1. Ha kʼaˉ puiˉ ve htaꞈ ngaˬ hui kʼoˆ htaˇ hkʼaˬ hkʼe ve chaw htaꞈ dawˇ mawˬ ve le?

 Ha kʼaˉ puiˉ ve htaꞈ ngaˬ hui kʼoˆ htaˇ hkʼaˬ hkʼe ve chaw htaꞈ dawˇ mawˬ ve le? Nyi ma nuˇ nehˬ ve, dawˇ sha gawˬ lehˍ ve, ha kʼaˉ puiˉ ve, piˇ gaˇ puiˉ ve, chi ve teˇ hpaˍ htaꞈ ngaˬ hui dawˇ mawˬ ve yoˬ. Awˬ hkʼoˆ kaꞈ, Saˍmaˍriˆ chaw Yuˇdaꞈ chaw htaꞈ ha kʼaˉ ve awˬ lawn Yeˍsuˆ tawˇ pa haˉ tehˆ maˍ laˇ ve htaꞈ ngaˬ hui dawˇ mawˬ ve yoˬ hehˉ. Yuˇdaꞈ chaw teˇ gʼaˇ htaꞈ chaw hkʼawˇ dawˆ piˇ ve htaꞈ yawˇ gʼa mawˬ htaˇ “ha kʼaˉ jaˇ” leh yawˇ haꞈ pehnˇ ve hkʼaw Yuˇdaꞈ chaw htaꞈ ga piˇ ve yoˬ. (Luˉkaꞈ 10:29-37) Yaˬhoˉvaˬ lehˬ ha kʼaˉ puiˉ jaˇ ve Gʼuiˬ sha hpehꞈ ve tehꞈ ngaˬ hui mawˬ tuˬ tawˇ pa haˉ chi ve tehˆ maˍ laˇ ve yoˬ. Yawˇ ngaˬ hui htaꞈ haꞈ jaˇ ve pa taw, ngaˬ hui htaꞈ teˇ nyi le le ha kʼaˉ laˇ ve yoˬ.

2. Ha kʼaˉ ve lehˬ aˬ htoꞈ ma htaꞈ caˉ daꞈ sheˍ ve le?

² Ha kʼaˉ ve htaꞈ ngaˬ hui kʼoˆ htaˇ, te yaꞈ ve chaw htaꞈ maˇ ciˍ yanˍ piˇ ve teˇ ceuˬ htaꞈ ngaˬ hui dawˇ mawˬ ve yoˬ. Yaˬhoˉvaˬ ngaˬ hui htaꞈ chi hkʼe ha kʼaˉ laˇ ve yoˬ. Chiˇ mvuh ve liꞈ bvuhꞈ paˍ kʼoˆ ve, “ngaˬ hui lehˬ ciˍ yanˍ keunˍ ve chaw hpehꞈ ve htawˇ, yawˇ maˇ ciˍ yanˍ laˇ.” (Chiˇ mvuh ve 103:10) Yaꞈ hkʼaˇ, teˇ pawˆ pawˆ kʼo, te yaꞈ ve chaw htaꞈ Yaˬhoˉvaˬ hehnˇ ve hkʼaw maˍ piˇ ve yoˬ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Awˬ lawn chi ve hkʼaw na hkawˇ 3 maˬ htaꞈ ngaˬ hui teˇ geh henˇ tuˬ yoˬ. Aˬ htoꞈ ma te Yaˬhoˉvaˬ ha kʼaˉ puiˉ ve tehꞈ hpeuꞈ maw laˇ ve le? Hehnˇ ve hkʼaw maˍ piˇ ve lehˬ ha kʼaˉ ve tehꞈ hkʼaˬ hkʼe hpeuꞈ maw laˇ ve le? Leh ngaˬ hui ha kʼaˉ ve tehꞈ hpeuꞈ maw piˇ tuˬ aˬ htoꞈ ma ga laˇ ve le? Na hkawˇ chi ve teˇ hpaˍ hkʼawꞈ laˇ gʼa tuˬ Liꞈ hpu hkʼaw teˇ geh nyi sheˍ.

4. Aˬ htoꞈ ma te Yaˬhoˉvaˬ ha kʼaˉ puiˉ ve tehꞈ hpeuꞈ maw laˇ ve le?

⁴ Ha kʼaˉ puiˉ ve htaꞈ Yaˬhoˉvaˬ dawˇ cawˇ jaˇ. Tcuh yaˇ Pawˇluꞈ htaꞈ dawˇ pawnˍ piˇ leh bvuhꞈ tcuh ve, Gʼuiˬ sha lehˬ “ha kʼaˉ puiˉ jaˇ  ve” cawˬ ve yoˬ. Awˬ lawn chi ve hkʼaw Pawˇluꞈ kʼoˆ ve, maˇ biˇ ve chaw yaˇ htaꞈ Gʼuiˬ sha ha kʼaˉ jaˇ leh mvuhˇ naw ma hkʼoˆ dawˇ law kuiˬ cawˬ tcuh ve yoˬ. (Eˇfeˇsuꞈ 2:4-7) Yaꞈ hkʼaˇ, chi ve teˇ moˍ htaꞈ ceh Yaˬhoˉvaˬ ha kʼaˉ ve maˇ heˆ. Chiˇ mvuh ve liꞈ hkʼaw Daˍviˆ kʼoˆ ve, “yawˇ lehˬ chaw teˇ gʼaˇ le le htaꞈ awˬ bon naꞈ piˇ leh, yawˇ te hpanˍ taˍ ve awˬ ceuˬ hkʼa peu˗eˬ htaꞈ ha kʼaˉ puiˉ ve nyi ma cawˬ ve yoˬ.” (Chiˇ mvuh ve 145:9) Yaˬhoˉvaˬ chaw yaˇ htaꞈ haꞈ jaˇ leh yawˇ ha kʼaˉ puiˉ ve tehꞈ hpeuꞈ maw laˇ ve yoˬ.

