1. Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le?

 Haꞈ pehnˇ ve lehˬ a yeˇ uiˍ jaˇ ve tehꞈ Yaˬhoˉvaˬ shawˍ ve yoˬ. (Hawˇseˍ 6:6) Leh Yaˬhoˉvaˬ lehˬ ngaˬ hui htaꞈ kaꞈ chi hkʼe shawˍ tcuh gaˇ ve yoˬ. Ngaˬ hui “haꞈ pehnˇ ve” cawˬ tuˬ Yaˬhoˉvaˬ tcuh kaˍ paˍ Miˆhkaˍ htaꞈ cuˇ leh kʼoˆ laˇ tcuh ve yoˬ. (Miˆhkaˍ 6:8) Yaꞈ hkʼaˇ, ngaˬ hui chi hkʼe te gʼa tuˬ, haꞈ pehnˇ ve hkʼaˬ hkʼe hpehꞈ ve gʼa shiˍ cawˇ sheˍ ve yoˬ.

2. Haꞈ pehnˇ ve lehˬ hkʼaˬ hkʼe ve htaꞈ kʼoˆ gaˇ ve le?

² Haꞈ pehnˇ ve lehˬ hkʼaˬ hkʼe hpehꞈ ve le? “Haꞈ pehnˇ ve” lehˬ hkʼaˬ htaˆ kaꞈ haꞈ ve htaꞈ kʼoˆ gaˇ ve yoˬ. Leh tawˇ hkawˇ chi teˇ hpaˍ htaꞈ shuˍ ve Miˬ guiˬ awˬ suhˉ yuˬ tawˆ ve Liꞈ hpu (Htaiˇ ve) hkʼaw aˬ laˬ hkʼe 190 pawˆ cawˬ ve yoˬ. “Miˬ guiˬ awˬ suhˉ yuˬ tawˆ ve Liꞈ hpu hkʼaw awˬ leuˉ kʼawꞈ kʼoˆ maˍ taˍ ve, haꞈ pehnˇ ve kʼoˆ gaˇ ve” lehˬ “hteˇ ve cawˇ ve htaꞈ te ve, haꞈ pehnˇ ve, leh nyi ma nuˇ nehˬ ve awˬ hkʼaw lo Gʼuiˬ sha ve tawˇ hkawˇ htaꞈ na yuˬ ve awˬ ceuˬ chi teˇ hpaˍ yoˬ. Gʼuiˬ sha chaw yaˇ htaꞈ haꞈ ve tehꞈ kʼoˆ htaˇ chi ve htaꞈ yehˇ ve yoˬ. Yaꞈ hkʼaˇ, haꞈ pehnˇ ve chi lehˬ chaw yaˇ teˇ gʼaˇ leh teˇ gʼaˇ haꞈ daꞈ gʼa ve yoˬ.” Yaˬhoˉvaˬ lehˬ haꞈ pehnˇ ve hpeuꞈ maw laˇ ve daꞈ jaˇ ve henˇ yuˬ tuˬ hpehꞈ ve yoˬ. Awˬ lawn chi ve hkʼaw Yaˬhoˉvaˬ chaw yaˇ htaꞈ haꞈ pehnˇ ve hkʼaˬ hkʼe hpeuꞈ maw laˇ ve le? Teˇ geh henˇ tuˬ yoˬ. Leh gʼuˇ suhˍ teˇ lawn hkʼaw Yaˬhoˉvaˬ ve kanˉ te ve chaw yawˇ htaꞈ henˇ yuˬ leh teˇ gʼaˇ leh teˇ gʼaˇ haꞈ pehnˇ ve hkʼaˬ hkʼe hpeuꞈ maw piˇ daꞈ tuˬ kaꞈ teˇ geh henˇ tuˬ yoˬ.

3. Yaˬhoˉvaˬ yawˇ htaꞈ caˉ daꞈ ve Moˉseˍ htaꞈ hkʼaˬ hkʼe kʼoˆ piˇ ve le?

³ Iˉsaˍreˍlaˆ chaw Eˇjiˇtuꞈ mvuhˇ miˬ hkʼaw tawˆ˗e peuˬ hkʼawꞈ nawˉ maˇ maw, Yaˬhoˉvaˬ Moˉseˍ htaꞈ yawˇ ve awˬ meh leh yawˇ ve te hkʼaˇ dawˇ hkʼaˇ htaꞈ caˉ daꞈ ve kʼoˆ piˇ ve yoˬ. Oˇ kaˬ lo kʼoˆ ve, “Gʼuiˬ sha lehˬ ha kʼaˉ puiˉ leh awˬ bon te piˇ puiˉ ve Gʼuiˬ sha hpehꞈ leh, nyi ma dawˇ zuhˬ gaˇ zuhˬ ve Gʼuiˬ sha, haꞈ pehnˇ uiˍ leh ka tiꞈ yeˬ ve Gʼuiˬ sha hpehꞈ ve yoˬ. Ngaˬ lehˬ, chaw awˬ hinˉ awˬ meunˍ gʼaˇ htaꞈ ka tiꞈ yeˬ leh,  yawˇ hui ve venˇ baˆ teˇ hpaˍ htaꞈ hpehˇ piˇ puiˉ ve Gʼuiˬ sha hpehꞈ ve yoˬ.” (Tawˆ kʼai ve 34:6, 7) Yaˬhoˉvaˬ ve haꞈ pehnˇ ve hkʼaˬ hkʼe daꞈ jaˇ ve le? Teˇ geh nyi sheˍ.

