1. Awˬ viˉ awˬ nyi yaˇ miˇ awˬ hpawˇ heuˆ tuˬ dawˇ ve kʼo, a shu yawˇ awˬ to htaꞈ aˬ htoꞈ ma na nyi cawˇ ve le?

 Hkriꞈ yaˇ teˇ gʼaˇ le le lehˬ Yeˍsuˆ biˇ jaˇ ve sheh kʼai paˍ kanˇ paˆ awˬ hawˉ lo chehˇ ve yoˬ. Yaꞈ hkʼaˇ, yaˇ miˇ teˇ gʼaˇ awˬ hpawˇ heuˆ ve kʼo, awˬ hpawˇ maˇ biˇ ve chaw hpehꞈ ve kanˇ paˆ awˬ hawˉ lo chehˇ ve yoˬ. Hkʼe te leh, shoꞈ shaꞈ ve awˬ lawn cawˬ ve yoˬ. Yaˇ miˇ awˬ hpawˇ heuˆ tuˬ dawˇ ve kʼo, a shu yawˇ awˬ to htaꞈ na nyi cawˇ ve, ‘hawˉ hkʼaˆ chi teˇ gʼaˇ daꞈ ve yehˬ shehˍ hpaˇ hpehꞈ gʼa tuˬ aˬ htoꞈ ma cawˬ ve le? Yawˇ Hkriꞈ yaˇ ve kanˉ teˇ hpaˍ leh Gʼuiˬ sha ve kanˉ te tuˬ yawˇ a yeˇ uiˍ jaˇ tehꞈ shawˍ˗aw laˇ? Shawˍ ve kʼo, hawˉ hkʼaˆ chi teˇ gʼaˇ daꞈ ve yehˬ shehˍ hpaˇ hpehꞈ leh ngaˬ huiˉ maˬ Yaˬhoˉvaˬ geh meuˆ daꞈ gʼa tuˬ, yonˍ gʼa tuˬ aˬ htoꞈ ma te laˇ ve le?’ Leh yawˇ awˬ to htaꞈ kʼawꞈ na nyi cawˇ ve, ‘ngaˬ huiˉ maˬ ve yehˬ kʼa hkʼaw ha lehˬ gʼa tuˬ ngaˬ daꞈ ve te hkʼaˇ dawˇ hkʼaˇ aˬ htoꞈ ma cawˬ ve le? Ngaˬ a shu yawˇ awˬ pon tiˉ maˇ dawˇ nyi leh yeunˇ hkanˍ ve chaw hpehꞈ˗aw laˇ? Ngaˬ Yaˬhoˉvaˬ geh meuˆ daꞈ˗aw laˇ?’ (Cuˇ yiˍ piˇ ve 4:9, 12) Heuˆ daꞈ ve hkʼaw ha lehˬ gʼa tuˬ maˇ heuˆ daꞈ sheˍ htaˇ, gʼa dawˇ cheˆ ve yoˬ.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Awˬ viˉ awˬ nyi yaˇ miˇ laiˉ lanˬ gʼaˇ awˬ hpawˇ ve kanˇ paˆ awˬ hawˉ lo chehˇ ve daꞈ ve henˇ yuˬ tuˬ hpehꞈ leh chiˇ mvuh ve gʼa keunˍ jaˇ. Leh awˬ viˉ awˬ nyi yaˇ miˇ ka tiꞈ yeˬ ve chaw chi teˇ hpaˍ geh ngaˬ hui kanˉ gʼa te ve ha lehˬ jaˇ. Awˬ lawn chi ve hkʼaw na hkawˇ 3 maˬ htaꞈ caˉ daꞈ ve ngaˬ hui teˇ geh henˇ tuˬ yoˬ. (1) Awˬ miˇ ma shoꞈ shaꞈ ve aˬ htoꞈ ma gʼa hpuˇ tuˬ le? (2) Awˬ miˇ ma awˬ hpawˇ ve kanˇ paˆ awˬ hawˉ lo chehˇ tuˬ aˬ htoꞈ ma awˬ hkʼaˇ cawˬ ve le? (3) Awˬ hpawˇ awˬ miˇ ma lehˬ, Yeˍsuˆ, Aˍbiˆgeˬlaˆ, leh Maˍriˆ Yoˇsehꞈ ve awˬ miˇ ma leh Yeˍsuˆ ve awˬ e kaꞈ hpehꞈ ve yawˇ hui htaꞈ hkʼaˬ hkʼe henˇ yuˬ gʼa ve le?

3. Aˬ htoꞈ ma te biˇ ve awˬ ca maˇ hpehꞈ gʼa ve le?

³ Awˬ ca lehˬ Gʼuiˬ sha geh laˬ ve daꞈ jaˇ ve laꞈ shawnˍ hpehꞈ ve yoˬ. Yaꞈ hkʼaˇ, ngaˬ hui maˇ biˇ ve chaw hpehꞈ ve yoˬ. (1 Yoˇhanˬ 1:8) Liꞈ hpu hkʼaw kʼoˆ ve, heuˆ daꞈ ve chaw lehˬ shoꞈ shaꞈ ve maˇ heˆ leh ‘tuꞈ ve hkanˍ ve’ gʼa hpuˇ tuˬ yoˬ. (1 Kawˇrenˍhtuˆ 7:28) Awˬ miˇ ma shoꞈ shaꞈ ve aˬ htoꞈ ma gʼa hpuˇ tuˬ ve teˇ geh nyi sheˍ.

