1. Co co taiˍ taiˍ ve a shaꞈ gʼa tuˬ ve htaꞈ chaw teˇ hpaˍ hkʼaˬ hkʼe dawˇ ve le?

 Chi beuꞈ teˇ co˗e ve chaw laiˉ gʼaˇ awˬ to hpawˇ chehˇ sha cawˬ sha gaˇ ve yoˬ. Hkʼe te leh, yawˇ hui caˇ ve htaꞈ shaˍ tiꞈ te leh hkʼaˬ htaˆ kaꞈ awˬ gʼaˇ caw ve yoˬ. Chi hkʼe hpehꞈ ve htawˇ, yawˇ hui ve a shaꞈ co co taiˍ taiˍ gʼa chehˇ tuˬ maˇ dawˇ law. Awˬ lawn kʼo, chi hkʼe dawˇ law ve lehˬ hpehꞈ chehˇ ve htaꞈ maˇ hawˍ daꞈ ve yoˬ. Gʼaˇ hteꞈ mawˇ kʼai ve kʼo, daꞈ la kuiˬ maˇ cawˬ ve pa taw, yawˇ hui a shaꞈ maˇ teꞈ chehˇ gaˇ ve yoˬ. Yoˇhanˬ liꞈ 3:16 leh 5:24 hkʼaw ngaˬ hui gʼa mawˬ ve hkʼe, “co tiꞈ ha tiꞈ htaꞈ gʼa” tuˬ caˉ daꞈ ve Yeˍsuˆ daꞈ ve hpawˇ kʼoˆ ve yoˬ.

2. Yoˇhanˬ liꞈ kaˇ nanˉ uiˍ 6 hkʼaw co co taiˍ taiˍ ve a shaꞈ gʼa tuˬ htaꞈ caˉ daꞈ ve Yeˍsuˆ hkʼaˬ hkʼe kʼoˆ ve le? (Yoˇhanˬ 6:39, 40)

² Teˇ nyi htaˇ, Yeˍsuˆ lehˬ chaw awˬ meunˍ gʼaˇ htaꞈ hkaoˍ monˇ leh ngaˇ anˇ tuˬ te leh caˍ piˇ ve yoˬ. a Chi ve lehˬ anˇ jaˇ ve awˬ lawn hpehꞈ ve yoˬ. Yaꞈ hkʼaˇ, peuˬ hkʼawꞈ nawˉ teˇ nyi Yeˍsuˆ kʼoˆ ve awˬ ceuˬ kaꞈ anˇ jaˇ sheˍ ve yoˬ. Oˇ ve teˇ nyi htaˇ, chaw awˬ moˍ lonˉ Kaˍpeˍneˍonˍ venˇ Gaˍliˍlehˇ gʼuiˬ po awˬ paˇ lo Yeˍsuˆ geh laˬ ve yoˬ. Leh Yeˍsuˆ yawˇ hui htaꞈ kʼoˆ piˇ ve, awˬ gʼuˇ suhˍ hpawˇ suh taˍ ve chaw htaꞈ yawˇ kʼawꞈ teꞈ tu la tcuh leh yawˇ hui co co taiˍ taiˍ ve a shaꞈ gʼa tuˬ yoˬ. (Yoˇhanˬ 6:39, 40 gʼaw sheˍ.) Yeˍsuˆ ve tawˇ hkawˇ htaꞈ nawˬ dawˇ nyi htaˇ, nawˬ haꞈ ve awˬ chawˇ leh nawˬ haꞈ ve chaw suh˗oˬ ve htaꞈ dawˇ nawˇ ve yoˬ hehˉ. Yeˍsuˆ ve tawˇ hkawˇ chaw oˇ ve teˇ hpaˍ kʼawꞈ teꞈ tu la gʼa ve tehꞈ, nawˬ dawˇ mawˬ tuˬ te laˇ ve yoˬ. Nawˬ leh yawˇ hui kaꞈ co co taiˍ taiˍ ve a shaꞈ gʼa tuˬ yoˬ. Chi hkʼoˆ kaꞈ, Yoˇhanˬ liꞈ kaˇ nanˉ uiˍ 6 hkʼaw awˬ lawn oˇ ve aꞈ kehˉ nyi ma pfuhˇ lawꞈ lawꞈ te laˇ ve cawˬ sheˍ ve yoˬ. Awˬ lawn chi ve lehˬ, oˇ htaˇ teˇ co˗e ve chaw laiˉ gʼaˇ leh chi beuꞈ teˇ co˗e ve chaw laiˉ gʼaˇ kaꞈ maˇ na gʼa ve yoˬ. Aˬ htoꞈ ma ve awˬ lawn hpehꞈ ve teˇ geh nyi sheˍ.

