1-2. Ngaˬ hui teˇ gʼaˇ leh teˇ gʼaˇ haꞈ daꞈ ve tehꞈ hpeuꞈ maw piˇ tuˬ aˬ htoꞈ ma awˬ hkʼaˇ cawˬ ve le?

 Ngaˬ hui teˇ gʼaˇ leh teˇ gʼaˇ haꞈ daꞈ cawˇ ve yoˬ. Aˬ htoꞈ ma pa taw le? Tawˇ naˉ ve liꞈ hkʼaw kʼoˆ ve, ‘ha kʼaˉ puiˉ ve leh ka tiꞈ yeˬ ve teˇ ceuˬ htaꞈ nawˬ geh taˇ mehˉ kʼai piˇ. Nawˬ oˇ hkʼe te ve kʼo, Gʼuiˬ sha kaꞈ chaw yaˇ kaꞈ nawˬ htaꞈ nyi ma cawˇ tuˬ yoˬ.’ “Nawˬ lehˬ ha kʼaˉ puiˉ ve chaw hpehꞈ ve kʼo, nawˬ awˬ to htaꞈ nawˬ awˬ bon te piˇ chehˇ ve yoˬ.” Hteˇ ve cawˇ ve htaꞈ te ve chaw leh haꞈ pehnˇ ve cawˬ ve chaw lehˬ a shaꞈ htaꞈ gʼa tuˬ yoˬ.—Tawˇ naˉ ve 3:3, 4; 11:17; 21:21.

² Tawˇ hkawˇ chi ve 3 ceuˬ lehˬ ngaˬ hui haꞈ daꞈ tuˬ hpeuꞈ maw laˇ ve yoˬ. Awˉ lawˉ 1 ceuˬ lehˬ, ngaˬ hui haꞈ daꞈ ve tehꞈ hpeuꞈ maw piˇ ve kʼo, Gʼuiˬ sha mehˆ gʼuˇ suhˍ awˬ hpfuhˇ hkʼaˆ jaˇ ve chaw hpehꞈ tuˬ yoˬ. 2 ceuˬ teˇ ceuˬ lehˬ, ngaˬ hui htaꞈ haꞈ ve awˬ chawˇ hkʼaˬ htaˆ kaꞈ cawˬ leh ngaˬ hui awˬ bon cawˬ tuˬ yoˬ. 3 ceuˬ teˇ ceuˬ lehˬ, awˬ gʼuˇ suhˍ hpawˇ ngaˬ hui awˬ bon gʼa leh co co taiˍ taiˍ a shaꞈ gʼa tuˬ yoˬ. Chi htaꞈ pa taw, “teˇ gʼaˇ htaꞈ teˇ gʼaˇ ha kʼaˉ daꞈ˗oꞈ” tehꞈ Yaˬhoˉvaˬ kʼoˆ taˍ ve htaꞈ ngaˬ hui gʼaꞈ te htaˇ awˬ bon gʼa jaˇ tuˬ yoˬ.—Zaˍhkaˍriˆ 7:9.

3. Awˬ lawn chi ve hkʼaw ngaˬ hui aˬ htoꞈ ma ve na hkawˇ htaꞈ henˇ tuˬ le?

³ Awˬ lawn chi ve hkʼaw ngaˬ hui na hkʼawˇ 4 maˬ htaꞈ teˇ geh henˇ tuˬ yoˬ. Ngaˬ hui a shu htaꞈ haꞈ cawˇ ve le? Ruˉhtaˆ liꞈ hkʼaw haꞈ daꞈ ve htaꞈ caˉ daꞈ ve ngaˬ hui htaꞈ aˬ htoꞈ ma maˍ laˇ ve le? Chi beuꞈ teˇ co˗e ngaˬ hui haꞈ daꞈ ve tehꞈ hkʼaˬ hkʼe te hpeuꞈ maw piˇ gʼa tuˬ le? Leh haꞈ daꞈ ve tehꞈ hpeuꞈ maw piˇ ve chaw aˬ htoꞈ ma awˬ bon htaꞈ gʼa tuˬ le?

4. Ngaˬ hui Yaˬhoˉvaˬ htaꞈ hkʼaˬ hkʼe te henˇ yuˬ gʼa ve le? (Maˍkuˆ 10:29, 30)

⁴ Peuˬ taˉ ve teˇ lawn hkʼaw ngaˬ hui gʼa henˇ peuˬ˗oˬ ve hkʼe, Yaˬhoˉvaˬ lehˬ yawˇ htaꞈ haꞈ ve chaw leh yawˇ ve kanˉ te ve chaw  htaꞈ ceh tiˉ haꞈ ve tehꞈ hpeuꞈ maw laˇ ve yoˬ. (Daˍyeˍlaˆ 9:4) Ngaˬ hui “Gʼuiˬ sha haꞈ ve awˬ yaˇ awˬ duˬ hpehꞈ ve hkʼe, yawˇ te ve hkʼa shuˍ shuˍ” te gaˇ ve yoˬ. (Eˇfeˇsuꞈ 5:1) Hkʼe te leh, ngaˬ hui awˬ viˉ awˬ nyi htaꞈ maˇ baˬ taˉ leh hkʼaˬ htaˆ kaꞈ haꞈ ve tehꞈ hpeuꞈ maw piˇ gaˇ ve yoˬ.—Maˍkuˆ 10:29, 30 gʼaw sheˍ.

