1. Ngaˬ hui Yaˬhoˉvaˬ ve Shaˉhkiˆhkanˍ ve chaw gʼa hpehꞈ ve aˬ htoꞈ ma te nyi hkʼaˇ suh leh ha lehˬ jaˇ ve le?

 Ngaˬ hui Yaˬhoˉvaˬ ve Shaˉhkiˆhkanˍ ve chaw gʼa hpehꞈ ve leh yawˇ ve awˬ meh htaꞈ gʼa yehˇ ve nyi hkʼaˇ suh leh ha lehˬ jaˇ. Ngaˬ hui Shaˉhkiˆhkanˍ ve chaw hpehꞈ ve tehꞈ mawˬ tcuh tuˬ, hto toˇ leh shu awˬ laꞈ gʼawˇ hpehꞈ la tuˬ maˍ piˇ ve yoˬ. “Co tiꞈ ha tiꞈ htaꞈ gʼa tuˬ awˬ pon hkʼa fuiˍ taˍ ve chaw hui lehˬ yonˍ la” leh awˬ laꞈ gʼawˇ hpehꞈ la tuˬ ngaˬ hui gʼa ga piˇ ve ha lehˬ jaˇ. (Tcuh yaˇ 13:48) Yeˍsuˆ ve awˬ laꞈ gʼawˇ yawˇ hui bon maˍ toˇ ve awˬ lawn Yeˍsuˆ htaꞈ kʼoˆ piˇ peuˬ hkʼawꞈ nawˉ, “Yeˍsuˆ lehˬ, daꞈ ve kehˬ ve Awˬ ha hpu awˬ hkʼaw lo ha lehˬ” ve yoˬ. Chi beuꞈ teˇ co˗e ngaˬ hui kaꞈ chi ve hkʼa shuˍ dawˇ ve yoˬ.—Luˉkaꞈ 10:1, 17, 21.

2. Hto toˇ ve kanˉ ngaˬ hui awˬ pon a yeˇ uiˍ jaˇ ve tehꞈ hpeuꞈ maw piˇ tuˬ hkʼaˬ hkʼe te gʼa ve le?

² Hto toˇ ve kanˉ a yeˇ uiˍ jaˇ ve tehꞈ ngaˬ hui shawˍ ve yoˬ. Tcuh yaˇ Pawˇluꞈ Tiˆmoˉseˍ htaꞈ kʼoˆ piˇ ve, ‘nawˬ awˬ to htaꞈ maˇ kʼoˆ, nawˬ maˍ piˇ ve awˬ ceuˬ teˇ hpaˍ htaꞈ maˇ kʼoˆ, shaˍ tiꞈ te chehˇ˗oˆ. Nawˬ chi hkʼe te ve kʼo, nawˬ awˬ to htaꞈ maˇ kʼoˆ, nawˬ ve hkawˇ htaꞈ gʼa kaˇ ve chaw teˇ hpaˍ htaꞈ maˇ kʼoˆ, nawˬ htaiˍ hkʼawꞈ piˇ tuˬ yoˬ.’ (1 Tiˆmoˉseˍ 4:16) Hto toˇ ve kanˉ lehˬ, shu ve a shaꞈ htaꞈ ga piˇ ve yoˬ. Ngaˬ hui Gʼuiˬ sha ve chaw hpehꞈ ve pa taw, ngaˬ hui awˬ to htaꞈ a yeˇ gʼa yuˬ cawˇ ve yoˬ. Ngaˬ hui shu htaꞈ maˍ piˇ ve hkʼa shuˍ gʼaꞈ te gaˇ leh Yaˬhoˉvaˬ chiˇ uiˍ chiˇ mvuh ve htaꞈ gʼa tuˬ te gaˇ ve yoˬ. (Hpiˇliˇpiˆ 1:27) Ngaˬ hui maˇ hto toˇ˗e sheˍ htaˇ hkʼa dehꞈ gu leh Yaˬhoˉvaˬ ga laˇ tuˬ lawˬ ve lehˬ, ‘ngaˬ hui maˍ ve htaꞈ a yeˇ yuˬ ve’ tehꞈ hpeuꞈ maw piˇ ve yoˬ.

