Maꞈ lonˉ nyiˇ pawˆ teˇ pawˆ htaˇ, Naˍziˬ ve maꞈ yaˇ teˇ gʼaˇ Yaˬhoˉvaˬ Shaˉhkiˆhkanˍ ve chaw teˇ moˍ htaꞈ heuˉ keu piˇ ve, “nawˬ hui Hpaˉlanˍ chaw maˇ heˆ leh Eˍgaˍlanˍ chaw htaꞈ maˇ bawˆ daꞈ ve kʼo, teˇ gʼaˇ le le gʼa suh˗e tuˬ yoˬ” tehꞈ kʼoˆ piˇ ve yoˬ. Naˍziˬ ve maꞈ yaˇ laꞈ caˉ hkʼa biˇ cawˬ ve yawˇ hui awˬ paˇ lo huˉ chehˇ taˍ ve htawˇ, maꞈ yaˇ kʼoˆ piˇ ve htaꞈ awˬ viˉ awˬ nyi teˇ gʼaˇ˗ehˬ kaꞈ maˇ gʼaꞈ te. Awˬ viˉ awˬ nyi haꞈ hanˉ jaˇ leh daꞈ ve henˇ yuˬ tuˬ hpehꞈ ve pa taw, Yaˬhoˉvaˬ Shaˉhkiˆhkanˍ ve chaw maꞈ te daꞈ ve hpawˇ hkʼaˬ hkʼe dawˇ ve htaꞈ hpeuꞈ maw laˇ ve yoˬ. Ngaˬ hui htaꞈ tiˇ pehˍ laˇ tuˬ kawˆ ho laˇ ve htawˇ ngaˬ hui maꞈ maˇ te. Ngaˬ hui lehˬ choˬ paˉ oˇ paˉ chehˇ tuˬ kaꞈ maˇ leuˆ yuˬ.

1. GʼUIˬ SHA VE CHAW MIˬ GUIˬ CHI HKʼOˆ LO TEˇ CHAW CEUˬ CEH TIˉ HPEHꞈ VE

Oˇ htaˇ teˇ co˗e, Yaˬhoˉvaˬ chaw teˇ chaw ceuˬ htaꞈ leuˆ yuˬ leh yawˇ ve chaw hpehꞈ tcuh ve lehˬ, Iˉsaˍreˍlaˆ chaw ceuˬ yoˬ. Gʼuiˬ sha kʼoˆ ve, nawˬ hui leh “miˬ guiˬ chi ve hkʼa peu˗eˬ ngaˬ ve mawˇ hpehꞈ ve yoˬ. Yaꞈ hkʼaˇ, nawˬ hui lehˬ ngaˬ leuˆ yuˬ taˍ ve chaw ceuˬ hpehꞈ la tuˬ yoˬ.” (Tawˆ kʼai ve 19:5) Yaˬhoˉvaˬ lehˬ yawˇ hui htaꞈ a shu yawˇ ve miˬ guiˬ awˬ ti piˇ ve yoˬ. Yaˬhoˉvaˬ lehˬ Iˉsaˍreˍlaˆ chaw, awˬ nu ve chaw ceuˬ htaꞈ maꞈ ca bawˆ˗e htaˇ, yawˇ hui lehˬ Yaˬhoˉvaˬ htaꞈ oˉ kʼoˍ pui ve chaw htaꞈ maˇ gʼa bawˆ leh maˇ gʼa tiˇ pehˍ tehꞈ tawˇ piˇ ve yoˬ. *

Chi beuꞈ teˇ co˗e, Yaˬhoˉvaˬ htaꞈ oˉ kʼoˍ pui ve chaw lehˬ “mvuhˇ miˬ teˇ peˆ le le awˬ hkʼaw lo maˇ kʼoˆ, awˬ ceuˬ awˬ hkʼaˇ teˇ ceuˬ le le awˬ hkʼaw lo maˇ kʼoˆ, chaw teˇ ceuˬ le le awˬ hkʼaw lo maˇ kʼoˆ, tawˇ hkawˇ teˇ ceuˬ le le awˬ hkʼaw lo maˇ kʼoˆ” laˬ ve yoˬ. (Hpeuꞈ maˍ ve 7:9) Yawˇ hui maꞈ ca bawˆ˗e ve kʼo, yawˇ hui awˬ nu ve mvuhˇ miˬ hkʼaw  chehˇ ve Yaˬhoˉvaˬ htaꞈ oˉ kʼoˍ pui ve chaw hui htaꞈ gʼa bawˆ daꞈ leh awˬ chawˇ htaꞈ kaꞈ gʼa tiˇ pehˍ tuˬ yoˬ hehˉ.