5. Yaˬhoˉvaˬ ha kʼaˉ puiˉ jaˇ ve tehꞈ Yeˍsuˆ hkʼaˬ hkʼe te shiˍ gʼa ve le?

⁵ Yaˬhoˉvaˬ hkʼaˬ hkʼe taw ha kʼaˉ puiˉ jaˇ ve Yeˍsuˆ shiˍ ve yoˬ. Yeˍsuˆ mvuhˇ naw ma hkʼoˆ Yaˬhoˉvaˬ geh chehˇ maw jaˇ ve pa taw, yawˇ hkʼe taw shiˍ ve teˇ gʼaˇ kaꞈ maˇ cawˬ. (Tawˇ naˉ ve 8:30, 31) Chaw yaˇ Yaˬhoˉvaˬ htaꞈ venˇ baˆ laiˉ pawˆ te yaꞈ ve htawˇ, Yaˬhoˉvaˬ ha kʼaˉ puiˉ jaˇ ve tehꞈ Yeˍsuˆ gʼa mawˬ ve yoˬ. (Chiˇ mvuh ve 78:37-42) Yeˍsuˆ maˍ htaˇ kaꞈ Yaˬhoˉvaˬ ve te hkʼaˇ dawˇ hkʼaˇ ha kʼaˉ puiˉ ve htaꞈ teˇ hkui teˇ hkui kʼoˆ ve yoˬ.

6. Yaˬhoˉvaˬ ha kʼaˉ puiˉ jaˇ ve tehꞈ ngaˬ hui na gʼa tuˬ Yeˍsuˆ hkʼaˬ hkʼe ga laˇ ve le?

⁶ Yaˬhoˉvaˬ hkʼaˬ hkʼe taw ha kʼaˉ puiˉ ve ngaˬ hui na gʼa tuˬ peuˬ taˉ ve teˇ lawn hkʼaw mehˉ kʼai taˍ ve yaˇ paˍ ve awˬ lawn Yeˍsuˆ tawˇ pa haˉ tehˆ maˍ laˇ ve yoˬ. Tawˇ pa haˉ chi ve hkʼaw yaˇ paˍ teˇ gʼaˇ yehˬ hkʼaw tawˆ˗e leh “yawˇ miˬ guiˬ ha lehˬ tuˬ te ponˬ te leuˉ leh, hpu shi mawˇ jeˬ htaꞈ yehˇ baˬ caˇ baˬ peuˬ sheˬ ve yo.” (Luˉkaꞈ 15:13) Peuˬ hkʼawꞈ nawˉ, yawˇ venˇ baˆ dawˇ hpfuhˆ leh nyi ma taˍ nehˬ leh aˉ hkʼaw kʼawꞈ la ve yoˬ. Yawˇ ve awˬ pa hkʼaˬ hkʼe te ve le? Yeˍsuˆ kʼoˆ ve, “yaˇ vuiˇ kuiˬ lo kʼawꞈ la chehˇ ve htaꞈ awˬ pa gʼa mawˬ htaˇ, yawˇ htaꞈ ha kʼaˉ leh, yawˇ geh gʼuiˇ kʼai ve yoˬ. Awˬ yaˇ paˍ ve kʼawˍ peˍ htaꞈ kʼuˉ taˍ leh boˆ nu ve yoˬ.” Awˬ pa yawˇ htaꞈ maˇ deˇ piˇ. Yaꞈ hkʼaˇ, awˬ pa yawˇ htaꞈ ha kʼaˉ leh aˉ hkʼaw kʼawꞈ la tuˬ kʼawꞈ haꞈ yuˬ piˇ ve yoˬ. Yaˇ chi teˇ gʼaˇ venˇ baˆ uiˍ jaˇ ve htaꞈ te ve htawˇ, yawˇ venˇ baˆ dawˇ hpfuhˆ leh awˬ pa kaꞈ venˇ baˆ hpehˇ piˇ ve yoˬ. Tawˇ pa haˉ chi ve hkʼaw awˬ pa lehˬ, Yaˬhoˉvaˬ htaꞈ shuˍ ve yoˬ. Venˇ baˆ dawˇ hpfuhˆ ve chaw htaꞈ Yaˬhoˉvaˬ venˇ baˆ hpehˇ piˇ tuˬ yoˬ tehꞈ ngaˬ hui mawˬ tuˬ Yeˍsuˆ ga laˇ ve yoˬ.—Luˉkaꞈ 15:17-24.

