1. Aˬ htoꞈ ma te laiˉ gʼaˇ htawˇ dawˇ nawˬ dawˇ cawˬ ve le?

 Chi teˇ hkui laiˉ meunˍ bon liˇ yawˇ hui Gʼuiˬ sha htaꞈ oˉ kʼoˍ pui ve cawˇ ve tehꞈ kʼoˆ ve yoˬ. Chi htaꞈ pa taw, laiˉ gʼaˇ htawˇ dawˇ nawˬ dawˇ cawˬ ve anˇ tuˬ maˇ loˍ. Laiˉ gʼaˇ na ve, “awˬ tehˬ ve bon liˇ teˇ maˬ tiˉ cawˬ ve laˇ? Maˇ heˆ leh Gʼuiˬ sha lehˬ bon liˇ hkʼa peu˗eˬ htaꞈ haꞈ yuˬ ve laˇ?” Ngaˬ hui awˬ nu ve chaw htaꞈ maˍ piˇ ve awˬ ceuˬ awˬ tehˬ hpehꞈ leh Yaˬhoˉvaˬ ve Shaˉhkiˆhkanˍ ve chaw teˇ moˍ ceh tiˉ oˉ kʼoˍ pui ve htaꞈ Gʼuiˬ sha haꞈ yuˬ ve laˇ tehꞈ ngaˬ hui yonˍ gʼa˗aw laˇ? Awˬ lawn chi htaꞈ yonˍ gʼa tuˬ ga laˇ gʼa ve teˇ geh nyi sheˍ.

2. Pawˇluꞈ yawˇ yonˍ ve awˬ ceuˬ awˬ tehˬ hpehꞈ ve tehꞈ aˬ htoꞈ ma te yonˍ gʼa ve le? (1 Hteˇsaˍlawˇniˆ 1:5)

² Tcuh yaˇ Pawˇluꞈ yawˇ yonˍ ve awˬ ceuˬ awˬ tehˬ hpehꞈ ve tehꞈ yonˍ gʼa ve yoˬ. (1 Hteˇsaˍlawˇniˆ 1:5 gʼaw sheˍ.) Yawˇ ve te hkʼaˇ dawˇ hkʼaˇ htaꞈ ceh yonˍ ve maˇ heˆ. Yaꞈ hkʼaˇ, yawˇ Liꞈ hpu hkʼaw hkʼa dehꞈ chaˬ nyi ve yoˬ. Yawˇ yonˍ ve “Liꞈ hpu hkʼa peu˗eˬ lehˬ Gʼuiˬ sha ve awˬ ha hpu dawˇ pawnˍ piˇ ve htaꞈ pa taw cawˬ la ve yoˬ.” (2 Tiˆmoˉseˍ 3:16) Pawˇluꞈ Liꞈ hpu hkʼaw hkʼa dehꞈ chaˬ nyi htaˇ, Yeˍsuˆ lehˬ ka tiꞈ te taˍ ve Meˍsiˉyaꞈ hpehꞈ ve tehꞈ yawˇ hkʼa tawˍ lehˆ gʼa mawˬ ve yoˬ. Oˇ htaˇ teˇ co˗e Yuˇdaꞈ chaw ve bon awˬ hoˉ chi awˬ tehˬ hpehꞈ ve tehꞈ yawˇ hui maˇ haꞈ yuˬ. Yawˇ hui Gʼuiˬ sha ve awˬ lawn maˍ ve htawˇ, Gʼuiˬ sha maˇ dawˇ cawˇ ve awˬ ceuˬ htaꞈ te ve yoˬ. (Tiˇtuˆ 1:16) Bon awˬ hoˉ yawˇ hui yonˍ gaˇ ve awˬ ceuˬ htaꞈ ceh leuˆ yuˬ leh yonˍ ve hkʼe Pawˇluꞈ maˇ gʼa te. HKʼe te leh, Pawˇluꞈ lehˬ ‘Gʼuiˬ sha ve a loˍ hkʼa peu˗eˬ htaꞈ maˍ tuˬ maˇ jaw kʼai.’—Tcuh yaˇ 20:27.

3. Ngaˬ hui yonˍ ve awˬ ceuˬ awˬ tehˬ hpehꞈ ve tehꞈ yonˍ gʼa tuˬ ngaˬ hui htawˇ dawˇ nawˬ dawˇ cawˬ ve na hkʼawˇ teˇ maˬ le le htaꞈ hkʼawꞈ laˇ tuˬ loˍ˗aw laˇ? (Awˇ ceˍ awˇ fa “ Yaˬhoˉvaˬ dawˇ ve leh te ve awˬ ceuˬ htaꞈ kʼoˆ ve kʼo, ‘ca kʼoˆ maˇ peuˬ’” hkʼaw nyi sheˍ.)

