1. Gʼuiˬ sha htaꞈ gʼaˇ va ve chaw hui lehˬ aˬ htoꞈ ma te ha lehˬ gʼa ve le?

 Awˬ tehˬ ha lehˬ ve lehˬ, teˇ hkui tiˉ cawˬ leh mehˉ kʼai ve maˇ heˆ. Yaꞈ hkʼaˇ, awˬ tehˬ ha lehˬ ve lehˬ ngaˬ hui geh hkʼaˬ htaˆ kaꞈ cawˬ ve yoˬ. Awˬ lawn chi ve Yeˍsuˆ hkʼaw pui hkʼoˆ lo bon maˍ htaˇ kʼoˆ ve yoˬ. Yawˇ kʼoˆ ve, ‘Gʼuiˬ sha htaꞈ gʼaˇ va ve chaw hui lehˬ gʼa ha lehˬ ve yoˬ.’ (Maꞈhtehˍ 5:3) Yeˍsuˆ chi hkʼe kʼoˆ htaˇ chaw yaˇ lehˬ, hpanˍ shehˍ hpaˇ htaꞈ shiˍ gaˇ leh Gʼuiˬ sha htaꞈ oˉ kʼoˍ pui gaˇ tuˬ hpanˍ laˇ ve tehꞈ, Yeˍsuˆ shiˍ ve pa taw yoˬ. Hpanˍ shehˍ hpaˇ chi lehˬ Yaˬhoˉvaˬ yoˬ. Leh yawˇ lehˬ ‘ha lehˬ ve Gʼuiˬ sha hpehꞈ ve’ pa taw, yawˇ htaꞈ oˉ kʼoˍ pui ve chaw htawˇ ha lehˬ ve yoˬ.—1 Tiˆmoˉseˍ 1:11.

2-3. (a) Yeˍsuˆ kʼoˆ ve a shu kaꞈ ha lehˬ gʼa ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le? Leh aˬ htoꞈ ma te ngaˬ hui awˬ lawn chi htaꞈ a yeˇ yuˬ cawˇ ve le?

² Ngaˬ hui awˬ tehˬ ha lehˬ ve cawˬ gʼa tuˬ, shoꞈ shaꞈ ve maˇ cawˬ ve htaꞈ kʼoˆ gaˇ ve laˇ? Chi hkʼe maˇ heˆ. Yeˍsuˆ hkʼaw pui hkʼoˆ lo bon maˍ htaˇ, yawˇ teˇ ceuˬ ceuˬ kʼoˆ ve chaw laiˉ gʼaˇ htaꞈ anˇ tuˬ te piˇ ve yoˬ. Yawˇ kʼoˆ ve, “dawˇ haˍ gaˇ haˍ ve chaw hui awˬ bon uiˍ ve yoˬ.” Yawˇ venˇ baˆ te ve maˇ heˆ leh a shaꞈ teꞈ kuiˬ hkʼaw shoꞈ shaꞈ ve gʼa hpuˇ ve pa taw, yawˇ dawˇ haˍ gaˇ haˍ ve yoˬ. Yeˍsuˆ kʼoˆ ve, yawˇ hui ha lehˬ gʼa ve yoˬ. Chi hkʼoˆ kaꞈ, Yeˍsuˆ kʼoˆ sheˍ ve, “hteˇ lehˍ cawˇ lehˍ te ve pa taw fawˉ ve mehˍ ve htaꞈ gʼa hkanˍ ve chaw hui” leh “ngaˬ htaꞈ pa taw shu nawˬ hui htaꞈ hkʼa mvuhˇ hkʼa na kʼoˆ ve” htawˇ ha lehˬ gʼa ve yoˬ. (Maꞈhtehˍ 5:4, 10, 11) Chi hkʼe gʼa hpuˇ ve lehˬ, awˬ tehˬ ha lehˬ gʼa ve hkʼaˬ hkʼe te hpehꞈ kʼai gʼa ve le?

³ Yeˍsuˆ kʼoˆ maˍ laˇ ve ngaˬ hui awˬ tehˬ ha lehˬ ve cawˬ gʼa ve lehˬ, shoꞈ shaꞈ ve maˇ cawˬ ve htaꞈ kʼoˆ gaˇ ve maˇ heˆ. Yaꞈ hkʼaˇ, ngaˬ hui Gʼuiˬ sha htaꞈ shiˍ leh yawˇ geh meuˆ daꞈ ve kʼo, awˬ tehˬ ha lehˬ ve cawˬ tuˬ te laˇ ve yoˬ. (Yaˍkoˆ 4:8) Ngaˬ hui awˬ tehˬ ha lehˬ ve cawˬ tuˬ ga laˇ gʼa ve awˬ lawn chi ve hkʼaw 3 hkʼaˇ htaꞈ teˇ geh henˇ tuˬ yoˬ.