7. Yaˬhoˉvaˬ ha kʼaˉ puiˉ jaˇ ve tehꞈ hpeuꞈ maw laˇ ve lehˬ, yawˇ cuˇ yiˍ cawˬ ve Gʼuiˬ sha hkʼaˬ hkʼe hpehꞈ ve le?

⁷ Yaˬhoˉvaˬ lehˬ cuˇ yiˍ cawˬ jaˇ. Yaꞈ hkʼaˇ, yawˇ ve cuˇ yiˍ ha kʼaˉ puiˉ ve hpawˇ yehˇ ve yoˬ. Yawˇ hkʼaˬ hkʼe ve hpawˇ dawˇ cheˆ ve htawˇ maˇ kʼoˆ, yawˇ hpanˍ taˍ ve awˬ ceuˬ teˇ hpaˍ htaꞈ hkʼaˬ htaˆ kaꞈ awˬ bon cawˬ ve yoˬ. Liꞈ hpu hkʼaw kʼoˆ ve, ‘mvuhˇ naw ma lo yaꞈ la ve cuˇ yiˍ lehˬ, ha kʼaˉ puiˉ ve teˇ ceuˬ kaꞈ, daꞈ ve awˬ shiˍ kaꞈ, hkʼa biˇ cawˬ ve yoˬ.’ (Yaˍkoˆ 3:17) Yaˬhoˉvaˬ lehˬ, awˬ pa awˬ e yaˇ htaꞈ haꞈ jaˇ ve hkʼe hpehꞈ ve yoˬ. Yaˇ awˬ pa awˬ e ha kʼaˉ laˇ tuˬ loˍ ve tehꞈ yawˇ hui shiˍ  ve yoˬ. (Chiˇ mvuh ve 103:13; Iˉsaˍyaˆ 49:15) Ngaˬ hui maˇ biˇ ve chaw yaˇ hpehꞈ leh Gʼuiˬ sha ha kʼaˉ laˇ tuˬ loˍ ve tehꞈ yawˇ shiˍ ve yoˬ. Hkʼe te leh, yawˇ ngaˬ hui htaꞈ venˇ baˆ hpehˇ laˇ leh ngaˬ hui awˬ gʼuˇ suhˍ hpawˇ dawˇ law kuiˬ cawˬ ve yoˬ. Yaˬhoˉvaˬ ha kʼaˉ puiˉ jaˇ ve tehꞈ hpeuꞈ maw laˇ ve lehˬ, yawˇ cuˇ yiˍ cawˬ jaˇ ve Gʼuiˬ sha hpehꞈ ve tehꞈ ngaˬ hui mawˬ ve yoˬ. Leh Gʼuiˬ sha lehˬ hkʼaˬ htaˆ kaꞈ ha kʼaˉ puiˉ jaˇ. Yaꞈ hkʼaˇ, Yaˬhoˉvaˬ ha kʼaˉ puiˉ ve lehˬ te yaꞈ ve chaw htaꞈ a yeˇ maˇ yuˬ ve maˇ heˆ tehꞈ ngaˬ hui hkʼaˬ hkʼe te shiˍ gʼa ve le?

8. Teˇ pawˆ pawˆ aˬ htoꞈ ma gʼa te ve le? Leh aˬ htoꞈ ma pa taw le?

⁸ Gʼuiˬ sha ve kanˉ te ve chaw venˇ baˆ te yaꞈ ve kʼo, ngaˬ hui hkʼaˬ hkʼe te cawˇ ve le? Pawˇluꞈ htaꞈ dawˇ pawnˍ piˇ leh bvuhꞈ tcuh taˍ ve, chaw oˇ ve teˇ gʼaˇ htaꞈ “awˬ chawˇ maˇ gʼa te.” (1 Kawˇrenˍhtuˆ 5:11) Venˇ baˆ maˇ dawˇ hpfuhˆ ve chaw htaꞈ Hkriꞈ yaˇ awˬ moˍ hkʼaw gʼa tawˆ cheˆ piˇ ve yoˬ. Chi awˬ viˉ awˬ nyi htaꞈ haꞈ shaˉ tuˬ leh Yaˬhoˉvaˬ ve daꞈ kehˬ ve awˬ liˇ awˬ hkʼaˇ htaꞈ haꞈ shaˉ tuˬ a yeˇ uiˍ jaˇ. Yaꞈ hkʼaˇ, tawˆ cheˆ piˇ ve lehˬ Yaˬhoˉvaˬ maˇ ha kʼaˉ puiˉ ve hpeuꞈ maw laˇ ve tehꞈ chaw teˇ hpaˍ dawˇ ve yoˬ. Awˬ tehˬ kʼo, chi hkʼe maˇ heˆ.

9-10. Heˍbrehˇ liꞈ 12:5, 6 hkʼaw kʼoˆ taˍ ve hkʼe, tawˆ cheˆ piˇ ve lehˬ ha kʼaˉ puiˉ ve tehꞈ aˬ htoꞈ ma te kʼoˆ gʼa ve le? Tawˇ pa haˉ kʼoˆ maˍ laˇ sheˍ.

⁹ Hpawnˬ daꞈ kuiˬ hkʼaw ngaˬ hui haꞈ ve awˬ viˉ awˬ nyi “Yaˬhoˉvaˬ ve Shaˉhkiˆhkanˍ ve chaw maˇ hpehꞈ˗o ve” tehꞈ kʼoˆ ve ngaˬ hui gʼa kaˇ htaˇ, nyi ma luˬ jaˇ. Yawˇ htaꞈ tawˆ cheˆ piˇ cawˇ˗aw laˇ tehꞈ ngaˬ hui htawˇ dawˇ nawˬ dawˇ cawˬ ve yoˬ. Tawˆ cheˆ piˇ ve lehˬ awˬ tehˬ ha kʼaˉ ve tehꞈ hpeuꞈ maw piˇ˗aw laˇ? Awˬ tehˬ ha kʼaˉ ve tehꞈ hpeuꞈ maw piˇ ve yoˬ. Beˆ maˍ piˇ cawˇ ve chaw htaꞈ maˇ beˆ maˍ piˇ ve lehˬ, maˇ haꞈ piˇ ve, maˇ ha kʼaˉ piˇ ve, leh cuˇ yiˍ maˇ cawˬ ve yoˬ. (Tawˇ naˉ ve 13:24) Tawˆ cheˆ piˇ ve lehˬ, venˇ baˆ te yaꞈ ve chaw yawˇ ve dawˇ hkʼaˇ pa tuˬ ga piˇ gʼa˗aw laˇ? Ga piˇ gʼa ve yoˬ. Venˇ baˆ uiˍ jaˇ ve htaꞈ te yaꞈ jaw ve chaw laiˉ gʼaˇ ve awˬ lawn htaꞈ ngaˬ hui mawˬ gʼa ve yoˬ. Nyi haꞈ shaˉ paˍ hehnˇ ve hkʼaw beˆ maˍ piˇ ve lehˬ yawˇ hui venˇ baˆ dawˇ hpfuhˆ ve, a shu yawˇ ve dawˇ hkʼaˇ pa gʼa ve, leh Yaˬhoˉvaˬ geh kʼawꞈ kʼawꞈ la tuˬ ga laˇ gʼa ve yoˬ.—Heˍbrehˇ 12:5, 6 gʼaw sheˍ.

