Yeˍsuˆ Yaˬhoˉvaˬ geh kanˉ teˇ geh te htaˇ, yawˇ laiˉ ceuˬ henˇ yuˬ gʼa ve yoˬ. Yawˇ miˬ guiˬ hkʼoˆ lo yaꞈ la htaˇ, kanˉ teˇ geh te ve daꞈ ve awˬ chawˇ hkʼaˬ hkʼe hpehꞈ gʼa tuˬ yawˇ te maˍ laˇ ve yoˬ. Ngaˬ hui Yeˍsuˆ ve awˬ lawn htaꞈ chaˬ nyi ve kʼo, ngaˬ hui kanˉ teˇ geh te ve daꞈ ve awˬ chawˇ hpehꞈ gʼa tuˬ ga laˇ ve 3 hkʼaˇ htaꞈ mawˬ ve yoˬ. Leh chi ve teˇ hpaˍ htaꞈ ngaˬ hui gʼaꞈ te ve kʼo, ngaˬ hui shu geh kanˉ teˇ geh te gʼa leh teˇ moˍ tiˉ hpehꞈ gʼa ve yoˬ.

Kanˉ teˇ geh te ve daꞈ ve awˬ chawˇ lehˬ, nyi ma nuˇ nehˬ ve chaw hpehꞈ leh kanˉ teˇ geh te ve chaw htaꞈ awˬ hpfuhˇ shiˍ ve yoˬ. Leh yawˇ shu aꞈ kehˉ cheuˬ ve hkʼe maˇ te. Yeˍsuˆ lehˬ Yaˬhoˉvaˬ nyi ma nuˇ nehˬ ve htaꞈ henˇ yuˬ gʼa ve yoˬ. Yaˬhoˉvaˬ teˇ gʼaˇ ceh tiˉ hpanˍ shehˍ hpaˇ hpehꞈ ve tehꞈ kuˬ keunˍ ve htawˇ, yawˇ nyi ma nuˇ nehˬ leh Yeˍsuˆ kaꞈ a yeˇ uiˍ ve kanˉ te ve tehꞈ awˬ nu ve chaw htaꞈ mawˬ tcuh ve yoˬ. Awˬ lawn chi Yaˬhoˉvaˬ kʼoˆ taˍ ve htaꞈ ngaˬ hui mawˬ gʼa ve yoˬ. Oˇ kaˬ lo kʼoˆ ve, “ngaˬ hui ve awˬ hoꞈ awˬ han htaꞈ shuˍ daꞈ ve chaw yaˇ htaꞈ te hpanˍ˗a veuˬ.” Chi ve teˇ tawn hkʼaw “ngaˬ hui” kʼoˆ ve tawˇ hkawˇ lehˬ, Yaˬhoˉvaˬ leh Yeˍsuˆ kanˉ teˇ geh te ve htaꞈ kʼoˆ gaˇ ve yoˬ. (Awˬ hkuiˉ puiˍ 1:26) Yeˍsuˆ Yaˬhoˉvaˬ ve tawˇ hkawˇ chi ve htaꞈ gʼa kaˇ htaˇ Yaˬhoˉvaˬ lehˬ nyi ma nuˇ nehˬ jaˇ ve Gʼuiˬ sha hpehꞈ ve tehꞈ Yeˍsuˆ dawˇ ve yoˬ.—Chiˇ mvuh ve 18:35.

Yeˍsuˆ miˬ guiˬ hkʼoˆ chehˇ htaˇ, yawˇ kaꞈ nyi ma nuˇ nehˬ jaˇ ve tehꞈ hpeuꞈ maw laˇ ve yoˬ. Shu yawˇ htaꞈ chiˇ mvuh piˇ htaˇ, Yaˬhoˉvaˬ ceh tiˉ chiˇ uiˍ chiˇ mvuh ve gʼa keunˍ ve tehꞈ Yeˍsuˆ kʼoˆ ve yoˬ. (Maˍkuˆ 10:17, 18;  Yoˇhanˬ 7:15, 16) Chi hkʼoˆ kaꞈ, Yeˍsuˆ awˬ laꞈ gʼawˇ hui geh awˬ chawˇ hkʼa dehꞈ te daꞈ gʼa leh yawˇ hui Yeˍsuˆ ve awˬ ceˬ hpehꞈ ve tehꞈ dawˇ tuˬ maˇ te piˇ leh yawˇ hui Yeˍsuˆ ve awˬ chawˇ hpehꞈ ve tehꞈ dawˇ tuˬ te piˇ ve yoˬ. (Yoˇhanˬ 15:15) Nyi ma nuˇ nehˬ ve htaꞈ caˉ daꞈ ve Yeˍsuˆ yawˇ hui htaꞈ maˍ piˇ htaˇ, yawˇ yawˇ hui htaꞈ hkui sheh tsuhˇ piˇ ve yoˬ. (Yoˇhanˬ 13:5, 12-14) Ngaˬ hui kaꞈ hkʼa shuˍ shuˍ, kanˉ teˇ geh te ve awˬ chawˇ htaꞈ ngaˬ hui awˬ to aꞈ kehˉ gʼa dawˇ nyi piˇ cawˇ leh yawˇ hui htaꞈ awˬ hpfuhˇ gʼa shiˍ piˇ cawˇ ve yoˬ. Ngaˬ hui shu htaꞈ yawˆ yan piˇ leh ngaˬ hui awˬ pon tiˉ maˇ dawˇ nyi ve kʼo, kanˉ tawˆ la ve kaꞈ daꞈ jaˇ tuˬ yoˬ.—Roˉmaꞈ 12:10.

