Awˬ Lawn 10
Aˬ htoꞈ ma te nawˬ Baˆtiˆsaˬ haꞈ yuˬ cawˇ ve le?
‘Nawˬ hui hkʼa peu˗eˬ Baˆtiˆsaˬ haꞈ yuˬ cawˇ ve yoˬ.’—TCUH YAˇ 2:38.
KʼA MUIˬ HKAWˇ 34 Ka tiꞈ yeˬ ve hkʼaw toˇ ve
HENˇ TUˬ VE TEˇ HPAˍ a
1-2. Baˆtiˆsaˬ haꞈ yuˬ ve teˇ nyi htaˇ ngaˬ hui aˬ htoꞈ ma htaꞈ dawˇ mawˬ gʼa ve le? Leh awˬ lawn chi ve hkʼaw aˬ htoꞈ ma htaꞈ gʼa henˇ tuˬ le?
Baˆtiˆsaˬ haꞈ yuˬ˗a yoˬ te chehˇ ve chaw htaꞈ nawˬ dawˇ nyi sheˍ. Yawˇ hui yonˍ gʼa ve hkʼaw na hkawˇ 2 hkawˇ hkʼawꞈ piˇ ve htaꞈ nawˬ gʼa kaˇ ve yoˬ. Hkʼe te leh, yawˇ hui ve yehˬ kʼa leh awˬ chawˇ ha lehˬ ha kʼa ve hkʼaw haꞈ yuˬ piˇ ve htaꞈ gʼa mawˬ ve yoˬ. Baˆtiˆsaˬ haꞈ yuˬ ve chaw iˉ kaˆ hkʼaw tawˆ la htaˇ, yawˇ hui ha lehˬ jaˇ leh awˬ viˉ awˬ nyi kaꞈ ha lehˬ jaˇ leh laꞈ sheh hta piˇ ve htaꞈ nawˬ gʼa mawˬ ve yoˬ. Teˇ shinˉ le le laiˉ hinˉ gʼaˇ Shaˉhkiˆhkanˍ ve chaw hpehꞈ tuˬ, Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ ve yoˬ.
2 Nawˬ Baˆtiˆsaˬ haꞈ yuˬ gaˇ ve kʼo, haiˬ ve miˬ guiˬ hkʼoˆ lo nawˬ awˬ nu ve chaw htaꞈ maˇ shuˍ daꞈ ve yoˬ. Awˬ lawn kʼo, ‘nawˬ Yaˬhoˉvaˬ htaꞈ oˉ kʼoˍ pui tuˬ ca chehˇ ve yoˬ.’ (Chiˇ mvuh ve 14:1, 2) Nawˬ a shaꞈ hkʼaˬ hkʼe ma gaˬ˗oˬ ve htawˇ maˇ kʼoˆ, awˬ lawn chi ve hkʼaw nawˬ awˬ pon bvuhꞈ taˍ ve yoˬ. Yaꞈ hkʼaˇ, ngaˬ hui Baˆtiˆsaˬ haꞈ yuˬ˗oˬ ve kʼo, Yaˬhoˉvaˬ ve kanˉ caˉ leh te kʼai tuˬ dawˇ teh taˍ gaˇ ve yoˬ. Awˬ tehˬ kʼo, ngaˬ hui Yaˬhoˉvaˬ ve kanˉ te tuˬ laiˉ hkʼaˇ cawˬ ve yoˬ. Awˬ lawn chi ve hkʼaw 3 hkʼaˇ htaꞈ teˇ geh henˇ tuˬ yoˬ.
NAWˬ HTEˇ VE CAWˇ VE AWˬ CEUˬ HTAꞈ HAꞈ VE
Saˍtanˍ Yaˬhoˉvaˬ htaꞈ she pfuhˍ piˇ leh yawˇ chi hkʼe te ve laiˉ hinˉ hkʼawꞈ gaˬ˗oˬ (Awˬ tawn 3-4 nyi sheˍ)
3. Aˬ htoꞈ ma te Yaˬhoˉvaˬ ve chaw hteˇ ve cawˇ ve htaꞈ haꞈ ve le? (Chiˇ mvuh ve 119:128, 163)
3 Yaˬhoˉvaˬ yawˇ ve chaw “hteˇ ve cawˇ ve” htaꞈ haꞈ˗oꞈ tehꞈ kʼoˆ piˇ ve yoˬ. (Zaˍhkaˍriˆ 8:19) Yeˍsuˆ kaꞈ yawˇ ve awˬ laꞈ gʼawˇ hui hteˇ ve cawˇ ve htaꞈ haꞈ˗oꞈ tehꞈ kʼoˆ piˇ ve yoˬ. (Maꞈhtehˍ 5:6) Hkʼe te leh, ngaˬ hui Gʼuiˬ sha mehˆ gʼuˇ suhˍ hteˇ ve cawˇ ve leh daꞈ ve awˬ ceuˬ te gaˇ ve yoˬ. Nawˬ hteˇ ve cawˇ ve htaꞈ haꞈ˗aw laˇ? Nawˬ haꞈ ve tehꞈ ngaˬ hui yonˍ ve yoˬ. Heˍ ve leh haiˬ ve teˇ ceuˬ le le htaꞈ nawˬ nyi bawˬ ve yoˬ. (Chiˇ mvuh ve 119:128, 163 gʼaw sheˍ.) Heˍ ve chaw lehˬ yawˇ ve awˬ pa Saˍtanˍ htaꞈ henˇ yuˬ chehˇ ve yoˬ. (Yoˇhanˬ 8:44; 12:31) Saˍtanˍ te ve teˇ ceuˬ lehˬ, Yaˬhoˉvaˬ ve awˬ meh htaꞈ te luˬ tuˬ she pfuhˍ piˇ ve yoˬ. Saˍtanˍ lehˬ Gʼuiˬ sha htaꞈ caˉ daꞈ ve gʼaˇ hteꞈ heˍ chehˇ ve yoˬ. Eˍdenˍ hko hkʼaw hpfuhˆ peuˬ hkʼawꞈ nawˉ kaꞈ yawˇ chi hkʼe te ve yoˬ. Miˬ guiˬ hkʼoˆ lo uˉ peunˍ shehˍ hpaˇ Yaˬhoˉvaˬ lehˬ a shu yawˇ awˬ pon tiˉ dawˇ nyi leh heˍ puiˉ jaˇ ve tehꞈ Saˍtanˍ she pfuhˍ piˇ ve yoˬ. Leh daꞈ ve awˬ ceuˬ chaw yaˇ htaꞈ kaꞈ maˇ piˇ ve tehꞈ kʼoˆ leh she pfuhˍ piˇ ve yoˬ. (Awˬ hkuiˉ puiˍ 3:1, 4, 5) Yaˬhoˉvaˬ htaꞈ caˉ daꞈ ve Saˍtanˍ heˍ piˇ ve pa taw chaw yaˇ Yaˬhoˉvaˬ htaꞈ maˇ daꞈ ve dawˇ tuˬ te piˇ ve yoˬ. Hkʼe te leh, chaw yaˇ “hteˇ ve cawˇ ve” htaꞈ maˇ te tuˬ leuˆ yuˬ ve pa taw, Saˍtanˍ te tcuh gaˇ ve hkʼe yawˇ hui maˇ cawˇ ve leh haiˬ ve awˬ ceuˬ htaꞈ te ve yoˬ.—Roˉmaꞈ 1:25-31.
4. Yaˬhoˉvaˬ lehˬ “ka tiꞈ yeˬ ve Gʼuiˬ sha hpehꞈ ve” tehꞈ hkʼaˬ hkʼe hpeuꞈ maw laˇ ve le? (Awˬ han htaꞈ nyi sheˍ.)
4 Yaˬhoˉvaˬ lehˬ “ka tiꞈ yeˬ ve Gʼuiˬ sha hpehꞈ ve” leh yawˇ htaꞈ haꞈ ve chaw htaꞈ hteˇ ve cawˇ ve maˍ piˇ ve pa taw, yawˇ hui Saˍtanˍ heˍ piˇ ve htaꞈ maˇ kʼawꞈ gʼa hpuˇ˗o. (Chiˇ mvuh ve 31:5) Yaˬhoˉvaˬ lehˬ yawˇ ve chaw htaꞈ ka tiꞈ yeˬ leh hteˇ ve cawˇ ve awˬ ceuˬ htaꞈ te tuˬ kaꞈ maˍ piˇ ve pa taw, yawˇ hui a shu yawˇ awˬ to htaꞈ yawˆ yan leh nyi ma gawˬ lehˍ cawˬ ve yoˬ. (Tawˇ naˉ ve 13:5, 6) Nawˬ Liꞈ hpu tanˬ henˇ htaˇ, nawˬ chi hkʼe ve chaw hpehꞈ tuˬ Yaˬhoˉvaˬ ga laˇ ve tehꞈ dawˇ˗aw laˇ? Yaˬhoˉvaˬ beˆ maˍ laˇ ve lehˬ, chaw yaˇ teˇ gʼaˇ le le awˬ pon a shaꞈ teꞈ hkʼaˇ daꞈ leh nawˬ awˬ pon kaꞈ daꞈ ve tehꞈ nawˬ gʼa henˇ ve yoˬ. (Chiˇ mvuh ve 77:13) Hkʼe te leh, Yaˬhoˉvaˬ kʼoˆ ve cawˇ ve awˬ ceuˬ teˇ ceuˬ le le htaꞈ nawˬ te gaˇ ve yoˬ. (Maꞈhtehˍ 6:33) Nawˬ awˬ nu ve chaw htaꞈ hteˇ ve cawˇ ve shiˍ tcuh gaˇ leh Saˍtanˍ heˍ ve tehꞈ kaꞈ hpeuꞈ maw piˇ gaˇ ve yoˬ. Chi nawˬ hkʼaˬ hkʼe te gʼa tuˬ le?
5. Nawˬ hteˇ ve cawˇ ve htaꞈ haꞈ ve tehꞈ awˬ nu ve chaw htaꞈ hkʼaˬ hkʼe te hpeuꞈ maw piˇ gʼa tuˬ le?
5 Nawˬ ve a shaꞈ teꞈ hkʼaˇ “ngaˬ Saˍtanˍ heˍ ve hkawˇ maˇ na ve tehꞈ hpeuꞈ maw piˇ gʼa ve yoˬ. Ngaˬ hteˇ ve cawˇ ve htaꞈ gʼawˆ tiˍ taˍ tuˬ yoˬ. Yaˬhoˉvaˬ lehˬ ngaˬ awˬ pon uiˍ jaˇ mvuh jaˇ ve Gʼuiˬ sha hpehꞈ tcuh gaˇ ve yoˬ. Leh Gʼuiˬ sha cawˇ ve tehꞈ kʼoˆ ve awˬ ceuˬ htaꞈ ngaˬ te gaˇ ve yoˬ.” Chi ve teˇ hpaˍ htaꞈ nawˬ hkʼaˬ hkʼe te gʼa tuˬ le? Nawˬ Yaˬhoˉvaˬ htaꞈ awˬ to chiˇ aꞈ piˇ tuˬ yoˬ tehꞈ yawˇ geh bon lawˬ ve yoˬ. Nawˬ Yaˬhoˉvaˬ htaꞈ awˬ to chiˇ aꞈ piˇ˗oˬ ve tehꞈ awˬ nu ve chaw mawˬ tuˬ Baˆtiˆsaˬ haꞈ yuˬ ve yoˬ. Nawˬ hteˇ ve cawˇ ve htaꞈ haꞈ ve kʼo, nawˬ Baˆtiˆsaˬ haꞈ yuˬ gaˇ tuˬ yoˬ.
