1-2. (a) Mvuhˇ miˬ teˇ hpaˍ hpaˍ hkʼaw ve uˉ peunˍ paˍ Yaˬhoˉvaˬ ve chaw htaꞈ hkʼaˬ hkʼe te piˇ ve le? Leh awˬ viˉ awˬ nyi hkʼaˬ hkʼe te ve le? (b) Fawˉ mehˍ ve htaꞈ gʼa hpuˇ ve chaw hkʼaˬ hkʼe te ha lehˬ gʼa ve le? (Awˬ htaꞈ hpawˇ ve awˬ han htaꞈ nyi sheˍ.)

 Chi teˇ hkui ngaˬ hui ve kanˉ htaꞈ tawˍ laˇ ve maˇ heˆ leh hkʼa dehꞈ maˇ te gʼa ve 30 mvuhˇ miˬ hpaˆ cawˬ ve yoˬ. Mvuhˇ miˬ teˇ hpaˍ hpaˍ hkʼaw kʼo, ngaˬ hui ve awˬ viˉ awˬ nyi htaꞈ htawnˍ hkʼaw yuˬ keu piˇ ve yoˬ. Yawˇ hui aˬ htoꞈ ma htaꞈ te yaꞈ ve le? Yaˬhoˉvaˬ ve mehˆ gʼuˇ suhˍ awˬ viˉ awˬ nyi teꞈ chiˉ maˇ gʼa te yaꞈ. Yawˇ hui te ve lehˬ, Liꞈ hpu gʼaw leh a shu yawˇ hkʼaˇ yawˇ Liꞈ hpu henˇ ve, yawˇ hui ve yonˍ hkʼaˇ awˬ nu ve chaw htaꞈ kʼoˆ maˍ piˇ leh teˇ geh hpawnˬ daꞈ ve yoˬ. Ngaˬ hui ve awˬ viˉ awˬ nyi lehˬ mvuhˇ miˬ uˉ peunˍ ve hpawˇ choˬ paˉ oˇ paˉ maˇ chehˇ ve yoˬ. Yaˬhoˉvaˬ ve kanˉ ka tiꞈ yeˬ ve hkʼaw te ve chaw chi teˇ hpaˍ tawˍ ve tsuhˇ ve gʼa hpuˇ jaˇ ve htawˇ, yawˇ hui ka tiꞈ yeˬ leh * a shaꞈ teꞈ chehˇ ve teˇ co˗e yawˇ hui ve awˬ to Yaˬhoˉvaˬ htaꞈ chiˇ aꞈ piˇ ve yoˬ. Yawˇ hui dawˇ teh taˍ ve htaꞈ teˇ gʼaˇ˗ehꞈ kaꞈ maˇ te luˬ laˇ tcuh. Awˬ viˉ awˬ nyi chi teˇ hpaˍ chi hkʼe te ve pa taw, ha lehˬ jaˇ.

² Awˬ viˉ awˬ nyi chi ve teˇ hpaˍ haꞈ hanˉ ve leh yawˇ hui ha lehˬ ha kʼa te taˍ ve awˬ han htaꞈ nawˬ gʼa mawˬ ve yoˬ. Yawˇ hui ha lehˬ gʼa ve lehˬ yawˇ hui hkʼaˬ htaˆ kaꞈ Yaˬhoˉvaˬ htaꞈ ka tiꞈ yeˬ gʼa ve, yawˇ nyi hkʼaˇ suh ve tehꞈ shiˍ ve pa taw yoˬ. (1 Raˍsaˍvanˍ 29:17) Yeˍsuˆ kʼoˆ ve, ‘hteˇ lehˍ cawˇ lehˍ te ve pa taw fawˉ ve mehˍ ve htaꞈ gʼa hkanˍ ve chaw hui awˬ bon uiˍ ve yoˬ. Ha lehˬ ve hkʼa biˇ cawˬ piˇ˗oˆ. Awˬ lawn kʼo, nawˬ hui ve laꞈ shawnˍ uiˍ jaˇ ve yoˬ.’—Maꞈhtehˍ 5:10-12.

3. Tcuh yaˇ liꞈ 4:19, 20 hkʼaw kʼoˆ taˍ ve hkʼe, tcuh yaˇ hui fawˉ ve mehˍ ve gʼa hpuˇ htaˇ hkʼaˬ hkʼe te ve le? Leh aˬ htoꞈ ma te yawˇ hui chi hkʼe te ve le?