“Daꞈ ve dawˇ hkʼaˇ maˇ cawˬ ve kʼo, luˬ kʼai sheˆ kʼai tuˬ yoˬ” tehꞈ nyi ma nuˇ nehˬ ve chaw shiˍ ve yoˬ. (Tawˇ naˉ ve 15:22) Ngaˬ hui hpehꞈ laˬ jaw ve awˬ lawn cawˬ ve maˇ heˆ leh puiˉ ve hpehꞈ ve htawˇ, teˇ ceuˬ le le hkʼa peu˗eˬ htaꞈ shiˍ maˇ gʼa ve tehꞈ tawnˇ taˍ cawˇ ve yoˬ. Yeˍsuˆ kaꞈ teˇ lawn lawn yawˇ maˇ shiˍ ve tehꞈ haꞈ yuˬ ve yoˬ. (Maꞈhtehˍ 24:36) Chi hkʼoˆ kaꞈ, awˬ laꞈ gʼawˇ hkʼaˬ hkʼe dawˇ chehˇ ve htaꞈ Yeˍsuˆ a yeˇ yuˬ ve yoˬ. (Maꞈhtehˍ 16:13-16) Awˬ laꞈ gʼawˇ Yeˍsuˆ geh kanˉ teˇ geh gʼa te ve nyi ma sha jaˇ ve yoˬ hehˉ! Ngaˬ hui nyi ma nuˇ nehˬ ve chaw hpehꞈ leh teˇ lawn le le htaꞈ maˇ shiˍ ve tehꞈ tawnˇ taˍ cawˇ ve yoˬ. Shu ve dawˇ hkʼaˇ htaꞈ ngaˬ hui gʼa na piˇ cawˇ ve yoˬ. Chi hkʼe te ve kʼo, kanˉ teˇ geh te ve cawˇ daꞈ hawˍ daꞈ leh ngaˬ hui te ve kanˉ kaꞈ daꞈ ve yoˬ.

Nyi haꞈ shaˉ paˍ Yeˍsuˆ htaꞈ henˇ yuˬ tuˬ a yeˇ uiˍ jaˇ. Yawˇ hui kanˉ teˇ geh te htaˇ daꞈ kehˬ ve awˬ ha hpu nyi haꞈ shaˉ paˍ hkʼaˬ ve teˇ gʼaˇ htaꞈ ga piˇ leh daꞈ ve dawˇ hkʼaˇ piˇ kaꞈ gʼa ve tehꞈ tawnˇ taˍ cawˇ ve yoˬ. Chi htaꞈ pa taw, nyi haꞈ shaˉ paˍ yawˇ hui hpawnˬ daꞈ htaˇ cawˇ daꞈ hawˍ daꞈ ve kʼo, yawˇ hui dawˇ hkʼaˇ piˇ daꞈ htaˇ kaꞈ nyi ma sha ve yoˬ. Hkriꞈ yaˇ awˬ moˍ hkʼaw awˬ bon cawˬ tuˬ yawˇ hui awˬ lawn teˇ hpaˍ htaꞈ dawˇ cheˆ gʼa ve yoˬ.

