1. Cuˇ yiˍ piˇ ve liꞈ 3:1, 7 hkʼaw ngaˬ hui htaꞈ aˬ htoꞈ ma maˍ laˇ ve le?

 Chaw teˇ hpaˍ tawˇ yaw gaˇ puiˉ jaˇ. Chaw teˇ hpaˍ tawˇ hkʼa dehꞈ maˇ yaw gaˇ. Awˬ lawn chi ve hkʼaw a yeˇ uiˍ ve Liꞈ hpu awˬ tawn hkʼaw, taꞈ iˉ gawˬ lehˍ chehˇ tuˬ ve awˬ yanˇ leh tawˇ yaw tuˬ ve awˬ yanˇ cawˬ ve ngaˬ hui gʼa mawˬ ve yoˬ. (Cuˇ yiˍ piˇ ve 3:1, 7 gʼaw sheˍ.) Yaꞈ hkʼaˇ, ngaˬ hui teˇ pawˆ pawˆ kʼo awˬ viˉ awˬ nyi tawˇ yaw maˇ ve chaw htaꞈ maˇ kʼawꞈ yaw maˇ tcuh gaˇ leh, tawˇ maˇ yaw maˇ ve chaw htaꞈ kʼawꞈ yaw maˇ tcuh gaˇ ve yoˬ.

2. Hkʼaˬ hkʼe htaˇ tawˇ yaw cawˇ ve, a shu awˬ liˇ teh tuˬ a hkaw˗anˬ cawˬ ve le?

² Tawˇ yaw puiˉ jaˇ ve lehˬ Gʼuiˬ sha geh laˬ ve laꞈ shawnˍ hpehꞈ ve yoˬ. (Tawˆ kʼai ve 4:10, 11; Hpeuꞈ maˍ ve 4:11) Liꞈ hpu hkʼaw Yaˬhoˉvaˬ ngaˬ hui htaꞈ kʼoˆ laˇ ve, laꞈ shawnˍ chi ve hkʼaˬ hkʼe yehˇ cawˇ ve le? Hkʼaˬ hkʼe htaˇ tawˇ yaw cawˇ ve, hkʼaˬ hkʼe htaˇ taꞈ iˉ chehˇ cawˇ ve, awˬ lawn chi ve Liꞈ hpu hkʼaw ngaˬ hui htaꞈ hkʼaˬ hkʼe maˍ laˇ gʼa ve teˇ geh nyi sheˍ. Ngaˬ hui shu geh tawˇ yaw htaˇ, Yaˬhoˉvaˬ hkʼaˬ hkʼe dawˇ ve kaꞈ teˇ geh henˇ tuˬ yoˬ. Hkʼaˬ hkʼe htaˇ tawˇ yaw cawˇ ve ngaˬ hui awˉ lawˉ teˇ geh henˇ tuˬ yoˬ.

3. Roˉmaꞈ liꞈ 10:14 hkʼaw kʼoˆ taˍ ve hkʼe, ngaˬ hui tawˇ yaw cawˇ ve awˬ yanˇ hkʼaˬ hkʼe htaˇ le?

³ Yaˬhoˉvaˬ leh yawˇ ve mvuhˇ miˬ ve awˬ lawn ngaˬ hui hkʼaˬ htaˆ kaꞈ yaw tuˬ gu hehnˇ taˍ cawˇ ve yoˬ. (Maꞈhtehˍ 24:14; Roˉmaꞈ 10:14 gʼaw sheˍ.) Ngaˬ hui chi hkʼe te ve kʼo, Yeˍsuˆ htaꞈ henˇ yuˬ chehˇ ve yoˬ. Yeˍsuˆ miˬ guiˬ hkʼoˆ lo laˬ ve lehˬ yawˇ ve Awˬ pa ve awˬ lawn awˬ tehˬ ve shu htaꞈ kʼoˆ piˇ tuˬ laˬ ve yoˬ. (Yoˇhanˬ 18:37) Hkʼe te leh ngaˬ hui tawˇ yaw tuˬ ve awˬ hkʼaˇ kaꞈ a yeˇ uiˍ ve tehꞈ tawnˇ taˍ cawˇ ve yoˬ. Ngaˬ hui Yaˬhoˉvaˬ ve awˬ lawn shu htaꞈ kʼoˆ piˇ htaˇ, “nyi ma nuˇ nehˬ leh yawˆ yan ve awˬ hkʼaw lo” te cawˇ ve yoˬ. Ngaˬ hui tawˇ yaw piˇ ve chaw hkʼaˬ hkʼe dawˇ ve leh yawˇ yonˍ ve ngaˬ hui na gʼa  cawˇ ve yoˬ. (1 Peˍtruˆ 3:15) Chi hkʼe te ve kʼo, tawˇ yaw piˇ ve ceh maˇ heˆ, ngaˬ hui maˍ ve yawˇ ve nyi ma hkʼaw gaˬ tuˬ yoˬ.