³ Tcuh yaˇ hui Yeˍsuˆ ve awˬ lawn maˍ ve pa taw, fawˉ ve mehˬ ve gʼa hpuˇ ve hkʼe, ngaˬ hui ve awˬ viˉ awˬ nyi kaꞈ gʼa hpuˇ chehˇ ve yoˬ.  Yuˇdaꞈ chaw suhˉ jehˬ shehˍ hpaˇ awˬ moˍ yawˇ hui htaꞈ “Yeˍsuˆ ve awˬ meh htaꞈ cuˇ ve awˬ hkʼaw lo maˍ piˇ hto piˇ ve teˇ ceuˬ a ciˉ kaꞈ taˇ te tehꞈ tawˇ piˇ ve yoˬ.” (Tcuh yaˇ 4:18; 5:27, 28, 40) Peuˬ leh tcuh yaˇ hui hkʼaˬ hkʼe te ve le? (Tcuh yaˇ 4:19, 20 gʼaw sheˍ.) Suhˉ jehˬ shehˍ hpaˇ chi teˇ moˍ aꞈ kehˉ kanˇ paˆ uiˍ shehˍ hpaˇ teˇ gʼaˇ kʼoˆ ve lehˬ Yeˍsuˆ htaꞈ caˉ daꞈ ve awˬ lawn “chaw chi ma ve htaꞈ bon maˍ piˇ tuˬ yawˇ ngaˬ hui htaꞈ tawˇ piˇ taˉ laˇ ve yoˬ” tehꞈ yawˇ hui shiˍ ve yoˬ. (Tcuh yaˇ 10:42) Chi htaꞈ pa taw, Peˍtruˆ leh Yoˇhanˬ awˬ laꞈ gʼawˇ hui awˬ tan te leh haꞈ hanˉ ve hkʼaw kʼoˆ ve, jehˬ daꞈ shehˍ hpaˇ awˬ moˍ ve tawˇ aꞈ kehˉ Gʼuiˬ sha ve tawˇ hkawˇ gʼa na yuˬ cawˇ ve yoˬ. Leh kʼawꞈ kʼoˆ sheˍ ve yawˇ hui Yeˍsuˆ ve awˬ lawn caˉ leh bon kʼawꞈ maˍ sheˍ ve yoˬ. ‘Nawˬ hui ve tawˇ lehˬ Gʼuiˬ sha ve tawˇ hkawˇ aꞈ kehˉ uiˍ ve tehꞈ kʼoˆ haˆ˗aw laˇ?’ Chi hkʼe kʼoˆ ve lehˬ tcuh yaˇ hui suhˉ jehˬ shehˍ hpaˇ awˬ moˍ htaꞈ na piˇ ve hkʼe shuˍ ve yoˬ.

4. Tcuh yaˇ liꞈ 5:27-29 hkʼaw kʼoˆ taˍ ve hkʼe, tcuh yaˇ hui aˬ htoꞈ ma te ve le? Leh ngaˬ hui yawˇ hui htaꞈ hkʼaˬ hkʼe henˇ yuˬ gʼa tuˬ le?

⁴ “Chaw yaˇ ve tawˇ hkawˇ aꞈ kehˉ Gʼuiˬ sha ve tawˇ hkawˇ htaꞈ ngaˬ hui gʼa na yuˬ ve yoˬ.” Chi lehˬ tcuh yaˇ hui chi beuꞈ teˇ co˗e Hkriꞈ yaˇ teˇ gʼaˇ le le awˬ pon daꞈ ve henˇ yuˬ tuˬ hpehꞈ ve yoˬ. (Tcuh yaˇ 5:27-29 gʼaw sheˍ.) Tcuh yaˇ hui Gʼuiˬ sha htaꞈ ka tiꞈ yeˬ ve pa taw, jawꞈ piˇ peuˬ hkʼawꞈ nawˉ “tcuh yaˇ hui lehˬ, awˬ meh oˇ ve htaꞈ pa taw maˇ shawˍ maˇ caˆ te laˇ ve htaꞈ hkanˍ keunˍ ve yoˬ tehꞈ Gʼuiˬ sha shawˍ taˍ ve pa taw, jehˬ daꞈ shehˍ hpaˇ awˬ moˍ mehˆ gʼuˇ suhˍ yawˇ hui ha lehˬ ha kʼa tawˆ kʼai ve yoˬ.” Peuˬ leh yawˇ hui bon kʼawꞈ maˍ kʼai ve yoˬ.—Tcuh yaˇ 5:40-42.

5. Ngaˬ hui na ve na hkawˇ htaꞈ hkʼawꞈ laˇ gʼa tuˬ aˬ htoꞈ ma cawˬ ve le?

⁵ Tcuh yaˇ hui ve awˬ lawn na hkawˇ teˇ ceuˬ ceuˬ cawˬ tuˬ te laˇ ve yoˬ. Tawˇ pa haˉ te kʼo, chaw yaˇ ve tawˇ hkawˇ aꞈ kehˉ Gʼuiˬ sha ve tawˇ hkawˇ htaꞈ na tehꞈ kʼoˆ ve, “uˉ peunˍ shehˍ hpaˇ teˇ hpaˍ awˬ hawˉ lo hkʼa dehꞈ chehˇ˗oˆ” tehꞈ kʼoˆ gaˇ ve laˇ? (Roˉmaꞈ 13:1) Peuˬ leh ngaˬ hui “uˉ peunˍ shehˍ hpaˇ teˇ hpaˍ awˬ hawˉ lo hkʼa dehꞈ chehˇ” leh yawˇ hui ve hkawˇ na yuˬ leh uiˍ jaˇ mvuhˇ jaˇ ve uˉ peunˍ shehˍ hpaˇ Gʼuiˬ sha htaꞈ hkʼaˬ hkʼe te ka tiꞈ yeˬ gʼa tuˬ le?—Tiˇtuˆ 3:1.

