1. Hkaoˍ monˇ Liꞈ hpu hkʼaw ve awˬ co˗e htaˇ ve chaw awˬ pon a yeˇ hkʼaˬ hkʼe taw uiˍ ve le?

 Hkaoˍ monˇ lehˬ Liꞈ hpu ve awˬ co˗e htaˇ ve chaw hkʼaˬ htaˆ kaꞈ caˇ ve yoˬ. (Awˬ hkuiˉ puiˍ 14:18; Luˉkaꞈ 4:4) Awˬ tehˬ yoˬ, teˇ pawˆ pawˆ kʼo, “hkaoˍ monˇ” kʼoˆ ve tawˇ hkawˇ caˇ tuˬ htaꞈ kʼoˆ gaˇ ve yoˬ. (Liꞈ hpu henˇ tuˬ ve liꞈ Maꞈhtehˍ liꞈ 6:11 leh Liꞈ hpu henˇ tuˬ ve liꞈ Tcuh yaˇ liꞈ 20:7 hkʼaw nyi sheˍ.) Yeˍsuˆ hkaoˍ monˇ htaꞈ yehˇ leh anˇ tuˬ 2 pawˆ te ve yoˬ. Awˬ lawn chi ve lehˬ ngaˬ hui teˇ gʼaˇ le le kaꞈ shiˍ ve yoˬ. (Maꞈhtehˍ 16:9, 10) Teˇ pawˆ lehˬ Yoˇhanˬ liꞈ kaˇ nanˉ uiˍ 6 hkʼaw bvuhꞈ taˍ ve yoˬ. Awˬ lawn chi htaꞈ ngaˬ hui teˇ geh nyi leh awˬ lawn chi ve ngaˬ hui htaꞈ aˬ htoꞈ ma maˍ laˇ gʼa ve kaꞈ teˇ geh nyi tuˬ yoˬ.

2. Aˬ htoꞈ ma pa taw caˇ tuˬ ve awˬ lawn htaꞈ dawˇ haˍ ve le?

² Teˇ pawˆ htaˇ Yeˍsuˆ leh awˬ laꞈ gʼawˇ hui bon maˍ peuˬ hkʼawꞈ nawˉ heuˬ jaˇ ve pa taw, yawˇ hui Gaˍliˍlehˇ gʼuiˬ po choˇ paˉ lo kʼai tuˬ haw loꞈ kʼoˍ ciˇ kʼai ve yoˬ. Hkʼe te leh, Behˇsehˇdaˆ venˇ awˬ paˇ chaw gawˬ kuiˬ lo gʼaˇ ca jehˇ˗e ve yoˬ. (Maˍkuˆ 6:7, 30-32; Luˉkaꞈ 9:10) Maˇ maw hkʼawꞈ nawˉ, chaw laiˉ hinˉ gʼaˇ Yeˍsuˆ leh awˬ laꞈ gʼawˇ hui geh oˇ kaˬ lo laˬ ve yoˬ. Yaꞈ hkʼaˇ, Yeˍsuˆ heuˬ jaˇ ve htawˇ, chaw chi teˇ hpaˍ htaꞈ maˍ piˇ ve yoˬ. Yeˍsuˆ yawˇ hui htaꞈ Gʼuiˬ sha ve mvuhˇ miˬ awˬ lawn maˍ piˇ leh naˬ ve gawˬ ve chaw htaꞈ gu na˗e piˇ ve yoˬ. Mvuhˇ hpeuꞈ la gaˬ leh chaw chi teˇ hpaˍ htaꞈ hkʼaˬ hkʼe te caˇ tuˬ caˍ piˇ gʼa tuˬ, awˬ laꞈ gʼawˇ hui htawˇ dawˇ nawˬ dawˇ cawˬ ve yoˬ. Chaw teˇ hpaˍ caˇ tuˬ yuˬ laˬ ve htawˇ, a ciˉ ceh tiˉ hpehꞈ ve yoˬ hehˉ. Maˇ˗awˍ ve chaw oˇ teˇ taw lo ve hkʼaˆ hkʼaw caˇ tuˬ gʼa ca vuiˬ˗e cawˇ ve yoˬ. (Maꞈhtehˍ 14:15; Yoˇhanˬ 6:4, 5) Hkʼe kʼo, Yeˍsuˆ hkʼaˬ hkʼe te ve le?

YEˍSUˆ HKAOˍ MONˇ HTAꞈ ANˇ TUˬ TE LEH CAˍ PIˇ VE

3. Chaw awˬ moˍ lonˉ Yeˍsuˆ maˍ ve hkawˇ ca na la ve chaw htaꞈ yawˇ hkʼaˬ hkʼe te piˇ ve le? (Awˬ htaꞈ hpawˇ ve awˬ han htaꞈ nyi sheˍ.)