4. Tawˇ naˉ ve liꞈ 9:9 hkʼaw kʼoˆ taˍ ve hkʼe, ngaˬ hui yaw ve tawˇ hkʼaˬ hkʼe te shu htaꞈ ga piˇ gʼa tuˬ le?

⁴ Awˬ viˉ awˬ nyi teˇ gʼaˇ gʼaˇ beˆ maˍ piˇ tuˬ ve htaꞈ mawˬ htaˇ, nyi haꞈ shaˉ paˍ beˆ maˍ piˇ tuˬ htawˇ dawˇ nawˬ dawˇ taˇ cawˬ. Yawˇ maˇ yaꞈ taw tuˬ cawˇ ve awˬ yanˇ ca cawˇ ve yoˬ. Awˬ viˉ awˬ nyi oˇ ve teˇ gʼaˇ geh, teˇ gʼaˇ tawˍ teˇ gʼaˇ yaw daꞈ tuˬ oˇ kaꞈ lo chaw maˇ chehˇ ve htaꞈ gʼa law taˍ ve yoˬ. Awˬ viˉ awˬ nyi cawˇ ve htaꞈ dawˇ cheˆ gʼa tuˬ, nyi haꞈ shaˉ paˍ Liꞈ hpu hkʼaw ve awˬ liˇ awˬ hkʼaˇ htaꞈ gʼa yehˇ ve yoˬ. Yaꞈ hkʼaˇ, awˬ viˉ awˬ nyi awˬ meh maˇ gʼa luˬ tuˬ yawˇ yawˆ yan ve hkʼaw gʼa yaw ve yoˬ. (Tawˇ naˉ ve 9:9 gʼaw sheˍ.) A yeˇ uiˍ ve htaꞈ kʼoˆ htaˇ, aˬ htoꞈ ma te haˆ haˆ te cawˇ ve le? Peun daꞈ ve nyiˇ hkʼaˇ htaꞈ teˇ geh nyi sheˍ. Awˉ lawˉ teˇ hkʼaˇ lehˬ hawˉ hkʼaˆ teˇ gʼaˇ yawˇ ve yaˇ htaꞈ shaˍ tiꞈ piˇ ve leh awˬ nu ve teˇ hkʼaˇ lehˬ yaˇ miˇ teˇ gʼaˇ awˬ gʼuˇ suhˍ hpawˇ jawˇ mawˇ te tuˬ ve geh ca yaw daꞈ˗e ve yoˬ.

5. Paw hkuˇ Eˇliˆ tawˇ yaw cawˇ ve awˬ yanˇ hkʼaˬ hkʼe htaˇ le?

⁵ Paw hkuˇ Eˇliˆ yawˇ ve yaˇ paˍ htaꞈ haꞈ jaˇ. Yaꞈ hkʼaˇ, yawˇ ve yaˇ paˍ nyiˇ gʼaˇ Yaˬhoˉvaˬ htaꞈ maˇ yawˆ yan. Yawˇ ve yaˇ paˍ aˉ yaˇ cawˬ ve yoˬ. Yawˇ hui daꞈ kehˬ ve aˉ po kʼo bon yehˬ hkʼaw paw hkuˇ te ve yoˬ. Yaꞈ hkʼaˇ, yawˇ hui ve kanˇ paˆ maˇ daꞈ ve hpawˇ yehˇ ve pa taw, Yaˬhoˉvaˬ htaꞈ tuˉ tanˇ piˇ taˍ ve htaꞈ nyi cha leh haˉ chawˇ haˉ paˆ te ve yoˬ. (1 Saˍmo˗eˍlaˆ 2:12-17, 22) Moˉseˍ ve awˬ liˇ tawˇ hkawˇ kʼo, Eˇliˆ ve yaˇ paˍ nyiˇ gʼaˇ suh keunˍ ve yoˬ. Yaꞈ hkʼaˇ, Eˇliˆ yawˇ hui htaꞈ shaˍ tiꞈ hkʼa dehꞈ maˇ piˇ leh yawˇ hui daꞈ kehˬ ve aˉ po kʼo bon yehˬ hkʼaw kanˉ kʼawꞈ te chehˇ sheˍ. (Bon maˍ ve 21:18-21) Eˇliˆ te ve awˬ ceuˬ htaꞈ Yaˬhoˉvaˬ hkʼaˬ hkʼe dawˇ ve le? Gʼuiˬ sha yawˇ htaꞈ kʼoˆ piˇ ve, “aˬ htoꞈ ma pa taw nawˬ ve yaˇ teˇ hpaˍ htaꞈ ngaˬ aꞈ kehˉ taˍ uiˍ” ve le? Gʼuiˬ sha Eˇliˆ ve yaˇ paˍ nyiˇ gʼaˇ htaꞈ tiˇ pehˍ piˇ ve yoˬ.—1 Saˍmo˗eˍlaˆ 2:29, 34.