6. (a) Roˉmaꞈ liꞈ 13:1 hkʼaw “uˉ peunˍ shehˍ hpaˇ” a shu htaꞈ kʼoˆ gaˇ ve le? Leh ngaˬ hui aˬ htoꞈ ma awˬ vuiˬ cawˬ ve le? (b) Yawˇ hui ve kanˇ paˆ hkʼaˬ hkʼe hpehꞈ ve le?

⁶ Roˉmaꞈ liꞈ 13:1 gʼaw sheˍ. Liꞈ hpu chi teˇ tawn hkʼaw kʼoˆ taˍ ve hkʼe, Hkriꞈ yaˇ lehˬ uˉ peunˍ  shehˍ hpaˇ hkawˇ gʼa na yuˬ cawˇ ve yoˬ. Chi ve lehˬ mvuhˇ miˬ uˉ peunˍ shehˍ hpaˇ hkawˇ gʼa na yuˬ ve yoˬ. Chaw chi teˇ moˍ leh awˬ liˇ awˬ hkʼaˇ htaꞈ yehˇ tuˬ nyiˉ laˇ ve, hteˇ hteˇ shawˇ shawˇ cawˬ tuˬ te laˇ ve, leh teˇ pawˆ pawˆ kʼo yawˇ hui Gʼuiˬ sha ve chaw htaꞈ kaꞈ ga piˇ ve yoˬ. (Hpeuꞈ maˍ ve 12:16) Liꞈ hpu hkʼaw ngaˬ hui htaꞈ kʼoˆ laˇ ve, mvuhˇ miˬ uˉ peunˍ ve hpawˇ awˬ hkawnˍ gʼa keu piˇ ve, leh yawˇ hui htaꞈ gʼa yawˆ yan piˇ ve yoˬ. (Roˉmaꞈ 13:7) Yaꞈ hkʼaˇ, mvuhˇ miˬ uˉ peunˍ paˍ kanˇ paˆ cawˬ gʼa ve lehˬ Yaˬhoˉvaˬ yawˇ hui htaꞈ kanˇ paˆ cawˬ tcuh ve pa taw yoˬ. Roˉmaꞈ venˇ lo uˉ peunˍ paˍ Poˍtiˆ Piˉlaꞈ Yeˍsuˆ htaꞈ na nyi piˇ htaˇ, awˬ lawn chi ve Yeˍsuˆ hkʼa tawˍ lehˆ hpeuꞈ maw laˇ ve yoˬ. Poˍtiˆ Piˉlaꞈ Yeˍsuˆ htaꞈ tiˇ pehˍ tuˬ maˇ tiˇ pehˍ tuˬ yawˇ kanˇ paˆ cawˬ ve tehꞈ kʼoˆ piˇ ve yoˬ. Yeˍsuˆ kʼawꞈ kʼoˆ ve, “mvuhˇ naw ma lo nawˬ htaꞈ kanˇ paˆ maˇ piˇ ve hkʼe kʼo, nawˬ ngaˬ awˬ hkʼoˆ teꞈ chiˉ kanˇ paˆ maˇ cawˬ.” (Yoˇhanˬ 19:11) Poˍtiˆ Piˉlaꞈ kʼoˆ ve htaꞈ ngaˬ hui gʼa mawˬ ve hkʼe, mvuhˇ miˬ uˉ peunˍ paˍ hui leh chi beuꞈ teˇ co˗e mvuhˇ miˬ kanˉ te paˍ kanˇ paˆ peuˬ kuiˬ leh kuiˬ cawˬ ve yoˬ.

7. Uˉ peunˍ shehˍ hpaˇ hkawˇ ngaˬ hui maˇ na cawˇ ve hkʼaˬ hkʼe htaˇ le? Leh yawˇ hui aˬ htoꞈ ma htaꞈ gʼa tawnˇ taˍ cawˇ ve le?

⁷ Mvuhˇ miˬ ve awˬ liˇ awˬ hkʼaˇ Gʼuiˬ sha ve awˬ liˇ tawˇ hkawˇ htaꞈ maˇ yaꞈ ve kʼo, Hkriꞈ yaˇ teˇ gʼaˇ le le gʼa na yuˬ cawˇ ve yoˬ. Yawˇ hui lehˬ ngaˬ hui htaꞈ Gʼuiˬ sha maˇ te tcuh laˇ ve awˬ ceuˬ htaꞈ te tehꞈ kʼoˆ laˇ ve, maˇ heˆ leh Gʼuiˬ sha te tehꞈ kʼoˆ laˇ ve awˬ ceuˬ htaꞈ tawˍ laˇ ve kʼo, ngaˬ hui yawˇ hui ve hkawˇ maˇ na. Tawˇ pa haˉ te kʼo, uˉ peunˍ shehˍ hpaˇ hawˉ hkʼaˆ htaꞈ laꞈ caˉ yehˇ leh mvuhˇ miˬ htaꞈ haꞈ shaˉ tuˬ awˬ liˇ teh piˇ ve, maˇ heˆ leh * Liꞈ hpu leh Gʼuiˬ sha ve kanˉ hkʼaˇ hkʼaw ve liꞈ maˇ cawˬ tcuh tuˬ tawˍ laˇ ve, maˇ heˆ leh ngaˬ hui htaꞈ maˇ hto toˇ tuˬ leh maˇ hpawnˬ daꞈ tuˬ kaꞈ tawˍ laˇ ve yoˬ. Mvuhˇ miˬ uˉ peunˍ shehˍ hpaˇ maˇ cawˇ ve hpawˇ kanˇ paˆ yehˇ ve pa taw, Hkriꞈ yaˇ htaꞈ fawˉ mehˍ piˇ ve yoˬ. Yawˇ hui te ve awˬ ceuˬ htaꞈ Gʼuiˬ sha nyi chehˇ ve pa taw, yawˇ hui te ve awˬ ceuˬ Gʼuiˬ sha htaꞈ gʼa kʼoˆ maˍ piˇ ve yoˬ.—Cuˇ yiˍ piˇ ve 5:8.

