Awˬ viˉ awˬ nyi gʼaˇ hteꞈ kʼawꞈ hto toˇ ve kʼo, hto toˇ tuˬ awˬ pon liꞈ kʼoˆ maˇ maˇ yehˇ tuˬ loˍ ve yoˬ. Buˆlinˍ Beˍteˍlaˆ hkʼaw awˬ viˉ awˬ nyi liꞈ kʼoˆ maˇ maˇ yanˍ tawˆ chehˇ˗o ve yoˬ. Yawˇ hui liꞈ yanˍ tawˆ kuiˬ laiˉ kaˬ lo hpu piˇ leh liꞈ kʼoˆ htu ve yanˍ tawˆ tcuh leh liꞈ kʼoˆ yanˍ tawˆ maˇ tanˇ ve pa taw, awˬ viˉ awˬ nyi hto toˇ kuiˬ lo laiˉ ha pa maˇ gʼa yehˇ. Awˬ viˉ awˬ nyi Raˆhteuꞈfawˍ lehˬ liꞈ yanˍ tawˆ ve hpawˇ nyi haꞈ shaˉ paˍ awˬ viˉ awˬ nyi Lo˗beuꞈ Ma˗tiˆ htaꞈ na piˇ ve, ngaˬ hui liꞈ kʼoˆ htu ve yanˍ tawˆ gʼa˗aw laˇ?

Hkʼe te leh, awˬ viˉ awˬ nyi Lo˗beuꞈ kʼoˆ ve, “daꞈ jaˇ ve dawˇ hkʼaˇ hpehꞈ leh nyi ma pfuhˇ lawꞈ lawꞈ te laˇ ve yoˬ. Chi kʼoˆ gaˇ ve lehˬ ngaˬ hui ve liꞈ yanˍ tawˆ kuiˬ hpaw tuˬ yoˬ.” Hkʼe te leh, ngaˬ hui ve awˬ viˉ awˬ nyi Buˆlinˍ venˇ yaꞈ kʼaw Hkʼaw hkʼawꞈ law teˇ tawn lo yehˬ nanˍ baꞈ 18 htaꞈ ngaˍ ve yoˬ. Leh yehˇ loˍ ve awˬ hkʼeun laiˉ ceuˬ vuiˬ ve yoˬ.

Yaꞈ hkʼaˇ, ngaˬ hui ve liꞈ yanˍ tawˆ ve teˇ gʼaˇ le le dawˇ cawˇ ve maˇ heˆ. Ngaˬ hui hpu piˇ leh liꞈ yanˍ tawˆ laˇ jaw ve awˬ hoˉ ngaˬ hui ve liꞈ yanˍ tawˆ kuiˬ awˬ ti lo ca guiˇ la ve yoˬ. Yawˇ kʼoˆ ve, “nawˬ hui ve liꞈ yanˍ tawˆ kuiˬ awˬ hkʼeun daꞈ jaˇ. Yaꞈ hkʼaˇ, yehˇ tuˬ awˬ hkʼaˇ maˇ shiˍ ve kʼo 6 ha pa peuˬ kʼo luˬ kʼai tuˬ yoˬ.”

Awˬ viˉ awˬ nyi Lo˗beuꞈ kʼoˆ ve, “luˬ kʼai gʼa ve yoˬ hehˉ. Yaꞈ hkʼaˇ, chi ve Yaˬhoˉvaˬ htaꞈ chiˇ aꞈ piˇ tuˬ yoˬ. Yawˇ ngaˬ hui htaꞈ hkʼaˬ htaˆ kaꞈ ga laˇ chehˇ ve yoˬ.” Leh awˬ viˉ awˬ nyi Lo˗beuꞈ kʼoˆ ve cawˇ jaˇ. Maˇ maw ngaˬ hui ve liꞈ yanˍ tawˆ kuiˬ teˇ nyi ve hkʼaw liꞈ kʼoˆ htu ve 2,000 kʼoˆ yanˍ tawˆ gʼa ve yoˬ.

