1-2. Nawˬ Baˆtiˆsaˬ haꞈ yuˬ tuˬ maˇ gu hehnˇ taˍ sheˍ ve kʼo, aˬ htoꞈ ma te awˬ gʼaˇ maˇ nuˇ cawˇ ve le? (Awˬ htaꞈ hpawˇ ve awˬ han htaꞈ nyi sheˍ.)

 Nawˬ Baˆtiˆsaˬ haꞈ yuˬ tuˬ dawˇ ve kʼo, nawˬ dawˇ teh taˍ ve daꞈ jaˇ ve yoˬ. Nawˬ Baˆtiˆsaˬ haꞈ yuˬ tuˬ gu hehnˇ˗oˬ laˇ? Gu hehnˇ˗oˬ leh nyi haꞈ shaˉ paˍ kaꞈ nawˬ Baˆtiˆsaˬ haꞈ yuˬ hpehꞈ˗oˬ ve tehꞈ kʼoˆ laˇ ve kʼo, gʼuˇ suhˍ teˇ pawˆ hpawnˬ daꞈ lonˉ hkʼaw nawˬ Baˆtiˆsaˬ haꞈ yuˬ gʼa ve yoˬ. Yaˬhoˉvaˬ ve kanˉ te ve lehˬ awˬ bon maˇ maˇ gʼa tuˬ yoˬ.

² Nawˬ Baˆtiˆsaˬ haꞈ yuˬ gaˇ tuˬ co ha hpawˇ chi aꞈ kehˉ gʼa uiˍ la mvuh la tcuh cawˇ ve tehꞈ awˬ nu ve chaw kʼoˆ laˇ ve kʼo, nawˬ hkʼaˬ hkʼe te tuˬ le? Maˇ heˆ leh nawˬ co ha hpawˇ teˇ ceuˬ ceuˬ gʼa te gʼa cawˇ ve tehꞈ dawˇ ve kʼo, hkʼaˬ hkʼe te tuˬ le? Nawˬ maˇ te gʼa ve kʼo, awˬ gʼaˇ taˇ nuˇ. Nawˬ a shaꞈ maˇ ve maˇ heˆ leh a shaꞈ i sheˍ ve htawˇ, Baˆtiˆsaˬ haꞈ yuˬ gʼa tuˬ co ha hpawˇ caˉ leh uiˍ la mvuh la tcuh sheˍ.

3. Ehˇtaˍyoˇpiˆ chaw a maꞈ lonˉ Hpiˇliˇpuˆ htaꞈ aˬ htoꞈ ma awˬ lawn na nyi piˇ ve le? Leh yawˇ ve tawˇ hkawˇ aˬ htoꞈ ma na hkawˇ cawˬ tuˬ te piˇ ve le? (Tcuh yaˇ 8:36, 38)

³ Tcuh yaˇ liꞈ 8:36, 38 gʼaw sheˍ. Ehˇtaˍyoˇpiˆ chaw a maꞈ lonˉ Hpiˇliˇpuˆ htaꞈ na piˇ ve, “ngaˬ Baˆtiˆsaˬ maˇ gʼa hkanˍ tuˬ, aˬ htoꞈ ma tawˍ taˍ tuˬ cawˬ le?” Yawˇ Baˆtiˆsaˬ haꞈ yuˬ gaˇ jaˇ ve tehꞈ hkʼa tawˍ lehˆ gʼa mawˬ ve yoˬ. Yaꞈ hkʼaˇ, yawˇ gu hehnˇ˗oˬ ve laˇ?

4. Ehˇtaˍyoˇpiˆ chaw hawˉ hkʼaˆ chi teˇ gʼaˇ yawˇ hkʼa dehꞈ henˇ shiˍ gaˇ ve tehꞈ hkʼaˬ hkʼe hpeuꞈ maw laˇ ve le?

⁴ Ehˇtaˍyoˇpiˆ chaw chi teˇ gʼaˇ “Yeˍruˆsaˍlehnˍ venˇ lo oˉ kʼoˍ ca pui kʼawꞈ la ve yoˬ.” (Tcuh yaˇ 8:27) Yawˇ lehˬ buiˇ shaˆ aˉ naˆ chaw hpehꞈ leh Yuˇdaꞈ chaw ve bon htaꞈ yonˍ la ve yoˬ. Yawˇ Heˍbrehˇ ve Liꞈ hpu hkʼaw Yaˬhoˉvaˬ ve awˬ lawn shiˍ˗oˬ ve yoˬ hehˉ. Yaꞈ hkʼaˇ, yawˇ leuˉ leh kʼawꞈ shiˍ gaˇ ve yoˬ. Hpiˇliˇpuˆ hawˉ hkʼaˆ chi ve teˇ gʼaˇ yaꞈ kʼaw kʼai chehˇ ve htaꞈ gʼa mawˬ htaˇ, yawˇ aˬ htoꞈ ma te chehˇ ve htaꞈ Hpiˇliˇpuˆ gʼa mawˬ ve  le? Yawˇ tcuh kaˍ paˍ Iˉsaˍyaˆ ve liꞈ daw htaꞈ gʼaw chehˇ ve yoˬ. (Tcuh yaˇ 8:28) Liꞈ hpu chi ve teˇ tawn lehˬ tcuhˉ kuiˬ naˉ jaˇ ve yoˬ. Ehˇtaˍyoˇpiˆ chaw a maꞈ lonˉ chi ve teˇ gʼaˇ lehˬ, Liꞈ hpu hkʼaw awˬ lawn lonˉ ma htaꞈ ceh shiˍ gaˇ ve maˇ heˆ tehꞈ ngaˬ hui hkʼa tawˍ lehˆ gʼa mawˬ ve yoˬ. Yaꞈ hkʼaˇ, yawˇ hkʼa dehꞈ shiˍ gaˇ ve yoˬ.

