1. Yaˬhoˉvaˬ ngaˬ hui htaꞈ aˬ htoꞈ ma dawˇ law kuiˬ cawˬ tcuh laˇ ve le?

 Yaˬhoˉvaˬ lehˬ ngaˬ hui htaꞈ co co taiˍ taiˍ a shaꞈ teꞈ chehˇ gʼa tuˬ dawˇ law kuiˬ peꞈ laˇ ve yoˬ. Chaw teˇ hpaˍ kʼo, mvuhˇ naw ma hkʼoˆ co co taiˍ taiˍ chehˇ tuˬ leh yawˇ hui maˇ suh puiˉ ve dawˇ law kuiˬ cawˬ ve yoˬ. (1 Kawˇrenˍhtuˆ 15:50, 53) Yaꞈ hkʼaˇ, maˇ˗awˍ ve chaw miˬ guiˬ hkʼoˆ lo co co taiˍ taiˍ chehˇ tuˬ dawˇ law kuiˬ cawˬ ve yoˬ. Ngaˬ hui naˬ ve gawˬ ve maˇ cawˬ leh ha lehˬ jaˇ tuˬ yoˬ. (Hpeuꞈ maˍ ve 21:3, 4) Ngaˬ hui mvuhˇ naw ma hkʼoˆ maˇ heˆ leh miˬ guiˬ hkʼoˆ dawˇ law kuiˬ cawˬ ve htawˇ maˇ kʼoˆ, dawˇ law kuiˬ chi lehˬ ngaˬ hui awˬ pon daꞈ jaˇ ve awˬ ceuˬ hpehꞈ ve yoˬ.

2. Ngaˬ hui ve dawˇ law kuiˬ lehˬ aˬ htoꞈ ma htaꞈ cuˇ ve le? Leh aˬ htoꞈ ma te ngaˬ hui chi hkʼe kʼoˆ gʼa ve le?

² “Dawˇ law kuiˬ” htaꞈ kʼoˆ htaˇ Liꞈ hpu hkʼaw kʼoˆ taˍ ve, ‘dawˇ law taˍ ve daꞈ ve awˬ ceuˬ biˇ la tuˬ’ ve htaꞈ kʼoˆ gaˇ ve yoˬ. Awˬ gʼuˇ suhˍ hpawˇ ve dawˇ law kuiˬ chi Yaˬhoˉvaˬ geh laˬ ve pa taw, ngaˬ hui yonˍ gʼa ve yoˬ. (Roˉmaꞈ 15:13) Yaˬhoˉvaˬ aˬ htoꞈ ma ka tiꞈ te taˍ laˇ ve htaꞈ ngaˬ hui shiˍ ve yoˬ. Leh yawˇ ka tiꞈ te taˍ laˇ ve awˬ tehˬ hpehꞈ la tuˬ yoˬ. (Heh puiˉ hkʼaw 23:19) Yaˬhoˉvaˬ ka tiꞈ te taˍ ve awˬ ceuˬ awˬ tehˬ hpehꞈ la tuˬ yoˬ tehꞈ ngaˬ hui yonˍ gʼa leh yawˇ chi hkʼe te gʼa tuˬ kanˇ paˆ cawˬ ve yoˬ. Chi htaꞈ pa taw, ngaˬ hui ve dawˇ law kuiˬ lehˬ zuhꞈ maˆ maˇ heˆ leh, ngaˬ hui hpehꞈ tcuh gaˇ ve awˬ ceuˬ hkʼe ceh hpehꞈ ve maˇ heˆ. Yaꞈ hkʼaˇ, ngaˬ hui ve dawˇ law kuiˬ lehˬ shaˉ hkiˆ cawˬ leh awˬ tehˬ awˬ na hpehꞈ la tuˬ yoˬ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le? (Chiˇ mvuh ve 71:5)

³ Mvuhˇ naw ma hkʼoˆ chehˇ ve Awˬ pa Yaˬhoˉvaˬ ngaˬ hui htaꞈ haꞈ jaˇ leh ngaˬ hui yawˇ htaꞈ gʼaˇ va tcuh gaˇ ve yoˬ. (Chiˇ mvuh ve 71:5 gʼaw sheˍ.) Ngaˬ hui Yaˬhoˉvaˬ htaꞈ gʼaˇ va htaˇ, ngaˬ hui ve dawˇ law kuiˬ hkʼa tawˍ lehˆ mawˬ tuˬ te laˇ ve yoˬ. Awˬ gʼuˇ suhˍ hpawˇ ngaˬ hui tuꞈ ve hkanˍ ve gʼa hpuˇ htaˇ, yeunˇ hkanˍ gʼaˇ ve, haꞈ hanˉ ve cawˬ ve, leh ha lehˬ ve cawˬ tuˬ te laˇ ve yoˬ. Dawˇ law kuiˬ lehˬ ngaˬ hui htaꞈ hkʼaˬ hkʼe te leh haꞈ shaˉ laˇ gʼa ve, teˇ geh henˇ tuˬ yoˬ. Yaꞈ hkʼaˇ, ngaˬ hui ve dawˇ law kuiˬ lehˬ, heuˇ shan hpawˇ ve sho kʼuˉ kʼawehꞈ leh sho uˉ tcuhˍ htaꞈ hkʼaˬ hkʼe te shuˍ ve le, awˉ lawˉ teˇ geh henˇ tuˬ yoˬ. Leh ngaˬ hui ve dawˇ law kuiˬ htaꞈ hkʼa tawˍ lehˆ hkʼaˬ hkʼe te mawˬ gʼa tuˬ le, chi ve kaꞈ teˇ geh henˇ tuˬ yoˬ.