5-6. Awˬ lawn chi ve hkʼaw aˬ htoꞈ ma te kanˉ te paˍ chi teˇ gʼaˇ kanˉ te kuiˬ yehˬ hkʼaw kanˉ kʼawꞈ te gaˇ ve le?

⁵ Haꞈ daꞈ ve hkʼaˬ hkʼe hpehꞈ ve ngaˬ hui na gʼa˗oˬ htaˇ, ngaˬ hui kaꞈ awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve nawˬ gʼa mawˬ tuˬ yoˬ hehˉ. Awˬ lawn chi ve htaꞈ na gʼa tuˬ, 1 lawn htaꞈ teˇ geh nyi sheˍ.

⁶ Chaw teˇ gʼaˇ kanˉ te kuiˬ hkʼaw laiˉ hkʼawꞈ te laˬ ve htaꞈ dawˇ nyi sheˍ. Yawˇ kanˉ oˇ kaˬ lo laiˉ hkʼawꞈ te htaˇ, kanˉ hkʼaˇ gu paˍ awˬ hoˉ htaꞈ maˇ mawˬ daꞈ jaw, leh tawˇ maˇ yaw daꞈ jaw. Leh yawˇ kanˉ te kuiˬ chi hkʼaw awˬ liˇ teh taˍ ve htaꞈ kaꞈ maˇ dawˇ cawˇ ve yoˬ. Yawˇ awˬ to htaꞈ hu gʼa tuˬ awˬ pon kanˉ te kuiˬ chi htaꞈ ka tiꞈ yeˬ leh kanˉ te chehˇ sheˍ ve yoˬ. Teˇ nyi kʼo, yawˇ a shaꞈ gaˬ leh kanˉ maˇ te˗oˬ htaˇ hkʼa gaˬ kanˉ chi htaꞈ te chehˇ sheˍ ve yoˬ. Yaꞈ hkʼaˇ, awˬ kaˍ awˬ nu ve kanˉ te kuiˬ hkʼaw aˉ yaˇ leh hpu gʼa maˇ ve kʼo, yawˇ kʼai tuˬ yoˬ.

7-8. (a) Ngaˬ hui haꞈ daꞈ ve tehꞈ hpeuꞈ maw piˇ tuˬ aˬ htoꞈ ma te laˇ ve le? (b) Ngaˬ hui Ruˉhtaˆ liꞈ hkʼaw aˬ htoꞈ ma htaꞈ henˇ tuˬ le?

⁷ Kanˉ te ve chaw chi teˇ gʼaˇ yawˇ haꞈ ve leh yawˇ ve te hkʼaˇ dawˇ hkʼaˇ peun daꞈ ve htaꞈ nawˬ mawˬ ve maˇ heˆ laˇ? Yawˇ htaꞈ peun daꞈ tuˬ te piˇ ve awˬ ceuˬ lehˬ te gaˇ tuˬ te piˇ ve yoˬ. Yawˇ kanˉ te kuiˬ hkʼaw kanˉ te chehˇ sheˍ ve lehˬ hpu gʼa gaˇ ve htaꞈ pa taw yoˬ. Yaꞈ hkʼaˇ, Liꞈ hpu hkʼaw Gʼuiˬ sha ve chaw haꞈ ve tehꞈ hpeuꞈ maw piˇ tuˬ aˬ htoꞈ ma te piˇ ve le? Yawˇ hui gʼa te ve maˇ heˆ leh awˬ bon gʼa gaˇ ve pa taw, yawˇ hui haꞈ ve tehꞈ hpeuꞈ maw piˇ ve maˇ heˆ. Yaꞈ hkʼaˇ, yawˇ hui nyi ma hkʼaw tawˆ la leh te ve yoˬ. Daˍviˆ Yawˇnaˆtanˍ htaꞈ haꞈ leh ka tiꞈ yeˬ ve awˬ lawn htaꞈ dawˇ nyi sheˍ. Yawˇnaˆtanˍ ve awˬ pa Daˍviˆ htaꞈ tiˇ pehˍ gaˇ ve htawˇ, Daˍviˆ Yawˇnaˆtanˍ htaꞈ haꞈ chehˇ sheˍ. Leh Yawˇnaˆtanˍ suh ve laiˉ hkʼawꞈ gaˬ˗o ve htawˇ, yawˇ ve yaˇ paˍ Meˍfiˆboˍshehˆ htaꞈ Daˍviˆ haꞈ ve tehꞈ hpeuꞈ maw piˇ chehˇ sheˍ.—1 Saˍmo˗eˍlaˆ 20:9, 14, 15; 2 Saˍmo˗eˍlaˆ 4:4; 8:15; 9:1, 6, 7.

⁸ Ruˉhtaˆ liꞈ hkʼaw haꞈ ve htaꞈ caˉ daꞈ ve ngaˬ hui laiˉ ceuˬ gʼa henˇ ve yoˬ. Liꞈ chi teˇ kʼoˆ hkʼaw ve awˬ lawn ngaˬ hui aˬ htoꞈ ma henˇ yuˬ gʼa ve le? Leh Hkriꞈ yaˇ awˬ moˍ hkʼaw awˬ viˉ awˬ nyi geh ngaˬ hui hkʼaˬ hkʼe te yuˬ yehˇ gʼa tuˬ le? * teˇ geh nyi sheˍ.

