Teˇ hkʼawꞈ le le laiˉ gʼaˇ Hkriꞈ yaˇ awˬ moˍ hkʼaw kʼawꞈ kʼawꞈ la ve yoˬ. Teˇ gʼaˇ kʼawꞈ la ve teˇ pawˆ le le mvuhˇ naw ma tcuh yaˇ hkʼaˬ hkʼe taw ha lehˬ ve htaꞈ dawˇ nyi sheˍ! (Luˉkaꞈ 15:7, 10) Nawˬ kaꞈ Hkriꞈ yaˇ awˬ moˍ hkʼaw tawˆ cheˆ piˇ taˍ ve kʼawꞈ la ve teˇ gʼaˇ hpehꞈ ve kʼo, Yeˍsuˆ, mvuhˇ naw ma tcuh yaˇ, leh Yaˬhoˉvaˬ, nawˬ Hkriꞈ yaˇ awˬ moˍ hkʼaw kʼawꞈ la ve htaꞈ mawˬ htaˇ, ha lehˬ jaˇ tuˬ yoˬ tehꞈ yonˍ gʼa ve yoˬ. Nawˬ Yaˬhoˉvaˬ geh teˇ pawˆ kʼawꞈ meuˆ daꞈ gaˇ ve htawˇ, chi maˇ sha ve tehꞈ nawˬ dawˇ ve yoˬ hehˉ. Nawˬ chi hkʼe dawˇ tuˬ aˬ htoꞈ ma te laˇ gʼa ve leh aˬ htoꞈ ma ga laˇ gʼa ve teˇ geh nyi sheˍ.

Laiˉ gʼaˇ Hkriꞈ yaˇ awˬ moˍ hkʼaw kʼawꞈ la˗oˬ htaˇ kaꞈ maˇ daꞈ ve dawˇ hkʼaˇ htaꞈ gʼa tawˍ daꞈ sheˍ. Nawˬ jawˇ mawˇ Daˍviˆ hkʼe dawˇ kaꞈ gʼa ve yoˬ hehˉ. Yawˇ venˇ baˆ hpehˇ piˇ ve htaꞈ gʼa˗oˬ ve htawˇ yawˇ kʼoˆ ve, “ngaˬ ve venˇ baˆ teˇ hpaˍ ngaˬ awˬ hkʼoˆ gaˬ la” ve yoˬ. (Chiˇ mvuh ve 40:12; 65:3) Chaw teˇ hpaˍ Yaˬhoˉvaˬ geh kʼawꞈ la˗oˬ ve htawˇ, yawˇ nyi ma laiˉ hkʼawꞈ naˬ sheˍ ve yoˬ. Iˉliˆsaˍbehˆ Hkriꞈ yaˇ awˬ moˍ hkʼaw tawˆ cheˆ piˇ ve 20 hkʼawꞈ hpaˆ˗oˬ ve yoˬ. * Yawˇ kʼoˆ ve, “Yaˬhoˉvaˬ ngaˬ htaꞈ venˇ baˆ hpehˇ laˇ˗oˬ ve tehꞈ ngaˬ yonˍ tuˬ haˍ jaˇ.” Nawˬ awˬ gʼaˇ nuˇ ve kʼo, nawˬ Yaˬhoˉvaˬ geh meuˆ daꞈ ve kaꞈ luˬ kʼai la gʼa ve yoˬ hehˉ. (Tawˇ naˉ ve 24:10) Awˬ lawn chi hkʼe ve nawˬ htaꞈ taˇ hpehꞈ la tcuh.

Yaˬhoˉvaˬ geh teˇ pawˆ kʼawꞈ meuˆ daꞈ tuˬ chaw teˇ hpaˍ aˬ htoꞈ ma gʼa te cawˇ ve shiˍ ve yoˬ. Yaꞈ hkʼaˇ, yawˇ chi teˇ hpaˍ htaꞈ te maˇ gʼa la ve kawˆ ve yoˬ. Aw˗tu˗awn Hkriꞈ yaˇ awˬ moˍ hkʼaw kʼawꞈ la˗oˬ ve yawˇ kʼoˆ ve, “Hkriꞈ yaˇ aˬ htoꞈ ma gʼa te cawˇ ve ngaˬ tawnˇ maˇ gʼa˗o.” Chaw teˇ hpaˍ chi hkʼe dawˇ ve pa taw, Hkriꞈ yaˇ ve dawˇ hkʼaˇ teˇ hpaˍ htaꞈ hkʼa dehꞈ maˇ gʼaꞈ te ve yoˬ.