5. Ehˇtaˍyoˇpiˆ chaw chi teˇ gʼaˇ yawˇ gʼa henˇ shiˍ taˍ ve awˬ ceuˬ htaꞈ aˬ htoꞈ ma te ve le?

⁵ Yawˇ lehˬ Kanˍdaˍkeˍ meh ve nanˇ hawˉ hkanˇ ma awˬ hawˉ lo jawˇ mawˇ te ve Ehˇtaˍyoˇpiˆ chaw hpehꞈ ve yoˬ. Yawˇ lehˬ “nanˇ hawˉ hkanˇ ma ve hpu shi mawˇ jeˬ hkʼa peu˗eˬ htaꞈ nyi haꞈ shaˉ shehˍ hpaˇ” hpehꞈ ve yoˬ. (Tcuh yaˇ 8:27) Hkʼe te leh, yawˇ kanˉ maˇ jaˇ. Yaꞈ hkʼaˇ, Yaˬhoˉvaˬ htaꞈ oˉ kʼoˍ ca pui˗e tuˬ awˬ yanˇ shawˍ teh taˍ ve yoˬ. Yawˇ awˬ tehˬ ve htaꞈ henˇ shiˍ gaˇ ve ceh tiˉ maˇ heˆ. Yaꞈ hkʼaˇ, yawˇ gʼa henˇ taˍ ve awˬ ceuˬ htaꞈ kaꞈ gʼaꞈ te ve yoˬ. Yawˇ Ehˇtaˍyoˇpiˆ lo tawˆ kʼai leh Yeˍruˆsaˍlehnˍ venˇ bon yehˬ lonˉ hkʼaw Yaˬhoˉvaˬ htaꞈ oˉ kʼoˍ ca pui˗e ve yoˬ. Oˇ kaˬ lo kʼai ve lehˬ awˬ yanˇ leh hpu kaꞈ gʼa yehˇ maˇ ve pa taw, sha ve maˇ heˆ. Yaꞈ hkʼaˇ, yawˇ Yaˬhoˉvaˬ htaꞈ oˉ kʼoˍ ca pui˗e tuˬ kʼai ve yoˬ.

6-7. Ehˇtaˍyoˇpiˆ chaw chi teˇ gʼaˇ Yaˬhoˉvaˬ htaꞈ leuˉ leh kʼawꞈ haꞈ tuˬ aˬ htoꞈ ma te piˇ ve le?

⁶ Ehˇtaˍyoˇpiˆ chaw chi teˇ gʼaˇ Hpiˇliˇpuˆ geh a yeˇ uiˍ ve laiˉ ceuˬ gʼa henˇ ve yoˬ. Tawˇ pa haˉ te kʼo, Yeˍsuˆ lehˬ Meˍsiˉyaꞈ hpehꞈ ve tehꞈ yawˇ gʼa shiˍ ve yoˬ. (Tcuh yaˇ 8:34, 35) Yeˍsuˆ yawˇ awˬ pon te laˇ ve htaꞈ caˉ daꞈ ve awˬ ceuˬ yawˇ gʼa henˇ ve ha lehˬ jaˇ. Leh chi yawˇ aˬ htoꞈ ma te gaˇ tuˬ te piˇ ve le? Yawˇ buiˇ shaˆ aˉ naˆ chaw hpehꞈ leh Yuˇdaꞈ chaw ve bon htaꞈ yonˍ leh jawˇ mawˇ kaꞈ hpehꞈ ve, chi ve htaꞈ ceh tiˉ yawˇ nyi hkʼaˇ suh ve maˇ heˆ. Yaꞈ hkʼaˇ, yawˇ Yaˬhoˉvaˬ leh Yeˍsuˆ htaꞈ haꞈ jaˇ ve pa taw, Yeˍsuˆ ve awˬ laꞈ gʼawˇ hpehꞈ la tuˬ yawˇ dawˇ cheˆ leh Baˆtiˆsaˬ haꞈ yuˬ ve yoˬ. Leh Hpiˇliˇpuˆ kaꞈ hawˉ hkʼaˆ chi ve teˇ gʼaˇ Baˆtiˆsaˬ haꞈ yuˬ gaˇ ve htaꞈ gʼa mawˬ ve pa taw, Baˆtiˆsaˬ piˇ ve yoˬ.

⁷ Nawˬ Ehˇtaˍyoˇpiˆ chaw chi teˇ gʼaˇ hkʼe gʼaꞈ te ve kʼo, nawˬ kaꞈ Baˆtiˆsaˬ haꞈ yuˬ gʼa tuˬ yoˬ. Nawˬ yonˍ gʼa ve hkʼaw kʼoˆ ve, ‘ngaˬ Baˆtiˆsaˬ maˇ gʼa hkanˍ tuˬ, aˬ htoꞈ ma tawˍ taˍ tuˬ cawˬ le?’ Nawˬ Ehˇtaˍyoˇpiˆ chaw chi teˇ gʼaˇ hkʼa shuˍ, hkʼaˬ hkʼe te gʼa tuˬ teˇ geh nyi sheˍ. Tawˇ pa haˉ te kʼo, yawˇ Yaˬhoˉvaˬ ve awˬ lawn leuˉ leh kʼawꞈ henˇ shiˍ gaˇ ve, henˇ taˍ ve awˬ ceuˬ htaꞈ gʼaꞈ te ve, leh Yaˬhoˉvaˬ htaꞈ leuˉ leh kʼawꞈ haꞈ maˇ la ve yoˬ.