3. Ngaˬ hui hto toˇ˗e htaˇ teˇ gʼaˇ le le dawˇ cawˇ˗aw laˇ? Tawˇ pa haˉ kʼoˆ maˍ laˇ sheˍ.

³ Ngaˬ hui hkʼa dehꞈ hto toˇ˗oˬ ve htawˇ, ngaˬ hui kʼoˆ piˇ ve awˬ ceuˬ htaꞈ chaw yaˇ maˇ na leh a yeˇ maˇ yuˬ laˇ ve yoˬ. Awˬ viˉ awˬ nyi Kehˬ Law˗dawˬ ve awˬ lawn htaꞈ teˇ geh nyi sheˍ. 1929 hkʼawꞈ te leh 1947 hkʼawꞈ hkʼa gaˬ, yawˇ teˇ gʼaˇ tiˉ Aiˆsuh˗lehˇ mvuhˇ miˬ lo hto toˇ ve yoˬ. Yawˇ liꞈ kʼoˆ laiˉ meunˍ kʼoˆ piˇ ve htawˇ, Shaˉhkiˆhkanˍ ve chaw hpehꞈ la ve maˇ cawˬ. Yawˇ kʼoˆ ve, “maˇ˗awˍ ve chaw awˬ tehˬ ve htaꞈ maˇ dawˇ cawˇ leh teˇ hpaˍ hpaˍ kʼo tawˍ laˇ ve yoˬ.” Miˍshenˍnaˍliˍ henˇ peuˬ˗oˬ  ve chaw oˇ kaˬ lo ca ga la ve htawˇ, Aiˆsuh˗lehˇ chaw Yaˬhoˉvaˬ htaꞈ awˬ to chiˇ aꞈ leh Baˆtiˆsaˬ haꞈ yuˬ tuˬ 9 hkʼawꞈ gʼa law sheˍ ve yoˬ. *

4. Awˬ tehˬ ve htaꞈ shu maˇ dawˇ cawˇ htaˇ ngaˬ hui hkʼaˬ hkʼe dawˇ ve le?

⁴ Ngaˬ hui hto toˇ˗e htaˇ shu maˇ dawˇ cawˇ ve maˇ heˆ leh Liꞈ hpu henˇ ve chaw maˇ uiˍ la mvuh la ve kʼo, ngaˬ hui nyi ma luˬ ve yoˬ hehˉ. Yuˇdaꞈ chaw maˇ˗awˍ ve Yeˍsuˆ htaꞈ Meˍsiˉyaꞈ hpehꞈ ve tehꞈ maˇ haꞈ yuˬ htaˇ, Pawˇluꞈ hkʼa shuˍ ngaˬ hui kaꞈ dawˇ ve yoˬ. Yawˇ kʼoˆ ve ‘ngaˬ ve nyi ma awˬ hkʼaw lo dawˇ haˍ jaˇ leh haw haw chiˆ chiˆ cawˬ ve yoˬ.’ (Roˉmaꞈ 9:1-3) Nawˬ geh Liꞈ hpu henˇ chehˇ ve chaw nawˬ yawˇ htaꞈ hkʼa dehꞈ ga piˇ ve, yawˇ awˬ pon bon lawˬ piˇ ve htawˇ yawˇ maˇ uiˍ la mvuh la leh nawˬ yawˇ htaꞈ Liꞈ hpu maˇ maˍ piˇ˗oˬ ve tehꞈ dawˇ ve chaw cawˬ˗aw laˇ? Chaw teˇ gʼaˇ˗ehˬ kaꞈ uiˍ la mvuh la leh Baˆtiˆsaˬ haꞈ yuˬ gʼa tuˬ nawˬ maˇ ga piˇ jaw ve laˇ? Nawˬ nyi ma luˬ leh nawˬ Yaˬhoˉvaˬ ve kanˉ te ve htaꞈ yawˇ awˬ bon maˇ naꞈ laˇ ve tehꞈ dawˇ ve cawˇ˗aw laˇ? Awˬ lawn chi ve hkʼaw na hkawˇ 2 maˬ htaꞈ teˇ geh henˇ tuˬ yoˬ. (1) Gʼuiˬ sha ve kanˉ hkʼa dehꞈ te gʼa ve hkʼaˬ hkʼe ve htaꞈ kʼoˆ gaˇ ve le? (2) Gʼuiˬ sha ve kanˉ te ve htaꞈ ngaˬ hui hkʼaˬ hkʼe dawˇ nyi cawˇ ve le?

5. Ngaˬ hui Yaˬhoˉvaˬ ve awˬ pon te ve awˬ ceuˬ aˬ htoꞈ ma te dawˇ taˍ ve hkʼe maˇ te gʼa ve le?

⁵ Gʼuiˬ sha ve a loˍ awˬ hkʼaˇ suh gʼaꞈ te ve chaw “yawˇ te ve kanˉ teˇ ceuˬ le le uiˍ la daꞈ la ve” tehꞈ Liꞈ hpu hkʼaw kʼoˆ taˍ ve yoˬ. (Chiˇ mvuh ve 1:3) Ngaˬ hui Yaˬhoˉvaˬ ve awˬ pon te ve teˇ ceuˬ le le ngaˬ hui dawˇ taˍ ve hkʼe te gʼa ve htaꞈ kʼoˆ gaˇ ve maˇ heˆ. Ngaˬ hui leh awˬ nu ve chaw kaꞈ maˇ biˇ ve chaw hpehꞈ ve pa taw, ngaˬ hui ve a shaꞈ dawˇ haˍ ve hkʼaw gʼa chehˇ taˍ ve yoˬ. (Yawˇbaˆ 14:1) Chi hkʼoˆ kaꞈ, teˇ pawˆ pawˆ ngaˬ hui htaꞈ tawˍ laˇ ve chaw ngaˬ hui Gʼuiˬ sha ve kanˉ te gaˇ ve hkʼe maˇ gʼa te tuˬ te laˇ ve yoˬ. (1 Kawˇrenˍhtuˆ 16:9; 1 Hteˇsaˍlawˇniˆ 2:18) Chi htaꞈ pa taw, Yaˬhoˉvaˬ ve awˬ pon kʼo yawˇ ve kanˉ hkʼa dehꞈ te gʼa ve hkʼaˬ hkʼe ve htaꞈ kʼoˆ gaˇ ve le? Liꞈ hpu hkʼaw ve awˬ liˇ awˬ hkʼaˇ htaꞈ teˇ geh nyi sheˍ.

