1. Yaˬhoˉvaˬ ve yehˬ kʼa teˇ moˍ tiˉ hpehꞈ tuˬ awˬ hkʼaˇ teˇ hkʼaˇ lehˬ aˬ htoꞈ ma le?

 Ngaˬ hui Yaˬhoˉvaˬ ve yehˬ kʼa hkʼaw gʼa chehˇ ve ha lehˬ jaˇ. Aˬ htoꞈ ma te ngaˬ hui teˇ geh chehˇ ve gawˬ lehˍ cawˬ leh ha lehˬ jaˇ ve le? Chi hkʼe hpehꞈ ve lehˬ, sheh kʼai shehˍ hpaˇ te tuˬ Yaˬhoˉvaˬ kanˇ paˆ piˇ ve htaꞈ ngaˬ hui yawˆ yan ve yoˬ. Sheh kʼai shehˍ hpaˇ ve aˉ yaˇ htaꞈ ngaˬ hui hkʼa dehꞈ na gʼa htaˇ, teˇ moˍ tiˉ hpehꞈ gʼa ve yoˬ.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Awˬ lawn chi ve hkʼaw Hkriꞈ yaˇ awˬ moˍ hkʼaw kanˇ paˆ cawˬ ve chaw htaꞈ caˉ daꞈ ve leh na hkawˇ chi ve teˇ hpaˍ htaꞈ hkʼawꞈ laˇ tuˬ kaꞈ teˇ geh henˇ tuˬ yoˬ. (1) Awˬ viˉ awˬ nyi yaˇ miˇ Hkriꞈ yaˇ awˬ moˍ hkʼaw aˬ htoꞈ ma awˬ vuiˬ cawˬ ve le? (2) Awˬ viˉ awˬ nyi hawˉ hkʼaˆ yaˇ miˇ teˇ gʼaˇ le le ve awˬ hkʼoˆ sheh kʼai paˍ hpehꞈ˗aw laˇ? (3) Yehˬ shehˍ hpaˇ awˬ miˇ ma leh yaˇ awˬ hkʼoˆ kanˇ paˆ cawˬ ve hkʼe, nyi haꞈ shaˉ paˍ kanˇ paˆ cawˬ˗aw laˇ? Awˉ lawˉ htaˇ awˬ viˉ awˬ nyi yaˇ miˇ htaꞈ hkʼaˬ hkʼe dawˇ nyi cawˇ ve teˇ geh henˇ tuˬ yoˬ.

3. Awˬ viˉ awˬ nyi yaˇ miˇ htaꞈ awˬ hpfuhˇ shiˍ tuˬ aˬ htoꞈ ma ga laˇ ve le?

³ Awˬ viˉ awˬ nyi yaˇ miˇ yawˇ hui ve yehˬ kʼa htaꞈ hkʼa dehꞈ nyi haꞈ shaˉ ve, hto toˇ ve kaiˬ ve, leh Hkriꞈ yaˇ awˬ moˍ hkʼaw awˬ viˉ awˬ nyi htaꞈ kaꞈ ga piˇ ve ngaˬ hui awˬ hpfuhˇ shiˍ ve yoˬ. Yaˬhoˉvaˬ, Yeˍsuˆ, tcuh yaˇ Pawˇluꞈ awˬ viˉ awˬ nyi yaˇ miˇ htaꞈ hkʼaˬ hkʼe dawˇ nyi ve ngaˬ hui na gʼa ve kʼo, yawˇ hui htaꞈ awˬ hpfuhˇ shiˍ jaˇ tuˬ yoˬ.

4. Yaˬhoˉvaˬ lehˬ hawˉ hkʼaˆ leh yaˇ miˇ awˬ hpfuhˇ hkʼa shuˍ cawˬ ve tehꞈ Liꞈ hpu hkʼaw ngaˬ hui na gʼa tuˬ hkʼaˬ hkʼe ga laˇ ve le?

