1-2. Ngaˬ hui mehˆ gʼuiˬ yaꞈ la tuˬ te laˇ ve aˬ htoꞈ ma cawˬ ve le?

 Maˇ hawˬ jaw ve chaw teˇ gʼaˇ kaꞈ maˇ cawˬ. Ngaˬ hui teˇ gʼaˇ le le kaꞈ mehˆ gʼuiˬ yaꞈ la jaw ve yoˬ. Ngaˬ hui ha lehˬ jaˇ tuˬ te laˇ ve teˇ lawn lawn gʼa hpuˇ htaˇ, ngaˬ hui ha lehˬ jaˇ leh hawˬ ve yoˬ. Tawˇ pa haˉ te kʼo, yaˇ paw la htaˇ, daꞈ ve awˬ ceuˬ htaꞈ dawˇ nawˇ htaˇ, nawˬ haꞈ ve awˬ chawˇ maˇ gʼa mawˬ daꞈ ve laiˉ hkʼawꞈ gaˬ˗oˬ ve htaꞈ gʼa kʼawꞈ mawˬ daꞈ htaˇ, nawˬ chi ve teˇ hpaˍ gʼa hpuˇ htaˇ hawˬ ve yoˬ.

² Yaꞈ hkʼaˇ, maˇ˗awˍ ve kʼo, awˬ lawn teˇ lawn lawn htaꞈ ngaˬ hui nyi ma luˬ jaˇ ve pa taw, hawˬ ve yoˬ. Tawˇ pa haˉ te kʼo, chaw teˇ gʼaˇ gʼaˇ ngaˬ hui nyi ma luˬ tuˬ te laˇ htaˇ, hawˬ ve, maˇ heˆ leh hpehꞈ chehˇ ve a naˍ htaꞈ pa taw naˬ jaˇ htaˇ, hawˬ ve yoˬ. Leh ngaˬ hui haꞈ ve chaw suh˗e ve pa taw, hawˬ ve yoˬ. Awˬ lawn chi ve hkʼa peu˗eˬ Baˍbuˍlonˍ chaw Yeˍruˆsaˍlehnˍ venˇ htaꞈ te luˬ htaˇ, tcuh kaˍ paˍ Yeˍraˍmiˆ hkʼa shuˍ ngaˬ hui kaꞈ dawˇ ve yoˬ. Yeˍraˍmiˆ kʼoˆ ve, “ngaˬ ve mehˆ gʼuiˬ iˉ kaˆ lawˬ hkʼe tawˆ la tcuhˉ taˍ ve yoˬ. Gʼuiˬ sha nyi yaꞈ peu laˇ leh ngaˬ hui htaꞈ mawˬ htaˇ hkʼa gaˬ” hpehꞈ ve yoˬ.—Dawˇ haˍ ve 3:48, 49.

3. Yaˬhoˉvaˬ yawˇ ve kanˉ te ve chaw nyi ma luˬ ve htaꞈ gʼa mawˬ htaˇ hkʼaˬ hkʼe dawˇ ve le? (Iˉsaˍyaˆ 63:9)

³ Ngaˬ hui a shaꞈ teꞈ kuiˬ hkʼaw maˇ daꞈ ve awˬ ceuˬ laiˉ ceuˬ gʼa hpuˇ ve pa taw, ngaˬ hui mehˆ gʼuiˬ hkʼaˬ hkʼe taw yaꞈ la ve htaꞈ Yaˬhoˉvaˬ shiˍ ve yoˬ. Liꞈ hpu hkʼaw ngaˬ hui htaꞈ ka tiꞈ te taˍ laˇ ve, Yaˬhoˉvaˬ ve kanˉ te ve chaw teˇ gʼaˇ leh teˇ gʼaˇ maˇ daꞈ ve awˬ lawn aˬ htoꞈ ma gʼa hpuˇ ve, yawˇ hkʼa dehꞈ shiˍ ve yoˬ. Ngaˬ hui ga laˇ tuˬ lawˬ htaˇ, yawˇ na taˍ ve yoˬ. (Chiˇ mvuh ve 34:15) Yaꞈ hkʼaˇ, Yaˬhoˉvaˬ ngaˬ hui htaꞈ mawˬ leh gʼa kaˇ ve ceh tiˉ maˇ heˆ. Yaˬhoˉvaˬ lehˬ ngaˬ hui htaꞈ haꞈ jaˇ ve Awˬ pa hkʼe hpehꞈ ve yoˬ. Ngaˬ hui hawˬ htaˇ, yawˇ ngaˬ hui geh teˇ geh nyi ma luˬ leh ga laˇ gaˇ jaˇ ve yoˬ.—Iˉsaˍyaˆ 63:9 gʼaw sheˍ.

4. Liꞈ hpu hkʼaw a shu ve awˬ lawn htaꞈ ngaˬ hui henˇ tuˬ le? Leh Yaˬhoˉvaˬ htaꞈ caˉ daꞈ ve ngaˬ hui aˬ htoꞈ ma gʼa henˇ tuˬ le?

⁴ Yaˬhoˉvaˬ yawˇ ve kanˉ te ve chaw nyi ma luˬ leh mehˆ gʼuiˬ yaꞈ la htaˇ, yawˇ hkʼaˬ hkʼe te ve Liꞈ hpu htaꞈ cuˇ leh ngaˬ hui htaꞈ kʼoˆ laˇ ve yoˬ. Haˍnaˆ, Daˍviˆ, leh jawˇ mawˇ Heˍsaˍkiˆ ve awˬ lawn htaꞈ ngaˬ hui  teˇ geh henˇ tuˬ yoˬ. Yawˇ hui hawˬ leh mehˆ gʼuiˬ yaꞈ la tuˬ aˬ htoꞈ ma te piˇ ve le? Yawˇ hui ga laˇ tuˬ lawˬ htaˇ, Yaˬhoˉvaˬ hkʼaˬ hkʼe te ve le? Ngaˬ hui nyi ma luˬ ve, shu hpfuhˆ laˇ ve htaꞈ gʼa hpuˇ ve, maˇ heˆ leh dawˇ law kuiˬ maˇ cawˬ ve paw taw mehˆ gʼuiˬ yaꞈ la htaˇ, yawˇ hui ve awˬ lawn ngaˬ hui htaꞈ awˬ gʼaˇ hkʼaˬ hkʼe peꞈ laˇ ve le?

