1. Yehˬ shehˍ hpaˇ awˬ miˇ ma leh yaˇ htaꞈ te piˇ ve awˬ hkʼaˇ yawˇ htaꞈ heuˆ la kuiˬ hkʼaˬ hkʼe cawˬ ve le?

 “Kanˇ paˆ yehˇ ve” htaꞈ kʼoˆ htaˇ, nawˬ hkʼaˬ hkʼe ve htaꞈ dawˇ mawˬ ve le? Tawˇ pa haˉ te kʼo, yehˬ shehˍ hpaˇ hpehꞈ ve chaw lehˬ yawˇ ve kanˇ paˆ htaꞈ yehˇ ve yoˬ. Hawˉ hkʼaˆ teˇ hpaˍ kʼo, awˬ liˇ awˬ hkʼaˇ maˇ heˆ leh chaw liˇ vaˇ liˇ chi teˇ hpaˍ hkʼaw uiˍ la ve pa taw, awˬ miˇ ma leh yaˇ htaꞈ maˇ daꞈ ve te piˇ ve yoˬ. Uˉyawˉpaˆ miˬ guiˬ lo chehˇ ve awˬ viˉ awˬ nyi Ya˗ni˗taˇ kʼoˆ ve, “choˬ kaˬ lo ve chaw lehˬ, yaˇ miˇ htaꞈ hawˉ hkʼaˆ aꞈ kehˉ awˬ hkʼehꞈ nehˬ ve maˇ heˆ leh awˬ ceˬ hkʼe shawˍ piˇ ve yoˬ.” Aˍmeˬriˆkaꞈ mvuhˇ miˬ lo chehˇ ve awˬ viˉ awˬ nyi Luˆ kʼoˆ ve, “awˬ pa teˇ hpaˍ yawˇ hui ve yaˇ htaꞈ maˍ piˇ ve, yaˇ miˇ lehˬ nyi guiˇ tuˬ ceh hpehꞈ leh, yawˇ hui hkawˇ taˇ na leh yawˇ hui htaꞈ a yeˇ taˇ yuˬ.” Yaꞈ hkʼaˇ, Yaˬhoˉvaˬ lehˬ hawˉ hkʼaˆ teˇ hpaˍ htaꞈ yawˇ hui ve kanˇ paˆ chi hkʼe hpawˇ maˇ yehˇ tcuh gaˇ. (Maˍkuˆ 7:13 htaꞈ tehˆ daꞈ sheˍ.) Hkʼe kʼo hawˉ hkʼaˆ lehˬ hkʼaˬ hkʼe te daꞈ ve yehˬ shehˍ hpaˇ hpehꞈ gʼa tuˬ le?

2. Yehˬ shehˍ hpaˇ aˬ htoꞈ ma htaꞈ gʼa shiˍ cawˇ ve le? Leh aˬ htoꞈ ma pa taw le?

² Hawˉ hkʼaˆ daꞈ ve yehˬ shehˍ hpaˇ hpehꞈ tuˬ Yaˬhoˉvaˬ yawˇ htaꞈ aˬ htoꞈ ma te tcuh gaˇ ve, awˉ lawˉ teˇ ceuˬ htaꞈ yawˇ gʼa shiˍ cawˇ ve yoˬ. Aˬ htoꞈ ma te Yaˬhoˉvaˬ chaw teˇ gʼaˇ gʼaˇ htaꞈ kanˇ paˆ piˇ ve leh yawˇ Yaˬhoˉvaˬ leh Yeˍsuˆ htaꞈ hkʼaˬ hkʼe te henˇ yuˬ gʼa tuˬ le htaꞈ kaꞈ yawˇ gʼa shiˍ cawˇ ve yoˬ. Aˬ htoꞈ ma te awˬ lawn chi a yeˇ uiˍ jaˇ ve le? Yawˇ yehˬ shehˍ hpaˇ hpehꞈ ve pa taw, Yaˬhoˉvaˬ yawˇ htaꞈ kanˇ paˆ piˇ ve yoˬ. Yawˇ ve kanˇ paˆ cawˇ ve hpawˇ yehˇ tuˬ Gʼuiˬ sha dawˇ law taˍ ve yoˬ.—Luˉkaꞈ 12:48.

3. 1 Kawˇrenˍhtuˆ 11:3 hkʼaw kʼoˆ taˍ ve hkʼe, sheh kʼai shehˍ hpaˇ htaꞈ caˉ daꞈ ve ngaˬ hui htaꞈ aˬ htoꞈ ma maˍ laˇ ve le?

