1. Chaw teˇ gʼaˇ yehˬ maˇ te sheˍ htaˇ aˬ htoꞈ ma awˉ lawˉ gʼa shawˍ nyi cawˇ ve le?

 Chaw teˇ gʼaˇ yehˬ te tuˬ dawˇ cheˆ htaˇ, yehˬ hkʼaˬ hkʼe te tuˬ yawˇ shiˍ˗oˬ. Yaꞈ hkʼaˇ, yawˇ yehˬ te tuˬ ve mawˇ vuiˬ leh laꞈ haˉ te˗aw laˇ? Maˇ te. Yawˇ te cawˇ ve a yeˇ uiˍ ve awˉ lawˉ teˇ ceuˬ lehˬ hpu hkʼaˬ ma peuˬ ve gʼa shawˍ nyi ve yoˬ. Aˬ htoꞈ ma pa taw le? Yehˬ chi te peuˬ tuˬ hpu lawꞈ maˇ lawꞈ ve yawˇ gʼa shiˍ tuˬ ve pa taw yoˬ. Yawˇ hpu hkʼaˬ ma peuˬ tuˬ awˉ lawˉ hkʼa dehꞈ shawˍ nyi ve kʼo, yehˬ chi te peuˬ tuˬ awˬ hkʼaˇ cawˬ ve yoˬ.

2. Luˉkaꞈ liꞈ 14:27-30 hkʼaw kʼoˆ taˍ ve hkʼe, nawˬ Baˆtiˆsaˬ maˇ haꞈ yuˬ sheˍ htaˇ aˬ htoꞈ ma htaꞈ awˉ lawˉ dawˇ nyi cawˇ ve le?

² Yaˬhoˉvaˬ htaꞈ haꞈ ve leh awˬ hpfuhˇ shiˍ ve nawˬ Baˆtiˆsaˬ haꞈ yuˬ gaˇ tuˬ te laˇ˗aw laˇ? Yoˬ kʼo yehˬ te paˍ hkʼe gʼa dawˇ cheˆ ve yoˬ. Aˬ htoꞈ ma te chi hkʼe kʼoˆ gʼa ve le? Luˉkaꞈ liꞈ 14:27-30 hkʼaw Yeˍsuˆ kʼoˆ ve htaꞈ dawˇ nyi sheˍ. (Gʼaw sheˍ.) Yeˍsuˆ kʼoˆ ve, yawˇ ve awˬ laꞈ gʼawˇ hpehꞈ ve lehˬ aˬ htoꞈ ma htaꞈ caˉ daꞈ ve le? Yawˇ ve awˬ laꞈ gʼawˇ hpehꞈ gaˇ ve chaw kʼo, “hkʼaˬ ma peuˬ tuˬ” ve htaꞈ gʼa haꞈ yuꞈ cawˇ ve yoˬ. Chi kʼoˆ gaˇ ve tcuhˉ kuiˬ lehˬ tuꞈ hkanˍ ve teˇ hpaˍ leh awˬ yanˇ kaꞈ gʼa yuˬ tanˇ ve yoˬ. (Luˉkaꞈ 9:23-26; 12:51-53) Chi htaꞈ pa taw Baˆtiˆsaˬ maˇ haꞈ yuˬ sheˍ htaˇ, aˬ htoꞈ ma gʼa hpuˇ tuˬ hkʼa dehꞈ gʼa dawˇ nyi cawˇ ve yoˬ. Chi hkʼe te ve kʼo, nawˬ Baˆtiˆsaˬ haꞈ yuˬ peuˬ hkʼawꞈ nawˉ, Yaˬhoˉvaˬ ve kanˉ ka tiꞈ yeˬ ve hkʼaw caˉ leh te gʼa tuˬ yoˬ.

3. Awˬ lawn chi ve hkʼaw aˬ htoꞈ ma htaꞈ henˇ tuˬ le?

³ Baˆtiˆsaˬ haꞈ yuˬ leh Yeˍsuˆ ve awˬ laꞈ gʼawˇ hpehꞈ la ve lehˬ shonˇ kʼai taˍ ve htaꞈ awˬ hpfuhˇ hkʼawꞈ˗aw laˇ? Hkʼawꞈ jaˇ! Baˆtiˆsaˬ haꞈ yuˬ ve lehˬ chi teˇ hkui leh awˬ gʼuˇ suhˍ hpawˇ kaꞈ awˬ bon maˇ maˇ gʼa tuˬ yehˬ miˉ hpaw laˇ ve htaꞈ shuˍ ve yoˬ. “Ngaˬ Baˆtiˆsaˬ haꞈ yuˬ tuˬ gu hehnˇ˗oˬ laˇ?” tehꞈ na hkawˇ chi ve Baˆtiˆsaˬ haꞈ yuˬ ve htaꞈ caˉ daꞈ ve a yeˇ uiˍ ve awˬ lawn chi ve hkʼaw teˇ geh henˇ tuˬ yoˬ.

