1-2. Maꞈhtehˍ liꞈ 5:11 hkʼaw kʼoˆ taˍ ve hkʼe, shoꞈ shaꞈ ve htaꞈ ngaˬ hui hkʼaˬ hkʼe dawˇ nyi cawˇ ve le?

 Yeˍsuˆ kʼoˆ ve yawˇ ve awˬ laꞈ gʼawˇ hpehꞈ ve chaw lehˬ, awˬ tehˬ ha lehˬ ve cawˬ tuˬ yoˬ. Yaꞈ hkʼaˇ, yawˇ kʼawꞈ kʼoˆ ve, yawˇ ve awˬ laꞈ gʼawˇ lehˬ shoꞈ shaꞈ ve gʼa hpuˇ tuˬ yoˬ. (Maꞈhtehˍ 10:22, 23; Luˉkaꞈ 6:20-23) Ngaˬ hui Yeˍsuˆ ve awˬ laꞈ gʼawˇ gʼa hpehꞈ ve ha lehˬ jaˇ. Yehˬ kʼa hkʼaw ve chaw tawˍ laˇ ve, mvuhˇ miˬ uˉ peunˍ ve fawˉ mehˍ laˇ ve, kanˉ te kuiˬ leh liꞈ henˇ yehˬ lo ve awˬ chawˇ maˇ daꞈ ve te tuˬ nyiˉ laˇ htaˇ, ngaˬ hui hkʼaˬ hkʼe dawˇ tuˬ ve le? Chi teˇ hpaˍ htaꞈ dawˇ nyi ve ceh kaꞈ dawˇ maˇ tuˬ te laˇ ve yoˬ.

² Maˇ˗awˍ ve chaw kʼo fawˉ ve mehˍ ve gʼa hpuˇ htaˇ, ha lehˬ tuˬ te laˇ gʼa ve tehꞈ dawˇ ve yoˬ. Yaꞈ hkʼaˇ, chi Liꞈ hpu hkʼaw kʼoˆ laˇ taˍ ve yoˬ. Tawˇ pa haˉ te kʼo, Yaˍkoˆ kʼoˆ ve, tuꞈ ve hkanˍ ve htaꞈ tiˉ dawˇ nyi leh dawˇ haˍ ve aꞈ kehˉ, tuꞈ ve hkanˍ ve lehˬ ngaˬ hui ha lehˬ tuˬ te laˇ gʼa ve tehꞈ dawˇ nyi cawˇ ve yoˬ. (Yaˍkoˆ 1:2, 12) Yeˍsuˆ kaꞈ kʼoˆ sheˍ ve ngaˬ hui fawˉ ve mehˍ ve gʼa hpuˇ ve htawˇ ha lehˬ gʼa ve yoˬ. (Maꞈhtehˍ 5:11 gʼaw sheˍ.) Yaꞈ hkʼaˇ, ngaˬ hui shoꞈ shaꞈ ve gʼa hpuˇ ve htawˇ hkʼaˬ hkʼe te ha lehˬ gʼa tuˬ le? Awˉ lawˉ peuˇ ve Hkriꞈ yaˇ htaꞈ Yaˍkoˆ liꞈ bvuhꞈ piˇ ve ngaˬ hui htaꞈ ga laˇ gʼa ve yoˬ. Awˉ lawˉ peuˇ ve Hkriꞈ yaˇ aˬ htoꞈ ma gʼa hpuˇ ve teˇ geh nyi sheˍ.

3. Yaˍkoˆ Yeˍsuˆ ve awˬ laꞈ gʼawˇ hpehꞈ la ve maˇ maw sheˍ htaˇ, aˬ htoꞈ ma hpehꞈ la ve le?

³ Yeˍsuˆ ve awˬ nyi paˍ Yaˍkoˆ awˬ laꞈ gʼawˇ hpehꞈ la ve maˇ maw sheˍ htaˇ, Yeˍruˆsaˍlehnˍ venˇ hkʼaw ve Hkriꞈ yaˇ hui htaꞈ shu fawˉ mehˍ piˇ ve yoˬ. (Tcuh yaˇ 1:14; 5:17, 18) Saˍteˍhpanˍ htaꞈ tiˇ pehˍ piˇ peuˬ hkʼawꞈ nawˉ, Hkriꞈ yaˇ teˇ hpaˍ Yeˍruˆsaˍlehnˍ venˇ hkʼaw tawˆ˗e leh “Yuˇdaꞈ mvuhˇ miˬ leh Saˍmaˍriˆ mvuhˇ miˬ teˇ kaˬ le le  lo hpaw˗e ve yoˬ.” Teˇ hpaˍ kʼo, Kuˇpaˍruˆ conˇ leh Anˍtiˆawˍ venˇ lo hpaw˗e ve yoˬ. (Tcuh yaˇ 7:58–8:1; 11:19) Oˇ htaˇ ve Hkriꞈ yaˇ tuꞈ hkanˍ jaˇ ve yoˬ hehˉ. Yaꞈ hkʼaˇ, yawˇ hui kʼai kuiˬ teˇ kaˬ le le lo bon maˍ ve yoˬ. Yawˇ hui co ha hpaw uiˍ la mvuh la jaˇ leh Roˉmaꞈ venˇ hkʼaw teˇ kaˬ le le lo Hkriꞈ yaˇ awˬ moˍ teh ve yoˬ. (1 Peˍtruˆ 1:1) Peuˬ leh, yawˇ hui shoꞈ shaꞈ ve gʼa hpuˇ sheˍ.

