1. Yeˍsuˆ awˬ laꞈ gʼawˇ htaꞈ aˬ htoꞈ ma ve awˬ lawn hkʼa tawˍ lehˆ kʼoˆ piˇ ve le? (Awˬ htaꞈ hpawˇ ve awˬ han htaꞈ nyi sheˍ.)

 Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, yawˇ awˬ laꞈ gʼawˇ htaꞈ hkʼa tawˍ lehˆ kʼoˆ piˇ ve, “ngaˬ nawˬ hui htaꞈ haꞈ ve hkʼe, nawˬ hui htawˇ teˇ gʼaˇ leh teˇ gʼaˇ haꞈ daꞈ˗oꞈ.” Yawˇ kʼawꞈ kʼoˆ ve, “nawˬ hui teˇ gʼaˇ leh teˇ gʼaˇ haꞈ daꞈ ve kʼo, haꞈ daꞈ ve oˇ ve htaꞈ pa taw nawˬ hui ngaˬ ve awˬ laꞈ gʼawˇ hpehꞈ ve htaꞈ chaw hkʼa peu˗eˬ gʼa shiˍ tuˬ yoˬ.”—Yoˇhanˬ 13:34, 35.

2. Aˬ htoꞈ ma te ngaˬ hui teˇ gʼaˇ leh teˇ gʼaˇ haꞈ daꞈ ve a yeˇ uiˍ jaˇ ve le?

² Yeˍsuˆ kʼoˆ ve, ngaˬ nawˬ hui htaꞈ haꞈ ve hkʼe nawˬ hui htawˇ shu htaꞈ haꞈ ve kʼo, nawˬ hui ngaˬ ve awˬ laꞈ gʼawˇ hpehꞈ ve tehꞈ chaw hkʼa peu˗eˬ gʼa shiˍ tuˬ yoˬ. Awˬ lawn chi awˉ lawˉ peuˇ ve Hkriꞈ yaˇ teˇ co˗e htaˇ awˬ tehˬ hpehꞈ leh chi beuꞈ hpehꞈ ve yoˬ. Chi hkʼe te tuˬ chi teˇ hkui ve awˬ yanˇ maˇ sha ve htawˇ, ngaˬ hui teˇ gʼaˇ leh teˇ gʼaˇ haꞈ daꞈ ve a yeˇ uiˍ jaˇ tehꞈ hkʼa tawˍ lehˆ gʼa mawˬ ve yoˬ.

3. Awˬ lawn chi ve hkʼaw aˬ htoꞈ ma htaꞈ henˇ tuˬ le?

³ Ngaˬ hui maˇ biˇ ve chaw hpehꞈ ve pa taw, teˇ gʼaˇ leh teˇ gʼaˇ nyi ma awˬ tawˬ hkʼa gaˬ haꞈ daꞈ tuˬ haˍ jaˇ. Chi hkʼe hpehꞈ ve htawˇ, Yeˍsuˆ htaꞈ henˇ yuˬ cawˇ ve yoˬ. Cawˇ daꞈ hui daꞈ tuˬ te ve, chaw mehˆ hpfuhˇ htaꞈ maˇ nyi ve, hkehˉ chaw teˇ hpaˍ htaꞈ hkʼa dehꞈ haꞈ yuˬ ve, haꞈ daꞈ ve chi hkʼaˬ hkʼe ga laˇ gʼa ve awˬ lawn chi ve hkʼaw henˇ tuˬ yoˬ. Chi ve htaꞈ henˇ htaˇ, ‘haꞈ daꞈ ve maˇ sha ve htawˇ, awˬ viˉ awˬ nyi coˇ caˇ ve ngaˬ hkʼaˬ hkʼe henˇ yuˬ gʼa ve le?’ a shu yawˇ awˬ to htaꞈ na nyi cawˇ ve yoˬ.

4. Maꞈhtehˍ liꞈ 5:23, 24 hkʼaw kʼoˆ taˍ ve hkʼe, awˬ viˉ awˬ nyi ngaˬ hui htaꞈ maˇ daꞈ ve hpawˇ dawˇ leh ngaˬ hui geh awˬ lawn cawˬ ve htawˇ cawˇ daꞈ hui daꞈ te tuˬ hkʼaˬ hkʼe te cawˇ ve le?