³ 1 Kawˇrenˍhtuˆ liꞈ 11:3 gʼaw sheˍ. Liꞈ hpu chi hkʼaw Yaˬhoˉvaˬ yawˇ ve yehˬ kʼa mvuhˇ naw ma leh miˬ guiˬ hkʼoˆ ve htaꞈ hteˇ hteˇ shawˇ shawˇ gu piˇ tuˬ maˍ laˇ ve yoˬ. Sheh kʼai shehˍ hpaˇ htaꞈ caˉ daꞈ  ve 2 hkʼaˇ lehˬ, kanˇ paˆ yehˇ ve leh awˬ vuiˬ htaꞈ te ve yoˬ. Yaˬhoˉvaˬ sheh kʼai shehˍ hpaˇ hpehꞈ leh kanˇ paˆ uiˍ jaˇ ve htawˇ, mvuhˇ naw ma tcuh yaˇ leh chaw yaˇ htaꞈ yawˇ kanˇ paˆ piˇ ve yoˬ. Yaꞈ hkʼaˇ, yawˇ hui te ve awˬ ceuˬ Gʼuiˬ sha htaꞈ gʼa kʼoˆ piˇ ve yoˬ. (Roˉmaꞈ 14:10; Eˇfeˇsuꞈ 3:14, 15) Yaˬhoˉvaˬ Yeˍsuˆ htaꞈ Hkriꞈ yaˇ hkʼoˆ kanˇ paˆ cawˬ tcuh ve yoˬ. Yawˇ te ve awˬ ceuˬ Yaˬhoˉvaˬ htaꞈ gʼa kʼoˆ piˇ ve yoˬ. (1 Kawˇrenˍhtuˆ 15:27) Yaˬhoˉvaˬ awˬ hpawˇ htaꞈ awˬ miˇ ma leh yaˇ hkʼoˆ kanˇ paˆ cawˬ tcuh ve yoˬ. Yaꞈ hkʼaˇ, yawˇ te ve awˬ ceuˬ Yaˬhoˉvaˬ leh Yeˍsuˆ htaꞈ gʼa kʼoˆ piˇ ve yoˬ.—1 Peˍtruˆ 3:7.

4. Yaˬhoˉvaˬ leh Yeˍsuˆ aˬ htoꞈ ma kanˇ paˆ cawˬ ve le?

⁴ Yaˬhoˉvaˬ lehˬ yawˇ ve yehˬ kʼa hkʼaw awˬ hoˉ hpehꞈ ve yoˬ. Yaˬhoˉvaˬ lehˬ awˬ liˇ awˬ hkʼaˇ teh tuˬ kanˇ paˆ cawˬ leh yawˇ ve yaˇ teˇ hpaˍ gʼaꞈ te tcuh tuˬ a hkaw˗anˬ cawˬ ve yoˬ. (Iˉsaˍyaˆ 33:22) Leh Yeˍsuˆ kaꞈ Hkriꞈ yaˇ hkʼoˆ sheh kʼai paˍ hpehꞈ ve yoˬ. Yawˇ awˬ liˇ teh tuˬ leh Hkriꞈ yaˇ awˬ liˇ chi htaꞈ gʼaꞈ te tcuh tuˬ a hkaw˗anˬ cawˬ ve yoˬ.—Gaˍlaˍtiˆ 6:2; Kawˇlawˇsehˇ 1:18-20.

5. Yehˬ shehˍ hpaˇ aˬ htoꞈ ma kanˇ paˆ cawˬ ve le? Leh yawˇ kanˇ paˆ hkʼaˬ hkʼe taw cawˬ ve le?

⁵ Yehˬ shehˍ hpaˇ yehˬ kʼa hkʼaw dawˇ cheˆ tuˬ a hkaw˗anˬ cawˬ ve tehꞈ Yaˬhoˉvaˬ leh Yeˍsuˆ htaꞈ henˇ yuˬ gʼa ve yoˬ. (Roˉmaꞈ 7:2; Eˇfeˇsuꞈ 6:4) Yaꞈ hkʼaˇ, yawˇ ve kanˇ paˆ peuˬ puiˉ ve yoˬ. Tawˇ pa haˉ te kʼo, yawˇ teh ve awˬ liˇ lehˬ Liꞈ hpu hkʼaw gʼa hawˍ daꞈ ve yoˬ. (Tawˇ naˉ ve 3:5, 6) Yehˬ shehˍ hpaˇ lehˬ yawˇ ve yehˬ hkʼaw maˇ chehˇ˗oˬ ve chaw htaꞈ awˬ liˇ teh piˇ tuˬ kanˇ paˆ maˇ cawˬ. (Roˉmaꞈ 14:4) Chi hkʼoˆ kaꞈ, yaˇ uiˍ la˗oˬ leh yehˬ hkʼaw maˇ chehˇ˗o ve htawˇ, yaˇ awˬ pa htaꞈ yawˆ yan chehˇ sheˍ. Yaꞈ hkʼaˇ, awˬ pa yaˇ htaꞈ sheh kʼai tuˬ a hkaw˗anˬ maˇ cawˬ˗o.—Maꞈhtehˍ 19:5.