9. Aˬ htoꞈ ma te Nawˉmiꞈ Yaˬhoˉvaˬ ve canˇ paˍ hpehꞈ ve tehꞈ Nawˉmiꞈ dawˇ ve le?

⁹ Ruˉhtaˆ liꞈ hkʼaw Nawˉmiꞈ ve awˬ lawn ngaˬ hui gʼa shiˍ tuˬ yoˬ. Nawˉmiꞈ ve awˬ hkuiˇ ma Ruˉhtaˆ leh Bawˇzaˆ Gʼuiˬ sha htaꞈ yawˆ yan ve Nawˉmiꞈ ve awˬ hpawˇ ve awˬ viˉ awˬ nyi hpehꞈ ve yoˬ. Iˉsaˍreˍlaˆ mvuhˇ miˬ hkʼaw caˇ tuˬ maˇ lawꞈ htaˇ, Nawˉmiꞈ yawˇ ve awˬ hpawˇ leh yawˇ ve yaˇ paˍ 2 gʼaˇ Mawˇbaˆ mvuhˇ miˬ lo hpaw˗e ve yoˬ. Oˇ kaˬ lo chehˇ htaˇ Nawˉmiꞈ ve awˬ hpawˇ suh˗e ve yoˬ. Peuˬ hkʼawꞈ nawˉ, yawˇ ve yaˇ paˍ 2 gʼaˇ awˬ miˇ ma heuˆ ve yoˬ. Peuˬ leh Nawˉmiꞈ ve yaˇ paˍ 2 gʼaˇ kaꞈ suh˗e ve yoˬ. (Ruˉhtaˆ 1:3-5; 2:1) Chi ve Nawˉmiꞈ dawˇ haˍ jaˇ leh nyi ma luˬ jaˇ tuˬ te piˇ ve yoˬ. Yawˇ awˬ gʼaˇ nuˇ jaˇ leh Yaˬhoˉvaˬ ve canˇ paˍ hpehꞈ ve tehꞈ dawˇ tuˬ te piˇ ve yoˬ. Yawˇ kʼoˆ ve, “Gʼuiˬ sha ngaˬ htaꞈ baˬ taˉ laˇ peuˬ.” “Gʼuiˬ sha lehˬ ngaˬ htaꞈ hkʼaˇ jaˇ ve awˬ ceuˬ peꞈ laˇ peuˬ.” “Gʼuiˬ sha ngaˬ htaꞈ ciˍ yanˍ leh tuꞈ hkanˍ piˇ lawˬ peuˬ.”—Ruˉhtaˆ 1:13, 20, 21.

10. Nawˉmiꞈ Yaˬhoˉvaˬ ve awˬ lawn maˇ daꞈ ve kʼoˆ htaˇ, Yaˬhoˉvaˬ hkʼaˬ hkʼe dawˇ ve le?

¹⁰ Yaˬhoˉvaˬ hkʼaˬ hkʼe te ve le? Yaˬhoˉvaˬ Nawˉmiꞈ htaꞈ baˬ taˉ leh maˇ ga piˇ ve maˇ heˆ. Yaꞈ hkʼaˇ, Yaˬhoˉvaˬ yawˇ htaꞈ ha kʼaˉ piˇ ve yoˬ. Shoꞈ shaꞈ ve maˇ heˆ leh tuꞈ ve hkanˍ ve gʼa hpuˇ htaˇ, “cuˇ  yiˍ cawˬ ve chaw lehˬ shu htaꞈ heˍ caˇ” la ve tehꞈ Yaˬhoˉvaˬ shiˍ ve yoˬ. (Cuˇ yiˍ piˇ ve 7:7) Yaˬhoˉvaˬ Nawˉmiꞈ htaꞈ maˇ baˬ taˉ piˇ ve tehꞈ Nawˉmiꞈ shiˍ tuˬ yawˇ gʼa ga piˇ cawˇ ve tehꞈ shiˍ ve yoˬ. (1 Saˍmo˗eˍlaˆ 2:8) Hkʼe te leh, Yaˬhoˉvaˬ Ruˉhtaˆ htaꞈ cuˇ leh Nawˉmiꞈ htaꞈ haꞈ ve tehꞈ hpeuꞈ maw piˇ tcuh ve yoˬ. Nawˉmiꞈ awˬ gʼaˇ hkʼe taw maˇ gʼa nuˇ leh Yaˬhoˉvaˬ yawˇ htaꞈ haꞈ ve tehꞈ shiˍ tuˬ, Ruˉhtaˆ nyi ma nuˇ nehˬ leh ha lehˬ ha kʼa ga piˇ ve yoˬ. Ruˉhtaˆ ve awˬ lawn ngaˬ hui htaꞈ aˬ htoꞈ ma maˍ laˇ ve le?