4. Aˬ htoꞈ ma te awˬ miˇ ma lehˬ awˬ hpawˇ ve kanˇ paˆ awˬ hawˉ lo chehˇ ve awˬ meꞈ awˬ hponˇ luˬ tuˬ te laˇ ve tehꞈ dawˇ ve le?

⁴ Awˬ miˇ ma ve chaw liˇ vaˇ liˇ lehˬ yawˇ awˬ hpawˇ ve kanˇ paˆ awˬ hawˉ lo chehˇ ve kʼo, awˬ meꞈ awˬ hponˇ luˬ tuˬ te laˇ ve tehꞈ dawˇ ve yoˬ. Aˍmeˬriˆkaꞈ mvuhˇ miˬ lo chehˇ ve Ma˗ri˗so kʼoˆ ve, “Yaˬhoˉvaˬ hawˉ hkʼaˆ htaꞈ sheh kʼai shehˍ hpaˇ te tcuh leh yaˇ miˇ hawˉ hkʼaˆ ve kanˇ paˆ awˬ hawˉ lo chehˇ tcuh ve tehꞈ ngaˬ shiˍ ve yoˬ. Yaꞈ hkʼaˇ, awˬ miˇ ma kaꞈ yawˆ yan ve gʼa cawˇ ve yoˬ. Yaˇ miˇ hawˉ hkʼaˆ hkʼa shuˍ gʼa cawˇ ve kʼoˆ ve chaw hui geh ngaˬ uiˍ ve yoˬ. Hkʼe te leh ngaˬ awˬ hpawˇ ve kanˇ paˆ awˬ hawˉ lo chehˇ tuˬ haˍ jaˇ.”

5. Hawˉ hkʼaˆ teˇ hpaˍ yaˇ miˇ htaꞈ caˉ daꞈ ve maˇ daꞈ ve dawˇ hkʼaˇ aˬ htoꞈ ma cawˬ ve le?

⁵ Awˬ hpawˇ teˇ hpaˍ dawˇ ve yaˇ miˇ lehˬ awˬ hkʼehꞈ nehˬ ve yoˬ. Aˍmeˬriˆkaꞈ mvuhˇ miˬ awˬ hawˉ hpawˇ lo chehˇ ve I˗vaw kʼoˆ ve, “ngaˬ chehˇ kuiˬ teˇ taw lo ve chaw awˍ caˇ htaˇ hawˉ hkʼaˆ awˉ lawˉ caˇ leh yaˇ miˇ lehˬ hkʼawꞈ nawˉ htaˇ gʼa caˇ ve yoˬ. Yaˇ miˇ lehˬ awˍ chiˇ gʼa te leh aˉ hkʼaw kaꞈ daꞈ kehˬ tuˬ gʼa te ve yoˬ. Yaꞈ hkʼaˇ, yaˇ paˍ teꞈ chiˉ maˇ gʼa te. Awˬ e, awˬ viˉ ma leh awˬ nyi ma te laˇ ve htaꞈ ceh law taˍ ve yoˬ. Leh yaˇ paˍ lehˬ yawˇ yehˬ chi ve hkʼaw jawˇ mawˇ hpehꞈ ve tehꞈ maˍ piˇ ve yoˬ.” Aˍshaˆ miˬ guiˬ lo chehˇ ve Yin˗linˍ kʼoˆ ve, “ngaˬ ve chaw ceuˬ tawˇ hkawˇ hkʼaw yaˇ miˇ lehˬ cuˇ yiˍ maˇ cawˬ cawˇ leh teꞈ chiˉ te puiˉ tuˬ kaꞈ maˇ loˍ. Aˉ hkʼaw lo ve kanˉ ceh te puiˉ kʼo lawꞈ˗oˬ. Nawˬ tawˇ teꞈ chiˉ yaw tuˬ maˇ loˍ.” Awˬ hpawˇ chi hkʼe dawˇ ve chaw lehˬ, haꞈ pehnˇ ve maˇ cawˬ leh Liꞈ hpu hkʼaw ve awˬ liˇ awˬ hkʼaˇ htaꞈ maˇ gʼa te. Yawˇ awˬ miˇ ma htaꞈ ha lehˬ tuˬ maˇ te piˇ. Yeˍsuˆ htaꞈ maˇ henˇ yuˬ leh Yaˬhoˉvaˬ nyi hkʼaˇ suh tuˬ kaꞈ maˇ te piˇ.—Eˇfeˇsuꞈ 5:28, 29; 1 Peˍtruˆ 3:7.