6. Aˬ htoꞈ ma te Yaˬhoˉvaˬ chaw teˇ hpaˍ htaꞈ sheh kʼai shehˍ hpaˇ te tuˬ kanˇ paˆ piˇ ve le?

⁶ Yaˬhoˉvaˬ yawˇ ve yehˬ kʼa htaꞈ haꞈ ve pa taw, chaw teˇ hpaˍ htaꞈ sheh kʼai shehˍ hpaˇ te tuˬ kanˇ paˆ piˇ ve yoˬ. Chi lehˬ Yaˬhoˉvaˬ peꞈ laˇ ve laꞈ shawnˍ hpehꞈ ve yoˬ. Gʼuiˬ sha yawˇ ve yehˬ kʼa hkʼaw sheh kʼai shehˍ hpaˇ cawˬ ve lehˬ hteˇ hteˇ shawˇ shawˇ cawˬ leh dawˇ sha gawˬ lehˍ ve cawˬ tuˬ te laˇ ve yoˬ. (1 Kawˇrenˍhtuˆ 14:33, 40) Sheh kʼai shehˍ hpaˇ maˇ cawˬ ve kʼo, Gʼuiˬ sha ve yehˬ kʼa hkʼaw shoꞈ shaꞈ leh ha lehˬ ve kaꞈ maˇ cawˬ. Awˬ leh meuˇ htaˇ, a shu dawˇ cheˆ tuˬ kaꞈ ngaˬ hui maˇ shiˍ.

7. Eˇfeˇsuꞈ liꞈ 5:25, 28 hkʼaw kʼoˆ taˍ ve hkʼe, Yaˬhoˉvaˬ lehˬ awˬ miˇ ma loˍ ve htaꞈ awˬ hpawˇ hkʼaˬ hkʼe te tcuh piˇ gaˇ ve le?

⁷ Yehˬ shehˍ hpaˇ yehˬ kʼa hkʼaw kanˇ paˆ yehˇ ve lehˬ daꞈ ve yoˬ. Aˬ htoꞈ ma te yaˇ miˇ laiˉ gʼaˇ nyiˉ laˇ ve, maˇ heˆ leh uˉ peunˍ laˇ ve tehꞈ dawˇ ve le? Chi hkʼe hpehꞈ ve lehˬ hawˉ hkʼaˆ laiˉ gʼaˇ yawˇ hui ve awˬ liˇ htaꞈ gʼaꞈ te leh Gʼuiˬ sha ve awˬ liˇ htaꞈ a yeˇ maˇ yuˬ. Hawˉ hkʼaˆ teˇ hpaˍ nyi ma sha tuˬ awˬ miˇ ma htaꞈ naˬ taweh te piˇ ve yoˬ. Tawˇ pa haˉ te kʼo, awˬ hpawˇ teˇ hpaˍ a yeˇ uiˍ ve chaw hpehꞈ ve tehꞈ dawˇ leh awˬ miˇ ma htaꞈ fawˉ mehˍ piˇ ve yoˬ. Leh yawˇ “hawˉ hkʼaˆ” hpehꞈ ve tehꞈ shu mawˬ tuˬ te ve yoˬ. Awˬ miˇ ma yawˇ htaꞈ haꞈ tuˬ maˇ nyiˉ piˇ gʼa ve htawˇ, kawˆ tuˬ te piˇ gʼa ve yoˬ. Yawˇ chi hkʼe te ve lehˬ awˬ miˇ ma htaꞈ uˉ peunˍ gʼa ve yoˬ. * Dawˇ hkʼaˇ leh te hkʼaˇ chi hkʼe ve htaꞈ pa taw, awˬ miˇ ma teˇ hpaˍ yawˆ yan piˇ ve htaꞈ gʼa cawˇ ve htawˇ maˇ gʼa. Chi ve lehˬ Yaˬhoˉvaˬ loˍ ve htaꞈ maˇ hawˍ daꞈ.—Eˇfeˇsuꞈ 5:25, 28 gʼaw sheˍ.

8. Hawˉ hkʼaˆ daꞈ ve yehˬ shehˍ hpaˇ hkʼaˬ hkʼe te hpehꞈ gʼa tuˬ le?

⁸ Hawˉ hkʼaˆ daꞈ ve yehˬ shehˍ hpaˇ hpehꞈ gʼa tuˬ Yaˬhoˉvaˬ leh Yeˍsuˆ kanˇ paˆ yehˇ ve htaꞈ henˇ yuˬ gʼa ve yoˬ. Yaˬhoˉvaˬ leh Yeˍsuˆ ve te hkʼaˇ dawˇ hkʼaˇ htaꞈ teˇ geh nyi sheˍ. Leh yehˬ shehˍ hpaˇ awˬ miˇ ma leh yaˇ htaꞈ te hkʼaˇ dawˇ hkʼaˇ chi ve 2  ceuˬ hkʼaˬ hkʼe te hpeuꞈ maw piˇ gʼa tuˬ kaꞈ teˇ geh henˇ tuˬ yoˬ.

