1-2. Tcuh yaˇ liꞈ 8:27-31, 35-38 hkʼaw kʼoˆ taˍ ve hkʼe, Ehˇtaˍyoˇpiˆ chaw ve a maꞈ lonˉ Baˆtiˆsaˬ haꞈ yuˬ gaˇ tuˬ aˬ htoꞈ ma te piˇ ve le?

 Nawˬ Baˆtiˆsaˬ haꞈ yuˬ leh Yeˍsuˆ ve awˬ laꞈ gʼawˇ hpehꞈ gaˇ˗aw laˇ? Haꞈ ve leh awˬ hpfuhˇ shiˍ ve htaꞈ pa taw, laiˉ gʼaˇ chi hkʼe dawˇ cheˆ ve yoˬ. Ehˇtaˍyoˇpiˆ chaw nanˇ hawˉ hkanˇ ma ve a maꞈ lonˉ ve awˬ lawn htaꞈ teˇ geh nyi sheˍ.

² Ehˇtaˍyoˇpiˆ chaw a maꞈ lonˉ chi teˇ gʼaˇ Liꞈ hpu hkʼaw gʼa henˇ taˍ ve hkʼe laꞈ haˉ gʼaꞈ te ve yoˬ. (Tcuh yaˇ 8:27-31, 35-38 gʼaw sheˍ.) Yawˇ chi hkʼe te gaˇ tuˬ aˬ htoꞈ ma te piˇ ve le? Yawˇ Liꞈ hpu htaꞈ awˬ hpfuhˇ shiˍ ve yoˬ. Yawˇ Yeˍruˆsaˍlehnˍ venˇ te leh Ehˇtaˍyoˇpiˆ lo kʼawꞈ la htaˇ, awˬ lawn chi ve ngaˬ hui hkʼa tawˍ lehˆ gʼa mawˬ ve yoˬ. Yawˇ Iˉsaˍyaˆ ve liꞈ hkʼaw gʼaw leh Hpiˇliˇpuˆ yawˇ geh gʼa yaw daꞈ htaˇ, a maꞈ lonˉ chi ve teˇ gʼaˇ kaꞈ Yeˍsuˆ te ve htaꞈ awˬ hpfuhˇ shiˍ ve yoˬ. Aˬ htoꞈ ma te a maꞈ lonˉ chi ve teˇ gʼaˇ Yeˍruˆsaˍlehnˍ venˇ lo kʼai ve le? Yawˇ Yaˬhoˉvaˬ htaꞈ haꞈ ve pa taw yoˬ. Ngaˬ hui hkʼaˬ hkʼe te shiˍ gʼa ve le? Yawˇ oˇ kaˬ lo Yaˬhoˉvaˬ htaꞈ oˉ kʼoˍ ca pui˗e ve pa taw yoˬ. Nyi˗a kʼo, yawˇ yonˍ chehˇ ve bon htaꞈ baˬ taˉ leh Gʼuiˬ sha htaꞈ chiˇ aꞈ piˇ˗oˬ ve chaw ceuˬ geh teˇ geh oˉ kʼoˍ pui ve yoˬ. Yawˇ Yaˬhoˉvaˬ htaꞈ haꞈ ve a yeˇ uiˍ jaˇ ve lehˬ Baˆtiˆsaˬ haꞈ yuˬ gaˇ leh Yeˍsuˆ ve awˬ laꞈ gʼawˇ hpehꞈ la ve yoˬ.—Maꞈhtehˍ 28:19.

3. Chaw teˇ hpaˍ Baˆtiˆsaˬ maˇ gʼa haꞈ yuˬ tuˬ aˬ htoꞈ ma tawˍ piˇ ve le? (Awˇ ceˍ awˇ fa “ Nawˬ ve nyi ma hkʼaˬ hkʼe hpehꞈ ve le?”)