6. Eˇliˆ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

⁶ Eˇliˆ ve awˬ lawn ngaˬ hui htaꞈ maˍ laˇ ve yoˬ. Awˬ chawˇ maˇ heˆ leh awˬ viˉ awˬ nyi Gʼuiˬ sha ve awˬ liˇ tawˇ hkawˇ htaꞈ te yaꞈ ve ngaˬ hui shiˍ htaˇ, yawˇ hui Yaˬhoˉvaˬ ve awˬ liˇ awˬ hkʼaˇ htaꞈ dawˇ nyi tuˬ ngaˬ hui shaˍ tiꞈ gʼa piˇ ve yoˬ. Yawˇ Gʼuiˬ sha ve awˬ tan te shehˍ hpaˇ ga laˇ tcuh cawˇ ve tehꞈ ngaˬ hui kʼoˆ piˇ cawˇ ve yoˬ. (Yaˍkoˆ 5:14) Awˬ chawˇ maˇ heˆ leh awˬ viˉ awˬ nyi htaꞈ Yaˬhoˉvaˬ aꞈ kehˉ a yeˇ uiˍ jaˇ ve tehꞈ ngaˬ hui Eˇliˆ hkʼe leˇ maˇ te. Chaw oˇ ve teˇ gʼaˇ htaꞈ ngaˬ hui shaˍ tiꞈ gʼa piˇ haˆ ve yoˬ. Chi hkʼe te tuˬ maˇ sha ve htawˇ, ngaˬ hui te ve awˬ hpfuhˇ hkʼawꞈ jaˇ. Eˇliˆ leh Iˉsaˍreˍlaˆ chaw yaˇ miˇ Aˍbiˆgeˬlaˆ hkʼaˬ hkʼe peun daꞈ ve teˇ geh nyi sheˍ.

7. Aˬ htoꞈ ma te Aˍbiˆgeˬlaˆ Daˍviˆ geh tawˇ ca yaw˗e ve le?

 ⁷ Aˍbiˆgeˬlaˆ lehˬ Naˍbaˍlaˆ paw sha jaˇ ve awˬ miˇ ma hpehꞈ ve yoˬ. Daˍviˆ leh yawˇ ve chaw jawˇ mawˇ Sawˉluꞈ htaꞈ hpaw˗e htaˇ, yawˇ hui Naˍbaˍlaˆ ve yawˬ hawˉ paˍ geh teˇ tcuhˉ teˇ yanˇ chehˇ leh chaw hkʼawˇ yawˬ htaꞈ maˇ gʼa hkʼawˇ la tuˬ haꞈ shaˉ piˇ ve yoˬ. Yaꞈ hkʼaˇ, Naˍbaˍlaˆ yawˇ hui te ve htaꞈ awˬ hpfuhˇ shiˍ˗aw laˇ? Maˇ shiˍ. Daˍviˆ ve chaw Naˍbaˍlaˆ geh caˇ tuˬ leh iˉ kaˆ ca lawˬ˗e htaˇ, Naˍbaˍlaˆ beuꞈ leh yawˇ hui htaꞈ deˇ ve yoˬ. (1 Saˍmo˗eˍlaˆ 25:5-8, 10-12, 14) Daˍviˆ Naˍbaˍlaˆ ve yehˬ hkʼaw hawˉ hkʼaˆ teˇ gʼaˇ le le htaꞈ ca tiˇ pehˍ˗e tehꞈ dawˇ ve yoˬ. (1 Saˍmo˗eˍlaˆ 25:13, 22) Awˬ leh meuˇ htaˇ yawˇ dawˇ taˍ ve hkʼe maˇ hpehꞈ. Aˍbiˆgeˬlaˆ tawˇ yaw cawˇ ve awˬ yanˇ shiˍ htaˇ, yawˇ Daˍviˆ geh tawˇ yaw haˆ ve yoˬ. Hawˉ hkʼaˆ 400 gʼaˇ beuꞈ ve, meuꞈ ve, leh laꞈ caˉ hkʼa biˇ cawˬ ve shiˍ ve htawˇ yawˇ kʼai ve yoˬ.

