Liꞈ hpu hkʼaw “oˇ ve hpaˇ” lehˬ yawˇ Ruˉhtaˆ htaꞈ heuˆ ve htawˇ, ti mi oˇ ve yawˇ ve yaˇ gʼa tuˬ maˇ heˆ tehꞈ aˬ htoꞈ ma te chi hkʼe kʼoˆ ve le? (Ruˉhtaˆ 4:1, 6)

Liꞈ hpu ve awˬ co˗e htaˇ hawˉ hkʼaˆ teˇ gʼaˇ awˬ miˇ ma heuˆ leh yaˇ maˇ cawˬ sheˍ htaˇ yawˇ suh˗e ve kʼo, yawˇ ve miˬ guiˬ a shu ve mawˇ hpehꞈ tuˬ ve le? Yawˇ ve awˬ meh awˬ ceuˬ awˬ hkʼaˇ hkʼaw maˇ kʼawꞈ cawˬ˗o ve laˇ? Moˉseˍ ve awˬ liˇ tawˇ hkawˇ chi ve htaꞈ hkʼawꞈ laˇ ve yoˬ.

Suh˗oˬ ve hawˉ hkʼaˆ maˇ heˆ leh yawˇ haˍ gʼaw leh miˬ guiˬ gʼa hawˇ ve kʼo, hkʼaˬ hkʼe kʼai tuˬ ve le? Chi ve lehˬ yawˇ ve awˬ viˉ awˬ nyi maˇ heˆ leh awˬ ceuˬ awˬ hkʼaˇ ti mi oˇ ve htaꞈ vuiˬ hkʼawꞈ gʼa ve yoˬ. Hkʼe te leh, miˬ guiˬ oˇ ve lehˬ yawˇ ve awˬ ceuˬ awˬ hkʼaˇ ve awˬ shinˉ awˬ ka hpehꞈ sheˍ ve yoˬ.—Oˉ kʼoˍ pui ve 25:23-28; Heh puiˉ hkʼaw 27:8-11.

Suh˗oˬ ve chaw ve awˬ ceuˬ awˬ hkʼaˇ hkʼaw awˬ meh maˇ gʼa mehˉ kʼai tuˬ hkʼaˬ hkʼe gʼa te cawˇ ve le? Suh˗oˬ ve chaw ve awˬ viˉ paˍ maˇ heˆ leh awˬ nyi paˍ yawˇ ve awˬ miˇ ma htaꞈ gʼa kʼawꞈ heuˆ cawˇ ve yoˬ. Chi hkʼe ve Ruˉhtaˆ gʼa hpuˇ ve yoˬ. Heuˆ daꞈ ve chaw geh yaˇ paˍ paw la ve awˉ lawˉ teˇ gʼaˇ lehˬ, suh˗oˬ ve hpaˇ ve yaˇ tehꞈ kʼawꞈ shawˍ leh yawˇ ve awˬ shinˉ awˬ ka gʼa tuˬ yoˬ. Gu teh taˍ laˇ ve chi hkʼe ve lehˬ suh˗oˬ ve hpaˇ ve awˬ miˇ ma htaꞈ haꞈ leh awˬ bon cawˬ ve tehꞈ hpeuꞈ maw piˇ ve yoˬ.—Bon maˍ ve 25:5-7; Maꞈhtehˍ 22:23-28.

