1. Ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?

 Maˇ maw ve awˬ yanˇ maˇ heˆ heˆ ve bon liˇ htaꞈ te luˬ htaˇ, Gawˇgaˆ leh Maˍgawˇgaˆ ca bawˆ la htaˇ, leh Aˍmaˍgeˍdonˍ maꞈ gaˬ la htaˇ, nawˬ chi teˇ hpaˍ htaꞈ dawˇ nyi ve kʼo dawˇ haˍ ve yoˬ hehˉ. ‘Oˇ ve teˇ yanˇ gaˬ kʼo ngaˬ ponˬ gʼa tuˬ ve laˇ? Leh ka tiꞈ yeˬ gʼa tuˬ ve laˇ?’ Nawˬ a shu yawˇ awˬ to htaꞈ chi hkʼe na nyi gʼa ve yoˬ. Nawˬ chi hkʼe dawˇ ve kʼo, awˬ lawn chi ve hkʼaw a yeˇ uiˍ ve Liꞈ hpu awˬ tawn Yeˍsuˆ kʼoˆ ve tawˇ hkawˇ htaꞈ caˉ daꞈ ve teˇ geh nyi sheˍ. Yawˇ awˬ laꞈ gʼawˇ htaꞈ kʼoˆ piˇ ve, “nawˬ hui ve nyi ma taˇ dawˇ haˍ gaˇ haˍ. Gʼuiˬ sha htaꞈ yonˍ˗oꞈ.” (Yoˇhanˬ 14:1) Nawˬ ve yonˍ hkʼaˇ yonˍ yeˬ ve kʼo, awˬ gʼuˇ suhˍ hpawˇ hpehꞈ la tuˬ ve awˬ ceuˬ teˇ hpaˍ htaꞈ nawˬ ponˬ gʼa tuˬ yoˬ tehꞈ yonˍ gʼa ve yoˬ.

2. Ngaˬ hui ve yonˍ hkʼaˇ yonˍ yeˬ tuˬ aˬ htoꞈ ma gʼa te cawˇ ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Ngaˬ hui ve yonˍ hkʼaˇ yonˍ yeˬ gaˇ ve kʼo, chi teˇ hkui ngaˬ hui yonˍ ve htaꞈ lawˇ nyi laˇ ve gʼa hpuˇ htaˇ, ngaˬ hui hkʼaˬ hkʼe haꞈ yuˬ gʼa tuˬ teˇ geh chaˬ nyi sheˍ. Ngaˬ hui chi hkʼe te ve kʼo, ngaˬ hui ve yonˍ hkʼaˇ yonˍ yeˬ maˇ la tuˬ hkʼaˬ ve teˇ ceuˬ ga laˇ gʼa ve htaꞈ shiˍ tuˬ yoˬ. Beˬ ve lawˇ ve htaꞈ ponˬ gʼa ve teˇ pawˆ le le ngaˬ hui ve yonˍ hkʼaˇ kaꞈ yonˍ yeˬ maˇ la ve yoˬ. Awˬ gʼuˇ suhˍ hpawˇ shoꞈ shaꞈ ve leh beˬ ve lawˇ ve gʼa hpuˇ htaˇ, ngaˬ hui yeunˇ hkanˍ gʼaˇ tuˬ yoˬ. Yeˍsuˆ ve awˬ laꞈ gʼawˇ beˬ ve lawˇ ve gʼa hpuˇ htaˇ, yawˇ hui ve yonˍ hkʼaˇ yonˍ yeˬ maˇ la tuˬ hkʼaˬ hkʼe gʼa te cawˇ ve htaꞈ shiˍ tuˬ, awˬ lawn chi ve hkʼaw 4 lawn htaꞈ teˇ geh henˇ tuˬ yoˬ. Leh ngaˬ hui yawˇ hui hkʼa shuˍ hkʼaˬ hkʼe ve awˬ lawn gʼa hpuˇ ve le? Leh chi ve ngaˬ hui awˬ gʼuˇ suhˍ hpawˇ hpehꞈ la tuˬ ve awˬ ceuˬ teˇ hpaˍ htaꞈ hkʼaˬ hkʼe gu hehnˇ gʼa tuˬ ga laˇ gʼa ve kaꞈ teˇ geh henˇ tuˬ yoˬ.

3. Maꞈhtehˍ liꞈ 6:30, 33 hkʼaw Yeˍsuˆ kʼoˆ ve tawˇ hkawˇ ngaˬ hui ve yonˍ hkʼaˇ htaꞈ na gʼa tuˬ hkʼaˬ hkʼe ga laˇ ve le?

³ Yehˬ shehˍ hpaˇ lehˬ awˬ miˇ ma leh yaˇ caˇ tuˬ, veuꞈ kʼaˇ, leh chehˇ kuiˬ daꞈ daꞈ cawˬ tcuh gaˇ ve yoˬ. Yaꞈ hkʼaˇ, laiˉ pawˆ kʼo, chi sha ve maˇ heˆ. Awˬ viˉ awˬ nyi teˇ hpaˍ hpaˍ kanˉ maˇ gʼa te˗o leh kanˉ ca ve htawˇ ca maˇ gʼa. Shaˉhkiˆhkanˍ ve chaw maˇ te cawˇ ve kanˉ yawˇ hui maˇ te ve pa taw, kanˉ maˇ gʼa te ve yoˬ. Ngaˬ hui chi hkʼe ve gʼa hpuˇ htaˇ, ngaˬ hui ve yonˍ hkʼaˇ yonˍ yeˬ leh Yaˬhoˉvaˬ ngaˬ hui ve yehˬ kʼa htaꞈ nyi haꞈ shaˉ laˇ tuˬ yoˬ tehꞈ yonˍ gʼa ve yoˬ. Yeˍsuˆ hkʼaw pui hkʼoˆ lo bon maˍ htaˇ, awˬ lawn chi ve awˬ laꞈ gʼawˇ hkʼa dehꞈ na gʼa tuˬ ga piˇ ve yoˬ. (Maꞈhtehˍ 6:30, 33 gʼaw sheˍ.) Yaˬhoˉvaˬ ngaˬ hui htaꞈ maˇ baˬ taˉ laˇ taˬ tehꞈ yonˍ ve kʼo, Gʼuiˬ sha ve mvuhˇ miˬ leh yawˇ ve kanˉ ngaˬ hui ve a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve yoˬ. Ngaˬ hui loˍ ve awˬ ceuˬ Yaˬhoˉvaˬ ga laˇ ve tehꞈ gʼa mawˬ htaˇ, ngaˬ hui yawˇ geh meuˆ daꞈ maˇ la leh yonˍ hkʼaˇ kaꞈ yonˍ yeˬ jaˇ tuˬ yoˬ.