6. Awˬ miˇ ma Yaˬhoˉvaˬ geh meuˆ daꞈ tuˬ aˬ htoꞈ ma gʼa te cawˇ ve le?

⁶ Peuˬ taˉ ve teˇ lawn hkʼaw ngaˬ hui gʼa henˇ ve, yehˬ kʼa hkʼaw ve chaw ve yonˍ hkʼaˇ, te hkʼaˇ dawˇ hkʼaˇ leh awˬ suhˍ awˬ shaˍ hpawˇ htawˇ gʼa nyi haꞈ shaˉ piˇ ve tehꞈ Yaˬhoˉvaˬ yehˬ shehˍ hpaˇ htaꞈ kʼoˆ piˇ ve yoˬ. (1 Tiˆmoˉseˍ 5:8) Yaꞈ hkʼaˇ, awˬ miˇ ma teˇ nyi le le Liꞈ hpu gʼaw tuˬ gʼa shawˍ teh ve, yawˇ gʼaw ve htaꞈ hkʼa dehꞈ gʼa dawˇ nyi ve, leh nyi ma awˬ tawˬ hkʼa gaˬ Yaˬhoˉvaˬ geh bon gʼa lawˬ ve yoˬ. Yaꞈ hkʼaˇ, chi sha ve maˇ heˆ. Awˬ lawn kʼo, awˬ miˇ ma kanˉ maˇ jaˇ leh chi htaꞈ te tuˬ awˬ gʼaˇ leh awˬ yanˇ maˇ cawˬ tehꞈ dawˇ ve yoˬ. Yaꞈ hkʼaˇ, awˬ yanˇ shawˍ teh tuˬ a yeˇ uiˍ jaˇ. Aˬ htoꞈ ma pa taw le? Awˬ lawn kʼo, Yaˬhoˉvaˬ teˇ gʼaˇ le le htaꞈ yawˇ geh meuˆ daꞈ tcuh gaˇ ve yoˬ.—Tcuh yaˇ 17:27.

7. Awˬ miˇ ma lehˬ awˬ hpawˇ ve kanˇ paˆ awˬ hawˉ lo chehˇ gʼa tuˬ aˬ htoꞈ ma ga piˇ ve le?

⁷ Awˬ miˇ ma lehˬ awˬ hpawˇ maˇ biˇ ve chaw hpehꞈ ve kanˇ paˆ awˬ hawˉ lo chehˇ tuˬ sha ve maˇ heˆ. Yaꞈ hkʼaˇ, yawˇ Liꞈ hpu hkʼaw cawˬ ve awˬ lawn htaꞈ na gʼa leh haꞈ yuˬ ve kʼo, yawˇ awˬ hpawˇ ve kanˇ paˆ awˬ hawˉ lo chehˇ tuˬ sha ve yoˬ.

8. Eˇfeˇsuꞈ liꞈ 5:22-24 hkʼaw kʼoˆ taˍ ve hkʼe, Hkriꞈ yaˇ hpehꞈ ve awˬ miˇ ma lehˬ aˬ htoꞈ ma te awˬ hpawˇ ve kanˇ paˆ awˬ hawˉ lo chehˇ ve le?

⁸ Hkriꞈ yaˇ hpehꞈ ve awˬ miˇ ma lehˬ, awˬ hpawˇ ve kanˇ paˆ awˬ hawˉ lo chehˇ ve yoˬ. Awˬ lawn kʼo, chi Yaˬhoˉvaˬ yawˇ htaꞈ te tcuh gaˇ ve awˬ ceuˬ hpehꞈ ve yoˬ. (Eˇfeˇsuꞈ 5:22-24 gʼaw sheˍ.) Yawˇ mvuhˇ naw ma hkʼoˆ ve Awˬ pa htaꞈ gʼaˇ va ve yoˬ. Leh Gʼuiˬ sha yawˇ htaꞈ haꞈ jaˇ ve tehꞈ shiˍ ve yoˬ. Gʼuiˬ sha yawˇ htaꞈ te tcuh laˇ ve teˇ ceuˬ le le yawˇ awˬ pon daꞈ jaˇ.—Bon maˍ ve 6:24; 1 Yoˇhanˬ 5:3.

9. Awˬ viˉ awˬ nyi yaˇ miˇ awˬ hpawˇ ve kanˇ paˆ awˬ hawˉ lo chehˇ ve kʼo, hkʼaˬ hkʼe hpehꞈ tuˬ le?

 ⁹ Miˬ guiˬ yaˇ hui lehˬ yaˇ miˇ Yaˬhoˉvaˬ ve awˬ liˇ tawˇ hkawˇ htaꞈ a yeˇ maˇ yuˬ tuˬ te piˇ ve yoˬ. Leh yawˇ awˬ hpawˇ ve kanˇ paˆ awˬ hawˉ lo chehˇ ve kʼo, awˬ meꞈ awˬ hponˇ maˇ cawˬ ve tehꞈ dawˇ tuˬ te piˇ ve yoˬ. Yaꞈ hkʼaˇ, chaw chi teˇ hpaˍ Yaˬhoˉvaˬ Gʼuiˬ sha htaꞈ maˇ shiˍ. Yaˬhoˉvaˬ lehˬ yaˇ miˇ yawˇ ve yaˇ awˬ hpfuhˇ hkʼaˆ jaˇ ve tehꞈ shawˍ ve yoˬ. Gʼuiˬ sha yawˇ hui htaꞈ awˬ meꞈ awˬ hponˇ luˬ tuˬ maˇ te piˇ tcuh. Yaˬhoˉvaˬ kʼoˆ ve hkʼe, awˬ viˉ awˬ nyi yaˇ miˇ awˬ hpawˇ ve kanˇ paˆ awˬ hawˉ lo chehˇ ve kʼo, yehˬ kʼa hkʼaw gawˬ lehˍ cawˬ tuˬ ga piˇ ve yoˬ. (Chiˇ mvuh ve 119:165) Chi hkʼe te ve kʼo, yawˇ ve awˬ hpawˇ, yawˇ awˬ to leh yaˇ kaꞈ awˬ bon gʼa tuˬ yoˬ.

