1. Nawˬ Liꞈ hpu maˇ henˇ sheˍ htaˇ nawˬ ve te hkʼaˇ dawˇ hkʼaˇ hkʼaˬ hkʼe hpehꞈ ve le?

 Nawˬ Liꞈ hpu maˇ henˇ sheˍ htaˇ nawˬ ve te hkʼaˇ dawˇ hkʼaˇ hkʼaˬ hkʼe hpehꞈ ve le? Ngaˬ hui laiˉ gʼaˇ kaꞈ awˉ lawˉ htaˇ ve a shaꞈ teꞈ hkʼaˇ htaꞈ maˇ dawˇ nyi gaˇ taˬ. Awˬ lawn kʼo, ngaˬ hui Liꞈ hpu maˇ henˇ sheˍ htaˇ ‘dawˇ law kuiˬ kaꞈ maˇ cawˬ leh Gʼuiˬ sha htaꞈ kaꞈ maˇ shiˍ.’ Ngaˬ hui ve te hkʼaˇ dawˇ hkʼaˇ kaꞈ miˬ guiˬ yaˇ Gʼuiˬ sha ve awˬ liˇ awˬ hkʼaˇ htaꞈ maˇ yuˬ yehˇ ve chaw hkʼa shuˍ hpehꞈ ve yoˬ. (Eˇfeˇsuꞈ 2:12) Yaꞈ hkʼaˇ, ngaˬ hui Liꞈ hpu gʼa henˇ˗oˬ htaˇ, ngaˬ hui ve te hkʼaˇ dawˇ hkʼaˇ kaꞈ pa ve yoˬ!

2. Liꞈ hpu gʼa henˇ˗oˬ htaˇ nawˬ aˬ htoꞈ ma gʼa shiˍ ve le?

² Liꞈ hpu gʼa henˇ˗oˬ htaˇ mvuhˇ naw ma hkʼoˆ ve Awˬ pa Yaˬhoˉvaˬ lehˬ nawˬ htaꞈ haꞈ jaˇ ve tehꞈ gʼa shiˍ ve yoˬ. Nawˬ Gʼuiˬ sha nyi hkʼaˇ suh tuˬ te piˇ gaˇ leh yawˇ ve yehˬ kʼa hkʼaw chehˇ gaˇ ve kʼo, nawˬ ve te hkʼaˇ dawˇ hkʼaˇ gʼa pa cawˇ ve tehꞈ shiˍ ve yoˬ. Leh Gʼuiˬ sha ve awˬ liˇ awˬ hkʼaˇ htaꞈ kaꞈ gʼa gʼaꞈ te ve yoˬ.—Eˇfeˇsuꞈ 5:3-5.

3. Kawˇlawˇsehˇ liꞈ 3:9, 10 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Yaˬhoˉvaˬ lehˬ hpanˍ shehˍ hpaˇ leh ngaˬ hui ve Awˬ pa kaꞈ hpehꞈ ve yoˬ. Hkʼe te leh, Gʼuiˬ sha lehˬ yawˇ ve yehˬ kʼa hkʼaw ve chaw htaꞈ awˬ liˇ teh piˇ tuˬ a hkaw˗anˬ cawˬ ve yoˬ. Ngaˬ hui Baˆtiˆsaˬ maˇ haꞈ yuˬ sheˍ htaˇ, Gʼuiˬ sha ngaˬ hui htaꞈ “chaw awˬ piˍ ve awˬ liˇ awˬ hkʼaˇ teˇ hpaˍ htaꞈ kaꞈ” kʼehˆ baˬ taˉ˗oˆ tehꞈ kʼoˆ laˇ ve yoˬ. * (Kawˇlawˇsehˇ 3:9, 10 gʼaw sheˍ.) Chi htaꞈ pa taw, Baˆtiˆsaˬ haꞈ yuˬ tuˬ dawˇ teh taˍ ve chaw htaꞈ na hkawˇ chi ve 3 maˬ hkʼawꞈ laˇ tcuh sheˍ. Chi ve lehˬ (1) “chaw awˬ piˍ ve awˬ liˇ awˬ hkʼaˇ teˇ hpaˍ” aˬ htoꞈ ma le? (2) Aˬ htoꞈ  ma te Yaˬhoˉvaˬ ngaˬ hui htaꞈ “chaw awˬ piˍ ve awˬ liˇ awˬ hkʼaˇ teˇ hpaˍ htaꞈ” baˬ taˉ tcuh gaˇ ve le? Leh (3) ngaˬ hui te hkʼaˇ dawˇ hkʼaˇ chi ve teˇ hpaˍ htaꞈ hkʼaˬ hkʼe te baˬ taˉ gʼa tuˬ le? Leh Baˆtiˆsaˬ haꞈ yuˬ˗oˬ ve chaw awˬ pon kʼo, te hkʼaˇ dawˇ hkʼaˇ awˬ piˍ htaꞈ maˇ kʼawꞈ te tuˬ awˬ lawn chi ve hkʼaw teˇ geh henˇ tuˬ yoˬ.