8. Aˍbiˆgeˬlaˆ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

⁸ Aˍbiˆgeˬlaˆ Daˍviˆ geh ca mawˬ daꞈ˗e htaˇ, yawˇ haꞈ hanˉ leh yawˆ yan ve hkʼaw tawˇ yaw ve yoˬ. Aˍbiˆgeˬlaˆ kʼoˆ taˍ ve hkʼe, Daˍviˆ gʼaꞈ te tcuh gaˇ ve yoˬ. Chi yawˇ maˇ te yaꞈ ve htawˇ, Daˍviˆ geh lawˬ hkawˉ ve yoˬ. Yawˇ Daˍviˆ ve te hkʼaˇ dawˇ hkʼaˇ daꞈ ve htaꞈ kʼoˆ leh Yaˬhoˉvaˬ ga laˇ tuˬ gʼaˇ va ve yoˬ. (1 Saˍmo˗eˍlaˆ 25:24, 26, 28, 33, 34) Chaw teˇ gʼaˇ venˇ baˆ uiˍ jaˇ ve htaꞈ te yaꞈ˗a te htaˇ, ngaˬ hui Aˍbiˆgeˬlaˆ hkʼe gʼa kʼoˆ haˆ ve yoˬ. (Chiˇ mvuh ve 141:5) Ngaˬ hui yawˆ yan ve hkʼaw kʼoˆ ve htawˇ, gʼa haꞈ hanˉ ve yoˬ. Ngaˬ hui chaw teˇ gʼaˇ htaꞈ haꞈ pehnˇ ve hkʼaw beˆ maˍ piˇ htaˇ, yawˇ ve awˬ chawˇ hpehꞈ ve tehꞈ hpeuꞈ maw piˇ ve yoˬ.—Tawˇ naˉ ve 27:17.

9-10. Nyi haꞈ shaˉ paˍ shu htaꞈ beˆ maˍ piˇ htaˇ, aˬ htoꞈ ma htaꞈ dawˇ nyi cawˇ ve le?

⁹ Awˬ viˉ awˬ nyi te yaꞈ˗a te ve htaꞈ nyi haꞈ shaˉ paˍ mawˬ htaˇ, shaˍ tiꞈ gʼa piˇ haˆ ve a yeˇ uiˍ jaˇ. (Gaˍlaˍtiˆ 6:1) Nyi haꞈ shaˉ paˍ kaꞈ maˇ biˇ ve chaw hpehꞈ leh teˇ pawˆ pawˆ beˆ maˍ laˇ cawˇ ve tehꞈ shiˍ  ve yoˬ. Yaꞈ hkʼaˇ, awˬ lawn chi yawˇ htawˇ dawˇ nawˬ dawˇ maˇ cawˬ tcuh leh beˆ maˍ piˇ cawˇ ve chaw htaꞈ ga piˇ ve yoˬ. (2 Tiˆmoˉseˍ 4:2; Tiˇtuˆ 1:9) Beˆ maˍ piˇ htaˇ, tawˇ yaw puiˉ ve, cuˇ yiˍ cawˬ ve, leh yeunˇ hkanˍ ve Gʼuiˬ sha geh laˬ ve laꞈ shawnˍ hpehꞈ ve tehꞈ yawˇ tawnˇ taˍ cawˇ ve yoˬ. Yawˇ awˬ viˉ awˬ nyi htaꞈ haꞈ ve pa taw, ga piˇ gaˇ ve yoˬ. (Tawˇ naˉ ve 13:24) Yaꞈ hkʼaˇ, a yeˇ uiˍ jaˇ ve lehˬ yawˇ Yaˬhoˉvaˬ hpawˇ chehˇ leh Hkriꞈ yaˇ awˬ moˍ shoꞈ shaꞈ ve maˇ gʼa hpuˇ tuˬ haꞈ shaˉ ve yoˬ.—Tcuh yaˇ 20:28.

