1. Chaw laiˉ gʼaˇ awˬ tehˬ ve cuˇ yiˍ htaꞈ gʼa kaˇ htaˇ hkʼaˬ hkʼe kʼai ve le? (Tawˇ naˉ ve 1:20, 21)

 Laiˉ mvuhˇ miˬ lo Yaˬhoˉvaˬ ve Shaˉhkiˆhkanˍ ve chaw kʼai kʼai laˬ laˬ ve chaw htaꞈ liꞈ kʼoˆ piˇ tuˬ, yaꞈ kʼaw hkʼoˆ lo huˉ taˍ ve yoˬ. Nawˬ kaꞈ chi hkʼe te jaw˗aw laˇ? Te jaw ve kʼo, Tawˇ naˉ ve liꞈ hkʼaw yaꞈ kʼaw hkʼoˆ lo leh tcuh hkʼaw lo hto toˇ chehˇ ve htaꞈ dawˇ mawˬ nyi sheˍ. (Tawˇ naˉ ve 1:20, 21 gʼaw sheˍ.) Liꞈ hpu hkʼaw leh Gʼuiˬ sha ve kanˉ hkʼaˇ hkʼaw “awˬ tehˬ ve cuˇ yiˍ” cawˬ ve yoˬ. Chi ve lehˬ Yaˬhoˉvaˬ geh laˬ ve cuˇ yiˍ hpehꞈ ve pa taw, chaw yaˇ gʼa cawˬ cawˇ ve awˉ lawˉ teˇ ceuˬ hpehꞈ leh, yawˇ hui co co taiˍ taiˍ a shaꞈ gʼa tuˬ ga piˇ ve yoˬ. Leh awˬ nu ve chaw ngaˬ hui ve liꞈ kʼoˆ yuˬ htaˇ ha lehˬ jaˇ. Yaꞈ hkʼaˇ, teˇ gʼaˇ le le ngaˬ hui ve liꞈ kʼoˆ htaꞈ heuˆ gaˇ ve maˇ heˆ. Chaw teˇ hpaˍ kʼo, Liꞈ hpu hkʼaw kʼoˆ taˍ ve htaꞈ a yeˇ maˇ yuˬ leh yawˇ hui Liꞈ hpu piˍ jaˇ˗o ve tehꞈ dawˇ ve pa taw, maˇ shawˍ maˇ caˆ kʼoˆ ve yoˬ. Chaw teˇ hpaˍ kʼo, Liꞈ hpu hkʼaw ve awˬ liˇ awˬ hkʼaˇ hehnˇ jaˇ tehꞈ kʼoˆ leh, awˬ liˇ awˬ hkʼaˇ chi ve teˇ hpaˍ htaꞈ gʼaꞈ te ve chaw lehˬ yawˇ hui ve awˬ liˇ hehnˇ jaˇ leh, yawˇ hui shu aꞈ kehˉ daꞈ ve tehꞈ chaw teˇ hpaˍ kʼoˆ ve yoˬ. Chi hkʼe hpehꞈ ve htawˇ, Yaˬhoˉvaˬ lehˬ teˇ gʼaˇ le le htaꞈ awˬ tehˬ ve cuˇ yiˍ peꞈ piˇ gaˇ ve yoˬ. Hkʼe kʼo yawˇ hkʼaˬ hkʼe te ve le?

2. Chi beuꞈ teˇ co˗e ngaˬ hui awˬ tehˬ ve cuˇ yiˍ hkʼaˬ kaˬ lo ca gʼa tuˬ le? Leh maˇ˗awˍ ve chaw aˬ htoꞈ ma te tuˬ leuˆ yuˬ ve le?

² Yaˬhoˉvaˬ teˇ gʼaˇ le le htaꞈ awˬ tehˬ ve cuˇ yiˍ gʼa kaˇ tcuh ve teˇ hkʼaˇ lehˬ, Liꞈ hpu hpehꞈ ve yoˬ. Miˬ guiˬ hkʼoˆ lo chaw teˇ gʼaˇ le le aˬ laˬ hkʼe Liꞈ hpu ca leh gʼaw gʼa ve yoˬ. Chi teˇ hkui Yaˬhoˉvaˬ lehˬ Liꞈ hpu htaꞈ cuˇ leh maˍ laˇ ve awˬ ceuˬ teˇ hpaˍ 1,000 chaw ceuˬ tawˇ hkawˇ hpaˆ yuˬ tawˆ tcuh ve yoˬ. Cuˇ yiˍ htaꞈ na ve chaw lehˬ Liꞈ hpu gʼaw leh beˆ maˍ laˇ ve htaꞈ a shaꞈ teꞈ kuiˬ hkʼaw yuˬ yehˇ leh awˬ bon gʼa ve yoˬ. Yaꞈ hkʼaˇ, maˇ˗awˍ ve chaw awˬ tehˬ ve cuˇ yiˍ htaꞈ na tuˬ maˇ leuˆ yuˬ. Yawˇ hui awˬ lawn teˇ ceuˬ ceuˬ htaꞈ dawˇ cheˆ htaˇ, a shu yawˇ awˬ to htaꞈ gʼaˇ va leh awˬ nu ve chaw kʼoˆ ve hkawˇ htaꞈ na ve yoˬ. Ngaˬ hui Liꞈ hpu hkʼaw beˆ maˍ laˇ ve htaꞈ gʼaꞈ te ve pa taw, yawˇ hui ngaˬ hui htaꞈ maˇ shawˍ maˇ caˆ te laˇ ve yoˬ. Awˬ lawn chi ve hkʼaw aˬ htoꞈ ma te chaw teˇ hpaˍ  chi hkʼe ve htaꞈ leuˆ ve teˇ geh henˇ tuˬ yoˬ. Yaꞈ hkʼaˇ, awˉ lawˉ htaˇ ngaˬ hui Yaˬhoˉvaˬ geh cuˇ yiˍ hkʼaˬ hkʼe te gʼa ve htaꞈ teˇ geh henˇ tuˬ yoˬ.