⁴ Yaˬhoˉvaˬ lehˬ hawˉ hkʼaˆ leh yaˇ miˇ awˬ hpfuhˇ hkʼa shuˍ cawˬ  ve tehꞈ Liꞈ hpu hkʼaw ngaˬ hui na gʼa tuˬ ga laˇ ve. Tawˇ pa haˉ te kʼo, awˉ lawˉ peuˇ ve Hkriꞈ yaˇ teˇ co˗e htaˇ, yawˇ hui anˇ tuˬ te gʼa leh tawˇ laiˉ ceuˬ hkawˇ yaw gʼa tuˬ Yaˬhoˉvaˬ daꞈ kehˬ ve awˬ ha hpu hawˉ hkʼaˆ leh yaˇ miˇ htaꞈ hkʼa shuˍ piˇ ve yoˬ. (Tcuh yaˇ 2:1-4, 15-18) Hawˉ hkʼaˆ leh yaˇ miˇ teˇ hpaˍ htaꞈ mvuhˇ naw ma hkʼoˆ Yeˍsuˆ geh teˇ geh uˉ peunˍ tuˬ Yaˬhoˉvaˬ leuˆ yuˬ ve yoˬ. (Gaˍlaˍtiˆ 3:26-29) Leh miˬ guiˬ hkʼoˆ lo co co taiˍ taiˍ chehˇ tuˬ dawˇ law taˍ ve chaw lehˬ hawˉ hkʼaˆ leh yaˇ miˇ kaꞈ cawˬ ve yoˬ. (Hpeuꞈ maˍ ve 7:9, 10, 13-15) Chi hkʼe ceh maˇ heˆ. Hawˉ hkʼaˆ leh yaˇ miˇ daꞈ ve awˬ lawn sha tanˇ maˍ tuˬ awˬ vuiˬ cawˬ ve yoˬ. (Maꞈhtehˍ 28:19, 20) Tawˇ pa haˉ te kʼo, Tcuh yaˇ liꞈ hkʼaw awˬ viˉ awˬ nyi Piˇkiˇlaˆ leh yawˇ ve awˬ hpawˇ Aˍkuˉlaˆ htaꞈ kaꞈ kʼoˆ taˍ ve yoˬ. Yawˇ hui Aˍpawˇluꞈ liꞈ tanˇ mvuh ve Liꞈ hpu hkʼaw hkʼa dehꞈ na gʼa tuˬ ga piˇ ve yoˬ.—Tcuh yaˇ 18:24-26.

5. Luˉkaꞈ liꞈ 10:38, 39, 42 hkʼaw kʼoˆ taˍ ve hkʼe, Yeˍsuˆ yaˇ miˇ htaꞈ yawˆ yan ve tehꞈ hkʼaˬ hkʼe hpeuꞈ maw laˇ ve le?

⁵ Yeˍsuˆ yaˇ miˇ htaꞈ yawˆ yan ve. Yeˍsuˆ ve awˬ co˗e htaˇ, Hpaˍriˍsehˇ hui yaˇ miˇ htaꞈ nyi cha leh chaw guiˇ kuiˬ lo yaˇ miˇ htaꞈ tawˇ maˇ yaw leh Liꞈ hpu hkʼaw ve awˬ lawn kaꞈ maˇ yaw daꞈ jaw. Yaꞈ hkʼaˇ, Yeˍsuˆ chi hkʼe maˇ te. Yeˍsuˆ Liꞈ hpu hkʼaw tcuhˉ kuiˬ naˉ ve awˬ laꞈ gʼawˇ hui htaꞈ maˍ piˇ htaˇ, yaˇ miˇ htaꞈ kaꞈ maˍ piˇ ve yoˬ. * (Luˉkaꞈ 10:38, 39, 42 gʼaw sheˍ.) Leh yawˇ teˇ venˇ le le lo bon ca maˍ˗e htaˇ kaꞈ yaˇ miˇ teˇ hpaˍ yawˇ awˬ hkʼaˇ suh kʼai tcuh ve yoˬ. (Luˉkaꞈ 8:1-3) Awˬ hkʼoˆ kaꞈ, yawˇ kʼawꞈ teꞈ tu la˗oˬ tehꞈ tcuh yaˇ hui htaꞈ ca kʼoˆ piˇ tuˬ, yaˇ miˇ htaꞈ daꞈ ve awˬ vuiˬ piˇ ve yoˬ.—Yoˇhanˬ 20:16-18.