³ Chaw teˇ hpaˍ kʼoˆ ve, awˬ tehˬ ve bon lehˬ Liꞈ hpu hkʼaw maˇ  kʼoˆ ve awˬ lawn htawˇ teˇ lawn le le gʼa hkʼawꞈ gʼa tcuh ve yoˬ. Chi hkʼe dawˇ ve chaw lehˬ awˬ hkʼaˇ ca˗aw laˇ? Pawˇluꞈ ve awˬ lawn htaꞈ teˇ geh nyi sheˍ. Pawˇluꞈ awˬ viˉ awˬ nyi htaꞈ kʼoˆ piˇ ve, “awˬ ceuˬ hkʼa peu˗eˬ htaꞈ lawˇ nyi˗o.” (1 Hteˇsaˍlawˇniˆ 5:21) Yaꞈ hkʼaˇ, yawˇ maˇ na gʼa ve kaꞈ laiˉ ceuˬ cawˬ ve tehꞈ haꞈ yuˬ ve yoˬ. Yawˇ kʼoˆ ve, ‘ngaˬ hui shiˍ taˍ ve lehˬ, maˇ biˇ sheˍ. Chi beuꞈ lehˬ, maˇ kehˬ daꞈ ve mehˆ gʼeuˆ awˬ hkʼaw lo ngaˬ hui nyi chehˇ ve hkʼe yoˬ.’ (1 Kawˇrenˍhtuˆ 13:9, 12) Pawˇluꞈ hkʼa peu˗eˬ htaꞈ maˇ na gʼa leh ngaˬ hui kaꞈ maˇ na gʼa. Yaꞈ hkʼaˇ, Yaˬhoˉvaˬ ve awˬ lawn leh yawˇ ve a loˍ shiˍ keunˍ shiˍ cawˇ ve htaꞈ Pawˇluꞈ na gʼa ve yoˬ. Yawˇ yonˍ ve awˬ ceuˬ awˬ tehˬ hpehꞈ ve tehꞈ yonˍ gʼa ve yoˬ.

4. Ngaˬ hui yonˍ ve awˬ ceuˬ awˬ tehˬ hpehꞈ ve tehꞈ yonˍ gʼa tuˬ hkʼaˬ hkʼe gʼa te cawˇ ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Ngaˬ hui yonˍ ve awˬ ceuˬ awˬ tehˬ hpehꞈ ve tehꞈ yonˍ gʼa tuˬ ve teˇ hkʼaˇ lehˬ, Yeˍsuˆ Gʼuiˬ sha htaꞈ oˉ kʼoˍ pui ve awˬ hkʼaˇ htaꞈ mawˬ gʼa ve yoˬ. Leh chi beuꞈ teˇ co˗e Yaˬhoˉvaˬ ve Shaˉhkiˆ hkanˍ ve chaw kaꞈ hkʼa shuˍ te˗aw laˇ? Awˬ tehˬ ve Hkriꞈ yaˇ te ve teˇ hpaˍ lehˬ, (1) ngaˬ hui shaˉ hoꞈ htaꞈ oˉ kʼoˍ maˇ pui, (2) ngaˬ hui Yaˬhoˉvaˬ ve awˬ meh htaꞈ chiˇ mvuh ve, (3) ngaˬ hui awˬ tehˬ ve htaꞈ haꞈ ve, (4) ngaˬ hui haꞈ daꞈ ve, chi ve teˇ hpaˍ henˇ tuˬ yoˬ.

5. Yeˍsuˆ Gʼuiˬ sha htaꞈ oˉ kʼoˍ pui ve awˬ hkʼaˇ ngaˬ hui aˬ htoꞈ ma htaꞈ henˇ yuˬ gʼa ve le? Leh ngaˬ hui yawˇ htaꞈ hkʼaˬ hkʼe henˇ yuˬ gʼa ve le?

⁵ Yeˍsuˆ Yaˬhoˉvaˬ htaꞈ haꞈ jaˇ. Hkʼe te leh, Yeˍsuˆ mvuhˇ naw ma hkʼoˆ leh miˬ guiˬ hkʼoˆ chehˇ htaˇ kaꞈ Yaˬhoˉvaˬ htaꞈ ceh tiˉ oˉ kʼoˍ pui ve yoˬ. Leh awˬ laꞈ gʼawˇ kaꞈ yawˇ hkʼa shuˍ te tuˬ maˍ piˇ ve yoˬ. (Luˉkaꞈ 4:8) Yeˍsuˆ leh awˬ laꞈ gʼawˇ oˉ kʼoˍ pui htaˇ, shaˉ hoꞈ maˇ yehˇ jaw. Chaw teˇ gʼaˇ kaꞈ Yaˬhoˉvaˬ htaꞈ maˇ mawˬ jaw ve pa taw, Yaˬhoˉvaˬ ve awˬ hoꞈ awˬ han htaꞈ shuˍ ve, chaw teˇ gʼaˇ kaꞈ te maˇ gʼa! (Iˉsaˍyaˆ 46:5) Laiˉ gʼaˇ yawˆ yan ve shaˉ hoꞈ awˬ han te teh leh oˉ kʼoˍ pui ve hpehꞈ kʼai gʼa˗aw laˇ? Awˬ liˇ tawˇ hkawˇ 10 hkawˇ hkʼaw 2 hkawˇ teˇ hkawˇ htaꞈ Yaˬhoˉvaˬ kʼoˆ ve, ‘shaˉ hoꞈ htaꞈ maˇ gʼa te. Mvuhˇ  naw ma hkʼoˆ leh miˬ guiˬ hkʼoˆ cawˬ ve awˬ ceuˬ teˇ hpaˍ htaꞈ shuˍ daꞈ ve shaˉ hoꞈ htaꞈ maˇ kʼoˆ, nawˬ hui maˇ gʼa te. Shaˉ hoꞈ oˇ hkʼe ve teˇ hpaˍ htaꞈ nawˬ hui oˉ kʼoˍ maˇ gʼa pui.’ (Tawˆ kʼai ve 20:4, 5) Gʼuiˬ sha nyi hkʼaˇ suh tuˬ te gaˇ ve chaw awˬ pon chi teˇ tawn hkʼaw hkʼa tawˍ lehˆ gʼa mawˬ ve yoˬ.