4. Awˉ lawˉ peuˇ ve Hkriꞈ yaˇ aˬ htoꞈ ma htaꞈ gʼa yeunˇ hkanˍ sheˍ ve le?

⁴ Awˉ lawˉ peuˇ ve Hkriꞈ yaˇ shoꞈ shaꞈ ve laiˉ ceuˬ gʼa hpuˇ ve yoˬ. Tawˇ pa haˉ te kʼo, aˬ laˬ hkʼe 50 hkʼawꞈ C.E. htaˇ, Roˉmaꞈ mvuhˇ miˬ uˉ peunˍ paˍ Kaˍlawˇdiˆ meh ve, Hkriꞈ yaˇ teˇ gʼaˇ le le htaꞈ Roˉmaꞈ venˇ lo tawˆ kʼai tcuh ve yoˬ. Chi htaꞈ pa taw, Yuˇdaꞈ chaw Hkriꞈ yaˇ lehˬ a shu yawˇ ve chehˇ kuiˬ htaꞈ baˬ taˉ leh teˇ kaˬ lo gʼa ca chehˇ˗e ve yoˬ. (Tcuh yaˇ 18:1-3) Aˬ laˬ hkʼe 61 hkʼawꞈ C.E. htaˇ, Pawˇluꞈ kʼoˆ ve, yawˇ ve awˬ chawˇ Hkriꞈ yaˇ htaꞈ htawnˍ hkʼaw yuˬ keu piˇ ve, chaw hkʼawˇ dawˆ piˇ ve pa taw awˬ meꞈ awˬ hponˇ luˬ tuˬ te piˇ ve yoˬ. (Heˍbrehˇ 10:32-34) Awˬ nu ve chaw hkʼa shuˍ, Hkriꞈ yaˇ haˍ ve gʼawˇ ve leh naˬ ve gawˬ ve htaꞈ kaꞈ gʼa yeunˇ hkanˍ sheˍ ve yoˬ.—Roˉmaꞈ 15:26; Hpiˇliˇpiˆ 2:25-27.

5. Aˬ htoꞈ ma ve na hkawˇ htaꞈ hkʼawꞈ tuˬ le?

⁵ Aˬ laˬ hkʼe 62 hkʼawꞈ C.E. htaˇ, Yaˍkoˆ yawˇ ve liꞈ yawˇ bvuhꞈ htaˇ Hkriꞈ yaˇ awˬ viˉ awˬ nyi aˬ htoꞈ ma gʼa hpuˇ ve yawˇ shiˍ ve yoˬ. Awˬ viˉ awˬ nyi oˇ ve teˇ hpaˍ htaꞈ ga piˇ tuˬ Yaˍkoˆ htaꞈ Yaˬhoˉvaˬ dawˇ pawnˍ piˇ leh bvuhꞈ tcuh ve yoˬ. Shoꞈ shaꞈ ve htaꞈ gʼa yeunˇ hkanˍ ve htawˇ ha lehˬ gʼa sheˍ ve yoˬ. Yaˍkoˆ ve liꞈ htaꞈ teˇ geh nyi leh na hkawˇ chi ve teˇ hpaˍ htaꞈ hkʼawꞈ laˇ tuˬ yoˬ. Ha lehˬ ve Yaˍkoˆ kʼoˆ ve tcuhˉ kuiˬ aˬ htoꞈ ma le? Hkriꞈ yaˇ ha lehˬ ve maˇ cawˬ tuˬ aˬ htoꞈ ma te piˇ ve le? Ngaˬ hui shoꞈ shaꞈ ve gʼa hpuˇ ve htawˇ cuˇ yiˍ, yonˍ ve, haꞈ hanˉ ve leh ha lehˬ gʼa tuˬ hkʼaˬ hkʼe ga laˇ ve le?

6. Luˉkaꞈ liꞈ 6:22, 23 hkʼaw kʼoˆ taˍ ve hkʼe, Hkriꞈ yaˇ shoꞈ shaꞈ ve gʼa hpuˇ ve htawˇ, aˬ htoꞈ ma te ha lehˬ gʼa ve le?