4. (a) Awˬ to chiˇ aꞈ ve aˬ htoꞈ ma htaꞈ kʼoˆ gaˇ ve le? (b) Maꞈhtehˍ liꞈ 16:24 hkʼaw kʼoˆ taˍ ve hkʼe “a shu yawˇ ve a loˍ htaꞈ baˬ taˉ” ve tcuhˉ kuiˬ hkʼaˬ hkʼe kʼoˆ gaˇ ve le?

⁴ Awˬ to chiˇ aꞈ ve aˬ htoꞈ ma htaꞈ kʼoˆ gaˇ ve le? Baˆtiˆsaˬ maˇ haꞈ yuˬ sheˍ htaˇ, nawˬ awˬ to Yaˬhoˉvaˬ htaꞈ awˉ lawˉ gʼa chiˇ aꞈ piˇ ve yoˬ. Awˬ to chiˇ aꞈ ve lehˬ Yaˬhoˉvaˬ ve kanˉ hkʼaˬ htaˆ kaꞈ te tuˬ yoˬ tehꞈ nyi ma awˬ tawˬ hkʼa gaˬ bon lawˬ ve yoˬ. Nawˬ Gʼuiˬ sha htaꞈ awˬ to chiˇ aꞈ piˇ htaˇ, nawˬ kaꞈ a shu yawˇ ve a loˍ htaꞈ maˇ te˗o. (Maꞈhtehˍ 16:24, * awˬ maiˉ htaꞈ gʼaw sheˍ.) Awˬ to chiˇ aꞈ piˇ leh nawˬ Yaˬhoˉvaˬ ve chaw gʼa hpehꞈ ve daꞈ jaˇ. (Roˉmaꞈ 14:8) Chi teˇ hkui kaꞈ tanˬ leh nawˬ a shaꞈ teꞈ kuiˬ hkʼaw Yaˬhoˉvaˬ ve kanˉ te leh a shu yawˇ ve a loˍ htaꞈ maˇ te˗o tehꞈ nawˬ Yaˬhoˉvaˬ htaꞈ kʼoˆ piˇ ve yoˬ. Nawˬ awˬ to chiˇ aꞈ piˇ ve lehˬ Gʼuiˬ sha geh hkanˍ leh ka tiꞈ te ve yoˬ. Gʼuiˬ sha ngaˬ hui htaꞈ hkanˍ tuˬ maˇ nyiˉ laˇ ve htawˇ, yawˇ geh hkanˍ˗oˬ ve kʼo, gʼaꞈ te tuˬ tehꞈ yawˇ dawˇ law ve yoˬ.—Chiˇ mvuh ve 116:12, 14.

5. Awˬ to chiˇ aꞈ ve leh Baˆtiˆsaˬ haꞈ yuˬ ve hkʼaˬ hkʼe caˉ daꞈ ve le?

⁵ Awˬ to chiˇ aꞈ ve leh Baˆtiˆsaˬ haꞈ yuˬ ve htaꞈ hkʼaˬ hkʼe caˉ daꞈ ve le? Awˬ to chiˇ aꞈ ve lehˬ nawˬ leh Yaˬhoˉvaˬ ve awˬ lawn hpehꞈ leh teˇ gʼaˇ˗ehꞈ kaꞈ maˇ shiˍ. Baˆtiˆsaˬ haꞈ yuˬ ve lehˬ shu mehˆ gʼuˇ suhˍ gʼa haꞈ yuˬ ve yoˬ. Baˆtiˆsaˬ haꞈ yuˬ ve lehˬ hpawnˬ daꞈ lonˉ 1 nyi maˇ heˆ leh hpawnˬ daꞈ lonˉ 3 nyi htaˇ yoˬ. Baˆtiˆsaˬ haꞈ yuˬ htaˇ, nawˬ Yaˬhoˉvaˬ htaꞈ awˬ to chiˇ aꞈ piˇ˗oˬ ve tehꞈ shu htaꞈ shiˍ tcuh ve yoˬ. * Nawˬ Yaˬhoˉvaˬ Gʼuiˬ sha htaꞈ nyi ma awˬ tawˬ hkʼa gaˬ gʼa haꞈ ve, nawˬ ve co ha, nawˬ ve dawˇ hkʼaˇ leh nawˬ ve awˬ gʼaˇ awˬ shaˉ hkʼa peu˗eˬ Yaˬhoˉvaˬ ve kanˉ te tuˬ shu htaꞈ shiˍ tcuh sheˍ.—Maˍkuˆ 12:30.

