Cehˆ leh Meh˗le˗le 1988 hkʼawꞈ htaˇ kaꞈ Gʼuiˬ sha ve kanˉ awˬ yanˇ hkʼa biˇ teˇ geh te ve yoˬ. Yawˇ huiˉ maˬ hkʼaˬ kaˬ lo chehˇ kaꞈ gʼa ve laiˉ gʼaˇ shiˍ ve yoˬ. Fen˗kenˬnaˬ venˇ leh Kaˬdeuˬlonˬ venˇ lo yawˇ hui awˬ vuiˬ awˬ suhˉ gʼa ve yoˬ. Yawˇ huiˉ maˬ Hpaˉlanˍ mvuhˇ miˬ awˬ tcuhˆ peuˍ uˉ peunˍ ve awˬ hawˉ lo chehˇ ve yoˬ. Yawˇ huiˉ maˬ htaꞈ ngaˬ hui na piˇ gaˇ ve yoˬ. Teˇ geh na sheˍ.

Nawˬ Gʼuiˬ sha ve kanˉ awˬ yanˇ hkʼa biˇ te gaˇ tuˬ aˬ htoꞈ ma te laˇ ve le?

Meh˗le˗le: Ngaˬ Kaˬdeuˬlonˬ venˇ lo uiˍ la ve yoˬ. Ngaˬ e Gʼuiˬ sha ve kanˉ te ve kaiˬ jaˇ. Ngaˬ yaˇ ehˉ htaˇ ngaˬ e geh teˇ nyi mvuhˇ hkʼa hpeuꞈ hto toˇ˗e ve yoˬ. Ngaˬ shu htaꞈ haꞈ ve yoˬ. 1985 hkʼawꞈ ngaˬ liꞈ henˇ peuˬ htaˇ, gʼuˇ suhˍ peuˍ ve tanˬ te ve yoˬ.

Cehˆ: Ngaˬ yaˇ ehˉ htaˇ awˬ paˇ awˬ kui lo ve chaw Gʼuiˬ sha ve kanˉ awˬ yanˇ hkʼa biˇ te ve tiˉ cawˬ leh kanˉ chi htaꞈ haꞈ ve yoˬ. Ngaˬ liꞈ hpehˇ htaˇ teˇ tcuhˉ teˇ yanˇ gʼuˇ suhˍ peuˍ ve te ve yoˬ. Teˇ shinˉ shinˉ kʼo, hkawꞈ nyi shinˉ nyi htaˇ, gʼuˇ suhˍ peuˍ ve chaw hto toˇ kuiˬ awˬ ti lo ngaˬ hui chaw gʼawˬ caˇ ve kaˇ ciˇ leh hto toˇ˗e ve yoˬ. Ngaˬ hui teˇ nyi mvuhˇ hkʼa hpeuꞈ hto toˇ ve yoˬ. Hto toˇ peuˬ hkʼawꞈ nawˉ laˇ tsuhˇ gʼuiˬ lo guiˇ˗e pyawˍ jaˇ.

1988 hkʼawꞈ htaˇ, ngaˬ Meh˗le˗le htaꞈ heuˆ daꞈ ve yoˬ. Peuˬ hkʼawꞈ nawˉ yawˇ kʼoˆ ve, ‘ngaˬ huiˉ maˬ teꞈ chiˉ dawˇ haˍ kuiˬ maˇ cawˬ neˬ. Gʼuiˬ sha ve kanˉ maˇ maˇ te cawˇ ve neˬ.’ Ngaˬ Meh˗le˗le geh gʼuˇ suhˍ peuˍ ve tanˬ te ve yoˬ. Peuˬ hkʼawꞈ nawˉ teˇ hkʼawꞈ htaˇ, ngaˬ huiˉ maˬ gʼuˇ suhˍ peuˍ ve liꞈ henˇ yehˬ lo teˇ geh kʼai leh henˇ peuˬ hkʼawꞈ nawˉ tcuh peu ve gʼuˇ suhˍ peuˍ ve gʼa te ve yoˬ. Fen˗kenˬnaˬ venˇ lo maˇ kʼai sheˍ htaˇ, Kaˬdeuˬlonˬ venˇ lo ngaˬ hui Gʼuiˬ sha ve kanˉ laiˉ ceuˬ gʼa te ve ha lehˬ jaˇ.