4. Dawˇ law kuiˬ lehˬ hkʼaˬ hkʼe te heuˇ shan hpawˇ ve sho kʼuˉ kʼawehꞈ htaꞈ shuˍ ve le? (Heˍbrehˇ 6:19)

⁴ Pawˇluꞈ Heˍbrehˇ chaw awˬ viˉ awˬ nyi htaꞈ liꞈ bvuhꞈ piˇ htaˇ, dawˇ law kuiˬ lehˬ heuˇ shan hpawˇ ve sho kʼuˉ kʼawehꞈ htaꞈ tehˆ maˍ piˇ ve yoˬ. (Heˍbrehˇ 6:19 gʼaw sheˍ.) Pawˇluꞈ lehˬ laˇ tsuhˇ gʼuiˬ lo laiˉ pawˆ te toˇ ve pa taw, heuˇ shan hpawˇ maˇ gʼa jiˆ kʼai tuˬ sho kʼuˉ kʼawehꞈ ga piˇ gʼa ve tehꞈ yawˇ shiˍ ve yoˬ. Teˇ pawˆ htaˇ, Pawˇluꞈ heuˇ shan hpawˇ ciˇ kʼai leh mvuhˇ yeˬ mvuhˇ haw lonˉ htaꞈ gʼa hpuˇ ve yoˬ. Hkʼe te leh, heuˇ shan hpawˇ haˉ pui htaꞈ maˇ gʼa htinˍ tuˬ, oˇ kaˬ lo kanˉ te ve chaw awˬ mehˍ hpawˇ lo ve sho kʼuˉ kʼawehꞈ teˇ hpaˍ laˇ tsuhˇ gʼuiˬ hkʼaw hpehˇ peu ve htaꞈ Pawˇluꞈ gʼa mawˬ ve yoˬ. (Tcuh yaˇ 27:29, 39-41) Heuˇ shan hpawˇ awˬ nu ve teˇ kaˬ lo maˇ gʼa jiˆ tawˆ˗e tuˬ sho kʼuˉ kʼawehꞈ ga piˇ ve hkʼe, ngaˬ hui shoꞈ shaꞈ ve mvuhˇ yeˬ mvuhˇ haw lonˉ hkʼa shuˍ gʼa hpuˇ htaˇ, dawˇ law kuiˬ chi lehˬ ngaˬ hui Yaˬhoˉvaˬ geh meuˆ daꞈ tuˬ ga laˇ ve yoˬ. Ngaˬ hui shoꞈ shaꞈ ve gʼa hpuˇ htaˇ, maˇ maw kʼo teˇ ceuˬ le le daꞈ la tuˬ yoˬ tehꞈ hkʼa dehꞈ yonˍ gʼa ve pa taw, dawˇ law kuiˬ yeˬ ve lehˬ, ngaˬ hui nyi ma gawˬ lehˍ cawˬ tuˬ te laˇ ve yoˬ. Ngaˬ hui shu fawˉ mehˍ laˇ ve htaꞈ gʼa hpuˇ tuˬ yoˬ tehꞈ Yeˍsuˆ shaˍ tiꞈ peꞈ laˇ˗oˬ ve htaꞈ tawnˇ taˍ cawˇ ve yoˬ. (Yoˇhanˬ 15:20) Hkʼe te leh, Yaˬhoˉvaˬ laꞈ shawnˍ peꞈ laˇ tuˬ yoˬ tehꞈ ka tiꞈ te taˍ laˇ ve htaꞈ dawˇ nyi ve lehˬ, ngaˬ hui Hkriꞈ yaˇ ve a shaꞈ teꞈ hkʼaˇ caˉ leh yeˬ chehˇ tuˬ te laˇ ve yoˬ.