NYI MA LUˬ VE PA TAW MEHˆ GʼUIˬ YAꞈ VE

5. Haˍnaˆ gʼa hpuˇ ve awˬ lawn yawˇ hkʼaˬ hkʼe dawˇ tuˬ te piˇ ve le?

⁵ Haˍnaˆ shoꞈ shaꞈ ve laiˉ ceuˬ gʼa hpuˇ leh nyi ma luˬ ve pa taw, mehˆ gʼuiˬ yaꞈ la tuˬ te piˇ ve yoˬ. Shoꞈ shaꞈ ve teˇ ceuˬ lehˬ, yawˇ ve awˬ hpawˇ awˬ miˇ ma teˇ gʼaˇ ceh tiˉ cawˬ ve maˇ heˆ. Yawˇ ve awˬ hpawˇ ve awˬ miˇ ma teˇ gʼaˇ Peˍniˇnaˆ meh leh yawˇ htaꞈ kʼoˆ guiˇ gʼuiˬ guiˇ piˇ ve yoˬ. Yaꞈ hkʼaˇ, chi hkʼe ceh tiˉ maˇ heˆ. Haˍnaˆ chaw meh ma kaꞈ hpehꞈ ve yoˬ. Hkʼe te leh, Peˍniˇnaˆ lehˬ yaˇ laiˉ gʼaˇ cawˬ ve yoˬ. (1 Saˍmo˗eˍlaˆ 1:1, 2) Haˍnaˆ chaw meh ma hpehꞈ ve pa taw, Peˍniˇnaˆ lehˬ hkʼaˬ htaˆ kaꞈ Haˍnaˆ htaꞈ kʼoˆ guiˇ gʼuiˬ guiˇ piˇ ve yoˬ. Nawˬ chi hkʼe gʼa hpuˇ ve kʼo, hkʼaˬ hkʼe dawˇ tuˬ ve le? Haˍnaˆ “dawˇ haˍ jaˇ ve” pa taw “maˇ caˇ maˇ dawˬ leh hawˬ chehˇ ve yoˬ.”—1 Saˍmo˗eˍlaˆ 1:6, 7, 10.

6. Haˍnaˆ awˬ gʼaˇ gʼa tuˬ hkʼaˬ hkʼe te ve le?

⁶ Haˍnaˆ awˬ gʼaˇ gʼa tuˬ hkʼaˬ kaˬ lo ca ve le? Yawˇ te ve teˇ ceuˬ lehˬ, Yaˬhoˉvaˬ ve daꞈ kehˬ ve bon yehˬ lo oˉ kʼoˍ ca pui˗e ve yoˬ. Oˇ ve teˇ yanˇ choˬ kaˬ lo lehˬ, awˬ tehˬ ve oˉ kʼoˍ pui kuiˬ hpehꞈ ve yoˬ. Yawˇ daꞈ kehˬ ve bon yehˬ gʼuˇ suhˍ lo chehˇ taˍ htaˇ, yawˇ “Gʼuiˬ sha geh bon lawˬ leh gʼaˇ hteꞈ hawˬ chehˇ ve yoˬ.” Yawˇ Yaˬhoˉvaˬ geh bon lawˬ leh kʼoˆ piˇ ve, “nawˬ ve awˬ ceˬ ma htaꞈ a ciˉ nyi laˇ˗oˆ. Ngaˬ hkʼaˬ ma gʼa tuꞈ gʼa hkanˍ chehˇ ve htaꞈ nyi leh, ngaˬ htaꞈ a ciˉ dawˇ nawˇ laˇ˗oˆ.” (1 Saˍmo˗eˍlaˆ 1:10, 11) Haˍnaˆ yawˇ nyi ma hkʼaw cawˬ ve awˬ ceuˬ hkʼa peu˗eˬ Yaˬhoˉvaˬ geh bon lawˬ leh kʼoˆ piˇ ve yoˬ. Haˍnaˆ mehˆ gʼuiˬ chi hkʼe taw taw yaꞈ la ve htaꞈ Yaˬhoˉvaˬ gʼa mawˬ htaˇ, Yaˬhoˉvaˬ kaꞈ yawˇ geh teˇ geh nyi ma luˬ ve yoˬ hehˉ. Yawˇ lehˬ Yaˬhoˉvaˬ haꞈ jaˇ ve yaˇ miˇ hkʼe hpehꞈ ve pa taw, Yaˬhoˉvaˬ yawˇ htaꞈ awˬ gʼaˇ piˇ gaˇ jaˇ ve yoˬ!