³ Yaˬhoˉvaˬ htaꞈ haꞈ ve nawˬ Baˆtiˆsaˬ haꞈ yuˬ gaˇ tuˬ te laˇ ve yoˬ. Yaꞈ hkʼaˇ, haꞈ ve teˇ ceuˬ nawˬ Baˆtiˆsaˬ maˇ gʼa haꞈ yuˬ tuˬ kaꞈ tawˍ laˇ ve yoˬ. Awˬ viˉ awˬ nyi maˇ heˆ leh nawˬ ve awˬ chawˇ Shaˉhkiˆhkanˍ ve chaw maˇ hpehꞈ ve, Baˆtiˆsaˬ haꞈ yuˬ peuꞈ hkʼawꞈ nawˉ yawˇ hui nawˬ htaꞈ nyi bawˬ laˇ tuˬ tehꞈ dawˇ haˍ ve yoˬ hehˉ. (Maꞈhtehˍ 10:37) Nawˬ  Yaˬhoˉvaˬ maˇ dawˇ cawˇ ve teˇ ceuˬ ceuˬ htaꞈ te gaˇ ve kʼo, chi ve htaꞈ maˇ te tuˬ haˍ jaˇ tehꞈ dawˇ ve yoˬ. (Chiˇ mvuh ve 97:10) Chi hkʼoˆ kaꞈ, maˇ heˆ heˆ ve bon liˇ htaꞈ caˉ daꞈ ve jehˇ ve awˬ nyi htaꞈ nawˬ dawˇ cawˇ ve yoˬ hehˉ. Nawˬ chi hkʼe ve hkʼaw uiˍ la ve pa taw, chi lehˬ nawˬ Yaˬhoˉvaˬ maˇ dawˇ cawˇ ve htaꞈ maˇ te tuˬ haˍ jaˇ tehꞈ dawˇ ve yoˬ hehˉ. (1 Kawˇrenˍhtuˆ 10:20, 21) Chi htaꞈ pa taw, “ngaˬ a shu htaꞈ haꞈ ve leh aˬ htoꞈ ma htaꞈ haꞈ jaˇ ve le?” tehꞈ nawˬ gʼa dawˇ cheˆ ve yoˬ.

4. Nawˬ Baˆtiˆsaˬ haꞈ yuˬ gaˇ tuˬ a yeˇ uiˍ jaˇ ve aˬ htoꞈ ma te laˇ ve le?

⁴ Nawˬ haꞈ ve leh awˬ hpfuhˇ shiˍ ve laiˉ ceuˬ cawˬ ve yoˬ. Nawˬ Shaˉhkiˆhkanˍ ve chaw geh Liꞈ hpu maˇ henˇ sheˍ htaˇ, nawˬ Liꞈ hpu htaꞈ awˬ hpfuhˇ shiˍ leh yawˆ yan˗oˬ ve yoˬ hehˉ. Nawˬ Yeˍsuˆ htaꞈ kaꞈ haꞈ ve yoˬ. Chi teˇ hkui nawˬ Shaˉhkiˆhkanˍ ve chaw htaꞈ shiˍ la htaˇ, yawˇ hui geh awˬ chawˇ te ve ha lehˬ ve yoˬ hehˉ. Yaꞈ hkʼaˇ, nawˬ awˬ to chiˇ aꞈ leh Baˆtiˆsaˬ haꞈ yuˬ gaˇ tuˬ, chi ve teˇ hpaˍ a yeˇ uiˍ jaˇ ve awˬ ceuˬ hpehꞈ ve maˇ heˆ. A yeˇ uiˍ jaˇ ve lehˬ nawˬ Yaˬhoˉvaˬ htaꞈ haꞈ leh Baˆtiˆsaˬ haꞈ yuˬ gaˇ ve yoˬ. Nawˬ teˇ ceuˬ le aꞈ kehˉ Gʼuiˬ sha htaꞈ haꞈ jaˇ ve kʼo, nawˬ Gʼuiˬ sha ve kanˉ maˇ gʼa te tuˬ teˇ ceuˬ kaꞈ tawˍ laˇ maˇ gʼa. Yaˬhoˉvaˬ htaꞈ haꞈ ve lehˬ Baˆtiˆsaˬ haꞈ yuˬ tuˬ yehˬ miˉ hpaw laˇ ve hkʼa shuˍ hpehꞈ leh yawˇ ve kanˉ te ve htaꞈ maˇ gʼa baˬ taˉ tuˬ hko ko laˇ ve hkʼa shuˍ hpehꞈ ve yoˬ.

5. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁵ Yeˍsuˆ kʼoˆ ve, ngaˬ hui ve nyi ma, co ha, dawˇ hkʼaˇ, leh awˬ gʼaˇ awˬ shaˉ hkʼa peu˗eˬ Yaˬhoˉvaˬ htaꞈ gʼa haꞈ ve yoˬ. (Maˍkuˆ 12:30) Nawˬ hkʼaˬ hkʼe te Yaˬhoˉvaˬ htaꞈ yawˆ yan leh chi hkʼe taw taw haꞈ gʼa tuˬ le? Yaˬhoˉvaˬ ngaˬ hui htaꞈ hkʼaˬ hkʼe taw haꞈ ve dawˇ nyi htaˇ, yawˇ htaꞈ haꞈ gaˇ tuˬ te laˇ ve yoˬ. (1 Yoˇhanˬ 4:19) Chi teˇ hkui nawˬ Yaˬhoˉvaˬ htaꞈ haꞈ˗oˬ ve kʼo, haꞈ ve chi a yeˇ uiˍ jaˇ. Gʼuiˬ sha htaꞈ haꞈ gaˇ tuˬ aˬ htoꞈ ma te laˇ ve teˇ ceuˬ ceuˬ htaꞈ teˇ geh nyi sheˍ. *

6. Roˉmaꞈ liꞈ 1:20 hkʼaw kʼoˆ taˍ ve hkʼe, Yaˬhoˉvaˬ htaꞈ caˉ daꞈ ve shiˍ tuˬ nawˬ htaꞈ ga laˇ ve awˬ hkʼaˇ teˇ hkʼaˇ aˬ htoꞈ ma ve le?

⁶ Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ henˇ yuˬ ve. (Roˉmaꞈ 1:20 gʼaw sheˍ. Hpeuꞈ maˍ ve 4:11) Yaˬhoˉvaˬ hpanˍ taˍ ve awˬ ceuˬ, suhˆ cehˬ hawˆ cehˬ, to nuˇ to shaˆ teˇ hpaˍ, leh nawˬ ve a shaꞈ anˇ lawꞈ lawꞈ ve chi ve teˇ hpaˍ htaꞈ dawˇ nyi sheˍ. (Chiˇ mvuh ve 139:14) Mvuhˇ nyi awˬ gʼeuˆ hehnˇ jaˇ ve chi Yaˬhoˉvaˬ hpanˍ taˍ ve, meuꞈ keu shiˍ awˬ moˍ awˬ cuˇ lonˉ hkʼaw ve teˇ shiˍ ceh hpehꞈ sheˍ ve htaꞈ dawˇ nyi sheˍ. * (Iˉsaˍyaˆ 40:26) Nawˬ chi ve teˇ hpaˍ htaꞈ hkʼa dehꞈ dawˇ nyi htaˇ, nawˬ Yaˬhoˉvaˬ htaꞈ yawˆ yan tuˬ yoˬ. Yaˬhoˉvaˬ lehˬ cuˇ yiˍ cawˬ jaˇ ve Gʼuiˬ sha hpehꞈ leh kanˇ paˆ uiˍ jaˇ ve tehꞈ ngaˬ hui shiˍ ve a yeˇ uiˍ jaˇ. Yaꞈ hkʼaˇ, nawˬ Yaˬhoˉvaˬ htaꞈ haꞈ leh meuˆ daꞈ maˇ la tuˬ, yawˇ htaꞈ chi aꞈ kehˉ gʼa shiˍ cawˇ ve yoˬ.

