1-2. (a) Heuˆ daꞈ gehˇ sheˍ ve aˬ htoˬ ma te Yaˬhoˉvaˬ htaꞈ gʼaˇ va cawˇ ve le? (Chiˇ mvuh ve 37:3, 4) (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 Nawˬ heuˆ daꞈ tuˬ te chehˇ ve maˇ heˆ leh heuˆ daꞈ gehˇ sheˍ ve laˇ? Nawˬ lehˬ nawˬ haꞈ ve chaw geh ha lehˬ ha kʼa chehˇ gaˇ ve yoˬ. Awˬ ca lehˬ shoꞈ shaꞈ ve cawˬ leh a yeˇ uiˍ ve laiˉ ceuˬ gʼa dawˇ cheˆ ve htaꞈ nawˬ mawˬ˗aw laˇ? Nawˬ shoꞈ shaꞈ ve htaꞈ gu leh dawˇ cheˆ ve awˬ lawn teˇ hpaˍ nawˬ ve awˬ ca htaꞈ a shaꞈ teꞈ kuiˬ hkʼaw heuˆ la kuiˬ awˬ yanˇ maw chaweh cawˬ ve yoˬ. Chi htaꞈ pa taw, Yaˬhoˉvaˬ beˆ maˍ laˇ ve htaꞈ nawˬ gʼaˇ va ve kʼo, nawˬ cawˇ ve hkʼaw dawˇ cheˆ gʼa ve, awˬ ca geh ha lehˬ ve cawˬ leh haꞈ daꞈ maˇ la tuˬ yoˬ. Leh Yaˬhoˉvaˬ beˆ maˍ laˇ ve htaꞈ nawˬ maˇ gʼaꞈ te ve kʼo, nawˬ ve awˬ ca geh shoꞈ shaꞈ ve cawˬ leh ha lehˬ ve kaꞈ maˇ cawˬ.—Chiˇ mvuh ve 37:3, 4 gʼaw sheˍ.

² Awˬ lawn chi ve hkʼaw heuˆ daꞈ gehˇ sheˍ ve chaw htaꞈ kʼoˆ ve htawˇ, awˬ hpawˇ awˬ miˇ ma shoꞈ shaꞈ ve gʼa hpuˇ ve teˇ hpaˍ htaꞈ kʼoˆ taˍ ve ngaˬ hui gʼa mawˬ ve yoˬ. Liꞈ hpu ve awˬ co˗e htaˇ, Gʼuiˬ sha ve kanˉ te ve chaw ka tiꞈ yeˬ ve chaw ve awˬ lawn teˇ geh nyi sheˍ. Ngaˬ hui ve awˬ ca geh yuˬ yehˇ gʼa tuˬ, yawˇ hui ve awˬ lawn htaꞈ ngaˬ hui aˬ htoꞈ ma henˇ yuˬ gʼa ve teˇ geh nyi sheˍ. Chi beuꞈ teˇ co˗e ve awˬ viˉ awˬ nyi teˇ ca ca ve awˬ lawn kaꞈ ngaˬ hui henˇ yuˬ gʼa ve yoˬ.

3-4. Heuˆ daꞈ gehˇ sheˍ ve awˬ ca aˬ htoꞈ ma gʼa hpuˇ ve le?

³ Heuˆ daꞈ gehˇ sheˍ ve chaw awˬ pon dawˇ haˍ ve chaw lehˬ yawˇ awˬ nu ve chaw hkʼe te tuˬ kʼoˆ piˇ ve yoˬ. Tawˇ pa haˉ te kʼo, awˬ pa awˬ e maˇ heˆ leh, awˬ viˉ awˬ nyi yawˇ hui htaꞈ yaˇ haˆ haˆ cawˬ tuˬ nyiˉ piˇ  ve yoˬ. Awˬ chawˇ maˇ heˆ leh yehˬ kʼa hkʼaw ve chaw yawˇ hui yehˬ vuiˬ leh yehˬ hkʼaw mawˇ daꞈ daꞈ ve cawˬ tuˬ kʼoˆ piˇ ve yoˬ.

⁴ Yawˇ hui shaˍ tiꞈ maˇ te ve kʼo, jeˬ cha tuˬ yoˬ. Jeˬ shaiˍ tuˬ awˬ hpawˇ awˬ miˇ ma kaꞈ kanˉ gʼa te ve yoˬ. Yawˇ hui a shu yawˇ hkʼaˇ yawˇ Liꞈ hpu henˇ ve, yehˬ kʼa hkʼaw oˉ kʼoˍ pui ve, maˇ heˆ leh hto toˇ˗e ve, yawˇ hui hkʼa dehꞈ maˇ te gʼa tuˬ yoˬ hehˉ. Yawˇ hui hpu maˇ maˇ gʼa tuˬ kanˉ awˬ leuˉ te leh kanˉ hkʼaˬ htaˆ kaꞈ te tuˬ, chaw teˇ hpaˍ teˇ pawˆ pawˆ kʼo, hpawnˬ daꞈ ve maˇ kʼai gʼa ve yoˬ. Chi hkʼe te htaˇ, Yaˬhoˉvaˬ ve kanˉ maˇ maˇ te ve hkʼaˬ hkʼe taw ha lehˬ tuˬ te laˇ ve htaꞈ yawˇ hui shonˇ kʼai ve yoˬ.

