1-2. Aˬ htoꞈ ma te Pawˇluꞈ ve awˬ lawn chi beuꞈ teˇ co˗e nyi haꞈ shaˉ paˍ htaꞈ ga piˇ gʼa ve le?

 Tcuh yaˇ Pawˇluꞈ awˬ viˉ awˬ nyi htaꞈ haꞈ jaˇ. Yawˇ awˬ viˉ awˬ nyi htaꞈ nyi haꞈ shaˉ tuˬ, yawˇ kanˉ te hkeuꞈ ve yoˬ. (Tcuh yaˇ 20:31) Leh awˬ viˉ awˬ nyi kaꞈ Pawˇluꞈ htaꞈ haꞈ jaˇ ve yoˬ. Teˇ pawˆ htaˇ Eˇfeˇsuꞈ venˇ hkʼaw chehˇ ve nyi haꞈ shaˉ paˍ teˇ hpaˍ Pawˇluꞈ oˇ kaˬ lo tawˆ kʼai leh yawˇ htaꞈ maˇ gʼa mawˬ daꞈ˗o ve tehꞈ yawˇ hui shiˍ ve pa taw, “yawˇ hui hkʼa peu˗eˬ gʼaˇ hteꞈ hawˬ” ve yoˬ. (Tcuh yaˇ 20:37) Chi beuꞈ teˇ co˗e kaꞈ hkʼa shuˍ shuˍ, nyi haꞈ shaˉ paˍ awˬ viˉ awˬ nyi htaꞈ haꞈ jaˇ leh yawˇ hui htaꞈ ga piˇ tuˬ teˇ ceuˬ le le te ve yoˬ. (Hpiˇliˇpiˆ 2:16, 17) Laiˉ pawˆ kʼo, chi hkʼe te tuˬ maˇ sha ve htawˇ, yawˇ hui htaꞈ aˬ htoꞈ ma ga piˇ gʼa tuˬ le?

² Pawˇluꞈ ve awˬ lawn nyi haꞈ shaˉ paˍ hui htaꞈ ga piˇ gʼa jaˇ. (1 Kawˇrenˍhtuˆ 11:1) Pawˇluꞈ lehˬ cheuˬ jaˇ ve chaw hpehꞈ ve maˇ heˆ. Yawˇ cawˇ ve awˬ ceuˬ htaꞈ te tuˬ, maˇ biˇ ve awˬ ceuˬ htaꞈ gʼa tawˍ daꞈ ve yoˬ. (Roˉmaꞈ 7:18-20) Leh yawˇ shoꞈ shaꞈ ve laiˉ ceuˬ htaꞈ kaꞈ gʼa tawˍ daꞈ ve yoˬ. Yaꞈ hkʼaˇ, Pawˇluꞈ awˬ gʼaˇ maˇ nuˇ. Yawˇ Yaˬhoˉvaˬ ve kanˉ ha lehˬ ha kʼa ve hkʼaw kʼawꞈ te kʼai gʼa ve yoˬ. Chi ve hkʼa shuˍ nyi haꞈ shaˉ paˍ awˬ pon laiˉ ceuˬ haˍ ve tehꞈ dawˇ ve htawˇ, yawˇ Pawˇluꞈ ve awˬ lawn htaꞈ henˇ yuˬ ve yoˬ. Hkʼe te leh, yawˇ awˬ lawn chi ve teˇ hpaˍ htaꞈ tawˍ daꞈ gʼa leh yawˇ Yaˬhoˉvaˬ ve kanˉ ha lehˬ ha kʼa ve hkʼaw te kʼai gʼa ve yoˬ. Yawˇ chi ve teˇ hpaˍ htaꞈ hkʼaˬ hkʼe te gʼa ve teˇ geh henˇ tuˬ yoˬ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Awˬ lawn chi ve hkʼaw nyi haꞈ shaˉ paˍ tawˍ daꞈ gʼaˇ tuˬ haˍ ve 4 lawn htaꞈ teˇ geh henˇ tuˬ yoˬ. (1) Hto toˇ leh awˬ vuiˬ htaꞈ keunˍ lawꞈ cawˇ lawꞈ ve hkʼaw te sheˍ. (2) Awˬ viˉ awˬ nyi htaꞈ nyi haꞈ shaˉ leh a yeˇ yuˬ piˇ sheˍ. (3) A shu yawˇ ve awˬ gʼaˇ nuˇ kuiˬ htaꞈ tawˍ daꞈ sheˍ. (4) Ngaˬ hui shu maˇ biˇ ve htaꞈ tawˍ daꞈ sheˍ. Pawˇluꞈ awˬ lawn  chi htaꞈ hkʼaˬ hkʼe te tawˍ daꞈ ve le, leh nyi haꞈ shaˉ paˍ hkʼaˬ hkʼe te yawˇ htaꞈ henˇ yuˬ gʼa ve kaꞈ teˇ geh henˇ tuˬ yoˬ.