3. Yoˇhanˬ liꞈ 6:51 hkʼaw Yeˍsuˆ yawˇ awˬ to htaꞈ caˉ daꞈ ve aˬ htoꞈ ma kʼoˆ ve le?

 ³ Kaˍpeˍneˍonˍ venˇ lo chaw awˬ moˍ lonˉ yawˇ hui Yeˍsuˆ geh hkaoˍ monˇ gʼa caˇ ve lehˬ, yawˇ hui ve awˬ puˍ awˬ pi lonˉ Iˉsaˍreˍlaˆ chaw hui Yaˬhoˉvaˬ geh Maˍnaˆ shiˍ gʼa caˇ ve htaꞈ dawˇ nawˇ ve yoˬ hehˉ. Liꞈ hpu hkʼaw hkaoˍ monˇ maˇ heˆ leh “mvuhˇ naw ma ve caˇ tuˬ” tehꞈ kʼoˆ ve yoˬ. (Chiˇ mvuh ve 105:40; Yoˇhanˬ 6:31) Yeˍsuˆ Maˍnaˆ shiˍ htaꞈ yehˇ leh a yeˇ uiˍ jaˇ ve teˇ lawn maˍ laˇ ve lehˬ, Maˍnaˆ shiˍ Yaˬhoˉvaˬ anˇ tuˬ te leh gu teh taˍ laˇ ve caˇ tuˬ hpehꞈ ve htawˇ, Iˉsaˍreˍlaˆ chaw caˇ tuˬ chi ve htaꞈ caˇ ve chaw awˬ leh meuˇ kʼo, gʼa suh˗e ve yoˬ. (Yoˇhanˬ 6:49) Yeˍsuˆ yawˇ awˬ to htaꞈ “mvuhˇ naw ma ve hkaoˍ monˇ,” “Gʼuiˬ sha ve hkaoˍ monˇ” leh ‘a shaꞈ teꞈ piˇ lawˬ ve hkaoˍ monˇ’ hpehꞈ ve yoˬ tehꞈ kʼoˆ ve yoˬ. (Yoˇhanˬ 6:32, 33, 35) Maˍnaˆ shiˍ leh Yeˍsuˆ ve awˬ to peun daꞈ ve htaꞈ yawˇ kʼoˆ ve, ‘ngaˬ lehˬ mvuhˇ naw ma hkʼoˆ lo yaꞈ la ve a shaꞈ teꞈ piˇ lawˬ ve hkaoˍ monˇ hpehꞈ ve yoˬ. Hkaoˍ monˇ chi htaꞈ gʼa caˇ ve chaw lehˬ, co co taiˍ taiˍ a shaꞈ gʼa teꞈ tuˬ yoˬ.’ (Yoˇhanˬ 6:51 gʼaw sheˍ.) Yuˇdaꞈ chaw oˇ ve teˇ hpaˍ anˇ jaˇ tuˬ yoˬ. Yeˍsuˆ lehˬ mvuhˇ naw ma hkʼoˆ lo yaꞈ la ve hkaoˍ monˇ hpehꞈ ve lehˬ, Gʼuiˬ sha yawˇ hui ve awˬ puˍ awˬ pi lonˉ htaꞈ piˇ taˍ ve Maˍnaˆ shiˍ aꞈ kehˉ daꞈ jaˇ ve tehꞈ, kʼoˆ ve htaꞈ yawˇ hui maˇ na gʼa ve yoˬ hehˉ. Peuˬ hkʼawꞈ nawˉ Yeˍsuˆ yawˇ hui htaꞈ kʼoˆ piˇ ve, ‘miˬ guiˬ yaˇ a shaꞈ gʼa teꞈ tuˬ ve awˬ pon, ngaˬ piˇ tuˬ ve hkaoˍ monˇ lehˬ, ngaˬ ve awˬ shaˍ yoˬ.” Chi Yeˍsuˆ hkʼaˬ hkʼe kʼoˆ gaˇ ve le? Chi ve lehˬ ngaˬ hui leh ngaˬ hui haꞈ ve chaw awˬ pon co co taiˍ taiˍ ve a shaꞈ gʼa tuˬ ve pa taw, ngaˬ hui na gʼa gaˇ ve yoˬ. Yeˍsuˆ hkʼaˬ hkʼe kʼoˆ gaˇ ve teˇ geh kʼawꞈ nyi sheˍ.

CO CO TAIˍ TAIˍ VE A SHAꞈ PEꞈ LAˇ TUˬ VE LEH YAWˇ VE AWˬ SHAˍ Aˬ HTOꞈ MA HTAꞈ KʼOˆ GAˇ VE LE?