7. Yaˬhoˉvaˬ htaꞈ haꞈ tuˬ nawˬ aˬ htoꞈ ma ve awˬ lawn htaꞈ yonˍ gʼa ve le?

⁷ Yaˬhoˉvaˬ nawˬ htaꞈ haꞈ ve tehꞈ nawˬ gʼa yonˍ ve yoˬ. Yaˬhoˉvaˬ mvuhˇ naw ma leh miˬ guiˬ htaꞈ hpanˍ shehˍ hpaˇ nawˬ htaꞈ a yeˇ yuˬ laˇ ve tehꞈ yonˍ tuˬ haˍ˗aw laˇ? Chi hkʼe hpehꞈ ve kʼo, Yaˬhoˉvaˬ “hkʼaˬ ve teˇ gʼaˇ htaꞈ htawˇ vuiˇ daꞈ ve maˇ heˆ” tehꞈ nawˬ tawnˇ taˍ cawˇ ve yoˬ. (Tcuh yaˇ 17:26-28) Yawˇ nawˬ ve “dawˇ hkʼaˇ hkʼa peu˗eˬ htaꞈ shiˍ” leh “nawˬ yawˇ geh kʼai ve kʼo, yawˇ nawˬ htaꞈ haꞈ yuˬ laˇ tuˬ yoˬ” tehꞈ ka tiꞈ te taˍ laˇ ve yoˬ. (1 Raˍsaˍvanˍ 28:9) Chi teˇ hkui nawˬ Liꞈ hpu henˇ gʼa ve lehˬ Yaˬhoˉvaˬ kʼoˆ taˍ ve hkʼe, “ngaˬ nawˬ hui htaꞈ kʼawꞈ caˉ leh haꞈ laˇ tuˬ sheˍ.”  (Yeˍraˍmiˆ 31:3) Yaˬhoˉvaˬ nawˬ awˬ pon te laˇ ve awˬ ceuˬ teˇ hpaˍ htaꞈ nawˬ hkʼa dehꞈ dawˇ nyi htaˇ, nawˬ kaꞈ yawˇ htaꞈ haꞈ tuˬ yoˬ.

8. Yaˬhoˉvaˬ haꞈ laˇ ve htaꞈ nawˬ awˬ hpfuhˇ shiˍ tuˬ hkʼaˬ hkʼe hpeuꞈ maw piˇ gʼa ve le?

⁸ Yaˬhoˉvaˬ haꞈ laˇ ve htaꞈ nawˬ awˬ hpfuhˇ shiˍ ve tehꞈ hpeuꞈ maw piˇ ve teˇ ceuˬ lehˬ, bon lawˬ ve hkʼaw yawˇ htaꞈ kʼoˆ piˇ ve yoˬ. Nawˬ kaꞈ Yaˬhoˉvaˬ htaꞈ haꞈ tuˬ, nawˬ dawˇ haˍ ve awˬ ceuˬ leh Yaˬhoˉvaˬ nawˬ awˬ pon te laˇ ve teˇ ceuˬ le le awˬ bon uiˍ jaˇ kʼoˆ piˇ ve yoˬ. Nawˬ bon lawˬ ve htaꞈ Yaˬhoˉvaˬ hkʼawꞈ laˇ ve shiˍ htaˇ, nawˬ Yaˬhoˉvaˬ geh gʼaˇ hteꞈ kʼawꞈ meuˆ daꞈ la ve yoˬ. Yaˬhoˉvaˬ nawˬ htaꞈ na gʼa ve tehꞈ nawˬ yonˍ gʼa ve yoˬ. (Chiˇ mvuh ve 116:1) Yaꞈ hkʼaˇ, nawˬ Yaˬhoˉvaˬ geh gʼaˇ hteꞈ meuˆ daꞈ maˇ la tuˬ, yawˇ ve dawˇ hkʼaˇ htaꞈ nawˬ gʼa na gʼa cawˇ ve yoˬ. Aˬ htoꞈ ma te yawˇ chi hkʼe dawˇ ve leh nawˬ htaꞈ aˬ htoꞈ ma te tcuh gaˇ ve gʼa shiˍ ve yoˬ. Chi hkʼe shiˍ tuˬ ve awˬ hkʼaˇ teˇ hkʼaˇ lehˬ nawˬ Liꞈ hpu gʼa henˇ ve yoˬ.

9. Nawˬ liꞈ hpu htaꞈ awˬ hpfuhˇ shiˍ ve tehꞈ hkʼaˬ hkʼe hpeuꞈ maw piˇ gʼa tuˬ le?

⁹ Liꞈ hpu htaꞈ awˬ hpfuhˇ shiˍ ve. Yaˬhoˉvaˬ htaꞈ caˉ daꞈ ve awˬ tehˬ ve leh yawˇ ve a loˍ Liꞈ hpu hkʼaw ceh tiˉ kʼoˆ laˇ gʼa ve yoˬ. Nawˬ Liꞈ hpu htaꞈ awˬ hpfuhˇ shiˍ ve tehꞈ hpeuꞈ maw piˇ gʼa tuˬ, teˇ nyi le le Liꞈ hpu gʼaw ve, Liꞈ hpu maˍ ve chaw maˇ laˬ sheˍ htaˇ hkʼa dehꞈ gu hehnˇ taˍ ve, leh nawˬ henˇ taˍ ve htaꞈ kaꞈ gʼa yuˬ yehˇ ve yoˬ. (Chiˇ mvuh ve 119:97, 99; Yoˇhanˬ 17:17) Nawˬ Liꞈ hpu gʼaw leh bvuhꞈ keu kuiˬ cawˬ˗aw laˇ? Chi ve awˬ hkʼaˇ suh nawˬ awˬ tehˬ awˬ na gʼaꞈ te˗aw laˇ?