8. Yoˇhanˬ liꞈ 17:3 hkʼaw kʼoˆ ve nawˬ aˬ htoꞈ ma gʼa te cawˇ ve le?

⁸ Yoˇhanˬ liꞈ 17:3 gʼaw sheˍ. Liꞈ hpu chi ve teˇ tawn hkʼaw Yeˍsuˆ kʼoˆ ve tawˇ hkawˇ nawˬ dawˇ cheˆ leh Liꞈ hpu henˇ gaˇ tuˬ te laˇ ve maˇ heˆ laˇ? Laiˉ gʼaˇ kaꞈ chi hkʼe dawˇ ve yoˬ. Yaꞈ hkʼaˇ, chi hkʼe kʼoˆ ve tawˇ hkawˇ lehˬ, ngaˬ hui caˉ leh kʼawꞈ henˇ gaˇ tuˬ te laˇ ve maˇ heˆ laˇ? Yoˬ. Ngaˬ hui “awˬ tehˬ awˬ na ve Gʼuiˬ sha teˇ gʼaˇ tiˉ htaꞈ” shiˍ tuˬ gʼa coˇ caˇ ve yoˬ. (Cuˇ yiˍ piˇ ve 3:11) Ngaˬ hui Yaˬhoˉvaˬ htaꞈ caˉ daꞈ ve awˬ lawn hkʼaˬ htaˆ kaꞈ gʼa henˇ ve yoˬ. Ngaˬ hui Yaˬhoˉvaˬ htaꞈ hkʼa dehꞈ shiˍ ve kʼo, yawˇ htaꞈ leuˉ leh meuˆ daꞈ ve yoˬ.—Chiˇ mvuh ve 73:28.

9. Liꞈ hpu hkʼaw awˬ lawn lonˉ ma htaꞈ ngaˬ hui gʼa henˇ peuˬ hkʼawꞈ nawˉ, aˬ htoꞈ ma gʼa te cawˇ sheˍ ve le?

 ⁹ Yaˬhoˉvaˬ htaꞈ caˉ daꞈ ve awˬ lawn ngaˬ hui tanˬ henˇ htaˇ, Liꞈ hpu hkʼaw awˬ lawn lonˉ ma hkʼa sha sha˗ehˬ ve htaꞈ gʼa henˇ ve yoˬ. Pawˇluꞈ awˬ viˉ awˬ nyi Heˍbrehˇ chaw htaꞈ liꞈ bvuhꞈ piˇ ve hkʼaw yawˇ tawˇ hkawˇ chi ve teˇ hpaˍ htaꞈ “awˬ lawn lonˉ ma” tehꞈ kʼoˆ ve yoˬ. Yaꞈ hkʼaˇ, yawˇ “awˬ lawn awˬ hkuiˉ puiˍ” a yeˇ maˇ uiˍ ve tehꞈ maˇ dawˇ. Chi lehˬ yaˇ ehˉ cuˉ gʼa dawˬ cawˇ ve hkʼe hpehꞈ ve tehꞈ yawˇ tehˆ taˍ ve yoˬ. (Heˍbrehˇ 5:12; 6:1) Pawˇluꞈ Hkriꞈ yaˇ teˇ gʼaˇ le le htaꞈ awˬ gʼaˇ piˇ ve, awˬ lawn lonˉ ma htaꞈ ceh shiˍ ve nyi hkʼaˇ taˇ suh. Yaꞈ hkʼaˇ, Liꞈ hpu hkʼaw awˬ tehˬ ve tcuhˉ kuiˬ naˉ ve htaꞈ kaꞈ shiˍ tcuh gaˇ ve yoˬ. Nawˬ Liꞈ hpu hkʼaw tcuhˉ kuiˬ naˉ ve htaꞈ henˇ gaˇ˗aw laˇ? Yaˬhoˉvaˬ leh yawˇ ve a loˍ htaꞈ caˉ daꞈ ve nawˬ leuˉ leh kʼawꞈ henˇ shiˍ gaˇ˗aw laˇ?

10. Aˬ htoꞈ ma te chaw teˇ hpaˍ lehˬ, Liꞈ hpu hkʼaw henˇ leh hpfuhˆ nyi ve haˍ jaˇ tehꞈ dawˇ ve le?

¹⁰ Yaꞈ hkʼaˇ, ngaˬ hui Liꞈ hpu henˇ leh hpfuhˆ nyi ve htaꞈ hkʼa dehꞈ maˇ dawˇ cawˇ. Hkʼe kʼo, nawˬ˗ehꞈ? Nawˬ liꞈ henˇ htaˇ, nawˬ liꞈ hkʼa dehꞈ gʼaw gʼa leh hpfuhˆ nyi ve cheuˬ˗aw laˇ? Nawˬ liꞈ henˇ gaˇ leh henˇ ve awˬ ceuˬ htaꞈ pyawˍ leh awˬ bon cawˬ ve tehꞈ dawˇ˗aw laˇ? Maˇ heˆ leh nawˬ liꞈ hkʼa dehꞈ gʼaw maˇ gʼa leh maˇ henˇ cheuˬ ve tehꞈ dawˇ˗aw laˇ? Nawˬ chi hkʼe dawˇ ve kʼo, nawˬ teˇ gʼaˇ ceh tiˉ maˇ heˆ. Taˇ dawˇ haˍ. Yaˬhoˉvaˬ nawˬ htaꞈ ga laˇ tuˬ yoˬ. Gʼuiˬ sha lehˬ cheuˬ leh daꞈ jaˇ ve Saˍlaꞈ lonˉ hpehꞈ ve yoˬ.