NAWˬ YEˍSUˆ HTAꞈ HAꞈ VE
6. Chiˇ mvuh ve liꞈ 45:4 hkʼaw nawˬ Yeˍsuˆ htaꞈ haꞈ tuˬ aˬ htoꞈ ma awˬ hkʼaˇ hpeuꞈ maw laˇ ve le?
6 Aˬ htoꞈ ma te nawˬ Yeˍsuˆ htaꞈ haꞈ ve le? Ngaˬ hui Yeˍsuˆ htaꞈ haꞈ tuˬ te laˇ ve lehˬ Chiˇ mvuh ve liꞈ 45:4 hkʼaw ngaˬ hui yonˍ gʼa tuˬ te laˇ ve htaꞈ teˇ geh nyi sheˍ. (Gʼaw sheˍ.) Yeˍsuˆ hteˇ ve cawˇ ve leh nyi ma nuˇ nehˬ ve cawˬ tuˬ haꞈ shaˉ ve yoˬ. Nawˬ hteˇ ve cawˇ ve htaꞈ haꞈ ve kʼo, nawˬ Yeˍsuˆ htaꞈ kaꞈ gʼa haꞈ ve yoˬ. Yeˍsuˆ hteˇ ve cawˇ ve htaꞈ haꞈ shaˉ tuˬ hkʼaˬ hkʼe taw gʼa haꞈ hanˉ ve htaꞈ dawˇ nyi sheˍ. (Yoˇhanˬ 18:37) Nyi ma nuˇ nehˬ ve awˬ lawn Yeˍsuˆ ngaˬ hui htaꞈ hkʼaˬ hkʼe maˍ laˇ ve le?
7. Yeˍsuˆ nyi ma nuˇ nehˬ ve htaꞈ aˬ htoꞈ ma te ngaˬ hui dawˇ cawˇ ve le?
7 Yeˍsuˆ nyi ma nuˇ nehˬ ve awˬ lawn ngaˬ hui htaꞈ te maˍ laˇ ve yoˬ. Yeˍsuˆ yawˇ awˬ to htaꞈ maˇ chiˇ mvuh. Leh yawˇ Awˬ pa Yaˬhoˉvaˬ htaꞈ hkʼaˬ htaˆ kaꞈ chiˇ mvuh ve yoˬ. (Maˍkuˆ 10:17, 18; Yoˇhanˬ 5:19) Yeˍsuˆ chi hkʼe te ve htaꞈ nawˬ hkʼaˬ hkʼe dawˇ ve le? Chi nawˬ Yeˍsuˆ htaꞈ haꞈ leh yawˇ htaꞈ henˇ yuˬ gaˇ tuˬ te laˇ ve maˇ heˆ laˇ? Te laˇ ve yoˬ. Aˬ htoꞈ ma pa taw Yeˍsuˆ nyi ma nuˇ nehˬ ve le? Awˬ lawn kʼo, yawˇ Yaˬhoˉvaˬ htaꞈ haꞈ leh Yaˬhoˉvaˬ nyi ma nuˇ nehˬ ve htaꞈ henˇ yuˬ ve yoˬ. (Chiˇ mvuh ve 18:35; Heˍbrehˇ 1:3) Leh Yeˍsuˆ Yaˬhoˉvaˬ htaꞈ hkʼa dehꞈ henˇ yuˬ gʼa ve pa taw, nawˬ Yeˍsuˆ htaꞈ haꞈ gaˇ tuˬ te laˇ ve maˇ heˆ laˇ?
8. Aˬ htoꞈ ma te Jawˇ mawˇ Yeˍsuˆ htaꞈ ngaˬ hui haꞈ ve le?
8 Yeˍsuˆ daꞈ jaˇ ve uˉ peunˍ shehˍ hpaˇ hpehꞈ ve pa taw, ngaˬ hui yawˇ htaꞈ haꞈ ve yoˬ. Yaˬhoˉvaˬ lehˬ Yeˍsuˆ htaꞈ maˍ piˇ leh Jawˇ mawˇ te tcuh ve yoˬ. (Iˉsaˍyaˆ 50:4, 5) Chi hkʼoˆ kaꞈ, Yeˍsuˆ haꞈ pehnˇ ve hkʼaw teˇ ceuˬ le le hpawˇ tanˇ laˇ ve htaꞈ ngaˬ hui dawˇ nyi sheˍ. (Yoˇhanˬ 13:1) Yeˍsuˆ nawˬ ve Jawˇ mawˇ hpehꞈ ve pa taw nawˬ yawˇ htaꞈ haꞈ jaˇ ve yoˬ. Yeˍsuˆ kʼoˆ ve, yawˇ htaꞈ haꞈ ve chaw lehˬ yawˇ ve tawˇ hkawˇ htaꞈ na yuˬ leh gʼaꞈ te ve tehꞈ hpeuꞈ maw piˇ ve chaw hui yoˬ. (Yoˇhanˬ 14:15; 15:14, 15) Yaˬhoˉvaˬ ve Yaˇ paˍ Yeˍsuˆ htaꞈ ngaˬ hui awˬ chawˇ gʼa te ve daꞈ jaˇ ve yoˬ.