4. Yeˍsuˆ ve tawˇ hkawˇ htaꞈ gʼa kaˇ htaˇ aˬ htoꞈ ma te chaw teˇ hpaˍ anˇ jaˇ ve le?

⁴ Oˇ ve teˇ yanˇ Yeˍsuˆ kʼoˆ ve htaꞈ gʼa kaˇ ve chaw anˇ jaˇ ve yoˬ. Yawˇ kʼoˆ ve, ‘miˬ guiˬ yaˇ a shaꞈ gʼa teꞈ tuˬ ve awˬ pon, ngaˬ piˇ tuˬ ve hkaoˍ monˇ lehˬ, ngaˬ ve awˬ shaˍ yoˬ.’ Yeˍsuˆ yawˇ ve awˬ shaˍ yawˇ hui htaꞈ awˬ tehˬ caˍ laˇ tuˬ ve tehꞈ yawˇ hui dawˇ˗aw laˇ? (Yoˇhanˬ 6:52) Chi hkʼe ceh tiˉ maˇ heˆ. Yeˍsuˆ kʼawꞈ kʼoˆ sheˍ ve, ‘chaw yaˇ ve Yaˇ hpu ve awˬ shaˍ htaꞈ maˇ caˇ leh yawˇ ve awˬ suhˍ htaꞈ maˇ dawˬ ve kʼo, nawˬ hui awˬ hkʼaw lo a shaꞈ teꞈ ve teˇ ceuˬ maˇ cawˬ.’—Yoˇhanˬ 6:53.

5. Ngaˬ hui Yeˍsuˆ ve awˬ suhˍ htaꞈ dawˬ tuˬ maˇ loˍ tehꞈ aˬ htoꞈ ma te yonˍ gʼa ve le?

⁵ Yaˬhoˉvaˬ Noˉaꞈ ve awˬ co˗e htaˇ awˬ suhˍ maˇ caˇ tcuh ve yoˬ. (Awˬ hkuiˉ puiˍ 9:3, 4) Yaˬhoˉvaˬ awˬ lawn chi htaꞈ kʼawꞈ kʼoˆ sheˍ ve yoˬ. Leh awˬ lawn chi Iˉsaˍreˍlaˆ chaw hui htaꞈ awˬ liˇ tawˇ hkawˇ piˇ tuˬ, Moˉseˍ bvuhꞈ ve a shu teˇ gʼaˇ awˬ suhˍ htaꞈ caˇ ve kʼo, “Gʼuiˬ sha ve chaw tehꞈ kʼawꞈ shawˍ piˇ tuˬ ve maˇ heˆ.” (Oˉ kʼoˍ pui ve 7:27) Yuˇdaꞈ chaw Moˉseˍ ve awˬ liˇ tawˇ hkawˇ htaꞈ na yuˬ tuˬ, Yeˍsuˆ kaꞈ maˍ piˇ ve yoˬ. (Maꞈhtehˍ 5:17-19) Chi htaꞈ pa taw, Yuˇdaꞈ chaw Yeˍsuˆ ve awˬ shaˍ htaꞈ caˇ leh Yeˍsuˆ ve awˬ suhˍ htaꞈ dawˬ tuˬ, yawˇ kʼoˆ ve tawˇ hkawˇ hpehꞈ kʼai maˇ gʼa taˍ tehꞈ dawˇ ve yoˬ. Chi hkʼe hpehꞈ ve htawˇ, chaw yaˇ “co tiˍ ha tiˍ” ve a shaꞈ gʼa tuˬ Yeˍsuˆ anˇ lawꞈ lawꞈ ve tawˇ hkawˇ htaꞈ kʼoˆ sheˍ ve yoˬ.—Yoˇhanˬ 6:54.

6. Yoˇhanˬ liꞈ 4:7, 14 hkʼaw Yeˍsuˆ kʼoˆ ve tawˇ hkawˇ tawˇ pa haˉ tehˆ maˍ laˇ ve tehꞈ ngaˬ hui hkʼaˬ hkʼe te shiˍ gʼa ve le?

⁶ Yeˍsuˆ kʼoˆ laˇ gaˇ ve awˬ ceuˬ aˬ htoꞈ ma le? Yawˇ awˬ lawn chi htaꞈ caˉ daꞈ ve tawˇ pa haˉ tehˆ maˍ laˇ ve hkʼa tawˍ lehˆ gʼa mawˬ ve yoˬ. Chi ve hkʼa shuˍ shuˍ, nanˍ bawˍ paˇ lo Yeˍsuˆ Saˍmaˍriˆ chaw yaˇ miˇ htaꞈ tawˇ yaw piˇ ve, “ngaˬ piˇ ve iˉ kaˆ htaꞈ hkʼa dawˬ ve chaw lehˬ, hkʼaˬ htaˆ kaꞈ iˉ kaˆ maˇ kʼawꞈ shiˉ. Ngaˬ yawˇ htaꞈ piˇ ve iˉ kaˆ lehˬ, yawˇ awˬ hkʼaw lo co tiꞈ ha tiꞈ awˬ pon tawˆ la chehˇ ve gʼuiˬ tuˇ hpehꞈ tuˬ yoˬ.” (Yoˇhanˬ 4:7, 14) b Awˬ tehˬ awˬ na iˉ kaˆ htaꞈ dawˬ ve lehˬ, co co taiˍ taiˍ ve a shaꞈ gʼa tuˬ yoˬ tehꞈ, Yeˍsuˆ Saˍmaˍriˆ  chaw yaˇ miˇ htaꞈ maˇ gʼa kʼoˆ piˇ. Chi ve hkʼa shuˍ shuˍ, Kaˍpeˍneˍonˍ venˇ lo Yeˍsuˆ ve awˬ shaˍ htaꞈ caˇ leh awˬ suhˍ htaꞈ dawˬ ve chaw lehˬ, co co taiˍ taiˍ ve a shaꞈ gʼa tuˬ yoˬ tehꞈ, yawˇ chaw awˬ moˍ lonˉ htaꞈ maˇ gʼa kʼoˆ piˇ.