5. Hkeh˗la leh Ma˗re˗shaˇ ve awˬ lawn nawˬ htaꞈ aˬ htoꞈ ma maˍ laˇ ve le?

⁵ Hpu chi ma ma ca ve ha lehˬ kuiˬ maˇ cawˬ ve tehꞈ laiˉ gʼaˇ ve awˬ lawn htaꞈ gʼa mawˬ ve yoˬ. Hkeh˗la leh Ma˗re˗shaˇ kaꞈ chi hkʼe dawˇ ve yoˬ. * Yawˇ hui a shaꞈ teꞈ kuiˬ hkʼaw hpehꞈ sha gaˇ ve pa taw, awˉ lawˉ htaˇ yawˇ hui kanˉ teˇ nyi le le te ve yoˬ. Yaꞈ hkʼaˇ, yawˇ hui ha lehˬ kuiˬ maˇ cawˬ. Hkeh˗la kʼoˆ ve, “yehˬ hkʼaw mawˇ maˇ yehˇ cawˇ ve kaꞈ maˇ jaˇ. Yaꞈ hkʼaˇ, ngaˬ hui Gʼuiˬ sha ve kanˉ maˇ maˇ te tuˬ maˇ dawˇ teh taˍ ve pa taw, ngaˬ ve a shaꞈ teꞈ kuiˬ hkʼaw shoꞈ shaꞈ leh dawˇ maˇ jaˇ.” Hpu chi ma ma ca ve lehˬ ha lehˬ kuiˬ maˇ cawˬ ve tehꞈ teˇ pawˆ pawˆ kʼo, nawˬ gʼa hpuˇ ve yoˬ. Yaꞈ hkʼaˇ, awˬ gʼaˇ taˇ nuˇ. Awˬ nu ve chaw daꞈ ve awˬ lawn htaꞈ nawˬ henˇ yuˬ gʼa ve yoˬ. Awˬ hpawˇ hpehꞈ ve chaw lehˬ Yawˇshaˍhpaˆ ve awˬ lawn htaꞈ hkʼaˬ hkʼe henˇ yuˬ gʼa ve chi teˇ hpaˍ teˇ geh nyi sheˍ.

6. Jawˇmawˇ Yawˇshaˍhpaˆ shoꞈ shaꞈ ve awˬ lawn gʼa hpuˇ htaˇ Tawˇ naˉ ve liꞈ 3:5, 6 hkʼaw beˆ maˍ laˇ taˍ ve htaꞈ hkʼaˬ hkʼe gʼaꞈ te ve le?

⁶ Nawˬ awˬ hpawˇ hpehꞈ ve kʼo teˇ pawˆ pawˆ kʼo, nawˬ awˬ vuiˬ cawˬ maˇ jaˇ ve pa taw, te maˇ gʼa˗o tehꞈ dawˇ ve yoˬ hehˉ. Nawˬ chi hkʼe dawˇ ve kʼo, jawˇ mawˇ Yawˇshaˍhpaˆ ve awˬ lawn htaꞈ teˇ geh nyi sheˍ. Yawˇ mvuhˇ miˬ hkʼaw ve chaw hkʼa peu˗eˬ htaꞈ nyi haꞈ shaˉ tuˬ awˬ vuiˬ cawˬ ve yoˬ. Chi yawˇ hkʼaˬ hkʼe te gʼa ve le? Yawˇ uˉ peunˍ ve awˬ hawˉ lo chehˇ ve chaw htaꞈ haꞈ shaˉ tuˬ, Yuˇdaꞈ mvuhˇ miˬ hkʼaw taꞈ yehˬ teˇ hpaˍ te leh maꞈ yaˇ 1,160,000 gʼaˇ shaw hpoˆ ve yoˬ. (2 Raˍsaˍvanˍ 17:12-19) Peuˬ hkʼawꞈ nawˉ, Yawˇshaˍhpaˆ shoꞈ shaꞈ ve awˬ lawn gʼa hpuˇ ve yoˬ. Yawˇ leh yawˇ ve yehˬ kʼa leh mvuhˇ miˬ yaˇ hkʼa peu˗eˬ htaꞈ Mawˇbaˆ chaw, Aˍmonˍ chaw leh Eˇdonˍ chaw ca bawˆ la tuˬ yoˬ tehꞈ kʼoˆ piˇ ve yoˬ. (2 Raˍsaˍvanˍ 20:1, 2) Yawˇshaˍhpaˆ hkʼaˬ hkʼe te ve le? Yawˇ nyi ma nuˇ nehˬ ve hkʼaw Yaˬhoˉvaˬ ga laˇ tuˬ bon lawˬ ve yoˬ. Tawˇ naˉ ve liꞈ 3:5, 6 hkʼaw beˆ maˍ laˇ taˍ ve htaꞈ yawˇ gʼaꞈ te ve yoˬ. (gʼaw sheˍ) 2 Raˍsaˍvanˍ liꞈ 20:5-12 hkʼaw Yawˇshaˍhpaˆ ve bon lawˬ hkawˇ htaꞈ ngaˬ hui mawˬ gʼa ve yoˬ. Yawˇ Yaˬhoˉvaˬ htaꞈ gʼaˇ hkʼaˬ hkʼe taw va ve chi ve hkʼaw ngaˬ hui mawˬ gʼa ve yoˬ. Leh Yaˬhoˉvaˬ yawˇ ve bon lawˬ hkawˇ htaꞈ hkʼaˬ hkʼe hkʼawꞈ piˇ ve le?

