Chaw teˇ hpaˍ gʼaw leh hkʼa dehꞈ maˇ dawˇ nyi ve kʼo chi ve htaꞈ htawˇ dawˇ nawˇ dawˇ cawˬ ve yoˬ. Awˬ tehˬ kʼo, Liꞈ hpu awˬ tawn chi ve teˇ hpaˍ hkʼaw Meˍfiˆboˍshehˆ meh ve 2 gʼaˇ cawˬ ve yoˬ. Chi ve htaꞈ ngaˬ hui hkʼaˬ hkʼe henˇ yuˬ gʼa tuˬ teˇ geh nyi sheˍ.

Jawˇ mawˇ Sawˉluꞈ lehˬ yaˇ paˍ 7 gʼaˇ leh yaˇ miˇ 2 gʼaˇ cawˬ ve yoˬ. Yawˇ ve yaˇ paˍ uiˍ lehˬ Yawˇnaˆtanˍ meh leh yawˇ ve yaˇ paˍ 2 gʼaˇ teˇ gʼaˇ Meˍfiˆboˍshehˆ lehˬ yawˇ ve awˬ miˇ ma i Riˆsaˍpaˍ geh paw taˍ ve yoˬ. Yawˇnaˆtanˍ kaꞈ yawˇ ve yaˇ paˍ Meˍfiˆboˍshehˆ meh ve cawˬ ve yoˬ. Jawˇ mawˇ Sawˉluꞈ lehˬ yawˇ ve yaˇ paˍ Meˍfiˆboˍshehˆ meh ve cawˬ leh awˬ hawehˍ paˍ kaꞈ Meˍfiˆboˍshehˆ meh ve cawˬ ve yoˬ.

Teˇ nyi htaˇ Sawˉluꞈ lehˬ Iˉsaˍreˍlaˆ mvuhˇ miˬ hkʼaw chehˇ ve Giˇbonˍ chaw hkʼa peu˗eˬ htaꞈ tiˇ pehˍ tuˬ awˬ hkʼaˇ ca ve yoˬ. Nyi˗a kʼo, laiˉ gʼaˇ htaꞈ tiˇ pehˍ piˇ˗oˬ ve yoˬ hehˉ. Chi hkʼe te ve lehˬ maˇ cawˇ. Awˬ lawn kʼo, Yawˇsuˆ ve awˬ co˗e htaˇ, Iˉsaˍreˍlaˆ chaw awˬ hoˉ awˬ naˬ Giˇbonˍ chaw htaꞈ maˇ tiˇ pehˍ kʼoˆ leh ka tiꞈ te taˍ ve yoˬ.—Yawˇsuˆ 9:3-27.

Sawˉluꞈ ve awˬ co˗e htaˇ kaꞈ awˬ liˇ chi yehˇ chehˇ sheˍ ve yoˬ. Yaꞈ hkʼaˇ, Sawˉluꞈ lehˬ Giˇbonˍ chaw hkʼa peu˗eˬ htaꞈ tiˇ pehˍ tuˬ awˬ hkʼaˇ ca chehˇ ve yoˬ. Hkʼe te leh, “Sawˉluꞈ leh yawˇ ve yehˬ yaˇ kʼa yaˇ teˇ hpaˍ shu htaꞈ tiˇ pehˍ ve pa taw venˇ baˆ uiˍ jaˇ ve yoˬ.” (2 Saˍmo˗eˍlaˆ 21:1) Daˍviˆ jawˇ mawˇ gʼa te˗oˬ htaˇ, a shaꞈ gʼa ponˬ ve Giˇbonˍ chaw Sawˉluꞈ te yaꞈ jaˇ ve awˬ lawn Daˍviˆ htaꞈ kʼoˆ maˍ piˇ ve yoˬ. Yaˬhoˉvaˬ Iˉsaˍreˍlaˆ mvuhˇ miˬ htaꞈ awˬ bon naꞈ piˇ tuˬ Sawˉluꞈ te yaꞈ taˍ ve awˬ ceuˬ htaꞈ hkʼaˬ hkʼe pon piˇ gʼa tuˬ, Daˍviˆ Giˇbonˍ chaw na piˇ ve yoˬ. Giˇbonˍ chaw hpu htaꞈ maˇ loˍ. Yaꞈ hkʼaˇ, Giˇbonˍ chaw htaꞈ “maˇ teꞈ chehˇ piˇ law gaˇ ve” Sawˉluꞈ ve awˬ hawehˍ awˬ haˆ 7 gʼaˇ htaꞈ yawˇ hui geh peu laˇ tuˬ lawˬ ve yoˬ. (Heh puiˉ hkʼaw 35:30, 31) Daˍviˆ lehˬ Giˇbonˍ chaw lawˬ ve hkʼe gʼaꞈ te ve yoˬ.—2 Saˍmo˗eˍlaˆ 21:2-6.