6. Yaˬhoˉvaˬ ve awˬ pon kʼo yawˇ ve kanˉ hkʼa dehꞈ te gʼa ve hkʼaˬ hkʼe ve htaꞈ kʼoˆ gaˇ ve le?

⁶ Yaˬhoˉvaˬ lehˬ ngaˬ hui coˇ caˇ leh yeunˇ hkanˍ ve htaꞈ nyi ve. Ngaˬ hui Yaˬhoˉvaˬ htaꞈ haꞈ ve pa taw yawˇ ve kanˉ kaiˬ ve hkʼaw te ve kʼo, na ve chaw cawˬ ve, maˇ cawˬ ve htawˇ, yawˇ ve kanˉ hkʼa dehꞈ te gʼa˗oˬ ve tehꞈ yawˇ shawˍ ve yoˬ. Pawˇluꞈ kʼoˆ ve, “Gʼuiˬ sha lehˬ maˇ hteˇ maˇ cawˇ ve Gʼuiˬ sha hpehꞈ ve maˇ heˆ. Ponˬ laˬ htaˇ nawˬ hui te taˍ ve kanˉ leh, Hkriꞈ yaˇ hui htaꞈ ga piˇ taˍ peuˬ ve awˬ hkʼoˆ, chi beuꞈ kaꞈ nawˬ hui chi hkʼe te chehˇ ve awˬ hkʼaw lo, haꞈ pehnˇ ve chi Gʼuiˬ sha awˬ pon nawˬ hui hpeuꞈ maˍ piˇ ve htaꞈ Gʼuiˬ sha yawˇ leunˇ tuˬ ve maˇ heˆ.” (Heˍbrehˇ 6:10) Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ ve maˇ cawˬ jaw ve htawˇ, ngaˬ hui coˇ caˇ leh Yaˬhoˉvaˬ htaꞈ haꞈ ve yawˇ maˇ leunˇ laˇ taˬ. Nawˬ Yaˬhoˉvaˬ ve awˬ pon kanˉ te ve dawˇ taˍ ve hkʼe hpehꞈ gʼa˗aw laˇ? Pawˇluꞈ Kawˇrenˍhtuˆ venˇ hkʼaw ve awˬ viˉ awˬ nyi htaꞈ kʼoˆ piˇ ve, “Jawˇmawˇ Yeˍsuˆ awˬ pon nawˬ hui te ve kanˉ lehˬ hkʼe leˇ hpehꞈ  ve maˇ heˆ” tehꞈ tawnˇ taˍ sheˍ.—1 Kawˇrenˍhtuˆ 15:58.

7. Tcuh yaˇ Pawˇluꞈ Gʼuiˬ sha ve kanˉ te ve awˬ lawn ngaˬ hui aˬ htoꞈ ma henˇ yuˬ gʼa ve le?

⁷ Tcuh yaˇ Pawˇluꞈ miˍshenˍnaˍliˍ hpehꞈ leh Gʼuiˬ sha kanˉ te ve cheuˬ jaˇ. Yawˇ laiˉ venˇ lo Hkriꞈ yaˇ awˬ moˍ cawˬ tuˬ te gʼa ve yoˬ. Yaꞈ hkʼaˇ, yawˇ htaꞈ maˇ maˍ cheuˬ ve tehꞈ shu kʼoˆ piˇ htaˇ, Pawˇluꞈ maˍ piˇ leh hkʼaˬ nyiˇ gʼaˇ Hkriꞈ yaˇ hpehꞈ la gʼa ve htaꞈ maˇ gʼa kʼoˆ maˍ piˇ. Yaꞈ hkʼaˇ, yawˇ kʼoˆ ve yawˇ hui “aꞈ kehˉ leuˉ leh ngaˬ kanˉ te ve yoˬ.” (2 Kawˇrenˍhtuˆ 11:23) Ngaˬ hui coˇ caˇ leh yeunˇ hkanˍ ve htaꞈ Yaˬhoˉvaˬ awˬ hpfuhˇ hkʼaˆ jaˇ tehꞈ shawˍ ve, Pawˇluꞈ ve awˬ lawn kaꞈ maˍ laˇ ve ngaˬ hui maˇ leunˇ cawˇ.