⁴ Yeˍsuˆ maˍ laˇ ve, awˬ viˉ awˬ nyi ngaˬ hui htaꞈ maˇ daꞈ ve hpawˇ dawˇ leh awˬ lawn cawˬ ve htawˇ, cawˇ daꞈ hui daꞈ tuˬ a yeˇ uiˍ jaˇ. (Maꞈhtehˍ 5:23, 24 gʼaw sheˍ.) Ngaˬ hui Yaˬhoˉvaˬ htaꞈ nyi hkʼaˇ  suh tcuh gaˇ ve kʼo, shu geh gʼa hawˍ daꞈ ve tehꞈ Yeˍsuˆ maˍ laˇ ve yoˬ. Ngaˬ hui awˬ viˉ awˬ nyi geh cawˇ daꞈ hui daꞈ tuˬ coˇ caˇ leh te˗oˬ ve kʼo, Gʼuiˬ sha ha lehˬ tuˬ te piˇ ve yoˬ. Yaꞈ hkʼaˇ, ngaˬ hui awˬ viˉ awˬ nyi htaꞈ beuꞈ chehˇ sheˍ leh cawˇ daꞈ hui daꞈ tuˬ maˇ te ve kʼo, ngaˬ hui oˉ kʼoˍ pui ve htaꞈ Yaˬhoˉvaˬ maˇ haꞈ yuˬ laˇ taˬ.—1 Yoˇhanˬ 4:20.

5. Cawˇ daꞈ hui daꞈ te tuˬ Mainˉ awˬ pon haˍ jaˇ ve aˬ htoꞈ ma te piˇ ve le?

⁵ Teˇ pawˆ pawˆ kʼo, ngaˬ hui cawˇ daꞈ hui daꞈ te tuˬ haˍ jaˇ. Aˬ htoꞈ ma te chi hkʼe hpehꞈ ve le? Mainˉ * gʼa hpuˇ ve awˬ ceuˬ htaꞈ dawˇ nyi sheˍ. Awˬ viˉ awˬ nyi teˇ gʼaˇ yawˇ htaꞈ deˇ leh yawˇ ve awˬ lawn Hkriꞈ yaˇ awˬ moˍ hkʼaw ve chaw htaꞈ kʼoˆ maˍ piˇ ve yoˬ. Mainˉ nyi ma naˬ jaˇ. Yawˇ hkʼaˬ hkʼe te ve le? Yawˇ kʼoˆ ve, “ngaˬ yeunˇ hkanˍ maˇ gʼaˇ leh awˬ viˉ awˬ nyi oˇ ve teˇ gʼaˇ htaꞈ hehnˇ ve hkʼaw kʼoˆ piˇ ve yoˬ.” Peuˬ hkʼawꞈ nawˉ Mainˉ nyi ma luˬ ve yoˬ. Yawˇ oˇ ve teˇ gʼaˇ geh lawˬ hkawˉ leh cawˇ daꞈ tuˬ te ve yoˬ. Yaꞈ hkʼaˇ, oˇ ve teˇ gʼaˇ kaꞈ cawˇ daꞈ tuˬ maˇ te. Awˉ lawˉ htaˇ Mainˉ dawˇ ve, ‘yawˇ ngaˬ htaꞈ cawˇ daꞈ tuˬ maˇ te laˇ ve ngaˬ aˬ htoꞈ ma te coˇ caˇ leh ca te ve le?’ Awˬ gʼaˇ taˇ nuˇ tcuh tehꞈ toˇ nyi shehˍ hpaˇ yawˇ htaꞈ awˬ gʼaˇ piˇ ve yoˬ. Mainˉ hkʼaˬ hkʼe kʼawꞈ te ve le?

6. (a) Mainˉ cawˇ daꞈ hui daꞈ tuˬ hkʼaˬ hkʼe te ve le? (b) Mainˉ Kawˇlawˇsehˇ liꞈ 3:13, 14 hkʼaw ve hkʼaˬ hkʼe gʼaꞈ te ve le?