6-7. 1 Peˍtruˆ liꞈ 3:18-22 hkʼaw kʼoˆ taˍ ve hkʼe, Baˆtiˆsaˬ haꞈ yuˬ gaˇ tuˬ nyiˇ ceuˬ aˬ htoꞈ ma le?

⁶ Baˆtiˆsaˬ haꞈ yuˬ ve lehˬ a yeˇ uiˍ jaˇ ve laˇ? 1 Peˍtruˆ liꞈ 3:18-22 hkʼaw nyi sheˍ. (Gʼaw sheˍ.) Noˉaꞈ haw loꞈ kʼoˍ lonˉ te ve lehˬ yawˇ yonˍ ve tehꞈ hpeuꞈ maw laˇ ve hkʼa shuˍ, nawˬ Baˆtiˆsaˬ haꞈ yuˬ ve lehˬ Gʼuiˬ sha htaꞈ awˬ to chiˇ aꞈ piˇ˗oˬ ve tehꞈ shu htaꞈ hpeuꞈ maw piˇ ve yoˬ. Yaꞈ hkʼaˇ, Baˆtiˆsaˬ haꞈ yuˬ ve lehˬ a yeˇ uiˍ jaˇ ve laˇ? Yoˬ. Chi htaꞈ Peˍtruˆ kʼoˆ ve yoˬ. Awˉ lawˉ teˇ ceuˬ Baˆtiˆsaˬ haꞈ yuˬ ve lehˬ, “nawˬ hui htaꞈ ponˬ laˇ ve yoˬ” tehꞈ Peˍtruˆ kʼoˆ ve yoˬ. Ngaˬ hui Yeˍsuˆ htaꞈ yonˍ ve, yawˇ ngaˬ hui awˬ pon hkanˍ suh laˇ ve, yawˇ teꞈ tu la leh mvuhˇ naw ma hkʼoˆ taˆ˗e ve, chi teˇ hkui yawˇ “Gʼuiˬ sha ve laꞈ sha paˉ lo chehˇ taˍ ve” htaꞈ ngaˬ hui yonˍ ve kʼo, Baˆtiˆsaˬ haꞈ yuˬ ve lehˬ ngaˬ hui htaꞈ ponˬ laˇ gʼa ve yoˬ.

⁷ Nyiˇ ceuˬ lehˬ Baˆtiˆsaˬ haꞈ yuˬ ve chi dawˇ shiˍ puiˉ ve nyi ma htaꞈ maˇ daꞈ ve maˇ gʼa heuˆ la tuˬ ga laˇ ve yoˬ. Ngaˬ hui awˬ to chiˇ aꞈ leh Baˆtiˆsaˬ haꞈ yuˬ htaˇ, Yaˬhoˉvaˬ geh meuˆ daꞈ la ve yoˬ. Ngaˬ hui venˇ baˆ dawˇ hpfuhˆ ve awˬ hkʼoˆ kaꞈ, Yeˍsuˆ htaiˍ hkʼawꞈ laˇ ve htaꞈ yonˍ ve tehꞈ hpeuꞈ maw piˇ ve pa taw, Gʼuiˬ sha ngaˬ hui ve venˇ baˆ hpehˇ laˇ ve yoˬ. Chi htaꞈ pa taw ngaˬ hui yawˇ geh te yaꞈ ve maˇ dawˇ.

8. Nawˬ Baˆtiˆsaˬ haꞈ yuˬ gaˇ tuˬ te laˇ ve a yeˇ uiˍ jaˇ ve aˬ htoꞈ ma le?

⁸ Nawˬ Baˆtiˆsaˬ haꞈ yuˬ gaˇ tuˬ aˬ htoꞈ ma te laˇ ve le? Nawˬ Liꞈ hpu hkʼa dehꞈ henˇ htaˇ, Yaˬhoˉvaˬ htaꞈ caˉ daꞈ ve leh yawˇ ve te hkʼaˇ dawˇ hkʼaˇ htaꞈ kaꞈ gʼa henˇ ve yoˬ. Nawˬ gʼa henˇ ve awˬ ceuˬ htaꞈ dawˇ cawˇ leh Yaˬhoˉvaˬ htaꞈ haꞈ ve yoˬ. Nawˬ Yaˬhoˉvaˬ htaꞈ haꞈ ve pa taw, dawˇ cheˆ leh Baˆtiˆsaˬ haꞈ yuˬ gaˇ tuˬ te laˇ ve a yeˇ uiˍ jaˇ.

9. Awˬ pa Gʼuiˬ sha, Yaˇ hpu, leh daꞈ kehˬ ve awˬ ha hpu awˬ meh awˬ hawˉ lo Baˆtiˆsaˬ haꞈ yuˬ ve, Maꞈhtehˍ liꞈ 28:19, 20 hkʼaw kʼoˆ taˍ ve chi hkʼaˬ hkʼe kʼoˆ gaˇ ve le?