3. Ngaˬ hui awˬ tehˬ ve cuˇ yiˍ cawˬ tuˬ aˬ htoꞈ ma gʼa te ve le?

³ Awˬ tehˬ ve cuˇ yiˍ lehˬ ngaˬ hui a shaꞈ teꞈ kuiˬ hkʼaw yuˬ yehˇ leh cawˇ ve hkʼaw dawˇ cheˆ gʼa ve htaꞈ kʼoˆ gaˇ ve yoˬ. Yaꞈ hkʼaˇ, awˬ tehˬ ve cuˇ yiˍ lehˬ chi ve aꞈ kehˉ cawˬ sheˍ ve yoˬ. Liꞈ hpu hkʼaw kʼoˆ ve, “cuˇ yiˍ cawˬ la hpehꞈ tuˬ nawˬ awˉ lawˉ peuˇ Gʼuiˬ sha htaꞈ yawˆ yan puiˉ ve nyi ma gʼa cawˬ ve yoˬ.” (Tawˇ naˉ ve 9:10) Chi htaꞈ pa taw, ngaˬ hui Gʼuiˬ sha “daꞈ kehˬ shehˍ hpaˇ” htaꞈ shiˍ tuˬ gʼa henˇ ve yoˬ. Chi kʼoˆ gaˇ ve lehˬ Yaˬhoˉvaˬ hkʼaˬ hkʼe dawˇ ve htaꞈ ngaˬ hui gʼa shiˍ leh yawˇ dawˇ ve hkʼe ngaˬ hui kaꞈ gʼa dawˇ cheˆ ve yoˬ. Ngaˬ hui te gʼa ve awˬ hkʼaˇ lehˬ, Liꞈ hpu leh Liꞈ hpu htaꞈ caˉ daꞈ ve liꞈ kʼoˆ hkʼaw ngaˬ hui gʼa hpfuhˆ nyi ve yoˬ. Chi hkʼe te htaˇ ngaˬ hui kaꞈ awˬ tehˬ ve cuˇ yiˍ cawˬ gʼa ve yoˬ.—Tawˇ naˉ ve 2:5-7.

4. Aˬ htoꞈ ma te Yaˬhoˉvaˬ teˇ gʼaˇ ceh tiˉ ngaˬ hui htaꞈ awˬ tehˬ ve cuˇ yiˍ peꞈ laˇ gʼa ve le?

⁴ Cuˇ yiˍ lehˬ Yaˬhoˉvaˬ geh laˬ leh yawˇ teˇ gʼaˇ ceh tiˉ ngaˬ hui htaꞈ awˬ tehˬ ve cuˇ yiˍ peꞈ laˇ gʼa ve yoˬ. (Roˉmaꞈ 16:27) Aˬ htoꞈ ma te ngaˬ hui chi hkʼe kʼoˆ gʼa ve le? Awˉ lawˉ teˇ ceuˬ lehˬ, Yaˬhoˉvaˬ hpanˍ shehˍ hpaˇ hpehꞈ ve, yawˇ ve cuˇ yiˍ lehˬ peuˬ kuiˬ leh kuiˬ maˇ cawˬ ve pa taw, Yaˬhoˉvaˬ lehˬ yawˇ hpanˍ taˍ ve teˇ ceuˬ le le htaꞈ caˉ daꞈ ve yawˇ shiˍ ve yoˬ. (Chiˇ mvuh ve 104:24) 2 ceuˬ teˇ ceuˬ lehˬ, yawˇ hpanˍ taˍ ve teˇ ceuˬ le le yawˇ cuˇ yiˍ cawˬ jaˇ ve Gʼuiˬ sha hpehꞈ ve tehꞈ hpeuꞈ maw laˇ ve yoˬ. (Roˉmaꞈ 11:33) 3 ceuˬ teˇ ceuˬ lehˬ, Yaˬhoˉvaˬ beˆ maˍ laˇ ve teˇ ceuˬ le le ngaˬ hui awˬ pon awˬ bon hkʼaˬ htaˆ kaꞈ cawˬ ve yoˬ. (Tawˇ naˉ ve 2:10-12) Ngaˬ hui awˬ tehˬ ve cuˇ yiˍ cawˬ gaˇ ve kʼo, chi ve 3 ceuˬ htaꞈ gʼa gʼaꞈ te ve yoˬ. Ngaˬ hui aˬ htoꞈ ma ve awˬ lawn dawˇ cheˆ ve, maˇ heˆ leh aˬ htoꞈ ma te ve htawˇ maˇ kʼoˆ, chi ve 3 ceuˬ htaꞈ hkʼaˬ htaˆ kaꞈ gʼa tawnˇ taˍ cawˇ ve yoˬ.

5. Yaˬhoˉvaˬ teˇ gʼaˇ ceh tiˉ awˬ tehˬ ve cuˇ yiˍ peꞈ laˇ gʼa ve tehꞈ chaw yaˇ maˇ haꞈ yuˬ ve kʼo hkʼaˬ hkʼe hpehꞈ tuˬ le?