¹⁰ Chi hkʼoˆ kaꞈ, tawˆ cheˆ piˇ ve lehˬ Hkriꞈ yaˇ awˬ moˍ htaꞈ haꞈ shaˉ ve tehꞈ ngaˬ hui na gʼa tuˬ ga laˇ ve yoˬ. Awˬ lawn chi htaꞈ teˇ geh dawˇ nyi sheˍ. Yawˬ hawˉ paˍ teˇ gʼaˇ yawˬ awˬ moˍ hkʼaw yawˬ teˇ hkeh naˬ chehˇ ve htaꞈ mawˬ ve kʼo, yawˬ chi ve htaꞈ ga piˇ gʼa tuˬ yawˇ htaꞈ teˇ kaˬ lo gʼa fuiˍ teh taˍ ve tehꞈ shiˍ ve yoˬ. Awˬ tehˬ kʼo, yawˬ lehˬ awˬ moˍ lonˉ teˇ geh chehˇ gaˇ ve yoˬ. Yawˬ teˇ hkeh awˬ moˍ hkʼaw maˇ gʼa chehˇ htaˇ, cheˆ cheˆ kʼai puiˉ leh kawˆ puiˉ jaˇ. Yawˬ hawˉ shehˍ hpaˇ yawˇ ve yawˬ htaꞈ chi hkʼe te piˇ htaˇ yawˇ ve yawˬ htaꞈ maˇ ha kʼaˉ piˇ ve laˇ? Maˇ heˆ. Naˬ chehˇ ve yawˬ ehˉ awˬ moˍ hkʼaw kʼawꞈ chehˇ tcuh ve kʼo, awˬ nu ve yawˬ htaꞈ a naˍ pehˉ la gʼa leh awˬ nu ve yawˬ htaꞈ kaꞈ naˬ tuˬ te piˇ gʼa ve tehꞈ yawˇ shiˍ ve yoˬ. Hkʼe te leh, yawˬ awˬ moˍ lonˉ htaꞈ haꞈ shaˉ tuˬ yawˇ htaꞈ teˇ kaˬ lo gʼa fuiˍ teh taˍ ve yoˬ.—Oˉ kʼoˍ pui ve 13:3, 4 htaꞈ tehˆ daꞈ sheˍ.

11. (a) Tawˆ cheˆ taˍ ve chaw lehˬ yawˬ ehˉ naˬ chehˇ ve htaꞈ hkʼaˬ hkʼe te shuˍ daꞈ ve le? (b) Tawˆ cheˆ taˍ ve chaw htaꞈ ga piˇ gʼa tuˬ aˬ htoꞈ ma cawˬ ve le?

¹¹ Tawˆ cheˆ taˍ ve chaw lehˬ yawˬ ehˉ naˬ chehˇ ve htaꞈ shuˍ ve yoˬ. Yawˇ Yaˬhoˉvaˬ geh meuˆ daꞈ ve luˬ kʼai ve yoˬ. (Yaˍkoˆ 5:14) Yawˬ ehˉ naˬ chehˇ ve awˬ nu ve yawˬ htaꞈ a naˍ pehˉ la gʼa ve hkʼa shuˍ, venˇ baˆ te yaꞈ ve chaw kaꞈ Hkriꞈ yaˇ awˬ moˍ hkʼaw awˬ viˉ awˬ nyi htaꞈ maˇ daꞈ ve dawˇ hkʼaˇ cawˬ la tuˬ te piˇ la gʼa ve yoˬ. Chi htaꞈ pa taw, Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ haꞈ shaˉ tuˬ, teˇ pawˆ pawˆ kʼo gʼa tawˆ cheˆ piˇ cawˇ ve yoˬ. Chi lehˬ Yaˬhoˉvaˬ yawˇ ve yawˬ htaꞈ haꞈ ve tehꞈ hpeuꞈ maw piˇ leh venˇ baˆ te yaꞈ ve chaw htaꞈ venˇ baˆ dawˇ hpfuhˆ tuˬ kaꞈ te piˇ gʼa ve yoˬ hehˉ. Tawˆ cheˆ piˇ ve chaw hpawnˬ daꞈ˗e gʼa ve, liꞈ kʼoˆ yuˬ gʼa ve, leh JW awˬ han tawˆ kuiˬ nyi gʼa ve yoˬ. Chi lehˬ yawˇ ve yonˍ hkʼaˇ yonˍ yeˬ tuˬ te piˇ gʼa ve yoˬ. Yawˇ co ha hpawˇ uiˍ la mvuh la ve nyi haꞈ shaˉ paˍ nyi chehˇ htaˇ, yawˇ Yaˬhoˉvaˬ geh kʼawꞈ meuˆ daꞈ tuˬ, yawˇ  Yaˬhoˉvaˬ ve Shaˉhkiˆhkanˍ ve chaw kʼawꞈ hpehꞈ la tuˬ, nyi haꞈ shaˉ paˍ yawˇ htaꞈ beˆ maˍ piˇ gʼa ve yoˬ. *

12. Venˇ baˆ te yaꞈ leh maˇ dawˇ hpfuhˆ ve chaw htaꞈ nyi haꞈ shaˉ paˍ yawˇ htaꞈ haꞈ leh ha kʼaˉ ve tehꞈ hkʼaˬ hkʼe hpeuꞈ maw piˇ gʼa tuˬ le?

