Chi teˇ hkʼawꞈ ve Shaw nyi kuiˬ Taꞈ yehˬ nawˬ hkʼa dehꞈ gʼaw nyi˗oˬ laˇ? Awˬ hawˉ lo ve na hkawˇ chi teˇ hpaˍ htaꞈ nawˬ hkʼawꞈ laˇ sheˍ:

Yaˬhoˉvaˬ awˬ viˉ awˬ nyi yaˇ miˇ htaꞈ daꞈ ve te piˇ˗aw laˇ?

Yaˬhoˉvaˬ awˬ viˉ awˬ nyi yaˇ miˇ htaꞈ daꞈ ve te piˇ leh yaˇ miˇ aꞈ kehˉ hawˉ hkʼaˆ htaꞈ haꞈ ve maˇ heˆ. Yawˇ yaˇ miˇ ve tawˇ hkawˇ htaꞈ kaꞈ na ve yoˬ. Yaˇ miˇ aˬ htoꞈ ma htaꞈ dawˇ haˍ ve Gʼuiˬ sha a yeˇ yuˬ piˇ ve yoˬ. Gʼuiˬ sha yaˇ miˇ htaꞈ yonˍ gʼa leh awˬ vuiˬ piˇ ve yoˬ.—w24.01, liꞈ mehˆ hpfuhˇ 15-16.

Eˇfeˇsuꞈ liꞈ 5:7 hkʼaw “yawˇ hui htaꞈ awˬ chawˇ taˇ te” tehꞈ beˆ maˍ laˇ taˍ ve htaꞈ ngaˬ hui hkʼaˬ hkʼe yuˬ yehˇ gʼa tuˬ le?

Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te tuˬ awˬ gʼaˇ maˇ peꞈ laˇ ve chaw geh awˬ chawˇ taˇ te tehꞈ tcuh yaˇ Pawˇluꞈ shaˍ tiꞈ peꞈ laˇ ve yoˬ. Beˆ maˍ laˇ hkawˇ chi ve kʼoˆ gaˇ ve lehˬ, mawˬ daꞈ gʼa ve awˬ chawˇ htaꞈ ceh tiˉ maˇ heˆ. I˗meh (e˗mail) hkʼaw ve awˬ chawˇ htaꞈ kaꞈ kʼoˆ gaˇ ve yoˬ.—w24.03, liꞈ mehˆ hpfuhˇ 22-23.

Heˍ laˇ ve hkʼaˬ hkʼe ve htaꞈ ngaˬ hui shaˍ tiꞈ gʼa te cawˇ ve le?

Awˬ viˉ awˬ nyi ngaˬ hui htaꞈ awˬ gʼaˇ peꞈ laˇ gaˇ ve pa taw, awˬ lawn oˇ ve awˬ tehˬ hpehꞈ ve laˇ tehꞈ hkʼa dehꞈ maˇ chaˬ nyi sheˍ ve kaꞈ ngaˬ hui htaꞈ feu laˇ ve yoˬ. Yaˬhoˉvaˬ ve chaw htaꞈ caˉ daꞈ ve maˇ heˆ ve awˬ lawn I˗meh hkʼaw kʼoˆ ve, chi ngaˬ hui maˇ shiˍ daꞈ ve chaw feu laˇ ve yoˬ. Leh Gʼuiˬ sha htaꞈ hpfuhˆ ve chaw lehˬ ngaˬ hui hto toˇ˗e htaˇ nyi ma pfuhˇ ve chaw hkʼe te ve yoˬ.—w24.04, liꞈ mehˆ hpfuhˇ 12.

Yaˬhoˉvaˬ suhˉ jehˬ piˇ ve, Jawˇ mawˇ Shawˉlaꞈmonˍ htaꞈ caˉ daꞈ ve, Sawˉdonˍ leh Gawˇmawˇraꞈ venˇ hkʼaw te luˬ piˇ ve chaw htaꞈ caˉ daꞈ ve, miˬ guiˬ hkʼoˆ lo iˉ kaˆ htonˍ htaˇ suh˗e ve chaw htaꞈ caˉ daꞈ ve ngaˬ hui shiˍ ve leh maˇ shiˍ ve aˬ htoꞈ ma cawˬ ve le?

Yaˬhoˉvaˬ chaw oˇ ve teˇ hpaˍ htaꞈ co co taiˍ taiˍ suhˉ jehˬ cheˆ piˇ ve hehˉ laˇ ngaˬ hui maˇ shiˍ. Yaꞈ hkʼaˇ, ngaˬ hui shiˍ ve awˬ ceuˬ lehˬ, Yaˬhoˉvaˬ teˇ ceuˬ le le shiˍ leh yawˇ ha kʼaˉ puiˉ jaˇ ve yoˬ.—w24.05, liꞈ mehˆ hpfuhˇ 3-4.

Yaˬhoˉvaˬ lehˬ yeˬ jaˇ ve haˉ hpawˇ hkʼe hpehꞈ ve ngaˬ hui aˬ htoꞈ ma awˬ lawn htaꞈ yonˍ gʼa tuˬ te laˇ ve le? (Bon maˍ ve 32:4)

Yaˬhoˉvaˬ lehˬ ngaˬ hui ve vaꞈ taˍ kuiˬ hpehꞈ ve yoˬ. Yaˬhoˉvaˬ ka tiꞈ yeˬ jaˇ ve, yawˇ ve te hkʼaˇ dawˇ hkʼaˇ maˇ pa jaw ve, leh yawˇ dawˇ law taˍ ve kaꞈ maˇ pa jaw ve pa taw, ngaˬ hui gʼaˇ va gʼa ve yoˬ.—w24.06, liꞈ mehˆ hpfuhˇ 26-28.