4. “Chaw awˬ piˍ ve awˬ liˇ awˬ hkʼaˇ teˇ hpaˍ” htaꞈ baˬ taˉ ve chaw lehˬ hkʼaˬ hkʼe hpehꞈ ve le?

⁴ “Chaw awˬ piˍ ve awˬ liˇ awˬ hkʼaˇ teˇ hpaˍ” maˇ baˬ taˉ ve chaw lehˬ a shu yawˇ awˬ pon tiˉ dawˇ nyi ve, beuꞈ puiˉ jaˇ ve, shu ve awˬ bon htaꞈ maˇ shiˍ ve, uiˍ muiˬ caˆ muiˬ ve, awˬ kʼu nyi ve awˬ han nyi ve, hehnˇ ve awˬ han nyi ve, haˉ chawˇ haˉ paˆ te ve, chi ve hkʼa peu˗eˬ htaꞈ yawˇ te chehˇ sheˍ. Yawˇ te hkʼaˇ dawˇ hkʼaˇ daꞈ ve kaꞈ cawˬ sheˍ leh maˇ daꞈ ve awˬ ceuˬ te htaˇ, nyi ma maˇ sha ve yoˬ hehˉ. Yaꞈ hkʼaˇ, yawˇ ve te hkʼaˇ dawˇ hkʼaˇ maˇ daꞈ ve htaꞈ pa tuˬ te gaˇ ve nyi ma hkʼa dehꞈ maˇ cawˬ.—Gaˍlaˍtiˆ 5:19-21; 2 Tiˆmoˉseˍ 3:2-5.

5. Ngaˬ hui maˇ daꞈ ve dawˇ hkʼaˇ maˇ dawˇ tuˬ leh maˇ daꞈ ve awˬ ceuˬ htaꞈ maˇ te˗o tuˬ, te gʼa˗aw laˇ? Kʼoˆ maˍ laˇ sheˍ. (Tcuh yaˇ 3:19)

⁵ Ngaˬ hui maˇ biˇ ve chaw hpehꞈ ve pa taw, maˇ daꞈ ve dawˇ hkʼaˇ maˇ dawˇ leh maˇ daꞈ ve awˬ ceuˬ maˇ te˗o tuˬ haˍ ve yoˬ. Te pawˆ pawˆ kʼo, ngaˬ hui kʼoˆ ve leh te ve awˬ ceuˬ peuˬ hkʼawꞈ nawˉ nyi ma luˬ ve yoˬ. (Yeˍraˍmiˆ 17:9; Yaˍkoˆ 3:2) Yaꞈ hkʼaˇ, ngaˬ hui “chaw awˬ piˍ ve awˬ liˇ awˬ hkʼaˇ teˇ hpaˍ htaꞈ” baˬ taˉ gʼa ve yoˬ. Ngaˬ hui te hkʼaˇ dawˇ hkʼaˇ maˇ daꞈ ve cawˬ sheˍ ve htawˇ, ngaˬ hui htaꞈ maˇ uˉ peunˍ tcuh. Leh ngaˬ hui te hkʼaˇ dawˇ hkʼaˇ pa˗oˬ ve tehꞈ awˬ nu ve chaw mawˬ tuˬ yoˬ.—Iˉsaˍyaˆ 55:7; Tcuh yaˇ 3:19 gʼaw sheˍ.

6. Aˬ htoꞈ ma te Yaˬhoˉvaˬ lehˬ ngaˬ hui htaꞈ “chaw awˬ piˍ ve awˬ liˇ awˬ hkʼaˇ teˇ hpaˍ” htaꞈ baˬ taˉ tcuh gaˇ ve le?

⁶ Yaˬhoˉvaˬ lehˬ ngaˬ hui htaꞈ maˇ daꞈ ve dawˇ hkʼaˇ maˇ dawˇ tcuh gaˇ leh maˇ daꞈ ve awˬ ceuˬ maˇ te tcuh gaˇ. Yaˬhoˉvaˬ ngaˬ hui htaꞈ haꞈ jaˇ ve pa taw, ha lehˬ tcuh gaˇ ve yoˬ. (Iˉsaˍyaˆ 48:17, 18) A shu yawˇ ve te hkʼaˇ dawˇ hkʼaˇ htaꞈ gʼaꞈ te ve lehˬ, yaꞈ ve tehꞈ shiˍ leh a shu yawˇ awˬ to leh awˬ nu ve chaw htaꞈ kaꞈ nyi ma naˬ tuˬ te piˇ ve tehꞈ Gʼuiˬ sha shiˍ ve yoˬ. Chi lehˬ Yaˬhoˉvaˬ htaꞈ kaꞈ nyi ma naˬ tuˬ te piˇ ve yoˬ.