Laiˉ hkʼawꞈ ve awˬ yanˇ nawˬ hui awˬ vuiˬ teˇ hkui teˇ hkui gʼa pa ve, hkʼaˬ hkʼe te haꞈ yuˬ gʼa ve le? 

Meh˗le˗le: Fen˗kenˬnaˬ venˇ lo ve Beˍteˍlaˆ hkʼaw ve awˬ viˉ awˬ nyi ngaˬ hui Iˉsaˍyaˆ liꞈ 6:8 htaꞈ dawˇ cawˇ ve shiˍ ve yoˬ. Yawˇ hui ngaˬ hui htaꞈ awˬ hkʼeun hkʼaw tawˇ yaw laˬ htaˇ na laˇ ve, “nawˬ dawˇ cawˇ ve Liꞈ hpu awˬ tawn hkʼaˬ ve teˇ tawn le tawnˇ gʼa˗aw laˇ?” chi hkʼe kʼoˆ laˇ htaˇ, awˬ vuiˬ awˬ suhˉ gʼa ve tehꞈ ngaˬ hui shiˍ ve yoˬ. Ngaˬ hui kʼoˆ piˇ ve, “ngaˬ hui kʼai tuˬ yoˬ! Ngaˬ hui htaꞈ kʼai peu laˇ˗oˆ!”

 Ngaˬ hui te jaw ve leh gʼa ve awˬ vuiˬ awˬ suhˉ htaꞈ maˇ tehˆ daꞈ. Chi hkʼe te ve kʼo, ngaˬ hui gʼa ve awˬ vuiˬ awˬ suhˉ htaꞈ maˇ ha lehˬ taˬ. Ngaˬ hui htaꞈ ga laˇ gʼa ve teˇ hkʼaˇ lehˬ maˇ mawˬ daꞈ jaw ve awˬ viˉ awˬ nyi htaꞈ shiˍ daꞈ tuˬ awˉ lawˉ te ve yoˬ.

Cehˆ: Awˉ lawˉ htaˇ awˬ chawˇ teˇ hpaˍ ngaˬ hui htaꞈ maˇ jiˆ kʼai tcuh gaˇ leh ngaˬ hui oˇ kaˬ lo caˉ leh chehˇ tuˬ lawˬ laˇ ve yoˬ. Ngaˬ hui Kaˬdeuˬlonˬ venˇ lo tawˆ˗e htaˇ awˬ viˉ awˬ nyi hawˉ hkʼaˆ teˇ gʼaˇ Maꞈhtehˍ liꞈ 13:38 hkʼaw Yeˍsuˆ kʼoˆ ve tawˇ hkawˇ htaꞈ ngaˬ hui dawˇ nyi tuˬ ga laˇ ve yoˬ. Choˬ kaˬ lo kʼoˆ ve, “heh lehˬ, miˬ guiˬ chi htaꞈ kʼoˆ ve yoˬ.” Ngaˬ hui awˬ vuiˬ awˬ suhˉ gʼa htaˇ, hto toˇ kuiˬ awˬ ti lehˬ miˬ guiˬ hkʼoˆ teˇ kaˬ le le lo hpehꞈ ve tehꞈ tawnˇ taˍ cawˇ ve yoˬ. A yeˇ uiˍ jaˇ ve lehˬ hto toˇ kuiˬ lo ve chaw yoˬ!