⁵ Ngaˬ hui hto toˇ kuiˬ awˬ ti lo ve chaw laiˉ gʼaˇ hpanˍ taˍ ve awˬ ceuˬ teˇ hpaˍ htaꞈ mawˬ htaˇ anˇ jaˇ tehꞈ kʼoˆ ve htawˇ, yawˇ hui hpanˍ shehˍ hpaˇ cawˬ ve tehꞈ maˇ haꞈ yuˬ leh chaw teˇ hpaˍ kʼo a shaꞈ teꞈ ve yawˇ hkʼaˇ yawˇ cawˬ la gʼa ve tehꞈ yonˍ ve yoˬ. Chaw teˇ hpaˍ kʼo, Gʼuiˬ sha htaꞈ yonˍ ve htawˇ, Liꞈ hpu piˍ jaˇ leh maˇ yehˇ gʼa˗o tehꞈ kʼoˆ ve yoˬ. Yawˇ hui a shu yawˇ hkʼaˇ yawˇ dawˇ cheˆ ve htaꞈ dawˇ cawˇ ve yoˬ. Yaꞈ hkʼaˇ, chaw yaˇ lehˬ Gʼuiˬ sha ve cuˇ yiˍ aꞈ kehˉ a shu yawˇ ve cuˇ yiˍ htaꞈ gʼaˇ va ve yoˬ. Miˬ guiˬ chi daꞈ la tuˬ nawˬ mawˬ˗aw laˇ? Chaw yaˇ awˬ tehˬ ha lehˬ gʼa ve cawˬ˗aw laˇ? Maˇ heˆ leh yawˇ hui dawˇ law kuiˬ aˬ htoꞈ ma cawˬ ve le? Ngaˬ hui mawˬ ve awˬ ceuˬ lehˬ ngaˬ hui yonˍ gʼa tuˬ te laˇ ve yoˬ. Oˇ kaˬ lo kʼoˆ ve, “Gʼuiˬ sha nawˬ geh maˇ chehˇ ve kʼo, nawˬ hkʼaˬ ma cuˇ yiˍ cawˬ leh shiˍ puiˉ ve htawˇ teꞈ chiˉ awˬ bon maˇ cawˬ.” (Tawˇ naˉ ve 21:30) Miˬ guiˬ hkʼoˆ lo ve shiˍ puiˉ ve, maˇ heˆ leh cuˇ yiˍ teˇ ceuˬ kaꞈ Gʼuiˬ sha htaꞈ ca tehˆ maˇ gʼa ve tehꞈ ngaˬ hui gʼa mawˬ ve yoˬ. Hkʼe te leh, ngaˬ hui awˬ tehˬ ve cuˇ yiˍ Yaˬhoˉvaˬ geh hkʼaˬ htaˆ kaꞈ gʼa lawˬ ve yoˬ. Yaꞈ hkʼaˇ, maˇ˗awˍ ve chaw chi hkʼe maˇ te. Aˬ htoꞈ ma pa taw le?

6. Tawˇ naˉ ve liꞈ 1:22-25 hkʼaw kʼoˆ taˍ ve hkʼe, awˬ tehˬ ve cuˇ yiˍ htaꞈ maˇ na ve chaw a shu le?

⁶ Awˬ tehˬ ve cuˇ yiˍ “yaꞈ kʼaw hkʼoˆ lo kuˬ toˇ chehˇ ve” htaꞈ chaw laiˉ gʼaˇ maˇ na. Liꞈ hpu hkʼaw kʼoˆ ve, awˬ tehˬ ve cuˇ yiˍ htaꞈ maˇ na ve chaw 3 moˍ cawˬ ve lehˬ, “chaw luˬ paˍ,” “maˇ shawˍ maˇ caˆ kʼoˆ ve chaw,” leh “cuˇ yiˍ maˇ cawˬ ve chaw,” chi teˇ hpaˍ yoˬ. (Tawˇ naˉ ve 1:22-25 * gʼaw sheˍ.) Chaw chi teˇ hpaˍ ve te hkʼaˇ dawˇ hkʼaˇ lehˬ, yawˇ hui Gʼuiˬ sha ve cuˇ yiˍ htaꞈ a yeˇ maˇ yuˬ tuˬ hkʼaˬ hkʼe te piˇ ve, leh ngaˬ hui ve te hkʼaˇ dawˇ hkʼaˇ  chi hkʼe ve maˇ gʼa cawˬ tuˬ hkʼaˬ hkʼe te cawˇ ve, awˬ lawn chi ve hkʼaw teˇ geh henˇ tuˬ yoˬ.

7. Aˬ htoꞈ ma te chaw teˇ hpaˍ “chaw luˬ paˍ” hpehꞈ tuˬ leuˆ yuˬ ve le?

⁷ “Chaw luˬ paˍ” lehˬ shu beˬ yuˬ sha jaˇ. (Tawˇ naˉ ve 14:15) Ngaˬ hui hto toˇ˗e htaˇ, chaw chi hkʼe ve htaꞈ gʼa mawˬ hkeh jaˇ. Chaw laiˉ lanˬ gʼaˇ htaꞈ bon awˬ hoˉ leh mvuhˇ miˬ kanˉ te paˍ heˍ piˇ ve htaꞈ dawˇ nyi sheˍ. Chaw laiˉ gʼaˇ htaꞈ bon awˬ hoˉ leh mvuhˇ miˬ kanˉ te paˍ heˍ piˇ ve tehꞈ yawˇ hui gʼa shiˍ htaˇ cheˆ˗ehꞈ kʼai ve yoˬ. Yaꞈ hkʼaˇ, Tawˇ naˉ ve liꞈ 1: 22 hkʼaw kʼoˆ taˍ ve hkʼe, yawˇ hui chi hkʼe ve htaꞈ ceh nyi hkʼaˇ suh ve pa taw, caˉ leh shu kʼawꞈ heˍ piˇ ve yoˬ. (Yeˍraˍmiˆ 5:31) Yawˇ hui Liꞈ hpu hkʼaw ve awˬ lawn maˍ ve htaꞈ maˇ shiˍ gaˇ leh yawˇ hui te gaˇ ve hkʼe te ve pa taw, Gʼuiˬ sha ve awˬ liˇ awˬ hkʼaˇ htaꞈ kaꞈ maˇ te gaˇ ve yoˬ. Kaˬneˬdaˬ mvuhˇ miˬ Ku˗eˇbehˆ lo chaw laiˉ gʼaˇ lehˬ, yaˇ miˇ bon liˇ hehnˇ ve teˇ gʼaˇ kʼoˆ ve hkʼe kʼoˆ ve yoˬ. Yawˇ Shaˉhkiˆhkanˍ ve chaw htaꞈ kʼoˆ piˇ ve, “caˬbuˉ ngaˬ hui htaꞈ heˍ laˇ ve kʼo, yawˇ yaꞈ ve yoˬ. Ngaˬ hui maˇ yaꞈ.” Ngaˬ hui kaꞈ yawˇ hui htaꞈ shu heˍ piˇ ve hkʼe maˇ hpehꞈ gaˇ.—Tawˇ naˉ ve 1:32; 27:12.