4. Ngaˬ hui awˬ tehˬ ha lehˬ ve cawˬ gʼa tuˬ awˉ lawˉ te cawˇ ve teˇ hkʼaˇ lehˬ aˬ htoꞈ ma le? (Chiˇ mvuh ve 1:1-3)

⁴ Awˉ lawˉ teˇ hkʼaˇ lehˬ, awˬ tehˬ ha lehˬ ve cawˬ gʼa tuˬ ngaˬ hui Liꞈ hpu gʼaw leh gʼa henˇ ve. Yeˍsuˆ kʼoˆ ve, “chaw yaˇ lehˬ hkaoˍ monˇ htaꞈ pa taw ceh tiˉ gʼa teꞈ ve maˇ heˆ. Gʼuiˬ sha ve mawꞈ kʼaw hkʼaw lo tawˆ la ve tawˇ teˇ hkawˇ le le htaꞈ pa taw gʼa teꞈ ve yoˬ.” (Maꞈhtehˍ 4:4) Chaw yaˇ leh to nuˇ to shaˆ a shaꞈ gʼa teꞈ chehˇ tuˬ caˇ tuˬ gʼa caˇ ve yoˬ. Yaꞈ hkʼaˇ, chaw yaˇ ceh tiˉ Liꞈ hpu hkʼaw Gʼuiˬ sha htaꞈ caˉ daꞈ ve cuˇ yiˍ henˇ gʼa ve yoˬ. Chi lehˬ ngaˬ hui awˬ pon a yeˇ uiˍ jaˇ. Chi htaꞈ pa taw, teˇ nyi le le Liꞈ hpu gʼaw cawˇ ve yoˬ. Chiˇ mvuh ve liꞈ bvuhꞈ paˍ kʼoˆ ve, ‘ha lehˬ ve chaw lehˬ Gʼuiˬ sha ve awˬ liˇ tawˇ hkawˇ htaꞈ na yuˬ leh mvuhˇ lawꞈ kʼaw mvuhˇ hpeuꞈ henˇ yuˬ tcuhˉ taˍ ve yoˬ.’—Chiˇ mvuh ve 1:1-3 gʼaw sheˍ.

5-6. (a) Liꞈ hpu hkʼaw ngaˬ hui aˬ htoꞈ ma awˬ lawn htaꞈ gʼa henˇ ve le? (b) Liꞈ hpu gʼaw ve ngaˬ hui htaꞈ hkʼaˬ hkʼe ga laˇ gʼa ve le?

⁵ Yaˬhoˉvaˬ ngaˬ hui htaꞈ haꞈ jaˇ. Hkʼe te leh, yawˇ ngaˬ hui htaꞈ Liꞈ hpu peꞈ laˇ ve yoˬ. Ngaˬ hui aˬ htoꞈ ma te paw la ve, ngaˬ hui Yaˬhoˉvaˬ geh hkʼaˬ hkʼe te meuˆ daꞈ gʼa ve, leh Gʼuiˬ sha ngaˬ hui htaꞈ venˇ baˆ hpehˇ laˇ tuˬ hkʼaˬ hkʼe gʼa te cawˇ ve, chi ve teˇ hpaˍ ngaˬ hui shiˍ tuˬ Liꞈ hpu hkʼaw maˍ laˇ ve yoˬ. Leh awˬ gʼuˇ suhˍ hpawˇ Yaˬhoˉvaˬ ka tiꞈ te taˍ ve htaꞈ caˉ daꞈ ve ngaˬ hui gʼa henˇ sheˍ ve yoˬ. Chi lehˬ ngaˬ hui dawˇ law kuiˬ cawˬ tuˬ ga laˇ ve yoˬ. (Yeˍraˍmiˆ 29:11) Ngaˬ hui Liꞈ hpu gʼa henˇ leh awˬ lawn chi ve teˇ hpaˍ htaꞈ gʼa shiˍ htaˇ, ngaˬ hui htaꞈ awˬ tehˬ ha lehˬ tuˬ te laˇ ve yoˬ.

⁶ Chi hkʼoˆ kaꞈ, ngaˬ hui a shaꞈ teꞈ kuiˬ hkʼaw awˬ tehˬ yuˬ yehˇ gʼa tuˬ, Liꞈ hpu hkʼaw beˆ maˍ laˇ leh, chi ve teˇ hpaˍ htaꞈ ngaˬ hui gʼaꞈ te htaˇ, ngaˬ hui kaꞈ ha lehˬ gʼa ve yoˬ. Chi htaꞈ pa taw, nawˬ shoꞈ  shaꞈ ve leh dawˇ maˇ jaˇ ve maˇ heˆ leh gʼaˇ nuˇ jaˇ ve hkʼaˬ hkʼe htaˇ gʼa hpuˇ ve htawˇ, Liꞈ hpu gʼaw leh hkʼa dehꞈ dawˇ nyi ve awˬ yanˇ yehˇ sheˍ. Yeˍsuˆ kʼoˆ ve, “awˬ tehˬ awˬ na awˬ bon uiˍ ve chaw teˇ hpaˍ lehˬ, Gʼuiˬ sha ve tawˇ hkawˇ htaꞈ na yuˬ leh te kʼai ve chaw hui yoˬ.”—Luˉkaꞈ 11:28.