4. Aˬ htoꞈ ma te nyi haꞈ shaˉ paˍ awˬ pon hto toˇ ve htaꞈ sheh kʼai tuˬ haˍ ve tehꞈ dawˇ ve le?

⁴ Aˬ htoꞈ ma te haˍ ve le? Nyi haꞈ shaˉ paˍ hto toˇ ve htaꞈ ceh tiˉ sheh kʼai ve maˇ heˆ. Yaꞈ hkʼaˇ, yawˇ awˬ vuiˬ laiˉ ceuˬ htaꞈ te sheˍ ve yoˬ. Tawˇ pa haˉ te kʼo, nyi haꞈ shaˉ paˍ bon gʼa maˍ ve, mvuhˇ hpeuꞈ haˉ hpawnˬ daꞈ ve hkʼaw mui hkawˇ mui leh Hkriꞈ yaˇ awˬ moˍ Liꞈ hpu henˇ ve kaꞈ sheh kʼai ve yoˬ. Chi hkʼoˆ kaꞈ, nyi haꞈ shaˉ paˍ lehˬ ga piˇ shehˍ hpaˇ htaꞈ awˬ vuiˬ te tuˬ maˍ piˇ leh Hkriꞈ yaˇ awˬ moˍ hkʼaw awˬ viˉ awˬ nyi teˇ gʼaˇ le le htaꞈ awˬ gʼaˇ kaꞈ piˇ sheˍ ve yoˬ. (1 Peˍtruˆ 5:2) Chi hkʼe ceh tiˉ maˇ heˆ. Nyi haꞈ shaˉ paˍ laiˉ gʼaˇ hpawnˬ daꞈ kuiˬ yehˬ leh Gʼuiˬ sha ve kanˉ hkʼaˇ hpawˇ ve yehˬ kaꞈ te leh gʼa nyi haꞈ shaˉ ve yoˬ. Yaꞈ hkʼaˇ, ngaˬ hui teˇ gʼaˇ le le leh nyi haꞈ shaˉ paˍ awˬ pon a yeˇ uiˍ ve kanˉ lehˬ hto toˇ ve yoˬ.—Maꞈhtehˍ 28:19, 20.

5. Pawˇluꞈ lehˬ bon maˍ ve kanˉ te ve daꞈ ve henˇ yuˬ tuˬ hkʼaˬ hkʼe hpehꞈ ve le?

⁵ Henˇ tuˬ ve. Hpiˇliˇpiˆ liꞈ 1:10 hkʼaw Pawˇluꞈ beˆ maˍ laˇ ve, “hteˇ ve cawˇ ve” htaꞈ shiˍ tuˬ awˉ lawˉ dawˇ nyi cawˇ ve yoˬ. Beˆ maˍ laˇ ve chi htaꞈ Pawˇluꞈ yawˇ kaꞈ yuˬ yehˇ ve yoˬ. Yawˇ Gʼuiˬ sha ve kanˉ te tuˬ awˬ vuiˬ gʼa leh chi yawˇ ve a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve yoˬ. Yawˇ “chaw hkʼa peu˗eˬ mehˆ gʼuˇ suhˍ maˇ kʼoˆ, teˇ yehˬ peuˬ teˇ yehˬ awˬ hkʼaw lo maˇ kʼoˆ” bon maˍ toˇ ve yoˬ. (Tcuh yaˇ 20:20) Teˇ shinˉ ve hkʼaw 1 nyi ceh yawˇ bon maˍ ve maˇ heˆ. Maˇ heˆ leh 1 nyi ve hkʼaw teˇ hkui ceh maˍ ve kaꞈ maˇ heˆ. Yaꞈ hkʼaˇ, yawˇ awˬ yanˇ ca leh hkʼaˬ htaˆ kaꞈ bon maˍ toˇ ve yoˬ. Tawˇ pa haˉ te kʼo, Pawˇluꞈ Aˍhtenˍ venˇ lo awˬ chawˇ htaꞈ law chehˇ htaˇ yawˇ aˉ yaˇ cawˬ ve chaw te hpaˍ htaꞈ bon maˍ piˇ leh teˇ hpaˍ kʼo, yawˇ maˍ ve hkawˇ na leh Hkriꞈ yaˇ hpehꞈ la ve yoˬ. (Tcuh yaˇ 17:16, 17, 34) Pawˇluꞈ “htawnˍ hkʼaw” gʼa chehˇ ve htawˇ, yawˇ shu htaꞈ bon maˍ piˇ gʼa tuˬ awˬ hkʼaˇ ca ve yoˬ.—Hpiˇliˇpiˆ 1:13, 14; Tcuh yaˇ 28:16-24.