8. Ngaˬ hui “chaw luˬ paˍ” maˇ gʼa hpehꞈ tuˬ hkʼaˬ hkʼe gʼa te cawˇ ve le?

⁸ Liꞈ hpu hkʼaw ngaˬ hui htaꞈ “dawˇ nyi ve awˬ hkʼaw lo chaw mawˇ hkʼe hpehꞈ piˇ˗oˆ” tehꞈ awˬ gʼaˇ peꞈ laˇ ve yoˬ. Hkʼaˬ htaˆ kaꞈ chaw luˬ paˍ hpehꞈ tuˬ maˇ heˆ. (1 Kawˇrenˍhtuˆ 14:20) Ngaˬ hui chi hkʼe te gʼa tuˬ a shaꞈ teꞈ kuiˬ lo Liꞈ hpu hkʼaw ve awˬ liˇ awˬ hkʼaˇ htaꞈ gʼa yuˬ yehˇ ve yoˬ. Ngaˬ hui chi hkʼe te˗oˬ htaˇ, Liꞈ hpu hkʼaw ve awˬ liˇ awˬ hkʼaˇ ngaˬ hui cuˇ yiˍ cawˬ ve hkʼaw dawˇ cheˆ gʼa leh shoꞈ shaꞈ ve maˇ gʼa cawˬ tuˬ ga laˇ ve yoˬ. Ngaˬ hui dawˇ cheˆ htaˇ, Liꞈ hpu hkʼaw ve awˬ liˇ awˬ hkʼaˇ yuˬ yehˇ˗aw laˇ tehꞈ, a shu yawˇ awˬ to htaꞈ na hkawˇ chi teˇ hpaˍ na nyi cawˇ ve yoˬ. Ngaˬ hui Liꞈ hpu henˇ leh hpawnˬ daꞈ ve teˇ tcuhˉ teˇ yanˇ kʼai˗oˬ htaˇ, aˬ htoꞈ ma te ngaˬ hui awˬ to chiˇ aꞈ leh Baˆtiˆsaˬ maˇ haꞈ yuˬ sheˍ ve le? Ngaˬ hui Baˆtiˆsaˬ haꞈ yuˬ˗oˬ ve kʼo, hto toˇ ve leh Liꞈ hpu maˍ ve hkʼa dehꞈ cheuˬ la tuˬ coˇ caˇ leh te˗aw laˇ? Ngaˬ hui dawˇ cheˆ htaˇ, Liꞈ hpu hkʼaw ve awˬ liˇ awˬ hkʼaˇ htaꞈ yuˬ yehˇ ve tehꞈ hpeuꞈ maw piˇ˗aw laˇ? Ngaˬ hui Hkriꞈ yaˇ ve te hkʼaˇ dawˇ hkʼaˇ cawˬ ve tehꞈ awˬ nu ve chaw htaꞈ hpeuꞈ maw piˇ˗aw laˇ? Ngaˬ hui awˬ to hkʼaw maˇ daꞈ ve awˬ ceuˬ mawˬ ve kʼo, gu pa gʼa˗aw laˇ? Chi ve teˇ hpaˍ a shu yawˇ awˬ to htaꞈ na nyi cawˇ ve yoˬ. Yaˬhoˉvaˬ shaˍ tiꞈ peꞈ laˇ ve htaꞈ ngaˬ hui na yuˬ htaˇ, “cuˇ yiˍ maˇ cawˬ ve chaw htaꞈ cuˇ yiˍ cawˬ la piˇ ve yoˬ.”—Chiˇ mvuh ve 19:7.

9. Maˇ shawˍ maˇ caˆ kʼoˆ ve chaw lehˬ cuˇ yiˍ htaꞈ hkʼaˬ hkʼe te a yeˇ maˇ yuˬ ve le?

⁹ 2 moˍ teˇ moˍ Yaˬhoˉvaˬ ve cuˇ yiˍ htaꞈ a yeˇ maˇ yuˬ ve chaw lehˬ, “maˇ shawˍ maˇ caˆ” kʼoˆ ve chaw hpehꞈ ve yoˬ. Teˇ pawˆ pawˆ ngaˬ hui hto toˇ˗e htaˇ chi hkʼe ve chaw htaꞈ mawˬ daꞈ ve yoˬ. (Chiˇ mvuh ve 123:4) Liꞈ hpu hkʼaw shaˍ tiꞈ peꞈ laˇ ve, awˬ leh meuˇ ve awˬ yanˇ hkʼaw maˇ shawˍ maˇ caˆ kʼoˆ ve chaw gʼaˇ hteꞈ maˇ la ve yoˬ. (2 Peˍtruˆ 3:3, 4) Chaw chi hkʼe ve lehˬ Lawˇtaˍ ve awˬ maˉ paˍ htaꞈ shuˍ ve yoˬ. Yawˇ hui Gʼuiˬ sha shaˍ tiꞈ piˇ ve htaꞈ maˇ na. Leh Liꞈ hpu hkʼaw ve awˬ liˇ awˬ hkʼaˇ gʼaꞈ te ve chaw htaꞈ yawˇ hui kʼoˆ guiˇ gʼuiˬ guiˇ piˇ ve yoˬ. (Awˬ hkuiˉ puiˍ 19:14) Yawˇ hui “a shu yawˇ ve awˬ suhˍ awˬ shaˍ a loˍ awˬ hkʼaˇ suh kʼai” ve yoˬ. (Yuˇdaꞈ 7, 17, 18) Liꞈ hpu hkʼaw maˇ shawˍ maˇ caˆ kʼoˆ taˍ ve chaw lehˬ, Yaˬhoˉvaˬ htaꞈ hpfuhˆ ve chaw leh yawˇ htaꞈ kaꞈ a yeˇ maˇ yuˬ ve chaw hui hpehꞈ ve yoˬ.