5. Yeˍsuˆ gʼa suh tuˬ yoˬ tehꞈ shiˍ ve htawˇ dawˇ law kuiˬ yawˇ htaꞈ hkʼaˬ hkʼe ga piˇ ve le?

⁵ Yeˍsuˆ gʼa suh tuˬ shiˍ ve htawˇ dawˇ law kuiˬ lehˬ, yawˇ yonˍ yeˬ tuˬ leh ka tiꞈ yeˬ tuˬ hkʼaˬ hkʼe ga piˇ ve htaꞈ dawˇ nyi sheˍ. Peˍteˍkoˆteˍ C.E. 33 hkʼawꞈ htaˇ, Yeˍsuˆ yonˍ gʼa ve leh yonˍ yeˬ ve htaꞈ Chiˇ mvuh ve liꞈ hkʼaw tcuh kaˍ paˍ ve tawˇ hkawˇ htaꞈ Peˍtruˆ kʼoˆ ve yoˬ. Oˇ kaˬ lo kʼoˆ ve, “ngaˬ ve awˬ to dawˇ law ve awˬ hkʼaw lo chehˇ tuˬ yoˬ. Awˬ lawn kʼo, nawˬ lehˬ ngaˬ ve co ha htaꞈ suh mvuhˇ miˬ lo baˬ taˉ tuˬ ve maˇ heˆ. Nawˬ ve daꞈ kehˬ ve chaw teˇ gʼaˇ htaꞈ kuiˇ kʼai luˬ kʼai tuˬ nawˬ maˇ hpehꞈ piˇ. Co ha teꞈ ve yaꞈ kʼaw nawˬ ngaˬ htaꞈ maˍ laˇ peuˬ. Nawˬ ve mehˆ hpfuhˇ htaꞈ gʼa mawˬ ve pa taw, ngaˬ ha lehˬ ve biˇ la tuˬ nawˬ te laˇ tuˬ yoˬ.” (Tcuh yaˇ 2:25-28; Chiˇ mvuh ve 16:8-11) Yeˍsuˆ yawˇ gʼa suh tuˬ yoˬ tehꞈ shiˍ ve htawˇ, Gʼuiˬ sha yawˇ htaꞈ suh kuiˬ lo kʼawꞈ teꞈ tu la tcuh laˇ tuˬ ve dawˇ law kuiˬ htaꞈ yawˇ hkʼa dehꞈ yonˍ ve yoˬ. Mvuhˇ naw ma hkʼoˆ yawˇ ve Awˬ pa geh teˇ pawˆ gʼa kʼawꞈ chehˇ leh ha lehˬ ve cawˬ gʼa tuˬ yoˬ.—Heˍbrehˇ 12:2, 3.

6. Awˬ viˉ awˬ nyi teˇ gʼaˇ dawˇ law kuiˬ htaꞈ hkʼaˬ hkʼe kʼoˆ ve le?

⁶ Liꞈ hpu hkʼaw ve dawˇ law kuiˬ awˬ viˉ awˬ nyi laiˉ gʼaˇ htaꞈ yeunˇ hkanˍ gʼaˇ tuˬ ga piˇ ve yoˬ. Eˍgaˍlanˍ mvuhˇ miˬ lo chehˇ ve awˬ viˉ awˬ nyi Le˗nan Chin ka tiꞈ yeˬ ve awˬ lawn htaꞈ dawˇ nyi sheˍ. Maꞈ lonˉ awˉ lawˉ teˇ pawˆ hpehꞈ htaˇ, yawˇ maꞈ yaˇ maˇ te ve pa taw, htawnˍ hkʼaw lo yuˬ keu piˇ ve yoˬ. Yawˇ teˇ gʼaˇ tiˉ 2 ha pa haw piˇ peuˬ hkʼawꞈ nawˉ, kanˉ hkeuꞈ ve htaꞈ nyiˉ te tcuh ve yoˬ. Peuˬ leh yawˇ kʼoˆ ve, “ngaˬ gʼa hpuˇ ve awˬ ceuˬ dawˇ law kuiˬ a yeˇ hkʼaˬ hkʼe taw uiˍ ve htaꞈ mawˬ tuˬ te laˇ ve yoˬ. Chi ngaˬ yeunˇ hkanˍ gʼaˇ tuˬ ga laˇ gʼa jaˇ. Leh ngaˬ hui henˇ yuˬ gʼa ve lehˬ Yeˍsuˆ, tcuh yaˇ hui, tcuh kaˍ paˍ hui, leh Liꞈ hpu hkʼaw Gʼuiˬ sha ka tiꞈ te taˍ laˇ ve cawˬ maˇ jaˇ ve yoˬ. Chi ve hkʼa peu˗eˬ lehˬ ngaˬ hui awˬ gʼuˇ suhˍ hpawˇ ve dawˇ law kuiˬ htaꞈ hkʼa tawˍ lehˆ mawˬ leh ngaˬ hui yeunˇ hkanˍ gʼaˇ tuˬ kaꞈ ga laˇ ve yoˬ.” Dawˇ law kuiˬ chi lehˬ Le˗nan awˬ pon heuˇ shan hpawˇ ve sho kʼuˉ kʼawehꞈ hkʼe hpehꞈ ve htaꞈ ngaˬ hui gʼa mawˬ ve yoˬ. Leh ngaˬ hui awˬ pon kaꞈ hpehꞈ ve yoˬ.