9. Awˬ laꞈ gʼawˇ hui Baˆtiˆsaˬ haꞈ yuˬ ve leh Yeˍsuˆ Baˆtiˆsaˬ haꞈ yuˬ ve hkʼaˬ hkʼe te shuˍ daꞈ ve le?
9 Yeˍsuˆ awˬ laꞈ gʼawˇ hui htaꞈ tawˇ piˇ taˉ ve teˇ ceuˬ lehˬ, yawˇ hui Baˆtiˆsaˬ gʼa haꞈ yuˬ leh Yeˍsuˆ kaꞈ awˬ lawn chi yawˇ hui htaꞈ te maˍ piˇ ve yoˬ. (Maꞈhtehˍ 28:19, 20) Yeˍsuˆ Baˆtiˆsaˬ haꞈ yuˬ ve lehˬ Yaˬhoˉvaˬ ve a loˍ htaꞈ gʼaꞈ te tuˬ ve tehꞈ hpeuꞈ maw piˇ ve yoˬ. (Heˍbrehˇ 10:7) Yeˍsuˆ ve awˬ laꞈ gʼawˇ Baˆtiˆsaˬ haꞈ yuˬ ve lehˬ, yawˇ hui Yaˬhoˉvaˬ htaꞈ awˬ to chiˇ aꞈ piˇ˗oˬ ve tehꞈ awˬ nu ve chaw htaꞈ hpeuꞈ maw piˇ ve yoˬ. Yaꞈ hkʼaˇ, yawˇ hui Yeˍsuˆ htaꞈ henˇ yuˬ ve lehˬ, oˇ ve teˇ yanˇ tanˬ leh yawˇ hui ve a shaꞈ teꞈ hkʼaˇ Yaˬhoˉvaˬ ve a loˍ htaꞈ gʼaꞈ te tuˬ yoˬ tehꞈ hpeuꞈ maw piˇ ve yoˬ. Yeˍsuˆ Baˆtiˆsaˬ haꞈ yuˬ ve leh awˬ laꞈ gʼawˇ hui Baˆtiˆsaˬ haꞈ yuˬ ve lehˬ teˇ ceuˬ ceuˬ peun daꞈ ve yoˬ. (Awˇ ceˍ awˇ fa “ Yeˍsuˆ Baˆtiˆsaˬ haꞈ yuˬ ve leh awˬ laꞈ gʼawˇ hui Baˆtiˆsaˬ haꞈ yuˬ ve hkʼaˬ hkʼe peun daꞈ ve le?” htaꞈ nyi sheˍ.)
10. Nawˬ Yeˍsuˆ htaꞈ haꞈ cawˇ ve aˬ htoꞈ ma awˬ hkʼaˇ cawˬ sheˍ ve le? Leh chi nawˬ aˬ htoꞈ ma te gaˇ tuˬ te laˇ sheˍ ve le?
10 Yeˍsuˆ lehˬ Yaˬhoˉvaˬ ve Yaˇ teˇ gʼaˇ tiˉ hpehꞈ ve tehꞈ nawˬ yonˍ ve yoˬ. Yeˍsuˆ Jawˇ mawˇ te leh ngaˬ hui htaꞈ uˉ peunˍ chehˇ˗oˬ ve nawˬ ha lehˬ jaˇ ve yoˬ. Yeˍsuˆ nyi ma nuˇ nehˬ jaˇ leh Yaˬhoˉvaˬ htaꞈ hkʼa dehꞈ henˇ yuˬ gʼa ve tehꞈ nawˬ gʼa mawˬ ve yoˬ. Yeˍsuˆ meuꞈ ve kaˆ ve chaw htaꞈ caˍ piˇ ve, awˬ gʼaˇ nuˇ ve chaw htaꞈ awˬ gʼaˇ piˇ ve, leh naˬ ve chaw htaꞈ kaꞈ gu na˗e piˇ ve nawˬ gʼa henˇ˗oˬ ve yoˬ. (Maꞈhtehˍ 14:14-21) Yeˍsuˆ chi beuꞈ teˇ co˗e ve Hkriꞈ yaˇ awˬ moˍ htaꞈ hkʼaˬ hkʼe sheh kʼai chehˇ ve nawˬ gʼa mawˬ ve yoˬ. (Maꞈhtehˍ 23:10) Leh awˬ gʼuˇ suhˍ hpawˇ miˬ guiˬ awˬ suhˉ hkʼaw yawˇ uˉ peunˍ htaˇ, chi aꞈ kehˉ kʼawꞈ te tuˬ ve tehꞈ nawˬ gʼa henˇ˗oˬ ve yoˬ. Nawˬ yawˇ htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa ve le? Yawˇ htaꞈ henˇ yuˬ gʼa ve yoˬ. (Yoˇhanˬ 14:21) Nawˬ te gʼa ve awˬ hkʼaˇ lehˬ, Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ ve yoˬ.