Nawˬ Hkriꞈ yaˇ awˬ moˍ teˇ kaˬ lo ca chehˇ˗e htaˇ, pa gʼa tuˬ aˬ htoꞈ ma ga laˇ ve le?

Nawˬ Yaˬhoˉvaˬ htaꞈ gʼaˇ va ve kʼo, oˇ htaˇ teˇ co˗e yawˇ ve chaw htaꞈ ga piˇ jaw ve hkʼe, nawˬ htaꞈ kaꞈ ga laˇ tuˬ yoˬ. Nawˬ chehˇ jaw ve Hkriꞈ yaˇ awˬ moˍ hkʼaw ve awˬ viˉ awˬ nyi leh nawˬ ca chehˇ˗e ve Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ taˇ tehˆ daꞈ. Nawˬ chehˇ ve awˬ viˉ awˬ nyi geh awˬ chawˇ te leh laiˉ ceuˬ teˇ geh te sheˍ. Leh awˬ chawˇ awˬ suhˉ ca sheˍ.—w24.07, liꞈ mehˆ hpfuhˇ 26-28.

Maꞈhtehˍ liꞈ kaˇ nanˉ uiˍ 25 hkʼaw tawˇ pa haˉ 3 lawn tehˆ maˍ laˇ taˍ ve htaꞈ ngaˬ hui aˬ htoꞈ ma htaꞈ henˇ yuˬ gʼa ve le?

Yawˬ leh aˉ cheꞈ ve tawˇ pa haˉ tehˆ maˍ laˇ taˍ ve lehˬ, ka tiꞈ yeˬ ve chaw hpehꞈ tuˬ kʼoˆ maˍ laˇ taˍ ve yoˬ. Cuˇ yiˍ cawˬ ve yaˇ miˇ haˉ leh cuˇ yiˍ maˇ cawˬ ve yaˇ miˇ haˉ ve awˬ lawn gu taˍ hehnˇ taˍ tuˬ maˍ laˇ ve yoˬ. Hpu ve awˬ lawn lehˬ kaiˬ leh hkʼa dehꞈ te gʼa tuˬ maˍ laˇ taˍ ve yoˬ.—w24.09, liꞈ mehˆ hpfuhˇ 20-24.

Sawˉlaꞈmonˍ ve bon yehˬ lonˉ tanˬ loꞈ˗e kuiˬ hkʼaˬ hkʼe mvuh cawˬ ve le?

2 Raˍsaˍvanˍ liꞈ 3:4 hkʼaw awˬ nu ve Liꞈ hpu awˬ tawn yuˬ tawˆ ve hkʼaw kʼoˆ ve, bon yehˬ lonˉ tanˬ loꞈ˗e kuiˬ “mvuh ve hpawˇ 120 shawꞈ cawˬ ve” maˇ heˆ leh 53 meˆ cawˬ ve yoˬ. Yaꞈ hkʼaˇ, awˬ nu ve Liꞈ hpu hkʼaw ‘20 shawꞈ cawˬ ve’ maˇ heˆ leh 9 meˆ cawˬ ve yoˬ. Bon yehˬ lonˉ ve yehˬ miˉ htu ve leh mvuh ve hpawˇ nyi˗a kʼo hawˍ daꞈ ve yoˬ.—w24.10, liꞈ mehˆ hpfuhˇ 31.

Ga piˇ shehˍ hpaˇ lehˬ, “awˬ miˇ ma teˇ gʼaˇ tiˉ gʼa cawˬ” ve hkʼaˬ hkʼe kʼoˆ gaˇ ve le? (1 Tiˆmoˉseˍ 3:12)

Awˬ miˇ ma teˇ gʼaˇ tiˉ gʼa cawˬ ve htaꞈ kʼoˆ gaˇ ve yoˬ. Pehꞈ ve tzuhˆ ve maˇ te leh awˬ nu ve yaˇ miˇ htaꞈ dawˇ cawˇ ve hkʼe maˇ te.—w24.11, liꞈ mehˆ hpfuhˇ 19.

Yoˇhanˬ liꞈ 6:53 hkʼaw Yeˍsuˆ ve mvuhˇ haˉ awˍ caˇ ve pawehˇ htaꞈ maˇ caˉ daꞈ ve tehꞈ aˬ htoꞈ ma te ngaˬ hui kʼoˆ gʼa ve le?

Yoˇhanˬ liꞈ 6:53 hkʼaw Yeˍsuˆ ve awˬ shaˍ htaꞈ caˇ leh awˬ suhˍ htaꞈ dawˬ lo tehꞈ kʼoˆ piˇ ve yoˬ. Yeˍsuˆ awˬ lawn chi ve 32 hkʼawꞈ C.E. htaˇ, Gaˍliˍlehˇ chaw leh Yuˇdaꞈ chaw yawˇ htaꞈ maˇ yonˍ ve chaw htaꞈ kʼoˆ piˇ ve yoˬ. Yaꞈ hkʼaˇ, Yeˍsuˆ ve mvuhˇ haˉ awˍ caˇ ve pawehˇ peuˬ hkʼawꞈ nawˉ teˇ hkʼawꞈ htaˇ te ve yoˬ. Oˇ ve teˇ yanˇ mvuhˇ naw ma hkʼoˆ Yeˍsuˆ geh teˇ geh uˉ peunˍ tuˬ ve chaw htaꞈ kʼoˆ piˇ ve yoˬ.—w24.12, liꞈ mehˆ hpfuhˇ 10-11.