11. Yaˬhoˉvaˬ lehˬ daꞈ jaˇ ve Saˍ laꞈ lonˉ hkʼaˬ hkʼe hpehꞈ ve le?

¹¹ Yaˬhoˉvaˬ kʼoˆ ve, yawˇ lehˬ daꞈ jaˇ ve Saˍ laꞈ lonˉ hpehꞈ ve yoˬ. (Iˉsaˍyaˆ 30:20, 21) Yawˇ lehˬ yeunˇ hkanˍ ve, nyi ma daꞈ ve leh ngaˬ hui htaꞈ na gʼa laˇ ve Saˍ laꞈ lonˉ hpehꞈ ve yoˬ. Yawˇ maˍ piˇ ve chaw htaꞈ yawˇ daꞈ ve hpawˇ nyi leh ngaˬ hui te maˇ gʼa ve awˬ leuˉ te tuˬ yawˇ maˇ dawˇ law. (Chiˇ mvuh ve 130:3) Yaˬhoˉvaˬ lehˬ nawˬ ve uˉ nawꞈ nehˆ htaꞈ hpanˍ shehˍ hpaˇ hpehꞈ ve tehꞈ tawnˇ taˍ sheˍ. Chi lehˬ daꞈ jaˇ ve awˬ ceuˬ hpehꞈ ve yoˬ. (Chiˇ mvuh ve 139:14) Chaw yaˇ lehˬ henˇ shiˍ gaˇ puiˉ ve yoˬ. Ngaˬ hui htaꞈ hpanˍ shehˍ hpaˇ Gʼuiˬ sha kaꞈ ngaˬ hui htaꞈ hkʼaˬ htaˆ kaꞈ henˇ tcuh gaˇ leh ha lehˬ tcuh gaˇ ve yoˬ. Chi htaꞈ pa taw, chi teˇ hkui kaꞈ Liꞈ hpu hkʼaw “co ha hpawˇ daꞈ jaˇ ve” htaꞈ ngaˬ hui henˇ ve kʼo, daꞈ ve yoˬ. (1 Peˍtruˆ 2:2) Nawˬ Liꞈ hpu gʼaw leh hpfuhˆ nyi ve hkʼaˬ htaˆ kaꞈ te gʼa tuˬ dawˇ teh taˍ sheˍ. (Yawˇsuˆ 1:8) Yaˬhoˉvaˬ nawˬ htaꞈ awˬ bon naꞈ laˇ leh yawˇ ve awˬ lawn gʼaw ve leh henˇ shiˍ ve htaꞈ ha lehˬ tuˬ yoˬ.

12. Yeˍsuˆ ve a shaꞈ teꞈ hkʼaˇ leh yawˇ Gʼuiˬ sha ve kanˉ te ve htaꞈ caˉ daꞈ ve aˬ htoꞈ ma te hkʼa dehꞈ hpfuhˆ nyi cawˇ ve le?

¹² Yeˍsuˆ a shaꞈ teꞈ hkʼaˇ leh yawˇ Gʼuiˬ sha ve kanˉ te ve htaꞈ caˉ daꞈ ve, nawˬ awˬ yanˇ yehˇ leh dawˇ nyi sheˍ. Awˬ leh meuˇ ve awˬ yanˇ chi ve hkʼaw ngaˬ hui Yaˬhoˉvaˬ ve kanˉ hkʼa dehꞈ te gʼa tuˬ, Yeˍsuˆ htaꞈ hkʼa dehꞈ henˇ yuˬ sheˍ. (1 Peˍtruˆ 2:21) Awˬ laꞈ gʼawˇ hui tuꞈ ve hkanˍ ve laiˉ ceuˬ gʼa hpuˇ tuˬ yoˬ tehꞈ, Yeˍsuˆ yawˇ hui htaꞈ hteˇ˗ehˬ kʼoˆ piˇ ve yoˬ. (Luˉkaꞈ 14:27, 28) Yaꞈ hkʼaˇ, yawˇ hui Yeˍsuˆ hkʼa shuˍ Gʼuiˬ sha htaꞈ ka tiꞈ yeˬ gʼa tuˬ yoˬ tehꞈ yawˇ yonˍ ve yoˬ. (Yoˇhanˬ 16:33) Yeˍsuˆ ve a shaꞈ teꞈ hkʼaˇ htaꞈ caˉ daꞈ ve henˇ leh hkʼa dehꞈ hpfuhˆ nyi htaˇ, teˇ nyi le le yawˇ htaꞈ henˇ yuˬ tuˬ dawˇ teh taˍ gʼa ve yoˬ.

13. Nawˬ Yaˬhoˉvaˬ geh caˉ leh aˬ htoꞈ ma lawˬ cawˇ ve le? Leh aˬ htoꞈ ma te nawˬ chi hkʼe lawˬ cawˇ ve le?

¹³ Nawˬ henˇ taˍ ve awˬ ceuˬ awˬ bon cawˬ ve yoˬ. Awˬ lawn kʼo, chi ve lehˬ nawˬ leuˉ leh Yaˬhoˉvaˬ htaꞈ shiˍ daꞈ maˇ la tuˬ ga laˇ leh nawˬ daꞈ ve te hkʼaˇ dawˇ hkʼaˇ cawˬ tuˬ kaꞈ ga laˇ ve yoˬ. Tawˇ pa haˉ te kʼo, nawˬ henˇ taˍ ve awˬ ceuˬ lehˬ, Gʼuiˬ sha htaꞈ haꞈ tuˬ ga laˇ leh yawˇ htaꞈ yonˍ maˇ la tuˬ kaꞈ ga laˇ ve yoˬ. (1 Kawˇrenˍhtuˆ 8:1-3) Nawˬ Liꞈ hpu hkʼaw hpfuhˆ nyi htaˇ nawˬ yonˍ yeˬ ve cawˬ maˇ la tuˬ, Yaˬhoˉvaˬ ga laˇ tcuh sheˍ. (Luˉkaꞈ 17:5) Nawˬ lawˬ ve hkʼe Gʼuiˬ sha hkʼawꞈ laˇ tuˬ yoˬ. Gʼuiˬ sha htaꞈ caˉ daꞈ ve cawˇ ve cuˇ yiˍ lehˬ, nawˬ yonˍ yeˬ tuˬ ga laˇ leh chi nawˬ a shaꞈ teꞈ kuiˬ hkʼaw yuˬ yehˇ tuˬ kaꞈ ga laˇ ve yoˬ.—Yaˍkoˆ 2:26.