⁹ Nawˬ Baˆtiˆsaˬ haꞈ yuˬ gaˇ ve teˇ ceuˬ lehˬ Liꞈ hpu hkʼaw maˍ ve htaꞈ yonˍ ve pa taw yoˬ. Yeˍsuˆ  shu awˬ laꞈ gʼawˇ hpehꞈ la tuˬ ca maˍ˗e kʼoˆ ve htaꞈ dawˇ nyi sheˍ. (Maꞈhtehˍ 28:19, 20 gʼaw sheˍ.) Yeˍsuˆ kʼoˆ ve awˬ laꞈ gʼawˇ hpehꞈ ve chaw Awˬ pa Gʼuiˬ sha, Yaˇ hpu, leh daꞈ kehˬ ve awˬ ha hpu awˬ meh awˬ hawˉ lo Baˆtiˆsaˬ haꞈ yuˬ cawˇ ve yoˬ. Yawˇ hkʼaˬ hkʼe kʼoˆ gaˇ ve le? Yaˬhoˉvaˬ htaꞈ caˉ daꞈ ve Liꞈ hpu hkʼaw maˍ laˇ ve, Yeˍsuˆ leh daꞈ kehˬ ve awˬ ha hpu nawˬ hkʼa dehꞈ gʼa yonˍ ve yoˬ. Awˬ tehˬ ve chi teˇ hpaˍ kanˇ paˆ cawˬ jaˇ leh nawˬ ve nyi ma hkʼaw gaˬ ve yoˬ. (Heˍbrehˇ 4:12) Awˬ lawn chi teˇ geh nyi sheˍ.

10-11. Awˬ pa Gʼuiˬ sha htaꞈ caˉ daꞈ ve leh awˬ tehˬ ve htaꞈ nawˬ gʼa henˇ leh yonˍ ve aˬ htoꞈ ma le?

¹⁰ Awˬ pa Gʼuiˬ sha htaꞈ caˉ daꞈ ve awˬ tehˬ ve nawˬ tanˬ henˇ htaˇ ve htaꞈ dawˇ nyi sheˍ. “Nawˬ lehˬ, Yaˬhoˉvaˬ meh leh miˬ guiˬ hkʼa peu˗eˬ hkʼoˆ uiˍ jaˇ mvuh jaˇ ve Gʼuiˬ sha teˇ gʼaˇ tiˉ hpehꞈ ve tehꞈ, teˇ gʼaˇ le le shiˍ tcuh sheˍ.” Leh “nawˬ teˇ gʼaˇ ceh tiˉ Gʼuiˬ sha hpehꞈ” ve yoˬ. (Chiˇ mvuh ve 83:18; (MGS). Iˉsaˍyaˆ 37:16) Yawˇ hpanˍ shehˍ hpaˇ leh ponˬ laˇ shehˍ hpaˇ hpehꞈ ve yoˬ. (Chiˇ mvuh ve 3:8; 36:9) Ngaˬ hui venˇ baˆ leh suh ve htaꞈ ponˬ tuˬ yawˇ gu teh taˍ laˇ leh co co taiˍ taiˍ a shaꞈ gʼa tuˬ awˬ hkʼaˇ cawˬ ve yoˬ. (Yoˇhanˬ 17:3) Nawˬ awˬ to chiˇ aꞈ leh Baˆtiˆsaˬ haꞈ yuˬ htaˇ, nawˬ Yaˬhoˉvaˬ ve Shaˉhkiˆhkanˍ ve chaw hpehꞈ ve yoˬ. (Iˉsaˍyaˆ 43:10-12) Miˬ guiˬ chi hkʼoˆ lo Yaˬhoˉvaˬ htaꞈ oˉ kʼoˍ pui ve yehˬ kʼa hkʼaw nawˬ kaꞈ chehˇ la ve pa taw, ngaˬ hui ve awˬ moˍ hkʼaw Gʼuiˬ sha ve awˬ meh kaꞈ cawˬ leh shu htaꞈ kaꞈ awˬ meh chi gʼa kʼoˆ piˇ ve ha lehˬ jaˇ.—Chiˇ mvuh ve 86:12.

¹¹ Awˬ pa Gʼuiˬ sha htaꞈ caˉ daꞈ ve Liꞈ hpu hkʼaw maˍ ve awˬ ceuˬ htaꞈ na gʼa ve ha lehˬ jaˇ. Awˬ tehˬ ve chi teˇ hpaˍ htaꞈ nawˬ yonˍ htaˇ, Yaˬhoˉvaˬ htaꞈ awˬ to chiˇ aꞈ piˇ gaˇ leh Baˆtiˆsaˬ haꞈ yuˬ ve yoˬ.