Kanˉ teˇ geh te ve awˬ chawˇ lehˬ, shu geh kanˉ teˇ geh te htaˇ nyi ma daꞈ ve chaw gʼa hpehꞈ ve yoˬ. Yawˇ ve dawˇ hkʼaˇ htaꞈ cawˇ ve tiˉ maˇ te ve, pa tuˬ cawˬ htaˇ pa ve, leh shu ve dawˇ hkʼaˇ htaꞈ kaꞈ na ve yoˬ. Yaˬhoˉvaˬ lehˬ nyi ma daꞈ jaˇ leh chaw yaˇ venˇ baˆ te leh suh keunˍ ve htawˇ, yawˇ ve awˬ liˇ awˬ hkʼaˇ htaꞈ tiˉ gʼawˆ tiˍ taˍ leh maˇ pa ve maˇ te tehꞈ Yeˍsuˆ gʼa mawˬ ve yoˬ. Chaw yaˇ teˇ gʼaˇ le le co co taiˍ taiˍ ve a shaꞈ gʼa tuˬ Yaˬhoˉvaˬ Yeˍsuˆ htaꞈ miˬ guiˬ hkʼoˆ lo peu laˇ leh htaiˍ hkʼawꞈ laˇ tcuh ve yoˬ.—Yoˇhanˬ 3:16.

Yeˍsuˆ shu htaꞈ ga piˇ tuˬ ve mawˬ htaˇ, Yeˍsuˆ lehˬ Iˉsaˍreˍlaˆ chaw htaꞈ ga piˇ tuˬ peu laˇ ve htawˇ, yawˇ Hkaˍnanˍ mvuhˇ miˬ hkʼaw chehˇ ve yaˇ miˇ teˇ gʼaˇ htaꞈ kaꞈ ga piˇ ve yoˬ. (Maꞈhtehˍ 15:22-28) Leh Yeˍsuˆ nyi ma daꞈ ve tehꞈ hpeuꞈ maw laˇ sheˍ ve lehˬ, awˬ nu ve chaw biˇ ve htaꞈ yawˇ maˇ dawˇ law. Yawˇ ve awˬ chawˇ Peˍtruˆ shu mehˆ gʼuˇ suhˍ lo yawˇ htaꞈ chiˇ baˬ htaˇ, yawˇ Peˍtruˆ htaꞈ venˇ baˆ hpehˇ piˇ leh a yeˇ uiˍ ve awˬ vuiˬ te  tcuh sheˍ ve yoˬ. (Luˉkaꞈ 22:32; Yoˇhanˬ 21:17; Tcuh yaˇ 2:14; 8:14-17; 10:44, 45) ‘Ngaˬ hui nyi ma daꞈ ve chaw hpehꞈ leh shu awˬ hawˉ lo chehˇ cawˇ ve’ tehꞈ Yeˍsuˆ ve awˬ lawn hkʼa tawˍ lehˆ gʼa mawˬ ve yoˬ.—Hpiˇliˇpiˆ 4:5.

Ngaˬ hui nyi ma daꞈ ve chaw hpehꞈ ve kʼo, pa ve cawˬ htaˇ ngaˬ hui pa leh teˇ gʼaˇ le le geh kanˉ te gʼa ve yoˬ. Yeˍsuˆ kaꞈ “awˬ hkawnˍ shaw paˍ leh venˇ baˆ yaˇ hui htaꞈ awˬ chawˇ te ve” pa taw, aˬ htoꞈ ma te chi hkʼe te ve le, tehꞈ canˇ paˍ hui kʼoˆ ve yoˬ. (Maꞈhtehˍ 11:19) Hkʼe kʼo, ngaˬ hui˗ehꞈ? Ngaˬ hui htaꞈ maˇ shuˍ ve chaw geh kanˉ teˇ geh te htaˇ, Yeˍsuˆ htaꞈ henˇ yuˬ˗aw laˇ? Lon˗iˉ toˇ nyi shehˍ hpaˇ hpehꞈ leh yawˇ Beˍteˍlaˆ hkʼaw awˬ viˉ awˬ nyi laiˉ gʼaˇ geh kanˉ gʼa te ve yoˬ. Yawˇ kʼoˆ ve, “awˬ viˉ awˬ nyi geh kanˉ gʼa te htaˇ, lanˇ venˇ kawˍ ve htaꞈ shuˍ ve tehꞈ ngaˬ dawˇ ve yoˬ. Awˬ viˉ awˬ nyi teˇ gʼaˇ leh teˇ gʼaˇ kaꞈ haˉ pui shiˍ maˇ shuˍ daꞈ ve htaꞈ shuˍ ve yoˬ. Haˉ pui shiˍ lehˬ teˇ shiˍ shiˍ kʼo i ve, teˇ shiˍ shiˍ kʼo uiˍ ve yoˬ. Yaꞈ hkʼaˇ, ngaˬ hui haˉ pui shiˍ teˇ shiˍ leh teˇ shiˍ hkʼoˆ gʼawˆ teh daꞈ ve kʼo, lanˇ venˇ kawˍ gʼa leh daꞈ ve yoˬ. Chi hkʼoˆ kaꞈ, awˬ nu ve chaw geh kanˉ hkʼa dehꞈ te gʼa tuˬ ngaˬ awˬ to kaꞈ gʼa pa ve yoˬ.” Awˬ viˉ awˬ nyi hawˉ hkʼaˆ chi teˇ gʼaˇ daꞈ jaˇ ve henˇ yuˬ tuˬ hpehꞈ ve yoˬ.