11. Aˬ htoꞈ ma te ngaˬ hui ve awˬ viˉ awˬ nyi awˬ gʼaˇ nuˇ ve chaw htaꞈ ga piˇ ve le?

¹¹ Ngaˬ hui haꞈ pehnˇ ve cawˬ ve kʼo, dawˇ haˍ leh nyi ma luˬ ve chaw htaꞈ ga piˇ gaˇ ve. Ruˉhtaˆ Nawˉmiꞈ htaꞈ maˇ baˬ taˉ ve hkʼe, Hkriꞈ yaˇ awˬ moˍ hkʼaw ve awˬ viˉ awˬ nyi dawˇ haˍ leh nyi ma luꞈ ve chaw htaꞈ ngaˬ hui maˇ baˬ taˉ. Chi hkʼe dawˇ ve chaw htaꞈ yawˇ hui haꞈ leh ga piˇ gʼa ve hkʼe ga piˇ gaˇ ve yoˬ. (Tawˇ naˉ ve 12:25; 24:10) Pawˇluꞈ beˆ maˍ laˇ ve, “nyi ma i puiˉ ve chaw teˇ hpaˍ htaꞈ awˬ gʼaˇ piˇ˗oˆ. Awˬ gʼaˇ nuˇ ve chaw teˇ hpaˍ htaꞈ ga piˇ˗oˆ” tehꞈ ngaˬ hui ve awˬ viˉ awˬ nyi gʼaꞈ te chehˇ ve yoˬ.—1 Hteˇsaˍlawˇniˆ 5:14.

12. Awˬ viˉ awˬ nyi awˬ gʼaˇ nuˇ chehˇ ve chaw htaꞈ ga piˇ tuˬ daꞈ jaˇ ve awˬ hkʼaˇ teˇ hkʼaˇ lehˬ aˬ htoꞈ ma le?

¹² Awˬ viˉ awˬ nyi awˬ gʼaˇ nuˇ chehˇ ve chaw htaꞈ ga piˇ ve daꞈ jaˇ ve awˬ hkʼaˇ teˇ hkʼaˇ lehˬ yawˇ kʼoˆ ve tawˇ htaꞈ hkʼa dehꞈ na leh yawˇ htaꞈ haꞈ ve tehꞈ shiˍ tcuh ve yoˬ. Nawˬ Gʼuiˬ sha ve kanˉ te ve chaw htaꞈ ga piˇ ve teˇ pawˆ le le yawˇ mawˬ ve yoˬ. (Chiˇ mvuh ve 41:1) Tawˇ naˉ ve liꞈ 19:17 hkʼaw kʼoˆ ve, “nawˬ haˍ gʼawˇ ve chaw htaꞈ ga piˇ ve kʼo, Gʼuiˬ sha htaꞈ chiˇ piˇ ngaˍ piˇ ve hkʼe hpehꞈ ve yoˬ. Gʼuiˬ sha nawˬ htaꞈ kʼawꞈ shaiˍ laˇ tuˬ yoˬ.”

13. Ruˉhtaˆ lehˬ Awˇraˍpaˆ htaꞈ hkʼaˬ hkʼe maˇ shuˍ ve le? Ruˉhtaˆ te ve awˬ ceuˬ haꞈ pehnˇ ve tehꞈ hkʼaˬ hkʼe hpeuꞈ maw piˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹³ Nawˉmiꞈ yawˇ ve awˬ hpawˇ leh yawˇ ve yaˇ paˍ 2 gʼaˇ suh˗e ve awˬ lawn htaꞈ ngaˬ hui dawˇ nyi htaˇ, haꞈ pehnˇ ve hkʼaˬ hkʼe cawˬ ve htaꞈ ngaˬ hui na gʼa ve yoˬ. “Gʼuiˬ sha lehˬ yawˇ ve chaw teˇ hpaˍ htaꞈ awˬ bon kʼawꞈ naꞈ piˇ ve pa taw, awˬ shiˍ awˬ nu maˇ maˇ kʼawꞈ cawˬ la piˇ ve awˬ hkawˇ htaꞈ Nawˉmiꞈ gʼa kaˇ” htaˇ, yawˇ dawˇ cheˆ leh yawˇ paw kuiˬ lo kʼoꞈ˗e ve yoˬ. (Ruˉhtaˆ 1:6) Awˉ lawˉ htaˇ yawˇ ve awˬ hkuiˇ ma 2 gʼaˇ yawˇ geh kʼai ve yoˬ. Yaꞈ hkʼaˇ, kʼai chehˇ htaˇ Nawˉmiꞈ yawˇ huiˉ maˬ htaꞈ Mawˇbaˆ mvuhˇ miˬ lo kʼoꞈ˗e tehꞈ 3 pawˆ kʼoˆ piˇ ve yoˬ. Hkʼaˬ hkʼe hpehꞈ la ve le? “Awˇraˍpaˆ lehˬ yawˇ ve awˬ pi ma htaꞈ boˆ nu taˉ leh, aˉ hkʼaw lo kʼawꞈ kʼoꞈ˗e ve yoˬ. Yaꞈ hkʼaˇ, Ruˉhtaˆ lehˬ yawˇ ve awˬ pi ma htaꞈ kʼuˉ tiˍ taˍ ve yoˬ.” (Ruˉhtaˆ 1:7-14) Awˇraˍpaˆ lehˬ Nawˉmiꞈ dawˇ taˍ ve hkʼe Mawˇbaˆ mvuhˇ miˬ lo kʼoꞈ˗e ve yoˬ. Yaꞈ hkʼaˇ, Ruˉhtaˆ chi hkʼe maˇ te. Yawˇ Mawˇbaˆ mvuhˇ miˬ lo kʼoꞈ˗e gʼa ve htawˇ, yawˇ Nawˉmiꞈ htaꞈ haꞈ ve pa taw, yawˇ geh chehˇ tuˬ leuˆ ve yoˬ. (Ruˉhtaˆ 1:16, 17) Ruˉhtaˆ chi hkʼe te ve lehˬ, Nawˉmiꞈ htaꞈ haꞈ ve pa taw yoˬ. Ruˉhtaˆ lehˬ haꞈ pehnˇ ve awˬ tehˬ awˬ na hpeuꞈ maw laˇ ve yoˬ. Chi ngaˬ hui htaꞈ aˬ htoꞈ ma maˍ laˇ ve le?

