ hkʼe ga laˇ ve le?

¹⁸ Ngaˬ hui kawˆ ve gʼa hpuˇ htaˇ, Yaˬhoˉvaˬ ve haꞈ pehnˇ ve ngaˬ hui htaꞈ hkʼaˬ hkʼe ga laˇ ve le? Gʼuˇ suhˍ peu ve Su˗seˇ yawˇ ve yaˇ paˍ yawˇ hkʼaˇ yawˇ tiˇ pehˍ htaˇ, yawˇ ve awˬ hpawˇ leh yawˇ hkʼaˬ hkʼe dawˇ ve awˬ lawn kʼoˆ maˍ laˇ ve yoˬ. Yawˇ kʼoˆ ve, “maˇ dawˇ maˇ gaˇ ve awˬ lawn chi hkʼe gʼa hpuˇ htaˇ ngaˬ  hui cheˆ˗ehꞈ kʼai leh teꞈ chiˉ te tuˬ maˇ shiˍ ve yoˬ. Chi aꞈ kehˉ uiˍ ve awˬ lawn gʼa kʼawꞈ hpuˇ la ve htaꞈ ngaˬ hui kawˆ ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ ha kʼaˉ jaˇ ve tehꞈ gʼa shiˍ ve yoˬ. Chi ve ngaˬ nyi ma gawˬ lehˍ cawˬ tuˬ te laˇ ve yoˬ.” Chi awˬ gʼuˇ suhˍ htaˇ ve La˗hki˗laˆ kʼawꞈ kʼoˆ ve, “teˇ haˉ htaˇ ngaˬ nyi ma luˬ jaˇ ve yoˬ. Ngaˬ kawˆ leh dawˇ haˍ jaˇ ve yoˬ. Ngaˬ hawˬ leh Yaˬhoˉvaˬ ga laˇ tuˬ bon lawˬ ve yoˬ. Teˇ hkui ceh tiˉ kaꞈ awˬ e yaˇ ehˉ htaꞈ beˬ piˇ ve hkʼa shuˍ, Yaˬhoˉvaˬ ngaˬ htaꞈ awˬ gʼaˇ peꞈ laˇ ve yoˬ. Hkʼe te leh, ngaˬ nyi ma gawˬ lehˍ cawˬ leh zuhꞈ gʼa ve yoˬ. Oˇ ve teˇ haˉ htaꞈ ngaˬ maˇ leunˇ jaw.” Nyi haꞈ shaˉ paˍ Hta˗so maꞈ yaˇ maˇ te ve pa taw, htawnˍ hkʼaw lo 4 hkʼawꞈ gʼa chehˇ ve yoˬ. Yaˬhoˉvaˬ yawˇ htaꞈ haꞈ leh nyi haꞈ shaˉ piˇ ve htaꞈ hkʼaˬ hkʼe gʼa ve le? Yawˇ kʼoˆ ve, “Yaˬhoˉvaˬ lehˬ ngaˬ loˍ ve aꞈ kehˉ yawˇ peꞈ laˇ ve pa taw, ngaˬ yawˇ htaꞈ gʼaˇ hkʼa dehꞈ va ve tehꞈ yonˍ tuˬ te laˇ ve yoˬ. Leh Yaˬhoˉvaˬ daꞈ kehˬ ve awˬ ha hpu ngaˬ htaꞈ peꞈ laˇ sheˍ ve yoˬ. Chi hkʼe ve hkʼaw ngaˬ gʼa chehˇ ve htawˇ, ngaˬ ha lehˬ ve cawˬ tuˬ te laˇ ve yoˬ. Hkʼe te leh, ngaˬ Yaˬhoˉvaˬ htaꞈ gʼaˇ hkʼa dehꞈ va ve kʼo, yawˇ ngaˬ htaꞈ haꞈ ve tehꞈ shiˍ tuˬ te laˇ ve pa taw, ngaˬ htawnˍ hkʼaw chehˇ htaˇ kaꞈ hkʼaˬ htaˆ kaꞈ gʼuˇ suhˍ peuˍ ve te ve yoˬ.”