9. Yaˬhoˉvaˬ nyi ma nuˇ nehˬ ve tehꞈ hkʼaˬ hkʼe te hpeuꞈ maw laˇ ve le?

⁹ Nyi ma nuˇ nehˬ ve. Yaˬhoˉvaˬ lehˬ cuˇ yiˍ cawˬ jaˇ ve htawˇ, yawˇ ve kanˉ te ve chaw ve hkawˇ na sheˍ ve yoˬ. (Awˬ hkuiˉ puiˍ 18:23, 24, 32) Gʼuiˬ sha yawˇ ve kanˇ paˆ awˬ hawˉ lo chehˇ ve chaw ve hkawˇ kaꞈ na ve yoˬ. (1 Jawˇmawˇ 22:19-22) Yaˬhoˉvaˬ lehˬ biˇ jaˇ ve htawˇ, ngaˬ hui biˇ ve chaw hpehꞈ ve tehꞈ yawˇ maˇ dawˇ. Gʼuiˬ sha maˇ biˇ ve chaw htaꞈ yawˇ ve kanˉ te tcuh leh awˬ vuiˬ te gʼa tuˬ yawˇ ga piˇ ve yoˬ. (Chiˇ mvuh ve 113:6, 7) Liꞈ hpu hkʼaw Yaˬhoˉvaˬ htaꞈ “ga piˇ shehˍ hpaˇ” tehꞈ kʼoˆ ve yoˬ. (Chiˇ mvuh ve 27:9; Heˍbrehˇ 13:6) Jawˇmawˇ Daˍviˆ shiˍ ve Yaˬhoˉvaˬ nyi ma nuˇ nehˬ ve hkʼaw yawˇ htaꞈ maˇ ga laˇ ve kʼo, a yeˇ uiˍ jaˇ ve kanˉ chi te maˇ gʼa ve yoˬ.—2 Saˍmo˗eˍlaˆ 22:36.

10. Yeˍsuˆ nyi ma nuˇ nehˬ ve hkʼaˬ hkʼe hpeuꞈ maw piˇ ve le?

¹⁰ Yeˍsuˆ ve awˬ lawn htaꞈ nyi sheˍ. Yeˍsuˆ lehˬ awˬ laꞈ gʼawˇ hui ve jawˇ mawˇ hpehꞈ ve htawˇ, yawˇ hui ve hkui sheh htaꞈ tsuhˇ piˇ ve yoˬ. Chi aˬ htoꞈ ma te Yaˬhoˉvaˬ Liꞈ hpu hkʼaw bvuhꞈ tcuh ve le? Awˬ hkʼaˇ teˇ hkʼaˇ lehˬ, teˇ gʼaˇ le le leh yehˬ shehˍ hpaˇ htaꞈ htawˇ maˍ laˇ ve yoˬ. Yeˍsuˆ kʼoˆ ve, “ngaˬ nawˬ hui htaꞈ te laˇ ve hkʼa shuˍ shuˍ nawˬ hui htawˇ te tuˬ, ngaˬ nawˬ hui htaꞈ henˇ yuˬ jawˬ yuˬ tuˬ te maˍ laˇ peuˬ.” (Yoˇhanˬ 13:12-17) Yeˍsuˆ kanˇ paˆ cawˬ jaˇ ve htawˇ, shu yawˇ ve awˬ ceˬ te laˇ tuˬ maˇ dawˇ law. Yaꞈ hkʼaˇ, yawˇ shu awˬ pon te piˇ ve yoˬ.—Maꞈhtehˍ 20:28.

11. Yaˬhoˉvaˬ leh Yeˍsuˆ nyi ma nuˇ nehˬ ve htaꞈ yehˬ shehˍ hpaˇ hkʼaˬ hkʼe te henˇ yuˬ gʼa tuˬ le?

¹¹ Ngaˬ hui awˬ pon henˇ yuˬ tuˬ. Yehˬ shehˍ hpaˇ nyi ma nuˇ nehˬ ve hpeuꞈ maw piˇ tuˬ laiˉ hkʼaˇ cawˬ ve yoˬ. Tawˇ pa haˉ te kʼo, awˬ miˇ ma leh yaˇ te maˇ gʼa ve awˬ leuˉ yawˇ maˇ dawˇ law. Yehˬ kʼa hkʼaw ve chaw yawˇ dawˇ ve hkʼe maˇ dawˇ ve htawˇ, yawˇ hui ve dawˇ hkʼaˇ htaꞈ na taˍ piˇ ve yoˬ. Aˍmeˬriˆkaꞈ mvuhˇ miˬ lo chehˇ ve Ma˗reˍ kʼoˆ ve, “teˇ pawˆ pawˆ kʼo, ngaˬ leh ngaˬ hpawˇ dawˇ ve kaꞈ maˇ shuˍ daꞈ. Yaꞈ hkʼaˇ, yawˇ ngaˬ htaꞈ awˬ hpfuhˇ shiˍ ve tehꞈ shiˍ leh ngaˬ hkʼaˬ hkʼe dawˇ ve kaꞈ yawˇ na laˇ ve yoˬ. Leh ngaˬ kʼoˆ piˇ peuˬ hkʼawꞈ nawˉ, yawˇ maˇ dawˇ cheˆ sheˍ htaˇ awˉ lawˉ dawˇ nyi ve yoˬ.” Chi hkʼoˆ kaꞈ, aˉ hkʼaw ve kanˉ lehˬ yaˇ miˇ ve kanˉ hpehꞈ ve tehꞈ oˇ kaˬ chehˇ ve chaw dawˇ ve htawˇ, nyi ma nuˇ nehˬ ve awˬ hpawˇ lehˬ kanˉ gʼa ga te ve yoˬ. Yaꞈ hkʼaˇ, awˬ lawn chi sha ve maˇ heˆ. Aˬ htoꞈ ma pa taw le? Awˬ viˉ awˬ nyi yaˇ miˇ Ra˗che kʼoˆ ve, “ngaˬ paw kuiˬ hkʼaˆ lehˬ awˬ hpawˇ hkehˇ gʼawˆ tsuhˇ ve maˇ heˆ leh yehˬ htuˍ  ve kʼo, oˇ kaˬ lo ve chaw leh awˬ viˉ awˬ nyi yawˇ hawˉ hkʼaˆ hpehꞈ ve laˇ tehꞈ htawˇ dawˇ nawˬ dawˇ cawˬ ve yoˬ. Chi teˇ gʼaˇ lehˬ awˬ miˇ ma htaꞈ kawˆ ve tehꞈ yawˇ hui dawˇ ve yoˬ.” Nawˬ chehˇ kuiˬ lo ve chaw kaꞈ chi hkʼe dawˇ ve kʼo, Yeˍsuˆ yawˇ ve awˬ laꞈ gʼawˇ ve hkui sheh tsuhˇ piˇ ve htaꞈ tawnˇ taˍ sheˍ. Maˇ˗awˍ ve kʼo, kanˉ chi ve lehˬ awˬ ceˬ ve kanˉ hpehꞈ ve yoˬ. Daꞈ ve yehˬ shehˍ hpaˇ lehˬ yawˇ awˬ pon tiˉ maˇ dawˇ nyi. Awˬ miˇ ma leh yaˇ ha lehˬ ve cawˬ˗aw laˇ kaꞈ yawˇ gʼa dawˇ nyi ve yoˬ. Daꞈ ve yehˬ shehˍ hpaˇ lehˬ nyi ma nuˇ nehˬ ve awˬ hkʼoˆ aˬ htoꞈ ma gʼa te sheˍ ve le?