7. Yawˇshaˍhpaˆ ve bon lawˬ hkawˇ htaꞈ Yaˬhoˉvaˬ hkʼaˬ hkʼe hkʼawꞈ piˇ ve le?

⁷ Yaˬhoˉvaˬ Yawˇshaˍhpaˆ htaꞈ tawˇ yaw piˇ tuˬ, Leˍviˆ chaw Yaˍhaˍzeˍlaˆ htaꞈ cuˇ ve yoˬ. Yaˬhoˉvaˬ kʼoˆ ve, “chehˇ kuiˬ yuˬ leh law nyi taˍ ve tiˉ te˗o. Gʼuiˬ sha nawˬ hui htaꞈ gʼaˇ shehˍ hpaˇ hpehꞈ la piˇ ve htaꞈ nawˬ hui gʼa mawˬ tuˬ yoˬ.” (2 Raˍsaˍvanˍ 20:13-17) Awˬ tehˬ kʼo, chi ve maꞈ bawˆ daꞈ ve teˇ  pawˆ le le htaꞈ maˇ shuˍ. Beˆ maˍ laˇ ve chi chaw yaˇ geh laˬ ve maˇ heˆ. Yaˬhoˉvaˬ Gʼuiˬ sha geh laˬ ve yoˬ. Yawˇshaˍhpaˆ Yaˬhoˉvaˬ htaꞈ gʼaˇ va leh Yaˬhoˉvaˬ kʼoˆ piˇ ve hkʼe gʼaꞈ te ve pa taw, maꞈ bawˆ cheuˬ ve chaw gʼuˇ suhˍ lo kʼai tcuh ve maˇ heˆ. Laꞈ caˉ maˇ cawˬ ve chaw htaꞈ gʼuˇ suhˍ kʼai tcuh leh Yaˬhoˉvaˬ htaꞈ kʼa muiˬ chiˇ mvuh tcuh ve yoˬ. Yaˬhoˉvaˬ Yawˇshaˍhpaˆ htaꞈ nyi ma luˬ tuˬ maˇ te piˇ. Yawˇ canˇ paˍ htaꞈ gʼaˇ tuˬ Gʼuiˬ sha ga piˇ ve yoˬ.—2 Raˍsaˍvanˍ 20:18-23.

8. Yawˇshaˍhpaˆ ve awˬ lawn htaꞈ awˬ hpawˇ hkʼaˬ hkʼe henˇ yuˬ gʼa ve le?

⁸ Awˬ hpawˇ hpehꞈ ve chaw˗oˬ, jawˇ mawˇ Yawˇshaˍhpaˆ ve awˬ lawn htaꞈ laiˉ ceuˬ henˇ yuˬ gʼa ve yoˬ. Nawˬ lehˬ nawˬ ve yehˬ kʼa htaꞈ haꞈ shaˉ tuˬ awˬ vuiˬ cawˬ ve yoˬ. Shoꞈ shaꞈ ve awˬ lawn cawˬ htaˇ nawˬ hkʼaˇ nawˬ gu gʼa ve tehꞈ dawˇ ve yoˬ. Yaꞈ hkʼaˇ, nawˬ awˬ to htaꞈ gʼaˇ taˇ va sheˍ. Nawˬ Yaˬhoˉvaˬ ga laˇ tuˬ bon lawˬ sheˍ. Chi hkʼoˆ kaꞈ, nawˬ miˇ ma geh bon teˇ geh lawˬ leh nyi ma hkʼaw cawˬ ve awˬ ceuˬ Yaˬhoˉvaˬ htaꞈ kʼoˆ maˍ piˇ sheˍ. Liꞈ hpu hkʼaw leh Gʼuiˬ sha ve kanˉ hkʼaˇ hkʼaw beˆ maˍ laˇ ve htaꞈ hpfuhˆ nyi sheˍ. Liꞈ hpu hkʼaw beˆ maˍ laˇ ve htaꞈ nawˬ gʼaꞈ te htaˇ, shu maˇ dawˇ cawˇ taˬ. Nawˬ chi hkʼe te ve kʼaˍ jaˇ tehꞈ yawˇ hui kʼoˆ leh hpu lehˬ teˇ ceuˬ le le htaꞈ vuiˬ gʼa ve pa taw, hpu teˇ ceuˬ ceh tiˉ yehˬ kʼa hkʼaw ha lehˬ leh kawˆ ve maˇ cawˬ tuˬ te laˇ gʼa ve tehꞈ yawˇ hui kʼoˆ ve yoˬ. Yaꞈ hkʼaˇ, Yawˇshaˍhpaˆ ve awˬ lawn htaꞈ tawnˇ taˍ sheˍ. Yawˇ Yaˬhoˉvaˬ htaꞈ gʼaˇ va leh gʼaꞈ te ve yoˬ. Yaˬhoˉvaˬ Yawˇshaˍhpaˆ htaꞈ maˇ baˬ taˉ ve hkʼe, nawˬ htaꞈ kaꞈ yawˇ maˇ baˬ taˉ laˇ taˬ. (Chiˇ mvuh ve 37:28; Heˍbrehˇ 13:5) Awˬ hpawˇ awˬ miˇ ma ha lehˬ gʼa tuˬ, aˬ htoꞈ ma te gʼa sheˍ ve le?