8. Ngaˬ hui Gʼuiˬ sha ve kanˉ te ve htaꞈ caˉ daꞈ ve aˬ htoꞈ ma htaꞈ tawnˇ taˍ cawˇ ve le?

⁸ Ngaˬ hui Yaˬhoˉvaˬ ve kanˉ te ve yawˇ nyi hkʼaˇ suh tuˬ te piˇ ve. Yeˍsuˆ awˬ laꞈ gʼawˇ 70 gʼaˇ htaꞈ bon maˍ˗e tuˬ kʼai tcuh ve yoˬ. Yawˇ hui bon maˍ peuˬ hkʼawꞈ nawˉ “ha lehˬ ha kʼa kʼawꞈ” la ve yoˬ. Aˬ htoꞈ ma te awˬ laꞈ gʼawˇ hui ha lehˬ ve le? Yawˇ hui kʼoˆ ve, “nawˬ ve awˬ meh htaꞈ cuˇ ve awˬ hkʼaw lo neˇ teˇ hpaˍ htaꞈ kaꞈ ngaˬ hui gʼaˇ ve yoˬ.” Yaꞈ hkʼaˇ, Yeˍsuˆ yawˇ hui htaꞈ chi hkʼe maˇ dawˇ tcuh gaˇ. Yawˇ kʼoˆ ve, “neˇ teˇ hpaˍ htaꞈ nawˬ hui gʼaˇ ve pa taw taˇ ha lehˬ. Mvuhˇ naw ma hkʼoˆ lo nawˬ hui ve awˬ meh bvuhꞈ taˍ ve htaꞈ ha lehˬ chehˇ˗oˆ.” (Luˉkaꞈ 10:17-20) Yawˇ hui daꞈ ve awˬ lawn teˇ pawˆ le le chi hkʼe leˇ gʼa hpuˇ ve maˇ heˆ tehꞈ Yeˍsuˆ shiˍ ve yoˬ. Oˇ ve teˇ yanˇ, yawˇ hui kʼoˆ piˇ ve htaꞈ na ve chaw awˬ leh meuˇ htaˇ Hkriꞈ yaˇ hpehꞈ la ve naˍ ngaˬ hui kaꞈ maˇ shiˍ. Yawˇ hui ha lehˬ ve lehˬ, te ve awˬ ceuˬ htaꞈ cawˬ ve maˇ heˆ tehꞈ gʼa na gʼa cawˇ ve yoˬ. Yawˇ hui coˇ caˇ leh Yaˬhoˉvaˬ nyi hkʼaˇ suh tuˬ te ve pa taw ha lehˬ gʼa ve yoˬ.

9. Gaˍlaˍtiˆ liꞈ 6:7-9 hkʼaw kʼoˆ taˍ ve hkʼe, ngaˬ hui yeunˇ hkanˍ leh Gʼuiˬ sha ve kanˉ caˉ leh te ve kʼo, awˬ bon hkʼaˬ hkʼe gʼa tuˬ le?

⁹ Ngaˬ hui yeunˇ hkanˍ leh Gʼuiˬ sha ve kanˉ caˉ leh te ve kʼo, co co taiˍ taiˍ a shaꞈ gʼa tuˬ yoˬ. Ngaˬ hui hto toˇ leh Liꞈ hpu hkʼa dehꞈ maˍ ve kʼo, awˬ tehˬ ve awˬ yawˇ sheˍ ve htaꞈ shuˍ ve yoˬ. Gʼuiˬ sha ve Awˬ ha hpu beˆ maˍ laˇ ve awˬ hkʼaˇ suh ngaˬ hui gʼaꞈ te chehˇ ve kʼo, “awˬ ha hpu htaꞈ caˉ daꞈ ve teˇ ceuˬ htaꞈ sheˍ” chehˇ ve yoˬ. “Daꞈ ve htaꞈ te ve awˬ hkʼaw lo awˬ gʼaˇ maˇ nuˇ leh te” ve kʼo, awˬ to chiˇ aꞈ leh Baˆtiˆsaˬ haꞈ yuˬ tuˬ ngaˬ hui ga piˇ ve chaw maˇ cawˬ ve htawˇ, Yaˬhoˉvaˬ ngaˬ hui htaꞈ ka tiꞈ te taˍ laˇ ve “co tiꞈ ha tiꞈ htaꞈ gʼa gʼeuꞈ tuˬ yoˬ.”—Gaˍlaˍtiˆ 6:7-9 gʼaw sheˍ.