4-5. (a) Yaˬhoˉvaˬ yawˇ htaꞈ caˉ daꞈ ve hkʼaˬ hkʼe kʼoˆ ve le? (b) Aˬ htoꞈ ma ve na hkawˇ htaꞈ ngaˬ hui teˇ geh henˇ tuˬ le?

⁴ Yaˬhoˉvaˬ yawˇ “haꞈ pehnˇ” ve cawˬ ve htaꞈ kʼoˆ ve yoˬ. Tawˇ hkawˇ chi ve Liꞈ hpu hkʼaw 7 pawˆ cawˬ ve yoˬ. (Heh puiˉ hkʼaw 14:18; Neˍhaˍmiˆ 9:17; Chiˇ mvuh ve 86:15; 103:8; Yawˇlaˆ 2:13; Yoˇnaˆ 4:2) Yaꞈ hkʼaˇ, tawˇ hkawˇ chi ve chaw yaˇ awˬ pon maˇ yehˇ jaw. Yaˬhoˉvaˬ htaꞈ ceh tiˉ yehˇ ve yoˬ. Yaˬhoˉvaˬ haꞈ pehnˇ ve cawˬ ve tehꞈ kʼoˆ ve htaꞈ ngaˬ hui gʼa mawˬ ve yoˬ. Te hkʼaˇ dawˇ hkʼaˇ chi ve yawˇ awˬ pon a yeˇ uiˍ jaˇ. * Chi ve htaꞈ pa taw jawˇ mawˇ Daˍviˆ kʼoˆ ve, ‘Gʼuiˬ sha˗oˬ, nawˬ ve haꞈ pehnˇ ve teˇ ceuˬ mvuhˇ naw ma htaꞈ dawꞈ taˍ ve yoˬ. Gʼuiˬ sha˗oˬ, nawˬ ve haꞈ pehnˇ ve teˇ ceuˬ hkʼaˬ ma daꞈ jaˇ ve le? Nawˬ ve toˍ laꞈ kʼuˉ awˬ hawˉ lo ngaˬ hui gʼaˇ jehˇ kuiˬ htaꞈ gʼa mawˬ ve yoˬ.’ (Chiˇ mvuh ve 36:5, 7) Gʼuiˬ sha ve haꞈ pehnˇ ve htaꞈ Daˍviˆ awˬ hpfuhˇ hkʼaˆ jaˇ tehꞈ dawˇ ve hkʼe ngaˬ hui dawˇ˗aw laˇ?

⁵ Haꞈ pehnˇ ve lehˬ hkʼaˬ hkʼe ve htaꞈ kʼoˆ gaˇ ve, ngaˬ hui na gʼa tuˬ na hkawˇ 2 maˬ htaꞈ teˇ geh nyi sheˍ. Yaˬhoˉvaˬ lehˬ a shu htaꞈ haꞈ ve le? Leh Yaˬhoˉvaˬ haꞈ laˇ ve htaꞈ ngaˬ hui aˬ htoꞈ ma awˬ bon gʼa ve le?

6. Yaˬhoˉvaˬ lehˬ a shu htaꞈ haꞈ ve le?

⁶ Yaˬhoˉvaˬ lehˬ a shu htaꞈ haꞈ ve le? Liꞈ hpu hkʼaw kʼoˆ ve, ngaˬ hui laiˉ ceuˬ htaꞈ haꞈ gʼa ve lehˬ, “hteˇ ve cawˇ ve,” “maˍ piˇ ve,” “cuˇ yiˍ,” leh pyawˍ ve, chi ve teˇ hpaˍ yoˬ. (2 Raˍsaˍvanˍ 26:10; Tawˇ naˉ ve 12:1; 21:17; 29:3) Yaꞈ hkʼaˇ, haꞈ pehnˇ ve lehˬ chaw htaꞈ ceh tiˉ haꞈ gʼa ve tehꞈ hpeuꞈ maw piˇ gʼa ve yoˬ. Yaˬhoˉvaˬ teˇ gʼaˇ le le htaꞈ haꞈ ve maˇ heˆ tehꞈ chaˬ nyi gʼa ve yoˬ. Yaꞈ hkʼaˇ, Gʼuiˬ sha lehˬ yawˇ geh meuˆ daꞈ ve chaw htaꞈ ceh tiˉ haꞈ ve yoˬ. Yaˬhoˉvaˬ yawˇ ve awˬ chawˇ htaꞈ ka tiꞈ yeˬ leh yawˇ hui htaꞈ daꞈ ve awˬ ceuˬ piˇ tuˬ yoˬ tehꞈ dawˇ teh taˍ ve yoˬ. Gʼuiˬ sha yawˇ hui htaꞈ hkʼaˬ htaˆ kaꞈ haꞈ ve yoˬ.