14. (a) Chi beuꞈ teˇ co˗e awˬ viˉ awˬ nyi haꞈ pehnˇ ve hkʼaˬ hkʼe hpeuꞈ maw piˇ chehˇ ve le? (b) Heˍbrehˇ liꞈ 13:16 hkʼaw kʼoˆ taˍ ve hkʼe, Gʼuiˬ sha tuˉ tanˇ tuˬ hkʼaˬ hkʼe ve htaꞈ haꞈ yuˬ ve le?

¹⁴ Ngaˬ hui haꞈ pehnˇ ve cawˬ ve kʼo, dawˇ taˍ ve  aꞈ kehˉ te gʼa ve. Chi beuꞈ teˇ co˗e ngaˬ hui awˬ viˉ awˬ nyi laiˉ gʼaˇ maˇ mawˬ daꞈ jaw ve awˬ viˉ awˬ nyi htaꞈ kaꞈ haꞈ pehnˇ ve tehꞈ hpeuꞈ maw piˇ chehˇ ve yoˬ. Tawˇ pa haˉ te kʼo, ngaˬ hui ve awˬ viˉ awˬ nyi mvuhˇ yeˬ mvuhˇ haw lonˉ gʼa hpuˇ htaˇ, awˬ viˉ awˬ nyi yawˇ hui htaꞈ aˬ htoꞈ ma ga piˇ gʼa tuˬ ve shiˍ gaˇ ve yoˬ. Maˇ heˆ leh Hkriꞈ yaˇ awˬ moˍ hkʼaw ve awˬ viˉ awˬ nyi shoꞈ shaꞈ ve gʼa hpuˇ htaˇ, yawˇ hui ga piˇ tuˬ awˬ hkʼaˇ ca leh laꞈ haˉ ga piˇ ve yoˬ. Chi beuꞈ teˇ co˗e ngaˬ hui ve awˬ viˉ awˬ nyi oˇ htaˇ teˇ co˗e ve awˬ viˉ awˬ nyi Maˍkeˍdawˇniˆ chaw htaꞈ henˇ yuˬ leh dawˇ taˍ ve aꞈ kehˉ te gʼa ve yoˬ. Awˬ viˉ awˬ nyi tuꞈ chehˇ hkanˍ chehˇ ve chaw htaꞈ ga piˇ tuˬ yawˇ hui awˬ yanˇ yuˬ tanˇ leh mawˇ teˇ hpaˍ “ha lehˬ ha kʼa kʼawꞈ tanˇ piˇ sheˍ” ve yoˬ. (2 Kawˇrenˍhtuˆ 8:3) Gʼuiˬ sha ve kanˉ te ve chaw haꞈ pehnˇ ve chi hkʼe ve hpeuꞈ maw piˇ htaˇ, Yaˬhoˉvaˬ nyi hkʼaˇ suh jaˇ!—Heˍbrehˇ 13:16 gʼaw sheˍ.

15-16. Aˬ htoꞈ ma te Ruˉhtaˆ dawˇ taˍ ve hkʼe gʼaꞈ te ve tehꞈ hpeuꞈ maw laˇ ve le?

¹⁵ Ngaˬ hui Ruˉhtaˆ leh Nawˉmiꞈ ve awˬ lawn hkʼaˬ hkʼe te yuˬ yehˇ gʼa ve awˬ lawn teˇ geh nyi sheˍ.

¹⁶ Dawˇ taˍ ve hkʼe te ve. Ruˉhtaˆ lehˬ Nawˉmiꞈ geh Yuˇdaꞈ mvuhˇ miˬ lo kʼai tuˬ kʼoˆ piˇ htaˇ, awˉ lawˉ htaˇ Nawˉmiꞈ maˇ kʼai tcuh gaˇ. Yaꞈ hkʼaˇ, Ruˉhtaˆ dawˇ taˍ ve hkʼe te ve pa taw, awˬ bon hkʼaˬ hkʼe gʼa ve le? “Ruˉhtaˆ yawˇ geh kʼai tuˬ dawˇ cheˆ taˍ peuˬ ve htaꞈ, Nawˉmiꞈ gʼa shiˍ ve teˇ yanˇ, yawˇ teꞈ chiˉ maˇ kʼawꞈ kʼoˆ ve yoˬ.”—Ruˉhtaˆ 1:15-18.