³ Yeˍsuˆ tcuh yaˇ hui htaꞈ kʼoˆ piˇ ve, “yawˇ hui kʼai tuˬ maˇ loˍ. Nawˬ hui yawˇ hui htaꞈ caˍ piˇ˗oˆ.” (Maꞈhtehˍ 14:16) Hawˉ hkʼaˆ ceh tiˉ gʼaw  ve kaꞈ 5,000 gʼaˇ cawˬ ve pa taw, sha ve maˇ heˆ. Leh yaˇ miˇ leh yaˇ ehˉ htaꞈ kaꞈ gʼaw ve kʼo, 15,000 gʼaˇ cawˬ ve yoˬ hehˉ. (Maꞈhtehˍ 14:21) Anˍdrehˍ Yeˍsuˆ htaꞈ kʼoˆ piˇ ve, “choꞈ te taˍ ve hkaoˍ monˇ 5 diˬ leh ngaˇ ehˉ 2 hkeh cawˬ ve yaˇ paˍ ehˉ teˇ gʼaˇ choˬ kaˬ chehˇ taˍ ve yoˬ. Yaꞈ hkʼaˇ, chaw chi ma ve awˬ pon chi teˇ hpaˍ ceh tiˉ aˬ htoꞈ ma kʼoˆ tuˬ cawˬ le?” (Yoˇhanˬ 6:9) Hkaoˍ monˇ lehˬ chaw haˍ awˬ pon leh maˇ˗awˍ ve chaw caˇ tuˬ awˬ pon hpehꞈ ve yoˬ. Ngaˇ kʼo aˉ lehꞈ hkʼawꞈ leh awˬ goˇ te taˍ ve yoˬ. Yaꞈ hkʼaˇ, hkaoˍ monˇ leh ngaˇ chi hkʼe ceh tiˉ ve chaw awˬ meunˍ gʼaˇ awˬ pon hkʼaˬ hkʼe te caˇ lawꞈ tuˬ le?

4. Yoˇhanˬ liꞈ 6:11-13 hkʼaw ngaˬ hui htaꞈ aˬ htoꞈ ma maˍ laˇ ve le? (Awˬ han htaꞈ nyi sheˍ.)

⁴ Mvuhˇ miˬ yaˇ chi teˇ hpaˍ htaꞈ Yeˍsuˆ caˇ tuˬ caˍ piˇ gaˇ ve pa taw, mvuhꞈ nawˉ lehˍ ve awˬ hkʼoˆ awˬ moˍ awˬ moˍ te mui tcuh˗o tehꞈ awˬ laꞈ gʼawˇ hui htaꞈ kʼoˆ piˇ ve yoˬ. (Maˍkuˆ 6:39, 40; Yoˇhanˬ 6:11-13 gʼaw sheˍ.) Liꞈ hpu hkʼaw kʼoˆ ve, hkaoˍ monˇ leh ngaˇ awˬ pon Yeˍsuˆ Yaˬhoˉvaˬ geh bon lawˬ leh awˬ bon uiˍ jaˇ tehꞈ kʼoˆ piˇ ve yoˬ. Yeˍsuˆ chi hkʼe te ve lehˬ, Yaˬhoˉvaˬ caˇ tuˬ gu shehˍ hpaˇ hpehꞈ ve tehꞈ, yawˇ hui htaꞈ mawˬ tcuh gaˇ ve pa taw yoˬ. Leh Yeˍsuˆ awˬ lawn chi ve Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ. Ngaˬ hui Yeˍsuˆ htaꞈ henˇ yuˬ cawˇ ve lehˬ, ngaˬ hui teˇ gʼaˇ tiˉ chehˇ htaˇ, maˇ heˆ leh shu geh chehˇ htaˇ kaꞈ awˍ maˇ caˇ sheˍ htaˇ bon lawˬ cawˇ ve yoˬ. Yeˍsuˆ bon lawˬ peuˬ hkʼawꞈ nawˉ, awˬ laꞈ gʼawˇ hui htaꞈ caˇ tuˬ pehˬ tcuh ve yoˬ. Teˇ gʼaˇ le le hkʼa bvuhˆ gʼa caˇ leh awˬ leuˉ kaꞈ cawˬ ve yoˬ. Peuˬ hkʼawꞈ nawˉ Yeˍsuˆ lehˬ, awˬ laꞈ gʼawˇ hui htaꞈ caˇ tuˬ leuˉ taˍ ve maˇ gʼa luˬ leh kʼawꞈ caˇ gʼa tuˬ, kʼawꞈ gʼawˆ tcuh ve yoˬ. Cawˬ taˍ ve awˬ ceuˬ htaꞈ awˬ hpfuhˇ shiˍ ve lehˬ, Yeˍsuˆ daꞈ jaˇ ve henˇ yuˬ tuˬ hpehꞈ ve yoˬ. Nawˬ awˬ pa awˬ e hpehꞈ ve kʼo, awˬ lawn chi htaꞈ yehˇ leh awˍ maˇ caˇ sheˍ htaˇ, bon lawˬ cawˇ ve, shu htaꞈ haꞈ ve tehꞈ hpeuꞈ maw piˇ ve, leh hkʼehˉ chaw htaꞈ haꞈ yuˬ puiˉ ve chaw hpehꞈ tuˬ nawˬ ve yaˇ htaꞈ maˍ piˇ cawˇ ve yoˬ.