7. Yaˬhoˉvaˬ chaw yaˇ teˇ gʼaˇ le le htaꞈ haꞈ ve tehꞈ hkʼaˬ hkʼe hpeuꞈ maw laˇ ve le?

⁷ Yaˬhoˉvaˬ chaw yaˇ teˇ gʼaˇ le le htaꞈ haꞈ ve yoˬ. Yeˍsuˆ Niˆkawˇdeˍ htaꞈ kʼoˆ piˇ ve “Gʼuiˬ sha miˬ guiˬ yaˇ htaꞈ haꞈ jaˇ ve pa taw, yawˇ ve Yaˇ hpu tiˍ piˇ laˇ ve yoˬ. Hkʼe te leh, Yaˇ hpu htaꞈ hkʼa haꞈ ve chaw hkʼa peu˗eˬ maˇ gʼa luˬ maˇ gʼa sheˆ ve awˬ hkʼoˆ kaꞈ, co tiꞈ ha tiꞈ htaꞈ gʼa ve yoˬ.”—Yoˇhanˬ 3:1, 16; Maꞈhtehˍ 5:44, 45.

8-9. (a) Yaˬhoˉvaˬ lehˬ yawˇ ve kanˉ te ve chaw htaꞈ aˬ htoꞈ ma te haꞈ ve tehꞈ hpeuꞈ maw piˇ ve le? (b) Ngaˬ hui aˬ htoꞈ ma htaꞈ henˇ tuˬ le?

⁸ Ngaˬ hui gʼa henˇ peuˬ˗oˬ ve, Yaˬhoˉvaˬ yawˇ haꞈ ve tehꞈ hpeuꞈ maw piˇ ve lehˬ, yawˇ geh meuˆ daꞈ ve, yawˇ ve kanˉ te ve chaw teˇ hpaˍ yoˬ. Awˬ lawn chi ve ngaˬ hui mawˬ gʼa tuˬ jawˇ mawˇ Daˍviˆ leh  tcuh kaˍ paˍ Daˍyeˍlaˆ ve tawˇ hkawˇ htaꞈ ngaˬ hui mawˬ gʼa ve yoˬ. Tawˇ pa haˉ te kʼo, Daˍviˆ kʼoˆ ve, “nawˬ htaꞈ shiˍ ve chaw htaꞈ nawˬ kʼawꞈ caˉ haꞈ piˇ leh, hteˇ ve cawˇ ve chaw hui htaꞈ daꞈ ve awˬ bon te piˇ” ve yoˬ. “Gʼuiˬ sha htaꞈ yawˆ yan ve chaw teˇ hpaˍ awˬ hkʼoˆ lo yawˇ haꞈ pehnˇ ve teˇ ceuˬ co co taiˍ taiˍ cawˬ chehˇ ve yoˬ.” Leh Daˍyeˍlaˆ kaꞈ kʼoˆ ve, “Gʼuiˬ sha˗oˬ, nawˬ lehˬ uiˍ jaˇ mvuh jaˇ ve Gʼuiˬ sha hpehꞈ ve pa taw, ngaˬ hui nawˬ htaꞈ yawˆ yan ve yoˬ. Nawˬ lehˬ ka tiꞈ yeˬ jaˇ leh, nawˬ htaꞈ haꞈ leh nawˬ ve tawˇ htaꞈ na yuˬ ve chaw hui htaꞈ hkʼaˬ htaˆ kaꞈ ha kʼaˉ piˇ chehˇ ve yoˬ.” (Chiˇ mvuh ve 36:10; 103:17; Daˍyeˍlaˆ 9:4) Yawˇ hui Gʼuiˬ sha htaꞈ shiˍ ve, Gʼuiˬ sha htaꞈ yawˆ yan ve, yawˇ ve awˬ liˇ tawˇ hkawˇ htaꞈ haꞈ leh gʼaꞈ te ve pa taw, Yaˬhoˉvaˬ yawˇ ve kanˉ te ve chaw htaꞈ haꞈ ve tehꞈ hpeuꞈ maw piˇ ve, Liꞈ hpu awˬ tawn chi ve htaꞈ ngaˬ hui mawˬ gʼa ve yoˬ. Yaˬhoˉvaˬ lehˬ cawˇ ve hkʼaw ceh tiˉ oˉ kʼoˍ pui ve htaꞈ haꞈ ve tehꞈ hpeuꞈ maw laˇ ve yoˬ.