4-5. Yehˬ kʼa hkʼaw ve chaw a shaꞈ teꞈ kuiˬ hkʼaw loˍ ve awˬ ceuˬ htaꞈ dawˇ haˍ dawˇ hkiˉ ve gu gʼa tuˬ aˬ htoꞈ ma ga laˇ gʼa ve le?

⁴ Veˬneˬzawˇehˇlaˇ mvuhˇ miˬ lo yehˬ kʼa teˇ yehˬ kʼa a shaꞈ teꞈ kuiˬ hkʼaw loˍ ve awˬ ceuˬ htaꞈ dawˇ haˍ ve teˇ geh nyi sheˍ. Yaꞈ hkʼaˇ, Yaˬhoˉvaˬ yawˇ hui htaꞈ awˬ tehˬ awˬ na nyi haꞈ shaˉ laˇ ve htaꞈ gʼa mawˬ ve yoˬ. Oˇ htaˇ Miˆgehnˬ ve yehˬ kʼa mawˇ miˬ te caˇ ve kaꞈ yawˇ hui ve yehˬ kʼa caˇ lawꞈ cawˬ ve yoˬ. Teˇ nyi htaˇ chaw haiˬ awˬ moˍ yawˇ hui ve miˬ guiˬ htaꞈ veh yuˬ leh gʼaꞈ kʼoˬ piˇ ve yoˬ. Miˆgehnˬ awˬ pa hpehꞈ ve kʼoˆ ve, “ngaˬ hui shu ve miˬ guiˬ hkʼaw ca chehˇ˗e leh miˬ guiˬ ehˉ oˇ ve hkʼaw caˇ tuˬ laiˉ ceuˬ ti ve yoˬ. Oˇ ve teˇ nyi hkʼaw loˍ ve awˬ ceuˬ cawˬ tuˬ, teˇ shawˉ le le ngaˬ tu la htaˇ Yaˬhoˉvaˬ geh bon lawˬ ve yoˬ.” Chi teˇ yehˬ kʼa a shaꞈ teꞈ kuiˬ hkʼaw tuꞈ hkanˍ jaˇ. Yaꞈ hkʼaˇ, yawˇ hui ve yonˍ hkʼaˇ yonˍ yeˬ leh teˇ nyi le le yawˇ hui loˍ ve awˬ ceuˬ Yaˬhoˉvaˬ nyi haꞈ shaˉ laˇ tuˬ yoˬ tehꞈ yonˍ gʼa ve yoˬ. Hkʼe te leh, yawˇ hui hkʼaˬ htaˆ kaꞈ hpawnˬ daꞈ˗e ve yoˬ. Yawˇ hui a shaꞈ teꞈ kuiˬ hkʼaw Gʼuiˬ sha ve mvuhˇ miˬ htaꞈ a yeˇ uiˍ jaˇ tehꞈ shawˍ htaˇ, Yaˬhoˉvaˬ yawˇ hui htaꞈ awˬ tehˬ awˬ na nyi haꞈ shaˉ piˇ ve yoˬ.

⁵ Miˆgehnˬ ve yehˬ kʼa tuꞈ ve hkanˍ ve gʼa hpuˇ htaˇ, yawˇ ve awˬ miˇ ma Yu˗lai Yaˬhoˉvaˬ yawˇ hui htaꞈ hkʼaˬ hkʼe nyi haꞈ shaˉ laˇ ve htaꞈ gʼa mawˬ ve yoˬ. Teˇ pawˆ pawˆ Yaˬhoˉvaˬ awˬ viˉ awˬ nyi htaꞈ cuˇ leh yawˇ hui loˍ ve awˬ ceuˬ ga piˇ tcuh ve, leh awˬ viˉ awˬ nyi teˇ hpaˍ kʼo Miˆgehnˬ htaꞈ kanˉ ca piˇ ve yoˬ. Gʼuiˬ sha kaꞈ awˬ tcuhˆ puiˍ htaꞈ cuˇ leh yawˇ hui loˍ ve awˬ ceuˬ ga piˇ tcuh ve yoˬ. Yaˬhoˉvaˬ yawˇ hui htaꞈ maˇ baˬ taˉ jaw leh yawˇ hui ve yehˬ kʼa hkʼaw ve chaw teˇ gʼaˇ le le yonˍ hkʼaˇ yonˍ yeˬ jaˇ ve htaꞈ gʼa mawˬ ve yoˬ. Yawˇ hui ve yaˇ miˇ uiˍ Ho˗se˗li Yaˬhoˉvaˬ hkʼaˬ hkʼe ga laˇ ve htaꞈ kʼoˆ maˍ laˇ tuˬ yoˬ. Yawˇ kʼoˆ ve, “ngaˬ ha lehˬ jaˇ. Yaˬhoˉvaˬ ve laꞈ sheh ngaˬ hui htaꞈ ga laˇ ve tehꞈ ngaˬ hkʼa tawˍ lehˆ gʼa mawˬ ve yoˬ. Chi teˇ hkui Yaˬhoˉvaˬ lehˬ ngaˬ ve awˬ chawˇ meuˆ daꞈ jaˇ ve hpehꞈ leh ngaˬ ve a shaꞈ yawˇ htaꞈ chiˇ aꞈ piˇ gʼa ve tehꞈ ngaˬ dawˇ ve yoˬ. Leh ngaˬ hui ve yehˬ kʼa tuꞈ ve hkanˍ ve gʼa hpuˇ ve htawˇ, awˬ gʼuˇ suhˍ hpawˇ tuꞈ jaˇ hkanˍ jaˇ ve htaꞈ gu hehnˇ taˍ gʼa tuˬ ga laˇ ve yoˬ.”