⁶ Maˇ˗awˍ ve chaw kʼoˆ ve, chehˇ sha cawˬ sha ve, hpu chi ma ma cawˬ ve, yehˬ kʼa hkʼaw dawˇ sha gawˬ lehˍ ve cawˬ ve kʼo, ha lehˬ ve yoˬ. Yaꞈ hkʼaˇ, ha lehˬ ve awˬ ceuˬ Yaˍkoˆ kʼoˆ ve lehˬ, oˇ ve teˇ gʼaˇ hkʼaˬ hkʼe hpehꞈ ve htaꞈ maˇ caˉ daꞈ. Yaꞈ hkʼaˇ, ha lehˬ ve Gʼuiˬ sha ve daꞈ kehˬ ve awˬ ha hpu ve awˬ shiˍ nawꞈ ve teˇ ceuˬ hpehꞈ ve yoˬ. (Gaˍlaˍtiˆ 5:22) Hkriꞈ yaˇ ha lehˬ ve lehˬ Yeˍsuˆ htaꞈ henˇ yuˬ leh Yaˬhoˉvaˬ nyi hkʼaˇ suh tuˬ te ve geh laˬ ve yoˬ. (Luˉkaꞈ 6:22, 23 gʼaw sheˍ; Kawˇlawˇsehˇ 1:10, 11) Ngaˬ hui nyi ma hkʼaw ha lehˬ ve cawˬ ve kʼo, mvuhˇ yeˬ mvuhˇ haw hkʼaˬ hkʼe taw uiˍ ve htawˇ, aˬ miˍ kawˆ faiˇ awˬ jaˇ lo htaˬ taˍ leh aˬ miˍ maˇ suh gʼa ve htaꞈ shuˍ ve yoˬ. Chi hkʼa shuˍ shuˍ ngaˬ hui ha lehˬ ve kʼo, shu kʼoˆ guiˇ gʼuiˬ guiˇ laˇ ve, yehˬ kʼa hkʼaw ve chaw tawˍ laˇ ve, gʼaˇ hteꞈ kʼawꞈ naˬ ve, maˇ heˆ leh hpu hkʼa dehꞈ maˇ cawˬ ve, chi hkʼe gʼa hpuˇ ve htawˇ, ha lehˬ ve maˇ mehˉ kʼai. Kawˆ faiˇ awˬ gʼeuˆ hkʼaˬ htaˆ kaꞈ ba chehˇ ve hkʼe ngaˬ hui ha lehˬ ve kaꞈ maˇ mehˉ kʼai. Ngaˬ hui tawˍ ve tsuhˇ ve gʼa hpuˇ ve htawˇ, aˬ miˍ kawˆ faiˇ awˬ gʼeuˆ gʼaˇ hteꞈ ba ve hkʼe, ngaˬ hui kaꞈ gʼaˇ hteꞈ ha lehˬ ve yoˬ. Ngaˬ hui Yaˬhoˉvaˬ ve kanˉ te ve pa taw shoꞈ shaꞈ ve gʼa hpuˇ jaˇ ve htawˇ, Yeˍsuˆ ve awˬ laꞈ gʼawˇ hpehꞈ ve tehꞈ hpeuꞈ maw piˇ ve yoˬ. (Maꞈhtehˍ 10:22; 24:9; Yoˇhanˬ 15:20) Hkʼe te leh, Yaˍkoˆ bvuhꞈ ve, “ngaˬ ve awˬ viˉ awˬ nyi teˇ hpaˍ˗oˬ, beˬ ve lawˇ ve laiˉ ceuˬ htaꞈ gʼa hpuˇ daꞈ ve teˇ yanˇ ha lehˬ chehˇ˗oˆ.”—Yaˍkoˆ 1:2.

7-8. Beˬ ve lawˇ ve gʼa hpuˇ htaˇ ngaˬ hui ve yonˍ hkʼaˇ hkʼaˬ hkʼe kʼai tuˬ le? Aˬ htoꞈ ma pa taw le?