10. Liꞈ hpu hkʼaw daꞈ jaˇ ve teˇ ceuˬ lehˬ aˬ htoꞈ ma le?

¹⁰ Liꞈ hpu hkʼaw daꞈ jaˇ ve teˇ ceuˬ lehˬ, Yeˍsuˆ geh teˇ geh chehˇ ve chaw yawˇ te ve mawˬ ve awˬ lawn bvuhꞈ taˍ ve yoˬ. Yeˍsuˆ nawˬ awˬ pon te laˇ ve Liꞈ hpu hkʼaw ceh tiˉ hteˇ˗ehꞈ kʼoˆ laˇ gʼa ve yoˬ. Yeˍsuˆ kʼoˆ ve leh te ve awˬ ceuˬ htaꞈ nawˬ henˇ htaˇ, nawˬ yawˇ geh awˬ chawˇ te gaˇ tuˬ yoˬ.

11. Nawˬ Yaˬhoˉvaˬ htaꞈ haꞈ gaˇ tuˬ aˬ htoꞈ ma te laˇ ve le?

¹¹ Nawˬ Yeˍsuˆ htaꞈ haꞈ ve kʼo, Yaˬhoˉvaˬ htaꞈ haꞈ maˇ la tuˬ yoˬ. Aˬ htoꞈ ma te chi hkʼe hpehꞈ ve le? Yeˍsuˆ Awˬ pa htaꞈ hkʼa dehꞈ henˇ yuˬ gʼa ve pa taw yoˬ. (Yoˇhanˬ 14:9) Nawˬ Yeˍsuˆ ve awˬ lawn gʼaˇ hteꞈ henˇ ve kʼo, Yaˬhoˉvaˬ htaꞈ na gʼa leh awˬ  hpfuhˇ shiˍ tuˬ yoˬ. Haˍ ve gʼawˇ ve, naˬ ve gawˬ ve, maˇ heˆ leh awˬ gʼaˇ nuˇ ve chaw, shu maˇ dawˇ cawˇ ve htaꞈ Yeˍsuˆ mawˬ leh ha kʼaˉ ve hpeuꞈ maw piˇ ve htaꞈ dawˇ nyi sheˍ. Chi hkʼoˆ kaꞈ, nawˬ Yeˍsuˆ ve tawˇ na yuˬ leh gʼaꞈ te htaˇ, nawˬ ve a shaꞈ teꞈ hkʼaˇ hkʼaˬ hkʼe taw daꞈ ve htaꞈ dawˇ sheˍ.—Maꞈhtehˍ 5:1-11; 7:24-27.

12. Yeˍsuˆ htaꞈ caˉ daꞈ ve nawˬ shiˍ la htaˇ, nawˬ aˬ htoꞈ ma te gaˇ tuˬ te laˇ ve le?

¹² Yeˍsuˆ ve a shaꞈ tanˇ laˇ leh ngaˬ hui ve venˇ baˆ awˬ pon htaiˍ hkʼawꞈ laˇ ve htaꞈ dawˇ nyi htaˇ, nawˬ yawˇ htaꞈ haꞈ jaˇ tuˬ yoˬ. (Maꞈhtehˍ 20:28) Yeˍsuˆ nawˬ awˬ pon suh laˇ ve tehꞈ nawˬ shiˍ htaˇ, Yaˬhoˉvaˬ geh venˇ baˆ lawˬ hpenˇ gaˇ tuˬ te laˇ ve yoˬ. (Tcuh yaˇ 3:19, 20; 1 Yoˇhanˬ 1:9) Nawˬ Yaˬhoˉvaˬ leh Yeˍsuˆ htaꞈ haꞈ htaˇ, Yaˬhoˉvaˬ leh Yeˍsuˆ htaꞈ haꞈ ve chaw geh nawˬ chehˇ gaˇ tuˬ yoˬ.