12-13. Gʼuiˬ sha ve Yaˇ Yeˍsuˆ htaꞈ caˉ daꞈ ve nawˬ gʼa henˇ leh yonˍ tuˬ aˬ htoꞈ ma te laˇ ve le?

¹² Yeˍsuˆ htaꞈ caˉ daꞈ ve nawˬ gʼa henˇ htaˇ, hkʼaˬ hkʼe dawˇ ve le? Yeˍsuˆ lehˬ Yaˬhoˉvaˬ awˬ hawˉ lo ve teˇ gʼaˇ hpehꞈ ve yoˬ. Yeˍsuˆ htaiˍ hkʼawꞈ shehˍ hpaˇ hpehꞈ leh yawˇ ve a shaꞈ ngaˬ hui awˬ pon tanˇ laˇ ve yoˬ. Yawˇ htaiˍ hkʼawꞈ laˇ ve awˬ hpfuhˇ htaꞈ ngaˬ hui hpeuꞈ maw piˇ htaˇ, venˇ baˆ hpehˇ laˇ ve htaꞈ gʼa tuˬ yoˬ. Ngaˬ hui Gʼuiˬ sha geh meuˆ daꞈ leh co co taiˍ taiˍ ve a shaꞈ gʼa tuˬ yoˬ. (Yoˇhanˬ 3:16) Chi hkʼoˆ kaꞈ, Yeˍsuˆ paw hkuˇ lonˉ hpehꞈ ve yoˬ. Ngaˬ hui htaiˍ hkʼawꞈ ve htaꞈ gʼa leh Gʼuiˬ sha geh meuˆ daꞈ tuˬ yawˇ ga laˇ ve yoˬ. (Heˍbrehˇ 4:15; 7:24, 25) Chi hkʼoˆ kaꞈ, Yeˍsuˆ Gʼuiˬ sha ve mvuhˇ miˬ hkʼaw Jawˇmawˇ kaꞈ hpehꞈ ve yoˬ. Yaˬhoˉvaˬ Yeˍsuˆ htaꞈ cuˇ leh yawˇ ve awˬ meh htaꞈ yawˆ yan tuˬ, haiˬ ve htaꞈ te luˬ tuˬ, leh miˬ guiˬ awˬ suhˉ hkʼaw ngaˬ hui htaꞈ awˬ bon naꞈ laˇ tuˬ yoˬ. (Maꞈhtehˍ 6:9, 10; Hpeuꞈ maˍ ve 11:15) Yeˍsuˆ htaꞈ ngaˬ hui henˇ yuˬ cawˇ ve yoˬ. (1 Peˍtruˆ 2:21) Gʼuiˬ sha ve a loˍ htaꞈ gʼaꞈ te tuˬ, Yeˍsuˆ te maˍ laˇ ve htaꞈ ngaˬ hui henˇ yuˬ gʼa ve yoˬ.—Yoˇhanˬ 4:34.

¹³ Gʼuiˬ sha ve Yaˇ Yeˍsuˆ htaꞈ caˉ daꞈ ve Liꞈ hpu hkʼaw maˍ laˇ ve htaꞈ nawˬ yonˍ htaˇ, nawˬ kaꞈ yawˇ htaꞈ haꞈ tuˬ yoˬ. Yeˍsuˆ te ve hkʼa shuˍ haꞈ pehnˇ ve chi nawˬ Yaˬhoˉvaˬ ve a loˍ htaꞈ te gaˇ tuˬ te laˇ leh nawˬ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ gaˇ tuˬ yoˬ.

14-15. Daꞈ kehˬ ve awˬ ha hpu htaꞈ caˉ daꞈ ve nawˬ gʼa henˇ leh yonˍ tuˬ aˬ htoꞈ ma te laˇ ve le?

¹⁴ Daꞈ kehˬ ve awˬ ha hpu htaꞈ caˉ daꞈ ve nawˬ gʼa henˇ htaˇ, hkʼaˬ hkʼe dawˇ ve le? Daꞈ kehˬ ve awˬ ha hpu awˬ to maˇ cawˬ. Yaˬhoˉvaˬ ve kanˇ paˆ hpehꞈ ve yoˬ. Yawˇ chi htaꞈ cuˇ leh Liꞈ hpu bvuhꞈ tuˬ dawˇ pawnˍ piˇ ve yoˬ. Ngaˬ hui Liꞈ hpu gʼaw htaˇ, na gʼa leh a shaꞈ teꞈ kuiˬ hkʼaw yuˬ yehˇ tuˬ daꞈ kehˬ ve awˬ ha hpu ga laˇ ve yoˬ. (Yoˇhanˬ 14:26; 2 Peˍtruˆ 1:21) Yaˬhoˉvaˬ yawˇ ve kanˇ paˆ htaꞈ yehˇ leh ngaˬ hui cawˬ taˍ ve awˬ gʼaˇ aꞈ kehˉ peꞈ laˇ tuˬ yoˬ. (2 Kawˇrenˍhtuˆ 4:7) Ngaˬ hui daꞈ ve awˬ lawn sha tanˇ hto toˇ htaˇ, beˬ ve lawˇ ve, leh shoꞈ shaꞈ ve htaꞈ yeunˇ hkanˍ gaˇ tuˬ, daꞈ kehˬ ve awˬ ha hpu ga laˇ ve yoˬ. Chi hkʼoˆ kaꞈ, Gʼuiˬ sha ve “awˬ ha hpu ve  awˬ shiˍ nawꞈ ve” lehˬ ngaˬ hui ve te hkʼaˇ dawˇ hkʼaˇ daꞈ ve tehꞈ hpeuꞈ maw piˇ tuˬ chi ga laˇ ve yoˬ. (Gaˍlaˍtiˆ 5:22) Gʼuiˬ sha htaꞈ gʼaˇ va leh nyi ma awˬ tawˬ hkʼa gaˬ lawˬ ve chaw htaꞈ daꞈ kehˬ ve awˬ ha hpu piˇ ve yoˬ.—Luˉkaꞈ 11:13.