5. Mvuhˇ miˬ yaˇ Yeˍsuˆ te ve awˬ ceuˬ htaꞈ hkʼaˬ hkʼe dawˇ ve le? Leh yawˇ aˬ htoꞈ ma te ve le?

 ⁵ Mvuhˇ miˬ yaˇ chi teˇ hpaˍ Yeˍsuˆ maˍ ve awˬ hkʼaˇ htaꞈ dawˇ cawˇ jaˇ leh yawˇ anˇ tuˬ te ve htaꞈ kaꞈ dawˇ cawˇ jaˇ ve yoˬ. Gʼuiˬ sha lehˬ awˬ meꞈ awˬ hponˇ cawˬ jaˇ ve tcuh kaˍ paˍ teˇ gʼaˇ htaꞈ leuˆ teh tuˬ yoˬ tehꞈ, Moˉseˍ kʼoˆ jaw ve htaꞈ yawˇ hui shiˍ ve yoˬ. Hkʼe te leh, yawˇ hui dawˇ ve, ‘Moˉseˍ kʼoˆ ve chaw oˇ ve teˇ gʼaˇ lehˬ Yeˍsuˆ hpehꞈ ve yoˬ laˇ?’ (Bon maˍ ve 18:15-18) Hpehꞈ ve yoˬ kʼo, yawˇ daꞈ jaˇ ve uˉ peunˍ shehˍ hpaˇ hpehꞈ leh Iˉsaˍreˍlaˆ chaw hkʼa peu˗eˬ caˇ tuˬ dawˬ tuˬ hkʼa biˇ cawˬ ve yoˬ. Chi htaꞈ pa taw, yawˇ hui ‘Yeˍsuˆ htaꞈ hkunˉ hawˉ hkanˇ nyiˉ te tcuh˗a tehꞈ dawˇ ve yoˬ.’ (Yoˇhanˬ 6:14, 15) Yeˍsuˆ yawˇ hui kʼoˆ ve hkʼe gʼaꞈ te ve kʼo, Roˉmaꞈ uˉ peunˍ ve awˬ hawˉ lo Yuˇdaꞈ chaw ve mvuhˇ miˬ uˉ peunˍ ve awˬ liˇ htaꞈ caˉ daꞈ ve yawˇ ga piˇ chehˇ ve yoˬ. Yaꞈ hkʼaˇ, Yeˍsuˆ chi hkʼe maˇ te. Liꞈ hpu hkʼaw kʼoˆ ve, Yeˍsuˆ “yawˇ teˇ gʼaˇ tiˉ hkʼaw pui hkʼoˆ lo kʼawꞈ taˆ˗e ve yoˬ.” Chi htaꞈ pa taw, shu Yeˍsuˆ htaꞈ nyiˉ piˇ ve htawˇ, Yeˍsuˆ mvuhˇ miˬ uˉ peunˍ ve htaꞈ maˇ caˉ daꞈ ve yoˬ. Yawˇ ngaˬ hui awˬ pon daꞈ jaˇ ve henˇ yuˬ tuˬ hpehꞈ ve yoˬ.

6. Ngaˬ hui Yeˍsuˆ htaꞈ aˬ htoꞈ ma ve awˬ lawn henˇ yuˬ gʼa ve le? (Awˬ han htaꞈ nyi sheˍ.)

⁶ Ngaˬ hui anˇ tuˬ te leh hkaoˍ monˇ caˍ laˇ tuˬ, chaw naˬ htaꞈ gu na˗e laˇ tuˬ, maˇ heˆ leh jawˇ mawˇ te tcuh laˇ tuˬ, chaw teˇ gʼaˇ kaꞈ maˇ lawˬ laˇ jaw. Yaꞈ hkʼaˇ, chaw teˇ hpaˍ hpaˍ ngaˬ hui mehˇ ca keu tuˬ jehˬ laˇ leh, mvuhˇ miˬ shoꞈ shaꞈ ve htaꞈ gu laˇ gʼa ve tehꞈ dawˇ ve chaw htaꞈ awˬ gʼaˇ piˇ tcuh gaˇ ve yoˬ. Yaꞈ hkʼaˇ, ngaˬ hui mvuhˇ miˬ uˉ peunˍ ve htaꞈ maˇ caˉ daꞈ tuˬ, Yeˍsuˆ lehˬ daꞈ jaˇ ve henˇ yuˬ tuˬ hpehꞈ ve yoˬ. Yeˍsuˆ kʼoˆ ve, “ngaˬ hkunˉ hawˉ hkanˇ te kuiˬ  lehˬ, chi miˬ guiˬ htaꞈ maˇ caˉ daꞈ.” (Yoˇhanˬ 17:14; 18:36) Chi beuꞈ teˇ co˗e ngaˬ hui Hkriꞈ yaˇ hpehꞈ ve chaw kaꞈ dawˇ ve, leh te ve, Yeˍsuˆ hkʼa shuˍ Gʼuiˬ sha ve mvuhˇ miˬ htaꞈ awˉ lawˉ teh cawˇ ve yoˬ. Awˬ lawn chi ve htaꞈ caˉ daꞈ ve ngaˬ hui chaw yaˇ htaꞈ kʼoˆ piˇ leh, Gʼuiˬ sha ve mvuhˇ miˬ uˉ peunˍ la tuˬ kaꞈ bon lawˬ cawˇ ve yoˬ. (Maꞈhtehˍ 6:10) Yeˍsuˆ hkaoˍ monˇ htaꞈ anˇ tuˬ te leh caˍ piˇ ve awˬ lawn htaꞈ kʼawꞈ dawˇ nyi sheˍ. Leh ngaˬ hui htaꞈ aˬ htoꞈ ma maˍ laˇ gʼa ve teˇ geh kʼawꞈ nyi sheˍ.