7. Nawˬ Liꞈ hpu gʼaw htaˇ awˬ bon hkʼa dehꞈ gʼa tuˬ hkʼaˬ hkʼe te cawˇ ve le?

⁷ Nawˬ Liꞈ hpu gʼaw htaˇ haˆ haˆ taˇ gʼaw. Awˬ lawn chi ve htaꞈ dawˇ nyi sheˍ. Nawˬ chi hkʼe hpehꞈ˗aw laˇ? Awˬ chawˇ nawˬ htaꞈ awˍ chiˇ mehˬ mehˬ te caˍ laˇ ve yoˬ. Nawˬ awˬ yanˇ hkʼa dehꞈ maˇ cawˬ ve maˇ heˆ leh awˬ nu ve awˬ ceuˬ htaꞈ ceh tiˉ dawˇ nyi chehˇ ve pa taw, awˍ chiˇ hkʼaˬ hkʼe taw mehˬ ve htaꞈ maˇ shiˍ gʼa. Nawˬ caˇ peuˬ htaˇ haˆ haˆ maˇ caˇ cawˇ law tehꞈ shiˍ la leh awˍ chiˇ mehˬ jaˇ ve htaꞈ a yehˉ yehˉ caˇ cawˇ law tehꞈ dawˇ ve yoˬ. Liꞈ hpu gʼaw ve kaꞈ hkʼa shuˍ yoˬ. Teˇ pawˆ pawˆ kʼo ngaˬ hui haˆ haˆ gʼaw ve yoˬ. Hkʼe te leh, ngaˬ hui Liꞈ hpu haˆ haˆ gʼaw ve pa taw, gʼaw ve htaꞈ maˇ ha lehˬ. Chi htaꞈ pa taw, ngaˬ hui awˬ yanˇ yehˇ leh oˇ ve teˇ hkui hkʼaˬ hkʼe hpehꞈ ve htaꞈ dawˇ nyi ve, leh aˬ htoꞈ ma hpehꞈ la ve htaꞈ dawˇ mawˬ ve, leh aˬ htoꞈ ma awˬ hkawˇ gʼa kaˇ ve htaꞈ ngaˬ hui Liꞈ hpu gʼaw htaˇ hkʼa dehꞈ dawˇ nyi ve kʼo, ngaˬ hui kaꞈ ha lehˬ ve cawˬ tuˬ yoˬ.

8. “Ka tiꞈ yeˬ leh cuˇ yiˍ cawˬ ve awˬ ceˬ” aˬ htoꞈ ma kanˉ te ve le? (Awˬ maiˉ hkʼaw nyi sheˍ.)

⁸ Yeˍsuˆ “ka tiꞈ yeˬ leh cuˇ yiˍ cawˬ ve awˬ ceˬ” htaꞈ leuˆ yuˬ leh awˬ yanˇ cawˇ lehˍ caˇ tuˬ dawˬ tuˬ pehˬ piˇ tcuh ve pa taw, ngaˬ hui yonˍ hkʼaˇ hpawˇ ve caˇ tuˬ teˇ nyi le le cawˬ maˇ jaˇ. * (Maꞈhtehˍ 24:45) Ka tiꞈ yeˬ leh cuˇ yiˍ cawˬ ve awˬ ceˬ lehˬ, caˇ tuˬ htaꞈ shuˍ ve cuˇ yiˍ ngaˬ hui htaꞈ peꞈ laˇ htaˇ yawˇ hui Liꞈ hpu htaꞈ cuˇ ve yoˬ. Gʼuiˬ sha ve kanˉ hkʼaˇ hkʼaw maˍ laˇ ve awˬ ceuˬ teˇ hpaˍ ngaˬ hui Yaˬhoˉvaˬ ve dawˇ hkʼaˇ htaꞈ na gʼa tuˬ ga laˇ ve yoˬ. (1 Hteˇsaˍlawˇniˆ 2:13) Ngaˬ hui Shaw nyi kuiˬ Taꞈ yehˬ leh Tu loˬ! tehꞈ kʼoˆ ve liꞈ, vehˆ saiˉ jw.org hkʼaw ve awˬ lawn teˇ hpaˍ gʼaw ve dawˇ cawˇ leh, mvuhˇ hpeuꞈ haˉ hpawnˬ daꞈ ve, leh hkawꞈ nyi shinˉ nyi hpawnˬ daꞈ ve gu ve kaꞈ ngaˬ hui dawˇ cawˇ ve yoˬ. Chi hkʼoˆ kaꞈ, teˇ ha pa le le JW awˬ han tawˆ kuiˬ nyi ve kaꞈ dawˇ cawˇ ve yoˬ. Ngaˬ hui Liꞈ hpu gʼaw leh a shu yawˇ hkʼaˇ yawˇ Liꞈ hpu henˇ htaˇ, ngaˬ hui awˬ tehˬ ha lehˬ gʼa tuˬ, gʼaꞈ te tuˬ 2 hkʼaˇ cawˬ ve yoˬ. Chi teˇ hkui ngaˬ hui 2 hkʼaˇ htaꞈ teˇ geh nyi sheˍ.