6. Taˇ kanˬ hpawˇ shoꞈ shaꞈ ve gʼa hpuˇ ve htawˇ, nawˬ ve yonˍ hkʼaˇ yonˍ yeˬ ve cawˬ tuˬ aˬ htoꞈ ma ga laˇ gʼa ve le?

⁶ Nawˬ taˇ kanˬ hpawˇ shoꞈ shaꞈ ve gʼa hpuˇ chehˇ˗aw laˇ? Chi ve lehˬ tuꞈ ve hkanˍ ve awˬ yanˇ hpehꞈ ve htawˇ, awˬ yanˇ chi ve hkʼaw nawˬ ve yonˍ  hkʼaˇ yonˍ yeˬ maˇ la tuˬ te sheˍ. Nawˬ Yaˬhoˉvaˬ geh bon lawˬ leh Maꞈhtehˍ liꞈ 6:25-34 hkʼaw Yeˍsuˆ kʼoˆ taˍ ve tawˇ hkawˇ htaꞈ dawˇ nyi sheˍ. Chi hkʼoˆ kaꞈ, Yaˬhoˉvaˬ ve kanˉ maˇ maˇ te ve chaw yawˇ hkʼaˬ hkʼe ga piˇ ve awˬ viˉ awˬ nyi laiˉ gʼaˇ ve awˬ lawn htaꞈ teˇ geh nyi sheˍ. (1 Kawˇrenˍhtuˆ 15:58) Yaˬhoˉvaˬ yawˇ hui htaꞈ ga piˇ ve nawˬ mawˬ htaˇ, yawˇ nawˬ htaꞈ kaꞈ ga laˇ tuˬ yoˬ tehꞈ yonˍ gʼa ve yoˬ. Nawˬ aˬ htoꞈ ma cawˬ cawˇ ve leh hkʼaˬ hkʼe ga laˇ cawˇ ve yawˇ shiˍ ve yoˬ. Yaˬhoˉvaˬ nawˬ htaꞈ awˬ tehˬ awˬ na ga laˇ ve nawˬ mawˬ htaˇ, nawˬ ve yonˍ hkʼaˇ yonˍ yeˬ maˇ la tuˬ yoˬ. Chi teˇ hkui tuꞈ ve hkanˍ ve aꞈ kehˉ awˬ gʼuˇ suhˍ hpawˇ gʼa hpuˇ tuˬ ve htaꞈ nawˬ yeunˇ hkanˍ gʼaˇ tuˬ yoˬ.—Haˍbaˍkuˆ 3:17, 18.

7. Maꞈhtehˍ liꞈ 8:23-26 hkʼaw kʼoˆ taˍ ve hkʼe, “mvuhˇ haw lonˉ” awˬ laꞈ gʼawˇ hui ve yonˍ hkʼaˇ htaꞈ hkʼaˬ hkʼe lawˇ nyi piˇ ve le?

⁷ Yeˍsuˆ leh awˬ laꞈ gʼawˇ hui mvuhˇ haw lonˉ htaꞈ gʼa hpuˇ htaˇ, awˬ yanˇ chi ve hkʼaw yawˇ hui ve yonˍ hkʼaˇ yonˍ yeˬ ve gʼa cawˬ cawˇ ve tehꞈ mawˬ tuˬ yawˇ ga piˇ ve yoˬ. (Maꞈhtehˍ 8:23-26 gʼaw sheˍ.) Oˇ ve teˇ yanˇ mvuhˇ haw lonˉ hehnˇ jaˇ leh gʼuiˬ baˇ teˇ hpaˍ haw loꞈ kʼoˍ htaꞈ hkʼa beh hkʼa beh te chehˇ ve yoˬ. Yaꞈ hkʼaˇ, Yeˍsuˆ lehˬ zuhꞈ muiˉ kʼa chehˇ ve yoˬ. Yeˍsuˆ ve awˬ laꞈ gʼawˇ kawˆ jaˇ leh yawˇ htaꞈ ca nawˍ piˇ la leh yawˇ ga laˇ tuˬ lawˬ ve yoˬ. Yaꞈ hkʼaˇ, Yeˍsuˆ yawˇ hui htaꞈ kʼoˆ piˇ ve, “hkʼa dehꞈ maˇ yonˍ ve chaw teˇ hpaˍ˗oˬ, nawˬ hui aˬ htoꞈ ma te kawˆ ve le?” Yaˬhoˉvaˬ kanˇ paˆ yehˇ leh Yeˍsuˆ leh yawˇ geh chehˇ ve chaw teˇ gʼaˇ le le htaꞈ nyi haꞈ shaˉ laˇ tuˬ yoˬ tehꞈ yawˇ hui shiˍ cawˇ ve yoˬ. Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Ngaˬ hui yonˍ hkʼaˇ yonˍ yeˬ ve kʼo, awˬ tehˬ awˬ na ve “mvuhˇ haw lonˉ” maˇ heˆ leh a shaꞈ teꞈ kuiˬ hkʼaw shoꞈ shaꞈ ve gʼa hpuˇ ve awˬ ceuˬ htaꞈ ponˬ gʼa tuˬ yoˬ.

8-9. A˗niꞈ ve yonˍ hkʼaˇ htaꞈ hkʼaˬ hkʼe lawˇ nyi piˇ ve le? Leh yawˇ htaꞈ aˬ htoꞈ ma ga piˇ ve le?