7. Tuꞈ ve hkanˍ ve ngaˬ hui ve dawˇ law kuiˬ hkʼa tawˍ lehˆ mawˬ tuˬ hkʼaˬ hkʼe te laˇ ve le? (Roˉmaꞈ 5:3-5; Yaˍkoˆ 1:12)

⁷ Ngaˬ hui tuꞈ ve hkanˍ ve htaꞈ gʼa yeunˇ hkanˍ htaˇ, Yaˬhoˉvaˬ ga laˇ ve tehꞈ gʼa mawˬ ve yoˬ. Gʼuiˬ sha ngaˬ hui htaꞈ nyi hkʼaˇ suh ve tehꞈ shiˍ leh chi ve lehˬ ngaˬ hui ve dawˇ law kuiˬ htaꞈ hkʼa tawˍ lehˆ mawˬ tuˬ te laˇ ve yoˬ. (Roˉmaꞈ 5:3-5; Yaˍkoˆ 1:12 gʼaw sheˍ.) Chi teˇ hkui ngaˬ hui ve dawˇ law kuiˬ lehˬ awˉ lawˉ htaˇ ngaˬ hui daꞈ ve awˬ lawn sha tanˇ gʼa kaˇ htaˇ aꞈ kehˉ hkʼa tawˍ lehˆ mawˬ ve yoˬ. Saˍtanˍ lehˬ, ngaˬ hui shoꞈ shaꞈ ve leh tuꞈ ve hkanˍ ve gʼa hpuˇ htaˇ, awˬ gʼaˇ nuˇ tuˬ te laˇ ve yoˬ. Yaꞈ hkʼaˇ, ngaˬ hui teˇ ceuˬ le le htaꞈ yeunˇ hkanˍ gʼaˇ tuˬ Yaˬhoˉvaˬ ga laˇ gʼa ve yoˬ.

8. Dawˇ law kuiˬ lehˬ hkʼaˬ hkʼe te sho uˉ tcuhˍ htaꞈ shuˍ ve le? (1 Hteˇsaˍlawˇniˆ 5:8)

⁸ Liꞈ hpu ve hkʼaw dawˇ law kuiˬ lehˬ sho uˉ tcuhˍ htaꞈ tehˆ maˍ laˇ ve yoˬ. (1 Hteˇsaˍlawˇniˆ 5:8 gʼaw  sheˍ.) Maꞈ yaˇ canˇ paˍ htaꞈ bawˆ daꞈ htaˇ, yawˇ ve oˉ kʼoˍ htaꞈ haꞈ shaˉ tuˬ sho uˉ tcuhˍ hkʼawˆ taˍ ve yoˬ. Ngaˬ hui kaꞈ Saˍtanˍ htaꞈ bawˆ daꞈ chehˇ ve yoˬ. Saˍtanˍ ngaˬ hui ve dawˇ hkʼaˇ htaꞈ maˇ gʼa heˍ laˇ tuˬ gʼa tawˍ daꞈ ve yoˬ. Saˍtanˍ ngaˬ hui htaꞈ beˬ yuˬ tuˬ maˇ jehˇ leh ngaˬ hui maˇ daꞈ ve dawˇ hkʼaˇ cawˬ tuˬ yawˇ gʼaˇ hteꞈ te laˇ chehˇ ve yoˬ. Maꞈ yaˇ yawˇ ve oˉ kʼoˍ htaꞈ haꞈ shaˉ tuˬ sho uˉ tcuhˍ hkʼawˆ ve hkʼe, ngaˬ hui Yaˬhoˉvaˬ geh ka tiꞈ yeˬ gʼa tuˬ dawˇ law kuiˬ lehˬ ngaˬ hui ve dawˇ hkʼaˇ htaꞈ haꞈ shaˉ laˇ gʼa ve yoˬ.

9. Dawˇ law kuiˬ maˇ cawˬ ve chaw ve a shaꞈ teꞈ hkʼaˇ hkʼaˬ hkʼe hpehꞈ ve le?

⁹ Co co taiˍ taiˍ ve dawˇ law kuiˬ lehˬ cuˇ yiˍ cawˬ ve hkʼaw daꞈ ve awˬ ceuˬ htaꞈ te tuˬ leh cawˇ ve htaꞈ dawˇ cheˆ gʼa tuˬ ga laˇ ve yoˬ. Yaꞈ hkʼaˇ, ngaˬ hui ve dawˇ law kuiˬ hkʼa tawˍ lehˆ maˇ mawˬ ve kʼo, ngaˬ hui a shu yawˇ awˬ pon tiˉ dawˇ nyi leh co co taiˍ taiˍ a shaꞈ gʼa tuˬ dawˇ law kuiˬ htaꞈ leunˇ kʼai la ve yoˬ. Kawˇrenˍhtuˆ venˇ hkʼaw Hkriꞈ yaˇ teˇ hpaˍ hpaˍ ve awˬ lawn htaꞈ dawˇ nyi sheˍ. Kʼawꞈ teꞈ tu la ve dawˇ law kuiˬ lehˬ Gʼuiˬ sha ka tiꞈ te taˍ laˇ ve a yeˇ uiˍ jaˇ ve awˬ ceuˬ hpehꞈ ve htawˇ yawˇ hui maˇ yonˍ. (1 Kawˇrenˍhtuˆ 15:12) Pawˇluꞈ kʼoˆ ve chaw oˇ teˇ hpaˍ lehˬ awˬ gʼuˇ suhˍ hpawˇ ve dawˇ law kuiˬ maˇ cawˬ leh chi teˇ hkui ha lehˬ tuˬ ve awˬ ceuˬ htaꞈ ceh te chehˇ ve yoˬ. (1 Kawˇrenˍhtuˆ 15:32) Chi beuꞈ teˇ co˗e ve chaw laiˉ gʼaˇ kaꞈ Gʼuiˬ sha ka tiꞈ te taˍ laˇ ve htaꞈ caˉ daꞈ ve dawˇ law kuiˬ maˇ cawˬ. Yawˇ hui teˇ nyi awˬ pon teˇ nyi ha lehˬ tuˬ ceh dawˇ nyi leh, a shu yawˇ ha lehˬ tuˬ ceh tiˉ te ve yoˬ. Yaꞈ hkʼaˇ, ngaˬ hui yawˇ hui htaꞈ maˇ shuˍ. Awˬ gʼuˇ suhˍ hpawˇ Gʼuiˬ sha ka tiꞈ te taˍ laˇ ve htaꞈ ngaˬ hui hkʼa dehꞈ yonˍ gʼa ve yoˬ. Ngaˬ hui ve dawˇ law kuiˬ lehˬ sho uˉ tcuhˍ hkʼe hpehꞈ leh ngaˬ hui maˇ daꞈ ve dawˇ hkʼaˇ maˇ gʼa dawˇ tuˬ haꞈ shaˉ laˇ ve yoˬ. Ngaˬ hui a shu yawˇ awˬ pon tiˉ maˇ gʼa dawˇ nyi leh Yaˬhoˉvaˬ geh meuˆ daꞈ ve htaꞈ maˇ gʼa te luˬ laˇ tuˬ gʼa leuˆ yuˬ ve yoˬ.—1 Kawˇrenˍhtuˆ 15:33, 34.