7. Roˉmaꞈ liꞈ 12:1, 2 hkʼaw kʼoˆ taˍ ve hkʼe, ngaˬ hui teˇ gʼaˇ le le aˬ htoꞈ ma htaꞈ gʼa leuˆ yuˬ cawˇ ve le?

⁷ Ngaˬ hui ve te hkʼaˇ dawˇ hkʼaˇ pa tuˬ coˇ caˇ ve kʼo, awˉ lawˉ htaˇ awˬ chawˇ maˇ heˆ leh yehˬ kʼa hkʼaw ve chaw kʼoˆ guiˇ gʼuiˬ guiˇ laˇ tuˬ yoˬ.  (1 Peˍtruˆ 4:3, 4) Shu hkawˇ na tuˬ maˇ loˍ, ngaˬ hui aˬ htoꞈ ma te gaˇ kaꞈ te gʼa ve tehꞈ yawˇ kʼoˆ laˇ ve yoˬ. Yaꞈ hkʼaˇ, Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te ve chaw lehˬ awˬ tehˬ awˬ na dawˇ taˍ ve hkʼe te gʼa˗aw laˇ? Maˇ te gʼa. Yawˇ hui Saˍtanˍ uˉ peunˍ ve awˬ hawˉ lo chehˇ taˍ ve yoˬ. (Roˉmaꞈ 12:1, 2 gʼaw sheˍ.) Ngaˬ hui ve venˇ baˆ leh Saˍtanˍ ve miˬ guiˬ ngaˬ hui htaꞈ meuˆ la kuiˬ cawˬ ve pa taw, teˇ gʼaˇ le le maˇ daꞈ ve te hkʼaˇ dawˇ hkʼaˇ awˬ piˍ hkʼe cawˬ tuˬ sheˍ laˇ, tehꞈ gʼa leuˆ yuˬ cawˇ ve yoˬ. Maˇ heˆ leh ngaˬ hui daꞈ jaˇ ve te hkʼaˇ dawˇ hkʼaˇ awˬ suhˉ cawˬ tuˬ Yaˬhoˉvaˬ htaꞈ ga laˇ tcuh tuˬ laˇ? Chi beuꞈ teˇ co˗e ngaˬ hui daꞈ ve te hkʼaˇ dawˇ hkʼaˇ cawˬ tuˬ Gʼuiˬ sha ga laˇ gʼa ve yoˬ.—Iˉsaˍyaˆ 64:8.

8. Ngaˬ hui maˇ daꞈ ve dawˇ hkʼaˇ leh maˇ daꞈ ve awˬ ceuˬ maˇ te tuˬ aˬ htoꞈ ma ga laˇ gʼa ve le?

⁸ Ngaˬ hui maˇ daꞈ ve dawˇ hkʼaˇ leh maˇ daꞈ ve awˬ ceuˬ maˇ te tuˬ awˬ yanˇ gʼa yehˇ leh gʼa coˇ caˇ jaˇ ve tehꞈ Yaˬhoˉvaˬ shiˍ ve yoˬ. (Chiˇ mvuh ve 103:13, 14) Ngaˬ hui ve te hkʼaˇ dawˇ hkʼaˇ pa gʼa tuˬ, Gʼuiˬ sha lehˬ Liꞈ hpu, daꞈ kehˬ ve awˬ ha hpu peꞈ laˇ ve yoˬ. Chi hkʼoˆ kaꞈ, ngaˬ hui cuˇ yiˍ cawˬ tuˬ yawˇ ve kanˉ hkʼaˇ kaꞈ ga laˇ ve yoˬ. Peuˬ la htaˇ nawˬ ve te hkʼaˇ dawˇ hkʼaˇ htaꞈ pa tuˬ, Yaˬhoˉvaˬ ga laˇ˗oˬ ve yoˬ. “Chaw awˬ piˍ ve awˬ liˇ awˬ hkʼaˇ teˇ hpaˍ htaꞈ kʼehˆ baˬ taˉ” leh co ha hpawˇ uiˍ la mvuh la leh Baˆtiˆsaˬ haꞈ yuˬ gʼa tuˬ, nawˬ te gʼa ve aˬ htoꞈ ma cawˬ sheˍ ve teˇ geh henˇ tuˬ yoˬ.