8. “Uˉ peunˍ shehˍ hpaˇ” lehˬ Yaˬhoˉvaˬ htaꞈ hkʼaˬ hkʼe peun daꞈ ve le? Leh aˬ htoꞈ ma te awˬ lawn chi shiˍ ve a yeˇ uiˍ jaˇ ve le?

⁸ “Uˉ peunˍ shehˍ hpaˇ” hui lehˬ uˉ peunˍ tuˬ kanˇ paˆ cawˬ ve htawˇ, yawˇ hui ve kanˇ paˆ lehˬ peuˬ kuiˬ leh kuiˬ cawˬ ve yoˬ. Mvuhˇ naw ma miˬ naˆ ma hkʼoˆ kanˇ paˆ uiˍ jaˇ ve lehˬ Yaˬhoˉvaˬ Gʼuiˬ sha hpehꞈ ve yoˬ. Heˍbrehˇ ve Liꞈ hpu hkʼaw “uiˍ jaˇ mvuhˇ jaˇ ve Gʼuiˬ sha” tehꞈ kʼoˆ ve 4 pawˆ cawˬ ve yoˬ.—Daˍyeˍlaˆ 7:18, 22, 25, 27.

9. Tcuh kaˍ paˍ Daˍyeˍlaˆ lehˬ yawˇ zuhꞈ maˆ mawˬ ve laiˉ lawn aˬ htoꞈ ma htaꞈ caˉ daꞈ ve le?

⁹ Yaˬhoˉvaˬ ve kanˇ paˆ lehˬ teˇ ceuˬ le le aꞈ kehˉ uiˍ jaˇ ve tehꞈ tcuh kaˍ paˍ Daˍyeˍlaˆ zuhꞈ maˆ mawˬ ve hkʼaw hkʼa tawˍ lehˆ hpeuꞈ maw laˇ ve yoˬ. Awˉ lawˉ htaˇ Daˍyeˍlaˆ uiˍ jaˇ ve to nuˇ to shaˆ 4 hkeh htaꞈ mawˬ ve yoˬ. Chi lehˬ oˇ htaˇ teˇ co˗e leh chi beuꞈ teˇ co˗e ve mvuhˇ miˬ hkʼoˆ ve kanˇ paˆ lonˉ htaꞈ kʼoˆ gaˇ ve yoˬ. Tawˇ pa haˉ te kʼo, oˇ htaˇ teˇ co˗e Baˍbuˍlonˍ, Meˍdiˆ˗Paˆshaˆ, Heˍlaˍsaˆ, Ruˉmaꞈ hui hpehꞈ ve yoˬ. Leh chi beuꞈ teˇ co˗e Eˍgaˍlanˍ˗Aˍmeˍriˆkaꞈ hui hpehꞈ ve yoˬ. (Daˍyeˍlaˆ 7:1-3, 17) Leh Yaˬhoˉvaˬ mvuhˇ naw ma kaw jaw hkʼoˆ mui taˍ ve htaꞈ Daˍyeˍlaˆ gʼa mawˬ ve yoˬ. (Daˍyeˍlaˆ 7:9, 10) Chi beuꞈ teˇ co˗e uˉ peunˍ shehˍ hpaˇ awˬ pon shaˍ tiꞈ piˇ ve htaꞈ ka tiꞈ yeˬ ve tcuh kaˍ paˍ chi teˇ gʼaˇ aˬ htoꞈ ma htaꞈ mawˬ sheˍ ve le?

10. Daˍyeˍlaˆ liꞈ 7:13, 14, 27 hkʼaw kʼoˆ taˍ ve hkʼe, miˬ guiˬ hkʼoˆ uˉ peunˍ tuˬ Yaˬhoˉvaˬ a shu htaꞈ kanˇ paˆ piˇ tuˬ le? Yaˬhoˉvaˬ hkʼaˬ hkʼe hpehꞈ ve chi ngaˬ hui hkʼa tawˍ lehˆ mawˬ tuˬ hkʼaˬ hkʼe te laˇ ve le?