⁹ Yaˬhoˉvaˬ chaw yaˇ teˇ gʼaˇ le le htaꞈ haꞈ ve hkʼa shuˍ ngaˬ hui yawˇ ve kanˉ maˇ te sheˍ htaˇ kaꞈ yawˇ ngaˬ hui htaꞈ awˉ lawˉ haꞈ laˇ ve yoˬ. (Chiˇ mvuh ve 104:14) Yaꞈ hkʼaˇ, ngaˬ hui yawˇ ve kanˉ te la htaˇ yawˇ ngaˬ hui htaꞈ haꞈ ve tehꞈ hpeuꞈ maw laˇ sheˍ ve yoˬ. Yaˬhoˉvaˬ yawˇ ve kanˉ te ve chaw htaꞈ ka tiꞈ te taˍ piˇ ve, “nawˬ hui htaꞈ haꞈ ve teˇ ceuˬ teˇ pawˆ kaꞈ mehˉ kʼai tuˬ ve maˇ heˆ.” (Iˉsaˍyaˆ 54:10) Daˍviˆ kʼoˆ ve, “Gʼuiˬ sha lehˬ hteˇ ve cawˇ ve chaw htaꞈ leuˆ yuˬ leh, ngaˬ yawˇ htaꞈ kuˬ ve teˇ yanˇ, yawˇ ngaˬ kuˬ hkawˇ htaꞈ na laˇ chehˇ ve” yoˬ. (Chiˇ mvuh ve 4:3) Yaˬhoˉvaˬ ngaˬ hui htaꞈ chi hkʼe taw nyi haꞈ shaˉ laˇ ve ngaˬ hui shiˍ htaˇ, ngaˬ hui aˬ htoꞈ ma te cawˇ ve le? Chiˇ mvuh ve liꞈ bvuhꞈ paˍ kʼoˆ ve, “cuˇ yiˍ cawˬ ve chaw hui awˬ lawn chi teˇ hpaˍ htaꞈ dawˇ nyi leh, yawˇ lehˬ hkʼaˬ ma haꞈ pehnˇ uiˍ ve Gʼuiˬ sha hpehꞈ ve htaꞈ dawˇ shiˍ piˇ lawˬ˗oꞈ.” (Chiˇ mvuh ve 107:43) Beˆ maˍ laˇ hkawˇ chi teˇ tawn lehˬ Yaˬhoˉvaˬ geh laˬ ve yoˬ. Yaˬhoˉvaˬ yawˇ ve kanˉ te ve chaw htaꞈ haꞈ ve tehꞈ hpeuꞈ maw piˇ leh ngaˬ hui aˬ htoꞈ ma awˬ bon gʼa ve 3 hkʼaˇ htaꞈ teˇ geh nyi sheˍ.

10. Yaˬhoˉvaˬ haꞈ pehnˇ ve co co yeˬ chehˇ ve htaꞈ ngaˬ hui aˬ htoꞈ ma awˬ bon gʼa ve le? (Chiˇ mvuh ve 31:7)

¹⁰ Yaˬhoˉvaˬ haꞈ pehnˇ ve co co yeˬ ve. Awˬ lawn chi Chiˇ mvuh ve liꞈ kaˇ nanˉ uiˍ 136 hkʼaw 26 pawˆ kʼoˆ taˍ ve yoˬ. Awˉ lawˉ teˇ tawn hkʼaw kʼoˆ ve, “Gʼuiˬ sha htaꞈ chiˇ mvuh˗o. Awˬ lawn kʼo, yawˇ lehˬ daꞈ jaˇ leh yawˇ haꞈ pehnˇ ve co co yeˬ chehˇ ve yoˬ.” (Chiˇ mvuh ve 136:1) Kaˇ nanˉ ehˉ 2 te leh 26 hkʼaw kʼawꞈ kʼoˆ sheˍ ve, “[Yaˬhoˉvaˬ] haꞈ pehnˇ ve co co yeˬ chehˇ  ve yoˬ.” Chiˇ mvuh ve liꞈ chi ve teˇ puꞈ ngaˬ hui hkʼa peu˗eˬ gʼaw peuˬ˗oˬ htaˇ, Yaˬhoˉvaˬ haꞈ pehnˇ ve laiˉ hkʼaˇ hpeuꞈ maw laˇ ve htaꞈ ngaˬ hui gʼa mawˬ ve dawˇ cawˇ jaˇ. “[Yaˬhoˉvaˬ] haꞈ pehnˇ ve co co yeˬ ve” tawˇ hkawˇ chi ve Yaˬhoˉvaˬ maˇ pa ve ngaˬ hui yonˍ tuˬ te laˇ ve yoˬ. Gʼuiˬ sha a shu htaꞈ haꞈ˗oˬ ve kʼo, oˇ ve teˇ gʼaˇ htaꞈ hkʼaˬ htaˆ kaꞈ haꞈ ve, oˇ ve teˇ gʼaˇ htaꞈ yawˇ dawˇ law chehˇ ve, leh yawˇ tuꞈ ve hkanˍ ve gʼa hpuˇ htaˇ Gʼuiˬ sha yawˇ htaꞈ maˇ chiˇ baˬ. Ngaˬ hui aˬ htoꞈ ma awˬ bon gʼa ve le? Yaˬhoˉvaˬ ngaˬ hui htaꞈ haꞈ leh ngaˬ hui geh hkʼaˬ htaˆ kaꞈ chehˇ tuˬ ve yoˬ tehꞈ ngaˬ hui shiˍ htaˇ, ngaˬ hui ha lehˬ ve leh shoꞈ shaꞈ ve teˇ hpaˍ gu gʼa leh yawˇ ve kanˉ caˉ leh te tuˬ yoˬ.—Chiˇ mvuh ve 31:7 gʼaw sheˍ.