¹⁰ Tawˇ hkʼaˬ hkʼe htaˇ yaw cawˇ ve awˬ yanˇ ngaˬ hui shiˍ ve yoˬ. Yaꞈ hkʼaˇ, teˇ pawˆ pawˆ kʼo ngaˬ hui teꞈ chiˉ maˇ yaw ve kaꞈ daꞈ ve yoˬ. Ngaˬ hui chi hkʼe te cawˇ ve awˬ yanˇ hkʼaˬ hkʼe htaˇ le?

11. Yaˍkoˆ tawˇ pa haˉ chi yehˇ ve aˬ htoꞈ ma te keunˍ jaˇ ve le?

¹¹ Tawˇ yaw ve shaˍ tiꞈ te tuˬ sha ve maˇ heˆ. Awˬ lawn chi ve ngaˬ hui shiˍ tuˬ Yaˍkoˆ tawˇ pa haˉ keunˍ ve htaꞈ te maˍ laˇ ve yoˬ. Yawˇ kʼoˆ ve, “ngaˬ hui hkʼa peu˗eˬ laiˉ ceuˬ te yaꞈ ve yoˬ. Chaw teˇ gʼaˇ gʼaˇ, yawˇ tawˇ teˇ pawˆ kaꞈ maˇ yaw yaꞈ jaw kʼo, yawˇ biˇ ve chaw hpehꞈ leh, awˬ to teˇ to hkʼa peu˗eˬ htaꞈ gʼaˇ ve chaw hpehꞈ ve yoˬ. Iˉ mvuhˇ htaꞈ ngaˬ hui gʼaˇ tuˬ yawˇ ve mawꞈ kʼaw awˬ hkʼaw lo sho caˆ keu ve kʼo, yawˇ awˬ to hkʼa peu˗eˬ htaꞈ ngaˬ hui gʼawˬ caw hpehꞈ ve yoˬ.” (Yaˍkoˆ 3:2, 3) Iˉ mvuhˇ mawꞈ kʼaw htaꞈ sho caˆ keu ve kʼo gʼaˇ tuˬ yoˬ. Iˉ mvuhˇ ciˇ paˍ lehˬ iˉ mvuhˇ htaꞈ gʼaˇ tuˬ, mawꞈ kʼaw sho caˆ keu taˍ ve aˉ hkeh htaꞈ gʼa gʼawˬ ve yoˬ. Iˉ mvuhˇ ciˇ paˍ lehˬ sho caˆ keu taˍ ve aˉ hkeh htaꞈ kiˇ˗ehꞈ maˇ gʼawˬ ve kʼo, pawˆ hpaw˗e tuˬ yoˬ. Chi ve nyiˇ hpawˇ kawˆ tuˬ cawˬ ve yoˬ. Tawˇ yaw ve htaꞈ shaˍ tiꞈ maˇ te ve kʼo, shoꞈ shaꞈ ve laiˉ ceuˬ cawˬ la ve yoˬ. Ngaˬ hui ve ha tehˍ htaꞈ gʼaˇ puiˉ tuˬ awˬ yanˇ hkʼaˬ hkʼe htaˇ le, teˇ geh nyi sheˍ.