7. Haˍnaˆ nyi ma hkʼaw cawˬ ve awˬ ceuˬ Yaˬhoˉvaˬ htaꞈ kʼoˆ piˇ ve pa taw, yawˇ htaꞈ hkʼaˬ hkʼe ga piˇ ve le?

⁷ Haˍnaˆ nyi ma hkʼaw cawˬ ve awˬ ceuˬ Yaˬhoˉvaˬ geh bon lawˬ leh kʼoˆ piˇ peuˬ hkʼawꞈ nawˉ, Paw hkuˇ lonˉ Eˇliˇ geh ka tiꞈ te piˇ ve htaꞈ kaꞈ gʼa ve yoˬ. Liꞈ hpu hkʼaw kʼoˆ ve, yawˇ “peuˬ hkʼawꞈ nawˉ tawˆ kʼai leh, caˇ tuˬ kʼawꞈ caˇ ve yoˬ. Chi teˇ pawˆ yawˇ maˇ kʼawꞈ dawˇ haˍ˗o.” (1 Saˍmo˗eˍlaˆ 1:17, 18) Haˍnaˆ dawˇ haˍ ve hkʼa peu˗eˬ Yaˬhoˉvaˬ htaꞈ chiˇ aꞈ piˇ ve yoˬ. Yawˇ shoꞈ shaꞈ ve awˬ lawn gʼa hpuˇ sheˍ ve htawˇ, yawˇ nyi ma gawˬ lehˍ cawˬ gʼa ve yoˬ. Chi ve lehˬ, Yaˬhoˉvaˬ yawˇ htaꞈ ga piˇ ve awˬ hkʼaˇ hpehꞈ ve yoˬ. Yawˇ hkʼaˬ hkʼe taw taw dawˇ haˍ ve htaꞈ Gʼuiˬ sha na gʼa ve yoˬ. Yawˇ hawˬ ve awˬ hkawˇ Gʼuiˬ sha gʼa kaˇ leh, peuˬ hkʼawꞈ nawˉ Gʼuiˬ sha yawˇ htaꞈ awˬ bon naꞈ piˇ leh yawˇ yaˇ cawˬ la ve yoˬ.—1 Saˍmo˗eˍlaˆ 1:19, 20; 2:21.

8-9. Heˍbrehˇ liꞈ 10:24, 25 hkʼaw kʼoˆ taˍ ve hkʼe, aˬ htoꞈ ma te ngaˬ hui coˇ caˇ leh hpawnˬ daꞈ˗e cawˇ ve le? (Awˬ han htaꞈ nyi sheˍ.)

⁸ Ngaˬ hui awˬ pon henˇ yuˬ tuˬ. Chi teˇ hkui nawˬ shoꞈ shaꞈ ve gʼa hpuˇ jaˇ ve pa taw, nyi ma luˬ jaˇ leh mehˆ gʼuiˬ yaꞈ tuˬ te laˇ˗aw laˇ? Tawˇ pa haˉ te kʼo, yehˬ kʼa hkʼaw ve chaw maˇ heˆ leh haꞈ ve awˬ chawˇ suh˗e ve yoˬ. Awˬ lawn chi hkʼe ve gʼa hpuˇ htaˇ,  nawˬ teˇ gʼaˇ tiˉ chehˇ gaˇ ve yoˬ hehˉ. Yaꞈ hkʼaˇ, Haˍnaˆ lehˬ daꞈ kehˬ ve bon yehˬ lo kʼai leh awˬ gʼaˇ gʼa ve yoˬ. Oˇ ve teˇ yanˇ nawˬ hpawnˬ daꞈ kuiˬ yehˬ lo maˇ kʼai gaˇ sheˍ ve htawˇ, choˬ kaˬ lo kʼai ve kʼo, nawˬ awˬ gʼaˇ gʼa tuˬ yoˬ. (Heˍbrehˇ 10:24, 25 gʼaw sheˍ.) Hpawnˬ daꞈ kuiˬ hkʼaw Liꞈ hpu awˬ tawn laiˉ tawn htaꞈ nawˬ gʼa kaˇ htaˇ, maˇ daꞈ ve awˬ ceuˬ htaꞈ dawˇ ve aꞈ kehˉ, daꞈ ve htaꞈ dawˇ tuˬ Yaˬhoˉvaˬ nawˬ htaꞈ ga laˇ tuˬ yoˬ. Awˬ bon gʼa ve lehˬ, oˇ ve teˇ yanˇ nawˬ nyi ma maˇ sha sheˍ ve htawˇ, nawˬ ve te hkʼaˇ dawˇ hkʼaˇ htaꞈ yuˬ tiˍ gʼaˇ tuˬ yoˬ.

⁹ Ngaˬ hui hpawnˬ daꞈ˗e htaˇ, awˬ viˉ awˬ nyi geh gʼa chehˇ ve htaꞈ ha lehˬ ve yoˬ. Yawˇ hui ngaˬ hui htaꞈ awˬ gʼaˇ peꞈ laˇ leh yawˇ hui ngaˬ hui htaꞈ hkʼaˬ hkʼe taw haꞈ ve mawˬ tuˬ te laˇ ve yoˬ. (1 Hteˇsaˍlawˇniˆ 5:11, 14) Awˬ viˉ awˬ nyi hawˉ hkʼaˆ teˇ gʼaˇ tcuh peu ve gʼuˇ suhˍ peuˍ ve te ve awˬ lawn htaꞈ teˇ geh nyi sheˍ. Yawˇ ve awˬ miˇ ma suh˗e ve yoˬ. Yawˇ kʼoˆ ve, “ngaˬ yawˇ htaꞈ dawˇ nawˇ ve pa taw, hawˬ ve yoˬ. Teˇ pawˆ pawˆ kʼo, ngaˬ teˇ gʼaˇ tiˉ chehˇ gaˇ ve yoˬ. Ngaˬ yawˇ ve awˬ lawn teˇ ceuˬ ceuˬ a ciˉ ceh dawˇ mawˬ ve kaꞈ hawˬ ve yoˬ. Yaꞈ hkʼaˇ, hpawnˬ daꞈ˗e ve ngaˬ awˬ gʼaˇ gʼa jaˇ tuˬ te laˇ ve yoˬ. Awˬ viˉ awˬ nyi htaꞈ gʼa mawˬ daꞈ htaˇ, na sha ve tawˇ yaw laˇ leh hpawnˬ daꞈ kuiˬ hkʼaw yawˇ hui hkʼawꞈ ve ngaˬ gʼa kaˇ htaˇ, awˬ gʼaˇ gʼa jaˇ tuˬ te laˇ ve yoˬ. Ngaˬ hkʼaˬ hkʼe taw dawˇ haˍ dawˇ hkiˉ ve htawˇ maˇ kʼoˆ, hpawnˬ daꞈ kuiˬ yehˬ lo gaˬ htaˇ, ngaˬ nyi ma sha jaˇ ve yoˬ.” Ngaˬ hui hpawnˬ daꞈ kuiˬ yehˬ lo kʼai htaˇ, Yaˬhoˉvaˬ awˬ viˉ awˬ nyi htaꞈ yehˇ leh ngaˬ hui htaꞈ ga laˇ gʼa ve yoˬ.