14. Peˍtruˆ lehˬ henˇ taˍ ve awˬ ceuˬ htaꞈ gʼaꞈ te ve a yeˇ uiˍ jaˇ ve tehꞈ hkʼaˬ hkʼe hpeuꞈ maw laˇ ve le? (Awˬ han htaꞈ nyi sheˍ.)

¹⁴ Tcuh yaˇ Peˍtruˆ kʼoˆ ve, Yeˍsuˆ ve awˬ laꞈ gʼawˇ lehˬ henˇ taˍ ve awˬ ceuˬ htaꞈ gʼaꞈ te ve a yeˇ uiˍ jaˇ  ve yoˬ. Yawˇ Noˉaꞈ ve awˬ lawn kʼoˆ maˍ laˇ ve yoˬ. Yaˬhoˉvaˬ Noˉaꞈ htaꞈ kʼoˆ piˇ ve, Noˉaꞈ ve awˬ co˗e htaˇ haiˬ ve chaw htaꞈ te luˬ tuˬ Gʼuiˬ sha lehˬ miˬ guiˬ hkʼoˆ lo iˉ kaˆ htonˍ tcuh ve yoˬ. Yaꞈ hkʼaˇ, Noˉaꞈ awˬ lawn chi htaꞈ shiˍ ve ceh maˇ lawꞈ. Yawˇ leh yehˬ kʼa hkʼaw ve chaw gʼa ponˬ tuˬ te ve yoˬ. Miˬ guiˬ hkʼoˆ lo iˉ kaˆ maˇ htonˍ sheˍ ve awˬ yanˇ htaˇ “haw loꞈ kʼoˍ lonˉ htaꞈ te” ve tehꞈ, Peˍtruˆ kʼoˆ ve htaꞈ chaˬ nyi sheˍ. (1 Peˍtruˆ 3:20) Noˉaꞈ leh yawˇ ve yehˬ kʼa haw loꞈ kʼoˍ lonˉ te tuˬ, Gʼuiˬ sha kʼoˆ piˇ ve hkʼe yawˇ hui laꞈ haˉ gʼaꞈ te ve htaꞈ ngaˬ hui gʼa mawˬ ve yoˬ. (Heˍbrehˇ 11:7) Peˍtruˆ kaꞈ Noˉaꞈ te ve awˬ ceuˬ leh Baˆtiˆsaˬ haꞈ yuˬ ve htaꞈ tehˆ daꞈ ve yoˬ. Yawˇ kʼoˆ ve, “chi hkʼa shuˍ shuˍ, chi beuꞈ Baˆtiˆsaˬ lehˬ, nawˬ hui htaꞈ ponˬ laˇ ve yoˬ.” (1 Peˍtruˆ 3:21) Nawˬ Baˆtiˆsaˬ haꞈ yuˬ tuˬ chi teˇ hkui te chehˇ ve awˬ ceuˬ leh, Noˉaꞈ leh yawˇ ve yehˬ kʼa haw loꞈ kʼoˍ lonˉ laiˉ hkʼawꞈ te ve chi ve htaꞈ tehˆ taˍ ve yoˬ. Hkʼe kʼo, nawˬ Baˆtiˆsaˬ haꞈ yuˬ gʼa tuˬ aˬ htoꞈ ma gʼa te cawˇ ve le?

15. Awˬ tehˬ awˬ na venˇ baˆ dawˇ hpfuhˆ ve aˬ htoꞈ ma htaꞈ kʼoˆ gaˇ ve le?

¹⁵ Ngaˬ hui te cawˇ ve awˉ lawˉ teˇ ceuˬ lehˬ, awˬ tehˬ awˬ na venˇ baˆ dawˇ hpfuhˆ ve yoˬ. (Tcuh yaˇ 2:37, 38) Nawˬ awˬ tehˬ awˬ na venˇ baˆ dawˇ hpfuhˆ ve kʼo, chi ve nawˬ ve te hkʼaˇ dawˇ hkʼaˇ htaꞈ pa tuˬ ga laˇ gʼa ve yoˬ. Tawˇ pa haˉ te kʼo, Yaˬhoˉvaˬ maˇ dawˇ cawˇ ve awˬ ceuˬ lehˬ, haˉ chawˇ haˉ paˆ te ve, shuˉ dawˬ ve, leh maˇ daꞈ ve tawˇ yaw ve, chi ve teˇ hpaˍ htaꞈ nawˬ maˇ te˗o ve laˇ? (1 Kawˇrenˍhtuˆ 6:9, 10; 2 Kawˇrenˍhtuˆ 7:1; Eˇfeˇsuꞈ 4:29) Nawˬ ve te hkʼaˇ dawˇ hkʼaˇ maˇ pa sheˍ ve kʼo, caˉ leh pa tuˬ coˇ caˇ sheˍ. Nawˬ htaꞈ Liꞈ hpu maˍ laˇ ve chaw geh yaw daꞈ ve, maˇ heˆ leh Hkriꞈ yaˇ awˬ moˍ hkʼaw nyi haꞈ shaˉ paˍ geh beˆ maˍ laˇ tuˬ lawˬ sheˍ. Nawˬ yaˇ nehˬ hpehꞈ leh awˬ pa awˬ e geh chehˇ sheˍ ve kʼo, nawˬ Baˆtiˆsaˬ maˇ haꞈ yuˬ tuˬ te laˇ ve, maˇ daꞈ ve te hkʼaˇ dawˇ hkʼaˇ htaꞈ awˬ pa awˬ e beˆ maˍ laˇ tuˬ lawˬ sheˍ.