⁸ Peu˗to˗li˗koˇ mvuhˇ miˬ lo chehˇ ve awˬ viˉ awˬ nyi yaˇ miˇ haˉ A˗niꞈ meh ve awˬ lawn htaꞈ teˇ geh nyi sheˍ. Yawˇ beˬ ve lawˇ ve hehnˇ jaˇ ve gʼa hpuˇ peuˬ hkʼawꞈ nawˉ, yawˇ ve yonˍ hkʼaˇ yonˍ yeˬ maˇ la ve yoˬ. 2017 hkʼawꞈ htaˇ, mvuhˇ yeˬ mvuhˇ haw lonˉ Heun˗ri˗hkin yawˇ ve yehˬ htaꞈ meuˆ baˬ piˇ ve yoˬ. Mvuhˇ yeˬ mvuhˇ haw lonˉ chi yawˇ kanˉ maˇ gʼa te tuˬ kaꞈ te piˇ ve yoˬ. A˗niꞈ kʼoˆ ve, “chi ve teˇ yanˇ ngaˬ tuꞈ jaˇ leh dawˇ haˍ dawˇ hkiˉ jaˇ. Yaꞈ hkʼaˇ, ngaˬ htaꞈ ga laˇ gʼa ve lehˬ bon lawˬ ve, Yaˬhoˉvaˬ htaꞈ gʼaˇ va ve, leh dawˇ maˇ jaˇ ve pa taw teꞈ chiˉ maˇ te ve maˇ te.”

⁹ A˗niꞈ kʼoˆ ve, beˬ ve lawˇ ve htaꞈ yeunˇ hkanˍ gʼaˇ tuˬ awˬ nu ve teˇ ceuˬ lehˬ, na yuˬ ve yoˬ. Yawˇ kʼoˆ ve, “Gʼuiˬ sha ve kanˉ hkʼaˇ beˆ maˍ laˇ ve htaꞈ ngaˬ gʼaꞈ te htaˇ, ngaˬ nyi ma gawˬ lehˍ cawˬ leh maˇ dawˇ haˍ dawˇ hkiˉ jaˇ. Yaˬhoˉvaˬ awˬ viˉ awˬ nyi htaꞈ cuˇ leh ngaˬ htaꞈ awˬ gʼaˇ peꞈ laˇ tcuh ve, leh ngaˬ loˍ ve awˬ ceuˬ kaꞈ ga laˇ tcuh ve yoˬ.” Yawˇ kʼawꞈ kʼoˆ sheˍ ve, “Yaˬhoˉvaˬ lehˬ ngaˬ dawˇ taˍ ve aꞈ kehˉ ga laˇ maˇ jaˇ. Chi ngaˬ ve yonˍ hkʼaˇ yonˍ yeˬ jaˇ tuˬ te laˇ ve yoˬ.”

10. Nawˬ a shaꞈ teꞈ kuiˬ hkʼaw “mvuhˇ haw lonˉ” gʼa hpuˇ ve kʼo, hkʼaˬ hkʼe te cawˇ ve le?

¹⁰ Nawˬ a shaꞈ teꞈ kuiˬ hkʼaw “mvuhˇ haw lonˉ” gʼa hpuˇ chehˇ˗aw laˇ? Mvuhˇ yeˬ mvuhˇ haw maˇ heˆ leh maˇ chehˇ sha ve pa taw, nawˬ dawˇ haˍ dawˇ hkiˉ jaˇ leh aˬ htoꞈ ma te tuˬ maˇ shiˍ ve yoˬ. Nawˬ chi hkʼe hpehꞈ ve kʼo, nawˬ dawˇ haˍ dawˇ hkiˉ ve Yaˬhoˉvaˬ htaꞈ gʼaˇ maˇ va tuˬ taˇ te laˇ tcuh. Yaˬhoˉvaˬ geh meuˆ daꞈ leh nyi ma hkʼaw cawˬ ve awˬ ceuˬ bon lawˬ htaˇ kʼoˆ piˇ sheˍ. Nawˬ ve yonˍ hkʼaˇ yonˍ yeˬ tuˬ te  leh ponˬ laˬ htaˇ Yaˬhoˉvaˬ hkʼaˬ hkʼe ga laˇ ve awˬ lawn htaꞈ dawˇ nyi sheˍ. (Chiˇ mvuh ve 77:11, 12) Chi teˇ hkui leh awˬ gʼuˇ suhˍ hpawˇ kaꞈ Yaˬhoˉvaˬ nawˬ htaꞈ maˇ baˬ taˉ laˇ taˬ tehꞈ nawˬ yonˍ gʼa ve yoˬ.