Awˬ ti awˬ suhˉ lo gaˬ htaˇ choˬ kaˬ lo ve chaw ha lehˬ puiˉ jaˇ. Ngaˬ hui a shaꞈ teꞈ hkʼaˇ yawˇ hui hkʼe leˇ te ve yoˬ. Yawˇ hui caˇ ve awˍ chiˇ ngaˬ hui caˇ jaw ve htaꞈ maˇ shuˍ. Yaꞈ hkʼaˇ, yawˇ hui caˇ ve dawˬ ve yawˇ hui hkʼe leˇ caˇ leh, a shu yawˇ awˬ to htaꞈ nyi haꞈ shaˉ ve yoˬ. Ngaˬ hui gʼa ve awˬ vuiˬ teˇ ceuˬ le le htaꞈ daꞈ ve hpawˇ nyi ve yoˬ.

Meh˗le˗le: Oˇ kaˬ lo ve awˬ viˉ awˬ nyi geh ngaˬ hui laiˉ ceuˬ henˇ yuˬ ve yoˬ. Ngaˬ Fen˗kenˬnaˬ venˇ lo gaˬ la ve awˉ lawˉ teˇ pawˆ htaꞈ dawˇ nawˇ ve yoˬ. Oˇ ve teˇ yanˇ mvuhˇ yeˬ laˬ jaˇ. Mvuhˇ yeˬ laˬ peuˬ hkʼawꞈ nawˉ hehꞈ hto toˇ tuˬ dawˇ ve yoˬ. Yaꞈ hkʼaˇ, awˬ viˉ awˬ nyi yaˇ miˇ teˇ gʼaˇ “kʼai yoˬ laˇ?” tehꞈ ngaˬ htaꞈ na laˇ ve yoˬ. Ngaˬ cheˆ˗ehꞈ kʼai leh yawˇ htaꞈ na piˇ ve, “hkʼaˬ hkʼe te kʼai tuˬ le?” Yawˇ kʼoˆ laˇ ve, “cawnˍ hkʼawˆ leh ngaˬ hui sho kuˇ gʼaꞈ kʼai tuˬ yoˬ.” Oˇ ve teˇ yanˇ, sho kuˇ gʼaꞈ leh cawnˍ hkʼawˆ ve awˬ hkʼaˇ ngaˬ gʼa henˇ ve yoˬ. Ngaˬ chi hkʼe maˇ te ve kʼo, mvuhˇ yeˬ yanˇ htaˇ hto toˇ˗e ve maˇ kʼai gaˬ taˬ.

Nawˬ hui aˬ laˬ hkʼe 15 pawˆ gʼa jiˆ kʼai˗oˬ. Ngaˬ hui htaꞈ kʼoˆ maˍ laˇ hpehꞈ˗aw laˇ?

Meh˗le˗le: Yehˬ jiˆ kʼai ve sha ve maˇ heˆ. Yaꞈ hkʼaˇ, chehˇ kuiˬ daꞈ daꞈ ve ca leh hto toˇ ve kʼawꞈ la htaˇ gʼaˇ hkʼa dehꞈ jehˇ leh nyi ma sha tuˬ a yeˇ uiˍ jaˇ.

Cehˆ: Yehˬ jiˆ kʼai htaˇ, awˬ sheuˉ nehˉ ve ngaˬ dawˇ cawˇ jaˇ. Yaꞈ hkʼaˇ, awˬ tcuhˉ peuˍ lo ve awˬ viˉ awˬ nyi ngaˬ hui yehˬ chi ve htaꞈ hkʼa maw maw maˇ gʼa chehˇ tuˬ shiˍ htaˇ, teˇ pawˆ pawˆ kʼo yawˇ hui kʼoˆ guiˇ laˇ ve, “Cehˆ yehˬ awˬ sheuˉ taˇ nehˉ sheˍ mehˍ!”