⁶ Mainˉ hkʼa dehꞈ dawˇ nyi leh yawˇ nyi ma nuˇ nehˬ ve maˇ cawˬ leh teˇ pawˆ pawˆ kʼo, yawˇ shu aꞈ kehˉ daꞈ ve tehꞈ dawˇ ve yoˬ. Yawˇ gʼa pa cawˇ ve tehꞈ shiˍ la ve yoˬ. (Kawˇlawˇsehˇ 3:8, 9, 12) Mainˉ yawˇ geh kʼawꞈ kʼai ve yoˬ. Yawˇ te ve awˬ ceuˬ lawˬ hkawˉ laˇ ve yoˬ tehꞈ nyi ma nuˇ nehˬ ve hkʼaw kʼoˆ piˇ ve yoˬ. Yawˇ oˇ ve teˇ gʼaˇ htaꞈ kaꞈ liꞈ bvuhꞈ piˇ ve yoˬ. Yawˇ nyi ma luˬ jaˇ leh oˇ ve teˇ gʼaˇ geh cawˇ daꞈ hui daꞈ gaˇ ve tehꞈ kʼoˆ piˇ ve yoˬ. Chi hkʼe ceh maˇ heˆ, oˇ ve teˇ gʼaˇ dawˇ cawˇ tuˬ laꞈ shawnˍ ehˉ Mainˉ vuiˬ leh ca piˇ ve yoˬ. Chi hkʼe te piˇ ve htawˇ, oˇ ve teˇ gʼaˇ Mainˉ htaꞈ beuꞈ chehˇ sheˍ leh venˇ baˆ maˇ hpehˇ piˇ. Awˬ viˉ awˬ nyi teˇ gʼaˇ leh teˇ gʼaˇ haꞈ daꞈ leh venˇ baˆ hpehˇ daꞈ˗oꞈ tehꞈ Yeˍsuˆ kʼoˆ ve htaꞈ Mainˉ na yuˬ ve yoˬ. (Kawˇlawˇsehˇ 3:13, 14 gʼaw sheˍ.) Ngaˬ hui awˬ viˉ awˬ nyi geh cawˇ daꞈ hui daꞈ tuˬ te˗oˬ ve htawˇ, yawˇ maˇ te laˇ sheˍ. Hkriꞈ yaˇ  awˬ tehˬ haꞈ daꞈ ve lehˬ yawˇ htaꞈ caˉ leh venˇ baˆ hpehˇ piˇ leh cawˇ daꞈ hui daꞈ tuˬ bon lawˬ piˇ sheˍ.—Maꞈhtehˍ 18:21, 22; Gaˍlaˍtiˆ 6:9.

7. (a) Ngaˬ hui hkʼaˬ hkʼe te tuˬ Yeˍsuˆ kʼoˆ laˇ ve le? (b) Awˬ viˉ awˬ nyi yaˇ miˇ teˇ gʼaˇ shoꞈ shaꞈ ve aˬ htoꞈ ma gʼa hpuˇ ve le?

⁷ Shu ngaˬ hui htaꞈ hkʼaˬ hkʼe te laˇ tcuh gaˇ ve kʼo, shu htaꞈ oˇ hkʼe gʼa te piˇ ve tehꞈ Yeˍsuˆ kʼoˆ laˇ ve yoˬ. Ngaˬ hui htaꞈ haꞈ laˇ ve chaw htaꞈ ceh haꞈ tehꞈ Yeˍsuˆ maˇ kʼoˆ laˇ. (Luˉkaꞈ 6:31-33) Awˬ viˉ awˬ nyi teˇ gʼaˇ nawˬ htaꞈ maˇ mawˬ ve hkʼe te leh tawˇ maˇ yaw laˇ ve kʼo, hkʼaˬ hkʼe te tuˬ le? Awˬ lawn chi hkʼe ve Hkriꞈ yaˇ awˬ moˍ hkʼaw tcuhˇ tcuhˬ maˇ hpehꞈ ve htawˇ, Saˍraˇ gʼa hpuˇ ve yoˬ. Yawˇ kʼoˆ ve, “awˬ viˉ awˬ nyi teˇ gʼaˇ ngaˬ htaꞈ tawˇ maˇ yaw laˇ ve yoˬ. Yawˇ chi hkʼe laiˉ pawˆ te˗oˬ. Aˬ htoꞈ ma te yawˇ chi hkʼe hpehꞈ ve ngaˬ maˇ shiˍ. Ngaˬ dawˇ maˇ jaˇ leh hpawnˬ daꞈ˗e ve kaꞈ maˇ ha lehˬ.” Awˉ lawˉ htaˇ Saˍraˇ dawˇ ve ‘ngaˬ teꞈ chiˉ maˇ gʼa te yaꞈ neˬ. Hkriꞈ yaˇ awˬ moˍ hkʼaw ve chaw kaꞈ awˬ viˉ awˬ nyi chi teˇ gʼaˇ peuˬ laˬ htaˇ hkʼe maˇ shuˍ tehꞈ dawˇ ve yoˬ.’