NAWˬ YAˬHOˉVAˬ HTAꞈ HAꞈ VE
11. Ngaˬ hui Baˆtiˆsaˬ haꞈ yuˬ ve a yeˇ uiˍ jaˇ ve awˬ hkʼaˇ aˬ htoꞈ ma le? Leh aˬ htoꞈ ma pa taw le?
11 Ngaˬ hui Baˆtiˆsaˬ haꞈ yuˬ ve a yeˇ uiˍ jaˇ ve awˬ hkʼaˇ lehˬ aˬ htoꞈ ma le? Yeˍsuˆ kʼoˆ ve, Gʼuiˬ sha tawˇ peꞈ laˇ ve a yeˇ uiˍ jaˇ ve lehˬ “nawˬ ve nyi ma hkʼa peu˗eˬ, nawˬ ve co ha hkʼa peu˗eˬ, nawˬ ve dawˇ hkʼaˇ hkʼa peu˗eˬ leh nawˬ ve awˬ gʼaˇ awˬ shaˉ hkʼa peu˗eˬ nawˬ ve Jawˇ mawˇ Gʼuiˬ sha htaꞈ gʼa haꞈ ve yoˬ.” (Maˍkuˆ 12:30) Liꞈ hpu chi teˇ tawn hkʼaw kʼoˆ taˍ ve hkʼe, nawˬ kaꞈ Gʼuiˬ sha htaꞈ haꞈ ve yoˬ maˇ heˆ laˇ?
Chi teˇ hkui nawˬ cawˬ ve daꞈ ve awˬ ceuˬ hkʼa peu˗eˬ Yaˬhoˉvaˬ geh gʼa leh awˬ gʼuˇ suhˍ hpawˇ yawˇ nawˬ htaꞈ chi aꞈ kehˉ kʼawꞈ peꞈ laˇ tuˬ yoˬ (Awˬ tawn 12-13 nyi sheˍ)
12. Aˬ htoꞈ ma te nawˬ Yaˬhoˉvaˬ htaꞈ haꞈ ve le? (Awˬ han htaꞈ nyi sheˍ.)
12 Ngaˬ hui Yaˬhoˉvaˬ htaꞈ haꞈ tuˬ awˬ hkʼaˇ laiˉ hkʼaˇ cawˬ ve yoˬ. Tawˇ pa haˉ te kʼo, Gʼuiˬ sha lehˬ “a shaꞈ teꞈ ve awˬ ceuˬ hkʼa peu˗eˬ ve awˬ hkuiˉ puiˍ hpehꞈ” leh “daꞈ ve awˬ bon hkʼa peu˗eˬ leh, biˇ ve laꞈ shawnˍ hkʼa peu˗eˬ” nawˬ htaꞈ peꞈ laˇ ve tehꞈ gʼa shiˍ ve yoˬ. (Chiˇ mvuh ve 36:9; Yaˍkoˆ 1:17) Nawˬ ve a shaꞈ teꞈ kuiˬ hkʼaw daꞈ ve awˬ ceuˬ hkʼa peu˗eˬ lehˬ, nawˬ htaꞈ haꞈ ve Yaˬhoˉvaˬ geh gʼa ve yoˬ.
13. Aˬ htoꞈ ma te htaiˍ hkʼawꞈ laˇ ve lehˬ daꞈ jaˇ ve laꞈ shawnˍ hpehꞈ ve le?
13 Htaiˍ hkʼawꞈ laˇ ve lehˬ Yaˬhoˉvaˬ geh gʼa ve daꞈ jaˇ ve laꞈ shawnˍ hpehꞈ ve yoˬ. Aˬ htoꞈ ma te chi hkʼe kʼoˆ gʼa ve le? Yaˬhoˉvaˬ leh Yeˍsuˆ hkʼaˬ hkʼe taw meuˆ daꞈ jaˇ ve htaꞈ nawˬ dawˇ nyi sheˍ. Yeˍsuˆ kʼoˆ ve, “Awˬ pa ngaˬ htaꞈ haꞈ” leh “Awˬ pa htaꞈ ngaˬ haꞈ ve yoˬ.” (Yoˇhanˬ 10:17; 14:31) Yaˬhoˉvaˬ leh Yeˍsuˆ teˇ geh chehˇ ve laiˉ hinˉ lanˬ hkʼawꞈ gaˬ˗oˬ ve yoˬ. Yawˇ huiˉ maˬ teˇ geh chehˇ maw jaˇ˗oˬ ve pa taw, haꞈ daꞈ jaˇ leh meuˆ daꞈ jaˇ ve yoˬ. (Tawˇ naˉ ve 8:22, 23, 30) Yaˬhoˉvaˬ lehˬ Yeˍsuˆ htaꞈ tuꞈ ve hkanˍ ve hkʼaw suh˗e tcuh htaˇ, yawˇ nyi ma hkʼaˬ hkʼe taw naˬ ve htaꞈ dawˇ nyi sheˍ. Yaˬhoˉvaˬ lehˬ chaw yaˇ htaꞈ haꞈ jaˇ leh nawˬ htaꞈ kaꞈ haꞈ jaˇ ve yoˬ. Nawˬ leh awˬ nu ve chaw co co taiˍ taiˍ ve a shaꞈ gʼa tuˬ Yaˬhoˉvaˬ yawˇ haꞈ jaˇ ve Yaˇ paˍ Yeˍsuˆ ngaˬ hui awˬ pon htaiˍ hkʼawꞈ laˇ tcuh ve yoˬ. (Yoˇhanˬ 3:16; Gaˍlaˍtiˆ 2:20) Chi ve htaꞈ pa taw ngaˬ hui Yaˬhoˉvaˬ htaꞈ haꞈ jaˇ ve yoˬ.