10. Ngaˬ hui nyi ma luˬ htaˇ Haˍnaˆ ve awˬ lawn htaꞈ hkʼaˬ hkʼe henˇ yuˬ gʼa ve le?

¹⁰ Haˍnaˆ nyi ma hkʼaw cawˬ ve awˬ ceuˬ Yaˬhoˉvaˬ geh bon lawˬ ve hkʼaw kʼoˆ piˇ peuˬ hkʼawꞈ nawˉ, awˬ gʼaˇ gʼa jaˇ ve yoˬ. Nawˬ kaꞈ ‘dawˇ haˍ dawˇ hkiˉ tuˬ hkʼa peu˗eˬ Yaˬhoˉvaˬ htaꞈ chiˇ aꞈ piˇ˗oˆ.’ Leh yawˇ nawˬ ve hkawˇ na tuˬ yoˬ tehꞈ yonˍ gʼa ve yoˬ. (1 Peˍtruˆ 5:7) Awˬ viˉ awˬ nyi yaˇ miˇ chaw hkʼawˇ ca dawˆ la htaˇ, yawˇ ve awˬ hpawˇ htaꞈ dawˆ pehˍ˗aˉ piˇ ve yoˬ. Yawˇ kʼoˆ ve, “ngaˬ ve nyi ma shiˍ peꞈ hkoˇ˗e peuˬ˗oˬ ve htaꞈ shuˍ leh awˉ lawˉ htaˇ hkʼe kʼawꞈ hpehꞈ la maˇ gʼa taˬ tehꞈ dawˇ ve yoˬ. Ngaˬ htaꞈ awˬ gʼaˇ peꞈ laˇ ve awˬ ceuˬ lehˬ, Awˬ pa Yaˬhoˉvaˬ geh bon lawˬ ve yoˬ. Teˇ pawˆ pawˆ kʼo, Yaˬhoˉvaˬ geh aˬ htoꞈ ma ve tawˇ kʼoˆ piˇ tuˬ kaꞈ maˇ shiˍ ve yoˬ. Yaꞈ hkʼaˇ, yawˇ ngaˬ htaꞈ na gʼa ve yoˬ. Ngaˬ nyi ma luˬ jaˇ leh teꞈ chiˉ kaꞈ dawˇ maˇ gʼa htaˇ, ngaˬ nyi ma gawˬ lehˍ ve cawˬ tuˬ Gʼuiˬ sha ga laˇ tuˬ bon lawˬ ve yoˬ. Peuˬ hkʼawꞈ nawˉ, ngaˬ ve nyi ma gawˬ lehˍ cawˬ leh ngaˬ caˉ leh a shaꞈ kʼawꞈ teꞈ chehˇ gʼa tuˬ te laˇ ve tehꞈ dawˇ ve yoˬ.” Nawˬ nyi ma hkʼaw cawˬ ve awˬ ceuˬ Yaˬhoˉvaˬ geh bon lawˬ ve hkʼaw kʼoˆ piˇ htaˇ, yawˇ kaꞈ nawˬ geh teˇ geh nyi ma luˬ ve yoˬ. Leh yawˇ lehˬ nawˬ nyi ma hkʼaˬ hkʼe taw naˬ ve htaꞈ na gʼa ve yoˬ. Nawˬ shoꞈ shaꞈ ve awˬ lawn cawˬ chehˇ sheˍ ve htawˇ, nawˬ awˬ gʼaˇ gʼa leh nyi ma gawˬ lehˍ ve cawˬ tuˬ Yaˬhoˉvaˬ ga laˇ gʼa ve yoˬ. (Chiˇ mvuh ve 94:19; Hpiˇliˇpiˆ 4:6, 7) Nawˬ ka tiꞈ yeˬ ve hkʼaw yeunˇ hkanˍ ve htaꞈ Yaˬhoˉvaˬ laꞈ shawnˍ peꞈ laˇ tuˬ yoˬ.—Heˍbrehˇ 11:6.