Nawˉmiꞈ ve awˬ lawn htaꞈ teˇ geh nyi sheˍ. Yawˇ Eˇliˆmaˍlehˆ htaꞈ heuˆ ve yoˬ. Eˇliˆmaˍlehˆ leh yawˇ ve yaˇ paˍ 2 gʼaˇ suh peuˬ hkʼawꞈ nawˉ, Nawˉmiꞈ htaꞈ nyi haꞈ shaˉ tuˬ yehˬ kʼa hkʼaw hawˉ hkʼaˆ maˇ cawˬ˗o. (Ruˉhtaˆ 1:1-5) Nawˉmiꞈ Yuˇdaꞈ mvuhˇ miˬ lo kʼawꞈ˗e htaˇ, yawˇ ve awˬ hkuiˇ ma Ruˉhtaˆ htaꞈ cuˇ leh Bawˇzaˆ yawˇ ve miˬ guiˬ vuiˬ hkʼawꞈ laˇ tuˬ ca kʼoˆ piˇ tcuh ve yoˬ. Bawˇzaˆ lehˬ Eˇliˆmaˍlehˆ ve awˬ ceuˬ awˬ hkʼaˇ hpehꞈ ve yoˬ. (Ruˉhtaˆ 2:1, 19, 20; 3:1-4) Yaꞈ hkʼaˇ, Bawˇzaˆ aꞈ kehˉ Eˇliˆmaˍlehˆ htaꞈ meuˆ daꞈ ve awˬ ceuˬ awˬ hkʼaˇ teˇ gʼaˇ kʼawꞈ cawˬ sheˍ ve tehꞈ Bawˇzaˆ shiˍ ve yoˬ. Chi lehˬ Liꞈ hpu hkʼaw “oˇ ve hpaˇ” tehꞈ kʼoˆ ve teˇ gʼaˇ hpehꞈ ve yoˬ. Ti mi oˇ ve vuiˬ hkʼawꞈ tuˬ hawˉ hkʼaˆ oˇ ve hpaˇ lehˬ a hkaw˗anˬ cawˬ ve yoˬ.—Ruˉhtaˆ 3:9, 12, 13.

Ti mi oˇ ve htaꞈ vuiˬ hkʼawꞈ tuˬ hpu gʼa yehˇ maˇ jaˇ ve tehꞈ yawˇ shiˍ ve htawˇ, awˉ lawˉ htaˇ lehˬ “oˇ ve hpaˇ” ga piˇ gaˇ ve yoˬ. (Ruˉhtaˆ 4:1-4) Aˬ htoꞈ ma pa taw le? Eˇliˆmaˍlehˆ ve miˬ guiˬ htaꞈ vuiˬ hkʼawꞈ tuˬ Nawˉmiꞈ lehˬ mawˇ jaˇ˗oˬ leh yaˇ maˇ cawˬ gʼa˗o ve tehꞈ yawˇ shiˍ ve yoˬ. Hkʼe te leh, miˬ guiˬ chi ve yawˇ ve mawˇ hpehꞈ tuˬ tehꞈ dawˇ ve yoˬ. Nawˉmiꞈ htaꞈ chi teˇ pawˆ ga piˇ ve lehˬ oˇ ve hpaˇ yawˇ awˬ pon awˬ bon cawˬ tuˬ tehꞈ dawˇ ve yoˬ.

Yaꞈ hkʼaˇ, yawˇ Ruˉhtaˆ htaꞈ gʼa heuˆ cawˇ ve tehꞈ shiˍ la htaˇ, yawˇ ve dawˇ hkʼaˇ kʼawꞈ pa ve yoˬ. Yawˇ kʼoˆ ve, “oˇ hkʼe yoˬ kʼo, ti mi oˇ ve htaꞈ ngaˬ maˇ vuiˬ˗o. Ti mi oˇ ve htaꞈ vuiˬ taˍ kaꞈ, ngaˬ ve yaˇ teˇ hpaˍ gʼa tuˬ ve maˇ heˆ taˬ.” (Ruˉhtaˆ 4:5, 6) Aˬ htoꞈ ma te chaw oˇ ve hpaˇ lehˬ dawˇ hkʼaˇ kʼawꞈ pa ve le?

Chaw oˇ ve hpaˇ maˇ heˆ leh awˬ nu ve hawˉ hkʼaˆ Ruˉhtaˆ htaꞈ heuˆ leh yaˇ hawˉ hkʼaˆ cawˬ ve kʼo, yaˇ paˍ oˇ ve lehˬ Eˇliˆmaˍlehˆ ve ti mi awˬ shinˉ awˬ ka htaꞈ gʼa tuˬ yoˬ. Hkʼe kʼo, “ti mi oˇ ve” htaꞈ hkʼaˬ hkʼe te yawˇ maˇ gʼa ve le? Liꞈ hpu hkʼaw maˇ gʼa kʼoˆ laˇ taˬ. Awˬ hkʼaˇ laiˉ hkʼaˇ cawˬ ve yoˬ hehˉ.

• Awˉ lawˉ teˇ hkʼaˇ lehˬ, ti mi oˇ ve yawˇ vuiˬ ve htawˇ yawˇ ve mawˇ maˇ hpehꞈ tuˬ ve pa taw yawˇ maˇ vuiˬ. Ti mi oˇ ve lehˬ Ruˉhtaˆ ve yaˇ paˍ ve mawˇ hpehꞈ tuˬ yoˬ.