9. Liꞈ hpu hkʼaw nawˬ htaꞈ hkʼaˬ hkʼe ga laˇ gʼa ve le?

⁹ Nawˬ hkʼaˬ hkʼe ve chaw hpehꞈ ve shiˍ tuˬ Liꞈ hpu gʼaw sheˍ. Nawˬ ve dawˇ hkʼaˇ, tawˇ yaw ve, leh te ve awˬ ceuˬ hkʼaˬ hkʼe ve chaw hpehꞈ ve shiˍ tuˬ, Liꞈ hpu lehˬ mehˆ gʼeuˆ hkʼe hpehꞈ leh nawˬ htaꞈ ga laˇ gʼa ve yoˬ. (Yaˍkoˆ 1:22-25) Nawˬ htaꞈ Liꞈ hpu maˍ laˇ ve chaw maˇ heˆ leh awˬ viˉ awˬ nyi hpehꞈ laˬ jaw ve awˬ lawn cawˬ ve chaw kaꞈ nawˬ htaꞈ ga laˇ gʼa tuˬ yoˬ. Tawˇ pa haˉ te kʼo, hkʼaˬ ve teˇ maˬ nawˬ te gʼa˗oˬ ve leh hkʼaˬ ve teˇ maˬ nawˬ kʼawꞈ pa gʼa tuˬ yawˇ Liꞈ hpu htaꞈ cuˇ leh beˆ maˍ laˇ tuˬ yoˬ. Maˇ heˆ leh nawˬ maˇ daꞈ ve te hkʼaˇ dawˇ hkʼaˇ htaꞈ pa gʼa tuˬ, daꞈ ve beˆ maˍ laˇ hkawˇ nawˬ ca gʼa tuˬ yawˇ ga laˇ tuˬ yoˬ. Yaˬhoˉvaˬ kaꞈ nawˬ htaꞈ ga laˇ tuˬ yoˬ. Nawˬ nyi ma hkʼaw cawˬ ve awˬ ceuˬ hkʼa peu˗eˬ Yaˬhoˉvaˬ shiˍ ve pa taw, nawˬ htaꞈ hkʼaˬ hkʼe ga laˇ tuˬ yawˇ hkʼa dehꞈ shiˍ ve yoˬ. (Tawˇ naˉ ve 14:10; 15:11) Chi htaꞈ pa taw, nawˬ hkʼaˬ htaˆ kaꞈ bon lawˬ sheˍ. Liꞈ hpu teˇ nyi le le gʼaw leh hkʼa dehꞈ dawˇ nyi sheˍ.

10. Eˇliˆ ve awˬ lawn nawˬ htaꞈ aˬ htoꞈ ma maˍ laˇ ve le?

¹⁰ Yaˬhoˉvaˬ ve awˬ liˇ awˬ hkʼaˇ lehˬ daꞈ jaˇ ve tehꞈ yonˍ sheˍ. Yaˬhoˉvaˬ ngaˬ hui htaꞈ te tehꞈ kʼoˆ laˇ ve teˇ ceuˬ le le ngaˬ hui awˬ pon awˬ bon cawˬ ve yoˬ. Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve chaw lehˬ a shu yawˇ awˬ to htaꞈ yawˆ yan leh a shaꞈ teꞈ hkʼaˇ daꞈ leh awˬ tehˬ ha lehˬ ve cawˬ tuˬ yoˬ. (Chiˇ mvuh ve 19:7-11) Yaꞈ hkʼaˇ, Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te ve chaw lehˬ yawˇ te ve awˬ ceuˬ maˇ daꞈ ve gʼa hpuˇ tuˬ yoˬ. Eˇliˆ Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te ve awˬ lawn htaꞈ teˇ geh nyi sheˍ. Yawˇ ve awˬ pa awˬ e Shaˉhkiˆhkanˍ ve chaw hpehꞈ leh yawˇ yaˇ ehˉ htaˇ kaꞈ Yaˬhoˉvaˬ htaꞈ haꞈ tuˬ maˍ piˇ ve yoˬ. Yaꞈ hkʼaˇ, yawˇ yaˇ nehˬ hpehꞈ˗oˬ htaˇ yawˇ maˇ daꞈ ve chaw htaꞈ awˬ chawˇ te ve pa taw, naˆ tsuhˇ awˬ yeꞈ caˆ ve, pehꞈ ve tzuhˆ ve te ve, leh shu ve mawˇ kaꞈ hkʼawˇ ve yoˬ. Yawˇ beuꞈ puiˉ jaˇ leh hkʼaˆ hkʼaw lo ve chaw htaꞈ kaꞈ awˬ lawn cawˬ daꞈ hkʼeh ve yoˬ. Yawˇ kʼoˆ ve, “Hkriꞈ yaˇ maˇ te cawˇ ve tehꞈ awˬ pa awˬ e maˍ laˇ ve teˇ ceuˬ le le htaꞈ yawˇ te ve yoˬ.” Yaꞈ hkʼaˇ, Eˇliˆ yawˇ yaˇ ehˉ htaˇ gʼa henˇ taˍ ve awˬ ceuˬ htaꞈ maˇ leunˇ. Yawˇ Liꞈ hpu teˇ pawˆ kʼawꞈ henˇ leh maˇ daꞈ ve te hkʼaˇ dawˇ hkʼaˇ htaꞈ pa tuˬ coˇ caˇ jaˇ. Hkʼe te leh, yawˇ 2000 hkʼawꞈ htaˇ Baˆtiˆsaˬ haꞈ yuˬ ve yoˬ. Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve Eˇliˆ awˬ pon awˬ bon hkʼaˬ hkʼe cawˬ ve le? Yawˇ kʼoˆ ve, “chi teˇ hkui ngaˬ nyi ma sha jaˇ leh ngaˬ ve dawˇ shiˍ puiˉ ve nyi ma kaꞈ daꞈ ve yoˬ.” * Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te ve chaw lehˬ a shu yawˇ awˬ to maˇ daꞈ ve awˬ ceuˬ gʼa hpuˇ ve tehꞈ Eˇliˆ  ve awˬ lawn htaꞈ gʼa mawˬ ve yoˬ. Yaꞈ hkʼaˇ, chi hkʼe hpehꞈ ve htawˇ Yaˬhoˉvaˬ lehˬ yawˇ hui ve te hkʼaˇ dawˇ hkʼaˇ htaꞈ pa gʼa tuˬ ga piˇ gaˇ ve yoˬ.