10. Chaw yaˇ awˬ tehˬ ve htaꞈ na ve lehˬ aˬ htoꞈ ma htaꞈ cawˬ ve le?

¹⁰ Chaw yaˇ awˬ tehˬ ve htaꞈ na ve lehˬ maˇ˗awˍ ve kʼo, yawˇ hui ve nyi ma htaꞈ cawˬ ve. Jeꞈ teˇ kaˬ leh teˇ kaˬ maˇ shuˍ daꞈ ve hkʼaw awˬ yawˇ sheˍ ve awˬ lawn Yeˍsuˆ tawˇ pa haˉ tehˆ maˍ laˇ ve yoˬ. Leh miˬ hkuiˇ daꞈ kuiˬ lo ceh tiˉ awˬ shiˍ nawꞈ la gʼa ve yoˬ. (Luˉkaꞈ 8:5-8) Yeˍsuˆ kʼoˆ ve, jeꞈ teˇ ceuˬ leh teˇ ceuˬ kaꞈ chaw yaˇ ve nyi ma htaꞈ shuˍ ve yoˬ. Chaw yaˇ Gʼuiˬ sha ve tawˇ hkawˇ htaꞈ na yuˬ ve maˇ shuˍ daꞈ. (Luˉkaꞈ 8:11-15) Ngaˬ hui kaꞈ tawˇ pa haˉ tehˆ maˍ laˇ ve hkʼaw awˬ yawˇ sheˍ paˍ htaꞈ shuˍ ve yoˬ. Daꞈ ve awˬ lawn sha tanˇ na tuˬ ngaˬ hui shu htaꞈ nyiˉ piˇ maˇ gʼa. Chi lehˬ yawˇ ve nyi ma htaꞈ cawˬ ve yoˬ. Ngaˬ hui ve awˬ vuiˬ lehˬ caˉ leh gʼa hto toˇ ve yoˬ. Pawˇluꞈ kʼoˆ ve, “a shu yawˇ ve kanˉ te taˍ ve hkʼe, teˇ gʼaˇ peuˬ teˇ gʼaˇ awˬ bon gʼa tuˬ yoˬ.”—1 Kawˇrenˍhtuˆ 3:8.

11. Aˬ htoꞈ ma te Noˉaꞈ hteˇ ve cawˇ ve awˬ lawn bon hkʼa dehꞈ maˍ gʼa ve le? (Awˬ htaꞈ hpawˇ ve awˬ han htaꞈ nyi sheˍ.)

¹¹ Oˇ htaˇ teˇ co˗e Yaˬhoˉvaˬ ve kanˉ te ve chaw kaꞈ bon maˍ ve htaꞈ shu maˇ na. Tawˇ pa haˉ te kʼo, Noˉaꞈ lehˬ “hteˇ ve cawˇ ve awˬ lawn htaꞈ bon maˍ ve” yoˬ. Yawˇ 40 leh 50 hkʼawꞈ bon maˍ toˇ ve htawˇ, chaw teˇ gʼaˇ kaꞈ maˇ na. (2 Peˍtruˆ 2:5) Noˉaꞈ lehˬ Yaˬhoˉvaˬ ve awˬ lawn maˍ ve htaꞈ shu na laˇ tuˬ dawˇ law ve yoˬ. Yaꞈ hkʼaˇ, Yaˬhoˉvaˬ chi hkʼe maˇ gʼa kʼoˆ piˇ. Yaˬhoˉvaˬ Noˉaꞈ htaꞈ haw loꞈ kʼoˍ te tcuh htaˇ, “nawˬ awˬ to leh nawˬ ve yaˇ teˇ hpaˍ, nawˬ ve awˬ miˇ ma leh nawˬ ve awˬ hkuiˇ ma teˇ hpaˍ, haw loꞈ kʼoˍ oˇ ve awˬ hkʼaw lo gʼa loꞈ˗e tuˬ” yoˬ tehꞈ Yaˬhoˉvaˬ kʼoˆ piˇ ve yoˬ. (Awˬ hkuiˉ puiˍ 6:18) Gʼuiˬ sha lehˬ  Noˉaꞈ htaꞈ haw loꞈ kʼoˍ te tcuh leh awˬ nu ve chaw htaꞈ kaꞈ te tuˬ kʼoˆ piˇ tcuh htaˇ, shu maˇ na laˇ taˍ tehꞈ yawˇ dawˇ ve yoˬ hehˉ. Awˬ tehˬ yoˬ. Teˇ gʼaˇ˗ehˬ kaꞈ yawˇ hkawˇ maˇ na. (Awˬ hkuiˉ puiˍ 6:15; 7:7) Noˉaꞈ hteˇ ve cawˇ ve awˬ lawn bon maˍ toˇ ve hkʼa dehꞈ te maˇ gʼa ve tehꞈ Yaˬhoˉvaˬ dawˇ˗aw laˇ? Maˇ dawˇ. Yawˇ Yaˬhoˉvaˬ kʼoˆ piˇ ve hkʼe teˇ ceuˬ le le gʼaꞈ te ve pa taw, Noˉaꞈ lehˬ hteˇ ve cawˇ ve awˬ lawn bon hkʼa dehꞈ maˍ gʼa ve tehꞈ Gʼuiˬ sha shawˍ ve yoˬ.—Awˬ hkuiˉ puiˍ 6:22.

12. Yeˍraˍmiˆ Gʼuiˬ sha ve kanˉ te ve hkʼaw chaw teˇ gʼaˇ kaꞈ maˇ na leh tawˍ piˇ ve htaꞈ gʼa hpuˇ ve htawˇ, yawˇ hkʼaˬ hkʼe te ha lehˬ gʼa ve le?