Yaˬhoˉvaˬ ve chaw lehˬ liꞈ yanˍ tawˆ ve awˬ hkʼoˆ kaꞈ hto toˇ tuˬ awˬ pon awˬ hkʼaˇ awˬ suhˉ kʼawꞈ yehˇ ve yoˬ. Chi ve lehˬ bon maˍ keu taˍ ve Viˆhtaˆyuˆ hkʼaw awˬ hkawˇ tawˆ tcuh ve yoˬ. 1922 hkʼawꞈ Ha pa 2 maˬ 26 nyi shinˉ nyi sha gʼuˇ hkʼawꞈ nawˉ, awˬ viˉ awˬ nyi Raˆhteuꞈfawˍ Viˆhtaˆyuˆ hkʼaw bon maˍ keu ve awˉ lawˉ teˇ pawˆ hpehꞈ ve yoˬ. Oˇ ve teˇ nyi bon maˍ hkawˇ awˬ lawn lonˉ ma lehˬ “Chi teˇ hkui a shaꞈ teꞈ chehˇ ve laiˉ lanˬ gʼaˇ maˇ gʼa suh.” Aˍmaˬriˆkaꞈ mvuhˇ miˬ  Hkeh˗liˆfaw˗ni˗a lo LawˆEˬjehˬleˬ venˇ hkʼaw oˇ ve teˇ nyi Viˆhtaˆyuˆ awˬ hkawˇ tawˆ kuiˬ awˬ ti lehˬ Keh˗o˗ci (KOG) awˬ ti hpehꞈ ve yoˬ.

Oˇ ve teˇ nyi bon maˍ hkawˇ na la ve chaw 25,000 gʼaˇ cawˬ ve yoˬ. Teˇ hpaˍ kʼo, awˬ bon uiˍ hkawˇ liꞈ bvuhꞈ feu laˇ ve yoˬ. Hkeh˗liˆfaw˗ni˗a lo Sa˗tan˗a˗na venˇ hkʼaw chehˇ ve Vi˗riˇ Eh˗fawˍ kaꞈ liꞈ bvuhꞈ laˇ ve teˇ gʼaˇ hpehꞈ ve yoˬ. Awˬ viˉ awˬ nyi Raˆhteuꞈfawˍ ve “bon maˍ hkawˇ na sha leh nyi ma pfuhˇ lawꞈ lawꞈ” te laˇ ve htaꞈ yawˇ awˬ bon uiˍ jaˇ tehꞈ kʼoˆ ve yoˬ. Leh yawˇ kʼawꞈ kʼoˆ sheˍ ve, “ngaˬ ve yehˬ kʼa naˬ chehˇ ve chaw 3 gʼaˇ cawˬ ve yoˬ. Nawˬ bon maˍ ve ngaˬ hui ve yehˬ htaꞈ maˇ veuˇ ve htawˇ, nawˬ ve bon maˍ hkawˇ Viˆhtaˆyuˆ hkʼaw maˇ tawˆ ve kʼo ngaˬ hui maˇ gʼa kaˇ taˍ.”

Teˇ shinˉ peuˬ hkʼawꞈ nawˉ yawˇ ve bon maˍ hkawˇ Viˆhtaˆyuˆ hkʼaw kʼawꞈ tawˆ sheˍ ve yoˬ. 1922 hkʼawꞈ peuˬ la paˇ neˇ htaˇ ve Shaw nyi kuiˬ Taꞈ yehˬ hkʼaw kʼoˆ ve, “Viˆhtaˆyuˆ hkʼaw bon maˍ keu taˍ ve htaꞈ gʼa na ve chaw aˬ laˬ hkʼe 300,000 gʼaˇ cawˬ ve yoˬ hehˉ.”