“HKAOˍ MONˇ HTAꞈ ANˇ TUˬ TE MAˍ VE AWˬ LAWN”

7. Yeˍsuˆ aˬ htoꞈ ma te ve le? Leh tcuh yaˇ hui hkʼaˬ hkʼe dawˇ ve le? (Yoˇhanˬ 6:16-20)

⁷ Hkaoˍ monˇ htaꞈ anˇ tuˬ te leh caˍ piˇ peuˬ hkʼawꞈ nawˉ, Yeˍsuˆ awˬ laꞈ gʼawˇ htaꞈ haw loꞈ kʼoˍ ciˇ leh Kaˍpeˍneˍonˍ venˇ lo kʼai˗a yoˬ tehꞈ kʼoˆ piˇ ve yoˬ. Chaw awˬ moˍ lonˉ Yeˍsuˆ htaꞈ hkunˉ hawˉ hkanˇ te tcuh gaˇ ve pa taw, yawˇ hkʼaw hkʼoˆ lo hpaw˗e ve yoˬ. (Yoˇhanˬ 6:16-20 gʼaw sheˍ.) Awˬ laꞈ gʼawˇ hui Gaˍliˍlehˇ gʼuiˬ po lo haw lawꞈ kʼoˍ gʼaꞈ kʼai chehˇ htaˇ, mvuhˇ yeˬ mvuhˇ haw lonˉ laˬ ve pa taw, gʼuiˬ baˇ hehnˇ jaˇ ve yoˬ. Leh Yeˍsuˆ yawˇ hui geh iˉ kaˆ hkʼoˆ lo juˇ kʼai ve yoˬ. Leh tcuh yaˇ Peˍtruˆ iˉ kaˆ hkʼoˆ yawˇ geh juˇ laˬ tuˬ kaꞈ kʼoˆ piˇ ve yoˬ. (Maꞈhtehˍ 14:22-31) Yeˍsuˆ haw loꞈ kʼoˍ hkʼaw loꞈ la htaˇ, mvuhˇ haw gawˬ lehˍ kʼai ve yoˬ. Awˬ laꞈ gʼawˇ hui ha lehˬ jaˇ leh kʼoˆ ve, “nawˬ lehˬ awˬ tehˬ awˬ na Gʼuiˬ sha ve Yaˇ hpu yoˬ.” a (Maꞈhtehˍ 14:33) Chi awˬ gʼuˇ suhˍ htaˇ, awˬ laꞈ gʼawˇ hui Yeˍsuˆ hkaoˍ monˇ htaꞈ caˉ daꞈ ve anˇ tuˬ te ve gʼa mawˬ jaw ve htawˇ, chi teˇ hkui yawˇ hui chi hkʼe kʼoˆ ve yoˬ. Maˍkuˆ kʼoˆ ve, ‘tcuh yaˇ hui anˇ jaˇ tehˬ tehˬ ve yoˬ. Awˬ lawn kʼo, hkaoˍ monˇ htaꞈ anˇ tuˬ te maˍ ve awˬ lawn yawˇ hui maˇ dawˇ shiˍ maˇ dawˇ pawnˍ. Yawˇ hui nyi ma kaꞈ heh chehˇ sheˍ ve yoˬ.’ (Maˍkuˆ 6:50-52) Awˬ tehˬ yoˬ, Yaˬhoˉvaˬ Yeˍsuˆ htaꞈ kanˇ paˆ piˇ leh chaw yaˇ awˬ meunˍ awˬ meunˍ gʼaˇ htaꞈ caˍ piˇ ve, tcuh yaˇ hui maˇ na gʼa sheˍ ve yoˬ. Yaꞈ hkʼaˇ, peuˬ hkʼawꞈ nawˉ, Yeˍsuˆ hkaoˍ monˇ htaꞈ caˉ daꞈ ve anˇ tuˬ te ve teˇ pawˆ kʼawꞈ kʼoˆ sheˍ ve yoˬ. Yeˍsuˆ aˬ htoꞈ ma kʼawꞈ kʼoˆ ve ngaˬ hui teˇ geh nyi sheˍ. Leh awˬ lawn chi ngaˬ hui htaꞈ aˬ htoꞈ ma maˍ laˇ gʼa ve kaꞈ teˇ geh nyi sheˍ.

8-9. Aˬ htoꞈ ma te chaw awˬ moˍ lonˉ Yeˍsuˆ htaꞈ gʼaꞈ ca ve le? (Yoˇhanˬ 6:26, 27)

⁸ Shawˉ pawˍ gaˬ leh chaw awˬ moˍ lonˉ Yeˍsuˆ hkaoˍ monˇ htaꞈ anˇ tuˬ te leh caˍ piˇ jaw kuiˬ awˬ ti lo kʼawꞈ laˬ ve yoˬ. Yaꞈ hkʼaˇ, Yeˍsuˆ leh tcuh yaˇ hui maˇ chehˇ˗oˬ. Hkʼe te leh, chaw chi teˇ hpaˍ Yeˍsuˆ geh Kaˍpeˍneˍonˍ venˇ lo kʼai tuˬ Tiˍbeˍriˆ venˇ lo haw loꞈ kʼoˍ ciˇ ve yoˬ. (Yoˇhanˬ 6:22-24) Yawˇ hui chi hkʼe te ve lehˬ, Gʼuiˬ sha ve mvuhˇ miˬ awˬ lawn htaꞈ caˉ daꞈ ve shiˍ gaˇ ve laˇ? Maˇ heˆ. Yawˇ hui hkaoˍ monˇ htaꞈ ceh tiˉ caˇ gaˇ ve yoˬ. Chi ngaˬ hui hkʼaˬ hkʼe te shiˍ gʼa ve le?