¹² Venˇ baˆ te yaꞈ leh maˇ dawˇ hpfuhˆ ve chaw htaꞈ ceh tiˉ tawˆ cheˆ piˇ ve tehꞈ ngaˬ hui tawnˇ taˍ cawˇ ve yoˬ. Chaw teˇ gʼaˇ htaꞈ tawˆ cheˆ piˇ tuˬ maˇ dawˇ cheˆ sheˍ htaˇ hkʼa dehꞈ dawˇ nyi cawˇ ve tehꞈ nyi haꞈ shaˉ paˍ shiˍ ve yoˬ. Yaˬhoˉvaˬ lehˬ keunˍ daꞈ ve hkʼe maˍ piˇ ve tehꞈ yawˇ hui shiˍ ve yoˬ. (Yeˍraˍmiˆ 30:11) Yawˇ hui awˬ viˉ awˬ nyi htaꞈ haꞈ leh teˇ gʼaˇ le le Yaˬhoˉvaˬ geh hkʼaˬ htaˆ kaꞈ meuˆ daꞈ tcuh gaˇ ve yoˬ. Yaꞈ hkʼaˇ, haꞈ ve leh ha kʼaˉ ve tehꞈ hpeuꞈ maw piˇ ve teˇ hkʼaˇ lehˬ, te yaꞈ ve chaw htaꞈ Hkriꞈ yaˇ awˬ moˍ hkʼaw tawˆ cheˆ piˇ ve yoˬ.

13. Aˬ htoꞈ ma te Kawˇrenˍhtuˆ venˇ hkʼaw ve Hkriꞈ yaˇ teˇ gʼaˇ htaꞈ tawˆ cheˆ piˇ ve le?

¹³ Oˇ htaˇ teˇ co˗e venˇ baˆ te yaꞈ leh maˇ dawˇ hpfuhˆ ve chaw htaꞈ Pawˇluꞈ hkʼaˬ hkʼe gu piˇ ve teˇ geh nyi sheˍ. Kawˇrenˍhtuˆ venˇ hkʼaw chehˇ ve Hkriꞈ yaˇ teˇ gʼaˇ awˬ pa ve awˬ miˇ ma i htaꞈ haˉ chawˇ te ve kʼo, yaꞈ taw tuˬ cawˬ jaˇ. Yaˬhoˉvaˬ Iˉsaˍreˍlaˆ chaw htaꞈ kʼoˆ piˇ jaw ve, “chaw teˇ gʼaˇ a shu yawˇ awˬ pa ve awˬ miˇ ma i htaꞈ haˉ chawˇ ca te ve kʼo, yawˇ htaꞈ kaꞈ yaˇ miˇ oˇ ve htaꞈ kaꞈ gʼa tiˇ pehˍ piˇ ve yoˬ. Awˬ lawn kʼo, chaw oˇ ve lehˬ a shu yawˇ awˬ pa ve awˬ meꞈ awˬ hponˇ htaꞈ te luˬ ve pa taw yoˬ.” (Oˉ kʼoˍ pui ve 20:11) Pawˇluꞈ kʼoˆ ve, Hkriꞈ yaˇ awˬ moˍ hawˉ hkʼaˆ chi ve teˇ gʼaˇ htaꞈ tiˇ pehˍ piˇ maˇ hpehꞈ. Yaꞈ hkʼaˇ, Hkriꞈ yaˇ awˬ moˍ hkʼaw tawˆ cheˆ piˇ gʼa ve tehꞈ yawˇ kʼoˆ ve yoˬ. Hawˉ hkʼaˆ chi ve teˇ gʼaˇ te ve Hkriꞈ yaˇ awˬ moˍ htaꞈ heuˆ la kuiˬ cawˬ ve yoˬ. Hawˉ hkʼaˆ chi ve teˇ gʼaˇ te yaꞈ ve chaꞈ chiˆ jaˇ ve htaꞈ chaw teˇ hpaˍ teꞈ chiˉ maˇ dawˇ!—1 Kawˇrenˍhtuˆ 5:1, 2, 13.