16. Ngaˬ hui Hkriꞈ yaˇ ve awˬ vuiˬ htaꞈ hkʼaˬ htaˆ kaꞈ te gʼa tuˬ hkʼaˬ hkʼe gʼa te cawˇ ve le?

¹⁶ Chi hkʼoˆ kaꞈ, nawˬ Hkriꞈ yaˇ ve awˬ vuiˬ htaꞈ hkʼaˬ htaˆ kaꞈ te gʼa tuˬ a yeˇ uiˍ jaˇ ve yoˬ. Tawˇ pa haˉ te kʼo, nawˬ hpawnˬ daꞈ ve hkʼaˬ htaˆ kaꞈ kʼai leh awˬ gʼaˇ piˇ daꞈ sheˍ. (Heˍbrehˇ 10:24, 25) Nawˬ teˇ yehˬ peuˬ teˇ yehˬ hto toˇ tuˬ te gʼa˗oˬ htaˇ, hto toˇ ve hkʼaˬ htaˆ kaꞈ kʼai sheˍ. Kanˉ chi ve htaꞈ nawˬ leuˉ leh te ve kʼo, te gaˇ tuˬ yoˬ. (2 Tiˆmoˉseˍ 4:5) Yaꞈ hkʼaˇ, nawˬ yaˇ nehˬ hpehꞈ leh awˬ pa awˬ e geh chehˇ sheˍ ve kʼo, a shu yawˇ awˬ to htaꞈ na nyi cawˇ ve, “ngaˬ pa ngaˬ e lehˬ ngaˬ hpawnˬ daꞈ˗e tuˬ leh hto toˇ˗e tuˬ kʼoˆ laˇ cawˇ˗aw laˇ? Maˇ heˆ leh awˬ nu ve chaw maˇ kʼoˆ laˇ ve kaꞈ ngaˬ hkʼaˇ ngaˬ te ve laˇ?” Hkriꞈ yaˇ ve awˬ vuiˬ te tuˬ awˬ nu ve chaw maˇ kʼoˆ laˇ ve kaꞈ te ve  kʼo, nawˬ ve yonˍ hkʼaˇ yonˍ yeˬ ve tehꞈ hpeuꞈ maw piˇ leh, Gʼuiˬ sha nawˬ awˬ pon te laˇ ve htaꞈ nawˬ haꞈ leh awˬ hpfuhˇ shiˍ ve tehꞈ hpeuꞈ maw piˇ chehˇ ve yoˬ. Chi ve lehˬ “Gʼuiˬ sha htaꞈ yawˆ yan ve chaw hpehꞈ keunˍ hpehꞈ cawˇ ve” tehꞈ hpeuꞈ maw piˇ ve yoˬ. (2 Peˍtruˆ 3:11; Heˍbrehˇ 13:15) Chi hkʼe te ve lehˬ, nawˬ Yaˬhoˉvaˬ htaꞈ laꞈ shawnˍ piˇ ve hkʼe shuˍ ve yoˬ. Ngaˬ hui Yaˬhoˉvaˬ htaꞈ laꞈ shawnˍ piˇ ve lehˬ, nyiˉ laˇ ve htaꞈ pa taw maˇ heˆ. Piˇ gaˇ ve htaꞈ pa taw piˇ ve yoˬ. Chi hkʼe te ve kʼo, yawˇ ha lehˬ jaˇ tuˬ yoˬ. (2 Kawˇrenˍhtuˆ 9:7 htaꞈ tehˆ daꞈ sheˍ.) Ngaˬ hui te ve awˬ ceuˬ Yaˬhoˉvaˬ htaꞈ te piˇ ve kʼo, ngaˬ hui kaꞈ ha lehˬ tuˬ yoˬ.

17-18. Nawˬ co ha hpawˇ uiˍ la mvuh la leh Baˆtiˆsaˬ haꞈ yuˬ gʼa tuˬ, te hkʼaˇ dawˇ hkʼaˇ hkʼaˬ hkʼe ve nawˬ htaꞈ ga laˇ ve le? (Tawˇ naˉ ve 3:3-6)

¹⁷ Nawˬ Baˆtiˆsaˬ haꞈ yuˬ gaˇ tuˬ co ha hpawˇ gʼaˇ hteꞈ uiˍ la mvuh la ve kʼo, nawˬ shoꞈ shaꞈ ve laiˉ ceuˬ gʼa hpuˇ tuˬ yoˬ hehˉ. Tawˇ pa haˉ te kʼo, nawˬ Shaˉhkiˆhkanˍ ve chaw hpehꞈ la tuˬ chaw teˇ hpaˍ kʼoˆ guiˇ gʼuiˬ guiˇ laˇ ve, nawˬ htaꞈ tawˍ laˇ ve, maˇ heˆ leh fawˉ mehˍ laˇ ve yoˬ. (2 Tiˆmoˉseˍ 3:12) Leh maˇ daꞈ ve te hkʼaˇ dawˇ hkʼaˇ htaꞈ nawˬ tawˍ daꞈ chehˇ ve awˬ yanˇ htaˇ, teˇ pawˆ pawˆ kʼawꞈ te la tuˬ yoˬ hehˉ. Maˇ heˆ leh nawˬ maˇ yeunˇ hkanˍ gaˇ˗o tehꞈ dawˇ ve, nawˬ dawˇ law taˍ ve vuiˇ jaˇ sheˍ ve tehꞈ dawˇ leh nyi ma maˇ sha ve yoˬ hehˉ. Nawˬ yeunˇ hkanˍ gʼaˇ tuˬ aˬ htoꞈ ma ga laˇ gʼa tuˬ le? Nawˬ htaꞈ ga laˇ gʼa jaˇ ve lehˬ nawˬ Yaˬhoˉvaˬ htaꞈ haꞈ ve yoˬ.