17. Ngaˬ hui dawˇ taˍ ve hkʼe te gʼa tuˬ aˬ htoꞈ ma ga laˇ gʼa ve le?

¹⁷ Ngaˬ hui hkʼaˬ hkʼe te yuˬ yehˇ tuˬ ve le? Dawˇ haˍ ve maˇ heˆ leh awˬ gʼaˇ nuˇ ve chaw htaꞈ ngaˬ hui ga piˇ htaˇ, gʼa yeunˇ hkanˍ cawˇ ve tehꞈ shiˍ ve yoˬ. Yaꞈ hkʼaˇ, ngaˬ hui chi aꞈ kehˉ te cawˇ sheˍ ve yoˬ. Ngaˬ hui yawˇ hui htaꞈ ga piˇ tuˬ dawˇ taˍ ve hkʼe, gʼaꞈ te cawˇ ve yoˬ. Awˉ lawˉ htaˇ yawˇ ngaˬ hui htaꞈ maˇ ga laˇ tcuh gaˇ. Yaꞈ hkʼaˇ, ngaˬ hui yawˇ htaꞈ haꞈ ve kʼo, yawˇ htaꞈ maˇ baˬ taˉ. Ngaˬ hui caˉ leh yawˇ htaꞈ awˬ chawˇ te leh teˇ nyi kʼo, yawˇ ngaˬ hui htaꞈ ga laˇ tcuh gaˇ tuˬ yoˬ tehꞈ dawˇ law taˍ ve yoˬ.—Gaˍlaˍtiˆ 6:2.

18. Ruˉhtaˆ nyi ma luˬ jaˇ tuˬ aˬ htoꞈ ma te piˇ ve le?

¹⁸ A yeˇ taˇ te. Nawˉmiꞈ leh Ruˉhtaˆ Behˍlehˍhehnˍ venˇ lo gaˬ la htaˇ, oˇ kaˬ lo chehˇ ve shiˍ daꞈ ve chaw htaꞈ gʼa mawˬ daꞈ ve yoˬ. Nawˉmiꞈ yawˇ hui htaꞈ kʼoˆ piˇ ve, “ngaˬ choˬ kaˬ lo tawˆ kʼai htaˇ, ngaˬ geh mawˇ jeˬ hkʼa biˇ cawˬ ve yoˬ. Yaꞈ hkʼaˇ, chi beuꞈ ngaˬ awˬ to kʼawˇ lehˍ kʼawꞈ la ve yoˬ.” (Ruˉhtaˆ 1:21) Ruˉhtaˆ chi hkʼe gʼa kaˇ htaˇ, yawˇ hkʼaˬ hkʼe dawˇ ve htaꞈ dawˇ nyi sheˍ. Ruˉhtaˆ ceh tiˉ Nawˉmiꞈ awˬ paˇ lo chehˇ leh Nawˉmiꞈ htaꞈ awˬ gʼaˇ piˇ chehˇ ve yoˬ. Yawˇ huiˉ maˬ teˇ geh hawˬ leh laiˉ nyi teˇ geh kʼai ve yoˬ. Yaꞈ hkʼaˇ, oˇ kaˬ lo gaˬ la htaˇ, ‘Yaˬhoˉvaˬ lehˬ ngaˬ awˬ to kʼawˇ lehˍ kʼawꞈ la tcuh laˇ taˍ ve yoˬ’ tehꞈ Nawˉmiꞈ kʼoˆ ve yoˬ. Ruˉhtaˆ Nawˉmiꞈ htaꞈ ga piˇ ve lehˬ Nawˉmiꞈ awˬ hpfuhˇ maˇ shiˍ ve htaꞈ shuˍ ve yoˬ. Ruˉhtaˆ yawˇ geh chehˇ taˍ ve nyi ma hkʼaˬ hkʼe taw luˬ ve htaꞈ dawˇ nyi sheˍ. Chi hkʼe hpehꞈ ve htawˇ, Ruˉhtaˆ lehˬ Nawˉmiꞈ htaꞈ maˇ baˬ taˉ.

19. Dawˇ maˇ leh dawˇ haˍ ve chaw htaꞈ ngaˬ hui maˇ baˬ taˉ tuˬ aˬ htoꞈ ma ga laˇ ve le?

¹⁹ Ngaˬ hui hkʼaˬ hkʼe te yuˬ yeˇ tuˬ ve le? Awˬ viˉ awˬ nyi dawˇ maˇ leh dawˇ haˍ ve chaw htaꞈ ngaˬ hui coˇ caˇ leh ga piˇ chehˇ ve htawˇ, ngaˬ hui htaꞈ tawˇ maˇ daꞈ ve yaw laˇ ve yoˬ. Yaꞈ hkʼaˇ, ngaˬ hui a yeˇ maˇ te. Leh yawˇ htaꞈ maˇ baˬ taˉ piˇ. Yawˇ htaꞈ awˬ gʼaˇ piˇ gʼa tuˬ awˬ hkʼaˇ ngaˬ hui Yaˬhoˉvaˬ ga laˇ tuˬ lawˬ gʼa ve yoˬ.—Tawˇ naˉ ve 17:17.