¹² Yeˍraˍmiˆ kaꞈ teˇ gʼaˇ 40 hkʼawꞈ hpaˆ bon maˍ toˇ ve htawˇ, chaw teˇ gʼaˇ kaꞈ maˇ na. Awˬ hkʼoˆ kaꞈ, yawˇ htaꞈ shu tawˍ piˇ ve yoˬ. Shu maˇ shawˍ maˇ caˆ kʼoˆ leh deˇ piˇ ve htaꞈ pa taw, awˬ gʼaˇ nuˇ jaˇ leh yawˇ Gʼuiˬ sha ve kanˉ maˇ te gaˇ˗o tehꞈ dawˇ ve yoˬ. (Yeˍraˍmiˆ 20:8, 9) Yaꞈ hkʼaˇ, Yeˍraˍmiˆ awˬ gʼaˇ maˇ nuˇ. Yawˇ daꞈ ve hpawˇ dawˇ leh Gʼuiˬ sha ve kanˉ te ve hkʼaw ha lehˬ gʼa tuˬ aˬ htoꞈ ma ga piˇ ve le? Yawˇ 2 ceuˬ htaꞈ dawˇ nyi ve yoˬ. Awˉ lawˉ teˇ ceuˬ lehˬ, Gʼuiˬ sha yawˇ htaꞈ bon maˍ tcuh ve awˬ lawn lehˬ, chaw yaˇ “uiˍ la daꞈ la tuˬ ve kanˉ hkʼaˇ” ga piˇ tcuh gaˇ ve yoˬ. (Yeˍraˍmiˆ 29:11) Nyiˇ ceuˬ teˇ ceuˬ lehˬ, Yeˍraˍmiˆ htaꞈ Yaˬhoˉvaˬ ve chaw tehꞈ kuˬ ve yoˬ. Gʼuiˬ sha Yeˍraˍmiˆ htaꞈ yawˇ ve awˬ tan tawˇ yaw tcuh ve yoˬ. (Yeˍraˍmiˆ 15:16) Ngaˬ hui kaꞈ Yeˍraˍmiˆ hkʼa shuˍ ngaˬ hui hto toˇ ve leh shu dawˇ law kuiˬ cawˬ tuˬ ga piˇ htaˇ ngaˬ hui kaꞈ Yaˬhoˉvaˬ ve awˬ meh yehˇ ve yoˬ. Ngaˬ hui chi ve nyiˇ ceuˬ htaꞈ a yeˇ yuˬ ve kʼo, na ve chaw maˇ cawˬ ve htawˇ Gʼuiˬ sha ve kanˉ te ve hkʼaw ha lehˬ gʼa ve yoˬ.

13. Maˍkuˆ liꞈ 4:26-29 hkʼaw Yeˍsuˆ tawˇ pa haˉ tehˆ maˍ laˇ ve htaꞈ ngaˬ hui hkʼaˬ hkʼe henˇ yuˬ gʼa ve le?

¹³ Chaw teˇ gʼaˇ yonˍ la tuˬ awˬ yanˇ gʼa yehˇ maw ve. Yeˍsuˆ awˬ lawn chi awˬ tehˬ ve htaꞈ kʼoˆ maˍ laˇ tuˬ, mvuhˇ hpeuꞈ zuhꞈ chehˇ htaˇ awˬ yawˇ sheˍ ve awˬ lawn tawˇ pa haˉ tehˆ maˍ laˇ ve yoˬ. (Maˍkuˆ 4:26-29 gʼaw sheˍ.) Yawˇ awˬ yawˇ sheˍ peuˬ hkʼawꞈ nawˉ awˬ yawˇ oˇ ve a yehˉ yehˉ yeˬ la uiˍ la ve yoˬ. Awˬ yawˇ sheˍ paˍ awˬ yawˇ oˇ ve haˆ haˆ uiˍ la yeˬ la tuˬ yawˇ te piˇ maˇ gʼa. Ngaˬ hui geh Liꞈ hpu henˇ chehˇ ve chaw kaꞈ hkʼa shuˍ shuˍ yawˇ kaꞈ a yehˉ yehˉ uiˍ la mvuh la ve yoˬ. Liꞈ hpu henˇ chehˇ ve chaw ngaˬ hui dawˇ taˍ ve hkʼe leˇ haˆ haˆ uiˍ la mvuh la tuˬ nyiˉ piˇ maˇ gʼa. Nawˬ geh Liꞈ hpu henˇ chehˇ ve chaw nawˬ dawˇ taˍ ve hkʼe haˆ haˆ maˇ uiˍ la mvuh la ve kʼo, awˬ gʼaˇ taˇ nuˇ. Awˬ laꞈ gʼawˇ hpehꞈ la tuˬ ga piˇ ve kaꞈ awˬ yawˇ sheˍ ve htaꞈ shuˍ ve pa taw, awˬ yanˇ yehˇ leh gʼa yeunˇ hkanˍ ve yoˬ.—Yaˍkoˆ 5:7, 8.