11. Yaˬhoˉvaˬ lehˬ aˬ htoꞈ ma htaꞈ maˇ dawˇ cawˇ ve le?

¹¹ Yaˬhoˉvaˬ maˇ dawˇ cawˇ ve awˬ ceuˬ htaꞈ maˇ dawˇ cawˇ tuˬ henˇ sheˍ. (Chiˇ mvuh ve 97:10) Liꞈ hpu hkʼaw kʼoˆ ve, “caˆ muiˬ puiˉ ve nyi ma, heˍ puiˉ ve ha tehˍ, teꞈ chiˉ venˇ baˆ maˇ cawˬ ve chaw htaꞈ tiˇ pehˍ ve laꞈ sheh” chi ve teˇ hpaˍ htaꞈ Yaˬhoˉvaˬ maˇ dawˇ cawˇ. (Tawˇ naˉ ve 6:16, 17) Leh “nyi ma uiˍ ve chaw leh, heˍ caˇ puiˉ ve chaw hui htaꞈ htawˇ” Gʼuiˬ sha maˇ dawˇ cawˇ. (Chiˇ mvuh ve 5:6) Yaˬhoˉvaˬ haiˬ ve awˬ ceuˬ chi teˇ hpaˍ htaꞈ nyi bawˬ jaˇ. Noˉaꞈ ve awˬ co˗e htaˇ miˬ guiˬ yaˇ haiˬ jaˇ ve pa taw, Gʼuiˬ sha te luˬ piˇ ve yoˬ. (Awˬ hkuiˉ puiˍ 6:13) Chi hkʼoˆ kaꞈ, Gʼuiˬ sha tcuh kaˍ paˍ Maˍlaˍhkiˆ htaꞈ cuˇ leh kʼoˆ piˇ tcuh ve, awˬ miˇ ma teꞈ chiˉ yaꞈ kuiˬ maˇ cawˬ ve htawˇ baˬ piˇ ve chaw htaꞈ Gʼuiˬ sha nyi bawˬ ve yoˬ. Chi hkʼe te ve chaw htaꞈ Gʼuiˬ sha maˇ haꞈ yuˬ leh yawˇ hui htaꞈ ciˍ yanˍ piˇ tuˬ yoˬ.—Maˍlaˍhkiˆ 2:13-16; Heˍbrehˇ 13:4.

12. “Haiˬ ve awˬ ceuˬ htaꞈ” nyi bawˬ ve aˬ htoꞈ ma htaꞈ kʼoˆ gaˇ ve le?

¹² Yaˬhoˉvaˬ lehˬ ngaˬ hui htaꞈ “haiˬ ve awˬ ceuˬ htaꞈ” nyi bawˬ tcuh gaˇ ve yoˬ. (Roˉmaꞈ 12:9) Nyi bawˬ ve kʼoˆ gaˇ ve lehˬ, chi ve teˇ tawn hkʼaw hehnˇ ve awˬ ceuˬ htaꞈ dawˇ mawˬ gʼa ve yoˬ. Nyi bawˬ ve lehˬ, teˇ ceuˬ ceuˬ htaꞈ ngaˬ hui maˇ dawˇ cawˇ ve pa taw, chaꞈ jaˇ ve htaꞈ kʼoˆ gaˇ ve yoˬ. Chaw teˇ gʼaˇ nawˬ htaꞈ caˇ tuˬ kuiˇ˗oˬ ve teˇ ceuˬ ceuˬ yuˬ caˍ laˇ ve kʼo, nawˬ hkʼaˬ hkʼe dawˇ tuˬ le? Nawˬ dawˇ ve ceh kaꞈ hpeꞈ gaˇ ve yoˬ hehˉ. Chi ve hkʼa shuˍ shuˍ Yaˬhoˉvaˬ maˇ dawˇ cawˇ ve awˬ ceuˬ htaꞈ te tuˬ dawˇ ve ceh kaꞈ chaꞈ jaˇ ve yoˬ hehˉ.

13. Aˬ htoꞈ ma te ngaˬ hui ve dawˇ hkʼaˇ htaꞈ shaˍ tiꞈ gʼa te cawˇ ve le?

¹³ Nawˬ ve dawˇ hkʼaˇ htaꞈ shaˍ tiꞈ te sheˍ. Ngaˬ hui ve dawˇ hkʼaˇ lehˬ ngaˬ hui te ve awˬ ceuˬ htaꞈ heuˆ la kuiˬ cawˬ ve yoˬ. Chi htaꞈ pa taw Yeˍsuˆ kʼoˆ ve, ngaˬ hui venˇ baˆ uiˍ jaˇ ve htaꞈ te tuˬ dawˇ la htaˇ, ngaˬ hui dawˇ hkʼaˇ chi hkʼe ve laꞈ haˉ gʼa pa cawˇ ve yoˬ. (Maꞈhtehˍ 5:21, 22, 28, 29) Ngaˬ hui Yaˬhoˉvaˬ nyi hkʼaˇ suh tuˬ te piˇ gaˇ ve maˇ heˆ laˇ? Chi hkʼe hpehꞈ ve kʼo, maˇ daꞈ ve awˬ ceuˬ ngaˬ hui dawˇ la htaˇ, maˇ kʼawꞈ dawˇ tuˬ a yeˇ uiˍ jaˇ!