6. Chi beuꞈ teˇ co˗e Yaˬhoˉvaˬ ve Shaˉhkiˆhkanˍ ve chaw a shu htaꞈ oˉ kʼoˍ pui ve le?

⁶ Oˇ htaˇ teˇ co˗e chaˬ nyi tehˆ nyi paˍ laiˉ gʼaˇ kʼoˆ ve, awˉ lawˉ peuˇ ve Hkriꞈ yaˇ kaꞈ Gʼuiˬ sha htaꞈ ceh tiˉ oˉ kʼoˍ pui ve yoˬ. Liꞈ kʼoˆ teˇ kʼoˆ hkʼaw kʼoˆ ve, “awˉ lawˉ peuˇ ve Hkriꞈ yaˇ lehˬ oˉ kʼoˍ pui kuiˬ awˬ ti hkʼaw shaˉ hoꞈ te cawˇ ve tehꞈ kʼoˆ ve ceh kaꞈ, chaꞈ chiˆ jaˇ ve awˬ ceuˬ shawˍ ve yoˬ.” Chi beuꞈ teˇ co˗e Yaˬhoˉvaˬ ve Shaˉhkiˆhkanˍ ve chaw kaꞈ awˉ lawˉ peuˇ ve Hkriꞈ yaˇ hkʼa shuˍ te ve yoˬ. Shaˉ hoꞈ, mvuhˇ naw ma tcuh yaˇ leh Yeˍsuˆ geh kaꞈ ngaˬ hui bon maˇ lawˬ. Chi hkʼoˆ kaꞈ, mvuhˇ miˬ ve a lanˍ leh mvuhˇ miˬ htaꞈ caˉ daꞈ ve oˉ kʼoˍ pui ve ngaˬ hui teˇ ceuˬ˗ehˬ kaꞈ maˇ te. Hkʼaˬ hkʼe hpehꞈ ve htawˇ maˇ kʼoˆ, ngaˬ hui Yeˍsuˆ ve tawˇ hkawˇ htaꞈ hkʼaˬ htaˆ kaꞈ na yuˬ tuˬ yoˬ. Oˇ kaˬ lo yawˇ kʼoˆ ve, “nawˬ ve Jawˇmawˇ Gʼuiˬ sha htaꞈ ceh tiˉ nawˬ oˉ kʼoˍ gʼa pui” ve yoˬ.—Maꞈhtehˍ 4:10.