11. Chiˇ mvuh ve liꞈ 86:5 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ venˇ baˆ hpehˇ laˇ tuˬ aˬ htoꞈ ma te piˇ ve le?

¹¹ Gʼuiˬ sha ve haꞈ pehnˇ ve yawˇ ngaˬ hui htaꞈ venˇ baˆ hpehˇ laˇ tuˬ te piˇ ve. Venˇ baˆ te yaꞈ ve chaw awˬ tehˬ awˬ na venˇ baˆ dawˇ hpfuhˆ leh Yaˬhoˉvaˬ maˇ dawˇ cawˇ ve awˬ ceuˬ htaꞈ yawˇ maˇ te˗o htaˇ, Yaˬhoˉvaˬ ve haꞈ pehnˇ ve kaꞈ chaw oˇ ve teˇ gʼaˇ htaꞈ venˇ baˆ hpehˇ piˇ tuˬ te piˇ ve yoˬ. Chiˇ mvuh ve liꞈ bvuhꞈ paˍ Daˍviˆ Yaˬhoˉvaˬ htaꞈ kʼoˆ ve, “ngaˬ hui lehˬ ciˍ yanˍ keunˍ ve chaw hpehꞈ ve htawˇ, yawˇ maˇ ciˍ yanˍ laˇ. Ngaˬ hui te yaꞈ ve venˇ baˆ teˇ hpaˍ htaꞈ yawˇ maˇ kʼawꞈ te hkʼawꞈ laˇ.” (Chiˇ mvuh ve 103:8-11) Te yaꞈ ve lehˬ nyi ma hkʼaˬ hkʼe taw naˬ ve Daˍviˆ yawˇ ve hpehꞈ laˬ jaw ve awˬ lawn yawˇ htaꞈ maˍ piˇ ve yoˬ. Yaˬhoˉvaˬ lehˬ venˇ baˆ hpehˇ piˇ puiˉ ve Gʼuiˬ sha hpehꞈ ve tehꞈ yawˇ gʼa shiˍ ve yoˬ. Yaˬhoˉvaˬ venˇ baˆ hpehˇ piˇ tuˬ aˬ htoꞈ ma te piˇ ve le? Hkʼawꞈ laˇ hkawˇ Chiˇ mvuh ve liꞈ 86:5 hkʼaw cawˬ ve yoˬ. (Gʼaw sheˍ. *) Daˍviˆ kʼoˆ ve, Gʼuiˬ sha htaꞈ ca ve chaw teˇ gʼaˇ le le htaꞈ yawˇ venˇ baˆ hpehˇ piˇ ve yoˬ.

12-13. Ngaˬ hui nyi ma luˬ chehˇ sheˍ ve kʼo, aˬ htoꞈ ma ga laˇ gʼa tuˬ ve le?

¹² Ngaˬ hui venˇ baˆ te yaꞈ htaˇ, te yaꞈ ve awˬ ceuˬ htaꞈ nyi ma luˬ ve lehˬ daꞈ ve yoˬ. Chi ngaˬ hui venˇ baˆ dawˇ hpfuhˆ tuˬ leh a shu yawˇ ve dawˇ hkʼaˇ pa tuˬ ga laˇ ve yoˬ. Yaꞈ hkʼaˇ, Yaˬhoˉvaˬ ve kanˉ te ve chaw teˇ hpaˍ te yaꞈ ve htaꞈ nyi ma luˬ chehˇ sheˍ leh yawˇ venˇ baˆ dawˇ hpfuhˆ˗oˬ ve htawˇ Yaˬhoˉvaˬ yawˇ htaꞈ venˇ baˆ maˇ hpehˇ laˇ taˬ tehꞈ yawˇ dawˇ ve yoˬ. Chi hkʼe dawˇ ve nawˬ kaꞈ teˇ gʼaˇ hpehꞈ ve kʼo, Yaˬhoˉvaˬ yawˇ ve kanˉ te ve chaw htaꞈ yawˇ haꞈ pehnˇ ve hpeuꞈ maw piˇ ve tehꞈ nawˬ na gʼa tuˬ ga laˇ ve yoˬ.