6. Pawˇluꞈ yaˇ miˇ htaꞈ hkʼaˬ hkʼe yawˆ yan piˇ ve le?

⁶ Tiˆmoˉseˍ yaˇ miˇ htaꞈ yawˆ yan tuˬ Pawˇluꞈ kʼoˆ piˇ ve. Pawˇluꞈ Tiˆmoˉseˍ htaꞈ ‘chaw mawˇ ma teˇ hpaˍ htaꞈ awˬ e hkʼa shuˍ shuˍ shawˍ taˍ leh, yaˇ nehˬ hpehꞈ ve yaˇ miˇ teˇ hpaˍ htaꞈ awˬ viˉ awˬ nyi hkʼe shawˍ taˍ˗oꞈ’ tehꞈ kʼoˆ piˇ ve yoˬ. (1 Tiˆmoˉseˍ 5:1, 2) Tiˆmoˉseˍ yonˍ hkʼaˇ yonˍ yeˬ tuˬ Pawˇluꞈ ga piˇ ve htawˇ, awˉ lawˉ htaˇ Tiˆmoˉseˍ Liꞈ hpu hkʼaw daꞈ kehˬ ve htaꞈ shiˍ tuˬ awˬ e leh awˬ pi ga piˇ ve yoˬ. (2 Tiˆmoˉseˍ 1:5; 3:14, 15) Chi hkʼoˆ kaꞈ Pawˇluꞈ Roˉmaꞈ venˇ hkʼaw awˬ viˉ awˬ nyi htaꞈ liꞈ bvuhꞈ piˇ htaˇ, awˬ viˉ awˬ nyi yaˇ miˇ teˇ hpaˍ ve awˬ meh htaꞈ kaꞈ kʼoˆ ve yoˬ. Awˬ viˉ awˬ nyi yaˇ miˇ chi teˇ hpaˍ aˬ htoꞈ ma htaꞈ te ve ceh yawˇ chaˬ nyi ve maˇ heˆ. Yaꞈ hkʼaˇ, yaˇ miˇ chi teˇ hpaˍ te ve htaꞈ yawˇ awˬ hpfuhˇ shiˍ ve yoˬ.—Roˉmaꞈ 16:1-4, 6, 12; Hpiˇliˇpiˆ 4:3.

7. Aˬ htoꞈ ma na hkawˇ htaꞈ caˉ daꞈ ve ngaˬ hui kʼawꞈ henˇ tuˬ le?

⁷ Chi teˇ hkui hkʼa gaˬ ngaˬ hui gʼa henˇ˗oˬ ve, awˬ viˉ awˬ nyi yaˇ miˇ hawˉ hkʼaˆ aꞈ kehˉ awˬ hkʼehꞈ nehˬ ve tehꞈ kʼoˆ ve Liꞈ hpu hkʼaw teˇ kaˬ kaꞈ maˇ mawˬ. Haꞈ luˬ diˬ ve yaˇ miˇ lehˬ Hkriꞈ yaˇ awˬ moˍ hkʼaw awˬ hpfuhˇ hkʼaˆ jaˇ. Hkriꞈ yaˇ awˬ moˍ hkʼaw gawˬ lehˍ ve cawˬ leh teˇ moˍ tiˉ hpehꞈ tuˬ awˬ viˉ awˬ nyi yaˇ miˇ ga daꞈ ve pa taw, nyi haꞈ shaˉ paˍ awˬ bon uiˍ jaˇ. Yaꞈ hkʼaˇ, awˬ viˉ awˬ nyi yaˇ miˇ oˉ kʼoˍ htaꞈ hpa peh cawˇ ve tehꞈ Yaˬhoˉvaˬ kʼoˆ ve teˇ lawn lawn htaꞈ ngaˬ hui na gʼa cawˇ ve yoˬ. Awˬ lawn kʼo, awˬ viˉ awˬ nyi hawˉ hkʼaˆ ceh tiˉ nyi haꞈ shaˉ paˍ leh ga piˇ shehˍ hpaˇ te tuˬ leuˆ teh taˍ ve yoˬ. Hkʼe te leh, Hkriꞈ yaˇ awˬ moˍ hkʼaw ve hawˉ hkʼaˆ teˇ gʼaˇ le le, yaˇ miˇ awˬ hkʼoˆ sheh kʼai shehˍ hpaˇ hpehꞈ ve tehꞈ kʼoˆ gaˇ ve laˇ?