20. Ruˉhtaˆ awˬ gʼaˇ maˇ gʼa nuˇ leh te kʼai tuˬ aˬ htoꞈ ma ga piˇ ve le?

²⁰ Awˬ gʼaˇ gʼa tuˬ loˍ ve chaw htaꞈ ga piˇ ve. Ruˉhtaˆ lehˬ Nawˉmiꞈ htaꞈ haꞈ ve tehꞈ hpeuꞈ maw piˇ ve htawˇ, yawˇ htaꞈ kaꞈ awˬ gʼaˇ peꞈ laˇ tuˬ loˍ ve yoˬ. Hkʼe te leh, Yaˬhoˉvaˬ Bawˇzaˆ htaꞈ cuˇ leh Ruˉhtaˆ htaꞈ awˬ gʼaˇ piˇ tcuh ve yoˬ. Bawˇzaˆ yawˇ htaꞈ kʼoˆ piˇ ve, “nawˬ te taˍ peuˬ ve kanˉ awˬ pon Gʼuiˬ sha  nawˬ htaꞈ awˬ bon naꞈ laˇ piˇ˗oˆ. Nawˬ gʼaˇ ca va la ve Iˉsaˍreˍlaˆ ve Gʼuiˬ sha nawˬ htaꞈ awˬ bon kʼawꞈ te hkʼawꞈ laˇ piˇ˗oˆ.” Tawˇ hkawˇ chi lehˬ Ruˉhtaˆ awˬ gʼaˇ gʼa jaˇ leh yawˇ Bawˇzaˆ htaꞈ kʼoˆ piˇ ve, “ngaˬ lehˬ nawˬ ve awˬ ceˬ te maˇ keunˍ ve chaw hpehꞈ ve htawˇ, nawˬ ngaˬ htaꞈ chi taw taw na sha ve tawˇ yaw laˇ ve yoˬ.” (Ruˉhtaˆ 2:12, 13) Bawˇzaˆ kʼoˆ piˇ ve tawˇ lehˬ, Ruˉhtaˆ awˬ gʼaˇ gʼa tuˬ awˬ yanˇ htaꞈ cawˇ daꞈ ve yoˬ. Chi yawˇ awˬ gʼaˇ gʼa leh te kʼai tuˬ ga piˇ ve yoˬ.

21. Iˉsaˍyaˆ liꞈ 32:1, 2 hkʼaw kʼoˆ taˍ ve hkʼe, nyi haꞈ shaˉ paˍ awˬ viˉ awˬ nyi htaꞈ a yeˇ yuˬ ve kʼo, aˬ htoꞈ ma te gaˇ tuˬ te piˇ ve le?

²¹ Ngaˬ hui hkʼaˬ hkʼe te yuˬ yehˇ tuˬ ve le? Teˇ pawˆ pawˆ kʼo, shu htaꞈ haꞈ ve tehꞈ hpeuꞈ maw piˇ ve chaw htawˇ, awˬ gʼaˇ peꞈ laˇ tuˬ loˍ ve yoˬ. Ruˉhtaˆ Nawˉmiꞈ htaꞈ ga piˇ ve Bawˇzaˆ gʼa mawˬ htaˇ, yawˇ chiˇ mvuh piˇ ve yoˬ. Chi beuꞈ teˇ co˗e nyi haꞈ shaˉ paˍ kaꞈ hkʼa shuˍ shuˍ, Hkriꞈ yaˇ awˬ moˍ hkʼaw ve awˬ viˉ awˬ nyi, awˬ nu ve awˬ viˉ awˬ nyi htaꞈ ga piˇ ve nyi haꞈ shaˉ paˍ mawˬ htaˇ, yawˇ htaꞈ chiˇ mvuh piˇ ve yoˬ. Awˬ viˉ awˬ nyi ga laˇ tuˬ loˍ htaˇ nyi haꞈ shaˉ paˍ chi hkʼe te ve kʼo, chi awˬ viˉ awˬ nyi awˬ gʼaˇ cawˬ tuˬ te piˇ leh awˬ nu ve chaw htaꞈ caˉ leh ga piˇ tuˬ te piˇ ve yoˬ.—Iˉsaˍyaˆ 32:1, 2 gʼaw sheˍ.

22-23. Nawˉmiꞈ ve dawˇ hkʼaˇ hkʼaˬ hkʼe pa ve le? Leh aˬ htoꞈ ma pa taw le? (Chiˇ mvuh ve 136:23, 26)

²² Bawˇzaˆ lehˬ Nawˉmiꞈ leh Ruˉhtaˆ htaꞈ caˇ tuˬ pehˬ piˇ ve yoˬ. (Ruˉhtaˆ 2:14-18) Bawˇzaˆ te piˇ ve awˬ ceuˬ htaꞈ Nawˉmiꞈ hkʼaˬ hkʼe dawˇ ve le? “Gʼuiˬ sha Bawˇzaˆ htaꞈ awˬ bon naꞈ piˇ˗oˆ. Gʼuiˬ sha lehˬ teꞈ chehˇ ve chaw leh suh peuˬ ve chaw hui htaꞈ te piˇ taˍ ve yawˇ ve ka tiꞈ htaꞈ hkʼaˬ htaˆ kaꞈ dawˇ nawˇ chehˇ ve yoˬ.” (Ruˉhtaˆ 2:20) Nawˉmiꞈ ve dawˇ hkʼaˇ lehˬ pa kʼai jaˇ. Chi awˬ gʼuˇ suhˍ htaˇ Nawˉmiꞈ nyi ma luˬ leh kʼoˆ ve, Gʼuiˬ sha “ngaˬ htaꞈ ciˍ yanˍ leh tuꞈ hkanˍ piˇ lawˬ peuˬ.” Yaꞈ hkʼaˇ, chi teˇ hkui yawˇ ha lehˬ leh kʼawꞈ kʼoˆ ve, ‘Yaˬhoˉvaˬ lehˬ hkʼaˬ htaˆ kaꞈ haꞈ pehnˇ ve Gʼuiˬ sha hpehꞈ ve yoˬ.’ Nawˉmiꞈ ve dawˇ hkʼaˇ pa kʼai tuˬ aˬ htoꞈ ma te piˇ ve le?