⁹ Chaw awˬ moˍ lonˉ Kaˍpeˍneˍonˍ venˇ lo Yeˍsuˆ geh ca mawˬ daꞈ˗e htaˇ, yawˇ hui caˇ tuˬ htaꞈ ceh tiˉ a yeˇ yuˬ ve tehꞈ, Yeˍsuˆ hteˇ˗ehˬ kʼoˆ piˇ ve yoˬ. Yeˍsuˆ yawˇ hui htaꞈ kʼoˆ piˇ ve, “hkaoˍ monˇ hkʼa bvuhˆ gʼa caˇ ve pa taw ceh nawˬ hui ngaˬ htaꞈ ca ve yoˬ.” Yawˇ hui lehˬ, “luˬ puiˉ sheˆ puiˉ ve caˇ tuˬ” htaꞈ ceh a yeˇ yuˬ ve yoˬ. Chi htaꞈ pa taw, Yeˍsuˆ yawˇ hui htaꞈ beˆ maˍ piˇ ve, “caˇ tuˬ oˇ ve lehˬ, co tiꞈ ha tiꞈ gʼa tuˬ awˬ pon yeˬ ve caˇ tuˬ dawˬ tuˬ hpehꞈ ve yoˬ.” (Yoˇhanˬ 6:26, 27 gʼaw sheˍ.) Caˇ tuˬ co co taiˍ taiˍ a shaꞈ peꞈ laˇ gʼa ve tehꞈ chaw awˬ moˍ lonˉ gʼa kaˇ htaˇ, yawˇ hui anˇ jaˇ ve yoˬ. Co co taiˍ taiˍ a shaꞈ peꞈ laˇ gʼa tuˬ hkʼaˬ hkʼe ve caˇ tuˬ le? Leh hkʼaˬ kaˬ lo ca gʼa tuˬ le?

10. Yeˍsuˆ awˬ hkʼaˇ suh gʼaꞈ yuˬ ve chaw awˬ moˍ lonˉ “co tiꞈ ha tiꞈ” gʼa tuˬ hkʼaˬ hkʼe gʼa te cawˇ ve le?

¹⁰ Chaw awˬ moˍ lonˉ oˇ ve lehˬ, caˇ tuˬ co co taiˍ taiˍ ve a shaꞈ gʼa tuˬ, yawˇ hui teˇ ceuˬ ceuˬ gʼa te cawˇ ve tehꞈ dawˇ ve yoˬ. Yawˇ hui dawˇ ve, Moˉseˍ ve awˬ liˇ tawˇ hkawˇ hkʼaw kʼoˆ taˍ ve hkʼe gʼa gʼaꞈ te ve yoˬ. Yaꞈ hkʼaˇ, Yeˍsuˆ yawˇ hui htaꞈ kʼoˆ piˇ ve, “Gʼuiˬ sha ve kanˉ te ve teˇ ceuˬ lehˬ, yawˇ peu laˇ ve teˇ gʼaˇ htaꞈ yonˍ ve teˇ ceuˬ hpehꞈ ve yoˬ.” (Yoˇhanˬ 6:28, 29) Chi awˬ gʼuˇ suhˍ htaˇ Yeˍsuˆ kʼoˆ jaw ve, “co tiꞈ ha tiꞈ” gʼa tuˬ Gʼuiˬ sha peu laˇ ve htaꞈ yonˍ ve tehꞈ hpeuꞈ maw piˇ ve a yeˇ uiˍ jaˇ ve yoˬ. (Yoˇhanˬ 3:16-18, 36) Leh peuˬ hkʼawꞈ nawˉ ngaˬ hui co co  taiˍ taiˍ ve a shaꞈ gʼa tuˬ hkʼaˬ hkʼe gʼa te cawˇ htaꞈ Yeˍsuˆ kʼoˆ sheˍ ve yoˬ.—Yoˇhanˬ 17:3.