⁷ Yaˍkʼoˆ kʼawꞈ kʼoˆ ve, aˬ htoꞈ ma te Hkriꞈ yaˇ tuꞈ ve hkanˍ ve htaꞈ yeunˇ hkanˍ sheˍ ve le? Yawˇ kʼoˆ ve, “nawˬ hui yonˍ ve nyi ma lehˬ, lawˇ nyi ve htaꞈ gʼa hpuˇ daꞈ htaˇ, nawˬ hui yeunˇ hkanˍ puiˉ la tuˬ” yoˬ. (Yaˍkoˆ 1:3) Ngaˬ hui shoꞈ shaꞈ ve gʼa hpuˇ ve kaꞈ, aˉ htaw dawˆ tuˬ aˬ miˍ htaꞈ shuˍ ve yoˬ. Aˉ htaw dawˆ shoˆ peuˬ hkʼawꞈ nawˉ ve hkʼa shuˍ shuˍ, ngaˬ hui shoꞈ shaꞈ ve gʼa hpuˇ htaˇ, yonˍ hkʼaˇ yonˍ yeˬ la ve yoˬ. Chi htaꞈ pa taw Yaˍkoˆ bvuhꞈ ve, “nawˬ hui teˇ ceuˬ kaꞈ maˇ yawnˇ kʼai leh, teˇ ceuˬ le le awˬ hkʼaw lo hkʼa biˇ hpehꞈ la tuˬ yeunˇ hkanˍ puiˉ ve nyi ma biˇ la htaˇ hkʼa gaˬ te˗o.” (Yaˍkoˆ 1:4) Ngaˬ hui shoꞈ shaꞈ ve gʼa hpuˇ htaˇ, yonˍ hkʼaˇ yonˍ yeˬ tuˬ te laˇ ve yoˬ. Shoꞈ shaꞈ ve chi teˇ hpaˍ htaꞈ ngaˬ hui yeunˇ hkanˍ gʼaˇ ve yoˬ.

⁸ Yaˍkoˆ ve liꞈ hkʼaw ngaˬ hui ha lehˬ tuˬ maˇ te laˇ ve teˇ ceuˬ ceuˬ htaꞈ kʼoˆ taˍ ve yoˬ. Shoꞈ shaꞈ ve chi teˇ hpaˍ aˬ htoꞈ ma le? Leh chi htaꞈ ngaˬ hui hkʼaˬ hkʼe te gʼaˇ tuˬ le?

9. Aˬ htoꞈ ma te ngaˬ hui cuˇ yiˍ gʼa cawˬ cawˇ ve le?

⁹ Ha lehˬ tuˬ maˇ te laˇ ve awˬ ceuˬ aˬ htoꞈ ma le? Hkʼaˬ hkʼe dawˇ cheˆ tuˬ maˇ shiˍ ve. Ngaˬ hui shoꞈ shaꞈ ve gʼa hpuˇ htaˇ, Yaˬhoˉvaˬ nyi hkʼaˇ suh tuˬ dawˇ cheˆ gaˇ ve yoˬ. Awˬ viˉ awˬ nyi awˬ bon gʼa leh ngaˬ hui Yaˬhoˉvaˬ htaꞈ ka tiꞈ yeˬ gʼa tuˬ awˬ pon  yoˬ. (Yeˍraˍmiˆ 10:23) Ngaˬ hui hkʼaˬ hkʼe dawˇ cheˆ tuˬ leh tawˍ laˇ ve chaw htaꞈ tawˇ hkʼaˬ hkʼe yaw hkʼawꞈ piˇ tuˬ ngaˬ hui cuˇ yiˍ gʼa cawˬ ve yoˬ. Ngaˬ hui hkʼaˬ hkʼe te tuˬ maˇ shiˍ ve teˇ yanˇ, awˬ gʼaˇ nuˇ leh ha lehˬ ve maˇ cawˬ.

10. Yaˍkoˆ liꞈ 1:5 hkʼaw kʼoˆ taˍ ve hkʼe, ngaˬ hui cuˇ yiˍ cawˬ tuˬ hkʼaˬ hkʼe gʼa te cawˇ ve le?

¹⁰ Hkʼaˬ hkʼe gʼaˇ tuˬ le? Yaˬhoˉvaˬ geh cuˇ yiˍ gʼa lawˬ ve. Ngaˬ hui shoꞈ shaꞈ ve gʼa hpuˇ ve htawˇ ha lehˬ gʼa ve yoˬ. Ngaˬ hui cuˇ yiˍ cawˬ ve hkʼaw dawˇ cheˆ gʼa tuˬ Yaˬhoˉvaˬ geh cuˇ yiˍ gʼa lawˬ ve yoˬ. (Yaˍkoˆ 1:5 gʼaw sheˍ.) Ngaˬ hui ve bon lawˬ hkawˇ htaꞈ Yaˬhoˉvaˬ laꞈ haˉ maˇ hkʼawꞈ laˇ ve kʼo, hkʼaˬ hkʼe te tuˬ ve le? Yaˍkoˆ kʼoˆ ve, “Gʼuiˬ sha geh lawˬ˗oꞈ.” Ngaˬ hui Yaˬhoˉvaˬ geh hkʼaˬ hkʼe taw lawˬ ve htawˇ yawˇ maˇ beuꞈ. Ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ Yaˬhoˉvaˬ geh cuˇ yiˍ lawˬ ve kʼo, ‘ngaˬ hui htaꞈ maˇ chaweh’ piˇ laˇ tuˬ yoˬ. (Chiˇ mvuh ve 25:12, 13) Ngaˬ hui aˬ htoꞈ ma htaꞈ gʼa hpuˇ tuˬ Gʼuiˬ sha shiˍ leh ngaˬ hui ve dawˇ hkʼaˇ htaꞈ yawˇ na gʼa leh ga laˇ gaˇ ve yoˬ. Chi lehˬ ngaˬ hui ha lehˬ tuˬ te laˇ ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ cuˇ yiˍ hkʼaˬ hkʼe peꞈ laˇ ve le?