10. Hkeh˗law kʼoˆ ve tawˇ hkawˇ htaꞈ ngaˬ hui aˬ htoꞈ ma henˇ yuˬ gʼa ve le?

¹⁰ Yaˬhoˉvaˬ lehˬ hawˉ hkʼaˆ htaꞈ kanˇ paˆ piˇ shehˍ hpaˇ hpehꞈ ve yoˬ. Awˬ miˇ ma awˬ hpawˇ ve kanˇ paˆ awˬ hawˉ lo chehˇ ve kʼo, yawˇ Yaˬhoˉvaˬ htaꞈ haꞈ leh yawˆ yan ve tehꞈ hpeuꞈ maw piˇ ve yoˬ. Aˍmeˬriˆkaꞈ mvuhˇ miˬ awˬ hawˉ hpawˇ lo chehˇ ve Hkeh˗law kʼoˆ ve, “ngaˬ hpawˇ teˇ pawˆ pawˆ te yaꞈ ve yoˬ. Yawˇ te yaꞈ htaˇ ngaˬ te ve awˬ ceuˬ lehˬ Yaˬhoˉvaˬ geh meuˆ daꞈ ve awˬ hpfuhˇ hkʼaˬ hkʼe taw hkʼaˆ ve shiˍ tuˬ hpeuꞈ maw piˇ ve yoˬ. Hkʼe te leh, ngaˬ yawˇ ve kanˇ paˆ awˬ hawˉ lo chehˇ ve yoˬ. Awˬ lawn kʼo, Awˬ pa Yaˬhoˉvaˬ htaꞈ nyi hkʼaˇ suh tcuh gaˇ ve yoˬ.”

11. Aˬneˆ venˇ baˆ hpehˇ piˇ tuˬ aˬ htoꞈ ma ga piˇ ve le? Leh yawˇ kʼoˆ ve htaꞈ ngaˬ hui aˬ htoꞈ ma henˇ gʼa ve le?

¹¹ Awˬ hpawˇ awˬ miˇ ma htaꞈ a yeˇ maˇ te leh yawˇ ve dawˇ hkʼaˇ htaꞈ kaꞈ a yeˇ maˇ yuˬ piˇ ve kʼo, yawˇ awˬ hpawˇ ve kanˇ paˆ awˬ hawˉ lo chehˇ leh yawˆ yan tuˬ haˍ jaˇ. Aˬneˆ hkʼaˬ hkʼe te ve teˇ geh nyi sheˍ. Yawˇ kʼoˆ ve, “teˇ gʼaˇ le le kaꞈ te yaꞈ ve tehꞈ ngaˬ tawnˇ taˍ ve yoˬ. Ngaˬ hpawˇ te yaꞈ htaˇ, ngaˬ maˇ beuꞈ leh awˬ lawn oˇ ve htaꞈ maˇ tawnˇ taˍ. Yaˬhoˉvaˬ hkʼa shuˍ ngaˬ venˇ baˆ hpehˇ piˇ˗oˬ htaˇ, nyi ma gawˬ lehˍ cawˬ ve yoˬ.” (Chiˇ mvuh ve 86:5) Awˬ miˇ ma awˬ hpawˇ htaꞈ venˇ baˆ hpehˇ piˇ ve kʼo, awˬ hpawˇ ve kanˇ paˆ awˬ hawˉ lo chehˇ tuˬ sha ve yoˬ.

12. Liꞈ hpu hkʼaw aˬ htoꞈ ma ve awˬ lawn cawˬ ve le?

¹² Chaw teˇ hpaˍ dawˇ ve, shu ve kanˇ paˆ awˬ hawˉ lo chehˇ ve chaw lehˬ awˬ gʼaˇ nuˇ ve chaw hpehꞈ ve yoˬ. Chi awˬ tehˬ maˇ heˆ. Liꞈ hpu hkʼaw shu ve kanˇ paˆ awˬ hawˉ lo chehˇ ve chaw laiˉ gʼaˇ  cawˬ ve yoˬ. Yaꞈ hkʼaˇ, yawˇ hui haꞈ hanˉ ve chaw hpehꞈ ve yoˬ. Yeˍsuˆ, Aˍbiˆgeˬlaˆ, leh Maˍriˆ yawˇ hui ve awˬ lawn htaꞈ teˇ geh nyi sheˍ.