11. Yuˇdaꞈ chaw yawˇ hui hkaoˍ monˇ gʼa caˇ tuˬ htaꞈ ceh tiˉ a yeˇ yuˬ ve tehꞈ hkʼaˬ hkʼe hpeuꞈ maw laˇ ve le? (Chiˇ mvuh ve 78:24, 25)

¹¹ Co tiꞈ ha ti gʼa tuˬ gʼa hpeuꞈ maw piˇ ve tehꞈ Yuˇdaꞈ chaw Yeˍsuˆ maˍ piˇ ve tawˇ hkawˇ htaꞈ a yeˇ maˇ yuˬ ve yoˬ. Yawˇ hui Yeˍsuˆ htaꞈ na piˇ ve, “ngaˬ hui gʼa mawˬ leh nawˬ htaꞈ gʼa yonˍ tuˬ, nawˬ aˬ htoꞈ ma awˬ heˆ te maˍ laˇ ve le?” (Yoˇhanˬ 6:30) Leh yawˇ hui kʼoˆ ve, Moˉseˍ ve awˬ co˗e htaˇ, yawˇ hui ve awˬ puˍ awˬ pi lonˉ Maˍnaˆ shiˍ htaꞈ gʼa caˇ ve yoˬ. Chi ve lehˬ hkaoˍ monˇ htaꞈ tehˆ daꞈ gʼa ve yoˬ hehˉ. (Neˍhaˍmiˆ 9:15; Chiˇ mvuh ve 78:24, 25 gʼaw sheˍ.) Yawˇ hui hkaoˍ monˇ htaꞈ ceh tiˉ gʼa caˇ tuˬ dawˇ nyi ve tehꞈ hkʼa tawˍ lehˆ gʼa mawˬ ve yoˬ. Chi hkʼoˆ kaꞈ, Yeˍsuˆ “mvuhˇ naw ma ve hkaoˍ monˇ” htaꞈ kʼoˆ htaˇ, Maˍnaˆ shiˍ aꞈ kehˉ daꞈ jaˇ ve yoˬ. Chi aˬ htoꞈ ma htaꞈ kʼoˆ gaˇ ve yawˇ hui Yeˍsuˆ htaꞈ maˇ gʼa na nyi piˇ. (Yoˇhanˬ 6:32) Awˬ suhˍ awˬ shaˍ hpawˇ yawˇ hui loˍ ve htaꞈ ceh tiˉ dawˇ nyi ve pa taw, Yeˍsuˆ coˇ caˇ leh yawˇ hui htaꞈ awˬ tehˬ ve maˍ piˇ ve a yeˇ maˇ yuˬ ve yoˬ. Awˬ lawn chi ngaˬ hui htaꞈ aˬ htoꞈ ma maˍ laˇ ve le?

NGAˬ HUI AWˬ PON A YEˇ UIˍ VE AWˬ CEUˬ

12. Yeˍsuˆ kʼoˆ ve a yeˇ uiˍ jaˇ ve awˬ ceuˬ aˬ htoꞈ ma le?

¹² Yoˇhanˬ liꞈ kaˇ nanˉ uiˍ 6 hkʼaw a yeˇ uiˍ jaˇ ve henˇ yuˬ tuˬ teˇ ceuˬ lehˬ, ngaˬ hui awˬ pon Yaˬhoˉvaˬ ve hkawˇ na yuˬ leh yawˇ geh meuˆ daꞈ ve a yeˇ uiˍ jaˇ ve awˬ ceuˬ hpehꞈ ve yoˬ. Yeˍsuˆ Saˍtanˍ beˬ piˇ ve htaꞈ tawˍ baˬ htaˇ awˬ lawn chi htaꞈ kʼoˆ ve yoˬ. (Maꞈhtehˍ 4:3, 4) Leh Yeˍsuˆ hkʼaw pui hkʼoˆ lo bon maˍ htaˇ, Gʼuiˬ sha htaꞈ gʼaˇ va cawˇ ve tehꞈ shiˍ ve chaw hui gʼa ha lehˬ ve yoˬ tehꞈ Yeˍsuˆ kʼoˆ ve yoˬ. (Maꞈhtehˍ 5:3) Chi htaꞈ pa taw, ngaˬ hui a shu yawˇ awˬ to htaꞈ na nyi cawˇ ve, ‘a shu yawˇ awˬ to loˍ ve aꞈ kehˉ Yaˬhoˉvaˬ geh meuˆ daꞈ ve a yeˇ uiˍ jaˇ ve tehꞈ ngaˬ ve a shaꞈ teꞈ hkʼaˇ hpeuꞈ maw piˇ˗aw laˇ?’

13. (a) Ngaˬ hui caˇ ve dawˬ ve htaꞈ ha lehˬ ve aˬ htoꞈ ma te maˇ yaꞈ ve le? (b) Pawˇluꞈ aˬ htoꞈ ma awˬ lawn shaˍ tiꞈ peꞈ laˇ ve le? (1 Kawˇrenˍhtuˆ 10:6, 7, 11)