10. Chiˇ mvuh ve liꞈ 1:1 hkʼaw kʼoˆ taˍ ve hkʼe, maˇ shawˍ maˇ caˆ kʼoˆ ve chaw ngaˬ hui maˇ hpehꞈ tuˬ hkʼaˬ hkʼe gʼa te ve le?

¹⁰ Maˇ shawˍ maˇ caˆ kʼoˆ ve chaw ngaˬ hui maˇ hpehꞈ tuˬ hkʼaˬ hkʼe gʼa te ve le? Chi lehˬ maˇ shawˍ maˇ caˆ kʼoˆ ve chaw htaꞈ ngaˬ hui awˬ chawˇ maˇ gʼa te. (Chiˇ mvuh ve 1:1 gʼaw sheˍ.) Gʼuiˬ sha htaꞈ hpfuhˆ ve chaw geh laˬ ve awˬ lawn ngaˬ hui maˇ na leh maˇ gʼaw. Chi hkʼoˆ kaꞈ, ngaˬ hui shaˍ tiꞈ maˇ te ve kʼo, ngaˬ hui shu ve awˬ lawn ca kʼoˆ gaˇ puiˉ la ve, Yaˬhoˉvaˬ leh yawˇ ve kanˉ hkʼaˇ sheh kʼai laˇ chehˇ ve htaꞈ ngaˬ hui htawˇ dawˇ nawˬ dawˇ cawˬ la ve yoˬ hehˉ. Ngaˬ hui a shu yawˇ awˬ to htaꞈ na nyi cawˇ ve, ‘Gʼuiˬ sha ve kanˉ hkʼaˇ hkʼaw awˬ lawn awˬ suhˉ beˆ maˍ laˇ ve, maˇ heˆ leh kʼoˆ maˍ laˇ ve cawˬ htaˇ, ngaˬ maˇ daꞈ ve hpawˇ kʼoˆ tuˬ ve laˇ? Gʼuiˬ  sha ve kanˉ hkʼaˇ hkʼaw sheh kʼai laˇ ve chaw htaꞈ yawˇ hui yaꞈ ve htaꞈ ceh tiˉ ngaˬ nyi˗aw laˇ?’ Ngaˬ hui a shu yawˇ awˬ to chi hkʼe ve dawˇ hkʼaˇ cawˬ htaˇ laꞈ haˉ yuˬ baˬ ve kʼo, Yaˬhoˉvaˬ nyi hkʼaˇ suh jaˇ ve yoˬ.—Tawˇ naˉ ve 3:34, 35.

11. “Cuˇ yiˍ maˇ cawˬ ve chaw” lehˬ Yaˬhoˉvaˬ ve awˬ liˇ awˬ hkʼaˇ htaꞈ hkʼaˬ hkʼe dawˇ ve le?

¹¹ 3 moˍ teˇ moˍ Gʼuiˬ sha ve cuˇ yiˍ htaꞈ a yeˇ maˇ yuˬ ve chaw lehˬ, “cuˇ yiˍ maˇ cawˬ ve chaw” hpehꞈ ve yoˬ. Chi hkʼe ve chaw lehˬ, a shaꞈ teꞈ kuiˬ hkʼaw Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te ve yoˬ. Yawˇ hui te chehˇ ve awˬ ceuˬ daꞈ ve tehꞈ dawˇ ve yoˬ. (Tawˇ naˉ ve 12:15) Awˬ tehˬ ve cuˇ yiˍ peꞈ laˇ shehˍ hpaˇ Yaˬhoˉvaˬ htaꞈ yawˇ hui a yeˇ maˇ yuˬ. (Chiˇ mvuh ve 53:1) Ngaˬ hui hto toˇ˗e htaˇ chi hkʼe ve chaw htaꞈ gʼa hpuˇ jaw ve yoˬ. Ngaˬ hui Liꞈ hpu hkʼaw ve awˬ liˇ awˬ hkʼaˇ htaꞈ gʼaꞈ te ve pa taw, yawˇ hui maˇ shawˍ maˇ caˆ kʼoˆ laˇ ve yoˬ. Yaꞈ hkʼaˇ, yawˇ hui awˬ nu ve chaw htaꞈ daꞈ ve awˬ ceuˬ te piˇ maˇ gʼa. Liꞈ hpu hkʼaw kʼoˆ ve, “cuˇ yiˍ cawˬ ve tawˇ htaꞈ chaw luˬ paˍ teˇ hpaˍ na maˇ gʼa puiˉ. Shu awˬ lawn uiˍ ve kanˉ teˇ hpaˍ jehˬ daꞈ htaˇ, yawˇ hui teꞈ chiˉ kʼoˆ maˇ gʼa.” (Tawˇ naˉ ve 24:7) Cuˇ yiˍ maˇ cawˬ ve chaw lehˬ shu htaꞈ daꞈ ve awˬ lawn maˇ kʼoˆ maˍ piˇ puiˉ. Hkʼe te leh, Yaˬhoˉvaˬ ngaˬ hui htaꞈ “cuˇ yiˍ maˇ cawˬ ve chaw geh taˇ ca chehˇ” tehꞈ kʼoˆ laˇ ve yoˬ.—Tawˇ naˉ ve 14:7.