9. Tcuh kaˍ paˍ Iˉsaˍyaˆ leh awˬ miˇ ma yawˇ hui ve awˬ lawn htaꞈ ngaˬ hui hkʼaˬ hkʼe henˇ yuˬ gʼa ve le?

⁹ Tcuh kaˍ paˍ Iˉsaˍyaˆ leh yawˇ ve awˬ miˇ ma yawˇ hui a shaꞈ teꞈ kuiˬ hkʼaw Yaˬhoˉvaˬ ve kanˉ a yeˇ uiˍ jaˇ tehꞈ shawˍ ve yoˬ. Iˉsaˍyaˆ tcuh kaˍ paˍ hpehꞈ leh yawˇ ve awˬ miˇ ma kaꞈ tcuh kaˍ ma tehꞈ kʼoˆ ve pa taw, Iˉsaˍyaˆ ve awˬ miˇ ma kaꞈ tcuh kaˍ paˍ htaꞈ caˉ daꞈ ve awˬ vuiˬ te tuˬ gʼa ve yoˬ hehˉ. (Iˉsaˍyaˆ 8:1-4) Yawˇ hui a shaꞈ teꞈ kuiˬ hkʼaw a yeˇ uiˍ jaˇ ve lehˬ, Yaˬhoˉvaˬ htaꞈ oˉ kʼoˍ pui ve tehꞈ hkʼa tawˍ lehˆ gʼa mawˬ ve yoˬ. Yawˇ hui ve awˬ lawn chi beuꞈ teˇ co˗e ve awˬ hpawˇ awˬ miˇ ma awˬ pon daꞈ jaˇ ve henˇ yuˬ tuˬ hpehꞈ ve yoˬ.

10. Liꞈ hpu hkʼaw tcuh kaˍ paˍ ve tawˇ hkawˇ henˇ ve lehˬ awˬ hpawˇ awˬ miˇ ma Yaˬhoˉvaˬ ve kanˉ maˇ maˇ te tuˬ dawˇ teh taˍ ve htaꞈ hkʼaˬ hkʼe ga piˇ ve le?

¹⁰ Awˬ hpawˇ awˬ miˇ ma a shaꞈ teꞈ kuiˬ hkʼaw Yaˬhoˉvaˬ ve kanˉ a yeˇ uiˍ jaˇ ve tehꞈ shawˍ tuˬ, te gʼa ve hkʼe te ve yoˬ. Yawˇ hui tcuh kaˍ paˍ ve tawˇ hkawˇ teˇ geh chaˬ nyi leh chi hkʼaˬ hkʼe hpehꞈ gʼa ve htaꞈ mawˬ˗oˬ htaˇ, yawˇ hui Yaˬhoˉvaˬ htaꞈ hkʼa dehꞈ yonˍ tuˬ te piˇ ve yoˬ. * (Tiˇtuˆ 1:2) Chi hkʼoˆ kaꞈ, tcuh kaˍ paˍ ve tawˇ hkawˇ awˬ tehˬ hpehꞈ la tuˬ yawˇ hui aˬ htoꞈ ma gʼa ga cawˇ ve htaꞈ dawˇ nyi ve yoˬ. Tawˇ pa haˉ te kʼo, awˬ leh meuˇ ve awˬ yanˇ maˇ gaˬ la sheˍ htaˇ, miˬ guiˬ chi hkʼoˆ teˇ kaˬ le le lo hto toˇ tuˬ, yawˇ hui tcuh kaˍ paˍ ve tawˇ hkawˇ Yeˍsuˆ kʼoˆ taˍ ve htaꞈ awˬ tehˬ hpehꞈ la tuˬ ga piˇ ve yoˬ. (Maꞈhtehˍ 24:14) Liꞈ hpu hkʼaw tcuh kaˍ paˍ ve tawˇ hkawˇ awˬ tehˬ hpehꞈ la chehˇ ve htaꞈ awˬ hpawˇ awˬ miˇ ma yonˍ ve yoˬ. Yawˇ hui kaꞈ Yaˬhoˉvaˬ ve kanˉ te gʼa ve hkʼe maˇ maˇ te ve yoˬ.