13. Aˬ htoꞈ ma te Yeˍsuˆ Yaˬhoˉvaˬ ve kanˇ paˆ awˬ hawˉ lo chehˇ ve le? Kʼoˆ maˍ laˇ sheˍ.

¹³ Yeˍsuˆ Yaˬhoˉvaˬ ve kanˇ paˆ awˬ hawˉ lo chehˇ ve yoˬ. Yaꞈ hkʼaˇ, yawˇ chi hkʼe te ve lehˬ yawˇ cuˇ yiˍ maˇ cawˬ leh teꞈ chiˉ te maˇ puiˉ ve maˇ heˆ. Ngaˬ hui shiˍ ve Yeˍsuˆ lehˬ cuˇ yiˍ cawˬ jaˇ. Awˬ lawn kʼo, yawˇ maˍ htaˇ hkʼa dehꞈ na gʼa ve yoˬ. (Yoˇhanˬ 7:45, 46) Yaˬhoˉvaˬ lehˬ Yeˍsuˆ te puiˉ te hpehꞈ ve htaꞈ yonˍ gʼa jaˇ. Hkʼe te leh, Yeˍsuˆ htaꞈ mvuhˇ naw ma leh miˬ guiˬ kaꞈ gʼa ga hpanˍ tcuh ve yoˬ. (Tawˇ naˉ ve 8:30; Heˍbrehˇ 1:2-4) Leh Yeˍsuˆ kʼawꞈ teꞈ tu la peuˬ hkʼawꞈ nawˉ, Yaˬhoˉvaˬ lehˬ “mvuhˇ naw ma hkʼoˆ leh miˬ guiˬ hkʼoˆ ve kanˇ paˆ hkʼa peu˗eˬ ngaˬ htaꞈ peꞈ laˇ peuˬ.” (Maꞈhtehˍ 28:18) Yeˍsuˆ chi hkʼe taw taw cheuˬ ve htawˇ, Yaˬhoˉvaˬ ga laˇ tuˬ lawˬ sheˍ ve yoˬ. Aˬ htoꞈ ma pa taw le? Awˬ lawn kʼo, yawˇ Yaˬhoˉvaˬ htaꞈ haꞈ ve yoˬ.—Yoˇhanˬ 14:31

14. (a) Yaˬhoˉvaˬ yaˇ miˇ htaꞈ nyi ve awˬ hkʼaˇ awˬ hpawˇ aˬ htoꞈ ma henˇ yuˬ gʼa ve le? (b) Tawˇ naˉ ve liꞈ kaˇ nanˉ uiˍ 31 hkʼaw awˬ hpawˇ aˬ htoꞈ ma henˇ yuˬ gʼa ve le?

¹⁴ Awˬ hpawˇ henˇ yuˬ tuˬ awˬ pon. Yaˬhoˉvaˬ awˬ miˇ ma htaꞈ awˬ hpawˇ ve kanˇ paˆ awˬ hawˉ lo chehˇ tcuh ve htawˇ, yaˇ miˇ hawˉ hkʼaˆ aꞈ kehˉ awˬ hkʼehꞈ nehˬ ve tehꞈ yawˇ maˇ dawˇ. Chi htaꞈ ngaˬ hui na gʼa ve yoˬ. Awˬ lawn kʼo, mvuhˇ naw ma hkʼoˆ Yeˍsuˆ geh teˇ geh uˉ peunˍ tuˬ Yaˬhoˉvaˬ hawˉ hkʼaˆ leh yaˇ miˇ htaꞈ leuˆ yuˬ ve yoˬ. (Gaˍlaˍtiˆ 3:26-29) Yaˬhoˉvaˬ Yeˍsuˆ htaꞈ yonˍ gʼa leh kanˇ paˆ piˇ ve tehꞈ hpeuꞈ maw laˇ ve yoˬ. Cuˇ yiˍ cawˬ ve awˬ hpawˇ kaꞈ Yaˬhoˉvaˬ htaꞈ henˇ yuˬ leh awˬ miˇ ma htaꞈ kanˇ paˆ gʼa piˇ ve yoˬ. Liꞈ hpu hkʼaw kʼoˆ ve, kaiˬ ve awˬ miˇ ma lehˬ yehˬ hkʼaw kanˉ laiˉ ceuˬ te gʼa leh tanˇ kaˬ hkʼaˇ kaꞈ te gʼa ve yoˬ. (Tawˇ naˉ ve 31:15, 16, 18 gʼaw sheˍ.) Yawˇ awˬ ceˬ hpehꞈ leh teꞈ chiˉ dawˇ hkʼaˇ piˇ maˇ gʼa ve maˇ heˆ. Yaꞈ hkʼaˇ, awˬ hpawˇ awˬ miˇ ma htaꞈ yonˍ gʼa leh yawˇ ve dawˇ hkʼaˇ kaꞈ na ve yoˬ. (Tawˇ naˉ ve 31:11, 26, 27 gʼaw sheˍ.) Awˬ hpawˇ awˬ miˇ ma htaꞈ chi hkʼe yawˆ yan piˇ htaˇ, yawˇ kaꞈ awˬ hpawˇ ve kanˇ paˆ awˬ hawˉ lo chehˇ ve ha lehˬ jaˇ.