14. Nawˬ ve a shaꞈ teꞈ hkʼaˇ hkʼaw dawˇ teh taˍ ve a yeˇ uiˍ jaˇ ve aˬ htoꞈ ma le?
14 Nawˬ Yaˬhoˉvaˬ ve awˬ lawn leuˉ leh gʼa henˇ htaˇ, nawˬ yawˇ htaꞈ gʼaˇ hteꞈ kʼawꞈ haꞈ ve yoˬ. Nawˬ chi teˇ hkui leh awˬ gʼuˇ suhˍ hpawˇ kaꞈ Yaˬhoˉvaˬ geh hkʼaˬ htaˆ kaꞈ meuˆ daꞈ gaˇ ve maˇ heˆ laˇ? Meuˆ daꞈ gaˇ ve yoˬ. Yaˬhoˉvaˬ lehˬ nawˬ yawˇ htaꞈ ha lehˬ tuˬ te laˇ tcuh gaˇ ve yoˬ. (Tawˇ naˉ ve 23:15, 16) Nawˬ Yaˬhoˉvaˬ htaꞈ haꞈ tuˬ kʼoˆ ve ceh maˇ heˆ. Gʼa te tawˆ la ve yoˬ. Nawˬ ve a shaꞈ teꞈ hkʼaˇ Yaˬhoˉvaˬ htaꞈ haꞈ ve tehꞈ hpeuꞈ maw piˇ gʼa ve yoˬ. (1 Yoˇhanˬ 5:3) Chi ve lehˬ nawˬ a shaꞈ teꞈ kuiˬ hkʼaw dawˇ teh taˍ ve a yeˇ uiˍ jaˇ ve awˬ ceuˬ hpehꞈ ve yoˬ.
15. Nawˬ Yaˬhoˉvaˬ htaꞈ haꞈ ve tehꞈ hpeuꞈ maw piˇ tuˬ hkʼaˬ hkʼe te tuˬ le?
15 Nawˬ Yaˬhoˉvaˬ htaꞈ haꞈ ve tehꞈ hpeuꞈ maw piˇ tuˬ hkʼaˬ hkʼe te tuˬ le? Awˉ lawˉ teˇ ceuˬ lehˬ, nawˬ awˬ tehˬ awˬ na Yaˬhoˉvaˬ Gʼuiˬ sha teˇ gʼaˇ tiˉ geh bon gʼa lawˬ ve yoˬ. Leh nawˬ yawˇ htaꞈ awˬ to chiˇ aꞈ piˇ tuˬ yoˬ tehꞈ kʼoˆ piˇ ve yoˬ. (Chiˇ mvuh ve 40:8) Peuˬ hkʼawꞈ nawˉ nawˬ Gʼuiˬ sha htaꞈ awˬ to chiˇ aꞈ piˇ˗oˬ ve tehꞈ Baˆtiˆsaˬ haꞈ yuˬ ve hkʼaw awˬ nu ve chaw htaꞈ hpeuꞈ maw piˇ ve yoˬ. Awˬ lawn chi ve hkʼaw ngaˬ hui gʼa henˇ˗oˬ ve hkʼe, Baˆtiˆsaˬ haꞈ yuˬ ve lehˬ nawˬ ha lehˬ tuˬ te laˇ leh nawˬ ve a shaꞈ teꞈ kuiˬ hkʼaw pa tuˬ kaꞈ te laˇ ve yoˬ. Nawˬ a shaꞈ teꞈ ve lehˬ nawˬ awˬ pon maˇ heˆ. Yaˬhoˉvaˬ awˬ pon hpehꞈ ve yoˬ. (Roˉmaꞈ 14:8; 1 Peˍtruˆ 4:1, 2) Chi nawˬ dawˇ cheˆ ve a yeˇ uiˍ jaˇ ve awˬ ceuˬ hpehꞈ ve maˇ heˆ laˇ? Hpehꞈ ve yoˬ. Yaꞈ hkʼaˇ, chi nawˬ a shaꞈ teꞈ kuiˬ hkʼaw daꞈ jaˇ ve awˬ ceuˬ te laˇ ve yoˬ. Chi nawˬ hkʼaˬ hkʼe te gʼa tuˬ le?
16. Chiˇ mvuh ve liꞈ 41:12 hkʼaw kʼoˆ taˍ ve hkʼe, Yaˬhoˉvaˬ htaꞈ awˬ to chiˇ aꞈ piˇ leh yawˇ ve kanˉ te ve chaw htaꞈ aˬ htoꞈ ma laꞈ shawnˍ piˇ tuˬ le?
16 Yaˬhoˉvaˬ lehˬ piˇ gaˇ puiˉ ve Gʼuiˬ sha hpehꞈ ve yoˬ. Nawˬ Yaˬhoˉvaˬ htaꞈ aˬ htoꞈ ma piˇ ve htawˇ maˇ kʼoˆ, yawˇ nawˬ htaꞈ laiˉ pun kʼawꞈ hkʼawꞈ laˇ tuˬ yoˬ. (Maˍkuˆ 10:29, 30) Yawˇ nawˬ htaꞈ daꞈ ve a shaꞈ teꞈ hkʼaˇ peꞈ laˇ leh chi teˇ hkui haiˬ ve miˬ guiˬ hkʼoˆ lo nawˬ chehˇ ve htawˇ ha lehˬ gʼa tuˬ te laˇ ve yoˬ. Chi lehˬ awˬ hkuiˉ puiˍ ceh tiˉ hpehꞈ sheˍ. Nawˬ Baˆtiˆsaˬ haꞈ yuˬ ve kʼo, nawˬ a shaꞈ co co taiˍ taiˍ gʼa tuˬ yoˬ. Nawˬ htaꞈ haꞈ ve Yaˬhoˉvaˬ Gʼuiˬ sha ve kanˉ co co taiˍ taiˍ gʼa te tuˬ yoˬ. Nawˬ yawˇ htaꞈ gʼaˇ hteꞈ kʼawꞈ haꞈ leh yawˇ kaꞈ nawˬ htaꞈ gʼaˇ hteꞈ kʼawꞈ haꞈ tuˬ yoˬ. Chi hkʼoˆ kaꞈ, Gʼuiˬ sha a shaꞈ co co taiˍ taiˍ teꞈ chehˇ ve hkʼe nawˬ kaꞈ gʼa teꞈ chehˇ tuˬ yoˬ.—Chiˇ mvuh ve 41:12 gʼaw sheˍ.