11. Piˇkiˇlaˆ leh Aˍkuˉlaˆ ve a shaꞈ teꞈ hkʼaˇ pa kʼai ve htawˇ, yawˇ hui hkʼaˬ hkʼe te ve le? Leh aˬ htoꞈ ma pa taw le?

¹¹ Awˬ hpawˇ awˬ miˇ ma a shaꞈ maˇ maˇ sheˍ ve Piˇkiˇlaˆ leh Aˍkuˉlaˆ ve awˬ lawn htaꞈ henˇ yuˬ gʼa ve yoˬ. Yawˇ hui lehˬ Roˉmaꞈ venˇ hkʼaw chehˇ ve Yuˇdaꞈ chaw hpehꞈ ve yoˬ. Yawˇ hui Yeˍsuˆ ve ha lehˬ ve bon hkawˇ htaꞈ gʼa kaˇ htaˇ, Hkriꞈ yaˇ  hpehꞈ la ve yoˬ. Yawˇ hui lehˬ oˇ ve teˇ yanˇ a shaꞈ teꞈ hkʼaˇ htaꞈ nyi hkʼaˇ suh ve yoˬ hehˉ. Yaꞈ hkʼaˇ, awˬ hkʼawꞈ nawˉ htaˇ awˬ tcuhˉ awˬ yanˇ pa kʼai ve pa taw, Yuˇdaꞈ chaw hkʼa peu˗eˬ Roˉmaꞈ venˇ hkʼaw gʼa tawˆ kʼai ve tehꞈ jawˇ mawˇ Kaˍlawˇdiˆ tawˇ piˇ ve yoˬ. Piˇkiˇlaˆ leh Aˍkuˉlaˆ kaꞈ chi hkʼaˬ hkʼe heuˆ la kuiˬ cawˬ ve htaꞈ dawˇ nyi sheˍ. Yawˇ hui chehˇ jaw kuiˬ htaꞈ baˬ taˉ ve, yehˬ awˬ suhˉ ca ve, leh kanˉ kaꞈ awˬ suhˉ gʼa te ve yoˬ. Chi hkʼe pa ve pa taw, yawˇ hui Gʼuiˬ sha ve mvuhˇ miˬ htaꞈ a yeˇ hkʼa dehꞈ maˇ yuˬ tuˬ te piˇ˗aw laˇ? Maˇ te piˇ. Yawˇ huiˉ maˬ Kawˇrenˍhtuˆ venˇ lo kʼai ve htaꞈ ngaˬ hui gʼa mawˬ ve yoˬ. Awˬ viˉ awˬ nyi yonˍ hkʼaˇ uiˍ la mvuh la tuˬ, yawˇ hui oˇ kaˬ lo ve Hkriꞈ yaˇ awˬ moˍ htaꞈ ga piˇ leh Pawˇluꞈ geh teˇ geh kanˉ te ve yoˬ. Leh peuˬ hkʼawꞈ nawˉ kaꞈ bon maˍ ve loˍ jaˇ kuiˬ laiˉ venˇ lo yawˇ hui kʼai ve yoˬ. (Tcuh yaˇ 18:18-21; Roˉmaꞈ 16:3-5) Yawˇ huiˉ maˬ ve a shaꞈ teꞈ hkʼaˇ hkʼaw laiˉ ceuˬ gʼa te ve ha lehˬ jaˇ!

12. Aˬ htoꞈ ma te awˬ hpawˇ awˬ miˇ ma Gʼuiˬ sha ve kanˉ te tuˬ dawˇ teh taˍ cawˇ ve le?

¹² Chi beuꞈ teˇ co˗e ve awˬ hpawˇ awˬ miˇ ma Piˇkiˇlaˆ leh Aˍkuˉlaˆ htaꞈ henˇ yuˬ leh Gʼuiˬ sha ve mvuhˇ miˬ htaꞈ awˉ lawˉ teh cawˇ ve yoˬ. Yawˇ hui chi hkʼe te gʼa tuˬ, Gʼuiˬ sha ve kanˉ dawˇ teh taˍ ve htaꞈ caˉ daꞈ ve yaw daꞈ cawˇ ve yoˬ. Chi hkʼe te tuˬ ve daꞈ jaˇ ve awˬ yanˇ lehˬ yawˇ hui maˆ daꞈ chehˇ htaˇ yoˬ. Yawˇ huiˉ maˬ teˇ geh dawˇ cheˆ leh dawˇ teh taˍ ve htaꞈ coˇ caˇ leh gʼaꞈ te ve yoˬ. Yaˬhoˉvaˬ yawˇ hui htaꞈ hkʼaˬ hkʼe ga laˇ ve yawˇ hui hkʼa dehꞈ gʼa mawˬ tuˬ yoˬ. (Cuˇ yiˍ piˇ ve 4:9, 12) Raˆshe leh Eˇliˇsaˍbehˆ ve awˬ lawn htaꞈ teˇ geh nyi sheˍ. Raˆshe kʼoˆ ve, “ngaˬ huiˉ maˬ maˆ daꞈ chehˇ htaˇ kaꞈ Gʼuiˬ sha ve kanˉ dawˇ teh taˍ ve htaꞈ awˉ lawˉ yaw daꞈ ve yoˬ.” Eˇliˇsaˍbehˆ kʼoˆ ve, “oˇ ve teˇ yanˇ ngaˬ hui yaw daꞈ ve lehˬ, awˬ yanˇ gaˬ la htaˇ gʼa dawˇ cheˆ tuˬ awˬ pon yoˬ. Ngaˬ hui dawˇ teh taˍ ve htaꞈ teˇ ceuˬ kaꞈ maˇ tawˍ laˇ tcuh.” Raˆshe leh Eˇliˇsaˍbehˆ chi hkʼe te ve lehˬ, Mi˗kaˬro˗neˇsaˇ mvuhˇ miˬ lo hto toˇ ve chaw loˍ jaˇ kuiˬ lo jiˆ kʼai gaˇ tuˬ te piˇ ve yoˬ.