¹⁰ Daˍyeˍlaˆ liꞈ 7:13, 14, 27 gʼaw sheˍ. Gʼuiˬ sha lehˬ chaw yaˇ uˉ peunˍ ve hkʼa peu˗eˬ htaꞈ te luˬ piˇ leh kanˇ paˆ gʼa keunˍ ve chaw htaꞈ Gʼuiˬ sha piˇ tuˬ yoˬ. Chi ve lehˬ a shu le? “Chaw yaˇ htaꞈ shuˍ ve teˇ gʼaˇ” lehˬ Yeˍsuˆ Hkriꞈ hpehꞈ ve yoˬ. “Gʼuiˬ sha ve chaw teˇ hpaˍ gʼaˇ shehˍ hpaˇ” lehˬ 144,000 gʼaˇ hpehꞈ leh yawˇ hui Yeˍsuˆ geh teˇ geh “co co taiˍ taiˍ gʼa uˉ peunˍ tuˬ yoˬ.” (Daˍyeˍlaˆ 7:18) Yaˬhoˉvaˬ teˇ  gʼaˇ ceh tiˉ kanˇ paˆ cawˬ leh chi hkʼe te gʼa ve pa taw, Yaˬhoˉvaˬ lehˬ “uiˍ jaˇ mvuhˇ jaˇ ve Gʼuiˬ sha” hpehꞈ ve tehꞈ ngaˬ hui hkʼa tawˍ lehˆ gʼa mawˬ ve yoˬ.

11. Yaˬhoˉvaˬ lehˬ uiˍ jaˇ mvuh jaˇ ve kanˇ paˆ cawˬ ve tehꞈ Daˍyeˍlaˆ hkʼaˬ hkʼe hpeuꞈ maw laˇ sheˍ ve le?

¹¹ Daˍyeˍlaˆ zuhꞈ maˆ mawˬ ve awˬ ceuˬ lehˬ, awˉ lawˉ htaˇ kʼoˆ kʼai peuˬ ve htaꞈ shuˍ daꞈ ve yoˬ. Choˬ kaˬ lo kʼoˆ ve, “mvuhˇ naw ma hkʼoˆ chehˇ ve Gʼuiˬ sha jawˇ mawˇ teˇ gʼaˇ htaꞈ yuˬ baˬ leh, awˬ nu ve teˇ gʼaˇ htaꞈ kʼawꞈ taˆ la piˇ ve yoˬ.” Daˍyeˍlaˆ kʼawꞈ kʼoˆ ve, “Kanˇ paˆ uiˍ ve Gʼuiˬ sha lehˬ, mvuhˇ miˬ hkʼa peu˗eˬ ve htaꞈ uˉ peunˍ tuˬ kanˇ paˆ cawˬ ve htaꞈ miˬ guiˬ chaw yaˇ hkʼa peu˗eˬ shiˍ˗oꞈ. Yawˇ lehˬ mvuhˇ miˬ chi teˇ hpaˍ htaꞈ yawˇ piˇ gaˇ ve chaw htaꞈ piˇ ve yoˬ.” (Daˍyeˍlaˆ 2:19-21; 4:17) Hkʼe kʼo, Yaˬhoˉvaˬ lehˬ mvuhˇ miˬ uˉ peunˍ paˍ hui htaꞈ leuˆ yuˬ leh yuˬ baˬ piˇ jaw˗o ve laˇ? Yuˬ baˬ piˇ jaw˗o ve yoˬ.

12. Yaˬhoˉvaˬ lehˬ oˇ htaˇ teˇ co˗e ve jawˇ mawˇ htaꞈ jawˇ mawˇ maˇ te tcuh˗o ve a shu ve awˬ lawn hpeuꞈ maw laˇ ve le? (Awˬ han htaꞈ nyi sheˍ.)