8. Eˇfeˇsuꞈ liꞈ 5:23 hkʼaw kʼoˆ taˍ ve hkʼe, awˬ viˉ awˬ nyi hawˉ hkʼaˆ teˇ gʼaˇ le le yaˇ miˇ awˬ hkʼoˆ sheh kʼai shehˍ hpaˇ hpehꞈ˗aw laˇ? Kʼoˆ maˍ laˇ sheˍ.

⁸ Hkriꞈ yaˇ awˬ moˍ hkʼaw hawˉ hkʼaˆ teˇ gʼaˇ le le yaˇ miˇ awˬ hkʼoˆ sheh kʼai shehˍ hpaˇ hpehꞈ˗aw laˇ? Maˇ hpehꞈ. Yeˍsuˆ teˇ gʼaˇ ceh tiˉ Hkriꞈ yaˇ awˬ moˍ hkʼoˆ sheh kʼai shehˍ hpaˇ hpehꞈ ve yoˬ. (Eˇfeˇsuꞈ 5:23 gʼaw sheˍ.) Yehˬ kʼa hkʼaw awˬ hpawˇ lehˬ sheh kʼai shehˍ hpaˇ hpehꞈ leh awˬ miˇ ma hkʼoˆ kanˇ paˆ cawˬ ve yoˬ. Yaꞈ hkʼaˇ, Baˆtiˆsaˬ haꞈ yuˬ˗oˬ ve yaˇ paˍ lehˬ awˬ e awˬ hkʼoˆ sheh kʼai tuˬ kanˇ paˆ maˇ cawˬ. (Eˇfeˇsuꞈ 6:1, 2) Nyi haꞈ shaˉ paˍ ve kanˇ paˆ  awˬ viˉ awˬ nyi hawˉ hkʼaˆ leh yaˇ miˇ awˬ hkʼoˆ hkʼa peu˗eˬ yawˇ hui maˇ uˉ peunˍ gʼa. (1 Hteˇsaˍlawˇniˆ 5:12; Heˍbrehˇ 13:17) Awˬ viˉ awˬ nyi yaˇ miˇ haˉ awˬ pa awˬ e geh maˇ chehˇ˗oˬ ve htawˇ, awˬ pa awˬ e leh nyi haꞈ shaˉ paˍ htaꞈ yawˆ yan sheˍ ve yoˬ. Yaꞈ hkʼaˇ, yawˇ hui ve sheh kʼai paˍ kaꞈ awˬ viˉ awˬ nyi hawˉ hkʼaˆ ve sheh kʼai paˍ htaꞈ shuˍ ve yoˬ. Oˇ ve lehˬ Yeˍsuˆ Hkriꞈ yoˬ.