10. Dawˇ law kuiˬ lehˬ ngaˬ hui maˇ daꞈ ve dawˇ hkʼaˇ maˇ gʼa cawˬ tuˬ hkʼaˬ hkʼe haꞈ shaˉ laˇ gʼa ve le?

¹⁰ Ngaˬ hui ve dawˇ law kuiˬ lehˬ, sho uˉ tcuhˍ hkʼe hpehꞈ leh ngaˬ hui Yaˬhoˉvaˬ htaꞈ nyi hkʼaˇ suh tuˬ te piˇ maˇ gʼa taˍ tehꞈ, maˇ gʼa dawˇ tuˬ ve dawˇ hkʼaˇ htaꞈ haꞈ shaˉ laˇ gʼa ve yoˬ. Tawˇ pa haˉ te kʼo, chaw teˇ hpaˍ kʼoˆ ve, ‘ngaˬ co co taiˍ taiˍ a shaꞈ gʼa tuˬ hpehꞈ kʼai maˇ gʼa taˬ. Awˬ lawn kʼo, ngaˬ maˇ daꞈ ve chaw hpehꞈ ve yoˬ. Ngaˬ Gʼuiˬ sha ve awˬ liˇ awˬ hkʼaˇ htaꞈ gʼaꞈ te maˇ gʼa taˬ.’ Yawˇbaˆ ve awˬ chawˇ Eˇliˇhpaˆ htaꞈ dawˇ nyi sheˍ. Yawˇ Yawˇbaˆ htaꞈ tawˇ chi hkʼe yaw piˇ ve yoˬ. Yawˇ kʼoˆ ve, “chaw yaˇ lehˬ, awˬ tehˬ awˬ na daꞈ kehˬ hpehꞈ˗aw laˇ?” Eˇliˇhpaˆ lehˬ Gʼuiˬ sha htaꞈ kʼoˆ sheˍ ve, “Gʼuiˬ sha lehˬ yawˇ ve mvuhˇ naw ma tcuh yaˇ teˇ hpaˍ htaꞈ kaꞈ maˇ yonˍ. Yawˇ hui kaꞈ yawˇ mehˆ gʼuˇ suhˍ lo daꞈ kehˬ ve maˇ heˆ.” (Yawˇbaˆ 15:14, 15) Chi awˬ tehˬ maˇ heˆ. Chi hkʼe ve dawˇ hkʼaˇ a shu geh laˬ ve le? Tawnˇ gʼa˗aw laˇ? Saˍtanˍ geh maˇ heˆ laˇ? Nawˬ chi hkʼe ve dawˇ hkʼaˇ cawˬ ve kʼo, nawˬ ve dawˇ law kuiˬ htaꞈ hkʼa tawˍ lehˆ maˇ mawˬ gʼa ve tehꞈ Saˍtanˍ shiˍ ve yoˬ. Chi htaꞈ pa taw, Saˍtanˍ heˍ ve tawˇ htaꞈ taˇ na. Yaˬhoˉvaˬ ka tiꞈ te taˍ laˇ ve htaꞈ hkʼaˬ htaˆ kaꞈ dawˇ nawˇ taˍ sheˍ. Yaˬhoˉvaˬ nawˬ htaꞈ co co taiˍ taiˍ a shaꞈ peꞈ laˇ maˇ gʼa ve tehꞈ nawˬ htawˇ dawˇ nawˬ dawˇ taˇ cawˬ tcuh. Nawˬ co co taiˍ taiˍ ve a shaꞈ gʼa htaˇ hkʼa gaˬ yawˇ ga laˇ tuˬ yoˬ.—1 Tiˆmoˉseˍ 2:3, 4.