13. Chiˇ mvuh ve liꞈ 28:7 hkʼaw kʼoˆ taˍ ve hkʼe, ngaˬ hui Yaˬhoˉvaˬ htaꞈ gʼaˇ va ve kʼo awˬ bon hkʼaˬ hkʼe gʼa tuˬ le?

¹³ Chi beuꞈ teˇ co˗e ve awˬ hpawˇ awˬ miˇ ma laiˉ ca Raˆshe leh Eˇliˇsaˍbehˆ hkʼa shuˍ a shaꞈ teꞈ hkʼaˇ caˇ lawꞈ dawˬ lawꞈ te leh jeˬ maˇ te cha ve yoˬ. Hto toˇ leh shu awˬ laꞈ gʼawˇ hpehꞈ la  tuˬ maˍ piˇ ve kanˉ htaꞈ awˬ yanˇ yuˬ tanˇ ve yoˬ. Yawˇ hui Gʼuiˬ sha ve kanˉ te tuˬ dawˇ teh taˍ ve htaꞈ coˇ caˇ leh gʼaꞈ te ve yoˬ. Yawˇ hui awˬ bon laiˉ ceuˬ gʼa ve yoˬ. Yaˬhoˉvaˬ yawˇ hui htaꞈ hkʼaˬ hkʼe nyi haꞈ shaˉ laˇ ve htaꞈ gʼa mawˬ ve yoˬ. Yawˇ hui Yaˬhoˉvaˬ htaꞈ gʼaˇ hkʼa dehꞈ va leh a shaꞈ teꞈ kuiˬ hkʼaw ha lehˬ jaˇ.—Chiˇ mvuh ve 28:7 gʼaw sheˍ.

14. Peˍtruˆ leh awˬ miˇ ma Maꞈhtehˍ liꞈ 6:25, 31-34 hkʼaw ka tiꞈ te taˍ ve htaꞈ yonˍ ve tehꞈ hkʼaˬ hkʼe hpeuꞈ maw laˇ ve le?

¹⁴ Awˬ hpawˇ awˬ miˇ ma lehˬ Peˍtruˆ leh awˬ miˇ ma ve awˬ lawn htaꞈ henˇ yuˬ gʼa ve yoˬ. Peˍtruˆ Yeˍsuˆ htaꞈ mawˬ daꞈ ve awˉ lawˉ teˇ pawˆ aˬ laˬ hkʼe ha pa 6 ma te leh 1 hkʼawꞈ peuˬ hkʼawꞈ nawˉ a yeˇ uiˍ ve awˬ lawn htaꞈ gʼa dawˇ cheˆ ve yoˬ. Oˇ ve teˇ yanˇ lehˬ Peˍtruˆ ngaˇ ca paˍ hpehꞈ ve yoˬ. Yeˍsuˆ Peˍtruˆ htaꞈ Gʼuiˬ sha ve kanˉ teˇ geh te tuˬ jehˬ piˇ htaˇ, yawˇ awˬ miˇ ma htaꞈ dawˇ nawˇ jaˇ tuˬ yoˬ hehˉ. (Luˉkaꞈ 5:1-11) Awˬ leh meuˇ htaˇ, Peˍtruˆ Yeˍsuˆ geh Gʼuiˬ sha ve kanˉ teˇ geh te leh bon teˇ geh maˍ˗e ve yoˬ. Dawˇ cheˆ ve chi teˇ pawˆ cuˇ yiˍ cawˬ leh awˬ miˇ ma kaꞈ nyi ma cawˇ ve yoˬ. Liꞈ hpu hkʼaw kʼoˆ ve, Yeˍsuˆ kʼawꞈ teꞈ tu la peuˬ hkʼawꞈ nawˉ Yeˍsuˆ kaꞈ teˇ tcuhˉ teˇ yanˇ Peˍtruˆ geh Gʼuiˬ sha ve kanˉ te ve yoˬ. (1 Kawˇrenˍhtuˆ 9:5) Peˍtruˆ ve awˬ miˇ ma lehˬ daꞈ ve henˇ yuˬ tuˬ hpehꞈ ve yoˬ. Peˍtruˆ Hkriꞈ yaˇ awˬ hpawˇ awˬ miˇ ma htaꞈ beˆ maˍ piˇ tuˬ liꞈ bvuhꞈ piˇ htaˇ yawˇ hkʼa dehꞈ beˆ maˍ piˇ gʼa ve yoˬ. (1 Peˍtruˆ 3:1-7) Yawˇ hui Gʼuiˬ sha ve mvuhˇ miˬ a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve kʼo, Yaˬhoˉvaˬ yawˇ hui htaꞈ nyi haꞈ shaˉ laˇ tuˬ yoˬ tehꞈ ka tiꞈ te taˍ ve htaꞈ yawˇ hui yonˍ ve yoˬ.—Maꞈhtehˍ 6:25, 31-34 gʼaw sheˍ.