14. Ngaˬ hui ve tawˇ hkawˇ lehˬ aˬ htoꞈ ma htaꞈ mawˬ tuˬ te laˇ ve le? Leh ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?

¹⁴ Nawˬ tawˇ yaw ve htaꞈ shaˍ tiꞈ te sheˍ. Yeˍsuˆ kʼoˆ ve, “mawꞈ kʼaw awˬ hkʼaw lo tawˆ la ve awˬ ceuˬ lehˬ, nyi ma hkʼaw lo tawˆ la ve yoˬ.” (Maꞈhtehˍ 15:18) Ngaˬ hui tawˇ yaw ve lehˬ hkʼaˬ hkʼe ve chaw hpehꞈ ve tehꞈ shiˍ tuˬ te laˇ ve yoˬ. Ngaˬ hui a shu yawˇ awˬ to htaꞈ na nyi cawˇ ve, ‘awˬ tehˬ ve awˬ lawn yaw ve  ngaˬ shoꞈ shaꞈ tuˬ te laˇ ve htawˇ ngaˬ heˍ tuˬ laˇ? Ngaˬ yehˬ kʼa cawˬ ve kʼo, ngaˬ yawˇ htaꞈ maˆ guiˇ ve tehꞈ dawˇ tuˬ te piˇ˗aw laˇ? Pehꞈ ve tzuhˆ ve hpawˇ ve awˬ lawn ngaˬ yaw˗aw laˇ? Shu ngaˬ htaꞈ nyi ma zuhˆ tuˬ te laˇ htaˇ ngaˬ tawˇ daꞈ daꞈ yaw piˇ tuˬ laˇ?’ Ngaˬ hui hkʼaˬ hkʼe ve chaw hpehꞈ ve tehꞈ shiˍ tuˬ, na hkawˇ chi ve teˇ hpaˍ htaꞈ hkʼa dehꞈ gʼa dawˇ nyi cawˇ ve yoˬ. Tawˇ yaw ve kaꞈ aˉ poꞈ tiˉ hkʼaˆ shiˍ htaꞈ shuˍ ve yoˬ. Aˉ poꞈ tiˉ hkʼaˆ shiˍ hpui baˬ˗oˬ htaˇ aˉ poꞈ kʼehˆ sha ve yoˬ. Chi ve hkʼa shuˍ shuˍ ngaˬ hui tawˇ maˇ daꞈ ve maˇ yaw˗o ve, maˇ heˍ˗o ve, pehꞈ ve tzuhˆ ve hpawˇ maˇ yaw˗o ve, maˇ na sha ve tawˇ maˇ yaw˗o ve kʼo, ngaˬ hui ve te hkʼaˇ dawˇ hkʼaˇ maˇ daꞈ ve htaꞈ baˬ taˉ tuˬ sha ve yoˬ.

15. Te hkʼaˇ dawˇ hkʼaˇ awˬ piˍ “hkanˍ suh peuˬ” ve aˬ htoꞈ ma htaꞈ kʼoˆ gaˇ ve le?

¹⁵ Te gʼa tuˬ dawˇ teh taˍ ve htaꞈ laꞈ haˉ gʼaꞈ te sheˍ. Ngaˬ hui ve te hkʼaˇ dawˇ hkʼaˇ pa gʼa tuˬ a yeˇ uiˍ jaˇ ve tehꞈ Pawˇluꞈ tawˇ pa haˉ tehˆ maˍ laˇ ve yoˬ. Pawˇluꞈ kʼoˆ ve, ngaˬ hui ve te hkʼaˇ dawˇ hkʼaˇ awˬ piˍ htaꞈ gʼa “hkanˍ suh peuˬ” ve yoˬ. (Roˉmaꞈ 6:6) Chi kʼoˆ gaˇ ve lehˬ, ngaˬ hui Yeˍsuˆ htaꞈ gʼa henˇ yuˬ cawˇ ve yoˬ. Yeˍsuˆ lehˬ Yaˬhoˉvaˬ nyi hkʼaˇ suh ve te piˇ tuˬ, yawˇ ha lehˬ ha kʼa hkanˍ suh peuˬ ve yoˬ. Chi ve hkʼa shuˍ shuˍ, ngaˬ hui Yaˬhoˉvaˬ nyi hkʼaˇ suh tuˬ te piˇ gaˇ ve kʼo, ngaˬ hui te hkʼaˇ dawˇ hkʼaˇ maˇ daꞈ ve maˇ kʼawꞈ cawˬ tcuh˗o. Ngaˬ hui chi hkʼe gʼa te cawˇ ve yoˬ. Ngaˬ hui ve dawˇ shiˍ puiˉ ve nyi ma gʼa daꞈ kehˬ leh co co taiˍ taiˍ ve dawˇ law kuiˬ gʼa cawˬ ve yoˬ. (Yoˇhanˬ 17:3; 1 Peˍtruˆ 3:21) Hkʼaˬ htaˆ kaꞈ Yaˬhoˉvaˬ ve awˬ liˇ awˬ hkʼaˇ maˇ pa ve tehꞈ ngaˬ hui tawnˇ taˍ cawˇ ve yoˬ. Ngaˬ hui ve te hkʼaˇ dawˇ hkʼaˇ kaꞈ Yaˬhoˉvaˬ ve awˬ liˇ awˬ hkʼaˇ awˬ hkʼaˇ suh gʼaꞈ te cawˇ ve yoˬ.—Iˉsaˍyaˆ 1:16-18; 55:9.