11. Aˬ htoꞈ ma te sheh kʼai shehˍ hpaˇ hkawˇ na tuˬ dawˇ teh taˍ cawˇ ve le?

¹¹ Nawˬ beˬ ve lawˇ ve htaꞈ yeunˇ hkanˍ gʼaˇ tuˬ, ga laˇ gʼa ve aˬ htoꞈ ma cawˬ sheˍ ve le? A˗niꞈ ve awˬ lawn htaꞈ gʼa mawˬ ve hkʼa shuˍ yoˬ. Na yuˬ ve lehˬ nawˬ htaꞈ ga laˇ gʼa ve yoˬ. Yaˬhoˉvaˬ leh Yeˍsuˆ yonˍ gʼa ve chaw htaꞈ nawˬ gʼaˇ va sheˍ. Chi ve lehˬ Hkriꞈ yaˇ awˬ moˍ hkʼaw sheh kʼai paˍ htaꞈ kʼoˆ ve yoˬ. Teˇ pawˆ pawˆ yawˇ hui beˆ maˍ laˇ ve ngaˬ hui dawˇ taˍ ve hkʼe maˇ heˆ leh awˬ hkʼaˇ hkʼa dehꞈ maˇ ca ve tehꞈ dawˇ ve htawˇ, na yuˬ ve chaw htaꞈ Yaˬhoˉvaˬ awˬ bon naꞈ piˇ tuˬ yoˬ tehꞈ tawnˇ taˍ sheˍ. Na yuˬ ve lehˬ a shaꞈ htaꞈ ga piˇ gʼa ve tehꞈ oˇ htaˇ teˇ co˗e Liꞈ hpu hkʼaw ka tiꞈ yeˬ ve chaw leh chi beuꞈ teˇ co˗e awˬ viˉ awˬ nyi ve hpehꞈ laˬ jaw ve awˬ lawn htaꞈ gʼa mawˬ ve yoˬ. (Tawˆ kʼai ve 14:1-4; 2 Raˍsaˍvanˍ 20:17) Awˬ lawn chi ve teˇ hpaˍ htaꞈ nawˬ dawˇ nyi sheˍ. Chi ve nawˬ haꞈ yuˬ gʼa tuˬ ga laˇ leh Gʼuiˬ sha ve kanˉ hkʼaˇ hkʼaw beˆ maˍ laˇ ve htaꞈ chi teˇ hkui leh awˬ gʼuˇ suhˍ hpawˇ kaꞈ gʼaꞈ te gʼa tuˬ ga laˇ ve yoˬ. (Heˍbrehˇ 13:17) Chi hkʼe te ve kʼo, awˬ gʼuˇ suhˍ hpawˇ chi aꞈ kehˉ uiˍ ve mvuhˇ haw lonˉ htaꞈ nawˬ maˇ kawˆ.—Tawˇ naˉ ve 3:25.

12. Luˉkaꞈ liꞈ 18:1-8 hkʼaw kʼoˆ taˍ ve hkʼe, Yonˍ ve, yeunˇ hkanˍ ve leh maˇ hteˇ maˇ cawˇ ve hkʼaˬ hkʼe te caˉ daꞈ ve le?

¹² Awˬ laꞈ gʼawˇ maˇ hteˇ maˇ cawˇ ve gʼa hpuˇ leh yawˇ hui ve yonˍ hkʼaˇ htaꞈ lawˇ nyi piˇ tuˬ yoˬ tehꞈ Yeˍsuˆ shiˍ ve yoˬ. Mehˇ chawˇ ma teˇ gʼaˇ suhˉ jehˬ paˍ geh hteˇ ve cawˇ ve hkʼaw suhˉ jehˬ laˇ tuˬ lawˬ ve awˬ lawn htaꞈ Yeˍsuˆ yawˇ hui na gʼa tuˬ Luˉkaꞈ liꞈ hkʼaw kʼoˆ maˍ piˇ ve htaꞈ ngaˬ hui gʼa mawˬ ve yoˬ. Yawˇ lawˬ tcuhˉ taˍ ve kʼo, suhˉ jehˬ paˍ ga laˇ tuˬ yoˬ tehꞈ yawˇ dawˇ ve yoˬ. Leh awˬ leh meuˇ htaˇ, yawˇ kaꞈ mehˇ chawˇ ma htaꞈ ga piˇ ve yoˬ. Chi aˬ htoꞈ ma henˇ yuˬ gʼa ve le? Yaˬhoˉvaˬ lehˬ hteˇ ve cawˇ ve Gʼuiˬ sha hpehꞈ ve yoˬ. Yeˍsuˆ kʼoˆ ve, “Gʼuiˬ sha leuˆ yuˬ taˍ ve chaw teˇ hpaˍ lehˬ, tanˇ hkuinˇ tanˇ vanˇ yawˇ htaꞈ lawˬ hkawˉ ve kʼo, Gʼuiˬ sha lehˬ hteˇ ve cawˇ ve awˬ hkʼaw lo yawˇ hui awˬ pon maˇ te piˇ tuˬ leh laˇ? Yawˇ maw chaweh law chehˇ tuˬ leh laˇ?” (Luˉkaꞈ 18:1-8 gʼaw sheˍ.) Yawˇ kʼawꞈ kʼoˆ sheˍ ve, “chaw yaˇ ve Yaˇ hpu kʼawꞈ gaˬ la ve teˇ yanˇ, miˬ guiˬ hkʼoˆ lo yonˍ ve teˇ ceuˬ cawˬ chehˇ ve htaꞈ gʼa mawˬ tuˬ laˇ?” Maˇ hteˇ maˇ cawˇ ve htaꞈ gʼa hpuˇ htaˇ, yeunˇ hkanˍ ve mehˇ chawˇ ma htaꞈ henˇ yuˬ leh te gʼa ve awˬ ceuˬ htaꞈ caˉ leh te sheˍ. Chi ngaˬ hui ve yonˍ hkʼaˇ yonˍ yeˬ ve tehꞈ hpeuꞈ maw piˇ ve yoˬ. Ngaˬ hui yonˍ ve cawˬ ve kʼo, Yaˬhoˉvaˬ ga laˇ tuˬ yoˬ tehꞈ yonˍ gʼa ve yoˬ. Chi hkʼoˆ kaꞈ, bon lawˬ ve lehˬ kanˇ paˆ cawˬ jaˇ tehꞈ ngaˬ hui gʼa yonˍ cawˇ ve yoˬ. Teˇ pawˆ pawˆ ngaˬ hui dawˇ taˍ ve aꞈ kehˉ kaꞈ yawˇ hkʼawꞈ laˇ ve yoˬ.