Mvuhˇ yeˬ mvuhˇ haw lonˉ gʼa hpuˇ ve chaw ve awˬ lawn htaꞈ dawˇ nyi sheˍ. Chi lehˬ yawˇ ve yehˬ luˬ jaˇ tuˬ te piˇ ve yoˬ. Yawˇ ve yehˬ luˬ˗aˍ ve htaꞈ nyi htaˇ, yehˬ awˉ lawˉ htaˇ hkʼe leˇ te peuˬ tuˬ awˬ yanˇ gʼa yehˇ leh gʼa coˇ caˇ jaˇ ve tehꞈ yawˇ shiˍ ve pa taw, yawˇ awˬ gʼaˇ nuˇ jaˇ ve yoˬ hehˉ. Chi ve hkʼa shuˍ shuˍ, nawˬ venˇ baˆ uiˍ jaˇ ve htaꞈ te yaꞈ htaˇ, nawˬ Yaˬhoˉvaˬ geh meuˆ daꞈ ve kaꞈ luˬ kʼai ve yoˬ. Yaˬhoˉvaˬ geh kʼawꞈ meuˆ daꞈ tuˬ gʼa coˇ caˇ jaˇ tehꞈ nawˬ dawˇ ve yoˬ hehˉ. Yaꞈ hkʼaˇ, nawˬ htaꞈ ga laˇ gʼa ve laiˉ ceuˬ cawˬ ve yoˬ.

Yaˬhoˉvaˬ ngaˬ hui htaꞈ kʼoˆ laˇ ve, ‘laˬ˗oꞈ. Ngaˬ hui yaw daꞈ shaˍ. Nawˬ hui ngaˬ geh cawˇ daꞈ tuˬ ngaˬ nawˬ  hui htaꞈ ga laˇ tuˬ yoˬ.’ (Iˉsaˍyaˆ 1:18) Yaˬhoˉvaˬ geh kʼawꞈ cawˇ daꞈ tuˬ nawˬ te gʼa ve hkʼe te˗o. Nawˬ chi hkʼe te ve htaꞈ yawˇ haꞈ ve yoˬ. Nawˬ Yaˬhoˉvaˬ geh kʼawꞈ la ve pa taw, Saˍtanˍ she pfuhˍ laˇ ve htaꞈ Yaˬhoˉvaˬ hkʼawꞈ piˇ tuˬ nawˬ te chehˇ ve yoˬ!—Tawˇ naˉ ve 27:11.

Nawˬ Yaˬhoˉvaˬ geh kʼawꞈ la ve ceh kaꞈ nawˬ yawˇ geh meuˆ daꞈ jaˇ˗oˬ ve yoˬ. Yaˬhoˉvaˬ ka tiꞈ te taˍ laˇ ve yawˇ nawˬ geh kaꞈ meuˆ daꞈ tuˬ yoˬ. (Yaˍkoˆ 4:8) Yaꞈ hkʼaˇ, nawˬ Hkriꞈ yaˇ awˬ moˍ hkʼaw kʼawꞈ la ve ceh maˇ lawꞈ. Nawˬ Yaˬhoˉvaˬ htaꞈ gʼa haꞈ leh yawˇ nawˬ ve Awˬ pa hpehꞈ leh nawˬ ve awˬ chawˇ meuˆ daꞈ jaˇ ve hpehꞈ tuˬ gʼa te ve yoˬ. Yaꞈ hkʼaˇ, nawˬ chi ve hkʼaˬ hkʼe te gʼa tuˬ le?

Nawˬ awˬ tehˬ te gʼa ve htaꞈ dawˇ teh taˍ sheˍ. Yaˬhoˉvaˬ ve awˬ lawn awˉ lawˉ htaˇ nawˬ gʼa henˇ ve, leh awˬ gʼuˇ suhˍ hpawˇ ve htaꞈ caˉ daꞈ ve Yaˬhoˉvaˬ ka tiꞈ te taˍ laˇ ve htaꞈ nawˬ gʼa henˇ ve maˇ leunˇ sheˍ ve yoˬ hehˉ. Yaꞈ hkʼaˇ, chi hkʼe ceh maˇ lawꞈ. Hkriꞈ yaˇ te cawˇ ve teˇ hpaˍ, hto toˇ ve, hpawnˬ daꞈ ve, leh awˬ viˉ awˬ nyi geh awˬ chawˇ te ve, chi ve teˇ hpaˍ htaꞈ nawˬ teˇ pawˆ kʼawꞈ te la cawˇ ve yoˬ. Dawˇ teh taˍ ve awˬ hawˉ lo ve teˇ hpaˍ htaꞈ teˇ geh nyi sheˍ.