9. Aˬ htoꞈ ma te awˬ viˉ awˬ nyi yaˇ miˇ teˇ pawˆ pawˆ oˉ kʼoˍ htaꞈ hpa peh cawˇ ve le?

⁹ Yaˬhoˉvaˬ lehˬ Hkriꞈ yaˇ awˬ moˍ hkʼaw hawˉ hkʼaˆ htaꞈ ceh tiˉ maˍ tcuh leh oˉ kʼoˍ pui ve hkʼaw sheh kʼai tcuh ve yoˬ. Chi yaˇ miˇ htaꞈ maˇ piˇ. (1 Tiˆmoˉseˍ 2:12) Aˬ htoꞈ ma pa taw le? Yaˬhoˉvaˬ yawˇ ve yehˬ kʼa hteˇ hteˇ shawˇ shawˇ cawˬ tuˬ, Yeˍsuˆ htaꞈ hawˉ hkʼaˆ awˬ hkʼoˆ sheh kʼai tcuh ve yoˬ. Gʼuiˬ sha lehˬ Hkriꞈ yaˇ awˬ moˍ hkʼaw hteˇ hteˇ shawˇ shawˇ cawˬ tuˬ, hawˉ hkʼaˆ htaꞈ sheh kʼai tcuh ve yoˬ. Yaꞈ hkʼaˇ, teˇ pawˆ pawˆ yaˇ miˇ hawˉ hkʼaˆ awˬ tan gʼa te ve kʼo, oˉ kʼoˍ htaꞈ hpa gʼa peh cawˇ ve tehꞈ Yaˬhoˉvaˬ kʼoˆ ve yoˬ. * (1 Kawˇrenˍhtuˆ 11:4-7) Yaˬhoˉvaˬ chi hkʼe te tcuh laˇ ve lehˬ, yaˇ miˇ hawˉ hkʼaˆ aꞈ kehˉ awˬ hkʼehꞈ nehˬ ve tehꞈ maˇ shawˍ. Yaꞈ hkʼaˇ, Yaˬhoˉvaˬ yaˇ miˇ htaꞈ yawˇ ve awˬ liˇ awˬ hkʼaˇ sheh kʼai shehˍ hpaˇ ve awˬ lawn htaꞈ yawˆ yan ve tehꞈ hpeuꞈ maw piˇ tcuh ve yoˬ. Chi teˇ hkui yehˬ shehˍ hpaˇ leh nyi haꞈ shaˉ paˍ kanˇ paˆ hkʼaˬ hkʼe taw cawˬ ve htaꞈ teˇ geh nyi sheˍ.

10. Nyi haꞈ shaˉ paˍ Hkriꞈ yaˇ awˬ moˍ hkʼaw awˬ liˇ awˬ hkʼaˇ teh gaˇ tuˬ aˬ htoꞈ ma te piˇ ve le?

¹⁰ Nyi haꞈ shaˉ paˍ lehˬ Yeˍsuˆ htaꞈ haꞈ leh Yaˬhoˉvaˬ leh Yeˍsuˆ ve yawˬ yawˇ hui htaꞈ nyi haꞈ shaˉ tcuh taˍ ve htaꞈ kaꞈ haꞈ ve yoˬ. (Yoˇhanˬ 21:15-17) Hkʼe te leh nyi haꞈ shaˉ paˍ Hkriꞈ yaˇ awˬ moˍ hkʼaw ve awˬ viˉ awˬ nyi teˇ gʼaˇ le le ve awˬ pa hkʼe hpehꞈ ve yoˬ. Yehˬ shehˍ hpaˇ yehˬ kʼa htaꞈ nyi haꞈ shaˉ gʼa tuˬ awˬ liˇ awˬ hkʼaˇ teh gʼa ve kʼo, yawˇ kaꞈ Hkriꞈ yaˇ awˬ moˍ hkʼaw awˬ viˉ awˬ nyi htaꞈ nyi  haꞈ shaˉ gʼa tuˬ awˬ liˇ awˬ hkʼaˇ teh gʼa ve tehꞈ dawˇ ve yoˬ. Leh teˇ hpaˍ kʼo yawˇ hui ve awˬ lawn teˇ lawn lawn htaꞈ nyi haꞈ shaˉ paˍ dawˇ cheˆ laˇ tuˬ ca lawˬ ve yoˬ. Yaꞈ hkʼaˇ, nyi haꞈ shaˉ paˍ yehˬ shehˍ hpaˇ hkʼa shuˍ kanˇ paˆ cawˬ˗aw laˇ?