 ²³ Awˬ leh meuˇ htaˇ Yaˬhoˉvaˬ Nawˉmiꞈ htaꞈ hkʼaˬ htaˆ kaꞈ ga laˇ chehˇ ve tehꞈ Nawˉmiꞈ gʼa mawˬ ve yoˬ. Chi hkʼoˆ kaꞈ, Nawˉmiꞈ Yuˇdaꞈ mvuhˇ miˬ lo kʼawꞈ la chehˇ htaˇ, Yaˬhoˉvaˬ Ruˉhtaˆ htaꞈ cuˇ leh yawˇ htaꞈ ga piˇ tcuh ve yoˬ. (Ruˉhtaˆ 1:16) Yaˬhoˉvaˬ Bawˇzaˆ htaꞈ cuˇ leh ‘ngaˬ huiˉ maˬ htaꞈ haꞈ shaˉ laˇ gʼa ve’ Nawˉmiꞈ gʼa mawˬ ve yoˬ. * (Ruˉhtaˆ 2:19, 20) Nawˉmiꞈ dawˇ ve, ‘Yaˬhoˉvaˬ ngaˬ htaꞈ maˇ baˬ taˉ laˇ jaw leh yawˇ hkʼaˬ htaˆ kaꞈ ngaˬ awˬ paˇ lo chehˇ taˍ ve tehꞈ chi teˇ hkui ngaˬ na gʼa˗oˬ!’ (Chiˇ mvuh ve 136:23, 26 gʼaw sheˍ.) Ruˉhtaˆ leh Bawˇzaˆ Nawˉmiꞈ htaꞈ ga laˇ tuˬ coˇ caˇ ve yawˇ awˬ bon uiˍ jaˇ tehꞈ dawˇ ve yoˬ. Nawˉmiꞈ awˬ gʼaˇ cawˬ la leh Yaˬhoˉvaˬ ve kanˉ kʼawꞈ te la ve yawˇ hui 3 gʼaˇ hkʼaˬ hkʼe taw ha lehˬ ve htaꞈ ngaˬ hui dawˇ mawˬ gʼa ve yoˬ.

24. Aˬ htoꞈ ma te ngaˬ hui ve awˬ viˉ awˬ nyi htaꞈ haꞈ pehnˇ ve tehꞈ hpeuꞈ maw piˇ tuˬ hkʼaˬ htaˆ kaꞈ dawˇ teh taˍ cawˇ ve le?

²⁴ Ruˉhtaˆ liꞈ hkʼaw haꞈ pehnˇ ve htaꞈ caˉ daꞈ ve ngaˬ hui htaꞈ aˬ htoꞈ ma maˍ laˇ ve le? Ngaˬ hui haꞈ pehnˇ ve cawˬ ve kʼo, awˬ viˉ awˬ nyi, nyi ma luˬ chehˇ leh awˬ gʼaˇ nuˇ chehˇ ve chaw htaꞈ ga piˇ tuˬ, dawˇ taˍ ve hkʼe caˉ leh te chehˇ ve yoˬ. Chi hkʼe ceh maˇ heˆ, haꞈ pehnˇ ve lehˬ a shu yawˇ awˬ to yuˬ tanˇ leh dawˇ taˍ ve aꞈ kehˉ te gʼa maˇ ve yoˬ. Chi hkʼoˆ kaꞈ, nyi haꞈ shaˉ paˍ lehˬ awˬ viˉ awˬ nyi awˬ nu ve chaw htaꞈ haꞈ leh ga piˇ ve chaw htaꞈ awˬ gʼaˇ piˇ cawˇ ve yoˬ. Ngaˬ hui ga piˇ ve chaw Yaˬhoˉvaˬ ve kanˉ kʼawꞈ te la ve htaꞈ ngaˬ hui mawˬ htaˇ, ha lehˬ jaˇ. (Tcuh yaˇ 20:35) Ngaˬ hui haꞈ pehnˇ ve htaꞈ hpeuꞈ maw piˇ tuˬ a yeˇ uiˍ jaˇ ve aˬ htoꞈ ma le? Ngaˬ hui “Gʼuiˬ sha haꞈ pehnˇ ve” htaꞈ henˇ yuˬ gaˇ ve pa taw, Gʼuiˬ sha nyi hkʼaˇ suh tuˬ te piˇ chehˇ ve yoˬ.—Tawˆ kʼai ve 34:6; Chiˇ mvuh ve 33:22.