2 LAWN PEUN DAꞈ VE

7. Yoˇhanˬ liꞈ 6:53 hkʼaw Yeˍsuˆ kʼoˆ ve tawˇ hkawˇ htaꞈ caˉ daꞈ ve chaw teˇ hpaˍ hkʼaˬ hkʼe kʼoˆ ve le?

⁷ Yoˇhanˬ liꞈ 6:53 hkʼaw chaw teˇ hpaˍ kʼoˆ ve, Yeˍsuˆ ve mvuhˇ haˉ awˍ caˇ ve pawehˇ htaꞈ caˉ daꞈ ve, hkʼaˬ hkʼe te cawˇ ve yawˇ kʼoˆ maˍ laˇ taˍ ve yoˬ. Awˬ lawn kʼo, Yeˍsuˆ tawˇ hkawˇ hkʼa shuˍ˗ehˬ ve htaꞈ kʼoˆ ve yoˬ. (Maꞈhtehˍ 26:26-28) Yawˇ hui kʼoˆ ve, Yeˍsuˆ suh ve dawˇ nawˇ tuˬ hpawnˬ daꞈ la ve chaw teˇ gʼaˇ le le, hkaoˍ monˇ caˇ leh a pehˉ meuˇ gʼuiˬ gʼa dawˬ ve yoˬ. Chi hkʼe kʼoˆ ve cawˇ˗aw laˇ? Cawˇ ve hkʼawꞈ laˇ hkawˇ htaꞈ ngaˬ hui gʼa tuˬ a yeˇ uiˍ jaˇ ve yoˬ. Awˬ lawn kʼo, teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ ve chaw laiˉ lanˬ gʼaˇ laˬ ve yoˬ. Yoˇhanˬ liꞈ 6:53 hkʼaw Yeˍsuˆ kʼoˆ ve tawˇ hkawˇ leh, Yeˍsuˆ ve mvuhˇ haˉ awˍ caˇ ve pawehˇ, hkʼaˬ hkʼe peun daꞈ ve ngaˬ hui teˇ geh nyi sheˍ.

8. 2 lawn peun daꞈ ve aˬ htoꞈ ma cawˬ ve le? (Awˬ han htaꞈ nyi sheˍ.)