15. Ti˗a˗koˇ leh Iˉsaˍtaˆ ve awˬ lawn htaꞈ nawˬ aˬ htoꞈ ma henˇ yuˬ gʼa ve le?

¹⁵ Nawˬ heuˆ daꞈ ve laiˉ hkʼawꞈ gaˬ˗oˬ ve kʼo, nawˬ Gʼuiˬ sha ve kanˉ maˇ maˇ te gaˇ tuˬ aˬ htoꞈ ma te laˇ ve le? Awˬ hkʼaˇ teˇ hkʼaˇ lehˬ, awˬ nu ve awˬ ca hpehꞈ laˬ jaw ve awˬ lawn htaꞈ gʼaw ve yoˬ. Tawˇ pa haˉ te kʼo, laiˉ tawn cawˬ ve, “Yawˇ hui Gʼuiˬ sha ve kanˉ ha lehˬ ha kʼa te ve” htaꞈ nyi sheˍ. Awˬ lawn chi ve Baˬraˬziˇ mvuhˇ miˇ lo chehˇ ve Ti˗a˗koˇ leh Iˉsaˍtaˆ awˬ hpawˇ awˬ miˇ ma chi ve teˇ ca Gʼuiˬ sha ve kanˉ maˇ maˇ te gaˇ tuˬ te piˇ ve yoˬ. Ti˗a˗koˇ kʼoˆ ve, “awˬ viˉ awˬ nyi ve awˬ lawn gʼa gʼaw˗oˬ htaˇ, Yaˬhoˉvaˬ ngaˬ hui htaꞈ beˆ maˍ laˇ leh hkʼaˬ hkʼe nyi haꞈ shaˉ laˇ tuˬ ve htaꞈ mawˬ tuˬ te laˇ ve yoˬ.” Awˬ leh meuˇ htaˇ yawˇ huiˉ maˬ Paˬraˬgoˇ˗eˇ mvuhˇ miˬ lo jiˆ kʼai leh 2014 hkʼawꞈ htaˇ, Pawˬtuˬgiˬ tawˇ hkawˇ yaw ve awˬ ti lo Gʼuiˬ sha ve kanˉ te ve yoˬ. Iˉsaˍtaˆ kʼoˆ ve, “Liꞈ hpu awˬ tawn Eˇfeˇsuꞈ liꞈ 3:20 chi ve ngaˬ dawˇ cawˇ jaˇ. Ngaˬ hui Yaˬhoˉvaˬ ve kanˉ te htaˇ, Liꞈ hpu awˬ tawn chi ve ngaˬ hui awˬ pon awˬ tehˬ hpehꞈ la ve htaꞈ laiˉ pawˆ mawˬ ve yoˬ.” Yaˬhoˉvaˬ ngaˬ hui lawˬ ve aꞈ kehˉ peꞈ laˇ tuˬ yoˬ tehꞈ Liꞈ hpu awˬ tawn chi Eˇfeˇsuꞈ venˇ lo chehˇ ve awˬ viˉ awˬ nyi htaꞈ Pawˇluꞈ kʼoˆ piˇ ve yoˬ. Ka tiꞈ chi ve ngaˬ hui ve awˬ co˗e hkʼa gaˬ awˬ tehˬ hpehꞈ chehˇ sheˍ.

16. A shaꞈ maˇ maˇ sheˍ ve awˬ hpawˇ awˬ miˇ ma Gʼuiˬ sha ve kanˉ te tuˬ dawˇ teh taˍ gʼa tuˬ a shu ga piˇ gʼa ve le?

¹⁶ Nawˬ kaꞈ a shaꞈ maˇ maˇ sheˍ ve awˬ ca hpehꞈ ve kʼo, Yaˬhoˉvaˬ htaꞈ gʼaˇ va ve chaw ve awˬ lawn nawˬ kaꞈ awˬ bon gʼa tuˬ yoˬ. Nawˬ Gʼuiˬ sha ve kanˉ te tuˬ dawˇ teh taˍ htaˇ, Gʼuiˬ sha ve kanˉ laiˉ chi hkʼawꞈ te laˬ˗oˬ ve awˬ ca geh beˆ maˍ laˇ tuˬ lawˬ sheˍ. Nawˬ chi hkʼe te ve kʼo, nawˬ kaꞈ Yaˬhoˉvaˬ htaꞈ gʼaˇ va ve tehꞈ hpeuꞈ maw piˇ chehˇ ve yoˬ. (Tawˇ naˉ ve 22:17, 19) Chi hkʼoˆ kaꞈ, Hkriꞈ yaˇ awˬ moˍ hkʼaw nyi haꞈ shaˉ paˍ beˆ maˍ laˇ tuˬ kaꞈ nawˬ lawˬ gʼa ve yoˬ. Nawˬ Gʼuiˬ sha ve kanˉ te tuˬ dawˇ teh taˍ gʼa tuˬ leh chi ve htaꞈ gʼaꞈ te gʼa tuˬ, yawˇ hui beˆ maˍ laˇ tuˬ yoˬ.

17. Hkeh˗la leh Ma˗re˗shaˇ aˬ htoꞈ ma hpehꞈ la ve le? Leh yawˇ hui ve awˬ lawn htaꞈ ngaˬ hui aˬ htoꞈ ma henˇ yuˬ gʼa ve le?