6. Pawˇluꞈ awˬ viˉ awˬ nyi htaꞈ hkʼaˬ hkʼe maˍ piˇ ve le?

⁶ Pawˇluꞈ lehˬ yawˇ awˬ yanˇ htaꞈ awˬ hpfuhˇ hkʼa hkʼawꞈ yehˇ ve yoˬ. Yawˇ Gʼuiˬ sha ve kanˉ te tuˬ awˬ nu ve chaw htaꞈ kaꞈ jehˬ piˇ ve yoˬ. Tawˇ pa haˉ te kʼo, Pawˇluꞈ shu mvuhˇ miˬ lo Miˍshenˍnaˍliˍ awˉ lawˉ teˇ pawˆ te htaˇ, awˬ meh awˬ suhˉ Maˍkuˆ tehꞈ kʼoˆ ve Yoˇhanˬ meh ve teˇ gʼaˇ htaꞈ kaꞈ shiˍ kʼai ve yoˬ. Yawˇ Miˍshenˍnaˍliˍ te ve 2 pawˆ teˇ pawˆ htaˇ, Tiˆmoˉseˍ htaꞈ kaꞈ shiˍ kʼai ve yoˬ. (Tcuh yaˇ 12:25; 16:1-4) Yawˇ hui teˇ geh kʼai htaˇ, Hkriꞈ yaˇ awˬ moˍ hkʼaw hkʼaˬ hkʼe te gu tuˬ, awˬ viˉ awˬ nyi htaꞈ nyi haꞈ shaˉ leh awˬ gʼaˇ hkʼaˬ hkʼe te piˇ tuˬ, leh hkʼaˬ hkʼe te maˍ cheuˬ ve chaw hpehꞈ tuˬ kaꞈ maˍ piˇ ve yoˬ.—1 Kawˇrenˍhtuˆ 4:17.

7. Eˇfeˇsuꞈ liꞈ 6:14, 15 hkʼaw Pawˇluꞈ kʼoˆ taˍ ve hkʼe, nyi haꞈ shaˉ paˍ hkʼaˬ hkʼe gʼaꞈ te gʼa tuˬ le?

⁷ Henˇ tuˬ ve. Nyi haꞈ shaˉ paˍ Pawˇluꞈ ve awˬ lawn htaꞈ henˇ yuˬ gʼa ve lehˬ, teˇ yehˬ peuˬ teˇ yehˬ hto toˇ ve ceh tiˉ maˇ heˆ. Yawˇ hui hkʼaˬ htaˆ kaꞈ hto toˇ  gʼa ve yoˬ. (Eˇfeˇsuꞈ 6:14, 15 gʼaw sheˍ.) Tawˇ pa haˉ te kʼo, yawˇ mawˇ vuiˬ˗e htaˇ, kanˉ te chehˇ htaˇ, hpawnˬ daꞈ kuiˬ yehˬ te ve htaꞈ ga piˇ tuˬ kʼai chehˇ htaˇ, maˇ heˆ leh oˇ kaˬ lo chehˇ ve chaw leh mawˇ ca yuˬ kʼoˍ la ve chaw htaꞈ kaꞈ to maˍ piˇ gʼa ve yoˬ. Chi hkʼoˆ kaꞈ, nyi haꞈ shaˉ paˍ teˇ geh hto toˇ˗e ve awˬ viˉ awˬ nyi leh ga piˇ shehˍ hpaˇ htaꞈ kaꞈ maˍ piˇ gʼa ve yoˬ.

8. Teˇ pawˆ pawˆ kʼo, nyi haꞈ shaˉ paˍ aˬ htoꞈ ma gʼa te cawˇ ve le?

⁸ Nyi haꞈ shaˉ paˍ lehˬ Hkriꞈ yaˇ awˬ moˍ hkʼaw ve kanˉ tiˉ te leh hto toˇ ve awˬ yanˇ maˇ cawˬ ve maˇ gʼa te. Yawˇ keunˍ lawꞈ cawˇ lawꞈ ve chaw hpehꞈ tuˬ awˬ vuiˬ teˇ hpaˍ hpaˍ htaꞈ maˇ te. Yawˇ dawˇ nyi leh Yaˬhoˉvaˬ geh bon lawˬ peuˬ hkʼawꞈ nawˉ, yawˇ awˬ vuiˬ maˇ maˇ te tuˬ haꞈ yuˬ ve kʼo, yawˇ a yeˇ uiˍ ve awˬ ceuˬ htaꞈ te tuˬ awˬ yanˇ maˇ cawˬ la ve tehꞈ shiˍ ve yoˬ. Tawˇ pa haˉ te kʼo, yawˇ teˇ shinˉ le le yehˬ kʼa hkʼaw oˉ kʼoˍ pui tuˬ, hkʼa dehꞈ hto toˇ tuˬ, leh yaˇ hto toˇ ve awˬ hkʼaˇ maˍ piˇ tuˬ, awˬ yanˇ kaꞈ maˇ cawˬ la ve yoˬ. Hkʼe te leh, nyi haꞈ shaˉ paˍ hui lehˬ awˬ vuiˬ teˇ hpaˍ htaꞈ maˇ te tuˬ haˍ ve tehꞈ dawˇ ve yoˬ. Yawˇ chi hkʼe te ve kʼo, keunˍ lawꞈ cawˇ lawꞈ ve chaw hpehꞈ gaˇ ve pa taw, Yaˬhoˉvaˬ na gʼa ve tehꞈ yawˇ yonˍ gʼa ve yoˬ.