¹⁵ Yaˬhoˉvaˬ ve chaw yawˇ ve kanˉ te ve htaꞈ ga piˇ htaˇ daꞈ kehˬ ve awˬ ha hpu htaꞈ gʼaˇ va ve tehꞈ ngaˬ hui shiˍ htaˇ awˬ gʼaˇ gʼa jaˇ. Daꞈ kehˬ ve awˬ ha hpu htaꞈ caˉ daꞈ ve nawˬ gʼa henˇ leh yonˍ htaˇ, nawˬ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ gaˇ tuˬ yoˬ.

16. Ngaˬ hui aˬ htoꞈ ma gʼa henˇ peuˬ˗oˬ ve le?

¹⁶ Nawˬ awˬ to chiˇ aꞈ leh Baˆtiˆsaˬ haꞈ yuˬ tuˬ dawˇ cheˆ htaˇ, a yeˇ uiˍ ve htaꞈ nawˬ gʼaꞈ te chehˇ ve yoˬ. Gʼa henˇ peuˬ ve hkʼa shuˍ “hkʼaˬ ma peuˬ tuˬ” ve htaꞈ gʼa haꞈ yuꞈ cawˇ ve yoˬ. Chi kʼoˆ gaˇ ve tcuhˉ kuiˬ lehˬ tuꞈ hkanˍ ve teˇ hpaˍ leh awˬ yanˇ kaꞈ gʼa yuˬ tanˇ ve yoˬ. Yaꞈ hkʼaˇ, nawˬ gʼa tuˬ ve awˬ bon lehˬ shonˇ kʼai peuˬ ve aꞈ kehˉ maˇ jaˇ tuˬ yoˬ. Baˆtiˆsaˬ haꞈ yuˬ ve lehˬ nawˬ ponˬ tuˬ ga laˇ leh Gʼuiˬ sha htaꞈ te yaꞈ ve maˇ dawˇ tuˬ ga laˇ ve yoˬ. Nawˬ Yaˬhoˉvaˬ htaꞈ haꞈ ve pa taw, Baˆtiˆsaˬ haꞈ yuˬ tuˬ dawˇ cheˆ ve a yeˇ uiˍ jaˇ. Awˬ pa Gʼuiˬ sha, yawˇ ve Yaˇ, leh daꞈ kehˬ ve awˬ ha hpu htaꞈ caˉ daꞈ ve, Liꞈ hpu hkʼaw maˍ laˇ ve htaꞈ nawˬ hkʼa dehꞈ gʼa yonˍ ve yoˬ. Ngaˬ hui henˇ peuˬ˗oˬ ve, “ngaˬ Baˆtiˆsaˬ haꞈ yuˬ tuˬ gu hehnˇ˗oˬ laˇ?” na hkawˇ chi htaꞈ nawˬ hkʼaˬ hkʼe dawˇ ve le?