11. Ngaˬ hui cuˇ yiˍ cawˬ tuˬ hkʼaˬ hkʼe gʼa te cawˇ sheˍ ve le?

¹¹ Yaˬhoˉvaˬ ngaˬ hui htaꞈ Liꞈ hpu hkʼaw ve cuˇ yiˍ peꞈ laˇ ve yoˬ. (Tawˇ naˉ ve 2:6) Ngaˬ hui cuˇ yiˍ gʼa tuˬ Liꞈ hpu leh Liꞈ hpu hkʼaw laˬ ve liꞈ kʼoˆ teˇ hpaˍ htaꞈ gʼa henˇ ve yoˬ. Yaꞈ hkʼaˇ, cuˇ yiˍ gʼa tuˬ henˇ ve ceh maˇ lawꞈ. Gʼuiˬ sha ve tawˇ hkawˇ ngaˬ hui a shaꞈ teꞈ kuiˬ hkʼaw gʼa yuˬ yehˇ ve yoˬ. Yaˍkoˆ kʼoˆ ve, “bon hkawˇ htaꞈ na yuˬ leh te ve chaw hpehꞈ piˇ˗oˆ. Kaˇ ve chaw ceh tiˉ taˇ hpehꞈ piˇ.” (Yaˍkoˆ 1:22) Gʼuiˬ sha beˆ maˍ laˇ ve tawˇ hkawˇ htaꞈ ngaˬ hui gʼaꞈ te ve kʼo, ha lehˬ ve, awˬ hkʼaˇ ca ve, leh ha kʼaˉ puiˉ ve yoˬ. (Yaˍkoˆ 3:17) Te hkʼaˇ dawˇ hkʼaˇ chi ve teˇ hpaˍ lehˬ ngaˬ hui shoꞈ shaꞈ ve gʼa hpuˇ ve htawˇ, ha lehˬ tuˬ te laˇ gʼa ve yoˬ.

12. Aˬ htoꞈ ma te Liꞈ hpu hkʼaw hkʼa dehꞈ shiˍ ve a yeˇ uiˍ jaˇ ve le?

¹² Liꞈ hpu lehˬ mehˆ gʼeuˆ htaꞈ shuˍ ve yoˬ. Liꞈ hpu lehˬ ngaˬ hui hkʼaˬ kaˬ lo gu tuˬ maˍ laˇ leh hkʼaˬ hkʼe te tuˬ shiˍ ve yoˬ. (Yaˍkoˆ 1:23-25) Tawˇ  pa haˉ te kʼo, ngaˬ hui Liꞈ hpu henˇ htaˇ, te hkʼaˇ dawˇ hkʼaˇ hkʼaˬ kaˬ lo pa cawˇ ve shiˍ la ve yoˬ. Shu ngaˬ hui htaꞈ nyi ma maˇ sha tuˬ te laˇ htaˇ, nyi ma nuˇ nehˬ leh hkʼaˬ hkʼe te cawˇ ve shiˍ tuˬ Yaˬhoˉvaˬ ga laˇ tuˬ yoˬ. Ngaˬ hui nyi ma gawˬ lehˍ cawˬ ve kʼo, shoꞈ shaꞈ ve htaꞈ tawˍ daꞈ gʼaˇ ve, awˬ hkʼaˇ gu gʼa ve, leh hkʼa dehꞈ dawˇ cheˆ gʼa ve yoˬ. (Yaˍkoˆ 3:13) Liꞈ hpu hkʼaw hkʼa dehꞈ shiˍ ve lehˬ a yeˇ uiˍ jaˇ tehꞈ ngaˬ hui shiˍ ve yoˬ.