9. Nyi haꞈ shaˉ paˍ awˬ pon haˍ ve aˬ htoꞈ ma ve awˬ lawn le?

⁹ Aˬ htoꞈ ma te haˍ ve le? Chi beuꞈ teˇ co˗e Yaˬhoˉvaˬ ve kanˉ te ve chaw shoꞈ shaꞈ ve laiˉ ceuˬ gʼa hpuˇ ve yoˬ. Awˬ leh meuˇ ve awˬ yanˇ hkʼaw ngaˬ hui teˇ gʼaˇ le le awˬ gʼaˇ peꞈ laˇ tuˬ leh ga laˇ tuˬ loˍ ve yoˬ. Awˬ viˉ awˬ nyi teˇ hpaˍ yawˇ maˇ gʼa te yaꞈ tuˬ, teˇ pawˆ pawˆ kʼo shaˍ tiꞈ gʼa piˇ chehˇ ve yoˬ. (1 Hteˇsaˍlawˇniˆ 5:14) Nyi haꞈ shaˉ paˍ awˬ viˉ awˬ nyi htaꞈ teˇ ceuˬ le le ga piˇ maˇ gʼa ve htawˇ, yawˇ hui Gʼuiˬ sha ve yawˬ hkʼe hpehꞈ ve pa taw awˬ gʼaˇ piˇ leh nyi haꞈ shaˉ piˇ tuˬ, Yaˬhoˉvaˬ nyi haꞈ shaˉ paˍ htaꞈ te gʼa ve hkʼe te tcuh gaˇ ve yoˬ. Yaꞈ hkʼaˇ, nyi haꞈ shaˉ paˍ kanˉ maˇ jaˇ. Hkʼe kʼo, yawˇ awˬ yanˇ ca leh awˬ viˉ awˬ nyi htaꞈ hkʼaˬ hkʼe ga piˇ gʼa tuˬ le?

10. 1 Hteˇsaˍlawˇniˆ liꞈ 2:7 hkʼaw kʼoˆ taˍ ve hkʼe, Pawˇluꞈ awˬ viˉ awˬ nyi htaꞈ nyi haꞈ shaˉ leh hkʼaˬ hkʼe te a yeˇ yuˬ piˇ ve le?

¹⁰ Pawˇluꞈ ve awˬ lawn. Pawˇluꞈ awˬ viˉ awˬ nyi htaꞈ chiˇ mvuh leh awˬ gʼaˇ piˇ tuˬ hkʼaˬ htaˆ kaꞈ awˬ yanˇ ca ve yoˬ. Nyi haꞈ shaˉ paˍ kaꞈ Pawˇluꞈ htaꞈ henˇ yuˬ gʼa ve lehˬ, awˬ viˉ awˬ nyi htaꞈ hkʼaˬ htaˆ kaꞈ haꞈ leh nyi ma nuˇ nehˬ ve hkʼaw te piˇ gʼa ve yoˬ. (1 Hteˇsaˍlawˇniˆ 2:7 gʼaw sheˍ.) Pawˇluꞈ awˬ viˉ awˬ nyi htaꞈ hkʼaˬ hkʼe taw haꞈ ve leh Yaˬhoˉvaˬ yawˇ hui htaꞈ haꞈ ve tehꞈ kʼoˆ piˇ ve yoˬ. (2 Kawˇrenˍhtuˆ 2:4; Eˇfeˇsuꞈ 2:4, 5) Pawˇluꞈ awˬ pon kʼo, Hkriꞈ yaˇ awˬ moˍ hkʼaw ve awˬ viˉ awˬ nyi lehˬ, awˬ chawˇ hkʼe hpehꞈ leh kanˉ teˇ geh te gaˇ ve yoˬ. Pawˇluꞈ awˬ viˉ awˬ nyi htaꞈ yonˍ gʼa lehˬ, yawˇ dawˇ haˍ ve leh gʼaˇ nuˇ kuiˬ aˬ htoꞈ ma cawˬ ve yawˇ hui shiˍ tuˬ kʼoˆ maˍ piˇ ve yoˬ. (2 Kawˇrenˍhtuˆ 7:5; 1 Tiˆmoˉseˍ 1:15) Yaꞈ hkʼaˇ, Pawˇluꞈ kaꞈ yawˇ ve awˬ lawn htaꞈ ceh tiˉ maˇ dawˇ nyi. Yawˇ awˬ viˉ awˬ nyi htaꞈ a yeˇ yuˬ piˇ leh ga piˇ gaˇ jaˇ.

11. Aˬ htoꞈ ma te Pawˇluꞈ awˬ viˉ awˬ nyi htaꞈ beˆ maˍ piˇ ve le?

¹¹ Teˇ pawˆ pawˆ kʼo, Pawˇluꞈ kaꞈ awˬ viˉ awˬ nyi htaꞈ gʼa beˆ maˍ piˇ ve yoˬ. Yaꞈ hkʼaˇ, yawˇ nyi ma zuhˆ ve hkʼaw beˆ maˍ piˇ ve maˇ heˆ. Yawˇ awˬ viˉ awˬ  nyi htaꞈ dawˇ haˍ leh kawˆ ve maˇ gʼa heuˆ la tuˬ haꞈ shaˉ piˇ gaˇ ve yoˬ. Pawˇluꞈ awˬ viˉ awˬ nyi htaꞈ hkʼa sha sha˗ehˬ ve hkʼaw beˆ maˍ piˇ leh gʼaꞈ te gaˇ tuˬ kaꞈ te piˇ ve yoˬ. Tawˇ pa haˉ te kʼo, Kawˇrenˍhtuˆ venˇ hkʼaw chehˇ ve Hkriꞈ yaˇ htaꞈ Pawˇluꞈ liꞈ bvuhꞈ piˇ htaˇ, yawˇ awˬ viˉ awˬ nyi htaꞈ hteˇ˗ehˬ beˆ maˍ piˇ ve yoˬ. Yawˇ awˬ viˉ awˬ nyi htaꞈ liꞈ bvuhꞈ piˇ˗a ve hkʼe gʼaꞈ te˗aw laˇ tehꞈ shiˍ gaˇ ve pa taw, yawˇ Tiˇtuˆ htaꞈ kʼai tcuh ve yoˬ. Awˬ viˉ awˬ nyi yawˇ beˆ maˍ piˇ ve htaꞈ gʼaꞈ te ve tehꞈ yawˇ shiˍ ve pa taw, ha lehˬ jaˇ!—2 Kawˇrenˍhtuˆ 7:6, 7.