15. Awˬ miˇ ma Yeˍsuˆ ve awˬ lawn htaꞈ aˬ htoꞈ ma henˇ yuˬ gʼa ve le?

¹⁵ Awˬ miˇ ma awˬ pon henˇ yuˬ tuˬ. Yeˍsuˆ daꞈ jaˇ ve kanˉ laiˉ ceuˬ te gʼa ve htawˇ, yawˇ Yaˬhoˉvaˬ ve kanˇ paˆ awˬ hawˉ lo chehˇ ve lehˬ, yawˇ ve awˬ meꞈ awˬ hponˇ luˬ ve tehꞈ maˇ dawˇ. (1 Kawˇrenˍhtuˆ 15:28; Hpiˇliˇpiˆ 2:5, 6) Kaiˬ ve awˬ miˇ ma kaꞈ Yeˍsuˆ ve awˬ lawn htaꞈ henˇ yuˬ ve yoˬ. Yawˇ awˬ hpawˇ ve kanˇ paˆ awˬ hawˉ lo chehˇ ve lehˬ, awˬ meꞈ awˬ hponˇ luˬ ve tehꞈ maˇ dawˇ. Yaꞈ hkʼaˇ, awˬ hpawˇ htaꞈ ga piˇ ve yoˬ. Leh yawˇ chi hkʼe te ve lehˬ, awˬ hpawˇ htaꞈ haꞈ ve ceh tiˉ maˇ heˆ. A yeˇ uiˍ jaˇ ve lehˬ, yawˇ Yaˬhoˉvaˬ htaꞈ haꞈ leh yawˆ yan ve yoˬ.

16. 1 Saˍmo˗eˍlaˆ liꞈ 25:3, 23-28 hkʼaw kʼoˆ taˍ ve hkʼe, Aˍbiˆgeˬlaˆ shoꞈ shaꞈ ve aˬ htoꞈ ma gʼa hpuˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹⁶ Aˍbiˆgeˬlaˆ ve awˬ hpawˇ lehˬ Naˍbaˍlaˆ meh ve yoˬ. Naˍbaˍlaˆ lehˬ uiˍ muiˬ caˆ muiˬ leh yawˇ awˬ pon tiˉ dawˇ nyi leh shu ve awˬ bon htaꞈ maˇ shiˍ. Chi hkʼe hpehꞈ ve htawˇ Aˍbiˆgeˬlaˆ yawˇ htaꞈ baˬ tuˬ maˇ te. Tawˇ pa haˉ te kʼo, Daˍviˆ leh yawˇ ve chaw Naˍbaˍlaˆ htaꞈ ca tiˇ pehˍ˗e te htaˇ, Aˍbiˆgeˬlaˆ teꞈ chiˉ maˇ shiˍ ve hkʼe maˇ te. Yaꞈ hkʼaˇ, yawˇ ve awˬ hpawˇ leh yehˬ kʼa hkʼaw ve chaw htaꞈ ga piˇ gʼa tuˬ yawˇ te gʼa ve hkʼe te ve yoˬ. Dawˇ nyi sheˍ, maꞈ yaˇ laꞈ caˉ hkʼa biˇ cawˬ ve 400 gʼaˇ htaꞈ yawˇ gʼa hpuˇ daꞈ tuˬ haꞈ hanˉ ve hkʼaˬ hkʼe taw gʼa cawˬ ve, leh Daˍviˆ htaꞈ awˬ hkʼaˇ gʼa kʼoˆ maˍ piˇ ve, awˬ hkʼoˆ kaꞈ yawˇ ve awˬ hpawˇ te yaꞈ ve htaꞈ gʼa hkanˍ yuˬ ve yoˬ. (1 Saˍmo˗eˍlaˆ 25:3, 23-28 gʼaw sheˍ.) Haꞈ hanˉ ve yaˇ miˇ chi teˇ gʼaˇ htaꞈ Yaˬhoˉvaˬ yehˇ leh Daˍviˆ maˇ gʼa te yaꞈ tuˬ, ga laˇ ve tehꞈ shiˍ ve yoˬ.

17. Awˬ hpawˇ lehˬ Daˍviˆ leh Aˍbiˆgeˬlaˆ htaꞈ aˬ htoꞈ ma henˇ yuˬ gʼa ve le?

¹⁷ Awˬ hpawˇ henˇ yuˬ tuˬ awˬ pon. Aˍbiˆgeˬlaˆ lehˬ cuˇ yiˍ cawˬ jaˇ. Leh Daˍviˆ yawˇ ve hkawˇ na ve kaꞈ cuˇ yiˍ cawˬ ve yoˬ. Hkʼe te leh, yawˇ hteˇ  ve chaw htaꞈ maˇ gʼa tiˇ pehˍ. Chi hkʼa shuˍ cuˇ yiˍ cawˬ ve awˬ hpawˇ htawˇ, awˬ miˇ ma ve dawˇ hkʼaˇ htaꞈ na leh a yeˇ uiˍ ve awˬ lawn maˇ gʼa dawˇ cheˆ sheˍ htaˇ awˉ lawˉ dawˇ nyi ve yoˬ. Awˬ miˇ ma ve dawˇ hkʼaˇ yawˇ maˇ gʼa te yaꞈ tuˬ ga laˇ ve tehꞈ shiˍ ve yoˬ.