2. IˉSAˍREˍLAˆ CHAW MAꞈ CA BAWˆ DAꞈ˗E TUˬ YAˬHOˉVAˬ TAWˇ PIˇ VE

Oˇ htaˇ teˇ co˗e, maꞈ ca bawˆ˗e tuˬ ve hkʼaˬ htaˆ leh aˬ htoꞈ ma pa taw gʼa bawˆ˗e tuˬ Yaˬhoˉvaˬ teˇ gʼaˇ ceh tiˉ dawˇ cheˆ gʼa ve yoˬ. Tawˇ pa haˉ te kʼo, awˬ nu ve chaw kaꞈ shiˍ ve, Hkaˍnaˍniˆ chaw lehˬ neˇ htaꞈ oˉ kʼoˍ pui ve, pehꞈ ve tzuhˆ ve te ve, leh a shu yawˇ ve yaˇ shaˉ hoꞈ htaꞈ tuˉ tanˇ ve pa taw, yawˇ hui htaꞈ te luˬ piˇ tuˬ Yaˬhoˉvaˬ Iˉsaˍreˍlaˆ chaw htaꞈ tawˇ piˇ ve yoˬ. Yaˬhoˉvaˬ ka tiꞈ te taˍ piˇ ve mvuhˇ miˬ hkʼaw maˇ daꞈ ve te ve chaw htaꞈ te luˬ tehꞈ Yaˬhoˉvaˬ Iˉsaˍreˍlaˆ chaw htaꞈ tawˇ piˇ ve yoˬ. Awˬ lawn kʼo, Iˉsaˍreˍlaˆ chaw yawˇ hui htaꞈ maˇ gʼa henˇ yuˬ tuˬ awˬ pon yoˬ. (Oˉ kʼoˍ pui ve 18:24, 25) Leh Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ hkʼaw chehˇ peuˬ hkʼawꞈ nawˉ, yawˇ hui a shu yawˇ ve mvuhˇ miˬ htaꞈ haꞈ shaˉ tuˬ, teˇ pawˆ pawˆ kʼo maꞈ ca te˗e tehꞈ Yaˬhoˉvaˬ tawˇ piˇ ve yoˬ. (2 Saˍmo˗eˍlaˆ 5:17-25) Yaꞈ hkʼaˇ, Yaˬhoˉvaˬ lehˬ Iˉsaˍreˍlaˆ chaw maꞈ ca te˗e tuˬ yawˇ hui hkʼaˇ yawˇ hui maˇ dawˇ cheˆ tcuh. Yawˇ hui Gʼuiˬ sha hkawˇ maˇ na yuˬ ve kʼo, laiˉ pawˆ yawˇ hui maꞈ ca bawˆ˗e ve kaꞈ maˇ gʼaˇ.—Heh puiˉ hkʼaw 14:41-45; 2 Raˍsaˍvanˍ 35:20-24.

Chi beuꞈ teˇ co˗e, chaw yaˇ maꞈ bawˆ daꞈ tuˬ Yaˬhoˉvaˬ maˇ kʼoˆ laˇ. Chi beuꞈ teˇ co˗e ve mvuhˇ miˬ teˇ hpaˍ lehˬ Gʼuiˬ sha awˬ pon dawˇ nyi ve aꞈ kehˉ, a shu yawˇ awˬ pon awˬ bon gʼa tuˬ maꞈ bawˆ ve yoˬ. Yawˇ hui maꞈ bawˆ ve lehˬ yawˇ hui ve mvuhˇ miˬ leuˉ leh kʼawꞈ uiˍ kʼai tuˬ, tanˇ kaˬ hpawˇ awˬ bon gʼa tuˬ, yawˇ hui ve mvuhˇ miˬ uˉ peunˍ ve awˬ bon gʼa tuˬ, leh awˬ nu ve teˇ hpaˍ awˬ pon yawˇ hui chi hkʼe te ve yoˬ. Yaꞈ hkʼaˇ, chaw teˇ hpaˍ kʼoˆ ve, Gʼuiˬ sha ve awˬ meh htaꞈ cuˇ leh yawˇ hui ve bon htaꞈ haꞈ shaˉ tuˬ maꞈ bawˆ ve, maˇ heˆ leh Gʼuiˬ sha ve canˇ paˍ htaꞈ tiˇ pehˍ ve tehꞈ kʼoˆ ve kʼo˗ehꞈ? Yaˬhoˉvaˬ lehˬ chi hkʼe te ve htaꞈ maˇ dawˇ cawˇ. Yaˬhoˉvaˬ lehˬ awˬ tehˬ oˉ kʼoˍ pui ve chaw htaꞈ yawˇ haꞈ shaˉ leh yawˇ ve canˇ paˍ htaꞈ awˬ gʼuˇ suhˍ hpawˇ Aˍmaˍgeˍdonˍ hkʼaw te luˬ piˇ tuˬ yoˬ. (Hpeuꞈ maˍ ve 16:14, 16) Oˇ ve teˇ yanˇ, Yaˬhoˉvaˬ yawˇ ve mvuhˇ naw ma tcuh yaˇ maꞈ moˍ htaꞈ cuˇ leh maꞈ bawˆ tcuh tuˬ yoˬ.—Hpeuꞈ maˍ ve 19:11-15.