12. Nyi haꞈ shaˉ paˍ lehˬ awˬ viˉ awˬ nyi htaꞈ awˬ gʼaˇ piˇ leh hkʼaˬ hkʼe ga piˇ ve le?

¹² Henˇ tuˬ ve. Nyi haꞈ shaˉ paˍ Pawˇluꞈ htaꞈ henˇ yuˬ ve lehˬ awˬ viˉ awˬ nyi htaꞈ awˬ chawˇ te ve yoˬ. Yawˇ chi hkʼe te ve lehˬ, hpawnˬ daꞈ ve hkʼaw haˆ haˆ laˬ ve kʼo, awˬ viˉ awˬ nyi geh tawˇ yaw daꞈ tuˬ awˬ yanˇ cawˬ maˇ ve yoˬ. Awˬ viˉ awˬ nyi awˬ gʼaˇ gʼa tuˬ tawˇ yaw piˇ ve lehˬ, awˬ yanˇ yehˇ maˇ ve tehꞈ maˇ dawˇ nyi cawˇ. Laiˉ pawˆ kʼo, awˬ viˉ awˬ nyi geh tawˇ chi suhˉ˗ehˍ yaw piˇ ve htawˇ, awˬ viˉ awˬ nyi awˬ gʼaˇ gʼa jaˇ. (Roˉmaꞈ 1:12; Eˇfeˇsuꞈ 5:16) Nyi haꞈ shaˉ paˍ Pawˇluꞈ htaꞈ heuˆ yuˬ ve lehˬ, awˬ viˉ awˬ nyi htaꞈ awˬ gʼaˇ piˇ tuˬ, Liꞈ hpu laiˉ tawn htaꞈ hpeuꞈ maˍ piˇ leh Yaˬhoˉvaˬ yawˇ hui htaꞈ haꞈ ve tehꞈ yonˍ gʼa tuˬ te piˇ ve yoˬ. Chi hkʼoˆ kaꞈ, nyi haꞈ shaˉ paˍ lehˬ awˬ viˉ awˬ nyi htaꞈ haꞈ ve tehꞈ gʼa shiˍ tcuh ve yoˬ. Nyi haꞈ shaˉ paˍ awˬ viˉ awˬ nyi geh tawˇ yaw daꞈ leh chiˇ mvuh piˇ tuˬ awˬ yanˇ gʼa ca ve yoˬ. Nyi haꞈ shaˉ paˍ awˬ viˉ awˬ nyi htaꞈ gʼa beˆ maˍ piˇ cawˇ ve kʼo, Liꞈ hpu htaꞈ gʼa cuˇ ve yoˬ. Awˬ viˉ awˬ nyi htaꞈ gʼaꞈ te tcuh gaˇ ve pa taw yawˇ hteˇ˗ehˬ kʼoˆ piˇ ve htawˇ, nyi ma nuˇ nehˬ ve hkʼaw gʼa te ve yoˬ.—Gaˍlaˍtiˆ 6:1.

13. Nyi haꞈ shaˉ paˍ ve awˬ gʼaˇ nuˇ kuiˬ yawˇ hkʼaˬ hkʼe dawˇ tuˬ te piˇ ve le?

¹³ Aˬ htoꞈ ma te haˍ ve le? Ngaˬ hui teˇ gʼaˇ le le leh nyi haꞈ shaˉ paˍ kaꞈ maˇ biˇ ve chaw hpehꞈ ve yoˬ. Hkʼe te leh, yawˇ kaꞈ te yaꞈ puiˉ ve yoˬ. (Roˉmaꞈ 3:23) Yaꞈ hkʼaˇ, nyi haꞈ shaˉ paˍ kaꞈ teˇ pawˆ pawˆ kʼo, yawˇ hui ve dawˇ hkʼaˇ keunˍ lawꞈ cawˇ lawꞈ ve hkʼaw maˇ dawˇ. Tawˇ pa haˉ te kʼo, nyi haꞈ shaˉ paˍ teˇ hpaˍ yawˇ ve gʼaˇ nuˇ kuiˬ htaꞈ dawˇ nyi jaˇ ve pa taw, awˬ gʼaˇ nuˇ la puiˉ ve yoˬ. Nyi haꞈ shaˉ paˍ teˇ hpaˍ kʼo, yawˇ yaꞈ kuiˬ maˇ cawˬ tehꞈ dawˇ leh yawˇ ve te hkʼaˇ dawˇ hkʼaˇ pa tuˬ a yeˇ maˇ uiˍ tehꞈ dawˇ ve yoˬ.