¹⁷ Teˇ pawˆ pawˆ Yaˬhoˉvaˬ ve kanˉ maˇ maˇ te tuˬ dawˇ teh taˍ ve hkʼe, te maˇ gʼa ve yoˬ. Tawˇ pa haˉ  te kʼo, Hkeh˗la leh Ma˗re˗shaˇ chi awˬ gʼuˇ suhˍ htaˇ kʼoˆ kʼai peuˬ ve yawˇ huiˉ maˬ heuˆ daꞈ ve 3 hkʼawꞈ peuˬ hkʼawꞈ nawˉ, Fiˬlanˬ mvuhˇ miˬ Awˬ tcuhˆ puiˍ hkʼaw yehˬ te ve hpawˇ ca ga˗e tuˬ, dawˇ cheˆ leh kʼai ve yoˬ. Oˇ kaˬ lo 6 ha pa awˬ leuˉ chehˇ maˇ gʼa ve htaꞈ yawˇ hui shiˍ la ve yoˬ. Chi hkʼe shiˍ la htaˇ nyi ma luˬ jaˇ. Peuˬ hkʼawꞈ nawˉ, Aˍraˆ ve tawˇ hkawˇ henˇ tuˬ kuˬ laˇ ve yoˬ. Chi teˇ hkui yawˇ hui awˬ nu ve teˇ mvuhˇ miˬ lo Aˍraˆ ve tawˇ hkawˇ yehˇ tuˬ Gʼuiˬ sha ve kanˉ gʼa te ve ha lehˬ jaˇ. Ma˗re˗shaˇ kʼoˆ ve, “maˇ te jaw ve awˬ ceuˬ htaꞈ gʼa te ve kawˆ jaˇ. Leh awˬ lawn chi ve hkʼa peu˗eˬ Yaˬhoˉvaˬ htaꞈ gʼaˇ va leh chiˇ aꞈ piˇ ve yoˬ. Ngaˬ hui maˇ dawˇ maˇ gaˇ ve hkʼaw Yaˬhoˉvaˬ ga laˇ ve laiˉ ceuˬ htaꞈ gʼa mawˬ ve yoˬ. Chi hkʼe ve htaꞈ ngaˬ gʼa hpuˇ htaˇ ngaˬ Yaˬhoˉvaˬ htaꞈ gʼaˇ hkʼa dehꞈ va la ve yoˬ.” Nawˬ nyi ma awˬ tawˬ hkʼa gaˬ Yaˬhoˉvaˬ htaꞈ gʼaˇ va ve kʼo, Yaˬhoˉvaˬ nawˬ htaꞈ awˬ bon naꞈ laˇ tuˬ yoˬ tehꞈ awˬ lawn chi ve nawˬ yonˍ gʼa ve yoˬ.

18. Awˬ hpawˇ awˬ miˇ ma Yaˬhoˉvaˬ htaꞈ caˉ leh gʼaˇ va tuˬ aˬ htoꞈ ma gʼa te cawˇ ve le?

¹⁸ Awˬ ca lehˬ Yaˬhoˉvaˬ geh gʼa ve laꞈ shawnˍ hpehꞈ ve yoˬ. (Maꞈhtehˍ 19:5, 6) Laꞈ shawnˍ chi ve htaꞈ Yaˬhoˉvaˬ awˬ hpawˇ awˬ miˇ ma htaꞈ ha lehˬ tcuh gaˇ ve yoˬ. (Tawˇ naˉ ve 5:18) Nawˬ a shaꞈ maˇ maˇ sheˍ ve awˬ ca hpehꞈ ve kʼo, chi teˇ hkui nawˬ ve a shaꞈ teꞈ hkʼaˇ hkʼaˬ hkʼe te chehˇ ve dawˇ nyi sheˍ. Yaˬhoˉvaˬ nawˬ htaꞈ laꞈ shawnˍ peꞈ laˇ ve htaꞈ awˬ hpfuhˇ shiˍ leh nawˬ Yaˬhoˉvaˬ ve kanˉ hkʼa dehꞈ te chehˇ˗aw laˇ? Nawˬ bon lawˬ htaˇ Yaˬhoˉvaˬ geh yaw daꞈ sheˍ. Nawˬ hpehꞈ chehˇ ve awˬ yanˇ htaꞈ hawˍ daꞈ tuˬ Liꞈ hpu hkʼaw ve awˬ liˇ awˬ hkʼaˇ htaꞈ ca leh Yaˬhoˉvaˬ kʼoˆ laˇ ve hkʼe gʼaꞈ te sheˍ. Chi hkʼe te ve kʼo, nawˬ ve a shaꞈ teꞈ hkʼaˇ ha lehˬ jaˇ tuˬ yoˬ tehꞈ nawˬ yonˍ gʼa ve yoˬ. Leh nawˬ ve awˬ ca geh Yaˬhoˉvaˬ ve kanˉ te ve htaꞈ a yeˇ uiˍ jaˇ tehꞈ nawˬ shawˍ ve kʼo, awˬ bon maˇ maˇ gʼa tuˬ yoˬ!