8. Saˍraˇ cawˇ daꞈ hui daꞈ tuˬ hkʼaˬ hkʼe te ve le? Yawˇ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

⁸ Cawˇ daꞈ hui daꞈ tuˬ Saˍraˇ teˇ ceuˬ ceuˬ te ve yoˬ. Yawˇ Yaˬhoˉvaˬ geh bon lawˬ leh awˬ viˉ awˬ nyi yaˇ miˇ oˇ ve teˇ gʼaˇ geh tawˇ ca yaw daꞈ˗e tuˬ dawˇ cheˆ ve yoˬ. Yawˇ hui teˇ gʼaˇ leh teˇ gʼaˇ na gʼa daꞈ˗oˬ htaˇ, kʼuˉ daꞈ leh venˇ baˆ hpehˇ daꞈ ve yoˬ. Oˇ ve teˇ yanˇ nyi˗aꞈ kʼo, teˇ ceuˬ le le daꞈ˗oˬ. Saˍraˇ kʼawꞈ kʼoˆ ve, “ponˬ kʼai ve awˬ yanˇ yawˇ ngaˬ htaꞈ oˇ htaˇ hkʼe leˇ kʼawꞈ te laˇ sheˍ. Ngaˬ nyi ma maˇ sha.” Yawˇ ve te hkʼaˇ dawˇ hkʼaˇ maˇ pa ve kʼo, Saˍraˇ ha lehˬ kuiˬ maˇ cawˬ gʼa tehꞈ dawˇ ve yoˬ. Saˍraˇ te gʼa ve daꞈ jaˇ ve lehˬ yawˇ htaꞈ haꞈ ve tehꞈ hpeuꞈ maw piˇ leh “venˇ baˆ hpehˇ daꞈ” ve yoˬ. (Eˇfeˇsuꞈ 4:32–5:2) Awˬ tehˬ ve Hkriꞈ yaˇ haꞈ daꞈ ve kʼo, ‘shu awˬ hkʼoˆ venˇ baˆ maˇ taˍ puiˉ. Haꞈ pehnˇ ve lehˬ, hkanˍ puiˉ ve, yonˍ puiˉ ve, dawˇ law puiˉ ve leh, hkʼa peu˗eˬ htaꞈ yeunˇ hkanˍ puiˉ ve’ tehꞈ Saˍraˇ tawnˇ gʼa ve yoˬ. (1 Kawˇrenˍhtuˆ 13:5, 7) Saˍraˇ nyi ma kʼawꞈ sha la leh maˇ dawˇ haˍ˗o. Awˬ leh meuˇ htaˇ oˇ ve teˇ gʼaˇ kaꞈ Saˍraˇ geh kʼawꞈ cawˇ daꞈ ve yoˬ. Nawˬ awˬ viˉ awˬ nyi geh cawˇ daꞈ hui daꞈ  tuˬ te leh haꞈ ve tehꞈ hpeuꞈ maw piˇ ve kʼo, “haꞈ pehnˇ ve nyi ma cawˬ leh cawˇ daꞈ hawˍ daꞈ piˇ shehˍ hpaˇ Gʼuiˬ sha lehˬ nawˬ hui geh chehˇ tuˬ yoˬ” teh nawˬ kaꞈ yonˍ gʼa ve yoˬ.—2 Kawˇrenˍhtuˆ 13:11.

9. Tcuh yaˇ liꞈ 10:34, 35 hkʼaw kʼoˆ taˍ ve hkʼe, aˬ htoꞈ ma te ngaˬ hui chaw mehˆ hpfuhˇ htaꞈ maˇ nyi cawˇ ve le?

⁹ Yaˬhoˉvaˬ chaw mehˆ hpfuhˇ htaꞈ maˇ nyi. (Tcuh yaˇ 10:34, 35 gʼaw sheˍ.) Ngaˬ hui chaw mehˆ hpfuhˇ htaꞈ maˇ nyi ve kʼo, Gʼuiˬ sha ve yaˇ hpehꞈ ve tehꞈ hpeuꞈ maw piˇ chehˇ ve yoˬ. Chi hkʼoˆ kaꞈ, a shu yawˇ awˬ to htaꞈ haꞈ ve hkʼe shu htaꞈ haꞈ kʼoˆ ve tawˇ hkawˇ na yuˬ ve yoˬ. Awˬ viˉ awˬ nyi hkʼaw ha lehˬ ve cawˬ tuˬ kaꞈ ga piˇ chehˇ ve yoˬ.

10-11. Awˬ viˉ awˬ nyi yaˇ miˇ teˇ gʼaˇ yawˇ ve maˇ daꞈ ve dawˇ hkʼaˇ htaꞈ hkʼaˬ hkʼe gu ve le?