12. Yehˬ shehˍ hpaˇ lehˬ Yaˬhoˉvaˬ leh Yeˍsuˆ htaꞈ aˬ htoꞈ ma henˇ yuˬ gʼa ve le?

¹² Haꞈ pehnˇ ve. Yaˬhoˉvaˬ teˇ ceuˬ le le haꞈ pehnˇ ve hkʼaw te ve yoˬ. (1 Yoˇhanˬ 4:7, 8) Yaˬhoˉvaˬ ngaˬ hui ve yonˍ hkʼaˇ htaꞈ nyi haꞈ shaˉ laˇ ve yoˬ. Ngaˬ hui Yaˬhoˉvaˬ geh meuˆ daꞈ tuˬ Liꞈ hpu leh yawˇ ve kanˉ hkʼaˇ htaꞈ cuˇ ve yoˬ. Yaˬhoˉvaˬ ngaˬ hui htaꞈ a yeˇ yuˬ laˇ ve lehˬ, yawˇ haꞈ laˇ ve htaꞈ shiˍ ve yoˬ. Ngaˬ hui awˬ to hpawˇ Yaˬhoˉvaˬ nyi haꞈ shaˉ laˇ ve lehˬ, ‘ngaˬ hui gʼa ha lehˬ tuˬ awˬ ceuˬ hkʼa peu˗eˬ peꞈ laˇ’ ve yoˬ. (1 Tiˆmoˉseˍ 6:17) Ngaˬ hui te yaꞈ htaˇ yawˇ maˍ laˇ ve yoˬ. Yaꞈ hkʼaˇ, yawˇ ngaˬ hui htaꞈ maˇ haꞈ˗o ve maˇ heˆ. Yaˬhoˉvaˬ ngaˬ hui htaꞈ haꞈ jaˇ ve pa taw, Yeˍsuˆ htaꞈ htaiˍ hkʼawꞈ laˇ tcuh ve yoˬ. Yeˍsuˆ kaꞈ ngaˬ hui htaꞈ haꞈ jaˇ ve pa taw, hkanˍ suh laˇ ve yoˬ. (Yoˇhanˬ 3:16; 15:13) Ka tiꞈ yeˬ ve chaw htaꞈ Yaˬhoˉvaˬ leh Yeˍsuˆ maˇ haꞈ tuˬ tawˍ piˇ maˇ gʼa.—Yoˇhanˬ 13:1; Roˉmaꞈ 8:35, 38, 39.

13. Yehˬ shehˍ hpaˇ awˬ miˇ ma leh yaˇ htaꞈ haꞈ pehnˇ ve hkʼaw hpeuꞈ maw piˇ tuˬ aˬ htoꞈ ma te a yeˇ uiˍ jaˇ ve le? (Awˇ ceˍ awˇ fa “ Heuˆ daꞈ gehˇ sheˍ ve hawˉ hkʼaˆ awˬ miˇ ma yawˆ yan laˇ tuˬ hkʼaˬ hkʼe gʼa te cawˇ ve le?” htaꞈ nyi sheˍ.)