7. Yaˬhoˉvaˬ ve Shaˉhkiˆhkanˍ ve chaw lehˬ awˬ nu ve bon liˇ htaꞈ hkʼaˬ hkʼe te maˇ shuˍ daꞈ ve le?

⁷ Chi beuꞈ teˇ co˗e ve chaw lehˬ bon maˍ cheuˬ ve chaw htaꞈ dawˇ cawˇ ve yoˬ. Laiˉ gʼaˇ yawˇ hui htaꞈ chiˇ mvuh jaˇ ve pa taw, oˉ kʼoˍ pui ve htaꞈ shuˍ ve yoˬ. Bon yehˬ hkʼaˬ ve teˇ maˬ hkʼaw bon maˍ cheuˬ ve chaw cawˬ ve kʼo, laiˉ gʼaˇ jehˬ daꞈ leh oˇ kaˬ lo bon ca lawˬ˗e ve, yawˇ hui ve liꞈ kʼoˆ vuiˬ ve, yawˇ hui htaꞈ hpu tanˇ chi ma ma tanˇ piˇ ve, maˇ heˆ leh yawˇ hui ve kanˉ hkʼaˇ hpawˇ chehˇ ve yoˬ. Yawˇ hui aˬ htoꞈ ma kʼoˆ ve htawˇ, chaw teˇ hpaˍ hpaˍ yonˍ ve yoˬ. Yeˍsuˆ miˬ guiˬ hkʼoˆ lo yaꞈ la leh yawˇ hui htaꞈ gʼa mawˬ daꞈ htaˇ, yawˇ hui bon maˍ paˍ htaꞈ mawˬ daꞈ leh ha lehˬ ve hkʼe ha lehˬ jaˇ tuˬ naˍ maˇ shiˍ. Yaꞈ hkʼaˇ, awˬ tehˬ ve Hkriꞈ yaˇ lehˬ chi hkʼe maˇ heˆ. Ngaˬ hui bon maˍ paˍ awˬ hoˉ maˇ cawˬ. Gʼuiˬ sha ve kanˉ hkʼaˇ hkʼaw sheh kʼai paˍ htaꞈ ngaˬ hui yawˆ yan ve htawˇ, ngaˬ hui maˇ fuiˍ maˇ pehˬ daꞈ. Yeˍsuˆ maˍ laˇ ve tawˇ hkawˇ htaꞈ ngaˬ hui na yuˬ ve yoˬ. Oˇ kaˬ lo kʼoˆ ve, “nawˬ hui hkʼa peu˗eˬ awˬ viˉ awˬ nyi hpehꞈ ve yoˬ.” (Maꞈhtehˍ 23:8-10) Awˬ tehˬ ve Hkriꞈ yaˇ lehˬ, bon awˬ hoˉ, mvuhˇ miˬ hpawˇ sheh kʼai paˍ leh, yawˇ hui hpawˇ maˇ chehˇ leh maˇ chiˇ uiˍ chiˇ mvuh piˇ. Ngaˬ hui choˬ paˉ oˇ paˉ maˇ chehˇ leh miˬ guiˬ htaꞈ kaꞈ maˇ caˉ daꞈ. Yaˬhoˉvaˬ ve Shaˉhkiˆhkanˍ ve chaw chi hkʼe te ve lehˬ, awˬ nu ve bon liˇ yawˇ hui awˬ tehˬ ve Hkriꞈ yaˇ hpehꞈ ve tehꞈ kʼoˆ ve htaꞈ ngaˬ hui maˇ shuˍ.—Yoˇhanˬ 18:36.

8. Yaˬhoˉvaˬ yawˇ ve awˬ meh htaꞈ shiˍ tcuh gaˇ leh awˬ meꞈ awˬ hponˇ cawˬ tuˬ te tcuh gaˇ ve tehꞈ ngaˬ hui hkʼaˬ hkʼe te shiˍ gʼa ve le?

⁸ Teˇ pawˆ htaˇ Yeˍsuˆ bon lawˬ ve, “A pa˗oˬ, nawˬ ve awˬ meh htaꞈ awˬ meꞈ awˬ hponˇ tawˆ la piˇ˗oˆ.” Hkʼe te leh, mvuhˇ tawˍ mvuhˇ htehˆ ve awˬ hkawˇ hkʼe mvuhˇ naw ma hkʼoˆ Yaˬhoˉvaˬ ve awˬ hkawˇ bvuhˬ tawˆ la leh kʼoˆ ve, yawˇ ve awˬ meh htaꞈ awˬ meꞈ awˬ hponˇ cawˬ la piˇ peuˬ. (Yoˇhanˬ 12:28) Yeˍsuˆ miˬ guiˬ hkʼoˆ lo chehˇ ve awˬ yanˇ htaˇ, yawˇ ve Awˬ pa ve awˬ meh htaꞈ awˬ meꞈ awˬ hponˇ cawˬ tuˬ hkʼaˬ htaˆ kaꞈ te ve yoˬ. Yeˍsuˆ awˬ hkʼaˇ suh gʼaꞈ yuˬ ve awˬ tehˬ ve Hkriꞈ yaˇ kaꞈ, Gʼuiˬ sha ve awˬ meh htaꞈ gʼa yehˇ ve ha lehˬ jaˇ leh, awˬ nu ve chaw Gʼuiˬ sha ve awˬ meh htaꞈ shiˍ tuˬ maˍ piˇ ve kaꞈ ha lehˬ jaˇ.—Yoˇhanˬ 17:26.

9. Awˉ lawˉ peuˇ ve Hkriꞈ yaˇ Gʼuiˬ sha ve awˬ meh htaꞈ yehˇ ve ha lehˬ jaˇ ve tehꞈ ngaˬ hui hkʼaˬ hkʼe te shiˍ gʼa ve le?

⁹ Hkriꞈ yaˇ awˬ moˍ cawˬ peuˬ hkʼawꞈ nawˉ maˇ maw Yaˬhoˉvaˬ lehˬ, “yawˇ ve awˬ meh htaꞈ pfuhˇ tuˬ ve awˬ pon buiˇ shaˆ aˉ naˆ chaw hui awˬ hkʼaw lo chaw teˇ moˍ htaꞈ yuˬ tawˆ tuˬ, awˉ lawˉ htaˇ Gʼuiˬ sha yawˇ hui htaꞈ dawˇ nyi leh ha kʼaˉ ve” yoˬ. (Tcuh yaˇ 15:14) Awˉ lawˉ peuˇ ve Hkriꞈ yaˇ Gʼuiˬ sha ve awˬ meh gʼa yehˇ ve ha lehˬ jaˇ leh awˬ nu ve chaw Gʼuiˬ sha ve awˬ meh htaꞈ shiˍ la tuˬ te ve kaꞈ yawˇ hui ha lehˬ jaˇ ve yoˬ. Yawˇ hui bvuhꞈ taˍ ve Liꞈ hpu hkʼaw kaꞈ Gʼuiˬ sha ve awˬ meh yehˇ leh bon  maˍ toˇ htaˇ kaꞈ Gʼuiˬ sha ve awˬ meh yehˇ ve yoˬ. * Chi yawˇ hui lehˬ awˬ nu ve chaw Gʼuiˬ sha ve awˬ meh htaꞈ shiˍ tuˬ te ve teˇ moˍ tiˉ cawˬ ve tehꞈ ngaˬ hui gʼa mawˬ ve yoˬ.—Tcuh yaˇ 2:14, 21.