HPFUHˆ PIˇ VE PA TAW MEHˆ GʼUIˬ YAꞈ VE

11. Daˍviˆ gʼa hpuˇ ve shoꞈ shaꞈ ve teˇ hpaˍ yawˇ hkʼaˬ hkʼe dawˇ tuˬ te piˇ ve le?

¹¹ Daˍviˆ a shaꞈ teꞈ kuiˬ hkʼaw shoꞈ shaꞈ ve laiˉ ceuˬ gʼa hpuˇ leh mehˆ gʼuiˬ yaꞈ la tuˬ te piˇ ve yoˬ. Chaw laiˉ gʼaˇ yawˇ htaꞈ nyi bawˬ ve yoˬ. Yawˇ yonˍ gʼa ve chaw htawˇ, yawˇ htaꞈ hpfuhˆ piˇ ve yoˬ. (1 Saˍmo˗eˍlaˆ 19:10, 11; 2 Saˍmo˗eˍlaˆ 15:10-14, 30) Daˍviˆ shoꞈ shaꞈ ve gʼa hpuˇ jaˇ htaˇ, yawˇ kʼoˆ ve, “ngaˬ lehˬ dawˇ haˍ ve htaꞈ pa taw awˬ gʼaˇ nuˇ jaˇ peuˬ. Teˇ haˉ le le ngaˬ hawˬ ve pa taw, ngaˬ ve zuhꞈ hpui nehˆ kʼai peuˬ. Ngaˬ ve uˉ gehˇ htawˇ mehˆ gʼuiˬ htaꞈ pa taw, nehˆ jaˇ peuˬ.” Aˬ htoꞈ ma pa taw Daˍviˆ chi hkʼe dawˇ ve le? Yawˇ kʼoˆ ve, “ngaˬ ve canˇ paˍ teˇ hpaˍ htaꞈ pa taw yoˬ.” (Chiˇ mvuh ve 6:6, 7) Awˬ nu ve chaw Daˍviˆ htaꞈ te piˇ ve haiˬ jaˇ ve awˬ ceuˬ lehˬ, yawˇ nyi ma naˬ jaˇ leh hawˬ ve yoˬ.

12. Chiˇ mvuh ve liꞈ 56:8 hkʼaw kʼoˆ taˍ ve hkʼe, Daˍviˆ aˬ htoꞈ ma awˬ lawn htaꞈ yonˍ gʼa ve le?

¹² Daˍviˆ a shaꞈ teꞈ kuiˬ hkʼaw shoꞈ shaꞈ ve gʼa hpuˇ jaˇ ve htawˇ, Yaˬhoˉvaˬ Daˍviˆ htaꞈ haꞈ ve tehꞈ yawˇ yonˍ gʼa sheˍ ve yoˬ. Yawˇ kʼoˆ ve, “Gʼuiˬ sha lehˬ ngaˬ hawˬ ve awˬ hkawˇ htaꞈ gʼa kaˇ peuˬ.” (Chiˇ mvuh ve 6:8) Awˬ yanˇ teˇ yanˇ htaˇ, Chiˇ mvuh ve liꞈ 56:8 hkʼaw nyi ma pfuhˇ lawꞈ lawꞈ ve kʼa muiˬ hkawˇ Daˍviˆ bvuhꞈ ve yoˬ. (Gʼaw sheˍ.) Chi ve teˇ tawn hkʼaw Daˍviˆ ve tawˇ hkawˇ Yaˬhoˉvaˬ ngaˬ hui htaꞈ haꞈ leh  hkʼaˬ hkʼe taw dawˇ haˍ ve shiˍ tuˬ te laˇ ve yoˬ. Daˍviˆ kʼoˆ ve, Yaˬhoˉvaˬ lehˬ ngaˬ ve mehˆ gʼuiˬ yawˇ ve iˉ kaˆ keu kuiˬ shaˍ gʼuiˬ kʼuˉ hkʼaw gʼawˆ keu taˍ ve, maˇ heˆ leh Daˍviˆ ve mehˆ gʼuiˬ yawˇ ve liꞈ daw awˬ hkʼaw lo bvuhꞈ keu taˍ peuˬ ve yoˬ. Yawˇ nyi ma hkʼaˬ hkʼe taw naˬ ve htaꞈ Yaˬhoˉvaˬ shiˍ leh maˇ leunˇ taˬ tehꞈ yonˍ gʼa ve yoˬ. Yawˇ aˬ htoꞈ ma gʼa hpuˇ chehˇ ve htaꞈ Gʼuiˬ sha mawˬ ve ceh maˇ heˆ tehꞈ yonˍ gʼa sheˍ ve yoˬ. Yawˇ hkʼaˬ hkʼe taw nyi ma luˬ ve htaꞈ Gʼuiˬ sha na gʼa ve tehꞈ yonˍ gʼa sheˍ ve yoˬ.

13. Awˬ nu ve chaw ngaˬ hui nyi ma luˬ tuˬ te laˇ htaˇ, ngaˬ hui aˬ htoꞈ ma htaꞈ tawnˇ taˍ cawˇ ve le? (Awˬ han htaꞈ nyi sheˍ.)

