Hpiˇliˇpaiˍ mvuhˇ miˬ Ba˗kin venˇ tanˇ kaˬ hkʼaˇ te kuiˬ teˇ taw lo teˇ nyi htaˇ, yaˇ miˇ 2 gʼaˇ te toˇ chehˇ ve yoˬ. Chaw guiˇ kuiˬ lo liꞈ kʼoˆ keu leh caꞈ tuˬ awˬ paˇ lo yaˇ miˇ teˇ gʼaˇ huˉ chehˇ ve htaꞈ yawˇ hui gʼa mawˬ ve yoˬ. Yaꞈ hkʼaˇ, yawˇ hui a yeˇ maˇ yuˬ leh hpanˍ kʼai ve yoˬ. Yawˇ hui awˬ viˉ awˬ nyi Heh˗ren kʼehˉ suhˍ lehˬ te laˇ ve htaꞈ tawnˇ gʼa ve yoˬ.

Peuˬ leh yawˇ hui kaꞈ chaw gʼawˬ caˇ ve kaˇ ciˇ kʼawꞈ˗e ve yoˬ. Yawˇ hui kaˇ hkʼaw chehˇ htaˇ, hpawnˬ daꞈ kuiˬ yehˬ htaꞈ JW liꞈ mehˆ lonˉ nehˉ taˍ ve htaꞈ gʼa mawˬ ve yoˬ. Chi ve yaꞈ sheh htaˇ ve liꞈ kʼoˆ keu leh caꞈ tuˬ htaꞈ shuˍ ve tehꞈ yawˇ hui tawnˇ gʼa ve yoˬ. Yawˇ hui kaˇ hkʼaw yaꞈ˗e leh choˬ kaˬ lo hpawnˬ daꞈ ve hkʼaˬ teˇ nyi htaˇ cawˬ ve ca nyi ve yoˬ. Leh hpawnˬ daꞈ kuiˬ yehˬ chi ve hkʼaw Hkriꞈ yaˇ awˬ moˍ laiˉ moˍ yehˇ chehˇ ve htaꞈ yawˇ hui gʼa mawˬ ve yoˬ.

Leh yawˇ huiˉ maˬ kaꞈ hpawnˬ daꞈ˗e ve yoˬ. Yawˇ hui a shu htaꞈ mawˬ ve le? Heh˗ren htaꞈ mawˬ daꞈ ve yoˬ! Yawˇ hui htaꞈ kʼehˉ suhˍ lehˬ te laˇ ve yaˇ miˇ lehˬ, Heh˗ren hpehꞈ ve tehꞈ laꞈ haˉ tawnˇ gʼa ve yoˬ. Heh˗ren kʼoˆ ve, “Yawˇ huiˉ maˬ ngaˬ geh juˇ laˬ htaˇ ngaˬ a chiˉ cheˆ˗ehꞈ kʼai ve yoˬ. Ngaˬ aˬ htoꞈ ma te yaꞈ ve le naˍ dawˇ ve yoˬ. Aˬ htoꞈ ma hpehꞈ la ve yawˇ huiˉ maˬ kaꞈ Heh˗ren htaꞈ kʼoˆ maˍ piˇ ve yoˬ.”

Yaˇ nehˬ chi ve 2 gʼaˇ hpawnˬ daꞈ leh awˬ viˉ awˬ nyi hui htaꞈ kaꞈ dawˇ cawˇ jaˇ. Yawˇ hui awˬ viˉ awˬ nyi geh awˬ chawˇ te daꞈ gʼa ve yoˬ. Awˬ viˉ awˬ nyi hpawnˬ daꞈ kuiˬ yehˬ hkʼaw daꞈ kehˬ tuˬ te chehˇ ve htaꞈ mawˬ htaˇ, yawˇ hui kaꞈ ga piˇ ve yoˬ. Yaˇ nehˬ oˇ ve 2 gʼaˇ hkʼaw ve teˇ gʼaˇ chi teˇ hkui Hpiˇliˇpaiˍ mvuhˇ miˬ lo maˇ chehˇ˗oˬ. Leh teˇ gʼaˇ kʼo hkʼaˬ htaˆ kaꞈ hpawnˬ daꞈ la leh Liꞈ hpu henˇ chehˇ ve yoˬ. Chi ve hkʼa peu˗eˬ lehˬ oˇ ve teˇ pawˆ kʼehˉ suhˍ lehˬ te laˇ ve pa taw yoˬ.