14. Kawˇrenˍhtuˆ venˇ hkʼaw tawˆ cheˆ taˍ ve chaw htaꞈ Pawˇluꞈ ha kʼaˉ ve tehꞈ hkʼaˬ hkʼe hpeuꞈ maw piˇ ve le? Leh aˬ htoꞈ ma pa taw le? (2 Kawˇrenˍhtuˆ 2:5-8, 11)

¹⁴ Ponˬ kʼai ve awˬ yanˇ venˇ baˆ te yaꞈ ve chaw chi teˇ gʼaˇ yawˇ ve dawˇ hkʼaˇ pa leh awˬ tehˬ awˬ na venˇ baˆ dawˇ hpfuhˆ ve tehꞈ Pawˇluꞈ gʼa shiˍ ve yoˬ. Hawˉ hkʼaˆ chi ve teˇ gʼaˇ Hkriꞈ yaˇ awˬ moˍ yaꞈ taw tuˬ te piˇ ve htawˇ, Pawˇluꞈ hehnˇ ve hkʼaw hawˉ hkʼaˆ chi teˇ gʼaˇ htaꞈ maˇ beˆ maˍ piˇ gaˇ. Leh yawˇ awˬ hoˉ chaw mawˇ teˇ hpaˍ htaꞈ kʼoˆ piˇ ve, “dawˇ haˍ jaˇ ve awˬ hkʼaw lo yawˇ maˇ gʼa gaˬ tuˬ, yawˇ ve venˇ baˆ htaꞈ hpehˇ piˇ cawˇ leh, yawˇ htaꞈ kʼawꞈ dawˇ sha la piˇ cawˇ ve yoˬ.” Pawˇluꞈ hawˉ hkʼaˆ chi ve teˇ gʼaˇ htaꞈ ha kʼaˉ leh yawˇ Hkriꞈ yaˇ awˬ moˍ hkʼaw kʼawꞈ kʼawꞈ la tuˬ te piˇ gaˇ ve yoˬ.—2 Kawˇrenˍhtuˆ 2:5-8, 11 gʼaw sheˍ.

15. Nyi haꞈ shaˉ paˍ keunˍ lawꞈ cawˇ lawꞈ ve hkʼaw hkʼaˬ hkʼe hpeuꞈ maw piˇ gʼa tuˬ le?

¹⁵ Nyi haꞈ shaˉ paˍ beˆ maˍ piˇ tuˬ loˍ htaˇ, yawˇ hui  Yaˬhoˉvaˬ hkʼa shuˍ ha kʼaˉ puiˉ ve tehꞈ gʼa hpeuꞈ maw piˇ ve yoˬ. Yaꞈ hkʼaˇ, te gʼa ve hkʼe teˇ pawˆ le le ha kʼaˉ ve tehꞈ gʼa hpeuꞈ maw piˇ ve yoˬ. Te yaꞈ ve chaw htaꞈ nyi haꞈ shaˉ paˍ maˇ maˍ piˇ ve kʼo, yawˇ hui ha kʼaˉ ve tehꞈ maˇ hpeuꞈ maw piˇ leh te yaꞈ ve chaw htaꞈ a yeˇ maˇ yuˬ ve hkʼe te piˇ ve yoˬ. Yaꞈ hkʼaˇ, ha kʼaˉ ve hpeuꞈ maw piˇ tuˬ nyi haꞈ shaˉ paˍ ceh tiˉ laˇ?

16. Tawˇ naˉ ve liꞈ 21:13 hkʼaw kʼoˆ taˍ ve hkʼe, maˇ ha kʼaˉ puiˉ ve chaw htaꞈ Yaˬhoˉvaˬ hkʼaˬ hkʼe te piˇ tuˬ le?

¹⁶ Ngaˬ hui teˇ gʼaˇ le le kaꞈ Yaˬhoˉvaˬ hkʼa shuˍ ha kʼaˉ puiˉ ve tehꞈ hpeuꞈ maw piˇ gaˇ ve yoˬ. Aˬ htoꞈ ma pa taw le? Awˬ lawn kʼo, Yaˬhoˉvaˬ kʼoˆ ve, shu htaꞈ maˇ ha kʼaˉ puiˉ ve chaw ve tawˇ hkawˇ yawˇ maˇ na. (Tawˇ naˉ ve 21:13 gʼaw sheˍ.) Yaˬhoˉvaˬ ngaˬ hui htaꞈ chi hkʼe maˇ te laˇ tcuh gaˇ. Hkʼe te leh, ngaˬ hui maˇ ha kʼaˉ puiˉ ve chaw maˇ hpehꞈ gaˇ. Awˬ viˉ awˬ nyi dawˇ haˍ ve awˬ lawn kʼoˆ laˇ htaˇ, ngaˬ hui maˇ kaˇ ve hkʼe maˇ te gaˇ. “Haˍ gʼawˇ ve chaw kuˬ hawˬ ve awˬ hkawˇ htaꞈ” ngaˬ hui na ve yoˬ. ‘Shu htaꞈ maˇ ha kʼaˉ puiˉ ve chaw teˇ gʼaˇ suhˉ jehˬ ve htaꞈ gʼa hkanˍ htaˇ, yawˇ htaꞈ maˇ ha kʼaˉ piˇ’ tuˬ yoˬ tehꞈ ngaˬ hui tawnˇ taˍ ve yoˬ. (Yaˍkoˆ 2:13) Ngaˬ hui nyi ma nuˇ nehˬ leh ngaˬ hui ha kʼaˉ laˇ ve htaꞈ gʼa cawˇ ve tehꞈ hkʼaˬ htaˆ kaꞈ tawnˇ taˍ ve kʼo, ngaˬ hui kaꞈ awˬ nu ve chaw htaꞈ ha kʼaˉ ve tehꞈ hpeuꞈ maw piˇ gʼa tuˬ yoˬ. Venˇ baˆ te yaꞈ ve chaw venˇ baˆ dawˇ hpfuhˆ leh Hkriꞈ yaˇ awˬ moˍ hkʼaw kʼawꞈ la htaˇ, ngaˬ hui yawˇ htaꞈ gʼa ha kʼaˉ piˇ ve yoˬ.