11. Yehˬ shehˍ hpaˇ ve kanˇ paˆ leh nyi haꞈ shaˉ paˍ ve kanˇ paˆ hkʼaˬ hkʼe te shuˍ daꞈ ve le?

¹¹ Nyi haꞈ shaˉ paˍ leh yehˬ shehˍ hpaˇ ve kanˇ paˆ teˇ ceuˬ ceuˬ shuˍ daꞈ ve tehꞈ Pawˇluꞈ kʼoˆ maˍ laˇ ve yoˬ. (1 Tiˆmoˉseˍ 3:4, 5) Tawˇ pa haˉ te kʼo, Yaˬhoˉvaˬ lehˬ yehˬ kʼa hkʼaw ve chaw yehˬ shehˍ hpaˇ hkawˇ na tcuh gaˇ ve yoˬ. Leh awˬ viˉ awˬ nyi kaꞈ nyi haꞈ shaˉ paˍ hkawˇ na tcuh gaˇ ve yoˬ. (Kawˇlawˇsehˇ 3:20) Chi hkʼoˆ kaꞈ, Yaˬhoˉvaˬ lehˬ nyi haꞈ shaˉ paˍ leh yehˬ shehˍ hpaˇ ve kanˇ paˆ awˬ hawˉ lo chehˇ ve chaw ve yonˍ hkʼaˇ yonˍ yeˬ tuˬ ga piˇ leh awˬ viˉ awˬ nyi ve te hkʼaˇ dawˇ hkʼaˇ kaꞈ nyi haꞈ shaˉ tcuh gaˇ ve yoˬ. Nyi haꞈ shaˉ paˍ leh yehˬ shehˍ hpaˇ ve kanˇ paˆ awˬ hawˉ lo chehˇ ve chaw shoꞈ shaꞈ ve gʼa hpuˇ htaˇ, yawˇ hui ga piˇ gʼa tuˬ yoˬ tehꞈ yonˍ gʼa ve yoˬ. (Yaˍkoˆ 2:15-17) Awˬ nu ve chaw Gʼuiˬ sha ve awˬ liˇ awˬ hkʼaˇ htaꞈ gʼaꞈ te tuˬ nyi haꞈ shaˉ paˍ leh yehˬ shehˍ hpaˇ ga piˇ tuˬ Gʼuiˬ sha dawˇ law taˍ ve yoˬ. Yaꞈ hkʼaˇ, Gʼuiˬ sha yawˇ hui htaꞈ shaˍ tiꞈ piˇ ve, “Liꞈ hpu hkʼaw bvuhꞈ taˍ ve awˬ hkʼaˇ suh ceh tiˉ” gʼa te ve yoˬ.—1 Kawˇrenˍhtuˆ 4:6.

12-13. Roˉmaꞈ liꞈ 7:2 hkʼaw kʼoˆ taˍ ve hkʼe, yehˬ shehˍ hpaˇ leh nyi haꞈ shaˉ paˍ ve kanˇ paˆ hkʼaˬ hkʼe peun daꞈ ve le?

¹² Yehˬ shehˍ hpaˇ leh nyi haꞈ shaˉ paˍ ve kanˇ  paˆ kaꞈ peun daꞈ jaˇ. Tawˇ pa haˉ te kʼo, nyi haꞈ shaˉ paˍ lehˬ Hkriꞈ yaˇ awˬ moˍ hkʼaw dawˇ cheˆ tuˬ Yaˬhoˉvaˬ yawˇ hui htaꞈ kanˇ paˆ piˇ ve yoˬ. Hkriꞈ yaˇ awˬ moˍ hkʼaw awˬ viˉ awˬ nyi hkʼaˬ ve teˇ gʼaˇ venˇ baˆ uiˍ jaˇ ve te yaꞈ leh maˇ dawˇ hpfuhˆ ve kʼo, nyi haꞈ shaˉ paˍ Hkriꞈ yaˇ awˬ moˍ hkʼaw tawˆ cheˆ piˇ tuˬ kanˇ paˆ cawˬ ve yoˬ.—1 Kawˇrenˍhtuˆ 5:11-13.