⁸ 2 lawn peun daꞈ ve htaꞈ teˇ geh nyi sheˍ. Awˉ lawˉ teˇ lawn lehˬ, Yoˇhanˬ liꞈ 6:53-56 hkʼaw Yeˍsuˆ ve tawˇ hkawˇ yawˇ hkʼaˬ hkʼe htaˇ yaw ve leh hkʼaˬ kaˬ lo yaw ve le? 32 hkʼawꞈ C.E. Yeˍsuˆ Gaˍliˍlehˇ mvuhˇ miˬ lo chehˇ htaˇ, yaw ve yoˬ. Chi ve lehˬ Yeˍsuˆ Yeˍruˆsaˍlehnˍ venˇ mvuhˇ haˉ awˍ caˇ ve maˇ tanˬ sheˍ teˇ hkʼawꞈ awˬ gʼuˇ suhˍ htaˇ, yaw ve yoˬ. 2 lawn teˇ lawn peun daꞈ ve lehˬ, Yeˍsuˆ a shu htaꞈ kʼoˆ piˇ ve le? Yoˇhanˬliꞈ kaˇ nanˉ  uiˍ 6 hkʼaw na ve chaw maˇ˗awˍ ve Yaˬhoˉvaˬ geh meuˆ daꞈ ve a yeˇ yuˬ ve aꞈ kehˉ awˬ suhˍ awˬ shaˍ hpawˇ loˍ ve htaꞈ a yeˇ yuˬ ve yoˬ. (Yoˇhanˬ 6:26) Awˬ tehˬ kʼo, Yeˍsuˆ yawˇ hui maˇ na gʼa ve teˇ ceuˬ ceuˬ htaꞈ kʼoˆ htaˇ, yawˇ hui Yeˍsuˆ htaꞈ maˇ yonˍ ve yoˬ. Hkʼe te leh, awˬ laꞈ gʼawˇ teˇ hpaˍ Yeˍsuˆ awˬ hkʼaˇ suh maˇ gʼaꞈ kʼai˗o ve yoˬ. (Yoˇhanˬ 6:14, 36, 42, 60, 64, 66) Yeˍsuˆ ve mvuhˇ haˉ awˍ caˇ ve pawehˇ 33 hkʼawꞈ C.E. htaˇ te ve yoˬ. Yawˇ hui Yeˍsuˆ maˍ ve htaꞈ hkʼa peu˗eˬ maˇ na gʼa ve htawˇ, oˇ ve teˇ yanˇ ka tiꞈ yeˬ ve tcuh yaˇ 11 gʼaˇ Yeˍsuˆ geh chehˇ sheˍ ve yoˬ. Yawˇ hui lehˬ Gaˍliˍlehˇ mvuhˇ miˬ lo Yuˇdaꞈ chaw htaꞈ peun daꞈ jaˇ ve yoˬ. Tcuh yaˇ hui lehˬ Yeˍsuˆ mvuhˇ naw ma lo yaꞈ la ve Gʼuiˬ sha ve Yaˇ hpehꞈ ve tehꞈ yonˍ ve yoˬ. (Maꞈhtehˍ 16:16) Hkʼe te leh, Yeˍsuˆ yawˇ hui htaꞈ chiˇ mvuh piˇ ve, “beˬ ve lawˇ ve htaꞈ ngaˬ gʼa hkanˍ ve teˇ yanˇ, nawˬ hui lehˬ ngaˬ geh hkʼa geh hkʼaˬ htaˆ kaꞈ chehˇ taˍ ve chaw teˇ hpaˍ hpehꞈ ve yoˬ.” (Luˉkaꞈ 22:28) Chi ve 2 lawn peun daꞈ ve lehˬ, Yoˇhanˬ liꞈ 6:53 hkʼaw Yeˍsuˆ ve mvuhˇ haˉ awˍ caˇ ve pawehˇ hkʼaˬ hkʼe te cawˇ ve yawˇ maˇ gʼa kʼoˆ maˍ laˇ taˍ. Chi ve 2 lawn peuˬ hkʼawꞈ nawˉ, peun daꞈ ve kaꞈ cawˬ sheˍ ve yoˬ.

YEˍSUˆ VE TAWˇ HKAWˇ NAWˬ AWˬ PON TCUHˉ KUIˬ HKʼAˬ HKʼE CAWˬ VE LE?

9. Yeˍsuˆ ve mvuhˇ haˉ awˍ caˇ ve pawehˇ hkʼaw kʼoˆ ve tawˇ hkawˇ chi lehˬ yawˇ hkʼaˬ hkʼe ve teˇ moˍ htaꞈ kʼoˆ piˇ ve le?

⁹ Yeˍsuˆ mvuhˇ haˉ awˍ caˇ ve pawehˇ te htaˇ, Yeˍsuˆ lehˬ diˇ maˇ keu ve hkaoˍ monˇ tcuh yaˇ hui htaꞈ piˇ leh kʼoˆ ve, chi ve lehˬ ngaˬ ve awˬ to hpehꞈ ve yoˬ. Hkʼe te leh, Yeˍsuˆ a pehˉ meuˇ gʼuiˬ yawˇ hui htaꞈ chiˇ piˇ leh kʼoˆ ve, “chi lehˬ ka tiꞈ shaˉ caˆ htaꞈ caˉ daꞈ ve ngaˬ ve awˬ suhˍ yoˬ.” (Maˍkuˆ 14:22-25; Luˉkaꞈ 22:20; 1 Kawˇrenˍhtuˆ 11:24) Chi lehˬ a yeˇ uiˍ jaˇ ve ka tiꞈ hpehꞈ ve yoˬ. Awˬ lawn kʼo, ka tiꞈ awˬ suhˉ chi ve lehˬ, Yaˬhoˉvaˬ ‘yawˇ ve Iˉsaˍreˍlaˆ chaw htaꞈ te piˇ ve yoˬ.’ Leh yawˇ hui “Gʼuiˬ sha ve mvuhˇ miˬ” hkʼaw uˉ peunˍ tuˬ yoˬ. Chi chaw yaˇ hkʼa peu˗eˬ htaꞈ ka tiꞈ te piˇ ve maˇ heˆ. (Heˍbrehˇ 8:6, 10; 9:15) Oˇ ve teˇ yanˇ tcuh yaˇ hui Yeˍsuˆ kʼoˆ ve tawˇ hkawˇ htaꞈ maˇ na gʼa ve yoˬ. Yaꞈ hkʼaˇ, peuˬ hkʼawꞈ nawˉ maˇ maw, yawˇ hui htaꞈ daꞈ kehˬ ve awˬ ha hpu leuˆ yuˬ piˇ leh ka tiꞈ te taˍ ve awˬ suhˉ hkʼaw yawˇ hui kaꞈ gʼa chehˇ leh mvuhˇ naw ma hkʼoˆ lo Yeˍsuˆ geh teˇ geh gʼa uˉ peunˍ tuˬ yoˬ.—Yoˇhanˬ 14:2, 3.