17. Jawˇmawˇ Daˍviˆ ha kʼaˉ puiˉ ve tehꞈ hkʼaˬ hkʼe hpeuꞈ maw piˇ ve le?

¹⁷ Liꞈ hpu hkʼaw ve awˬ lawn ngaˬ hui ha kʼaˉ puiˉ ve chaw hpehꞈ leh shu htaꞈ a yeˇ te piˇ tuˬ ga laˇ ve yoˬ. Tawˇ pa haˉ te kʼo, jawˇ mawˇ Daˍviˆ ve awˬ lawn htaꞈ dawˇ nyi sheˍ. Yawˇ awˬ nu ve chaw htaꞈ ha kʼaˉ puiˉ ve yoˬ. Sawˉluꞈ lehˬ Gʼuiˬ sha leuˆ yuˬ taˍ ve jawˇ mawˇ hpehꞈ ve tehꞈ Daˍviˆ shiˍ ve yoˬ. Sawˉluꞈ Daˍviˆ htaꞈ tiˇ pehˍ gaˇ ve htawˇ, yawˇ Sawˉluꞈ htaꞈ ha kʼaˉ leh maˇ te hkʼawꞈ piˇ.—1 Saˍmo˗eˍlaˆ 24:9-12, 18, 19.

18-19. Daˍviˆ ha kʼaˉ puiˉ ve tehꞈ maˇ hpeuꞈ maw piˇ ve 2 pawˆ cawˬ ve hkʼaˬ hkʼe htaˇ le?

¹⁸ Teˇ pawˆ pawˆ kʼo, Daˍviˆ kaꞈ ha kʼaˉ puiˉ ve tehꞈ maˇ hpeuꞈ maw piˇ. Tawˇ pa haˉ te kʼo, Daˍviˆ leh yawˇ ve chaw Naˍbaˍlaˆ nyi ma maˇ daꞈ leh haiˬ ve chaw hpehꞈ ve geh yawˇ hui kʼai htaˇ, yawˇ hui Naˍbaˍlaˆ geh caˇ tuˬ ca lawˬ˗e ve maˇ piˇ ve awˬ hkʼoˆ kaꞈ kʼawꞈ deˇ piˇ ve yoˬ. Chi Daˍviˆ beuꞈ jaˇ leh Naˍbaˍlaˆ leh yawˇ ve aˉ hkʼaw lo chehˇ ve hawˉ hkʼaˆ hkʼa peu˗eˬ htaꞈ tiˇ pehˍ gaˇ ve yoˬ. Naˍbaˍlaˆ ve awˬ miˇ ma Aˍbiˇgeˍlaˆ nyi ma gawˬ lehˍ cawˬ leh Daˍviˆ chaw htaꞈ maˇ gʼa tiˇ pehˍ tuˬ tawˍ piˇ ve daꞈ jaˇ.—1 Saˍmo˗eˍlaˆ 25:9-22, 32-35.

¹⁹ Teˇ nyi htaˇ tcuh kaˍ paˍ Naˍtanˍ Daˍviˆ htaꞈ kʼoˆ piˇ ve, paw sha ve chaw teˇ gʼaˇ haˍ gʼawˇ ve chaw ve yawˬ hkʼawˇ ve yoˬ. Daˍviˆ awˬ lawn chi gʼa kaˇ htaˇ yawˇ beuꞈ jaˇ leh kʼoˆ ve, “chi hkʼe te ve chaw lehˬ suh keunˍ ve yoˬ, tehꞈ teꞈ chehˇ ve Gʼuiˬ sha htaꞈ cuˇ leh ngaˬ hkanˍ ve yoˬ.” (2 Saˍmo˗eˍlaˆ 12:1-6) Awˬ tehˬ kʼo, Daˍviˆ Moˉseˍ ve awˬ liˇ tawˇ hkawˇ htaꞈ shiˍ ve yoˬ. Shu ve yawˬ 1 hkeh hkʼawˇ ve chaw lehˬ 1 hkeh awˬ tan 4 hkeh gʼa kʼawꞈ shaiˍ ve tehꞈ Daˍviˆ shiˍ ve yoˬ. (Tawˆ kʼai ve 22:1) Yaꞈ hkʼaˇ, Daˍviˆ kʼoˆ ve, hawˉ hkʼaˆ chi ve teˇ gʼaˇ suh keunˍ ve yoˬ. Yawˇ chi hkʼe te dawˇ cheˆ piˇ ve lehˬ haiˬ jaˇ. Naˍtanˍ yawˇ htaꞈ kʼoˆ maˍ piˇ ve lehˬ awˬ tehˬ ve awˬ lawn hpehꞈ ve maˇ heˆ. Yawˇ venˇ baˆ laiˉ ceuˬ te ve lehˬ hawˉ hkʼaˆ chi teˇ gʼaˇ te ve aꞈ kehˉ kaꞈ haiˬ jaˇ ve tehꞈ yawˇ na gʼa tuˬ tawˇ pa haˉ ceh tehˆ maˍ piˇ ve yoˬ. Awˬ tehˬ  kʼo, yawˬ ehˉ hkʼawˇ ve chaw htaꞈ Daˍviˆ ha kʼaˉ piˇ ve kʼo, yawˇ ha kʼaˉ puiˉ ve chaw hpehꞈ ve yoˬ. Yaꞈ hkʼaˇ, Yaˬhoˉvaˬ lehˬ Daˍviˆ htaꞈ oˇ ve aꞈ kehˉ laiˉ pun ha kʼaˉ piˇ ve yoˬ.—2 Saˍmo˗eˍlaˆ 12:7-13.