9. Ngaˬ hui awˬ tehˬ ha lehˬ gʼa tuˬ gʼa te cawˇ ve 2 hkʼaˇ aˬ htoꞈ ma le?

⁹ 2 hkʼaˇ teˇ hkʼaˇ lehˬ, ngaˬ hui awˬ tehˬ ha lehˬ gʼa tuˬ Yaˬhoˉvaˬ ve awˬ liˇ awˬ hkʼaˇ htaꞈ gʼa gʼaꞈ te ve. Chiˇ mvuh ve liꞈ bvuhꞈ paˍ kʼoˆ ve, “Gʼuiˬ sha htaꞈ yawˆ yan ve chaw leh, yawˇ ve awˬ liˇ tawˇ hkawˇ htaꞈ na yuˬ ve chaw lehˬ gʼa ha lehˬ ve yoˬ.” (Chiˇ mvuh ve 128:1) Yaˬhoˉvaˬ htaꞈ yawˆ yan ve kʼoˆ gaˇ ve lehˬ, yawˇ htaꞈ haꞈ leh yawˆ yan jaˇ ve pa taw, yawˇ nyi ma naˬ tuˬ teˇ ceuˬ kaꞈ maˇ te piˇ gaˇ. (Tawˇ naˉ ve 16:6) Chi htaꞈ pa taw Liꞈ hpu hkʼaw kʼoˆ taˍ ve hkʼa shuˍ, Gʼuiˬ sha ve awˬ liˇ awˬ hkʼaˇ htaꞈ coˇ caˇ leh gʼaꞈ te gaˇ ve yoˬ. (2 Kawˇrenˍhtuˆ 7:1) Ngaˬ hui Yaˬhoˉvaˬ dawˇ cawˇ ve awˬ ceuˬ htaꞈ te leh yawˇ maˇ dawˇ cawˇ ve awˬ ceuˬ htaꞈ maˇ te ve pa taw, ngaˬ hui ha lehˬ jaˇ tuˬ yoˬ.—Chiˇ mvuh ve 37:27; 97:10; Roˉmaꞈ 12:9.

10. Roˉmaꞈ liꞈ 12:2 hkʼaw kʼoˆ taˍ ve hkʼe, Gʼuiˬ sha ve kanˉ te ve chaw teˇ gʼaˇ le le aˬ htoꞈ ma te cawˇ ve le?

¹⁰ Roˉmaꞈ liꞈ 12:2 gʼaw sheˍ. Aˬ htoꞈ ma cawˇ ve, maˇ cawˇ ve, Yaˬhoˉvaˬ dawˇ cheˆ tuˬ a hkaw˗anˬ cawˬ ve tehꞈ ngaˬ hui shiˍ ve pa taw, ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ kaꞈ gʼa gʼaꞈ te ve yoˬ. Awˬ lawn chi htaꞈ dawˇ nyi sheˍ. Yaꞈ kʼaw lonˉ hkʼoˆ lo kaˇ hkʼaˬ hkʼe taw gʼaꞈ gehˬ tuˬ mvuhˇ miˬ kanˉ te paˍ awˬ liˇ teh tuˬ a hkaw˗anˬ cawˬ ve tehꞈ chaw teˇ gʼaˇ shiˍ ve yoˬ. Yaꞈ hkʼaˇ, yawˇ awˬ liˇ awˬ hkʼaˇ chi htaꞈ hkʼa dehꞈ maˇ gʼaꞈ te gaˇ ve pa taw, yawˇ kaˇ gʼaꞈ gehˬ jaˇ. Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ hkʼa dehꞈ na yuˬ ve kʼo, ngaˬ hui a shaꞈ teꞈ chehˇ kuiˬ hkʼaw awˬ liˇ awˬ hkʼaˇ chi htaꞈ gʼa gʼaꞈ te ve yoˬ. (Tawˇ naˉ ve 12:28) Daˍviˆ kaꞈ chi hkʼe dawˇ ve yoˬ. Hkʼe te leh, yawˇ Yaˬhoˉvaˬ htaꞈ kʼoˆ piˇ ve, “a shaꞈ teꞈ kuiˬ lo kʼai ve yaꞈ kʼaw nawˬ ngaˬ  htaꞈ maˍ laˇ tuˬ yoˬ. Nawˬ ngaˬ htaꞈ ha lehˬ tuˬ biˇ la piˇ leh co co taiˍ taiˍ dawˇ sha tuˬ piˇ laˇ ve yoˬ.”—Chiˇ mvuh ve 16:11.