12. Ngaˬ hui ve ha tehˍ htaꞈ gʼaˇ puiˉ tuˬ awˬ yanˇ hkʼaˬ hkʼe htaˇ le?

 ¹² Awˬ viˉ awˬ nyi maˇ shiˍ keunˍ ve teˇ ceuˬ ceuˬ htaꞈ nawˬ shiˍ htaˇ hkʼaˬ hkʼe te tuˬ le? Tawˇ pa haˉ te kʼo, a hkaw˗anˬ maˇ gʼa ve mvuhˇ miˬ lo awˬ viˉ awˬ nyi Gʼuiˬ sha ve kanˉ te chehˇ ve htaꞈ nawˬ mawˬ htaˇ, yawˇ hui kanˉ hkʼaˬ hkʼe te ve na piˇ gaˇ˗aw laˇ? Awˬ tehˬ kʼo nawˬ kaꞈ yawˇ hui htaꞈ dawˇ haˍ ve yoˬ. Ngaˬ hui kaꞈ awˬ viˉ awˬ nyi htaꞈ haꞈ leh yawˇ hui hkʼaˬ hkʼe hpehꞈ ve shiˍ gaˇ ve yoˬ. Ngaˬ hui yawˇ hui awˬ pon bon lawˬ piˇ gaˇ ve yoˬ. Yaꞈ hkʼaˇ, chi teˇ hkui ngaˬ hui ve ha tehˍ htaꞈ gʼaˇ puiˉ tuˬ awˬ yanˇ hpehꞈ ve yoˬ. Faˉ taˍ ve awˬ lawn shiˍ ve chaw htaꞈ ngaˬ hui shiˍ gaˇ leh nyiˉ piˇ htaˇ, awˬ viˉ awˬ nyi oˇ ve teˇ gʼaˇ leh awˬ nu ve awˬ viˉ awˬ nyi htaꞈ ngaˬ hui haꞈ ve tehꞈ maˇ hpeuꞈ maw piˇ. A hkaw˗anˬ maˇ gʼa ve mvuhˇ miˬ lo awˬ viˉ awˬ nyi Gʼuiˬ sha ve kanˉ te ve htaꞈ ngaˬ hui maˇ kʼawꞈ shoꞈ shaꞈ tcuh gaˇ. Shaˉhkiˆhkanˍ ve chaw, hto toˇ ve, hpawnˬ daꞈ ve, leh Hkriꞈ yaˇ ve kanˉ hkʼaˬ hkʼe te ve oˇ kaˬ lo ve awˬ viˉ awˬ nyi maˇ kʼoˆ laˇ gaˇ.

13. Tawˇ naˉ ve liꞈ 11:13 hkʼaw kʼoˆ taˍ ve hkʼe, nyi haꞈ shaˉ paˍ aˬ htoꞈ ma gʼa te cawˇ ve le? Aˬ htoꞈ ma te yawˇ chi hkʼe te ve le?

¹³ Tawˇ naˉ ve liꞈ 11:13 hkʼaw ve awˬ liˇ awˬ hkʼaˇ nyi haꞈ shaˉ paˍ gʼaꞈ te tuˬ a yeˇ uiˍ jaˇ. (Gʼaw sheˍ.) Shu maˇ shiˍ keunˍ ve tawˇ yawˇ hui maˇ gʼa yaw cawˇ. Awˬ lawn chi nyi haꞈ shaˉ paˍ awˬ ca cawˬ˗oˬ ve awˬ pon maˇ sha. Awˬ tehˬ kʼo awˬ hpawˇ awˬ miˇ ma hkʼaˬ htaˆ kaꞈ haꞈ daꞈ leh meuˆ daꞈ tuˬ yawˇ hui dawˇ haˍ dawˇ hkiˉ ve kʼoˆ maˍ daꞈ ve yoˬ. Hkriꞈ yaˇ awˬ moˍ hkʼaw awˬ viˉ awˬ nyi ve awˬ lawn awˬ miˇ ma htaꞈ maˇ kʼoˆ piˇ cawˇ tehꞈ nyi haꞈ shaˉ paˍ hkʼa dehꞈ shiˍ ve yoˬ. Yawˇ chi hkʼe maˇ te ve kʼo, awˬ nu ve awˬ viˉ awˬ nyi kaꞈ yawˇ htaꞈ maˇ yonˍ leh yawˇ kaꞈ awˬ meh luˬ tuˬ yoˬ. Leuˆ teh taˍ ve chaw lehˬ Hkriꞈ yaˇ awˬ moˍ yonˍ gʼa ve chaw gʼa hpehꞈ cawˇ leh “ha tehˍ nyiˇ maˬ” maˇ gʼa hpehꞈ. (1 Tiˆmoˉseˍ 3:8) Chi ve tcuhˉ kuiˬ lehˬ yawˇ shu ve awˬ lawn maˇ kʼoˆ puiˉ ve chaw gʼa hpehꞈ ve yoˬ. Awˬ miˇ ma maˇ shiˍ keunˍ ve awˬ lawn nyi haꞈ shaˉ paˍ yawˇ htaꞈ haꞈ ve kʼo awˬ vuiˬ maˇ te cawˬ piˇ.

14. Nyi haꞈ shaˉ paˍ ve awˬ miˇ ma lehˬ hkʼaˬ hkʼe te awˬ hpawˇ ve awˬ meh daꞈ tuˬ te gʼa ve le?

¹⁴ Nyi haꞈ shaˉ paˍ ve awˬ miˇ ma awˬ hpawˇ ve awˬ meh maˇ gʼa luˬ tuˬ ga piˇ ve lehˬ, maˇ shiˍ keunˍ ve awˬ lawn kʼoˆ laˇ tuˬ maˇ nyiˉ piˇ. Chi hkʼe te ve lehˬ awˬ hpawˇ htaꞈ ga piˇ leh yawˇ ve awˬ hpawˇ htaꞈ yonˍ ve chaw htaꞈ yawˆ yan ve yoˬ. Yawˇ dawˇ sha gawˬ lehˍ ve leh Hkriꞈ yaˇ awˬ moˍ hkʼaw teˇ moˍ tiˉ hpehꞈ tuˬ te ve pa taw, Yaˬhoˉvaˬ ha lehˬ tuˬ te piˇ chehˇ ve yoˬ.—Roˉmaꞈ 14:19.