14. Hpiˇliˇpiˆ liꞈ 4:13 hkʼaw kʼoˆ taˍ ve hkʼe, nyi ma nuˇ nehˬ ve Pawˇluꞈ gʼaˇ nuˇ kuiˬ htaꞈ gu tuˬ hkʼaˬ hkʼe ga piˇ ve le?

¹⁴ Pawˇluꞈ ve awˬ lawn. Pawˇluꞈ nyi ma nuˇ nehˬ leh yawˇ ve dawˇ hkʼaˇ htaꞈ yawˇ hkʼaˇ yawˇ gu maˇ gʼa tehꞈ shiˍ ve pa taw, yawˇ Yaˬhoˉvaˬ htaꞈ gʼaˇ va ve yoˬ. Pawˇluꞈ nyi ma uiˍ ve chaw hpehꞈ leh Hkriꞈ yaˇ htaꞈ fawˉ mehˍ jaw ve yoˬ. Yaꞈ hkʼaˇ, yawˇ te ve awˬ ceuˬ yaꞈ ve tehꞈ shiˍ la htaˇ, yawˇ ve te hkʼaˇ dawˇ hkʼaˇ htaꞈ pa ve yoˬ. (1 Tiˆmoˉseˍ 1:12-16) Pawˇluꞈ Yaˬhoˉvaˬ htaꞈ gʼaˇ va ve yoˬ. Hkʼe te leh, yawˇ awˬ viˉ awˬ nyi htaꞈ haꞈ ve, ha kʼaˉ puiˉ ve, nyi ma nuˇ nehˬ ve nyi haꞈ shaˉ paˍ hpehꞈ la ve yoˬ. Pawˇluꞈ yawˇ maˇ biˇ ve chaw hpehꞈ ve tehꞈ shiˍ  ve htawˇ, yawˇ te yaꞈ ve awˬ ceuˬ htaꞈ ceh tiˉ maˇ dawˇ nyi. Yaˬhoˉvaˬ yawˇ htaꞈ venˇ baˆ hpehˇ laˇ gʼa ve tehꞈ yawˇ yonˍ gʼa ve yoˬ. (Roˉmaꞈ 7:21-25) Pawˇluꞈ yawˇ awˬ to biˇ ve chaw gʼa hpehꞈ ve tehꞈ yawˇ maˇ dawˇ law ve htawˇ, yawˇ Hkriꞈ yaˇ ve te hkʼaˇ dawˇ hkʼaˇ cawˬ tuˬ gʼa coˇ caˇ leh, yawˇ awˬ vuiˬ htaꞈ hkʼa dehꞈ te gʼa tuˬ, nyi ma nuˇ nehˬ ve hkʼaw Yaˬhoˉvaˬ htaꞈ gʼaˇ gʼa ve yoˬ.—1 Kawˇrenˍhtuˆ 9:27; Hpiˇliˇpiˆ 4:13 gʼaw sheˍ.

15. Nyi haꞈ shaˉ paˍ lehˬ a shu yawˇ ve gʼaˇ nuˇ kuiˬ htaꞈ hkʼaˬ hkʼe nyi cawˇ ve le?

¹⁵ Henˇ tuˬ ve. Yawˇ biˇ ve chaw hpehꞈ ve pa taw, nyi haꞈ shaˉ paˍ te tuˬ leuˆ yuˬ piˇ taˍ ve maˇ heˆ. Nyi haꞈ shaˉ paˍ gʼaˇ nuˇ kuiˬ cawˬ ve tehꞈ Yaˬhoˉvaˬ shiˍ ve yoˬ. Yaˬhoˉvaˬ lehˬ yawˇ yaꞈ kuiˬ cawˬ ve tehꞈ yawˇ haꞈ yuˬ tcuh gaˇ leh Hkriꞈ yaˇ ve teˇ hkʼaˇ dawˇ hkʼaˇ cawˬ tcuh gaˇ ve yoˬ. (Eˇfeˇsuꞈ 4:23, 24) Yawˇ te hkʼaˇ dawˇ hkʼaˇ aˬ htoꞈ ma pa cawˇ ve htaꞈ shiˍ tuˬ, leh pa gʼa tuˬ a shu yawˇ hkʼaˇ yawˇ Liꞈ hpu gʼa henˇ ve yoˬ. Yawˇ chi hkʼe te ve kʼo, yawˇ daꞈ ve nyi haꞈ shaˉ paˍ hpehꞈ leh ha lehˬ ve cawˬ tuˬ Yaˬhoˉvaˬ ga piˇ tuˬ yoˬ.—Yaˍkoˆ 1:25.