17. Nawˬ Yaˬhoˉvaˬ htaꞈ piˇ gʼa ve aˬ htoꞈ ma awˬ ceuˬ cawˬ sheˍ ve le?
17 Nawˬ awˬ to chiˇ aꞈ leh Baˆtiˆsaˬ haꞈ yuˬ htaˇ, nawˬ Yaˬhoˉvaˬ htaꞈ awˬ hpfuhˇ hkʼaˆ jaˇ ve awˬ ceuˬ piˇ ve yoˬ. Yaˬhoˉvaˬ lehˬ nawˬ htaꞈ daꞈ ve teˇ ceuˬ le le peꞈ laˇ leh nawˬ teˇ yanˇ le le ha lehˬ ve cawˬ tuˬ kaꞈ peꞈ laˇ ve yoˬ. Chi htaꞈ pa taw, nawˬ Gʼuiˬ sha htaꞈ kʼawꞈ te hkʼawꞈ piˇ tuˬ teˇ ceuˬ lehˬ, hkʼa peu˗eˬ hkʼoˆ awˬ shehˍ hpaˇ Gʼuiˬ sha ve kanˉ ka tiꞈ yeˬ ve hkʼaw ha lehˬ ha kʼa te ve yoˬ. (Yawˇbaˆ 1:8; 41:11; Tawˇ naˉ ve 27:11) Chi ve lehˬ nawˬ ve a shaꞈ teꞈ hkʼaˇ hkʼaw ha lehˬ tuˬ te laˇ ve yoˬ. Chi htaꞈ pa taw, nawˬ Baˆtiˆsaˬ haꞈ yuˬ ve a yeˇ uiˍ jaˇ ve awˬ hkʼaˇ lehˬ, nawˬ Yaˬhoˉvaˬ htaꞈ haꞈ ve pa taw yoˬ.
NAWˬ Aˬ HTOꞈ MA HTAꞈ LAW CHEHˇ VE LE?
18. Nawˬ a shu yawˇ awˬ to htaꞈ aˬ htoꞈ ma na nyi cawˇ ve le?
18 Shu nawˬ htaꞈ na laˇ ve, nawˬ Baˆtiˆsaˬ haꞈ yuˬ tuˬ ve laˇ? Nawˬ hkʼaˬ hkʼe hkʼawꞈ piˇ tuˬ le? Nawˬ teˇ gʼaˇ ceh tiˉ na hkawˇ chi htaꞈ hkʼawꞈ piˇ gʼa ve yoˬ. Nawˬ a shu yawˇ awˬ to htaꞈ na nyi cawˇ ve, ‘ngaˬ aˬ htoꞈ ma htaꞈ law chehˇ ve le?’ (Tcuh yaˇ 8:36) Awˬ lawn chi ve hkʼaw ngaˬ hui gʼa henˇ˗oˬ ve hkʼe, ngaˬ hui Yaˬhoˉvaˬ ve kanˉ te ve 3 hkʼaˇ htaꞈ tawnˇ taˍ sheˍ. Awˉ lawˉ teˇ hkʼaˇ lehˬ, nawˬ hteˇ ve cawˇ ve htaꞈ haꞈ ve yoˬ. A shu yawˇ awˬ to htaꞈ na nyi cawˇ ve, ‘miˬ guiˬ hkʼoˆ lo teˇ gʼaˇ le le awˬ tehˬ ve tawˇ tiˉ yaw leh hteˇ ve cawˇ ve htaꞈ tiˉ te ve mawˬ gaˇ ve maˇ heˆ laˇ?’ 2 hkʼaˇ teˇ hkʼaˇ lehˬ, nawˬ Yeˍsuˆ htaꞈ haꞈ ve pa taw yoˬ. Nawˬ a shu yawˇ awˬ to htaꞈ na nyi cawˇ ve, ‘Yeˍsuˆ ngaˬ ve Jawˇ mawˇ hpehꞈ tcuh gaˇ˗aw laˇ? Leh ngaˬ Yeˍsuˆ htaꞈ henˇ yuˬ gaˇ˗aw laˇ?’ 3 hkʼaˇ teˇ hkʼaˇ a yeˇ uiˍ jaˇ ve lehˬ, nawˬ Yaˬhoˉvaˬ htaꞈ haꞈ ve pa taw yoˬ. Nawˬ a shu yawˇ awˬ to htaꞈ na nyi cawˇ ve, ‘ngaˬ Yaˬhoˉvaˬ htaꞈ ha lehˬ tcuh gaˇ ve pa taw yawˇ ve kanˉ ha lehˬ ha kʼa te˗aw laˇ?’ Na hkawˇ chi ve 3 maˬ htaꞈ nawˬ yoˬ tehꞈ kʼoˆ ve kʼo, aˬ htoꞈ ma te nawˬ Baˆtiˆsaˬ haˆ maˇ haꞈ yuˬ sheˍ ve le? Nawˬ aˬ htoꞈ ma htaꞈ law chehˇ sheˍ ve le?—Tcuh yaˇ 16:33.