¹⁰ Chaw mehˆ hpfuhˇ htaꞈ maˇ nyi ve laiˉ gʼaˇ awˬ pon maˇ sha. Awˬ viˉ awˬ nyi Ruˉhtaˆ ve awˬ lawn htaꞈ teˇ geh nyi sheˍ. Yawˇ yaˇ nehˬ htaˇ, teˇ mvuhˇ miˬ lo ve chaw yawˇ ve yehˬ kʼa htaꞈ maˇ daꞈ ve te piˇ ve yoˬ. Chi yawˇ htaꞈ heuˆ la kuiˬ hkʼaˬ hkʼe cawˬ ve le? Ruˉhtaˆ kʼoˆ ve, “mvuhˇ miˬ oˇ ve htaꞈ caˉ daꞈ ve kʼo ngaˬ nyi bawˬ jaˇ. Mvuhˇ miˬ oˇ kaˬ lo laˬ ve chaw kʼo, awˬ viˉ awˬ nyi hpehꞈ ve, maˇ hpehꞈ ve kaꞈ shuˍ daꞈ ve tehꞈ ngaˬ dawˇ ve yoˬ.” Ruˉhtaˆ maˇ daꞈ ve dawˇ hkʼaˇ chi htaꞈ hkʼaˬ hkʼe gu gʼa ve le?

¹¹ Ruˉhtaˆ chi hkʼe maˇ dawˇ tuˬ shiˍ la ve yoˬ. Teˇ hkʼawꞈ teˇ pawˆ tawˆ ve liꞈ kʼoˆ hkʼaw hpehꞈ laˬ jaw ve awˬ lawn mvuhˇ miˬ oˇ ve htaꞈ caˉ daꞈ ve yawˇ gʼaw ve yoˬ. Yawˇ kʼoˆ ve, “mvuhˇ miˬ oˇ ve hkʼaw ve chaw htaꞈ yawˇ daꞈ ve hpawˇ nyi leh mvuhˇ miˬ oˇ ve hkʼaw ve awˬ viˉ awˬ nyi Yaˬhoˉvaˬ ve kanˉ nyi ma awˬ tawˬ hkʼa gaˬ te ve htaꞈ ngaˬ mawˬ ve yoˬ. Yawˇ hui kaꞈ awˬ viˉ awˬ nyi hpehꞈ ve tehꞈ ngaˬ na gʼa la ve yoˬ.” Ponˬ kʼai ve awˬ yanˇ, yawˇ chi aꞈ kehˉ gʼa te cawˇ ve shiˍ la ve yoˬ. Yawˇ kʼawꞈ kʼoˆ ve, “mvuhˇ miˬ oˇ ve hkʼaw ve awˬ viˉ awˬ nyi htaꞈ mawˬ ve teˇ pawˆ le le yawˇ hui geh awˬ chawˇ te tuˬ gʼa coˇ caˇ jaˇ. Ngaˬ yawˇ hui geh yaw daꞈ htaˇ kʼawꞈ shiˍ daꞈ maˇ la ve yoˬ.” Hkʼaˬ hkʼe hpehꞈ la ve le? Ruˉhtaˆ kʼoˆ ve, “awˬ leh meuˇ htaˇ ngaˬ maˇ daꞈ ve dawˇ hkʼaˇ maˇ cawˬ˗o.”

12. Saˍraˇ maˇ daꞈ ve dawˇ hkʼaˇ aˬ htoꞈ ma cawˬ ve le?

¹² Chaw teˇ hpaˍ hpaˍ chaw mehˆ hpfuhˇ htaꞈ nyi ve tehꞈ yawˇ hui maˇ jaw. Saˍraˇ ve awˬ lawn htaꞈ teˇ geh nyi sheˍ. Chaw ceuˬ, chaw hpu chaw naˆ, hpu cawˬ ve maˇ cawˬ ve, maˇ heˆ leh Gʼuiˬ sha ve kanˉ hkʼaˇ hkʼaw awˬ vuiˬ cawˬ ve, Saˍraˇ chi hkʼe ve teˇ hpaˍ htaꞈ maˇ nyi ve pa taw, yawˇ chaw mehˆ hpfuhˇ htaꞈ maˇ nyi ve yoˬ. Yaꞈ hkʼaˇ, yawˇ kʼoˆ ve, “awˬ tehˬ kʼo yawˇ chaw mehˆ hpfuhˇ htaꞈ nyi ve tehꞈ shiˍ la ve yoˬ.” Saˍraˇ ve yehˬ kʼa cuˇ yiˍ cawˬ ve pa taw, cuˇ yiˍ cawˬ ve chaw htaꞈ yawˇ awˬ chawˇ te gaˇ ve yoˬ. Yawˇ ve awˬ chawˇ teˇ gʼaˇ htaꞈ kʼoˆ piˇ ve, “awˬ viˉ awˬ nyi hkʼaw cuˇ yiˍ cawˬ ve chaw htaꞈ ceh ngaˬ awˬ chawˇ te gaˇ ve yoˬ. Cuˇ yiˍ maˇ cawˬ ve chaw kʼo ngaˬ awˬ chawˇ hkʼa dehꞈ maˇ te gaˇ.” Saˍraˇ gʼa pa cawˇ ve tehꞈ shiˍ la leh hkʼaˬ hkʼe te ve le?