11-12. (a) Ngaˬ hui dawˇ haˍ leh awˬ gʼaˇ nuˇ htaˇ, aˬ htoꞈ ma htaꞈ shaˍ tiꞈ te cawˇ ve le? (b) Hpiˇliˇpiˆ liꞈ 4:8 hkʼaw ngaˬ hui pyawˍ ve leh gʼaˇ jehˇ htaˇ te ve awˬ ceuˬ htaꞈ leuˆ tuˬ hkʼaˬ hkʼe ga laˇ ve le?

¹¹ Ngaˬ hui dawˇ haˍ leh awˬ gʼaˇ nuˇ htaˇ, chi ve htaꞈ leunˇ tuˬ teˇ ceuˬ ceuˬ te gaˇ ve yoˬ. Chi lehˬ awˬ tehˬ hpehꞈ ve yoˬ. Yaꞈ hkʼaˇ, ngaˬ hui Yaˬhoˉvaˬ maˇ dawˇ cawˇ ve awˬ ceuˬ htaꞈ maˇ te tuˬ shaˍ tiꞈ gʼa te ve yoˬ.—Eˇfeˇsuꞈ 5:10-12, 15-17.

¹² Tcuh yaˇ Pawˇluꞈ Hpiˇliˇpiˆ Hkriꞈ yaˇ htaꞈ liꞈ bvuhꞈ piˇ htaˇ, yawˇ oˇ kaˬ chehˇ ve awˬ viˉ awˬ nyi htaꞈ ‘cawˇ ve awˬ ceuˬ, daꞈ ve kehˬ ve awˬ ceuˬ, nyi sha ve awˬ ceuˬ, leh daꞈ ve awˬ ceuˬ hkʼa hkʼa peu˗eˬ’ htaꞈ te tuˬ Pawˇluꞈ awˬ gʼaˇ piˇ ve yoˬ. (Hpiˇliˇpiˆ 4:8 gʼaw sheˍ.) Pyawˍ ve awˬ ceuˬ leh, gʼaˇ jehˇ htaˇ te ve awˬ ceuˬ, awˬ lawn chi Pawˇluꞈ yawˇ hui htaꞈ hteˇ˗ehꞈ maˇ bvuhꞈ piˇ ve htawˇ, yawˇ kʼoˆ ve tawˇ hkawˇ lehˬ chi ve teˇ hpaˍ htaꞈ caˉ daꞈ ve yoˬ. Liꞈ hpu chi teˇ tawn hkʼaw Pawˇluꞈ kʼoˆ ve tawˇ hkawˇ htaꞈ nawˬ gʼaw htaˇ, “aˬ htoꞈ ma” kʼoˆ ve awˬ tan, “liꞈ hkawˇ,” “awˬ han,” “liꞈ kʼoˆ,” maˇ heˆ leh “VDO kenˍ” (game) bvuhꞈ nyi sheˍ. Chi hkʼe te htaˇ Gʼuiˬ sha aˬ htoꞈ ma htaꞈ haꞈ yuˬ ve, maˇ haꞈ yuˬ ve, nawˬ shiˍ tuˬ ga laˇ ve yoˬ. Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ a shaꞈ teꞈ kuiˬ hkʼaw gʼaꞈ te gʼa leh dawˇ shiˍ puiˉ ve nyi ma ngaˬ hui htaꞈ shoꞈ shaꞈ tuˬ maˇ te laˇ˗o. (Chiˇ mvuh ve 119:1-3) Ngaˬ hui chi hkʼe te htaˇ, awˬ tehˬ ha lehˬ ve cawˬ tuˬ ga laˇ gʼa leh awˬ nu ve awˬ ceuˬ teˇ hpaˍ htaꞈ kʼawꞈ caˉ te kʼai gʼa ve yoˬ.—Tcuh yaˇ 23:1.