13. Yaˬhoˉvaˬ nawˬ htaꞈ aˬ htoꞈ ma peꞈ laˇ ve le?

¹³ Yaˬhoˉvaˬ htaꞈ haꞈ ve chaw htaꞈ haꞈ ve. Nawˬ ve awˬ viˉ awˬ nyi leh awˬ chawˇ nawˬ Yaˬhoˉvaˬ htaꞈ awˬ to chiˇ aꞈ piˇ gaˇ ve yawˇ hui maˇ na gʼa. Yawˇ hui nawˬ htaꞈ tawˍ laˇ ve yoˬ hehˉ. Yaꞈ hkʼaˇ, nawˬ yehˬ kʼa hkʼaw ve awˬ viˉ awˬ nyi hkʼe cawˬ tuˬ Yaˬhoˉvaˬ ga laˇ tuˬ yoˬ. Nawˬ yawˇ hui geh meuˆ daꞈ ve kʼo, haꞈ laˇ ve leh loˍ ve awˬ ceuˬ cawˬ htaˇ ga laˇ tuˬ yoˬ. (Maˍkuˆ 10:29, 30; Heˍbrehˇ 10:24, 25) Awˬ gʼuˇ suhˍ hpawˇ nawˬ ve yehˬ kʼa hkʼaw ve chaw Yaˬhoˉvaˬ htaꞈ oˉ kʼoˍ pui la leh nawˬ hkʼe leˇ Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te tuˬ naˍ kaꞈ maˇ shiˍ.—1 Peˍtruˆ 2:12.

14. 1 Yoˇhanˬ liꞈ 5:3 hkʼaw kʼoˆ taˍ ve hkʼe, Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te htaˇ, nawˬ ve te hkʼaˇ dawˇ hkʼaˇ hkʼaˬ hkʼe hpehꞈ la tuˬ le?

¹⁴ Yaˬhoˉvaˬ ve awˬ liˇ awˬ hkʼaˇ htaꞈ awˬ hpfuhˇ shiˍ leh gʼaꞈ te ve. Nawˬ Yaˬhoˉvaˬ htaꞈ maˇ shiˍ sheˍ htaˇ, aˬ htoꞈ ma cawˇ maˇ cawˇ ve nawˬ hkʼaˇ nawˬ dawˇ cheˆ ve yoˬ. Yaꞈ hkʼaˇ, Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve daꞈ jaˇ ve tehꞈ chi teˇ hkui nawˬ shiˍ˗oˬ ve yoˬ. (Chiˇ mvuh ve 1:1-3; 1 Yoˇhanˬ 5:3 gʼaw sheˍ.) Awˬ hpawˇ awˬ miˇ ma, awˬ pa awˬ e, leh yaˇ teˇ hpaˍ htaꞈ caˉ daꞈ ve Liꞈ hpu hkʼaw beˆ maˍ laˇ ve htaꞈ dawˇ nyi sheˍ. Nawˬ beˆ maˍ laˇ hkawˇ chi teˇ hpaˍ htaꞈ gʼaꞈ te htaˇ, nawˬ ve yehˬ kʼa hkʼaw kaꞈ ha lehˬ jaˇ ve maˇ heˆ laˇ? (Eˇfeˇsuꞈ 5:22–6:4) Awˬ chawˇ leuˆ ve, nawˬ Yaˬhoˉvaˬ beˆ maˍ laˇ ve htaꞈ na yuˬ htaˇ, nawˬ te hkʼaˇ dawˇ hkʼaˇ daꞈ leh ha lehˬ jaˇ ve maˇ heˆ laˇ? (Tawˇ naˉ ve 13:20; 1 Kawˇrenˍhtuˆ 15:33) Yoˬ tehꞈ nawˬ hkʼawꞈ tuˬ yoˬ.