13. Aˬ htoꞈ ma te ngaˬ hui Liꞈ hpu hkʼaw cawˬ ve chaw ve awˬ lawn henˇ cawˇ ve le?

¹³ Maˇ te cawˇ ve awˬ ceuˬ ngaˬ hui te peuˬ hkʼawꞈ nawˉ htaˇ, maˇ te cawˇ ve tehꞈ shiˍ la ve yoˬ. Chi htaꞈ pa taw, a shu yawˇ ve awˬ lawn aꞈ kehˉ shu ve awˬ lawn htaꞈ awˉ lawˉ dawˇ nyi cawˇ ve yoˬ. Chi lehˬ cuˇ yiˍ gʼa tuˬ daꞈ jaˇ ve awˬ hkʼaˇ hpehꞈ ve yoˬ. Chi htaꞈ pa taw Yaˍkoˆ ngaˬ hui htaꞈ kʼoˆ laˇ ve, Liꞈ hpu hkʼaw cawˬ ve Aˍbraˍhanˍ, Raˍhaˆ, Yawˇbaˆ, leh Eˇliˇyaꞈ yawˇ hui ve awˬ lawn htaꞈ awˉ lawˉ nyi sheˍ. (Yaˍkoˆ 2:21-26; 5:10, 11, 17, 18) Yaˬhoˉvaˬ htaꞈ ka tiꞈ yeˬ ve chaw chi teˇ hpaˍ shoꞈ shaꞈ ve gʼa hpuˇ ve htawˇ ha lehˬ gʼa ve yoˬ. Ngaˬ hui Yaˬhoˉvaˬ htaꞈ gʼaˇ gʼa ve kʼo, yawˇ hui hkʼa shuˍ te gʼa ve tehꞈ yonˍ gʼa ve yoˬ.

14-15. Aˬ htoꞈ ma te ngaˬ hui ve nyi ma hkʼaw htawˇ dawˇ nawˬ dawˇ maˇ cawˬ tcuh cawˇ ve le?

¹⁴ Ha lehˬ ve maˇ cawˬ tuˬ te laˇ ve aˬ htoꞈ ma le? Nyi ma hkʼaw htawˇ dawˇ nawˬ dawˇ cawˬ ve. Liꞈ hpu hkʼaw teˇ lawn lawn htaꞈ ngaˬ hui maˇ na gʼa ve maˇ heˆ leh, ngaˬ hui bon lawˬ ve hkʼe Yaˬhoˉvaˬ maˇ hkʼawꞈ laˇ ve pa taw, htawˇ dawˇ nawˬ dawˇ cawˬ ve yoˬ. Ngaˬ hui ve nyi ma hkʼaw htawˇ dawˇ nawˬ dawˇ cawˬ tcuh ve kʼo, ngaˬ hui ve yonˍ hkʼaˇ kaꞈ awˬ gʼaˇ nuˇ la leh Yaˬhoˉvaˬ geh meuˆ daꞈ ve i kʼai la ve yoˬ. (Yaˍkoˆ 1:7, 8) Chi hkʼoˆ kaꞈ, awˬ gʼuˇ suhˍ hpawˇ ngaˬ hui ve dawˇ law kuiˬ htaꞈ kaꞈ hkʼa dehꞈ maˇ yonˍ tuˬ te laˇ ve yoˬ.

¹⁵ Tcuh yaˇ Pawˇluꞈ dawˇ law kuiˬ lehˬ heuˇ shan hpawˇ ve sho kʼuˉ hkawehꞈ htaꞈ tehˆ taˍ ve yoˬ. (Heˍbrehˇ 6:19) Heuˇ shan hpawˇ ve sho kʼuˉ hkawehꞈ lehˬ mvuhˇ yeˬ mvuhˇ haw laˬ htaˇ haˉ pui shiˍ htaꞈ maˇ htiˬ tuˬ te piˇ ve yoˬ. Yaꞈ hkʼaˇ, heuˇ shan hpawˇ ve sho caˆ cheˆ˗e ve kʼo, sho kʼuˉ hkawehꞈ kaꞈ teꞈ chiˉ awˬ bon maˇ cawˬ. Heuˇ shan hpawˇ ve sho kʼuˉ hkawehꞈ ve sho caˆ htaꞈ yawˇ caˇ ve hkʼe, nyi ma hkʼaw htawˇ dawˇ nawˬ dawˇ cawˬ ve kʼo, awˬ gʼaˇ nuˇ tuˬ te laˇ ve yoˬ. Htawˇ dawˇ nawˬ dawˇ cawˬ ve htaꞈ maˇ gu leh tawˍ ve tsuhˇ ve gʼa hpuˇ ve kʼo, Yaˬhoˉvaˬ ka tiꞈ te taˍ ve hkʼe maˇ gʼaꞈ te ve tehꞈ dawˇ la ve yoˬ. Ngaˬ hui yonˍ ve maˇ cawˬ ve kʼo, dawˇ law kuiˬ kaꞈ meu˗eˇ awˬ meu˗eˇ mehˉ kʼai la ve yoˬ. Yaˍkoˆ kʼoˆ ve hkʼa shuˍ, “htawˇ dawˇ nawˬ dawˇ te ve chaw lehˬ, laˇ tsuhˇ gʼuiˬ htaꞈ mvuhˇ haw meuˆ leh gʼuiˬ baˇ taˆ taˆ yaꞈ yaꞈ te ve hkʼe hpehꞈ ve yoˬ.” (Yaˍkoˆ 1:6) Chi hkʼe ve chaw lehˬ ha lehˬ ve maˇ cawˬ gʼa!