Yaˬhoˉvaˬ geh hkʼaˬ htaˆ kaꞈ yaw daꞈ sheˍ. Nawˬ te yaꞈ jaˇ leh Yaˬhoˉvaˬ geh bon maˇ lawˬ haˆ ve tehꞈ yawˇ shiˍ ve yoˬ. (Roˉmaꞈ 8:26) Chi hkʼe hpehꞈ ve htawˇ, nawˬ “hkʼaˬ htaˆ kaꞈ bon lawˬ tcuhˉ” taˍ leh nawˬ yawˇ geh awˬ chawˇ hkʼaˬ hkʼe taw te daꞈ gaˇ jaˇ ve kʼoˆ piˇ sheˍ. (Roˉmaꞈ 12:12) An˗dehˬ kʼoˆ ve, “chi awˬ gʼuˇ suhˍ htaˇ ngaˬ te yaꞈ jaˇ leh yaꞈ taw jaˇ. Yaꞈ hkʼaˇ, ngaˬ bon lawˬ ve teˇ pawˆ le le chi hkʼe ve dawˇ hkʼaˇ ngaˬ awˬ meu˗eˇ awˬ meu˗eˇ maˇ cawˬ˗o leh nyi ma gawˬ lehˍ cawˬ ve yoˬ.” Nawˬ Yaˬhoˉvaˬ geh hkʼaˬ hkʼe kʼoˆ piˇ tuˬ maˇ shiˍ ve kʼo, Chiˇ mvuh ve liꞈ kaˇ nanˉ uiˍ 51 leh 65 hkʼaw jawˇ mawˇ Daˍviˆ ve bon lawˬ hkawˇ htaꞈ dawˇ nyi sheˍ.

Hkʼaˬ htaˆ kaꞈ Liꞈ hpu henˇ sheˍ. Nawˬ chi hkʼe te ve kʼo, yonˍ hkʼaˇ yonˍ yeˬ ve cawˬ leh Yaˬhoˉvaˬ htaꞈ haꞈ jaˇ tuˬ yoˬ. (Chiˇ mvuh ve 19:7-11) Hpi˗li˗peh koˆ ve, “ngaˬ Liꞈ hpu gʼaw ve leh a shu yawˇ hkʼaˇ yawˇ hkʼaˬ htaˆ kaꞈ Liꞈ hpu henˇ ve maˇ te ve pa taw, ngaˬ ve yonˍ hkʼaˇ kaꞈ awˬ gʼaˇ nuˇ leh Yaˬhoˉvaˬ nyi ma luˬ tuˬ te piˇ ve yoˬ. Ngaˬ maˇ kʼawꞈ te yaꞈ gaˇ˗o leh hkʼaˬ htaˆ kaꞈ a shu yawˇ hkʼaˇ yawˇ Liꞈ hpu henˇ tuˬ dawˇ teh taˍ ve yoˬ.” Nawˬ kaꞈ chi hkʼe te gʼa ve yoˬ. A shu yawˇ hkʼaˇ yawˇ Liꞈ hpu henˇ htaˇ aˬ htoꞈ ma htaꞈ henˇ tuˬ maˇ shiˍ ve kʼo, nawˬ ve awˬ chawˇ yonˍ hkʼaˇ yonˍ yeˬ ve chaw htaꞈ na nyi sheˍ. Yawˇ nawˬ htaꞈ ga laˇ gʼa tuˬ yoˬ.

Nawˬ awˬ viˉ awˬ nyi geh kʼawꞈ meuˆ daꞈ sheˍ. Chaw teˇ hpaˍ Yaˬhoˉvaˬ geh kʼawꞈ la˗oˬ htaˇ, awˬ viˉ awˬ nyi yawˇ htaꞈ maˇ daꞈ ve hpawˇ dawˇ la ve htaꞈ hkiˉ ve yoˬ hehˉ. La˗li˗sa kʼoˆ ve, “ngaˬ Hkriꞈ yaˇ awˬ moˍ htaꞈ baˬ taˉ leh awˬ viˉ awˬ nyi, nyi ma luˬ tuˬ te piˇ ve ngaˬ yaꞈ taw jaˇ. Ngaˬ chi hkʼe dawˇ ve maw jaˇ˗oˬ.” Nyi haꞈ shaˉ paˍ leh awˬ nu ve awˬ viˉ awˬ nyi nawˬ Yaˬhoˉvaˬ geh teˇ pawˆ kʼawꞈ meuˆ daꞈ la tuˬ ga laˇ gʼa ve tehꞈ yonˍ sheˍ. (Awˇ ceˍ awˇ fa “ Nyi haꞈ shaˉ paˍ te gʼa ve awˬ ceuˬ” htaꞈ nyi sheˍ.) Nawˬ Hkriꞈ yaˇ awˬ moˍ hkʼaw kʼawꞈ la ve yawˇ hui ha lehˬ jaˇ leh nawˬ htaꞈ kaꞈ ha lehˬ tcuh gaˇ ve yoˬ.—Tawˇ naˉ ve 17:17.