12. Ngaˬ hui “cuˇ yiˍ maˇ cawˬ ve chaw” hkʼe maˇ hpehꞈ tuˬ aˬ htoꞈ ma ga laˇ ve le?

¹² Miˬ guiˬ chaw yaˇ Yaˬhoˉvaˬ beˆ maˍ piˇ ve htaꞈ maˇ na ve hkʼe ngaˬ hui maˇ hpehꞈ gaˇ. Yaˬhoˉvaˬ hkʼaˬ hkʼe dawˇ ve leh yawˇ ve awˬ liˇ awˬ hkʼaˇ htaꞈ ngaˬ hui shiˍ gaˇ ve kʼo, ngaˬ hui leuˉ leh gʼa kʼawꞈ henˇ ve yoˬ. Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ leuˉ leh kʼawꞈ haꞈ maˇ la tuˬ ga laˇ gʼa ve lehˬ, Yaˬhoˉvaˬ hkawˇ na yuˬ ve chaw leh maˇ na yuˬ ve chaw htaꞈ ngaˬ hui tehˆ daꞈ nyi sheˍ. Yawˇ hui a shaꞈ teꞈ hkʼaˇ hkʼaˬ hkʼe peun daꞈ ve htaꞈ dawˇ nyi sheˍ. Chi beuꞈ teˇ co˗e cuˇ yiˍ maˇ cawˬ ve chaw laiˉ gʼaˇ Yaˬhoˉvaˬ beˆ maˍ piˇ ve htaꞈ maˇ na yuˬ ve pa taw, yawˇ hui a shaꞈ teꞈ kuiˬ hkʼaw shoꞈ shaꞈ ve laiˉ ceuˬ gʼa hpuˇ ve yoˬ. Nawˬ Yaˬhoˉvaˬ hkawˇ na yuˬ ve pa taw, nawˬ ve a shaꞈ teꞈ kuiˬ hkʼaw yawˇ hui aꞈ kehˉ daꞈ ve tehꞈ mawˬ˗aw laˇ?—Chiˇ mvuh ve 32:8, 10.

13. Yaˬhoˉvaˬ lehˬ ngaˬ hui yawˇ beˆ maˍ laˇ ve hkawˇ na yuˬ tuˬ maˇ nyiˉ laˇ ve laˇ?

¹³ Yaˬhoˉvaˬ lehˬ teˇ gʼaˇ le le htaꞈ cuˇ yiˍ leh daꞈ ve beˆ maˍ hkawˇ piˇ ve yoˬ. Yaˬhoˉvaˬ lehˬ yawˇ ve beˆ maˍ piˇ hkawˇ na tuˬ chaw teˇ gʼaˇ htaꞈ kaꞈ maˇ nyiˉ piˇ ve htawˇ, yawˇ hui maˇ na yuˬ ve kʼo heuˆ la kuiˬ hkʼaˬ hkʼe cawˬ ve yawˇ kʼoˆ taˍ ve yoˬ. Liꞈ hpu hkʼaw kʼoˆ ve, “nawˬ hui te ve kanˉ lehˬ, nawˬ hui htaꞈ naˬ piˇ lawˬ tuˬ yoˬ.” (Tawˇ naˉ ve 1:29-32) Chi beuꞈ teˇ co˗e ve chaw a shu yawˇ ve a loˍ awˬ hkʼaˇ suh tiˉ te ve yoˬ. Hkʼe te leh, yawˇ hui tuꞈ ve hkanˍ ve, dawˇ haˍ ve, leh shoꞈ shaꞈ ve laiˉ ceuˬ gʼa hpuˇ ve yoˬ. Leh awˬ leh meuˇ htaˇ yawˇ hui htaꞈ te luˬ piˇ tuˬ yoˬ. Yaꞈ hkʼaˇ, Yaˬhoˉvaˬ yawˇ ve hkawˇ na yuˬ ve chaw htaꞈ ka tiꞈ te laˇ ve, “ngaˬ ve tawˇ htaꞈ na yuˬ ve chaw hkʼaˬ ve teˇ gʼaˇ maˇ kʼoˆ, gawˬ lehˍ gʼa chehˇ tuˬ yoˬ. Yawˇ lehˬ teꞈ chiˉ kawˆ tuˬ maˇ cawˬ.”—Tawˇ naˉ ve 1:33.

14-15. Tawˇ naˉ ve liꞈ 4:23 hkʼaw ngaˬ hui htaꞈ hkʼaˬ hkʼe maˍ laˇ ve le?

¹⁴ Ngaˬ hui Yaˬhoˉvaˬ ve cuˇ yiˍ htaꞈ na yuˬ leh gʼaꞈ te ve kʼo, hkʼaˬ htaˆ kaꞈ awˬ bon gʼa tuˬ yoˬ. Yaˬhoˉvaˬ beˆ maˍ laˇ hkawˇ na yuˬ leh gʼaꞈ te ve maˇ  haˍ tehꞈ ngaˬ hui gʼa henˇ˗oˬ ve yoˬ. Tawˇ pa haˉ te kʼo, Tawˇ naˉ ve liꞈ teˇ daw hkʼaw beˆ maˍ laˇ hkawˇ cawˬ maˇ jaˇ. Awˬ yanˇ hkʼaˬ hkʼe maw ponˬ kʼai˗oˬ ve htawˇ, beˆ maˍ laˇ hkawˇ chi awˬ bon cawˬ leh ngaˬ hui a shaꞈ teꞈ kuiˬ hkʼaw daꞈ la tuˬ ga laˇ ve yoˬ. Tawˇ naˉ ve liꞈ hkʼaw beˆ maˍ laˇ hkawˇ 4 ceuˬ htaꞈ ngaˬ hui teˇ geh kʼawꞈ henˇ tuˬ yoˬ.