Meh˗le˗le mawˇ gu keu ve cheuˬ jaˇ. “Aˉ kʼaꞈ yehˬ” “zuhꞈ kuiˬ” “awˬ chiˇ awˍ te kuiˬ” hkʼaw yehˇ tuˬ awˬ pon, teˇ ceuˬ le le yawˇ ta kʼoˍ hkʼaw keu peuˬ htaˇ, hkʼa dehꞈ bvuhꞈ nehˉ ve yoˬ. Ngaˬ hui yehˬ awˬ suhˉ lo gaˬ la htaˇ, hkʼaˬ teˇ ta kʼoˍ hkʼaˬ kaˬ lo yehˇ tuˬ shiˍ ve yoˬ. Ta kʼoˍ teˇ maˬ le le aˬ htoꞈ ma keu taˍ ve yawˇ hkʼa dehꞈ bvuhꞈ nehˉ ve pa taw, ca sha ve yoˬ.

 Meh˗le˗le: Ngaˬ hui hteˇ hteˇ shawˇ shawˇ cawˬ tuˬ te jawˬ ve pa taw, awˬ ti awˬ suhˉ lo gaˬ la htaˇ ngaˬ hui Gʼuiˬ sha ve kanˉ laꞈ haˉ te kʼai gʼa ve yoˬ.

Nawˬ hui “te chehˇ ve kanˉ htaꞈ biˇ la htaˇ hkʼa gaˬ” te gʼa tuˬ awˬ yanˇ hkʼaˬ hkʼe shawˍ teh ve le?—2 Tiˆmoˉseˍ 4:5.

Meh˗le˗le: Shinˉ peuˬ teˇ nyi ngaˬ hui gʼaˇ jehˇ leh hpawnˬ daꞈ˗e tuˬ gu ve yoˬ. Shinˉ peuˬ nyiˇ nyi te leh shinˉ nyi hkʼa gaˬ ngaˬ hui Gʼuiˬ sha ve kanˉ te ve yoˬ.

Cehˆ: Ngaˬ hui awˬ yanˇ hkʼa biˇ gʼa te ve htawˇ, chi ve htaꞈ hkʼe taw taw maˇ dawˇ haˍ. A yeˇ uiˍ jaˇ ve lehˬ hto toˇ ve yoˬ. Ngaˬ hui aˉ hkʼaw tawˆ˗e leh kʼawꞈ la htaˇ, mawˬ daꞈ ve chaw htaꞈ hto maˍ piˇ ve yoˬ.

Meh˗le˗le: Ngaˬ hui ca guiˇ haˉ˗e htaˇ, teˇ pawˆ le le ngaˬ liꞈ kʼoˆ ehˉ yuˬ kʼai ve yoˬ. Ngaˬ hui Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ maˇ kʼoˆ piˇ ve htawˇ, chaw teˇ hpaˍ hpaˍ ngaˬ hui geh liꞈ gʼaw guiˇ tuˬ ve teˇ ceuˬ ceuˬ ca lawˬ la ve yoˬ. Shu ngaˬ hui htaꞈ chaˬ nyi chehˇ ve pa taw, ngaˬ hui veuꞈ kaˇ veuꞈ ve leh teˇ hkʼaˇ dawˇ hkʼaˇ htaꞈ shaˍ tiꞈ gʼa te ve yoˬ.

Cehˆ: Awˬ nu ve teˇ hkʼaˇ lehˬ ngaˬ hui shu geh awˬ chawˇ te gʼa ve yoˬ. Ngaˬ ve yehˬ aˉ kʼaꞈ lo shaw shiˆ leh yaꞈ kʼaw hkʼoˆ lo baˬ˗aꞈ ve kaꞈ gʼawˆ baˬ ve yoˬ. Awˬ chawˇ awˬ paˆ ngaˬ hui te ve htaꞈ chaˬ nyi chehˇ leh teˇ pawˆ pawˆ na laˇ ve, “Liꞈ hpu teˇ kʼoˆ lawˬ hpehꞈ˗aw laˇ?” tehꞈ kʼoˆ laˇ ve yoˬ.