¹³ Ngaˬ hui loˍ ve awˬ ceuˬ cawˬ tuˬ bon lawˬ ve maˇ yaꞈ. Leh cawˬ taˍ ve awˬ ceuˬ htaꞈ ha lehˬ ve kaꞈ maˇ yaꞈ. (Luˉkaꞈ 11:3) Liꞈ hpu hkʼaw kʼoˆ ve, “chaw yaˇ te keunˍ te cawˇ jaˇ ve kanˉ lehˬ, a shu yawˇ ca gʼa taˍ ve mawˇ jeˬ htaꞈ yehˇ leh ha lehˬ ha kʼa caˇ chehˇ dawˬ chehˇ cawˇ ve yoˬ.” Awˬ lawn kʼo, “chi kaꞈ Gʼuiˬ sha geh laˬ ve htaꞈ ngaˬ hui shiˍ ve yoˬ.” (Cuˇ yiˍ piˇ ve 2:24; 8:15; Yaˍkoˆ 1:17) Chi hkʼe hpehꞈ ve htawˇ, awˬ lawn chi htaꞈ caˉ daꞈ ve ngaˬ hui keunˍ lawꞈ cawˇ lawꞈ gʼa dawˇ nyi cawˇ ve yoˬ. Yeˍruˆsaˍlehnˍ venˇ leh bon yehˬ lonˉ htaꞈ te luˬ paˇ neˇ la yoˬ te htaˇ, a shaꞈ teꞈ chehˇ ve Hkriꞈ yaˇ htaꞈ liꞈ bvuhꞈ piˇ ve hkʼaw tcuh yaˇ Pawˇluꞈ awˬ lawn chi htaꞈ kʼoˆ ve yoˬ. Oˇ htaˇ teˇ co˗e Iˉsaˍreˍlaˆ chaw htaꞈ hpehꞈ la ve awˬ lawn kaꞈ yawˇ kʼoˆ ve yoˬ. Iˉsaˍreˍlaˆ chaw hui Siˉnaˆ hkʼaw hkuiˉ pui lo chehˇ htaˇ ve awˬ lawn kaꞈ yawˇ kʼoˆ sheˍ ve yoˬ. Yawˇ Hkriꞈ yaˇ htaꞈ shaˍ tiꞈ piˇ ve, ‘Iˉsaˍreˍlaˆ chaw haiˬ ve awˬ ceuˬ teˇ hpaˍ htaꞈ sheˉ lai ve hkʼe taˇ te.’ (1 Kawˇrenˍhtuˆ 10:6, 7, 11 gʼaw sheˍ.) Oˇ ve teˇ yanˇ Yaˬhoˉvaˬ anˇ tuˬ te leh Iˉsaˍreˍlaˆ chaw hui htaꞈ caˇ tuˬ gu piˇ ve yoˬ. Yaꞈ hkʼaˇ, yawˇ hui a shu yawˇ awˬ pon tiˉ dawˇ nyi leh caˇ tuˬ htaꞈ ceh tiˉ dawˇ nyi ve yoˬ. Hkʼe te leh, caˇ tuˬ oˇ ve teˇ hpaˍ, yawˇ hui awˬ pon “haiˬ ve awˬ ceuˬ” hpehꞈ la ve yoˬ. (Heh puiˉ hkʼaw 11:4-6, 31-34) Yawˇ hui shi nuˇ shaˉ hoꞈ te leh oˉ kʼoˍ pui htaˇ, yawˇ hui caˇ ve dawˬ ve leh ha lehˬ ha kʼa hpawehˇ te chehˇ ve yoˬ. (Tawˆ k’ai ve 32:4-6) 70 hkʼawꞈ C.E. htaˇ, Yeˍruˆsaˍlehnˍ venˇ leh bon yehˬ lonˉ htaꞈ te luˬ la paˇ neˇ la ve awˬ yanˇ hkʼaw a shaꞈ teꞈ chehˇ ve chaw Hkriꞈ yaˇ htaꞈ shaˍ tiꞈ piˇ tuˬ, Pawˇluꞈ awˬ lawn oˇ ve htaꞈ kʼoˆ maˍ piˇ ve yoˬ. Leh chi teˇ hkui ngaˬ hui kaꞈ awˬ leh meuˇ ve awˬ yanˇ hkʼaw chehˇ taˍ ve yoˬ. Hkʼe te leh, Pawˇluꞈ shaˍ tiꞈ peꞈ laˇ ve htaꞈ ngaˬ hui a yeˇ gʼa yuˬ cawˇ ve yoˬ.

14. Caˇ tuˬ htaꞈ kʼoˆ htaˇ miˬ guiˬ awˬ suhˉ hkʼaw ngaˬ hui aˬ htoꞈ ma htaꞈ gʼa mawˬ tuˬ dawˇ law taˍ gʼa ve le?

¹⁴ Yeˍsuˆ ngaˬ hui htaꞈ bon lawˬ tuˬ maˍ laˇ htaˇ yawˇ kʼoˆ ve, “yaꞈ nyi loˍ ve caˇ tuˬ dawˬ tuˬ teˇ hpaˍ, yaꞈ nyi ngaˬ hui htaꞈ peꞈ laˇ˗oˆ.” Leh bon lawˬ tuˬ Yeˍsuˆ kʼawꞈ maˍ laˇ sheˍ ve, “mvuhˇ naw ma hkʼoˆ lo nawˬ ve a loˍ biˇ ve hkʼe, miˬ guiˬ hkʼoˆ htaꞈ htawˇ biˇ la piˇ˗oˆ.” (Maꞈhtehˍ 6:9-11) Chi nawˬ aˬ htoꞈ ma htaꞈ dawˇ mawˬ tuˬ te laˇ ve le? Liꞈ hpu hkʼaw kʼoˆ ve,  miˬ guiˬ awˬ suhˉ hkʼaw Yaˬhoˉvaˬ caˇ tuˬ dawˬ tuˬ hkʼa biˇ cawˬ tcuh gaˇ ve yoˬ. Iˉsaˍyaˆ liꞈ 25:6-8 hkʼaw kʼoˆ ve, chaw teˇ gʼaˇ le le mehˬ jaˇ ve caˇ tuˬ gʼa caˇ tuˬ yoˬ. Leh Chiˇ mvuh ve liꞈ 72:16 hkʼaw kʼoˆ sheˍ ve, ‘mvuhˇ miˬ awˬ hkʼaw lo caˬ shiˍ hkʼa biˇ cawˬ la piˇ˗oˆ. Hkʼaw pui ehˉ teˇ hpaˍ awˬ hkʼoˆ lo caˬ yeˬ hkʼa biˇ cawˬ la piˇ˗oˆ.’ Nawˬ dawˇ cawˇ ve caˇ tuˬ mehˬ mehˬ ve te leh awˬ suhˉ awˬ suhˉ te tuˬ ve htaꞈ nawˬ law chehˇ ve maˇ heˆ laˇ? Chi hkʼoˆ kaꞈ, a pehˉ meuˇ hko te leh nawˬ te taˍ ve awˬ shiˍ htaꞈ gʼa caˇ ve ha lehˬ jaˇ tuˬ yoˬ. (Iˉsaˍyaˆ 65:21, 22) Oˇ ve teˇ yanˇ gaˬ kʼo, teˇ gʼaˇ le le awˬ ceuˬ chi ve teˇ hpaˍ htaꞈ ha lehˬ gʼa ve yoˬ.