10. Yeˍsuˆ ve mvuhˇ haˉ awˍ caˇ ve pawehˇ hkʼaw yawˇ kʼoˆ ve awˬ ceuˬ leh Gaˍliˍlehˇ gʼuiˬ po paˇ lo yawˇ kʼoˆ ve awˬ ceuˬ hkʼaˬ hkʼe peun daꞈ ve le? (Awˬ han htaꞈ nyi sheˍ.)

¹⁰ Yeˍsuˆ ve mvuhˇ haˉ awˍ caˇ ve pawehˇ te ve htaꞈ chaˬ nyi sheˍ. Yeˍsuˆ “i ve yawˬ awˬ moˍ” htaꞈ kʼoˆ ve yoˬ. Leh oˇ ve teˇ nyi mvuhˇ hpeuꞈ la htaˇ, mvuhˇ haˉ awˍ caˇ ve pawehˇ hkʼaw Yeˍsuˆ geh chehˇ ve ka tiꞈ yeˬ ve tcuh yaˇ hui kaꞈ “i ve yawˬ awˬ moˍ” geh chehˇ taˍ ve yoˬ. (Luˉkaꞈ 12:32) Yawˇ hui leh awˬ nu ve chaw teˇ hpaˍ chi ve teˇ moˍ hkʼaw chehˇ ve lehˬ, hkaoˍ monˇ caˇ leh a pehˉ meuˇ gʼuiˬ gʼa dawˬ ve yoˬ. Chaw chi ve teˇ moˍ lehˬ mvuhˇ naw ma hkʼoˆ lo Yeˍsuˆ geh teˇ geh gʼa uˉ peunˍ tuˬ yoˬ. Chi htaꞈ pa taw, Yeˍsuˆ ve mvuhˇ haˉ awˍ caˇ ve pawehˇ hkʼaw yawˇ tcuh yaˇ hui htaꞈ kʼoˆ piˇ ve lehˬ, chaw gʼaw gʼa ve htaꞈ kʼoˆ gaˇ ve yoˬ. Yaꞈ hkʼaˇ, Gaˍliˍlehˇ gʼuiˬ po paˇ lo Yeˍsuˆ kʼoˆ ve awˬ ceuˬ lehˬ, chaw awˬ moˉ lonˉ gʼaw maˇ gʼa ve htaꞈ kʼoˆ gaˇ ve yoˬ.

11. Yeˍsuˆ Gaˍliˍlehˇ mvuhˇ miˬ lo kʼoˆ ve tawˇ hkawˇ gʼaw gʼa ve chaw htaꞈ kʼoˆ gaˇ ve maˇ heˆ tehꞈ hkʼaˬ hkʼe hpeuꞈ maw laˇ ve le?

¹¹ 32 hkʼawꞈ C.E. Yeˍsuˆ Gaˍliˍlehˇ mvuhˇ miˬ lo chehˇ htaˇ, Yuˇdaꞈ chaw Yeˍsuˆ geh hkaoˍ monˇ ceh tiˉ caˇ gaˇ ve chaw htaꞈ yawˇ kʼoˆ ve yoˬ. Chi hkʼe hpehꞈ ve htawˇ, hkaoˍ monˇ aꞈ kehˉ a yeˇ uiˍ jaˇ ve htaꞈ yawˇ hui a yeˇ yuˬ tuˬ yawˇ ga piˇ ve yoˬ. Chi ve lehˬ, yawˇ hui co co taiˍ taiˍ ve a shaꞈ gʼa tuˬ gu teh taˍ piˇ ve yoˬ. Yeˍsuˆ kʼoˆ ve, suh˗oˬ ve chaw htaꞈ kʼawꞈ teꞈ tu la piˇ leh co co taiˍ taiˍ ve a shaꞈ gʼa tuˬ yoˬ. Oˇ ve teˇ yanˇ chaw maˇ maˇ awˬ bon gʼa tuˬ ve htaꞈ Yeˍsuˆ kʼoˆ ve yoˬ. Yeˍsuˆ ve mvuhˇ haˉ awˍ caˇ ve pawehˇ hkʼaw yawˇ kʼoˆ htaˇ, gʼaw gʼa ve chaw htaꞈ kʼoˆ gaˇ ve maˇ heˆ. Awˬ tehˬ kʼo Yeˍsuˆ kʼoˆ ve, ‘hkaoˍ monˇ chi htaꞈ gʼa caˇ ve chaw lehˬ, co co taiˍ taiˍ ve a shaꞈ teꞈ tuˬ yoˬ. Miˬ guiˬ yaˇ a shaꞈ gʼa teꞈ tuˬ ve awˬ pon, ngaˬ piˇ tuˬ ve  hkaoˍ monˇ lehˬ, ngaˬ ve awˬ shaˍ yoˬ.’—Yoˇhanˬ 6:51. c