¹³ Yaꞈ hkʼaˇ, kanˇ paˆ teˇ ceuˬ ceuˬ kʼo, Yaˬhoˉvaˬ yehˬ shehˍ hpaˇ htaꞈ piˇ ve, nyi haꞈ shaˉ paˍ htaꞈ maˇ piˇ. Tawˇ pa haˉ te kʼo, Yaˬhoˉvaˬ lehˬ yehˬ shehˍ hpaˇ yehˬ kʼa hkʼaw awˬ liˇ teh tuˬ a hkaw˗anˬ piˇ leh yehˬ kʼa hkʼaw ve chaw gʼaꞈ te tcuh gʼa ve yoˬ. (Roˉmaꞈ 7:2 gʼaw sheˍ.) Yehˬ shehˍ hpaˇ yawˇ ve yaˇ aˉ hkʼaw lo hkʼaˬ nyiˇ naˍ riˍ kʼawꞈ la tuˬ awˬ yanˇ tinˍ piˇ gʼa ve yoˬ. Yawˇ ve yaˇ maˇ na yuˬ ve kʼo, maˍ piˇ tuˬ a hkaw˗anˬ cawˬ ve yoˬ. (Eˇfeˇsuꞈ 6:1) Yehˬ shehˍ hpaˇ yehˬ kʼa hkʼaw awˬ liˇ maˇ teh sheˍ htaˇ, awˬ miˇ ma geh kaꞈ tawˇ yaw daꞈ sheˍ ve yoˬ. Awˬ lawn kʼo, ‘yawˇ huiˉ maˬ teˇ gʼaˇ tiˉ hpehꞈ la peuˬ.’ *—Maꞈhtehˍ 19:6.

14. (a) Maˍkuˆ liꞈ 10:45 hkʼaw kʼoˆ taˍ ve hkʼe, Yaˬhoˉvaˬ lehˬ Yeˍsuˆ htaꞈ Hkriꞈ yaˇ awˬ moˍ hkʼoˆ sheh kʼai shehˍ hpaˇ te tcuh ve aˬ htoꞈ ma te keunˍ jaˇ ve le? (b) Uˉ peunˍ ve Kawˍmiˍtiˍ aˬ htoꞈ ma ve awˬ vuiˬ cawˬ ve le? (Awˇ ceˍ awˇ fa “ Uˉ peunˍ ve Kawˍmiˍtiˍ ve awˬ vuiˬ” htaꞈ nyi sheˍ.)

¹⁴ Yaˬhoˉvaˬ lehˬ Hkriꞈ yaˇ awˬ moˍ hkʼaw ve chaw teˇ gʼaˇ leh teˇ gʼaˇ htaꞈ htaiˍ hkʼaw ve awˬ hpfuhˇ hkʼa shuˍ vuiˬ hkʼawꞈ taˍ ve yoˬ. (Maˍkuˆ 10:45 gʼaw sheˍ; Tcuh yaˇ 20:28; 1 Kawˇrenˍhtuˆ 15:21, 22) Chi htaꞈ pa taw, Yaˬhoˉvaˬ lehˬ Yeˍsuˆ htaꞈ Hkriꞈ yaˇ awˬ moˍ hkʼoˆ sheh kʼai shehˍ hpaˇ te tcuh ve keunˍ jaˇ. Yawˇ ngaˬ hui awˬ pon a shaꞈ tanˇ laˇ ve pa taw, teˇ gʼaˇ leh teˇ gʼaˇ, teˇ yehˬ kʼa leh teˇ yehˬ kʼa, Hkriꞈ yaˇ awˬ moˍ teˇ kaˬ leh teˇ kaˬ aˬ htoꞈ ma te tuˬ yawˇ awˬ liˇ awˬ hkʼaˇ teh piˇ tuˬ  a hkaw˗anˬ cawˬ ve yoˬ. (Gaˍlaˍtiˆ 6:2) Yaꞈ hkʼaˇ, Yeˍsuˆ awˬ liˇ awˬ hkʼaˇ teh ve ceh maˇ heˆ. Ngaˬ hui teˇ gʼaˇ leh teˇ gʼaˇ htaꞈ haꞈ ve pa taw hkʼa dehꞈ haꞈ shaˉ laˇ ve yoˬ.—Eˇfeˇsuꞈ 5:29.

15-16. Awˬ viˉ awˬ nyi Maˍren leh Beˍyaˍmenˍ kʼoˆ ve htaꞈ nawˬ hkʼaˬ hkʼe henˇ yuˬ gʼa ve le?