16. Nyi haꞈ shaˉ paˍ awˬ viˉ awˬ nyi ve yaꞈ kuiˬ htaꞈ ceh tiˉ nyi ve kʼo, hkʼaˬ hkʼe hpehꞈ la tuˬ le?

¹⁶ Aˬ htoꞈ ma te haˍ ve le? Nyi haꞈ shaˉ paˍ lehˬ awˬ viˉ awˬ nyi htaꞈ awˬ chawˇ hkʼa dehꞈ te ve kʼo, yawˇ hui ve yaꞈ kuiˬ leh gʼaˇ nuˇ kuiˬ htaꞈ mawˬ gʼa ve yoˬ. Nyi haꞈ shaˉ paˍ shaˍ tiꞈ maˇ te ve kʼo, yawˇ nyi zuhˆ puiˉ ve, awˬ viˉ awˬ nyi htaꞈ maˇ ha kʼaˉ puiˉ ve, leh awˬ viˉ awˬ nyi htaꞈ ca kʼoˆ puiˉ ve yoˬ. Saˍtanˍ ngaˬ hui htaꞈ chi hkʼe hpehꞈ tcuh gaˇ ve tehꞈ Pawˇluꞈ shaˍ tiꞈ peꞈ laˇ ve yoˬ.—2 Kawˇrenˍhtuˆ 2:10, 11.

17. Pawˇluꞈ awˬ viˉ awˬ nyi htaꞈ hkʼaˬ hkʼe nyi ve le?

¹⁷ Pawˇluꞈ ve awˬ lawn. Pawˇluꞈ awˬ viˉ awˬ nyi htaꞈ hkʼaˬ htaˆ kaꞈ daꞈ ve hpawˇ nyi ve yoˬ. Laiˉ pawˆ kʼo, awˬ viˉ awˬ nyi Pawˇluꞈ nyi ma naˬ tuˬ te piˇ ve pa taw, awˬ viˉ awˬ nyi yaꞈ kuiˬ cawˬ ve tehꞈ Pawˇluꞈ shiˍ ve yoˬ. Maˇ daꞈ ve awˬ ceuˬ htaꞈ te leh maˇ daꞈ ve chaw hpehꞈ ve shuˍ daꞈ ve tehꞈ Pawˇluꞈ shiˍ ve yoˬ. Pawˇluꞈ awˬ viˉ awˬ nyi htaꞈ haꞈ leh daꞈ ve hpawˇ hkʼaˬ htaˆ kaꞈ nyi ve yoˬ. Awˬ viˉ awˬ nyi hkʼaˬ ve teˇ gʼaˇ te yaꞈ ve kʼo, yawˇ cawˇ ve htaꞈ te gaˇ ve tehꞈ Pawˇluꞈ shiˍ ve yoˬ. Yaꞈ hkʼaˇ, yawˇ te gʼa tuˬ chaw teˇ gʼaˇ gʼaˇ gʼa ga piˇ ve yoˬ.

18. Pawˇluꞈ lehˬ Eˇvawˇdiˆ leh Suˇtuˆ htaꞈ hkʼaˬ hkʼe ga piˇ ve le? Leh awˬ lawn chi nawˬ htaꞈ hkʼaˬ hkʼe maˍ laˇ ve le? (Hpiˇliˇpiˆ 4:1-3)

¹⁸ Hpiˇliˇpiˆ Hkriꞈ yaˇ awˬ moˍ hkʼaw ve Eˇvawˇdiˆ leh Suˇtuˆ htaꞈ Pawˇluꞈ hkʼaˬ hkʼe ga piˇ ve teˇ geh nyi sheˍ. (Hpiˇliˇpiˆ 4:1-3 gʼaw sheˍ.) Awˬ viˉ awˬ nyi yaˇ miˇ chi 2 gʼaˇ awˬ lawn cawˬ daꞈ ve yoˬ. Yaꞈ hkʼaˇ, Pawˇluꞈ yawˇ hui htaꞈ maˇ deˇ piˇ leh maˇ daꞈ ve chaw hpehꞈ ve tehꞈ maˇ dawˇ cheˆ piˇ. Yawˇ hui ka tiꞈ yeˬ ve hkʼaw Yaˬhoˉvaˬ ve kanˉ laiˉ hkʼawꞈ te ve pa taw, yawˇ hui htaꞈ daꞈ ve hpawˇ Pawˇluꞈ nyi ve yoˬ. Yaˬhoˉvaˬ yawˇ huiˉ maˬ htaꞈ haꞈ jaˇ ve tehꞈ Pawˇluꞈ shiˍ ve yoˬ. Hkʼe te leh, yawˇ huiˉ maˬ cawˇ daꞈ tuˬ Pawˇluꞈ ga piˇ ve yoˬ. Yawˇ huiˉ maˬ htaꞈ daꞈ ve hpawˇ Pawˇluꞈ nyi ve pa taw, yawˇ ha lehˬ jaˇ leh Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ meuˆ daꞈ ve yoˬ.

19. (a) Nyi haꞈ shaˉ paˍ awˬ viˉ awˬ nyi htaꞈ daꞈ ve hpawˇ hkʼaˬ hkʼe nyi gʼa ve le? (b) Hpawnˬ daꞈ kuiˬ yehˬ hkʼaw nyi haꞈ shaˉ paˍ daꞈ kehˬ tuˬ te chehˇ ve awˬ han nawˬ htaꞈ aˬ htoꞈ ma maˍ laˇ ve le?