• 2 hkʼaˇ teˇ hkʼaˇ lehˬ, yawˇ Nawˉmiꞈ leh Ruˉhtaˆ htaꞈ kaꞈ gʼa nyi haꞈ shaˉ tuˬ ve pa taw yoˬ.

• 3 hkʼaˇ teˇ hkʼaˇ lehˬ, Ruˉhtaˆ leh chaw oˇ ve hpaˇ heuˆ daꞈ leh yaˇ laiˉ gʼaˇ cawˬ ve kʼo, oˇ ve hpaˇ ve awˬ miˇ ma teˇ hpaˍ ve yaˇ geh Ruˉhtaˆ ve yaˇ kaꞈ awˬ shinˉ awˬ ka hkʼa shuˍ gʼa cawˇ ve yoˬ.

• 4 hkʼaˇ teˇ hkʼaˇ lehˬ, hawˉ hkʼaˆ oˇ ve teˇ gʼaˇ lehˬ awˬ nu ve awˬ miˇ ma geh yaˇ maˇ cawˬ ve kʼo, Ruˉhtaˆ ve yaˇ paˍ lehˬ Eˇliˆmaˍlehˆ leh hawˉ hkʼaˆ oˇ ve teˇ gʼaˇ geh awˬ shinˉ awˬ ka hkʼa peu˗eˬ gʼa tuˬ yoˬ. Yaꞈ hkʼaˇ, chaw oˇ ve hpaˇ suh˗e ve kʼo, yawˇ ve awˬ shinˉ awˬ ka lehˬ Eˇliˆmaˍlehˆ ve awˬ ceuˬ awˬ hkʼaˇ ve awˬ shinˉ awˬ ka hpehꞈ tuˬ yoˬ. Yawˇ ve maˇ hpehꞈ˗o. Chaw oˇ ve hpaˇ lehˬ Nawˉmiꞈ htaꞈ ga piˇ tuˬ yawˇ awˬ shinˉ awˬ ka shoˇ˗e la ve htaꞈ kawˆ ve pa taw, yawˇ ve awˬ ceuˬ awˬ hkʼaˇ Bawˇzaˆ htaꞈ kʼawꞈ chiˇ aꞈ piˇ ve yoˬ. Bawˇzaˆ lehˬ ti mi oˇ ve htaꞈ yawˇ vuiˬ tuˬ haꞈ yuˬ ve yoˬ. Suh˗oˬ ve hpaˇ ve “awˬ ceuˬ awˬ hkʼaˇ teˇ hpaˍ kʼawꞈ cawˬ la tuˬ” yawˇ chi hkʼe te ve yoˬ.—Ruˉhtaˆ 4:10.

Nyi˗a kʼo chaw oˇ ve hpaˇ lehˬ, yawˇ ve awˬ meh leh awˬ shinˉ awˬ ka htaꞈ haꞈ shaˉ tuˬ ceh a yeˇ yuˬ ve yoˬ. Chi hkʼe te ve lehˬ, yawˇ awˬ pon ceh tiˉ dawˇ nyi ve yoˬ. Yaꞈ hkʼaˇ, hawˉ hkʼaˆ oˇ ve hpaˇ ve awˬ meh htaꞈ chi beuꞈ teˇ co˗e chaw teˇ gʼaˇ kaꞈ maˇ shiˍ ve yoˬ. Awˬ hkʼoˆ kaꞈ, Bawˇzaˆ daꞈ jaˇ ve awˬ vuiˬ gʼa ve hkʼe yawˇ maˇ gʼa. Chi ve lehˬ Yeˍsuˆ Hkriꞈ maˇ heˆ leh Meˍsiˉyaꞈ ve awˬ puˍ lonˉ maˇ gʼa hpehꞈ. Chaw oˇ ve hpaˇ lehˬ yawˇ awˬ pon tiˉ dawˇ nyi leh shu loˍ ve htaꞈ maˇ ga piˇ ve pa taw, yawˇ ve a shaꞈ teꞈ kuiˬ hkʼaw ha lehˬ ve maˇ cawˬ ve tehꞈ ngaˬ hui gʼa mawˬ ve yoˬ!—Maꞈhtehˍ 1:5; Luˉkaꞈ 3:23, 32.