Hkriꞈ yaˇ awˬ moˍ hkʼaw awˬ viˉ awˬ nyi geh ngaˬ hui nyi ma daꞈ ve tehꞈ hpeuꞈ maw piˇ tuˬ, hkʼaˬ hkʼe ve awˬ yanˇ htaˇ le? Awˬ viˉ awˬ nyi awˬ moˍ ehˉ hkʼaw teˇ geh hto toˇ˗e htaˇ yoˬ. Ngaˬ hui awˬ viˉ awˬ nyi laiˉ gʼaˇ geh teˇ geh hto toˇ˗e leh teˇ hpaˍ kʼo yehˬ kʼa hkʼaw nyi haꞈ shaˉ tuˬ ngaˬ hui htaꞈ maˇ shuˍ. Ngaˬ hui yawˇ hui geh teˇ geh hto toˇ˗e htaˇ, ngaˬ hui geh teˇ geh hto toˇ ve awˬ viˉ awˬ nyi htaꞈ hkʼa dehꞈ dawˇ nyi piˇ gʼa˗aw laˇ? Ngaˬ hui teˇ ceuˬ ceuˬ te vaiˇ ve chaw hpehꞈ ve kʼo, naiˇ ve kʼawꞈ te gʼa˗aw laˇ? Maˇ heˆ leh ngaˬ hui teˇ pawˆ pawˆ hto toˇ tuˬ ve awˬ hkʼaˇ kʼawꞈ pa gʼa˗aw laˇ? Ngaˬ hui chi hkʼe te ve kʼo, awˬ viˉ awˬ nyi ha lehˬ tuˬ te piˇ gʼa ve yoˬ.

Kanˉ teˇ geh te ve daꞈ ve awˬ chawˇ lehˬ, shu htaꞈ pehˬ piˇ tanˇ piˇ hkawˇ shiˍ ve yoˬ. (1 Tiˆmoˉseˍ 6:18) Yeˍsuˆ mvuhˇ naw ma hkʼoˆ Yaˬhoˉvaˬ geh kanˉ teˇ geh te htaˇ, yawˇ teˇ gʼaˇ tiˉ te tuˬ kanˉ maˇ veh tiˍ taˍ tehꞈ Yeˍsuˆ mawˬ ve yoˬ. Yaˬhoˉvaˬ “mvuhˇ naw ma htaꞈ” hpanˍ htaˇ Yeˍsuˆ kaꞈ “oˇ kaˬ lo chehˇ taˍ” leh Yeˍsuˆ yawˇ ve Awˬ pa geh laiˉ ceuˬ henˇ gʼa ve yoˬ. (Tawˇ naˉ ve 8:27) Leh Yeˍsuˆ miˬ guiˬ hkʼoˆ chehˇ htaˇ kaꞈ yawˇ ve ‘Awˬ pa geh gʼa kaˇ ve’ awˬ ceuˬ awˬ laꞈ gʼawˇ htaꞈ kʼoˆ maˍ piˇ ve yoˬ. (Yoˇhanˬ 15:15) Ngaˬ hui Yaˬhoˉvaˬ leh Yeˍsuˆ htaꞈ henˇ yuˬ leh kanˉ teˇ geh te ve awˬ chawˇ htaꞈ cuˇ yiˍ leh hpehꞈ laˬ jaw ve awˬ lawn maˍ piˇ cawˇ ve tehꞈ tawnˇ taˍ sheˍ. Kanˉ teˇ geh te ve daꞈ ve awˬ chawˇ lehˬ, yawˇ te puiˉ ve awˬ ceuˬ yawˇ teˇ gʼaˇ tiˉ maˇ veh tiˍ taˍ leh kanˉ teˇ geh te ve awˬ chawˇ htaꞈ maˍ piˇ ve yoˬ. Yaꞈ hkʼaˇ, yawˇ ha lehˬ ve hkʼaw puiˉ ve hpehꞈ ve hkʼe yawˇ shiˍ taˍ ve awˬ ceuˬ hkʼa peu˗eˬ shu htaꞈ maˍ piˇ ve yoˬ.