Nawˬ awˬ viˉ awˬ nyi geh meuˆ daꞈ tuˬ aˬ htoꞈ ma ga laˇ ve le? Nawˬ te gʼa ve hkʼe yawˇ hui geh awˬ chawˇ hkʼa dehꞈ te sheˍ. Hpawnˬ daꞈ ve leh hto toˇ ve hkʼaˬ htaˆ kaꞈ yawˇ hui geh te sheˍ. Chi hkʼe te ve nawˬ htaꞈ hkʼaˬ hkʼe ga laˇ ve le? Hpi˗leꞈ kʼoˆ ve, “ngaˬ kʼawꞈ la tuˬ awˬ viˉ awˬ nyi law chehˇ ve yoˬ. Yawˇ hui ngaˬ htaꞈ haꞈ jaˇ tehꞈ ngaˬ dawˇ ve yoˬ. Ngaˬ Hkri yaˇ awˬ moˍ hkʼaw ve chaw teˇ gʼaˇ kʼawꞈ hpehꞈ la tuˬ yawˇ hui ga laˇ ve yoˬ. Yaˬhoˉvaˬ ngaˬ htaꞈ venˇ baˆ hpehˇ laˇ˗oˬ ve tehꞈ dawˇ tuˬ kaꞈ yawˇ hui ga laˇ ve yoˬ. Ngaˬ caˉ leh Gʼuiˬ sha ve kanˉ kʼawꞈ te kʼai gʼa ve tehꞈ yonˍ tuˬ kaꞈ yawˇ hui ga laˇ ve yoˬ.”—Awˇ ceˍ awˇ fa “ Nawˬ te gʼa ve awˬ ceuˬ” htaꞈ nyi sheˍ.

Chi teˇ hkui nawˬ kaꞈ Yaˬhoˉvaˬ geh meuˆ daꞈ tuˬ coˇ caˇ chehˇ ve yoˬ hehˉ. Yaꞈ hkʼaˇ, Saˍtanˍ nawˬ htaꞈ chi hkʼe maˇ te tcuh gaˇ. Yawˇ nawˬ htaꞈ shoꞈ shaꞈ ve “mvuhˇ yeˬ mvuhˇ haw lonˉ” hkʼe hpuˇ tcuh gaˇ ve yoˬ. (Luˉkaꞈ 4:13) Chi htaꞈ pa taw, nawˬ yawˇ htaꞈ tawˍ daꞈ tuˬ gu hehnˇ taˍ sheˍ. Nawˬ ve yonˍ hkʼaˇ yonˍ yeˬ tuˬ te leh Yaˬhoˉvaˬ geh kaꞈ gʼaˇ hteꞈ meuˆ daꞈ tuˬ coˇ caˇ sheˍ.

Yaˬhoˉvaˬ yawˇ ve kanˉ te ve yawˬ ehˉ htaꞈ shuˍ ve chaw htaꞈ ka tiꞈ te piˇ ve, “mehˉ kʼai taˍ ve yawˬ teˇ hpaˍ htaꞈ ngaˬ gʼaꞈ ca leh, hpaw toˇ chehˇ ve yawˬ teˇ hpaˍ htaꞈ htawˇ ngaˬ shiˍ hkʼawꞈ veu laˇ piˇ tuˬ yoˬ. Hkʼaw kuiˬ naˬ kuiˬ cawˬ ve teˇ hpaˍ htaꞈ ngaˬ peh piˇ leh, naˬ chehˇ ve teˇ hpaˍ htaꞈ ngaˬ gu na˗e piˇ tuˬ yoˬ.” (Yeˍsaˍkeˍlaˆ 34:16) Laiˉ gʼaˇ Yaˬhoˉvaˬ geh kʼawꞈ meuˆ daꞈ la tuˬ yawˇ ga piˇ gʼa ve yoˬ. Nawˬ Yaˬhoˉvaˬ geh hkʼa dehꞈ kʼawꞈ meuˆ daꞈ la tuˬ yawˇ ga laˇ gaˇ ve tehꞈ yonˍ gʼa ve yoˬ.