Nawˬ hui vuiˇ jaˇ kuiˬ lo hto toˇ˗e hkʼeh jaˇ. Hkʼaˬ ve teˇ pawˆ nawˬ dawˇ cawˇ jaˇ ve le?

Cehˆ: Kenˬnaˬ venˇ lo chehˇ htaˇ, hto toˇ kuiˬ awˬ ti teˇ kaˬ kaˬ kʼo kʼai haˍ jaˇ. Gaˬ˗e tuˬ teˇ shinˉ gʼa kʼai leh yaꞈ kʼaw haˍ jaˇ ve aˬ laˬ hkʼe 600 kiˇ loˇ gʼa kʼai ve yoˬ. Aˍmeˬzonˬ heh puiˉ hkʼaw Sheh˗te˗le hkʼaˆ lo kʼai htaˇ, ngaˬ hui dawˇ cawˇ jaˇ. Oˇ kaˬ lo gaˬ˗e tuˬ hkʼaw hkʼoˆ kʼai tuˬ ve kaˇ leh heuˇ caˆ laiˉ naˍ riˍ ngaˬ hui gʼa ciˇ kʼai ve yoˬ. Oˇ kaˬ lo ve chaw maˇ˗awˍ ve shi duˇ ve chaw hpehꞈ ve yoˬ. Liꞈ kʼoˆ piˇ htaˇ, yawˇ hui ha lehˬ jaˇ. Chaw teˇ hpaˍ shi deˬ ehˉ peꞈ laˇ ve yoˬ. Mvuhˇ hpeuꞈ la htaˇ Gʼuiˬ sha ve kanˉ hkʼaˇ hkʼaw ve VDO ngaˬ oˇ kaˬ lo ve chaw htaꞈ hpaw maˍ piˇ ve yoˬ. Ca nyi la maˇ jaˇ.

Meh˗le˗le: Peuˬ laˬ ve hkʼaˬ nyiˇ hkʼawꞈ maˇ gaˬ sheˍ htaˇ, Hkeh˗maw˗hpe hkʼaˆ lo Cehˆ htaꞈ bon maˍ tcuh ve yoˬ. Aw˗yan˗hpawˆ iˉ kaˆ lawˬ ngaˬ hui 4 naˍ riˍ heuˇ caˆ gʼa ciˇ kʼai ve ha lehˬ jaˇ.

Cehˆ: Iˉ kaˆ gʼuiˬ dawˇ hehnˇ jaˇ leh ngaˬ hui kawˆ tuˬ cawˬ ve yoˬ. Gʼuiˬ dawˇ oˇ ve htaꞈ hpanˍ kʼai htaˇ, nawˬ hui anˇ jaˇ tuˬ yoˬ. Oˇ kaˬ lo hpanˍ kʼai gʼa ve heuˇ caˆ gʼaꞈ paˍ cheuˬ jaˇ. Yaꞈ hkʼaˇ, chi lehˬ daꞈ jaˇ. Awˬ viˉ awˬ nyi 6 gʼaˇ ceh kʼai ve htawˇ, Yeˍsuˆ suh ve dawˇ nawˇ tuˬ hpawnˬ daꞈ la ve chaw aˬ laˬ hkʼe 50 gʼaˇ cawˬ ve yoˬ. Laiˉ gʼaˇ kʼo Me˗le˗deˬ chaw hpehꞈ ve yoˬ.

Meh˗le˗le: Yawˇ hui Yaˬhoˉvaˬ ve kanˉ maˇ maˇ te htaˇ, yaˇ nehˬ daꞈ ve awˬ lawn chi hkʼe gʼa hpuˇ leh ha lehˬ jaˇ. Chi hkʼe gʼa hpuˇ htaˇ, nawˬ Yaˬhoˉvaˬ htaꞈ gʼaˇ hkʼa dehꞈ va sheˍ. Nawˬ ve hpehꞈ laˬ jaw ve htaꞈ pa taw, yonˍ yeˬ gʼa ve yoˬ. Yaˬhoˉvaˬ laꞈ sheh che leh ngaˬ hui htaꞈ ga laˇ ve laiˉ pawˆ gʼa mawˬ ve yoˬ.