¹⁵ Nawˬ ve nyi ma htaꞈ haꞈ shaˉ sheˍ. Liꞈ hpu hkʼaw kʼoˆ ve, “yaˇ˗oˬ nawˬ ve nyi ma htaꞈ haꞈ shaˉ˗oˆ. Awˬ lawn kʼo, nawˬ a shaꞈ teꞈ ve lehˬ nawˬ ve nyi ma htaꞈ cawˬ ve yoˬ.” (Tawˇ naˉ ve 4:23, MGS) Ngaˬ hui ve nyi ma awˬ gʼaˇ cawˬ tuˬ hkʼaˬ hkʼe gʼa te ve le? Ngaˬ hui awˬ bon cawˬ ve caˇ tuˬ caˇ ve, te jaw ve hkʼe awˬ gʼaˇ gʼa caw ve, nyi ma htaꞈ heuˆ la kuiˬ cawˬ ve awˬ ceuˬ htaꞈ maˇ te ve yoˬ. Chi ve hkʼa shuˍ shuˍ, Tawˇ naˉ ve liꞈ hkʼaw kʼoˆ taˍ ve hkʼe ngaˬ hui ve nyi ma htaꞈ haꞈ shaˉ tuˬ, Liꞈ hpu teˇ nyi le le gʼaw ve, hpawnˬ daꞈ˗e tuˬ gu ve, hkʼaˬ htaˆ kaꞈ hpawnˬ daꞈ˗e ve, leh hpawnˬ daꞈ kuiˬ hkʼaw hkʼawꞈ ve yoˬ. Ngaˬ hui awˬ gʼaˇ caw ve hkʼa shuˍ, ngaˬ hui hto toˇ ve hkʼaˬ htaˆ kaꞈ gʼa kʼai ve yoˬ. Chi hkʼoˆ kaꞈ, ngaˬ hui ve dawˇ hkʼaˇ htaꞈ heuˆ la kuiˬ cawˬ ve awˬ ceuˬ htaꞈ maˇ te. Tawˇ pa haˉ te kʼo, awˬ liˇ awˬ hkʼaˇ maˇ daꞈ ve chaw hkawˇ ngaˬ hui maˇ na, maˇ nyi, maˇ gʼaw leh awˬ chawˇ kaꞈ maˇ te ve yoˬ.

16. Tawˇ naˉ ve liꞈ 23:4, 5 hkʼaw beˆ maˍ laˇ taˍ ve, aˬ htoꞈ ma te chi beuꞈ teˇ co˗e awˬ pon awˬ bon cawˬ jaˇ ve le?

¹⁶ Nawˬ cawˬ ve awˬ ceuˬ htaꞈ nyi hkʼaˇ suh sheˍ. Liꞈ hpu hkʼaw kʼoˆ ve, “paw sha la tuˬ ve htaꞈ uˉ hkeuꞈ tcuhˉ leh taˇ gʼaꞈ ca. Nawˬ ve hpu teˇ hpaˍ lehˬ toˍ laꞈ kʼuˉ nawꞈ leh teˇ hkui tiˉ poˬ hpaw˗e ve aˉ ceˬ hkʼa shuˍ mehˉ kʼai puiˉ ve yoˬ.” (Tawˇ naˉ ve 23:4, 5) Hpu shi leh paw sha gaˇ ve lehˬ co co maˇ yeˬ gʼa. Chi beuꞈ teˇ co˗e haˍ gʼawˇ ve chaw leh paw sha ve chaw lehˬ, hpu shi htaꞈ ceh tiˉ gʼaꞈ ca chehˇ ve pa taw, awˬ meh luˬ tuˬ, awˬ chawˇ maˇ cawˬ tuˬ, yehˬ kʼa hpaˆ tuˬ, leh maˇ chehˇ sha tuˬ, chi hkʼe gʼa hpuˇ ve yoˬ hehˉ. (Tawˇ naˉ ve 28:20; 1 Tiˆmoˉseˍ 6:9, 10) Yaꞈ hkʼaˇ, cuˇ yiˍ lehˬ ngaˬ hui keunˍ lawꞈ cawˇ ve dawˇ hkʼaˇ cawˬ leh lawˇ hpaꞈ uiˍ ve chaw maˇ hpehꞈ tuˬ te laˇ ve yoˬ. Hkʼe kʼo cawˬ taˍ ve awˬ ceuˬ htaꞈ nyi hkʼaˇ suh leh ha lehˬ gʼa ve yoˬ.—Cuˇ yiˍ piˇ ve 7:12.

17. Tawˇ naˉ ve liꞈ 12:18 hkʼaw “cuˇ yiˍ htaꞈ yehˇ leh yaw ve tawˇ” htaꞈ kʼoˆ taˍ ve hkʼe, ngaˬ hui tawˇ yaw ve kaꞈ chi ve hkʼe hpehꞈ tuˬ hkʼaˬ hkʼe gʼa te cawˇ ve le?

¹⁷ Nawˬ tawˇ maˇ yaw sheˍ htaˇ dawˇ nyi sheˍ. Ngaˬ hui tawˇ yaw ve htaꞈ shaˍ tiꞈ maˇ te ve kʼo, shoꞈ shaꞈ ve cawˬ la ve yoˬ. Liꞈ hpu hkʼaw kʼoˆ ve, “maˇ dawˇ nyi leh yaw ve tawˇ teˇ hpaˍ lehˬ, aˉ htaw hkʼa shuˍ shu htaꞈ naˬ piˇ lawˬ ve yoˬ. Yaꞈ hkʼaˇ, cuˇ yiˍ htaꞈ yehˇ leh yaw ve tawˇ lehˬ, shu htaꞈ kʼawꞈ na˗e la piˇ gʼa ve yoˬ.”  (Tawˇ naˉ ve 12:18) Ngaˬ hui shu ve awˬ lawn maˇ kʼoˆ daꞈ ve kʼo, chaw teˇ gʼaˇ geh kaꞈ ngaˬ hui awˬ lawn maˇ cawˬ daꞈ. (Tawˇ naˉ ve 20:19) Ngaˬ hui ve tawˇ shu nyi ma naˬ tuˬ maˇ te piˇ leh shu nyi ma sha tuˬ te piˇ ve kʼo, Liꞈ hpu hkʼaw ve cuˇ yiˍ ngaˬ hui ve nyi ma hkʼaw hkʼa biˇ cawˬ gʼa ve yoˬ. (Luˉkaꞈ 6:45) Liꞈ hpu hkʼaw beˆ maˍ laˇ ve htaꞈ ngaˬ hui dawˇ nyi htaˇ, ngaˬ hui ve tawˇ lehˬ ‘cuˇ yiˍ maˍ yiˍ ve awˬ hkuiˉ puiˍ hpehꞈ leh iˉ kaˆ lawˬ hkʼe kehˬ lehˍ cawˬ puiˉ ve’ pa taw shu nyi ma sha tuˬ te piˇ gʼa ve yoˬ.—Tawˇ naˉ ve 18:4.