13. Yehˬ kʼa teˇ yehˬ kʼa maˇ hteˇ maˇ cawˇ ve gʼa hpuˇ htaˇ, bon lawˬ ve yawˇ hui htaꞈ hkʼaˬ hkʼe ga piˇ ve le?

¹³ Awˬ viˉ awˬ nyi yaˇ miˇ Be˗lo ve awˬ lawn htaꞈ teˇ geh nyi sheˍ. Yawˇ Konˍgoˍ mvuhˇ miˬ lo chehˇ ve yoˬ. Teˇ nyi htaˇ laꞈ caˉ hkʼa biˇ cawˬ ve maꞈ yaˇ teˇ moˍ yawˇ hui ve hkʼaˆ lo ca bawˆ la ve pa taw, Be˗lo lehˬ yawˇ ve awˬ hpawˇ Shaˉhkiˆhkanˍ ve chaw maˇ hpehꞈ leh yawˇ hui ve yaˇ miˇ 15 hkʼawꞈ ve yawˇ hui gʼa hpaw˗e ve yoˬ. Yawˇ hui hpaw˗e chehˇ htaˇ kaꞈ maꞈ yaˇ laꞈ caˉ hkʼa biˇ cawˬ ve shaw taˍ laˇ ve htaꞈ gʼa mawˬ daꞈ ve yoˬ. Maꞈ yaˇ awˬ viˉ awˬ nyi Be˗lo ve yehˬ kʼa htaꞈ tiˇ pehˍ tuˬ yoˬ tehꞈ kawˆ ho piˇ ve yoˬ. Oˇ ve teˇ yanˇ  Be˗lo hawˬ ve yoˬ. Leh yawˇ ve yaˇ miˇ kaꞈ awˬ e htaꞈ taˇ hawˬ kʼoˆ piˇ leh awˬ hkawˇ bvuhˬ chaweh bon lawˬ ve hkʼaw Yaˬhoˉvaˬ ve awˬ meh htaꞈ laiˉ pawˆ kʼoˆ ve yoˬ. Yawˇ bon lawˬ peuˬ hkʼawꞈ nawˉ, laꞈ caˉ hkʼa biˇ cawˬ ve maꞈ yaˇ awˬ hoˉ yawˇ htaꞈ na piˇ ve, “nawˬ bon lawˬ ve a shu maˍ laˇ ve le?” Be˗lo ve yaˇ miˇ hkʼawꞈ piˇ ve, “Maꞈhtehˍ liꞈ 6:9-13 hkʼaw kʼoˆ taˍ ve hkʼe, lawˬ tehꞈ ngaˬ e maˍ laˇ ve yoˬ.” Maꞈ yaˇ awˬ hoˉ kʼoˆ piˇ ve, “kʼai loˬ. Yaˬhoˉvaˬ Gʼuiˬ sha nawˬ leh nawˬ ve yehˬ kʼa htaꞈ haꞈ shaˉ piˇ˗oˆ.”

14. Ngaˬ hui ve yonˍ hkʼaˇ htaꞈ lawˇ nyi laˇ ve aˬ htoꞈ ma le? Leh ngaˬ hui yeunˇ hkanˍ gʼaˇ tuˬ aˬ htoꞈ ma ga laˇ ve le?

¹⁴ Nawˬ bon lawˬ ve lehˬ kanˇ paˆ maˇ cawˬ tehꞈ maˇ gʼa dawˇ tuˬ hpehꞈ laˬ jaw ve awˬ lawn chi maˍ laˇ ve yoˬ. Nawˬ bon lawˬ ve htaꞈ Gʼuiˬ sha maˇ kʼawꞈ laˇ sheˍ tehꞈ dawˇ ve kʼo, hkʼaˬ hkʼe te tuˬ le? Chi ve nawˬ ve yonˍ hkʼaˇ htaꞈ lawˇ nyi laˇ ve yoˬ hehˉ. Mehˇ chawˇ ma caˉ leh bon lawˬ ve htaꞈ nawˬ henˇ yuˬ sheˍ. Gʼuiˬ sha nawˬ htaꞈ maˇ chiˇ baˬ leh nawˬ bon ve htaꞈ keunˍ daꞈ ve awˬ yanˇ hkʼaw Gʼuiˬ sha hkʼawꞈ laˇ tuˬ yoˬ tehꞈ yonˍ gʼa ve yoˬ. Nawˬ caˉ leh Gʼuiˬ sha geh daꞈ kehˬ ve awˬ ha hpu lawˬ sheˍ. (Hpiˇliˇpiˆ 4:13) Maˇ maw ve awˬ yanˇ nawˬ dawˇ taˍ ve aꞈ kehˉ Gʼuiˬ sha awˬ bon maˇ maˇ naꞈ laˇ leh nawˬ aˬ htoꞈ ma gʼa yeunˇ hkanˍ jaw ve kaꞈ tawnˇ maˇ gʼa˗o. Beˬ ve lawˇ ve gʼa hpuˇ ve htaꞈ nawˬ yeunˇ hkanˍ leh ka tiꞈ yeˬ gʼa tuˬ Yaˬhoˉvaˬ ga laˇ tcuh ve kʼo, nawˬ yonˍ yeˬ leh awˬ gʼuˇ suhˍ hpawˇ beˬ ve lawˇ ve htaꞈ yeunˇ hkanˍ gʼaˇ tuˬ yoˬ.—1 Peˍtruˆ 1:6, 7.