3. YAˬHOˉVAˬ HTAꞈ YONˍ VE CHAW HUI HTAꞈ IˉSAˍREˍLAˆ CHAW MAˇ TIˇ PEHˍ PIˇ VE

Oˇ htaˇ teˇ co˗e, Iˉsaˍreˍlaˆ chaw ve maꞈ moˍ lehˬ, Yaˬhoˉvaˬ htaꞈ yonˍ ve tehꞈ hpeuꞈ maw laˇ ve chaw htaꞈ ha kʼaˉ piˇ leh suh keunˍ ve tehꞈ Gʼuiˬ sha dawˇ cheˆ ve chaw htaꞈ ceh tiˉ yawˇ hui tiˇ pehˍ piˇ ve yoˬ. Chi htaꞈ pa taw, 2 lawn htaꞈ teˇ geh nyi sheˍ. Yeˍriˆhkoˇ venˇ htaꞈ te luˬ tehꞈ  Yaˬhoˉvaˬ tawˇ piˇ htaˇ, Raˍhaˆ lehˬ Yaˬhoˉvaˬ htaꞈ yonˍ ve tehꞈ Iˉsaˍreˍlaˆ chaw mawˬ ve pa taw, yawˇ leh yawˇ ve yehˬ kʼa htaꞈ ponˬ piˇ ve yoˬ. (Yawˇsuˆ 2:9-16; 6:16, 17) Oˇ ve hkʼawꞈ nawˉ, Giˇbonˍ chaw hui kaꞈ Gʼuiˬ sha htaꞈ yawˆ yan ve tehꞈ Iˉsaˍreˍlaˆ chaw gʼa mawˬ ve pa taw, yawˇ hui htaꞈ maˇ tiˇ pehˍ piˇ.—Yawˇsuˆ 9:3-9, 17-19.

Chi beuꞈ teˇ co˗e, chi beuꞈ teˇ co˗e ve maꞈ yaˇ lehˬ teˇ gʼaˇ le le htaꞈ tiˇ pehˍ ve yoˬ. Gʼuiˬ sha htaꞈ yonˍ ve, maˇ heˆ leh mvuhˇ miˬ yaˇ teꞈ chiˉ maˇ shiˍ ve htaꞈ htawˇ maˇ kʼoˆ, yawˇ hui htaꞈ tiˇ pehˍ piˇ ve yoˬ.