16. Ngaˬ hui htawˇ dawˇ nawˬ dawˇ cawˬ htaˇ aˬ htoꞈ ma te cawˇ ve le?

¹⁶ Hkʼaˬ hkʼe te gʼaˇ tuˬ le? Htawˇ dawˇ nawˬ dawˇ cawˬ ve htaꞈ gu leh nawˬ ve yonˍ hkʼaˇ yonˍ tuˬ te ve. Nawˬ htawˇ dawˇ nawˬ dawˇ cawˬ ve htaꞈ laꞈ haˉ gʼa gu ve yoˬ. Eˇliˇyaꞈ ve awˬ co˗e htaˇ ve chaw htawˇ dawˇ nawˬ dawˇ cawˬ leh yonˍ hkʼaˇ htaꞈ hkʼa dehꞈ maˇ yeˬ ve yoˬ. Eˇliˇyaꞈ yawˇ hui htaꞈ kʼoˆ piˇ ve, “nawˬ hui hkʼaˬ maw maw nyi ma heh chehˇ tuˬ sheˍ ve le? Ngaˬ hui ve Gʼuiˬ sha lehˬ, awˬ tehˬ awˬ na ve Gʼuiˬ sha hpehꞈ ve kʼo, yawˇ htaꞈ oˉ kʼoˍ pui˗o. Baˍlaˆ lehˬ, awˬ tehˬ awˬ na ve Gʼuiˬ sha hpehꞈ ve kʼo, yawˇ htaꞈ oˉ kʼoˍ pui˗o.” (1 Jawˇmawˇ 18:21) Chi beuꞈ teˇ co˗e kaꞈ hkʼa shuˍ yoˬ. Yaˬhoˉvaˬ awˬ tehˬ ve Gʼuiˬ sha hpehꞈ ve, Liꞈ hpu lehˬ Gʼuiˬ sha ve tawˇ hkawˇ hpehꞈ ve, Yaˬhoˉvaˬ ve Shaˉhkiˆhkanˍ ve chaw lehˬ yawˇ ve chaw hpehꞈ ve tehꞈ ngaˬ hui yonˍ gʼa htaˇ hkʼa gaˬ gʼa hpfuhˆ nyi ve yoˬ. (1 Hteˇsaˍlawˇniˆ 5:21) Ngaˬ hui chi hkʼe te ve kʼo, htawˇ dawˇ nawˬ dawˇ cawˬ ve htaꞈ gu leh ngaˬ hui ve yonˍ hkʼaˇ yonˍ yeˬ tuˬ te ve yoˬ. Ngaˬ hui ga laˇ tuˬ loˍ ve kʼo, nyi haꞈ shaˉ paˍ ga laˇ gʼa ve yoˬ. Ngaˬ hui ha lehˬ ha kʼa ve hkʼaw Yaˬhoˉvaˬ ve kanˉ caˉ leh te gaˇ ve kʼo, laꞈ haˉ gʼa te ve yoˬ.

17. Ngaˬ hui haꞈ hanˉ ve maˇ cawˬ ve kʼo, hkʼaˬ hkʼe hpehꞈ la tuˬ le?

¹⁷ Ha lehˬ ve maˇ cawˬ tuˬ te laˇ ve aˬ htoꞈ ma le? Awˬ gʼaˇ nuˇ ve. Liꞈ hpu hkʼaw kʼoˆ ve, “haˍ ve kanˉ htaꞈ gʼa hpuˇ daꞈ htaˇ nyi ma luˬ puiˉ ve chaw lehˬ,  awˬ tehˬ awˬ na gʼaˇ nuˇ ve chaw hpehꞈ ve yoˬ.” (Tawˇ naˉ ve 24:10) Heˍbrehˇ hkawˇ “awˬ gʼaˇ nuˇ ve” tcuhˉ kuiˬ lehˬ, “haꞈ hanˉ ve maˇ cawˬ ve” htaꞈ kʼoˆ gaˇ ve yoˬ. Nawˬ haꞈ hanˉ ve maˇ cawˬ ve kʼo, ha lehˬ ve kaꞈ maˇ cawˬ.