¹² Yaˬhoˉvaˬ lehˬ “uˉ peunˍ shehˍ hpaˇ” hui aꞈ kehˉ kanˇ paˆ cawˬ ve yoˬ. Chi ve htaꞈ caˉ daꞈ ve Liꞈ hpu hkʼaw 3 lawn htaꞈ teˇ geh nyi sheˍ. Eˇjiˇtuꞈ ve jawˇ mawˇ Hpaˍrawˇ lehˬ Iˉsaˍreˍlaˆ chaw htaꞈ fawˉ mehˍ piˇ leh, yawˇ hui htaꞈ awˬ ceˬ nyiˉ te tcuh leh awˬ hkʼoˆ kaꞈ yawˇ hui htaꞈ maˇ hpehˇ piˇ. Peuˬ hkʼawꞈ nawˉ Yaˬhoˉvaˬ yawˇ ve chaw awˬ ceˬ te ve htaꞈ hpehˇ piˇ leh, Hpaˍrawˇ leh yawˇ ve maꞈ yaˇ laˇ tsuhˇ gʼuiˬ nyi hkʼaw suh˗e tcuh ve yoˬ. (Tawˆ kʼai ve 14:26-28; Chiˇ mvuh ve 136:15) Baˍbuˍlonˍ ve jawˇ mawˇ Beˍlaˍshaˍzaˍ hti caˇ hti dawˬ ve pawehˇ te ve yoˬ. Yawˇ ‘mvuhˇ naw ma Gʼuiˬ sha htaꞈ maˇ yawˆ maˇ yan te ve yoˬ.’ Leh Yaˬhoˉvaˬ htaꞈ chiˇ mvuh ve aꞈ kehˉ ‘hpu, shi, yuˬ te taˍ ve shaˉ hoꞈ teˇ hpaˍ htaꞈ chiˇ mvuh piˇ chehˇ ve yoˬ.’ (Daˍyeˍlaˆ 5:22, 23) Yaꞈ hkʼaˇ, Yaˬhoˉvaˬ lehˬ uiˍ muiˬ caˆ muiˬ ve jawˇ mawˇ chi teˇ gʼaˇ htaꞈ te luˬ piˇ ve yoˬ. Liꞈ hpu hkʼaw kʼoˆ ve, “oˇ ve teˇ haˉ” Beˍlaˍshaˍzaˍ htaꞈ tiˇ pehˍ leh yawˇ ve mvuhˇ miˬ Meˍdiˆ chaw leh Paˇshaˇ chaw htaꞈ piˇ ve yoˬ. (Daˍyeˍlaˆ 5:28, 30, 31) Paˍliˇsaˍtaiˇ mvuhˇ miˬ lo uˉ peunˍ ve jawˇ mawˇ Heˍroˆ Aˍgiˇpiˆ tcuh yaˇ Yaˍkoˆ htaꞈ tiˇ pehˍ piˇ leh tcuh yaˇ Peˍtruˆ htaꞈ tiˇ pehˍ piˇ tuˬ htawnˍ hkʼaw yuˬ keu taˍ ve yoˬ. Yaꞈ hkʼaˇ, Heˍroˆ yawˇ dawˇ teh taˍ ve htaꞈ maˇ gʼa te tuˬ Yaˬhoˉvaˬ tawˍ piˇ ve yoˬ. “Gʼuiˬ sha ve mvuhˇ naw ma tcuh yaˇ yawˇ htaꞈ ciˍ yanˍ piˇ ve yoˬ.” Peuˬ leh Heˍroˆ suh˗e ve yoˬ.—Tcuh yaˇ 12:1-5, 21-23.

13. Yaˬhoˉvaˬ lehˬ mvuhˇ miˬ uˉ peunˍ shehˍ hpaˇ hui aꞈ kehˉ kanˇ paˆ uiˍ ve tehꞈ aˬ htoꞈ ma awˬ lawn hpeuꞈ maw laˇ ve le?

¹³ Yaˬhoˉvaˬ lehˬ mvuhˇ miˬ uˉ peunˍ shehˍ hpaˇ hui aꞈ kehˉ kanˇ paˆ uiˍ ve tehꞈ hpeuꞈ maw laˇ ve  yoˬ. Tawˇ pa haˉ te kʼo, Hkaˍnanˍ mvuhˇ miˬ ve jawˇ mawˇ 31 gʼaˇ Iˉsaˍreˍlaˆ chaw htaꞈ ca bawˆ la htaˇ, jawˇ mawˇ chi ve teˇ moˍ htaꞈ gʼaˇ tuˬ, Yaˬhoˉvaˬ Iˉsaˍreˍlaˆ chaw htaꞈ ga piˇ leh Yaˬhoˉvaˬ ka tiꞈ te taˍ ve mvuhˇ miˬ htaꞈ bawˆ yuˬ gʼa ve yoˬ. (Yawˇsuˆ 11:4-6, 20; 12:1, 7, 24) Jawˇ mawˇ Beˍhaˍdaˆ leh jawˇ mawˇ Suˇriˆ 32 gʼaˇ Iˉsaˍreˍlaˆ chaw htaꞈ ca bawˆ la htaˇ, jawˇ mawˇ chi teˇ hpaˍ htaꞈ Iˉsaˍreˍlaˆ chaw gʼaˇ tuˬ Yaˬhoˉvaˬ ga piˇ ve yoˬ.—1 Jawˇmawˇ 20:1, 26-29.

14-15. (a) Jawˇ mawˇ Neˍbuˍhkaˍneˍzaˍ leh jawˇ mawˇ Daˍliˆ Yaˬhoˉvaˬ uˉ peunˍ ve htaꞈ caˉ daꞈ ve yawˇ hui hkʼaˬ hkʼe kʼoˆ ve le? (b) Yaˬhoˉvaˬ leh yawˇ ve chaw htaꞈ caˉ daꞈ ve chiˇ mvuh ve liꞈ bvuhꞈ paˍ hkʼaˬ hkʼe kʼoˆ ve le?