11. Ngaˬ hui ve dawˇ law kuiˬ gʼa htaˇ hkʼa gaˬ aˬ htoꞈ ma te yeunˇ hkanˍ cawˇ ve le?

¹¹ Ngaˬ hui ve dawˇ law kuiˬ htaꞈ hkʼa tawˍ lehˆ mawˬ leh hkʼa dehꞈ yonˍ gʼa tuˬ maˇ sha. Yaˬhoˉvaˬ ka tiꞈ te taˍ laˇ ve biˇ la tuˬ ngaˬ hui law chehˇ htaˇ, ngaˬ hui maˇ kʼawꞈ yeunˇ hkanˍ gaˇ˗o. Yaꞈ hkʼaˇ, Yaˬhoˉvaˬ lehˬ co co taiˍ taiˍ teꞈ chehˇ ve yoˬ. Gʼuiˬ sha ve dawˇ hkʼaˇ awˬ yanˇ htaꞈ shawˍ ve kʼo, ngaˬ hui htaꞈ peun daꞈ jaˇ. Awˬ yanˇ chi ngaˬ hui awˬ pon kʼo maw jaˇ ve htawˇ, Yaˬhoˉvaˬ awˬ pon kʼo ngeh jaˇ. (2 Peˍtruˆ 3:8, 9) Yaˬhoˉvaˬ ve a loˍ biˇ la tuˬ yawˇ daꞈ jaˇ ve awˬ hkʼaˇ htaꞈ yehˇ tuˬ yoˬ. Yaꞈ hkʼaˇ, Yaˬhoˉvaˬ ve a loˍ ngaˬ hui dawˇ taˍ ve awˬ yanˇ hkʼaw te tuˬ ve maˇ heˆ. Hkʼe kʼo, ngaˬ hui yeunˇ hkanˍ leh law chehˇ htaˇ, ngaˬ hui ve dawˇ law kuiˬ hkʼa tawˍ lehˆ mawˬ gʼa tuˬ aˬ htoꞈ ma ga laˇ gʼa ve le?—Yaˍkoˆ 5:7, 8.

12. Heˍbrehˇ liꞈ 11:1, 6 hkʼaw kʼoˆ taˍ ve hkʼe, dawˇ law kuiˬ leh yonˍ hkʼaˇ hkʼaˬ hkʼe te caˉ daꞈ ve le?

¹² Ngaˬ hui Yaˬhoˉvaˬ geh meuˆ daꞈ ve kʼo, ngaˬ hui ve dawˇ law kuiˬ hkʼa tawˍ lehˆ mawˬ tuˬ te laˇ ve yoˬ. Gʼuiˬ sha teˇ gʼaˇ ceh tiˉ ngaˬ hui ve dawˇ law kuiˬ awˬ tehˬ hpehꞈ tuˬ te laˇ gʼa ve yoˬ. Dawˇ law kuiˬ leh yonˍ  hkʼaˇ hkʼaˬ hkʼe te caˉ daꞈ ve, Liꞈ hpu hkʼaw ngaˬ hui mawˬ gʼa ve yoˬ. Yaˬhoˉvaˬ awˬ tehˬ cawˬ leh “yawˇ htaꞈ ca ve chaw hui htaꞈ awˬ bon naꞈ piˇ” tuˬ yoˬ tehꞈ ngaˬ hui hkʼa dehꞈ yonˍ gʼa ve yoˬ. (Heˍbrehˇ 11:1, 6 gʼaw sheˍ.) Yaˬhoˉvaˬ awˬ tehˬ cawˬ ve tehꞈ ngaˬ hui leuˉ leh yonˍ ve kʼo, Yaˬhoˉvaˬ ka tiꞈ te taˍ ve teˇ ceuˬ le le awˬ tehˬ te tuˬ yoˬ tehꞈ ngaˬ hui leuˉ leh yonˍ gʼa ve yoˬ. Ngaˬ hui Yaˬhoˉvaˬ geh hkʼa dehꞈ meuˆ daꞈ tuˬ leh ngaˬ hui ve dawˇ law kuiˬ hkʼa tawˍ lehˆ mawˬ gʼa tuˬ hkʼaˬ hkʼe gʼa te cawˇ ve teˇ geh henˇ tuˬ yoˬ.