4. MAꞈ BAWˆ DAꞈ CHEHˇ VE AWˬ YANˇ HTAˇ IˉSAˍREˍLAˆ CHAW LEHˬ YAˬHOˉVAˬ TAWˇ PIˇ VE HTAꞈ CEH TIˉ GʼA GʼAꞈ TE VE

Oˇ htaˇ teˇ co˗e, Iˉsaˍreˍlaˆ chaw maꞈ yaˇ lehˬ maꞈ bawˆ˗e htaˇ, Yaˬhoˉvaˬ kʼoˆ piˇ taˍ ve awˬ hkʼaˇ htaꞈ ceh tiˉ gʼa gʼaꞈ te ve yoˬ. Tawˇ pa haˉ te kʼo, teˇ pawˆ pawˆ Gʼuiˬ sha yawˇ hui htaꞈ kʼoˆ piˇ ve, “awˉ lawˉ peuˇ venˇ yaˇ oˇ ve teˇ hpaˍ laꞈ caˉ yaꞈ tuˬ gʼa kʼoˆ piˇ ve yoˬ.” (Bon maˍ ve 20:10) Chi hkʼoˆ kaꞈ, Yaˬhoˉvaˬ lehˬ Iˉsaˍreˍlaˆ chaw ve maꞈ yaˇ htaꞈ yawˇ hui awˬ to leh yawˇ hui haˉ kuiˬ kaꞈ daꞈ kehˬ tuˬ te leh yawˇ ve awˬ liˇ awˬ hkʼaˇ htaꞈ kaꞈ gʼaꞈ te tehꞈ kʼoˆ piˇ ve yoˬ. (Bon maˍ ve 23:9-14) Iˉsaˍreˍlaˆ mvuhˇ miˬ awˬ paˇ lo chehˇ ve, mvuhˇ miˬ ve maꞈ yaˇ teˇ hpaˍ yawˇ hui hpehˬ yuˬ veu laˇ ve yaˇ miˇ htaꞈ nyiˉ behˇ piˇ ve yoˬ. Yaꞈ hkʼaˇ, Iˉsaˍreˍlaˆ chaw ve maꞈ yaˇ htaꞈ Yaˬhoˉvaˬ chi hkʼe maˇ te tcuh. Awˬ tehˬ kʼo, Iˉsaˍreˍlaˆ chaw hui lehˬ yawˇ hui hpeh yuˬ veu laˇ ve yaˇ miˇ htaꞈ heuˆ gaˇ ve kʼo, teˇ ha pa law nyi sheˍ tehꞈ Gʼuiˬ sha kʼoˆ piˇ ve yoˬ.—Bon maˍ ve 21:10-13.

Chi beuꞈ teˇ co˗e, mvuhˇ miˬ teˇ hpaˍ hpaˍ maˇ˗awˍ ve kʼo mvuhˇ miˬ awˬ kaˍ lo maꞈ maˇ gʼa bawˆ daꞈ tuˬ yawˇ hui liꞈ bvuhꞈ cheˆ daꞈ ve yoˬ. Yawˇ hui liꞈ bvuhꞈ cheˆ daꞈ taˍ ve chi ve lehˬ, mvuhˇ miˬ yaˇ htaꞈ haꞈ shaˉ tuˬ awˬ pon yoˬ. Yaꞈ hkʼaˇ, mvuhˇ miˬ chi ve teˇ hpaˍ yawˇ hui liꞈ bvuhꞈ cheˆ daꞈ taˍ ve hkʼe maˇ gʼaꞈ te.

5. GʼUIˬ SHA YAWˇ VE CHAW AWˬ PON MAꞈ BAWˆ VE

Oˇ htaˇ teˇ co˗e, Yaˬhoˉvaˬ lehˬ Iˉsaˍreˍlaˆ chaw awˬ pon maꞈ bawˆ ve yoˬ. Yawˇ hui maꞈ bawˆ ve laiˉ pawˆ gʼaˇ tuˬ Yaˬhoˉvaˬ anˇ tuˬ te leh ga piˇ ve yoˬ. Tawˇ pa haˉ te kʼo, Gʼuiˬ sha Iˉsaˍreˍlaˆ chaw Yeˍriˆhkoˇ venˇ chaw htaꞈ gʼaˇ tuˬ ga piˇ ve lehˬ, “yawˇ hui gʼaˇ hteꞈ kuˬ” tehꞈ kʼoˆ piˇ leh “lanˇ venˇ teˇ hpaˍ paˆ ce sheˬ ve yoˬ.” Chi htaꞈ pa taw, Iˉsaˍreˍlaˆ chaw Yeˍriˆhkoˇ venˇ htaꞈ hkʼa sha sha˗ehˬ bawˆ yuˬ gʼa ve yoˬ. (Yawˇsuˆ 6:20) Hkʼe kʼo, Iˉsaˍreˍlaˆ chaw Aˍmawˇriˆ chaw htaꞈ ca bawˆ˗e htaˇ, yawˇ hui hkʼaˬ hkʼe te Aˍmawˇriˆ chaw htaꞈ bawˆ gʼaˇ tuˬ le? “Gʼuiˬ sha lehˬ mvuhˇ naw ma hkʼoˆ lo uiˍ jaˇ ve vaˇ shiˍ teˇ hpaˍ ce la piˇ leh, yawˇ hui htaꞈ teˍ pehˍ piˇ lawˬ ve yoˬ. Iˉsaˍreˍlaˆ chaw hui tiˇ pehˍ ve aꞈ kehˉ vaˇ shiˍ ce teˍ leh suh˗e ve chaw maˇ jaˇ ve yoˬ.”—Yawˇsuˆ 10:6-11.