13. Saˍraˇ te hkʼaˇ dawˇ hkʼaˇ pa ve htaꞈ ngaˬ hui hkʼaˬ hkʼe te henˇ yuˬ gʼa ve le?

¹³ Saˍraˇ hkʼa dehꞈ dawˇ nyi tuˬ toˇ nyi shehˍ hpaˇ ga piˇ ve yoˬ. Yawˇ kʼoˆ ve, “ngaˬ Gʼuiˬ sha ve kanˉ ka tiꞈ yeˬ ve hkʼaw te ve, hpawnˬ daꞈ kuiˬ hkʼaw hkʼa dehꞈ hkʼawꞈ ve, leh Liꞈ hpu hkʼaw ve awˬ lawn shiˍ jaˇ tehꞈ toˇ nyi shehˍ hpaˇ chiˇ mvuh laˇ ve yoˬ. Ngaˬ hui Liꞈ hpu hkʼaw ve awˬ lawn shiˍ maˇ ve kʼo, Hkriꞈ yaˇ ve te hkʼaˇ dawˇ hkʼaˇ lehˬ nyi ma nuˇ nehˬ ve, a shu yawˇ awˬ to htaꞈ gʼaˇ puiˉ ve, leh ha kʼaˉ puiˉ ve cawˬ ve yoˬ tehꞈ yawˇ kʼoˆ maˍ laˇ ve yoˬ.” Toˇ nyi shehˍ hpaˇ kʼoˆ piˇ ve hkʼe Saˍraˇ gʼaꞈ te ve yoˬ. Yawˇ kʼoˆ ve, “chi teˇ hkui a yeˇ uiˍ jaˇ ve lehˬ awˬ viˉ awˬ nyi htaꞈ haꞈ leh dawˇ haˍ ve gʼa te tawˆ la ve tehꞈ ngaˬ shiˍ la ve yoˬ. Hkʼe te leh ngaˬ awˬ viˉ awˬ nyi htaꞈ daꞈ ve hpawˇ kʼawꞈ nyi ve yoˬ.” Yawˇ kʼawꞈ kʼoˆ ve, “yawˇ hui Yaˬhoˉvaˬ mehˆ gʼuˇ suhˍ daꞈ ve te hkʼaˇ dawˇ hkʼaˇ hkʼaˬ hkʼe cawˬ ve htaꞈ ngaˬ nyi ve yoˬ.” Awˬ lawn chi  ngaˬ hui htaꞈ hkʼaˬ hkʼe maˍ laˇ ve le? Ngaˬ hui shu aꞈ kehˉ liꞈ henˇ mvuh ve pa taw, daꞈ ve tehꞈ maˇ dawˇ cawˇ. Ngaˬ hui “awˬ viˉ awˬ nyi” htaꞈ nyi ma awˬ tawˬ hkʼa gaˬ haꞈ ve kʼo, chaw mehˆ hpfuhˇ htaꞈ maˇ nyi.—1 Peˍtruˆ 2:17.

14. Heˍbrehˇ 13:16 hkʼaw kʼoˆ taˍ ve hkʼe, ngaˬ hui hkehˉ chaw htaꞈ haꞈ yuˬ ve kʼo Yaˬhoˉvaˬ hkʼaˬ hkʼe dawˇ ve le?

¹⁴ Hkehˉ chaw teˇ hpaˍ htaꞈ hkʼa dehꞈ haꞈ yuˬ ve lehˬ a yeˇ uiˍ jaˇ tehꞈ Yaˬhoˉvaˬ shawˍ ve yoˬ. (Heˍbrehˇ 13:16 gʼaw sheˍ.) Hkehˉ chaw htaꞈ haꞈ yuˬ ve leh ga laˇ tuˬ loˍ ve chaw htaꞈ ga piˇ ve kʼo, Yaˬhoˉvaˬ htaꞈ oˉ kʼoˍ pui ve teˇ ceuˬ hpehꞈ ve yoˬ. (Yaˍkoˆ 1:27; 2:14-17) “Hkehˉ chaw teˇ hpaˍ htaꞈ hkʼa dehꞈ nyi haꞈ shaˉ˗oˆ” tehꞈ Liꞈ hpu hkʼaw ngaˬ hui htaꞈ maˍ laˇ ve yoˬ. (Roˉmaꞈ 12:13) Ngaˬ hui hkehˉ chaw htaꞈ haꞈ yuˬ htaˇ, yawˇ htaꞈ haꞈ ve, awˬ chawˇ te gaˇ ve, leh yawˇ htaꞈ awˬ tehˬ dawˇ haˍ ve tehꞈ hpeuꞈ maw piˇ ve yoˬ. Hkaoˍ monˇ, iˉ kaˆ, awˬ chiˇ awˍ shu htaꞈ piˇ ve maˇ heˆ leh a yeˇ yuˬ piˇ ve kʼo, ngaˬ hui te ve htaꞈ Yaˬhoˉvaˬ kaꞈ ha lehˬ ve yoˬ. (1 Peˍtruˆ 4:8-10) Yaꞈ hkʼaˇ, hkehˉ chaw htaꞈ haꞈ yuˬ tuˬ maˇ sha ve teˇ ceuˬ ceuˬ te laˇ ve yoˬ.