12. Yeˍsuˆ kʼoˆ ve co co taiˍ taiˍ ve a shaꞈ gʼa tuˬ hkʼaˬ hkʼe gʼa te cawˇ ve le?

¹² Gaˍliˍlehˇ mvuhˇ miˬ lo Yeˍsuˆ Yuˇdaꞈ chaw htaꞈ kʼoˆ piˇ ve tawˇ hkawˇ, chaw teˇ gʼaˇ le le co co taiˍ taiˍ ve a shaꞈ gʼa tuˬ ve htaꞈ kʼoˆ gaˇ ve maˇ heˆ. Yeˍsuˆ lehˬ ‘hkaoˍ monˇ caˇ ve’ chaw htaꞈ ceh tiˉ kʼoˆ gaˇ ve yoˬ. Chi ve lehˬ, yonˍ ve tehꞈ hpeuꞈ maw laˇ ve chaw ceh tiˉ co co taiˍ taiˍ ve a shaꞈ gʼa tuˬ yoˬ. Chi beuꞈ teˇ co˗e ve chaw laiˉ gʼaˇ Hkriꞈ yaˇ hpehꞈ ve tehꞈ kʼoˆ ve htawˇ, ‘Yeˍsuˆ htaꞈ yonˍ’ leh yawˇ ga ponˬ laˇ shehˍ hpaˇ hpehꞈ ve tehꞈ yonˍ ve kaꞈ lawꞈ˗oˬ. (Yoˇhanˬ 6:29) Gaˍliˍlehˇ mvuhˇ miˬ awˬ hkʼaw lo Yeˍsuˆ awˬ hkʼaˇ suh gʼaꞈ kʼai ve chaw laiˉ gʼaˇ yawˇ htaꞈ kʼawꞈ baˬ taˉ ve yoˬ. Aˬ htoꞈ ma pa taw yawˇ hui chi hkʼe te ve le?

13. Awˬ tehˬ awˬ na Yeˍsuˆ ve awˬ laꞈ gʼawˇ hpehꞈ tuˬ aˬ htoꞈ ma gʼa te cawˇ ve le?

¹³ Chaw awˬ moˍ lonˉ oˇ ve teˇ hpaˍ Yeˍsuˆ yawˇ hui loˍ ve awˬ ceuˬ piˇ sheˍ ve ceh ceh yawˇ awˬ hkʼaˇ suh gʼaꞈ kʼai sheˍ ve yoˬ. Tawˇ pa haˉ te kʼo, anˇ tuˬ te leh naˬ ve gawˬ ve htaꞈ gu na˗e piˇ ve, hkaoˍ monˇ caˍ piˇ ve, leh yawˇ hui kaˇ gaˇ ve awˬ ceuˬ hkʼe gʼa kaˇ ve yoˬ. Yaꞈ hkʼaˇ, Yeˍsuˆ ve awˬ tehˬ ve awˬ laꞈ gʼawˇ hpehꞈ tuˬ yawˇ hui chi aꞈ kehˉ gʼa te cawˇ ve tehꞈ, Yeˍsuˆ hpeuꞈ maw piˇ ve yoˬ. Chaw yaˇ loˍ ve awˬ ceuˬ htaꞈ piˇ tuˬ yoˬ tehꞈ, Yeˍsuˆ miˬ guiˬ hkʼoˆ lo laˬ ve maˇ heˆ. Chi htaꞈ pa taw, awˬ tehˬ awˬ na Yeˍsuˆ ve awˬ laꞈ gʼawˇ hpehꞈ gʼa tuˬ, yawˇ geh ‘laˬ˗oꞈ’ kʼoˆ ve tawˇ hkawˇ htaꞈ yawˇ hui gʼa haꞈ yuˬ leh gʼa na yuˬ cawˇ ve yoˬ.—Yoˇhanˬ 5:40; 6:44.