AWˬ TEHˬ VE HKRIꞈ YAˇ LEHˬ CAWˇ DAꞈ HAWˍ DAꞈ TUˬ TE VE

Chi beuꞈ teˇ co˗e ngaˬ hui maꞈ maˇ ca bawˆ˗e ve lehˬ, oˇ htaˇ teˇ co˗e Iˉsaˍreˍlaˆ chaw htaꞈ peun daꞈ jaˇ ve tehꞈ gʼa mawˬ ve yoˬ. Yaꞈ hkʼaˇ, teˇ hkʼaˇ kʼawꞈ cawˬ sheˍ ve yoˬ. Tawˇ pa haˉ te kʼo, Gʼuiˬ sha awˬ gʼuˇ suhˍ htaˇ kaꞈ kʼoˆ taˍ ve, awˬ leh meuˇ ve awˬ yanˇ hkʼaw Gʼuiˬ sha maˍ piˇ ve chaw lehˬ, yawˇ hui “maꞈ bawˆ tuˬ awˬ hkʼaˇ kʼawꞈ gu tuˬ ve maˇ heˆ.” Hkʼe te leh, yawˇ hui maꞈ bawˆ ve htaꞈ maˇ caˉ daꞈ. (Iˉsaˍyaˆ 2:2-4) Yeˍsuˆ kʼoˆ sheˍ ve, yawˇ ve awˬ laꞈ gʼawˇ lehˬ “chi miˬ guiˬ htaꞈ maˇ caˉ daꞈ” leh yawˇ hui choˬ paˉ oˇ paˉ kaꞈ maˇ chehˇ.—Yoˇhanˬ 15:19.

Chi hkʼoˆ kaꞈ, Yeˍsuˆ lehˬ yawˇ ve awˬ laꞈ gʼawˇ htaꞈ leuˉ leh kʼawꞈ te tuˬ kaꞈ maˍ piˇ sheˍ ve yoˬ. Yeˍsuˆ yawˇ ve awˬ laꞈ gʼawˇ htaꞈ nyi ma zuhˆ ve dawˇ hkʼaˇ maˇ daꞈ ve maˇ cawˬ tuˬ, maˇ cawˇ maˇ hawˍ daꞈ ve maˇ cawˬ tuˬ, leh maꞈ maˇ te tuˬ kaꞈ maˍ piˇ ve yoˬ. (Maꞈhtehˍ 5:21, 22) Leh Yeˍsuˆ yawˇ ve awˬ laꞈ gʼawˇ htaꞈ “cawˇ daꞈ hui daꞈ tuˬ te” leh canˇ paˍ htaꞈ kaꞈ haꞈ˗oꞈ tehꞈ kʼoˆ piˇ ve yoˬ.—Maꞈhtehˍ 5:9, 44.

Leh ngaˬ hui teˇ gʼaˇ le le awˬ pon kʼo˗ehꞈ? Ngaˬ hui kaꞈ maꞈ maˇ ca bawˆ daꞈ˗e gaˇ. Yaꞈ hkʼaˇ, ngaˬ hui awˬ viˉ awˬ nyi teˇ gʼaˇ gʼaˇ htaꞈ maˇ dawˇ cawˇ ve pa taw, yawˇ geh deˇ daꞈ ve maˇ heˆ leh Hkriꞈ yaˇ awˬ moˍ hkʼaw maˇ cawˇ maˇ hawˍ daꞈ tuˬ te˗aw laˇ? Chi hkʼe hpehꞈ ve kʼo, ngaˬ hui ve dawˇ hkʼaˇ oˇ hkʼe ve maˇ gʼa cawˬ tuˬ coˇ caˇ leh gʼa gu ve yoˬ.—Yaˍkoˆ 4:1, 11.

Ngaˬ hui maꞈ te ve htaꞈ maˇ caˉ daꞈ. Yaꞈ hkʼaˇ, ngaˬ hui awˬ viˉ awˬ nyi dawˇ sha gawˬ lehˍ ve cawˬ tuˬ leh haꞈ daꞈ tuˬ te ve yoˬ. (Yoˇhanˬ 13:34, 35) Ngaˬ hui choˬ paˉ oˇ paˉ maˇ chehˇ tuˬ a shu yawˇ awˬ to htaꞈ haꞈ shaˉ leh, miˬ guiˬ chi hkʼoˆ lo maꞈ bawˆ ve maˇ cawˬ tuˬ Yaˬhoˉvaˬ te tuˬ ve awˬ nyi htaꞈ ngaˬ hui lawˬ chehˇ taˍ ve yoˬ.—Chiˇ mvuh ve 46:9.