15. Nawˬ Liꞈ hpu hkʼaw ve awˬ liˇ awˬ hkʼaˇ htaꞈ yuˬ yehˇ kuiˬ maˇ shiˍ htaˇ hkʼaˬ hkʼe te tuˬ le?

¹⁵ Nawˬ Liꞈ hpu hkʼaw ve awˬ liˇ awˬ hkʼaˇ htaꞈ henˇ htaˇ, teˇ pawˆ pawˆ hkʼaˬ hkʼe yuˬ yehˇ tuˬ hkʼa dehꞈ maˇ shiˍ. Aˬ htoꞈ ma cawˇ maˇ cawˇ ve nawˬ fuiˍ daꞈ pehˬ daꞈ gʼa tuˬ ga laˇ ve lehˬ Hkriꞈ yaˇ ve liꞈ kʼoˆ teˇ hpaˍ Liꞈ hpu hkʼaw caˉ daꞈ ve kʼoˆ maˍ laˇ leh Yaˬhoˉvaˬ ve kanˉ hkʼaˇ cawˬ tcuh laˇ ve yoˬ. (Heˍbrehˇ 5:13, 14) Nawˬ Hkriꞈ yaˇ ve liꞈ kʼoˆ teˇ hpaˍ gʼaw leh yuˬ yehˇ kuiˬ shiˍ htaˇ, beˆ maˍ laˇ ve chi nawˬ awˬ pon awˬ bon cawˬ leh nawˬ kaꞈ Gʼuiˬ sha ve kanˉ hkʼaˇ hkʼaw teˇ gʼaˇ hpehꞈ gaˇ tuˬ yoˬ.

16. Yaˬhoˉvaˬ yawˇ ve chaw htaꞈ hkʼaˬ hkʼe nyi haꞈ shaˉ ve le?

¹⁶ Yaˬhoˉvaˬ htaꞈ haꞈ leh yawˇ ve kanˉ hkʼaˇ hpawˇ chehˇ ve. Yaˬhoˉvaˬ Yeˍsuˆ htaꞈ Hkriꞈ yaˇ awˬ moˍ teˇ kaˬ le le lo nyi haꞈ shaˉ tcuh ve yoˬ. (Eˇfeˇsuꞈ 1:22; 5:23) Awˬ viˉ awˬ nyi hawˉ hkʼaˆ leuˆ yuˬ taˍ ve chaw htaꞈ awˬ moˍ ehˉ leuˆ teh leh, chi beuꞈ teˇ co˗e Yeˍsuˆ te tcuh gaˇ ve teˇ ceuˬ le le yawˇ hui htaꞈ shehˍ kʼai tcuh ve yoˬ. Yeˍsuˆ leuˆ yuˬ taˍ ve awˬ moˍ ehˉ chi htaꞈ “ka tiꞈ yeˬ leh cuˇ yiˍ cawˬ ve awˬ ceˬ” tehꞈ kuˬ ve yoˬ. Nawˬ Yaˬhoˉvaˬ geh meuˆ daꞈ tuˬ yawˇ hui ga laˇ leh, nawˬ ve yonˍ hkʼaˇ htaꞈ haꞈ shaˉ laˇ tuˬ a yeˇ uiˍ jaˇ tehꞈ yawˇ hui dawˇ ve yoˬ. (Maꞈhtehˍ 24:45-47) Nawˬ htaꞈ beˆ maˍ leh haꞈ shaˉ laˇ tuˬ ka tiꞈ yeˬ leh cuˇ yiˍ cawˬ ve awˬ ceˬ, awˬ viˉ awˬ nyi hawˉ hkʼaˆ awˬ vuiˬ te keunˍ ve chaw htaꞈ leuˆ teh leh nyi haꞈ shaˉ tcuh ve yoˬ. (Iˉsaˍyaˆ 32:1, 2; Heˍbrehˇ 13:17; 1 Peˍtruˆ 5:2, 3) Nyi haꞈ  shaˉ paˍ a yeˇ yuˬ leh kanˉ te laˇ ve, awˬ gʼaˇ peꞈ laˇ leh nawˬ Yaˬhoˉvaˬ geh hkʼa dehꞈ meuˆ daꞈ tuˬ ga laˇ ve yoˬ. Yawˇ hui te ve a yeˇ uiˍ jaˇ ve lehˬ nawˬ Yaˬhoˉvaˬ ve awˬ lawn shu htaꞈ maˍ piˇ tuˬ ga laˇ ve yoˬ.—Eˇfeˇsuꞈ 4:11-13.