15. Yawˇbaˆ ve awˬ chawˇ 3 gʼaˇ htaꞈ Yaˬhoˉvaˬ hkʼaˬ hkʼe dawˇ ve le?

¹⁵ Ngaˬ tawˇ hkʼaˬ hkʼe yaw ve leh hkʼaˬ hkʼe htaˇ yaw cawˇ ve Yawˇbaˆ ve liꞈ hkʼaw laiˉ ceuˬ maˍ laˇ ve yoˬ. Yawˇbaˆ maˇ daꞈ ve laiˉ ceuˬ gʼa hpuˇ peuˬ hkʼawꞈ nawˉ, hawˉ hkʼaˆ 4 gʼaˇ yawˇ htaꞈ awˬ gʼaˇ piˇ leh beˆ maˍ piˇ ve yoˬ. Yawˇ hui awˬ yanˇ maw chaweh taꞈ iˉ chehˇ taˍ ve yoˬ. Yaꞈ hkʼaˇ, hawˉ hkʼaˆ chi ve 3 gʼaˇ lehˬ Eˇliˇhpaˆ, Biˇlaˍdaˆ, leh Zawˇhpaˆ yawˇ hui Yawˇbaˆ htaꞈ ga piˇ tuˬ maˇ dawˇ nyi ve tehꞈ hpeuꞈ maw laˇ ve yoˬ. Yawˇbaˆ hkʼaˬ hkʼe hpawˇ te yaꞈ ve yawˇ hui chaˬ nyi tuˬ tiˉ dawˇ nyi ve yoˬ. Teˇ pawˆ pawˆ yawˇ hui yaw ve tawˇ cawˇ ve htawˇ, maˇ˗awˍ ve kʼo yawˇ hui Yawˇbaˆ leh Yaˬhoˉvaˬ htaꞈ maˇ daꞈ ve hpawˇ kʼoˆ ve yoˬ. Yawˇ hui Yawˇbaˆ htaꞈ maˇ daꞈ ve chaw tehꞈ dawˇ cheˆ ve yoˬ. (Yawˇbaˆ 32:1-3) Awˬ lawn chi Yaˬhoˉvaˬ hkʼaˬ hkʼe dawˇ ve le? Yawˇ beuꞈ jaˇ. Chaw chi 3 gʼaˇ kʼaˍ leh Yawˇbaˆ yawˇ hui awˬ pon bon lawˬ laˇ tuˬ ca lawˬ hkawˉ˗e tehꞈ Gʼuiˬ sha kʼoˆ piˇ ve yoˬ.—Yawˇbaˆ 42:7-9.

16. Eˇliˇhpaˆ, Biˇlaˍdaˆ, leh Zawˇhpaˆ ve maˇ daꞈ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹⁶ Eˇliˇhpaˆ, Biˇlaˍdaˆ, leh Zawˇhpaˆ ve maˇ daꞈ ve awˬ lawn ngaˬ hui htaꞈ hkʼaˬ hkʼe maˍ laˇ ve le?  Awˉ lawˉ teˇ ceuˬ lehˬ ngaˬ hui awˬ viˉ awˬ nyi htaꞈ maˇ dawˇ cheˆ piˇ. (Maꞈhtehˍ 7:1-5) Ngaˬ hui tawˇ maˇ yaw sheˍ htaˇ shu yaw ve htaꞈ hkʼa dehꞈ na ve, yawˇ awˬ tehˬ kʼo aˬ htoꞈ ma gʼa hpuˇ ve ngaˬ hui gʼa na gʼa piˇ ve yoˬ. (1 Peˍtruˆ 3:8) Nyiˇ ceuˬ lehˬ ngaˬ hui tawˇ daꞈ daꞈ yaw leh awˬ tehˬ ve htaꞈ gʼa yaw ve yoˬ. (Eˇfeˇsuꞈ 4:25) Shehˆ ceuˬ lehˬ ngaˬ hui shu htaꞈ aˬ htoꞈ ma tawˇ yaw piˇ ve Yaˬhoˉvaˬ a yeˇ yuˬ jaˇ.