¹³ Ngaˬ hui awˬ bon hkʼaˬ hkʼe gʼa ve le? Ngaˬ hui maˇ biˇ ve chaw hpehꞈ leh te yaꞈ ve htawˇ, ngaˬ hui  nyi ma maˇ luˬ leh Yaˬhoˉvaˬ ve kanˉ ha lehˬ ha kʼa te gʼa ve yoˬ. “Yawˇ ve Yaˇ hpu Yeˍsuˆ Hkriꞈ ve awˬ suhˍ lehˬ, ngaˬ hui ve venˇ baˆ teˇ ceuˬ le le htaꞈ tsuhˇ baˬ laˇ chehˇ ve yoˬ.” (1 Yoˇhanˬ 1:7) Nawˬ nyi ma luˬ chehˇ sheˍ ve htawˇ, nawˬ awˬ tehˬ awˬ na venˇ baˆ dawˇ hpfuhˆ ve kʼo, Yaˬhoˉvaˬ nawˬ htaꞈ venˇ baˆ hpehˇ laˇ tuˬ yoˬ tehꞈ nawˬ tawnˇ taˍ sheˍ. Haꞈ pehnˇ ve leh venˇ baˆ hpehˇ piˇ ve hkʼaˬ hkʼe te caˉ daꞈ ve, Daˍviˆ kʼoˆ ve tawˇ hkawˇ htaꞈ chaˬ nyi sheˍ. Yawˇ kʼoˆ ve, “mvuhˇ naw ma lehˬ miˬ guiˬ hkʼoˆ lo mvuh jaˇ ve hkʼe, yawˇ haꞈ pehnˇ ve teˇ ceuˬ lehˬ yawˇ htaꞈ kawˆ ve chaw hui awˬ hkʼoˆ lo uiˍ jaˇ maˇ jaˇ ve yoˬ. Mvuhˇ nyi tawˆ hpawˇ lehˬ, mvuhˇ nyi kʼehˬ hpawˇ htaꞈ vuiˇ jaˇ ve hkʼe, yawˇ lehˬ ngaˬ hui ve venˇ baˆ teˇ hpaˍ ngaˬ hui htaꞈ vuiˇ kuiˬ lo yuˬ baˬ ve yoˬ.” (Chiˇ mvuh ve 103:11, 12) Yaˬhoˉvaˬ lehˬ “venˇ baˆ hpehˇ piˇ puiˉ ve yoˬ.”—Iˉsaˍyaˆ 55:7.

14. Gʼuiˬ sha ve haꞈ pehnˇ ve ngaˬ hui htaꞈ haꞈ shaˉ laˇ ve htaꞈ caˉ daꞈ ve awˬ hkʼaˇ Daˍviˆ aˬ htoꞈ ma kʼoˆ taˍ ve le?

¹⁴ Gʼuiˬ sha ve haꞈ pehnˇ ve ngaˬ hui htaꞈ haꞈ shaˉ laˇ ve. Daˍviˆ Yaˬhoˉvaˬ geh bon lawˬ ve, ‘Gʼuiˬ sha lehˬ ngaˬ hpaw vaꞈ taˍ kuiˬ hpehꞈ leh, dawˇ haˍ kuiˬ hkʼaw lo ngaˬ htaꞈ ponˬ laˇ tuˬ ve yoˬ. Nawˬ htaiˍ hkʼawꞈ laˇ ve awˬ bon htaꞈ ngaˬ awˬ hkawˇ bvuhˬ chaweh chiˇ mvuh tuˬ yoˬ. Awˬ lawn kʼo, nawˬ ngaˬ htaꞈ haꞈ shaˉ laˇ ve yoˬ. Gʼuiˬ sha htaꞈ gʼaˇ va ve chaw htaꞈ, yawˇ ve haꞈ pehnˇ ve teˇ ceuˬ haꞈ shaˉ piˇ tuˬ yoˬ.’ (Chiˇ mvuh ve 32:7, 10) Oˇ htaˇ teˇ co˗e ve lanˇ venˇ lehˬ venˇ hkʼaw chehˇ ve chaw htaꞈ haꞈ shaˉ piˇ ve yoˬ. Yaˬhoˉvaˬ ve haꞈ pehnˇ ve kaꞈ lanˇ venˇ htaꞈ shuˍ leh ngaˬ hui Yaˬhoˉvaˬ geh meuˆ daꞈ ve htaꞈ haꞈ shaˉ laˇ ve yoˬ. Chi hkʼoˆ kaꞈ, Yaˬhoˉvaˬ ve haꞈ pehnˇ ve yawˇ ngaˬ hui geh jiˆ laˬ tuˬ kaꞈ te piˇ sheˍ ve yoˬ.—Yeˍraˍmiˆ 31:3.