¹⁸ Nawˬ Yaˬhoˉvaˬ htaꞈ haꞈ ve lehˬ daꞈ jaˇ ve yoˬ. Chi ve lehˬ nawˬ Yaˬhoˉvaˬ htaꞈ piˇ gʼa ve daꞈ jaˇ ve awˬ ceuˬ hpehꞈ ve yoˬ. (Tawˇ naˉ ve 3:3-6 gʼaw sheˍ.) Nawˬ Yaˬhoˉvaˬ htaꞈ awˬ tehˬ awˬ na haꞈ ve kʼo, nawˬ shoꞈ shaꞈ ve aˬ htoꞈ ma gʼa hpuˇ ve htawˇ, yeunˇ hkanˍ gʼaˇ tuˬ yoˬ. Liꞈ hpu hkʼaw laiˉ tawn kʼoˆ ve, Yaˬhoˉvaˬ lehˬ yawˇ ve kanˉ te ve chaw htaꞈ haꞈ ve yoˬ. Chi kʼoˆ gaˇ ve lehˬ Yaˬhoˉvaˬ yawˇ hui htaꞈ hkʼaˬ htaˆ kaꞈ haꞈ tuˬ yoˬ. (Chiˇ mvuh ve 100:5) Nawˬ htaꞈ Gʼuiˬ sha hkʼa shuˍ hpanˍ taˍ ve yoˬ. (Awˬ hkuiˉ puiˍ 1:26) Hkʼe kʼo, nawˬ haꞈ pehnˇ ve hkʼaˬ htaˆ kaꞈ hkʼaˬ hkʼe te cawˬ gʼa tuˬ le?

19. Yaˬhoˉvaˬ nawˬ awˬ pon te laˇ ve teˇ ceuˬ le le htaꞈ awˬ bon uiˍ jaˇ kʼoˆ piˇ tuˬ, nawˬ hkʼaˬ hkʼe gʼa te cawˇ ve le? (Gaˍlaˍtiˆ 2:20)

¹⁹ Nawˬ Yaˬhoˉvaˬ htaꞈ haꞈ ve maˇ la tuˬ, awˬ bon uiˍ jaˇ tehꞈ kʼoˆ piˇ tuˬ gʼa te jawˬ ve yoˬ. (1 Hteˇsaˍlawˇniˆ 5:18) Nawˬ a shu yawˇ awˬ to htaꞈ teˇ nyi le le na nyi cawˇ ve, “yaꞈ nyi Yaˬhoˉvaˬ ngaˬ htaꞈ haꞈ ve hkʼaˬ hkʼe hpeuꞈ maw laˇ ve le?” Yaˬhoˉvaˬ nawˬ htaꞈ haꞈ ve nawˬ tawnˇ gʼa ve kʼo, awˬ bon uiˍ jaˇ tehꞈ kʼoˆ piˇ tuˬ bon lawˬ sheˍ. Chi ve lehˬ Yaˬhoˉvaˬ nawˬ awˬ pon te laˇ leh nawˬ htaꞈ haꞈ ve tehꞈ hpeuꞈ maw laˇ ve htaꞈ dawˇ nyi sheˍ. Pawˇluꞈ kaꞈ chi hkʼa shuˍ dawˇ ve yoˬ. (Gaˍlaˍtiˆ 2:20 gʼaw sheˍ.) Leh nawˬ a shu yawˇ awˬ to htaꞈ na nyi cawˇ ve, ‘Yaˬhoˉvaˬ ngaˬ htaꞈ chi taw taw haꞈ laˇ ve htaꞈ gʼa mawˬ ve pa taw, ngaˬ yawˇ htaꞈ  haꞈ ve tehꞈ hpeuꞈ maw piˇ gaˇ˗aw laˇ?’ Nawˬ Yaˬhoˉvaˬ htaꞈ haꞈ ve lehˬ, beˬ ve lawˇ ve htaꞈ tawˍ daꞈ gʼaˇ tuˬ, leh shoꞈ shaꞈ ve htaꞈ yeunˇ hkanˍ gʼaˇ tuˬ ga laˇ ve yoˬ. Chi ve lehˬ nawˬ Hkriꞈ yaˇ ve awˬ vuiˬ htaꞈ hkʼaˬ htaˆ kaꞈ te gʼa tuˬ ga laˇ leh, nawˬ Yaˬhoˉvaˬ htaꞈ teˇ nyi le le haꞈ ve tehꞈ hpeuꞈ maw piˇ gʼa ve yoˬ.