13. Ngaˬ hui awˬ tehˬ ha lehˬ ve cawˬ gʼa tuˬ te cawˇ ve 3 hkʼaˇ teˇ hkʼaˇ lehˬ aˬ htoꞈ ma le? (Yoˇhanˬ 4:23, 24)

¹³ 3 hkʼaˇ teˇ hkʼaˇ lehˬ, nawˬ a shaꞈ teꞈ kuiˬ hkʼaw Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ tehꞈ gʼa shawˍ ve. Yaˬhoˉvaˬ lehˬ ngaˬ hui htaꞈ hpanˍ shehˍ hpaˇ hpehꞈ leh yawˇ htaꞈ ceh tiˉ oˉ kʼoˍ pui cawˇ ve yoˬ. (Hpeuꞈ maˍ ve 4:11; 14:6, 7) Hkʼe te leh, ngaˬ hui a shaꞈ teꞈ kuiˬ hkʼaw a yeˇ uiˍ jaˇ ve lehˬ, Gʼuiˬ sha htaꞈ oˉ kʼoˍ pui ve yawˇ haꞈ yuˬ laˇ tuˬ gʼa te ve yoˬ. Chi kʼoˆ gaˇ ve lehˬ, “yawˇ htaꞈ oˉ kʼoˍ pui ve chaw hui lehˬ, nyi ma awˬ hkʼaw leh hteˇ ve cawˇ ve awˬ hkʼaw lo oˉ kʼoˍ gʼa pui ve yoˬ.” (Yoˇhanˬ 4:23, 24 gʼaw sheˍ.) Ngaˬ hui oˉ kʼoˉ pui ve htaꞈ daꞈ kehˬ ve awˬ ha hpu beˆ maˍ laˇ tcuh ve kʼo, Liꞈ hpu hkʼaw kʼoˆ taˍ ve hkʼe Gʼuiˬ sha htaꞈ oˉ kʼoˍ pui gʼa tuˬ yoˬ. Ngaˬ hui chehˇ taˍ ve mvuhˇ miˬ hkʼaw Gʼuiˬ sha ve kanˉ te ve htaꞈ tawˍ laˇ leh hkʼa dehꞈ maˇ gʼa te ve htawˇ, ngaˬ hui Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ tehꞈ gʼa shawˍ ve yoˬ. Chi teˇ hkui awˬ viˉ awˬ nyi Yaˬhoˉvaˬ ve Shaˉhkiˆhkanˍ ve chaw hpehꞈ ve pa taw, 100 gʼaˇ hpaˆ htawnˍ hkʼaw gʼa chehˇ ve yoˬ. * Chi hkʼe hpehꞈ ve htawˇ yawˇ hui bon lawˬ gʼa ve, a shu yawˇ hkʼaˇ yawˇ Liꞈ hpu henˇ gʼa ve, Yaˬhoˉvaˬ leh yawˇ ve mvuhˇ miˬ awˬ lawn shu htaꞈ kʼoˆ maˍ piˇ ve pa taw, yawˇ hui ha lehˬ gʼa ve yoˬ. Shu ngaˬ hui htaꞈ deˇ laˇ ve maˇ heˆ leh fawˉ mehˍ laˇ htaˇ, Yaˬhoˉvaˬ ngaˬ hui geh chehˇ ve tehꞈ shiˍ ve pa taw ha lehˬ gʼa ve yoˬ. Yawˇ ngaˬ hui htaꞈ awˬ bon naꞈ laˇ leh laꞈ shawnˍ peꞈ laˇ tuˬ yoˬ.—Yaˍkoˆ 1:12; 1 Peˍtruˆ 4:14.

14. Taˬjiˆkiˬsaˍtanˍ mvuhˇ miˬ lo awˬ viˉ awˬ nyi yaˇ nehˬ teˇ gʼaˇ aˬ htoꞈ ma htaꞈ gʼa hpuˇ ve le? Leh aˬ htoꞈ ma pa taw le?