Nawˬ hui laiˉ ceuˬ hkawˇ yaw gʼa ve law neˬ. Cheuˬ ve pa taw laiˉ ceuˬ hkawˇ yaw gʼa ve maˇ heˆ laˇ?

Cehˆ: Maˇ heˆ. Hto toˇ ve leh Hkriꞈ yaˇ awˬ moˍ htaꞈ gʼa ga piˇ ve pa taw, ngaˬ tawˇ hkawˇ awˬ suhˉ henˇ ve yoˬ. Liꞈ henˇ yaˇ te jawˬ ve Liꞈ hpu gʼaw ve maˇ gʼa te sheˍ htaˇ kaꞈ, ngaˬ La˗na˗htaw˗ko * ve tawˇ hkawˇ Shaw nyi kuiˬ Taꞈ yehˬ awˉ lawˉ gʼa sheh kʼai ve yoˬ. Ngaˬ awˬ vuiˬ te ve hkʼaˬ hkʼe kʼai le tehꞈ awˬ viˉ awˬ nyi hawˉ hkʼaˆ teˇ gʼaˇ htaꞈ na piˇ ve yoˬ. Yawˇ kʼoˆ ve, “teˇ pawˆ pawˆ kʼo nawˬ kʼoˆ ve ngaˬ hui maˇ na gʼa ve htawˇ, hkʼe kaꞈ daꞈ jaˇ.” Yaˇ ehˉ teˇ hpaˍ ngaˬ htaꞈ ga laˇ gʼa jaˇ. Ngaˬ kʼoˆ yaꞈ ve kʼo, chaw mawˇ teꞈ chiˉ maˇ kʼoˆ laˇ? Yaꞈ hkʼaˇ, yaˇ ehˉ teˇ hpaˍ teˇ ceuˬ ceuˬ kʼoˆ laˇ ve yoˬ. Ngaˬ yaˇ ehˉ geh laiˉ ceuˬ gʼa henˇ ve yoˬ.

Meh˗le˗le: Hto toˇ kuiˬ teˇ kaˬ lo ngaˬ geh Liꞈ hpu henˇ chehˇ ve chaw Hpaˉlanˍ, Pawˬtuˬgiˬ leh La˗na˗htaw˗ko hkawˇ yaw gʼa ve yoˬ. Nawˬ awˬ pon haˍ jaˇ ve Pawˬtuˬgiˬ tawˇ hkawˇ Liꞈ hpu awˉ lawˉ ca maˍ˗e cawˇ ve tehꞈ awˬ viˉ awˬ nyi yaˇ miˇ teˇ gʼaˇ kʼoˆ laˇ ve yoˬ. Peuˬ leh nawˬ yaw gʼa ve chaw ceuˬ tawˇ hkawˇ htaꞈ a yehˉ yehˉ ca sheˍ. Aˬ htoꞈ ma te yawˇ chi hkʼe kʼoˆ laˇ ve awˉ lawˉ htaˇ ngaˬ maˇ na gʼa.