15. Kʼawꞈ teꞈ tu la ve chaw aˬ htoꞈ ma gʼa henˇ tuˬ ve le? (Yoˇhanˬ 6:35)

¹⁵ Yoˇhanˬ liꞈ 6:35 gʼaw sheˍ. Yeˍsuˆ ngaˇ leh hkaoˍ monˇ htaꞈ anˇ tuˬ te leh Yuˇdaꞈ chaw gʼa caˇ ve htaꞈ dawˇ nyi sheˍ. Yawˇ hui teˇ hpaˍ hpaˍ kʼawꞈ teꞈ tu la ve htaꞈ nawˬ gʼa mawˬ daꞈ tuˬ yoˬ hehˉ. Yawˇ hui a shaꞈ teꞈ chehˇ htaˇ, yonˍ ve tehꞈ maˇ hpeuꞈ maw piˇ sheˍ ve htawˇ, yawˇ hui htaꞈ kʼawꞈ teꞈ tu la piˇ tuˬ yoˬ hehˉ. (Yoˇhanˬ 5:28, 29) Yeˍsuˆ kʼoˆ ve, ‘ngaˬ lehˬ a shaꞈ teꞈ piˇ lawˬ ve hkaoˍmonˇ hpehꞈ ve yoˬ. Ngaˬ geh laˬ ve chaw lehˬ, maˇ kʼawꞈ meuꞈ˗o.’ Chi ve htaꞈ Yeˍsuˆ kʼoˆ htaˇ, hkʼaˬ hkʼe kʼoˆ gaˇ ve yawˇ hui gʼa kʼawꞈ henˇ tuˬ yoˬ. Yeˍsuˆ htaiˍ hkʼawꞈ laˇ ve htaꞈ yawˇ hui yonˍ ve awˬ hkʼaw lo gʼa henˇ cawˇ leh, Yeˍsuˆ yawˇ hui awˬ pon a shaꞈ tanˇ laˇ ve kaꞈ gʼa yonˍ cawˇ ve yoˬ. Oˇ ve teˇ yanˇ kʼawꞈ teꞈ tu la ve chaw leh miˬ guiˬ awˬ suhˉ hkʼaw paw la ve yaˇ ehˉ htaꞈ Liꞈ hpu maˍ piˇ tuˬ yoˬ. Chaw chi teˇ hpaˍ Yaˬhoˉvaˬ geh meuˆ daꞈ tuˬ ngaˬ hui gʼa ga piˇ ve lehˬ, hkaoˍ monˇ gʼa caˇ ve leh miˬ guiˬ awˬ suhˉ hkʼaw mehˬ jaˇ ve caˇ tuˬ gʼa caˇ ve aꞈ kehˉ ngaˬ hui ha lehˬ jaˇ tuˬ te laˇ ve yoˬ.

16. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

¹⁶ Chi teˇ hkui Yoˇhanˬ liꞈ kaˇ nanˉ uiˍ 6 htaꞈ caˉ daꞈ ve teˇ lawn lawn ngaˬ hui gʼa henˇ˗oˬ. Yaꞈ hkʼaˇ, “co tiꞈ ha tiꞈ” gʼa tuˬ ve htaꞈ caˉ daꞈ ve Yeˍsuˆ maˍ laˇ ve laiˉ lawn cawˬ sheˍ ve yoˬ. Yuˇdaꞈ chaw oˇ ve teˇ hpaˍ Yeˍsuˆ kʼoˆ ve awˬ ceuˬ htaꞈ a yeˇ yuˬ cawˇ leh ngaˬ hui teˇ gʼaˇ le le kaꞈ a yeˇ yuˬ cawˇ ve yoˬ. Yoˇhanˬ liꞈ kaˇ nanˉ uiˍ 6 htaꞈ caˉ daꞈ ve awˬ lawn ngaˬ hui gʼuˇ suhˍ teˇ lawn hkʼaw teˇ geh kʼawꞈ henˇ tuˬ yoˬ.