Bon maˍ hkawˇ gʼa kaˇ ve chaw maˇ maˇ nyi ma sha jaˇ leh teˇ hpaˍ kʼo liꞈ bvuhꞈ feu laˇ ve yoˬ. Buˆlinˍ Beˍteˍlaˆ awˬ paˇ conˇ Sa˗teh hkʼaw Liꞈ hpu henˇ yaˇ dawˆ cheˆ leh Viˆhtaˆyuˆ tawˆ kuiˬ awˬ ti yehˬ te ve yoˬ. Leh Liꞈ hpu henˇ yaˇ kaꞈ Viˆhtaˆyuˆ tawˆ kuiˬ awˬ ti chi ve htaꞈ Daꞈbeuˇyuˬ Bi˗bi˗aˍ (WBBR) tehꞈ meh piˇ ve yoˬ. Awˬ ti chi ve htaꞈ laiˉ hkʼawꞈ yehˇ sheˍ leh Gʼuiˬ sha ve mvuhˇ miˬ teˇ kaˬ le le lo hto toˇ gaˬ˗e ve yoˬ.

Shaw nyi kuiˬ Taꞈ yehˬ 1922 hkʼawꞈ Ha pa 6 maˬ 15 nyi hkʼaw kʼoˆ ve, 1922 hkʼawꞈ Ha pa 9 maˬ 5-13 nyi htaˇ LawˆEˬjehˬleˬ lo Siˍdeuˇ Hpawehˉ venˇ hkʼaw hpawnˬ daꞈ lonˉ te tuˬ yoˬ. Liꞈ hpu henˇ yaˇ Siˍdeuˇ Hpawehˉ venˇ lo gaˬ la htaˇ ha lehˬ jaˇ.

Awˬ viˉ awˬ nyi Raˆhteuꞈfawˍ bon maˍ hkawˇ awˉ lawˉ teˇ lawn hkʼaw kʼoˆ ve, “ngaˬ hui ve Jawˇ mawˇ Yeˍsuˆ hpawnˬ daꞈ lonˉ chi teˇ pawˆ htaꞈ awˬ bon naꞈ laˇ tuˬ yoˬ tehꞈ ngaˬ yonˍ gʼa ve yoˬ. Leh miˬ guiˬ hkʼoˆ lo hto toˇ jaw ve aꞈ kehˉ kʼawꞈ hto toˇ maˇ tuˬ yoˬ.” Leh hpawnˬ daꞈ ve chi hkʼaw awˬ viˉ awˬ nyi laiˉ gʼaˇ bon maˍ ve kaꞈ hto toˇ ve a yeˇ uiˍ jaˇ tehꞈ kʼoˆ maˍ ve yoˬ.

Hpawnˬ daꞈ ve chi teˇ pawˆ Ha pa 9 maˬ 18 nyi shinˉ peuˬ 5 nyi htaˇ, hpawnˬ daꞈ la ve chaw hkʼa peu˗eˬ aˬ laˬ hkʼe 8,000 gʼaˇ cawˬ ve yoˬ. Awˬ viˉ awˬ nyi Raˆhteuꞈfawˍ bon maˍ hkawˇ gʼa kaˇ ve chaw teˇ gʼaˇ le le ha lehˬ jaˇ. Yawˇ hui kʼoˆ ve, “E˗Di˗VI” kuˬ piˇ ve liꞈ hkʼoˆ bvuhꞈ taˍ ve chi hkʼaˬ hkʼe kʼoˆ gaˇ ve le? Yawˇ hui oˇ kaˬ lo mui˗oˬ htaˇ, shaˍ hpawehˇ hkʼawꞈ nawˉ lo hpa daw lonˉ loꞈ taˍ ve htaꞈ chaw laiˉ gʼaˇ gʼa mawˬ ve yoˬ. Aˍmaˬriˆkaꞈ mvuhˇ miˬ Oˆkaˬlaˬhoˉmaˇ lo Hta˗saˆ venˇ  hkʼaw laˬ ve A˗htunˇ Hkawˆ yawˇ mui kuiˬ awˬ ti lo bon maˍ hkawˇ hkʼa dehꞈ gʼa kaˇ ve pa taw ha lehˬ jaˇ. Oˇ htaˇ teˇ co˗e lehˬ tawˇ yaw keu tuˬ awˬ hkʼeun maˇ cawˬ ve pa taw yoˬ.