¹⁵ Awˬ viˉ awˬ nyi yaˇ miˇ Yeˍsuˆ htaꞈ yawˆ yan ve tehꞈ hpeuꞈ maw piˇ tuˬ, awˬ viˉ awˬ nyi hawˉ hkʼaˆ leuˆ teh taˍ ve hkawˇ na yuˬ ve yoˬ. Aˍmeˬriˆkaꞈ mvuhˇ miˬ lo chehˇ ve Maˍren hkʼa shuˍ awˬ viˉ awˬ nyi yaˇ miˇ laiˉ gʼaˇ kaꞈ dawˇ ve yoˬ. Yawˇ kʼoˆ ve, “awˬ miˇ ma gʼa hpehꞈ ve leh Hkriꞈ yaˇ awˬ moˍ hkʼaw awˬ viˉ awˬ nyi yaˇ miˇ gʼa hpehꞈ ve ngaˬ awˬ pon awˬ hpfuhˇ hkʼaˆ jaˇ. Yaˬhoˉvaˬ awˬ hpawˇ leh nyi haꞈ shaˉ paˍ htaꞈ kanˇ paˆ piˇ taˍ ve htaꞈ yawˆ yan gʼa tuˬ ngaˬ gʼa coˇ caˇ jaˇ. Yaꞈ hkʼaˇ, yawˇ hui kaꞈ ngaˬ chi htaꞈ gʼaꞈ te tuˬ haˍ ve maˇ te laˇ. Yawˇ hui ngaˬ htaꞈ yawˆ yan leh ngaˬ te ve awˬ ceuˬ htaꞈ awˬ bon uiˍ jaˇ kʼoˆ laˇ ve yoˬ.”

¹⁶ Awˬ viˉ awˬ nyi hawˉ hkʼaˆ lehˬ awˬ vuiˬ htaꞈ na gʼa ve tehꞈ hpeuꞈ maw piˇ tuˬ yaˇ miˇ htaꞈ yawˆ yan ve yoˬ. Eˍgaˍlanˍ mvuhˇ miˬ lo chehˇ ve awˬ viˉ awˬ nyi Beˍyaˍmenˍ kʼoˆ ve, “hpawnˬ daꞈ kuiˬ hkʼaw awˬ viˉ awˬ nyi yaˇ miˇ hkʼawꞈ ve htaꞈ ngaˬ laiˉ ceuˬ henˇ gʼa ve yoˬ. Yawˇ hui hpfuhˆ nyi ve awˬ hkʼaˇ, hto toˇ tuˬ awˬ hkʼaˇ, Liꞈ hpu maˍ tuˬ awˬ hkʼaˇ, ngaˬ cheuˬ la tuˬ kaꞈ gʼa henˇ ve yoˬ. Yawˇ hui te ve awˬ ceuˬ awˬ hpfuhˇ hkʼaˆ jaˇ.”

17. Aˬ htoꞈ ma te Yaˬhoˉvaˬ kanˇ paˆ piˇ taˍ ve chaw htaꞈ ngaˬ hui yawˆ yan cawˇ ve le?

¹⁷ Hawˉ hkʼaˆ leh yaˇ miˇ maˇ kʼoˆ, yehˬ shehˍ hpaˇ leh nyi haꞈ shaˉ paˍ maˇ kʼoˆ, kanˇ paˆ cawˬ tuˬ Yaˬhoˉvaˬ leuˆ teh taˍ ve chaw htaꞈ ngaˬ hui na gʼa leh yawˆ yan ve kʼo, Hkriꞈ yaˇ awˬ moˍ hkʼaw dawˇ sha gawˬ lehˍ cawˬ leh teˇ moˍ tiˉ hpehꞈ tuˬ ga piˇ gʼa ve yoˬ. A yeˇ uiˍ jaˇ ve lehˬ, ngaˬ hui haꞈ jaˇ ve Awˬ pa Yaˬhoˉvaˬ htaꞈ chiˇ mvuh chehˇ ve yoˬ.—Chiˇ mvuh ve 150:6.