18. Yeunˇ hkanˍ ve hkʼaˬ hkʼe ve htaꞈ kʼoˆ gaˇ ve le?

¹⁸ Hkʼaˬ hkʼe te gʼaˇ tuˬ le? Nawˬ Yaˬhoˉvaˬ htaꞈ gʼaˇ va ve kʼo haꞈ hanˉ ve cawˬ leh yeunˇ hkanˍ gʼaˇ ve. Ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ haꞈ hanˉ ve gʼa cawˬ ve yoˬ. (Yaˍkoˆ 5:11) “Yeunˇ hkanˍ ve” Yaˍkoˆ kʼoˆ ve tcuhˉ kuiˬ lehˬ, chaw teˇ gʼaˇ teˇ kaˬ tiˉ huˉ ve htaꞈ kʼoˆ gaˇ ve yoˬ. Maꞈ yaˇ teˇ gʼaˇ yawˇ huˉ jaw kuiˬ lo haꞈ hanˉ ve hkʼaw huˉ ve kʼo, canˇ paˍ ca bawˆ la ve htawˇ maˇ hpaw˗e ve htaꞈ dawˇ nyi sheˍ.

19. Tcuh yaˇ Pawˇluꞈ ve awˬ lawn htaꞈ ngaˬ hui hkʼaˬ hkʼe henˇ yuˬ gʼa ve le?

¹⁹ Tcuhˇ yaˇ Pawˇluꞈ lehˬ haꞈ hanˉ leh yeunˇ hkanˍ ve daꞈ ve henˇ yuˬ tuˬ hpehꞈ ve yoˬ. Teˇ pawˆ pawˆ yawˇ awˬ gʼaˇ nuˇ ve tehꞈ dawˇ ve htawˇ, yawˇ Yaˬhoˉvaˬ htaꞈ gʼaˇ va ve pa taw, yeunˇ hkanˍ gʼaˇ ve yoˬ. (2 Kawˇrenˍhtuˆ 12:8-10; Hpiˇliˇpiˆ 4:13) Ngaˬ hui nyi ma nuˇ nehˬ leh Yaˬhoˉvaˬ htaꞈ ga laˇ tcuh ve kʼo, ngaˬ hui kaꞈ awˬ gʼaˇ gʼa leh haꞈ hanˉ gʼa ve yoˬ.—Yaˍkoˆ 4:10.

20-21. Ngaˬ hui aˬ htoꞈ ma awˬ lawn htaꞈ yonˍ gʼa ve le?

²⁰ Ngaˬ hui shoꞈ shaꞈ ve gʼa hpuˇ ve lehˬ, Yaˬhoˉvaˬ ciˍ yanˍ laˇ ve maˇ heˆ tehꞈ yonˍ gʼa ve yoˬ. Yaˍkoˆ ngaˬ hui htaꞈ tawˆ hkanˍ laˇ ve, “venˇ baˆ beˬ ve htaꞈ gʼa hkanˍ ve teˇ yanˇ, Gʼuiˬ sha ngaˬ htaꞈ beˬ chehˇ ve yoˬ tehꞈ, teˇ gʼaˇ kaꞈ taˇ kʼoˆ. Awˬ lawn kʼo, haiˬ ve awˬ ceuˬ Gʼuiˬ sha htaꞈ beˬ maˇ hpehꞈ. Haiˬ ve te tuˬ Gʼuiˬ sha chaw teˇ gʼaˇ htaꞈ kaꞈ maˇ beˬ.” (Yaˍkoˆ 1:13) Awˬ lawn chi ngaˬ hui yonˍ gʼa˗oˬ htaˇ, Awˬ pa Yaˬhoˉvaˬ geh meuˆ daꞈ ve yoˬ.—Yaˍkoˆ 4:8.

²¹ Yaˬhoˉvaˬ lehˬ “maˇ pa puiˉ.” (Yaˍkoˆ 1:17) Awˉ lawˉ peuˇ ve Hkriꞈ yaˇ Gʼuiˬ sha ga piˇ leh shoꞈ shaꞈ ve htaꞈ tawˍ daꞈ gʼaˇ ve hkʼa shuˍ, chi beuꞈ teˇ co˗e ngaˬ hui kaꞈ shoꞈ shaꞈ ve htaꞈ tawˍ daꞈ gʼaˇ tuˬ Gʼuiˬ sha ga laˇ tuˬ yoˬ. Nawˬ cuˇ yiˍ, yonˍ ve, haꞈ hanˉ ve cawˬ tuˬ Gʼuiˬ sha geh bon lawˬ cawˇ ve yoˬ. Yawˇ nawˬ ve bon lawˬ hkawˇ htaꞈ hkʼawꞈ laˇ tuˬ yoˬ. Nawˬ shoꞈ shaꞈ ve htaꞈ gʼa hpuˇ ve htawˇ ha lehˬ gʼa tuˬ, yawˇ ga laˇ gʼa ve tehꞈ yonˍ gʼa ve yoˬ.