Awˬ viˉ awˬ nyi Raˆhteuꞈfawˍ bon maˍ chehˇ htaˇ, hpawehˇ oˇ ve hkʼaw awˬ nu ve chaw maˇ gʼa loꞈ la tuˬ, mui hkawˇ mui paˍ kʼoˆ ve yoˬ. 9:30 miꞈ niꞈ gaˬ htaˇ Maꞈhtehˍ liꞈ 4:17 hkʼaw Yeˍsuˆ ve tawˇ hkawˇ htaꞈ Raˆhteuꞈfawˍ bon tanˬ maˍ htaˇ kʼoˆ ve yoˬ. Oˇ kaˬ lo kʼoˆ ve, “mvuhˇ naw ma mvuhˇ miˬ gaˬ la paˇ neˇ” ve yoˬ. Awˬ viˉ awˬ nyi Raˆhteuꞈfawˍ bon maˍ htaˇ, Gʼuiˬ sha ve mvuhˇ miˬ awˬ lawn chaw yaˇ hkʼaˬ hkʼe te gʼa kaˇ tuˬ le tehꞈ yawˇ kʼoˆ maˍ ve yoˬ. Yawˇ kʼoˆ ve, “Yeˍsuˆ kʼawꞈ yaꞈ la htaˇ yawˇ kanˉ ca te la ve lehˬ awˬ tehˬ ve htaꞈ haꞈ leh ka tiꞈ yeˬ ve chaw htaꞈ shaw hpoˆ tuˬ yoˬ tehꞈ kʼoˆ ve yoˬ.”

Awˬ viˉ awˬ nyi A˗htunˇ oˇ ve teˇ yanˇ hpawnˬ daꞈ lonˉ hkʼaw mui taˍ leh kʼoˆ ve, “ngaˬ bon maˍ hkawˇ htaꞈ hkʼa dehꞈ na chehˇ ve yoˬ.” Yaꞈ hkʼaˇ, yawˇ laꞈ tcuh laꞈ haˉ naˬ ve yoˬ. Hkʼe te leh, hpawnˬ daꞈ kuiˬ yehˬ lonˉ hkʼaw yawˇ maˇ kʼawꞈ loꞈ la gʼa˗o ve tehꞈ shiˍ ve pa taw maˇ tawˆ˗e gaˇ.

Awˬ baˬ lo tawˆ˗e ve hkʼaˬ nyiˇ miꞈ niꞈ maˇ gaˬ sheˍ ve kaꞈ yawˇ chehˇ sha la ve yoˬ. Oˇ kaˬ lo kʼawꞈ loꞈ la htaˇ yawˇ kʼoˆ ve, laꞈ sheh hta ve awˬ hkawˇ bvuhˬ jaˇ ve htaꞈ yawˇ gʼa kaˇ ve yoˬ. Aˬ htoꞈ ma hpehꞈ ve htaꞈ yawˇ shiˍ gaˇ jaˇ ve pa taw, bon maˍ hkawˇ gʼa kaˇ tuˬ yawˇ dawˇ cheˆ leh yehˬ hkʼoˆ lo taˆ˗e ve yoˬ. Oˇ ve teˇ yanˇ awˬ viˉ awˬ nyi A˗htunˇ 23 hkʼawꞈ ceh sheˍ ve pa taw yehˬ hkʼoˆ lo taˆ˗e gaˬ tuˬ awˬ hkʼaˇ mawˬ ve yoˬ. Yehˬ hkʼoˆ lo yehˬ miˉ ehˉ hpaw˗a laˇ ve htaꞈ cawˇ daꞈ ve pa taw yawˇ taˆ˗e gaˬ˗oˬ htaˇ “bon maˍ hkawˇ hkʼa dehꞈ gʼa kaˇ ve yoˬ.”