16. Aˬ htoꞈ ma te nawˬ gʼaˇ nuˇ kuiˬ htaꞈ caˉ leh tawˍ daꞈ cawˇ ve le?

¹⁶ Nawˬ gʼaˇ nuˇ kuiˬ htaꞈ caˉ leh tawˍ daꞈ sheˍ. Nawˬ Baˆtiˆsaˬ haꞈ yuˬ peuˬ hkʼawꞈ nawˉ, nawˬ gʼaˇ nuˇ kuiˬ htaꞈ caˉ leh gʼa tawˍ daꞈ chehˇ sheˍ ve yoˬ. Ma˗ri˗si˗oˆ ve awˬ lawn htaꞈ teˇ geh nyi sheˍ. Yawˇ a shaꞈ maˇ maˇ sheˍ htaˇ hawˉ hkʼaˆ leh yaˇ miˇ htaꞈ kaꞈ dawˇ cawˇ leh pehꞈ ve tzuhˆ ve te ve yoˬ. Peuˬ hkʼawꞈ nawˉ, yawˇ Yaˬhoˉvaˬ ve Shaˉhkiˆhkanˍ ve chaw htaꞈ mawˬ daꞈ leh Liꞈ hpu henˇ ve yoˬ. Yawˇ ve te hkʼaˇ dawˇ hkʼaˇ pa tuˬ coˇ caˇ jaˇ. Hkʼe te leh, 2002 hkʼawꞈ gaˬ leh yawˇ Baˆtiˆsaˬ haꞈ yuˬ ve yoˬ. Leh Ma˗ri˗si˗oˆ Yaˬhoˉvaˬ ve kanˉ laiˉ hkʼawꞈ te˗oˬ ve yoˬ. Yawˇ kʼoˆ ve, “teˇ pawˆ pawˆ kʼo, ngaˬ maˇ daꞈ ve te hkʼaˇ dawˇ hkʼaˇ htaꞈ gʼa tawˍ daꞈ chehˇ sheˍ ve tehꞈ shiˍ ve yoˬ.” Chi hkʼe hpehꞈ ve htawˇ, Ma˗ri˗si˗oˆ awˬ gʼaˇ maˇ nuˇ. Yawˇ kʼoˆ ve, “maˇ daꞈ ve awˬ ceuˬ htaꞈ ngaˬ maˇ te leh Yaˬhoˉvaˬ nyi hkʼaˇ suh tuˬ te piˇ ve tehꞈ shiˍ htaˇ awˬ gʼaˇ gʼa ve yoˬ.” *