15. Haꞈ pehnˇ ve lehˬ ngaˬ hui ve gʼaˇ va kuiˬ leh haꞈ shaˉ laˇ kuiˬ hpehꞈ ve tehꞈ, hkʼaˬ hkʼe shuˍ ve le?

¹⁵ Gʼuiˬ sha ve chaw hkʼaˬ hkʼe ve haꞈ shaˉ piˇ ve htaꞈ gʼa tuˬ, Daˍviˆ tawˇ pa haˉ teˇ ceuˬ kʼawꞈ tehˆ maˍ laˇ ve yoˬ. Yawˇ kʼoˆ ve, “ngaˬ ve gʼaˇ va kuiˬ lehˬ, ngaˬ htaꞈ haꞈ ve Gʼuiˬ sha hpehꞈ ve yoˬ.” Leh yawˇ kʼawꞈ kʼoˆ sheˍ ve, “yawˇ lehˬ, ngaˬ htaꞈ haꞈ shaˉ laˇ shehˍ hpaˇ, ngaˬ ve htanˬ tuˬ, ngaˬ ve peun kuiˬ leh, ngaˬ ve htaiˍ hkʼawꞈ paˍ hpehꞈ ve yoˬ. Gawˬ lehˍ gʼa chehˇ tuˬ ngaˬ yawˇ htaꞈ gʼaˇ va ve yoˬ. Chaw ceuˬ teˇ hpaˍ htaꞈ ngaˬ awˬ hawˉ lo yawˇ chehˇ tcuh ve yoˬ.” (Chiˇ mvuh ve 59:17; 144:2) Yaˬhoˉvaˬ ve haꞈ pehnˇ ve lehˬ, gʼaˇ va kuiˬ leh haꞈ shaˉ laˇ kuiˬ hpehꞈ ve tehꞈ, aˬ htoꞈ ma te Daˍviˆ tehˆ daꞈ ve le? Ngaˬ hui yawˇ ve chaw hpehꞈ leh hkʼaˬ kaˬ lo chehˇ ve htawˇ maˇ kʼoˆ, ngaˬ hui yawˇ geh maˇ meuˆ daꞈ tuˬ te laˇ ve awˬ ceuˬ htaꞈ yawˇ haꞈ shaˉ laˇ ve yoˬ. Chiˇ mvuh ve liꞈ kaˇ nanˉ uiˍ 91 kaꞈ awˬ lawn chi ngaˬ hui yonˍ gʼa tuˬ te laˇ ve yoˬ. Chiˇ mvuh ve liꞈ chi teˇ puꞈ bvuhꞈ paˍ kʼoˆ ve, “Gʼuiˬ sha htaꞈ chi hkʼe kʼoˆ piˇ hpehꞈ ve yoˬ. Nawˬ lehˬ, ngaˬ htaꞈ haꞈ shaˉ laˇ shehˍ hpaˇ leh, ngaˬ ve Gʼuiˬ sha hpehꞈ ve yoˬ.” (Chiˇ mvuh ve 91:1-3, 9, 14) Yaˬhoˉvaˬ ngaˬ hui htaꞈ hkʼaˬ hkʼe haꞈ shaˉ laˇ ve mawˬ tuˬ, Moˉseˍ kaꞈ chi hkʼa shuˍ tawˇ pa haˉ tehˆ maˍ laˇ ve yoˬ. (Chiˇ mvuh ve 90:1) Yawˇ maˇ suh sheˍ htaˇ, yawˇ tawˇ pa haˉ teˇ ceuˬ tehˆ maˍ laˇ sheˍ ve yoˬ. Yawˇ kʼoˆ ve, “Gʼuiˬ sha lehˬ hkʼaˬ htaˆ kaꞈ yawˇ ve laꞈ sheh nawˬ hui htaꞈ haꞈ shaˉ laˇ leh ga laˇ chehˇ ve yoˬ.” (Bon maˍ ve 33:27) “Yawˇ ve laꞈ sheh nawˬ hui htaꞈ haꞈ shaˉ leh ga laˇ chehˇ ve” kʼoˆ ve lehˬ, Yaˬhoˉvaˬ htaꞈ caˉ daꞈ ve ngaˬ hui shiˍ tuˬ aˬ htoꞈ ma te laˇ ve le?

16. Yaˬhoˉvaˬ ngaˬ hui htaꞈ hkʼaˬ hkʼe ga laˇ ve le? Leh ngaˬ hui awˬ bon hkʼaˬ hkʼe gʼa ve le? (Chiˇ mvuh ve 136:23)

¹⁶ Yaˬhoˉvaˬ ngaˬ hui ve gʼaˇ va kuiˬ hpehꞈ ve tehꞈ shiˍ htaˇ, ngaˬ hui kawˆ tuˬ maˇ cawˬ tehꞈ dawˇ ve yoˬ. Teˇ nyi nyi kʼo, dawˇ maˇ jaˇ ve, awˬ gʼaˇ nuˇ ve, leh a shaꞈ maˇ teꞈ chehˇ gaˇ˗o tehꞈ dawˇ ve yoˬ. Hkʼe kʼo, Yaˬhoˉvaˬ ngaˬ hui htaꞈ hkʼaˬ hkʼe ga laˇ gʼa tuˬ le? (Chiˇ mvuh ve 136:23 gʼaw sheˍ.) Yawˇ ve laꞈ sheh ngaˬ hui htaꞈ haꞈ shaˉ laˇ leh ngaˬ hui teˇ pawˆ kʼawꞈ tu la gʼa ve yoˬ. (Chiˇ mvuh ve 28:9; 94:18) Ngaˬ hui aˬ htoꞈ ma awˬ bon gʼa ve le? Ngaˬ hui Yaˬhoˉvaˬ htaꞈ hkʼaˬ htaˆ kaꞈ gʼaˇ va gʼa ve shiˍ htaˇ, hkʼaˬ hkʼe ga laˇ ve le? Awˉ lawˉ teˇ ceuˬ lehˬ, ngaˬ hui hkʼaˬ kaˬ lo chehˇ ve htawˇ maˇ kʼoˆ, Yaˬhoˉvaˬ ngaˬ hui htaꞈ haꞈ shaˉ laˇ gʼa ve tehꞈ yonˍ gʼa ve yoˬ. Nyiˇ ceuˬ teˇ ceuˬ lehˬ, mvuhˇ naw ma hkʼoˆ ve Awˬ pa ngaˬ hui htaꞈ dawˇ haˍ jaˇ ve tehꞈ yonˍ gʼa ve yoˬ.