14. Nyi ma pfuhˇ ve chaw cawˬ tuˬ awˬ yanˇ gʼa yehˇ maw ve tehꞈ hpehꞈ laˬ jaw ve awˬ lawn aˬ htoꞈ ma maˍ laˇ ve le?

¹⁴ Teˇ kaˬ kaˬ kʼo, nyi ma pfuhˇ ve chaw cawˬ tuˬ awˬ yanˇ laiˉ hkʼawꞈ gʼa yehˇ ve yoˬ. Awˬ viˉ awˬ nyi 2 gʼaˇ Lo˗behˬ leh Keh˗diˆ ve awˬ lawn htaꞈ teˇ geh nyi sheˍ. 1959 hkʼawꞈ htaˇ Kaˬneˬdaˬ mvuhˇ miˬ Ku˗eˇbehˆ venˇ lo hkʼaˬ htaˆ kaꞈ gʼuˇ suhˍ peuˍ ve te tuˬ yawˇ hui htaꞈ kʼai tcuh ve yoˬ. * Awˉ lawˉ htaˇ oˇ kaˬ lo ve chaw, awˬ chawˇ awˬ paˆ leh Caˬbuˉ awˬ hoˉ htaꞈ kawˆ ve yoˬ. Hkʼe te leh, yawˇ hui Shaˉhkiˆhkanˍ ve chaw htaꞈ tawˇ maˇ yaw laˇ? Keh˗diˆ kʼoˆ ve, “2 hkʼawꞈ ve hkʼaw ngaˬ hui teˇ nyi ve 8 naˍ liˍ teˇ nyi le le teˇ yehˬ peuˬ teˇ yehˬ hto toˇ ve yoˬ. Teˇ gʼaˇ˗ehˬ kaꞈ maˇ na! Yehˬ miˉ paˇ lo laˬ leh hpa gʼawˬ beh ve chaw ceh tiˉ cawˬ ve yoˬ. Yaꞈ hkʼaˇ, ngaˬ hui awˬ gʼaˇ maˇ nuˇ.” Ponˬ kʼai ve awˬ yanˇ, oˇ kaˬ lo ve chaw kaꞈ nyi ma pfuhˇ leh awˬ tehˬ ve htaꞈ dawˇ cawˇ ve chaw cawˬ la ve yoˬ. Chi teˇ hkui venˇ chi ve hkʼaw Hkriꞈ yaˇ awˬ moˍ 3 kaˬ cawˬ˗oˬ.—Iˉsaˍyaˆ 60:22.

15. 1 Kawˇrenˍhtuˆ liꞈ 3:6, 7 hkʼaw shu awˬ laꞈ gʼawˇ hpehꞈ la tuˬ maˍ piˇ ve htaꞈ caˉ daꞈ ve aˬ htoꞈ ma maˍ laˇ ve le?

¹⁵ Shu awˬ laꞈ gʼawˇ hpehꞈ la tuˬ maˍ piˇ ve lehˬ gʼa ga daꞈ ve. Chaw teˇ gʼaˇ Baˆtiˆsaˬ haꞈ yuˬ tuˬ Hkriꞈ yaˇ awˬ moˍ hkʼaw ve awˬ viˉ awˬ nyi gʼa ga daꞈ ve yoˬ. (1 Kawˇrenˍhtuˆ 3:6, 7 gʼaw sheˍ.) Awˬ lawn chi ve htaꞈ dawˇ nyi sheˍ. Awˬ viˉ awˬ nyi teˇ gʼaˇ hto toˇ˗e leh nyi ma pfuhˇ ve chaw htaꞈ mawˬ daꞈ ve yoˬ. Chaw oˇ ve teˇ gʼaˇ htaꞈ yawˇ liꞈ kʼoˆ leh liꞈ kʼoˆ ehˉ piˇ ve yoˬ. Awˬ yanˇ maˇ cawˇ daꞈ ve pa taw yawˇ ca kʼawꞈ guiˇ˗e maˇ gʼa. Awˬ viˉ awˬ nyi awˬ nu ve teˇ  gʼaˇ yawˇ awˬ tan oˇ ve teˇ gʼaˇ geh ca kʼawꞈ guiˇ˗e tuˬ lawˬ piˇ ve yoˬ. Awˬ viˉ awˬ nyi kaꞈ oˇ ve teˇ gʼaˇ geh ca kʼawꞈ guiˇ˗e leh Liꞈ hpu maˍ piˇ ve yoˬ. Awˬ viˉ awˬ nyi chi teˇ gʼaˇ kaꞈ Hkriꞈ yaˇ awˬ moˍ hkʼaw ve awˬ nu ve awˬ viˉ awˬ nyi htaꞈ jehˬ piˇ leh nyi ma pfuhˇ ve chaw chi teˇ gʼaˇ geh Liꞈ hpu ca maˍ˗e ve yoˬ. Nyi ma pfuhˇ ve chaw chi teˇ gʼaˇ yonˍ hkʼaˇ yonˍ yeˬ leh Yaˬhoˉvaˬ htaꞈ haꞈ maˇ la tuˬ awˬ viˉ awˬ nyi teˇ gʼaˇ leh teˇ gʼaˇ yawˇ htaꞈ awˬ gʼaˇ piˇ ve yoˬ. Awˬ lawn chi ve kaꞈ Yeˍsuˆ kʼoˆ ve hkʼa shuˍ shuˍ, awˬ yawˇ sheˍ ve leh gʼeuꞈ ve chaw kaꞈ gʼa ha lehˬ ve yoˬ. Ngaˬ hui kaꞈ hkʼa shuˍ shuˍ, chaw teˇ gʼaˇ Baˆtiˆsaˬ haꞈ yuˬ ve kʼo, ngaˬ hui teˇ gʼaˇ le le kaꞈ ha lehˬ ve yoˬ.—Yoˇhanˬ 4:35-38.