¹³ Ngaˬ hui awˬ pon henˇ yuˬ tuˬ. Yehˬ shehˍ hpaˇ kaꞈ haꞈ pehnˇ ve hkʼaw gʼa te ve yoˬ. Aˬ htoꞈ ma te chi a yeˇ uiˍ jaˇ ve le? Tcuh yaˇ Yoˇhanˬ kʼoˆ ve, “a shu yawˇ mawˬ chehˇ ve awˬ viˉ awˬ nyi [maˇ heˆ leh yehˬ kʼa] htaꞈ maˇ haꞈ ve chaw teˇ gʼaˇ lehˬ, maˇ mawˬ jaw ve Gʼuiˬ sha htaꞈ yawˇ hkʼaˬ hkʼe te haꞈ hpehꞈ tuˬ le?” (1 Yoˇhanˬ 4:11, 20) Yehˬ kʼa htaꞈ haꞈ ve hawˉ hkʼaˆ lehˬ, Yaˬhoˉvaˬ leh Yeˍsuˆ htaꞈ henˇ yuˬ leh yehˬ kʼa hkʼaw ve chaw htaꞈ yonˍ hkʼaˇ, dawˇ hkʼaˇ leh awˬ to hpawˇ nyi haꞈ shaˉ piˇ ve yoˬ. (1 Tiˆmoˉseˍ 5:8) Leh yawˇ ve yaˇ htaꞈ kaꞈ maˍ piˇ ve yoˬ. Yawˇ dawˇ cheˆ htaˇ kaꞈ  Yaˬhoˉvaˬ htaꞈ yawˆ yan leh yehˬ kʼa hkʼaw ve chaw awˬ bon cawˬ tuˬ te ve yoˬ. Chi teˇ hkui yehˬ shehˍ hpaˇ Yaˬhoˉvaˬ leh Yeˍsuˆ htaꞈ henˇ yuˬ leh awˬ lawn chi htaꞈ hkʼaˬ hkʼe te dawˇ cheˆ gʼa tuˬ teˇ geh nyi sheˍ.

14. Yehˬ shehˍ hpaˇ yehˬ kʼa hkʼaw ve chaw ve yonˍ hkʼaˇ htaꞈ hkʼaˬ hkʼe te haꞈ shaˉ piˇ gʼa tuˬ le?

¹⁴ Yehˬ kʼa hkʼaw ve chaw ve yonˍ hkʼaˇ htaꞈ haꞈ shaˉ piˇ leh yawˇ hui Yaˬhoˉvaˬ geh meuˆ daꞈ tuˬ ga piˇ ve. Yeˍsuˆ Yaˬhoˉvaˬ htaꞈ henˇ yuˬ leh yawˇ ve awˬ laꞈ gʼawˇ yonˍ hkʼaˇ hpawˇ yonˍ yeˬ tuˬ ga piˇ ve yoˬ. (Maꞈhtehˍ 5:3, 6; Maˍkuˆ 6:34) Chi ve hkʼa shuˍ shuˍ, yehˬ shehˍ hpaˇ a yeˇ gʼa yuˬ cawˇ ve lehˬ yawˇ hui Yaˬhoˉvaˬ geh meuˆ daꞈ tuˬ gʼa ga piˇ ve yoˬ. (Bon maˍ ve 6:6-9) Yawˇ leh yehˬ kʼa hkʼaw ve chaw Liꞈ hpu gʼaw ve leh hkʼaˬ htaˆ kaꞈ Liꞈ hpu henˇ ve, hpawnˬ daꞈ˗e ve, hto toˇ˗e ve, leh Yaˬhoˉvaˬ geh meuˆ daꞈ ve yawˇ chi ve teˇ hpaˍ te chehˇ˗aw laˇ tehꞈ gʼa yonˍ gʼa tcuh ve yoˬ.

15. Yehˬ shehˍ hpaˇ yehˬ kʼa hkʼaw ve chaw ve dawˇ hkʼaˇ htaꞈ na gʼa tuˬ hkʼaˬ hkʼe gʼa te cawˇ ve le?

¹⁵ Yehˬ kʼa hkʼaw ve chaw ve dawˇ hkʼaˇ htaꞈ na gʼa piˇ ve. Yaˬhoˉvaˬ Yeˍsuˆ htaꞈ haꞈ ve tehꞈ shu mehˆ gʼuˇ suhˍ kʼoˆ ve yoˬ. (Maꞈhtehˍ 3:17) Yeˍsuˆ kaꞈ awˬ laꞈ gʼawˇ htaꞈ haꞈ ve tehꞈ kʼoˆ leh te maˍ piˇ ve yoˬ. Leh yawˇ hui kaꞈ Yeˍsuˆ htaꞈ haꞈ ve tehꞈ kʼoˆ ve yoˬ. (Yoˇhanˬ 15:9, 12, 13; 21:16) Chi ve hkʼa shuˍ shuˍ, yehˬ shehˍ hpaˇ kaꞈ awˬ miˇ ma leh yaˇ htaꞈ haꞈ ve tehꞈ mawˬ tcuh gʼa ve yoˬ. Liꞈ hpu henˇ ve leh yehˬ kʼa hkʼaw oˉ kʼoˍ pui ve teˇ geh te ve yoˬ. Chi hkʼoˆ kaꞈ, yawˇ awˬ miˇ ma leh yaˇ htaꞈ haꞈ ve tehꞈ kʼoˆ piˇ leh yawˇ hui yawˇ awˬ pon awˬ hpfuhˇ hkʼaˬ hkʼe taw cawˬ ve kʼoˆ piˇ cawˇ ve yoˬ. Leh yawˇ hui htaꞈ shu mehˆ gʼuˇ suhˍ lo kaꞈ gʼa chiˇ mvuh piˇ ve yoˬ.—Tawˇ naˉ ve 31:28, 29