17. Eˇliˇhuˆ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹⁷ Hawˉ hkʼaˆ awˇ gʼaˇ teˇ gʼaˇ Yawˇbaˆ geh kʼai ve chaw lehˬ Aˍbraˍhanˍ ve awˬ viˉ awˬ nyi Eˇliˇhuˆ yoˬ. Yawˇ Yawˇbaˆ leh awˬ nu ve hawˉ hkʼaˆ 3 gʼaˇ tawˇ yaw ve htaꞈ na ve yoˬ. Yawˇ ha kʼaˉ ve hkʼaw hteˇ˗ehꞈ beˆ maˍ piˇ leh awˬ leh meuˇ htaˇ, Yawˇbaˆ ve maˇ daꞈ ve dawˇ hkʼaˇ pa gʼa tuˬ ga piˇ ve pa taw, yawˇ hkʼa dehꞈ na taˍ ve tehꞈ ngaˬ hui hkʼa tawˍ lehˆ gʼa mawˬ ve yoˬ. (Yawˇbaˆ 33:1, 6, 17) Eˇliˇhuˆ awˬ pon a yeˇ uiˍ jaˇ ve lehˬ Yaˬhoˉvaˬ htaꞈ chiˇ uiˍ chiˇ mvuh ve yoˬ. Yawˇ awˬ to leh shu htaꞈ chiˇ mvuh ve maˇ heˆ. (Yawˇbaˆ 32:21, 22; 37:23, 24) Ngaˬ hui taꞈ iˉ chehˇ ve awˬ yanˇ leh na ve awˬ yanˇ cawˬ ve tehꞈ Eˇliˇhuˆ ve awˬ lawn maˍ laˇ ve yoˬ. (Yaˍkoˆ 1:19) Ngaˬ hui beˆ maˍ piˇ htaˇ a yeˇ uiˍ jaˇ ve lehˬ, Yaˬhoˉvaˬ htaꞈ chiˇ uiˍ chiˇ mvuh ve ngaˬ hui htaꞈ maˇ heˆ.

18. Yaˬhoˉvaˬ geh laˬ ve daꞈ jaˇ ve laꞈ shawnˍ htaꞈ awˬ hpfuhˇ shiˍ ve tehꞈ ngaˬ hui hkʼaˬ hkʼe hpeuꞈ maw piˇ chehˇ ve le?

¹⁸ Ngaˬ hui tawˇ hkʼaˬ htaˆ leh hkʼaˬ hkʼe htaˇ yaw cawˇ ve Liꞈ hpu hkʼaw beˆ maˍ laˇ ve htaꞈ gʼaꞈ te htaˇ, Gʼuiˬ sha geh laˬ ve laꞈ shawnˍ htaꞈ awˬ hpfuhˇ shiˍ ve tehꞈ hpeuꞈ maw piˇ chehˇ ve yoˬ. Cuˇ yiˍ cawˬ ve jawˇ mawˇ Sawˉlaꞈmonˍ htaꞈ dawˇ pawnˍ piˇ leh bvuhꞈ tcuh ve, “daꞈ ve dawˇ hkʼaˇ hpeuꞈ maˍ laˇ ve lehˬ, hpu hkʼeun htaꞈ tcuhˉ taˍ ve shi hkʼe hpehꞈ ve yoˬ.” (Tawˇ naˉ ve 25:11) Ngaˬ hui shu hkawˇ hkʼa dehꞈ na leh dawˇ nyi sheˍ htaˇ hehꞈ yaw ve kʼo, ngaˬ hui yaw ve tawˇ lehˬ hpu hkʼeun htaꞈ tcuhˉ taˍ ve shi hkʼe hpehꞈ leh awˬ hpfuhˇ hkʼaˆ jaˇ. Ngaˬ hui tawˇ yaw maˇ ve, maˇ yaw maˇ ve htawˇ, shu htaꞈ awˬ gʼaˇ piˇ ve kʼo, Yaˬhoˉvaˬ nyi hkʼaˇ suh jaˇ tuˬ yoˬ. (Tawˇ naˉ ve 23:15; Eˇfeˇsuꞈ 4:29) Chi lehˬ Yaˬhoˉvaˬ geh laˬ ve daꞈ jaˇ ve laꞈ shawnˍ htaꞈ awˬ hpfuhˇ shiˍ ve yoˬ!