10. Yaˬhoˉvaˬ ve Shaˉhkiˆhkanˍ ve chaw teˇ moˍ ceh tiˉ awˬ nu ve chaw Gʼuiˬ sha ve awˬ meh htaꞈ shiˍ la tuˬ te piˇ ve tehꞈ ngaˬ hui hkʼaˬ hkʼe te shiˍ gʼa ve le?

¹⁰ Yaˬhoˉvaˬ ve Shaˉhkiˆhkanˍ ve chaw teˇ moˍ ceh tiˉ awˬ nu ve chaw Gʼuiˬ sha ve awˬ meh htaꞈ shiˍ la tuˬ te piˇ ve maˇ heˆ laˇ? Te piˇ ve yoˬ. Ngaˬ hui awˬ lawn chi htaꞈ teˇ geh nyi sheˍ. Chi beuꞈ teˇ co˗e ve bon awˬ hoˉ awˬ nu ve chaw Gʼuiˬ sha ve awˬ meh htaꞈ maˇ gʼa shiˍ tuˬ yawˇ hui te gʼa ve hkʼe teˇ ceuˬ le le te ve yoˬ. Yawˇ hui Liꞈ hpu hkʼaw Yaˬhoˉvaˬ ve awˬ meh htaꞈ shiˆ baˬ leh yawˇ hui ve bon yehˬ hkʼaw kaꞈ awˬ meh chi maˇ kʼoˆ tcuh. * Yaꞈ hkʼaˇ, Shaˉhkiˆhkanˍ ve chaw chi hkʼe maˇ te. Shaˉhkiˆhkanˍ ve chaw lehˬ Gʼuiˬ sha ve awˬ meh htaꞈ yehˇ leh chiˇ uiˍ chiˇ mvuh ve tehꞈ awˬ nu ve chaw shiˍ ve yoˬ. Awˬ nu ve chaw Gʼuiˬ sha ve awˬ meh htaꞈ shiˍ tuˬ ngaˬ hui ga piˇ leh ngaˬ hui hkʼe leˇ te ve awˬ nu ve bon awˬ moˍ maˇ cawˬ. Chi hkʼe ceh tiˉ maˇ heˆ. Ngaˬ hui a shaꞈ teꞈ kuiˬ hkʼaw Gʼuiˬ sha ve awˬ meh htaꞈ yehˇ ve kaꞈ keunˍ jaˇ. (Iˉsaˍyaˆ 43:10-12) Chi hkʼoˆ kaꞈ, Miˬ guiˬ awˬ suhˉ yuˬ tawˆ ve Liꞈ hpu 240 lanˬ kʼoˆ hpaˆ yuˬ tawˆ ve yoˬ. Choˬ kaˬ lo Yaˬhoˉvaˬ ve awˬ meh cawˬ keunˍ cawˬ cawˇ ve hkʼaw kʼawꞈ keu ve yoˬ. Awˬ nu ve Liꞈ hpu hkʼaw Gʼuiˬ sha ve awˬ meh yuˬ baˬ ve yoˬ. Liꞈ hpu htaꞈ caˉ daꞈ ve liꞈ kʼoˆ ngaˬ hui 1,000 chaw ceuˬ tawˇ hkawˇ hpaˆ yuˬ tawˆ leh awˬ nu ve chaw Gʼuiˬ sha ve awˬ meh htaꞈ shiˍ tuˬ ga piˇ ve yoˬ.