16. Yehˬ shehˍ hpaˇ aˬ htoꞈ ma gʼa te cawˇ sheˍ ve le? Leh yawˇ aˬ htoꞈ ma htaꞈ shaˍ tiꞈ gʼa te cawˇ ve le?

¹⁶ Yehˬ kʼa hkʼaw ve chaw htaꞈ awˬ suhˍ awˬ shaˍ hpawˇ nyi haꞈ shaˉ piˇ ve. Iˉsaˍreˍlaˆ chaw maˇ na yuˬ ve htaꞈ pa taw ciˍ yanˍ piˇ chehˇ ve htawˇ, yawˇ hui loˍ ve awˬ ceuˬ Yaˬhoˉvaˬ ga piˇ chehˇ ve yoˬ. (Bon maˍ ve 2:7; 29:5) Chi beuꞈ teˇ co˗e ngaˬ hui kaꞈ loˍ ve awˬ ceuˬ Yaˬhoˉvaˬ ga laˇ chehˇ ve yoˬ. (Maꞈhtehˍ 6:31-33; 7:11) Chi hkʼa shuˍ shuˍ, Yeˍsuˆ yawˇ awˬ hkʼaˇ suh gʼaꞈ yuˬ ve chaw htaꞈ caˇ tuˬ caˍ piˇ leh awˬ to hpawˇ htawˇ haꞈ shaˉ piˇ ve yoˬ. (Maꞈhtehˍ 14:17-20) Yehˬ shehˍ hpaˇ Yaˬhoˉvaˬ htaꞈ nyi hkʼaˇ suh tuˬ te piˇ gaˇ ve kʼo, yehˬ kʼa hkʼaw ve chaw loˍ ve awˬ ceuˬ gʼa nyi haꞈ shaˉ piˇ ve yoˬ. (Maꞈhtehˍ 4:24) Yaꞈ hkʼaˇ, yawˇ shaˍ tiꞈ gʼa te ve yoˬ. Yawˇ kanˉ te maˇ jaˇ leh yehˬ kʼa hkʼaw ve chaw ve yonˍ hkʼaˇ htaꞈ maˇ nyi haꞈ shaˉ piˇ leh dawˇ hkʼaˇ hpawˇ a yeˇ maˇ yuˬ piˇ ve maˇ gʼa te.

17. Yaˬhoˉvaˬ leh Yeˍsuˆ ngaˬ hui htaꞈ hkʼaˬ hkʼe beˆ maˍ laˇ ve le?

¹⁷ Beˆ maˍ laˇ ve. Yaˬhoˉvaˬ ngaˬ hui htaꞈ ga laˇ gaˇ ve pa taw beˆ maˍ laˇ ve yoˬ. (Heˍbrehˇ 12:7-9) Yaˬhoˉvaˬ hkʼa shuˍ Yeˍsuˆ kaꞈ yawˇ ve kanˇ paˆ awˬ hawˉ lo chehˇ ve chaw htaꞈ haꞈ pehnˇ ve hkʼaw beˆ maˍ piˇ ve yoˬ. (Yoˇhanˬ 15:14, 15) Yawˇ hteˇ˗ehꞈ beˆ maˍ piˇ ve htawˇ, nyi ma nuˇ nehˬ ve hkʼaw te ve yoˬ. (Maꞈhtehˍ 20:24-28) Ngaˬ hui maˇ biˇ ve chaw hpehꞈ leh teˇ hkui teˇ hkui te yaꞈ ve htaꞈ yawˇ na gʼa ve yoˬ.—Maꞈhtehˍ 26:41.

18. Daꞈ ve yehˬ shehˍ hpaˇ lehˬ aˬ htoꞈ ma htaꞈ dawˇ nyi cawˇ ve le?

 ¹⁸ Daꞈ ve yehˬ shehˍ hpaˇ lehˬ Yaˬhoˉvaˬ leh Yeˍsuˆ htaꞈ henˇ yuˬ leh yawˇ ve yehˬ kʼa hkʼaw ve chaw maˇ biˇ ve tehꞈ tawnˇ taˍ cawˇ ve yoˬ. Hkʼe te leh awˬ miˇ ma leh yaˇ te yaꞈ htaˇ, “hehnˇ chaweh” maˇ gʼa te piˇ. (Kawˇlawˇsehˇ 3:19) Chi hkʼe te piˇ ve aꞈ kehˉ yawˇ Gaˍlaˍtiˆ liꞈ 6:1 hkʼaw ve awˬ liˇ awˬ hkʼaˇ htaꞈ gʼaꞈ te leh, yawˇ kaꞈ maˇ biˇ ve chaw hpehꞈ ve tehꞈ dawˇ leh yawˇ hui htaꞈ ‘nyi ma nuˇ nehˬ ve hkʼaw’ gʼa ga piˇ cawˇ ve yoˬ. Yeˍsuˆ hkʼa shuˍ yawˇ hui htaꞈ maˍ piˇ gʼa tuˬ daꞈ jaˇ ve awˬ hkʼaˇ lehˬ, daꞈ ve te hkʼaˇ dawˇ hkʼaˇ gʼa te maˍ piˇ ve yoˬ.—1 Peˍtruˆ 2:21.