13. Ngaˬ hui hkʼaˬ hkʼe te leh Yaˬhoˉvaˬ geh meuˆ daꞈ gʼa tuˬ le?

¹³ Yaˬhoˉvaˬ geh bon lawˬ leh Liꞈ hpu gʼaw ve. Ngaˬ hui Yaˬhoˉvaˬ htaꞈ maˇ mawˬ gʼa ve htawˇ, ngaˬ hui yawˇ geh meuˆ daꞈ gʼa ve yoˬ. Bon lawˬ ve hkʼaw ngaˬ hui Yaˬhoˉvaˬ geh tawˇ yaw daꞈ leh yawˇ ngaˬ hui ve bon lawˬ hkawˇ htaꞈ na laˇ tuˬ yoˬ tehꞈ yonˍ gʼa ve yoˬ. (Yeˍraˍmiˆ 29:11, 12) Ngaˬ hui Yaˬhoˉvaˬ ve hkawˇ na tuˬ Liꞈ hpu gʼaw leh hkʼa dehꞈ dawˇ nyi ve yoˬ. Oˇ htaˇ teˇ co˗e Yaˬhoˉvaˬ yawˇ ve kanˉ te ve chaw htaꞈ hkʼaˬ hkʼe ga piˇ ve ngaˬ hui gʼa gʼaw htaˇ, ngaˬ hui ve dawˇ law kuiˬ leuˉ leh hkʼa tawˍ lehˆ kʼawꞈ mawˬ tuˬ te laˇ ve yoˬ. Liꞈ hpu hkʼaw bvuhꞈ taˍ ve teˇ ceuˬ le le lehˬ “ngaˬ hui htaꞈ maˍ laˇ tuˬ awˬ pon bvuhꞈ taˍ ve yoˬ. Hkʼe te leh, ngaˬ hui yeunˇ hkanˍ leh Liꞈ hpu awˬ hkʼaw lo dawˇ sha ve htaꞈ gʼa ve pa taw dawˇ law tuˬ cawˬ ve yoˬ.”—Roˉmaꞈ 15:4.

14. Yaˬhoˉvaˬ yawˇ ve kanˉ te ve chaw htaꞈ te piˇ ve awˬ hkʼaˇ, aˬ htoꞈ ma te ngaˬ hui hkʼa dehꞈ dawˇ nyi cawˇ ve le?

¹⁴ Yaˬhoˉvaˬ lehˬ ka tiꞈ te taˍ ve htaꞈ hkʼaˬ htaˆ kaꞈ haꞈ shaˉ ve tehꞈ dawˇ nyi sheˍ. Aˍbraˍhanˍ leh Saˍraˇ awˬ pon Yaˬhoˉvaˬ te piˇ ve awˬ ceuˬ htaꞈ dawˇ nyi sheˍ. Yawˇ huiˉ maˬ mawˇ jaˇ˗oˬ ve htawˇ, yaˇ cawˬ gʼa tuˬ yoˬ tehꞈ Gʼuiˬ sha ka tiꞈ te piˇ ve yoˬ. (Awˬ hkuiˉ puiˍ 18:10) Hkʼe kʼo, Aˍbraˍhanˍ hkʼaˬ hkʼe dawˇ ve le? Liꞈ hpu hkʼaw kʼoˆ ve, yawˇ lehˬ “chaw ceuˬ laiˉ ceuˬ ve awˬ pa hpehꞈ la tuˬ, dawˇ law kuiˬ maˇ cawˬ htawˇ, yawˇ yonˍ leh dawˇ law chehˇ ve yoˬ.” (Roˉmaꞈ 4:18) Awˬ lawn chi chaw yaˇ awˬ pon kʼo hpehꞈ kʼai maˇ gʼa taˬ tehꞈ dawˇ ve htawˇ, Yaˬhoˉvaˬ yawˇ ka tiꞈ te taˍ ve htaꞈ awˬ tehˬ te tuˬ yoˬ tehꞈ Aˍbraˍhanˍ yonˍ gʼa ve yoˬ. Leh chi Aˍbraˍhanˍ htaꞈ nyi ma luˬ tuˬ maˇ te piˇ. (Roˉmaꞈ 4:19-21) Awˬ lawn chi ngaˬ hui htaꞈ maˍ laˇ ve, ngaˬ hui awˬ pon maˇ hpehꞈ gʼa taˍ tehꞈ dawˇ ve  htawˇ, Yaˬhoˉvaˬ ka tiꞈ te taˍ ve htaꞈ haꞈ shaˉ ve tehꞈ, ngaˬ hui yawˇ htaꞈ yonˍ gʼa ve yoˬ.

15. Yaˬhoˉvaˬ ngaˬ hui awˬ pon aˬ htoꞈ ma te laˇ˗oˬ ve htaꞈ dawˇ nyi cawˇ ve le?

¹⁵ Yaˬhoˉvaˬ nawˬ awˬ pon te laˇ˗oˬ ve htaꞈ dawˇ nyi sheˍ. Liꞈ hpu hkʼaw ka tiꞈ te taˍ laˇ ve nawˬ awˬ pon awˬ tehˬ hpehꞈ la gʼa ve awˬ ceuˬ htaꞈ dawˇ nyi sheˍ. Tawˇ pa haˉ te kʼo, Yeˍsuˆ ka tiꞈ te laˇ ve Yaˬhoˉvaˬ lehˬ nawˬ loˍ ve awˬ ceuˬ peꞈ laˇ tuˬ yoˬ. (Maꞈhtehˍ 6:32, 33) Nawˬ Yaˬhoˉvaˬ geh bon lawˬ ve kʼo, yawˇ daꞈ kehˬ ve awˬ ha hpu peꞈ laˇ tuˬ yoˬ tehꞈ Yeˍsuˆ htawˆ hkanˍ laˇ ve yoˬ. (Luˉkaꞈ 11:13) Yaˬhoˉvaˬ yawˇ ka tiꞈ te taˍ ve hkʼe yeˬ jaˇ ve tehꞈ nawˬ mawˬ˗aw laˇ? Yaˬhoˉvaˬ ka tiꞈ te taˍ laˇ ve, nawˬ awˬ pon awˬ tehꞈ hpehꞈ la ve awˬ nu ve awˬ ceuˬ htaꞈ kaꞈ dawˇ nyi sheˍ. Tawˇ pa haˉ te kʼo, Gʼuiˬ sha ka tiꞈ te taˍ laˇ ve nawˬ htaꞈ venˇ baˆ hpehˇ laˇ ve, awˬ gʼaˇ peꞈ laˇ ve, leh nawˬ ve yonˍ hkʼaˇ uiˍ la mvuh la tuˬ, cuˇ yiˍ peꞈ laˇ tuˬ yoˬ. (Maꞈhtehˍ 6:14; 24:45; 2 Kawˇrenˍhtuˆ 1:3) Yaˬhoˉvaˬ nawˬ awˬ pon aˬ htoꞈ ma te laˇ˗oˬ ve awˬ ceuˬ htaꞈ nawˬ hkʼa dehꞈ dawˇ nyi htaˇ, awˬ gʼuˇ suhˍ hpawˇ nawˬ ve dawˇ law kuiˬ htaꞈ Gʼuiˬ sha awˬ tehˬ te laˇ tuˬ yoˬ tehꞈ nawˬ yonˍ gʼa ve yoˬ.