11. Awˉ lawˉ peuˇ ve Hkriꞈ yaˇ awˬ tehˬ ve htaꞈ haꞈ ve tehꞈ ngaˬ hui hkʼaˬ hkʼe te shiˍ gʼa ve le?

¹¹ Yeˍsuˆ awˬ tehˬ ve htaꞈ haꞈ ve lehˬ, Yaˬhoˉvaˬ htaꞈ caˉ daꞈ ve leh yawˇ ve a loˍ awˬ tehˬ ve htaꞈ Yeˍsuˆ haꞈ ve yoˬ. Chi hkʼoˆ kaꞈ, Yeˍsuˆ awˬ tehˬ ve awˬ hkʼaˇ suh gʼaꞈ te leh awˬ nu ve chaw awˬ tehˬ ve htaꞈ shiˍ la tuˬ kaꞈ ga piˇ ve yoˬ. (Yoˇhanˬ 18:37) Yeˍsuˆ awˬ hkʼaˇ suh gʼaꞈ yuˬ ve awˬ laꞈ gʼawˇ kaꞈ chi hkʼe te ve yoˬ. Yawˇ hui awˬ tehˬ ve htaꞈ haꞈ jaˇ. (Yoˇhanˬ 4:23, 24) Tcuh yaˇ Peˍtruˆ Hkriꞈ yaˇ yonˍ ve lehˬ “hteˇ ve cawˇ ve yaꞈ kʼaw” htaꞈ shuˍ ve tehꞈ kʼoˆ ve yoˬ. (2 Peˍtruˆ 2:2) Awˉ lawˉ peuˇ ve Hkriꞈ yaˇ awˬ tehˬ ve htaꞈ haꞈ jaˇ ve pa taw, bon liˇ bon hkʼaˇ, chaw liˇ vaˇ liˇ, leh awˬ tehˬ ve htaꞈ maˇ caˉ daꞈ ve hkʼaˬ hkʼe ve dawˇ hkʼaˇ htawˇ maˇ kʼoˆ, yawˇ hui maˇ haꞈ yuˬ leh maˇ yonˍ. (Kawˇlawˇsehˇ 2:8) Chi beuꞈ teˇ co˗e awˬ tehˬ ve Hkriꞈ yaˇ kaꞈ hteˇ ve cawˇ ve awˬ hkʼaˇ suh kʼai ve yoˬ. Yawˇ hui yonˍ ve teˇ ceuˬ le le Liꞈ hpu hkʼaw cawˬ leh Liꞈ hpu hkʼaw kʼoˆ ve hkʼe yawˇ hui gʼaꞈ te ve yoˬ.—3 Yoˇhanˬ 3, 4.

12. Gʼuiˬ sha ve kanˉ hkʼaˇ hkʼaw ve chaw sheh kʼai paˍ teˇ ceuˬ ceuˬ gʼa pa cawˇ ve htaꞈ shiˍ htaˇ yawˇ hui aˬ htoꞈ ma te ve le? Leh aˬ htoꞈ ma te yawˇ hui chi hkʼe te ve le?

¹² Yaˬhoˉvaˬ ve Shaˉhkiˆhkanˍ ve chaw yawˇ hui awˬ tehˬ ve htaꞈ hkʼa peu˗eˬ na gʼa ve tehꞈ maˇ gʼa kʼoˆ leh Liꞈ hpu hkʼaw ve awˬ lawn hkʼa peu˗eˬ htaꞈ na gʼa ve kaꞈ maˇ gʼa kʼoˆ. Teˇ pawˆ pawˆ yawˇ hui kaꞈ Liꞈ hpu hkʼaw maˍ ve htaꞈ hkʼa peu˗eˬ maˇ na gʼa leh Hkriꞈ yaˇ awˬ moˍ hkʼaw beˆ maˍ piˇ ve maˇ cawˇ ve kaꞈ cawˬ ve yoˬ hehˉ. Liꞈ hpu hkʼaw kʼoˆ ve, cuˇ yiˍ shaˬ te shaˬ cawˬ maˇ la ve pa taw ngaˬ hui anˇ tuˬ maˇ loˍ. (Kawˇlawˇsehˇ 1:9, 10) Ngaˬ hui awˬ tehˬ ve htaꞈ awˬ meu˗eˇ awˬ meu˗eˇ na gʼa tuˬ Yaˬhoˉvaˬ ga laˇ gʼa ve pa taw gʼa yeunˇ hkanˍ ve yoˬ. Awˬ tehˬ ve lehˬ shaˬ te shaˬ awˬ gʼeuˆ ba la chehˇ ve htaꞈ shuˍ ve yoˬ. (Tawˇ naˉ ve 4:18) Gʼuiˬ sha ve kanˉ hkʼaˇ hkʼaw ve sheh kʼai paˍ aˬ htoꞈ ma gʼa pa cawˇ ve htaꞈ yawˇ hui shiˍ ve kʼo, laꞈ haˉ pa ve yoˬ. Awˬ tehˬ kʼo, bon liˇ laiˉ maˬ kaꞈ pa ve cawˬ ve yoˬ. Yawˇ hui pa ve lehˬ bon yehˬ hkʼaw ve awˬ moˍ yaˇ dawˇ cawˇ tcuh gaˇ ve pa taw, maˇ˗awˍ ve chaw dawˇ cawˇ ve awˬ hkʼaˇ suh gʼaꞈ pa ve yoˬ. Gʼuiˬ sha ve kanˉ hkʼaˇ pa ve cawˬ htaˇ, ngaˬ hui kaꞈ gʼaꞈ pa ve lehˬ Yaˬhoˉvaˬ haꞈ yuˬ laˇ tcuh gaˇ leh ngaˬ hui Yeˍsuˆ te ve hkʼe te ve yoˬ. (Yaˍkoˆ 4:4) Maˇ˗awˍ ve chaw dawˇ cawˇ ve maˇ heˆ leh chaw teˇ gʼaˇ ve dawˇ hkʼaˇ awˬ hkʼaˇ suh ngaˬ hui maˇ gʼaꞈ pa. Yaꞈ hkʼaˇ, ngaˬ hui pa ve lehˬ ngaˬ hui awˬ tehˬ ve htaꞈ haꞈ leh Liꞈ hpu hkʼaw ve cuˇ yiˍ htaꞈ ngaˬ hui hkʼa dehꞈ na gʼa la ve pa taw pa ve yoˬ!—1 Hteˇsaˍlawˇniˆ 2:3, 4.