¹⁴ Ngaˬ hui a shaꞈ teꞈ kuiˬ hkʼaw hkʼaˬ hkʼe ve gʼa hpuˇ ve htawˇ, awˬ tehˬ ha lehˬ ve cawˬ tuˬ ga laˇ gʼa ve 3 hkʼaˇ htaꞈ gʼa henˇ kʼai peuˬ ve hkʼe, awˬ viˉ awˬ nyi ve awˬ lawn hpehꞈ laˬ jaw ve ngaˬ hui yonˍ gʼa tuˬ te laˇ ve yoˬ. Taˬjiˆkiˬsaˍtanˍ mvuhˇ miˬ lo maꞈ yaˇ maˇ te ve awˬ viˉ awˬ nyi Co˗vi˗don Bo˗bo˗nawˆ 19 hkʼawꞈ ve awˬ lawn htaꞈ teˇ geh nyi sheˍ. Ha pa 10 maˬ 4 nyi 2019 hkʼawꞈ htaˇ, yawˇ htaꞈ maꞈ yaˇ ca hpeh la leh laiˉ ha pa haw tiˍ piˇ ve yoˬ. Yawˇ hui Co˗vi˗don htaꞈ chaw haiˬ hkʼa shuˍ te piˇ ve yoˬ. Yawˇ maꞈ yaˇ te tuˬ leh maꞈ yaˇ ve aˉ poꞈ veuꞈ kʼaˇ veuꞈ tuˬ hkanˍ tcuh leh dawˆ piˇ ve awˬ lawn  htaꞈ caˉ daꞈ ve laiˉ mvuhˇ miˬ lo (TV) awˬ han hkʼaw tawˆ tcuh ve yoˬ. Peuˬ leh yawˇ htaꞈ yaꞈ ve tehꞈ suhˉ jehˬ cheˆ piˇ leh kanˉ te hkeuꞈ jaˇ kuiˬ lo shiˍ kʼai ve yoˬ. Yaꞈ hkʼaˇ, Taˬjiˆkiˬsaˍtanˍ mvuhˇ miˬ lo ve jawˇ mawˇ yawˇ htaꞈ htawnˍ hkʼaw lo hpehˇ piˇ tcuh ve yoˬ. Co˗vi˗don awˬ lawn chi ve hkʼa peu˗eˬ htaꞈ gʼa hpuˇ ve awˬ yanˇ htaˇ, yawˇ ka tiꞈ yeˬ leh hkʼaˬ htaˆ kaꞈ ha lehˬ chehˇ ve yoˬ. Yawˇ chi hkʼe te gʼa tuˬ aˬ htoꞈ ma ga piˇ ve le? Yawˇ Gʼuiˬ sha htaꞈ gʼaˇ gʼa va ve tehꞈ shiˍ ve yoˬ.

15. Co˗vi˗don htawnˍ hkʼaw lo chehˇ htaˇ, yawˇ Liꞈ hpu gʼaw leh a shu yawˇ hkʼaˇ yawˇ Liꞈ hpu hkʼaˬ hkʼe te henˇ ve le?

¹⁵ Co˗vi˗don htawnˍ hkʼaw lo chehˇ htaˇ yawˇ Liꞈ hpu gʼaw leh a shu yawˇ hkʼaˇ yawˇ Liꞈ hpu henˇ ve yoˬ. Yaꞈ hkʼaˇ, yawˇ Liꞈ hpu leh Gʼuiˬ sha ve kanˉ hkʼaˇ hkʼaw ve liꞈ maˇ cawˬ ve pa taw, yawˇ hkʼaˬ hkʼe te Liꞈ hpu henˇ gʼa ve le? Awˬ viˉ awˬ nyi laiˉ gʼaˇ yawˇ htaꞈ caˇ tuˬ feu piˇ leh teˇ nyi le le Liꞈ hpu gʼaw tuˬ caˇ tuˬ hkʼaw bvuhꞈ keu taˍ piˇ ve pa taw, yawˇ Liꞈ hpu gʼaw leh teˇ nyi le le hkʼa dehꞈ dawˇ nyi gʼa ve yoˬ. Yawˇ htaꞈ hpehˇ piˇ peuˬ hkʼawꞈ nawˉ yawˇ kʼoˆ ve, “awˬ viˉ awˬ nyi beˬ ve lawˇ ve hehnˇ jaˇ ve maˇ gʼa hpuˇ jaw ve chaw lehˬ, chi teˇ hkui kaꞈ nawˬ te gʼa ve hkʼe Yaˬhoˉvaˬ htaꞈ hkʼa dehꞈ shiˍ daꞈ tuˬ leh, Liꞈ hpu leh yawˇ ve kanˉ hkʼaˇ hkʼaw ve liꞈ gʼaw ve lehˬ a yeˇ uiˍ jaˇ.”