¹⁴ Chaw yaˇ uˉ peunˍ ve teˇ co˗e peuˬ teˇ co˗e Yaˬhoˉvaˬ lehˬ kanˇ paˆ uiˍ jaˇ mvuh jaˇ ve tehꞈ laiˉ pawˆ hpeuꞈ maw laˇ ve yoˬ. Tawˇ pa haˉ te kʼo, Baˍbuˍlonˍ ve jawˇ mawˇ Neˍbuˍhkaˍneˍzaˍ nyi ma maˇ nuˇ nehˬ leh Yaˬhoˉvaˬ htaꞈ maˇ yawˆ yan htaˇ, yawˇ ve kanˇ paˆ awˬ meꞈ awˬ hponˇ hkʼaˬ ma uiˍ ve htaꞈ chiˇ mvuh ve pa taw, Yaˬhoˉvaˬ yawˇ htaꞈ gʼuˇ kʼai tcuh ve yoˬ. Yawˇ gʼuˇ ve na˗e la peuˬ hkʼawꞈ nawˉ, “uiˍ jaˇ mvuh jaˇ ve Gʼuiˬ sha htaꞈ chiˇ mvuh” leh kʼoˆ ve, “yawˇ ve mvuhˇ miˬ co co taiˍ taiˍ yeˬ chehˇ tuˬ yoˬ.” Leh yawˇ kʼawꞈ kʼoˆ ve, teˇ gʼaˇ˗ehˬ kaꞈ Gʼuiˬ sha htaꞈ tawˍ piˇ maˇ gʼa. (Daˍyeˍlaˆ 4:30, 33-35) Daˍyeˍlaˆ Yaˬhoˉvaˬ htaꞈ ka tiꞈ yeˬ ve pa taw, laˇ caˬ shiˉ hkawˆ hkʼaw baˬ keu piˇ htaˇ ve teˇ lawn htaꞈ ngaˬ hui mawˬ tuˬ te laˇ ve yoˬ. Jawˇ mawˇ Daˍriˆ Yaˬhoˉvaˬ Daˍyeˍlaˆ htaꞈ ga piˇ ve gʼa mawˬ htaˇ yawˇ kʼoˆ ve, “Daˍyeˍlaˆ ve Gʼuiˬ sha htaꞈ kawˆ leh yawˆ yan tuˬ ngaˬ tawˇ peꞈ laˇ ve yoˬ. Yawˇ lehˬ teꞈ chehˇ ve Gʼuiˬ sha hpehꞈ leh, co co taiˍ taiˍ uˉ peunˍ chehˇ ve yoˬ. Yawˇ ve mvuhˇ miˬ teˇ pawˆ kaꞈ luˬ kʼai tuˬ ve maˇ heˆ.”—Daˍyeˍlaˆ 6:7-10, 19-22, 26, 27.

¹⁵ Chiˇ mvuh ve liꞈ bvuhꞈ paˍ kʼoˆ ve, “Gʼuiˬ sha lehˬ chaw yaˇ teˇ hpaˍ ve dawˇ hkʼaˇ htaꞈ te luˬ piˇ leh, yawˇ hui te tuˬ dawˇ taˍ ve kanˉ teˇ hpaˍ htaꞈ tawˍ taˍ ve yoˬ.” Leh yawˇ kʼawꞈ kʼoˆ sheˍ ve, “Gʼuiˬ sha htaꞈ oˉ kʼoˍ pui ve chaw hui gʼa ha lehˬ ve yoˬ. Yawˇ ve chaw hpehꞈ la tuˬ leuˆ yuˬ ve htaꞈ gʼa hkanˍ ve chaw hui htawˇ gʼa ha lehˬ ve yoˬ.” (Chiˇ mvuh ve 33:10, 12) Ngaˬ hui Yaˬhoˉvaˬ htaꞈ hkʼaˬ htaˆ kaꞈ ka yeˬ ve lehˬ daꞈ jaˇ!

16. “Tuꞈ jaˇ hkanˍ jaˇ” ve awˬ leh meuˇ teˇ pawˆ gaˬ htaˇ, ngaˬ hui aˬ htoꞈ ma htaꞈ yonˍ gʼa tuˬ le? Aˬ htoꞈ ma pa taw le? (Awˬ han htaꞈ nyi sheˍ.)

¹⁶ Peuˬ laˬ htaˇ Yaˬhoˉvaˬ aˬ htoꞈ ma te kʼai˗oˬ ve ngaˬ hui gʼa shiˍ htaˇ, Yaˬhoˉvaˬ lehˬ yawˇ ve chaw “tuꞈ jaˇ hkanˍ jaˇ” ve htaꞈ ponˬ piˇ gʼa tuˬ yoˬ tehꞈ ngaˬ hui yonˍ gʼa ve yoˬ. (Maꞈhtehˍ 24:21; Daˍyeˍlaˆ 12:1) Gawˇgaˆ leh Maˍgawˇgaˆ mvuhˇ miˬ awˬ moˍ lonˉ htaꞈ kʼoˆ gaˇ leh Yaˬhoˉvaˬ ve chaw htaꞈ ca bawˆ la htaˇ, Yaˬhoˉvaˬ yawˇ ve chaw htaꞈ ponˬ piˇ tuˬ yoˬ. Mvuhˇ miˬ awˬ moˍ lonˉ leh awˬ nu ve mvuhˇ miˬ 193 mvuhˇ miˬ pawnˇ daꞈ leh uiˍ jaˇ mvuh jaˇ ve Yaˬhoˉvaˬ leh mvuhˇ naw ma tcuh yaˇ hui htaꞈ ca bawˆ la ve htawˇ maˇ gʼaˇ taˬ. Yaˬhoˉvaˬ ka tiꞈ te piˇ ve, “ngaˬ hkʼaˬ ma uiˍ ve leh hkʼaˬ ma daꞈ kehˬ jaˇ ve awˬ lawn chaw ceuˬ hkʼa peu˗eˬ ve htaꞈ hpeuꞈ maˍ piˇ tuˬ yoˬ. Oˇ htaˇ, ngaˬ Gʼuiˬ sha hpehꞈ ve htaꞈ yawˇ hui shiˍ la tuˬ yoˬ.”—Yeˍsaˍkeˍlaˆ 38:14-16, 23; Chiˇ mvuh ve 46:10.