18. Awˬ miˇ ma Aˍbiˆgeˬlaˆ ve awˬ lawn htaꞈ aˬ htoꞈ ma henˇ yuˬ gʼa ve le?

¹⁸ Awˬ miˇ ma awˬ pon henˇ yuˬ tuˬ. Awˬ hpawˇ shaˉhkiˆhkanˍ ve chaw maˇ hpehꞈ leh Liꞈ hpu hkʼaw ve awˬ liˇ awˬ hkʼaˇ htaꞈ maˇ gʼaꞈ te ve htawˇ, awˬ miˇ ma Yaˬhoˉvaˬ htaꞈ haꞈ leh yawˆ yan ve kʼo, yawˇ ve yehˬ kʼa awˬ bon gʼa tuˬ yoˬ. Awˬ hpawˇ htaꞈ baˬ tuˬ yawˇ awˬ hkʼaˇ maˇ ca. Yaꞈ hkʼaˇ, awˬ hpawˇ Yaˬhoˉvaˬ htaꞈ shiˍ la tuˬ ga piˇ gʼa tuˬ awˬ hpawˇ ve kanˇ paˆ awˬ hawˉ lo chehˇ leh yawˆ yan piˇ ve yoˬ. (1 Peˍtruˆ 3:1, 2) Yawˇ ve awˬ hpawˇ Yaˬhoˉvaˬ htaꞈ oˉ kʼoˍ maˇ pui ve htawˇ, yawˇ Yaˬhoˉvaˬ htaꞈ ka tiꞈ yeˬ leh awˬ hpawˇ ve kanˇ paˆ awˬ hawˉ lo chehˇ ve htaꞈ Yaˬhoˉvaˬ awˬ hpfuhˇ shiˍ ve yoˬ.

19. Awˬ miˇ ma awˬ hpawˇ hkawˇ maˇ na cawˇ ve hkʼaˬ hkʼe htaˇ le?

¹⁹ Awˬ miˇ ma awˬ hpawˇ ve kanˇ paˆ awˬ hawˉ lo chehˇ ve htawˇ, yawˇ awˬ miˇ ma htaꞈ Yaˬhoˉvaˬ ve awˬ liˇ awˬ hkʼaˇ leh Liꞈ hpu hkʼaw maˇ hawˍ daꞈ ve awˬ ceuˬ te tcuh laˇ htaˇ, awˬ hpawˇ hkawˇ maˇ na. Tawˇ pa haˉ te kʼo, awˬ hpawˇ Shaˉhkiˆhkanˍ ve chaw maˇ hpehꞈ leh awˬ miˇ ma htaꞈ heˍ tcuh ve, mawˇ hkʼawˇ tcuh ve, maˇ heˆ leh Yaˬhoˉvaˬ maˇ dawˇ cawˇ ve awˬ ceuˬ te tcuh laˇ htaˇ maˇ te. Hkriꞈ yaˇ teˇ gʼaˇ le le leh awˬ hpawˇ heuˆ˗oˬ ve yaˇ miˇ, Yaˬhoˉvaˬ htaꞈ ka tiꞈ gʼa yeˬ ve yoˬ. Leh Liꞈ hpu hkʼaw maˇ hawˍ daꞈ ve awˬ ceuˬ te tcuh laˇ htaˇ maˇ te. Yaꞈ hkʼaˇ, yawˇ chi hkʼe maˇ te ve haꞈ hanˉ ve hkʼaw gʼa kʼoˆ maˍ piˇ ve yoˬ.—Tcuh yaˇ 5:29.

20. Maˍriˆ Yaˬhoˉvaˬ geh meuˆ daꞈ ve tehꞈ ngaˬ hui hkʼaˬ hkʼe te shiˍ gʼa ve le?

²⁰ Maˍriˆ Yaˬhoˉvaˬ geh meuˆ daꞈ ve ngaˬ hui hkʼaˬ hkʼe te shiˍ gʼa ve le? Tawˇ pa haˉ te kʼo, Baˆtiˆsaˬ piˇ paˍ Yoˇhanˬ awˬ e Eˇliˇsaˍbehˆ geh yawˇ tawˇ yaw daꞈ htaˇ, yawˇ Heˍbrehˇ ve Liꞈ hpu awˬ tawn 20 tawn hpaˆ kʼoˆ ve yoˬ. Chi htaꞈ nyi htaˇ yawˇ Liꞈ hpu awˬ tawn hkʼa dehꞈ shiˍ ve yoˬ. (Luˉkaꞈ 1:46-55) Dawˇ nyi sheˍ, Maˍriˆ Yoˇsehꞈ geh heuˆ daꞈ tuˬ ka tiꞈ te˗oˬ ve htawˇ, Maˍriˆ Yaˬhoˉvaˬ ve yaˇ hu leh paw la tuˬ yoˬ tehꞈ mvuhˇ naw ma tcuh yaˇ Yoˇsehꞈ htaꞈ cuˇ leh Maˍriˆ htaꞈ ca kʼoˆ piˇ tcuh ve maˇ heˆ. Yaꞈ hkʼaˇ, mvuhˇ naw ma tcuh yaˇ Maˍriˆ htaꞈ hteˇ˗ehꞈ kʼoˆ piˇ tcuh ve  yoˬ. (Luˉkaꞈ 1:26-33) Maˍriˆ Yaˬhoˉvaˬ ve yaˇ htaꞈ haꞈ leh hu gʼa tuˬ yoˬ tehꞈ Yaˬhoˉvaˬ Maˍriˆ htaꞈ yonˍ gʼa ve yoˬ. Leh Yeˍsuˆ kʼawꞈ teꞈ tu la leh mvuhˇ naw ma hkʼoˆ taˆ˗e peuˬ hkʼawꞈ nawˉ kaꞈ, Maˍriˆ Yaˬhoˉvaˬ geh meuˆ daꞈ sheˍ ve tehꞈ ngaˬ hui yonˍ gʼa ve yoˬ.—Tcuh yaˇ 1:14.