18. Tawˇ naˉ ve liꞈ 24:6 hkʼaw beˆ maˍ laˇ taˍ ve, ngaˬ hui Gʼuiˬ sha ve kanˉ hkʼa dehꞈ te gʼa tuˬ hkʼaˬ hkʼe ga laˇ gʼa ve le?

¹⁸ Beˆ maˍ laˇ taˍ ve htaꞈ gʼaꞈ te sheˍ. Liꞈ hpu hkʼaw beˆ maˍ laˇ hkawˇ awˬ bon cawˬ ve yoˬ. Choˬ kaˬ lo kʼoˆ ve, “maꞈ maˇ ca bawˆ sheˍ gʼuˇ suhˍ, awˉ lawˉ peuˇ awˬ hkʼaˇ gʼa gu taˍ ve yoˬ. Daꞈ ve dawˇ hkʼaˇ shaˬ gʼa maˇ ve kʼo, shaˬ gʼaˇ hkʼaˇ cawˬ ve yoˬ.” (Tawˇ naˉ ve 24:6) Beˆ maˍ laˇ hkawˇ chi ve ngaˬ hui hto toˇ htaˇ leh Liꞈ hpu maˍ htaˇ yuˬ yehˇ ve kʼo, ngaˬ hui Gʼuiˬ sha ve kanˉ hkʼaˬ hkʼe taw daꞈ ve htaꞈ te gʼa ve dawˇ nyi sheˍ. Ngaˬ hui Gʼuiˬ sha ve kanˉ te htaˇ, a shu yawˇ ve dawˇ hkʼaˇ htaꞈ maˇ gʼaꞈ te ve yoˬ. Gʼuiˬ sha ve kanˉ hkʼaˇ beˆ maˍ laˇ ve awˬ hkʼaˇ suh gʼaꞈ te tuˬ yoˬ. Ngaˬ hui ve hpawnˬ daꞈ kuiˬ lo ‘daꞈ ve dawˇ hkʼaˇ piˇ daꞈ ve chaw laiˉ gʼaˇ cawˬ ve yoˬ.’ Hpawnˬ daꞈ kuiˬ hkʼaw bon maˍ ve leh awˬ nu ve awˬ vuiˬ te maˍ laˇ htaˇ, awˬ viˉ awˬ nyi ve hpehꞈ laˬ jaw ve awˬ lawn kʼoˆ maˍ laˇ ve kaꞈ cawˬ ve yoˬ. Chi hkʼoˆ kaꞈ, Gʼuiˬ sha ve kanˉ hkʼaˇ lehˬ ngaˬ hui awˬ pon awˬ bon cawˬ ve laꞈ caˉ laiˉ ceuˬ kaꞈ gu laˇ sheˍ ve yoˬ. Tawˇ pa haˉ te kʼo, chaw yaˇ Liꞈ hpu hkʼaw na gʼa tuˬ ga laˇ ve, maˍ laˇ ve awˬ ceuˬ teˇ hpaˍ leh VDO kaꞈ cawˬ ve yoˬ. Nawˬ laꞈ caˉ chi ve teˇ hpaˍ htaꞈ yehˇ gʼa tuˬ te jaw chehˇ˗aw laˇ?

19. Yaˬhoˉvaˬ beˆ maˍ laˇ ve cuˇ yiˍ htaꞈ nawˬ hkʼaˬ hkʼe dawˇ ve le? (Tawˇ naˉ ve 3:13-18)

¹⁹ Tawˇ naˉ ve liꞈ 3:13-18 gʼaw sheˍ. Liꞈ hpu hkʼaw daꞈ jaˇ ve beˆ maˍ laˇ hkawˇ peꞈ laˇ ve ngaˬ hui awˬ hpfuhˇ shiˍ jaˇ. Daꞈ ve beˆ maˍ laˇ hkawˇ chi hkʼe ve maˇ cawˬ ve kʼo, ngaˬ hui ve a shaꞈ teꞈ hkʼaˇ hkʼaˬ hkʼe hpehꞈ tuˬ naˍ maˇ shiˍ. Awˬ lawn chi ve hkʼaw Tawˇ naˉ ve liꞈ hkʼaw ve cuˇ yiˍ htaꞈ ngaˬ hui gʼa mawˬ ve yoˬ. Awˬ tehˬ kʼo, Liꞈ hpu teˇ daw hkʼa peu˗eˬ hkʼaw Yaˬhoˉvaˬ ve beˆ maˍ laˇ hkawˇ daꞈ jaˇ ve cawˬ taˍ ve yoˬ. Beˆ maˍ laˇ hkawˇ chi ve ngaˬ hui a shaꞈ teꞈ hkʼaˇ hkʼaw hkʼaˬ htaˆ kaꞈ yuˬ yehˇ sheˍ. Miˬ guiˬ yaˇ hui Yaˬhoˉvaˬ ve cuˇ yiˍ htaꞈ a yeˇ maˇ yuˬ ve htawˇ, “cuˇ yiˍ cawˬ ve chaw lehˬ, ha lehˬ ha kʼa gʼa chehˇ ve yoˬ” tehꞈ ngaˬ hui hkʼa dehꞈ yonˍ gʼa ve yoˬ.