¹³ Ngaˬ hui awˬ pon henˇ yuˬ tuˬ. Nawˬ nyi ma luˬ ve maˇ heˆ leh nawˬ yonˍ gʼa jaˇ ve chaw nawˬ htaꞈ hpfuhˆ laˇ ve pa taw, nyi ma luˬ chehˇ ve laˇ? Tawˇ pa haˉ te kʼo, nawˬ heuˆ daꞈ˗a te chehˇ ve chaw nawˬ htaꞈ baˬ taˉ laˇ ve, maˇ heˆ leh nawˬ ve awˬ ca nawˬ htaꞈ baˬ taˉ laˇ ve, maˇ heˆ leh nawˬ haꞈ ve chaw Yaˬhoˉvaˬ ve kanˉ maˇ te˗o ve pa taw, nawˬ nyi ma luˬ jaˇ ve yoˬ hehˉ. Awˬ viˉ awˬ nyi hawˉ hkʼaˆ teˇ gʼaˇ awˬ miˇ ma haˉ chawˇ haˉ paˆ te leh yawˇ htaꞈ baˬ taˉ piˇ ve yoˬ. Yawˇ kʼoˆ ve, “nga cheˆ˗ehꞈ kʼai ve yoˬ. Awˬ lawn chi hkʼe ve ngaˬ htaꞈ hpehꞈ la tuˬ maˇ dawˇ nyi jaw. Ngaˬ awˬ to awˬ hpfuhˇ maˇ cawˬ ve, beuꞈ jaˇ ve, leh nyi ma luˬ jaˇ ve yoˬ.” Chaw teˇ gʼaˇ nawˬ htaꞈ hpfuhˆ laˇ ve maˇ heˆ leh nyi ma luˬ jaˇ tuˬ te laˇ ve kʼo, Yaˬhoˉvaˬ nawˬ htaꞈ baˬ taˉ laˇ tuˬ awˬ nyi maˇ cawˬ tehꞈ yonˍ sheˍ. Awˬ viˉ awˬ nyi hawˉ hkʼaˆ kʼawꞈ kʼoˆ ve, “chaw yaˇ lehˬ ngaˬ hui htaꞈ hpfuhˆ laˇ gʼa ve yoˬ. Yaꞈ hkʼaˇ, Yaˬhoˉvaˬ lehˬ ngaˬ hui awˬ pon yeˬ jaˇ ve haˉ hpawˇ hkʼe hpehꞈ ve yoˬ. Ngaˬ hui a shaꞈ teꞈ kuiˬ hkʼaw aˬ htoꞈ ma gʼa hpuˇ ve htawˇ maˇ kʼoˆ, yawˇ ngaˬ hui htaꞈ ga laˇ chehˇ ve yoˬ. Yaˬhoˉvaˬ yawˇ ve kanˉ ka tiꞈ yeˬ ve hkʼaw te ve chaw htaꞈ baˬ taˉ piˇ tuˬ awˬ nyi maˇ cawˬ.” (Chiˇ mvuh ve 37:28) Miˬ guiˬ hkʼoˆ lo ve chaw yaˇ Yaˬhoˉvaˬ ngaˬ hui htaꞈ haꞈ ve hkʼe taw maˇ cawˬ ve tehꞈ tawnˇ taˍ sheˍ. Shu hpfuhˆ laˇ ve gʼa hpuˇ ve pa taw, nawˬ nyi ma naˬ jaˇ ve htawˇ, Yaˬhoˉvaˬ nawˬ htaꞈ hkʼaˬ htaˆ kaꞈ haꞈ ve yoˬ. Nawˬ yawˇ awˬ pon awˬ hpfuhˇ hkʼaˆ jaˇ. (Roˉmaꞈ 8:38, 39) Chi htaꞈ pa taw, awˬ nu ve chaw nawˬ htaꞈ hkʼaˬ hkʼe te laˇ ve htawˇ, Awˬ pa Yaˬhoˉvaˬ nawˬ htaꞈ haꞈ ve co co yeˬ ve tehꞈ tawnˇ taˍ sheˍ.

14. Chiˇ mvuh ve liꞈ 34:18 hkʼaw ngaˬ hui htaꞈ awˬ gʼaˇ hkʼaˬ hkʼe peꞈ laˇ ve le?

¹⁴ Nawˬ htaꞈ awˬ nu ve chaw hpfuhˆ laˇ ve kʼo, Chiˇ mvuh ve liꞈ 34:18 hkʼaw Daˍviˆ ve tawˇ hkawˇ htaꞈ nawˬ gʼaw htaˇ, awˬ gʼaˇ gʼa ve yoˬ. (Gʼaw sheˍ.) Liꞈ kʼoˆ teˇ kʼoˆ hkʼaw kʼoˆ ve, “nyi ma luˬ jaˇ” ve chaw lehˬ awˬ gʼuˇ suhˍ hpawˇ dawˇ law kuiˬ maˇ cawˬ˗o ve chaw htaꞈ kʼoˆ gaˇ ve tehꞈ dawˇ ve yoˬ. Chi hkʼe taw taw nyi ma luˬ ve chaw htaꞈ Yaˬhoˉvaˬ hkʼaˬ hkʼe ga piˇ ve le? Awˬ pa awˬ e yaˇ htaꞈ haꞈ jaˇ ve awˬ lawn dawˇ nyi sheˍ. Yaˇ nyi ma luˬ leh hawˬ htaˇ, awˬ pa awˬ e kʼuˉ piˇ leh beˬ piˇ ve yoˬ. Chi ve hkʼa shuˍ shuˍ, awˬ nu ve chaw ngaˬ hui htaꞈ hpfuhˆ laˇ ve, maˇ heˆ leh baˬ taˉ laˇ ve pa taw, nyi ma luˬ jaˇ ve kʼo, Yaˬhoˉvaˬ ngaˬ hui “awˬ paˇ neˇ lo chehˇ” taˍ ve tehꞈ awˬ gʼaˇ peꞈ laˇ leh ga laˇ tuˬ law taˍ ve yoˬ. Chi hkʼoˆ kaꞈ, awˬ gʼuˇ suhˍ hpawˇ ve htaꞈ caˉ daꞈ ve dawˇ law kuiˬ daꞈ jaˇ ve yawˇ ngaˬ hui htaꞈ peꞈ laˇ sheˍ ve yoˬ. Chi ve lehˬ ngaˬ hui tuꞈ ve hkanˍ ve gʼa hpuˇ ve htaꞈ yeunˇ hkanˍ gʼaˇ tuˬ ga laˇ ve yoˬ.—Iˉsaˍyaˆ 65:17.

 DAWˇ MAˇ TAWˆ VE PA TAW MEHˆ GʼUIˬ YAꞈ VE

15. Heˍsaˍkiˆ hawˬ tuˬ te piˇ ve shoꞈ shaꞈ ve awˬ lawn aˬ htoꞈ ma gʼa hpuˇ ve le?

¹⁵ Jawˇ mawˇ Heˍsaˍkiˆ a shaꞈ 39 hkʼawꞈ htaˇ, naˬ jaˇ leh suh la paˇ neˇ ve yoˬ. Tcuh kaˍ paˍ Iˉsaˍyaˆ Yaˬhoˉvaˬ geh gʼa ve awˬ lawn Heˍsaˍkiˆ suh tuˬ yoˬ tehꞈ ca kʼoˆ piˇ la tcuh ve yoˬ. (2 Jawˇmawˇ 20:1) Nyi˗a kʼo, Heˍsaˍkiˆ awˬ pon dawˇ tuiꞈ gaˇ tuiꞈ jaˇ ve yoˬ. Yawˇ nyi ma luˬ jaˇ ve pa taw, hawˬ leh Yaˬhoˉvaˬ ga laˇ tuˬ lawˬ ve yoˬ.—2 Jawˇmawˇ 20:2, 3.