17. Yaˬhoˉvaˬ ve haꞈ pehnˇ ve ngaˬ hui aˬ htoꞈ ma awˬ lawn htaꞈ yonˍ gʼa tuˬ te laˇ ve le? (Chiˇ mvuh ve 33:18-22)

¹⁷ Ngaˬ hui henˇ peuˬ˗oˬ ve hkʼa shuˍ, ngaˬ hui shoꞈ shaꞈ ve aˬ htoꞈ ma gʼa hpuˇ ve htawˇ, ngaˬ hui Yaˬhoˉvaˬ geh ka tiꞈ yeˬ ve haꞈ shaˉ gʼa tuˬ yawˇ ga laˇ gʼa ve tehꞈ yonˍ gʼa ve yoˬ. (2 Kawˇrenˍhtuˆ 4:7-9) Tcuh kaˍ paˍ Yeˍraˍmiˆ kʼoˆ ve, “Gʼuiˬ sha lehˬ, hkʼaˬ htaˆ kaꞈ haꞈ pehnˇ uiˍ jaˇ leh ha kʼaˉ puiˉ jaˇ ve yoˬ.” (Dawˇ haˍ ve 3:22) Yaˬhoˉvaˬ ngaˬ hui htaꞈ hkʼaˬ htaˆ kaꞈ haꞈ ve tehꞈ yonˍ gʼa ve yoˬ. Awˬ lawn kʼo, Liꞈ hpu hkʼaw ngaˬ hui htaꞈ kʼoˆ laˇ ve, “Gʼuiˬ sha lehˬ yawˇ htaꞈ yawˆ yan ve chaw leh, yawˇ ve haꞈ pehnˇ ve htaꞈ gʼaˇ va ve chaw hui htaꞈ haꞈ shaˉ piˇ chehˇ ve yoˬ.”—Chiˇ mvuh ve 33:18-22 gʼaw sheˍ.

18-19. (a) Ngaˬ hui hkʼaˬ htaˆ kaꞈ aˬ htoꞈ ma htaꞈ tawnˇ taˍ cawˇ ve le? (b) Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

¹⁸ Ngaˬ hui hkʼaˬ htaˆ kaꞈ aˬ htoꞈ ma htaꞈ tawnˇ taˍ cawˇ ve le? Ngaˬ hui Yaˬhoˉvaˬ ve kanˉ maˇ te sheˍ htaˇ, chaw yaˇ teˇ gʼaˇ le le htaꞈ Gʼuiˬ sha haꞈ piˇ ve hkʼe ngaˬ hui htaꞈ kaꞈ haꞈ laˇ ve yoˬ. Yaꞈ hkʼaˇ, ngaˬ hui Yaˬhoˉvaˬ ve kanˉ te la htaˇ, yawˇ leuˉ leh haꞈ laˇ ve htaꞈ ngaˬ hui gʼa ve yoˬ. Haꞈ ve chi Yaˬhoˉvaˬ ngaˬ hui htaꞈ haꞈ shaˉ laˇ leh yawˇ ve laꞈ sheh ngaˬ hui htaꞈ kʼuˉ laˇ ve htaꞈ shuˍ ve yoˬ. Yawˇ ngaˬ hui htaꞈ haꞈ ve pa taw, yawˇ ngaˬ hui geh hkʼaˬ htaˆ kaꞈ chehˇ leh ka tiꞈ te taˍ ve hkʼe gʼaꞈ te tuˬ yoˬ. Ngaˬ hui yawˇ geh hkʼaˬ htaˆ kaꞈ awˬ chawˇ te daꞈ tcuh gaˇ ve yoˬ! (Chiˇ mvuh ve 46:1, 2, 7) Chi htaꞈ pa taw, ngaˬ hui shoꞈ shaꞈ ve aˬ htoꞈ ma gʼa hpuˇ ve htawˇ, ngaˬ hui yawˇ htaꞈ ka tiꞈ yeˬ gʼa tuˬ yawˇ ga laˇ tuˬ yoˬ.

¹⁹ Yaˬhoˉvaˬ yawˇ ve kanˉ te ve chaw htaꞈ yawˇ haꞈ pehnˇ ve hkʼaˬ hkʼe hpeuꞈ maw piˇ ve ngaˬ hui gʼa henˇ˗oˬ. Gʼuiˬ sha lehˬ ngaˬ hui kaꞈ teˇ gʼaˇ leh teˇ gʼaˇ haꞈ daꞈ tcuh gaˇ ve yoˬ. Chi ve ngaˬ hui hkʼaˬ hkʼe te gʼa tuˬ le? Gʼuˇ suhˍ teˇ lawn hkʼaw awˬ lawn chi htaꞈ caˉ daꞈ ve teˇ geh henˇ tuˬ yoˬ.