13. Awˬ tehˬ ve Hkriꞈ yaˇ ve daꞈ ve te hkʼaˇ dawˇ hkʼaˇ lehˬ aˬ htoꞈ ma le? Leh awˬ lawn chi htaꞈ Yaˬhoˉvaˬ ve Shaˉhkiˆhkanˍ ve chaw hkʼaˬ hkʼe te ve le?

¹³ Awˉ lawˉ peuˇ ve Hkriꞈ yaˇ daꞈ ve te hkʼaˇ dawˇ hkʼaˇ laiˉ ceuˬ cawˬ ve yoˬ. Yawˇ hui daꞈ jaˇ ve teˇ ceuˬ lehˬ haꞈ daꞈ puiˉ jaˇ ve yoˬ. Yeˍsuˆ kʼoˆ ve, “nawˬ hui teˇ gʼaˇ leh teˇ gʼaˇ haꞈ daꞈ ve kʼo, haꞈ daꞈ ve oˇ ve htaꞈ pa taw nawˬ hui ngaˬ ve awˬ laꞈ gʼawˇ hpehꞈ ve htaꞈ chaw hkʼa peu˗eˬ gʼa shiˍ tuˬ yoˬ.” (Yoˇhanˬ 13:34, 35) Chi beuꞈ teˇ co˗e miˬ guiˬ chi hkʼoˆ lo Yaˬhoˉvaˬ ve Shaˉhkiˆhkanˍ ve chaw haꞈ daꞈ leh teˇ moˍ tiˉ hpehꞈ ve yoˬ. Ngaˬ hui awˬ nu ve bon liˇ htaꞈ maˇ shuˍ. Ngaˬ hui mvuhˇ miˬ hkʼaˬ kaˬ lo laˬ ve maˇ heˆ leh chaw ceuˬ hkʼaˬ hkʼe ve hpehꞈ ve htawˇ teˇ yehˬ kʼa hkʼaw ve chaw htaꞈ shuˍ ve yoˬ. Chi ve htaꞈ ngaˬ hui mawˬ gʼa tuˬ Hkriꞈ yaˇ awˬ moˍ hkʼaw hpawnˬ daꞈ ve, hpawnˬ daꞈ lonˉ teˇ nyi, leh hpawnˬ daꞈ lonˉ shehˆ nyi hkʼaw mawˬ gʼa ve yoˬ. Yaˬhoˉvaˬ ngaˬ hui oˉ kʼoˍ pui ve htaꞈ haꞈ yuˬ laˇ ve tehꞈ chi ve teˇ hpaˍ ngaˬ hui hkʼa dehꞈ yonˍ gʼa tuˬ te laˇ ve yoˬ.

14. Kawˇlawˇsehˇ liꞈ 3:12-14 hkʼaw kʼoˆ taˍ ve hkʼe, ngaˬ hui haꞈ daꞈ ve htaꞈ mawˬ tuˬ te gʼa ve awˬ hkʼaˇ aˬ htoꞈ ma cawˬ ve le?

¹⁴ Liꞈ hpu hkʼaw kʼoˆ ve, ngaˬ hui “teˇ gʼaˇ leh teˇ gʼaˇ gʼaˇ hteꞈ haꞈ daꞈ˗oꞈ.” (1 Peˍtruˆ 4:8) Ngaˬ hui chi hkʼe te gʼa ve teˇ hkʼaˇ lehˬ, teˇ gʼaˇ leh teˇ gʼaˇ yeunˇ hkanˍ daꞈ ve, teˇ gʼaˇ leh teˇ gʼaˇ venˇ baˆ taˍ daꞈ kuiˬ cawˬ kʼo, venˇ baˆ hpehˇ daꞈ ve yoˬ. Chi hkʼoˆ kaꞈ, Hkriꞈ yaˇ awˬ moˍ hkʼaw ve chaw teˇ gʼaˇ le le leh ngaˬ hui htaꞈ nyi ma luˬ tuˬ te laˇ ve chaw htaꞈ htawˇ gʼa haꞈ ve yoˬ. (Kawˇlawˇsehˇ 3:12-14 gʼaw sheˍ.) Ngaˬ hui chi hkʼe te haꞈ daꞈ ve kʼo, awˬ tehˬ ve Hkriꞈ yaˇ hpehꞈ ve yoˬ.