16. Yaˬhoˉvaˬ Heˍsaˍkiˆ ve bon lawˬ hkawˇ htaꞈ hkʼaˬ hkʼe hkʼawꞈ piˇ ve le?

¹⁶ Heˍsaˍkiˆ hawˬ ve htaꞈ Yaˬhoˉvaˬ gʼa mawˬ leh ha kʼaˉ jaˇ ve yoˬ. Hkʼe te leh, Yaˬhoˉvaˬ lehˬ tcuh kaˍ paˍ Iˉsaˍyaˆ htaꞈ cuˇ leh yawˇ htaꞈ ca kʼawꞈ kʼoˆ piˇ tcuh ve, “nawˬ ve bon lawˬ hkawˇ htaꞈ gʼa kaˇ peuˬ leh, nawˬ ve mehˆ gʼuiˬ htaꞈ gʼa mawˬ peuˬ. Ngaˬ nawˬ htaꞈ gu na˗e laˇ” tuˬ yoˬ. Yaˬhoˉvaˬ Heˍsaˍkiˆ htaꞈ a shaꞈ kʼawꞈ teꞈ chehˇ tcuh leh Iˉsaˍreˍlaˆ chaw Aˍsuˇriˆ chaw bawˆ la ve htaꞈ gʼa pon tuˬ yoˬ tehꞈ, Yaˬhoˉvaˬ ka tiꞈ te piˇ ve yoˬ.—2 Jawˇmawˇ 20:4-6.

17. Ngaˬ hui naˬ jaˇ htaˇ, Yaˬhoˉvaˬ ngaˬ hui htaꞈ hkʼaˬ hkʼe ga laˇ ve le? (Chiˇ mvuh ve 41:3) (Awˬ han htaꞈ nyi sheˍ.)

¹⁷ Ngaˬ hui awˬ pon henˇ yuˬ tuˬ. Nawˬ naˬ jaˇ leh gu maˇ gʼa˗o ve a naˍ hpehꞈ chehˇ ve laˇ? Nawˬ hkʼaˬ hkʼe dawˇ ve Yaˬhoˉvaˬ htaꞈ kʼoˆ piˇ sheˍ. Nawˬ nyi ma hkʼaw cawˬ ve awˬ ceuˬ Yaˬhoˉvaˬ htaꞈ kʼoˆ piˇ htaˇ, hawˬ ve yoˬ hehˉ. Liꞈ hpu hkʼaw ngaˬ hui htaꞈ ka tiꞈ te laˇ taˍ ve, “yawˇ lehˬ ha kʼaˉ puiˉ ve Awˬ pa hpehꞈ leh, dawˇ sha gaˇ sha tuˬ hkʼa peu˗eˬ piˇ shehˍ hpaˇ Gʼuiˬ sha hpehꞈ ve yoˬ.” Ngaˬ hui tuꞈ ve hkanˍ ve gʼa hpuˇ htaˇ, yawˇ ngaˬ hui htaꞈ awˬ gʼaˇ peꞈ laˇ tuˬ yoˬ. (2 Kawˇrenˍhtuˆ 1:3, 4) Chi teˇ hkui ngaˬ hui gʼa hpuˇ chehˇ ve shoꞈ shaꞈ ve hkʼa peu˗eˬ Yaˬhoˉvaˬ yuˬ baˬ laˇ tuˬ maˇ dawˇ law ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ awˬ gʼaˇ peꞈ laˇ leh ga laˇ tuˬ yoˬ tehꞈ yonˍ gʼa ve yoˬ. (Chiˇ mvuh ve 41:3 gʼaw sheˍ.) Ngaˬ hui awˬ gʼaˇ cawˬ tuˬ, cuˇ yiˍ cawˬ tuˬ, leh nyi ma gawˬ lehˍ ve cawˬ leh shoꞈ shaꞈ ve htaꞈ yeunˇ hkanˍ gʼaˇ tuˬ, Yaˬhoˉvaˬ ve daꞈ kehˬ ve awˬ ha hpu ngaˬ hui htaꞈ peꞈ laˇ tuˬ yoˬ. (Tawˇ naˉ ve 18:14; Hpiˇliˇpiˆ 4:13) Chi hkʼoˆ kaꞈ, Yaˬhoˉvaˬ ngaˬ hui htaꞈ awˬ gʼaˇ peꞈ laˇ ve lehˬ, maˇ maw ve awˬ yanˇ naˬ ve gawˬ ve hkʼa peu˗eˬ maˇ cawˬ tuˬ yoˬ tehꞈ, Liꞈ hpu hkʼaw dawˇ law kuiˬ daꞈ jaˇ ve ngaˬ hui htaꞈ peꞈ laˇ ve yoˬ.—Iˉsaˍyaˆ 33:24.

18. A shaꞈ teꞈ kuiˬ hkʼaw shoꞈ shaꞈ ve gʼa hpuˇ jaˇ htaˇ, nawˬ awˬ gʼaˇ cawˬ tuˬ Liꞈ hpu hkʼaˬ ve teˇ tawn ga laˇ gʼa ve le? (Awˇ ceˍ awˇ fa “ Yaˬhoˉvaˬ ve tawˇ hkawˇ nyi ma luˬ ve htaꞈ ga laˇ gʼa ve” htaꞈ nyi sheˍ.)