19-20. Yehˬ shehˍ hpaˇ gʼa dawˇ cheˆ htaˇ Yaˬhoˉvaˬ leh Yeˍsuˆ htaꞈ hkʼaˬ hkʼe henˇ yuˬ gʼa ve le?

¹⁹ Dawˇ cheˆ htaˇ a shu yawˇ awˬ pon tiˉ maˇ dawˇ nyi ve. Yaˬhoˉvaˬ shu awˬ pon awˬ bon cawˬ tuˬ dawˇ cheˆ ve yoˬ. Tawˇ pa haˉ te kʼo, a shaꞈ htaꞈ hpanˍ tuˬ Yaˬhoˉvaˬ dawˇ cheˆ ve lehˬ, yawˇ awˬ pon awˬ bon cawˬ tuˬ te ve maˇ heˆ. Ngaˬ hui awˬ pon awˬ bon cawˬ tuˬ yoˬ. Chi hkʼoˆ kaꞈ, Yaˬhoˉvaˬ ve Yaˇ ngaˬ hui awˬ pon hkanˍ suh laˇ tuˬ yawˇ htaꞈ chaw teˇ gʼaˇ kaꞈ maˇ nyiˉ piˇ gʼa. Yaꞈ hkʼaˇ, yawˇ ngaˬ hui htaꞈ ga laˇ gaˇ ve pa taw, ha lehˬ ha kʼa chi hkʼe te laˇ ve yoˬ. Yeˍsuˆ kaꞈ shu awˬ pon awˬ bon cawˬ tuˬ hkʼa shuˍ dawˇ cheˆ ve yoˬ. (Roˉmaꞈ 15:3) Yeˍsuˆ gʼaˇ jehˇ cawˇ ve aꞈ kehˉ chaw awˬ moˍ lonˉ htaꞈ maˍ piˇ tuˬ leuˆ yuˬ ve yoˬ.—Maˍkuˆ 6:31-34.

²⁰ Daꞈ ve yehˬ shehˍ hpaˇ lehˬ, yawˇ gʼa te cawˇ ve haˍ jaˇ ve teˇ ceuˬ lehˬ yehˬ kʼa hkʼaw ve chaw htaꞈ heuˆ la kuiˬ cawˬ ve dawˇ cheˆ htaˇ yoˬ. Chi a yeˇ uiˍ jaˇ ve tehꞈ yawˇ shiˍ ve yoˬ. Awˬ hkʼaˇ maˇ ca leh yawˇ ve dawˇ hkʼaˇ htaꞈ yehˇ leh dawˇ cheˆ ve maˇ gʼa te. Yaꞈ hkʼaˇ, yawˇ hkʼaˬ hkʼe dawˇ cheˆ cawˇ ve Yaˬhoˉvaˬ maˍ laˇ tcuh cawˇ ve yoˬ. * (Tawˇ naˉ ve 2:6, 7) Yawˇ chi hkʼe te htaˇ, yawˇ awˬ pon awˬ bon cawˬ tuˬ maˇ heˆ. Shu awˬ pon awˬ bon cawˬ tuˬ dawˇ cheˆ ve yoˬ.—Hpiˇliˇpiˆ 2:4.

21. Awˬ gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

²¹ Yaˬhoˉvaˬ lehˬ yehˬ shehˍ hpaˇ htaꞈ haˍ ve awˬ vuiˬ piˇ ve yoˬ. Gʼuiˬ sha lehˬ yawˇ htaꞈ awˬ vuiˬ chi hkʼa dehꞈ te tcuh gaˇ ve yoˬ. Chi yawˇ Gʼuiˬ sha htaꞈ gʼa kʼoˆ maˍ piˇ ve yoˬ. Yawˇ Yaˬhoˉvaˬ leh Yeˍsuˆ htaꞈ hkʼa dehꞈ henˇ yuˬ ve kʼo, yawˇ daꞈ ve yehˬ shehˍ hpaˇ hpehꞈ gʼa ve yoˬ. Yehˬ shehˍ ma kaꞈ yehˬ kʼa hkʼaw awˬ vuiˬ htaꞈ hkʼa dehꞈ te ve kʼo, yawˇ hui ve yehˬ kʼa hkʼaw ha lehˬ jaˇ tuˬ yoˬ. Awˬ miˇ ma lehˬ yehˬ kʼa hkʼaw awˬ hpawˇ sheh kʼai ve htaꞈ hkʼaˬ hkʼe yawˆ yan cawˇ ve le? Leh yawˇ haˍ ve awˬ lawn aˬ htoꞈ ma gʼa hpuˇ ve le? Awˬ gʼuˇ suhˍ teˇ lawn hkʼaw awˬ lawn chi htaꞈ hkʼawꞈ laˇ tuˬ yoˬ.