17. Na˗bi˗haˍ ve awˬ lawn nawˬ htaꞈ awˬ gʼaˇ hkʼaˬ hkʼe peꞈ laˇ ve le?

 ¹⁷ Yaˬhoˉvaˬ ga laˇ tuˬ bon lawˬ leh yawˇ ve daꞈ kehˬ ve awˬ ha hpu htaꞈ gʼaˇ va sheˍ. (Gaˍlaˍtiˆ 5:22; Hpiˇliˇpiˆ 4:6) “Chaw awˬ piˍ ve awˬ liˇ awˬ hkʼaˇ teˇ hpaˍ htaꞈ” kaꞈ kʼehˆ baˬ taˉ leh awˉ lawˉ htaˇ hkʼe maˇ kʼawꞈ te tuˬ gʼa coˇ caˇ jaˇ. Na˗bi˗haˍ ve awˬ lawn htaꞈ teˇ geh nyi sheˍ. Yawˇ 6 hkʼawꞈ htaˇ kaꞈ awˬ pa baˬ˗aˉ piˇ ve yoˬ. Yawˇ kʼoˆ ve, “ngaˬ cheˆ˗ehꞈ kʼai leh nyi ma luˬ jaˇ.” Yawˇ yaˇ nehˬ hpehꞈ˗oˬ htaˇ, chaw hkawˇ maˇ na puiˉ leh beuꞈ puiˉ jaˇ. Peuˬ leh yawˇ naˆ tsuhˇ awˬ yeꞈ caˆ puiˉ ve hawˇ leh shu yuˬ gʼa htaˇ, htawnˍ hkʼaw lo laiˉ hkʼawꞈ gʼa chehˇ ve yoˬ. Peuˬ hkʼawꞈ nawˉ, Yaˬhoˉvaˬ ve Shaˉhkiˆhkanˍ ve chaw htawnˍ hkʼaw lo ca guiˇ la ve yoˬ. Hkʼe te leh, yawˇ Liꞈ hpu tanˬ henˇ ve yoˬ. Na˗bi˗haˍ yawˇ ve te hkʼaˇ dawˇ hkʼaˇ pa jaˇ. Yawˇ kʼoˆ ve, “ngaˬ ve te hkʼaˇ dawˇ hkʼaˇ teˇ hpaˍ hpaˍ maˇ daꞈ ve hkʼa sha sha˗ehˬ pa gʼa ve yoˬ. Yaꞈ hkʼaˇ, shuˉ tawˍ gʼa tuˬ haˍ jaˇ.” Na˗bi˗haˍ shuˉ tawˍ gʼa tuˬ teˇ hkʼawꞈ hpaˆ gʼa yehˇ ve yoˬ. Yawˇ te gʼa tuˬ aˬ htoꞈ ma ga piˇ ve le? Yawˇ kʼoˆ ve, “ngaˬ shuˉ tawˍ gʼa tuˬ ga laˇ ve a yeˇ uiˍ jaˇ ve teˇ ceuˬ lehˬ, Yaˬhoˉvaˬ geh hkʼaˬ htaˆ kaꞈ bon lawˬ ve yoˬ.” Chi teˇ hkui yawˇ awˬ nu ve chaw htaꞈ kʼoˆ piˇ gaˇ ve, “ngaˬ ve te hkʼaˇ dawˇ hkʼaˇ pa leh Yaˬhoˉvaˬ nyi hkʼaˇ suh tuˬ te piˇ gʼa ve hkʼe, a shu teˇ gʼaˇ kaꞈ te gʼa ve yoˬ tehꞈ ngaˬ yonˍ ve yoˬ!” *

18. 1 Kawˇrenˍhtuˆ liꞈ 6:9-11 hkʼaw kʼoˆ taˍ ve hkʼe, Yaˬhoˉvaˬ ve kanˉ te ve chaw laiˉ gʼaˇ aˬ htoꞈ ma te gʼa ve le?

¹⁸ Awˉ lawˉ peuˇ ve Hkriꞈ yaˇ laiˉ gʼaˇ haˉ chawˇ te ve, hawˉ hkʼaˆ chawˇ hawˉ hkʼaˆ pehꞈ ve tzuhˆ ve te ve, shu ve mawˇ htaꞈ hkʼawˇ jaw ve htawˇ, Yeˍsuˆ Hkriꞈ geh uˉ peunˍ tuˬ Yaˬhoˉvaˬ leuˆ yuˬ piˇ ve yoˬ. Yaꞈ hkʼaˇ, yawˇ hui Yaˬhoˉvaˬ ve daꞈ ve kehˬ ve awˬ ha hpu ga laˇ tcuh ve pa taw, yawˇ hui ve te hkʼaˇ dawˇ hkʼaˇ htaꞈ pa gʼa ve yoˬ. (1 Kawˇrenˍhtuˆ 6:9-11 gʼaw sheˍ.) Chi beuꞈ teˇ co˗e kaꞈ hkʼa shuˍ shuˍ, Liꞈ hpu lehˬ chaw laiˉ lanˬ gʼaˇ htaꞈ a shu yawˇ ve te hkʼaˇ dawˇ hkʼaˇ pa gʼa tuˬ ga piˇ ve yoˬ. * Haiˬ jaˇ ve htaꞈ te jaw ve chaw htawˇ pa gʼa ve yoˬ. Nawˬ kaꞈ nawˬ ve te hkʼaˇ dawˇ hkʼaˇ pa leh Baˆtiˆsaˬ haꞈ yuˬ gʼa ve tehꞈ yonˍ gʼa tuˬ yawˇ hui ve awˬ lawn ga laˇ gʼa ve yoˬ.

19. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

¹⁹ Baˆtiˆsaˬ haꞈ yuˬ gaˇ ve kʼo, “chaw awˬ piˍ ve awˬ liˇ awˬ hkʼaˇ teˇ hpaˍ htaꞈ” gʼa baˬ taˉ ve yoˬ. Yaꞈ hkʼaˇ, chi hkʼe ceh tiˉ maˇ lawꞈ. Yawˇ hui ‘te hkʼaˇ dawˇ hkʼaˇ awˬ suhˉ htaꞈ kaꞈ gʼa veuꞈ deh ve yoˬ.’ Gʼuˇ suhˍ teˇ lawn hkʼaw chi ve ngaˬ hui hkʼaˬ hkʼe te gʼa tuˬ leh awˬ nu ve chaw ngaˬ hui htaꞈ hkʼaˬ hkʼe ga laˇ gʼa tuˬ kaꞈ teˇ geh henˇ tuˬ yoˬ.