NAWˬ HTAꞈ HAꞈ VE GʼUIˬ SHA GEH JIˆ LAˬ˗Oꞈ

19. (a) Yaˬhoˉvaˬ ngaˬ hui htaꞈ haꞈ ve tehꞈ shiˍ htaˇ bon hkʼaˬ hkʼe lawˬ tuˬ ve le? (b) Nawˬ dawˇ cawˇ jaˇ ve Yaˬhoˉvaˬ ve haꞈ pehnˇ ve htaꞈ caˉ daꞈ ve hkʼaˬ ve teˇ tawn le? (Awˇ ceˍ awˇ fa “ Yaˬhoˉvaˬ ngaˬ hui htaꞈ haꞈ ve tehꞈ shiˍ tuˬ maˍ laˇ ve Liꞈ hpu awˬ tawn” htaꞈ nyi sheˍ.)

¹⁹ Hpehꞈ laˬ jaw ve awˬ lawn ngaˬ hui gʼa henˇ˗oˬ ve hkʼe, Yaˬhoˉvaˬ lehˬ ‘haꞈ pehnˇ ve Gʼuiˬ sha hpehꞈ’ leh ngaˬ hui geh chehˇ ve tehꞈ gʼa mawˬ ve yoˬ. (2 Kawˇrenˍhtuˆ 13:11) Yaˬhoˉvaˬ ngaˬ hui teˇ gʼaˇ leh teˇ gʼaˇ htaꞈ a yeˇ yuˬ laˇ ve yoˬ. “Yawˇ ve haꞈ pehnˇ ve teˇ ceuˬ” ngaˬ hui htaꞈ peꞈ laˇ ve tehꞈ yonˍ gʼa ve yoˬ. (Chiˇ mvuh ve 32:10) Yaˬhoˉvaˬ ngaˬ hui htaꞈ haꞈ ve awˬ hkʼaˇ htaꞈ caˉ daꞈ ve ngaˬ hui hkʼa dehꞈ dawˇ nyi htaˇ, yawˇ ngaˬ hui htaꞈ dawˇ haˍ ve tehꞈ hkʼa dehꞈ yonˍ gʼa ve yoˬ. Chi ve ngaˬ hui yawˇ geh hkʼa dehꞈ meuˆ daꞈ tuˬ te laˇ ve yoˬ. Ngaˬ hui bon lawˬ ve hkʼaw teˇ lawn le le Yaˬhoˉvaˬ htaꞈ kʼoˆ maˍ piˇ gʼa ve yoˬ. Yawˇ ngaˬ hui htaꞈ hkʼaˬ hkʼe taw haꞈ tcuh gaˇ ve kaꞈ kʼoˆ piˇ leh, ngaˬ hui aˬ htoꞈ ma awˬ lawn dawˇ haˍ ve kaꞈ kʼoˆ piˇ gaˇ ve yoˬ. Yaˬhoˉvaˬ ngaˬ hui ve dawˇ hkʼaˇ htaꞈ na gʼa leh ga laˇ gaˇ jaˇ ve tehꞈ ngaˬ hui yonˍ gʼa ve yoˬ.—Chiˇ mvuh ve 145:18, 19.

20. Aˬ htoꞈ ma te ngaˬ hui Yaˬhoˉvaˬ haꞈ laˇ ve htaꞈ gʼa gaˇ ve le?

²⁰ Kaˆ jaˇ ve awˬ nyi htaˇ, ngaˬ hui ve awˬ to lehˬ lehˬ cawˬ tuˬ aˬ miˍ lehˬ gaˇ ve yoˬ. Chi ve hkʼa shuˍ shuˍ, ngaˬ hui a shaꞈ teꞈ kuiˬ hkʼaw shoꞈ shaꞈ ve leh tuˬ ve hkanˍ ve gʼa hpuˇ htaˇ, Yaˬhoˉvaˬ ngaˬ hui htaꞈ ga laˇ gʼa tuˬ ngaˬ hui yawˇ awˬ paˇ lo chehˇ gaˇ ve yoˬ. Chi htaꞈ pa taw, Yaˬhoˉvaˬ haꞈ pehnˇ ve nawˬ gawˬ lehˍ ve cawˬ tuˬ te laˇ ve htaꞈ ha lehˬ sheˍ. Teˇ gʼaˇ le le haꞈ pehnˇ ve chi htaꞈ haꞈ yuˬ leh ‘ngaˬ Yaˬhoˉvaˬ htaꞈ haꞈ ve’ tehꞈ kʼoˆ sheˍ!—Chiˇ mvuh ve 116:1.