15-16. (a) Aˬ htoꞈ ma te chaw teˇ hpaˍ hpaˍ hkehˉ chaw htaꞈ haꞈ yuˬ tuˬ htawˇ dawˇ nawˬ dawˇ cawˬ ve le? (b) Eˬdiˆ hkehˉ chaw htaꞈ haꞈ yuˬ tuˬ aˬ htoꞈ ma ga piˇ ve le?

¹⁵ Ngaˬ hui hpehꞈ chehˇ ve awˬ ceuˬ htaꞈ pa taw, hkehˉ chaw htaꞈ haꞈ yuˬ tuˬ htawˇ dawˇ nawˬ dawˇ cawˬ ve yoˬ. Eˬdiˆ mehˉ chawˇ ma ve awˬ lawn htaꞈ teˇ geh nyi sheˍ. Yawˇ Shaˉhkiˆhkanˍ ve chaw maˇ hpehꞈ sheˍ htaˇ, shu geh awˬ chawˇ maˇ te gaˇ puiˉ. Shu yawˇ aꞈ kehˉ hkehˉ chaw htaꞈ haꞈ yuˬ puiˉ ve tehꞈ yawˇ dawˇ ve yoˬ.

¹⁶ Yaꞈ hkʼaˇ, yawˇ Shaˉhkiˆhkanˍ ve chaw hpehꞈ la htaˇ, yawˇ ve te hkʼaˇ dawˇ hkʼaˇ pa ve yoˬ. Yawˇ hkehˉ chaw htaꞈ haꞈ yuˬ tuˬ te gʼa ve hkʼe te ve yoˬ. Yawˇ kʼoˆ ve, “hpawnˬ daꞈ kuiˬ yehˬ te la ve teˇ ca nawˬ ve aˉ hkʼaw lo 2 shinˉ haˉ tcuh hpehꞈ˗aw laˇ tehꞈ nyi haꞈ shaˉ paˍ na laˇ ve yoˬ. Oˇ ve teˇ yanˇ Zaˍraˍtaˆ venˇ lo mehˇ chawˇ ma teˇ gʼaˇ Yaˬhoˉvaˬ awˬ bon naꞈ piˇ ve htaꞈ ngaˬ tawnˇ gʼa ve yoˬ.” (1 Jawˇmawˇ 17:12-16) Awˬ viˉ awˬ nyi oˇ ve teˇ ca Eˬdiˆ ve aˉ hkʼaw lo haˉ tcuh leh Yaˬhoˉvaˬ yawˇ htaꞈ  awˬ bon naꞈ piˇ˗aw laˇ? Yawˇ kʼoˆ ve, “2 shinˉ ceh kʼoˆ˗aꞈ ve kaꞈ 2 ha pa kʼawꞈ haˉ ve yoˬ. Ngaˬ hui awˬ meu˗eˇ meu˗eˇ meuˆ daꞈ la ve yoˬ.” Chi hkʼe ceh maˇ heˆ, Yaˬhoˉvaˬ yawˇ htaꞈ awˬ bon naꞈ piˇ ve pa taw, Hkriꞈ yaˇ awˬ moˍ hkʼaw laiˉ gʼaˇ htaꞈ meuˆ daꞈ la ve yoˬ. Chi teˇ hkui yawˇ gʼuˇ suhˍ peuˍ ve te leh awˬ viˉ awˬ nyi Gʼuiˬ sha ve kanˉ te ve yawˇ aˉ hkʼaw laˬ tcuh gaˇ ve yoˬ. Yawˇ kʼawꞈ kʼoˆ ve, “ngaˬ shu htaꞈ teˇ ceuˬ ceuˬ piˇ ve kʼo, ha lehˬ tuˬ te laˇ leh ngaˬ awˬ bon maˇ maˇ gʼa ve yoˬ.”—Heˍbrehˇ 13:1, 2.