Yaꞈ hkʼaˇ, oˇ kaˬ lo chehˇ taˍ ve A˗htunˇ ceh tiˉ maˇ heˆ. Awˬ chawˇ laiˉ gʼaˇ chehˇ taˍ ve htaꞈ kaꞈ gʼa mawˬ ve yoˬ. Teˇ gʼaˇ lehˬ Fehˇ Caw˗shan hpehꞈ ve yoˬ. Fehˇ A˗htunˇ htaꞈ mawˬ htaˇ haˆ laˬ˗o, “nawˬ aˉ hteꞈ tcuhˆ jaˇ ve teˇ maˬ cawˬ˗aw laˇ” tehꞈ na piˇ ve yoˬ.

“Cawˬ ve yoˬ” tehꞈ yawˇ kʼawꞈ piˇ ve yoˬ.

Fehˇ kʼoˆ ve, “Gʼuiˬ sha nawˬ htaꞈ ngaˬ geh peu laˇ ve yoˬ. Awˬ lawn chi ve ngaˬ bon lawˬ peuˬ gehˇ sheˍ. Oˇ kaˬ lo hpa daw lonˉ htaꞈ nawˬ mawˬ˗aw laˇ? Hpa oˇ ve lehˬ loꞈ keu taˍ leh sho chuˇ dawˆ keu taˍ ve yoˬ.  Suhˉ jehˬ paˍ Raˆhteuꞈfawˍ * ve hkawˇ htaꞈ nawˬ hkʼa dehꞈ na taˍ sheˍ mehˍ. Yawˇ ‘Nawˬ hui hto toˇ loˬ, hto toˇ loˬ’ tehꞈ kʼoˆ ve awˬ hkawˇ htaꞈ gʼa kaˇ htaˇ, aˉ hkeh 4 caˆ htaꞈ tawˆ cheˆ mehˍ.”

Hkʼe te leh, A˗htunˇ aˉ hteꞈ ka leh awˬ chawˇ kʼoˆ laˇ ve tawˇ htaꞈ na taˍ ve yoˬ. Leh awˬ viˉ awˬ nyi Raˆhteuꞈfawˍ bon maˍ ve a yeˇ uiˍ jaˇ ve awˬ tawn lo gaˬ htaˇ, yawˇ bon maˍ htaˇ ha lehˬ jaˇ leh nyi ma pfuhˇ ve hkʼaw aˬ laˬ hkʼe kuˬ heuˉ˗a tehꞈ te ve yoˬ. Yawˇ kʼoˆ ve, “awˬ tehˬ Shaˉhkiˆhkanˍ ve chaw hpehꞈ leh Jawˇ mawˇ Yeˍsuˆ awˬ pon ka tiꞈ yeˬ sheˍ. Baˍbuˍlonˍ htaꞈ caˉ daꞈ ve te luˬ peuˬ htaˇ hkʼa gaˬ Gʼuiˬ sha ve kanˉ te tcuhˉ taˍ sheˍ. Hto toˇ ve kanˉ teˇ kaˬ le le lo gaˬ˗e tuˬ te sheˍ. Yaˬhoˉvaˬ lehˬ Gʼuiˬ sha hpehꞈ leh Yeˍsuˆ Hkriꞈ lehˬ Hkunˉ hawˉ hkanˇ Hkunˉ hawˉ hkanˇ leh Jawˇ mawˇ hkʼoˆ Jawˇ mawˇ hpehꞈ ve tehꞈ miˬ guiˬ chaw yaˇ gʼa shiˍ cawˇ ve yoˬ. Chi teˇ hkui a yeˇ uiˍ jaˇ ve awˬ yanˇ hpehꞈ ve yoˬ. Nyi sheˍ. Hkunˉ hawˉ hkanˇ uˉ peunˍ chehˇ˗o. Nawˬ lehˬ yawˇ ve awˬ tan hto toˇ chehˇ ve yoˬ. Chi htaꞈ pa taw, Hkunˉ hawˉ hkanˇ leh yawˇ ve mvuhˇ miˬ awˬ lawn hto toˇ kʼai loˬ, hto toˇ kʼai loˬ, hto toˇ kʼai loˬ!”