16. Co˗vi˗don aˬ htoꞈ ma htaꞈ dawˇ nyi leh a yeˇ yuˬ ve le?

¹⁶ Co˗vi˗don Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve yoˬ. Yawˇ htawnˍ hkʼaw lo chehˇ htaˇ yawˇ maˇ daꞈ ve awˬ ceuˬ htaꞈ maˇ dawˇ leh maˇ daꞈ ve awˬ  ceuˬ htaꞈ kaꞈ maˇ te. Yaꞈ hkʼaˇ, yawˇ Yaˬhoˉvaˬ htaꞈ caˉ daꞈ ve awˬ ceuˬ dawˇ nyi leh Yaˬhoˉvaˬ htaꞈ a yeˇ uiˍ jaˇ tehꞈ shawˍ ve yoˬ. Yawˇ Yaˬhoˉvaˬ hpanˍ taˍ ve awˬ ceuˬ htaꞈ dawˇ nyi ve, teˇ shawˉ le le yawˇ tu la leh ngaˆ kuˬ ve hkawˇ htaꞈ na ve, leh mvuhˇ hpeuꞈ kʼo ha pa leh meuꞈ keu shiˍ htaꞈ nyi ve dawˇ cawˇ ve yoˬ. Co˗vi˗don kʼoˆ ve, “Yaˬhoˉvaˬ hpanˍ taˍ ve awˬ ceuˬ lehˬ ngaˬ ha lehˬ tuˬ leh awˬ gʼaˇ gʼa tuˬ te laˇ ve yoˬ.” Chi ve hkʼa shuˍ shuˍ, Yaˬhoˉvaˬ ngaˬ hui htaꞈ peꞈ laˇ ve awˬ ceuˬ leh Liꞈ hpu hkʼaw beˆ maˍ laˇ ve awˬ ceuˬ htaꞈ awˬ hpfuhˇ shiˍ ve kʼo, ngaˬ hui ha lehˬ jaˇ tuˬ yoˬ. Leh ngaˬ hui nyi ma hkʼaw ha lehˬ ve kʼo, yeunˇ hkanˍ gʼaˇ tuˬ yoˬ.

17. Ngaˬ hui Co˗vi˗don hkʼa shuˍ gʼa hpuˇ ve kʼo, 1 Peˍtruˆ liꞈ 1:6, 7 hkʼaw ngaˬ hui awˬ pon awˬ tehˬ hkʼaˬ hkʼe hpehꞈ la tuˬ le?

¹⁷ Co˗vi˗don a shaꞈ teꞈ kuiˬ hkʼaw Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ tehꞈ shawˍ ve yoˬ. Yawˇ Gʼuiˬ sha htaꞈ ka tiꞈ yeˬ ve a yeˇ uiˍ jaˇ tehꞈ yawˇ shiˍ ve yoˬ. Yeˍsuˆ kʼoˆ ve, “nawˬ ve Jawˇ mawˇ Gʼuiˬ sha htaꞈ nawˬ oˉ kʼoˍ gʼa pui leh, yawˇ ve kanˉ htaꞈ ceh tiˉ nawˬ gʼa te ve yoˬ.” (Luˉkaꞈ 4:8) Maꞈ yaˇ leh maꞈ yaˇ awˬ hoˉ Co˗vi˗don Shaˉhkiˆ hkanˍ ve chaw maˇ gʼa hpehꞈ tuˬ nyiˉ piˇ ve yoˬ. Awˬ gʼaˇ maˇ nuˇ leh yonˍ ve htaꞈ haꞈ shaˉ gʼa tuˬ, yawˇ tanˇ hkuinˇ tanˇ vaˇ hawˬ leh Yaˬhoˉvaˬ geh bon lawˬ ve yoˬ. Yawˇ beˬ ve lawˇ ve gʼa hpuˇ jaˇ ve htawˇ, yawˇ caˉ leh ka tiꞈ yeˬ chehˇ sheˍ ve yoˬ. Yawˇ htaꞈ shu yuˬ gʼa peuˬ hkʼawꞈ nawˉ dawˆ piˇ ve, htawnˍ hkʼaw yuˬ keu piˇ ve htawˇ, ha lehˬ ve cawˬ gʼa sheˍ ve yoˬ. Chi ve teˇ hpaˍ htaꞈ yawˇ yeunˇ hkanˍ gʼaˇ˗oˬ ve pa taw, yawˇ ve yonˍ hkʼaˇ yonˍ yeˬ gʼa ve yoˬ.—1 Peˍtruˆ 1:6, 7 gʼaw sheˍ.

18. Ngaˬ hui ha lehˬ ve caˉ leh hkʼaˬ hkʼe te kʼawꞈ cawˬ gʼa tuˬ le?

¹⁸ Ngaˬ hui awˬ tehˬ ha lehˬ gʼa tuˬ aˬ htoꞈ ma gʼa te cawˇ ve Yaˬhoˉvaˬ shiˍ ve yoˬ. Awˬ lawn chi ve hkʼaw gʼa henˇ˗oˬ ve 3 hkʼaˇ htaꞈ nawˬ gʼaꞈ te ve kʼo, nawˬ shoꞈ shaꞈ ve laiˉ ceuˬ gʼa hpuˇ ve htawˇ, nawˬ kaꞈ awˬ tehˬ ha lehˬ gʼa ve yoˬ. Leh nawˬ kaꞈ Chiˇ mvuhˇ ve liꞈ bvuhꞈ paˍ kʼoˆ ve hkʼe, “Gʼuiˬ sha htaꞈ oˉ kʼoˍ pui ve chaw hui gʼa ha lehˬ ve yoˬ” tehꞈ nawˬ kaꞈ kʼoˆ gʼa ve yoˬ.—Chiˇ mvuh ve 144:15.