17. Baˆtiˆsaˬ maˇ haꞈ yuˬ sheˍ htaˇ aˬ htoꞈ ma te cawˇ ve le?

¹⁷ Nawˬ Baˆtiˆsaˬ haꞈ yuˬ tuˬ gu hehnˇ˗oˬ ve kʼo, nawˬ Yaˬhoˉvaˬ geh meuˆ daꞈ tuˬ laiˉ ceuˬ te˗oˬ ve htaꞈ kʼoˆ gaˇ ve yoˬ. * Nawˬ Liꞈ hpu hkʼaˬ htaˆ kaꞈ gʼaw ve pa taw, Yaˬhoˉvaˬ leh Yeˍsuˆ htaꞈ nawˬ hkʼa dehꞈ shiˍ daꞈ leh yonˍ ve yoˬ. (Heˍbrehˇ 11:6) Liꞈ hpu hkʼaw Yaˬhoˉvaˬ ka tiꞈ te taˍ laˇ ve htaꞈ nawˬ yonˍ leh Yeˍsuˆ htaiˍ hkʼawꞈ laˇ ve awˬ hpfuhˇ venˇ baˆ leh suh ve htaꞈ ponˬ tuˬ nawˬ yonˍ ve yoˬ. Nawˬ venˇ baˆ dawˇ hpfuhˆ ve, nawˬ te yaꞈ ve htaꞈ nyi ma luˬ ve, leh Yaˬhoˉvaˬ venˇ baˆ hpehˇ laˇ tuˬ lawˬ ve yoˬ. Nawˬ ve te hkʼaˇ dawˇ hkʼaˇ maˇ daꞈ ve htaꞈ baˬ taˉ leh Gʼuiˬ sha nyi hkʼaˇ suh tuˬ te ve yoˬ. (Tcuh yaˇ 3:19) Nawˬ ve yonˍ hkʼaˇ shu htaꞈ kʼoˆ piˇ gaˇ leh nawˬ Baˆtiˆsaˬ maˇ haꞈ yuˬ sheˍ htaˇ, awˬ viˉ awˬ nyi geh hto toˇ ve yoˬ. (Maꞈhtehˍ 24:14) Nawˬ a yeˇ uiˍ ve chi ve teˇ hpaˍ htaꞈ te ve pa taw, Yaˬhoˉvaˬ nyi hkʼaˇ suh leh ha lehˬ jaˇ tuˬ te piˇ ve yoˬ.—Tawˇ naˉ ve 27:11.

18. Baˆtiˆsaˬ maˇ haꞈ yuˬ sheˍ htaˇ nawˬ aˬ htoꞈ ma gʼa te cawˇ ve le?

¹⁸ Baˆtiˆsaˬ maˇ haꞈ yuˬ sheˍ htaˇ, nawˬ te cawˇ ve 2-3 ceuˬ cawˬ ve yoˬ. Henˇ peuˬ˗oˬ ve hkʼa shuˍ, nawˬ ve a shaꞈ teꞈ hkʼaˇ Gʼuiˬ sha ve a loˍ cawˇ ve hkʼe te tuˬ yoˬ tehꞈ ka tiꞈ te ve hkʼaw Yaˬhoˉvaˬ htaꞈ awˬ to chiˇ aꞈ piˇ leh nyi ma awˬ tawˬ hkʼa gaˬ bon lawˬ ve yoˬ. (1 Peˍtruˆ 4:2) Peuˬ leh nawˬ Baˆtiˆsaˬ haꞈ yuˬ gaˇ ve nyi haꞈ shaˉ paˍ awˬ moˍ hkʼaw caˉ daꞈ paˍ htaꞈ gʼa kʼoˆ piˇ ve yoˬ. Yawˇ nyi haꞈ shaˉ paˍ teˇ gʼaˇ gʼaˇ nawˬ geh ca yaw daꞈ la tcuh tuˬ yoˬ. Yawˇ hui nawˬ htaꞈ shiˍ leh haꞈ ve pa taw, yaw daꞈ tuˬ taˇ dawˇ haˍ sheˍ. Liꞈ hpu hkʼaw maˍ laˇ ve htaꞈ nawˬ  na gʼa ve tehꞈ yawˇ hui yonˍ gʼa tuˬ leh nawˬ awˬ to chiˇ aꞈ leh Baˆtiˆsaˬ haꞈ yuˬ ve a yeˇ uiˍ jaˇ ve tehꞈ shiˍ tuˬ, yawˇ hui nawˬ geh Liꞈ hpu hkʼaw ve awˬ lawn na laˇ tuˬ yoˬ. Nawˬ gu hehnˇ˗oˬ ve tehꞈ yawˇ hui mawˬ htaˇ, hpawnˬ daꞈ lonˉ 1 nyi maˇ heˆ leh hpawnˬ daꞈ lonˉ 3 nyi hkʼaw nawˬ Baˆtiˆsaˬ haꞈ yuˬ gʼa tuˬ yawˇ hui kʼoˆ laˇ tuˬ yoˬ.

19-20. Baˆtiˆsaˬ haꞈ yuˬ peuˬ hkʼawꞈ nawˉ nawˬ aˬ htoꞈ ma gʼa te cawˇ ve le?