A˗htunˇ kʼoˆ ve, yawˇ leh awˬ chawˇ aˉ caˆ hkeh htaꞈ laꞈ haˉ tawˆ cheˆ htaˇ, loꞈ keu taˍ ve hpa a yehˉ yehˉ ce yaꞈ la leh nyi sha jaˇ. Hpa oˇ ve hkʼaw bvuhꞈ taˍ ve, “Jawˇ mawˇ leh Gʼuiˬ sha ve mvuhˇ miˬ awˬ pon hto toˇ loˬ.” Chi lehˬ Kaˇlaˇ hkawˇ kʼo “E˗Di˗VI” kʼoˆ ve htaꞈ cawˇ daꞈ ve yoˬ. Awˬ lawn kʼo, chi tcuhˉ kuiˬ lehˬ “hto toˇ loˬ” tehꞈ kʼoˆ gaˇ ve yoˬ.

Siˬdaꞈhpawˇ lo hpawnˬ daꞈ lonˉ chi teˇ pawˆ lehˬ awˬ viˉ awˬ nyi Gʼuiˬ sha ve mvuhˇ miˬ hto toˇ ve kanˉ htaꞈ a yeˇ yuˬ tuˬ te piˇ ve yoˬ. Kanˉ chi ve te tuˬ awˬ viˉ awˬ nyi kaꞈ nyi ma pfuhˇ leh ha lehˬ jaˇ. Oˆkaˬlaˬhoˉmaˇ lo laˬ ve Hkʼaw hpaw hteuˇ teˇ gʼaˇ (chi teˇ hkui kʼo gʼuˇ suhˍ peuˍ ve chaw) kʼoˆ ve, “ngaˬ hui hto toˇ kuiˬ awˬ ti lehˬ haˉ pui naˆ cawˬ kuiˬ awˬ ti hpehꞈ ve yoˬ. Oˇ kaˬ lo ve chaw haˍ gʼawˇ jaˇ. Yawˇ kʼoˆ ve, liꞈ kʼoˆ Deuꞈ Go˗denˇ Eˬ hkʼaw daꞈ ve awˬ lawn sha tanˇ laiˉ gʼaˇ gʼa kaˇ htaˇ, yawˇ hui mehˆ gʼuiˬ yaꞈ la ve yoˬ. Awˬ viˉ awˬ nyi chi teˇ gʼaˇ kʼawꞈ kʼoˆ sheˍ ve, “yawˇ hui awˬ gʼaˇ gʼa tuˬ te piˇ ve pa taw ngaˬ ha lehˬ jaˇ.”

Luˉkaꞈ liꞈ 10:2 hkʼaw Yeˍsuˆ kʼoˆ taˍ ve tawˇ hkawˇ htaꞈ haˆ haˆ te cawˇ ve tehꞈ Liꞈ hpu henˇ yaˇ chi teˇ hpaˍ kʼoˆ ve yoˬ. Yeˍsuˆ kʼoˆ ve, “caˬ gʼeuꞈ tuˬ cawˬ maˇ jaˇ ve kaꞈ, caˬ gʼeuꞈ shehˍ hpaˇ hui a ciˉ ceh tiˉ cawˬ ve yoˬ.” 1922 hkʼawꞈ peuˬ la paˇ neˇ htaˇ, Gʼuiˬ sha ve mvuhˇ miˬ awˬ lawn chi teˇ hkui aꞈ kehˉ teˇ kaˬ le le lo hto toˇ tuˬ awˬ viˉ awˬ nyi coˇ caˇ leh te ve yoˬ.