Teˇ nyi htaˇ, La˗na˗htaw˗ko hkawˇ yaw ve chaw htaꞈ ngaˬ Liꞈ hpu awˉ lawˉ maˍ piˇ ve yoˬ. Peuˬ leh  Baˬraˬziˇ chaw Pawˬtuˬgiˬ hkawˇ yaw ve geh Liꞈ hpu ca maˍ˗e ve yoˬ. 2 gʼaˇ teˇ gʼaˇ geh Liꞈ hpu tanˬ maˍ piˇ htaˇ, awˬ viˉ awˬ nyi yaˇ miˇ kʼoˆ laˇ ve, “Meh˗le˗le˗oˬ, nawˬ Liꞈ hpu maˍ piˇ chehˇ ve chaw hkʼa dehꞈ maˇ na gʼa tehꞈ ngaˬ dawˇ ve.” Liꞈ hpu henˇ ve chaw Pawˬtuˬgiˬ hkawˇ yaw ve geh ngaˬ La˗na˗htaw˗ko hkawˇ yaw piˇ ve tehꞈ shiˍ la ve yoˬ. Yawˇ kʼoˆ laˇ ve daꞈ jaˇ law tehꞈ ngaˬ shiˍ la ve yoˬ!

Awˬ viˉ awˬ nyi nawˬ huiˉ maˬ htaꞈ haꞈ jaˇ law neˬ. Nawˬ hui yawˇ hui geh chi hkʼe taw taw meuˆ daꞈ tuˬ aˬ htoꞈ ma te laˇ ve le?

Cehˆ: Tawˇ naˉ ve liꞈ 11:25 hkʼaw kʼoˆ ve, ‘shu htaꞈ tanˇ piˇ ve kʼo uiˍ la daꞈ la tuˬ yoˬ.’ Ngaˬ hui awˬ viˉ awˬ nyi geh awˬ yanˇ hkʼa dehꞈ yehˇ leh yawˇ hui htaꞈ ga piˇ ve yoˬ. Chaw teˇ hpaˍ kʼoˆ ve, hpawnˬ daꞈ kuiˬ yehˬ te htaˇ “hto toˇ ve chaw te tcuh kaꞈ gʼa ve neˬ.” Yaꞈ hkʼaˇ, ngaˬ kʼoˆ piˇ ve, “ngaˬ kaꞈ hto toˇ ve chaw hpehꞈ ve yoˬ. Aˬ htoꞈ ma te cawˇ ve kʼo ngaˬ kaꞈ ga gaˇ ve neˬ.” Awˬ tehˬ yoˬ. Ngaˬ hui a shu yawˇ awˬ pon awˬ yanˇ cawˬ cawˇ ve htawˇ, a shu yawˇ awˬ pon tiˉ maˇ dawˇ nyi leh shu htaꞈ awˬ yanˇ piˇ gʼa ve yoˬ.

Meh˗le˗le: Ngaˬ hui awˬ viˉ awˬ nyi htaꞈ a yeˇ yuˬ cawˇ ve yoˬ. Awˬ viˉ awˬ nyi ve yaˇ gʼa nyi haꞈ shaˉ laˇ leh liꞈ henˇ yehˬ lo shiˍ hkʼawꞈ laˇ tuˬ loˍ htaˇ, yawˇ hui htaꞈ ga piˇ tuˬ awˬ yanˇ ca cawˇ ve yoˬ. Yawˇ hui ga laˇ tuˬ loˍ htaˇ, ngaˬ hui kaꞈ laꞈ haˉ ga piˇ gʼa ve yoˬ. Chi hkʼe te ve kʼo, yawˇ hui geh meuˆ daꞈ maˇ la ve yoˬ.

Hto toˇ ve chaw loˍ jaˇ kuiˬ lo nawˬ hui Gʼuiˬ sha ve kanˉ te htaˇ, aˬ htoꞈ ma awˬ bon gʼa ve le?

Cehˆ: Gʼuiˬ sha ve kanˉ awˬ yanˇ hkʼa biˇ te ve ngaˬ hui awˬ bon maˇ maˇ gʼa tuˬ te laˇ ve yoˬ. Suhˆ jehˬ hawˆ jehˬ daꞈ jaˇ ve htaꞈ ngaˬ hui gʼa mawˬ leh Yaˬhoˉvaˬ hpanˍ taˍ ve awˬ ceuˬ htaꞈ ha lehˬ ve yoˬ. Ngaˬ hui shoꞈ shaꞈ ve cawˬ ve htawˇ, Yaˬhoˉvaˬ ve chaw lehˬ hkʼaˬ kaˬ lo chehˇ ve kaꞈ ga daꞈ ve tehꞈ ngaˬ hui shiˍ ve pa taw, ha lehˬ jaˇ.