19. Aˬ htoꞈ ma te nawˬ Baˆtiˆsaˬ haꞈ yuˬ tuˬ htawˇ dawˇ nawˬ dawˇ maˇ cawˬ cawˇ ve le? Tawˇ pa haˉ kʼoˆ maˍ laˇ sheˍ. (Yoˇhanˬ 4:34)
19 Nawˬ Baˆtiˆsaˬ haꞈ yuˬ tuˬ htawˇ dawˇ nawˬ dawˇ cawˬ sheˍ ve kʼo, Yeˍsuˆ tawˇ pa haˉ tehˆ maˍ laˇ ve teˇ lawn htaꞈ dawˇ nyi sheˍ. (Yoˇhanˬ 4:34 gʼaw sheˍ.) Yeˍsuˆ Yaˬhoˉvaˬ ve a loˍ htaꞈ te ve lehˬ caˇ tuˬ htaꞈ shuˍ ve tehꞈ kʼoˆ ve yoˬ. Aˬ htoꞈ ma te chi ve htaꞈ tehˆ ve le? Awˬ lawn kʼo, caˇ tuˬ lehˬ awˬ to htaꞈ awˬ bon cawˬ ve yoˬ. Yaˬhoˉvaˬ ngaˬ hui htaꞈ peꞈ laˇ ve awˬ ceuˬ lehˬ awˬ bon cawˬ ve tehꞈ Yeˍsuˆ shiˍ ve yoˬ. Ngaˬ hui awˬ to htaꞈ kawˆ tuˬ cawˬ ve awˬ ceuˬ Yaˬhoˉvaˬ maˇ te tcuh gaˇ. Yaˬhoˉvaˬ nawˬ htaꞈ te tcuh gaˇ ve awˬ ceuˬ lehˬ Baˆtiˆsaˬ haꞈ yuˬ tcuh gaˇ ve maˇ heˆ laˇ? Yoˬ. (Tcuh yaˇ 2:38) Chi htaꞈ pa taw, nawˬ Yaˬhoˉvaˬ kʼoˆ laˇ ve htaꞈ gʼaꞈ te ve kʼo, nawˬ awˬ bon gʼa jaˇ tuˬ yoˬ tehꞈ yonˍ gʼa ve yoˬ. Nawˬ caˇ tuˬ mehˬ jaˇ ve htaꞈ caˇ tuˬ htawˇ dawˇ nawˬ dawˇ maˇ cawˬ ve kʼo, aˬ htoꞈ ma te nawˬ Baˆtiˆsaˬ haꞈ yuˬ tuˬ htawˇ dawˇ nawˬ dawˇ cawˬ sheˍ ve le?
20. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?
20 Nawˬ aˬ htoꞈ ma htaꞈ law chehˇ sheˍ ve le? Yaꞈ hkʼaˇ, laiˉ gʼaˇ kʼoˆ ve, “ngaˬ maˇ gʼa gu hehnˇ sheˍ.” Nawˬ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ tuˬ dawˇ cheˆ ve lehˬ, a shaꞈ teꞈ kuiˬ hkʼaw a yeˇ uiˍ jaˇ ve awˬ ceuˬ hpehꞈ ve yoˬ. Nawˬ Baˆtiˆsaˬ haꞈ yuˬ gʼa tuˬ awˬ yanˇ yehˇ leh gʼa coˇ caˇ jaˇ ve yoˬ. Nawˬ Baˆtiˆsaˬ haꞈ yuˬ gaˇ ve kʼo, chi teˇ hkui kaꞈ hkʼaˬ hkʼe gu hehnˇ taˍ gʼa ve le? Chi ve gʼuˇ suhˍ teˇ lawn hkʼaw teˇ geh henˇ tuˬ yoˬ.
KʼA MUIˬ HKAWˇ 28 Yaˬhoˉvaˬ ve awˬ chawˇ hpehꞈ ve
a Liꞈ hpu henˇ ve chaw teˇ gʼaˇ le le awˬ pon Baˆtiˆsaˬ haꞈ yuˬ ve lehˬ a yeˇ uiˍ jaˇ. Hkʼe kʼo, yawˇ hui Baˆtiˆsaˬ haꞈ yuˬ gaˇ tuˬ aˬ htoꞈ ma te piˇ ve le? Baˆtiˆsaˬ haꞈ yuˬ gaˇ tuˬ te piˇ ve lehˬ haꞈ ve htaꞈ pa taw yoˬ. Yaꞈ hkʼaˇ, yawˇ hui aˬ htoꞈ ma htaꞈ haꞈ leh a shu htaꞈ kaꞈ haꞈ cawˇ ve le? Awˬ lawn chi ve hkʼaw hkʼawꞈ laˇ hkawˇ chi ve teˇ hpaˍ htaꞈ teˇ geh henˇ tuˬ yoˬ. Leh ngaˬ hui Baˆtiˆsaˬ haꞈ yuˬ ve kʼo, ngaˬ hui ve a shaꞈ teꞈ hkʼaˇ hkʼaˬ hkʼe te daꞈ la tuˬ ve, awˬ lawn chi ve hkʼaw teˇ geh henˇ tuˬ yoˬ.