16. Nawˬ maˇ chehˇ sha leh awˬ gʼaˇ hkʼa dehꞈ maˇ cawˬ ve kʼo, Gʼuiˬ sha ve kanˉ te ve hkʼaw aˬ htoꞈ ma te nawˬ ha lehˬ gʼa ve le?

¹⁶ Nawˬ maˇ chehˇ sha ve, awˬ gʼaˇ hkʼa dehꞈ maˇ cawˬ ve, leh oˇ htaˇ hkʼe leˇ Gʼuiˬ sha ve kanˉ hkʼa dehꞈ te maˇ gʼa ve htawˇ, nawˬ ha lehˬ gʼa sheˍ ve yoˬ. Jawˇmawˇ Daˍviˆ ve awˬ lawn htaꞈ teˇ geh nyi sheˍ. Aˍmaˍlehˆ chaw Daˍviˆ ve yehˬ kʼa leh Iˉsaˍreˍlaˆ chaw hui ve mawˇ yuˬ kʼai htaˇ, Daˍviˆ leh yawˇ hpawˇ chehˇ ve chaw yawˇ hui ve yehˬ kʼa htaꞈ ca ga piˇ˗e ve yoˬ. Hawˉ hkʼaˆ 200 gʼaˇ heuˬ jaˇ leh kʼai maˇ gʼa ve pa taw, mawˇ htaꞈ shaw tcuh taˉ ve yoˬ. Daˍviˆ Aˍmaˍlehˆ chaw htaꞈ bawˆ gʼaˇ leh kʼawꞈ la htaˇ teˇ gʼaˇ le le htaꞈ mawˇ hkʼa shuˍ˗ehˍ gʼa pehˬ piˇ cawˇ ve tehꞈ Daˍviˆ kʼoˆ piˇ ve yoˬ. (1 Saˍmo˗eˍlaˆ 30:21-25) Shu awˬ laꞈ gʼawˇ hpehꞈ la tuˬ maˍ piˇ ve kaꞈ hkʼa shuˍ yoˬ. Gʼuiˬ sha ve kanˉ ngaˬ hui te gaˇ ve hkʼe hkʼa dehꞈ te maˇ gʼa ve htawˇ, chaw teˇ gʼaˇ Yaˬhoˉvaˬ htaꞈ shiˍ la ve, uiˍ la mvuh la ve, Baˆtiˆsaˬ haꞈ yuˬ leh yawˇ co tiꞈ ha tiꞈ ve yaꞈ kʼawꞈ hkʼoˆ chehˇ ve htaꞈ ngaˬ hui mawˬ htaˇ, teˇ gʼaˇ le le puiˉ ve hpehꞈ ve hkʼe te ve htaꞈ ha lehˬ gʼa ve yoˬ.

17. Aˬ htoꞈ ma ve awˬ lawn ngaˬ hui Yaˬhoˉvaˬ htaꞈ awˬ bon uiˬ jaˇ kʼoˆ piˇ cawˇ ve le?

¹⁷ Yaˬhoˉvaˬ ngaˬ hui htaꞈ haꞈ leh yawˇ ve kanˉ te tcuh laˇ ve awˬ bon uiˍ jaˇ. Ngaˬ hui hkawˇ na tuˬ chaw teˇ gʼaˇ htaꞈ kaꞈ maˇ nyiˉ piˇ gʼa ve yawˇ shiˍ ve yoˬ. Ngaˬ hui hkʼaˬ hkʼe taw coˇ caˇ ve leh yawˇ htaꞈ hkʼaˬ hkʼe taw haꞈ ve yawˇ mawˬ htaˇ, yawˇ ngaˬ hui htaꞈ laꞈ shawnˍ peꞈ laˇ tuˬ yoˬ. Chi hkʼoˆ kaꞈ, shu awˬ laꞈ gʼawˇ hpehꞈ la tuˬ hkʼaˬ hkʼe hpawˇ ga piˇ ve htawˇ maˇ kʼoˆ, hkʼaˬ hkʼe te leh ngaˬ hui ha lehˬ gʼa tuˬ yawˇ maˍ laˇ ve yoˬ. (Yoˇhanˬ 14:12) Ngaˬ hui awˬ gʼaˇ maˇ nuˇ ve kʼo, Yaˬhoˉvaˬ ngaˬ hui htaꞈ nyi hkʼaˇ suh jaˇ tuˬ yoˬ tehꞈ yonˍ gʼa ve yoˬ!