15. Maꞈhtehˍ liꞈ 17:19, 20 hkʼaw kʼoˆ taˍ ve hkʼe, Yeˍsuˆ ve awˬ laꞈ gʼawˇ shoꞈ shaꞈ ve aˬ htoꞈ ma gʼa hpuˇ ve le?

¹⁵ Yonˍ ve lehˬ yawˇ hui tuꞈ ve hkanˍ ve leh shoꞈ shaꞈ ve teˇ ceuˬ le le gʼa hpuˇ ve htaꞈ ga laˇ gʼa tuˬ yoˬ tehꞈ Yeˍsuˆ awˬ laꞈ gʼawˇ htaꞈ maˍ piˇ ve yoˬ. (Maꞈhtehˍ 17:19, 20 gʼaw sheˍ.) Yeˍsuˆ ve awˬ laꞈ gʼawˇ laiˉ pawˆ neˇ htaꞈ gʼaꞈ kʼoˬ gʼa ve htawˇ, oˇ ve teˇ pawˆ neˇ htaꞈ gʼaꞈ kʼoˬ maˇ gʼa ve yoˬ. Aˬ htoꞈ ma pa taw le? Yeˍsuˆ yawˇ hui htaꞈ kʼoˆ piˇ ve, yonˍ ve chi aꞈ kehˉ gʼa cawˬ cawˇ ve yoˬ. Yawˇ hui shoꞈ shaꞈ ve lehˬ, hkʼaw pui lonˉ hkʼa shuˍ gʼa hpuˇ ve htawˇ, yeunˇ hkanˍ gʼaˇ tuˬ yoˬ. Chi beuꞈ teˇ co˗e ngaˬ hui shoꞈ shaꞈ ve gʼa hpuˇ ve kaꞈ gu maˇ gʼa taˍ tehꞈ dawˇ ve yoˬ hehˉ.

16. Geh˗deˇ nyi ma luˬ leh dawˇ haˍ htaˇ, yonˍ ve yawˇ htaꞈ hkʼaˬ hkʼe ga piˇ ve le?

¹⁶ Gaw˗aˍtiˬmaˬlaˬ mvuhˇ miˬ lo chehˇ ve awˬ viˉ awˬ nyi yaˇ miˇ Geh˗deˇ ve awˬ lawn htaꞈ teˇ geh dawˇ nyi sheˍ. Hpawnˬ daꞈ peuˬ hkʼawꞈ nawˉ, yawˇ leh awˬ hpawˇ kʼoꞈ˗e ve yoˬ. Yaꞈ hkʼaˇ, kʼoꞈ˗e chehˇ htaˇ awˬ hpawˇ htaꞈ shu tiˇ pehˍ piˇ ve yoˬ. Yonˍ ve lehˬ Geh˗deˇ chi ve htaꞈ haꞈ yuˬ gʼa tuˬ hkʼaˬ hkʼe ga piˇ ve le? Yawˇ kʼoˆ ve, “bon lawˬ ve lehˬ ngaˬ dawˇ haˍ ve awˬ ceuˬ Yaˬhoˉvaˬ htaꞈ chiˇ aꞈ piˇ tuˬ ga laˇ ve yoˬ. Chi ngaˬ nyi ma gawˬ lehˍ cawˬ tuˬ te laˇ ve yoˬ. Yaˬhoˉvaˬ ngaˬ htaꞈ dawˇ haˍ ve pa taw, ngaˬ htaꞈ ga laˇ tuˬ yehˬ kʼa hkʼaw ve chaw htaꞈ cuˇ ve, leh Hkriꞈ yaˇ awˬ moˍ hkʼaw ve chaw htaꞈ kaꞈ cuˇ ve yoˬ. Ngaˬ Gʼuiˬ sha ve kanˉ maˇ maˇ te htaˇ, nyi ma luˬ ve kaꞈ hkʼe taw maˇ cawˬ˗o. Chi ngaˬ teˇ nyi le le shoꞈ shaꞈ ve htaꞈ yeunˇ hkanˍ gʼaˇ tuˬ ga laˇ ve yoˬ. Leh shawˉ pawˍ awˬ pon hkʼe taw maˇ dawˇ hkiˉ tuˬ kaꞈ ga laˇ ve yoˬ. Hpehꞈ la ve chi teˇ pawˆ awˬ gʼuˇ suhˍ hpawˇ ngaˬ beˬ ve lawˇ ve aˬ htoꞈ ma gʼa hpuˇ ve htawˇ, yeunˇ hkanˍ gʼaˇ tuˬ tehꞈ shiˍ ve yoˬ. Yaˬhoˉvaˬ Yeˍsuˆ leh Gʼuiˬ sha ve kanˉ hkʼaˇ ngaˬ htaꞈ ga laˇ tuˬ yoˬ.”

17. Shoꞈ shaꞈ ve hkʼaw pui lonˉ hkʼa shuˍ ngaˬ hui gʼa hpuˇ htaˇ hkʼaˬ hkʼe te cawˇ ve le?

¹⁷ Nawˬ haꞈ ve chaw suh˗e ve pa taw, nawˬ nyi ma luˬ chehˇ ve laˇ? Chi hkʼe hpehꞈ ve kʼo, Liꞈ hpu hkʼaw  kʼawꞈ teꞈ tu la ve awˬ lawn htaꞈ caˉ daꞈ ve nawˬ gʼaw leh nawˬ ve yonˍ hkʼaˇ uiˍ la mvuh la tuˬ te sheˍ. Maˇ heˆ leh nawˬ haꞈ ve chaw Hkriꞈ yaˇ awˬ moˍ hkʼaw tawˆ cheˆ ve pa taw, nawˬ nyi ma luˬ chehˇ ve laˇ? Gʼuiˬ sha maˍ laˇ ve lehˬ daꞈ jaˇ ve awˬ hkʼaˇ hpehꞈ ve tehꞈ nawˬ yonˍ gʼa tuˬ, a shu yawˇ hkʼaˇ yawˇ Liꞈ hpu gʼaw sheˍ. Nawˬ shoꞈ shaꞈ ve aˬ htoꞈ ma gʼa hpuˇ ve htawˇ maˇ kʼoˆ, awˬ yanˇ chi ve nawˬ ve yonˍ hkʼaˇ uiˍ la mvuh la tuˬ te sheˍ. Nyi ma hkʼaw cawˬ ve awˬ ceuˬ Yaˬhoˉvaˬ geh bon lawˬ htaˇ kʼoˆ piˇ sheˍ. Nawˬ teˇ gʼaˇ tiˉ taˇ chehˇ. Awˬ viˉ awˬ nyi geh awˬ chawˇ te sheˍ. (Tawˇ naˉ ve 18:1) Nawˬ yeunˇ hkanˍ gʼaˇ tuˬ te gʼa ve awˬ ceuˬ htaꞈ te leh chi hkʼe te ve nawˬ mehˆ gʼuiˬ yaꞈ la ve htawˇ nyi ma luˬ ve htaꞈ tiˉ taˇ dawˇ nyi. (Chiˇ mvuh ve 126:5, 6) Hpawnˬ daꞈ ve, hto toˇ ve, hkʼaˬ htaˆ kaꞈ kʼai leh teˇ nyi le le Liꞈ hpu gʼaw leh awˬ gʼuˇ suhˍ hpawˇ Yaˬhoˉvaˬ daꞈ jaˇ ve awˬ ceuˬ maˇ maˇ peꞈ laˇ tuˬ yoˬ tehꞈ, ka tiꞈ te taˍ laˇ ve htaꞈ dawˇ nyi sheˍ. Yaˬhoˉvaˬ nawˬ htaꞈ ga laˇ ve gʼa mawˬ htaˇ, nawˬ yawˇ htaꞈ yonˍ maˇ la tuˬ yoˬ.