 ¹⁹ Henˇ tuˬ ve. Nyi haꞈ shaˉ paˍ awˬ viˉ awˬ nyi htaꞈ daꞈ ve hpawˇ nyi cawˇ ve yoˬ. Awˬ viˉ awˬ nyi maˇ biˇ ve chaw hpehꞈ ve htawˇ, yawˇ hui htaꞈ daꞈ ve hpawˇ chiˇ mvuh piˇ gʼa ve yoˬ. (Hpiˇliˇpiˆ 2:3) Teˇ pawˆ pawˆ kʼo, nyi haꞈ shaˉ paˍ lehˬ awˬ viˉ awˬ nyi htaꞈ gʼa beˆ maˍ piˇ cawˇ ve yoˬ. Yaꞈ hkʼaˇ, yawˇ Pawˇluꞈ htaꞈ henˇ yuˬ ve lehˬ, teˇ pawˆ pawˆ kʼo, awˬ viˉ awˬ nyi kʼoˆ ve leh te ve teˇ ceuˬ ceuˬ yawˇ maˇ dawˇ cawˇ ve kʼo, awˬ viˉ awˬ nyi yaꞈ kuiˬ htaꞈ maˇ nyi cawˇ ve yoˬ. Nyi haꞈ shaˉ paˍ lehˬ awˬ viˉ awˬ nyi Yaˬhoˉvaˬ htaꞈ hkʼaˬ hkʼe taw haꞈ ve, hkʼaˬ hkʼe taw gʼa yeunˇ hkanˍ ve, a yeˇ yuˬ piˇ cawˇ ve yoˬ. Leh yawˇ hui daꞈ ve awˬ ceuˬ htaꞈ te gaˇ ve yoˬ. Nyi haꞈ shaˉ paˍ awˬ viˉ awˬ nyi htaꞈ daꞈ ve hpawˇ nyi ve kʼo, Hkriꞈ yaˇ awˬ moˍ hkʼaw kaꞈ dawˇ sha gawˬ lehˍ cawˬ leh ha lehˬ ve yoˬ.

20. Nyi haꞈ shaˉ paˍ lehˬ Pawˇluꞈ ve awˬ lawn htaꞈ awˬ bon hkʼaˬ hkʼe gʼa tuˬ le?

²⁰ Nyi haꞈ shaˉ paˍ lehˬ Pawˇluꞈ ve awˬ lawn htaꞈ hkʼa dehꞈ henˇ yuˬ ve kʼo, awˬ bon gʼa jaˇ tuˬ yoˬ. Tawˇ pa haˉ te kʼo, Shaw nyi kuiˬ Taꞈ yehˬ Ha pa 4 maˬ 2018 hkʼawꞈ liꞈ mehˆ hpfuhˇ 22-23 awˬ tawn 7-9 leh Ha pa 2 maˬ 2020 hkʼawꞈ liꞈ mehˆ hpfuhˇ 23-24 awˬ tawn 13-15 hkʼaw nyi sheˍ. Liꞈ kʼoˆ chi teˇ hpaˍ htaꞈ gʼaw nyi htaˇ, nawˬ awˬ to htaꞈ na nyi cawˇ ve, “nyi haꞈ shaˉ paˍ te ve awˬ vuiˬ htaꞈ hkʼaˬ htaˆ kaꞈ ha lehˬ gʼa tuˬ Pawˇluꞈ ve awˬ lawn ngaˬ htaꞈ hkʼaˬ hkʼe ga laˇ ve le?”

21. Nyi haꞈ shaˉ paˍ aˬ htoꞈ ma ve awˬ lawn htaꞈ yonˍ gʼa ve le?

²¹ Nyi haꞈ shaˉ paˍ biˇ ve chaw hpehꞈ ve tehꞈ Yaˬhoˉvaˬ maˇ dawˇ law ve htaꞈ gʼa tawnˇ taˍ cawˇ ve yoˬ. Yaꞈ hkʼaˇ, Yaˬhoˉvaˬ lehˬ nawˬ awˬ vuiˬ te ve htaꞈ ka tiꞈ yeˬ tcuh gaˇ ve yoˬ. (1 Kawˇrenˍhtuˆ 4:2) Pawˇluꞈ ka tiꞈ yeˬ ve hkʼaw kanˉ te ve htaꞈ Yaˬhoˉvaˬ awˬ hpfuhˇ shiˍ ve yoˬ. Nawˬ kanˉ te hkeuꞈ ve htaꞈ Yaˬhoˉvaˬ awˬ hpfuhˇ ve tehꞈ nawˬ kaꞈ yonˍ gʼa ve yoˬ. “Ponˬ laˬ htaˇ nawˬ hui te taˍ ve kanˉ leh, Hkriꞈ yaˇ hui htaꞈ ga piˇ taˍ peuˬ ve awˬ hkʼoˆ, chi beuꞈ kaꞈ nawˬ hui chi hkʼe te chehˇ ve awˬ hkʼaw lo, haꞈ pehnˇ ve chi Gʼuiˬ sha awˬ pon nawˬ hui hpeuꞈ maˍ piˇ ve htaꞈ [Yaˬhoˉvaˬ] yawˇ leunˇ tuˬ ve maˇ heˆ.”—Heˍbrehˇ 6:10.