Ngaˬ hui kanˉ teˇ geh te ve awˬ chawˇ htaꞈ pehˬ piˇ gʼa ve teˇ ceuˬ lehˬ awˬ gʼaˇ piˇ daꞈ ve yoˬ. Ngaˬ hui kanˉ te ve htaꞈ chaˬ nyi leh awˬ bon uiˍ jaˇ tehꞈ kʼoˆ laˇ ve kʼo, ngaˬ hui ha lehˬ jaˇ tuˬ ve maˇ heˆ laˇ? Yeˍsuˆ yawˇ kanˉ teˇ geh te ve awˬ laꞈ gʼawˇ htaꞈ kʼoˆ piˇ ve, yawˇ yawˇ hui te ve awˬ ceuˬ htaꞈ awˬ hpfuhˇ shiˍ ve yoˬ. (Maꞈhtehˍ 25:19-23; Luˉkaꞈ 10:17-20 htaꞈ tehˆ daꞈ sheˍ.) Leh Yeˍsuˆ awˬ laꞈ gʼawˇ hui htaꞈ kʼoˆ piˇ ve, ngaˬ te ve kanˉ “aꞈ kehˉ uiˍ ve kanˉ” htaꞈ htawˇ nawˬ hui gʼa te tuˬ yoˬ. (Yoˇhanˬ 14:12) Yeˍsuˆ yawˇ maˇ suh sheˍ teˇ haˉ htaˇ, ka tiꞈ yeˬ ve tcuh yaˇ hui htaꞈ chiˇ mvuh piˇ ve yoˬ. Oˇ kaˬ lo kʼoˆ ve, “beˬ ve lawˇ ve htaꞈ ngaˬ gʼa hkanˍ ve teˇ yanˇ, nawˬ hui lehˬ ngaˬ geh hkʼa geh hkʼaˬ htaˆ kaꞈ chehˇ taˍ ve” yoˬ. (Luˉkaꞈ 22:28) Yeˍsuˆ chi hkʼe kʼoˆ ve htaꞈ yawˇ hui awˬ gʼaˇ gʼa jaˇ leh Yeˍsuˆ kʼoˆ taˍ ve hkʼe teˇ ceuˬ le le htaꞈ ha lehˬ ha kʼa te tuˬ yoˬ hehˉ. Ngaˬ hui kanˉ teˇ geh te ve awˬ chawˇ htaꞈ chiˇ mvuh piˇ ve kʼo, yawˇ hui kaꞈ ha lehˬ jaˇ tuˬ yoˬ. Leh kanˉ te ve kaꞈ daꞈ tuˬ yoˬ.

Awˬ viˉ awˬ nyi Hka˗yon˗deh kʼoˆ ve, “kanˉ teˇ geh te ve daꞈ ve awˬ chawˇ lehˬ biˇ ve chaw hpehꞈ tuˬ maˇ loˍ. Yaꞈ hkʼaˇ, yawˇ teˇ gʼaˇ le le htaꞈ ha lehˬ ve cawˬ tuˬ te piˇ gʼa leh awˬ nu ve chaw kanˉ teˇ geh te sha tuˬ kaꞈ te piˇ gʼa ve yoˬ.” Nawˬ kaꞈ kanˉ teˇ geh te ve chi hkʼe ve awˬ chawˇ hpehꞈ gʼa˗aw laˇ? Nawˬ chi hkʼe ve chaw hpehꞈ˗aw laˇ tehꞈ nawˬ geh kanˉ teˇ geh te ve awˬ chawˇ htaꞈ na nyi sheˍ. Awˬ laꞈ gʼawˇ Yeˍsuˆ geh kanˉ teˇ geh te ve htaꞈ dawˇ cawˇ ve hkʼe, yawˇ nawˬ geh kanˉ teˇ geh te ve htaꞈ dawˇ cawˇ ve kʼo, “nawˬ hui gʼa ha lehˬ tuˬ, ngaˬ hui nawˬ hui geh kanˉ teˇ geh te ve” tehꞈ Pawˇluꞈ kʼoˆ ve hkʼa shuˍ nawˬ kaꞈ kʼoˆ gʼa ve yoˬ.—2 Kawˇrenˍhtuˆ 1:24.