18. Nawˬ ve yonˍ hkʼaˇ hkʼa dehꞈ maˇ yonˍ yeˬ ve kʼo hkʼaˬ hkʼe te cawˇ ve le?

¹⁸ Nawˬ gʼa hpuˇ jaw ve shoꞈ shaꞈ ve teˇ hpaˍ leh chi teˇ hkui gʼa hpuˇ chehˇ ve awˬ ceuˬ nawˬ yonˍ ve hkʼa dehꞈ maˇ cawˬ ve htaꞈ mawˬ tuˬ te laˇ ve yoˬ. Awˬ yanˇ chi ve lehˬ nawˬ ve yonˍ hkʼaˇ yonˍ yeˬ tuˬ gʼa te cawˇ ve tehꞈ tawnˇ taˍ sheˍ. Oˇ kaˬ lo kʼoˆ ve, “ngaˬ hui yonˍ ve teˇ ceuˬ maˇ la tuˬ a ciˉ te laˇ˗oˆ” tehꞈ Yeˍsuˆ ve awˬ laꞈ gʼawˇ kʼoˆ ve hkʼa shuˍ te sheˍ. (Luˉkaꞈ 17:5) Chi hkʼoˆ kaꞈ, awˬ lawn chi ve hkʼaw hpehꞈ laˬ jaw ve awˬ lawn kʼoˆ kʼai peuˬ ve htaꞈ nawˬ dawˇ nyi sheˍ. Miˆgehnˬ leh Yu˗lai hkʼa shuˍ Yaˬhoˉvaˬ nawˬ htaꞈ hkʼaˬ hkʼe htaˇ ga laˇ jaw ve dawˇ nyi sheˍ. Nawˬ shoꞈ shaꞈ ve gʼa hpuˇ jaˇ htaˇ, Be˗lo ve yaˇ miˇ leh A˗niꞈ hkʼa shuˍ Yaˬhoˉvaˬ geh nyi ma awˬ tawˬ hkʼa gaˬ bon lawˬ sheˍ. Geh˗beˇ hkʼa shuˍ yehˬ kʼa hkʼaw ve chaw leh awˬ viˉ awˬ nyi htaꞈ cuˇ leh Yaˬhoˉvaˬ nawˬ htaꞈ ga laˇ tuˬ yoˬ tehꞈ taˇ leunˇ sheˍ. Chi teˇ hkui nawˬ shoꞈ shaꞈ ve gʼa hpuˇ ve htaꞈ Yaˬhoˉvaˬ ga laˇ tcuh ve kʼo, awˬ gʼuˇ suhˍ hpawˇ nawˬ shoꞈ shaꞈ ve aˬ htoꞈ ma gʼa hpuˇ ve htawˇ, yawˇ ga laˇ tuˬ yoˬ tehꞈ nawˬ yonˍ gʼa ve yoˬ.

19. Yeˍsuˆ aˬ htoꞈ ma awˬ lawn htaꞈ yonˍ gʼa ve le? Nawˬ kaꞈ aˬ htoꞈ ma htaꞈ yonˍ gʼa ve le?

¹⁹ Yeˍsuˆ awˬ laꞈ gʼawˇ htaꞈ hkʼa dehꞈ maˇ yonˍ ve tehꞈ kʼoˆ piˇ ve yoˬ. Yaꞈ hkʼaˇ, yawˇ hui Yaˬhoˉvaˬ htaꞈ gʼaˇ va ve kʼo, awˬ gʼuˇ suhˍ hpawˇ beˬ ve lawˇ ve aˬ htoꞈ ma gʼa hpuˇ ve htawˇ, yeunˇ hkanˍ gʼaˇ tuˬ yoˬ tehꞈ yawˇ yonˍ gʼa ve yoˬ. (Yoˇhanˬ 14:1; 16:33) Chaw awˬ moˍ lonˉ yonˍ hkʼaˇ yonˍ yeˬ ve pa taw, yawˇ hui tuꞈ jaˇ hkanˍ jaˇ ve htaꞈ ponˬ kʼai gʼa tuˬ yoˬ tehꞈ yawˇ yonˍ gʼa ve yoˬ. (Hpeuꞈ maˍ ve 7:9, 14) Gʼa ponˬ ve awˬ moˍ chi hkʼaw nawˬ kaꞈ teˇ gʼaˇ hpehꞈ tuˬ laˇ? Chi teˇ hkui nawˬ ve yonˍ hkʼaˇ yonˍ yeˬ tuˬ te gʼa ve hkʼe teˇ ceuˬ le le te ve kʼo, Yaˬhoˉvaˬ nawˬ htaꞈ ga laˇ leh nawˬ kaꞈ ponˬ ve hkʼaw teˇ gʼaˇ hpehꞈ tuˬ yoˬ!—Heˍbrehˇ 10:39.