21. Awˬ hpawˇ Maˍriˆ ve awˬ lawn htaꞈ aˬ htoꞈ ma henˇ yuˬ gʼa ve le?

²¹ Awˬ hpawˇ henˇ yuˬ tuˬ awˬ pon. Cuˇ yiˍ cawˬ ve awˬ hpawˇ lehˬ, awˬ miˇ ma Liꞈ hpu hkʼaw hkʼa dehꞈ shiˍ ve htaꞈ ha lehˬ ve yoˬ. Awˬ miˇ ma yawˇ aꞈ kehˉ cheuˬ la ve htaꞈ yawˇ maˇ kawˆ. Leh awˬ miˇ ma yehˬ shehˍ hpaˇ ve aˉ yaˇ htaꞈ veh la ve kaꞈ yawˇ maˇ kawˆ. Yawˇ shiˍ ve Liꞈ hpu hkʼaw hkʼa dehꞈ shiˍ ve yaˇ miˇ lehˬ, yehˬ kʼa htaꞈ ga gʼa jaˇ. Awˬ hpawˇ tawnˇ taˍ cawˇ ve, awˬ miˇ ma yawˇ aꞈ kehˉ liꞈ henˇ mvuh ve htawˇ, yehˬ kʼa hkʼaw oˉ kʼoˍ pui ve leh Hkriꞈ yaˇ ve kanˉ te ve hkʼaw awˬ hpawˇ gʼa sheh kʼai ve yoˬ.—Eˇfeˇsuꞈ 6:4.

22. Awˬ miˇ ma Maˍriˆ ve awˬ lawn htaꞈ aˬ htoꞈ ma henˇ yuˬ gʼa ve le?

²² Awˬ miˇ ma awˬ pon henˇ yuˬ tuˬ. Hkriꞈ yaˇ ve kanˉ te ve hkʼaw awˬ hpawˇ sheh kʼai ve htawˇ, awˬ miˇ ma lehˬ yonˍ hkʼaˇ htaꞈ kaꞈ gʼa nyi haꞈ shaˉ ve tehꞈ gʼa tawnˇ taˍ cawˇ ve yoˬ. (Gaˍlaˍtiˆ 6:5) Chi hkʼe te gʼa tuˬ a shu yawˇ hkʼaˇ yawˇ Liꞈ hpu henˇ ve leh dawˇ nyi ve awˬ yanˇ gʼa shawˍ teh cawˇ ve yoˬ. Chi yawˇ Yaˬhoˉvaˬ htaꞈ haꞈ leh yawˆ yan tuˬ te piˇ leh awˬ hpawˇ ve kanˇ paˆ awˬ hawˉ lo chehˇ ve ha lehˬ ve yoˬ.

23. Awˬ miˇ ma awˬ hpawˇ ve kanˇ paˆ awˬ hawˉ lo chehˇ ve kʼo, yawˇ awˬ to, yehˬ kʼa, leh Hkriꞈ yaˇ awˬ moˍ hkʼaw awˬ bon hkʼaˬ hkʼe cawˬ tuˬ le?

²³ Awˬ miˇ ma Yaˬhoˉvaˬ htaꞈ haꞈ ve pa taw awˬ hpawˇ ve kanˇ paˆ awˬ hawˉ lo chehˇ ve chaw lehˬ, awˬ hpawˇ ve kanˇ paˆ awˬ hawˉ lo maˇ chehˇ ve chaw aꞈ kehˉ ha lehˬ ve yoˬ. Yawˇ yaˇ nehˬ awˬ pon daꞈ ve henˇ yuˬ tuˬ hpehꞈ ve yoˬ. Yehˬ kʼa leh Hkriꞈ yaˇ awˬ moˍ hkʼaw kaꞈ ha lehˬ jaˇ tuˬ te piˇ ve yoˬ. (Tiˇtuˆ 2:3-5) Chi beuꞈ teˇ co˗e Yaˬhoˉvaˬ ve kanˉ ka tiꞈ yeˬ ve hkʼaw te ve chaw maˇ˗awˍ ve lehˬ yaˇ miˇ hpehꞈ ve yoˬ. (Chiˇ mvuh ve 68:11) Hawˉ hkʼaˆ leh yaˇ miˇ hpehꞈ ve htawˇ maˇ kʼoˆ, Hkriꞈ yaˇ awˬ moˍ hkʼaw teˇ gʼaˇ le le a yeˇ uiˍ ve awˬ vuiˬ cawˬ ve yoˬ. Awˬ gʼuˇ suhˍ teˇ lawn hkʼaw awˬ lawn chi htaꞈ ngaˬ hui henˇ tuˬ yoˬ.