17. Liꞈ hpu hkʼaw kʼoˆ ve awˬ gʼuˇ suhˍ hpawˇ miˬ guiˬ hkʼoˆ lo ve jawˇ mawˇ hkʼaˬ hkʼe hpehꞈ kʼai tuˬ le? Leh Yaˬhoˉvaˬ htaꞈ ka tiꞈ yeˬ ve chaw hui hkʼaˬ hkʼe hpehꞈ tuˬ le?

¹⁷ Gawˇgaˆ Yaˬhoˉvaˬ ve chaw htaꞈ ca te luˬ la htaˇ, Aˍmaˍgeˍdonˍ hkʼaw “miˬ guiˬ ve hkunˉ hawˉ hkanˇ teˇ hpaˍ” htaꞈ Gʼuiˬ sha te luˬ piˇ tuˬ yoˬ. Chi lehˬ maꞈ awˬ leh meuˇ teˇ pawˆ hpehꞈ ve yoˬ. (Hpeuꞈ maˍ ve 16:14, 16; 19:19-21) Yaꞈ hkʼaˇ, “Gʼuiˬ sha lehˬ ka tiꞈ yeˬ ve chaw htaꞈ haꞈ shaˉ piˇ” leh miˬ guiˬ hkʼoˆ lo chehˇ tcuh tuˬ yoˬ.—Chiˇ mvuh ve 31:23; Tawˇ naˉ ve 2:21.

18. Awˬ tehˬ ve Hkriꞈ yaˇ laiˉ gʼaˇ aˬ htoꞈ ma te ve le? Leh aˬ htoꞈ ma pa taw yawˇ hui chi hkʼe te ve le? (Daˍyeˍlaˆ 3:28)

¹⁸ Peuˬ laˬ ve teˇ co˗e peuˬ teˇ co˗e yawˇ hui Yaˬhoˉvaˬ htaꞈ haꞈ leh Gʼuiˬ sha lehˬ uiˍ jaˇ mvuh jaˇ ve uˉ peunˍ shehˍ hpaˇ hpehꞈ ve pa taw, awˬ tehˬ ve Hkriꞈ yaˇ laiˉ gʼaˇ htawnˍ hkʼaw chehˇ leh hkanˍ suh ve yoˬ. Yawˇ hui hkʼaˬ hkʼe gʼa hpuˇ ve htawˇ, Yaˬhoˉvaˬ htaꞈ hkʼaˬ htaˆ kaꞈ ka tiꞈ yeˬ ve yoˬ. Yawˇ hui uiˍ jaˇ mvuh jaˇ ve Gʼuiˬ sha htaꞈ ka tiꞈ yeˬ tuˬ dawˇ teh taˍ ve pa taw, yawˇ hui lehˬ Heˍbrehˇ chaw yaˇ nehˬ 3 gʼaˇ aˬ miˍ beuꞈ pfuh hkʼaw baˬ keu piˇ ve htaꞈ shuˍ ve yoˬ.—Daˍyeˍlaˆ 3:28 gʼaw sheˍ.

19. Yaˬhoˉvaˬ htaꞈ ka tiꞈ yeˬ ve aˬ htoꞈ ma te a yeˇ uiˍ jaˇ tehꞈ shawˍ ve le?

¹⁹ Yaˬhoˉvaˬ htaꞈ ka tiꞈ yeˬ ve lehˬ a yeˇ uiˍ jaˇ tehꞈ ngaˬ hui shawˍ ve yoˬ. Awˬ lawn kʼo, “ka tiꞈ yeˬ leh hteˇ ve cawˇ ve chaw htaꞈ Gʼuiˬ sha awˬ bon naꞈ piˇ ve yoˬ.” (1 Saˍmo˗eˍlaˆ 26:23) Chi hkʼoˆ kaꞈ, “hteˇ ve cawˇ ve chaw lehˬ Gʼuiˬ sha htaꞈ ka tiꞈ yeˬ chehˇ ve pa taw gʼa teꞈ chehˇ tuˬ yoˬ.” (Haˍbaˍkuˆ 2:4) Ngaˬ hui te cawˇ ve daꞈ jaˇ ve awˬ ceuˬ lehˬ aˬ htoꞈ ma gʼa hpuˇ ve htawˇ maˇ kʼoˆ, Yaˬhoˉvaˬ htaꞈ hkʼaˬ htaˆ kaꞈ ka tiꞈ yeˬ gʼa yeˬ ve yoˬ. Ngaˬ hui chi hkʼe te htaˇ, Chiˇ mvuh ve liꞈ bvuhꞈ paˍ kʼoˆ ve hkʼe, “Yaˬhoˉvaˬ ve awˬ liˇ tawˇ hkawˇ htaꞈ hkʼa dehꞈ na yuˬ leh ka tiꞈ yeˬ ve chaw hui lehˬ gʼa ha lehˬ ve yoˬ.”—Chiˇ mvuh ve 119:1.