Oˇ ve teˇ yanˇ Sawˉluꞈ leh Yawˇnaˆtanˍ suh˗oˬ. Yaꞈ hkʼaˇ, Yawˇnaˆtanˍ ve yaˇ paˍ Meˍfiˆboˍshehˆ maˇ suh sheˍ. Meˍfiˆboˍshehˆ lehˬ yaˇ ehˉ htaˇ kaꞈ maˇ dawˇ maˇ gaˇ ve awˬ ceuˬ gʼa hpuˇ ve pa taw, hkui kʼawꞈ paˍ hpehꞈ ve yoˬ. Leh Giˇbonˍ chaw htaꞈ tiˇ pehˍ tuˬ awˬ hkʼaˇ ca ve yawˇ ve awˬ puˍ Sawˉluꞈ te ve awˬ ceuˬ htaꞈ yawˇ maˇ caˉ daꞈ. Chi hkʼoˆ kaꞈ, Daˍviˆ lehˬ Yawˇnaˆtanˍ leh yawˇ ve awˬ hawehˍ awˬ haˆ hkʼaˬ htaˆ kaꞈ haꞈ tuˬ ka tiꞈ te piˇ ve yoˬ. Chi lehˬ Meˍfiˆboˍshehˆ htaꞈ kaꞈ kʼoˆ gaˇ ve yoˬ. (1 Saˍmo˗eˍlaˆ 18:1; 20:42) Liꞈ hpu hkʼaw kʼoˆ ve, “Daˍviˆ lehˬ Yawˇnaˆtanˍ htaꞈ ka tiꞈ te daꞈ taˍ ve hkʼe, Sawˉluꞈ ve awˬ hawehˍ, Yawˇnaˆtanˍ ve yaˇ Meˍfiˆboˍshehˆ htaꞈ ponˬ piˇ ve yoˬ.”—2 Saˍmo˗eˍlaˆ 21:7.

Daˍviˆ Giˇbonˍ chaw lawˬ ve hkʼe gʼaꞈ te ve yoˬ. Yawˇ Sawˉluꞈ ve yaˇ paˍ 2 gʼaˇ htaꞈ Giˇbonˍ chaw geh peu piˇ ve yoˬ. Chi ve hkʼaw ve teˇ gʼaˇ lehˬ Meˍfiˆboˍshehˆ meh ve yoˬ. Leh Sawˉluꞈ ve awˬ hawehˍ paˍ 5 gʼaˇ kaꞈ Giˇbonˍ chaw geh peu piˇ ve yoˬ. (2 Saˍmo˗eˍlaˆ 21:8, 9) Daˍviˆ te ve awˬ ceuˬ lehˬ Iˉsaˍreˍlaˆ chaw shu htaꞈ tiˇ pehˍ ve gʼa ponˬ tuˬ te piˇ ve yoˬ.

Awˬ lawn chi ve ngaˬ hui henˇ yuˬ tuˬ a yeˇ uiˍ jaˇ ve yoˬ. Gʼuiˬ sha ve awˬ liˇ tawˇ hkawˇ hkʼa tawˍ lehˆ kʼoˆ laˇ taˍ ve, “yaˇ teˇ hpaˍ te yaꞈ ve venˇ baˆ awˬ tan, awˬ pa awˬ e htaꞈ maˇ gʼa tiˇ pehˍ.” (Bon maˍ ve 24:16) Chi htaꞈ pa taw, Sawˉluꞈ ve yaˇ paˍ 2 gʼaˇ leh awˬ hawehˍ paˍ 5 gʼaˇ teꞈ chiˉ maˇ te yaꞈ ve htaꞈ tiˇ pehˍ piˇ ve Yaˬhoˉvaˬ nyi ma maˇ cawˇ. Leh Gʼuiˬ sha ve awˬ liˇ tawˇ hkawˇ hkʼaw kʼoˆ sheˍ ve, “te yaꞈ ve chaw htaꞈ ceh tiˉ gʼa tiˇ pehˍ ve yoˬ.” Sawˉluꞈ ve yaˇ paˍ 2 gʼaˇ leh awˬ hawehˍ paˍ 5 gʼaˇ lehˬ, Giˇbonˍ chaw awˬ ceuˬ awˬ hkʼaˇ hkʼa peu˗eˬ htaꞈ tiˇ pehˍ tuˬ awˬ hkʼaˇ gu ve hpehꞈ gʼa ve yoˬ. Hkʼe te leh, yawˇ hui 7 gʼaˇ te taˍ ve awˬ ceuˬ htaꞈ gʼa haꞈ yuˬ ve yoˬ.

Te kʼoˆ laˇ ve htaꞈ pa taw te yaꞈ ve tehꞈ maˇ kʼoˆ cawˇ ve, awˬ lawn chi ve maˍ laˇ ve yoˬ. Yawˇ te taˍ ve awˬ ceuˬ htaꞈ gʼa haꞈ yuˬ ve yoˬ. Liꞈ hpu hkʼaw kʼoˆ ve, “nawˬ te tuˬ ve kanˉ htaꞈ hkʼa dehꞈ gu taˍ˗oꞈ. Oˇ hkʼe te ve kʼo, nawˬ hkʼa te ve kanˉ teˇ ceuˬ le le daꞈ la tuˬ yoˬ. Haiˬ ve awˬ ceuˬ htaꞈ jaw kʼai leh, gʼuˇ suhˍ hteˇ lehˍ kʼai˗o. Nawˬ ve hkui piˍ teˇ piˍ kaꞈ maˇ gʼa yaꞈ kʼai tuˬ shaˍ tiꞈ taˍ˗oꞈ.”—Tawˇ naˉ ve 4:24-27; Eˇfeˇsuꞈ 5:15.