15. Awˉ lawˉ peuˇ ve Hkriꞈ yaˇ te ve hkʼe ngaˬ hui te gʼa tuˬ aˬ htoꞈ ma cawˬ sheˍ ve le?

¹⁵ Awˉ lawˉ peuˇ ve Hkriꞈ yaˇ te ve hkʼe, oˉ kʼoˍ pui ve htaꞈ caˉ daꞈ ve awˬ nu ve awˬ ceuˬ ngaˬ hui te gʼa ve cawˬ sheˍ ve yoˬ. Tawˇ pa haˉ te kʼo, awˉ lawˉ peuˇ ve Hkriꞈ yaˇ te ve hkʼa shuˍ, chi beuꞈ teˇ co˗e Gʼuiˬ sha ve kanˉ hkʼaˇ hkʼaw kaꞈ, toˇ nyi shehˍ hpaˇ, nyi haꞈ shaˉ paˍ, leh ga piˇ shehˍ hpaˇ te ve yoˬ. (Hpiˇliˇpiˆ 1:1; Tiˇtuˆ 1:5) Chi hkʼoˆ kaꞈ, ngaˬ hui Gʼuiˬ sha ve awˬ liˇ awˬ hkʼaˇ htaꞈ gʼaꞈ te ve teˇ hpaˍ lehˬ, heuˆ daꞈ ve, teˇ geh zuhꞈ ve, awˬ suhˍ awˬ lawn, leh awˉ lawˉ peuˇ ve Hkriꞈ yaˇ te yaꞈ leh venˇ baˆ maˇ dawˇ hpfuhˆ ve htaꞈ gu ve hkʼe, chi ve teˇ hpaˍ cawˇ ve hkʼaw te ve yoˬ.—Tcuh yaˇ 15:28, 29; 1 Kawˇrenˍhtuˆ 5:11-13; 6:9, 10; Heˍbrehˇ 13:4.

16. Eˇfeˇsuꞈ liꞈ 4:4-6 hkʼaw ngaˬ hui htaꞈ aˬ htoꞈ ma maˍ laˇ ve le?

¹⁶ Yeˍsuˆ kʼoˆ ve laiˉ gʼaˇ yawˇ ve awˬ laꞈ gʼawˇ hpehꞈ ve tehꞈ kʼoˆ ve htawˇ, teˇ gʼaˇ le le yawˇ ve awˬ laꞈ gʼawˇ awˬ tehˬ awˬ na hpehꞈ ve maˇ heˆ. (Maꞈhtehˍ 7:21-23) Liꞈ hpu hkʼaw awˬ gʼuˇ suhˍ htaˇ kaꞈ ngaˬ hui htaꞈ kʼoˆ laˇ taˍ ve, awˬ leh meuˇ ve awˬ yanˇ laiˉ gʼaˇ “Gʼuiˬ sha htaꞈ yawˆ yan ve htaꞈ caˉ daꞈ ve awˬ liˇ awˬ hkʼaˇ teˇ hpaˍ htaꞈ te ve htawˇ oˇ ve htaꞈ caˉ daꞈ ve kanˇ paˆ htaꞈ yawˇ hui chiˇ baˬ ve” yoˬ. (2 Tiˆmoˉseˍ 3:1, 5) Yaꞈ hkʼaˇ, Liꞈ hpu hkʼaw hkʼa tawˍ lehˆ kʼoˆ laˇ ve, Gʼuiˬ sha lehˬ “yonˍ ve teˇ ceuˬ tiˉ” cawˬ ve htaꞈ ceh haꞈ yuˬ ve yoˬ.—Eˇfeˇsuꞈ 4:4-6 gʼaw sheˍ.

17. “Yonˍ ve teˇ ceuˬ tiˉ” cawˬ leh Yeˍsuˆ awˬ hkʼaˇ suh gʼaꞈ te leh Gʼuiˬ sha haꞈ yuˬ laˇ ve chi beuꞈ teˇ co˗e a shu te chehˇ ve le?

¹⁷ “Yonˍ ve teˇ ceuˬ tiˉ” cawˬ ve htaꞈ Gʼuiˬ sha haꞈ yuˬ laˇ ve hkʼaˬ ve teˇ moˍ le? Yeˍsuˆ leh awˉ lawˉ peuˇ ve Hkriꞈ yaˇ ve awˬ lawn ngaˬ hui nyi peuˬ hkʼawꞈ nawˉ, Yaˬhoˉvaˬ ve Shaˉhkiˆhkanˍ ve chaw teˇ moˍ ceh tiˉ hpehꞈ ve tehꞈ hkʼa tawˍ lehˆ gʼa mawˬ ve yoˬ. Ngaˬ hui Yaˬhoˉvaˬ ve Shaˉhkiˆhkanˍ ve chaw gʼa hpehꞈ leh Yaˬhoˉvaˬ htaꞈ caˉ daꞈ ve awˬ tehˬ ve leh yawˇ ve a loˍ htaꞈ kaꞈ gʼa shiˍ ve ha lehˬ jaˇ! Ngaˬ hui yonˍ ve awˬ ceuˬ awˬ tehˬ hpehꞈ ve tehꞈ yonˍ sheˍ.