¹⁹ Baˆtiˆsaˬ haꞈ yuˬ peuˬ hkʼawꞈ nawˉ kaꞈ nawˬ aˬ htoꞈ ma gʼa kʼawꞈ te cawˇ sheˍ ve le? * Nawˬ awˬ to chiˇ aꞈ leh hkanˍ taˍ ve htaꞈ gʼaꞈ te tuˬ Yaˬhoˉvaˬ dawˇ law ve tehꞈ nawˬ maˇ leunˇ cawˇ. Chi htaꞈ pa taw nawˬ Baˆtiˆsaˬ haꞈ yuˬ peuˬ hkʼawꞈ nawˉ, awˬ hto chiˇ aꞈ leh hkanˍ taˍ ve htaꞈ gʼa gʼaꞈ te ve yoˬ. Hkʼaˬ hkʼe te nawˬ hkanˍ taˍ ve htaꞈ gʼaꞈ te gʼa tuˬ le?

²⁰ Nawˬ ve Hkriꞈ yaˇ awˬ moˍ hkʼaw ve chaw htaꞈ meuˆ daꞈ sheˍ. Nawˬ Baˆtiˆsaˬ haꞈ yuˬ˗oˬ htaˇ, miˬ guiˬ chi hkʼoˆ lo “awˬ viˉ awˬ nyi” hkʼaw nawˬ kaꞈ teˇ gʼaˇ hpehꞈ ve yoˬ. (1 Peˍtruˆ 2:17) Yawˇ hui nawˬ ve yehˬ kʼa hkʼaw ve chaw hkʼe hpehꞈ ve yoˬ. Nawˬ hkʼaˬ htaˆ kaꞈ hpawnˬ daꞈ˗e htaˇ, nawˬ yawˇ hui geh meuˆ daꞈ tuˬ yoˬ. Nawˬ teˇ nyi le le Liꞈ hpu gʼaw leh hkʼa dehꞈ dawˇ nyi sheˍ. Liꞈ hpu hkʼaw ve teˇ lawn lawn nawˬ gʼaw htaˇ, gʼaw taˍ ve awˬ lawn htaꞈ hkʼa dehꞈ dawˇ nyi sheˍ. Chi hkʼe te ve kʼo nawˬ gʼaw ve htaꞈ hkʼa dehꞈ na gʼa tuˬ yoˬ. (Chiˇ mvuh ve 1:1, 2) Nawˬ hkʼaˬ htaˆ kaꞈ “bon lawˬ” sheˍ. Nawˬ nyi ma awˬ tawˬ hkʼa gaˬ Yaˬhoˉvaˬ geh bon lawˬ ve kʼo yawˇ geh meuˆ daꞈ tuˬ yoˬ. (Maꞈhtehˍ 26:41) Gʼuiˬ sha ve mvuhˇ miˬ lehˬ a shaꞈ teꞈ kuiˬ hkʼaw a yeˇ uiˍ jaˇ. (Maꞈhtehˍ 6:33) Chi hkʼe te gʼa tuˬ, hto toˇ ve nawˬ awˬ pon a yeˇ uiˍ jaˇ tehꞈ gʼa shawˍ ve yoˬ. Nawˬ hkʼaˬ htaˆ kaꞈ hto toˇ˗e ve kʼo, nawˬ ve yonˍ hkʼaˇ yonˍ yeˬ leh shu co co taiˍ taiˍ ve a shaꞈ gʼa tuˬ ga piˇ gʼa ve yoˬ.—1 Tiˆmoˉseˍ 4:16.

21. Baˆtiˆsaˬ haꞈ yuˬ ve aˬ htoꞈ ma awˬ pon yehˬ miˉ hpaw laˇ ve le?

²¹ Nawˬ awˬ hto chiˇ aꞈ leh Baˆtiˆsaˬ haꞈ yuˬ ve a shaꞈ teꞈ kuiˬ hkʼaw a yeˇ uiˍ jaˇ. Nawˬ teˇ ceuˬ ceuˬ gʼa yuˬ tanˇ ve htawˇ, awˬ hpfuhˇ hkʼawꞈ˗aw laˇ? Hkʼawꞈ jaˇ! Chi teˇ hkui nawˬ gʼa hpuˇ chehˇ ve tuꞈ ve hkanˍ ve teˇ hkui teˇ yanˇ ceh hpehꞈ ve yoˬ. (2 Kawˇrenˍhtuˆ 4:17) Baˆtiˆsaˬ haꞈ yuˬ ve lehˬ chi teˇ hkui nawˬ ha lehˬ tuˬ yehˬ miˉ hpaw laˇ leh awˬ gʼuˇ suhˍ hpawˇ “awˬ tehˬ awˬ na yeˬ ve a shaꞈ” gʼa tuˬ yoˬ. (1 Tiˆmoˉseˍ 6:19) Hkʼe te leh “ngaˬ Baˆtiˆsaˬ haꞈ yuˬ tuˬ gu hehnˇ˗oˬ laˇ?” na hkawˇ chi htaꞈ caˉ daꞈ ve bon lawˬ ve hkʼaw hkʼa dehꞈ dawˇ nyi sheˍ.