20. Daˍviˆ ve awˬ lawn ngaˬ hui htaꞈ aˬ htoꞈ ma maˍ laˇ ve le?

²⁰ Daˍviˆ beuꞈ htaˇ, Naˍbaˍlaˆ leh awˬ nu ve hawˉ hkʼaˆ suh keunˍ ve yoˬ tehꞈ yawˇ dawˇ cheˆ ve yoˬ. Leh Naˍtanˍ Daˍviˆ htaꞈ tawˇ pa haˉ tehˆ maˍ piˇ peuˬ hkʼawꞈ nawˉ, hawˉ hkʼaˆ oˇ ve suh keunˍ ve yoˬ tehꞈ Daˍviˆ kaꞈ dawˇ ve yoˬ. Daˍviˆ nyi ma nuˇ nehˬ ve chaw hpehꞈ ve htawˇ, aˬ htoꞈ ma te hawˉ hkʼaˆ oˇ ve teˇ gʼaˇ htaꞈ haiˬ ve hkʼaw dawˇ cheˆ piˇ ve le tehꞈ, ngaˬ hui htawˇ dawˇ nawˬ dawˇ cawˬ ve yoˬ. Oˇ ve teˇ yanˇ Daˍviˆ hkʼaˬ hkʼe hpehꞈ ve le dawˇ nyi sheˍ. Yawˇ Gʼuiˬ sha htaꞈ te yaꞈ leh chi yawˇ nyi ma maˇ sha tuˬ te piˇ ve yoˬ. Haiˬ jaˇ ve hkʼaw dawˇ cheˆ piˇ ve lehˬ, chaw oˇ ve teˇ gʼaˇ Gʼuiˬ sha geh meuˆ daꞈ ve luˬ kʼai tuˬ te piˇ ve yoˬ. Yeˍsuˆ ngaˬ hui htaꞈ shaˍ tiꞈ peꞈ laˇ ve, “shu nawˬ hui htaꞈ venˇ baˆ maˇ gʼa taˍ tuˬ, nawˬ hui shu htaꞈ venˇ baˆ taˇ taˍ. Awˬ lawn kʼo, nawˬ hui shu htaꞈ venˇ baˆ taˍ ve hkʼa shuˍ shuˍ, shu nawˬ hui htaꞈ venˇ baˆ kʼawꞈ taˍ laˇ tuˬ yoˬ.” (Maꞈhtehˍ 7:1, 2) Hkʼe te leh, ngaˬ hui shu htaꞈ a yeˇ yuˬ piˇ ve kʼo, Gʼuiˬ sha hkʼa shuˍ “ha kʼaˉ puiˉ jaˇ ve” cawˬ ve yoˬ.

21-22. Ngaˬ hui shu htaꞈ ha kʼaˉ ve tehꞈ hpeuꞈ maw piˇ gʼa tuˬ aˬ htoꞈ ma ve awˬ hkʼaˇ cawˬ ve le?

²¹ Ha kʼaˉ puiˉ ve lehˬ dawˇ ve ceh tiˉ maˇ heˆ. Gʼa te tawˆ la ve yoˬ. Yehˬ kʼa hkʼaw ve chaw, Hkriꞈ yaˇ awˬ moˍ hkʼaw ve awˬ viˉ awˬ nyi, maˇ heˆ leh ngaˬ hui awˬ paˇ awˬ kui lo chehˇ ve chaw htaꞈ dawˇ mawˬ gʼa ve yoˬ. Ngaˬ hui yawˇ hui htaꞈ ha kʼaˉ ve tehꞈ hpeuꞈ maw piˇ gʼa tuˬ awˬ hkʼaˇ laiˉ hkʼaˇ cawˬ ve yoˬ. A shu teˇ gʼaˇ awˬ gʼaˇ gʼa tuˬ loˍ ve le? Caˇ tuˬ ca yuˬ piˇ ve maˇ heˆ leh awˬ nu ve awˬ ceuˬ te piˇ gʼa˗aw laˇ? Maˇ heˆ leh Hkriꞈ yaˇ awˬ moˍ hkʼaw kʼawꞈ la gehˇ sheˍ ve chaw htaꞈ awˬ gʼaˇ piˇ laˇ tuˬ awˬ chawˇ loˍ ve htaꞈ awˬ chawˇ te piˇ˗aw laˇ? Awˬ nu ve chaw htaꞈ awˬ gʼaˇ piˇ tuˬ ngaˬ hui daꞈ ve awˬ lawn sha tanˇ hto toˇ˗aw laˇ? Awˬ hkʼaˇ chi ve lehˬ ngaˬ hui mawˬ daꞈ ve chaw htaꞈ ha kʼaˉ ve tehꞈ hpeuꞈ maw piˇ ve daꞈ jaˇ ve awˬ hkʼaˇ hpehꞈ ve yoˬ.—Yawˇbaˆ 29:12, 13; Roˉmaꞈ 10:14, 15; Yaˍkoˆ 1:27.

²² Ngaˬ hui chaˬ nyi puiˉ ve chaw hpehꞈ ve kʼo, ngaˬ hui awˬ nu ve chaw htaꞈ ha kʼaˉ ve tehꞈ hpeuꞈ maw piˇ tuˬ awˬ nu ve awˬ hkʼaˇ kaꞈ cawˬ ve yoˬ. Gʼuiˬ sha lehˬ “ha kʼaˉ puiˉ jaˇ ve” pa taw, ngaˬ hui awˬ nu ve chaw htaꞈ ha kʼaˉ ve tehꞈ hpeuꞈ maw piˇ htaˇ, yawˇ ha lehˬ jaˇ ve tehꞈ yonˍ gʼa ve yoˬ.