17. Roˉmaꞈ liꞈ 10:10, 13, 14 hkʼaw kʼoˆ taˍ ve hkʼe, aˬ htoꞈ ma te Yaˬhoˉvaˬ ve awˬ lawn shu htaꞈ hto maˍ piˇ ve le?

¹⁷ Shu Yaˬhoˉvaˬ htaꞈ haꞈ tuˬ ga piˇ ve. Yeˍsuˆ awˬ laꞈ gʼawˇ Yaˬhoˉvaˬ ve awˬ lawn shu htaꞈ maˍ piˇ tuˬ kʼoˆ piˇ ve yoˬ. (Maꞈhtehˍ 28:19, 20) Teˇ pawˆ pawˆ kʼoˆ laˇ ve chi htaꞈ ngaˬ hui na ve lehˬ awˬ vuiˬ htaꞈ pa taw yoˬ. Yaꞈ hkʼaˇ, nawˬ Yaˬhoˉvaˬ htaꞈ haꞈ ve kʼo, nawˬ kaꞈ tcuh yaˇ Peˍtruˆ leh Yoˇhanˬ hkʼe dawˇ ve yoˬ. Yawˇ hui kʼoˆ ve, “ngaˬ huiˉ maˬ lehˬ, gʼa kaˇ gʼa mawˬ ve awˬ lawn teˇ hpaˍ htaꞈ maˇ hto maˇ maˍ ve kʼo, chehˇ maˇ hpehꞈ tehꞈ kʼawꞈ kʼoˆ piˇ ve yoˬ.” (Tcuh yaˇ 4:20) Shu Yaˬhoˉvaˬ htaꞈ haꞈ tuˬ ga piˇ ve hkʼe taw, ha lehˬ tuˬ te laˇ ve teˇ ceuˬ kaꞈ maˇ cawˬ. Ehˇtaˍyoˇpiˆ chaw a maꞈ lonˉ Liꞈ hpu hkʼaw awˬ tehˬ ve htaꞈ gʼa henˇ leh Baˆtiˆsaˬ haꞈ yuˬ htaˇ, ha lehˬ ve bon hkawˇ maˍ paˍ Hpiˇliˇpuˆ hkʼaˬ hkʼe taw ha lehˬ ve htaꞈ dawˇ nyi sheˍ. Nawˬ Hpiˇliˇpuˆ htaꞈ henˇ yuˬ leh Yeˍsuˆ shu htaꞈ ha lehˬ ve bon hkawˇ maˍ piˇ kʼoˆ ve htaꞈ na yuˬ htaˇ, nawˬ Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ hpeuꞈ maw piˇ ve yoˬ. (Roˉmaꞈ 10:10, 13, 14 gʼaw sheˍ.) Ehˇtaˍyoˇpiˆ chaw hkʼe leˇ “ngaˬ Baˆtiˆsaˬ maˇ gʼa hkanˍ tuˬ, aˬ htoꞈ ma tawˍ taˍ tuˬ cawˬ le?” nawˬ awˬ to htaꞈ na nyi cawˇ ve yoˬ.—Tcuh yaˇ 8:36.

18. Gʼuˇ suhˍ teˇ lawn hkʼaw aˬ htoꞈ ma htaꞈ henˇ tuˬ le?

¹⁸ Baˆtiˆsaˬ haꞈ yuˬ tuˬ dawˇ cheˆ htaˇ, nawˬ a shaꞈ teꞈ kuiˬ hkʼaw a yeˇ uiˍ jaˇ ve awˬ ceuˬ dawˇ cheˆ chehˇ ve yoˬ. Chi lehˬ hkʼa dehꞈ gʼa dawˇ cheˆ ve yoˬ. Chi htaꞈ pa taw, Baˆtiˆsaˬ haꞈ yuˬ ve aˬ htoꞈ ma htaꞈ caˉ daꞈ ve nawˬ hkʼa dehꞈ gʼa dawˇ nyi ve yoˬ. Baˆtiˆsaˬ haꞈ yuˬ ve htaꞈ caˉ daꞈ ve, nawˬ Baˆtiˆsaˬ maˇ haꞈ yuˬ sheˍ htaˇ leh haꞈ yuˬ peuˬ hkʼawꞈ nawˉ aˬ htoꞈ ma gʼa te cawˇ ve, nawˬ gʼa shiˍ cawˇ ve gʼuˇ suhˍ teˇ lawn hkʼaw teˇ geh henˇ tuˬ yoˬ.