¹⁸ Jawˇ mawˇ Heˍsaˍkiˆ Yaˬhoˉvaˬ ve tawˇ hkawˇ htaꞈ awˬ gʼaˇ gʼa jaˇ ve yoˬ. Ngaˬ hui kaꞈ Liꞈ hpu hkʼaw Yaˬhoˉvaˬ ve tawˇ hkawˇ htaꞈ awˬ gʼaˇ gʼa jaˇ ve yoˬ. Yaˬhoˉvaˬ yawˇ ve tawˇ hkawˇ chi teˇ hpaˍ ngaˬ hui htaꞈ awˬ gʼaˇ peꞈ laˇ tuˬ haꞈ shaˉ taˍ ve yoˬ. Ngaˬ hui shoꞈ shaꞈ ve gʼa hpuˇ leh nyi ma luˬ jaˇ htaˇ, yawˇ ve tawˇ hkawˇ ngaˬ hui awˬ gʼaˇ cawˬ tuˬ ga laˇ ve yoˬ. (Roˉmaꞈ 15:4) Aˍfaˍriˆkaˆ miˬ guiˬ mvuhˇ nyi kehˬ hpawˇ lo chehˇ ve, awˬ viˉ awˬ nyi yaˇ miˇ teˇ gʼaˇ mvuhˇ haˉ caˇ ve a naˍ hpehꞈ ve tehꞈ tehˆ nyi mawˬ ve yoˬ. Yawˇ nyi ma luˬ jaˇ ve pa taw, teˇ hkui teˇ hkui hawˬ ve yoˬ. Yawˇ kʼoˆ ve, “Iˉsaˍyaˆ liꞈ 26:3 hkʼaw ngaˬ htaꞈ awˬ gʼaˇ peꞈ laˇ jaˇ ve yoˬ. Ngaˬ laiˉ ceuˬ htaꞈ maˇ uˉ peunˍ gʼa ve htawˇ, shoꞈ shaꞈ ve htaꞈ yeunˇ hkanˍ gʼaˇ leh a shu yawˇ awˬ to htaꞈ uˉ peunˍ gʼaˇ tuˬ, Liꞈ hpu awˬ tawn chi Yaˬhoˉvaˬ lehˬ ngaˬ nyi  ma gawˬ lehˍ ve cawˬ tuˬ ga laˇ gʼa ve tehꞈ yonˍ gʼa ve yoˬ.” Nawˬ shoꞈ shaꞈ ve gʼa hpuˇ jaˇ leh dawˇ tuiꞈ gaˇ tuiꞈ htaˇ, Liꞈ hpu awˬ tawn hkʼaˬ ve teˇ tawn nawˬ awˬ gʼaˇ gʼa tuˬ ga laˇ gʼa jaˇ ve le?

19. Awˬ gʼaˇ suhˍ hpawˇ ngaˬ hui htaꞈ daꞈ jaˇ ve dawˇ law kuiˬ aˬ htoꞈ ma law taˍ ve le?

¹⁹ Ngaˬ hui awˬ leh meuˇ ve awˬ yanˇ hkʼaw chehˇ ve yoˬ. Ngaˬ hui chi aꞈ kehˉ leuˉ leh mehˆ gʼuiˬ yaꞈ tuˬ te laˇ ve awˬ lawn gʼa hpuˇ tuˬ yoˬ. Yaꞈ hkʼaˇ, Haˍnaˆ, Daˍviˆ, leh jawˇ mawˇ Heˍsaˍkiˆ ve awˬ lawn hkʼe, Yaˬhoˉvaˬ ngaˬ hui mehˆ gʼuiˬ yaꞈ ve htaꞈ mawˬ leh yawˇ kaꞈ ngaˬ hui geh teˇ geh nyi ma luˬ ve yoˬ. Ngaˬ hui ve mehˆ gʼuiˬ Yaˬhoˉvaˬ awˬ pon awˬ hpfuhˇ hkʼaˆ jaˇ ve yoˬ. Chi htaꞈ pa taw, nyi ma luˬ tuˬ te laˇ ve awˬ lawn ngaˬ hui gʼa hpuˇ htaˇ, ngaˬ hui nyi ma hkʼaw cawˬ ve awˬ ceuˬ bon lawˬ ve hkʼaw Yaˬhoˉvaˬ htaꞈ kʼoˆ piˇ gaˇ ve yoˬ. Hkriꞈ yaˇ awˬ moˍ hkʼaw ve awˬ viˉ awˬ nyi geh gʼa chehˇ leh awˬ gʼaˇ gʼa tuˬ Liꞈ hpu awˬ tawn htaꞈ ca sheˍ. Ngaˬ hui ka tiꞈ yeˬ ve hkʼaw yeunˇ hkanˍ ve kʼo, Yaˬhoˉvaˬ ngaˬ hui htaꞈ laꞈ shawnˍ peꞈ laˇ tuˬ yoˬ tehꞈ yonˍ gʼa ve yoˬ. Yaˬhoˉvaˬ yawˇ ka tiꞈ te taˍ ve hkʼe gʼaꞈ te tuˬ ve awˬ lawn, awˬ gʼaˇ suhˍ hpawˇ ngaˬ hui nyi ma luˬ leh mehˆ gʼuiˬ yaꞈ ve hkʼa peu˗eˬ htaꞈ yawˇ shiˆ baˬ laˇ tuˬ, shu hpfuhˆ laˇ ve maˇ kʼawꞈ cawˬ tcuh laˇ tuˬ, dawˇ tuiꞈ gaˇ tuiꞈ ve maˇ kʼawꞈ cawˬ tcuh laˇ tuˬ ve tehꞈ yawˇ kʼoˆ laˇ taˍ ve yoˬ. (Hpeuꞈ maˍ ve 21:4) Leh oˇ ve teˇ yanˇ gaˬ kʼo, tuꞈ ve hkanˍ ve htaꞈ pa taw, maˇ gʼa hawˬ˗o. Yaꞈ hkʼaˇ, ha lehˬ ve mehˆ gʼuiˬ kʼawꞈ yaꞈ la tuˬ yoˬ.