14. Yeˍsuˆ ve awˬ suhˍ leh awˬ shaˍ htaꞈ ngaˬ hui awˬ bon gʼa tuˬ hkʼaˬ hkʼe gʼa te cawˇ ve le?

¹⁴ Chaw awˬ moˍ lonˉ oˇ ve teˇ hpaˍ htaꞈ Yeˍsuˆ kʼoˆ piˇ ve, yawˇ hui yonˍ ve tehꞈ gʼa hpeuꞈ maw  piˇ cawˇ ve yoˬ. Aˬ htoꞈ ma awˬ lawn htaꞈ yonˍ ve le? Yeˍsuˆ ve awˬ suhˍ leh awˬ shaˍ yawˇ hui awˬ pon tanˇ laˇ ve tehꞈ yonˍ ve kʼo, co co taiˍ taiˍ ve a shaꞈ gʼa tuˬ yoˬ. Chi hkʼe te yonˍ ve lehˬ, Yuˇdaꞈ chaw oˇ ve teˇ hpaˍ awˬ pon a yeˇ uiˍ jaˇ leh chi beuꞈ teˇ co˗e ngaˬ hui awˬ pon kaꞈ a yeˇ uiˍ jaˇ. (Yoˇhanˬ 6:40) Awˬ tehˬ yoˬ, Yoˇhanˬ liꞈ 6:53 hkʼaw kʼoˆ taˍ ve hkʼe, Yeˍsuˆ ve awˬ suhˍ leh awˬ shaˍ ngaˬ hui awˬ pon awˬ bon gʼa tuˬ, htaiˍ hkʼawꞈ laˇ ve htaꞈ ngaˬ hui yonˍ ve tehꞈ gʼa hpeuꞈ maw piˇ ve yoˬ. Chi ve lehˬ, chaw awˬ moˍ lonˉ gʼaw maˇ peuˬ ve chaw awˬ pon awˬ bon gʼa tuˬ yoˬ.—Eˇfeˇsuꞈ 1:7.

15-16. Yoˇhanˬ liꞈ kaˇ nanˉ uiˍ 6 hkʼaw a yeˇ uiˍ jaˇ ve ngaˬ hui aˬ htoꞈ ma htaꞈ gʼa henˇ ve le?

¹⁵ Yoˇhanˬ liꞈ kaˇ nanˉ uiˍ 6 hkʼaw ve awˬ lawn ngaˬ hui leh ngaˬ hui haꞈ ve chaw awˬ pon awˬ bon cawˬ jaˇ. Yeˍsuˆ chaw yaˇ htaꞈ hkʼaˬ hkʼe taw haꞈ ve, chi ngaˬ hui mawˬ tuˬ te laˇ ve yoˬ. Tawˇ pa haˉ te kʼo, Yeˍsuˆ Gaˍliˍlehˇ mvuhˇ miˬ lo chehˇ htaˇ, naˬ ve gawˬ ve chaw htaꞈ gu na˗e piˇ ve, yawˇ hui htaꞈ Gʼuiˬ sha ve mvuhˇ miˬ awˬ lawn maˍ piˇ ve, leh yawˇ hui awˬ pon caˇ tuˬ gu teh piˇ ve yoˬ. (Luˉkaꞈ 9:11; Yoˇhanˬ 6:2, 11, 12) A yeˇ uiˍ jaˇ ve Yeˍsuˆ yawˇ hui htaꞈ maˍ piˇ ve lehˬ, ‘a shaꞈ teꞈ piˇ lawˬ ve hkaoˍ monˇ hpehꞈ ve yoˬ.’—Yoˇhanˬ 6:35, 48.

¹⁶ “Awˬ kaˍ awˬ nu ve yawˬ teˇ hpaˍ” awˬ moˍ hkʼaw chehˇ ve chaw Yeˍsuˆ suh ve dawˇ nawˇ tuˬ hpawnˬ daꞈ ve te htaˇ, hkaoˍ monˇ maˇ caˇ leh a pehˉ meuˇ gʼuiˬ maˇ dawˬ. (Yoˇhanˬ 10:16) Yaꞈ hkʼaˇ, yawˇ hui Yeˍsuˆ ve awˬ suhˍ leh awˬ shaˍ htaꞈ awˬ bon gʼa ve lehˬ, Yeˍsuˆ htaiˍ hkʼawꞈ laˇ ve htaꞈ yawˇ hui yonˍ ve tehꞈ gʼa hpeuꞈ maw piˇ ve yoˬ. (Yoˇhanˬ 6:53) Yeˍsuˆ suh ve dawˇ nawˇ tuˬ hpawnˬ daꞈ ve hkʼaw hkaoˍ monˇ caˇ leh a pehˉ meuˇ gʼuiˬ dawˬ ve chaw kʼo, ka tiꞈ shaˉ caˆ awˬ suhˉ hkʼaw chehˇ leh mvuhˇ naw ma hkʼoˆ Yeˍsuˆ geh teˇ geh uˉ peunˍ tuˬ dawˇ law kuiˬ cawˬ ve yoˬ. Ngaˬ hui awˬ kaˍ awˬ nu ve yawˬ teˇ hpaˍ hpehꞈ ve, maˇ heˆ leh leuˆ yuˬ taˍ ve chaw hpehꞈ ve htawˇ maˇ kʼoˆ, Yoˇhanˬ liꞈ kaˇ nanˉ uiˍ 6 hkʼaw ve awˬ lawn ngaˬ hui awˬ pon kaꞈ awˬ bon cawˬ ve yoˬ. Ngaˬ hui co co taiˍ taiˍ ve a shaꞈ gʼa tuˬ chi ve lehˬ, yonˍ ve tehꞈ gʼa hpeuꞈ maw piˇ ve a yeˇ uiˍ jaˇ tuˬ te laˇ ve yoˬ.