Ngaˬ yaˇ nehˬ htaˇ, choˬ paˉ oˇ paˉ maˇ chehˇ ve pa taw, Fen˗kenˬnaˬ venˇ lo chehˇ htaˇ ngaˬ htawnˍ hkʼaw lo gʼa chehˇ ve yoˬ. Teˇ nyi kʼo, ngaˬ choˬ kaˬ lo Liꞈ hpu gʼa maˍ la tuˬ maˇ dawˇ nyi jaw. Yaˬhoˉvaˬ ngaˬ hui htaꞈ awˬ bon naꞈ laˇ jaˇ.

Meh˗le˗le: Ngaˬ ha lehˬ tuˬ te laˇ ve awˬ ceuˬ lehˬ Yaˬhoˉvaˬ ve kanˉ gʼa te leh shu htaꞈ ga piˇ ve pa taw ha lehˬ jaˇ. Ngaˬ huiˉ maˬ meuˆ daꞈ tuˬ te laˇ ve yoˬ. Teˇ pawˆ htaˇ Cehˆ ngaˬ htaꞈ na laˇ ve, awˬ viˉ awˬ nyi teˇ ca awˬ gʼaˇ nuˇ chehˇ ve awˍ caˇ la tuˬ jehˬ piˇ hpehꞈ˗aw laˇ tehꞈ kʼoˆ laˇ ve yoˬ. Ngaˬ kʼawꞈ kʼoˆ piˇ ve, “ngaˬ kaꞈ chi hkʼe dawˇ chehˇ ve yoˬ.” Ngaˬ huiˉ maˬ dawˇ hkʼaˇ shuˍ daꞈ ve yoˬ.

Cehˆ: Maˇ maw ve awˬ yanˇ, Cehˆ ve nyiˍ shiˍ u htaꞈ mvuhˇ haˉ caˇ ve tehꞈ saˍ laꞈ gʼonˍ kʼoˆ laˇ ve yoˬ. Meh˗le˗le awˬ lawn chi ve maˇ kaˇ gaˇ ve htawˇ, ngaˬ yawˇ htaꞈ kʼoˆ piˇ ve, “meh htaoˍ˗oˬ, ngaˬ chaw mawˇ maˇ hpehꞈ sheˍ htaˇ gʼa suh˗e ve, maˇ heˆ leh haˆ gʼa suh˗e ve kʼo, ‘ngaˬ ve a shaꞈ awˬ hpfuhˇ hkʼaˆ jaˇ ve lehˬ Yaˬhoˉvaˬ ve kanˉ te ve yoˬ. Chi lehˬ ngaˬ ha lehˬ tuˬ te laˇ ve yoˬ.”—Awˬ hkuiˉ puiˍ 25:8.

Meh˗le˗le: Ngaˬ hui gʼa te tuˬ maˇ dawˇ ve htawˇ, Yaˬhoˉvaˬ laiˉ ceuˬ kʼawꞈ te tcuh laˇ ve yoˬ. Ngaˬ hui ve a shaꞈ teꞈ hkʼaˇ daꞈ ve gʼa hpuˇ jaˇ. Yaˬhoˉvaˬ ngaˬ hui geh chehˇ ve tehꞈ hkʼaˬ htaˆ kaꞈ yonˍ ve yoˬ. Gʼuiˬ sha ve kanˉ hkʼaˇ hkʼaˬ kaˬ lo kʼai tcuh laˇ ve htawˇ, ngaˬ hui laꞈ haˉ kʼai ve yoˬ!