17. Luˉkaꞈ leh awˬ miˇ ma aˬ htoꞈ ma dawˇ gʼa ve le?

¹⁷ Ngaˬ hui hkehˉ chaw htaꞈ haꞈ yuˬ puiˉ ve yoˬ. Yaꞈ hkʼaˇ, ngaˬ hui chi aꞈ kehˉ kʼawꞈ te gʼa sheˍ laˇ? Luˉkaꞈ leh awˬ miˇ ma hkehˉ chaw htaꞈ haꞈ yuˬ puiˉ ve teˇ geh nyi sheˍ. Awˬ pa awˬ e, awˬ viˉ awˬ nyi, awˬ chawˇ meuˆ daꞈ ve, leh toˇ nyi shehˍ hpaˇ teˇ ca, yawˇ hui ve aˉ hkʼaw lo laˬ tuˬ jehˬ piˇ gaˇ ve yoˬ. Yaꞈ hkʼaˇ, Luˉkaꞈ kʼoˆ ve, “awˬ chawˇ meuˆ daꞈ jaˇ ve ceh jehˬ piˇ ve law tehꞈ chi teˇ hkui ngaˬ shiˍ la ve yoˬ.” Luˉkaꞈ leh awˬ miˇ ma hkʼaˬ hkʼe te hkehˉ chaw htaꞈ kʼawꞈ haꞈ yuˬ puiˉ la ve le?

18. Luˉkaꞈ leh awˬ miˇ ma hkʼaˬ hkʼe te hkehˉ chaw htaꞈ kʼawꞈ haꞈ yuˬ piˇ ve le?

¹⁸ Luˉkaꞈ leh awˬ miˇ ma Yeˍsuˆ kʼoˆ ve tawˇ htaꞈ dawˇ nawˇ la ve yoˬ. Yeˍsuˆ kʼoˆ ve, “nawˬ hui htaꞈ haꞈ laˇ ve chaw hui htaꞈ ceh kʼawꞈ haꞈ ve kʼo, aˬ htoꞈ ma awˬ bon cawˬ le?” Hkehˉ chaw htaꞈ haꞈ yuˬ puiˉ ve tcuhˉ kuiˬ hkʼaˬ hkʼe kʼoˆ gaˇ ve yawˇ hui na gʼa ve yoˬ. (Maꞈhtehˍ 5:45-47) Teˇ gʼaˇ le le htaꞈ piˇ gaˇ ve nyi ma cawˬ tuˬ Yaˬhoˉvaˬ htaꞈ gʼa henˇ yuˬ cawˇ ve tehꞈ yawˇ hui shiˍ la ve yoˬ. Awˬ viˉ awˬ nyi yawˇ hui ve aˉ hkʼaw maˇ laˬ jaw sheˍ ve chaw htaꞈ jehˬ piˇ tuˬ dawˇ cheˆ ve yoˬ. Luˉkaꞈ kʼoˆ ve, “yawˇ hui htaꞈ jehˬ piˇ ve teˇ pawˆ le le laˬ htaˇ, teˇ gʼaˇ le le ha lehˬ leh Yaˬhoˉvaˬ geh kaꞈ meuˆ daꞈ maˇ la ve yoˬ.”

19. Ngaˬ hui Yeˍsuˆ ve awˬ laꞈ gʼawˇ hpehꞈ ve tehꞈ hkʼaˬ hkʼe hpeuꞈ maw piˇ gʼa tuˬ le? Nawˬ hkʼaˬ hkʼe te tuˬ dawˇ teh taˍ ve le?

¹⁹ Ngaˬ hui nyi ma awˬ tawˬ hkʼa gaˬ haꞈ daꞈ ve kʼo, cawˇ daꞈ hui daꞈ ve chaw hpehꞈ ve, chaw mehˆ hpfuhˇ htaꞈ maˇ nyi ve, leh hkehˉ chaw htaꞈ hkʼa dehꞈ haꞈ yuˬ puiˉ ve hkʼaˬ hkʼe ga laˇ ve awˬ lawn chi ve hkʼaw gʼa henˇ˗oˬ. Maˇ daꞈ ve te hkʼaˇ dawˇ hkʼaˇ htaꞈ ngaˬ hui yuˬ baˬ leh awˬ viˉ awˬ nyi htaꞈ nyi ma awˬ tawˬ hkʼa gaˬ gʼa haꞈ cawˇ ve yoˬ. Chi hkʼe te ve kʼo, ngaˬ hui Yeˍsuˆ ve awˬ laꞈ gʼawˇ hpehꞈ ve tehꞈ hpeuꞈ maw piˇ ve yoˬ.—Yoˇhanˬ 13:17, 35.