20. Yaˬhoˉvaˬ htaꞈ awˬ to chiˇ aꞈ piˇ ve hkʼaˬ hkʼe kʼoˆ gaˇ ve le? Leh chi a yeˇ hkʼaˬ hkʼe taw uiˍ ve le?

²⁰ Nawˬ Yaˬhoˉvaˬ htaꞈ haꞈ ve lehˬ, nawˬ yawˇ htaꞈ awˬ to chiˇ aꞈ piˇ tuˬ bon lawˬ gaˇ tuˬ te laˇ ve yoˬ. Chi ve lehˬ nawˬ awˬ pon bon lawˬ ve a yeˇ uiˍ jaˇ ve awˬ ceuˬ hpehꞈ ve yoˬ. Nawˬ Yaˬhoˉvaˬ htaꞈ awˬ to chiˇ aꞈ piˇ˗oˬ htaˇ, daꞈ jaˇ ve dawˇ law kuiˬ cawˬ ve tehꞈ tawnˇ taˍ sheˍ. Chi ve lehˬ nawˬ yawˇ ve chaw hkʼaˬ htaˆ kaꞈ hpehꞈ tuˬ yoˬ. Nawˬ Yaˬhoˉvaˬ htaꞈ awˬ to chiˇ aꞈ piˇ˗oˬ ve kʼo, nawˬ a shaꞈ teꞈ kuiˬ hkʼaw daꞈ ve awˬ lawn leh maˇ daꞈ ve awˬ lawn gʼa hpuˇ ve htawˇ, nawˬ yawˇ ve kanˉ hkʼaˬ htaˆ kaꞈ te tuˬ yoˬ tehꞈ yawˇ geh ka tiꞈ te taˍ ve yoˬ. Awˬ to chiˇ aꞈ ve bon lawˬ ve lehˬ teˇ pawˆ ceh tiˉ te ve yoˬ. Yaˬhoˉvaˬ htaꞈ awˬ to chiˇ aꞈ piˇ ve lehˬ dawˇ cheˆ ve a yeˇ uiˍ jaˇ ve awˬ ceuˬ hpehꞈ ve yoˬ. Nawˬ a shaꞈ teꞈ ve teˇ co˗e a yeˇ uiˍ ve laiˉ lawn htaꞈ dawˇ cheˆ jaw˗oˬ ve tehꞈ dawˇ nyi sheˍ. Teˇ lawn lawn kʼo, nawˬ dawˇ cheˆ ve cawˇ ve yoˬ. Yaꞈ hkʼaˇ, Yaˬhoˉvaˬ htaꞈ awˬ to chiˇ aꞈ piˇ ve dawˇ cheˆ ve hkʼe taw teˇ ceuˬ˗ehˬ kaꞈ daꞈ ve maˇ cawˬ tehꞈ gʼa shiˍ ve yoˬ. (Chiˇ mvuh ve 50:14) Saˍtanˍ lehˬ ngaˬ hui Yaˬhoˉvaˬ htaꞈ ka tiꞈ maˇ yeˬ tcuh gaˇ leh, Yaˬhoˉvaˬ htaꞈ kaꞈ hkʼa dehꞈ maˇ haꞈ tcuh gaˇ ve yoˬ. Yaꞈ hkʼaˇ, Saˍtanˍ htaꞈ taˇ gʼaˇ tcuh. (Yawˇbaˆ 27:5) Nawˬ Yaˬhoˉvaˬ htaꞈ haꞈ ve lehˬ nawˬ yawˇ htaꞈ awˬ to chiˇ aꞈ piˇ taˍ ve htaꞈ keunˍ jaˇ leh nawˬ yawˇ geh hkʼaˬ htaˆ kaꞈ meuˆ daꞈ tuˬ ga laˇ ve yoˬ.

21. Baˆtiˆsaˬ haꞈ yuˬ ve lehˬ Gʼuiˬ sha ve kanˉ te tuˬ yoˬ tehꞈ awˬ hkuiˉ puiˍ tanˬ ve hkʼaˬ hkʼe te kʼoˆ gʼa ve le?

²¹ Nawˬ Yaˬhoˉvaˬ htaꞈ awˬ to chiˇ aꞈ piˇ peuˬ hkʼawꞈ nawˉ, Hkriꞈ yaˇ awˬ moˍ hkʼaw nyi haꞈ shaˉ paˍ geh tawˇ ca yaw daꞈ˗e leh nawˬ Baˆtiˆsaˬ haꞈ yuˬ gaˇ ve tehꞈ yawˇ hui htaꞈ kʼoˆ piˇ sheˍ. Yaꞈ hkʼaˇ, Baˆtiˆsaˬ haꞈ yuˬ ve lehˬ Yaˬhoˉvaˬ ve kanˉ tanˬ te ve tehꞈ tawnˇ taˍ sheˍ. Chi htaꞈ pa taw, chi teˇ hkui kaꞈ nawˬ Yaˬhoˉvaˬ htaꞈ gʼa haꞈ cawˇ ve yoˬ. Leh nawˬ Yaˬhoˉvaˬ htaꞈ hkʼaˬ htaˆ kaꞈ haꞈ tuˬ yoˬ tehꞈ dawˇ teh taˍ sheˍ. Chi hkʼe te ve lehˬ nawˬ Baˆtiˆsaˬ haꞈ yuˬ tuˬ gu hehnˇ˗oˬ ve yoˬ. Leh Baˆtiˆsaˬ haꞈ yuˬ ve awˬ nyi htaˇ, nawˬ awˬ pon daꞈ jaˇ ve awˬ nyi hpehꞈ ve yoˬ. Yaꞈ hkʼaˇ, oˇ ve teˇ nyi lehˬ nawˬ Gʼuiˬ sha ve kanˉ te tuˬ tanˬ ve tehꞈ tawnˇ taˍ sheˍ. Nawˬ Yaˬhoˉvaˬ leh Yeˍsuˆ htaꞈ haꞈ ve gʼaˇ hteꞈ maˇ la tuˬ te sheˍ.