16. Aˬ htoꞈ ma te dawˇ law kuiˬ lehˬ awˬ hpfuhˇ hkʼaˆ jaˇ ve laꞈ shawnˍ hpehꞈ ve le?

¹⁶ Co co taiˍ taiˍ ve dawˇ law kuiˬ lehˬ, Gʼuiˬ sha peꞈ laˇ ve awˬ hpfuhˇ hkʼaˆ jaˇ ve laꞈ shawnˍ hpehꞈ ve yoˬ. Daꞈ jaˇ ve dawˇ law kuiˬ chi awˬ gʼuˇ suhˍ hpawˇ hpehꞈ la tuˬ ngaˬ hui law chehˇ leh awˬ tehˬ awˬ na hpehꞈ la tuˬ yoˬ tehꞈ yonˍ gʼa ve yoˬ. Dawˇ law kuiˬ chi heuˇ shan hpawˇ ve sho kʼuˉ kʼawehꞈ hkʼe hpehꞈ leh ngaˬ hui tuꞈ hkanˍ ve, fawˉ mehˍ ve, gʼa suh tuˬ tehꞈ shiˍ ve htawˇ, yeunˇ hkanˍ gʼaˇ tuˬ te laˇ ve yoˬ. Dawˇ law kuiˬ chi sho uˉ tcuhˍ htaꞈ shuˍ leh ngaˬ hui maˇ daꞈ ve awˬ ceuˬ htaꞈ maˇ te tuˬ leh cawˇ ve awˬ ceuˬ htaꞈ hkʼaˬ htaˆ kaꞈ te tuˬ ga laˇ ve yoˬ. Liꞈ hpu hkʼaw ve dawˇ law kuiˬ lehˬ ngaˬ hui Yaˬhoˉvaˬ geh meuˆ daꞈ maˇ tuˬ leh yawˇ ngaˬ hui htaꞈ hkʼaˬ hkʼe taw haꞈ ve shiˍ tuˬ kaꞈ te laˇ ve yoˬ. Ngaˬ hui ve dawˇ law kuiˬ htaꞈ yonˍ gʼa leh ngaˬ hui ve dawˇ law kuiˬ hkʼa tawˍ lehˆ mawˬ tuˬ te ve kʼo, awˬ tehˬ awˬ bon gʼa tuˬ yoˬ.

17. Aˬ htoꞈ ma te dawˇ law kuiˬ lehˬ ha lehˬ tuˬ te laˇ ve le?

¹⁷ Roˉmaꞈ venˇ lo Hkriꞈ yaˇ htaꞈ Pawˇluꞈ liꞈ bvuhꞈ piˇ ve hkʼaw kʼoˆ piˇ ve, “dawˇ law ve awˬ hkʼaw lo ha lehˬ chehˇ˗oˆ.” (Roˉmaꞈ 12:12) Pawˇluꞈ hkʼaˬ htaˆ kaꞈ Yaˬhoˉvaˬ htaꞈ ka tiꞈ yeˬ ve kʼo, yawˇ mvuhˇ naw ma hkʼoˆ co co taiˍ taiˍ a shaꞈ gʼa tuˬ tehꞈ yonˍ ve pa taw, ha lehˬ chehˇ ve yoˬ. Yaˬhoˉvaˬ lehˬ yawˇ ka tiꞈ te taˍ ve htaꞈ yeˬ jaˇ ve tehꞈ ngaˬ hui yonˍ gʼa ve pa taw, ngaˬ hui kaꞈ dawˇ law kuiˬ htaꞈ ha lehˬ gʼa ve yoˬ. Chiˇ mvuh ve liꞈ bvuhꞈ paˍ kʼoˆ ve, ‘Gʼuiˬ sha htaꞈ gʼaˇ va ve chaw lehˬ, gʼa ha lehˬ ve yoˬ. Yawˇ lehˬ ka tiꞈ yeˬ jaˇ ve yoˬ.’—Chiˇ mvuh ve 146:5, 6.